Mayın 13-də Şərur Şəhər Fizika-Riyaziyyat Təmayüllü Liseyə qəbul imtahanları keçirilib. Naxçıvan Muxtar Respublikasının ümumtəhsil məktəblərinin VI və VII sinif şagirdləri üçün nəzərdə tutulmuş imtahanlar Naxçıvan şəhərində və rayon Təhsil şöbələrinin nəzdində yaradılmış imtahan mərkəzlərində keçirilib.
İmtahanlar saat 1500-də başlayıb və şagirdlərə müvafiq fənlər üzrə 100 test sualı təqdim olunub. Şagirdlərə imtahan müddəti üçün 2 saat 30 dəqiqə vaxt ayrılıb. İmtahanların obyektiv keçirilməsinə nəzarət Tələbə Qəbulu üzrə Dövlət Komissiyasının Naxçıvan Mux­tar Respublikası Regional Bölməsinin nəzarətçi bazasında olan müəllimlər və Naxçıvan Muxtar Respublikası Təhsil Nazirliyinin məsul əməkdaşları tərəfindən aparılıb.
Qeyd edək ki, Naxçıvan Muxtar Respublikası Ali Məclisi Sədrinin 14 aprel 2015-ci il tarixli Sərəncamı ilə yaradılmış Şərur Şəhər Fizika-Riyaziyyat Təmayüllü Liseyə sənədlərin qəbulu aprel ayının 15-dən may ayının 10-dək aparılıb və ümumilikdə, 1060 şagird sənəd verib. 2015-­2016-cı tədris ili üçün liseyə 160 şagirdin qəbulu nəzərdə tutulub. Dünən VI və VII siniflər üzrə keçirilən imtahanlarda 461 şagird iştirak edib. Mayın 15-də isə liseyə VIII və IX siniflər üzrə qəbul imtahanları keçiriləcək və 419 şagird iştirak edəcək.

Xəbərlər şöbəsi

Naxçıvan Dövlət Universitetində (NDU) “Naxçıvan və Şərqi Anadolu abidələri” mövzusunda Beynəlxalq Simpozium keçirilib.
Azərbaycan, Türkiyə, İran, Əfqanıstan, Rumıniya da daxil olmaqla, 5 ölkədən 56 alimin, həmçinin Naxçıvan Dövlət Universitetinin və ölkəmizin bir sıra ali təhsil ocaqlarının, Azərbaycan Milli Elmlər Akademiyasının (AMEA) müvafiq elmi-tədqiqat institutlarının, AMEA Naxçıvan Bölməsinin əməkdaşlarının, Türkiyənin Ağrı İbrahim Çeçen, Ərzurum Atatürk, Ankara Qazi, Qars Qafqaz, Elazığ və digər universitetlərindən dəvət olunmuş memarlıq üzrə mütəxəssislərin də iştirak etdiyi beynəlxalq simpoziumun plenar iclası başlamazdan əvvəl Naxçıvan Dövlət Universiteti ərazisində – Memarlıq və mühəndislik fakültəsinin ətrafında Türkiyənin Ağrı İbrahim Çeçen, Ankara Qazi, Ərzurum Atatürk və Naxçıvan Dövlət universitetləri əməkdaşlarının birgə layihəsi olan daşdan düzəldilmiş heykəllərin açılışı olub. Ağrı İbrahim Çeçen Universitetinin müəllimi Naci Edi heykəllər haqqında məlumat verib. Vurğulanıb ki, simpoziumdan 15 gün öncə Naxçıvan Dövlət Universitetində heykəl hazırlanması işlərinə Türkiyə tərəfindən 7 memar qatılıb. Naxçıvan məhsulu olan yerli travertin daşdan hazır­lanmış heykəllərdə iki ölkənin milli dəyərləri əks olunub.

Mayın 7-də Naxçıvan Muxtar Respublikası Rabitə və Yeni Texnologiyalar və Təhsil nazirliklərinin təşkilatçılığı ilə muxtar respublikanın 200-dən çox məktəbi ilə Naxçıvan şəhərindəki Xatirə Muzeyi arasında canlı dərs aparılıb.

Mayın 7-də muxtar respublikanın ümumtəhsil, orta ixtisas və ali təhsil məktəblərində, Heydər Əliyev adına Hərbi Liseydə bir dərs saatı 1941-1945-ci illər müharibəsində alman faşizmi üzərində qazanılan tarixi qələbənin 70 illiyinə həsr olunub.
Dərslərdə şagird, tələbə və kursantlara məlumat verilib ki, 1941-1945-ci illər müharibəsində azərbaycanlılar böyük qəhrəmanlıqlar göstərib, qələbənin qazanılmasına töhfələr veriblər. Qanlı-qadalı döyüşlərdə naxçıvanlılar da öz vətənpərvərliklərini, fədakarlıqlarını nümayiş etdiriblər. Bu müharibədə 30 minə yaxın naxçıvanlı iştirak edib, onların yarısı qəhrəmancasına həlak olub, 600 nəfəri doğma Naxçıvana yüksək mükafatlarla qayıdıb.
Xalqımız 1941-1945-ci illər müharibəsində şərəfli döyüş yolu keçmiş igid oğul və qızlarımızın qəhrəmanlıqlarını heç vaxt unutmayacaq.

Xəbərlər şöbəsi

Dünən Naxçıvan Müəllimlər İnstitutunda ümummilli lider Heydər Əliyevin anadan olmasının 92-ci ildönümünə həsr edilmiş “Müasir təlim metodları və yeni pedaqoji texnologiyaların təlim-tərbiyə prosesində tətbiqi” mövzusunda respublika elmi konfransı keçirilib.
Konfransın plenar iclasında institutun rektoru, professor Oruc Həsənli çıxış edərək tədbirin əhəmiyyətindən danışıb. Qeyd olunub ki, ümummilli liderimiz Heydər Əliyev ölkəmizə rəhbərliyi dövründə elm və təhsil sahəsinin müasir standartlar səviyyəsində fəaliyyətini diqqət mərkəzində saxlayıb, istər orta, orta ixtisas, istərsə də ali təhsil sistemində bir sıra islahatların həyata keçirilməsini təmin etmək məqsədilə mühüm sərəncamlar imzalayıb.
Sonra ali təhsil ocağının müəllimlərindən tarix üzrə fəlsəfə doktoru Ələkbər Cabbarlının, pedaqogika üzrə fəlsəfə doktoru Lalə Allahverdiyevanın, filologiya üzrə fəlsəfə doktoru Fəxriyyə Cəfərovanın, Şərur rayon Zeyvə kənd tam orta məktəbinin müəllimi Fərmayıl Əsgərovun məruzələri dinlənilib.

Ümummilli lider Heydər Əliyevin anadan olmasının 92-ci ildönümü münasibətilə Naxçıvan Dövlət Universitetində keçirilən silsilə tədbirlər davam etdirilir. Bu tədbirlərin davamı kimi ali təhsil ocağında “Ümummilli lider Heydər Əliyev və Azərbaycan təhsili” mövzusunda konfrans keçirilib.

Konfransı giriş sözü ilə açan universitetin tərbiyə işləri üzrə prorektoru, professor Məmməd Rzayev Azərbaycan xalqının ümummilli lideri, görkəmli dövlət xadimi Heydər Əliyevin zəngin nəzəri irsində və möhtəşəm fəaliyyətində təhsil məsələlərinin xüsusi yer tutduğunu bildirib. Qeyd olunub ki, ulu öndərimiz ölkənin və xalqın taleyində, hərtərəfli tərəqqisində, uğurlar qazanılmasında təhsilin xüsusi rolunu, əhəmiyyətini həmişə yüksək qiymətləndirib. Bu gün müstəqil Azərbaycanda, оnun ayrılmaz tərkib hissəsi оlan Naxçıvan Muxtar Respublikasında ulu öndər Heydər Əliyevin siyasi kursu bütün sahələrdə uğurla davam etdirilir. Təhsil sahəsində həyata keçirilən böyük tədbirlər də bu siyasətin tərkib hissəsidir.

Bitkilərin müalicəvi xüsusiyyətləri insanlara hələ qədim zamanlardan məlum olmuşdur və min illərdir ki, bitkilərdən qida, sığınacaq, mühafizə, müalicə və sair məqsədlər üçün istifadə edilir. Hələ eramızdan 6000-8000 il əvvəl şumerlərin, vavilonların, assuriyalıların işlətdikləri dərman bitkiləri haqqındakı məlumatlar misirlilər, yunanlar, romalılar, çinlilər və tibetlilər tərəfindən mənimsənilmişdir. Şərq ölkə­lərində də dərman bitkilərindən geniş istifadə olunmuşdur. Qədim Roma, Çin, yunan, Misir və Şərq həkimləri dərman bitkilərinin öyrənilməsinə, müxtəlif üsullarla xəstəliklərin müalicəsində istifadəsinə aid dəyərli əsərlər yazmışlar. 

Xüsusilə qədim Roma həkimləri Klavdiya Qalen, Korneliya Cels, Böyük Pliniy, Dioskorid, Çin alimlərindən Li-Di, Li-Şi-Çjen, Şərqin böyük loğmanı Əbu Əli İbn Sina bu sahədə dünya şöhrəti qazanmışlar. Məsələn, farmakoloq Li-Şi-Çjen 27 il ərzində yazdığı 52 cildlik “Farmakologiyanın əsasları” adlı əsərində 1500-dən çox, Böyük Pliniy “Tibb tarixi” kitabında 1000, Əbu Əli İbn Sina isə “Tibb elminin qanunları” kitabında 600-ə qədər dərman bitkisi haqqında məlumat vermişlər. Xalq təbabətinin bir qolu olan türkəçarələr həmin müalicə üsullarına aid olmaqla, zamanın sınağından uğurla çıxmış və bu gün də öz əhəmiyyətini itirməmişdir.

Təhsili inkişaf etmiş cəmiyyət bütün sahələrdə yüksək nəticə qazana bilər. Muxtar respublikamızda həyata keçirilən genişmiqyaslı quruculuq tədbirlərindən təhsil sahəsinə də xeyli pay düşüb. Yenidən qurulan və ya inşa edilən təhsil obyektləri inkişaf etmiş ölkələrin qabaqcıl təhsil müəssisələri ilə müqayisə edilə biləcək səviyyədədir.

Əlbəttə, bütün bunlar savadlı, bacarıqlı, peşəkar gənclər yetişdirmək məqsədi daşıyır. Naxçıvanda fəaliyyət göstərən ali təhsil ocaqlarında yaradılan şəraitin nəticəsidir ki, muxtar respublikamızın abituriyentlərinin əksəriyyəti buradakı institut və universitetlərdə təhsil almağa üstünlük verir. Onu da qeyd edək ki, təhsil almaq üçün Naxçıvandakı ali məktəbləri seçən Azərbaycanın regionlarından və digər dövlətlərdən olan gənclərin də sayı az deyil.

Aprelin 26-da Tələbə Qəbulu üzrə Dövlət Komissiyası (TQDK) Bakı, Naxçıvan və Gəncə şəhərlərində 2015-2016-cı tədris ili üçün Azərbaycan Respublikası ali təhsil müəssisələrinin magistratura təhsil pilləsinə qəbul imtahanının ikinci mərhələsini keçirib.
Naxçıvan Dövlət Universitetində keçirilən imtahana TQDK-nın Naxçıvan Muxtar Respublikası Regional Bölməsinin nəzarətçi bazasından olan müəllimlər cəlb edilmişdilər. 205 bakalavriatın iştirak etdiyi imtahan saat 1300-də başladı.
İmtahan başlamazdan əvvəl bakalavriatlarla görüşüb həmsöhbət olduq. Ramazan Abdullayev Naxçıvan Dövlət Universitetində “hüquqşünaslıq” ixtisası üzrə təhsil alıb. O dedi:
– Babək rayon Yarımca kənd tam orta məktəbini bitirmişəm. Ali məktəbə qəbul imtahanlarında 675 bal toplayaraq Prezident təqaüdünə layiq görülmüşəm. Arzularımdan biri də magistratura təhsili almaqdır. Birinci turda 80 bal topladım. İndi isə ikinci turda iştirak edəcəyəm.
Ordubad rayonunun Nürgüt kəndindən olan Nuranə Haqverdiyeva “Naxçıvan” Universitetinin “in­gi­lis dili” ixtisasını bitirib. Onun ­dediklərindən:
– Mən ikinci dəfədir ki, ali təhsil müəssisələrinin magistratura təhsil pilləsinə qəbul imtahanında iştirak edirəm. Ötən il keçid balını toplaya bilməmişdim. Amma buna baxmayaraq, ruhdan düşmədim. Bu il daha ciddi hazırlaşdım. Bu dəfə özümə çox güvənirəm.

Naxçıvan Dövlət Universitetində (NDU) “Müasir arıçılığın problemləri və inkişaf xüsusiyyətləri” mövzusunda beynəlxalq elmi-praktik konfrans keçirilib. Konfrans iştirakçıları əvvəlcə ali məktəbin Təbiətşünaslıq və kənd təsərrüfatı fakültəsinin foyesində universitet əməkdaşlarının arıçılıq sahəsinə aid kitablarından ibarət sərgiyə baxıblar.

NDU-nun müəllim və tələbələri ilə yanaşı, ölkəmizin bir sıra ali təhsil ocaqlarının, həmçinin Türkiyənin Qars Qafqaz, Qara Dəniz Texniki universitetlərindən dəvət olunmuş mütəxəssis alimlərin, Zonquldaq, Qars, Ərdahan, Artvin Arıçılar birliklərinin əməkdaşlarının, muxtar respublikanın aidiyyəti qurumlarının, arıçı sahibkarların iştirak etdiyi beynəlxalq elmi-praktik konfransı giriş sözü ilə universitetin rektoru, AMEA-nın müxbir üzvü Saleh Məhərrəmov açıb. Rektor Azərbaycanda qədim tarixə malik arıçılığın X-XII əsrlərdə daha da inkişaf etdiyini, halallıq və zəhmətsevən əsas aqrar sahələrdən biri olduğunu bildirib. Qeyd olunub ki, regionda kənd təsərrüfatının digər sahələri kimi, arıçılığın da inkişafına dövlətimiz tərəfindən yüksək qayğı göstərilir. Bu sahə ilə məşğul olan sahibkarlara dövlət tərəfindən güzəştli kreditlər verilir, arıçılıq məhsullarının idxal və ixracına əlverişli şərait yaradılır. Sonra rektor Saleh Məhərrəmovun “Miqrasiyanın arıların parazitofaunasına təsiri” mövzusunda məruzəsi dinlənilib.

Dünən Naxçıvan Müəllimlər İnstitutunda “Təhsil kurikulumları: praktik tətbiqlər” mövzusunda respublika elmi konfransı keçirilib.
Konfransın plenar iclasını giriş sözü ilə Naxçıvan Müəllimlər İnstitutunun rektoru, professor Oruc Həsənli açaraq tədbirin əhəmiyyətindən danışıb. Qeyd edilib ki, kurikulum dünyanın mütərəqqi təhsil modellərindən biri kimi hazırda geniş miqyasda tətbiq olunur. Konseptual sənəd kimi kurikulumun məzmununda standartlar, zəruri minimum, təhsil alanların hazırlığına qoyulan tələblər, texnologiya və qiymətləndirmə məsələləri əhatə edilir. Aparılan araşdırmalar nəticəsində belə qənaət hasil edilib ki, yeni təlim strategiyaları, o cümlədən fəal təlim, interaktiv metodların tətbiqi müəllimin peşəkarlıq səviyyəsinə yeni və kifayət qədər yüksək tələblər qoyur. O, nəinki elmdə təsdiqlənmiş ideyaları, həm də bu və ya digər məsələ üzrə mübahisəli mövqeləri, eləcə də bu mövqelərin əsaslandırılmasını bacarmalıdır. Təmsil etdiyi elm sahəsini yaxşı bilməli, yeni təlim strategiyalarının tətbiqi ilə bağlı bacarıqlara malik olmalıdır.

Azərbaycan Milli Elmlər Akademiyası (AMEA) Naxçıvan Bölməsində keçirilmiş konfransı giriş sözü ilə bölmənin sədri, akademik İsmayıl Hacıyev açıb, görkəmli alimin həyat və fəaliyyəti haqqında geniş məlumat verib.
Qeyd edilib ki, Fəxrəddin Hinduşah Naxçıvani XIII-XIV əsrlərdə yaşamış azərbaycanlı tarixçi, dövlət xadimi, siyasət nəzəriyyəçisi, filoloq və ədibdir. “Əs-Sihah əl-Əcəmiyyə” adlı farsca-azərbaycanca lüğət müəl­lifi olan Hinduşah Naxçıvaninin adıçəkilən əsəri elmə məlum olan ilk fars və Azərbaycan dillərinin lüğəti kimi qiymətləndirilir. 21 bab, 393 fəsildən ibarət olan bu lüğət 3 hissədən – “Müqəddimə” (ərəb dilində), “Lüğət” və “Fars dilinin qrammatikası”ndan (ərəb dilində) ibarətdir.
Konfransda bölmənin Tarix, Etnoqrafiya və Arxeologiya İnstitutunun şöbə müdiri, tarix üzrə fəlsəfə doktoru İlhami Əliyev “Görkəmli elm adamı Fəxrəddin Hinduşah Naxçıvaninin dövrü və mühiti”, İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev “Fəxrəddin Hinduşah Naxçıvaninin həyat və yaradıcılığı”, həmin institutun elmi işçisi Nərgiz İsmayılova “Fəxrəddin və Şəmsəddin Naxçıvanilərin həyat və yaradıcılığının öyrənilməsi məsələləri”, bölmənin Əlyazmalar Fondunun şöbə müdiri Fəxrəddin Eylazov “Şəmsəddin ibn Hinduşah Naxçıvaninin həyat və yaradıcılığı” mövzularında çıxışlar ediblər.
Elmi konfransa AMEA Naxçıvan Bölməsinin sədri, akademik İsmayıl Hacıyev yekun vurub.

Xəbərlər şöbəsi

Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi, Naxçıvan Muxtar Respublikası Ali Məclisinin Sədri yanında Gənclər Fondu, Gənclər və İdman Nazirliyi, Təhsil Nazirliyi və Naxçıvan Muxtar Respublikası “Gənc­lərin İntellektual İnkişaf Mərkəzi” İctimai Birliyinin birgə təşkilatçılığı ilə Sədərək rayonunda yeniyetmələr arasında “Nuh yurdu” intellektual oyununun rayon birinciliyi keçirilib.
Tədbirdə Gənclər və İdman Nazirliyinin Gənclərlə iş şöbəsinin müdiri Canməmməd Canməmməd­ov, Sədərək Rayon Gənclər və İdman İdarəsinin rəisi Etibar Əliyev çıxış edərək intellektual oyunun keçirilməsində məqsədin Azərbaycanın, o cümlədən Naxçıvanın zəngin milli mədəniyyətinin və tarixinin təbliğindən, yeniyetmələrin intellektual səviyyələrini, dünyagörüşünü, zehni inkişafını stimullaşdırmaqdan, onlar arasında bilik və elmin nüfuzunu artırmaqdan, eləcə də asudə vaxtlarının səmərəli təşkili istiqamətində yeni üsullar tətbiq etməkdən ibarət olduğunu bildirib və iştirakçılara uğurlar arzulayıblar.
İntellektual oyunda 6 komanda iştirak edib. İki mərhələ və final mərhələsindən ibarət oyunun nəticələrinə əsasən, Sədərək rayon 2 nömrəli tam orta məktəbin “Qeyrət qalası” komandası birinci yerə layiq görülüb. İkinci yerə Sədərək rayon 1 nömrəli tam orta məktəbin “Sədərək”, üçüncü yerə isə həmin məktəbin “Ağ oğlan” komandaları layiq görülüblər.
Qaliblər təşkilatçılar tərəfindən diplom, fəxri fərman, kubok və hədiyyələrlə mükafatlandırılıblar.

 Ceyhun Məmmədov

Türkiyə Cümhuriyyətinin Abant İzzət Baysal Universitetinin nümayəndə heyəti Naxçıvan Muxtar Respublikasına səfər çərçivəsində Naxçıvan Dövlət Universitetində (NDU) olub.
NDU-nun rektoru, AMEA-nın müxbir üzvü Saleh Məhərrəmov Azərbaycan və Türkiyə arasındakı dostluq və qardaşlıq əlaqələrindən danışıb. Bu əlaqələrin inkişafında elm və təhsil müəssisələri arasında tərəfdaşlığın xüsusi əhəmiyyət kəsb etdiyini vurğulayan rektor qeyd edib ki, bu ali məktəb Türkiyə universitetləri ilə əməkdaşlığa xüsusi önəm verir. Universitet qardaş ölkənin 40-a yaxın ali təhsil ocağı ilə elm, təhsil, mədəniyyət və idman sahələrində əməkdaşlıq edir. Həmçinin universitet Türkiyənin 40 ali məktəbi ilə birgə digər ölkələrin də ali təhsil müəssisələri arasında tələbə və akademik heyətin mübadiləsini həyata keçirmək məqsədi daşıyan Mövlana Mübadilə Pro­qramının iştirakçısıdır. Tibb fakültəsinin bir neçə tələbəsi artıq bu mübadilə pro­qramına əsasən, ali təhsillərini Türkiyənin müxtəlif ali təhsil ocaqlarında davam etdirir. Qonaqlardan Əminə Əratay təmsil etdiyi universitet haqqında məlumat verərək qeyd edib ki, mərkəz kampusu Boludan 13 kilometr uzaqlıqda yerləşən Abant İzzət Baysal Universitetində 1000-ə yaxın təhsil işçisi çalışır, 10 fakültə, institut, 5 yüksək məslək məktəbi fəaliyyət göstərir, 20 minə yaxın tələbə təhsil alır. Digər çıxış edənlər Naxçıvan və Naxçıvan Dövlət Universiteti haqqında xoş təəssüratlarını bölüşüblər.
Sonra universitetlə tanışlıq olub. Tədris işləri üzrə prorektor, filologiya üzrə fəlsəfə doktoru, dosent Surə Seyid universitetin yaranma tarixi, strukturu haqqında qonaqlara məlumat verərək qeyd edib ki, 10 fakültə və 47 kafedranın, magistratura və xarici tələbələrlə iş üzrə dekanlıqların fəaliyyət göstərdiyi universitetdə hazırda 237 nəfəri xarici ölkə vətəndaşı olmaqla, 5349 nəfər tələbə ali təhsil alır. Qonaqlar müxtəlif fakültələrdə tələbələrlə görüşüb tədris prosesi ilə tanış olublar.

Mehriban SULTAN

Naxçıvan Müəllimlər İnstitutunun və Naxçıvan şəhərindəki Heydər Əliyev adına tam orta məktəbin təşkilatçılığı ilə “Ümumtəhsil məktəblərində təfəkküryönümlü kurikulumların tətbiqi yolları” mövzusunda elmi-praktik konfrans keçirilib.
Konfransı giriş sözü ilə Heydər Əliyev adına tam orta məktəbin direktoru Namiq Məmmədov açaraq bildirib ki, yeni təhsil islahatının məktəblərdə həyata keçirilməsi ilə əlaqədar olaraq qarşıya çıxan problemlərin aradan qaldırılması ilə bağlı məktəbimizlə Naxçıvan Müəllimlər İnstitutu birlikdə müxtəlif mövzularda elmi-praktik konfranslar keçirir. Bu konfranslar müzakirə formasında təşkil olunur ki, həmin müzakirələrdə ümumtəhsil məktəblərinin müəllimləri yeni tədris üsul və metodları haqqında məlumatlar əldə edirlər.
Naxçıvan Müəllimlər İnstitutunun rektoru, professor Oruc Həsənli “Təfəkküryönümlü kurikulumların mahiyyəti” mövzusunda məruzə ilə çıxış edərək bildirib ki, təhsil sahəsində kurikulum islahatının həyata keçirildiyi bir dövrdə müəllimlərin qarşısında duran əsas vəzifə milli-mənəvi və ümumbəşəri dəyərlərə malik, geniş dünyagörüşlü, təşəbbüskar və yenilikləri qiymətləndirməyi bacaran şəxsiyyət formalaşdırmaqdır. Cəmiyyətin və dövlətin inkişafını təmin edən sistemləşdirilmiş bilik, bacarıq və dəyərlərin mənimsənilməsi şagirdlərimizi gələcək həyata və səmərəli fəaliyyətə hazırlamağa xidmət edir.

Babək rayonunda yeniyetmələr arasında “Nuh yurdu” intellektual oyununun rayon birinciliyi keçirilib.
Naxçıvan Muxtar Respublikası Ali Məclisinin Sədri yanında Gənclər Fondu, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi, Gənc­lər və İdman Nazirliyi və Naxçıvan Muxtar Respublikası “Gənclərin İntellektual İnkişaf Mərkəzi” İctimai Birliyinin birgə təşkilatçılığı ilə keçirilən oyunun məqsədi Azərbaycanın, o cümlədən Naxçıvanın zəngin milli mədəniyyətini və tarixini təbliğ etmək, yeniyetmələrin intellektual səviyyələrini, dünyagörüşünü, zehni inkişafını stimullaşdırmaq, eləcə də onların asudə vaxtlarını səmərəli təşkil etməkdən ibarətdir. İntellektual oyunda 8 komanda iştirak edib. Oyunun nəticələrinə görə, Qoşadizə kənd tam orta məktəbinin “İnci” komandası birinci yerə layiq görülüb. Digər iki pillədə isə Güznüt kənd tam orta məktəbinin “Nəqşi-cahan” və Kərimbəyli kənd tam orta məktəbinin “Ulduz” komandaları qərarlaşıblar.
Qaliblər təşkilatçılar tərəfindən diplom, fəxri fərman, kubok və hədiyyələrlə mükafatlandırılıblar.

 Ceyhun Məmmədov

Dünən “Naxçıvan” Universitetində tədris prosesində yeni təlim texnologiyalarından istifadə imkanlarına həsr olunmuş konfrans keçirilib.
Konfransı giriş sözü ilə açan universitetin rektoru, professor İsmayıl Əliyev pedaqogika elminin cəmiyyətin inkişafındakı rolundan bəhs edib, müasir dövrdə pedaqogika elmi qarşısında duran vəzifələrdən, onların icrası istiqamətində yeni texnologiyaların əhəmiyyətindən danışıb. Rektor bildirib ki, tədris prosesinin düzgün qurulması, bu sahədə təlim texnologiyalarının mənimsənilməsi, onların tətbiq olunması günün tələbi kimi təhsil sisteminin qarşısında duran vəzifələrdəndir. Bildirilib ki, bu məsələlərin tədqiq olunmasına müəllimlərlə yanaşı, tələbələrin də cəlb edilməsi müasir dövrün reallıqları baxımından maraq doğurur.

Bədnam ermənilər qardaş Türkiyə Cümhuriyyətini beynəlxalq arenada gözdən salmaq üçün dünyada yalançı soyqırımı iddiaları yaymaqdadırlar. Heç bir arxiv materialına, rəsmi sənədə əsaslanmayan bu iddialar, çox təəssüf ki, bəzi məkrli dünya dövlətləri tərəfindən də dəstəklənməkdədir. Türkiyə və Azərbaycan prezidentləri, dövlət adamları bu iddianın həqiqətə uyğun olmadığını sənədlərlə sübuta yetirmiş və bu işi tarixçilərin araşdırmalarını təklif etmişlər. Ona görə də son zamanlar tez-tez beynəlxalq miqyasda türk-erməni münasibətlərinin öyrənilməsi məqsədilə elmi məclislər, konfrans və simpoziumlar təşkil edilir. Bu məclislərdə elm adamları apardığı araşdırmaları, arxivlərdən topladıqları materialları təhlil edərək ictimaiyyətə təqdim edir, bu sahədə fikir mübadilələri aparırlar.

Tanınmış tenor, Azərbaycan Respublikasının Xalq artisti, Azərbaycan Dövlət Akademik Opera və Balet Teatrının solisti Samir Cəfərov Naxçıvan Dövlət Universitetində ali məktəbin İncəsənət fakültəsinin “solo oxuma” ixtisası tələbələri üçün növbəti ustad dərsi keçib.
Dərsdən öncə universitetin İncəsənət fakültəsinin dekanı, Naxçıvan Muxtar Respublikasının Əməkdar artisti Mübariz Əsgərov tanınmış tenor Samir Cəfərovun yaradıcılığı, səhnə fəaliyyəti, Naxçıvanda vokal məktəbinin formalaşmasındakı xidmətləri haqqında danışıb.

Bakı şəhərində Rabitə və Yüksək Texnologiyalar Nazirliyinin, Heydər Əliyev Fondunun, Təhsil Nazirliyinin və AMEA-nın İnformasiya Texnologiyaları İnstitutunun birgə təşkilatçılığı ilə 17 may – Dünya Telekommunikasiya və İnformasiya Cəmiyyəti Gününə həsr olunan ali məktəb tələbələri arasında informatika üzrə ümumrespublika olimpiadası keçirilib. Naxçıvan Dövlət Universitetinin (NDU) komandası da həmin olimpiadaya qatılıb.
Qafqaz Universitetində olimpiadanın 1-ci mərhələsi keçirilib. Hər təhsil müəssisəsindən maksimum 5 komandanın iştirak edə biləcəyi olimpiadada NDU-nu 1 komanda təmsil edib. İlkin mərhələdə respublikanın 17 ali təhsil müəssisəsindən 66 komandanın iştirakı ilə keçirilən olimpiadanın birinci mərhələsində uğurla çıxış edən Naxçıvan Dövlət Universitetinin komandası final mərhələsinə vəsiqə qazanıb. “NDU” komandası müasir informasiya-kommunikasiya texnologiyalarının mənimsənilməsi və tətbiqi, informatika sahəsində nəzəri bilik səviyyəsi üzrə fərqlənərək finala çıxıb.
Qeyd edək ki, final mərhələsi AMEA-nın İnformasiya Texnologiyaları İnstitutunda keçiriləcəkdir.

Mina QASIMOVA

Türkiyə Respublikasının İqdır Universitetinin rektoru, professor-doktor İbrahim Hakkı Yılmaz və onun rəhbərlik etdiyi nümayəndə heyəti Naxçıvan Dövlət Universitetində olub. Universitetin rektoru, AMEA-nın müxbir üzvü Saleh Məhərrəmov elm, təhsil sahəsində universitetlərarası əməkdaşlığın rolundan danışıb, ali təhsil ocağı haqqında ətraflı məlumat verib. Rektor qeyd edib ki, dünyanın 80-dən çox tanınmış universiteti ilə tərəfdaşlıq edən bu ali məktəbin beynəlxalq əlaqələrində Türkiyə universitetləri birinci sırada dayanır. Qardaş ölkə­nin 40-a yaxın ali təhsil ocağı ilə, o cümlədən Ankara, Ərdahan, Van Yüzüncü İl, Kocaeli, Qars Qafqaz, Elazığ, Ərzincan, Ərzurum Atatürk universitetləri ilə uğurlu əməkdaşlıq bundan sonra da davam etdiriləcək. Məsafəcə daha yaxın olan, Türkiyənin ən gənc ali təhsil müəssisələrindən olan İqdır Universiteti ilə 2011-ci ildə əməkdaşlığa dair protokol imzalanıb.
İqdır Universitetinin rektoru, professor-doktor İbrahim Hakkı Yılmaz qeyd edib ki, 2008-2009-cu tədris ilindən fəaliyyətə başlayan bu ali məktəbdə hazırda 6 fakültə, 2 yüksək məslək məktəbi, 3 institut və 4 elmi-tədqiqat mərkəzi fəaliyyət göstərir, 375 professor-müəllim heyəti çalışır, 3126 tələbə təhsil alır.
İki universitet arasında Mövlana mübadilə protokolu imzalanıb. Türk ali təhsil müəssisələri ilə digər ölkə­lərin ali təhsil müəssisələri arasında tələbə və akademik heyətin mübadiləsini həyata keçirmək məqsədi daşıyan Mövlana Mübadilə Pro­qramının protokoluna əsasən, Naxçıvan Dövlət Universiteti Türkiyənin digər 40 ali məktəbi ilə yanaşı, İqdır Universiteti ilə də tələbə mobilliyi həyata keçirəcək.

Azərbaycanda elmin, təhsilin inkişafı onun ayrılmaz tərkib hissəsi olan Naxçıvan Muxtar Respublikasında da öz real inikasını tapmaqdadır. Yüksəkixtisaslı gənc alim və mütəxəssislərin hazırlanması, onların intellektual səviyyələrinin yüksəldilməsi üçün Naxçıvan Dövlət Universitetində də mühüm işlər görülür.
Son iyirmi ildə Naxçıvan Dövlət Universiteti elmin, təhsilin tərəqqisinə göstərilən yüksək dövlət qayğısından bəhrələnərək müasir universitet kimi formalaşıb, ölkənin qabaqcıl ali məktəblərindən birinə çevrilib. Dünya elm, təhsil sisteminə uğurla inteqrasiya edən bu ali məktəbdə son iyirmi ildə qazanılan əsas uğurlardan biri də tələbə mobilliyinə nail olunmasıdır. Tələbə və doktorantlarımız dünya təhsil təcrübəsini mənimsəmək məqsədilə Türkiyə, Rusiya, Gürcüstan, Rumıniya, Çexiya, İspaniya kimi ölkələrdə təhsillərini uğurla davam etdirirlər. Həmyerlimiz Şəhanə Hüseyn­ova da “Erasmus Mundus” proqramı çərçivəsində xaricdə doktorantura təhsili alan ilk iki azərbaycanlıdan biridir. Şəhanə Hüseynova 2002-2006-cı illərdə Naxçıvan Dövlət Universitetinin Təbiətşünaslıq fakültəsində “kimya müəllimliyi” ixtisası üzrə ali təhsil alıb. 2006-2008-ci illərdə həmin ali məktəbdə “qeyri-üzvi kimya” ixtisası üzrə magistratura təhsil pilləsində oxuyub. 2008-ci ildə Naxçıvan Dövlət Universitetinin “qeyri-üzvi kimya” ixtisası üzrə doktorantı olub.

Aprelin 4-də “Naxçıvan” Universitetində “Naxçıvan” Universiteti, AMEA Naxçıvan Bölməsi və Naxçıvan Dövlət Universiteti əməkdaşlarının iştirakı ilə “Azərbaycanın tarixi coğrafiyasının aktual problemləri” mövzusunda respublika elmi konfransı keçirilib.
Konfransın plenar iclasını giriş sözü ilə “Naxçıvan” Universitetinin rektoru, professor İsmayıl Əliyev açaraq bildirib ki, müasir dövrdə ölkəmizin sürətli sosial-iqtisadi inkişafı elmin müxtəlif sahələrində, o cümlədən tarixi-coğrafi problemlərin həllində yeni yanaşmalar tələb edir. Naxçıvan Muxtar Respublikasında elm və təhsilə göstərilən dövlət qayğısı elmi kadrların formalaşdırılması istiqamətində qarşımıza yeni vəzifələr qoyur. Keçirilən elmi konfransın əsas qayəsi də muxtar respublikanın elmi müəssisələrinin mövcud potensialından istifadə etməklə təqdim olunan mövzular üzrə elmi fikirlərin bölüşdürülməsidir.
Plenar iclasda çıxış edən AMEA Naxçıvan Bölməsinin sədri, akademik İsmayıl Hacıyev bildirib ki, Naxçıvanda elm və təhsilə olan maraq, tarixi coğrafiya problemlərinə müraciət olunması həmişə tarixi zərurət daşıyıb, xüsusən ötən əsrin son illərində baş verən hadisələr fonunda bu zərurət öz aktuallığını göstərib. Hazırda bu sahəyə olan marağın artırılması ölkəmizin və muxtar respublikamızın yerləşdiyi ərazinin tarixi hüdudlarının müəyyən olunması, regionda baş vermiş müxtəlif hadisələrin tarixi gerçəklikləri fonunda çox əhəmiyyətlidir. Bütün bunlar ölkəmizin məruz qaldığı haqsızlıqların unudulmaması, tarixi torpaqlarımızın yaxşı tanınması baxımından müasir Azərbaycan tarixi tədqiqinin əsas problemlərindəndir.

Gənc nəslin tərbiyəsi, yeniliklərdən məlumatı olan insan yetişdirilməsi bütün inkişaf mərhələlərində hər kəsi düşündürən qayğılardan olmuşdur. Məhz buna görə də dünyadakı inkişafın axarından kənarda qalmamaq üçün bütün yolların məhz təhsildən keçdiyini bilən aqillərimiz istənilən şərtlər daxilində təhsili özlərinin əsas qayğılarından biri olduğunu bəyan etmişlər. Dövr dəyişir və zaman pəncərəsindən geriyə dönüb baxarkən görürük ki, gün-güzəranımız, gələcəyimiz üçün edilən nə varsa, öz qiymətini sağlam, savadlı gənclərlə, onların uğurları ilə tapır. Belə olduqda millətin minillik tarixini, mədəniyyətini yaşadacaq insanların yetişdirilməsi üçün dövlət-xalq-məktəb əməkdaşlığının möhkəmləndirilməsi, əzbərçilikdən uzaq, analitik təfəkkürlü gənclərin hazırlığı günün aktual məsələsinə çevrilir.

Naxçıvan Musiqi Kollecinin 40 illik yubileyi qeyd olunur

Bu ilin aprelində Naxçıvan Musiqi Kollecinin yaradılmasının 40 illiyi tamam olur. Naxçıvan Muxtar Respublikası Ali Məclisinin Sədri 29 mart 2015-ci il tarixdə “Naxçıvan Musiqi Kollecinin 40 illik yubileyinin keçirilməsi haqqında” Sərəncam imzalayıb. Həmin sərəncam Naxçıvan musiqiçilərinin böyük sevincinə səbəb olmaqla onların gələcək fəaliyyətinə böyük qayğının ifadəsidir.

40 il, əslində, təhsil ocağı üçün az müddət deyil. Bir qərinədən artıq zaman kəsiyidir. Və düz 40 ildir ki, burada gənc nəslə musiqi elmi, ifaçılıq sənəti öyrədilir. Bu sənət ocağı ölkəmizdə mədəniyyətin, incəsənətin inkişafının dönüş dövründə, çiçəklənən vaxtında yaradılıb. Daha doğrusu, 1974-cü ildə muxtar respublikamızın təşkil olunmasının 50 illik yubiley tədbirində iştirak etmək üçün Naxçıvana gələn xalqımızın ümummilli lideri Heydər Əliyevin bilavasitə təşəbbüsü, tapşırığı ilə həyata vəsiqə alıb. Naxçıvan Musiqi Kolleci ulu öndərin muxtar respublika sakinlərinə bəxş etdiyi hədiyyələrdən və onun yadigarlarından biridir. 1975-ci il aprel ayının 18-də Naxçıvan Orta İxtisas Musiqi Məktəbi kimi fəaliyyətə başlayan bu sənət ocağının ixtisaslı musiqiçi kadrların hazırlanmasında, xalqımıza məxsus musiqi ənənələrinin yaşadılmasında, mahnılarımızın, eləcə də dünya klassik musiqisinin təbliği və öyrənilməsi sahəsində fəaliyyəti təqdirəlayiqdir. Həmçinin onun fəaliyyəti ilə muxtar respublikamızın uşaq musiqi məktəblərinin ixtisaslı müəllimlərlə təmin olunması problemləri də aradan qalxmağa başlayıb. Ümumiyyətlə, Musiqi Kollecinin Naxçıvanın mədəni həyatının inkişafındakı rolu böyükdür. Kollec olmasaydı, Naxçıvan Dövlət Universitetinin Konservatoriyasını yaratmaq da çətin olardı.

Türkiyə Respublikasının Ərzurum Atatürk Universitetinin rektoru, professor-doktor Hikmət Koçakın rəhbərlik etdiyi nümayəndə heyəti Naxçıvan Dövlət Universitetində olub.
Universitetin rektoru, AMEA-nın müxbir üzvü Saleh Məhərrəmov bildirib ki, dünyanın 80-dən çox tanınmış universiteti ilə tərəfdaşlıq edən bu ali məktəb Türkiyə universitetləri ilə əməkdaşlığa xüsusi əhəmiyyət verir. Qardaş ölkə­nin 40-a yaxın ali təhsil ocağı ilə əməkdaşlıq bu gün də uğurla davam etdirilir. Bu əlaqələrin təməli 1992-ci ildə Ərzurum Atatürk Universiteti ilə əməkdaşlıq vasitəsilə qoyulub. Tibb fakültəsinin və “baytarlıq” ixtisasının tələbələri müxtəlif vaxtlarda bu ali təhsil müəssisəsində təcrübədə olublar, müştərək konfranslar keçirilib. Təsadüfi deyil ki, 2012-ci ildə Naxçıvan Dövlət Universitetinin Elmi Şurasının qərarı ilə universitetlərarası elmi-mədəni əlaqələrin inkişafı sahəsindəki xidmətlərinə görə Ərzurum Atatürk Universitetinin rektoru, professor-doktor Hikmət Koçak Naxçıvan Dövlət Universitetinin fəxri doktoru seçilib. Rektor vurğulayıb ki, 2011 və 2012-ci illərdə yenilənən universitetlərarası əməkdaşlıq müqaviləsi bundan sonra da elm və təhsilin inkişafına öz töhfəsini verəcək.
Ərzurum Atatürk Universitetinin rektoru, professor-doktor Hikmət Koçak deyib ki, universitetin beynəlxalq əlaqələrində Azərbaycan ali məktəblərinin özünəməxsus yeri vardır. Naxçıvan Dövlət Universiteti ilə əməkdaşlığın inkişaf etdirilməsi bundan sonra da diqqət mərkəzində saxlanılacaq.

Naxçıvan Dövlət Universitetində 2014-2015-ci tədris ilinin ikinci semestrinə aid pedaqoji təcrübənin başlanğıc konfransı keçirilib. Konfransı universitetin rektoru, AMEA-nın müxbir üzvü Saleh Məhərrəmov açıb.
Universitetin Tədris şöbəsinin müdiri, tarix üzrə fəlsəfə doktoru Rafiq Rəhimov məlumat verib ki, 2014-2015-ci tədris ilinin ikinci semestrində pedaqoji profilli ixtisaslarda III-IV kurslarda təhsil alan 563 tələbə Naxçıvan şəhərindəki Qızlar Liseyi, Babək rayonunun Şıxmahmud və Kərimbəyli kənd tam orta məktəbləri də daxil olmaqla muxtar respublikanın 17 tam orta məktəbində təcrübədə olacaqlar. Tədris şöbəsinin müdiri pedaqoji təcrübə zamanı dərslərin bolonya sisteminin tələblərinə uyğun şəkildə, informasiya-kommunikasiya texnologiyaları vasitəsilə keçilməsinin, tərbiyəvi tədbirlərin təşkilinin əhəmiyyətindən, təcrübəçi tələbələrin, metodistlərin, məktəb müdiriyyətinin üzərinə düşən vəzifələrdən, sənədləşmə işlərindən də bəhs edib.
Sonra Bədən tərbiyəsi və idman kafedrasının müdiri Həsən Babayev, psixologiya üzrə fəlsəfə doktoru Salatın Hacıyeva çıxış edərək konfrans iştirakçılarını pedaqoji təcrübənin sonunda təhvil veriləcək sənədlər, qiymətləndirmə meyarı, açıq dərslərin təşkili barədə məlumatlandırıblar.
Naxçıvan Muxtar Respublikasının Təhsil naziri Piri Nağıyev çıxış edərək Azərbaycanda aparılan təhsil islahatlarının uğurlarından, muxtar respublikada təhsilin inkişaf səviyyəsindən danışıb.

Xəbərlər şöbəsi

Dünən Şərur rayonunda yeniyetmələr arasında “Nuh yurdu” intellektual oyununun Şərur rayon birinciliyi keçirilib. Naxçıvan Muxtar Respublikası Ali Məclisinin Sədri yanında Gənc­lər Fondunun, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin, Gənclər və İdman Nazirliyinin və Naxçıvan Muxtar Respublikası Gənclərin İntellektual İnkişaf Mərkəzi İctimai Birliyinin birgə təşkilatçılığı ilə keçirilən oyunun məqsədi Azərbaycanın, o cümlədən Naxçıvanın zəngin milli mədəniyyətinin və tarixinin təbliği, yeniyetmələrin intellektual səviyyələrinin, dünyagörüşlərinin, zehni inkişafının stimullaşdırılması, onlar arasında bilik və elmin nüfuzunun artırılması, eləcə də asudə vaxtlarının səmərəli təşkili istiqamətində yeni üsulların tətbiqindən ibarət olub. İntellektual oyunda 8 komanda iştirak edib. Birinci yerə Şərur şəhər 2 nömrəli tam orta məktəbin “Arpaçay” komandası layiq görülüb. Digər iki pillədə isə Sərxanlı, Kürkənd və Dərəkənd tam orta məktəblərinin birgə komandası olan “Şahin” və Aralıq kənd tam orta məktəbinin “Zəngəzur” komandaları qərarlaşıblar.
Qaliblərə təşkilatçılar tərəfindən diplom, fəxri fərman, kubok və hədiyyələr təqdim olunub.

Ceyhun MƏMMƏDOV

Dünən Naxçıvan şəhərindəki 5 nömrəli tam orta məktəbdə 31 Mart – Azərbaycanlıların Soyqırımı Gününə həsr olunmuş muxtar respublika ümumtəhsil məktəblərinin şagirdləri arasında şeir müsabiqəsi keçirilib.

Müsabiqənin keçirilməsində məqsəd soyqırımı qurbanlarının xatirəsinin yad edilməsi, məktəblilərdə vətənpərvərlik, Vətənə məhəbbət hislərinin yüksəldilməsi, onlara vətəndaşlıq duyğusunun aşılanması və istedadlı şagirdlərin üzə çıxarılmasından ibarət olub. Tədbirdə Naxçıvan Muxtar Respublikası Gənclər və İdman, Təhsil nazirliklərinin və Naxçıvan Muxtar Respublikası Yazıçılar Birliyinin nümayəndələri çıxış edərək xalqımızın soyqırımı tarixi haqda danışıblar.
Sonra şagirdlərin ifasında vətənpərvərlik mövzusunda şeirlər səsləndirilib. Münsiflər heyətinin qərarına əsasən, Kəngərli rayon Böyükdüz kənd tam orta məktəbinin şagirdi Aynur İbrahimova birinci yerə layiq görülüb. Naxçıvan şəhər 14 nömrəli tam orta məktəbin şagirdi Anar Mikayıllı ikinci, Şahbuz şəhər 1 nömrəli tam orta məktəbin şagirdi Qızbəsti Quliyeva isə üçüncü yerlərə çıxıblar. Heydər Əliyev adına tam orta məktəbin şagirdi Qönçə Aydınlı, Ordubad rayon Yuxarı Əylis kənd tam orta məktəbinin şagirdi Rumiyyə Tağıyeva, Naxçıvan şəhərindəki Qızlar Liseyinin şagirdi Fəhmidə Mollayeva isə həvəsləndirici yerlərə layiq görülüblər.
Qaliblər təşkilatçılar tərəfindən diplom, fəxri fərman və hədiyyələrlə təltif olunublar.

 Ceyhun MƏMMƏDOV

Bu gün respublikamızın ümumtəhsil sistemində əsaslı islahatlar aparılır. Ulu öndər Heydər Əliyev ölkəmizin tərəqqisində təhsilin rolunu yüksək qiymətləndirərək bu sahədə əsaslı islahatların keçirilməsinin ilk təşəbbüskarı olub, irəli sürdüyü müddəalarla Azərbaycan təhsilinin inkişaf istiqamətlərini müəyyənləşdirib.
“Azərbaycan Respublikasının təhsil sahəsində İslahat Proqramı” müstəsna əhəmiyyətə malik tarixi sənəd kimi müasir dövrdə ölkəmizin ümumi təhsil sahəsində dövlət siyasətinin konseptual prinsiplərini və strategiyasını formalaşdırıb. Dövlətin təhsillə bağlı siyasəti, cəmiyyətin ehtiyac və tələbatı, təhsil alanın maraqları nəzərə alınaraq təhsilin məzmunu yenidən qurulur, yeni qiymətləndirmə sistemi tətbiq olunur. Müasir pedaqoji yanaşmalar əsasında aparılan və elmi-nəzəri əsaslara söykənən bu prosesin təməli 1999-cu ildə islahat proqramının qəbul edilməsi ilə qoyulub. Məqsəd Azərbaycanda milli zəminə, bəşəri dəyərlərə söykənən, differensiallaşdırma, fərdləşdirmə və inteqrasiya kimi prinsiplərə üstünlük verən, təhsil alanın bu prosesin əsas subyektinə çevrilməsini özunə əsas vəzifə hesab edən yeni təhsil sisteminin yaradılmasıdır.
Tələbyönümlülük, nəticəyönümlülük, şagirdyönümlülük, şəxsiyyətyönümlülük, inteqrativlik təhsilin müasir məzmununun didaktik əsasını təşkil edir və Azərbaycan Respublikası Nazirlər Kabinetinin 30 oktyabr 2006-cı il tarixli Qərarı ilə təsdiq olunmuş “Azərbaycan Respublikasında ümumi təhsilin konsepsiyası (Milli Kurikulumu)” bilavasitə həmin prinsipləri özündə əks etdirir.
2009-cu ildə “Təhsil haqqında” Azərbaycan Respublikasının Qanunu qüvvəyə minib və 3 iyun 2010-cu ildə “Ümumi təhsil pilləsinin dövlət standartı və proqramları (kurikulumları)” təsdiq edilib.

2015-ci il martın 27-də ölkəmizin ali elmi qurumu olan Azərbaycan Milli Elmlər Akademiyasının təsis edilməsinin 70 ili tamam olur. Ölkə Prezidenti cənab İlham Əliyev 2014-cü il martın 14-də “Azərbaycan Milli Elmlər Akademiyasının 70 illik yubileyinin keçirilməsi haqqında” Sərəncam imzalamışdır. Sərəncamda deyilir: “Ölkədə elmi-intellektual potensialın milli sərvət kimi formalaşdırılmasında, elmin dövrün tələblərindən irəli gələn strateji istiqamətlərinin müəyyənləşdirilməsi və onun ən müxtəlif sahələri üzrə yüksəkixtisaslı kadrların hazırlanmasında Milli Elmlər Akademiyasının müstəsna rolu vardır. Yarandığı vaxtdan etibarən ötən fəaliyyət müddəti ərzində o, mühüm nailiyyətlər qazanmış, elmi məktəblərin qurulmasına müvəffəq olmuş, beynəlxalq elm strukturlarına uğurla inteqrasiya etmişdir. Akademiya müstəqil dövlətçiliyin əsaslarının möhkəmləndirilməsində öz üzərinə düşən vəzifələrin öhdəsindən bu gün də layiqincə gəlir və cəmiyyətin sosial-iqtisadi tərəqqisinə, mədəni-mənəvi təşəkkülünə töhfələrini əsirgəmir”.

Naxçıvan Dövlət Universitetində görkəmli ədəbiyyatşünas-alim Əziz Şərifin 120 illik yubileyinə həsr olunmuş elmi konfrans keçirilib.
“Əziz Şərif – 120: Azərbaycan elminin fədakar səfiri” mövzusunda keçirilən elmi konfransı giriş sözü ilə universitetin rektoru, AMEA-nın müxbir üzvü Saleh Məhərrəmov açıb.
“Əziz Şərifin həyatı və yaradıcı­lıq yolu” mövzusunda məruzə ilə çıxış edən filologiya üzrə fəlsəfə doktoru, dosent Seyfəddin Eyvazov bildirib ki, Azərbaycanın əsas elm və mədəniyyət mərkəzlərindən olan Naxçıvan şəhərində dünyaya gələn Əziz Şərif burada məşhur maarifçi Məhəmməd Tağı Sidqinin rəhbərlik etdiyi “Tərbiyə” məktəbində təhsil alıb. 1905-ci ildə Tiflisə gedərək atası Qurbanəli Şərifzadənin yaxın dostu və məsləkdaşı Cəlil Məmmədquluzadənin ailəsi ilə yaşaması onun gələcək taleyi üçün mühüm əhəmiyyət kəsb edib və həmin illər Əziz Şərifin elmi fəaliyyətində mühüm rol oynayıb. Seyfəddin Eyvaz­ov XX əsr Azərbaycan elmi-ədəbi və ictimai fikrinin inkişafında, ədəbiyyatımızın və elmimizin dünyada təbliği və tanıdılmasında ustad alimin müstəsna xidmətlərindən danışıb.

Hər il mart ayının 14-ü Türkiyədə “Tibb bayramı” kimi qeyd olunur. Bu il Türkiyənin Girəsun Universitetində keçirilən bayram tədbirlərində Naxçıvan Muxtar Respublikasının Səhiyyə naziri və Naxçıvan Dövlət Universitetinin bir qrup nümayəndə heyəti iştirak edib. Türkiyənin Girəsun Universitetinin rektoru, professor-doktor Aygün Attar Naxçıvandan gəlmiş heyəti universitetlə tanış edib.

Girəsun Universitetinin rektoru Aygün Attar və Naxçıvan Dövlət Universitetinin rektoru, AMEA-nın müxbir üzvü Saleh Məhərrəmov iki universitet arasında akademik və elmi işbirliyi haqqında müqavilə imzalayıblar.
Bu müqavilənin məqsədi iki universitet arasında akademik və elmi iş sahələrində əməkdaşlıq etmək və ortaq təhsil sahəsi yaratmaqdan ibarətdir. Müqavilədə iki universitet arasında təhsil sahəsində əməkdaşlığın inkişafında müəllim və tələbə mübadilələrinin həyata keçirilməsi, müştərək elmi-tədqiqat layihələrinin hazırlanması, ortaq konfrans, seminar və tədbirlərin keçirilməsi də nəzərdə tutulur.
Sonra Tibb fakültəsi Tətbiqi və Araşdırma Xəstəxanasının açılış mərasimi keçirilib. Girəsun valisi Həsən Qaraxanın, Girəsun Universitetinin professor və müəllim heyətinin, Naxçıvan Muxtar Respublikasından Girəsuna dəvət olunmuş qonaqların, həmçinin ictimaiyyət nümayəndələrinin qatıldığı mərasimdə açılışı bildirən lent kəsildikdən sonra yeni xəstəxana ilə tanışlıq olub. Xəstəxana binasının ən müasir tələblərə cavab verən tibbi müəssisə kimi layihələndirilərək inşa edildiyi vurğulanıb. Qonaqlara məlumat verilib ki, xəstəxanada Stasionar, Poliklinika və Təcili yardım şöbələri fəaliyyət göstərir. Burada həmçinin yoluxucu xəstəliklər, pediatriya, doğuş və ginekologiya, cərrahiyyə, terapiya bölmələri, laboratoriya, burun-boğaz-qulaq kabineti, fizioterapiya, elektrokardioqrafiya və ul­trasəslə müayinə otaqları vardır.

Muxtar respublikanın ümum­təhsil məktəblərində çalışan müəllimlərin attestasiyası dünən başa çatıb. Son attestasiya imtahanında “musiqi”, “təsviri incəsənət”, “əmək hazırlığı” və “texnologiya” fənlərini tədris edən müəllimlər biliklərini sınayıblar. 

Attestasiyanın yekunu ilə bağlı Naxçıvan Muxtar Respublikası Təhsil Nazirliyinin mətbuat xidmətindən qəzetimizə verilən məlumatda bildirilir ki, mart ayının 1-dən başlayan imtahanlarda martın 18-nə qədər Azərbaycan dili və ədəbiyyat, tarix, fizika, biologiya, kimya, fiziki tərbiyə, gənclərin çağırışaqədərki hazır­lığı, xarici dil, coğrafiya, riyaziyyat, informatika, ibtidai sinif müəllimləri iştirak ediblər. İmtahanlar Naxçıvan şəhər 14, Şərur şəhər 2, Culfa şəhər 3, Şahbuz şəhər 1 nömrəli məktəblərin binalarında keçirilib. Müəllimlərin biliklərinin sınandığı ünvanlar sırasında Babək qəsəbə tam orta məktəbi, Ordubad şəhər internat məktəbi, Kəngərli rayon Qıvraq qəsəbə tam orta məktəbi, Sədərək rayon Heydər­abad qəsəbə tam orta məktəbi də olub.
Ümumiyyətlə, iki saat müddətində yazılı test formasında keçirilən attestasiya imtahanlarında müəllimlərə 80 sual təqdim olunub. Sözügedən attestasiya müəllimlərin dövlət təhsil standartlarına uyğun bilik, bacarıq və vərdişlərə malik olması, təhsil proqramlarına uyğun ixtisas və elmi-pedaqoji səviyyələrinin yüksəldilməsi, onların peşəkarlıq səviyyəsinin artırılması, əlavə təlim ehtiyaclarının müəyyənləşdirilməsi, müəllimlik fəaliyyətinin stimullaşdırılması və onların əməyinin qiymətləndirilməsinin təmin edilməsi məqsədilə aparılıb.

Xəbərlər şöbəsi

Naxçıvan Dövlət Universitetində Frankofoniya bayramı qeyd olunub.
Universitetin rektoru, AMEA-nın müxbir üzvü Saleh Məhər­rəm­ov giriş sözü ilə çıxış edərək fransız dilinin dünyada qəbul olunan əsas beynəlxalq dillərdən biri olduğunu, xarici dillərin, o cümlədən fransız dilinin öyrənilməsinin dünyaya inteqrasiya, ölkələrarası siyasi, elmi, mədəni əlaqələrin gələcək inkişafı baxımından zəruri olduğunu vurğulayıb. Rektor bu istiqamətdə universitetdə görülən işləri yüksək dəyərləndirərək bildirib ki, bu yaxınlarda Fransanın ali dövlət mükafatı – “Akademik Palma (Kavaler dərəcəsi)” ordeni ilə təltif edilən Azərbaycan təhsilinin dörd nümayəndəsindən biri Naxçıvan Dövlət Universitetinin Fransız dili kafedrasının müdiri, dosent Əli Allahverdiyev olub. O, Azərbaycanda fransız dilinin inkişafı və yayılması üçün göstərdiyi səylərə, Azərbaycan-Fransa ədəbi əlaqələri ilə bağlı apardığı elmi tədqiqatlara görə Fransanın Baş nazirinin təsdiqi ilə bu yüksək mükafata layiq görülüb. Rektor bu yaxınlarda Fransanın paytaxtı Paris şəhərində “Kampus Frans” Agentliyinin təşkilatçılığı ilə keçirilən “Azərbaycan günü” tədbirlərindən, Fransadakı Azərbaycan Mədəniyyət Mərkəzinin fəaliyyətindən danışaraq qeyd edib ki, bütün bunlar iki ölkə arasında əməkdaşlığın, xüsusilə elm, təhsil sahəsində tərəfdaşlığın möhkəmlənməsi baxımından əhəmiyyətlidir.

Martın 15-də Naxçıvan şəhərindəki 7 nömrəli tam orta məktəbdə ölkə üzrə keçirilən fənn olimpiadalarının Azərbaycan Respublikası mərhələsinin yarımfinal turu keçirilib.
Naxçıvan Muxtar Respublikası Təhsil Nazirliyinin mətbuat xidmətindən aldığımız məlumata görə, 8 fənn üzrə keçirilən bilik olimpiadasının yarımfinal turunda IX-XI siniflər üzrə 316 şagird iştirak edib. Nəticələrin qiymətləndirilməsi Azərbaycan Respublikası Təhsil Nazirliyində yaradılan komissiya tərəfindən aparılacaq. Müvəffəqiyyət qazanan şagirdlər olimpiadanın final mərhələsinə vəsiqə qazanacaqlar.
Məlumat üçün qeyd edək ki, istedadlı uşaq və gənclərin aşkara çıxarılmasında, onların həvəsləndirilməsi və rəğbətləndirilməsində, təlimdə sağlam rəqabətin yaradılmasında fənn olimpiadaları müstəsna rol oynayır. Muxtar respublikada təhsil sahəsində aparılan məqsədyönlü işlər nəticəsində məktəblərdə ayrı-ayrı fənlər üzrə olimpiadalarda iştiraka layiq şagirdlər seçilir və onların hazırlığına nəzarət gücləndirilir. Bu cür bilik olimpiadaları məktəblərin fəaliyyətinin əsas meyarlarından biri kimi dəyərləndirilir.

Xəbərlər şöbəsi

Mart ayının 15-də Tələbə Qəbulu üzrə Dövlət Komissiyası 2015-2016-cı tədris ili üçün Azərbaycan Respublikasında baza ali tibb təhsili əsasında həkim-mütəxəssislərin hazırlanması məqsədilə rezidentura səviyyəsinə qəbul imtahanının I mərhələsini keçirib. Naxçıvan şəhərində Naxçıvan Dövlət Universitetində keçirilən imtahanda 35 namizəd iştirak edib.
Birinci mərhələdə namizədlərə baza ali tibb təhsili istiqamətinə müvafiq olaraq, qəbul proqramı əsasında baza fənləri üzrə 100 test tapşırığı təqdim olunub. İmtahan suallarının cavablandırılmasına 2 saat 30 dəqiqə vaxt ayrılıb.
Rezidentura səviyyəsinə qəbul imtahanının II mərhələsi iyulun 7-də keçiriləcək və ikinci mərhələyə imtahanın birinci mərhələsində topladığı bal 40-dan az olmayan namizədlər buraxılacaqlar.
Qeyd edək ki, hər bir test tapşırığının düzgün cavabı 1 (bir) balla qiymətləndirilir və səhv cavablar namizədin imtahan nəticəsinə təsir göstərmir.

Xəbərlər şöbəsi

Ali məktəbdə ilk dərs günü auditoriyaya daxil olan müəllimin dərsi hamımızı ovsunladı. Doxsan dəqiqəlik mühazirədə ondan çoxlu şeir nümunələri eşitdik. Bu şeirlərin hamısı mövzunun izahı ilə bağlı idi. Dərsin sonunda: “müəllim, bu şeirləri kim yazıb?” sualımız cavabsız qaldı. Sonradan öyrəndik ki, şeirlərin müəllifi də müəllimimizin özüdür... 

...Bəzən elə mövzular olur ki, onları qələmə almaqda çətinlik çəkirsən. Üstəgəl ki, mövzunun qəhrəmanı sənə dərs deyən müəllim ola. İnsanın həyatında böyük rol oynayan, heç vaxt unutmayacağı müəllimləri az deyil. Yaradıcılığı haqqında bəhs etmək istədiyim Naxçıvan Dövlət Universitetinin kafedra müdiri, pedaqogika üzrə elmlər doktoru, professor Elbəyi Maqsudov məhz belə müəllim, belə alimdir.
Azərbaycanda, eləcə də dünyada ana dili elminin qrammatikasını poetik dillə təsvir və tərənnüm etməyə girişən adamlar azdır. Dünyada barmaqla sayılacaq qədər azdır elmi poeziyaya gətirənlər. O, Azərbaycan dilçiliyi tarixində ilk dəfə olaraq poetik-praktik qrammatika yaradaraq dilin bütün bölmələrini elmi, bədii və praktik sintezlə poetikləşdirib. “Poetik-praktik Azərbaycan dili” kitabı dövlət dilinin tətbiqi baxımından poetik dillə yazılmış ilk fundamental əsər kimi məktəblilər, abituriyentlər, müəllimlər və xaricdə yaşayan həmvətənlərimiz üçün əvəz­edilməz mənbədir. Akademik İsa Həbib­bəyli kitab haqqında fikirlərini belə ifadə edib: “Poetik-praktik Azərbaycan dili” kitabını Azərbaycan cəmiyyətinə, dünya azərbaycanlılarına yüksək səviyyədə təqdim etmək olar. Bu, böyük intellektual düşüncə ilə ciddi elmi düşüncənin vəhdətindən yaranmış mükəmməl bir əsərdir. Bunu təkcə yaxşı Azərbaycan dili müəllimi yaza bilməz, bunu təkcə yaxşı şair də yaza bilməz. Hər ikisini mükəmməl bilən və içində dil, Vətən, Azərbaycan sevgisi olan bir adam yaza bilər. Bu da Elbəyi müəllimdir”.

Babək Rayon Mədəniyyət Evində görkəmli elm xadimi Əziz Şərifin 120 illik yubileyi münasibətilə konfrans keçirilib.
Konfransı giriş sözü ilə rayon Mədəniyyət və Turizm Şöbəsinin müdiri Ceyhun Fərəcov açıb.
Tədbirdə muxtar respublika Mədəniyyət və Turizm Nazirliyinin Mədəniyyət üzrə Elmi Metodik Mərkəzinin şöbə müdiri Fərzalı Səfərov­un, Cəlil Məmmədquluzadənin Nehrəm kəndindəki xatirə muzeyinin direktoru Akif Hacıyevin, Babək Rayon Mərkəzləşdirilmiş Kitabxana Sisteminin direktoru Fatma Bağırovanın, rayon Uşaq musiqi məktəbinin müəllimi Vəfa Əsgərovanın çıxışları olub.
Çıxışlarda qeyd edilib ki, maraqlı həyat və zəngin yaradıcılıq yolu keçən Əziz Şərif ədəbi tənqid və ədəbiyyatşünaslıq sahəsində səmərəli fəaliyyət göstərib, XIX-XX əsrlər Azərbaycan ədəbiyyatının az tədqiq olunan ədəbi şəxsiyyətləri haqqında qiymətli əsərlər yazıb. Çoxlu məqalələrin, elmi əsərlərin, tənqidi-bioqrafik oçerk və mono­qrafiyaların müəllifi olan Əziz Şərifin elmi fəaliyyəti və axtarışları nəticəsində Azərbaycanın görkəmli yazıçılarının bir sıra əsərləri, XIX-XX əsrlərə dair çoxsaylı məktublar, sənəd və fotoşəkillər, qiymətli əlyazma materialları aşkarlanaraq elmi və ədəbi mühitə təqdim edilib.

Martın 11-də müəllimlərin peşəkarlıq səviyyəsinin artırılması və onların əməyinin qiymətləndirilməsinin təmin olunması məqsədilə Naxçıvan Muxtar Respublikası ümumtəhsil məktəblərində çalışan “gənclərin çağırışaqədərki hazırlığı” və “fiziki tərbiyə” fənlərini tədris edən müəllimlərin attestasiyası keçirilib. “Gənclərin çağırışaqədərki hazırlığı” fənni üzrə 172, “fiziki tərbiyə” fənni üzrə isə 316 nəfər olmaqla imtahanda, ümumilikdə, muxtar respublika üzrə 488 müəllim iştirak edib. Qeyd edək ki, imtahanlar Naxçıvan şəhər 14 nömrəli tam orta məktəbdə, Şərur şəhər 2 nömrəli tam orta məktəbdə, Babək rayon Babək qəsəbə tam orta məktəbində, Culfa şəhər 3 nömrəli tam orta məktəbdə, Ordubad rayon internat məktəbində, Şahbuz rayon 1 nömrəli tam orta məktəbdə, Kəngərli rayon Qıvraq qəsəbə tam orta məktəbində və Sədərək rayon Heydər­abad qəsəbə tam orta məktəbində keçirilib.
Dünən isə “coğrafiya” fənnindən attestasiya olub.
İki saat müddətində yazılı test formasında keçirilən attestasiyada müəllimlərə 80 sual (40 ixtisas, 25 metodika və kurikulum, 15 informasiya-kommunikasiya texnologiyalarından) təqdim olunub.
Qeyd edək ki, 1 mart 2015-ci il tarixdən bu günədək muxtar respublikada “Azərbaycan dili və ədəbiyyat”, “tarix”, “fizika”, “kimya” və “biologiya” fənləri üzrə də ixtisas müəllimlərinin attestasiya imtahanları keçirilib.

Xəbərlər şöbəsi

Martın 12-də AMEA Naxçıvan Bölməsində ədəbiyyatşünas-alim Əziz Şərifin 120 illik yubileyi münasibətilə “Görkəmli pedaqoq və elm xadimi” adlı elmi konfrans keçirilib.
Elmi konfransı giriş sözü ilə bölmə sədri, akademik İsmayıl Hacıyev açaraq Əziz Şərifin həyat və yaradıcılığı haqqında məlumat verdi. Qeyd edildi ki, Əməkdar elm xadimi, filologiya elmləri doktoru, professor Əziz Şərifin XX əsr Azərbaycan elmi-ədəbi və ictimai fikrinin inkişafında böyük xidmətləri vardır. Professor Əziz Şərif ölkəmizdə və onun hüdudlarından kənarda görkəmli ədəbiyyatşünas, fədakar tərcüməçi və publisist kimi şöhrət qazanıb. Onun adı son yüz ilin adlı-sanlı Azərbaycan ziyalıları arasında xüsusi iftixarla çəkilir.
Vurğulanıb ki, ədəbiyyatımızın və elmimizin dünyada təbliği və tanıdılmasında ustad alimin müstəsna xidmətləri yüksək qiymətə layiqdir. Azərbaycanın əsas elm və mədəniyyət mərkəzlərindən olan Naxçıvan şəhərində dünyaya gələn Əziz Şərif burada məşhur maarifçi Məhəmməd Tağı Sidqinin rəhbərlik etdiyi “Tərbiyə” məktəbində təhsil alıb. “Gənc Əziz Şərifin 1905-ci ildə Tiflisə gedərək atası Qurbanəli Şərifzadənin yaxın dostu və məsləkdaşı Cəlil Məmmədquluzadənin ailə mühitində yaşaması onun gələcək taleyi üçün mühüm əhəmiyyət kəsb edib”, – deyən akademik bildirdi ki, Cəlil Məmmədquluzadənin evində təşkil olunmuş pansionda dərs oxuyub maariflənməsi, mollanəsrəddinçilərlə tanışlığı Əziz Şərifin sonrakı elmi fəaliyyətinin intişar tapmasında mühüm rol oynayıb.

Muxtar respublikada təhsilə qayğı öz bəhrələrini verir

20 ilə yaxındır ki, muxtar respublikada əsas istiqamət götürülən sahələrdən biri təhsildir. 19 il bundan əvvəl muxtar respublikada müasir tələblərə cavab verən məktəb binaları barmaqla sayılacaq qədər az idi. İndi isə təkcə Naxçıvan şəhərində deyil, ən ucqar dağ kəndlərində belə, ən müasir məktəb binaları tikilir, onların maddi-texniki bazaları gücləndirilir, yeni informasiya texnologiyalarının tətbiqi diqqət mərkəzində saxlanılır. Məktəblilər pulsuz dərsliklərlə təmin olunurlar; tədris ocaqlarında fəaliyyət göstərən kitabxanalar da eləcə. Təkcə bir faktı qeyd edək ki, son 10 ildə muxtar respublikada 160-dək məktəb binası tikilərək və ya əsaslı təmir edilərək istifadəyə verilib. Ümumtəhsil məktəblərinə 3700 kompüter dəsti verilib, hər 12 şagird bir kompüterlə təmin olunub. Təhsil müəssisələrindəki kompüterlərin 84 faizi internetə qoşulub, təhsil ocaqlarında 600-ə yaxın elektron lövhə quraşdırılıb. Bütün bunların nəticəsidir ki, təhsildə keyfiyyət göstəricisi ilbəil artır. Əgər 2013-cü ildə tələbə adını qazananların 312-si 500-dən yuxarı bal toplayıbsa, 2014-cü ildə 347 abituriyent 500-700 intervalında yüksək nəticə göstərib. Müqayisə üçün qeyd etmək olar ki, 1995-1996-cı tədris ilində bu göstərici 5 nəfər olub.

Avropa Birliyinin TEMPUS pro­qramı çərçivəsində həyata keçirilən “Davamlı turizmin idarə olunması sahəsində beynəlxalq bakalavr və magistr proqramları üçün yeni modulların hazırlanması” layihəsinin rəhbərləri Naxçıvan Dövlət Universitetində olublar.
Layihənin meneceri, Almaniyanın Yade Tətbiqi Elmlər Universitetinin Beynəlxalq əlaqələr şöbəsinin müdir müavini Gila Altmann, layihənin rəhbər komitəsinin üzvü, birinci işçi qrupunun rəhbəri, Almaniyanın Vorms Tətbiqi Elmlər Universitetinin vitse-prezidenti, professor Knut Scherhag universitet kampusunu gəzərək tədris prosesi, maddi-texniki baza ilə tanış olublar. Universitetin rektoru, AMEA-nın müxbir üzvü Saleh Məhərrəmov qonaqlara universitet barədə məlumat verib. Qeyd olunub ki, universitetin bütün binaları arasında fiber-optik kabellə şəbəkə qurulub, 108 hektarlıq kampusda simsiz internet şəbəkəsi yaradılıb. Virtual əməkdaşlığın genişləndirilməsi, beynəlxalq videokonfransların təşkili üçün senat otağında polikam kamera, 21 nəfərlik mikrofon, 3 elektron monitor və 1 elektron kürsü quraşdırılıb.
İnformasiya-Kommunikasiya Texnologiyaları Mərkəzində quraşdırılan server avadanlıqları, elektron mühafizə sistemi, elektron test imtahanlarının gedişinin kameralar vasitəsilə müşahidə olunması almaniyalı qonaqlarda maraq doğurub. Media Mərkəzində isə bildirilib ki, “Universitet” televiziyası və “Nuhçıxan” radiosu Naxçıvan şəhərində rəqəmsal formatda yayımlanır.

Martın 4-də Bakı şəhərində Azərbaycan Milli Elmlər Akademiyasının (AMEA) Rəyasət Heyətinin 2014-cü ilin nəticələri və qarşıda duran vəzifələrlə bağlı iclası keçirilib.
AMEA-nın Naxçıvan Bölməsinin, Naxçıvan Dövlət Universitetinin və Naxçıvan Müəllimlər İnstitutunun əməkdaşları Naxçıvan Dövlət Universitetində videobağlantı vasitəsilə iclasın gedişini izləyiblər.
İclası giriş sözü ilə açan AMEA-nın prezidenti, akademik Akif Əlizadə ötən ilin yekunları və qarşıda duran vəzifələrlə bağlı çıxış etdikdən sonra sözü AMEA Naxçıvan Bölməsinin sədri, akademik İsmayıl Hacıyevə verib.
İsmayıl Hacıyev bildirib ki, hesabat ilində bölmədə Azərbaycan Respublikası Prezidentinin 19 fərman və sərəncamı, Azərbaycan Respublikası Nazirlər Kabinetinin 10 qərar və sərəncamı, Naxçıvan Muxtar Respublikası Ali Məclisi Sədrinin və Nazirlər Kabinetinin 11 adda fərman və sərəncamları icra edilib. Ötən il AMEA-nın Naxçıvan Bölməsi Rəyasət Heyətinin 15 iclası keçirilib.

Naxçıvan Muxtar Respublikasında sosial-iqtisadi və humanitar inkişaf sahələrində əldə olunmuş nailiyyətlər dünyanın hər yerində maraq doğurmaqdadır. Bu həftə “Naxçıvan” Universitetinin əməkdaşları Zülfüqar Zülfüqarovun və iqtisad üzrə fəlsəfə doktoru Əli Cabbarovun ABŞ-ın nüfuzlu SAPUB elmi nəşriyyatında çap olunan rüblük “Amerika Turizm Menecmenti” jurnalında dərc edilmiş “Azərbaycan Respublikasının Naxçıvan Muxtar Respublikasında sosial turizmin resursları, planlaşdırılması və inkişafı” adlı elmi məqaləsi də bu baxımdan maraqla qarşılanmışdır. Elmi məqalədə Naxçıvan Muxtar Respublikasında sosial turizm istiqamətində görülmüş işlər təhlil olunmuş, Duzdağ Fizioterapiya Mərkəzində sosial cəhətdən həssas əhali qruplarının pulsuz müalicəsinin təşkilinin əhəmiyyəti göstərilmişdir. Elmi məqalədə Duzdağ Fizioterapiya Mərkəzində Azərbaycan vətəndaşları ilə yanaşı, gürcüstanlı aztəminatlı ailələrdən olan uşaqların da pulsuz müalicəsinin təşkili müasir dünyada sosial turizmin inkişafına xidmət edən elmi tələblər və mövcud sosial imperativlər baxımından tutarlı fakt olduğu sübut olunmuşdur. Məqalədə turizmin idarə edilməsi baxımından dərin humanitar motivlərlə zəngin olan belə addımların təkcə ölkədaxili turizm çərçivəsində deyil, eyni zamanda beynəlxalq turizm səviyyəsində də mümkün ola biləcəyi qənaətinə gəlinmiş, bu sahədə Naxçıvan Muxtar Respublikasında qazanılmış müsbət təcrübədən əldə olunmuş elmi nəticələr və gələcək perspektivlər təhlil edilmişdir.
Məqalənin ingiliscə mətni ilə http://journal.sapub.org/tourism internet saytında tanış olmaq mümkündür.

Nuray ƏSGƏROVA

“Naxçıvan” Universitetinin administrativ heyəti ECDL (European computer driving licence – Avropa kompüter hüququ) təlimlərində iştirak ediblər. Təlimlər interaktiv qaydada və fərdi yanaşma ilə praktik məşğələlərlə keçirilib.
İki həftə davam edən təlimlərdə ECDL tədris proqramının “Kompüterin əsasları” və “Onlayn biliklər” modulları tədris olunub.

Bu günlərdə Fransanın paytaxtı Paris şəhərində “Kampus Frans” Agentliyinin təşkilatçılığı ilə “Azərbaycan günü” tədbirləri keçirilib.
Azərbaycan Respublikası Təhsil Nazirliyinin nümayəndələri, 10-a yaxın aparıcı universitet rəhbərləri ilə birgə Naxçıvan Dövlət Universitetinin rektoru, AMEA-nın müxbir üzvü Saleh Məhərrəmov da tədbirlərdə iştirak edib. Tədbirin əsas məqsədi Azərbaycan və Fransa ali təhsil müəssisələri arasında ikitərəfli əlaqələrin inkişaf etdirilməsi, tələbə və müəllim mübadiləsi, birgə pro­qramların həyata keçirilməsi imkanlarını dəyərləndirmək olub.

Bu gün ümumtəhsil səviyyəsində şagirdlərə zəruri biliklər, dövlət və cəmiyyət qarşısında hüquq və vəzifələri aşılamağa çalışan müəllimlər dövlət təhsil standartlarına uyğun bilik, bacarıq və vərdişlərə malik olmalı, təhsil proqramlarına uyğun ixtisas və elmi-pedaqoji səviyyələrini yüksəltməlidirlər.
Martın 1-də müəllimlərin peşəkarlıq səviyyəsinin artırılması, əlavə təlim ehtiyaclarının müəyyənləşdirilməsi, müəllimlik fəaliyyətinin stimullaşdırılması və müəllimlərin əməyinin qiymətləndirilməsinin təmin olunması məqsədilə Naxçıvan Muxtar Respublikasının ümumtəhsil məktəblərində çalışan “Azərbaycan dili və ədəbiyyat” fənnini tədris edən müəllimlərin attestasiyası keçirilib. Naxçıvan Muxtar Respublikası Təhsil Nazirliyinin mətbuat xidmətindən bildiriblər ki, bu fənn üzrə attestasiya imtahanında muxtar respublika üzrə 996 müəllim iştirak edib.

“Naxçıvan” Universitetində 2014-cü ilin yekunlarına həsr olunmuş yığıncaq keçirilib. Tədbiri ali təhsil müəssisəsinin rektoru, professor İsmayıl Əliyev açaraq məruzə ilə çıxış edib. Bildirilib ki, 2014-cü il “Naxçıvan” Universiteti üçün çox uğurlu il olub. Belə ki, ali təhsil ocağının struktur vahidləri yenidən işlənərək təkmilləşdirilib, sabit ştat cədvəli təsdiq olunub, yüksək vəzifə maaşları müəyyən edilib, yeni maliyyə smetası dəqiqləşdirilib. Universitetdə 4 fakültə, 8 kafedra, 5 şöbə və 5 mərkəz fəaliyyət göstərməklə əlavə iki fakültə və 2 kafedra yaradılıb. Ötən il təhsil müəssisəsinə 253 nəfər qəbul olunub ki, bunlardan da 210 nəfəri muxtar respublikanın ümumtəhsil məktəblərini bitirən məzunlar, 43 nəfəri isə Azərbaycanın digər bölgələrindən olan tələbələrdir. Hazırda universitetdə 971 nəfər tələbə bakalavr, 1 nəfər tələbə isə magistratura təhsil pilləsi üzrə təhsil alır. Qeyd olunub ki, ötən dövr ərzində burada 7 binadan və yardımçı qurğulardan ibarət möhtəşəm universitet şəhərciyi salınıb.

“Azərbaycan xalqı son 200 il ərzində erməni millətçi şovinistlərinin zaman-zaman bir neçə dəfə etnik təmizləmə, soyqırımı siyasətinə məruz qalıb. Nəticədə, həmvətənlərimiz tarixi torpaqlarından qovulub, qaçqına, məcburi köçkünə çevrilib və bütün bunlar ermənilər tərəfindən kütləvi qırğınlarla müşayiət olunub. Qarabağın dilbər guşələrindən biri olan Xocalı da ötən əsrin əvvəllərində erməni daşnakları tərəfindən yandırılıb, viran edilib. Amma 1992-ci il fevralın 25-dən 26-na keçən gecə törədilən soyqırımının nəticələri daha ağılasığmaz, daha dəhşətli olub. Öz miqyasına görə Xocalı soyqırımı təkcə Azərbaycan xalqına qarşı deyil, bütün insanlıq və bəşəriyyət əleyhinə yönəlmiş ən ağır cinayətlərdən biridir”.
Bu fikirlər dünən muxtar respublikamızın ali, orta ixtisas və ümumtəhsil məktəblərində, Heydər Əliyev adına Hərbi Liseydə Xocalı soyqırımına həsr edilmiş bir dərs saatında səsləndirilib, Xocalı soyqırımı ilə bağlı tələbə, kursant və şagirdlərə ətraflı məlumat verilib.
Dərslərdə Xocalı soyqırımına hüquqi-siyasi qiymətin verilməsindən də ətraflı bəhs edilib, bu faciənin dünya ictimaiyyətinə çatdırılması istiqamətində görülən işlərin əhəmiyyəti vurğulanıb.

Xəbərlər şöbəsi