Şagirdlərin formalaşmasında, mənəvi aləminin zənginləşməsində, dünyagörüşünün və bilik dairəsinin genişlənməsində, məntiqi təfəkkürünün, idraki bacarıqlarının inkişafında mütaliənin rolu nəzərə alınaraq aprel ayı muxtar respublikanın ümumtəhsil məktəblərində “Mütaliə aylığı” elan edilib. Bu məqsədlə aprelin 4-də Naxçıvan Muxtar Respublikası Təhsil Nazirliyi tərəfindən “Şagirdlərin formalaşdırılmasında mütaliənin rolu və əhəmiyyəti” mövzusunda tədbir keçirilib. 

Tədbirdə Naxçıvan Muxtar Respublikasının təhsil naziri Rəhman Məmmədov çıxış edərək təhsilə göstərilən dövlət qayğısından əhatəli bəhs edib.
Vurğulanıb ki, Naxçıvan Muxtar Respublikası Ali Məclisi Sədrinin 2017-ci il 28 avqust tarixli Sərəncamı ilə tariximiz, mədəniyyətimiz və milli kimliyimiz haqqında dolğun məlumat verən, gənc nəslin həyat yolunun müəyyənləşdirilməsinə və dünyagörüşünün artırılmasına xidmət edən oxunması zəruri olan kitabların siyahısı təsdiq edilib. Ümumtəhsil məktəblərinin kitabxanalarında həmin kitablardan ibarət guşələr yaradılıb.

Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 2015-ci il 27 iyul tarixli Sərəncamı hami təşkilatlar ilə təhsil müəssisələri arasında uğurlu əməkdaşlığa nail olunmasına, bununla da muxtar respublikada mütəşəkkil kadr hazırlığına öz bəhrəsini verməkdədir. “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsinə dair əlavə tədbirlər və innovasiyaların dəstəklənməsi haqqında” 2019-cu il 3 aprel tarixli Sərəncam isə “İdeyadan başlanğıca” devizi altında innovasiyaya və dayanıqlı inkişafa əsaslanan, yaradıcı düşüncəni və elmi-texniki tərəqqini əks etdirən birgə yeni layihələrin (startapların) həyata keçirilməsi ilə bağlı mühüm bir mərhələnin əsasını qoydu.
“Şərq qapısı” qəzeti də müvafiq Sərəncamın icrasını diqqət mərkəzində saxlayır, muxtar respublikada jurnalistika üzrə yüksəkixtisaslı kadrların yetişdirilməsi istiqamətində tədbirlər görülür. Bu tədbirlərin davamı olaraq jurnalist tələbələrin mətbuatda mütəmadi çıxışlarını təmin etmək məqsədilə yeni “Estafet” rubrikası yaratdıq. Beləliklə, estafet muxtar respublikamızın zəngin mətbu ənənələrini davam etdirə biləcək, yüksək intellektə və yaradıcı potensiala malik tələbə-gənclərindir. İnanırıq ki, həm jurnalistikanı həyat amalı seçən, həm də analitik təfəkkürə, bədii təxəyyülə və publisistik düşüncəyə malik digər yaradıcı tələbə-gənclərimiz “Estafet”lə peşəkarlığa aparan uğurlu bir sənət yolçuluğuna çıxacaqlar.

Həyatda ən böyük arzularımdan biri ali təhsil almaq idi. Orta məktəbdə oxuduğum dövrdən bu arzumu gerçəkləşdirməyə çalışırdım. Ailəmin dəstəyi, çalışqanlığım sayəsində bu hədəfə çatdım.

“Naxçıvan Muxtar Respublikası – 95” devizi altında yeniyetmələr arasında intellektual oyunlar olimpiadasının Sədərək rayon birinciliyi təşkil edilib.
Olimpiada çərçivəsində yarışlar “Xəmsə”, “Poliqon” və “Vətəni tanı” intellektual oyunları üzrə vahid turnir şəklində keçirilib.
“Xəmsə” milli intellektual oyununun yekun nəticələrinə görə Sədərək kənd 2 nömrəli tam orta məktəbin “Qeyrət qalası” komandası I, Heydərabad qəsəbə tam orta məktəbinin “Qartal” komandası II, Sədərək kənd 1 nömrəli tam orta məktəbin “Günnüt” komandası isə III yerə layiq görülüblər.

Naxçıvan Muxtar Respublikası Ali Məclisinin Sədri yanında Bilik Fondunun Ali Məclisin Sədri tərəfindən təsdiq olunmuş 2019-cu il üzrə Tədbirlər Planına əsasən “Pedaqoji fikir tarixindən” kitabının təqdimatı keçirilib.
Naxçıvan Müəllimlər İnstitutunun rektoru, dosent Elbrus İsayev tədbiri giriş sözü ilə açaraq bildirib ki, pedaqoji fikir tarixinə nəzər saldıqda bu günün nailiyyətlərinin keçmişdən qidalandığını, ondan qüvvət aldığını görürük. Keçmişlə müasirliyi düzgün uzlaşdırmadan, onu düzgün dəyərləndirmədən və müqayisə etmədən bugünkü məktəbimizin və pedaqoji fikrimizin səviyyəsini müəyyənləşdirmək olmaz. Bu səbəbdən kitab ali məktəb tələbələri və pedaqoqlar və ümumilikdə, ziyalılar üçün dəyərli mənbə, stolüstü kitab səciyyəsi daşıyır.
Rektor qeyd edib ki, Naxçıvan Müəllimlər İnstitutunda növbəti tədris semestrindən “Pedaqoji fikir tarixi” adlı seçmə fənnin tədris planına salınması və pedaqoji fikir tarixi ilə əlaqəli mövzuların tədqiqata cəlb olunması nəzərdə tutulur.
Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin müdiri Surə Seyid çıxışında vurğulayıb ki, elmin və təhsilin davamlı inkişafı muxtar respublika rəhbəri tərəfindən daim diqqət mərkəzində saxlanılır. 2014-cü il 4 sen­tyabr tarixli Fərmanla Naxçıvan Muxtar Respublikası Ali Məclisinin Sədri yanında Bilik Fondu təsis edilib. Bu günədək fondun təşkilatçılığı ilə onlarla beynəlxalq və yerli səviyyəli konfranslar, seminarlar, dəyirmi masalar və disputlar keçirilib, ümumilikdə, elmi innovasiyaların, elmi yeniliklərin, layihələrin dəstəklənməsi işinə diqqət artırılıb. Bilik Fondunun maliyyə dəstəyi ilə onlarla kitab və jurnal nəşr olunaraq müvafiq qurumlara hədiyyə edilib. Əhalinin elmi-texniki, ictimai-siyasi, sosial-iqtisadi, ekoloji və humanitar biliklərinin artırılması istiqamətlərində görülmüş bu işlərin davamı olaraq Naxçıvan Muxtar Respublikası Ali Məclisinin Sədri yanında Bilik Fondu 2019-cu ilin Tədbirlər Planına əsasən “Əcəmi” Nəşriyyat-Poliqrafiya Birliyində 10 min tirajla “Pedaqoji fikir tarixindən” kitabı nəşr etdirib.

AMEA Naxçıvan Bölməsinin Bioresurslar İnstitutunun direktoru, akademik Tariyel Talıbov Almaniyanın Berlin şəhərində Ümumdünya Təbiəti Mühafizə Fondunun (WWF) Qafqaz ekoregionunun yeni beşillik plan və proqramlarının müzakirəsi və “Qırmızı kitab”a düşən bəzi növlərin yeni statuslarının dəqiqləşdirilməsi üçün təşkil olunan tədbirdə iştirak edib.
Altı gün davam edən beynəlxalq tədbirlərdə akademik Tariyel Talıbov Qafqaz ekoregionunda apardığı elmi-tədqiqat işləri, xüsusən qlobal təhlükə altında olan bəbirin biologiyasının izlənilməsi, qida obyektləri və digər nadir növlərin statuslarının qiymətləndirilməsinə dair təqdimatla çıxış edib.
Azərbaycanlı alim Qafqaz ekoregionunun təbiətinin qorunması, xüsusilə qlobal təhlükə altında olan bəbir və onun ov növlərinin qorunub saxlanılmasına verdiyi töhfəyə, həmçinin Bioresurslar İnstitutunda vəhşi təbiət üzrə çöl mütəxəssislərinin potensialının artırılması və Naxçıvanda vəhşi təbiətin mütəmadi monitorinqinin təşkilindəki səylərinə görə Ümumdünya Təbiəti Mühafizə Fondunun Asiya Birliyinin Fəxri fərmanına layiq görülüb.

AMEA Naxçıvan Bölməsinin
İnformasiya şöbəsi

Dövlət İmtahan Mərkəzi tə­rəfindən martın 31-də ümumi (9 illik) orta təhsil bazasında orta ixtisas təhsili müəssisələrinə (kolleclərə) qəbul olmaq istəyən əvvəlki illərin məzunları, indiyədək təhsil sənədi ala bilməyən və eksternat qaydasında imtahan verən məzunlar, üzrlü səbəbdən bu ay keçirilən buraxılış imtahanlarının (IX sinif) birinci mərhələsində iştirak edə bilməyən cari ilin məzunları, orta ixtisas təhsili müəssisələrinin müsabiqəsində orta məktəbdə təhsil aldıqları bölmədən fərqli bölmə üzrə iştirak etmək istəyən Azərbaycan və ya rus dili fənni üzrə imtahan verən cari ilin məzunları, orta ixtisas təhsili müəssisələrinin müsabiqəsində buraxılış imtahanı çərçivəsində verilən xarici dil fənnindən fərqli xarici dil fənni üzrə iştirak etmək istəyən cari ­ ilin məzunları üçün imtahanlar keçirilib.
Ölkə üzrə təşkil olunan imtahanlar eyni vaxtda, saat 1100-da başlanıb. Həmin gün, ümumilikdə, 7353 nəfər imtahan verib.
Naxçıvan şəhərində 14 nömrəli tam orta məktəbdə keçirilən imtahanda şagirdlərə Azərbaycan dili, riyaziyyat və xarici dil fənləri olmaqla, ümumilikdə, 45 test tapşırığı təqdim olunub.
Qeyd edək ki, imtahanda istifadə olunan açıqtipli tapşırıqların yoxlanılaraq nəticələrin imtahanın ikinci mərhələsi keçirilənədək www.dim.gov.az saytında elan olunması nəzərdə ­tutulur.

 Güntac ŞAHMƏMMƏDLİ

Martın 31-də Naxçıvan şəhər 4 nömrəli tam orta məktəbdə respublika fənn olimpiadalarının yarımfinal turu keçirilib. Respublika fənn olimpiadalarında xüsusi istedada malik IX-XI sinif şagirdləri güclərini sınayıblar.
Məlumat üçün bildirək ki, olimpiadanın yarımfinal turunda şəhər və rayon mərhələsinin nəticələrinə əsasən 329 şagird iştirak etmək hüququ qazanıb.
Ümumilikdə, 8 fənn üzrə keçirilən yarımfinal mərhələsində şagirdlərə 30 test tapşırığı təqdim edilib. Olimpiadaların təşkilində məqsəd istedadlı uşaqların aşkar olunması, şagirdlərdə fənlərə olan marağın artırılması, onların sağlam rəqabət mühitində öz bilik və bacarıqlarını nümayiş etdirmələri olub.
Yarımfinal turunda minimum 21 sualı düzgün cavablandıran şagirdlər aprel ayında keçiriləcək respublika fənn olimpiadalarının final turunda iştirak edəcəklər.

Naxçıvan Muxtar Respublikası
Təhsil Nazirliyinin mətbuat xidməti

İnteraktiv dərsdə AMEA Naxçıvan Bölməsinin əməkdaşı, tarix üzrə fəlsəfə doktoru Yaşar Rəhimov şagirdlərə məlumat verərək bildirib ki, ötən əsrin əvvəllərindən başlayaraq təcavüzkar erməni daşnaklarının xalqımıza qarşı törətdikləri dəhşətli cinayətlərin izləri Xatirə Muzeyindəki eksponatlarda da öz əksini tapıb. Ölkəmizin suverenliyi və ərazi bütövlüyü uğrunda döyüşlərdə həlak olanların xatirəsinin əbədiləşdirildiyi muzeydə şəhid olmuş qəhrəmanlarımızın fotoşəkilləri, şəxsi əşyaları və sənədləri, eyni zamanda qəhrəmanlıq tariximizin müxtəlif dövrlərinə aid kitablar nümayiş etdirilir.
Qeyd olunub ki, 1918-ci ilin martında törədilmiş bu soyqırımı paytaxt Bakı şəhəri də daxil olmaqla, ölkəmizin bir sıra regionlarını, o cümlədən muxtar respublikamızı da əhatə edib. 1905-1907, 1918-1920, 1988-1994-cü illərdə xalqımıza qarşı soyqırımı törədilməsində əsas məqsəd torpaqlarımızın işğalı və “Böyük Ermənistan” dövlətinin yaradılması idi. Hazırda muzeydə bu faciəli hadisələri özündə əks etdirən müxtəlif fotoşəkillər, xəritələr və sənədlər nümayiş etdirilir.
Vurğulanıb ki, ermənilərin azərbaycanlılara qarşı törətdikləri soyqırımı aktları və deportasiya ilə bağlı məsələyə ilk siyasi-hüquqi qiymət ümummilli lider Heydər Əliyev tərəfindən verilib. Ulu ­öndərin 1998-ci il martın 26-da imzaladığı “Azərbaycanlıların soyqırımı haqqında” Fərman bu baxımdan çox mühüm tarixi sənəddir.
Diqqətə çatdırılıb ki, dahi şəxsiyyətin bu sahədəki fəaliyyətini Prezident cənab İlham Əliyev bu gün uğurla və qətiyyətlə davam etdirməkdədir.

İnteraktiv dərsdə azərbaycanlılara qarşı ayrı-ayrı vaxtlarda həyata keçirilən soyqırımı və deportasiya siyasətinin acı nəticələrini özündə əks etdirən eksponatlar videobağlantı vasitəsilə şagirdlər tərəfindən izlənilib və müxtəlif bölmələrdə yerləşən eksponatlar haqqında geniş məlumat verilib.
İnteraktiv dərs muxtar respublikanın 200-dən çox təhsil müəssisəsində izlənilib.

Naxçıvan Muxtar Respublikası
Təhsil Nazirliyinin mətbuat xidməti

İntellektual idman növü kimi şahmatın inkişafına muxtar respublikamızda ciddi diqqət yetirilir. Bu məqsədlə şəhər və rayonlarda şahmat məktəbləri tikilərək istifadəyə verilib, həmin məktəblərin maddi-texniki bazası gücləndirilib. Eyni zamanda müasir informasiya-kommunikasiya texnologiyaları ilə təmin olunmuş şahmat məktəblərində interaktiv dərslərin təşkili üçün hər cür şərait yaradılıb.
2018-ci il dekabrın 10-da Naxçıvan Muxtar Respublikasının Ali Məclisində “Naxçıvan Muxtar Respublikasında bədən tərbiyəsi və idmanın hazırkı vəziyyəti və qarşıda duran vəzifələr haqqında” keçirilmiş müşavirədə verilmiş tapşırıqların icrasının təmin olunması, ümumtəhsil məktəblərində şahmat dərslərinin tədrisi səviyyəsinin artırılması, uşaq-gənc­lər şahmat məktəblərinin fəaliyyətinin gücləndirilməsi istiqamətində məqsədyönlü tədbirlər həyata keçirilir. Təhsil Nazirliyi Şahmat Federasiyası ilə birlikdə mütəmadi olaraq şahmat məşğələləri də təşkil edir.
Həmin tədbirlərin davamı olaraq martın 28-də Naxçıvan şəhərində Şahmat Mərkəzində “Qambitlərin izahlı təhlili” mövzusunda növbəti interaktiv dərs keçilib. Dərsi beynəlxalq dərəcəli hakim Emin Hacıyev aparıb. Qeyd olunub ki, qambit piyada qurban verməklə oyunda üstün vəziyyətin yaradılmasıdır. Daha sonra “EVANS” qambiti haqqında şagirdlərə geniş məlumat verilib.

Amerika Birləşmiş Ştatlarından gələn mütəxəssislər Jack Morrisin və İan Bernetinin iştirakı ilə “Naxçıvan” Universitetində “Təhsildə keyfiyyətə nəzarət sistemlərinin inkişaf etdirilməsi” mövzusunda keçirilən treninq maraqla qarşılanıb.
Ali təhsil ocağının Beynəlxalq əlaqələr şöbəsinin müdiri Rəcəb Cəfərli çıxış edərək treninqin keçirilməsində məqsədin keyfiyyətə nəzarət mexanizminin və mərkəzlərinin yaradılması, həmçinin inkişaf etdirilməsi yolları barədə müasir metodların tətbiqi üsullarının öyrənilməsidir. Həmçinin universitet heyətinin şöbə və onun funksiyası haqqında məlumatlandırılması, onlayn platformanın yaradılması da qarşıya qoyulan əsas məqsədlərdəndir.
Vurğulanıb ki, universitetin Boloniya prosesinə qoşulması və çoxpilləli təhsil sisteminə keçilməsi ilə əlaqədar Almaniyanın, ABŞ-ın, Türkiyənin və digər ölkələrin qabaqcıl universitetləri və elmi mərkəzləri ilə sıx əlaqələr qurulub. Qarşılıqlı əməkdaşlıq gündən-günə daha da genişləndirilir. Universitetin əməkdaşları TEMPUS, ERASMUS, COMOLTE kimi ümumavropa təhsil layihələrində fəal iştirak edirlər.
Treninqdə xarici dillərin mənimsənilməsi zamanı yaranan problemlər və dil öyrənilməsinin asanlaşdırılması qaydaları da müzakirə edilib.

Seyfur HACIMURADOV

Azərbaycan Respublikasının Prezidenti cənab İlham Əliyevin 2018-ci il 9 aprel tarixli Sərəncamı ilə martın 27-si Azərbaycan Respublikasında “Elm günü” kimi təsis edilmişdir.
Azərbaycan Elmlər Akademiyası son 75 ilə yaxın bir dövrdə şərəfli inkişaf yolu keçmişdir. Elmlər Akademiyası ümummilli lider Heydər Əliyevin Azərbaycana rəhbərliyi dövründə daha dinamik inkişaf etmiş, ölkəmiz sürətlə inkişaf edən, yüksələn respublikaya çevrilmişdir. Azərbaycan Respublikası dövlət müstəqilliyi qazandıqdan və dahi rəhbərin ölkə­mizdə ikinci dəfə siyasi hakimiyyətə qayıdışından sonra xalqımızın ictimai-siyasi, milli-mənəvi və mədəni həyatında keyfiyyətcə yeni bir mərhələ başlamışdır. 1997-ci il yanvarın 31-də Azərbaycan Elmlər Akademiyasının rəhbərliyini, alimlərin bir qrupunu Prezident sarayında qəbul edən ümummilli lider demişdir: “Azərbaycan Elmlər Akademiyası respublikamızın ən yüksək elmi müəssisəsidir. O, dövlətə məxsusdur. Bu akademiyanın işi və orada işləyənlərin səviyyəsi, şübhəsiz ki, başqalarından yüksəkdir, yüksək də olacaq. Biz akademiyanın hörmətini həmişə qoruyub saxlamalıyıq”.

Naxçıvan Dövlət Universitetində muxtar respublikanın ali təhsil ocaqlarında təhsil alan tələbələrin iştirakı ilə “İdeyadan biznesə” layihəsinin Naxçıvan turunun keçirilməsi ilə əlaqədar seminar olub.
Naxçıvan Dövlət Universitetinin rektoru, AMEA-nın müxbir üzvü Saleh Məhərrəmov seminarı açaraq bildirib ki, tələbələrin innovativ ideyalarının inkişaf etdirilməsi üçün bu cür layihələrin həyata keçirilməsi çox əhəmiyyətlidir. Muxtar respublika rəhbərinin diqqət və qayğısı ilə startap ekosisteminin inkişaf etdirildiyini vurğulayan rektor bunun üçün universitetdə gənclərə hər cür şərait yaradıldığını qeyd edib.
Naxçıvan Muxtar Respublikasının rabitə və yeni texnologiyalar naziri Rövşən Məmmədov çıxış edərək deyib ki, həyatımızın bütün sahələrində innovativ həllərin tətbiqinin zəruri olduğu bir dövrdə “İdeyadan biznesə” startap layihəsinin həyata keçirilməsi çox uğurlu təşəbbüsdür. Bu layihə ölkəmizdə milli startap infrastrukturunun inkişaf etməsinə, yeni biznes inqubatorların yaradılmasına kömək edəcək və startapçılar arasında əlaqələrin gücləndirilməsinə xidmət göstərəcəkdir. Layihə tələbələrin yaradıcı düşünməsi, yeni ideyaların ortaya çıxarılması, mövcud məsələlərə fərqli yanaşma üslubu kimi potensiallarının üzə çıxarılmasında mühüm rol oynayacaqdır.

AMEA Naxçıvan Bölməsində “Naxçıvan Muxtar Respublikasının coğrafiyası” ikicildliyinin təqdimatı olub.
Tədbiri bölmənin sədri, akademik İsmayıl Hacıyev açaraq fundamental nəşrin elmi dəyərindən danışıb. Alim bildirib ki, AMEA-nın Akademik Həsən Əliyev adına Coğrafiya İnstitutu ilə birgə hazırlanan, Naxçıvan Muxtar Respublikası Ali Məclisinin dəstəyi ilə çap edilən kitabın birinci cildində zəngin təbii şəraitə və təbii ehtiyatlara malik olan muxtar respublika ərazisinin fiziki coğrafiyasının müxtəlif sahələrini əhatə edən ən son elmi tədqiqatların nəticələri əks olunub. Fundamental əsərdə Naxçıvan ərazisinin geoloji quruluşu, relyefi, iqlimi, su ehtiyatları, torpaq və bitki örtüyü, heyvanlar aləmi və landşaftları araşdırılmaqla, fiziki-coğrafi rayonlaşdırma vahidləri ayrılıb və onlar geniş şərh edilib.

Bu gün Naxçıvanın tarixi, mədəniyyəti, elmi-ədəbi mühiti dərindən öyrənilir, sanballı tədqiqat materialları nəşr olunur. Bu dəyərli mənbələrin qorunması və təbliği, gələcək nəsillərə çatdırılması vacib məsələdir. Naxçıvan Muxtar Respublikası Ali Məclisinin Naxçıvanşünaslıq Mərkəzinin fəaliyyəti, bu mənada, mühüm əhəmiyyət daşıyır.

AMEA Naxçıvan Bölməsində ­Naxçıvan Muxtar Respublikası Ali Məclisinin Sədri cənab Vasif Talıbovun “Görkəmli alim Nemətullah Naxçıvani irsinin öyrənilməsi və tədqiqi haqqında” 2018-ci il 29 oktyabr tarixli Sərəncamının icrası istiqamətində silsilə tədbirlər davam etdirilir.
Bu günlərdə AMEA Naxçıvan Bölməsində olan Türkiyənin Naxçıvandakı Baş konsulu Məhmət Emin Kiraz Nemətullah Naxçıvaninin Türkiyə kitabxanalarında saxlanılan 12 əlyazmasının nüsxəsinin elektron variantını bölməyə təqdim edib.

Naxçıvan Dövlət Universitetində 27 mart – Elm günü ərəfəsində doktorant və dissertantlarla görüş olub.
Tədbirdə universitetin rektoru, AMEA-nın müxbir üzvü Saleh Məhərrəmov Azərbaycan Respublikasının Prezidenti İlham Əliyevin Azərbaycanda “Elm günü”nün təsis edilməsi haqqında 2018-ci il 9 aprel tarixli Sərəncamının dövlət başçısının Azərbaycan elminə göstərdiyi diqqət və qayğı ilə yanaşı, həm də onun elm amilinin ölkədə hərəkətverici qüvvəyə çevrilməsi istiqamətində həyata keçirdiyi məqsədyönlü dövlət siyasətinin tərkib hissəsi olduğunu qeyd edib. Rektor vurğulayıb ki, 1998-ci ildə universitetdə Dissertasiya Şurasının yaradılması muxtar respublikamızda elmin inkişafına göstərilən qayğının ifadəsidir.
AMEA Naxçıvan Bölməsinin sədri, akademik İsmayıl Hacıyev qeyd edib ki, elmin inkişafını daim diqqət mərkəzində saxlayan ümummilli lider Heydər Əliyev Naxçıvan Muxtar Respublikasının geosiyasi vəziyyətini nəzərə alaraq 2002-ci il avqustun 7-də Azərbaycan Milli Elmlər Akademiyasının Naxçıvan Bölməsinin yaradılması haqqında tarixi Sərəncam imzalayıb. Akademik ötən dövrdə bölmənin uğurlu fəaliyyət göstərdiyini, əməkdaşların 20 qrant, o cümlədən 3 beynəlxalq layihənin qalibi olduğunu, 25 minə yaxın elmi məqalə dərc etdirdiklərini diqqətə çatdırıb.
AMEA Naxçıvan Bölməsi, Tarix, Etnoqrafiya və Arxeologiya İnstitutunun professoru, AMEA-nın müxbir üzvü Vəli Baxşəliyev doktorant və dissertantlara öz məsləhətlərini verib, qarşıdan gələn əlamətdar gün münasibətilə elm adamlarını təbrik edib.
Sonda dissertantların sualları cavablandırılıb.

Səadət ƏLİYEVA

AMEA Naxçıvan Bölməsində Elm günü ilə əlaqədar olaraq “Elm həftəsi”nin ilk tədbiri ­keçirilib.
Tədbirdə bölmənin sədri, akademik İsmayıl Hacıyev Prezident cənab İlham Əliyevin “Azərbaycan Respublikasında “Elm günü”nün təsis edilməsi haqqında” 2018-ci il 9 aprel tarixli Sərəncamına əsasən hər il martın 27-nin ölkəmizdə Elm günü kimi qeyd ediləcəyini bildirib. Respublikamızda elmə göstərilən diqqət və qayğıdan danışan akademik əsası ümummilli lider Heydər Əliyev tərəfindən qoyulan bu ənənənin bu gün ölkə başçısı tərəfindən uğurla davam etdirildiyini vurğulayıb.
Qeyd olunub ki, 2002-ci il avqust ayının 7-də ümummilli liderin təşəbbüsü ilə yaradılan AMEA Naxçıvan Bölməsi Naxçıvan Muxtar Respublikası Ali Məclisi Sədrinin diqqət və qayğısı nəticəsində ən son avadanlıqlarla təchiz edilib. Bölmədə Naxçıvanın tarixi, etno­qrafiyası, arxeologiyası, ədəbiyyatı, folkloru, bioresursları və təbii ehtiyatlarının araşdırılmasında elmi istiqamətlər müəyyən edilib, müvafiq profillərə uyğun elmi-tədqiqat işləri yerinə yetirilərək mühüm nəticələr əldə olunub.
Naxçıvan Muxtar Respublikası Ali Məclisi Aparatının Humanitar siyasət məsələləri və ictimai təşkilatlarla iş şöbəsinin müdiri Surə Seyid çıxışında qeyd edib ki, Azərbaycan Respublikasında elmin inkişafı dövlət siyasətinin əsas prioritetlərindən biridir. Dövlətin gələcəyi, iqtisadi, siyasi və hərbi qüdrəti onun elmi potensialı ilə bilavasitə bağlıdır.

Bu günlərdə Türkiyə Respublikasının İstanbul şəhərində Avrasiya Universitetlər Birliyinin (EURAS) təhsil sərgisi təşkil olunub.
Sərgidə “Naxçıvan” Universitetinin tədris və tərbiyə işləri üzrə prorektoru, iqtisad üzrə fəlsəfə doktoru Hüseyn Bağırsoylu və Naxçıvan Dövlət Universitetinin Beynəlxalq əlaqələr şöbəsinin müdiri Müşərrəf Məmmədova da iştirak ediblər. Tədbirdə Türkiyə Respublikasının gənc­lər və idman naziri, təhsil təşkilatlarının rəhbərləri, 150-dən çox universitet təmsil olunub.
Naxçıvan ali təhsil müəssisələrinin təşkil etdiyi sərgi böyük maraq doğurub. Sərgiyə baxışdan sonra universitetin tədris və tərbiyə işləri üzrə prorektoru Hüseyn Bağırsoylunun EURAS-ın İstanbul Universiteti üzrə təmsilçisi doktor Mustafa Aydınla görüşü olub. Görüş zamanı “Naxçıvan” Universitetinin beynəlxalq əlaqələri haqqında ətraflı məlumat verilib, universitetlərarası əməkdaşlıq məsələləri müzakirə olunub.

Xəbərlər şöbəsi

Naxçıvan Şahmat Mərkəzində “Naxçıvan Muxtar Respublikası – 95” devizi altında ali və orta ixtisas təhsili müəssisələrinin tələbələri arasında “Poliqon” strateji intellekt oyunu üzrə universiada keçirilib.
Qalib olan komanda Bakı şəhərində təşkil olunacaq “Poliqon” strateji intellekt oyunu üzrə II Respublika Universiadasında Naxçıvanı təmsil edəcəkdir.
14 komandanın iştirak etdiyi oyun “Axtarış”, “Hədəf”, “Saxlama”, “Zəfər” və “Ekstra” mərhələlərindən ibarət olub. Oyunda səsləndirilən 24 sualdan daha çoxuna cavab verən “Diplomat” komandası qalib adını qazanıb. “Turan” komandası ikinci, “Qisas” komandası üçüncü olub.
Qaliblərə Gənclər və İdman Nazirliyinin diplomları, fəxri fərmanları, oxunması zəruri olan kitablar, həmçinin Azərbaycan və dünya ədəbiyyatı nümunələri təqdim olunub. Gənclər və İdman Nazirliyinin, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin birgə təşkilatçılığı ilə keçirilən universiadada əvvəlcədən yaradılmış link vasitəsilə 14 komandada 90 nəfərə yaxın gənc qeydiyyatdan keçərək iştirak edib.

 Ceyhun MƏMMƏDOV

Heydər Əliyev Muzeyində növbəti açıq dərs “Ümummilli lider Heydər Əliyev və Naxçıvanın muxtariyyəti” mövzusuna həsr olunub.
Naxçıvan şəhər 4 nömrəli tam orta məktəbin şagirdlərinin iştirakı ilə keçirilən dərsdə 1924-cü il fevralın 9-da Naxçıvan Muxtar Respublikasının yaradılmasından danışılıb. Qeyd olunub ki, 1993-cü ildə dahi şəxsiyyət Heydər Əliyevin siyasi hakimiyyətə qayıdışı ilə Naxçıvan Muxtar Respublikasının sosial-iqtisadi inkişafına diqqət daha da artırılıb.
Bildirilib ki, Naxçıvan Muxtar Respublikasının yaradılması ölkəmizin siyasi tarixində əhəmiyyətli hadisə olub. Müstəqillik dövründə Azərbaycan dövlətçiliyinin qorunması və möhkəmləndirilməsi ilə bağlı kompleks problemləri uğurla həll edən ümummilli lider Heydər Əliyev Naxçıvanın muxtariyyət statusu əleyhinə yönələn cəhdlərin qarşısını böyük qətiyyətlə alıb, onu daha da möhkəmləndirib.
Sonda şagirdlər muzeyin ekspozisiyası ilə tanış olublar.

Xəbərlər şöbəsi

Ölkəmizdə, o cümlədən muxtar respublikamızda elmin inkişafında qadınlarımızın tarixən misilsiz xidmətləri olub. Müstəqilliyimizin bərpasından sonra isə Azərbaycan qadınının intellektual potensialından yetərincə istifadə sahəsindəki boşluğun aradan qaldırılmasına başlanılıb. Bundan sonra qadınlar digər sahələrdə olduğu kimi, elmdə də təmsil olunmağa başlayıb.
“Qadınlar dövlətimizin, müstəqilliyimizin, bu günümüzün dayağıdır”, – deyən ümummilli lider Heydər Əliyevin bu sahəyə diqqəti doğma diyarımızda da intellektual qadınların inkişafına rəvac verib. Ailə dəyərlərini qorumaqla yanaşı, Azərbaycan elminə də mühüm töhfələr verən bu qadınlar içərisindən XX əsrin sonunda artıq 2 akademik yetişib. Onlardan biri qədim yaşayış yerlərindən olan Şahtaxtı kəndində anadan olmuş, ümummilli lider Heydər Əliyevin ömür-gün yoldaşı, sirdaşı, Azərbaycana İlham Əliyev kimi tərəqqipərvər dövlət xadimi bəxş etmiş görkəmli oftalmoloq Zərifə xanım Əliyeva, digəri isə Şərur rayonunun Şəhriyar kəndində dünyaya göz açmış, tanınmış bioloq Siddiqə Məmmədova idi. Onlarla yanaşı, biologiya sahəsində Zəhra Şahtaxtinskaya, Sevda Məmməd­əliyeva, botanika üzrə Roza Əsgərova, filologiya sahəsində Ninel Hacıyeva, fizika-riyaziyyat elmləri üzrə Zərifə Əliyarova, Sevda Abdullayeva, kimya sahəsində Rəfiqə Əliyeva, Svetlana Məmmədova Azərbaycan elminə dəyərli töhfələr verməklə elmlər doktoru alimlik dərəcəsini qazanıblar. Svetlana Məmmədova həm də şəhid alim qadınlarımızdandır. O, 1990-cı ilin Qanlı Yanvar günlərində faciəli surətdə həlak olub və Şəhidlər xiyabanında dəfn edilib.

Naxçıvan Müəllimlər İnstitutunda “Elm aylığı” çərçivəsində “Tələbələrin elmi-tədqiqat fəaliyyətlərinin təşkilinin aktual problemləri” mövzusunda seminar-müşavirə keçirilib.
Tədbiri giriş sözü ilə İnstitutun rektoru, tarix üzrə fəlsəfə doktoru, dosent Elbrus İsayev açaraq “Elm aylığı”nın mahiyyəti, məqsədi və vəzifələri haqqında ətraflı məlumat verib.
Bildirilib ki, “Elm aylığı” çərçivəsində keçiriləcək silsilə tədbirlər ali təhsil müəssisələrində təhsil alanların elmi-tədqiqat fəaliyyətinin müasir tələblər baxımından təşkilinin, onların innovasiya fəaliyyətinə cəlb olunması yollarının araşdırılması, gələcək mütəxəssislərin düzgün istiqamətləndirilməsi məqsədi daşıyır.

Naxçıvan Dövlət Universitetinin Pedaqoji fakültəsində 5 mart – Bədən Tərbiyəsi və İdman Gününə həsr olunmuş elmi-nəzəri konfrans keçirilib.
Konfransı giriş sözü ilə açan universitetin rektoru, AMEA-nın müxbir üzvü Saleh Məhərrəmov ölkəmizdə, o cümlədən muxtar respublikamızda idmanın inkişafına göstərilən diqqət və qayğıdan ətraflı bəhs edib.
Bədən tərbiyəsi və idman kafedrasının müdiri, Naxçıvan Muxtar Respublikasının Əməkdar bədən tərbiyəsi və idman xadimi Əvəz Tağıyev qeyd edib ki, idmanın inkişafı, müxtəlif sahələri üzrə yaradılmış olimpiada mərkəzləri bu sahəyə xüsusi diqqətin olduğunun əyani sübutudur. Bədən tərbiyəsi və idman kafedrasının baş müəllimi Valeh Əlixanov universitetin Pedaqoji fakültəsinin nəzdində 2000-ci ildə yaradılan İdman muzeyindən, ali təhsil ocağında idmanın 16 növü üzrə keçirilən məşğələ­lərdən danışıb. Bildirilib ki, yaradılan hərtərəfli şərait tələbələri bu istiqamətdə daha fəal olmağa səsləyir.

Əcəmi seyrəngahında gənclər arasında “Axtar tap” intellektual oyunu keçirilib.
Əvvəlcə gənclər və idman naziri Azad Cabbarov çıxış edərək muxtar respublikada gənclərə göstərilən diqqət və qayğı barədə danışıb. Bildirilib ki, dövlət gənclər siyasəti Naxçıvan Muxtar Respublikasında uğurla həyata keçirilir. Gənclər muxtar respublikanın ictimai-­siyasi, iqtisadi-mədəni həyatında fəal iştirak edirlər. Bu gün muxtar respublikada gənclərin məşğulluğunun təmin edilməsi, onların yaradıcılıq axtarışlarının stimullaşdırılması, milli ruhda, hərbi-vətənpərvərlik tərbiyəsinin gücləndirilməsi, sağlam həyat tərzinin təbliği diqqət mərkəzindədir.
Vurğulanıb ki, bununla bağlı müxtəlif mövzularda tədbirlər keçirilir. Gənclərin bütün sahələrdə uğur qazanması da onu göstərir ki, onlara dövlətimiz tərəfindən böyük diqqət və qayğı vardır.
Diqqətə çatdırılıb ki, gənclər müxtəlif layihələr vasitəsilə Gənclər və İdman Nazirliyinə müraciət edə bilərlər.
Sonra gənclər ərazinin müxtəlif yerlərində hazırlanan suallara cavab taparaq birincilik uğrunda mübarizə aparıblar. Suallara daha tez cavab verən “Zirvə” komandası qalib adını qazanıb. “Atabəylər” komandası ikinci, “Karvan” komandası isə üçüncü olub.

Naxçıvan Muxtar Respublikası Təhsil Nazirliyi tərəfindən muxtar respublikanın ümumtəhsil məktəblərində təhsil alan şagirdlərin ali təhsil müəssisələrinə ekskursiyaları təşkil olunur.
Martın 15-dək davam edəcək ekskursiyaların Naxçıvan Dövlət Universitetinə, “Naxçıvan” Universitetinə və Naxçıvan Müəllimlər İnstitutuna təşkili nəzərdə tutulub. Ekskursiyalarda muxtar respublikanın bütün şəhər və rayon məktəbliləri təmsil olunmaqla, ümumilikdə, 300-dən çox şagird iştirak edəcəkdir.
Martın 1-də təşkil edilən növbəti ekskursiyada Şərur rayon, Sədərək rayon və Şərur Şəhər ­Fizika-Riyaziyyat Təmayüllü Lisey üzrə, ümumilikdə, 70 şagird iştirak edib.
Muxtar respublikanın ali təhsil ocaqlarına ekskursiyada olan şagirdlər bu ali təhsil müəssisələrində kadr hazırlığı aparılan ixtisaslar və tələbələr üçün yaradılan şərait haqqında məlumat alıblar. Eyni zamanda şagirdlər dərslərdə də iştirak edib, müəllim və tələbələrlə görüşüb, kitabxana, akt zalı, idman zalı, kompüter və elektron lövhəli otaqlar, laboratoriyalar və yataqxana ilə yaxından tanış olublar.
Məzunların ixtisas seçiminə öz müsbət təsirini göstərəcək ekskursiyaların davamlı olaraq təşkili planlaşdırılır.

Naxçıvan Muxtar Respublikası
Təhsil Nazirliyinin mətbuat xidməti

Dövlət İmtahan Mərkəzi martın 3-də Bakı, Şirvan şəhərləri və Naxçıvan Muxtar Respublikasının orta ümumtəhsil müəssisələrinin IX sinif şagirdləri üçün buraxılış imtahanının birinci mərhələsini keçirib.
Həmin gün, ümumilikdə, 37 min 434 şagird imtahan verib. İmtahan bütün binalarda saat 1100-da başlanıb və 3 saat davam edib. İmtahanda şagirdlərin bilik və bacarıqlarını yoxlamaq məqsədilə tədris dili, riyaziyyat və xarici dil fənləri üzrə, ümumilikdə, 45 tapşırıq təqdim edilib. Buraxılış imtahanlarının birinci mərhələsinin keçirilməsi üçün 84 imtahan mərkəzi ayrılıb.
Naxçıvan Muxtar Respublikasında imtahanların şəffaf və obyektiv keçirilməsi üçün, ümumilikdə, 12 imtahan mərkəzi yaradılıb. Bu mərkəzlərdə, ümumilikdə, 3439 şagird imtahan verib.
Muxtar respublikada keçirilən imtahanların idarə olunmasına, ümumilikdə, 27 imtahan rəhbəri, 12 ümumi rəhbər, 334 nəzarətçi-müəllim cəlb edilib.
Qeyd edək ki, imtahanda istifadə olunan açıqtipli tapşırıqların yoxlanılması uzun müddət tələb etdiyindən nəticələrin imtahanın ikinci mərhələsi keçirilənədək www.dim.gov.az saytında elan olunması nəzərdə tutulur.

 Güntac ŞAHMƏMMƏDLİ

Naxçıvan şəhər 10 nömrəli uşaq bağçasının məktəbəqədər hazırlıq qruplarında olan 5-6 yaşlı uşaqlar arasında “Ağıllı uşaq” əyləncəli intellektual oyunu keçirilib.
Tədbirin keçirilməsində məqsəd uşaqların zehni inkişafının stimullaşdırılması, onların asudə vaxtlarının səmərəli təşkili, intellektual oyunlara uşaqların marağının artırılması, əqli qabiliyyətlərinin və məntiqi düşüncələrinin inkişaf etdirilməsi olub. İki mərhələdən ibarət oyunda 4 komanda iştirak edib. Birinci mərhələdə uşaqlar butona basmaqla 35, ikinci mərhələdə isə onlara təqdim olunan 5 şəkilli sualı cavablandırıblar.
Sonda daha çox suala düzgün cavab verən “Əlincə qalası” komandası qalib adını qazanıb. “Gülüstan” komandası ikinci, “Möminə xatın” və “Nuh yurdu” komandaları isə üçüncü olub.
Qaliblərə təşkilatçılar tərəfindən diplom, fəxri fərman və rəngli kitablar təqdim olunub. Daha sonra uşaqların iştirakı ilə yallı rəqsi nümayiş etdirilib.

Bu günlərdə Bakı Biznes Universitetinin kordinatoru olduğu EQAC –Erasmus Plus layihəsinin İngiltərənin Middlesex Universitetində təşkil edilən növbəti treninqində partnyor universitet kimi “Naxçıvan” Universitetini təmsil edən rektor, professor İsmayıl Əliyev və bir qrup əməkdaş da iştirak ediblər.
Layihənin məqsədi Azərbaycan universitetlərində keyfiyyətə nəzarət mərkəzinin yaradılması və bu mərkəzlərin fəaliyyətinin Avropa standart­larına uyğun formalaşdırılmasıdır.
Təlimin sonunda Azərbaycandan olan universitetlərin əməkdaşlarına treninqi uğurla başa vurduqlarına görə sertifikatlar təqdim edilib. Bundan başqa, təlim çərçivəsində “Naxçıvan” Universitetinin rektoru, professor İsmayıl Əliyevlə Middlesex Universitetinin vitse-konsleri Tim Blackman arasında görüş olub, qarşılıqlı əməkdaşlığa dair söhbətlər aparılıb.

Nuray ƏSGƏROVA

Türkiyə Respublikasının Baş konsulu Mehmet Emin Kiraz “Naxçıvan” Universitetində olub.
Universitetin kitabxanasında təşkil edilən görüşdə ali təhsil ocağının rektoru, professor İsmayıl Əliyev universitetin beynəlxalq əlaqələri barədə ətraflı məlumat verib. Bildirilib ki, “Naxçıvan” Universiteti tərəfindən bir çox xarici universitetlər və beynəlxalq qurumlarla əməkdaşlıq müqavilələri imzalanıb. Bu əməkdaşlıq ortaq elmi proqramların və konfransların keçirilməsinə, tələbə mobilliyinin artırılmasına, müəllim-tələbə mübadilələrinin həyata keçirilməsinə xidmət edir.
Görüş zamanı “Mövlana Mübadilə Proqramı” çərçivəsində “Naxçıvan” Universiteti ilə Türkiyə universitetləri arasında münasibətlərin daha da genişləndirilməsinə dair Türkiyə vətəndaşlarının “Naxçıvan” Universitetinə təhsilə cəlbi ilə əlaqədar bir sıra məsələlər müzakirə olunub. Bundan başqa, Türkiyə universitetlərində çalışan akademik heyətin ali təhsil ocağına dəvət olunması və onların mühazirələr keçməsi ilə bağlı razılıqlar əldə edilib.
Sonra Baş konsul Mehmet Emin Kiraz gətirdiyi 46 cildlik dini ensiklopediyanı universitet kitabxanasına təqdim edib.

Nuray ƏSGƏROVA

Fevralın 26-da Naxçıvan Muxtar Respublikası Ali Məclisinin Xocalı soyqırımı ilə əlaqədar Tədbirlər Planına uyğun olaraq Təhsil Nazirliyinin təşkilatçılığı ilə muxtar respublikanın orta ümumtəhsil müəssisələri ilə Naxçıvan şəhərindəki Xatirə Muzeyi arasında interaktiv əlaqə yaradılıb.
“Xocalı faciəsini unutmamalıyıq” mövzusunda keçilən dərsdə muzeyin bələdçisi Leyla Məmmədova əvvəlcə bu mədəniyyət müəssisəsi haqqında məlumat verib. Bildirib ki, Naxçıvan Muxtar Respublikası Ali Məclisi Sədrinin 1997-ci ildə imzaladığı Sərəncamla yaradılan mədəniyyət müəssisəsində hazırda 2000-dən çox eksponat var. Onlardan 400-ə yaxını ekspozisiyada nümayiş etdirilir. Eksponatların hər biri tariximizin qanlı və şanlı səhifələrini özündə əks etdirir. Burada, əsasən, şəhidlərin fotoşəkilləri, şəxsi sənədləri, döyüş fəaliyyətlərini əhatə edən materiallar, eyni zamanda Azərbaycan Respublikasının Milli qəhrəmanlarının, Sovet İttifaqı qəhrəmanlarının fotoşəkilləri və onlara aid materiallar qorunur. Muzeydə eksponatların xronoloji ardıcıllıqla yerləşdirilməsi gənc nəslin qəhrəmanlıq tariximiz haqqında ətraflı məlumat almasına şərait yaradır.
İnteraktiv dərsdə Xocalıda törədilən soyqırımı barədə şagirdlərə ətraflı məlumat verilib, bu faciəyə ilk dəfə ulu öndər Heydər Əliyev tərəfindən hüquqi-siyasi qiymət verildiyi vurğulanıb, Azərbaycan Prezidentinin Xocalı həqiqətlərinin dünyaya çatdırılması istiqamətində həyata keçirdiyi tədbirlərdən bəhs olunub.

İnteraktiv dərsi Heydər Əliyev adına Hərbi Lisey və muxtar respublikanın 200-dən çox təhsil müəssisəsindən izləyiblər.
Qeyd edək ki, həmin gün muxtar respublikamızın ali, orta ixtisas və ümumtəhsil məktəblərində ilk dərs saatı Xocalı soyqırımına həsr olunub.

Naxçıvan Muxtar Respublikası Təhsil Nazirliyinin
mətbuat xidməti

Ümummilli liderimiz Heydər Əliyevin müəllifi olduğu ordu quruculuğu strategiyasında ixtisaslı hərbi kadrların hazırlanması xüsusi yer tutur. Hələ Sovetlər İttifaqı dövründə ulu öndərimizin rəhbərliyi ilə Cəmşid Naxçıvanski adına Respublika Hərbi Təyinatlı Orta İnternat Məktəbi yaradılmışdır. Dahi rəhbər Naxçıvan Muxtar Respublikası Ali Məclisinin Sədri işlədiyi dövrdə ilk dəfə Naxçıvanda milli ordu hissələri yaradılmış, ölkəmizdə ikinci dəfə siyasi hakimiyyətə qayıtdıqdan sonra isə milli ordu quruculuğu sahəsində daha geniş tədbirlər görülmüş, Azərbaycan Respublikasının Silahlı Qüvvələri formalaşmışdır. Ulu öndərin 1998-ci il 13 mart tarixli Sərəncamı ilə Cəmşid Naxçıvanski adına hərbi liseyin Naxçıvan filialının yaradılması da bu sahədə görülən işlərin tərkib hissəsidir. 

1999-cu ilin oktyabrında filialın yeni tədris korpusunun açılışında iştirak edən ümummilli liderimiz bu hərbi təhsil müəssisəsinin yaradılması zərurətindən danışaraq demişdir: “Tarixən naxçıvanlı gənclər zabit peşəsinə yiyələnməyə meyilli olublar. Tarixi vərəqləyin, görün Naxçıvandan vaxtilə nə qədər böyük sərkərdələr çıxıbdır. Elə XIX-XX əsrlərin tarixini götürək. Naxçıvan xanları – Kəngərlilər sülaləsindən çar Rusiyasının ordusunda altı general var idi. Onlardan sonuncusu Cəmşid xan Naxçıvanski idi. Əgər sonrakı dövrü, sovet hakimiyyəti dövrünü götürsək, Naxçıvandan yüksək rütbəli, çox dəyərli zabitlər çıxıbdır. ... Ona görə də burada olan gəncləri hərbi peşəyə cəlb etmək üçün hərbi liseyin filialının yaradılması çox zəruri idi”.

Muxtar respublika fənn olimpiadasının qaliblərinin mükafatlandırılması mərasimi keçirilib.
Tədbirdə Naxçıvan Muxtar Respublikasının təhsil naziri Rəhman Məmmədov çıxış edərək bildirib ki, dövlətimizin hərtərəfli diqqət və qayğısı ilə təhsil müəssisələrinin maddi-tədris bazası daha da möhkəmləndirilib, tədris prosesi günün tələbləri səviyyəsində qurulub. Fənn kabinələri, fizika, kimya, biologiya laboratoriyaları zəruri avadanlıqlarla təmin olunub. Bütün bunlar isə təhsilin səviyyəsinin yüksəldilməsinə geniş imkanlar açır. İstedadı və yaradıcı təfəkkürü ilə seçilən şagirdləri aşkar etmək istiqamətində də müxtəlif tədbirlər həyata keçirilir. Bu tədbirlər sırasında hər il muxtar respublikada keçirilən fənn olimpiadaları mühüm əhəmiyyət kəsb edir.
Diqqətə çatdırılıb ki, olimpiadaların keçirilməsində məqsəd xüsusi istedadlı uşaqların üzə çıxarılması, şagirdlərdə fənlərə olan marağın artırılması, onların sağlam rəqabət mühitində öz bilik və bacarıqlarını nümayiş etdirmələrinə və peşə seçiminə hazır­lanmasına zəmin yaradılmasından ibarətdir. Məktəblilərin muxtar respublika fənn olimpiadalarının keçirilməsi onların respublika fənn olimpiadalarına hazırlığında və yüksək nəticələr qazanmağında mühüm əhəmiyyətə malikdir. Fənn olimpiadalarının yekunlarına görə şagirdlərin əldə etdikləri nəticələr müvafiq fənn müəllimlərinin, eləcə də məktəbin fəaliyyətinin qiymətləndirilməsində əsas meyarlardan biri kimi nəzərə alınır.
Nazir qeyd edib ki, məktəblilərin muxtar respublika fənn olimpiadası iki mərhələdə keçirilib. IX-XI sinif şagirdləri arasında Azərbaycan dili və ədəbiyyat, riyaziyyat, fizika, kimya, biologiya, informatika, tarix, coğrafiya fənləri üzrə olimpiadanın I şəhər və rayon mərhələsində 545 şagird öz biliyini sınayıb, onlardan 191-i yüksək nəticə göstərərək final mərhələsində iştirak etmək hüququ qazanıb. Nəticələrə əsasən fevralın 12-də keçirilən olimpiadanın final mərhələsində, ümumilikdə, 51 şagird I, II və III yerlərin qalibi olub.

Fevralın 24-də Dövlət İmtahan Mərkəzi ali təhsil müəssisələrinin və Azərbaycan Milli Elmlər Akademiyasının magistraturalarına qəbul imtahanının birinci mərhələsini keçirib.
Magistratura səviyyəsinə qəbul imtahanının birinci mərhələsi respublikanın 5 şəhərində – Bakı, Naxçıvan, Gəncə, Mingəçevir və Lənkəran şəhərlərində, ümumilikdə, 39 imtahan binasında aparılıb. İmtahan bütün binalarda eyni vaxtda, saat 1300-da başlanıb və 2 saat 30 dəqiqə davam edib.
Bu ildən etibarən imtahanlarda bakalavrların xarici dil üzrə dinləyib-anlama bacarıqları da yoxlanılır. İmtahan dinləmə mətninin səsləndirilməsi ilə başlanıb. Bəzi imtahan binalarına giriş zamanı imtahan iştirakçılarının şəxsiyyətini dəqiqləşdirmək məqsədilə “Face Recognition” (üzün tanınması) texnologiyasına əsaslanan proqram-texniki vasitələrdən istifadə olunub. Bu texnologiyanın tətbiq edilməsində əsas məqsəd bakalavrların imtahan binasına buraxılış rejimini daha sürətli həyata keçirmək və qeydiyyatdan keçmiş bakalavrların əvəzinə başqa şəxslərin imtahan binasına daxil olmasının qarşısını ­almaqdır.

AMEA Naxçıvan Bölməsində Əməkdar elm xadimi, Bioresurslar İnstitutunun direktoru, akademik Tariyel Talıbovun 70 illiyinə həsr olunan yubiley tədbiri keçirilib.
Tədbirdə bölmənin sədri, akademik İsmayıl Hacıyev Tariyel Talıbovun mənalı ömür yoluna, zəngin elmi-pedaqoji fəaliyyətinə nəzər salıb. Bildirib ki, görkəmli alim bütün ömrünü Naxçıvan Muxtar Respublikasının flora və fauna biomüxtəlifliyinə, müasir vəziyyətinə, nadir, endemik, nəsli kəsilmək təhlükəsi altında olan bitki növlərinə, onların səmərəli istifadə olunması və mühafizəsinə həsr edib.
Akademik bildirib ki, Tariyel Talıbov səmərəli fəaliyyətinə görə bir sıra mükafatlara layiq görülüb. O, Azərbaycan Respublikası Təhsil Nazirliyinin, AMEA Rəyasət Heyətinin fəxri fərmanları ilə təltif edilib, “Azərbaycan Respublikasının Əməkdar elm xadimi” fəxri adına, ümummilli lider Heydər Əliyevin anadan olmasının 90 illiyi ilə əlaqədar “Yubiley qızıl medalı”na, AMEA-nın Həsən bəy Zərdabi adına mükafatına layiq görülüb, Naxçıvan Muxtar Respublikası Ali Məclisinin Sədri ­cənab Vasif Talıbovun 2019-cu il 21 fevral tarixli Sərəncamı ilə “Naxçıvan Muxtar Respublikasına xidmətlərə görə” nişanı ilə təltif olunub.

Naxçıvan Muxtar Respublikası Ali Məclisi Sədrinin 2019-cu il 17 yanvar tarixli Sərəncamı ilə təsdiq olunmuş Tədbirlər Planına uyğun olaraq Cəlil Məmmədquluzadənin 150 illik yubileyi muxtar respublikamızda geniş şəkildə qeyd olunur. Bu tədbirlərin davamı olaraq 2019-cu il fevralın 21-də Naxçıvan şəhərində yerləşən Cəlil Məmmədquluzadənin ev-muzeyində “Cəlil Məmmədquluzadənin həyat və fəaliyyəti” mövzusunda interaktiv dərs keçilib.

AMEA Naxçıvan Bölməsinin İncəsənət, Dil və Ədəbiyyat İnstitutunun şöbə müdiri Ramiz Qasımov interaktiv dərsdə qeyd edib ki, çox­əsrlik tarixə malik olan Azərbaycan ədəbiyyatının inkişafında böyük Azərbaycan yazıçısı və dramaturqu Cəlil Məmmədquluzadənin mühüm xidmətləri olmuşdur.
Görkəmli yazıçı-publisistin həyatı haqqında ətraflı məlumat verilərək bildirilib ki, sovet dövründə yaradıcılığı və şəxsiyyəti ideologiyanın təhriflərinə məruz qalan Cəlil Məmməd­quluzadənin irsi ümummilli lider Heydər Əliyevin qayğısı sayəsində toplanılaraq nəşr edilmiş, ciddi tədqiqatların obyekti olmuşdur. Görkəmli yazıçının adına küçələr verilmiş, Bakıda, Cəlilabad və doğma vətəni Naxçıvan şəhərlərində əzəmətli heykəlləri ucaldılmışdır. Ədibin ölməz əsərləri daim teatrların repertuarlarında olmuş, çoxsaylı əsərləri səhnələşdirilərək böyük tamaşaçı rəğbəti qazanmışdır. Dahi yazıçının Naxçıvan şəhərindəki ev-muzeyi ümummilli lider Heydər Əliyevin 1998-ci il 19 iyun tarixli Sərəncamına əsasən yaradılmışdır. Həmçinin Cəlil Məmmədqulu­zadənin vaxtilə müəllimlik etdiyi Nehrəmdə və Cəlilkənddə xatirə muzeyləri istifadəyə verilmişdir.

Naxçıvan Muxtar Respublikası Ali Məclisi Sədrinin Sərəncamı ilə təsdiq edilmiş Naxçıvan Muxtar Respublikasının 95 illik yubileyinə həsr olunmuş Tədbirlər Planına əsasən Heydər Əliyev Uşaq-Gənclər Yaradıcılıq Mərkəzində “Naxçıvanımızı tanıyaq” mövzusunda keçirilən bilik yarışının II turunun seçim mərhələsi başa çatıb.
Naxçıvan Şəhər Təhsil Şöbəsi və Heydər Əliyev Uşaq-Gənclər Yaradıcılıq Mərkəzinin təşkilatçılığı ilə keçirilən yarışda Naxçıvan şəhər 3 nömrəli tam orta məktəbin “Əlincə”, 8 nömrəli tam orta məktəbin “Gəmiqaya”, 10 nömrəli tam orta məktəbin “Nuh yurdu” və Naxçıvan Qızlar Liseyinin “Araz” komandaları iştirak edib. Liseyin “Araz” komandası qalib gələrək finala vəsiqə qazanıb.
Onu da vurğulayaq ki, 6 mərhələdən ibarət olan yarış yanvar ayından başlayaraq ayda bir dəfə olmaqla, Naxçıvan şəhərindəki ümumtəhsil məktəbləri arasında keçirilməkdədir. Yarış seçim mərhələsi və final formatından ibarətdir. Seçim mərhələsi beş turdan ibarət olmaqla, 4 komanda və 20 şagirdin iştirakı ilə keçirilir. Ən yaxşı nəticə göstərən 5 komanda final mərhələsində iştirak etmək imkanı qazanır. Viktorinanın seçim mərhələsinin hər turu test, videoçarxlar formatında olmaqla, 5 mərhələ 32 sual, final mərhələsi isə 40 sualdan ibarətdir. Suallar Naxçıvanın tarixi, coğrafiyası, görkəm­li şəxsiyyətləri, tarix-mədəniyyət abidələrinə həsr edilib. Hər sual üzrə düzgün cavab 10 bal intervalında qiymətləndirilir.
Təqdim edilmiş hər bir suala 10 saniyə ərzində verilən cavab etibarlı sayılır. Bir neçə komandanın topladığı ballar eyni olarsa, vaxt baxımından suala daha tez cavab verən komanda qalib hesab edilir.
Final mərhələsində I,II, III və həvəsləndirici yerləri tutan qalib komandalar təşkilatçılar tərəfindən diplom, kubok və hədiyyələrlə mükafatlandırılacaqlar.

 Gülcamal TAHİROVA

Muxtar respublikamızda uşaqların əlverişli sosial mühitdə böyüməsi diqqətdə saxlanılır, onların təlim-tərbiyəsinin daha da təkmilləşdirilməsi istiqamətində məqsədyönlü tədbirlər həyata keçirilir. Müasir uşaq bağçaları istifadəyə verilir, uşaqların fiziki və əqli inkişafı, istedad və bacarıqlarının üzə çıxarılması, asudə vaxtlarının düzgün təşkili daim diqqət mərkəzində saxlanılır. Hərtərəfli infrastruktur yaradılmış məktəbəqədər tərbiyə müəssisələrində uşaqlar unikal şəraitdə böyüyür və məktəb həyatına hazırlanır.

Yolumuzu ötən günlərdə istifadəyə verilən Naxçıvan şəhərindəki 2 nömrəli uşaq bağçasına salırıq. Məktəbəqədər tərbiyə müəssisəsinə qədəm qoyduğumuz andan buradakı səmimi atmosfer bizdə xoş təəssüratlar yaradır. Bağçanın müdiri Şeyda Əliyeva bizi bu müəssisə ilə tanış edir. O bildirir ki, Naxçıvan Muxtar Respublikası Ali Məclisi Sədrinin böyük­­ diqqət və qayğısı nəticəsində bağçada balaca fidanların hərtərəfli inkişafı, ilkin təhsil vərdişlərinə yiyələnmələri üçün hər cür şərait yaradılıb. 200 yerlik bağça 4 mərtəbədən ibarətdir. Binada valideynlər və tibb otaqları, 2 oyun zalı, metodik kabinə, dərzi, camaşırxana, mətbəx, bufet, ərzaq anbarı, tədbirlər zalı, tərbiyəçi-metodist və digər otaqlar yerləşir. Burada oxunması zəruri olan kitablardan ibarət guşə yaradılıb. Bağçada hər birində yemək və yataq otağı, mətbəx və oyun zalı olan 3 körpələr, 2 orta, 3 böyüklər və 2 məktəbəhazırlıq qrupları vardır. Uşaqların təlim-tərbiyəsi ilə 20 müəllim, 10 dayə məşğul olur, onlara ilkin oxu və riyazi vərdişləri aşılanır, onların bədii­-estetik zövqlərinin formalaşdırılması üçün məşğələlər keçirilir. Maraq dairələrinə uyğun təşkil edilən bu məşğələ və tədbirlər körpə balalarımızın bədii-texniki, fiziki-mənəvi kamilliyini inkişaf etdirməklə yanaşı, dünyagörüşlərini də artırır.

AMEA Naxçıvan Bölməsin­də Azərbaycan ədəbiyyatının görkəm­li nümayəndəsi, yazıçı, dramaturq və ictimai xadim Cəlil Məmmədquluzadənin 150 illik yubileyinə həsr olunmuş elmi konfrans ­keçirilib.
Tədbir AMEA Naxçıvan Bölməsi, Naxçıvan Muxtar Respublikası Yazıçılar Birliyi, “Naxçıvan” və Naxçıvan Dövlət universitetləri tərəfindən birgə təşkil olunub.
Konfransda bölmənin sədri, akademik İsmayıl Hacıyev ölkə başçısı cənab İlham Əliyevin “Cəlil Məmmədquluzadənin 150 illik yubileyinin qeyd edilməsi haqqında”, eyni zamanda Naxçıvan Muxtar Respublikası Ali Məclisinin Sədri cənab Vasif Talıbovun “Cəlil Məmməd­quluzadənin 150 illik yubileyinin Naxçıvan Muxtar Respublikasında keçirilməsinə dair Tədbirlər Planı”nın təsdiq edilməsi haqqında sərəncamlarına uyğun olaraq ölkəmizdə, o cümlədən muxtar respublikada silsilə tədbirlər keçirildiyini bildirib. Alim sözügedən sərəncamları bütünlükdə Azərbaycan ədəbiyyatına verilən dəyər kimi qiymətləndirib.

Naxçıvan Muxtar Respublikasında təhsilin inkişafı prioritet məsələdir. Aparılan quruculuq işlərində məktəbə, təhsil infrastrukturunun müasirləşdirilməsinə xüsusi diqqət yetirilir. 20 ildən artıq bir dövrdə muxtar respublikada 200-dən çox məktəb binasının tikilməsinin, istər Naxçıvan şəhərində, istərsə də ən ucqar dağ və sərhəd kəndlərində eyni tədris şəraitinin yaradılmasının nəticəsidir ki, şagirdlərin təhsilə marağı artmış, ali və orta ixtisas məktəblərinə həm sənədvermə, həm də qəbulun göstəriciləri ilbəil yaxşılaşmışdır. Xüsusilə məktəblərdə elektron lövhələrin quraşdırılması, internetə çıxışı olan kompüterlərin, müasir laboratoriyaların, fənn kabinələrinin və zəngin fonda malik kitabxanaların istifadəyə verilməsi buraxılış və qəbul imtahanlarında yüksək nəticələrin qazanılmasına səbəb olmuşdur.

“Naxçıvan” Universitetinin Təhsil Nazirliyinə hamiliyə verilmiş Azərbaycan dili və ədəbiyyat, tarix, coğrafiya, informatika, xarici dil müəllimliyi və filologiya ixtisası üzrə III kurs tələbələri, həmçinin Riyaziyyat və informatika müəllimliyi ixtisasının IV kurs tələbələri ilə ­təcrübəqabağı konfrans keçirilib.
Konfransda “Naxçıvan” Universitetinin rektoru, professor İsmayıl Əliyev çıxış edərək bildirib ki, ali məktəblərdə müəllimlik ixtisaslarında təhsil alan tələbələrin pedaqoji təcrübə keçmələri onların gələcəkdəki fəaliyyətində mühüm rol oynayacaq amillərdəndir. Özünü tamamilə doğrultmuş bu prosesdə “Naxçıvan” Universiteti də həmişə fəallıq göstərir. Pedaqoji təcrübəyə cəlb olunan müəllim və tələbələrlə söhbətlər aparılır, təcrübənin keçirildiyi məktəblərlə sıx əlaqə qurulur, tələbələrin ixtisas və metodik biliklərinin təcrübi yolla artırılması diqqət mərkəzində saxlanılır. Növbəti təcrübənin də faydalı olacağına əminliyini bildirən rektor tələbələrə uğurlar arzulayıb.
Naxçıvan Muxtar Respublikasının təhsil naziri Rəhman Məmmədov çıxış edərək bildirib ki, muxtar respublikanın ali və orta ixtisas təhsili müəssisələrində gənclərin ixtisaslı kadr kimi formalaşması üçün hər cür şərait yaradılıb. “Naxçıvan” Universitetində yaradılan müasir təhsil və yüksək sosial-məişət şəraitinin nəticəsidir ki, ötən il məzunlardan 220-si ixtisas seçimi zamanı bu təhsil müəssisəsinə üstünlük verib. Həmin 220 abituriyentdən 104-ü pedaqoji profilli ixtisaslarda təhsil alır.

Azərbaycan Vətən Müharibəsi Veteranları və Şəhid Ailələrinin Naxçıvan Muxtar Respublika Təşkilatının təşkilatçılığı ilə Kəngərli rayonunun Akademik Zərifə xanım Əliyeva adına Şahtaxtı kənd tam orta məktəbində keçirilən tədbiri məktəbin direktoru, Naxçıvan Muxtar Respublikası Ali Məclisinin deputatı Etimad Məmmədov açaraq Xocalı faciəsindən 27 il ötdüyünü qeyd edib, faciənin bəşəriyyətə qarşı törədilmiş dəhşətli cinayət olduğunu vurğulayıb.
Tədbirdə çıxış edən Azərbaycan Vətən Müharibəsi Veteranları və Şəhid Ailələrinin Naxçıvan Muxtar Respublika Təşkilatının sədri Məcid Seyidov qeyd edib ki, dünya tarixinin ən qanlı soyqırımlarından biri kimi Xocalı faciəsi xalqımıza qarşı iki əsrdən çox müddət ərzində erməni millətçiləri tərəfindən davamlı olaraq həyata keçirilən etnik təmizləmə, soyqırımı siyasətinin növbəti mərhələsi, davamı idi. 1992-ci il fevralın 26-da erməni hərbi birləşmələri Xocalı şəhərində soyqırımı aktı həyata keçirib. Bu faciə zamanı 613 nəfər öldürülüb, 1000 nəfər dinc sakin aldığı güllə yarasından əlil olub. Öldürülənlərdən 106-sı qadın, 63-ü azyaşlı uşaq, 70-i qocadır. 8 ailə tamamilə məhv edilib, 25 uşaq hər iki valideynini, 130 nəfər valideynlərindən birini itirib. Faciə baş verən gecə 1275 dinc sakin girov götürülüb, onların 150-nin taleyi indi də məlum deyil.

Naxçıvan Müəllimlər İnstitutunda IV kurs İbtidai sinif müəllimliyi, Məktəbəqədər təlim və tərbiyə, V kurs Riyaziyyat və informatika müəllimliyi ixtisaslarında təhsil alan tələbələr üçün keçiriləcək pedaqoji təcrübənin başlanğıc konfransı olub. Naxçıvan Muxtar Respublikası Təhsil Nazirliyi və Naxçıvan Müəllimlər İnstitutunun birgə təşkilatçılığı ilə keçirilən konfransı giriş sözü ilə institutun rektoru, dosent Elbrus İsayev açaraq son illər ölkəmizdə təhsil sahəsində tətbiq olunan yeniliklərdən danışıb, təşkil edilən pedaqoji təcrübələrin əhəmiyyətindən bəhs edib.

Konfransda Naxçıvan Muxtar Respublikasının təhsil naziri Rəhman Məmmədov çıxış edərək bildirib ki, Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 2015-ci il 27 iyul tarixli Sərəncamının icrası daim diqqətdə saxlanılır. Ötən müddət ərzində bu istiqamətdə görülən tədbirlər nəticəsində muxtar respublikadakı ali və orta ixtisas təhsili müəssisələrində müvafiq ixtisaslarda təhsil alan tələbələrin daha yüksək səviyyədə hazırlığına, təcrübələrə yiyələnmələrinə geniş imkanlar açılıb.

AMEA Naxçıvan Bölməsi Rəyasət Heyətinin növbəti ümumi yığıncağı keçirilib.
İclası giriş sözü ilə açan bölmənin sədri, akademik İsmayıl Hacı­yev Naxçıvan Muxtar Respublikası Ali Məclisinin Sədri cənab Vasif ­Talıbovun “Görkəmli alim Nemətullah Naxçıvani irsinin öyrənilməsi və tədqiqi haqqında” 2018-ci il 29 oktyabr tarixli Sərəncamından irəli gələn vəzifələrdən danışıb.

Naxçıvan şəhərindəki “Gənclik” Mərkəzində “Naxçıvan Muxtar Respublikası – 95” devizi altında yeniyetmələr arasında intellektual oyunlar olimpiadasının Naxçıvan şəhər birinciliyi keçirilib.
Naxçıvan Muxtar Respublikası Gənclər və İdman, Təhsil nazirlikləri, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin və “Gənclərin İntellektual İnkişaf Mərkəzi” İctimai Birliyinin birgə təşkil etdiyi olimpiadanın keçirilməsində məqsəd yeniyetmələrin bilik və bacarıqlarının artırılması, dünya­görüşlərinin, zehni inkişaflarının stimullaşdırılması, asudə vaxtlarının səmərəli təşkil olunması, intellektual oyunların kütləviliyinin təmin edilməsidir.
Olimpiada çərçivəsində yarışlar “Xəmsə” milli intellektual, “Poliqon” strateji intellekt və “Vətəni tanı” intellektual oyunları üzrə vahid turnir şəklində keçirilib.
Naxçıvan şəhər 12 nömrəli tam orta məktəbin “Günnüt” komandası “Xəmsə” oyununda “Bəlli”, “Şərtli”, “Sirli” və “Fərdi” raundlarının nəticələrinə görə ən çox xal nominalı toplayaraq qalib adını qazanıb. 5 nömrəli tam orta məktəbin “Altay” komandası ikinci, 8 nömrəli tam orta məktəbin “Bozqurd” komandası isə üçüncü olublar.

AMEA Naxçıvan Bölməsinin Təbii Ehtiyatlar İnstitutunun Hidro­geologiya və mineral sular laboratoriyasının müdiri, kimya üzrə fəlsəfə doktoru, dosent Fizzə Məmmədova Rusiyanın “Akademik” Elmi-Nəşriyyat Mərkəzi və “İvanov Manacment Group” Elm-Təhsil Holdinqinə rəyçi seçilib.
Elmi nəşrlərin keyfiyyətinin yüksəldilməsi istiqamətində məhsuldar iş aparan hər iki müəssisənin Rəyasət Heyəti tərəfindən 221 nəfər arasından seçilən 23 namizəddən biri olan Fizzə Məmmədova son 5 ildə Rusiyanın nüfuzlu elmi jurnallarında dərc olunan məqalələrinin səviyyəsinə, aktuallığına və üzvü olduğu Beynəlxalq Birləşmiş Elmlər Akademiyasının təqdimatına görə sözügedən qurumlara rəyçi seçilib.
Dünyanın elmi-nəşriyyat xidmətləri sırasında aparıcı yer tutan bu akademik qurumlarda il ərzində yüzlərlə elmi konfranslar keçirilir, çoxsaylı elmi jurnallar dərc edilir, məsafəli elmi baza, onlayn kurslar və elektron kitabxanalar fəaliyyət göstərir.
Qeyd edək ki, hüquqi rəyçi statusu ilə yanaşı, azərbaycanlı alimin elmi məqalələri və kitabları həmin nəşriyyatlarda güzəştli şərtlərlə dərc olunacaq və “Science Public Library” elektron kitabxanasında sərgilənəcək.

AMEA Naxçıvan Bölməsinin
İnformasiya şöbəsi

Naxçıvan Muxtar Respublikası Ali Məclisinin Sədri cənab Vasif Talıbovun 2019-cu il 21 yanvar tarixli Sərəncamı ilə “Naxçıvan Muxtar Respublikasının 95 illik yubileyinə həsr olunmuş Tədbirlər Planı”na uyğun olaraq muxtar respublikada bu münasibətlə silsilə tədbirlər keçirilir. Həmin tədbirlərin davamı olaraq dünən muxtar respublikanın ümumtəhsil müəssisələri ilə Dövlət Bayrağı Muzeyi arasında “Naxçıvanın muxtariyyəti tarixi nailiyyətdir” mövzusunda ­interaktiv dərs təşkil edilib.
İnteraktiv dərsdə AMEA-nın müxbir üzvü Fəxrəddin Səfərli bildirib ki, Azərbaycanın və Şərqin ən qədim diyarlarından biri, çox­əsrlik dövlətçilik ənənələri ilə həmişə xalqımızın zəngin mədəni irsini layiqincə yaşadan, görkəmli elm xadimləri, sənətkarlar, tarixi şəxsiyyətlər yetişdirən, ölkəmizin sosial-iqtisadi, ictimai­­-siyasi həyatında əvəzsiz rol oynayan Naxçıvan Muxtar Respublikasının 95 illik yubileyi tamam olur.

Naxçıvanın ilk intellektual oyunu olan “Kim? Nə? Hara?” üzrə yeniyetmələrin I Naxçıvan Muxtar Respublika birinciliyinə yekun vurulub.
Oyunun yekun nəticəsinə əsasən Şahbuz rayon Kükü kənd tam orta məktəbinin şagirdi Günel Vəliyeva qalib adını qazanıb. Siyavuş Bağırov ikinci, Eltun Məmmədov üçüncü olub.
Qaliblərə diplom, fəxri fərman və hədiyyələri Naxçıvan Muxtar Respublikasının gənclər və idman naziri Azad Cabbarov və Naxçıvan Muxtar Respublikası Dövlət Televiziya və Radio Verilişləri Komitəsinin sədri Sahil Tahirli təqdim ediblər.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan Muxtar Respublikası Ali Məclisinin Sədri cənab Vasif Talıbovun 2019-cu il 21 yanvar tarixli Sərəncamla təsdiq etdiyi “Naxçıvan Muxtar Respublikasının 95 illik yubileyinə həsr olunmuş Tədbirlər Planı”na uyğun olaraq muxtar respublikanın digər təşkilatları ilə yanaşı, Təhsil Nazirliyi tərəfindən də silsilə tədbirlər həyata keçirilir. Bunlardan biri də fevral ayı ərzində ümumtəhsil məktəblərinin şagirdləri arasında təşkil olunan “Naxçıvan – mənim doğma diyarım” mövzusunda inşa yazı, rəsm və şeir müsabiqələridir.
Müsabiqə qaliblərinin mükafatlandırılması fevralın 7-də Heydər Əliyev Uşaq-Gənclər Yaradıcılıq Mərkəzində keçirilib. Tədbirdə Naxçıvan Muxtar Respublikası təhsil nazirinin müavini Heyran Əhmədova müsabiqənin əhəmiyyətindən danışaraq bildirib ki, 3 fevralda başa çatan şəhər və rayon mərhələlərinin qalibləri muxtar respublika mərhələsində iştirak etmək hüququ əldə ediblər. 5-7 fevral tarixlərdə həmin müsabiqələrin muxtar respublika mərhələsi keçirilib. İnşa yazı müsabiqəsinin muxtar respublika mərhələsində ümumtəhsil məktəblərinin IX-XI siniflərində təhsil alan və rayon (şəhər) mərhələsinin qalibi olmuş 60 şagird iştirak edib. Bədii qiraətçilərin müsabiqəsində 30 şagird istedadını sınayıb. Rəsm müsabiqəsində isə muxtar respublikanın 40 fırça həvəskarı öz ­bacarığını nümayiş etdirib.

Tarixən hər bir xalq özünün xoşbəxt gələcəyə olan ümidlərini, ilk növbədə, gənc nəsillə bağlayır. Hər bir ölkənin sosial-iqtisadi inkişafında aparıcı qüvvə hesab olunan gənclər cəmiyyətin ictimai-siyasi, ­sosial-iqtisadi və mədəni həyatında fəal iştirak edərək, əksər proseslərin mərkəzində dayanırlar. Bu gün muxtar respublikamızda da prioritet sahələrin inkişafına hesablanan siyasi istiqamətlərdən biri gənclər siyasətidir. Muxtar diyarımızda gənclərə diqqət və qayğı hər il daha da artır və bunun sayəsində uğurlu nəticələr müşahidə olunur. Doğma diyarımızın tərəqqi və inkişafı gənclərin bu torpağa bağlılığını artırır, onları cəmiyyətdə özlərini təsdiq etməyə ruhlandırır, gələcəyə böyük inamla addımlamalarına şərait yaradır. 

Bu gün gənclərimiz onlara bəslənilən ümidləri doğrultmaq üçün səylə çalışır, milli-mənəvi, maddi-mədəni dəyərlərin təbliğatçısı kimi muxtar diyarımızın dünyada tanıdılmasında fəaliyyətlərini genişləndirir, hər sahədə qazandıqları uğurlarla muxtar respublikamızın inkişafına öz töhfələrini verirlər. Azərbaycan Respublikasının Prezidenti cənab İlham Əliyevin 2019-cu il 31 yanvar tarixli Sərəncamı ilə 2 fevral – Azərbaycan Gəncləri Günü münasibətilə mədəniyyət, elm, təhsil və ictimai fəaliyyət sahəsində xüsusi fərqlənən gənclər sırasında 2019-cu il Gənclər üçün Prezident mükafatı verilən Nigar Mirzəmmədova da belə gənclərimizdəndir.

Ümumi təhsil pilləsində təhsilalanların yekun qiymətləndirilməsi (buraxılış) və ali təhsil müəssisələrinə qəbul imtahanlarında tətbiq ediləcək yeni qaydalar və modellər haqqında Azərbaycan dili, riyaziyyat, ingilis, fransız və rus dili fənləri üzrə Naxçıvan şəhərində elmi-metodik seminarlar keçirilib. 

Naxçıvan Döv­lət Texniki Kollecində bununla bağlı keçirilən plenar iclası Naxçıvan Muxtar Respublikasının təhsil naziri Rəhman Məmmədov açaraq bildirib ki, bu gün muxtar respublikamızda təhsil və ixtisaslı mütəxəssis hazırlığı dövlət siyasətinin prioritet istiqamətlərindən birini təşkil edir. Bunun nəticəsidir ki, təhsilin keyfiyyəti hər il yüksəlir, ali təhsil müəssisələrinə tələbə qəbulunun keyfiyyət göstəricilərində davamlı artım dinamikası müşahidə edilir.
Qeyd olunub ki, bu ildən etibarən təhsil pillələrinin bütün səviyyələrini əhatə edən yeni qiymətləndirmə mexanizmlərinin tətbiqinə başlanılıb. Cari tədris ilində XI sinfi bitirən şagirdlər yeni məzmun əsasında ümumi təhsili başa vuran ilk məzunlar olacaqlar. Bu səbəbdən də onların buraxılış imtahanlarının yeni formatda təşkili ilə bağlı yeni qaydalar hazırlanıb. Yeni imtahan modeli məktəbin və müəllimin həm məsuliyyətinin, həm də nüfuzunun artmasına, eyni zamanda şagirdlərin biliklərinin hərtərəfli qiymətləndirilməsinə əhəmiyyətli şəkildə təsir edəcəkdir.
Vurğulanıb ki, bu gün keçirilən elmi-metodik seminarlarda əsas məqsəd yeni qaydalar və modellər haqqında məlumat verməkdir.