AMEA Naxçıvan Bölməsinin əməkdaşları 2011-ci ildən etibarən Azərbaycan Respublikasının Prezidenti yanında Elmin İnkişafı Fondunun müsabiqələr yolu ilə həyata keçirdiyi qrant layihələrində iştirak edirlər. Əməkdaşlar Azərbaycan elminin inkişafına dəstək verən Fondun qrant müsabiqələrində elmin müxtəlif istiqamətləri üzrə 16 qrant layihəsinin qalibi olublar. Məlumat üçün qeyd edək ki, ötən il qalib olan qrant layihələri çərçivəsində 3 monoqrafiya işıq üzü görüb.
Bölmənin Təbii Ehtiyatlar İnstitutunun Sorbsiya prosesləri laboratoriyasının rəhbəri, kimya üzrə fəlsəfə doktoru, dosent Günel Məmmədova da fondun qrant müsabiqələrində iştirak edən gənc alimlərdən biridir. Onun təqdim etdiyi “Naxçıvan Muxtar Respublikasının yeraltı sərvətlərindən yeni yüksək temperatura davamlı istilik izolyasiya materiallarının, seolitlərin alınma metodlarının işlənilməsi” adlı layihəsi Azərbaycan Respublikasının Prezidenti yanında Elmin İnkişafı Fondunun Uğurlu layihələr bölməsində yer alıb.

Naxçıvan Dövlət Universitetində 31 dekabr – Dünya Azərbaycanlılarının Həmrəylik Gününə həsr olunmuş “Mənim tələbə dünyam” adlı videomüsabiqəyə yekun vurulub.
Müsabiqədə fərqlənən tələbələrin mükafatlandırılması mərasimində çıxış edən universitetin rektoru, AMEA-nın müxbir üzvü Saleh Məhərrəmov bu cür tədbirlərin Naxçıvan Dövlət Universitetinin tanıdılması, ümumilikdə, muxtar respublikamızda təhsil üçün yaradılan müasir şəraitin təbliği baxımından əhəmiyyətini qeyd edib. Rektor tələbələri növbəti müsabiqələrdə daha fəal olmağa çağırıb.
Qeyd edək ki, tələbələr tərəfindən çəkilən və universitet həyatını, tələbə dünyasını əks etdirən videolarda yaradıcı yanaşma əsas götürülüb. Naxçıvan Dövlət Universitetinin “İnstagram” sə­hifəsində yerləşdirilmək üçün 20-dən çox video müsabiqəyə təqdim olunub.
Qaliblər universitetin “İnstagram” səhifəsində ən çox bəyənilən 10 video arasından seçilib. Peşəkar münsiflərin rəyinə əsasən Təsviri incəsənət tarixi və nəzəriyyəsi ixtisası üzrə II kurs magistr Gülbani Əliyeva müsabiqənin qalibi olub. Xalq çalğı alətləri ixtisası üzrə I kurs tələbəsi Əsmər İbrahimbəyli II, həmin ixtisas üzrə I kurs tələbəsi Rövşən Rüstəmov III yerləri tutublar. İki tələbə isə həvəsləndirici yerə layiq görülüb.
Qaliblər Naxçıvan Dövlət Universitetinin diplom və pul mükafatları ilə təltif olunublar.

Səadət ƏLİYEVA

Bu yaxınlarda Azərbaycan Milli Elmlər Akademiyasının vitse-prezidenti, AMEA Ədəbiyyat İnstitutunun direktoru, akademik İsa Həbibbəylinin Naxçıvanın dünya miqyasında tanınan özünəməxsus sərvəti olan duza, Duz dağına, duz mədənlərinə həsr olunmuş “Duzdağ mozaikası” kitabı işıq üzü görüb. Bakıda “Elm və təhsil” nəşriyyatında yüksək poliqrafik keyfiyyətlə və dizaynla nəşr olunan 308 səhifəlik kitabın elmi redaktoru AMEA Naxçıvan Bölməsinin sədri, akademik İsmayıl Hacıyevdir. 

“Dövlətçilik işığında”, “Bir yüngülvari müqəddimə”, “Tarixi mənbələrdə Duzdağ”, “Duzdağ araşdırmaları”, “Dünyanın Duzdağı”, “Duzdağ odası” və “Duzdağ mozaikası – danışan şəkillər” adlı yeddi bölmədən ibarət olan kitab Naxçıvandakı Duzdağ ilə hərtərəfli tanışlıq üçün böyük məlumat bazası ilə diqqəti cəlb edir. Bu cür zəhmət tələb edən bir nəşrin ortaya çıxması həm də vətəndaşlıq mövqeyinin elmi ifadəsi kimi səciyyəvidir.
Kitabın “Dövlətçilik işığında” adlı bölməsi ilə tanışlıq belə əhəmiyyətli nəşrin yazılma səbəbi haqqında kifayət qədər məlumat verir. Kitabın girişində xalqımızın ümummilli lideri Heydər Əliyevin aşağıdakı fikirləri özünə yer tapıb: “Naxçıvanın çox gözəllikləri var. Birincisi, onun təbiətidir. Azərbaycanın hər yerində gözəl guşə tapmaq olar. Haraya gedirsən, Azərbaycan gözəl bir yerdir. Amma mən bu gün Naxçıvandayam və Naxçıvan haqqında danışıram. Naxçıvanın təbiətinin gözəlliyi məğrurluq rəmzidir. Bax, ətrafda görünən dağlar, qayalar, çılpaq torpaqlar, – burada yaşıllıq azdır, – bu, diyara xüsusi gözəllik verir. Ancaq bu gözəllik, yenə də deyirəm, qəhrəmanlıq, məğrurluq rəmzidir. O məğrur dağlar kimi insanlar da məğrurdur”.

Naxçıvan Dövlət Universitetində akademik ombudsmanın təyinatına həsr olunmuş yığıncaq keçirilib.
Tədbirdə ali təhsil ocağının beynəlxalq layihələrdə iştirakından söz açan universitetin rektoru, AMEA-nın müxbir üzvü Saleh Məhərrəmov AESOP (Advocacy Establishment for Students through Ombudsman Position) – “Ombudsman vəzifəsi yaratmaqla tələbələrin təmsili təyin olunması” layihəsindən söz açıb. Rektor universitetdə bu vəzifənin yaradılmasının Avropa təhsil sisteminə inteqrasiya yolunda mühüm addım olduğunu qeyd edib.
Universitetin akademik ombudsman vəzifəsinə Ceyran Quliyevanın namizədliyi irəli sürülüb. Səs çoxluğu ilə o, universitetin akademik ombudsman vəzifəsinə təyin olunub.
Layihə barədə məlumat verən Xarici tələbələrlə iş üzrə dekan, Universitetin AESOP layihəsi üzrə işçi qrupunun üzvü, dosent Ceyran Quliyeva qeyd edib ki, layihə çərçivəsində universitet əməkdaşları üç ölkədə – Polşa, Portuqaliya və İtaliya universitetlərində fəaliyyət göstərən ombudsman ofisləri, onların iş fəaliyyəti, bu vəzifəni yerinə yetirən nümayəndələrlə tanış olublar. Həmçinin tədbir iştirakçılarına akademik ombudsmanın səlahiyyətləri haqda da məlumat verilib.

Ölkəmiz dövlət müstəqilliyinə qovuşduqdan sonra bütün sahələrdə olduğu kimi, təhsildə də xeyli irəliləyişlər əldə edilib. Təhsil ocaqları üçün müasir standartlara cavab verən yeni binalar tikilib, yararsız binalar əsaslı surətdə yenidən qurulub. Bunu muxtar respublikamızın timsalında da görmək mümkündür. Həyata keçirilən məqsədyönlü tədbirlər nəticəsində son illər ərzində regionda 200-dən artıq təhsil müəssisəsi üçün bina tikilib və ya əsaslı şəkildə yenidən qurulub, onlar ən müasir tədris avadanlıqları və informasiya-kommunikasiya texnologiyaları ilə təchiz olunub. Həmin texnologiyalardan səmərəli istifadə təmin edilib. Sevindirici haldır ki, sovet dönəmindən fərqli olaraq, indi paytaxt Naxçıvan şəhərindəki məktəb binası ilə ən ucqar dağ kəndindəki təhsil ocağının binası arasında heç bir fərq yoxdur. Bütün bunlar isə tədrisin səviyyəsinin yüksəldilməsinə imkan verib. Elə bunun nəticəsidir ki, son illərdə ali məktəblərə qəbulun keyfiyyət göstəricisi xeyli yaxşılaşıb. 

Ötən günlərdə Ordubad şəhər 3 nömrəli tam orta məktəbdən yazı hazırlamaq üçün həmin təhsil ocağına gedərkən yolboyu xəyalımda sovet dövründə muxtar respublikada fəaliyyət göstərən məktəblərin vəziyyəti haqqında yaşlı adamlardan eşitdiklərimi canlandırmağa çalışırdım. Onlar deyirdilər ki,O dövrdəki məktəblərdə tələblərə cavab verməyən sinif otaqları, köhnəlmiş tədris avadanlıqları şagirdlərin yaxşı təhsil almasına imkan vermirdi.

Naxçıvan Dövlət Universitetinin İnformasiya texnologiyaları və sistemləri mühəndisliyi ixtisasının IV kurs tələbələri noyabr ayının 10-dan dekabr ayının 27-dək Naxçıvan Muxtar Respublikası Rabitə və Yeni Texnologiyalar Nazirliyində təcrübə keçiblər. Təcrübə müddətinin yekunu olaraq nazirlikdə tələbələrlə görüş olub.
Görüşdə Naxçıvan Muxtar Respublikasının rabitə və yeni texnologiyalar naziri Rövşən Məmmədov bildirib ki, Naxçıvan Muxtar Respublikası Ali Məclisi Sədrinin ­2015-ci il iyulun 27-də imzaladığı “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncama əsasən Naxçıvan Dövlət, “Naxçıvan” universitetlərinin, Naxçıvan Müəllimlər İnstitutunun və Naxçıvan Dövlət Texniki Kollecinin bir sıra ixtisasları Naxçıvan Muxtar Respublikası Rabitə və Yeni Texnologiyalar Nazirliyinin hamiliyinə verilib. Müvafiq ixtisaslarda təhsil alan tələbələrlə mütəmadi görüşlər keçirilir, onların ixtisaslarına daha dərindən yiyələnmələri üçün köməklik göstərilir.

Naxçıvan Dövlət Universitetində 2017-2018-ci tədris ilində universitetdaxili və muxtar respublika, eləcə də ölkə miqyaslı idman və bilik yarışlarında qələbə qazanmış tələbələri mükafatlandırma mərasimi keçirilib.
Universitetin rektoru, AMEA-nın müxbir üzvü Saleh Məhərrəmov muxtar respublikada gənclərin təhsilə və idmana cəlbi istiqamətində ardıcıl tədbirlərin həyata keçirilməsindən danışıb.
Universitet Tələbə İdman Klubunun sədri, dosent Məmmədəli Rəhimov klubun 2017-2018-ci tədris ilinə dair hesabatını diqqətə çatdırıb. Məlumat verilib ki, Bakı şəhərində keçirilən kempo döyüş təlimi üzrə III Avrasiya birinciliyində 100 kiloqram çəki dərəcəsində Səyyad Məmmədov I, Bakı şəhərində keçirilən budo döyüş növü üzrə dünya kuboku yarışında Vüqar Məhərrəmov I yerə layiq görülüblər. Kiyev şəhərində keçirilən karate-do üzrə Beynəlxalq turnirdə isə Sərcan Məmmədov III yerin sahibi olub.
İdmançılarımız 10-17 noyabr – Beynəlxalq tələbə-gənclər həftəsinə həsr olunmuş Ali və orta ixtisas tələbələrinin muxtar respublika birinciliyində stolüstü tennis, atletika və voleybol yarışlarında da uğur əldə ediblər.
Tədbirdə, həmçinin Universitet Tələbə-Gənclər Təşkilatı tərəfindən keçirilən bilik yarışmasında, eləcə də Fizika-riyaziyyat fakültəsinin təşkil etdiyi fakültələrarası bilik yarışmasında qalib gələn komandalar da təltif olunub.

Nərmin Cabbarova

Ölkəmizdə, o cümlədən muxtar respublikamızda elmin inkişafına daimdiqqət və qayğı göstərilir. Bunu Naxçıvanda elmin mərkəzi məbədgahına çevrilən AMЕA Naxçıvan Bölməsinin timsalında da görmək olar.
Bunun nəticəsidir ki, bölmənin elmi-tədqiqat institutları fəaliyyətini günün tələbləri səviyyəsində quraraq elmin inkişafına böyük töhfələr vermək üçün öz səylərini davam etdirirlər. Yola salmağa hazırlaşdığımız 2017-ci il də bölmə üçün uğurlu olub.
Bölmənin fəaliyyətini xarakterizə edən başlıca göstərici kimi nəşr edilən elmi əsərləri göstərmək olar. Cari ildə bölmə əməkdaşlarının 767 elmi əsəri işıq üzü görüb. Onlardan 165-i xaricdə çapdan çıxıb. Elmi məqalələrdən 45-i impakt faktorlu jurnallarda, o cümlədən 10-u Thomson Reuters İnstitutu tərəfindən müəyyən olunan jurnallarda çap edilib.
Bölmə əməkdaşlarının 5 monoqrafiyası, 8 kitabı və 277 məqaləsi hazırlanaraq müxtəlif nəşriyyatlara təqdim olunub. Bundan əlavə, bölmənin Təbii Ehtiyatlar İnstitutunun əməkdaşları bir patent alıb, 5 patent hazırlayaraq aid qurumlara təqdim edib. Onu da qeyd edək ki, bölmədə yerinə yetirilən iki qrant layihəsinə yekun vurulub.
Fransanın Beynəlxalq Qeydiyyat Xidmətində qeydiyyatdan keçərək beynəlxalq kod almış və iki seriyada (ictimai və humanitar, təbiət və texniki elmlər seriyaları) ildə dörd dəfə nəşr olunan “Xəbərlər” jurnalının 50-ci,“Axtarışlar” jurnalının isə 26-cı nömrəsi çapdan çıxıb.

Naxçıvan şəhərindəki Gənclər Mərkəzində gənclər arasında “Nuh yurdu” intellektual oyunu keçirilib. Naxçıvan Muxtar Respublikası Gənclər və İdman Nazirliyi, Naxçıvan Muxtar Respublikası Ali Məclisinin Sədri yanında Gənclər Fondu, Yeni Azərbaycan Partiyası Naxçıvan Muxtar Respublika Təşkilatı Heydər Əliyev adına Gənclər Birliyi və “Gənclərin İntellektual İnkişaf Mərkəzi” İctimai Birliyinin təşkilat­ç­ı­­­l­ığı ilə keçirilən yarış ­31 Dekabr – Dünya Azərbaycanlılarının Həmrəylik Günü və Yeni il münasibətilə təşkil edilib.
Gənclər və İdman Nazirliyinin Gənclərlə iş şöbəsinin müdiri Tahir Məmmədli və Gənclər Fondunun əməkdaşı Ceyhun Xəlilli çıxış edərək oyunun keçirilməsində məqsədin gənclərin intellektual səviyyəsini, dünyagörüşünü, zehni inkişafını stimullaşdırmaqdan, onlar arasında bilik və elmin nüfuzunu artırmaqdan, eləcə də asudə vaxtlarını səmərəli təşkil etməkdən ibarət olduğunu bildirib, gəncləri 31 Dekabr – Dünya Azərbaycanlılarının Həmrəylik Günü və Yeni il münasibətilə təbrik ediblər.
16 komandanın iştirak etdiyi oyun 4 yarımfinal və final mərhələsindən ibarət olub. Hər mərhələdə ən yüksək xal yığaraq birinci yerə çıxan komandalar finala vəsiqə qazanıblar. Belə ki, “Nuh”, “Zərbə”, “Buta” və “Zirvə” komandaları finalda mübarizə aparıblar. Sonda “Nuh” komandası qalib adını qazanıb. “Zərbə” komandası ikinci, “Zirvə” komandası isə üçüncü olub.
Qalib gələn komandalara təşkilatçılar tərəfindən kubok, diplom və fəxri fərmanlar təqdim edilib.

 Ceyhun MƏMMƏDOV

Naxçıvan Dövlət Universitetində Vəliyəddin Əliyevin 100 illik yubileyinə həsr olunmuş elmi konfrans keçirilib.
Tədbiri giriş sözü ilə açan universitetin rektoru, AMEA-nın müxbir üzvü ­Saleh Məhərrəmov alimin müasir Azərbaycan elm və təhsil tarixindəki yerindən, dilçilik elminin inkişafındakı xidmətlərindən, universitetdəki səmərəli elmi-pedaqoji fəaliyyətindən bəhs edib.
Filologiya üzrə fəlsəfə doktoru, dosent Qənirə Əsgərova alimin həyat və fəaliyyəti ilə bağlı məruzəsində onun ömür yolundan, dilçilik sahəsində böyük bir məktəb yaratmasından, indiki Azərbaycan dilçiliyi kafedrasının formalaşmasındakı xidmətlərindən danışıb.
“Vəliyəddin Əliyev və klassik Azərbaycan ədəbiyyatı” mövzusunda məruzə edən filologiya üzrə elmlər doktoru, professor Hüseyn Həşimli konfrans iştirakçılarına ­görkəmli alimin yaradıcılığı, zəngin elmi irsi, Azərbaycan ədəbi dil tarixinin inkişafındakı rolu barədə ətraflı məlumat verib.
Filologiya üzrə fəlsəfə doktoru, dosent İman Cəfərov “Azərbaycan dilçiliyində təzadlara aydınlıq gətirən alim” mövzusundakı məruzəsində Azərbaycan ədəbiyyatında bədii təsvir və bədii ifadə vasitələri haqda ilk araşdırma müəllifi kimi alimin əməyini xüsusi qeyd edib.
Sonda Vəliyəddin Əliyevin qızı, universitetin Çağırışaqədərki hazırlıq və mülki müdafiə kafedrasının baş müəllimi Rüxsarə Əsədova atası haqda xatirələrini bölüşüb, tədbirin təşkilatçılarına minnətdarlığını bildirib.

Səadət Əliyeva

Naxçıvan Muxtar Respublikası Gənclər və İdman Nazirliyi və Naxçıvan Muxtar Respublikası Ali Məclisinin Sədri yanında Gənclər Fondunun təşkilatçılığı ilə ilk dəfə olaraq muxtar respublikada “Trio” intellektual oyunu keçirilib. Burada məqsəd gənclərdə intellektual oyunlara marağı artırmaqdır.
8 komandanın mübarizə apardığı və üç raunddan ibarət olan oyunda hər raund bir milli, bir xarici və bir musiqili mövzuda olmaqla, ümumilikdə, 27 sual səsləndirilib. İştirakçılar komanda şəklində hər bir sualı 1 dəqiqə ərzində müzakirə edib, cavabı yazılı formada aparıcıya təqdim ediblər.
Yekunda “Turan” komandası qalib adını qazanıb. Digər iki pillədə isə “Nuh” və “Xəzər” komandaları qərarlaşıb.
Qaliblərə və oyunda fəal iştirak edən komandalara Gənclər və İdman Nazirliyinin diplom və fəxri fərmanları təqdim olunub.

Ceyhun MƏMMƏDOV

Naxçıvan Muxtar Respublikası Təhsil Nazirliyinin təsdiq etdiyi Əsasnaməyə uyğun olaraq Naxçıvan şəhər 14 nömrəli tam orta məktəbdə 7-11-ci sinif şagirdləri arasında olimpiadanın şəhər turniri keçirilib.
Qeyd edək ki, keçirilən olimpiadada muxtar respublika üzrə 1260 şagird iştirak edib. Şagirdlər Azərbaycan dili, xarici dil, fizika, riyaziyyat, biologiya və kimya fənlərindən test tapşırıqlarını cavablandırıblar. Şagirdlərə hər fənn üzrə 30 test tapşırığı verilib. Sualların cavablandırılmasına 2 saat vaxt ayrılıb. Sualların 20-si qapalı, 10-u isə açıqtipli olub. Olimpiadada muxtar respublikanın ümumtəhsil məktəblərinin şagirdləri və Heydər Əliyev adına Hərbi Liseyin kursantları iştirak ediblər.
Qeyd edək ki,1260 nəfərin iştirak etdiyi olimpiada iki mərhələdə keçirilir. Birinci, yəni rayon və şəhər mərhələsində yüksək nəticə göstərən şagirdlər ikinci mərhələyə vəsiqə qazanacaqlar. 

 Ramiyyə ƏKBƏROVA

Naxçıvan Muxtar Respublikası Ali Məclisi Sədrinin 2017-ci il 28 avqust tarixli “Oxunması zəruri olan kitablar haqqında” Sərəncamından irəli gələn vəzifələrin yerinə yetirilməsi istiqamətində həyata keçirilən tədbirlər mühüm əhəmiyyət daşıyır. Muxtar respublikanın Təhsil Nazirliyinin məktəblilər və tələbələr arasında keçirilən inşa yazı müsabiqəsi də həmin tədbirlərin davamıdır. Ötən şənbə günü müsabiqə qaliblərinin mükafatlandırma mərasimi olub.
Tədbirdə muxtar respublikanın təhsil naziri Məmməd Qəribov çıxış edərək vurğulayıb ki, Sərəncamla təsdiq edilən “Oxunması zəruri olan kitabların Siyahısı” gənc nəslin mütailə mədəniyyətinin formalaşdırılmasına böyük töhfədir. Təsdiq olunmuş siyahıda gənc nəslin dövlətçilik və vətənpərvərlik tərbiyəsinə, habelə şəxsiyyət kimi formalaşmasına daha çox təsir edə biləcək kitablara üstünlük verilməsi müstəqil dövlətçilik idealları üstündə köklənmiş kamil Azərbaycan vətəndaşlarının daha yetkin səviyyədə formalaşdırılmasına kömək etmək məqsədi daşıyır. Zəruri ədəbiyyatın siyahısı Azərbaycançılıq dünyagörüşünün inkişaf etdirilməsi üçün də istiqamətverici imkanlara malikdir.
Diqqətə çatdırılıb ki, sərəncama uyğun olaraq təhsil müəssisələrində həmin kitablardan ibarət guşələr yaradılıb.

Noyabr ayında təhsil sahəsində müxtəlif tədbirlər həyata keçirilib. Belə ki, Naxçıvan Muxtar Respublikası Ali Məclisi Sədrinin “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” 2014-cü il ­20 iyun tarixli Sərəncamına uyğun olaraq Heydər Əliyev Muzeyi, Hüseyn Cavidin ev-muzeyi və Dövlət Bayrağı Muzeyi ilə ümumtəhsil məktəbləri arasında interaktiv dərs keçilmiş, şagirdlərə ətraflı məlumatlar verilmişdir. Həmçinin Azərbaycan Milli Elmlər Akademiyası Naxçıvan Bölməsində, Naxçıvan Dövlət Universitetində, “Naxçıvan” Universitetində və Naxçıvan Müəllimlər İnstitutunda, eləcə də orta ixtisas təhsili müəssisələrində çalışan elmi dərəcəli müəllimlər tərəfindən noyabr ayı ərzində ümumtəhsil məktəblərində 215 saat dərs tədris edilib.

“Naxçıvan” Universitetinin İdarəetmə kafedrasının və Naxçıvan Muxtar Respublikası Maliyyə Nazirliyinin birgə təşkilatçılığı ilə keçirilən konfransı ali təhsil ocağının tərbiyə işləri üzrə prorektoru Əli Yusifov açıb.
Konfransda Azər-Türk Bankın əməkdaşı Murad Sevdimalıyev “Banklarda risklərin idarə edilməsi” mövzusunda məruzə edərək bildirib ki, son illərdə banklar tərəfindən iqtisadiyyata kredit qoyuluşlarının və əhalidən cəlb olunan əmanətlərin artması tendensiyası davam edib. Bu da bank sisteminin iqtisadiyyatda, xüsusən də sahibkarların maliyyə resurslarına olan tələbatının ödənilməsində rolunu yüksəldib. Belə ki, son 10 ildə real iqtisadi artım 4 dəfədən çox olub, strateji valyuta ehtiyatları 42, bank kreditləri 25, əhalinin əmanətləri isə 32 dəfə çoxalıb.
Naxçıvan Muxtar Respublikası Maliyyə Nazirliyinin əməkdaşı Məmmədnağı Əkbərov ­“Heydər Əliyevin Naxçıvan iqtisadiyyatının və maliyyə sisteminin inkişafında rolu” mövzusunda çıxış edib. Bildirib ki, ümummilli lider Heydər Əliyevin ali hakimiyyətə qayıdışından sonra Azərbaycanın digər bölgələri kimi, Naxçıvan Muxtar Respublikası da özünün əsl inkişaf mərhələsinə qədəm qoyub.
Sonra İdarəetmə fakültəsinin tələbəsi Şəhruz Yusubzadənin “Bankların qiymətli kağızlar bazarında fəaliyyət növləri” mövzusunda çıxışı dinlənilib.

Nuray ƏSGƏROVA

Naxçıvan Dövlət Universitetində Təsviri incəsənət kafedrasının müdiri, Xalq rəssamı, professor Hüseynqulu Əliyev və həmin kafedranın müəllimi Ləman Məmmədovanın birgə ərsəyə gətirdikləri “Heykəltəraşlıq və rəngkarlıqda insan gözəlliyinin təcəssümü” və “Təsviri sənət nəzəriyyəsi” adlı kitabların təqdimetmə mərasimi olub.
Tədbiri giriş sözü ilə açan universitetin rektoru, AMEA-nın müxbir üzvü Saleh Məhərrəmov hər iki kitabın elmi əhəmiyyətini qeyd edib.
Vurğulanıb ki, Naxçıvanda rəssamlığa göstərilən diqqət və qayğı nəticəsində artıq muxtar respublikada peşəkar rəssamlar nəsli yetişib.
Naxçıvan Muxtar Respublikasının Əməkdar rəssamı ­Həbibə Allahverdiyeva, Təsviri incəsənət kafedrasının müəllimləri Əlövsət Allahverdiyev və Elnurə Orucova çıxış ediblər. Qeyd olunub ki, hər iki dərs vəsaiti bakalavr, magistr, aspirant və tədqiqatçılar, eləcə də geniş oxucu kütləsi üçün ­nəzərdə tutulub.
Universitetin son illərdə qazandığı nailiyyətlər təhsilimizə göstərilən yüksək diqqət və qayğının bəhrəsidir, – deyən müəlliflər universitet mühitində yaradıcı insanların elmi-pedaqoji fəaliyyəti üçün göstərilən dövlət dəstəyinə görə minnətdar olduqlarını bildiriblər.

Səadət ƏLİYEVA

Türkiyə Cümhuriyyəti Başbakanlığı Atatürk Mədəniyyət, Dil və Tarix Yüksək Qurumu Atatürk Araşdırma Mərkəzi və Girəsun Universitetinin birgə təşkilatçılığı ilə Türkiyənin Girəsun şəhərində “II Beynəxalq demokratiya simpoziumu: imperializm, hegemoniya və təhlükəsizlik fəaliyyətləri” adlı beynəlxalq elmi simpozium keçirilib. Türkiyə, Rumıniya, İran, İraq və digər ölkələrin tanınmış alimlərinin iştirak etdiyi tədbirdə Azərbaycanı üç elm xadimi təmsil edib. Naxçıvan Dövlət Universitetinin Hüquq fənləri kafedrasının dosenti, tarix üzrə fəlsəfə doktoru Elman Cəfərli elmi simpoziumda “Sovet Rusiyasının imperialist siyasətində xalqların öz müqəddəratını təyin etməsi prinsipi və Cənubi Qafqazda muxtar dövlət qurumlarının yaradılması” mövzusunda məruzə ilə çıxış edib.

Naxçıvan Dövlət Universiteti dünyanın ən önəmli təhsil qurumlarından olan Avrasiya Universitetlər Birliyinin (EURAS) üzvü seçilib.
2008-ci ildə İstanbulda təsis edilmiş Türkiyə, Azərbaycan və digər ölkələrin ali məktəblərinin təsis etdiyi Avrasiya Universitetlər Birliyinin məqsədi universitetlər arasında işbirliyini gücləndirmək, yeni layihələr həyata keçirməkdir. Avropa, Asiya və Yaxın Şərq regionlarından olan universitetləri birləşdirən qurumun həyata keçirdiyi layihələr mübadilə proqramları, birgə elmi tədqiqatlar, nəşrlər, təqaüd ­pro­qramlarıdır.
Bu münasibətlə universitetdə keçirilən tədbirdə ali təhsil ocağında təhsilin səviyyəsinin daha da yaxşılaşdırılması, yaradılan əlverişli şəraitdən səmərəli şəkildə istifadə olunması, dünyanın, o cümlədən, ölkəmizin qabaqcıl ali təhsil ocaqları ilə əlaqələrin genişləndirilməsi, universitetin beynəlxalq arenada tanıdılması və təbliği istiqamətində işlərin bundan sonra da davam etdiriləcəyi bildirilib.
Qeyd edək ki, Naxçıvan Dövlət Universiteti son illər beynəlxalq əlaqələrin genişləndirilməsi sahəsində xeyli irəliləyişlər əldə edib. Universitetin hazırda dünyanın 50-dən çox ölkəsinin 80-dən çox ali təhsil ocağı ilə əlaqələri mövcuddur. Hazırda Naxçıvan Dövlət Universitetində “Mövlana”, Tempus, Erasmus+, Erasmus Mundus proqramları həyata ­keçirilir.

Səadət Əliyeva

Naxçıvan Muxtar Respublikası Ali Məclisi Sədrinin imzaladığı “Oxunması zəruri olan kitablar haqqında” Sərəncam ilə bağlı olaraq gənclərdə yazı vərdişlərinin formalaşması üçün inşa yazı müsabiqəsi keçirilir.
Müsabiqədə muxtar respublikada fəaliyyət göstərən ümumtəhsil məktəblərinin IX-XI sinif şagirdləri, Heydər Əliyev adına Hərbi Liseyin kursantları və Naxçıvan Dövlət Texniki Kollecinin I-III kurs tələbələri iştirak edirlər.
Qaliblər mövzu əhatəliliyinə və yazı qaydalarına riayət edilmiş inşa yazılara görə ­seçilir.
Məlumat üçün bildirək ki, şəhər və rayonlar üzrə təşkil edilən müsabiqənin I mərhələsində ilk üç yeri tutan iştirakçılar yekun mərhələdə inşa yazaraq özünüifadə bacarıqlarını nümayiş etdirəcəklər. İnşa yazılar sərəncamla təsdiq olunmuş siyahıya daxil edilən əsərlərlə bağlı yazılacaq.
Qeyd edək ki, müsabiqənin II mərhələsi dekabr ayının 16-da ­keçiriləcək.

Nail ƏSGƏROV

Azərbaycan Respublikası Təhsil Nazirliyi tərəfindən elan olunan “Təhsildə inkişaf və innovasiyalar” üzrə qrant müsabiqəsinin qalibi Şərur şəhər 1 nömrəli tam orta məktəbin direktor əvəzi Əli Mehdiyev olub.
Şərur Rayon Təhsil Şöbəsindən aldığımız məlumata görə, dövlət ümumtəhsil müəssisələri və bu müəssisələrdə çalışan pedaqoji işçilər üçün elan edilən qrant müsabiqəsində prioritet sahələr nəzərə alınıb, müsabiqə 2 kateqoriya – ümumtəhsil müəssisələri və fərdi layihələr üzrə keçirilib.
Bu müsabiqədə Şərur şəhər 1 nömrəli tam orta məktəbin adından direktor əvəzi Əli Mehdiyev iştirak edərək “Məktəbdaxili rəhbərlik və nəzarətin təkmilləşdirilməsi” layihəsi ilə qalib olub. Layihə rəhbəri Əli Mehdiyev tərəfindən sentyabr ayının 22-dən başlayaraq rayonun müxtəlif ümumtəhsil məktəblərində seminar-treninqlər təşkil edilib. İştirakçılar təlim materialları və metodik vəsaitlərlə təmin olunublar. Məlumat üçün bildirək ki, seminar-treninqlər dekabr ayının 22-dək davam edəcək.
Qeyd edək ki, təhsildə inkişaf və innovasiyalar üzrə qrant müsabiqəsinin keçirilməsində başlıca məqsəd təhsil müəssisələrində və təhsilverənlərdə sağlam rəqabəti və innovativ fəaliyyəti stimullaşdırmaqdır. Müsabiqə müasir tələblər baxımından məktəbdaxili rəhbərlik və nəzarətin təkmilləşdirilməsi, pedaqoji işçilərin peşəkarlıq səviyyəsinin yüksəldilməsi, istedadlı uşaqlarla işin təşkili ilə bağlı, ümumilikdə, 10 mövzu üzrə keçirilib.
Ümumtəhsil müəssisələri kateqoriyası üzrə müsabiqədə istənilən dövlət tam orta ümumtəhsil müəssisəsinin iştirak etmək hüququ vardır. İbtidai və orta ümumtəhsil müəssisələrinin yalnız tam orta ümumtəhsil müəssisələri ilə birgə layihə verməsi mümkündür. Fərdi layihə kateqoriyası üzrə müsabiqədə iştirak üçün bütün ümumtəhsil müəssisələrində işləyən pedaqoji işçilər layihə təqdim edə bilərlər.

 Nail ƏSGƏROV

AMEA Naxçıvan Bölməsində 2017-ci ilin elmi və elmi-təşkilati fəaliyyətinin yekunlarına dair Elmi-Tədqiqat institutlarının hesabat yığıncağı keçirilib.
Bölmənin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Fəxrəddin Səfərli bildirib ki, hesabat ilində əməkdaşların 8 monoqrafiyası, 4 kitabı, 171 elmi əsəri çapdan çıxıb.
Diqqətə çatdırılıb ki, Naxçıvan Muxtar Respublikası Ali Məclisi Sədrinin 2017-ci il 9 fevral tarixli Sərəncamı ilə əməkdaşların müəllifi olduğu “Naxçıvan tarixi” çoxcildliyi Naxçıvan Muxtar Respublikası mükafatına, AMEA-nın müxbir üzvü Qadir Qədirzadənin müəllifi olduğu “Başlanğıcın sonu, sonun başlanğıcı” kitabı isə Ali ­Məclisin Sədri tərəfindən mükafata layiq görülüb.
Bildirilib ki, AMEA-nın müxbir üzvü Vəli Baxşəliyevin rəhbərliyi ilə “Naxçıvan tarixinin arxeoloji, etnoqrafik, epiqrafik və Şərq mənbələri əsasında tədqiqi, arxeoloji abidələrin elektron qeydiyyatı və xəritələşdirilməsi” mövzusu qrant layihəsinin qalibi olub. Cari ildə Qədim dövr arxeologiyası şöbəsi ilə Fransa Respublikası Milli Elmi Araşdırmalar Mərkəzinin Arxeologiya laboratoriyası arasında əməkdaşlıq haqqında müqavilə imzalanıb.

Azərbaycan Respublikası Gənclər və İdman Nazirliyi və “İrəli” İctimai Birliyinin maliyyə dəstəyi ilə reallaşdırılmış “Azərbaycan İntellektual Birincisi” layihəsinə yekun vurulub. Layihənin sonuncu günündə ulu öndər Heydər Əliyevin əziz xatirəsinə həsr olunmuş final mərhələsi keçirilib.
Layihə çərçivəsində dörd intellektual oyun (“Xəmsə”, “Nə? Harada? Nə zaman?”, “Axtar tap”, “Vətəni tanı”) üzrə 11 regionda keçirilən yarışlarda Naxçıvan Muxtar Respublikası da daxil olmaqla, ümumilikdə, 70 rayondan 1500-ə yaxın gənc iştirak edib. Hər rayon yarışlarda 18 nəfərlik komanda ilə təmsil olunub. Layihənin icrası müddətində Bakı, Sumqayıt, Quba, Tərtər, İsmayıllı, Şəmkir, Mingəçevir, Şəki, Sabirabad, Lənkəran rayon və şəhərlərindəki Gənclər evlərində və mərkəzlərində, Naxçıvan Muxtar Respublikasında regional turnirlər keçirilib.
Layihənin yekununda “Vətəni tanı” oyunu üzrə Sabirabad, Qobustan və Naxçıvan gəncləri müvafiq olaraq ilk üç pillədə qərarlaşıblar. “Axtar tap” oyununun nəticələrinə görə Abşeron rayonunun təmsilçiləri ilk sırada yer alıblar. İkinci yerə Biləsuvar, üçüncü yerə isə Sabirabad gəncləri layiq görülüblər. “Nə? Harada? Nə zaman?” oyunu üzrə birinci yerə Abşeron, ikinci yerə Gəncə, üçüncü yerə Naxçıvan gəncləri sahib olublar. “Xəmsə” oyunu üzrə isə Şabran, Lənkəran və Goranboy rayonlarının gənc intellektualları qalib adını qazanıblar.
Qalib gələn komandalar medallar, şəhadətnamələr və hədiyyələrlə təltif olunublar.

Ceyhun MƏMMƏDOV

Naxçıvan Muxtar Respublikası Ali Məclisi Sədrinin 2017-ci il 28 avqust tarixdə imzaladığı “Oxunması zəruri olan kitablar haqqında” Sərəncamdan sonra əksəriyyətini oxuduğum həmin kitablara yenidən qayıtdım. Düzdür, bu kitablar daha çox gənclər və yeniyetmələr üçün nəzərdə tutulsa da, orta və yaşlı nəslin nümayəndələrində də siyahıda olan və oxumadıqları kitablara qarşı bir maraq, həvəs oyandığını görmək və duymaq olur. Mən də bu baxımdan istisna deyiləm. 

Elə ilk olaraq həmin siyahının birinci kitabı olan “Azərbaycan xalqının ümummilli lideri Heydər Əliyevin Yeni 2001-ci il, Yeni əsr və Üçüncü minillik, münasibətilə Azərbaycan xalqına müraciəti”ni təkrar oxudum. Bundan sonra sərəncamın mahiyyətini daha aydın şəkildə dərk etdim. Həmin müraciətdə Azərbaycan xalqının, dövlətimizin, Azərbaycançılıq ideologiyasının tarixdən günümüzədək, hətta xalqımız var olduqca davam edən yolu nəzərdən keçirilib, diqqətə çatdırılıb, sonrakı ideal yol müəyyənləşdirilib. Müraciətdə deyilir: “...Keçdiyimiz yola nəzər salarkən aydın olur ki, biz nadir bir irsin varisləriyik. Hər bir Azərbaycan vətəndaşı bu irsə layiq olmağa çalışaraq böyük bir tarixi keçmişi, zəngin mədəniyyəti, yüksək mənəviyyatı olan ölkəmizin həm dünəninə, həm bu gününə, həm də gələcəyinə dərin bir məsuliyyət hissi ilə yanaşmalıdır...
Bizim əcdadlarımız ibtidai insanın mədəniyyət sahəsində əldə etdiyi bütün nailiyyətlərdən faydalanaraq, özünəməxsus zəngin mədəni-mənəvi irs yaratmışdır...

Naxçıvan şəhərindəki Gənc­lər Mərkəzində “Azərbaycan İntellektual Birincisi” layihəsinin Naxçıvan Muxtar Respublikası turnirinin açılış mərasimi olub.
Mərasimdə Naxçıvan Muxtar Respublikası gənclər və idman naziri Azad Cabbarov, Naxçıvan Muxtar Respublikası Ali Məclisinin Sədri yanında Gənclər Fondunun icraçı direktoru Məmməd Babayev və “İrəli” İctimai Birliyinin sədri Mirhəsən Seyidovun çıxışları olub.
Çıxış edənlər vurğulayıblar ki, ölkəmizdə ulu öndərimiz Heydər Əliyevin əsasını qoyduğu dövlət gənclər siyasəti uğurla həyata keçirilir. “Azərbaycan İntellektual Birincisi” layihəsinin ölkə gənclərinin potensial intellektinin qiymətləndirilməsi baxımından əhəmiyyəti vurğulanıb. Bildirilib ki, layihənin əsas məqsədi gənclərin intellektual fəaliyyətə cəlb olunması, onların bilik və bacarıqlarının artırılması, beynəlxalq intellektual yarışlara hazırlanmasıdır.
Sonra turnirin oyunlarına start verilib.
Turnir çərçivəsində muxtar respublikanın bütün bölgələrindən 8 komanda 4 intellektual oyunda – “Xəmsə”, “Nə? Harada? Nə zaman?”, “Axtar tap” və “Vətəni tanı” bilik yarışlarında qüvvələrini sınayıblar. “Xəmsə” və “Nə? Harada? Nə zaman?” bilik yarışlarının qalibləri Naxçıvan şəhərini təmsil edən komandalar olub. “Axtar tap” bilik yarışında Kəngərli rayonunun komandası, “Vətəni tanı” bilik yarışında isə Şahbuz rayonunun komandası qalib gəlib.
Oyunların nəticələrinə görə qalib komandalar 5-6 dekabr tarixlərində Bakı şəhərində keçiriləcək final mərhələsinə vəsiqə qazanıblar.

“Naxçıvan” Universitetində Pedaqogika və psixologiya kafedrasının təşkilatçılığı ilə “Müəllim- tələbə münasibətlərinin pedaqoji aspektləri” mövzusunda konfrans keçirilib. Konfransı giriş sözü ilə ali təhsil ocağının rektoru, professor İsmayıl Əliyev açaraq müəllim-tələbə münasibətlərində diqqət edilməsi lazım olan məqamlardan danışıb. Bildirilib ki, müəllim tələbələrlə səmimi ünsiyyət saxlamalı, onlarla əməkdaşlığa və humanist prinsiplərə söykənən münasibətlər qurmalıdır. Tədris etdiyi fəndən asılı olmayaraq, hər bir müəllim pedaqogika və psixologiya elmlərini bilməli, tələbələrə şəxsiyyət kimi yanaşmalı, onların fərdi psixoloji xüsusiyyətlərini nəzərə alaraq dərsini qurmağı bacarmalıdır.
Konfransda Pedaqogika və psixologiya kafedrasının müəllimləri Təranə Əliyevanın “Müəllim-tələbə münasibətləri təlimin səmərəliliyinin əsas komponenti kimi”, Aygün Rüstəmovanın “Müəllim-tələbə münasibətlərinin psixoloji əsasları” və həmin kafedranın müdiri Nəzakət Yusifovanın “Müəllim-tələbə münasibətlərində pedaqoji ustalığın rolu” mövzularında məruzələri dinlənilib.
Bildirilib ki, təhsil islahatlarının tələblərinin yerinə yetirilməsində, ilk növbədə, müəllim təlimin yeni texnologiyalarını mənimsəməli, yeni proqram və dərsliklərdən bəhrələnməyi, son elmi yenilikləri tətbiq etməyi bacarmalıdır.

Nuray ƏSGƏROVA

AMEA Naxçıvan Bölməsinin nəzdində fəaliyyət göstərən Arxeologiya və Etnoqrafiya Muzeyi haqqında “Arxeologiya və Etnoqrafiya Muzeyi” (məlumat-bələdçi) kitabçası işıq üzü görüb.
Yeni nəşrin elmi məsləhətçiləri – bölmənin sədri, akademik İsmayıl Hacıyev və AMEA-nın müxbir üzvü Fəxrəddin Səfərli, elmi redaktoru və ön sözün müəllifi AMEA-nın müxbir üzvü Vəli Baxşəliyev, tərtibçisi isə bölmənin Tarix, Etnoqrafiya və Arxeologiya İnstitutunun Arxeoloji xidmət şöbəsinin müdiri, tarix üzrə fəlsəfə doktoru, dosent Zeynəb Quliyevadır.
Kitabçanın nəşr olunmasında əsas məqsəd bölməyə gələn yerli və xarici qonaqları Naxçıvanın аrxeoloji, tarix-memarlıq, təbiət və mədəniyyət abidələri barəsində dolğun məlumatlandırmaqdır.

Cari tədris ilində göstəricilər daha yüksək olacaq

Ümummilli liderimiz Heydər Əliyev təhsilə, bu strateji sahənin inkişafına xüsusi əhəmiyyət verərək deyirdi: “Təhsil sahəsi xalqımızın bu günü, millətimizin, dövlətimizin gələcəyi üçün ən vacib bir sahədir”. Bu qənaəti muxtar respublikanın təhsil işçiləri dərindən dərk edir, təhsilin inkişafı məqsədilə imzalanmış dövlət proqramlarından, digər normativ-hüquqi sənədlərdən irəli gələn vəzifələrin uğurla yerinə yetirilməsinə çalışırlar. Bu gün hərtərəfli dövlət qayğısının ifadəsidir ki, məktəblərin kompüterlərlə, elektron lövhələrlə, müasir avadanlıqlarla təminatı öz müsbət həllini tapıb. Göstərilən diqqət və qayğı sayəsində milli təhsilimizin inkişafı üçün hüquqi baza ilə yanaşı, təlim-tərbiyə müəssisələrinin maddi-texniki bazasının da yenidən qurulmasına xüsusi önəm verilib.

Culfa Rayon Təhsil Şöbəsi və onun əhatə etdiyi təhsil müəssisələri də işlərini bu istiqamətdə qurublar. Bunun da nəticəsində təhsilin məzmunu yenilənib, keyfiyyəti yüksəlib, təhsil ocaqlarının maddi-texniki bazası möhkəmləndirilib.
Son illər müasir tələblərə cavab verən 22 yeni məktəb binası, 5 məktəbdənkənar təhsil müəssisəsi tikilib və ya əsaslı şəkildə təmir olunaraq müəllim və şagirdlərin istifadəsinə verilib. Ötən tədris ilində Saltaq kəndində 306, Gülüstan kəndində 156 yerlik məktəb binaları öz qapılarını müəllim və şagirdlərin üzünə açıb. Xanəgah kənd tam orta məktəbi isə əsaslı təmir edilib. Hazır­da Dizə kəndində 216 şagird yerlik məktəb binasında son tamam­lama işləri aparılır.

AMEA Naxçıvan Bölməsində “Klassik genetikanın əsasları” mövzusunda interaktiv dərs təşkil olunub.

İnteraktiv dərsi AMEA Naxçıvan Bölməsinin Bioresurslar İnstitutunun əməkdaşı, aqrar elmlər üzrə elmlər doktoru, dosent Varis Quliyev aparıb. Bildirilib ki, genetika irsiyyət və dəyişkənlik haqqında elmdir, irsi informasiyaların qorunub saxlanması və gələcək nəsillərə ötürülməsindən bəhs edir. Genetika biologiya fənləri içərisində əsas yerlərdən birini tutur. Müasir genetika irsiyyət və dəyişkənlik hadisələrini zoologiya, botanika, seleksiya, bitkiçilik, heyvandarlıq kimi bioloji və digər sahələrin nailiyyətlərinə əsaslanaraq öyrənir. Genetik tədqiqatlar biologiyanın nəzəri sahəsini, habelə zootexnikanı, baytarlığı, kənd təsərrüfatı heyvanlarının seleksiyasını, bitkilərin seleksiya və toxumçuluğunu, tibbi xeyli zənginləşdirib. Virusları, bakteriyaları, göbələkləri, bitki və heyvan hüceyrələrini orqanizmdən kənar becərmək və onların nuklein turşularını öyrənmək, orqanizmlərin həyat fəaliyyəti prosesində genlərin təsirinin qanunauyğunluqlarını müəyyən etməyə imkan verir.
Varis Quliyev genetikanın inkişaf tarixi, tədqiqat üsulları, bu elm sahəsində işlədilən şərti işarələr, əsas genetik anlayışlar, eləcə də Q.Mendelin qanunları haqqında şagirdlərə ətraflı məlumat verib.
Qeyd edək ki, dərsi muxtar respublikanın 203 ümumtəhsil məktəbinin şagirdləri izləyiblər.

Xəbərlər şöbəsi

Naxçıvan şəhərində fəaliyyət göstərən ümumtəhsil məktəblərinin texniki işçilərinin iştirakı ilə maarifləndirici tədbir keçirilib.
Tədbiri giriş sözü ilə Naxçıvan Şəhər Təhsil Şöbəsinin müdiri Elşən Qəbulov açaraq bildirib ki, bu gün ölkəmizdə, eləcə də muxtar respublikamızda təhsilin inkişafına xüsusi diqqət və qayğı göstərilir. Təhsil müəssisələri üçün müasir üslubda yeni inzibati binalar tikilir, təhsil ocaqları üçün zəruri şərait yaradılır, tədris prosesində ən yeni texnologiyalar tətbiq olunur.

Naxçıvan Dövlət Universitetində 1 dekabr – Ümumdünya QİÇS-lə Mübarizə Gününə həsr olunmuş elmi-praktik konfrans keçirilib. Konfransı giriş sözü ilə universitetin rektoru, AMEA-nın müxbir üzvü Saleh Məhərrəmov açıb.
Sonra Naxçıvan Muxtar Respublikası səhiyyə nazirinin müavini Samrat Gəncəyeva çıxış edərək bildirib ki, QİÇS-lə mübarizə istiqamətində beynəlxalq təcrübədən istifadə edən Azərbaycan bu xəstəliyə yoluxma səviyyəsi aşağı olan ölkələr sırasına daxildir. Vurğulanıb ki, Naxçıvan Muxtar Respublikası Yoluxucu Xəstəliklər Mərkəzi, Qazanılmış İmmun Çatışmazlığı Sindromu ilə Mübarizə və Profilaktika (QİÇS) Mərkəzi üçün ayrıca binaların tikilməsi bu xəstəliklə mübarizənin səmərəli təşkilinə xidmət etməklə yanaşı, muxtar respublikada səhiyyəyə göstərilən dövlət qayğısının bariz nümunəsidir.
Tədbirdə Təməl tibb fənləri kafedrasının müəllimi Şəfiqə Süleymanova, muxtar respublika Yoluxucu Xəstəliklər Mərkəzinin həkimi Adil İbrahimov və başqaları çıxış ediblər.
Konfrans mövzu ətrafında müzakirə və diskussiyalarla davam edib.

Səadət Əliyeva

“Naxçıvan” Universitetinin iştirak etdiyi AESOP “Erasmus+” layihəsi çərçivəsində yaradılacaq Tələbə Ombudsman Aparatı haqqında ali məktəbin bütün fakültələrində silsilə şəkildə məlumatlandırma günləri keçirilir.
“Erasmus+” layihəsinə əsasən 2018-ci ildən etibarən ali təhsil ocağında Varşava modelinə uyğun Ombudsmanlıq ofisi yaradılacaq.
Tədbirdə ali təhsil ocağının rektoru, professor İsmayıl Əliyev çıxış edərək tələbələrlə aparılan söhbətlərin mahiyyəti barədə məlumat verib.
Universitetin layihə kordinatoru Elmira Hüseynova ombudsman, onun “Naxçıvan” Universitetində mövqeyi, fəaliyyət sahələri və səlahiyyətləri haqqında geniş məlumat verib, tələbələrin Ombudsman aparatı vasitəsilə hüquqlarının müdafiəsindən bəhs edib və onları maraqlandıran sualları cavablandırıb.
Sonra universitetdə yaradılan İdrak Hazırlıq Mərkəzinin direktoru Könül Babayeva çıxış edərək mərkəzin gördüyü işlər və təlim sahələri üzrə məlumat verib.
Onu da bildirək ki, məlumatlandırma günləri noyabr ayının sonunadək davam edəcək.

Nuray ƏSGƏROVA

Naxçıvan Dövlət Universitetində beynəlxalq əlaqələrin inkişaf etdirilməsi və dünya universitetləri ilə əməkdaşlıqların qurulması istiqamətində məqsədyönlü tədbirlər görülür. Bu tədbirlərin davamı kimi Türkiyənin Çankırı Karatekin Universitetindən 20 nəfərdən ibarət nümayəndə heyəti “Erasmus+” layihəsi çərçivəsində Naxçıvan Dövlət Universitetində olub. Universitetin rektoru, AMEA-nın müxbir üzvü Saleh Məhərrəmov ali təhsil ocağının yaranma tarixindən danışıb, universitetin 50 illik yubileyinin dövlət səviyyəsində qeyd olunduğunu diqqətə çatdırıb. Beynəlxalq əlaqələrdən də danışan rektor “Erasmus+” çərçivəsində müvafiq ixtisaslardan 15 tələbənin bir semestr ərzində Çankırı Karatekin Universitetində təhsil almaq üçün göndərildiyini bildirib.
Universitetlə yaxından tanış olan qonaqlar ixtisaslaşmış bölmələrdə dərs və treninqlər keçiblər. Onlar ali təhsil müəssisəsinin Tarix-filologiya, Beynəlxalq münasibətlər və xarici dillər, Sosial idarəetmə və hüquq, İqtisad, Pedaqoji, Təbiətşünaslıq və kənd təsərrüfatı, Tibb fakültələrində keçilən dərslərdə qardaş ölkənin tədris sahəsindəki təcrübələrini bölüşüblər.
Tədris sahəsində fəaliyyət göstərən heyət müvafiq olaraq Tədris, Media, Kadrlar şöbələrində treninqlər keçiriblər.
Universitetdə mövcud olan media mərkəzi ilə maraqlanan qonaqlar bir həftə ərzində televiziya və radionun iş prinsipi, onlayn videokonfransların keçirilmə qaydaları ilə yaxından tanış olublar.
Mühasibatlıqda sənəd dövriyyəsi ilə maraqlanan qonaqlar Tələbə-məzun şöbəsində universitetdə həyata keçirilən elektron tədris prosesi ilə tanış olublar.

Səadət ƏLİYEVA

Muxtar respublika ümumtəhsil məktəblərinin IX-XI sinif şagirdləri arasında test-sınaq imtahanları keçirilmişdir.
Sınaq imtahanlarında XI sinif şagirdlərinə 5 fənn üzrə 125 sual təqdim olunmuş, sualların cavablandırılmasına 180 dəqiqə vaxt verilmişdir. IX-X sinif şagirdlərinin buraxılış imtahanlarına hazırlıq səviyyəsinin yüksəldilməsi və gələcəkdə imtahanların birinci mərhələsində yüksək nəticələr əldə etmələri üçün sınaq imtahanları yeni formatda keçirilmişdir. IX sinif şagirdlərinə ana dili və riyaziyyat fənlərinin hər birindən 30 olmaqla, ümumilikdə 60 sual, X sinif şagirdlərinə isə ana dili, riyaziyyat və xarici dil fənlərinin hər birindən 30 olmaqla, ümumilikdə, 90 sual təqdim edilmişdir.
Sualları cavablandırmaq üçün IX və X sinif şagirdlərinə 120 dəqiqə vaxt ayrılmışdır. Sınaq imtahanlarında muxtar respublikanın bütün ümumtəhsil məktəbləri şagirdlərinin iştirakı təmin olunmuşdur.

Naxçıvan Muxtar Respublikası
Təhsil Nazirliyinin mətbuat xidməti

Naxçıvan şəhərindəki Gənclər Mərkəzində keçirilən yeniyetmələr arasında “Nuh yurdu” intellektual oyununun Naxçıvan Muxtar Respublika birinciliyi başa çatıb.
İntellektual oyun Naxçıvan Muxtar Respublikası Ali Məclisinin Sədri yanında Gənclər Fondunun, muxtar respublikanın Gənclər və İdman, Təhsil nazirliklərinin, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin, “Gənclərin İntellektual İnkişaf Mərkəzi” İctimai Birliyinin birgə təşkilatçılığı ilə keçirilib.
İntellektual oyunda rayon və şəhər birinciliklərində qalib olan 8 komanda iştirak edib. Oyun yarımfinal və final mərhələsindən ibarət olub.
“Lider”, “Qeyrət qalası”, “Odlar yurdu” və “Nuh yurdu” komandaları finala vəsiqə qazanıblar.
Oyunun yekun nəticəsinə görə, Culfa rayonunun “Odlar yurdu” komandası I, Naxçıvan şəhərinin “Lider” komandası II, Şərur rayonunun “Nuh yurdu” komandası isə III yerə çıxıblar.
Qalib gələn komandalara təşkilatçıların kubok, diplom, fəxri fərman və oxunması zəruri olan kitablardan təqdim edilib.
Qeyd edək ki, qalib komandalar dekabr ayında Qəbələ şəhərində yeniyetmələr arasında keçiriləcək V Azərbaycan çempionatında muxtar respublikanı təmsil edəcəklər.

Ceyhun MƏMMƏDOV

AMEA Naxçıvan Bölməsində Naxçıvan Muxtar Respublikası Ali Məclisi Sədrinin 2017-ci il 28 avqust tarixli ­Sərəncamı ilə “Oxunması zəruri olan kitablar Siyahısı”na daxil edilən “Azərbaycan xalqının ümummilli lideri ­Heydər Əliyevin Yeni 2001-ci il, Yeni əsr və Üçüncü minillik münasibətilə Azərbaycan xalqına müraciəti” kitabının müzakirəsi keçirilib.
Tədbirdə bölmənin Tarix, Etnoqrafiya və Arxeologiya İnstitutunun direktoru, AMEA-nın müxbir üzvü Fəxrəddin Səfərli sərəncamın gənc nəslin vətənpərvərlik, tarixi kökə bağlılıq ruhunda tərbiyə edilməsindəki əhəmiyyətindən bəhs edib.
“Əcəmi” Nəşriyyat-Poliqrafiya Birliyində nəşr olunan “Azərbaycan xalqının ümummilli lideri Heydər Əliyevin Yeni 2001-ci il, Yeni əsr və Üçüncü minillik münasibətilə Azərbaycan xalqına müraciəti” kitabının məziyyətlərindən danışan alim bildirib ki, bu nəşr xalqımız üçün əhəmiyyət kəsb edən tarixi məqamları əhatə edir. Kitabda tariximizin bütün dövrləri təhlil olunur.
Qeyd olunub ki, nəşrdə Azərbaycan tarixinə dərindən nəzər salınır, tarixi proseslərə, hadisələrə obyektiv qiymət verilir, elmi-nəzəri təhlillər aparılır. Ümummilli lider Heydər Əliyevin müraciətini Azərbaycan intibahına çağıran sənəd kimi dəyərləndirən tarixçi-alim bildirib ki, həmin müraciət gənc nəsillər üçün mühüm tarixdir və bu tarix gələcək nəsillər tərəfindən daim öyrəniləcək, tədqiq olunacaqdır.
Tədbirdə institutun şöbə müdiri, tarix üzrə fəlsəfə doktoru Emin Şıxəliyev və böyük elmi işçi, tarix üzrə fəlsəfə doktoru Yaşar Rəhimov çıxış edərək kitabın bütün azərbaycanlılar üçün əhəmiyyət kəsb edən tarixi, siyasi-ideoloji məqamları əhatə etdiyini vurğulayıblar.

AMEA Naxçıvan Bölməsinin
İnformasiya şöbəsi

Naxçıvan Muxtar Respublikası Ali Məclisi Sədrinin 2015-ci il 27 iyul tarixli “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamına əsasən Naxçıvan Dövlət Universitetinin Hüquqşünaslıq, eləcə də Dövlət və bələdiyyə idarəetməsi ixtisasları Naxçıvan Muxtar Respublikası Ədliyyə Nazirliyinin hamiliyinə verilib.
Noyabrın 22-23-də adıçəkilən ixtisaslar üzrə I kursda təhsil alan tələbələr nazirliyin aparatında və tabe qurumlarında təcrübə keçiblər.
İlk olaraq gələcəyin hüquqşünasları Naxçıvan Muxtar Respublikası Ədliyyə Nazirliyinin Penitensiar Xidmətində dövlətimizin cəza-icra siyasətinin həyata keçirilməsi, məhkumların hüquq və vəzifələrinin təmin edilməsi üçün peşə kurslarının təşkili haqqında ətraflı məlumat alıblar. Burada onları maraqlandıran suallara aydınlıq gətirilib.

Şərur rayonunda öz uğurları ilə seçilən çox sayda təhsil ocağı vardır. Onlardan biri də Şərur şəhər 1 nömrəli tam orta məktəbdir.
Məktəblə tanışlıq zamanı məlum oldu ki, adıçəkilən təhsil ocağı 1963-cü ildən fəaliyyət göstərir. Məktəbin direktor əvəzi Əli Mehdiyev bildirdi ki, muxtar respublikada təhsilə göstərilən qayğıdan Şərur şəhər ­ 1 nömrəli tam orta məktəbə də pay düşüb. Belə ki, 2010-cu ilin yanvar ayında məktəb binası yenidənqurmadan sonra müəllim və şagirdlərin istifadəsinə verilib. 738 şagird yerlik 3 mərtəbəli məktəb binasında fizika və kimya laboratoriyaları, elektron lövhəli siniflər, kompüter otaqları, kitabxana, hərbi kabinə və idman zalı vardır. Məktəbin həyətində müxtəlif idman qurğuları quraşdırılıb. Burada fəaliyyət göstərən şahmat otaqlarında uşaq və yeniyetmələrin zəka idmanı ilə məşğul olmaları üçün hər cür şərait yaradılıb. Müasir idman zalında şagirdlər müxtəlif idman növləri ilə məşğul olur, fiziki sağlamlıqlarını möhkəmləndirirlər. Onların idman yarışlarında yüksək nəticələr əldə etmələri də yaradılan şəraitin bəhrəsidir. Təhsil ocağının hərbi kabinəsi bu gün şagirdlərin ən çox üz tutduğu ünvanlardandır. Burada şagirdlərin hərbi hazır­lığın ilkin sirlərinə yiyələnmələri üçün bütün imkanlar mövcuddur.

Dünən Heydər Əliyev Uşaq-Gənc­lər Yaradıcılıq Mərkəzində Uşaq Hüquqları Haqqında Konvensiyanın və Uşaq Hüquqları Haqqında Bəyannamənin qəbul olunduğu günlə əlaqədar olaraq “Biz qayğı ilə böyüyürük” mövzusunda şagirdlər arasında keçirilən inşa yazı müsabiqəsinin yekun tədbiri keçirilib.
Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi və muxtar respublika Təhsil Nazirliyi tərəfindən IX-XI sinif şagirdləri arasında keçirilən müsabiqəyə son mərhələdə 19 yazı təqdim olunub.
Tədbirdə Naxçıvan Muxtar Respublikası Ailə, Qadın və Uşaq Problemləri üzrə Dövlət Komitəsi sədrinin müavini Aytən Məmmədovanın və muxtar respublika Təhsil Nazirliyinin şöbə müdiri Rüstəm Həsənovun çıxışları olub. Çıxışlarda ölkəmizdə, eləcə də muxtar respublikamızda uşaq hüquqları sahəsində həyata keçirilən tədbirlərdən danışılıb, onların istedadlarını, bacarıqlarını üzə çıxarmaq, dünyagörüşünü düzgün formalaşdırmaq, vətənpərvər ruhda yetişdirmək istiqamətində görülən işlərdən, bu sahədə qəbul olunan dövlət proqramlarının əhəmiyyət­indən bəhs edilib.
Qeyd edilib ki, qaliblərin müəyyənləşdirilməsində əsas meyarlar inşa yazıların məzmunlu, əhatəli olması, fikir aydınlığı və lakonikliyin qorunmasıdır. Sevindirici haldır ki, müsabiqəyə təqdim olunan yazı işlərinin əksəriyyətində məktəblilər mövzu ilə bağlı düşüncələrini aydın və müstəqil şəkildə ifadə edə biliblər. Bu da uşaqların mütaliəli, yaradıcı olmasından onlarda yazı mədəniyyətinin formalaşmasından xəbər verir.
Müsabiqənin nəticəsinə görə Sədərək kənd 1 nömrəli tam orta məktəbin ­XI sinif şagirdi Gülnar Səlimli I yerə layiq görülüb. Naxçıvan şəhər 14 nömrəli tam orta məktəbin IX sinif şagirdi Ayxan Ələkbərov II, Naxçıvan Qarnizonu tam orta məktəbinin IX sinif şagirdi Aytəkin Bağırova III yeri tutublar.
Qaliblərə diplom və hədiyyələr təqdim edilib.

 Ramiyyə ƏKBƏROVA

Naxçıvan Muxtar Respublikası Turizm-Diyarşünaslıq Mərkəzi tərəfindən məktəblilərin payız tətili ilə bağlı bir sıra mədəni-kütləvi tədbirlər hazırlanaraq həyata keçirilib. Belə tədbirlərin davamı olaraq uşaq, yeniyetmə və gənc turistlərin 4 günlük istirahət müddəti üçün proqram hazırlanıb.

Proqram çərçivəsində payız tətilinin birinci günü məktəblilər üçün Əcəmi seyrəngahında Naxçıvan Rəssamlar Birliyinin üzvü, Əməkdar rəssam Həmzə Sadiqov tərəfindən ustad dərsi keçilib.
Rəssam məktəblilərə ustad dərsinin incəlikləri haqqında məlumat verib, müxtəlif janrlar, dünya rəssamlıq inciləri haqda danışıb. Həmzə Sadiqov Açıq Səma Altında Muzeyi seçərək bu muzeydəki eksponatların eskizlərini yaradıb, məktəblilərə bu eskizlərin tabloya köçürülməsi qaydaları haqqında məlumat verib. O, gənc turizm həvəskarlarına rəngkarlığın sirləri, əsərin işlənmə texnikası barədə də danışıb. Burada məktəblilər öyrəniblər ki, əvvəlcə bütöv obyektlərin və fonun rənglənməsi, kompozisiya bitdikdən sonra isə əsərin kiçik elementlərinin işlənilməsi vacibdir. Turizmə həvəs göstərən uşaqların mənzərə janrında rəsmlər çəkməyi öyrənmələri məqsədəuyğundur.

Muxtar respublikada təhsilin inkişafı və tədrisin keyfiyyətinin yüksəldilməsi istiqamətində ardıcıl tədbirlər görülür. Ötən ay Azərbaycan Milli Elmlər Akademiyası Naxçıvan Bölməsinin əməkdaşları, muxtar respublikanın ali və orta ixtisas təhsili müəssisələrində çalışan elmi dərəcəli müəllimlər tərəfindən ümumtəhsil məktəblərində 204 saat nümunəvi dərs keçirilmişdir.
Muxtar respublikanın ümumtəhsil məktəblərinin məktəbəhazırlıq qruplarına qəbul davam etdirilmiş, şagirdlərin fiziki tərbiyə dərslərini qavraması və onlar tərəfindən idman normativlərinin yerinə yetirilməsi ilə bağlı monitorinqlər aparılmışdır. Həmçinin ötən ay ümumtəhsil məktəblərinin dörd, yeddi və on birinci sinif şagirdlərinin iştirakı ilə mərkəzləşmiş qaydada növbəti test-sınaq imtahanları keçirilmişdir. Ok­tyabr ayında Naxçıvan Şəhər Peşə Liseyini müxtəlif ixtisasartırma kursları üzrə 100-ə yaxın müdavim bitirmişdir.
Naxçıvan Muxtar Respublikasında fəaliyyət göstərən ali və orta ixtisas təhsili müəssisələrinin tələbələri arasında Dövlət Müstəqilliyi Gününə həsr olunmuş peyntbol üzrə muxtar respublika birinciliyi, idmanın basketbol, şahmat, stolüstü tennis növləri və “Vətənin müdafiəsinə hazıram” poliatlon çoxnövçülüyü üzrə spartakiada keçirilib. Ay ərzində Heydər Əliyev Uşaq-Gənclər Yaradıcılıq Mərkəzinin rəsm dərnəyinin üzvləri üçün ustad dərsi, ümumtəhsil məktəblərində şahmat fənnini tədris edən müəllimlər üçün Bakıdan dəvət olunmuş şahmat mütəxəssisləri tərəfindən 7 günlük seminar-treninq təşkil olunub.

Naxçıvan Muxtar Respublikası
Təhsil Nazirliyinin mətbuat xidməti

Naxçıvan şəhərindəki Heydər Əliyev adına tam orta məktəbdə Naxçıvan Muxtar Respublikası Estetik Tərbiyə Mərkəzi tərəfindən Milli Dirçəliş Günü ilə bağlı tədbir təşkil edilib. Tədbir başlanmazdan əvvəl mərkəzin dərnək üzvlərinin ifasında Dövlət Himni səsləndirilib. Aparıcı, mərkəzin dərnək rəhbəri Təranə Mirzəyeva tədbirin əhəmiyyətindən bəhs edib.
Videoslaydların da nümayiş olunduğu tədbirdə Estetik Tərbiyə Mərkəzinin direktoru Toğrul Həsənov, Heydər Əliyev adına tam orta məktəbin direktor müavini Arzu Həziyeva, mərkəzin metodisti Rahilə Əliyeva çıxış ediblər. Bildirilib ki, noyabr ayının 17-si hər il ölkəmizdə Milli Dirçəliş Günü kimi qeyd olunur. Xalqın tarixi yaddaşının özünə qayıtması, milli dirçəlişə nail olunması böyük bir tarixi prosesin nəticəsidir.
Vurğulanıb ki, milli dövlətçiliyimizin dirçəliş prosesinin hüquqi əsaslarının yaradılmasına məhz 17 noyabr 1990-cı ildə ulu öndərimizin rəhbərliyi ilə Naxçıvandan başlanıb. Əslində isə Azərbaycan xalqının milli dirçəlişinin əsası ötən əsrin 70-80-ci illərində qoyulub. O dövrdə ulu öndər Heydər Əliyevin xalqın milli şüurunun oyanışı istiqamətində həyata keçirdiyi tədbirlər ötən əsrin 90-cı illərinin əvvəllərində Azərbaycan xalqının öz milli suverenliyini təmin etmək üçün mübarizəyə başlamasını şərtləndirib.
Sonra mərkəzin dərnək üzvlərinin ifasında şeirlər bədii ­qiraət olunub, mahnı və rəqslər ifa edilib.

 Nail ƏSGƏROV

AMEA Naxçıvan Bölməsinin Təbii Ehtiyatlar İnstitutu “Nəqşicahan Holdinq” Şirkətlər Qrupu Culfa rayon “Karbon Qazı Zavodu” MMC ilə birgə keçirilən konfransı Təbii Ehtiyatlar İnstitutunun direktoru, AMEA-nın müxbir üzvü Əliəddin Abbasov açıb.

Bildirib ki, Naxçıvan Muxtar Respublikasında 250-dən artıq mineral su yatağı mövcuddur. Alim ionların sirli birləşməsindən əmələ gələn və onlarla dərman preparatlarını əvəz edən şəfalı mineral sulardan içməli su təchizatında və təsərrüfatda, sənayedə və müalicəvi məqsədlər üçün geniş istifadə olunduğunu bildirib. Qeyd edib ki, “mineral suların təbii muzeyi” adlandırılan Naxçıvanın mineral su bulaqları içərisində Darıdağ termal suyu, tərkibindəki karbon qazı, bor, dəmir, arsenin miqdarına və debitinə görə seçilir.
Konfransda institutun Hidrogeologiya və mineral sular laboratoriyasının rəhbəri, kimya üzrə fəlsəfə doktoru Fizzə Məmmədova “Darıdağ arsenli mineral suyu haqqında”, Mineral xammalın kimyası və texnologiyası laboratoriyasının böyük elmi işçisi, kimya elmləri üzrə fəlsəfə doktoru Əhməd Qarayev “Karbon qazının sənaye üsulu ilə alınması metodları” və kimya elmləri doktoru Bayram Rzayev “Karbon qazının tətbiq sahələri” mövzusunda məruzələrlə çıxış ediblər.

Bu gün muxtar respublikamızda çox sayda müasir uşaq bağçaları fəaliyyət göstərir. Biz də ara-sıra yolumuzu həmin müəssisələrdən salır, burada yaradılan şərait, uşaqların məktəbəqədər tərbiyə prosesində aldıqları biliklər ilə maraqlanırıq. Ötən günlərdə Naxçıvan şəhərində fəaliyyət göstərən 10 nömrəli uşaq bağçasında olduq.

Qeyd edək ki, bu məktəbəqədər müəssisə üçün yeni bina inşa olunub, 2013-cü il yanvar ayının 14-də fəaliyyətə başlayıb. Həmin gün açılış mərasimində Naxçıvan Muxtar Respublikası Ali Məclisinin Sədri ümummilli liderimiz Heydər Əliyevin “Uşaqlar bizim gələcəyimizdir. Gələcəyimizi nə cür tərbiyə edəcəyiksə, böyüdəcəyiksə, ölkəmizin, millətimizin, dövlətimizin gələcəyi bundan asılı olacaqdır” fikrini xatırladaraq deyib: “Uşaq bağçasının yeni binasında ölkəmizin gələcəyi olan uşaqların sağlam milli ruhda yetişdirilməsi üçün lazımi şərait vardır. Yaradılan şərait uşaqların yüksək sosial-mənəvi mühitdə böyüməsinə, onların təlim-tərbiyəsinin, ilkin təhsilinin müasir səviyyədə təşkil olunmasına imkan verəcəkdir. Uşaq bağçalarında cəmiyyət və ölkə üçün yararlı vətəndaş kimi böyüdülən uşaqlar isə orta təhsillərini də müvəffəqiyyətlə başa vuraraq dövlətimizin gələcək inkişafında yaxından iştirak edəcəklər. Ona görə də məktəbəqədər tərbiyə müəssisələrində uşaqlara ilkin biliklərin dərindən öyrədilməsi, onların məktəbə hazırlanması və əsl vətəndaş kimi yetişdirilməsi diqqət mərkəzində saxlanılmalıdır”.

10-17 noyabr Beynəlxalq Tələbə-Gənclər Həftəsi münasibətilə muxtar respublikada fəaliyyət göstərən ali və orta ixtisas təhsili müəssisələrinin komandaları arasında keçirilən “Nuh yurdu” intellektual oyununa yekun vurulub.

Naxçıvan Muxtar Respublikası Gənclər və İdman Nazirliyi, Naxçıvan Muxtar Respublikası Ali Məclisinin Sədri yanında Gənclər Fondu, Yeni Azərbaycan Partiyası Naxçıvan Muxtar Respublika Təşkilatı Heydər Əliyev adına Gənclər Birliyi və Gənclərin İntellektual İnkişaf Mərkəzi İctimai Birliyinin birgə təşkil etdiyi oyun Gənclər Mərkəzində keçirilib.
Oyunda ali və orta ixtisas təhsili müəssisələrinin hər birindən 2 olmaqla, ümumilikdə, 12 komanda mübarizə aparıb. Oyun üç yarımfinal və final mərhələsindən ibarət olub. “Turan”, “Nuh”, “Yurd” və “Melodiya” komandaları finala vəsiqə alıblar.
Nəticəyə əsasən Naxçıvan Dövlət Universitetinin “Turan” komandası qalib adını qazanıb. “Naxçıvan” Universitetinin “Yurd” komandası ikinci, Naxçıvan Dövlət Universitetinin “Nuh” komandası isə üçüncü olublar.
Qalib gələn komandalar 17 noyabr 2017-ci il tarixdə “Gənclik” Mərkəzində keçiriləcək tədbirdə mükafatlandırılacaqlar.

 Ceyhun MƏMMƏDOV

Məhəmməd Füzuli adına Ordubad şəhər internat tam orta məktəbi 1957-ci ildə I-IV siniflər üçün 120 nəfərlik şagird kontingenti ilə 7 illik məktəb kimi Ordubad şəhərində tikilmiş 240 şagird yerlik binada fəaliyyətə başlayıb. Məktəbə rayonun qabaqcıl müəllimləri cəlb edilib. Bu da öz bəhrəsini verib. Elə ilk illərdən başlayaraq məktəb öz fəaliyyəti ilə gözəçarpan göstəricilərə imza atıb. Ölkəmizin müxtəlif rayonlarından bu təhsil ocağına axın başlayıb. Bu məktəb həm də valideyn himayəsindən məhrum olmuş və aztəminatlı ailələrin uşaqlarının oxumaq imkanı əldə etmələri baxımından diqqəti çəkib.

1964-cü ildə Ordubad şəhərində internat məktəbi üçün yeni 420 şagird yerlik tədris, 300 yerlik yataqxana korpusu inşa olunub. Yeni korpuslar həmin ilin sentyabrında öz qapılarını 340 şagirdin üzünə açıb. Bu illər ərzində məktəbdə güclü təhsil ənənələri yaradılıb.
Azərbaycan Respublikası ikinci dəfə müstəqilliyinə qovuşduqdan sonra ulu öndərin yenidən hakimiyyətə qayıdışı ilə ölkə təhsilinin inkişaf strategiyası müəyyənləşdirildi. Regionların sosial-iqtisadi inkişafı Azərbaycanda inşa olunan yeni məktəb binalarının sayının artmasına, təhsildə uğurlar qazanılmasına stimul oldu. Bu qayğıdan Ordubad internat məktəbinə də pay düşdü. 2006-cı il dekabrın 21-də ölkə Prezidenti cənab İlham Əliyevin iştirakı ilə istifadəyə verilən internat məktəbi yeni inkişaf mərhələsinə qədəm qoydu. Bir neçə il bundan əvvəl isə məktəb binası əsaslı surətdə təmir edilib.

Ordubad Rayon Mədəniyyət Evində yeniyetmələr arasında keçirilən “Nuh yurdu” intellektual oyununun Ordubad rayon birinciliyinə yekun vurulub.
Birincilik Naxçıvan Muxtar Respublikası Gənclər və İdman, Təhsil nazirlikləri, Naxçıvan Muxtar Respublikası Ali Məclisinin Sədri yanında Gənclər Fondu, Yeni Azərbaycan Partiyası Naxçıvan Muxtar Respublika Təşkilatı Heydər Əliyev adına Gənclər Birliyi və Gənclərin İntellektual İnkişaf Mərkəzi İctimai Birliyinin təşkilatçılığı ilə keçirilib.
Əvvəlcə Gənclər və İdman Nazirliyinin Gənclərlə iş şöbəsinin müdiri Tahir Məmmədli çıxış edərək oyunun keçirilməsində məqsədin yeniyetmələrin intellektual səviyyəsini, dünyagörüşünü, zehni inkişafını stimullaşdırmaq, onlar arasında bilik və elmin nüfuzunu artırmaq olduğunu bildirib və komandalara uğurlar arzulayıb.
8 komandanın iştirak etdiyi oyun yarımfinal və final mərhələsindən ibarət olub. Final mərhələsinə “Xəzər”, “Qasırğa”, “Qarabağ” və “Danyeri” komandaları vəsiqə qazanıblar.
Yekunda Ordubad şəhər M.Füzuli adına tam orta internat məktəbinin “Qarabağ” komandası intellektual oyunun qalibi olub. Əndəmic kənd tam orta məktəbinin “Danyeri” və Ordubad şəhər 3 nömrəli tam orta məktəbin “Qasırğa” komandaları isə müvafiq olaraq ikinci və üçüncü yerlə kifayətləniblər.
Qalib komandalara təşkilatçıların kubok, diplom, fəxri fərman və oxunması zəruri olan kitablar külliyyatı təqdim olunub.

Ceyhun MƏMMƏDOV

Noyabrın 8-də muxtar respublikanın ümumtəhsil məktəbləri ilə Dövlət Bayrağı Muzeyi arasında interaktiv dərs keçilib.

Açıq dərsdə muzeyin bələdçisi Ayşən Mehdiyeva tərəfindən qeyd edilib ki, dövlət rəmzləri istənilən dövlətin tanınma nişanı, suverenliyinin, özünəməxsusluğunun rəmzidir. Bu rəmzlərdə hər bir dövlətin, xalqın çoxəsrlik tarixi, milli dəyərləri və ənənələri öz əksini tapır. Qədim dövlətçilik tarixi və ənənələri olan çağdaş Azərbaycan dövlətinin müstəqilliyini və şərəfli keçmişini əks etdirən dövlət rəmzləri sırasında Azərbaycan Respublikasının bayrağı müstəsna yer tutur.
Qeyd olunub ki, milli düşüncəmizdə əsas dövlət rəmzlərindən olan bayrağa xüsusi münasibət tarixboyu özünü qabarıq göstərib, xalqımızın milli mövcudluq nişanəsi sayılıb. Üçrəngli bayrağımızın dövlət rəmzlərindən biri kimi qəbul edilərək ucaldılması isə 1918-ci ilin 28 mayında yaradılan Azərbaycan Xalq Cümhuriyyəti dövrünə təsadüf edir. Həmin gün Azərbaycan Milli Şurası Tiflisdə İstiqlal Bəyannaməsi ilə dövlət müstəqilliyini bütün dünyaya bəyan edib. Fətəli xan Xoyskinin rəhbərlik etdiyi Azərbaycan Müvəqqəti Hökumətinin 1918-ci il 24 iyun tarixli qərarı ilə üzərində ağ aypara və səkkizguşəli ulduz təsviri olan qırmızı rəngli bayraq Azərbaycan Xalq Cümhuriyyətinin dövlət bayrağı kimi qəbul edilib.

Naxçıvan Muxtar Respublikası Ali Məclisinin Naxçıvanşünaslıq Mərkəzində 9 Noyabr – Dövlət Bayrağı Günü münasibətilə “Naxçıvan xanlığının bayraqları” mövzusunda açıq dərs keçilib.
Naxçıvan Musiqi Kollecinin bir qrup tələbəsinin iştirakı ilə keçilən dərsdə mərkəzin elmi katibi Emin Məmmədov bildirib ki, qədim zamanlardan bütün dövlətlərin özünəməxsus simvolları, rəmzləri olub və həmin rəmzlər hər bir ölkənin tarixi və dövlətçilik ənənələrində xüsusi yerə malikdir. Zəngin dövlətçilik tarixinə malik olan Azərbaycanın ərazisində yaradılan bir sıra dövlətlərin də özünəməxsus bayraqları olub. Bu baxımdan 1747-ci ildə əsası Kəngərli tayfasının başçısı Heydərqulu xan tərəfindən qoyulan Naxçıvan xanlığı daha çox diqqəti cəlb edir.
Qeyd olunub ki, ötən illərdə Naxçıvan xanlığının bayraqları Milli Azərbaycan Tarixi Muzeyinin əməkdaşı, tarix üzrə fəlsəfə doktoru, bayraqşünas Pərvin Gözəlov tərəfindən Sankt-Peterburq şəhərinin Ermitaj Muzeyinin bayraq fondunda və arxivində aparılan elmi tədqiqatlar nəticəsində aşkar­lanıb. Naxçıvan xanlığının bizədək gəlib çatan bayraqlarından biri 1812-ci ilin 19-20 oktyabrında Aslandüz döyüşündə general-mayor Pyotr Kotlyarevski tərəfindən qənimət kimi götürülmüş döyüş bayrağıdır. Dövlət bayrağı isə 1827-ci ildə xanlığın işğalı zamanı general Paskeviç tərəfindən qənimət kimi əldə edilmiş bayraqdır. Həmin bayraq bu günə qədər müxtəlif xarici muzeylərin fondlarında “XVIII-XIX əsr müsəlman bayrağı” kimi saxlanılıb.

Tələbə və elm işçilərinin beynəlxalq mübadiləsi ilə məşğul olan və bu sahədə dünyanın ən böyük təqaüd təşkilatı sayılan Alman Akademik Mübadilə Xidmətinin əməkdaşları Naxçıvan Dövlət Universitetində olublar. Beynəlxalq münasibətlər və xarici dillər fakültəsində təşkil edilən görüşdə qonaqları salamlayan universitetin rektoru, AMEA-nın müxbir üzvü Saleh Məhərrəmov mərkəzin fəaliyyətinin və əməkdaşlıq əlaqələrinin əhəmiyyətindən danışıb.
Xidmətin Bakı Məlumat Mərkəzinin direktoru Stefani Düfo vurğulayıb ki, Azərbaycanda 1997-ci ildən fəaliyyət göstərən qurum dünyada 60-dan artıq ölkədə 15 xarici nümayəndəlik, 56 məlumat mərkəzi və 500-dən artıq lektor və dil mütəxəssisləri ilə təmsil olunur. Alman Akademik Mübadilə Xidmətinin əsas fəaliyyəti tələbələrin və elmi işçilərin mübadiləsi ilə Almaniyanın xarici ölkələrlə akademik münasibətlərinin dəstəklənməsidir. Xidmətin Bakı Məlumat Mərkəzi regionlarda yerləşən ali təhsil müəssisələri ilə əməkdaşlıq etməkdə maraqlıdır. Əvvəlki layihələrdə təkcə alman dili ixtisasında oxuyan tələbələrə üstünlük verilirdisə, bu gün artıq layihə çərçivəsində ingilis dilli təhsil proqramlarına da yer verilir. İl ərzində tələbə və müəllimlər üçün müxtəlif mövzularda seminarlar və yay məktəbləri təşkil edən Bakı Məlumat Mərkəzi tərəfindən təqaüdlü təhsil proqramları da irəli sürülür.
Sonda tələbələrin mərkəzin iş prinsipi ilə əlaqədar sualları cavablandırılıb, mərkəzin fəaliyyətini dolğun əks etdirən broşürlər paylanılıb.

Səadət Əliyeva

Naxçıvan Dövlət Universiteti və Naxçıvan Muxtar Respublikası Səhiyyə Nazirliyi tərəfindən “Həkimlərin etik davranışları” mövzusunda konfrans keçirilib.
Konfransı giriş sözü ilə universitetin rektoru, AMEA-nın müxbir üzvü Saleh Məhərrəmov açaraq muxtar respublikada səhiyyənin müasir vəziyyəti və inkişafı istiqamətində görülən tədbirlərdən danışıb.
Naxçıvan Muxtar Respublikası səhiyyə nazirinin müavini Samrat Gəncəyeva “Tibb fakültəsi: tələbələr və həkim deontologiyası” mövzusunda məruzəsində bildirib ki, əhalinin sağlamlığının qorunması dövlətin öz vətəndaşlarına göstərdiyi xüsusi qayğıdan irəli gəlir. Bunun həyata keçirilməsində həkimin peşəkar fəaliyyətinin və mənəvi mövqeyinin rolu böyükdür. Buna görə də həkimlərin fəaliyyətinin səmərəliliyinin artırılması, onlara ictimai etimadın yüksəldilməsi üçün etik davranış qaydalarının müəyyən olunması vacib və əhəmiyyətli məsələlərdən biridir.