“Naxçıvan” Universitetində 2014-cü ilin yekunlarına həsr olunmuş yığıncaq keçirilib. Tədbiri ali təhsil müəssisəsinin rektoru, professor İsmayıl Əliyev açaraq məruzə ilə çıxış edib. Bildirilib ki, 2014-cü il “Naxçıvan” Universiteti üçün çox uğurlu il olub. Belə ki, ali təhsil ocağının struktur vahidləri yenidən işlənərək təkmilləşdirilib, sabit ştat cədvəli təsdiq olunub, yüksək vəzifə maaşları müəyyən edilib, yeni maliyyə smetası dəqiqləşdirilib. Universitetdə 4 fakültə, 8 kafedra, 5 şöbə və 5 mərkəz fəaliyyət göstərməklə əlavə iki fakültə və 2 kafedra yaradılıb. Ötən il təhsil müəssisəsinə 253 nəfər qəbul olunub ki, bunlardan da 210 nəfəri muxtar respublikanın ümumtəhsil məktəblərini bitirən məzunlar, 43 nəfəri isə Azərbaycanın digər bölgələrindən olan tələbələrdir. Hazırda universitetdə 971 nəfər tələbə bakalavr, 1 nəfər tələbə isə magistratura təhsil pilləsi üzrə təhsil alır. Qeyd olunub ki, ötən dövr ərzində burada 7 binadan və yardımçı qurğulardan ibarət möhtəşəm universitet şəhərciyi salınıb.
Arxitektura baxımından mükəmməl tikilmiş tədris korpusları yüksək zövqlə dizayn edilib, mühazirə və məşğələlər üçün hərtərəfli şərait yaradılıb. Müasir informasiya-kommunikasiya texnologiyalarının tətbiq olunduğu ali təhsil müəssisəsində hazırda 2000-2500 tələbənin təhsil ala bilməsi üçün mükəmməl tədris bazası mövcuddur.
Vurğulanıb ki, hesabat dövründə universitetdə 43 mövzu üzrə elmi-tədqiqat işi yerinə yetirilib, 110 tələbə elmi axtarışlara cəlb edilib. Universitet əməkdaşları tərəfindən 10 kitab, 132 məqalə və 2 tezis hazırlanaraq çap olunub, o cümlədən 4 əməkdaş xarici ölkələrdə keçirilən konfranslarda çıxış edib. Bəhs edilən dövrdə Rumıniyanın Spiru Hayet Universiteti, Çexiyanın Palaçki Universiteti və Latviyanın Beynəlxalq Baltik Akademiyası ilə əməkdaşlığa dair memorandum imzalanıb, əməkdaşlıq edilən universitetlərin sayı 18-ə yüksəlib.
Sonra məruzə ətrafında universitetin təlim-tərbiyə işləri üzrə prorektoru Əli Yusifovun və ali məktəbin müəllimi, iqtisad üzrə fəlsəfə doktoru, dosent Ceyhun Mahmudovun çıxışları olub.
Yığıncağa “Naxçıvan” Universitetinin rektoru, professor İsmayıl Əliyev yekun vurub.
Səbuhi HƏSƏNOV
