Sentyabrın 4-də Naxçıvan şəhərində təhsil yarmarkası keçirilib. Naxçıvan şəhər 7 nömrəli tam orta məktəbdə keçirilən tədbiri Naxçıvan Muxtar Respublikasının təhsil naziri Piri Nağıyev açıb.
Qeyd olunub ki, ölkə başçısının 5 sentyabr 2009-cu il tarixli “Təhsil haqqında Azərbaycan Respublikası Qanunun tətbiq edilməsi barədə” Fərmanının icrasını təmin etmək və gənc kadrların iş şəraitini yaxşılaşdırmaq məqsədilə Azərbaycan Respublikası Nazirlər Kabinetinin 15 avqust 2014-cü il tarixli Qərarı ilə “Pedaqoji profilli ixtisaslar üzrə ali və orta ixtisas təhsili müəssisələrini bitirmiş və ümumtəhsil müəssisələrində işə başlamış mütəxəssislər üçün əlavə güzəştlər və stimullaşdırıcı tədbirlərin müəyyən edilməsi haqqında” Azərbaycan Respublikası Nazirlər Kabinetinin 2010-cu il 14 aprel tarixli Qərarında dəyişiklik edilib. Yeni qərara əsasən, pedaqoji profilli ali və orta ixtisas təhsili müəssisələrini bitirmiş, dövlət sifarişi ilə iş yerlərində əmək fəaliyyətinə başlayan və 3 il müddətində bu fəaliyyəti ümumi təhsil müəssisələrində davam etdirən 35 yaşadək gənc mütəxəssislərə bu müddət ərzində kommunal xidmətlərini ödəmək üçün 60 manat, rayon mərkəzindən 20 kilometrdən artıq məsafədə yerləşən ümumi təhsil müəssisələrində əmək fəaliyyətinə başlayan hər bir nəfər üçün 3 il müddətində əməkhaqqına hər ay 160 manat məbləğində əlavələr ödəniləcəkdir. Üçillik müddət bitdikdən sonra həmin və ya digər kənd məktəbində pedaqoji fəaliyyətini davam etdirən gənc mütəxəssislərə daha 2 il müddətində kompensasiya əməkhaqqına əlavə olunacaqdır.

Dünən Naxçıvan Muxtar Respublikası Nəqliyyat Nazirliyində yük və sərnişindaşıma xidməti ilə məşğul olan hüquqi və fiziki şəxslərin iştirakı ilə seminar-müşavirə keçirilib. Tədbirdə Naxçıvan Muxtar Respublikası Nəqliyyat Nazirliyinin Nəqliyyatda əlaqələndirmə və lisenziyalaşdırma şöbəsinin müdiri Ramin Qəhrəmanov çıxış edib.
Bildirilib ki, muxtar respublikamızda digər sahələrlə yanaşı, avtomobil nəqliyyatı sahəsində də əsaslı islahatlar aparılıb və müsbət nəticələr əldə edilib. Muxtar respublika rəhbərinin bu sahəyə diqqət və qayğısının nəticəsidir ki, ən ucqar dağ kəndlərinə belə, rahat asfalt yollar salınır, rayon mərkəzlərində yeni avtovağzallar tikilib istifadəyə verilir. Yol-nəqliyyat infra­strukturunun yenilənməsi, bu sahədə həyata keçirilən müxtəlif tədbirlər avtomobil nəqliyyatı ilə sərnişin və yük daşınmalarının müasir tələblərə uyğun yerinə yetirilməsi zərurətini yaradır. Qeyd olunub ki, muxtar respublika ərazisində sərnişin və yük daşınmasına görə razılıq (lisenziya) qanunvericilikdə nəzərdə tutulmuş qaydada Naxçıvan Muxtar Respublikası Nəqliyyat Nazirliyi tərəfindən 5 il müddətinə verilir.

Şərur Rayon Mədəniyyət və Turizm Şöbəsinin nəzdində yaradılmış “Arpaçay” instrumental, Şərur Xalq Yallı, “Şərur qönçələri” Uşaq Yallı ansamblları rayonun mədəni həyatında fəal iştirak edir, şərurluların asudə vaxtlarının səmərəli təşkilinə səy göstərirlər. Adıçəkilən kollektivlər tez-tez rayon ərazisində yerləşən hərbi hissələrdə də olur, hərbçilər qarşısında maraqlı konsert proqramları ilə çıxış edirlər.
Rayon Mədəniyyət və Turizm Şöbəsindən aldığımız məlumata görə, bu günlərdə adıçəkilən kollektivlər “N” hərbi hissəsində olub. Ansamblların repertuarında dövlətçiliyimizə, müstəqilliyimizə, vətənpərvərliyə həsr olunmuş mahnılar səsləndirilib, ansamblların ifasında əsgərlərimizdə döyüş ruhunu yüksəldən rəqslər və yallılar təqdim edilib. Konsert pro­qramı əsgər və zabitlər tərəfindən alqışlarla qarşılanıb.
Hərbi hissə rəhbərliyi bu tədbirin xalq-ordu birliyinin bariz ifadəsi olduğunu diqqətə çatdırıb, əsgərlərin asudə vaxtlarının səmərəli təşkilinə töhfə verdikləri üçün musiqi kollektivlərinə şəxsi heyət adından minnətdarlığını bildirib.

Xəbərlər şöbəsi

Muxtar respublikamızda gələcəyimiz olan uşaqlar, o cümlədən sağlamlıq imkanları məhdud, valideynlərini itirmiş və ya valideyn himayəsindən məhrum olmuş uşaqlar daim dövlətimizin diqqət və qayğısı əhatəsindədirlər. Onların sağlam böyümələri, biliklərə yiyələnmələri, intellektual inkişafı, xüsusi istedada malik olanların aşkara çıxarılması, milli-mənəvi dəyərlərə sadiq vətənpərvər şəxsiyyət kimi formalaşması istiqamətində davamlı tədbirlər həyata keçirilir.
Qeyd olunan tədbirlərin davamı olaraq, 15 sentyabr – Bilik Günü münasibətilə Naxçıvan şəhərində və muxtar respublikanın bütün rayonlarında Naxçıvan Muxtar Respublikası Əmək və Əhalinin Sosial Müdafiəsi, Təhsil nazirliklərinin və Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə sağlamlıq imkanları məhdud, valideynlərini itirmiş və ya valideyn himayəsindən məhrum olmuş, habelə aztəminatlı ailələrin uşaqları ilə görüş keçirilmişdir.

Tikinti-quruculuq işlərinin aparılması ölkəmiz üçün nə qədər vacibdirsə, Azərbaycanın ən qiymətli sərvəti olan insanların sağlamlığının qorunması ondan da vacibdir. Ona görə də insanların təhlükəsizliyi daim dövlətimizin diqqət mərkəzindədir.
Naxçıvan Muxtar Respublikası Ali Məclisində bu ilin fevral ayında tikintidə işlərin keyfiyyətlə aparılması və təhlükəsizlik tədbirlərinə həsr olunmuş müşavirə keçirilmişdir. Adıçəkilən müşavirədə Naxçıvan Muxtar Respublikası Ali Məclisinin Sədri demişdir: “Ötən müddət ərzində bu sahədə bir çox işlərin görülməsinə baxmayaraq, hələ də bəzi çatışmazlıqlar mövcuddur. Aparılan yoxlamalar zamanı son illər istifadəyə verilmiş yeni tikililərin çoxunda nöqsan və çatışmazlıqlar aşkara çıxarılmışdır. Bu, onu göstərir ki, tikinti aparan təşkilatlar tərəfindən tələskənliyə yol verilir və tikinti zamanı təsdiq edilmiş standartlara əməl olunmur. Keyfiyyətə xüsusi diqqət yetirilməməsi, yaxud tikilənlərin lazımi qaydada qorunmaması səbəbindən istifadəyə verildikdən sonra onların bir çoxunda təmirə ehtiyac yaranır”.

Muxtar respublikada sığorta fəaliyyətinin genişləndirilməsi və vətəndaşların sığorta xidmətləri ilə tam təmin olunması istiqamətində səmərəli işlər davam etdirilməkdədir. Belə ki, Naxçıvan Muxtar Respublikası Dövlət Baş Sığorta Agentliyindən aldığımız məlumata görə, ötən ilin ilk səkkiz ayı ilə müqayisədə cari ilin müvafiq dövründə sığorta tədiyyələrinin toplanması və müqavilələrin bağlanması istiqamətində 10,2 faiz artım müşahidə olunmuşdur.
Nəqliyyat, daşınmaz əmlak, əmlak sığortası, insanların həyatına və sağlamlığına dəymiş zərərlər üzrə və digər sığorta növləri üzrə ödənilən sığorta məbləğləri isə 22,2 faiz artmışdır. Başqa sözlə, sığorta fəaliyyətinin genişlənməsi ilə vətəndaşların sığortanın faydalarından bəhrələnməsi imkanları da artmaqdadır.

Xəbərlər şöbəsi

Sentyabr ayının 2-də Culfa Rayon Prokurorluğunun təşkilatçılığı ilə rayonun Əlincə kəndində təbii qazdan, sudan, elektrik və ya istilik enerjisindən düzgün istifadə qaydalarına, həmçinin “Uşaqları qorumaq hər bir valideynin borcudur” mövzusuna həsr olunmuş tədbir keçirilmişdir.
Tədbirdə Culfa rayon prokuroru, baş ədliyyə müşaviri Əli Adı­gözəlov “Təbii qazın, suyun, elektrik və ya istilik enerjisinin talanmasına görə məsuliyyət” mövzusunda məruzə ilə çıxış etmişdir. Bildirilmişdir ki, hər bir idarə, müəssisə və təşkilat, eləcə də hər bir vətəndaş elektrik enerjisindən və təbii qazdan səmərəli istifadə etməli, israfçılığa, qanunsuz istifadə hallarına qətiyyən yol verməməlidir. Əli Adıgözəlov qanunsuz istifadə halları ilə əlaqədar Cinayət Məcəlləsindəki maddələr barədə də sakinlərə məlumat vermişdir.

Naxçıvan Şəhər Elektrik Şəbəkəsindən aldığımız məlumata görə, 2014-2015-ci ilin payız-qış mövsümünə hazırlıqla əlaqədar kompleks tədbirlər həyata keçirilib, transformator yarımstansiyalarında əsaslı və cari təmir işləri aparılıb, istismar müddəti başa çatmış elektrik dirəkləri yeniləri ilə əvəz olunub, dirəklərarası məsafələr normaya salınıb, kabellər, eləcə də məftillər yeniləri ilə əvəz edilib, 10/0,4 kilovoltluq elektrik xətləri çəkilib bərkidilib.
Elektrik enerjisi verilişinin tənzimlənməsi və texniki itkinin minimuma endirilməsi məqsədilə Naxçıvan şəhərində müxtəlif gücə malik 2 ədəd yeni transformator yarım­stansiyası quraşdırılıb, 3 ədəd transformator isə azgüclü transformatorla əvəz edilib.
Naxçıvan şəhərində 10 və 0,4 kilovoltluq elektrik hava xətlərinin yeraltı kabellərlə əvəz edilməsi istiqamətində işlər davam etdirilib, 11 min 334 metr uzunluğunda 10 kilovoltluq, 2 min metr uzunluğunda isə 0,4 kilovoltluq hava xətləri yeraltı kabellərlə əvəz edilib, istismar müddəti başa çatmış 94 ədəd elektrik dirəyi ləğv olunub.

Taxıl iki yay görməlidir

Taxıl əkini hər bir məmləkətin iqlim xüsusiyyətlərinə görə payız və yaz fəsli aparılır. Naxçıvan diyarının iqlimi mötədil olduğundan və yazda digər işlərin çoxluğundan bineyi-qədimdən taxılın payız əkininə daha çox üstünlük verilmişdir. İnsanın qida payında çörəklə yanaşı, un məmulatları (yarma, makaron, vermişel, əriştə, unlu-umaclı xörəklər, hər cür zənginliyə malik şirniyyatlar) məhz bərəkətli taxıl zəmilərindən hasilə gəlir. Culfa rayonu ərazisindəki Darıdağda minillik tarixə malik dəyirmandaşı yataqları, əksər yaşayış məntəqələrimizdəki xeyli sayda su dəyirmanları bu torpaqlarda bol taxıl yetişdirilməsindən xəbər verir. Arpa, buğda, gülül, çovdar, darı, vələmir, noxud, mərcimək kimi dənli- paxlalılar öz dadı-tamı ilə məşhurdur.

Payızlıq əkinlə yazlıq əkinin məhsulunda tərkibcə dad fərqi olur. Halva, plovluq üçün əriştə yazlıq buğda unundan hazırlanır.
Dağlıq zonalarda payız əkininə avqustun ikinci yarısından başlanardı ki, səpilən toxumlar cücərib, suvarılıb kollanma fazasına elə daxil olsun ki, necə deyərlər, içərisində kəklik gizlənə bilsin. Buna görə atalarımızın belə bir məsəli var: “Taxıl iki yay görməlidir”. Belə kollanmış taxıla qışın qarı, şaxtası güc gələ bilməz, o, yaza salamat çıxar. İkinci yayın günəşli günləri bol məhsul yetirir. Bu ilin nəticələri göstərir k, keçən payızdan əkilən 35,7 min hektaradək arpa, buğda əkinləri aqrotexniki qaydada optimal müddətdə keçirilmiş, suvarılıb gübrələnmiş, alaqlara, zərərverici və xəstəliklərə qarşı düzgün mübarizə aparılmış, yetişdirilən məhsul vaxtında və itkisiz tədarük olunaraq 103 min tondan çox məhsul əldə edilmişdir. İlkin emaldan toxumluq, ərzaq və mal-qara üçün yem ehtiyatı yaradılmışdır. Təbiidir ki, 2015-ci ilin məhsulu üçün payızlıq əkinlərə hələ iki ay bundan əvvəl hazırlıq görülüb. Mövcud vəziyyətlə bağlı Naxçıvan Muxtar Respublikası Kənd Təsərrüfatı Nazirliyinin əməkdaşları Əsgər Həsənov və Zərrab Əfəndiyevlə həmsöhbət olduq.

Bu gün muxtar respublikada nail olunmuş sosial-iqtisadi inkişaf, təhsilə göstərilən dövlət qayğısı, bu sahədə olan çatışmazlıqların tezliklə aradan qaldırılması üçün həyata keçirilən təsirli və məqsədyönlü tədbirlər bütün valideynlərin, həmçinin müəllim və şagirdlərin problemini aradan qaldırıb. Dərsliklər pulsuz verilir, məktəbli geyimləri vahid formadadır, istənilən ölçüdə məktəbli formaları ucuz qiymətə satılır, məktəbli ləvazimatları da boldur.
Daha bir yaxşı hal ondan ibarətdir ki, hər il Naxçıvan şəhərində məktəbli yarmarkaları təşkil edilir. Buradan istənilən məktəbli ləvazimatını və geyimlərini, ən uzağı, bir saat ərzində almaq olar. Cari ildə də Naxçıvan şəhərinin Xətai küçəsindəki Mərkəzi bazarda təşkil edilən məktəbli yarmarkasında qələbəlik müşahidə olunur. Qeyd edək ki, sentyabr ayının 1-dən başlanan və 15-dək davam edəcək yarmarkada dərs ləvazimatları, məktəbli və idman formaları, məktəbli çantası, lüğət, bədii ədəbiyyatlar və digər ləvazimatlar satılır.
Yarmarkada ayrı-ayrı fənlər üzrə əyani vəsaitlərin satışına da geniş yer ayrılıb. Burada satılan lüğət və digər nəşrlərə, dünya uşaq ədəbiyyatı nümunələrinə, bədii və elmi ədəbiyyata da böyük alıcı marağı vardır. Satış yerlərinin hər birində məhsulların zənginliyi, keyfiyyəti, satış qiymətlərinin əlverişli olması, yüksək xidmətin təşkili alıcılar tərəfindən razılıqla qarşılanır.
Naxçıvan Muxtar Respublikası İqtisadiyyat və Sənaye Nazirliyi tərəfindən təşkil edilən, 40-dan çox sahibkarlıq subyektinin iştirak etdiyi məktəbli yarmarkasında Naxçıvan şəhərində fəaliyyət göstərən yerli istehsal müəssisələrinin məhsulları da satışa çıxarılır.
Yarmarkada həmsöhbət olduğumuz valideynlərin və müəllimlərin hamısı belə tədbirin təşkilindən razılıqlarını bildirdilər.

Xəbərlər şöbəsi

İnkişafının keyfiyyətcə yeni və sürətli mərhələsini yaşayan Naxçıvan Muxtar Respublikasını xarakterizə edən əsas xüsusiyyətlərdən biri formalaşdırılmış möhkəm iqtisadi əsaslar fonunda əhalinin maddi rifah halının davamlı olaraq yüksəldilməsi, muxtar respublika sakinlərinin etibarlı sosial müdafiəsinin təşkilidir. Qloballaşma prosesinin geniş vüsət aldığı mövcud dönəmdə iqtisadiyyatda yaşanan yüksəlişin vətəndaşların həyatında da öz əksini tapması həyata keçirilən sosialyönümlü iqtisadi siyasətin yüksək səmərəliliyini və praktik nəticələrinin effektivliyini aydın şəkildə nümayiş etdirir. Sosial-iqtisadi tərəqqi prosesində qazanılan nailiyyətlərin miqyasının ildən-ilə genişlənməsi və dərinləşməsi əhalinin bütün təbəqələrinin həyat səviyyəsinin yaxşılaşdırılması ilə bərabər, bu istiqamətdə mümkün zəruri tədbirlərin uğurla reallaşmasına da yeni imkanlar açır. Dövlətin iqtisadi əsaslarının davamlı olaraq möhkəmlənməsi şəraitində sosial-iqtisadi problemlərin həlli, yoxsulluğun azaldılması, işgüzar fəallığın yüksəldilməsi, habelə məşğulluq tədbirlərinin həyata keçirilməsi istiqamətində muxtar respublikada son illər ərzində uğurlu addımlar atılıb.

Dünən Şərur Rayon Prokurorluğunun təşkilatçılığı ilə rayonun Sərxanlı kəndində elektrik enerjisindən və təbii qazdan düzgün istifadə qaydalarına, həmçinin ətraf mühitin qorunmasına həsr olunmuş tədbir keçirilmişdir.
Tədbiri giriş sözü ilə Sərxanlı kənd inzibati ərazi dairəsi üzrə nümayəndə Asəf Quliyev açaraq tədbirin mahiyyətindən danışmışdır.
Şərur rayon prokuroru, baş ədliyyə müşaviri Kamil Şükürov “Enerji resurslarının talanmasına qarşı mübarizə” mövzusunda məruzə ilə çıxış etmişdir. Qeyd olunmuşdur ki, muxtar respublikaya təbii qazın nəqli bərpa olunmuş, yeni elektrik stansiyaları tikilərək istifadəyə verilmişdir. Hazırda qarşıda duran başlıca vəzifə enerji resurslarından səmərəli istifadə olunmasından ibarətdir. “Hər bir idarə, müəssisə və təşkilat, eləcə də vətəndaşlar elektrik enerjisindən və təbii qazdan səmərəli istifadə etməli, israfçılığa, qanunsuz istifadə hallarına qətiyyən yol verməməlidir”, – deyən rayon prokuroru bildirmişdir ki, Azərbaycan Respublikası Cinayət Məcəlləsinin mülkiyyət əleyhinə olan cinayətlər fəslinə “Təbii qazın, elektrik və ya istilik enerjisinin talanması” maddəsi əlavə olunmaqla cinayət qanunvericiliyimizdə bir sıra əməllər cinayət əməli kimi təsbit olunmuşdur.

Babək Rayon Məşğulluq Mərkəzində növbəti əmək yarmarkası keçirilib.
Tədbiri giriş sözü ilə Babək Rayon Məşğulluq Mərkəzinin direktoru Qurban Tarverdiyev açaraq bildirib ki, “Azərbaycan Respublikasının Məşğulluq Strategiyası (2006-2015-ci illər)”nın birinci mərhələsinin uğurlu icrası yoxsulluğun nəzərəçarpacaq dərəcədə azalmasına gətirib çıxarıb. Həyata keçirilən məşğulluq tədbirləri əhalinin sosial müdafiəsinin gücləndirilməsində, insanların daimi işlə təmin olunmasında mühüm rol oynayır və muxtar respublika sakinləri tərəfindən onlara göstərilən böyük qayğı kimi dəyərləndirilir.
Qeyd olunub ki, vətəndaşların səmərəli məşğulluğunun təmin olunması, onların sosial müdafiəsinin gücləndirilməsi, əmək bazarının inkişafı muxtar respublikamızda da daim diqqət mərkəzində saxlanılan məsələlərdəndir. Bu baxımdan yeni müəssisələrin fəaliyyətə başlamasına, sahibkarlığın inkişaf etdirilməsinə xüsusi önəm verilir. İşaxtaran vətəndaşların, xüsusilə gənclərin işlə təmin olunması sahəsində mühüm əhəmiyyət kəsb edən tədbirlərdən biri də muxtar respublikada müntəzəm olaraq keçirilən əmək yarmarkalarıdır. Yarmarkalara hazırlıq dövründə həyata keçirilən təşkilati işlər, xüsusilə işəgötürənlərlə yaradılan qarşılıqlı əməkdaşlıq münasibətləri bu mühüm aktiv məşğulluq tədbirində işəgötürənlərin, işaxtaran vətəndaşların fəal iştirakını təmin edib. Babək Rayon Məşğulluq Mərkəzi də öz işini bu istiqamətdə qurub.

Kolza xaççiçəklilər fəsiləsinə aid olan birillik zülallı və yağlı bitkidir. Onun vətəni şərqi Asiyadır. Bu gün dünyada ən geniş yayılma arealı Kanada, Hindistan, Cənubi Amerika, Avstraliya, Çin, Almaniya,  İran və Türkiyə əraziləridir. Azərbaycanın Zaqatala, Qax, Balakən, Qusar, Gədəbəy rayonlarında əkilib-becərilməkdədir. Ötən əsrin 50-60-cı illərində Naxçıvan Muxtar Respublikasının bir neçə kolxoz və sovxoz təsərrüfatında silos şəklində mal-qara üçün yem ehtiyatı toplanması məqsədilə əkini keçirilmişdir.

Botaniki xüsusiyyətləri. Naxçıvan Muxtar Respublikasında əkini keçirilmiş kolza bitkisi raps və şalğam turp adı ilə məşhur olmuşdur. Kolza bitkisi birillik və ikiillik olur. Tərəvəz bitkisi kimi, ilk olaraq, İsveç botaniki Kasper Banxin kolzanın bioloji və botaniki təsvirini vermiş və müəyyən olunmuşdur ki, bu bitki yabanı turp və Çin kələminin təsadüfi çarpazlaşması nəticəsində meydana gəlmiş bir hibriddir. Xaççiçəklilər fəsiləsinə aid olan bu bitki soyuğa davamlıdır. Yarpaqlarının üzəri sürüşkənliyə malik olub, qalın, bir növ, dilimlənmiş kələm yarpağını xatırladır.

Naxçıvan Muxtar Respublikası Kənd Təsərrüfatı Nazirliyi torpaq mülkiyyətçilərinə, həmçinin fermerlərə bitkiçilik və heyvandarlıq sahələrində mövsümlə bağlı aşağıdakı işlərin görülməsini tövsiyə edir.
Meyvə və üzüm bağlarında – Meyvə bağlarında məhsul yığımı davam etdirilir. Məhsulu yığılmış, eləcə də cavan ağaclardan ibarət meyvə bağında suvarma işi aparılmalıdır.
Üzüm bağlarında da kütləvi məhsul yığılır və satışa göndərilir. Məhsul yığıldıqdan sonra tənəklər suvarılır.
Əkinçilikdə – Payızlıq taxıl əkinlərinin mütəşəkkil keçirilməsi üçün sahələr seçilir, şum qaldırılır və əkinə hazırlıq işləri görülür. Səpin üçün tədarük edilmiş taxıl toxumları dərmanlanır və əkin aparılır. Toxumların dərmanlanmasında (alyans, dinit, qranozan, vitovaks və sair) preparatlardan istifadə edilir.
2015-ci ilin məhsulu üçün payız şumu qaldırılır.
Səbzə tərəvəzlərin əkini aparılır.

Ətraf mühitin mühafizəsi, insanların sağlam təbii mühitdə yaşaması və təbii sərvətlərdən xalqımızın rifahının yaxşılaşdırılması naminə səmərəli istifadə edilməsi ölkəmizdə aparılan sosial-iqtisadi islahatların tərkib hissələrindən biridir. Naxçıvan Muxtar Respublikasında da ekoloji sağlamlığın təmin edilməsi və ətraf mühitin mühafizəsi məqsədilə mühüm addımlar atılır. Son illər bu sahədə görülən işlər Naxçıvan şəhərinin də simasını dəyişməklə bərabər, həm də təmiz, ekoloji cəhətdən saf bir şəhər mühitinin yaradılması ilə nəticələnmişdir. Təbii ki, həyata keçirilən tədbirlər nəticəsində şəhərimizin sanitar-epidemioloji vəziyyəti də xeyli dəyişmişdir. İsti yay günlərində mövcud epidemioloji vəziyyətin necə olduğunu öyrənmək üçün Naxçıvan Şəhər Gigiyena və Epidemiologiya Mərkəzinin direktoru Oruc Əliyevlə həmsöhbət olduq:

Avqustun 26-da Naxçıvan Muxtar Respublikası Daxili İşlər Nazirliyi Dövlət Yol Polisi İdarəsində Naxçıvan Muxtar Respublikası Dövlət Baş Sığorta Agentliyi ilə birlikdə muxtar respublikada avtonəqliyyat vasitəsi sahiblərinin mülki məsuliyyətinin icbari sığortasının aparılması sahəsində görülmüş işlər və qarşıda duran vəzifələrlə bağlı tədbir keçirilib.
Tədbiri Dövlət Yol Polisi İdarəsinin rəisi, polis mayoru Aydın Ağayev açaraq qeyd edib ki, avtonəqliyyat vasitəsi sahiblərinin mülki məsuliyyətinin icbari sığortası üzrə sığorta müqavilələrinin bağlanmasına nəzarət qanunla Daxili İşlər Nazirliyinin Dövlət Yol Polisinə həvalə olunub. Bu işin aparılması üçün Dövlət Yol Polisi İdarəsinin əməkdaşları Dövlət Baş Sığorta Agentliyi ilə birlikdə tədbirlər həyata keçirib.

...Ömrü-günü açıq havada, alaçıqda keçən, illərin izlərini nurlu çöhrələrindəki qırışlarda yaşadan ağbirçəklərimiz, ağsaqqallarımız torpaqla əlləşib-vuruşublar. Alın tərini torpağa qarışdıran, əllərinin qabarı ilə torpağı ovxalayanlar ondan əldə etdikləri nemətlərlə övladlarını doyurublar. Nə gecə biliblər, nə gündüz. Sağlamlığın da, uzunömürlülüyün də əlacını işdə, zəhmətdə görüblər. Yorulanda bir ağacın dibində oturub bir qurtum su içib, bir dürmək çörək yeməklə dünyanın yorğunluğu çıxıb canlarından. Bir çimir yuxudan sonra yenidən torpaqla çək-çevirə başlayıblar, ta gün dönüb anasının qoynuna girənə kimi. Sağlığı da, saflığı da, uzun ömrü-günü də beləcə qazanıblar. Ona “möhtac” olub, ondan dolanıblar.
Deməli, insan yaranışından təbiətlə bağlı olub. O, əkib-becərib, təbiət də doyurub, dolandırıb. Ona görə də gələcəyimiz naminə bu ünsiyyəti elə babalarımız kimi biz də saxlamağa borcluyuq.

Yanacaqdoldurma məntəqələri insanların daha çox istifadə etdiyi obyektlərdən olmaqla, partlayış kateqoriyalı ən təhlükəli obyektlər siyahısına daxildir.
Naxçıvan Muxtar Respublikası Fövqəladə Hallar Nazirliyi yanacaqdoldurma məntəqələrində texniki təhlükəsizlik və yanğın təhlükəsizliyi qaydalarının tələblərinə əməl olunması məqsədilə müəssisə rəhbərləri və orada çalışan insanlar tərəfindən aşağıda qeyd olunan texniki təhlükəsizlik və yanğın təhlükəsizliyi qaydalarının tələblərinə ciddi əməl olunmasını vacib hesab edir.
Yanacaqdoldurma məntəqələrinin istismarı zamanı təhlükəsizlik qaydalarının pozulması, mövcud istismar qaydalarının tələblərinə əməl olunma­ması, işin düzgün təşkil edilməməsi, əməkdaşlara əməyin mühafizəsi və yanğın təhlükəsizliyi qaydalarının öyrədilməməsi, qabaqlayıcı tədbirlərin həyata keçirilməməsi, ehtiyatsızlıq yanacaqdoldurma məntəqələrində yanğın və partlayış təhlükəsi yaradan başlıca səbəblərdəndir. Bütün bu amillər mövcud qaydalara əsasən, diqqət mərkəzində saxlanılarsa, təbiət hadisələrinin təsiri istisna olmaqla, yanacaqdoldurma məntəqələrində fövqəladə hadisələrin, o cümlədən partlayış və ya yanğın hadisələrinin başvermə ehtimalı olduqca aşağı olar.

Ordubad rayonunda keçirilən növbəti əmək yarmarkasını rayon Məşğulluq Mərkəzinin direktoru Telman Həsənov açaraq bildirib ki, Naxçıvan Muxtar Respublikası sakinlərinin əmək hüququnun qorunması, əmək, məşğulluq və əhalinin sosial müdafiəsi sahəsində səmərəli tədbirlərin həyata keçirilməsi, işçilərin maddi, sosial, mənəvi və digər həyati tələbatlarının ödənilməsi sosial-iqtisadi siyasətin əsas prioritet istiqamətini təşkil edir. Həyata keçirilən tədbirlər nəticəsində muxtar respublikada səmərəli işgüzarlıq mühiti formalaşdırılıb, investisiya fəallığı daha da artırılıb, insan kapitalının yüksək inkişaf səviyyəsi təmin edilib.
Qeyd olunub ki, Ordubad Rayon Məşğulluq Mərkəzinin əməkdaşları rayondakı idarə, müəssisə və təşkilatlarda, sahibkarlıq subyektlərində olan boş iş yerləri haqqında məlumatlar toplayaraq həmin yerləri əmək yarmarkalarında işaxtaran vətəndaşlara təqdim edirlər. Bugünkü əmək yarmarkası da işaxtaran vətəndaşların, xüsusilə gənclərin sosial müdafiəsinin gücləndirilməsi, onların münasib işlə təmin edilməsi istiqamətində ardıcıl olaraq həyata keçirilən mühüm tədbirlərdən biridir. Yarmarkanın təşkilində əsas məqsəd işaxtaranların öz ixtisaslarına uyğun işlə təmin olunmasıdır. Ötən illərdə mərkəzə müraciət edən vətəndaşlar əmək yarmarkaları vasitəsilə özlərinə daimi iş yerləri tapıblar.

Öz müalicəvi əhəmiyyətinə görə dünyada tanınmış Naxçıvanın Duzdağında hər il çoxlu sayda insan şəfa tapır. Bunlar arasında ölkəmizin vətəndaşları ilə yanaşı, dost ölkələrdən gəlmiş müxtəlif kateqoriyadan olan insanlar da vardır. Naxçıvan Muxtar Respublikası Ali Məclisinin Sədri cənab Vasif Talıbovun dəvəti ilə gürcüstanlı uşaqların burada pulsuz müalicə alması isə artıq ənənə halını almışdır.
Naxçıvan Muxtar Respublikası Ali Məclisinin Sədri 2012-ci ilin yanvar ayında Gürcüstanın Acarıstan Muxtar Respublikasına səfəri zamanı səhiyyə sahəsində əlaqələrin inkişafı barədə də fikir mübadiləsi aparılıb, bu sahədə qarşılıqlı əməkdaşlığın perspektivləri nəzərdən keçirilib. Ali Məclisin Sədri səhiyyə sahəsində əlaqələrin genişləndirilməsinin vacibliyini qeyd edib, tənəffüs yolu xəstəliklərindən əziyyət çəkən acarıstanlı uşaqların Naxçıvanın Duzdağ Fizioterapiya Mərkəzində müalicə olunması barədə təklif razılıqla qarşılanıb.

Naxçıvan Muxtar Respublikası Ali Məclisinin Sədri cənab Vasif Talıbovun 2012-ci ilin yanvar ayında Gürcüstanın Acarıstan Muxtar Respublikasına səfəri zamanı digər sahələrlə yanaşı, səhiyyə sahəsində də əlaqələrin inkişafı barədə fikir mübadiləsi aparılmış, bu sahədə qarşılıqlı əməkdaşlığın perspektivləri nəzərdən keçirilmişdir. Ali Məclisin Sədri səhiyyə sahəsində əlaqələrin genişləndirilməsinin vacibliyini qeyd etmiş, tənəffüs yolu xəstəliklərindən əziyyət çəkən acarıs­tanlı uşaqların Naxçıvanın Duzdağ Fizioterapiya Mərkəzində müalicə olunması barədə təklifi razılıqla qarşılanmışdır. Ötən dövr ərzində əməkdaşlığın inkişafı daha da genişlənmiş, tənəffüs yolu xəstəliklərindən əziyyət çəkən acarıstanlı uşaqların iki dəfə Naxçıvan Muxtar Respublikasının Duzdağ Fizioterapiya Mərkəzində müalicəsi təşkil edilmişdir.

Dünən Culfa şəhərində növbəti əmək yarmarkası keçirilib. Tədbiri giriş sözü ilə açan Culfa Rayon Məşğulluq Mərkəzinin direktoru Yalçın Hüseynov muxtar respublikada əhalinin məşğulluğunun təmin olunması istiqamətində son illər həyata keçirilən məqsədyönlü tədbirlərdən danışıb. Qeyd olunub ki, şəhər və rayonlarımızda fəaliyyət göstərən məşğulluq mərkəzləri öz işlərini təmsil etdikləri bölgələrdə idarə, müəssisə və təşkilatlarla əlaqəli şəkildə quraraq boş iş yerləri haqqında məlumatlar toplayır, əmək yarmarkalarında həmin iş yerlərini qeyri-məşğul vətəndaşlara təqdim edirlər. Culfa Rayon Məşğulluq Mərkəzi də fəaliyyətini bu istiqamətdə qurub. Ötən illərdə mərkəzə müraciət edən vətəndaşlar əmək yarmarkaları vasitəsilə özlərinə daimi iş yeri tapıb.
Əmək yarmarkasında Culfa Rayon İcra Hakimiyyəti başçısının müavini Allahverdi Qasımov çıxış edərək bildirib ki, ümummilli liderimiz Heydər Əliyevin müəyyənləşdirdiyi məşğulluq strategiyası bu gün Azərbaycan Respublikasının Prezidenti cənab İlham Əliyev tərəfindən uğurla həyata keçirilir. Əmək bazarının təkmilləşdirilməsi, iqtisadi fəallığın yüksəldilməsi üçün əlverişli şəraitin yaradılması sahəsində müvafiq tədbirlər reallaşdırılır. Qeyd olunub ki, muxtar respublikamızda da həyata keçirilən məşğulluq tədbirləri əhalinin sosial müdafiəsinin gücləndirilməsində, insanların daimi işlə təminatında mühüm rol oynayır və muxtar respublika sakinləri tərəfindən onlara göstərilən böyük qayğı kimi dəyərləndirilir.
Tədbirdə çıxış edən işaxtaran vətəndaş Əbülfəz Əliyev dövlətimiz tərəfindən əhalinin məşğulluğunun təmin olunması istiqamətində görülən işlərə görə minnətdarlığını bildirib.
Yarmarkada işaxtaran vətəndaşlara 23 təşkilatdan 183 boş iş yeri təqdim edilib. Tədbirdə 35 nəfərə işə göndəriş verilib.

Xəbərlər şöbəsi

Peşəmlə, işimlə əlaqədar olaraq Şərur rayonunun əksər kəndlərində olsam da, son zamanlar Püsyana yolum düşməmişdi. Rayon mərkəzindən 23 kilometr cənub-şərqdə yerləşən Püsyanda aparılan genişmiqyaslı quruculuq işləri haqqında bu günlər tez-tez eşitdiyim xoş sözlər məndə həmin kəndə getmək marağı yaratdı.

Tarixi yaddaş

Püsyan kəndi Şərurun ən iri yaşayış məntəqələrindən biridir. Dörd min beş yüzdən çox insan Tanrının heç bir səxavətinə “tamarzı” qalmayan bu yurd yerinin qoynuna sığınaraq xoş və firavan həyat sürür. Püsyan kəndinin tarixi çox qədimlərə gedib çıxır. Bunu aparılan arxeoloji qazıntıların elmi təhlili də təsdiq edir. Kəndin cənub-şərqindəki antik dövrə aid yaşayış yerinin sahəsi 3 hektardır. Burada aşkarlanan maddi-mədəniyyət nümunələri eramızdan əvvəl I və eramızın II əsrlərinə aid edilir.
Kəndin cənub-şərqində yerləşən daha bir arxeoloji abidə antik dövrə aid nekropoldur. Sahəsi 1200 kvadratmetrdir. Hər tərəfdən əkin sahələri ilə əhatə olunub. 1981-ci ildə təsərrüfat işləri görülərkən aşkara çıxıb. Abidələr daş qutu və torpaq qəbirlərdən ibarətdir. Abidənin eramızdan əvvəl II-I əsrlərə aid olunması ehtimal edilir.

Bu mövzuda Naxçıvan Muxtar Respublikası Dövlət Sosial Müdafiə Fondunun Babək Rayon Şöbəsi tərəfindən rayonun Zeynəddin kəndində maarifləndirici tədbir keçirilmişdir.
Tədbirdə fondun Babək Rayon Şöbəsinin müdiri Natiq Hacıyev və Fərdi uçotun təşkili sektorunun müdiri Azər Məmmədov çıxış edərək məcburi dövlət sosial sığortasının mahiyyəti və üstünlükləri, məcburi dövlət sosial sığorta haqlarının ödənilməsinin əhəmiyyəti, əmək pensiyaları və sığortaolunanların pensiya təminatı hüququ, sığortaolunanların fərdi uçot sistemi ilə bağlı məsələlər barədə məlumat vermişlər.
Qeyd olunmuşdur ki, məcburi dövlət sosial sığorta haqqı əmək pensiyalarının yeganə maliyyə mənbəyi olduğundan pensiyaların maliyyələşdirilməsi vəziyyəti bilavasitə sığorta haqqının ödənilməsindən asılıdır. İşçilərin sosial sığorta münasibətləri “Sosial sığorta haqqında” Azərbaycan Respublikasının Qanunu və digər normativ-hüquqi aktlarla tənzimlənir.
Tədbirdə torpaq mülkiyyətçilərinin məcburi dövlət sosial sığortası üzrə vəzifələrindən də danışılmışdır. Bildirilmişdir ki, mülkiyyətində kənd təsərrüfatına yararlı torpaqları olan mülkiyyətçilər torpağın olduğu ərazi üzrə Dövlət Sosial Müdafiə Fondunun orqanlarında uçota durmalıdırlar.
Qeyd olunmuşdur ki, məcburi dövlət sosial sığorta haqlarını vaxtlı-vaxtında və tam məbləğdə ödəməklə torpaq mülkiyyətçiləri gələcəkdə baş verə biləcək sosial sığorta hadisələrindən sığortalanmış olacaqlar. Ödənilmiş məcburi dövlət sosial sığorta haqları onlar üçün fondda fərdi uçot sistemində açılmış fərdi şəxsi hesablara işlənilir. Gələcəkdə pensiya təyinatı aparıldıqda həmin fərdi şəxsi hesabda olan məlumatlar əsas götürüləcəkdir. Qeyd olunmuşdur ki, məcburi dövlət sosial sığorta haqqı sığortaedənlər tərəfindən “onlayn ödəmə” sistemi vasitəsilə bankda nağd qaydada və ya internet vasitəsilə plastik kartlardan istifadə etməklə ödənilə bilər.
Sonda tədbir iştirakçılarını maraqlandıran suallar cavablandırılmışdır.

Naxçıvan Muxtar Respublikası
Dövlət Sosial Müdafiə Fondunun mətbuat xidməti

Muxtar respublikada əhalinin sosial vəziyyətinin yaxşılaşdırılması məqsədilə həyata keçirilən tədbirlər aztəminatlı ailələri də əhatə etmişdir. Bu qrupdan olan ailələrin sosial müdafiələrinin gücləndirilməsi məqsədilə ünvanlı sosial yardımların təyin edilməsi, əmək qabiliyyətli ailə üzvlərinin məşğulluq problemlərinin həll olunması, aztəminatlı ailələrə baş çəkilməsi bu səpgidə görülən işlərdəndir.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin mətbuat xidmətindən verilən məlumata görə, növbəti belə görüş Babək rayonunun Nehrəm kəndində yaşayan aztəminatlı, I qrup əlil Elnur Ələkbərovun evində keçirilmişdir. Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi, Əmək və Əhalinin Sosial Müdafiəsi və Səhiyyə nazirliklərinin əməkdaşları ailənin yaşayış vəziyyəti ilə maraqlanmış, ailə üzvlərini tibbi müayinədən keçirmiş, ailəyə məişət əşyası və ərzaq payı verilmişdir.
Xüsusi qayğıya ehtiyacı olan ailənin üzvləri diqqət və qayğıya görə minnətdarlıqlarını bildirmişlər.

Xəbərlər şöbəsi

Kəngərli Rayon Məşğulluq Mərkəzində növbəti əmək yarmarkası keçirilib.
Tədbiri giriş sözü ilə mərkəzin direktoru Məzahir Rüstəmov açıb. Bildirib ki, ölkə­mizdə “Azərbaycan Respublikasının Məşğulluq Strategiyası (2006-2015-ci illər)”nın birinci mərhələsinin uğurlu icrası yoxsulluğun nəzərəçarpacaq dərəcədə azalmasına gətirib çıxarıb. Həyata keçirilən məşğulluq tədbirləri əhalinin sosial müdafiəsinin gücləndirilməsində, insanların daimi işlə təmin olunmasında mühüm rol oynayır və muxtar respublika sakinləri tərəfindən onlara göstərilən böyük qayğı kimi dəyərləndirilir.
Kəngərli Rayon İcra Hakimiyyəti başçısının müavini Nazim Canbaxşıyev çıxış edərək qeyd edib ki, ötən illər ərzində muxtar respublikanın bütün bölgələrində, eləcə də Kəngərli rayonunda təşkil olunan əmək yarmarkalarında işaxtaran vətəndaşlara boş iş yerləri təklif olunmaqla yanaşı, onların mövcud əmək bazarının tələblərinə uyğun peşələr üzrə hazırlıq kurslarına və haqqıödənilən ictimai işlərə cəlb olunması da təmin edilib. Kəngərli rayonu əhаlisinin məşğulluğunun gücləndirilməsi, işахtаrаnlаrlа işəgötürənlər аrаsındа birbаşа əlаqələrin yаrаdılmаsı və məşğulluq оrqаnlаrının fəаliyyətinin səmərəliliyinin yüksəldilməsi istiqamətində təşkil edilən əmək yarmarkalаrı mühüm əhəmiyyətə malikdir. Bu istiqamətdə keçirilmiş tədbirlərin təhlili göstərir ki, belə tədbirlərdə işaxtaran vətəndaşlar yerli məşğulluq orqanlarının xidmətlərindən daha çox bəhrələnir, işəgötürən müəssisələrin məsul nümayəndələri ilə birbaşa ünsiyyət yaratmaq imkanı qazanırlar.
İşaxtaran vətəndaş Şəhriyar Quliyev çıxışında bildirib ki, belə tədbirlər əhali tərəfindən rəğbətlə qarşılanır, onların müvafiq işlə təmin olunmaq imkanlarını artırır. O, bu gün təşkil olunan növbəti əmək yarmarkasında işə göndəriş alanlar adından minnətdarlığını bildirib.
12 özəl və dövlət müəssisəsindən 49 boş iş yerinin çıxarıldığı yarmarkada 16 nəfərə işə göndəriş verilib, 1 nəfər isə peşə hazırlığı kursuna cəlb olunub.

*   *   *

Şahbuz rayonunda da əmək yarmarkası keçirilib. Yarmarkaya 15 idarə, müəssisə və təşkilatdan 146 boş iş yeri çıxarılıb. 26 nəfərə işə göndəriş verilib, 4 nəfər isə peşə hazırlığı kursuna göndərilib.

Xəbərlər şöbəsi

Elm və texnologiyanın yüksək inkişaf etdiyi XXI əsrin yenilikləri bəşəriyyət üçün nə qədər vacibdirsə, müasir dünyanın qarşı-qarşıya qaldığı ekoloji problemlərin sürətli həlli də o qədər vacibdir. Buna görə də bu gün inkişaf etmiş ölkələrin əksəriyyətində diqqət mərkəzində saxlanılan əsas məsələlərdən biri ekoloji tarazlığın sabit saxlanılması və davamlılığına nail olunması, meyvə, giləmeyvə, bəzək bağçılığının yaradılması, meşə sahələrinin genişləndirilməsidir.

Bildiyimiz kimi, bəşər elmini düşündürən bir amil də tullantısı olmayan zavod yaratmaqdır. Məntiq etibarilə bu zavodu yaşıl yarpaqlı, geniş gövdəli, qollu-budaqlı ağaclara bənzətmək olar. Çünki istənilən yaşıl bitkinin son tullantısı kainata, bəşəriyyətə oksigen sintezidir. İqtisadi, mənəvi, ekoloji baxımdan bitkilərin, o cümlədən ağacların gündəlik həyatımızdakı rolu hər birimizə aydındır. Naxçıvan Muxtar Respublikasının kontinental iqlim şəraitində ağac əkmək, ona qulluq göstərmək və son nəticə olaraq ondan faydalanmaq çətin, məsuliyyətli və zəhmət tələb edən işdir. Təsəvvürümüzə gətirək ki, minbir əziyyətlə toxumacardan meyvə verən, kölgə salan, ekoloji baxımdan insanlara həmdəm olan ağaclara bizim nə qədər ehtiyacımız vardır. Buna görə də ağacların əkilməsində torpaq sahələrinin düzgün seçilməsi, müasir texnologiyaya cavab verəcək şəkildə becərmə işlərinin aparılması, bir sözlə, ağaclara və bitki aləminə qayğı göstərilməsi ən aktual məsələlərdən biridir.

Cəmiyyət sürətlə inkişaf edir və bu inkişaf özü ilə bərabər yeni-yeni tələbatlar doğurur. Bu tələbatlar içərisində, şübhəsiz, hər gün hər yerdə rast gəlinə bilən qəfil hadisələrə əvvəlcədən hazırlıqlı olmaq, onların vurduğu maddi zərərlərə qarşı iqtisadi təhlükəsizliyimizi təmin etmək vacib amil kimi özünü göstərir. İnsanlara belə bir rahatlığı təmin edən zəmanət, yəni  sığorta varsa, onda daha firavan həyat sürmək, qurub-yaratmaq üçün digər şərtlər də təmin olunur. Odur ki, sabah rast gələ biləcəyimiz qəfil riskli hadisələrə qarşı bu gündən sığortalanmaq həm özümüz, həm ailə üzvlərimiz, həm də bütün cəmiyyət üçün ən etibarlı seçimdir. Bu inam və etibar isə inkişafın doğurduğu müasir həyat tərzimizdir. 

Sığorta olunmaq müasir dövrdə mühüm tələbatlardan biridir və onun inkişaf səviyyəsi də cəmiyyətdə mövcud olan hüquqi, iqtisadi və təşkilati münasibətlərin təkmilləşməsi, onun həyata keçirilmə texnologiyası ilə paralel olaraq dəyişir. Bir neçə yüz il qabaq insanlar yalnız qəfil baş verən və ağac materiallardan inşa edilmiş minlərlə evi külə döndərən yanğın hadisələrindən sığorta olunurdularsa, hazırda sığorta olunmaqla baş verə biləcək çoxlu sayda qəfil hadisələrin vurduğu zərərlər nəticəsində dəymiş maddi itkilərin əvəzini təmin etmək mümkündür. İndi ölkəmizdə və dünyada tətbiq olunan icbari sığortalarla yanaşı, xeyli sayda könüllü sığorta xidmətləri də sığorta agentlikləri tərəfindən təklif olunur ki, bunlardan insanlar öz maraqları üçün istifadə edirlər. Sığorta xidmətlərinin belə geniş yayılması isə insanların riskli hadisələr zamanı dəyə biləcək maddi zərərlərdən tamamilə arxayın şəkildə öz həyatlarını davam etdirmələrinə imkan yaradır ki, bu da müasir həyat tərzimizin qaçılmaz elementlərindən biridir.

Naxçıvan Muxtar Respublikası Ali Məclisi Sədrinin 18 dekabr 2013-cü il tarixli Sərəncamı ilə təsdiq edilmiş “2014-2015-ci illərdə Naxçıvan Muxtar Respublikasında sağlamlıq imkanları məhdud uşaqların təhsilə cəlbi üzrə Dövlət Pro­qramı”nın icrası istiqamətində növbəti tədbir təşkil olunub.
Avqustun 20-də Məhdud Fiziki İmkanlılar üçün Naxçıvan Regional İnformasiya Mərkəzində sağlamlıq imkanları məhdud 12 uşağın iştirakı ilə “Oxu, qavra” adlı mütaliə yarışı keçirilib.
Yarış iştirakçıları bir saat ərzində elektron kitabxananın kataloqunda olan bədii ədəbiyyatdan seçilmiş hekayəni oxumaqla onun məzmununa aid tərtib olunan test suallarını cavablandırıblar. Ən çox sualı düzgün cavablandıran iştirakçı yarışın qalibi olub.
Yarışda ilk üç yeri tutan sağlamlıq imkanları məhdud uşaqlara hədiyyələr, digər yarış iştirakçılarına isə həvəsləndirici mükafatlar təqdim edilib.
Qeyd edək ki, belə tədbirlər sağlamlıq imkanları məhdud uşaqların sosial reabilitasiyasına – mütaliə vərdişi yaratmaqla onların intellektual səviyyələrinin yüksəldilməsinə xidmət edir.

Naxçıvan Muxtar Respublikası
Əmək və Əhalinin Sosial Müdafiəsi Nazirliyinin mətbuat xidməti

Sədərək rayonunda keçirilən növbəti əmək yarmarkasını giriş sözü ilə rayon Məşğulluq Mərkəzinin direktoru Həsən Nəsirov açıb. O qeyd edib ki, Naxçıvan Muxtar Respublikası Ali Məclisi Sədrinin 2013-cü il 18 dekabr tarixli Sərəncamı ilə təsdiq edilmiş “2014-2015-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı” muxtar respublikamızda sahibkarlığın, xüsusən kiçik sahibkarlığın inkişaf etdirilməsinə, yeni ehtiyatlar hesabına yeni iş yerlərinin açılmasına, regiondakı əmək ehtiyatlarının iqtisadi fəallığının yüksəldilməsinə xidmət edir. Dövlət pro­qramından irəli gələn vəzifələrin yerinə yetirilməsi üçün mərkəzin əməkdaşları rayondakı idarə, müəssisə və təşkilatlarda, sahibkarlıq subyektlərində boş iş yerləri haqqında məlumatlar toplayaraq həmin yerləri əmək yarmarkalarında işaxtaran vətəndaşlara təqdim edirlər.

Müasir cəmiyyətdə insanların böyük bir qisminin evdə və işdə, toyda və səfərdə yerinə görə üstünlük verdikləri ümumi qəbul olunmuş bir geyim forması vardır ki, bunlar da zamanın diktəsi və inkişafın mövcud səviyyəsi ilə bir moda halına gəlib zövqlərə görə də dəyişir. 

Bununla yanaşı, geyim, hər şeydən əvvəl, iqtisadi bir tələbatdır və bu tələbatın ödənilməsi üçün çəkilən xərclər qədər geyim istehsal edən firmalar da gəlir əldə edirlər. Yəni bu gün yeri gəldi-gəlmədi, yalnız bir məclis üçün alınan bahalı paltarlara ödənilən pul həmin firmanın, onun yerləşdiyi ölkənin qazancı deməkdir. Moda sürətlə dəyişdiyindən və insanların da geyimlərə olan marağı tükənmədiyindən geyim sənayesi dünyada çox geniş yayılmaqda və kənd təsərrüfatı, kimya, maşınqayırma sənayesi kimi bir çox sektorlara da qazanc gətirən bir sahəyə çevrilməkdədir. Bizdə isə, hələlik, əsaslı moda-geyim sənayesi olmasa da, hər kəsin maddi imkanından, milli adətlərimizdən, modaya çevik münasibətimizdən yaranan zəngin geyim ənənələrimiz vardır.

Gömür kəndi də belə günlərini yaşayır

Yaxın keçmişə qısa ekskurs və ya yol boyu düşüncələr

Müstəqilliyimizin ilk illərini xatırlayanlar bu həqiqəti təsdiq edərlər ki, ümummilli liderimiz Heydər Əliyev 1991-1993-cü illərdə Naxçıvan Muxtar Respublikası Ali Məclisinin Sədri vəzifəsində işləyərkən nəinki Naxçıvan, ümumilikdə, ölkəmiz üçün taleyüklü tədbirlər həyata keçirib. Düşmənlə üz-üzə dayanan bu qədim yurd yerinin müdafiəsi üçün xalqımızın böyük oğlu cahanşümul xidmətlər göstərib. Ulu Tanrı dahi rəhbəri böyük xilaskarlıq missiyası yerinə yetirmək üçün bu xalqa bəxş edib. O vaxtlar kommunikasiya xətləri kəsilən, yolları bağlanan bu qədim diyarda ulu öndərin çıraq işığında imza­ladığı sənədlər bu günümüzə, sabahımıza hesablanmışdı. O illərdə dahi şəxsiyyət naxçıvanlıların inamlarını özünə qaytardı. Yurd qədri bilən insanlar da dahi rəhbərin ətrafında sıx birləşdilər, onunla bir oldular...
Tariximiz üçün ən ağır dövr olan o illərdə bu birlik hesabına Naxçıvan üzləşdiyi çətinliklərə mərdliklə sinə gərdi. Bu gün dönüb o illərə baxmamaq mümkün deyil. Çünki qovuşduğumuz bugünkü firavan yaşayışın təməli o günlərin çıraq işığında qoyulub. Bu işığın gur şöləsi bu gün bütün Azərbaycanı nurlandırır.
Şahbuz rayonunun ucqar dağ və sərhəd yaşayış məntəqəsi olan Gömür kəndinə gedərkən bu düşüncələr içərisində idim. Burada son illərin quruculuq tədbirlərindən də xəbərim var idi və təbii ki, bu tədbirlər ümummilli liderin ideyalarının gerçəkləşməsinin təzahürüdür. Belə təzahürləri həyatımızın hər sahəsində görürük.

Əyləncə və İstirahət Mərkəzi. Son günlərdə bu gözəl məkan muxtar respublika  sakinlərinin ən çox üz tutduqları ünvanlardan birinə çevrilib. “2014-2015-ci illərdə Naxçıvan şəhərinin sosial-iqtisadi inkişafı üzrə Pro­qram”a əsasən, insanların istirahətinin səmərəli təşkili məqsədilə Naxçıvançay vadisində tikilən və ötən ay istifadəyə verilən bu mərkəzdə həm uşaqların, həm də böyüklərin istirahəti üçün hər cür şərait yaradılıb. Hər gün yüzlərlə insanın axışdığı bu məkanda olduq, vətəndaşların təəssüratlarını öyrənmək istədik. 

Həyatımıza bəzək, ömrümüzə sevinc olan körpələr gələcəyimiz, xoş sabahımızdır. Uşaq qədər məsum, təmiz, sevimli varlıq yoxdur. Onlar daim böyüklərin qayğısına ehtiyac duyurlar. Ona görə də uşaqlara, körpələrə diqqət hər birimizin borcudur. Bu, humanist və ədalətli cəmiyyətin yaranması üçün zəruri şərtlərdən biridir. Uşaqların böyük himayədarı olan ümummilli liderimiz Heydər Əliyev deyirdi: “Uşaqlar bizim gələcəyimizdir. Gələcəyimizi nə cür tərbiyə edəcəyiksə, böyüdəcəyiksə, ölkəmizin, millətimizin, dövlətimizin gələcəyi bundan asılı olacaqdır”.

 Sevindirici haldır ki, ölkəmizdə uşaq və gənclərin hərtərəfli inkişafı, onların intellektual səviyyəsinin yüksəldilməsi, məktəbəqədər təlim və tərbiyənin səmərəli təşkili dövlətimizin xüsusi diqqət ayırdığı məsələlərdən biridir.

Ölkə Prezidenti cənab İlham Əliyevin 2014-cü il 2 aprel tarixli Sərəncamı ilə təsdiq edilmiş “Azərbaycan Respublikasında informasiya cəmiyyətinin inkişafına dair 2014-2020-ci illər üçün Milli Strategiya”da informasiya və kommunikasiya texnologiyaları respublikanın davamlı və dayanıqlı inkişafının təmin edilməsi, cəmiyyətdə şəffaflığın və demokratiyanın inkişaf etdirilməsi üçün əlverişli vasitə olaraq qəbul edilir.
Ölkədə “elektron hökumət”in formalaşdırılmasına ciddi diqqət yetirilir və dövlət-vətəndaş münasibətlərinin informasiya texnologiyaları vasitələrindən istifadə etməklə sadələşdirilməsi, şəffaflaşdırılması bürokratik əngəllərin qarşısının alınmasına xidmət edir. Dövlət orqanları tərəfindən göstərilən elektron xidmətlərin keyfiyyətinin artırılması və əhatə dairəsinin genişləndirilməsi, elektron xidmətlərin əlçatanlığının artırılması üçün ictimai çıxış məntəqələri şəbəkəsinin genişləndirilməsi, vətəndaşların “elektron hökumət” üzrə məlumatlılıq səviyyəsinin yüksəldilməsi adıçəkilən strategiyanın başlıca prinsiplərindəndir.

Yulaf (avena) çox qədim dövrlərdən Asiyanın qərbi ilə şərqi arasında olan ölkələrdə geniş ərazilərdə yayılmış bitkidir. Bu bitkinin yabanı və mədəni növləri müxtəlif məqsədlər üçün becərilib artırılmışdır. Azərbaycanın əksər ərazilərində, o cümlədən Naxçıvan Muxtar Respublikasında daha çox əkilən taxıl sahələrində yabanı forması olan tarla yulafçası geniş yayılmışdır.

Naxçıvan ərazisində yulafın səciyyəvi xüsusiyyətlərinin öyrənilməsi məqsədilə Naxçıvan Muxtar Respublikası Kənd Təsərrüfatı Nazirliyinin Həsən Əliyev adına “Araz” Elm-İstehsalat Birliyinin yardımçı təcrübə təsərrüfatında 2011-ci ildə kiçik ərazidə sınaq əkini aparılmışdır. Fenoloji müşahidələrin nəticəsi göstərmişdir ki, ərazidə əkin özünü doğruldur və əkin sahələrinin genişləndirilməsi məqsədəuyğundur.
Botaniki xüsusiyyətləri. Xarici görünüşünə görə vələmirə çox oxşayır və hətta onu tozlandırıb növ keyfiyyətini dəyişir. Toxumları vələmirin toxumuna qarışdıqda çətin seçilir. Bol nişastalı dən məhsulu üçün yetişdirilən tarla bitkisidir. Cücərtisi açıq-yaşıl rəngli, olduqca zərifdir. Çiçək qrupu şaxələnən, yaxud şaxələnməyən, sıxılmış və ya dağınıq süpürgə təşkil edir. Sünbülcüyü 2-3 və çoxçiçəklidir.

Vətən hardan başlanır? Sərhəddənmi? Belə düşünənlər var, qoy kim necə düşünürsə, elə düşüncəsində də qalsın. Vətən mənim evimdən başlanır, mənim küçəmdən başlanır, mənim məhəlləmdən, kəndimdən, şəhərimdən başlanır və bir kəpənək qanadı da, bir şibyə də, mamır da, bir lalə də, bənövşə də, zirinc də, bir sözlə, bu torpağımın yetirdiyi nə varsa, hamısı Vətəndir. Vallah, lap oxumaq istərdim: bura Vətəndir, səsim çatandır, ünüm yetəndir. Təkcə bumu? Məmməd Araz demişkən: “Vətən mənə oğul desə, nə dərdim, Mamır olub qayasında bitərdim”. Bir də Rəşid Behbudov oxuyardı: “Bir anamdan, bir də səndən doya bilmirəm, ey Vətən”. Bu deyimlərin lap öncəsi Abbas Səhhətin təbirincə desək: Vətəni sevməyən insan olmaz, |Olsa da, ol şəxsdə vicdan olmaz.

Dünən Naxçıvan Muxtar Respublikası Səhiyyə Nazirliyinin təşkilatçılığı ilə Naxçıvan Diaqnostika-Müalicə Mərkəzində könüllü qanvermə aksiyası keçirilib.
Aksiyada Naxçıvan Muxtar Respublikası Daxili İşlər Nazirliyinin əməkdaşları iştirak ediblər. Növbəti qanvermə aksiyasının keçirilməsində əsas məqsəd qana ehtiyacı olan uşaqlara tibbi yardımın keyfiyyətinin artırılması, faktor preparatları ilə müalicənin təşkil edilməsi və digər tədbirlərin görülməsindən ibarət olub.
Əvvəlcə donorlardan arterial təzyiqin yoxlanılması, hepatit, QİÇS və digər yoluxucu xəstəliklərin olub-olmamasının müəyyən edilməsi üçün qan analizləri götürülərək testdən keçirilib. Donorlardan götürülmüş 20,4 litr qanın qrupları müəyyənləşdirilib, birli, ikili və üçlü torbalarda 13,8 litri Naxçıvan Diaqnostika-Müalicə Mərkəzinin, 6,6 litri isə Naxçıvan Muxtar Respublikası Doğum Mərkəzinin qan banklarına təhvil verilib.

Xəbərlər şöbəsi

Muxtar respublikada gedən sürətli sosial-iqtisadi inkişafın nəticələri özünü sığorta sahəsində də göstərməkdədir. Vətəndaşlar baş verə biləcək qəfil hadisələrdən sığortalanmaqla daşınmaz əmlaklarına, avtomobillərinə dəymiş zərərlərin ödənməsini, üçüncü şəxslərə vura biləcəkləri zərərə görə mülki məsuliyyətlərini zəmanət altına almış olurlar. Muxtar respublikamızda sığorta fəaliyyətinin müasir tələblərə uyğun şəkildə təkmilləşdirilməsi istiqamətində 30 noyabr 2011-ci il tarixdə Naxçıvan Muxtar Respublikası Ali Məclisində “Muxtar respublikada sığorta fəaliyyəti və qarşıda duran vəzifələr barədə” keçirilən müşavirənin xüsusi əhəmiyyəti olub və vətəndaşların sığorta xidmətləri ilə tam təmin olunması istiqamətində səmərəli işlər görülməkdədir. Belə ki, muxtar respublikanın rayonlarında, kənd mərkəzlərində, səhiyyə, mədəniyyət, təhsil ocaqlarında, sahibkarlıq obyektlərində aparılan görüşlər, keçirilən maarifləndirici tədbirlər artıq öz bəhrəsini verməkdədir.
Naxçıvan Muxtar Respublikası Dövlət Baş Sığorta Agentliyindən aldığımız məlumata görə, ötən ilin ilk yeddi ayı ilə müqayisədə cari ilin müvafiq dövründə sığorta tədiyyələrinin toplanması və müqavilələrin bağlanmasında 8,7 faiz artım müşahidə olunub. Nəqliyyat, daşınmaz əmlak sığortası, insanların sağlamlığına dəymiş zərərlər və digər sığorta növləri üzrə ödənilən sığorta məbləğləri isə 22,1 faiz artıb. Bu hal vətəndaşlar üçün sığortanın nə qədər əhəmiyyətli olduğunu bir daha göstərməkdədir.

 Əli CABBAROV

Bu gün qadınlarımızın böyük əksəriyyəti ailə büdcəsinə kömək etmək, həyat standartlarını yüksəltmək, yaxud peşə sevgisi, cəmiyyətdə  mövqe tutmaq kimi bir sıra səbəblərdən işləməyə üstünlük verir. Uzun müddət işləmək istəyən qadınlarımızı uğurlu karyera qurmaq maraqlandırır. Xanımlarımızı ən çox düşündürən sual isə budur ki, ailəyə və karyeraya bərabər zaman ayırmaq mümkündürmü?

Bu yazımızda qadınların seçim qarşısında qaldıqları məsələlərdən biri olan ailə və karyera mövzusundan bəhs etməyə çalışacağıq. Bir vaxtlar çalışan kişilərin sayı qadınlara nisbətən daha çox idi və onlar karyeraya üstünlük verirdilərsə, hazırda dünyada, o cümlədən ölkəmizdə çalışan qadınların sayı getdikcə artmaqda, karyera tendensiyası kişilərlə qadınlar arasında bərabərlik təşkil etməkdədir. Kişilərin bir çoxu belə düşünür ki, yalnız onlar karyera sahibi ola bilərlər. Eyni zamanda qadınların karyera sahibi olmalarını onlardan daha üstün bir mövqedə olmaları kimi səciyyələndirirlər. Bu gün əksər qadınlarımız öz karyeralarını qurmaqla həm də ailələrinə iqtisadi cəhətdən kömək etmiş olurlar.

Naxçıvan Muxtar Respublikası Dövlət Sosial Müdafiə Fondunun şöbələri tərəfindən məcburi dövlət sosial sığortası sahəsində maarifləndirici tədbirlərin keçirilməsi davam etdirilir. Növbəti maarifləndirici tədbir Naxçıvan Dövlət Sosial Müdafiə Fondunun Ordubad Rayon Şöbəsi tərəfindən rayonun Əylis kəndində keçirilib. Tədbiri Əylis kənd inzibati ərazi dairəsi üzrə nümayəndə İsmayıl Quliyev açaraq tədbirin əhəmiyyətindən danışıb.
Tədbirdə fondun Ordubad Rayon Şöbəsinin əməkdaşları Feyzulla Əkbərov, Həbib İsmayılov və Hacı Sadiqov çıxış edərək əmək pensiyaları və sığortaolunanların pensiya təminatı hüququ, sığortaolunanların fərdi uçot sistemi, məcburi dövlət sosial sığortasının mahiyyəti və könüllü sosial sığortanın, məcburi dövlət sosial sığorta haqlarının ödənilməsinin əhəmiyyəti ilə bağlı məsələlər barədə torpaq mülkiyyətçilərinə məlumat veriblər.
Qeyd olunub ki, işləyən hər bir vətəndaş fəaliyyət göstərdiyi təşkilatda əməkhaqqının düzgün rəsmiləşdirilməsinə nail olmalı, bunu işəgötürəndən tələb etməlidir. Həmçinin əməkhaqqının düzgün göstərilməsində, sosial sığorta haqlarının düzgün hesablanmasında, vaxtında və tam ödənilməsində maraqlı olmalıdır. Torpaq mülkiyyətçiləri, fiziki şəxslər isə şəxsən özləri sosial sığorta haqlarının düzgün hesablanmasını təmin etməlidirlər. Məcburi dövlət sosial sığorta haqqı sığortaedənlər tərəfindən onlayn ödəmə sistemi vasitəsilə bankda nağd qaydada və internet vasitəsilə plastik kartlardan istifadə etməklə ödənilə bilər.
Tədbirdə könüllü sosial sığortanın əhəmiyyəti barədə də yığıncaq iştirakçılarına məlumat verilib. Bildirilib ki, bütün vətəndaşlar məcburi dövlət sosial sığorta haqları ilə yanaşı, könüllü qaydada da əlavə sığorta haqqı ödəməklə sığorta oluna bilərlər. Bu, həmin vətəndaşların gələcəkdə əmək pensiyalarına əlavələrin hesablanmasına və alacaqları pensiyanın məbləğinin çox olmasına təsir göstərəcəkdir.
Vurğulanıb ki, sığortaolunanın fərdi şəxsi hesabında olan pensiya kapitalı onun bilavasitə pensiyasının məbləğinə təsir göstərir. Bu vəsait nə qədər çox olarsa, sığortaolunanın pensiyasının məbləği də bir o qədər çox olacaqdır.
Sonda iştirakçıları maraqlandıran suallar cavablandırılıb.

Naxçıvan Muxtar Respublikası Dövlət Sosial Müdafiə
Fondunun mətbuat xidməti

Avqustun 13-də Ordubad Rayon Prokurorluğu rayonun Yuxarı Əylis kəndində maarifləndirici tədbir keçirib.
Tədbirdə Ordubad rayon prokuroru, baş ədliyyə müşaviri Yusif Abdullayev “Enerji ehtiyatlarından qənaətlə istifadə olunmalıdır” mövzusunda çıxış edib.
Bildirilib ki, ölkəmizin digər regionları kimi, Naxçıvan Muxtar Respublikasında da hər bir vətəndaşın normal yaşayışı üçün kommunal xidmətlərin səviyyəsi yüksəldilir, əhalinin fasiləsiz olaraq elektrik enerjisi, təbii qaz və içməli su ilə təminatı ön plana çəkilir. Bu baxımdan enerji ehtiyatlarının qeyri-qanuni istifadəsinə qarşı mübarizənin gücləndirilməsi istiqamətində əhalinin maarifləndirilməsinə diqqətin artırılması zəruridir.

Muxtar respublikada aztəminatlı ailələrin sosial problemlərinin həll olunması, o cümlədən insanların rifahının yaxşılaşdırılması istiqamətində həyata keçirilən çoxşaxəli tədbirlər ictimaiyyət tərəfindən rəğbətlə qarşılanır. Mütəmadi olaraq müvafiq kateqoriyadan olan ailələrə baş çəkilməsi də həmin tədbirlərdəndir.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi, Əmək və Əhalinin Sosial Müdafiəsi və Səhiyyə nazirliklərinin birgə təşkilatçılığı ilə Babək rayonunun Xəlilli kəndində yaşayan aztəminatlı, I qrup əlil Nurəddin Səfərəliyevin ailəsinə baş çəkilib. Adıçəkilən təşkilatların əməkdaşları aztəminatlı ailənin yaşayış vəziyyəti ilə maraqlanıb, ailə üzvləri tibbi müayinədən keçirilib, onlara ərzaq payı verilib.
Xüsusi qayğıya ehtiyacı olan ailənin üzvləri diqqət və qayğıya görə minnətdar­lıqlarını bildiriblər.

Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsinin
mətbuat xidməti

Azərbaycan Respublikasında və onun ayrılmaz tərkib hissəsi olan Naxçıvan Muxtar Respublikasında bütün sahələrdə olduğu kimi, əhalinin sosial müdafiəsi sahəsində də bir sıra uğurlu islahatlar aparılıb və təkmil sığorta-pensiya sistemi formalaşdırılıb.
Fərdi uçot sisteminə əsaslanan yeni sığorta-pensiya sistemi işləyən vətəndaşların Dövlət Sosial Müdafiə Fonduna ödəmiş olduqları məcburi dövlət sosial sığorta haqlarına əsasən, pensiya təyinatını özündə əks etdirir. Bu məqsədlə dövlət və özəl müəssisələrdə çalışan işçilər, həmçinin fərdi sahibkarlıqla məşğul olan fiziki şəxslər və mülkiyyətində kənd təsərrüfatına yararlı torpaq payı olan torpaq mülkiyyətçiləri Dövlət Sosial Müdafiə Fondunun yerli orqanları tərəfindən qeydiyyata alınıb, onlara sosial sığorta şəhadətnamələri verilib və fondda fərdi şəxsi hesab açılıb. 2006-cı il yanvarın 1-dən həmin kateqoriyadan olan vətəndaşların (sığortaolunanların) ödəmiş olduqları məcburi dövlət sosial sığorta haqları onların fərdi şəxsi hesablarında toplanılıb. Sığortaolunanlar pensiyaya çıxanda toplanmış məcburi dövlət sosial sığorta haqlarından onlara pensiya təyinatı aparılacaq. Sığortaolunanlara təyin olunan pensiyanın məbləği onların fərdi şəxsi hesablarında olan məcburi dövlət sosial sığorta haqlarının məbləğindən və sığorta stajlarından asılıdır. Bunlar nə qədər çox olarsa, sığortaolunanın pensiyası da ona uyğun çox olacaqdır.

Ən vacibli ehtiyaclarımız içərisində yer alan informasiya texnologiyaları modern insan həyatının ayrılmaz hissəsinə çevrilib. İnternetin kəşfi isə xüsusilə böyük hadisədir. İnternet vasitəsilə dünyanın hər tərəfi ilə informasiya alış-verişi etmək mümkündür. Sosial-iqtisadi sahələrlə yanaşı, elm, təhsil, səhiyyə sahələrində də internet əhəmiyyətli yer tutmaqdadır. İnternet insanları bir-birinə yaxınlaşdırmaqdadır.
Əlbəttə, fiziki olaraq bir izolyasiya olduğu doğrudur, ancaq insanlar internet vasitəsilə fikirlərini bir-birlərinə daha yaxşı çatdırır, fikri baxımdan daha çox mövzunu müzakirəyə cəlb edə bilirlər. İnternet ictimailəşmək baxımından da əhəmiyyətli rola malikdir, çünki bu mühitdə kimsə əvvəlcə nə geydiyinizə, necə göründüyünüzə baxaraq sizi qiymətləndirmir. İnternet fikirlərin ön plana çıxdığı bir mühitdir. Xüsusilə son zamanlarda təhsil sahəsində internetdən geniş şəkildə istifadə olunur. İnternet məlumatlanmaq baxımından böyük bazaya sahibdir. Dünyada internetdən istifadə edənlərin sayı getdikcə artmaqdadır. İnternet vasitəsilə insanlar elektron kitabxanalardan istifadə edir, elektron formada alış-veriş və sair həyata keçirirlər. Bu isə insanlara vaxt qazandırmaqla bərabər, rahat və ucuz başa gəlir. Bundan əlavə, internet vasitəsilə dünyanın müxtəlif kitabxanaları, ticarət obyektləri, mağazaları ilə əlaqə saxlamaq mümkündür.

Zaman-zaman verilən tapşırıqların və qarşıya qoyulan vəzifələrin adı dəyişsə də hədəf birdir: ailələrin rahat, layiqli yaşayışını təmin etmək və bütövlüyünü qorumaq!

Ötən əsrin 90-cı illərinin əvvəlində Naxçıvan Muxtar Respublikasının qarşısında çox mühüm vəzifələr dayanırdı. Ən başlıca vəzifələrdən biri dövlət quruculuğu prosesini uğurla həyata keçirmək idi. İqtisadi və sosial islahatlar, xüsusilə ictimai mülkiyyətə (əslində, dövlət mülkiyyətinə) əsaslanan sistemdən liberal iqtisadiyyata – bazar iqtisadiyyatına keçid vacib amillərdən biri kimi öz həllini tapmalıydı. Əlbəttə, bu məsələnin həlli o qədər də asan deyildi. Uzun müddət sovet iqtisadi-sosial sistemində yaşamış əhalinin birdən-birə bazar münasibətlərinə keçməsi müəyyən sosial, iqtisadi və psixoloji çətinliklər yaradırdı. Bütün bunlarla yanaşı, Naxçıvan Muxtar Respublikasının təcavüzkar Ermənistan tərəfindən blokadaya salınması burada yaşayan ailələrin vəziyyətini bir qədər də mürəkkəbləşdirirdi.

Ölkəmizdə 2006-cı ildən tətbiq olunan sığorta-pensiya modeli müasir dünyada sığorta-pensiya sistemləri üzrə ən mühüm elementləri özündə birləşdirir və bu sahədəki islahatlar nüfuzlu beynəlxalq təşkilatlar, maliyyə institutları tərəfindən çox yüksək qiymətləndirilir.
Fərdi uçot sisteminin əsas məqsədlərindən biri sığortaolunanların gələcəkdə alacaqları pensiyaların hansı məbləğdə olacağını qabaqcadan müəyyənləşdirmələrinə şərait yaratmaqdır. Fərdi uçotla bağlı yaradılmış bazadan istifadə etməklə sosial sığorta iştirakçıları haqqında dəqiq məlumat almaq mümkündür. Bu da, öz növbəsində, sığortaolunanın pensiyaya çıxacağı haqqında dəqiq proqnozların verilməsinə, sığortaolunanlar və sığortaedənlər tərəfindən ödənilməli və ödənilmiş olan məcburi dövlət sosial sığorta haqlarına daha asan və çox vaxt sərf etmədən nəzarət etməyə imkan verir.

İşaxtaran vətəndaşların işlə təmin edilməsi üçün avqustun 19-da növbəti əmək yarmarkalarına start veriləcək

Ümummilli liderimiz Heydər Əliyevin müəyyənləşdirdiyi məşğulluq strategiyası bu gün Azərbaycan Respublikasının Prezidenti cənab İlham Əliyev tərəfindən ardıcıllıqla davam etdirilir. Bunun nəticəsidir ki, “Azərbaycan Respublikasının Məşğulluq Strategiyasının (2006-2015-ci illər)” uğurlu icrası işsizlik səviyyəsinin nəzərəçarpacaq dərəcədə azalması ilə nəticələnib. Muxtar respublikamızda da həyata keçirilən məşğulluq tədbirləri əhalinin sosial müdafiəsinin gücləndirilməsində, insanların daimi işlə təmin olunmasında mühüm rol oynayır.
Naxçıvan Muxtar Respublikası Ali Məclisi Sədrinin 2013-cü il 18 dekabr tarixli Sərəncamı ilə təsdiq edilmiş “2014-2015-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı” da bu məqsədə xidmət edən mühüm dövlət sənədidir. Proqramda nəzərdə tutulan tədbirlərin yerinə yetirilməsi istiqamətində görülən işlər muxtar respublika sakinləri tərəfindən insan amilinə, onun layiq olduğu səviyyədə yaşamasına qayğı kimi dəyərləndirilir.

Muxtar respublikamızda əhalinin sosial müdafiəsinin gücləndirilməsi, qeyri-məşğul əhalinin işlə təmin edilməsi, müxtəlif sahələr üzrə peşələrə cəlb olunması üçün məqsədyönlü tədbirlər həyata keçirilir. Belə tədbirlər sırasında gənclərin və iş­axtaran vətəndaşların ehtiyac duyulan sahələrdə işləməsi üçün onlara peşə təhsili verilməsidir.
2009-cu ilin aprel ayından fəaliyyətə başlayan Naxçıvan Regional Peşə Tədris Mərkəzi bu funksiyanı uğurla yerinə yetirir. Ötən müddət ərzində mərkəzdə yüzlərlə gənc müxtəlif peşələrə yiyələnib, ehtiyac olan sahələrdə işlə təmin edilib. Hazırda mərkəzdə 4 ixtisas üzrə məşğələlər davam etdirilir. Ağac üzərində oyma, qadın bərbəri, qaz təsərrüfatı avadanlıqlarının istismarı və təmiri üzrə çilingər, ofisiant peşələri üzrə 57 nəfər təhsil alır. Onlardan 4-ü qadın olmaqla, 8-i məhdud fiziki imkanlılardır. İki ay davam edəcək məşğələlər sona çatdıqdan sonra məzunlara şəhadətnamələr veriləcək, onlar iş yerləri ilə təmin olunacaqlar.

Xəbərlər şöbəsi