Şahbuz rayonunda bitkilərin toplanması və təbliği məqsədilə ümumtəhsil məktəblərinin şagirdləri arasında “Dərman bitkiləri” müsabiqəsi keçirilib.
Rayon Gənclər və İdman İdarəsi, Yeni Azərbaycan Partiyası Şahbuz Rayon Təşkilatının Gənclər Birliyi və Təhsil Şöbəsinin təşkilatçılığı ilə keçirilən müsabiqə iki mərhələdən – məktəbdaxili və rayon mərhələsindən ibarət olub.
Məktəb daxilində keçirilən müsabiqənin birinci mərhələsi yekunlaşıb və məktəblilər müsabiqənin şərtlərinə əməl edərək topladıqları bitkiləri rayon Gənclər və İdman İdarəsinə təhvil veriblər. Rayon mərhələsində münsiflər heyətinin qərarı ilə seçilən dərman bitkiləri Uşaq-Gənclər Yaradıcılıq Mərkəzində sərgilənib. Müsabiqədə mərkəzin dərnək üzvü Aytac Abbasova birinci yerə layiq görülüb. Badamlı qəsəbə tam orta məktəbinin şagirdi İsmayıl Paşayev ikinci, Şahbuz şəhər 2 nömrəli tam orta məktəbin şagirdi Solmaz Qəhrəmanlı isə üçüncü olub.
Qaliblər təşkilatçıların diplom və hədiyyələri ilə mükafatlandırılıblar.
Qeyd edək ki, toplanmış dərman bitkilərinin satış-sərgisi təşkil ­olunacaqdır.

Naxçıvan Muxtar Respublikası
Gənclər və İdman Nazirliyinin mətbuat xidməti

Bu gün muxtar respublikamızda hər sahədə olduğu kimi, təhsildə də tərəqqi dövrü yaşanır. Təhsil müəssisələrində müasir infra­strukturun yaradılması, təhsilin keyfiyyətinin yüksəldilməsi, maddi-texniki bazalarının gücləndirilməsi məzunların qəbul imtahanlarında yüksək nəticələr qazanmalarını təmin edir. Naxçıvan şəhərində “İstedad-XXI əsr” hazırlıq kurslarının təşkili də bu istiqamətdə görülən işlərin real nəticəsidir. Kurslar yüksək biliyə malik abituriyentlərin hazırlanmasında, müxtəlif xarici dillərin tədrisində, məktəbəqədər və ibtidai sinif şagirdlərinin istedadlarının üzə çıxarılmasında mühüm rol oynayır. 

“Naxçıvan” Universitetinin Pedaqoji və Xarici dillər fakültələrinin əyani şöbə üzrə təhsil alan tələbələri 2018-2019-cu tədris ilinin payız semestrində pedaqoji təcrübə keçməyə başlayıblar. Qeyd edək ki, ümumilikdə, 112 tələbə Heydər ­Əliyev adına tam orta məktəbdə, həmçinin 8 və 15 nömrəli tam orta məktəblərdə 7 həftəlik təcrübə keçəcək.
Bununla bağlı keçirilən konfransda çıxış edən universitetin tədris və tərbiyə işləri üzrə prorektoru, iqtisad üzrə fəlsəfə doktoru Hüseyn Bağırsoylu pedaqoji təcrübənin tələbələrin ali təhsil zamanı aldıqları nəzəri bilikləri tətbiq etmələri, pedaqoji mühitə uyğunlaşmaları, tədris prosesini dərindən mənimsəmələri baxımından mühüm əhəmiyyət kəsb etdiyini vurğulayıb. Prorektor tələbələrə ümumtəhsil məktəbləri ilə əməkdaşlığın möhkəmlənməsinə, yüksəkixtisaslı kadr hazırlığına xidmət edəcək pedaqoji təcrübə zamanı məsuliyyət və nizam-intizamın vacib amil olmasından bəhs edib.
Konfransda Pedaqogika və psixologiya kafedrasının müdiri Nəzakət Yusifovanın, metodist Tural Paşayevin çıxışları dinlənilib.

Nuray ƏSGƏROVA

Naxçıvan Müəllimlər İnstitutunda 2018-2019-cu tədris ilinin birinci yarısında əyani şöbəsində təhsil alan IV kurs tələbələrinin ikinci pedaqoji təcrübəsinə həsr olunmuş başlanğıc konfransı keçirilib.
Təhsildə sosial-psixoloji xidmət və Təsviri incəsənət müəllimliyi ixtisasları tələbələrinin iştirak etdiyi tədbirdə ali təhsil ocağının rektoru Elbrus İsayev bildirib ki, institutun 48 tələbəsi Naxçıvan şəhərindəki 8, 10, 11 və 14 nömrəli tam orta məktəblərə 8 həftəlik pedaqoji təcrübəyə göndərilir.
Konfransda iştirak edən Naxçıvan Muxtar Respublikasının təhsil naziri Rəhman Məmmədov qeyd edib ki, 2017-2018-ci tədris ilinin birinci yarımilində Naxçıvan Dövlət Universitetindən 678, “Naxçıvan” Universitetindən 112 və Naxçıvan Müəllimlər İnstitutundan 149 olmaqla, ümumilikdə, 939 nəfər III və IV kurs tələbəsi ümumtəhsil məktəblərində pedaqoji təcrübə keçib. Naxçıvan şəhər ümumtəhsil məktəbləri ilə yanaşı, Babək rayonunun Şıxmahmud və Kərimbəyli kənd tam orta məktəblərində də tələbələrin pedaqoji təcrübə keçmələri təmin olunub.
Vurğulanıb ki, təcrübə müddətində tələbələrə pedaqoji proseslə bağlı zəruri yeniliklər çatdırılacaq .
Tədbirdə pedaqoji təcrübənin təşkili və keçirilməsi, təcrübə zamanı pedaqoqun və psixoloqun vəzifələri barədə iştirakçılara məlumat verilib.

Xəbərlər şöbəsi

Hacıvar kənd tam orta məktəbində məktəblilər üçün “Sosial şəbəkələrin müsbət və mənfi xüsusiyyətləri” mövzusunda seminar keçirilib.
Babək Rayon Gənclər və İdman İdarəsinin əməkdaşı Aytəkin Süleymanova tədbirdə çıxış edərək bildirib ki, yeniyetmə və gənclər sosial şəbəkələrin əhəmiyyətliliyi ilə yanaşı, mənfi xüsusiyyətlərini də bilməli, onlardan istifadə edərkən mütləq məlumatlı və çox diqqətli olmalıdırlar. Bu sahədə ən vacib məqam insanların maarifləndirilməsidir. Buna görə də yeniyetmə və gənclər arasında mütəmadi olaraq maarifləndirmə tədbirləri, seminarlar keçirilir. Ailədə və təhsil ocaqlarında asudə vaxt düzgün müəyyənləşdirilərsə, yeniyetmə və gənclər virtual aləmə deyil, real fəaliyyətə üstünlük verərlər.
Qeyd edək ki, seminar Babək Rayon Gənclər və İdman İdarəsinin, Təhsil Şöbəsinin və Yeni Azərbaycan Partiyası Babək Rayon Təşkilatı Gənclər Birliyinin təşkilatçılığı ilə keçirilib.

Ceyhun MƏMMƏDOV

“Azercell Telekom” Məhdud Məsuliyyətli Cəmiyyəti yeni tədris ilinin başlanması ilə əlaqədar tələbələr üçün növbəti təqaüd proqramına start verib. Bununla bağlı Naxçıvan Dövlət Universitetində təşkil olunan görüşdə şirkətin İnsan resursları departamentinin nümayəndələri proqramın mahiyyətini və ondan bəhrələnməyin yollarını izah ediblər.
Universitetin Tədris və tərbiyə işləri üzrə prorektoru, tarix üzrə fəlsəfə doktoru, dosent Rafiq Rəhimov belə görüşlərin keçirilməsinin əhəmiyyətindən danışıb.
Təqaüd proqramı haqqında ətraflı məlumat verən “Azercell”in əməkdaşları bildiriblər ki, bu proqramı həyata keçirməkdə əsas məqsəd təhsildə müvəffəqiyyət əldə edən yüksək potensiallı tələbələrə qayğı göstərmək, onların gələcəkdə peşəkar mütəxəssis kimi formalaşmasına dəstək verməkdən ibarətdir.
Vurğulanıb ki, proqramın bütün seçim mərhələlərini uğurla keçən tələbələr cari təhsil müddətinin sonuna qədər şirkət tərəfindən 200 manat məbləğində aylıq təqaüd alacaq. Eyni zamanda gənclər proqram çərçivəsində informasiya-kommunikasiya texnologiyaları sahəsindəki biliklərini artırmaq, şirkətin korporativ tədbirlərində və sosial fəaliyyətində iştirak etmək, müxtəlif təlimlərə qoşulmaq və şirkətdə təcrübə keçmək imkanı əldə edə ­biləcəklər.
Qeyd edilib ki, 2008-ci ildən bu günə kimi ölkəmizin müxtəlif universitetlərində təhsil alan 156-dan çox tələbə şirkətin fəxri təqaüdçüsü adına layiq görülüb. Tələbə təqaüdü proqramı 3 istiqamətdə həyata keçirilir. Müsabiqəyə müraciət etmək üçün tələbələr şirkətin ­rəsmi internet səhifəsinə (www.azercell.jobs) daxil olub qeydiyyatdan keçməlidirlər. Ərizələr bir ay müddətində yalnız onlayn formada qəbul edilir. Təqaüd proqramının sonunda isə tələbələrə sertifikatlar veriləcək.
Sonda tələbələrin sualları cavablandırılıb, fəal tələbələrə “Azercell”in əməkdaşları tərəfindən hədiyyələr verilib. Tədbirdə təqaüd proqramına qoşulmaq qaydalarını əks etdirən videoçarx nümayiş etdirilib.

Badəm MƏMMƏDOVA

Naxçıvan şəhərindəki Gənclər Mərkəzində keçirilən yeniyetmələr arasında “Xəmsə” milli intellektual oyununun Naxçıvan şəhər birinciliyinə yekun vurulub.
Oyunun keçirilməsində məqsəd zəngin milli mədəniyyətimizin və tariximizin təbliğindən, yeniyetmələrin intellektual səviyyəsini, dünya­görüşünü formalaşdırmaqdan, zehni inkişafını stimullaşdırmaqdan, eləcə də asudə vaxtlarının səmərəli təşkili istiqamətində yeni üsullar tətbiq etməkdən ibarətdir.
İntellektual oyunda 8 komanda iştirak edib. 2 yarımfinal və final mərhələsindən ibarət olan oyunda qalib adını “Günnüt” komandası qazanıb. Digər iki pillədə “Qafqaz” və “Mübariz” komandaları qərarlaşıblar.
Qaliblər təşkilatçılar tərəfindən diplom, fəxri fərman və bilik yarışması kitabları ilə mükafatlandırılıblar.
Qeyd edək ki, birincilik Naxçıvan Muxtar Respublikası Gənclər və İdman, Təhsil nazirlikləri, Naxçıvan Muxtar Respublikasının Gənclər Fondu, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənc­lər Birliyi və “Gənclərin İntellektual İnkişaf Mərkəzi” İctimai Birliyinin birgə təşkilatçılığı ilə keçirilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Bu gün muxtar respublikamızda gənclərin hərtərəfli, müasir şərait və texniki avadanlıqlarla təchiz olunmuş məktəblərdə təhsil alması onları arzularına, qarşıya qoyduqları məqsədə çatmağa daha da yaxınlaşdırır. Xalqımızın adət-ənənələrinə, milli və ümumbəşəri dəyərlərə dərindən yiyələnir, yüksək mənəviyyatlı, vətənpərvər və ixtisaslı gənclər kimi yetişirlər. Yaradılan hərtərəfli şərait isə bu gün gənclərin məsuliyyət hissini daha da artırır, onları ölkəmizin inkişafı naminə təhsildə böyük uğurlar qazanmağa sövq edir.

Avqustun 20-də Nax­­çıvan Muxtar Respublikasının ümumtəhsil məktəblərini bitirərək ali məktəblərə qəbul imtahanlarında yüksək bal toplamış tələbələr­lə görüşü zamanı Ali ­Məclisin Sədri cənab Vasif Talıbov demişdir: “Dövlətin məqsədi ondan ibarətdir ki, yaradılmış müasir təhsil şəraitindən istifadə edən gənclər düzgün həyat yolu seçsinlər. Çünki yalnız hərtərəfli təhsil alan, peşə öyrənən, özünü ölkəsinin gələcəyinə hazırlayan gənclər dövlətçiliyimizin və müstəqilliyimizin dayağı ola bilərlər”.
Builki qəbul imtahanlarında yüksək bal toplayan və Prezident təqaüdünə layiq görülən muxtar respublika gənclərindən biri də Zöhrə Kəngərlidir. 2001-ci il iyunun 5-də Naxçıvan şəhərində anadan olan Zöhrə 2007-ci ildə Bakı şəhərində Heydər Əliyev adına Liseyin 1-ci sinfinə qəbul olunur. 2008-ci ilin may ayından Naxçıvan şəhər Əkbər Ağayev adına 8 nömrəli tam orta məktəbdə təhsilini davam etdirir. 2018-ci ildə həmin məktəbi əla qiymətlərlə bitirir və qəbul imtahanında III ixtisas qrupu üzrə 690 bal toplayaraq tələbə adını qazanır. Hazırda o, Azərbaycan Respublikasının Prezidenti yanında Dövlət İdarəçilik Akademiyasının Hüquqşünaslıq ixtisasında təhsilini davam etdirir. Elə buna görə də Zöhrə ilə sosial şəbəkə vasitəsilə həmsöhbət olduq. O bildirdi ki, qəbul imtahanı onun üçün uğurlu keçib. Mənim üçün əsas problem vaxt idi və buna görə çox həyəcanlı idim. Cavab kartımı yoxlayarkən İngilis dili fənnindən iki səhvim çıxdı. 700 bal toplamağı qarşıma məqsəd qoysam da, nəticəmdən razı idim.

AMEA Naxçıvan Bölməsində görkəmli alim və ictimai xadim, Əməkdar elm xadimi, Dövlət mükafatı laureatı, akademik Həsən Abdullayevin anadan olmasının 100 illiyinə həsr edilən elmi konfrans olub.
Tədbir Naxçıvan Dövlət və “Naxçıvan” universitetləri, Naxçıvan Müəllimlər İnstitutunun birgə təşkilatçılığı ilə keçirilib.
Konfransda bölmənin sədri, akademik İsmayıl Hacıyev çıxış edərək bildirib ki, Prezident cənab İlham Əliyev “Akademik Həsən Abdullayevin 100 illik yubileyi haqqında” Sərəncam imzalayıb. Buna uyğun olaraq Naxçıvan Muxtar Respublikası Ali Məclisinin Sədri cənab Vasif Talıbovun 2017-ci il 27 iyul tarixli Sərəncamı ilə “Akademik Həsən ­Abdullayevin 100 illik yubileyinin Naxçıvan Muxtar Respublikasında keçirilməsi ilə əlaqədar Tədbirlər Planı” təsdiq olunub. Elmi konfrans da həmin sərəncama əsasən keçirilir.
“Görkəmli alim və elm təşkilatçısı” mövzusunda məruzə edən bölmə sədri Həsən Abdullayevin zəngin elmi fəaliyyətinə qısa nəzər salıb. Bildirilib ki, ­görkəmli alim Azərbaycanda müasir fizikanın, xüsusən yarımkeçiricilər fizikası və texnikasının bünövrəsini yaratmaqla bərabər, onun hərtərəfli inkişafının başlıca istiqamətlərini müəyyənləşdirib. O, yüksək­ixtisaslı elmi kadrların hazırlanmasında böyük xidmətlər göstərib, Azərbaycanda yarımkeçiricilər fizikası üzrə elmi məktəb yaradıb. Akademik İsmayıl Hacıyev alimin uzun illər Azərbaycan Elmlər Akademiyasının Fizika İnstitutuna rəhbərlik etdiyini diqqətə çatdırıb.

AMEA Naxçıvan Bölməsi ilə Naxçıvan Muxtar Respublikasının 200-dən artıq ümumtəhsil məktəbi arasında yaradılan interaktiv dərsdə görkəmli Azərbaycan alimi, Dövlət mükafatı laureatı, Əməkdar elm xadimi, akademik Həsən Abdul­layevin həyatı haqqında şagirdlərə ətraflı məlumat verilib.
“Akademik Həsən Abdullayev: görkəmli fizik” mövzusunda keçilən dərsdə bölmənin Təbii Ehtiyatlar İnstitutunun Fiziki tədqiqatlar laboratoriyasının rəhbəri, fizika üzrə fəlsəfə doktoru, dosent Məmməd Hüseynəliyev akademikin həyat və elmi fəaliyyəti haqqında şagirdlərə geniş məlumat verib. Bildirib ki, bu il görkəmli fizik, böyük elm təşkilatçısı, akademik Həsən Məmmədbağır oğlu Abdullayevin anadan olmasının 100 illiyi tamam olur.
Azərbaycanda fizika məktəbinin formalaşmasında, sanballı nəticələrə nail olunmasında alimin əməyin­dən bəhs edən Məmməd Hüseynəliyev akademikin müəllifi olduğu və tələbələri ilə birlikdə yazdığı selen düzləndiricilərinə aid monoqrafiyaların dünya elmi nəşrləri sırasında öz fundamentallığı ilə seçildiyini deyib. Qeyd edib ki, akademik Həsən Abdullayevin Azərbaycanda bərk cisimlər fizikasının inkişafında, yarımkeçiricilər elektronikasının və yüksək texnologiyaların müasir həyata tətbiqində əvəzsiz rolu olub. Alim 15 mono­qrafiyanın, 250-dən çox ixtiranın, onlarla dərsliyin, 500-dən çox elmi məqalənin müəllifidir.
Açıq dərsdə qeyd olunub ki, ­Həsən Abdullayevin yaratdığı elmi irs bu gün də öyrənilir.

AMEA Naxçıvan Bölməsinin
İnformasiya şöbəsi

İnsan övladı dünyaya göz açdığı andan daim irəli getməyə, uğur qazanmağa can atır. Yalnız əzm və cəsarətlə çalışanlara müvəffəqiyyət ­zirvəsində yer tutmaq nəsib olur. Haqqında söhbət açacağımız gənc həmyaşıdları arasında fərqlənməyi, erkən yaşdan uğur qazanmağı bacarıb.

Onun barəsində qısaca məlumat verərək deyim ki, Əliyev Əbdülhüseyn Telman oğlu 2000-ci il noyabrın 22-də Naxçıvan şəhərinin Qaraçuq kəndində zəhmətkeş ailədə dünyaya göz açıb. Atası Telman kişi zəhmətə qatlaşıb, gözünün ağı-qarası iki oğlunu böyüdüb. Həmişə övladlarına deyib ki, bala, siz çalışın oxuyub savadlı, millətinə, Vətəninə layiqli övlad olasınız. Atanın bu sözləri böyük oğlu Əbdülhüseynin yaddaşına daha çox həkk olunub. Beləcə balaca Əbdülhüseyn atasının bu nəsihətindən sonra dərslərə həvəs göstərməyə başlayıb. İllər keçdikcə oxuduğu Naxçıvan şəhər 9 nömrəli tam orta məktəbdə fəallığı ilə müəllimlərinin diqqətini çəkib. Hələ 5-ci sinifdə təhsil alarkən uğur çırağı nur saçmağa başlayıb. Belə ki, o, sınaq imtahanında yüksək bal topladığı üçün Naxçıvan Muxtar Respublikası Ali Məclisinin Sədri cənab Vasif Talıbovla görüşmək şərəfinə nail olub. Muxtar respublika rəhbərinin ona kompüter hədiyyə etməsi isə Əbdül­hüseyni oxumağa daha da ruhlandırıb. Nəticədə, yuxarı siniflərdə uğurları xeyli çoxalıb. Riyaziyyat fənninə isə elə balaca yaşlarından böyük həvəsi olub. Təsadüfi deyil ki, o, 10-11-ci siniflərdə oxuyarkən riyaziyyat üzrə keçirilən fənn olimpiadalarında uğurla iştirak edərək 2 dəfə muxtar respublika ikincisi, bir dəfə ölkə üçüncüsü adını qazanıb. Ən böyük nəticəni isə 2017-2018-ci tədris ilində keçirilən qəbul imtahanlarında göstərib. Belə ki, II ixtisas qrupu üzrə keçirilən birinci imtahanda 651 balı qənaətbəxş hesab etməyən Əbdülhüseyn ikinci imtahandan 690 bal toplamaqla təkcə valideyn və müəllimlərinin deyil, muxtar respublikanın fəxrinə çevrilib. O, Azərbaycan Respublikasının Prezidenti yanında Dövlət İdarəçilik Akademiyasının İqtisadiyyat fakültəsinə qəbul olub.

AMEA Naxçıvan Bölməsində “Baba Nemətullah Naxçıvani və orta əsrlər İslam mədəniyyəti” mövzusunda elmi konfrans keçirilib.
Tədbirdə bölmənin sədri, akademik İsmayıl Hacıyev sufi şeyxlərindən olan Baba Nemətullah Naxçıvaninin həyat və yaradıcılığından danışaraq bildirib ki, böyük mütəfəkkir “Qurani­-Kərim”i təsəvvüf üslubunda şərh edən ilk alim kimi tarixə düşüb. O, təsəvvüf və təfsir sahəsində əsərlər qələmə alıb.
Diqqətə çatdırılıb ki, Baba Nemətullah Naxçıvani həyatının çox hissəsini Naxçıvanda, sonralar isə Təbrizdə və Türkiyənin Konya vilayətinin Ağşəhər qəsəbəsində yaşayıb. Konya valiliyinin təşəbbüsü ilə Ağşəhərdəki məktəbə alimin adı verilib.
Vurğulanıb ki, Nemətullah Naxçıvaninin heç bir ədəbiyyatdan istifadə etməyərək yazdığı (“Əl-Fəvatihül İlahiyyə vəl Məfatihül Qeybiyyə”) “Quran” təfsir kitabı üç cilddən ibarətdir. İlk cilddə 13, ikinci cilddə 20, üçüncü cilddə isə 81 surənin təfsiri və şərhi yer alıb. Əsərin orijinalı İstanbulda Topqapı Sarayı III Əhməd Xan Kitabxanasında mühafizə olunur.
Məlumat verilib ki, Naxçıvan Muxtar Respublikası Ali Məclisinin Sədri cənab Vasif Talıbovun tapşırığı ilə sözügedən əsərin üç cildi cari ildə filologiya üzrə fəlsəfə doktoru Nərgiz İsmayılova tərəfindən tərcümə edilib, üzərində son redaktə işləri aparılır.
Tədbirdə bölmənin Tarix, Etno­qrafiya və Arxeologiya İnstitutunun direktoru, AMEA-nın müxbir üzvü Fəxrəddin Səfərlinin, İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyevin, həmin institutun Ədəbiyyatşünaslıq şöbəsinin müdiri, filologiya üzrə fəlsəfə doktoru, dosent Ramiz Qasımovun, Əlyazmalar fondunun Əlyazmaların kataloqlaşdırılması, tədqiqi və nəşri şöbəsinin müdiri, fəlsəfə üzrə fəlsəfə doktoru, dosent Səbuhi İbrahimovun, Ədəbiyyatşünaslıq şöbəsinin böyük elmi işçisi, filologiya üzrə fəlsəfə doktoru Nərgiz İsmayılovanın mövzu ilə bağlı məruzələri dinlənilib.

AMEA Naxçıvan Bölməsinin
İnformasiya şöbəsi

Naxçıvan Muxtar Respublikası Ali ­Məclisinin Sədri yanında Dövlət Qulluğu Məsələləri üzrə Komissiya tərəfindən 24 avqust-12 sentyabr 2018-ci il tarixlərdə keçirilən imtahanlarda müvafiq keçid balını toplayaraq işə qəbul edilən gənc müəllimlərlə görüş olub. Təhsil Nazirliyində keçirilən tədbiri giriş sözü ilə açan nazir Rəhman Məmmədov gənclərin muxtar respublikamızın ictimai-siyasi həyatındakı mühüm rolundan, onlara göstərilən yüksək dövlət qayğısından danışıb.
Qeyd olunub ki, təhsilin keyfiyyəti gələcək nəsillərə bilik verən müəllimlərin səviyyəsindən də çox asılıdır. Bu gün muxtar respublikada təhsil sahəsində görülən işlərdən biri də müəllim heyətinin seçilməsindəki yenilikdir. Bu yenilik Naxçıvan Muxtar Respublikası Nazirlər Kabinetinin 2018-ci il 14 aprel tarixli qərarı ilə təsdiq olunmuş “Naxçıvan Muxtar Respublikasında müəllimlərin dövlət ümumi təhsil və ilk peşə ixtisas təhsili müəssisələrinə işə qəbulu, bilik və bacarıqlarının qiymətləndirilməsinin aparılması Qaydaları”na uyğun olaraq komissiya tərəfindən pedaqoji profilli ixtisasları bitirmiş gənclərin müsabiqə yolu ilə işə qəbuludur.

“Naxçıvan Muxtar Respublikasının dərman bitkiləri” adlı fundamental kitab Rusiya Federasiyasının Orexova-Zuevo vilayətində Dövlət Humanitar Texnologiya Universitetinin nəşriyyatında rus dilində nəşr olunub.
Kitabın müəllifləri AMEA Naxçıvan Bölməsinin Bioresurslar İnstitutunun direktoru, akademik Tariyel Talıbov, həmin institutun əməkdaşları – professor Əliyar İbrahimov, biologiya üzrə fəlsəfə doktorları Ənvər İbrahimov, Ramiz Ələkbərov, Azərbaycan Dövlət Aqrar Universitetinin Elm şöbəsinin müdiri, biologiya üzrə fəlsəfə doktoru, dosent Abbas İsmayılov, kimya üzrə fəlsəfə doktoru, dosent Vahid Quliyev və Naxçıvan Dövlət Universitetinin baş müəllimi Əli Qurbanovdur.
Yeni nəşrdə Naxçıvanın flora biomüxtəlifliyində faydalı bitkilər, xüsusilə müalicəvi təsiri olan dərman bitkilərinin yayılma zonaları müəyyən edilib, onların tərkibindəki bioaktiv maddələrin ayrı-ayrı xəstəliklərdə müalicəvi əhəmiyyəti araşdırılıb. Kitabda, həmçinin Naxçıvan florasında yayılmış dərman bitkilərinin təbiətdəki müasir vəziyyəti və təbii ehtiyatı bol olan bu növlərin mövcud yayılma zonaları müvafiq xəritələrdə verilib. Dərman bitkilərinin rəngli fotoşəkilləri, yayıldığı ərazilər, kimyəvi tərkibi, müalicəvi əhəmiyyəti, eyni zamanda bu bitkilərin toplanması, qurudulması və saxlanması qaydaları göstərilib.
Kitabın elmi redaktoru, AMEA-nın müxbir üzvü Elşad Qurbanov, ­rəyçiləri isə AMEA-nın müxbir üzvləri Saleh Məhərrəmov və Tofiq ­Məmmədovdur.
Nəşr Naxçıvan Muxtar Respublikasında mövcud olan 132 növ rəsmi dərman bitkisinin sistematik vəziyyəti, təbii və istismar ehtiyatı, kimyəvi tərkibi və yayılma zonaları haqqında geniş təsəvvür yaradan ilk kitabdır.

AMEA Naxçıvan Bölməsinin
İnformasiya şöbəsi

Vətənimizə layiq gənclər olacağıq

“İstənilən uğurun sirri özünəinam, məsuliyyət və səbirdədir”, – deyən Elvariz Məmmədov bu il ali məktəblərə qəbul imtahanlarında II qrup üzrə 695 bal toplayaraq tələbə adını qazanan abituriyentlərimizdəndir. Kəngərli rayonunun Qıvraq qəsəbəsində dünyaya göz açan Elvariz Məmmədov 2007-ci ildə həmin qəsəbədəki tam orta məktəbin birinci sinfinə daxil olub. Öz bacarığı, qabiliyyəti ilə məktəbin sevimlisinə çevrilən bu şagirdin nailiyyət qazanmasında müəllimlərinin də əməyi danılmazdır. Orta təhsilini başa vurduğu Qıvraq qəsəbə tam orta məktəbinin direktoru Mahmud Cavadovun dediyinə görə, təhsil ocağının müəllimləri Elvarizdə istedad və elmə olan sonsuz marağı hələ kiçik yaşlarından hiss ediblər. O deyir ki, Elvariz məktəbdə keçirilən bütün bilik yarışlarında və tədbirlərdə aktivliyi ilə seçilib. 2016-2017-ci illərdə iştirak etdiyi respublika fənn olimpiadası üzrə “Gümüş”, həmçinin 2017-ci ildə “Ölkəmizi tanıyaq” layihəsi üzrə Bakıda keçirilən bilik yarışında “Qızıl” medal qazanıb. Bundan əlavə, dəfələrlə olimpiadalarda iştirak edib və mükafatlara layiq görülüb.
Ailəsinin fəxri olan bu tələbənin valideynlərilə söhbət zamanı öyrəndik ki, onlar sadə peşə adamlarıdır. Elvarizin atası deyir ki, istər mən, istərsə də həyat yoldaşım ali təhsil ala bilmədiyimiz üçün ürəyimizdə qalan bu arzumuzun övladlarımız tərəfindən gerçəkləşdirilməsini istəmişik. Onların təhsil almaları, cəmiyyətə layiqli fərd kimi yetişmələri üçün əlimizdən gələni əsirgəməmişik. Şükür Allaha, onlar da bu arzumuzun yerinə yetməsi üçün səylə çalışıblar. Rza Məmmədov deyir ki, böyük oğlum kimi, Elvariz də hələ kiçik yaşlarından vaxtını təhsilə, mütaliəyə həsr edib. Bilik və dünyagörüşünü artırmaq üçün kitablar onun ən yaxın sirdaşı olub. Elə Elvarizin uğur qazanmasının başlıca səbəblərindən biri də mütaliəni sevməsi olub.

Türkiyə Respublikasının Van Yüzüncü İl Universitetinin rektoru Peyami Battal və İqdır Universitetinin rektoru professor Mehmet Hakkı Alma Naxçıvan Dövlət Universitetində olublar. Qonaqlar əvvəlcə Bilik Günü münasibətilə keçirilən tədbirdə iştirak edib, tələbə adını qazanan gənclərə təbriklərini çatdırıblar.
Sonra Naxçıvan Dövlət Universitetində görüş keçirilib.
Naxçıvan Dövlət Universitetinin rektoru, AMEA-nın müxbir üzvü Saleh Məhərrəmov ali təhsil müəssisəsinin Türkiyə universitetləri ilə səmərəli əməkdaşlığından danışıb. Bu əlaqələrin əhəmiyyətini vurğulayan rektor eyni zamanda “Mövlana” mübadilə proqramı çərçivəsində görülən işləri, müəllim-tələbə mübadiləsini diqqətə çatdırıb.

AMEA Naxçıvan Bölməsində “Naxçıvanda arxeoloji tədqiqatlar” mövzusunda tədbir keçirilib.
Tədbirdə bölmənin sədri, akademik İsmayıl Hacıyev on ildən artıqdır ki, Naxçıvan Muxtar Respublikasının ərazisində aparılan respublika və beynəlxalq səviyyəli arxeoloji araşdırmalardan, çoxsaylı tədqiqatlardan bəhs edib. O, bu il bölmənin arxeoloji ekspedisiyasının Fransa Milli Elmi Araşdırmalar Mərkəzinin arxeoloqları ilə birgə əvvəlki illərdəki tədqiqatlarını davam etdirdiyini, bölgənin I Kültəpə, Duzdağ və Naxçıvantəpə yaşayış yerlərində qazıntılar apardığını diqqətə çatdırıb.
Sonra bölmənin Tarix, Etno­qrafiya və Arxeologiya İnstitutunun Qədim dövr arxeologiyası şöbəsinin müdiri, Naxçıvan arxeoloji ekspedisiyasının rəhbəri, AMEA-nın müxbir üzvü Vəli Baxşəliyev Naxçıvan ərazisində aparılan arxeoloji ekspedisiyalarla bağlı məlumat verib. O qeyd edib ki, qazıntılar zamanı Kültəpənin Neolit dövrünə aid abidə olduğu tarixi arxeoloji əsaslarla dəqiqləşdirilib. O, I Kültəpə yaşayış yeri ətrafında əvvəlki illərdə aparılan arxeoloji araşdırmalarda aşkar olunan Eneolit dövrü yaşayış yerinin tədqiqinin davam etdirildiyini bildirib.
Daha sonra Azərbaycan və Fransa Beynəlxalq Arxeoloji ekspedisiya layihəsinin beynəlxalq ekspedisiya rəhbəri, Fransa Milli Elmi Araşdırmalar Mərkəzinin əməkdaşı Catherine Marro çıxış edərək bu ilin oktyabr ayında Bakı şəhərində açılacaq sərgidə I Kültəpə, Ovçular təpəsi və Duzdağda araşdırmalar zamanı əldə olunan materialların da nümayiş etdiriləcəyi barədə məlumat verib.
Catherine Marro arxeoloji qazıntılara dəstək və hərtərəfli şərait yaradan Naxçıvan Muxtar Respublikası Ali Məclisinin Sədrinə minnətdarlığını bildirib.
Sonda sözügedən qədim yaşayış yerlərində tədqiqat zamanı aşkar olunan maddi-mədəniyyət nümunələri videogörüntü vasitəsilə nümayiş etdirilib.

AMEA Naxçıvan Bölməsinin
İnformasiya şöbəsi

24 avqust-12 sentyabr tarixlərdə Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya tərəfindən müəllimlərin dövlət ümumi təhsil müəssisələrinə işə qəbulu üçün elan edilmiş müsabiqənin test imtahanları keçirilib. Müsabiqəyə 165 vakant vəzifə çıxarılıb, 123 vakant vəzifənin tutulması üçün 527 sənəd təqdim edilib, test imtahanlarında 518 namizəd iştirak edib.
Müraciətlər müsabiqə elan edildiyi gündən etibarən 30 gün ərzində komissiyanın rəsmi internet səhifəsi vasitəsilə elektron formada qəbul edilib. Ən çox müsabiqə vəziyyəti İbtidai sinif müəllimliyi (166 müraciət), İngilis dili (84 müraciət), Riyaziyyat (43 müraciət), Coğrafiya (42 müraciət) və Tarix (41 müraciət) ixtisasları üzrə qeydiyyata alınıb.

Naxçıvan şəhərindəki 3 nömrəli tam orta məktəbdə rus dili və ədəbiyyatı fənni üzrə VII-VIII sinif şagirdləri arasında keçirilən ümumrespublika olimpiadasının Naxçıvan Muxtar Respublikası üzrə zona turunun qaliblərinə mükafatlar təqdim olunub.
Bu münasibətlə təşkil olunan tədbirdə Rusiya Federasiyasının ölkəmizdəki səfirliyinin nümayəndələri və Naxçıvan Muxtar Respublikası Təhsil Nazirliyinin əməkdaşları iştirak ediblər.
Tədbir iştirakçıları əvvəlcə ümummilli lider Heydər Əliyevin Naxçıvan şəhərinin baş meydanında əzəmətlə ucalan abidəsi önünə gələrək gül dəstələri qoyub, Heydər Əliyev Muzeyini ziyarət ediblər. Naxçıvan Muxtar Respublikası Təhsil Nazirliyinin Ümumtəhsil məktəbləri və liseylərlə iş üzrə şöbə müdiri Abdulla Əsgərov çıxış edərək olimpiadanın təşkilinin əhəmiyyətindən bəhs edib.

15 sentyabr – Bilik Günü muxtar respublikamızın ümumtəhsil, ali və orta ixtisas məktəblərində keçirilən tədbirlərlə qeyd olunub. Ali təhsil ocaqlarında ali məktəblərə qəbul imtahanlarında yüksək bal toplayaraq tələbə adına layiq görülən gənclərə tələbə biletləri təqdim edilib, I kurs tələbələri oxuyacaqları ali təhsil müəssisələri ilə tanış olublar.
Naxçıvan şəhəri, Qaraçuq kənd 9 nömrəli tam orta məktəbdə keçirilən tədbirdə çıxış edən Naxçıvan Şəhər İcra Hakimiyyətinin başçısı Mirsənani Seyidov və Naxçıvan Şəhər Təhsil Şöbəsinin müdiri Elşən Qəbulov şagird və müəllimləri 15 sen­tyabr – Bilik Günü və yeni tədris ilinin başlanması münasibətilə təbrik edərək bildiriblər ki, ulu öndərimiz Heydər Əliyevin əsasını qoyduğu təhsil strategiyası Azərbaycanda və onun ayrılmaz tərkib hissəsi olan Naxçıvan Muxtar Respublikasında uğurla davam ­etdirilir.
Diqqətə çatdırılıb ki, muxtar respublikamızda təhsilə göstərilən dövlət qayğısının nəticəsində hər il ali məktəblərə qəbulda yüksək bal toplayanların sayı artır. Yaradılan şərait daha böyük uğurlar qazanmağa imkan verir. Növbəti dərs ilində də bu şəraitdən səmərəli istifadə ediləcək, daha böyük nailiyyətlər ­qazanılacaq.
Qeyd edək ki, Bilik Günü münasibətilə muxtar respublikanın bütün rayonlarının təhsil müəssisələrində də tədbirlər keçirilib.

Xəbərlər şöbəsi

Azərbaycan Respublikasının Prezidenti cənab İlham Əliyevin 2004-cü il 21 avqust tarixli Fərmanı ilə hər il sentyabrın 15-i ölkəmizdə Bilik Günü kimi qeyd olunur. 

Ötən əsrin 70-ci illərində ümummilli liderimiz Heydər Əliyev tərəfindən müəyyənləşdirilən təhsil strategiyası Azərbaycanda ixtisaslı milli kadrların hazırlanmasının əsasını qoymuş, iqtisadi potensial inkişaf etdirilmiş, sosial-­mədəni, elm-təhsil və milli-mənəvi dəyərlər dirçəldilmiş, bu yolla gələcək müstəqillik üçün etibarlı zəmin yaradılmışdır. Dahi şəxsiyyət ölkəmizdə yenidən siyasi hakimiyyətə qayıtdıqdan sonra da təhsilin inkişafını dövlət siyasətinin prioritet istiqaməti kimi müəyyənləşdirmiş, bu sahədə kompleks islahatlar həyata keçirilmişdir. “Hər bir dövlət əgər istəyirsə ki, öz ölkəsinin inkişafını təmin etsin, öz millətinin elmini, mədəniyyətini dünya standartlarına çatdırsın, o mütləq, hər ­şeydən çox, təhsilə fikir verməlidir, təhsilin inkişafına səy göstərməlidir, təhsil üçün bütün imkanları yaratmalıdır”, – deyən ulu öndərin təhsil siyasəti bu gün ölkə Prezidenti cənab İlham Əliyev tərəfindən uğurla davam etdirilir. Ölkə başçısı tərəfindən təhsil sistemində yenidənqurmanın həyata keçirilməsi, həm təhsil alanlar, həm də təhsil verənlər üçün əlverişli şəraitin yaradılması, təhsilin inkişafı istiqamətində dövlət pro­qramları və sərəncamların imzalanması təhsilimizin daha da inkişaf etdirilməsinə xidmət göstərir.

(esse) 

Üç ay boyunca Günəşin hamıdan erkən oyandığı, dəcəl uşaqların bir-birindən şən və əyləncəli keçirdiyi günlər – yay tətili, nəhayət ki, bitdi. Təzə-təzə öz qızıl libasına ürpələnən ağacların qızmar istidən sonra sanki rahat nəfəs aldığı geniş xiyabandan uşaqlardan kiminin əl-ələ, kiminin də qaçdı­-qovdu oynaya-oynaya, dəstə-dəstə tələsərək keçdiyi yol bu gün çox qələbəlik idi. Balacalarla birgə böyüklərin də hər gün keçib getdiyi bu yolun çoxlarının yaddaşında bir hekayəsi var. Kimdən soruşsan, ürəyində hələ uşaqkən, ata-anasının, əmi-dayısının əlindən tutub təmtəraqla ilk dəfə bu məktəbə gətirdiyi həmin gündən mütləq bir xatirə canlanacaq. O gündən illər keçdi və bir də baxdıq ki, bir vaxtlar, bəlkə də, özü ağırlığındakı çantasını təzəcə ütülənmiş ağ köynəyinin üstündən çiyninə salıb, kimi könülsüz, kimi də həmişəkindən daha şən məktəbə ­tələsən uşaqlarmışıq sən demə. “Kaş ki o günlər bir də olsaydı, biz də bu uşaqlar kimi qayğısız, şən məktəbə yollansaydıq”, – deyənlər çoxdur bu gün. Bu yoldan kimlər keçmədi ki? Məktəbdə ilk zəng gününün izdihamına, səs-küyünə alışa bilməyib valideynlərinin ardınca ağlayanlar da, elə birinci gündən hamı ilə dil tapıb gələcək sinif yoldaş­ları ilə dostlaşanlar da. İlk dərs günü bilməyərəkdən müəlliməsini anasının adı ilə çağıranlar da, birinci tənəffüsdən sonra öz siniflərini qonşu birincilərlə çaş-baş salanlar da buradan keçiblər. ...Amma həmin günün sonunda əvvəlki görkəmi olmasa da, hamı yenə bu yoldan keçib həmin məktəbdən evə qayıtmışdı.
Beləcə, bu məktəb yolu şəhərimizin qaynar axınında özünə yolyoldaşı tapıb gələcəyini, bəlkə də, bütün taleyini bu yola bağlamış yüzlərlə, minlərlə insanın həyat yoluna işıq tutdu. Bu insanlar yazın ilıq nəfəsində də, qışın soyuq sazağında da eyni sevgiylə hər gün bu yolu seçdilər. Uğurları ilə müəllimlərinin sevimlisi də oldular, dəcəllikləri, tənbəllikləri ilə danlaq daşı da. Amma yetkin­ləşib, kamil insan kimi müstəqil həyata atılanda onların hamısı hər bir övladına qucağını açan müstəqil Azərbaycan dövlətində özlərinə yer tapdılar. Onlardan kimisi yenidən bu dəfə müəllim kimi bu yola qayıtdı, kimisi daşı daş üstə qoyub yeni məktəb tikdi, kimisi də öz yolunu mübarizlərin səfinə qatıb ­Vətəninin keşiyində dayandı. Zaman ötdükcə yollar da şaxələndi, hər kəs taleyinə yazılmış öz yolunda qismətini aradı. Ancaq hara düşsək də, kimə tuş gəlsək də, ana südü, ata nəsihəti qədər ürəyimizə təpər, zəkamıza işıq tutan bir yol həmişə bizimlə oldu. Bu, bizim işıqlı, müqəddəs məktəb yolumuzdur.

 Əli CABBAROV

Azərbaycan xalqının ümummilli lideri, görkəmli dövlət xadimi Heydər Əliyevin zəngin nəzəri irsində və fəaliyyətində təhsil məsələləri xüsusi yer tutur. Dahi rəhbər deyirdi: “Hər bir dövlət əgər istəyirsə ki, öz ölkəsinin inkişafını təmin etsin, öz millətinin elmini, mədəniyyətini dünya standartlarına çatdırsın, o mütləq, hər şeydən çox, təhsilə fikir verməlidir, təhsilin inkişafına səy göstərməlidir, təhsil üçün bütün imkanları yaratmalıdır”.
Ulu öndərimiz həm təhsilin məzmunu, mahiyyəti, məqsədləri, səmərəli təşkili, müəllim əməyinin şərəfi, şagirdlərin və tələbələrin vəzifələri barədə dəyərli fikirlər söyləmiş, həm də Azərbaycan təhsilinin hərtərəfli yüksəlişi qayğısına qalmış, illər bоyu bu sahədə böyük inkişafa rəvac verən sistemli tədbirlər həyata keçirmişdir. İstər Azərbaycana birinci, istərsə də ikinci rəhbərliyi dövründə ümummilli lider daim təhsilə, tərbiyəyə strateji sahə kimi baxmış, Vətənin, xalqın tərəqqisində оnların rоluna yüksək qiymət vermişdir. “Təhsil sahəsi xalqımızın bu günü, millətimizin, dövlətimizin gələcəyi üçün ən vacib bir sahədir”, – deyən müdrik rəhbər Azərbaycan təhsilinin inkişafı naminə son dərəcə böyük işlər görmüşdür.
Görkəmli dövlət xadiminin ölkə­mizə rəhbərliyinin birinci dövründə əldə etdiyi mühüm tarixi nailiyyətlərdən biri də milli kadr potensialının, o cümlədən ehtiyac duyulan ixtisaslar üzrə mütəxəssis kontingentinin yaradılmasıdır. Bu məqsədi uğurla həyata keçirmək üçün ulu öndərimiz hər il azərbaycanlı gənclərin təhsil almaq üçün keçmiş SSRİ-nin nüfuzlu ali məktəblərinə göndərilməsi ənənəsinin əsasını qoymuşdur. Həmin dövrdə SSRİ-nin 170 qabaqcıl ali təhsil ocağına 15 minə yaxın gənc göndərilmiş, hər il xaricə 800 tələbə yola salınmışdır.

Ümummilli liderimiz Heydər Əliyev tərəfindən əsası qoyulan və daim qayğı ilə əhatə olunan təhsil sistemi bu gün ölkəmizdə, eləcə də muxtar respublikamızda öz bəhrələrini verməkdədir. Son illər ən ucqar dağ kəndlərimizdəki müasir standartlara cavab verən məktəblərdən tutmuş şəhər məktəblərinədək hər birində ali məktəblərə qəbulun səviyyəsi ildən-ilə yüksəlir. Buna yeni tikilən və hərtərəfli şərait yaradılaraq istifadəyə verilən, maddi-texniki bazası gücləndirilən, savadlı müəllim kollektivlərinin çalışdığı məktəblərdə təlim-tərbiyə işinin düzgün təşkili nəticəsində nail olunub. Özünəməxsus təhsil ənənələrinə malik Şahbuz rayonunun builki məzunlarının uğurları da ürəkaçandır. Rayonun Şahbuz şəhər 1 nömrəli, Badamlı qəsəbə və Aşağı Qışlaq kənd tam orta məktəblərindən 7 məzun 600-700 intervalında bal toplayıb. Onlardan ən yüksək bal toplayanları tanıyaq.

Aşağı Qışlaq kənd tam orta məktəbinin ötən təhsil ilində 13 məzunu olub, onların 11-i ali məktəblərə sənəd qəbulunda iştirak edib. Qəbul imtahanlarında 8-i ali (onlardan 2-nin balı 600-dən yuxarıdır), 3-ü isə orta ixtisas məktəblərində təhsil almaq üçün müvafiq bal toplayıblar. Məktəbin məzunu Nailə ­Qoç­əliyeva qəbul imtahanlarının birinci mərhələsində III ixtisas qrupu üzrə 612 bal əldə etsə də, daha yüksək nəticə göstərmək arzusu abituriyentlərə verilən ikinci fürsətdə özünü doğruldub. O, 651 bal toplayaraq bütün ixtisas qrupları üzrə rayon birincisi olub, Naxçıvan Dövlət Universitetinin Xarici dil (ingilis dili müəllimliyi) ixtisasına qəbul olunub. Nailə ilə söhbətləşərkən o, bu barədə belə dedi: – İmtahan zamanı keçirdiyim həyəcanla əlaqədar ürəyimcə olan nəticə qazana bilmədim. Bu bal məni qane etmədiyi üçün may ayının 13-də keçirilən imtahanın birinci mərhələsindən iyulun 26-da keçirilən ikinci mərhələsinədək gecəni gündüzə qatıb imtahana daha ciddi hazırlaşdım. Bu isə topladığım balın artmasına səbəb oldu.

Bakı Biznes Universiteti Avropa Birliyinin “Erasmus Plus” proqramının maliyyə dəstəyi ilə “Azərbaycan universitetlərində keyfiyyətə təminat mərkəzlərinin yaradılması və inkişaf etdirilməsi” layihəsini uğurla həyata keçirməkdədir.

Layihə çərçivəsində Azərbaycan Respublikasının 11 universitetinin keyfiyyətə nəzarət mərkəzinin və Beynəlxalq əlaqələr şöbəsinin nümayəndəsi bu günlərdə İsveçin Royal Texnologiya Universitetində və Uppsala Universitetində birhəftəlik təlimdə iştirak edib.

  Hər il sentyabr ayı yurdumuza qədəm qoyduğu andan yeni tədris ilinə hazırlıq işləri görülər. Valideynlər övladları ilə birgə mağazalara üz tutar, onlara məktəbli geyimləri, dərs ləvazimatları alarlar. Məktəbə ilk dəfə gedəcək uşaqlar və onların valideynləri isə bu prosesi daha böyük həyəcanla yaşayarlar. Vaxt, vədə yetişər.­ Bilik Günü səhər erkəndən oyanan valideynlər övladlarını da ayağa qaldırar, onları səliqəli şəkildə geyindirər, əlindən yapışıb məktəbə tələsərlər. 

Həmin gün yolboyu uşaqların şən, şaqraq gülüşlərini, valideynlərin sevinc səslərini eşidən zaman öz uşaqlıq çağların yadına düşər. Sevincini gizlədə bilmərsən... Məktəbin həyətində əsl toy-bayram ab-havası hiss olunar. Direktor məktəblilərə xoş gəldin edər, uşaqlara yeni tədris ilində uğurlar arzulayar. Daha sonra ilk zəng çalınar, balacalar sinfə tələsər, ibtidai sinif müəllimi ilə tanışlıq başlayar. Məktəbə yenicə qədəm qoyan uşağın ilk dərs günü bu cür maraqlı anlarla yaddaşına yazılar və ömürboyu şirin bir xatirətək hafizəsində yaşayar.
Xatırlatmaq yerinə düşər ki, illər öncə övladını birinci sinfə aparan valideyn bir sıra problemlərlə üzləşərdi. Bu yaşda uşaqların əksəriyyətinin məktəb mühitinə alışmağı çətin olardı. Bu zaman isə valideyn günahı uşaqda axtarar, filankəsin övladı məktəbə can atır, bizim uşaqsa evdən ayrılmaq istəmir, – deyə hey şikayətlənərdi: – Gözümdən qırağa qoymamışam. Elə evdə say saymağı, hərf oxumağı, yazı yazmağı öyrətmişəm. Hətta çoxlu ­şeirlər, nağıllar da bilir. Ancaq indi deyirik ki, məktəbə gedəcəksən, deyir evdə qalmaq istəyirəm. Heç bilmirəm bu uşaqla necə edim?

“Naxçıvanqala” Tarix-Memarlıq Muzey Kompleksində Naxçıvan Muxtar Respublikası Gənclər və İdman Nazirliyi, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi və “Gənclərin İntellektual İnkişaf Mərkəzi” İctimai Birliyinin təşkilatçılığı ilə gənclər arasında yeni – “Xəzinə axtarışı” intellektual oyunu keçirilib.
Yarışdan öncə Gənclər və İdman Nazirliyinin Gənclərlə iş şöbəsinin müdiri Tahir Məmmədli qeyd edib ki, oyunun keçirilməsində məqsəd gənclərin intellektual oyunlara cəlb olunması, onların intellektual səviyyəsinin, dünyagörüşünün, zehni inkişafının stimul­laşdırılması, asudə vaxtlarının səmərəli təşkil edilməsidir.
Oyunda yaşı 18-dən 29-dək olan gənclərdən ibarət 10 komanda mübarizə aparıb.
Yekun nəticəyə əsasən “Şən oğlanlar” komandası qalib adını qazanıb. Digər iki pillədə “Zirvə” və “Diplomat” komandaları ­qərarlaşıblar.
Sonda qalib komandalar və komanda üzvləri nazirlik tərəfindən diplom və fəxri fərmanlarla təltif olunublar.

Naxçıvan Muxtar Respublikası Gənclər və İdman Nazirliyinin
mətbuat xidməti

Sentyabrın 10-da “Gənclik” Mərkəzində Naxçıvan Muxtar Respublikası təhsil işçilərinin ənənəvi sentyabr konfransı keçirilib. Konfransda muxtar respublikanın bütün təhsil müəssisələrinin rəhbərləri, Təhsil Nazirliyinin əməkdaşları, qabaqcıl müəllimlər iştirak ediblər.
Konfransı giriş sözü ilə Naxçıvan Muxtar Respublikasının təhsil naziri Rəhman Məmmədov açaraq geniş məruzə edib, təhsilə göstərilən dövlət qayğısından və qarşıda duran vəzifələrdən danışıb. Qeyd olunub ki, muxtar respublikamızda təhsilin inkişafı sahəsində ardıcıl tədbirlər həyata keçirilir. ­Naxçıvan Muxtar Respublikası Ali Məclisi Sədrinin diqqət və qayğısı sayəsində təhsil müəssisələrinin maddi-texniki bazası möhkəmləndirilir. Ötən dövr ərzində muxtar respublikamızda 200-dən çox təhsil müəssisəsi üçün yeni binalar tikilib və ya mövcud binalar əsaslı şəkildə yenidən qurulub. Əvvəlki illərdə olduğu kimi, 2018-ci ildə də ­tikinti-quruculuq işlərinin önündə təhsil quruculuğu dayanıb. Belə ki, 2018-ci ilin birinci yarımili ərzində 904 şagird yerlik 3 ümumtəhsil məktəbi və Ordubad Rayon Təhsil Şöbəsi üçün binalar tikilərək və ya əsaslı şəkildə yenidən qurularaq istifadəyə verilib. Hazır­da da bu sahədə işlər davam etdirilir.

AMEA Naxçıvan Bölməsində AMEA-nın Nəsimi adına Dilçilik İnstitutunun direktoru, akademik Möhsün Nağısoylu və Azərbaycan Dillər Universitetinin müəllimi, professor Adil Babayevlə ­görüş keçirilib.

Tədbirdə ilk çıxış edən bölmənin İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev Azərbaycan dilinin saflığının qorunması və inkişafı istiqamətində ölkəmizdə həyata keçirilən islahatlardan danışıb.
Sonra akademik Möhsün Nağısoylu çıxış edərək Azərbaycan dili və dilçilik elminin qarşısında duran hədəflərdən bəhs edib. Dilçi alim qeyd edib ki, respublikada dil siyasətinin birmənalı şəkildə formalaşdırılması, ana dilinin dövlət dili kimi tətbiqi işinin təkmilləşdirilməsi və dünya azərbaycanlılarının ünsiyyət vasitəsinə çevrilərək milli həmrəyliyin göstəricisi kimi beynəlxalq aləmdə rolu və nüfuzunun yüksəldilməsi Azərbaycan xalqının ümummilli lideri Heydər Əliyevin adı ilə bağlıdır.
“Ölkəmizdə dil siyasəti bu gün ulu öndərin layiqli davamçısı Prezident İlham Əliyev tərəfindən uğurla davam etdirilir”, – deyən alim dövlət başçısının 2004-cü il 12 yanvar tarixli “Azərbaycan dilində latın qrafikası ilə kütləvi nəşrlərin həyata keçirilməsi haqqında” və 2012-ci il 23 may tarixli “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Pro­qramı”nın hazırlanması barədə imzaladığı sərəncamları xatırladıb. Vurğulayıb ki, AMEA-nın 70 illik yubileyinə həsr olunmuş ümumi yığıncağında Prezident İlham Əliyevin dərinməzmunlu nitqində diqqət mərkəzinə çəkdiyi bir sıra məsələlərdən biri də ana dilimizlə bağlı idi. Dilçi alim rəhbərlik etdiyi institutun əməkdaşlarının ana dilimizlə bağlı həyata keçirdikləri tədbirlərdən və qarşıda duran vəzifələrdən söz açıb.
Professor Adil Babayev isə çıxışında dilimizlə bağlı aktual məsələlərə toxunub. O, ümummilli lider Heydər Əliyevin “Hər bir xalqın milliliyini, mənəvi dəyərlərini yaşadan, inkişaf etdirən onun dilidir” sözlərini xatırladaraq XX əsrdə Azərbaycan dilinə olan münasibəti müxtəlif arxivlərdən topladığı sənədlərin dili ilə tədbir iştirakçılarının diqqətinə çatdırıb.
Sonra dilçi alimlər bölmə əməkdaşlarının suallarını cavab­landırıblar.

AMEA Naxçıvan Bölməsinin
İnformasiya şöbəsi

Muxtar respublikamızda gələcəyimiz olan uşaqlar, o cümlədən sağlamlıq imkanları məhdud, valideynlərini itirmiş və ya valideyn himayəsindən məhrum olmuş uşaqlar daim dövlətimizin diqqət və qayğısı əhatəsindədirlər. Onların sağlam böyümələri, biliklərə yiyələnmələri, intellektual inkişafı, xüsusi istedada malik olanların aşkara çıxarılması, milli-mənəvi dəyərlərə sadiq vətənpərvər gənc kimi formalaşması istiqamətində ardıcıl tədbirlər həyata keçirilir.
Qeyd olunan tədbirlərin davamı olaraq 15 sentyabr – Bilik Günü münasibətilə Naxçıvan Muxtar Respublikası Əmək və Əhalinin Sosial Müdafiəsi, Təhsil nazirliklərinin və Ailə, Qadın və Uşaq Problemləri üzrə Dövlət Komitəsinin birgə təşkilatçılığı ilə aztəminatlı,valideynlərini itirmiş, sağlamlıq imkanları məhdud uşaqlarla görüş keçirilib. Təhsil Nazirliyində təşkil olunan tədbiri giriş sözü ilə təhsil naziri Rəhman Məmmədov açaraq dövlətimizin xüsusi qayğıya ehtiyacı olan uşaqların təhsil almalarına göstərdiyi qayğıdan bəhs edib və ­şagirdlərə yeni tədris ilində uğurlar arzulayıb.
Əmək və əhalinin sosial müdafiəsi naziri Cavid Səfərov, Ailə, Qadın və Uşaq Problemləri üzrə Dövlət Komitəsinin sədri Ramilə Seyidova muxtar respublikada sosial qayğıya ehtiyacı olan uşaqlara yaradılan şəraitdən söhbət açıb və şagirdləri qarşıdan gələn Bilik Günü münasibətilə təbrik edərək onlara təhsildə müvəffəqiyyətlər arzulayıblar.

Hər il olduğu kimi, bu il də “İstedad-XXI əsr” hazırlıq kurslarında yüksək nəticə göstərən abituriyentlərlə görüş keçirilib.
“İstedad-XXI əsr” Məhdud Məsuliyyətli Cəmiyyətinin direktor müavini Arzu Abdullayev tədbirdə çıxış edərək bildirib ki, bu gün müstəqil Azərbaycanda, оnun ayrılmaz tərkib hissəsi оlan Naxçıvan Muxtar Respublikasında ulu öndər Heydər Əliyevin siyasi kursu bütün sahələrdə uğurla davam etdirilir. Təhsil sahəsində həyata keçirilən əhəmiyyətli tədbirlər də bu siyasətin üzvi tərkib hissəsidir. Aparılan islahatlar Azərbaycan təhsilinin dünyaya inteqrasiyasına, milli və dünyəvi dəyərlər zəminində yüksəlişinə layiqincə xidmət etməkdədir. Muxtar respublikamızda bir-birinin ardınca tikilib istifadəyə verilən ən müasir maddi-texniki bazaya malik məktəblər, təhsilin keyfiyyətinin yüksəldilməsinə yönəldilən tədbirlər bu baxımdan ­xüsusi dəyərə malikdir.

Müdriklərimiz deyiblər ki, elm və bilik öyrənməyə tələs. Çünki bunlar əldən heç bir zaman çıxmayan miras, bezilməyən yoldaş, insanın bəzəyi və hər bir kəsin bütün ömürboyu köməyinə yetən dəyərlərdir. Bu iki dəyəri əldə etməyin yolu isə təhsildən keçir. Bu gün muxtar respublikamızda bu sahəyə xüsusi diqqət yetirilir, təhsilimizin möhkəm təməllər üzərində qurulmasına şərait yaradılır. Ulu öndər Heydər Əliyevin dediyi kimi: “İqtisadiyyatda, mədəniyyətdə, elmdə – həyatın bütün sahələrində əldə olunmuş nailiyyətlərin başında duran, onun əsasını təşkil edən, kökü olan məktəbdir, təhsildir, müəllimdir”.

Naxçıvan Muxtar Respublikası ­Təhsil və İqtisadiyyat nazirliklərinin təşkilatçı­lığı ilə Naxçıvan şəhərindəki Mərkəzi bazarda ənənəvi məktəbli yarmarkası təşkil olunub.

Bakı Biznes Universitetinin kordinator olduğu EQAC Erasmus Pulus layihəsinin növbəti təlim yığıncağı İsveçin Stokholm şəhərində təşkil edilib.
Təlimlərin ilk günündə İsveçin KTH Kral Texnologiya Universitetinin vitse-prezidenti Stefan Ostlund Azərbaycan universitetlərindən olan heyəti qəbul edib və universitetin keyfiyyətin təminatı sahəsində gördüyü işlər barəsində məlumat verib. 6 gün davam edəcək təlimlərdə KTH Kral Texnologiya Universiteti partnyor universitetlərə beynəlxalqlaşma və keyfiyyətə təminat siyasəti ilə bağlı təlimlər keçərək tərəfdaş universitetlərlə təcrübələrini bölüşəcəkdir.
Məlumat üçün bildirək ki, “Naxçıvan” Universitetini təlimdə Beynəlxalq əlaqələr şöbəsinin müdiri Rəcəb Cəfərli və keyfiyyətə nəzarət bölməsinin mütəxəssisi Könül Babayeva təmsil edirlər.

Nuray ƏSGƏROVA

Adil Babayev adına Naxçıvan Muxtar Respublika Uşaq Kitabxanası məktəblilərin yay tətili günlərini səmərəli keçirmələri üçün iyun-avqust aylarında həftədə iki gün olmaqla “Yay oxu zalı” təşkil edir. Məqsəd məktəblilərin mütaliəyə maraqlarını artırmaqdır.
Hər dərs ilinin sonunda kitabxana tərəfindən Naxçıvan Şəhər Təhsil Şöbəsinə məktubla müraciət edilərək kitabxanaya yaxın ərazidə yerləşən tam orta ümumtəhsil məktəblərindən I-VI siniflərdə, əsasən, dərslərini zəif oxuyan şagirdlərdən 30-35 nəfərin təsdiq olunmuş siyahısı alınır, məktəb rəhbərləri və kitabxanaçılar həmin məktəblilərlə fərdi söhbətlər aparır, “Yay oxu zalı”nda iştirak etməyin vacibliyini onlara izah edirlər.
Məşğələlərin keçirilməsi üçün Mədəniyyət Nazirliyinin təşkilatçılığı ilə kitabxanaya 100-dən artıq dərsliklər alınıb.
Bu ilin iyun ayının 25-dən başlayaraq növbəti yay mövsümü məşğələlərinə 32 məktəbli cəlb edilib. Şagirdlərin hansı fənlərdən geri qaldıqları müəyyənləşdirilərək onlara qrup şəklində dərslər keçilib. Mədəniyyət müəssisəsinin kollektivi məktəblilərin kitabxananın daimi oxucularına çevrilmələri və ­biliklərini artırmaları üçün bu layihəni gələcəkdə də davam etdirəcək.

Məsmə Cəfərova
Adil Babayev adına Naxçıvan Muxtar Respublika Uşaq Kitabxanasının əməkdaşı

Muxtar respublikamızın sərhəd kəndlərindəki təhsil ocaqları da xüsusi diqqət və qayğı ilə əhatə olunub. Həmin yaşayış məntəqələrindəki məktəblər müasir binalarda yerləşməklə yanaşı, hər cür texniki avadanlıqlarla təchiz ediliblər. Belə təhsil ocaqlarından biri də Ordubad rayonundakı Kotam kənd tam orta məktəbidir.
Təhsil ocağı 1933-cü ildə 4 illik ibtidai məktəb kimi fəaliyyətə başlayıb. İlk illər məktəb bir nəfər müəllimdən və iki sinif otağından ibarət olub. Məktəbin ilk direktoru, əslən rayonun Yuxarı Əylis kəndindən olan Rza Kazımzadə burada tədris prosesini layiqincə yerinə yetirəcək pedaqoji kollektivin formalaşması istiqamətində uğurla fəaliyyət göstərib. Sonralar məktəbə görkəmli rentgenoloq, tibb elmləri doktoru, mərhum akademik Rəhim Rəhimov direktor təyin olunub. 1943-cü ildə bu təhsil ocağı 7 illik məktəb kimi fəaliyyətini davam etdirib. 1965-ci ildə isə məktəb üçün yeni bina tikilib və təhsil ocağı orta məktəbə çevrilib.
Kotam kənd məktəbinin inkişafında rayonun tanınmış müəllim-pedaqoqlarından Məhəmmədəli Həsənovun, Əvəz İsaqzadənin, Səid Əliyevin, Əbülfəz Kərimovun, Kamil İsmayılovun, Pakizə Həsənovanın, Əşrəf Həsənovun və başqalarının böyük xidmətləri olub. Bacarıqlı müəllimlərin sayəsində məktəbdə bir çox görkəmli elm adamları yetişib. Fizika elmləri doktorları Qurbanəli Əliyev, Abasət İsayev, biologiya üzrə fəlsəfə doktorları Əsgər Qulamov, Sabir Həsənov, fizika üzrə fəlsəfə doktoru Zakir Hüseynov, riyaziyyat üzrə fəlsəfə doktoru Səid Əliyev və başqaları bu məktəbin yetirmələridir. Hazırda məktəbdə direktor kimi çalışan Anar Həsənli də bu təhsil ocağının məzunudur.

Bu gün ölkəmizdə və onun ayrılmaz tərkib hissəsi olan muxtar respublikamızda da təhsil siyasəti uğurla davam etdirilir, gənc nəslin hərtərəfli təhsil alması, peşə sahibi olması və vətənpərvər ruhda böyüməsi üçün ardıcıl tədbirlər görülür. Təhsil müəssisələrinin müasir tələblər səviyyəsində qurulması, onların hərtərəfli informasiya və kommunikasiya texnologiyaları, müasir kompüter dəstləri, elektron lövhələr və digər texnoloji avadanlıqlarla təmin edilməsi bu siyasətin bariz göstəricisidir. Bu da öz bəhrəsini verir, tədrisin keyfiyyəti ildən-ilə daha da yüksəlir. 

Hər il ali məktəbə qəbul olunanların və yüksək bal toplayanların sayının artması bunu bir daha təsdiq edir. Bu il də muxtar respublikada ali məktəblərə qəbul göstəricilərində artım olub, 331 məzun 500-700 arasında bal toplayıb. Avqustun 20-də Naxçıvan Muxtar Respublikasının ümumtəhsil məktəblərini bitirərək ali məktəblərə qəbul imtahanlarında yüksək bal toplamış tələbələrlə görüşdə Naxçıvan Muxtar Respublikası Ali ­Məclisinin Sədri demişdir: “Bu gün ümummilli ­liderimiz Heydər Əliyevin əsasını qoyduğu təhsil strategiyası ölkəmizin intellektual potensialının yüksəlişinə öz töhfəsini verir. Artıq Azərbaycan dünyada təkcə sabitliyin təmin olunduğu və iqtisadiyyatı inkişaf edən ölkə kimi yox, həm də elm və təhsil ölkəsi kimi tanınır. Naxçıvan Muxtar Respublikasında da təhsil quruculuğu əsas vəzifələr sırasındadır. İstər ümumtəhsil, peşə, istərsə də orta ixtisas və ali təhsil məktəblərində yaradılan şərait hərtərəfli inkişaf edən, formalaşmış gəncliyin yetişməsinə hesablanıb. Yeni texnologiyaların və distant təhsilin tətbiqi, müasir tədris metodlarından istifadə dünya təhsil sisteminə inteqrasiyanı sürətləndirib”.

Avqustun 24-dən etibarən müəllimlərin işə qəbulu üçün elan olunmuş müsabiqənin test imtahanları başlayıb. Qeyd edək ki, muxtar respublikada müəllimlərin dövlət ümumi təhsil müəssisələrinə işə qəbulu ilk dəfə olaraq mərkəzləşdirilmiş qaydada müsabiqə və şəffaflıq əsasında, elektron proqram təminatı tətbiq olunmaqla test imtahanları vasitəsilə keçirilir.

Məlumat üçün bildirək ki, Naxçıvan Muxtar Respublikası Ali ­Məclisinin Sədri yanında Dövlət Qulluğu Məsələləri üzrə Komissiya tərəfindən müəllimlərin dövlət ümumi təhsil müəssisələrinə işə qəbulu üçün 17 iyul 2018-ci il tarixdə müsabiqə elan edilmişdir. Müsabiqəyə 165 vakant vəzifə çıxarılıb. Ən çox vakant vəzifələr Şərur rayonu (48 yer), Şahbuz rayonu (29 yer) və Ordubad rayonu (27 yer) üzrədir.
Müsabiqədə iştirak etmək üçün müraciətlər müsabiqə elan edildiyi gündən etibarən 30 gün ərzində komissiyanın internet portalı vasitəsilə elektron formada qəbul edilib. Müsabiqəyə çıxarılmış vakant vəzifələrin tutulması üçün 527 namizəd sənəd təqdim edib. Ən çox müsabiqə vəziyyəti ibtidai sinif müəllimliyi (166 müraciət), ingilis dili (84 müraciət), riyaziyyat (43 müraciət), coğrafiya (42 müraciət) və tarix (41 müraciət) ixtisasları üzrə qeydiyyata alınıb.

Müasir dövrdə ölkəmizin tarix və mədəniyyətinin, təbiətinin, milli və mənəvi dəyərlərinin, görkəmli şəxsiyyətlərinin beynəlxalq aləmdə tanıdılması və təbliğ edilməsi baxımından vətəndaşlarımızın, xüsusilə gənc­lərimizin xarici dil bilməsi zəruridir. Sevindirici haldır ki, bu gün təkcə yeniyetmə və gənclərin deyil, hətta orta nəslin nümayəndələrinin də dünyada geniş yayılmış ingilis, fransız, alman, ispan, rus və digər dilləri öyrənməyə can atdıqlarının şahidi oluruq. Bəs bu gün muxtar respublikamızda xarici dilləri öyrənməyə olan maraq hansı səviyyədədir?

Bununla bağlı əvvəlcə “İstedad XXI əsr” hazırlıq kurslarının direktoru Elbrus İsayevlə həmsöhbət olduq və müsahibimizdən rəhbərlik etdiyi kurslarda fəaliyyət göstərən xarici dil tədrisi qrupları haqqında fikirlərini öyrəndik. Elbrus müəllim bildirdi ki, “İstedad XXI əsr” hazırlıq kurslarının fəaliyyət istiqamətlərindən biri də xarici dillər üzrə danışıq qruplarıdır. Hansı ki bu qruplar kursda artıq 4 tədris ilidir, fəaliyyət göstərir. Burada xarici dil hazırlığı, əsasən, ingilis, rus, fransız və alman dillərində aparılır. Qruplarda müxtəlif kateqoriyalardan olan dinləyicilər iştirak edir. Onlar həm müxtəlif ixtisas üzrə hazırlaşan abituriyentlər, həm tələbələr, həm də 3-14 yaşlı uşaqlardır. Burada hər kateqoriya üçün xüsusi proqramlar hazırlanıb və müraciət edən dinləyicilərə dərslər elə həmin proqramlar əsasında keçilir. Tədris müəssisəsində adıçəkilən xarici dillər üzrə qrammatik biliklər öyrədilir, həm də danışıq qrupları təşkil olunur. Xarici dillər üzrə kurslar 4 əsas bacarığın – danışıq, dinləmə, yazma və oxumanın inkişafına yönəldilib. Kurslar ən müasir metodlardan istifadə etməklə xüsusi proqramlar və CD/DVD materialları əsasında keçilir. Proqram seçilərkən tələbənin başlanğıc bilik səviyyəsi, sərbəst vaxtı və dili öyrənməkdə məqsədi nəzərə alınır. Dərslər iştirakçıların seçiminə əsasən fərdi və kiçik qruplar şəklində təşkil olunur. Kursa danışıq üçün müraciət edənlər danışıq, qrammatikanı öyrənmək istəyənlər isə qrammatika ağırlıqlı qruplara cəlb olunurlar.

Naxçıvan Muxtar Respublikası Təhsil Nazirliyində 2017-2018-ci tədris ilində məktəbi xüsusi nailiyyətlərlə başa vuran məzunlara “Qızıl” və “Gümüş” medal­ların təqdimatı keçirilib.
Tədbirdə çıxış edən təhsil naziri Rəhman Məmmədov “Qızıl” və “Gümüş” medallarla təltif olunan məzunları təbrik edərək muxtar respublikamızda təhsilin inkişafı istiqamətində görülən işlərdən, yaradılan şəraitdən danışıb. Bildirilib ki, muxtar respublikamızda bütün sahələr kimi, təhsil də Naxçıvan Muxtar Respublikası Ali Məclisi Sədrinin diqqət və qayğısı ilə əhatə olunub. Bunun nəticəsidir ki, ötən dövr ərzində 200-dən çox təhsil müəssisəsi üçün binalar istifadəyə verilib, onların maddi-texniki bazası möhkəmləndirilib, məktəblər ən müasir informasiya texnologiyaları, o cümlədən kompüter və elektron lövhələrlə təchiz olunub. Həmçinin elektron təhsilin tətbiqi, təhsil müəssisələrində virtual tədris mühitinin formalaşdırılması, tədrisin əyaniliyi və səmərəliliyinin artırılması da diqqətdə saxlanılıb. Hazırda da bu sahədə işlər davam etdirilir.
Nazir qeyd edib ki, muxtar respublikada aparılan dövlət siyasətinin nəticəsində ali və orta ixtisas təhsili müəssisələrinə tələbə qəbulunda ilbəil artım tempi müşahidə olunur. 2017-2018-ci tədris ili üzrə ali məktəblərə qəbul olan məzunların 331-i imtahanlarda daha yüksək nəticə göstərərək 500-700 intervalında bal toplayıb.

Dünən Şahbuz şəhər 1 nömrəli tam orta məktəbdə Şahbuz Rayon Gənclər və İdman İdarəsinin, Yeni Azərbaycan Partiyası Şahbuz Rayon Təşkilatının Gənclər Birliyinin və Birləşmiş Həmkarlar İttifaqı Komitəsinin birgə təşkilatçılığı ilə 18-29 yaşlı gənclər arasında “Xəmsə” milli intellektual oyunu keçirilib.
Oyunun keçirilməsində məqsəd gənclərin intellektual səviyyələrinin, dünyagörüşlərinin, zehni inkişaflarının stimullaşdırılması, onlar arasında bilik və elmin nüfuzunun artırılması, asudə vaxtlarının səmərəli təşkil edilməsidir. Oyunda “Gənclik”, “Qanlıgöl”, ”Salvartı”, “Zirvə” komandaları iştirak edib. Sonda “Gənclik” komandası I, “Zirvə” komandası II, “Qanlıgöl” komandası isə III yerə layiq görülüblər. Qalib komandalara təşkilatçılar tərəfindən diplom və fəxri fərmanlar təqdim olunub. Oyunda 16 nəfər gənc iştirak edib.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan Muxtar Respublikası Ali ­Məclisinin Sədri yanında Dövlət Qulluğu Məsələləri üzrə Komissiya tərəfindən Naxçıvan Muxtar Respublikasında müəllimlərin dövlət ümumi təhsil müəssisələrinə işə qəbulu üçün 17 iyul 2018-ci il tarixdə elan olunmuş müsabiqənin test imtahanları 24 avqust 2018-ci il ­tarixdən etibarən keçiriləcəkdir.
Qeyd edək ki, müsabiqəyə 165 vakant vəzifə çıxarılıb, həmin vəzifələrin tutulması üçün 527 nəfər sənəd təqdim edib. Naxçıvan Muxtar Respublikası Nazirlər Kabinetinin 2018-ci il 14 aprel tarixli 61 nömrəli Qərarına əsasən iştirakçıların dövlət nümunəli təhsil sənədlərinin hüquqiliyinin yoxlanılması məqsədilə onların siyahısı komissiya tərəfindən Azərbaycan Respublikası Dövlət İmtahan Mərkəzi Publik Hüquqi Şəxsin Naxçıvan Muxtar Respublikası Regional Bölməsinə göndərilib. Yoxlamanın nəticəsində iki namizədin diplomlarının “Tələbə-Məzun” Dövlət Elektron Məlumat Sistemində mövcud olmadığı müəyyən edilib. Bununla da, 525 namizəd test imtahanlarına buraxılıb.

Builki məzunların hamısı tələbə adını qazanıb

Bu gün orta məktəb partası arxasında əyləşərək elmin ilkin sirlərinə yiyələnən qızlarımızın cəmiyyətə savadlı bir fərd kimi daxil olması vacib məsələlərdən biridir. Bu baxımdan maarifçi-­ziyalılarımız Azərbaycan qızlarının mükəmməl təhsil almasına çalışıblar. Fəal və mübariz Azərbaycan qadınları öz fəaliyyətində xalqımızın milli-mədəni ənənələrinin qorunub saxlanılmasına və zənginləşməsinə səy göstəriblər. Böyütdükləri qızların həm savadlı, həm də xalqımıza məxsus olan milli-mənəvi dəyərlərə sədaqət ruhunda formalaşdırılmasına xüsusi diqqət yetiriblər. Günümüzdə də bu məsələ öz aktuallığını qoruyub saxlamaqdadır. 

1992-ci ildən Naxçıvan şəhərində fəaliyyət göstərən Qızlar Liseyinin pedaqoji kollektivi bu həqiqəti dərindən dərk edir, öz işini bu istiqamətdə qurmağa səy göstərir. Kollektivə belə bir şərəfli işin öhdəsindən layiqincə gəlmək üçün hərtərəfli şərait yaradılıb.
Belə ki, 2012-ci ilin fevral ayının 9-da yenidən qurulan lisey binasına əlavə olaraq bir mərtəbə də artırılıb, sinif otaqları genişləndirilib, fənn kabinələrində müasir şərait yaradılıb. Hazırda zirzəmi ilə birlikdə 4 mərtəbədən ibarət olan binada 32 sinif otağı, fənn kabinələri, elektron lövhəli siniflər, kompüter otaqları, müəllimlər otağı və idman zalı vardır. Liseydə təhsil alan 384 şagirdin ­təlim-tərbiyəsi ilə 56 müəllim və tərbiyəçi məşğul olur.

Hər bir millətin gələcəyi onun təhsilli,
savadlı övladları ilə bağlıdır

“Təhsil millətin gələcəyidir”, – deyən ümummilli lider Heydər Əliyevin siyasi xətti ölkəmizdə, eləcə də muxtar respublikamızda uğurla davam etdirilir. Məhz bunun nəticəsidir ki, bu gün diyarımızın bölgələrinə yolumuz düşəndə ilk diqqətimizi çəkən müasir məktəb binaları olur. Burada şagird və müəllimlərin istifadəsində olan geniş, işıqlı sinif və elektron lövhəli otaqlar, laboratoriyalar, fənn kabinələri, kompüter sinifləri, müasir idman zalları təhsilin ən yüksək səviyyədə təşkilinə imkan verir. Muxtar respublikanın ucqar sərhəd yaşayış məntəqələrində, ən kiçik kəndlərdə belə, tikilən müasir­tipli məktəb binaları təhsilin inkişafına göstərilən böyük diqqət və qayğının nümunəsidir. Nəticədə, ali və orta ixtisas məktəblərinə qəbul imtahanlarındakı göstəricilər ildən-ilə daha da yüksəlir, məzunlarımızın səsi ölkəmizlə yanaşı, dünyanın bir çox ali təhsil ocaqlarından, elmi-tədqiqat institutlarından gəlir. Bütün bunları muxtar respublikanın ən böyük bölgəsi olan Şərur rayonunun məzunlarının timsalında da aydın görmək olar. 

Ötən illərdə olduğu kimi, son tədris ilində də rayonun tam orta məktəblərini bitirən məzunlar uğurlu nəticələr əldə ediblər. Onların 485 nəfəri, yaxud 83,62 faizi ali məktəblərə qəbul imtahanlarında iştirak edib, 51-i 500-700 intervalında bal toplayıb.
Onlardan bir neçəsi ilə görüşdük, həmsöhbət olduq.

Azərbaycanda milli ordu quruculuğu çox çətin, mürəkkəb və ziddiyyətli mərhələlərdən keçib. Milli ordunun keçdiyi tarixi yol bugünkü və gələcək nəsillər üçün böyük örnəkdir.
Ölkəmizdə milli hərbi kadr hazır­lığı işi də ulu öndərimiz Heydər Əliyevin adı ilə bağlıdır. Belə ki, 1971-ci ildə keçmiş SSRİ-də hərbi təmayüllü iki internat məktəbi vardı: Naximov və Suvorov adına hərbi təmayüllü məktəblər. Lakin tədrisin rus dilində olması və Azərbaycandan uzaqda yerləşmələri həmin məktəblərdə azərbaycanlıların təhsil almasını çətinləşdirirdi. Ümummilli lider Heydər Əliyevin 1971-ci ildə böyük səyləri nəticəsində Azərbaycanda hərbi kadrlar hazırlayan məktəb yaradıldı. Həmin dövrdə Azərbaycan ildə, təxminən, 60 min gənci ordu sıralarına göndərirdi. Sovet rejiminin ən güclü vaxtlarında respublikamızda milli hərbi kadr hazır­lığı üçün baza rolunu oynayacaq məktəbin yaradılmasına ovaxtkı mərkəz heç bir vəchlə yol vermək istəmirdi. Təsadüfi deyil ki, həmin dövrdə Moskvadan Bakıya təşrif buyuran emissarlar Azərbaycanda belə bir hərbi məktəbə ehtiyac olmadığını əsaslandırmağa çalışırdılar. Amma ulu öndərimiz mahir diplomatiyası ilə bu cəhdlərin qarşısını aldı.

Muxtar respublikamızın əksər orta ümumtəhsil müəssisələrində olduğu kimi, Babək rayonunun da bir çox məktəblərinin məzunları ali məktəblərə builki qəbul imtahanında müvəffəqiyyət əldə ediblər. Bu gün rayonun təhsil müəssisələrinin hərtərəfli qayğı ilə əhatə olunması, maddi-texniki bazasının gücləndirilməsi, kadr təminatının xeyli yaxşılaşdırılması, müasir tədris şəraitinin yaradılması şagirdlərin imtahanlarda yüksək nəticə əldə etməsinin başlıca səbəblərindən biridir.
Babək Rayon Təhsil Şöbəsindən aldığımız məlumata görə, 2018-2019-cu tədris ili üçün ali məktəblərə imtahan verən I-V və II-III ixtisas qrupları üzrə 500-700 bal intervalında nəticə göstərən abituriyentlərin sayı xeyli artıb. Belə ki, Babək qəsəbə 1 nömrəli tam orta məktəbdən, rayonun Zeynəddin, Qahab, Məzrə, Şəkərabad, Hacıvar, Güznüt, Nehrəm, Didivar, Sirab, Vayxır, Cəhri, Çeşməbasar, Kültəpə kənd tam orta məktəblərindən, ümumilikdə, 35 şagird 500-700 bal intervalında nəticə göstərib.
Rayon üzrə ən yüksək göstəricini Babək qəsəbə 1 nömrəli tam orta məktəbin məzunu Zübeydə Zeynalova əldə edib, III ixtisas qrupu üzrə iştirak edən abituriyent 687 bal toplayıb. Söhbət zamanı öyrəndik ki, o əvvəlcədən maksimum bal toplamağı qarşısına məqsəd qoyub. Ancaq imtahanın həyəcan və stresi ondan da yan keçməyib, iki sualı kağız üzərində səhv qaralamaqla indiki nəticəni göstərib. Əldə etdiyi yüksək nəticəni həm məktəbinin, həm də özünün uğuru hesab edir. Bildirir ki, bu gün daha yaxşı təhsil almağımız üçün hərtərəfli şərait yaradılıb. Bu da imkan verir ki, orta məktəb imtahanlarında, eləcə də ali məktəblərə qəbul zamanı yüksək nəticələr əldə edək. Uğur qazanmağın digər bir yolu isə özünə inanmaq və məqsədə çatmaq üçün çox çalışmaqdır. Bu işdə məktəb müəllimlərim ilə yanaşı, valideynlərimin də rolu böyük olub. Onların mənə inamları, dərslərimdə, imtahanlarımda həmişə dəstək olmaları bugünkü uğurlarımın başlıca səbəbidir. Bunun üçün valideynlərimə, bizə yaratdıqları hərtərəfli şərait üçün isə dövlətimizə minnətdaram.

Bu gün ölkəmizdə, eləcə də muxtar respublikamızda milli təhsilimizin hərtərəfli inkişafı üçün sistemli tədbirlər həyata keçirilir. Görülən genişmiqyaslı işlərin, atılan məqsədyönlü addımların nəticəsidir ki, hər keçən gün bu sahədə yüksək nailiyyətlər qazanılır, uğurlu göstəricilər əldə olunur. Muxtar respublikamızın əksər orta ümumtəhsil müəssisələrində olduğu kimi, Ordubad rayonunun da bir çox məktəblərinin məzunları ali məktəblərə builki qəbul imtahanında müvəffəqiyyətlə iştirak ediblər. Rayonun bütün məktəbləri üzrə ən yüksək nəticəni Gənzə kənd tam orta məktəbinin məzunu Sunay Rzayeva əldə edib. Qəbul imtahanında III ixtisas qrupu üzrə iştirak edən abituriyent 685 bal toplayıb. Söhbət zamanı Sunay sevincini bizimlə bölüşərək dedi ki, 1-ci sinifdən 11-ci sinfə qədər əlaçı olub. Fənlər arasında fərq qoymayıb, bütün dərsləri eyni qaydada oxumağa çalışıb. Lakin Azərbaycan dili, ədəbiyyat, tarix fənlərinə daha çox marağı olduğundan doqquzuncu sinifdə III ixtisas qrupu üzrə hazırlaşmaq qərarına gəlib. Onun dedik­lərindən: “Fikrimcə, yaxşı nəticə əldə etmək üçün ən birinci özünə inanmaq vacibdir. Daha sonra dərs bölgüsünü düzgün etmək, vaxtında yatmaq və bütün fikrini dərslərə yönəltmək lazımdır. Hələ ki, universitet və fakültə seçimini etməmişəm. Amma çox şadam ki, məqsədimə nail oldum. Bunun üçün müəllimlərimə və valideynlərimə minnətdaram”.

Dövlət İmtahan Mərkəzi iyulun 26-da 2018-2019-cu tədris ili üçün Azərbaycan Respublikasının ali təhsil müəssisələrinə II və III ixtisas qrupları üzrə qəbul imtahanı keçirib.
İmtahan respublikanın 11 şəhərində – Bakı, Naxçıvan, Gəncə, Sumqayıt, Mingəçevir, Şəki, Bərdə, Göyçay, Şirvan, Lənkəran və Xaçmazda, ümumilikdə, 61 binada aparılıb. İmtahanların idarə olunmasına 217 imtahan rəhbəri və ümumtəhsil müəssisələrindən 2585 nəzarətçi-müəllim cəlb olunub.
Məlumat üçün bildirək ki, Naxçıvan şəhərində imtahanlar 7, 14 nömrəli və Heydər Əliyev adına tam orta məktəblərdə keçirilib. İmtahana 153 nəzarətçi, 12 imtahan rəhbəri cəlb edilib, bir gün əvvəl onlar üçün seminar-treninqlər təşkil edilib. Ümumilikdə, 1615 abituriyent imtahan verib.
İmtahan bütün binalarda eyni vaxtda – saat 1100-da başlanıb və 3 saat davam edib. İmtahan başa çatdıqdan sonra müstəqil ekspertlər tərəfindən test tapşırıqlarının ekspertizası aparılıb. Həmin gün “Space” telekanalında canlı yayımlanan “Abituriyent” verilişində Dövlət İmtahan Mərkəzinin məsul əməkdaşları və ekspertlər tərəfindən sualların düzgün cavabları və test tapşırıqları ilə bağlı geniş izahat verilib. Sualların düzgün cavabları Dövlət İmtahan Mərkəzinin internet saytında və “Facebook” səhifəsində yerləşdirilib.
Abituriyentlərin cavab kartlarının emalı başa çatdıqdan sonra nəticələr və hər bir abituriyentin cavab kartının qrafik təsviri imtahandan 3-4 gün sonra mərkəzin rəsmi internet saytında (www.dim.gov.az) yerləşdiriləcəkdir.

 Güntac ŞAHMƏMMƏDLİ

Naxçıvan Müəllimlər İnstitutunda beşinci çağırış Naxçıvan Muxtar Respublikası Ali Məclisinin səkkizinci sessiyasında qarşıya qoyulan vəzifələrin müzakirəsinə həsr olunmuş kollegiya iclası keçirilib. İclası institutun tədris və tərbiyə işləri üzrə prorektoru Kamal Camalov açaraq məruzə ilə çıxış edib. 

Bildirilib ki, may ayının 16-da Naxçıvan Müəllimlər İnstitutunun müasir standartlara cavab verən və yüksək maddi-texniki təchizata malik yeni binasının istifadəyə verilməsi, Azərbaycan Respublikasının Prezidenti cənab İlham Əliyevin muxtar respublikamıza səfəri zamanı binanın açılışında iştirak edib ali təhsil ocağının kollektivi və şəhər ictimaiyyətinin nümayəndələri ilə görüşməsi institutun professor-müəllim heyətində, tələbə kontingentində böyük ruh yüksəkliyi və əzmkarlıq yaradıb.
Qeyd olunub ki, Naxçıvan Muxtar Respublikası Nazirlər Kabinetinin 2018-ci il 24 may tarixli qərarı ilə Naxçıvan Müəllimlər İnstitutunda struktur dəyişik­likləri aparılması məqsədilə ali təhsil ocağının yeni ştat cədvəli təsdiq olunub, mövcud prorektorluqlar ləğv edilib, yeni strukturlar yaradılıb. Həmin strukturlara yeni təyinatlar olub.

22 iyul – Milli Mətbuat Günü ilə əlaqədar Naxçıvan Dövlət Universitetində elmi-praktik konfrans keçirilib. Tədbir iştirakçıları əvvəlcə Naxçıvan şəhərindəki Heydər Əliyev Muzeyini ziyarət ediblər.
Konfransda universitetin rektoru, AMEA-nın müxbir üzvü Saleh Məhərrəmov ölkəmizdə söz, fikir və mətbuat azadlığının təmin edilməsində ümummilli lider Heydər Əliyevin müstəsna xidmətlərindən danışıb.
Universitetin Televiziya, mətbuat və ictimaiyyətlə əlaqələr bölməsinin müdiri Səadət Əliyeva “Azərbaycan mətbuatı: tarix və bu gün” mövzusunda çıxış edib.
Universitetin tədris-tərbiyə işləri üzrə prorektoru, tarix üzrə fəlsəfə doktoru, dosent Rafiq Rəhimov universitetin media kollektivini əlamətdar gün münasibətilə təbrik edib.
Sonra universitetin Media Mərkəzində çalışan bir qrup əməkdaşa mükafat təqdim olunub.

Xəbərlər şöbəsi