Naxçıvan Dövlət Texniki Kollecində “Naxçıvan Dəmir Yolları” Məhdud Məsuliyyətli Cəmiyyətinə hamiliyə verilmiş Nəqliyyatda daşımaların təşkili ixtisası üzrə təhsil alan tələbələrlə görüş keçirilib.
Tədbiri giriş sözü ilə kollecin direktoru Asəf Ruşanov açaraq muxtar respublikada yol-nəqliyyat infra­strukturunun genişləndirilməsi istiqamətində görülən işlərdən, nəqliyyat sektorunun inkişafının təmin olunması sahəsində həyata keçirilən tədbirlərdən, dəmir yolu nəqliyyatında daşınmaların günün tələbləri səviyyəsində reallaşdırılmasında ixtisaslı kadrların rolundan danışıb. Qeyd edib ki, Naxçıvan bu gün blokada şəraitində yaşayır. Lakin blokadanın yaratdığı çətinliklərə baxmayaraq, muxtar respublikada dəmir yolu nəqliyyatının inkişafına xüsusi diqqət yetirilir, bu sahə daim işlək vəziy­yətdə saxlanılır. Naxçıvanın işğalçı ölkə ilə sərhəddə yerləşməsi dəmir yolu nəqliyyatının inkişafını zəruri edir. Bu gün muxtar respublikada daxili yük və sərnişin daşınmalarının həyata keçirilməsində dəmir yolunun imkanlarından geniş istifadə olunur.
“Naxçıvan Dəmir Yolları” Məhdud Məsuliyyətli Cəmiyyətinin direktoru Mahir Əliyev çıxış edərək Naxçıvan Muxtar Respublikası Ali Məclisinin Sədri cənab Vasif Talıbovun diqqət və qayğısı ilə cəmiyyətin fəaliyyəti üçün müasir iş şəraitinin yaradıldığını, vağzal binalarının, stansiyaların idarəetmə mərkəzlərinin, digər inzibati və yardımçı binaların əsaslı təmir olunduğunu diqqətə çatdırıb.

Gürcüstanın Akaki Tsereteli Universitetinin koordinatorluğu ilə reallaşdırılan AESOP layihəsinin növbəti təlimi Portuqaliyanın Braqa şəhərində yerləşən Minho Universitetində keçirilib.
Tədbirdə layihə tərəfdaşı kimi iştirak edən “Naxçıvan” Universitetini bu ali təhsil ocağının tədris şöbəsinin müdiri Anar Abuzərli, Beynəlxalq əlaqələr şöbəsinin müdiri Rəcəb Cəfərli, layihə koordinatoru Elmira Hüseynova və Xarici dillər kafedrasının müdiri Anara Nəsirli təmsil ediblər. Azərbaycan, Ukrayna və Gürcüstandan nümayəndələrin də iştirak etdiyi təlimin keçirilməsində məqsəd universitet­lərdə ombudsman aparatlarının funksiya və strukturunun nəzəri və praktik cəhətdən öyrənilməsindən ibarət olub.
Təlimdə Tələbə Ombudsman Aparatının rəhbəri Paula Cristina Martius iştirakçıları salamlayıb və bu tədbirin mahiyyəti haqqında geniş məlumat verib. Sonra təlim əvvəlcədən müəyyənləşdirilmiş proqram üzrə davam etdirilib.

Nuray ƏSGƏROVA

Naxçıvan Muxtar Respublikası Ali Məclisi Sədrinin Naxçıvan Dövlət Universitetinin 50 illik yubileyinin keçirilməsi haqqında 14 yanvar 2017-ci il tarixdə imzaladığı Sərəncama uyğun keçirilən yubiley tədbirlərinin növbəti ünvanı Kəngərli rayonu olub.
Yubiley tədbirində çıxış edən tərbiyə işləri üzrə prorektor, dosent Şamxal Məmmədov Naxçıvan Dövlət Universitetinin tarixi inkişaf yoluna nəzər salaraq bildirib ki, ali təhsil ocağında geniş bilik və dünyagörüşü qazanmaq, bacarıq və qabiliyyətləri inkişaf etdirmək, asudə vaxtı maraqlı və mənalı keçirmək üçün hər cür şərait və böyük imkanlar vardır. Prorektor Naxçıvan Dövlət Universitetinin 2014-cü ildə 799 balla, 2017-ci ildə isə 827 balla Azərbaycan Respublikasının ali məktəblərinin reytinq cədvəli üzrə birinci yerə layiq görülməsini bu universitetin artan nüfuzunun göstəricisi kimi qiymətləndirib.

Anadan olmasının 80, əmək fəaliyyətinin isə 60 illiyi tamam olan Sübhi Kəngərli mədəniyyət sahəsində 50 il səmərəli fəaliyyət göstərmiş ağsaqqal və tanınmış ziyalılarımızdandır.

1966-cı ildə Cəlil Məmmədquluzadə adına Naxçıvan Muxtar Respublika Ədəbiyyat Muzeyində elmi işçi kimi fəaliyyətə başlamış Sübhi Kəngərli muzeyin ilk yaradıcılarından biri olmuşdur. Muxtar respublikanın mədəni həyatında böyük yeri olan görkəmli ədəbiyyatşünas-alim və yaradıcıların daim əlaqə saxladığı bu mədəniyyət ocağının gündən-günə zənginləşməsində Sübhi müəllim böyük xidmətlər göstərmişdir.
Sübhi Kəngərli 1975-1980-ci illərdə Azərbaycan Milli Elmlər Akademiyasının Fəlsəfə və Hüquq İnstitutunun “Etika və Estetika” üzrə qiyabi aspiranturasını bitirmiş, “Şəxsiyyətin ideya-estetik inkişafında mədəniyyət müəssisələrinin rolu” (Naxçıvan materialları əsasında) mövzusunda elmi-tədqiqat işi yazmışdır.
Sübhi müəllimin mədəniyyət sahəsindəki fəaliyyəti rəngarəng olmuşdur. 1969-1972-ci illərdə Cəlil Məmmədquluzadə adına Naxçıvan Dövlət Musiqili Dram Teatrının direktoru, sonralar Məmməd Səid Ordubadi adına Naxçıvan Muxtar Respublika Kitabxanasında elmi iş üzrə direktor müavini vəzifələrində işləmişdir. O, harada işləməsindən asılı olmayaraq, özünə qarşı tələbkar olmuş, tapşırılan vəzifələri vicdanla yerinə yetirməyə səy göstərmiş və bunu başqalarından da tələb etmişdir.

50 yaşı tamam olan, bu illər ərzində özünəməxsus tarixi inkişaf yolu keçən Naxçıvan Dövlət Universitetinin Azərbaycanda elm və təhsilin inkişafında, eləcə də kadr potensialının formalaşmasında xüsusi rolu vardır. Naxçıvan Muxtar Respublikası Ali Məclisi Sədrinin diqqət və qayğısı sayəsində bu ali təhsil ocağının ölkədə və beynəlxalq aləmdə nüfuzu daha da artmaqdadır. 

Böyük Britaniyanın dünyada məşhur olan Kembric Universitetinin bu ali məktəbi dostluq və əməkdaşlıq üçün seçməsi, ənənəyə uyğun olaraq ali məktəblər haqqında hər il nəşr etdirdiyi “Mükəmməlliyə bələdçi. Qlobal təhsil və imkanlar” seriyasından olan bələdçi kitabında Naxçıvan Dövlət Universitetinə yer ayrılması universitetin beynəlxalq nüfuzunun göstəricisi olmaqla yanaşı, həm də, bütövlükdə, Azərbaycan ali məktəbinin əhəmiyyətli uğurlarından biri hesab oluna bilər. Həmin jurnalın 2013-cü il nəşrində 44 ölkədən 183 təhsil müəssisəsi sırasında Azərbaycandan ilk dəfə məhz əsas elm və ali təhsil mərkəzi olan Naxçıvan Dövlət Universiteti və onun əldə etdiyi uğurlar haqqında məqalə verilmişdir. 2014-cü və 2017-ci illərdə Azərbaycan Respublikası Təhsil Nazirliyinin sifarişi ilə anonim qaydada Azərbaycan ali təhsil müəssisələri arasında keçirilən reytinq sıralamasında Naxçıvan Dövlət Universitetinin birinci yerə layiq görülməsi də mühüm nailiyyətdir.

“Naxçıvan” Universitetində 2016-2017-ci tədris ilində Tələbə Elmi Cəmiyyətinin xətti ilə yerinə yetirilmiş elmi-tədqiqat işlərinin yekununa həsr olunmuş konfrans keçirilib.
Plenar iclası giriş sözü ilə universitetin rektoru, professor İsmayıl Əliyev açaraq qeyd edib ki, Tələbə Elmi Cəmiyyətinin əsas məqsədi ali təhsilli mütəxəssislərin hazırlanmasının keyfiyyətinin yüksəldilməsinə yönəldilmiş elmi-təşkilati tədbirlərin həyata keçirilməsi, elmi-texniki potensialın qorunub saxlanılması və təhsil alanların elmi-tədqiqat fəaliyyətinin yeni sosial-iqtisadi şəraitə uyğunlaşdırılmasında ali təhsil müəssisələrinin işinə kömək etməkdən ibarətdir.
Rektor onu da vurğulayıb ki, Tələbə Elmi Cəmiyyəti sabahın gənc tədqiqatçılarının həqiqi axtarış və yaradıcılıq məktəbidir. Eyni zamanda bu cəmiyyət istedadlı və bacarıqlı tələbələrin üzə çıxarılmasında mühüm rol oynayır. Bu elmi arena tələbələrin nə qədər bilikli, bacarıqlı, elmə bağlı olmalarını nümayiş etdirmələri baxımından önəmlidir.
Konfransda ali təhsil ocağının Mühasibat uçotu və audit ixtisası üzrə IV kurs tələbəsi Günay Babayevanın “Elektron vergi xidmətləri”, İqtisadiyyat ixtisasının I kurs tələbəsi Aydan Nabatovanın “Tələb və təklif”, Riyaziyyat və informatika müəllimliyi ixtisasının III kurs tələbəsi Türqanə Nəbiyevanın “Sosial şəbəkə xidmətləri” və Xarici dil müəllimliyi ixtisasının III kurs tələbəsi Jalə Məmmədovanın “Leaar­ners differences” mövzularında hazır­ladıqları elmi-tədqiqat işləri konfrans iştirakçıları tərəfindən maraqla qarşılanıb.
Konfrans öz işini “Pedaqogika və psixologiya”, “Azərbaycan dili və ədəbiyyat”, “İqtisadiyyat”, “Ümumi tarix”, “Təbiət elmləri”, “İdarəetmə”, “Xarici dillər”, “Beynəlxalq münasibətlər”, “Riyaziyyat və informatika” bölmələri üzrə davam etdirib.

Nuray ƏSGƏROVA

Babək Rayon Mədəniyyət Evində Naxçıvan Muxtar Respublikası Ali Məclisinin Sədri yanında Gənc­lər Fondu, Naxçıvan Muxtar Respublikası Gənclər və İdman və Təhsil nazirlikləri, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyi və Naxçıvan Muxtar Respublikası “Gənclərin İntellektual İnkişaf Mərkəzi” İctimai Birliyinin birgə təşkilatçılığı ilə yeniyetmələr arasında “Nuh yurdu” intellektual oyununun rayon birinci­liyi keçirilib.
Açılış mərasimində çıxış edən Gənclər və İdman Nazirliyi Aparatının Gənclərlə iş şöbəsinin müdiri Nicat Babayev və rayon Gənclər və İdman İdarəsinin rəisi Nazim Salmanlı oyunun keçirilməsi məqsədi haqqında geniş məlumat veriblər.
Bildirilib ki, məqsəd yeniyetmələrin intellektual səviyyəsini, dünyagörüşünü, zehni inkişafını stimullaşdırmaq, onlar arasında bilik və elmin nüfuzunu artırmaq, eləcə də asudə vaxtlarını səmərəli təşkil etməkdən ibarətdir.
Səkkiz komandanın iştirak etdiyi oyun yarımfinal və final mərhələsindən ibarət olub.
Yekunda Babək qəsəbə 1 nömrəli tam orta məktəbin “Odlar yurdu” komandası daha yüksək nəticə göstərərək qalib adını qazanıb. Kərimbəyli kənd tam orta məktəbinin “Zəka” komandası ikinci, Şıxmahmud kənd tam orta məktəbinin “Qarabağ” komandası isə üçüncü olub.
Qaliblərə təşkilatçıların fəxri fərman, diplom, kubok və bilik kitabçaları təqdim olunub.

Ceyhun Məmmədov

Tədbiri AMEA Naxçıvan Bölməsinin sədri, akademik İsmayıl Hacıyev açaraq iştirakçıları gündə­likdəki məsələlərlə tanış edib.
Sonra bölmənin Bioresurslar İnstitutunun Torpaq ehtiyatları laboratoriyasının rəhbəri, dosent Sahib Hacı­yevin “Naxçıvan Muxtar Respublikası torpaqlarının tədqiqi və mədəni-təbii bitkilərə yararlı torpaqların qiymətləndirilməsi” mövzusunda elmi məruzəsi dinlənilib. Sahib Hacı­yev ölkədə aqrar sektoru inkişaf etdirmək məqsədilə irimiqyaslı dövlət proqramlarının həyata keçirildiyini, bir sıra vacib dövlət sənədlərinin imzalandığını deyib.
Bildirib ki, aqrar sektorun inkişafında əsaslı rol oynayan torpaq ehtiyatlarından səmərəli istifadə etmək üçün yeni metodların köməyi ilə regionun torpaqları elmi əsaslarla öyrənilməyə başlanılıb. Tədqiqat işi Naxçıvan Muxtar Respublikası ərazisində 550 min 275 hektar sahəni əhatə edib və əkinəyararlı 162 min 391 hektar sahədə yem, taxıl, üzüm və tərəvəzaltı torpaqlar götürülüb. Torpaqların öyrənilməsi məqsədilə müəyyən edilən istiqamətlər üzrə 150-dən çox ekspedisiyaya gedilib.

Naxçıvan Muxtar Respublikası Təhsil Nazirliyi və Naxçıvan Muxtar Respublikası İnternet və Yeni Texnologiyaların Tədrisi Mərkəzinin birgə təşkilatçılığı ilə muxtar respublika üzrə ümumtəhsil məktəblərinin şagirdləri arasında kompüter bilikləri müsabiqəsi keçirilib.
Ümummilli liderimiz Heydər Əliyevin anadan olmasının 94-cü ildönümü ilə əlaqədar İnternet və Yeni Texnologiyaların Tədrisi Mərkəzində keçirilən müsabiqədə muxtar respublikanın şəhər və rayon məktəbləri üzrə 16 şagird iştirak edib.
Əvvəlcə mərkəzin direktoru Vüqar Rəsulov, direktor müavini Nəriman Sadıxov və Təhsil Nazirliyinin əməkdaşı Anar Mirzəyev müsabiqənin məqsəd və vəzifələrindən danışıblar. Çıxışlarda bildirilib ki, müsabiqənin təşkilində əsas məqsəd uşaq və gənclərin informasiya-kommunikasiya texnologiyalarına marağının və biliklərinin artırılması, onların istedadlarının aşkara çıxarılması, asudə vaxtlarının səmərəli təşkilindən ibarətdir.
Müsabiqədə şagirdlərə “Windows”, “Word”, “Excel” proqramları və internet şəbəkəsinə dair test sualları təqdim olunub.
Sonda münsiflər tərəfindən müsabiqənin qalibləri müəyyənləşdirilib. Beləliklə, I yerə Culfa rayon Yaycı kənd 1 nömrəli tam orta məktəbin 10-cu sinif şagirdi Elgün Hüseynli, II yerə Naxçıvan şəhər 11 nömrəli tam orta məktəbin 7-ci sinif şagirdi Cavid Əliyev, III yerə isə Naxçıvan şəhər 1 nömrəli tam orta məktəbin 9-cu sinif şagirdi Rəbbi Səfərli və Ordubad rayon internat məktəbinin 11-ci sinif şagirdi Hüseyn Abdullabəyli layiq görülüblər. Qaliblər diplom, fəxri fərman və qiymətli hədiyyələrlə mükafatlandırılıb.
Müsabiqədə həvəsləndirici yerləri tutan şagirdlərə isə genişzolaqlı internet kartları hədiyyə olunub.

Gülcamal TAHİROVA

Hər iki təhsil müəssisəsinə qəbul imtahanları mayın 21-də “İstedad-XXI əsr” kursları tərəfindən Naxçıvan Dövlət Texniki Kollecinin inzibati binasında keçirilib. Test formasında, mərkəzləşmiş qaydada keçirilən imtahanlarda hər bir iştirakçıya 100 sual təqdim olunub, sualların cavablandırılmasına 2 saat 30 dəqiqə vaxt ayrılıb.
Nəticələr imtahan keçirildikdən 3 gün sonra www.istedad21.com internet saytında açıqlanacaq. Hər iki liseyə daxil olmaq üçün sənəd verən və imtahanda yüksək nəticə göstərən ilk 60 nəfər məktəbin şagirdləri sırasına qəbul ediləcəkdir.
Qeyd edək ki, 2017-2018-ci tədris ili üçün Naxçıvan Qızlar Liseyi və Şərur Şəhər Fizika-Riyaziyyat Təmayüllü Liseyə sənəd qəbulu hər iki təhsil ocağında bu il aprelin 1-dən mayın 5-dək aparılıb. Muxtar respublikanın şəhər və rayonlarından bu müəssisələrdə təhsilini davam etdirmək istəyən cari ildə VI sinifdə oxuyan 379 oğlan şagird Şərur Şəhər Fizika-Riyaziyyat Təmayüllü Liseyə, IV sinifdə oxuyan 159 qız şagird isə Naxçıvan Qızlar Liseyinə sənədlərini təqdim ediblər.

Xəbərlər şöbəsi

AMEA Naxçıvan Bölməsinin Bioresurslar İnstitutunda 22 may – Beynəlxalq Biomüxtəliflik Günü ilə əlaqədar elmi konfrans keçirilib.
Naxçıvan Ekologiya və Təbii Sərvətlər Nazirliyi, Naxçıvan Dövlət Universitetinin Təbiətşünaslıq və kənd təsərrüfatı fakültəsi ilə birgə keçirilən tədbiri bölmənin Bioresurslar İnstitutunun direktoru, akademik Tariyel Talıbov açıb. Akademik biomüxtəlifliyin mövcud vəziyyəti barədə danışıb, ölkədə bioloji müxtəlifliyin qorunması istiqamətində görülən işlərdən, həyata keçirilən tədbirlərdən, bölmənin Bioresurslar İnstitutunun apardığı tədqiqatlardan ətraflı bəhs edib.
Sonra institutun Meyvə, tərəvəz və üzümçülük laboratoriyasının rəhbəri, dosent Varis Quliyevin “Naxçıvan Muxtar Respublikasının meyvə və giləmeyvə bitkilərinin biomüxtəlifliyinin ərzaq təhlükəsizliyinin təminatında rolu”, Ekologiya və Təbii Sərvətlər Nazirliyinin şöbə müdiri Şövqi Əliyevin “Naxçıvan Muxtar Respublikasında biomüxtəlifliyin qorunması”, Naxçıvan Dövlət Universitetinin Təbiətşünaslıq və kənd təsərrüfatı fakültəsinin dekan müavini, dosent Hilal Qasımovun “Naxçıvan Muxtar Respublikasının biomüxtəlifliyində yabanı tərəvəz bitkilərinin rolu” mövzusunda məruzələri dinlənilib.
Daha sonra Bioresurslar İnstitutunun Bitki sistematikası şöbəsinin müdiri, professor Əliyar İbrahimov, dosent İsmayıl Məmmədov, dosent Ənvər İbrahimov, Zooloji tədqiqatlar şöbəsinin müdiri, dosent Akif Bayramov və Torpaq ehtiyatları laboratoriyasının müdiri Sahib Hacıyev çıxış edərək Naxçıvan Muxtar Respublikasında biomüxtəlifliyin qorunması istiqamətində görülən işlərdən söz açıblar.

AMEA Naxçıvan Bölməsinin İnformasiya şöbəsi

Gənc müəllimlər bu adı həmişə uca tuturlar

Hər bir ölkənin inkişafı, müstəqilliyinin möhkəmləndirilməsi və  dövlətçiliyinin gücləndirilməsi birbaşa gələcəyin etibarlı təminatı olan kadr hazırlığından asılıdır. Məhz buna görə də bu gün Azərbaycanda gənc kadrların hazırlanmasına, onların işlə təmin olunmasına xüsusi diqqət yetirilir. 

Ulu öndər Heydər Əliyev həmişə gənc nəslə böyük ümidlər bəsləyib, gənclərlə görüşlərində, mötəbər tədbirlərdəki çıxışlarında bildirib ki, Azərbaycanın gələcəyi olan gənc­lərin hərtərəfli yetişdirilməsi, təhsil alması ən vacib və zəruri məsələlər sırasındadır. Bu işdə təhsil ocaqlarının və müəllimlərin də üzərinə böyük vəzifələr düşür. Ulu öndər Heydər Əliyev çıxışlarında bu peşə sahiblərinə daim yüksək qiymət verib. O deyib: “Mən dünyada müəllimdən yüksək ad tanımıram. Bizim hər birimiz elmi dərəcəmizdən, biliyimizdən, təhsil səviyyəmizdən asılı olmayaraq bütün nailiyyətlərimizə görə məktəbə, müəllimə borcluyuq”.
Müəllimlər şagirdlərin dərin və hərtərəfli təhsil almaları, yaşadıqları dövrün problemlərindən baş çıxarmaları üçün bütün bilik və bacarıqlarını sərf edirlər. Valideynlə bərabər, bəlkə də, ondan daha çox, uşağın hər cür şıltaqlığına, əziyyətinə dözmək, kədəri ilə kədərlənib, sevinci ilə sevinmək müəllimlərin üzərinə düşən böyük məsuliyyətdir. Müəllim hər bir hərəkəti ilə örnək təşkil edir, onun biliyi, təcrübəsi şagirdin yaxşı təhsil almasında əsaslı rol oynayır. Belə müəllimlərdən biri də Sədərək kənd 1 nömrəli tam orta məktəbin tarix müəllimi Vurğun Əsgərlidir.
Vurğun Əsgərli 1995-ci ildə Şərur rayonunun Çərçiboğan kəndində dünyaya göz açıb. O, orta məktəbdə təhsil aldığı müddətdə şagirdlər arasında seçilib, keçirilən müxtəlif olimpiadalarda, viktorinalarda, digər bilik yarışmalarında iştirak edərək yaxşı nəticələr qazanıb. Ali məktəblərə qəbul imtahanında Vurğun 500-dən yuxarı bal toplayaraq Bakı Dövlət Universitetinə qəbul olunub. İmtahanda yüksək nəticə göstərdiyinə görə Naxçıvan Muxtar Respublikası Ali Məclisinin Sədri cənab Vasif Talıbov tərəfindən ­mükafatlandırılıb.

Ali məktəblərdə tədrisin keyfiyyətini qiymətləndirmək məqsədi ilə aparılan milli reytinq tədqiqatlarının nəticələrinə əsasən Naxçıvan Dövlət Universiteti aparılmış tədqiqatlar nəticəsində hazırlanmış reytinqdə ali məktəblərin 2015-2016-cı ilin göstəricilərinə əsasən 827 balla Azərbaycanda fəaliyyət göstərən 19 dövlət, 9 qeyri-dövlət ali təhsil müəssisəsi arasında birinci yerə layiq görülüb. 

Mayın 20-də Naxçıvan Dövlət Universitetində bu münasibətlə tədbir keçirilib.                  

Tədbirdə Naxçıvan Dövlət Universitetinin rektoru, Azərbaycan Milli Elmlər Akademiyasının müxbir üzvü Saleh Məhərrəmov çıxış edərək qeyd edib ki, Naxçıvan Dövlət Univeristeti Azərbaycanın ali təhsil ailəsinin öndə gedən üzvlərindən biridir. Azərbaycanda ən böyük universitet şəhərciyi olan bu ali təhsil ocağının 108 hektarlıq ərazisində yeni tikilmiş, ən son texnoloji avadanlıqlarla təchiz olunmuş və yüksək maddi-texniki bazaya malik 16 tədris korpusu fəaliyyət göstərir. 82-dən çox dünya universiteti ilə elm və təhsil sahəsində əməkdaşlıq müqaviləsi olan universitet 2011-ci ildən “Erasmus Mundus” və “Erasmus Humeria” layihələrinə qoşulub. Naxçıvan Dövlət Universiteti həmçinin 7 Tempus layihəsinin də iştirakçısıdır. 

Naxçıvan Muxtar Respublikası Ali Məclisi Sədrinin 2015-ci il 27 iyul tarixli “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamına uyğun olaraq, dünən Naxçıvan Muxtar Respublikası Ədliyyə Nazirliyində Naxçıvan Dövlət Universitetinin Sosial idarəetmə və hüquq fakültəsinin hüquqşünaslıq, dövlət və bələdiyyə idarəetməsi ixtisaslarında təhsil alan II və III kurs tələbələri ilə görüş ­keçirilib.
Tədbirdə çıxış edən Naxçıvan Muxtar Respublikasının ədliyyə naziri, II dərəcəli dövlət ədliyyə müşaviri Suliddin Əliyev bildirib ki, sərəncamdan irəli gələn vəzifələrin icrası məqsədilə nazirliyin və Naxçıvan Dövlət Universitetinin 8 oktyabr 2015-ci il tarixli birgə tədbirlər planı təsdiq edilib, universitetin nazirliyin hamiliyinə verilmiş müvafiq ixtisaslarının tələbələri ilə müxtəlif tədbirlər həyata keçirilib.
Qeyd olunub ki, nazirlik hər il öz iş planına tələbələrin hamiliyi ilə bağlı bənd daxil edir və tələbələrlə görüşlər keçirilir.
Diqqətə çatdırılıb ki, nazirlikdə və Məhkəmə Ekspertiza Mərkəzində olan tələbələr nazirliyin şöbə və bölmələrinin işi ilə maraqlanıb, Məhkəmə Ekspertiza Mərkəzinin müvafiq laboratoriyalarında ekspertiza işlərinin aparılmasında yaxından iştirak ediblər. Həmçinin Naxçıvan Şəhər Bələdiyyəsi və nazirliyin Penitensiar Xidmətində hər iki müəssisənin iş prinsipi ilə tanış olublar.

AMEA Naxçıvan Bölməsinin İncəsənət, Dil və Ədəbiyyat İnstitutunun direktoru, AMEA-nın müxbir üzvü Əbülfəz Quliyev və filologiya üzrə fəlsəfə doktoru Samirə Həsən­ovanın həmmüəllifi olduqları “Məhəmməd ağa Şahtaxtlı: görkəmli dilçi və naşir” adlı monoqrafiya işıq üzü görüb.
AMEA Naxçıvan Bölməsinin Rəyasət Heyətinin qərarı ilə nəşr olunan mono­qrafiyada görkəmli maarifçi-ədib və naşir Məhəmməd ağa Şahtaxtlının dilçilik irsi araşdırılır. Həmçinin əsərdə Məhəmməd ağa Şahtaxtlının ana dili məsələləri, o cümlədən əlifba, terminologiya, tərcümə, ana dilinin saflığı, dil tədrisi haqqında düşüncə və görüşləri o dövrün mətbuat orqanlarının materialları əsasında ətraflı şəkildə təhlil və tədqiq olunur.
Qeyd edək ki, Naxçıvan Muxtar Respublikası Ali Məclisinin Sədri 2006-cı il 27 fevral tarixdə “Məhəmməd ağa Şahtaxtlının anadan olmasının 160 illiyinin qeyd olunması və xatirəsinin əbədiləşdirilməsi haqqında” Sərəncam imzalayıb. Sərəncamdan irəli gələn vəzifələrin icrası ilə əlaqədar Naxçıvan şəhərindəki Kitab evinə görkəmli maarifçi-publisistin adı verilib, onun xatirəsi əbədiləşdirilib. Həmçinin Azərbaycan elmində, təhsilində, dövlət quruculuğunda, diplomatiyada, mətbuat tarixində böyük xidmətləri olan Şahtaxtinskilərin ayrı-ayrı nümayəndələri barədə araşdırmalar aparılıb, onların həyatları arxiv materialları əsasında öyrənilib və bir sıra kitab, monoqrafiya, məqalələr yazılaraq geniş ictimaiyyətə təqdim edilib.
“Məhəmməd ağa Şahtaxtlı: görkəmli dilçi və naşir” monoqrafiyası da məhz bu sərəncamın icrası istiqamətində həyata keçirilən növbəti tədbirlərdən biridir.

AMEA Naxçıvan Bölməsinin İnformasiya şöbəsi

Bu mövzuda Naxçıvan Muxtar Respublikası Rabitə və Yeni Texnologiyalar Nazirliyinin və “Naxçıvan” Universitetinin birgə təşkilatçılığı ilə elmi-praktik konfrans keçirilib. Ali təhsil ocağındakı bu tədbiri giriş sözü ilə universitetin tədris işləri üzrə prorektoru, tarix üzrə fəlsəfə doktoru, dosent İbrahim Kazımbəyli açıb.
Tədbirdə universitetin Riyaziyyat və informatika kafedrasının müdiri Məftun Əliyevin “İnternet şəbəkəsinin müasir cəmiyyətdə yaratdığı yeni reallıqlar”, həmin kafedranın müəllimi Şamil Hümbətovun “İnformasiya texnologiyalarının telekommunikasiya şəbəkələrinə konvengensiyası”, Rabitə və Yeni Texnologiyalar Nazirliyinin əməkdaşı Hüseyn Əsgərovun “Peyk rabitəsinin imkanları”, Riyaziyyat və informatika müəllimliyi ixtisasının III kurs tələbəsi Turqanə Nuri­yevanın “İnternetin günümüzdə fayda və ziyanları” mövzularında çıxışları dinlənilib.
Çıxışlarda bildirilib ki, müasir dövrdə informasiya-kommunikasiya texnologiyaları cəmiyyətin inkişafına təsir göstərən əsas amillərdən birinə çevrilib. Onun əhatə dairəsi dövlət strukturlarını və vətəndaş cəmiyyəti institutlarını, təhsili, mədəniyyəti və demək olar ki, həyatın bütün sahələrini əhatə edib. Bir çox inkişaf etmiş və inkişaf etməkdə olan ölkələr informasiya-kommunikasiya texnologiyalarının (İKT) yaratdığı üstünlüklərdən faydalanır və nəticədə, iqtisadi sahədə böyük uğurlara imza atırlar.
Vurğulanıb ki, İKT-nin inkişaf etdirilməsi hər bir ölkənin intellektual və elmi potensialının vacib göstəricilərindən biridir. Bu prosesin zəruriliyi müasir dövrdə daha çox hiss olunur. Yeni texnologiyaların sürətli inkişafı və yayılması bəşəriyyətin inkişafı üçün geniş imkanlar açır. Ölkəmizdə də informasiya cəmiyyətinin qurulması və kompüterləşmə sahəsində uğurlu addımlar atılıb. Məhz bu səbəbdən də son illər təhsil sistemində İKT infra­strukturunun inkişaf etdirilməsi və təhsildə İKT-nin tətbiqinin dünya standartları səviyyəsinə çatdırılması ölkəmizdə prioritet istiqamətlərdən birinə çevrilib.
Sonda tələbələri maraqlandıran suallar cavablandırılıb.

Nuray ƏSGƏROVA

Füsunkar gözəlliyi ilə gözoxşayan Şahbuz rayonu həm də özünün təhsil ənənələri, səsi-sorağı ölkəmizin müxtəlif elm ocaqlarından, tədris müəssisələrindən gələn elm adamları ilə tanınır. Davamlı dövlət qayğısı hər il rayonda təhsil sahəsində yeni uğurlar qazanılmasına şərait yaradıb. Bölgədə 23 tam orta məktəb və 6 məktəbdənkənar təhsil müəssisəsi fəaliyyət göstərir. Dövlətimizin təhsil işçiləri qarşısında qoyduğu vəzifələrin yerinə yetirilməsində səy və bacarığını səfərbər edən təhsil ocaqlarından biri Şahbuz şəhər 1 nömrəli tam orta məktəbdir. 

Bu təhsil ocağı 1930-cu ildə ibtidai məktəb kimi fəaliyyətə başlayıb. Bir qədər sonra 7 illik məktəbə, 1954-1955-ci tədris ilindən isə orta məktəbə çevrilib. Fəaliyyət göstərdiyi dövrdə xeyli uğurlara imza atıb. Qürurvericidir ki, orta təhsillərini bu məktəbdə almış Arif Həşimli Azərbaycan Milli Elmlər Akademiyasının həqiqi üzvüdür. Əyyub Quliyev Azərbaycan Milli Elmlər Akademiyasının müxbir üzvü, 5 elmlər doktoru, professor, 20-yə yaxın fəlsəfə doktoru hazırda ölkəmizin müxtəlif ali məktəblərində fəaliyyət göstərirlər. Bu gün adıçəkilən təhsil ocağında onların ardıcılları yetişdirilir. Pedaqoji kollektiv çalışır ki, cəmiyyətə intellektual səviyyəli, həm də vətənpərvər gənclər yetişdirilməsinə nail olsun. Bu vəzifənin öhdəsindən gəlmək üçün məktəbdə hərtərəfli şərait var. Belə ki, 2007-ci ildə yeni məktəb binası tikilib, 15 kompüterdən ibarət kompüter sinfi, 3 laboratoriya, 1 kitabxana, idman zalı, 4 elektron lövhə müəllim və şagirdlərin istifadəsinə verilib. Məktəbin açılış mərasimində: “Bu gün tikilib istifadəyə verilən məktəb gələcəyin qapısıdır. İndi biz öz gələcəyimizin açılışını edirik. Biz bu gün belə bir məktəb istifadəyə veririksə, müəyyən nailiyyətlər qazanırıqsa, deməli, bundan da böyük uğurlar qazanmaq üçün zəhmət çəkmək, əziyyət çəkmək, intizamlı və tələbkar olmaq lazımdır. Bütün bu prinsiplər günü-gündən yüksəlir”, – deyən Ali Məclisin Sədri bunu da diqqətə çatdırıb: “Bu ölkəni qorumaq, inkişaf etdirmək üçün onun təhsilli, vətənpərvər insanları olmalıdır”.

Naxçıvan Muxtar Respublikası Rabitə və Yeni Texnologiyalar Nazirliyində Naxçıvan Dövlət Universitetinin Memarlıq və mühəndislik fakültəsinin İnformasiya texnologiyaları və sistemləri mühəndisliyi ixtisasının III və IV kurs tələbələri ilə görüş keçirilib.

Tədbiri rabitə və yeni texnologiyalar naziri Rövşən Məmmədov açaraq bildirib ki, bu gün muxtar respublikada ali və orta ixtisas təhsili müəssisələrində təhsil alan tələbələrin yüksək intellektual səviyyəyə və praktik iş qabiliyyətinə yiyələnmələri daim diqqət mərkəzində saxlanılır. Təhsilin inkişafı, tələbələrin nəzəriyyə ilə yanaşı, təcrübi biliklərə yiyələnmələri, ən əsası isə müxtəlif sahələr üzrə peşəkar kadrların hazırlanması işində Naxçıvan Muxtar Respublikası Ali Məclisi Sədrinin 2015-ci il 27 iyul tarixli “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamı xüsusi əhəmiyyət kəsb edir.
Qeyd olunub ki, həmin sərəncamla Naxçıvan Dövlət Universitetinin, “Naxçıvan” Universitetinin, Naxçıvan Müəllimlər İnstitutunun və Naxçıvan Dövlət Texniki Kollecinin bir sıra ixtisasları Naxçıvan Muxtar Respublikası Rabitə və Yeni Texnologiyalar Nazirliyinin hamiliyinə verilib. Bununla əlaqədar müasir rabitə sistemində texnoloji yeniliklərin, poçt işinin və yeni texnologiyaların tətbiqi ilə görülən işlərin üstünlükləri praktik olaraq tələbələrə çatdırılır. Məqsəd gələcəkdə muxtar respublikada informasiya-kommunikasiya texnologiyaları sahəsində çalışacaq kadrların daha peşəkar yetişməsi, təhsil illərindən başlayaraq onların ixtisas sirlərinə dərindən yiyələnmələri, eyni zamanda bu sahənin müasir cəmiyyətdə nə qədər lazımlı, ehtiyac duyulan sahə olduğunu tələbələrə aşılamaqdır.

Muxtar respublikanın ümumtəhsil məktəblərinin X-XI sinif şagirdləri arasında keçirilən həmin müsabiqənin qalibləri mükafatlandırılıblar.
Tədbirdə Naxçıvan Muxtar Respublikası Ali Məclisinin Sədri yanında Gənclər Fondunun icraçı direktoru Məmməd Babayev və Naxçıvan Muxtar Respublikası Təhsil Nazirliyinin əməkdaşı Rüstəm Həsənov çıxış edərək müsabiqənin məqsəd və mahiyyəti barədə danışıblar.
Çıxışlarda bildirilib ki, müsabiqənin məqsədi tarixən Yaxın və Orta Şərqin gözəl şəhərlərindən biri kimi tanınan, İslam mədəniyyəti nümunələri ilə zəngin olan Naxçıvanı İslam mədəniyyətinin paytaxtı kimi yeniyetmə və gənclərin gözü ilə təqdim etmək, onların bu sahədəki biliyini üzə çıxarmaqdır.
Vurğulanıb ki, muxtar respublikamızın İslam mədəniyyətinə, incəsənətinə, mədəniyyət abidələrinə, tarixinə həsr olunmuş inşa yazılar rayon təhsil şöbələri tərəfindən Naxçıvan Muxtar Respublikası Təhsil Nazirliyinə təqdim olunub və onlardan ən yaxşıları seçilərək mükafata layiq görülüb.
Qeyd edək ki, bu müsabiqə Naxçıvan Muxtar Respublikası Ali Məclisinin Sədri yanında Gənclər Fondu və Naxçıvan Muxtar Respublikası Təhsil Nazirliyi tərəfindən keçirilib.
Müsabiqədə 4 nəfər həvəsləndirici, 3 nəfər III, 2 nəfər II, 1 nəfər isə I yerə layiq görülüb. Onlara diplom və müxtəlif hədiyyələr təqdim olunub. Fərqlənən və mükafatçılar sırasına düşə bilməyən 5 iştirakçı isə Gənclər Fondunun və Təhsil Nazirliyinin xüsusi diplomları ilə təltif edilib.

 Fatma Babayeva

Muxtar respublikanın ümumtəhsil məktəblərində bir dərs saatı ümummilli lider Heydər Əliyevə həsr olunub. Heydər Əliyev Muzeyi ilə əlaqə yaradılaraq interaktiv dərs keçilib.
220 təhsil müəssisəsi canlı bağlantı vasitəsilə muzeyə qoşularaq ulu öndərin həyat və fəaliyyəti ilə bağlı “Heydər Əliyev və müstəqil Azərbaycan” mövzusunda keçilən interaktiv dərsi izləyib.
Muzeyin direktoru Ramil Orucəliyev ulu öndərin həyat və fəaliyyəti, şəxsi arxivindən götürülmüş ayrı-ayrı dövrlərə aid fotolar, habelə müxtəlif eksponatlar barədə ətraflı məlumat verib.
“Tarixdə elə şəxsiyyətlər var ki, onların həyat yolu bütöv bir xalqın və ölkənin taleyində mühüm rol oynayır”, – deyən Ramil Orucəliyev vurğulayıb ki, ümummilli lider Heydər Əliyev belə şəxsiyyətlərin fövqündə dayanır. Ulu öndərimiz xalqımızın arzusunda olduğu azadlıq, müstəqillik və milli dövlətçilik kimi ali idealların gerçəkləşməsinə nail olub. Bu dahi insanın mənalı həyat yolu müstəqil Azərbaycanın siyasi bioqrafiyasına çevrilib. Görkəmli dövlət xadiminin əziz xatirəsi hər bir azərbaycanlının qəlbində dərin kök salıb. Ümummilli liderimizin ölkəmiz üçün göstərdiyi misilsiz xidmətlər tariximizin şanlı səhifəsinə çevrilib. Bu böyük insanın həyat yolu hər bir məktəbliyə, hər bir gəncə nümunədir.

 Nail Əsgərov

Dövlət İmtahan Mərkəzi mayın 7-də 2017-2018-ci tədris ili üçün Azərbaycan Respublikasının ali təhsil müəssisələrinə qəbul olmaq istəyən abituriyentlərin I və IV ixtisas qrupları üzrə qəbul imtahanı keçirib.

İmtahan respublikanın 11 şəhərində – Bakı, Naxçıvan, Gəncə, Sumqayıt, Mingəçevir, Şəki, Bərdə, Göyçay, Şirvan, Lənkəran və Xaçmaz şəhərlərində aparılıb. İmtahanların idarə olunmasına 206 imtahan rəhbəri və orta təhsil müəssisələrindən 2226 nəzarətçi-müəllim cəlb olunub. İmtahan zallarında abituriyent­lərin rahat şəkildə imtahan verməsi üçün zəruri şərait yaradılıb, binaların girişində təhlükəsizliyin və buraxılış rejiminin operativliyinin təmin edilməsi üçün stasionar metalaxtaran aparatlar quraşdırılıb.
Naxçıvan şəhərində qəbul imtahanları 7 və 14 nömrəli tam orta məktəblərdə aparılıb. İmtahan üçün 1089 nəfər qeydiyyatdan keçib. İmtahana 96 nəzarətçi, 8 imtahan rəhbəri cəlb olunub, bir gün əvvəl onlara seminar-treninqlər keçirilib.

Ümummilli lider Heydər Əliyevin anadan olmasının 94-cü ildönümü münasibətilə Naxçıvan Muxtar Respublikası Ali Məclisinin Tədbirlər Planına uyğun olaraq muxtar respublikanın ümumtəhsil məktəblərinin şagirdləri arasında “Gənclər Azərbaycanın gələcəyidir” mövzusunda iki mərhələdən ibarət inşa yazı müsabiqəsi keçirilib.
Ötən gün müsabiqənin muxtar respublika mərhələsi olub. Tədbiri giriş sözü ilə açan Naxçıvan Muxtar Respublikasının təhsil naziri Məmməd Qəribov bildirib ki, ümummilli liderimiz, Türk dünyasının bəşəriyyətə bəxş etdiyi dahi şəxsiyyət Heydər Əliyev xalqımızın qəlbində əbədiləşən bəşəri dühadır. Müstəqil Azərbaycanın sabahkı qurucuları bu dahi şəxsiyyətin irsini layiqincə öyrənirlər.

Muxtar respublikanın texniki-peşə məktəblərində təlim-tərbiyə prosesinin səmərəliliyinin yüksəldilməsi, gənclərin peşə və fənlərə olan maraq və meyillərinin artırılması, istedadlı gənc­lərin üzə çıxarılması, onlarla aparılan işin forma və metodlarının təkmilləşdirilməsi istiqamətində məqsədyönlü tədbirlər həyata keçirilir.

Əmək bazarında rəqabətə­davamlı peşələrdən biri də qaz avadanlıqlarının istismarı və təmiri üzrə çilingər peşəsi perspektivli peşələrdən biridir. Azərbaycanın ayrılmaz tərkib hissəsi olan Naxçıvan Muxtar Respublikasında da bu sahə üçün ixtisaslı kadrlara ehtiyac yarandığından “Naxçıvan Muxtar Respublikasında peşə-­ixtisas təhsili üzrə ixtisasların siyahılarının və tədris planlarının təsdiq edilməsi haqqında” Naxçıvan Muxtar Respublikası Nazirlər Kabinetinin 2016-cı il 25 avqust tarixli qərarı ilə ixtisasartırma kursları siyahısına qaz avadanlıqlarının istismarı və təmiri üzrə çilingər peşəsi də daxil edilib. Ötən il sen­tyabrın 1-dən başlayaraq Naxçıvan Muxtar Respublikası Əmək və Əhalinin Sosial Müdafiəsi Nazirliyi yanında Naxçıvan Regional Peşə Tədris Mərkəzində bu peşə üzrə ixtisasartırma kursu fəaliyyətə başlayıb. “Naxçıvanqaz” İstehsalat Birliyinin tabeliyindəki şəhər, rayon qaz istismar idarələrində, qaz təsərrüfatında, xüsusilə qəza xidmətində çalışanların peşəkarlıq səviyyəsini artırmaq məqsədilə onların ixtisas hazırlığına qrup halında cəlb olunmaları təşkil edilib.

Naxçıvan Muxtar Respublikası Ali Məclisi Sədrinin “Naxçıvan Dövlət Universitetinin 50 illik yubileyinin keçirilməsi haqqında” 14 yanvar 2017-ci il tarixli Sərəncamına uyğun olaraq Şərur şəhərində Naxçıvan Dövlət Universitetinin növbəti yubiley tədbiri keçirilib.
Tədbiri giriş sözü ilə açan Şərur Rayon Təhsil Şöbəsinin müdiri Zaur Həsənov Naxçıvan Dövlət Universitetinin ali təhsilli kadrların hazırlanmasındakı əhəmiyyətli rolundan danışıb.
Naxçıvan Dövlət Universitetinin Həmkarlar ittifaqı komitəsinin sədri Elşən Məmmədov çıxışında Naxçıvan Dövlət Universitetinin 50 illik tarixi barədə qısa məlumat verib. Qeyd olunub ki, 1967-ci ildən fəaliyyət göstərən bu ali tədris ocağı muxtar respublikada hərtərəfli dünyagörüşə malik, intellektual səviyyəli gənc nəslin yetişməsində müstəsna əhəmiyyət daşıyır. Universitetin belə yüksək səviyyədə fəaliyyətində dövlət qayğısının böyük rolu var. Bu ali təhsil ocağının məzunları ölkəmizin ictimai-siyasi həyatına öz töhfələrini verirlər.
Vurğulanıb ki, universitet dünyanın 80-dən çox ölkəsinin tanınmış ali təhsil ocaqları ilə dostluq və əməkdaşlıq əlaqələri qurub. Hazırda Naxçıvan Dövlət Universitetində 12 dövlətdən 300-ə yaxın tələbə təhsil alır.

“Naxçıvan” Universitetinin kitabxanasında pedaqoji elmlər doktoru, professor İsmayıl Əliyevin “Pedaqogika” kitabının təqdimatı olub.
Tədbiri giriş sözü ilə universitetin tərbiyə işləri üzrə prorektoru Əli Yusifov açaraq müəllifi təbrik edib, yeni işıq üzü görən dərs vəsaitinin məziyyətləri barədə ətraflı məlumat verib. Bildirilib ki, ali məktəb tələbələri, doktorant və müəllimləri üçün nəzərdə tutulmuş bu dərs vəsaiti ümumi pedaqogika üzrə nəzəri biliklər və müasir təcrübənin ən yeni nailiyyətləri əsasında tərtib olunub. Kitab sistematik olaraq “Pedaqogikanın ümumi əsasları”, “Didaktika”, “Tərbiyə nəzəriyyəsi” və “Məktəbşünaslıq” bölmələrindən ibarətdir. Pedaqogikanın nəzəri problemlərini və praktik pedaqoji nailiyyətləri əhatə edən dərs vəsaitində mühazirələr pedaqogika elminin klassik bölmələrinin ardıcıllığı ilə tərtib edilmişdir. Kitabda öyrəniləcək materialların əsas mahiyyətinin sadə, elmi dəqiqliklə verilməsi tələbələrin pedaqoji bilikləri dərindən mənimsəməsinə kömək göstərəcək.
Sonra Pedaqogika və psixologiya kafedrasının müəllimi, pedaqoji elmlər doktoru Vahid Rzayevin, Naxçıvan Dövlət Universitetinin professoru, fəlsəfə elmləri doktoru, Azərbaycan Respublikasının Əməkdar müəllimi Məmməd Rzayevin, “Naxçıvan” Universiteti kitabxanasının müdiri, dosent Aypara Behbud­ovanın, İdarəetmə fakültəsinin dekanı, tarix üzrə fəlsəfə doktoru Elbrus İsayevin, Pedaqogika nəzəriyyəsi və tarixi ixtisası üzrə magistr Lalə Qarayevanın kitabla bağlı fikirləri dinlənilib.
Sonda rektor, professor İsmayıl Əliyev tədbir iştirakçılarına və kitabın ərsəyə gəlməsində kömək­liyi olan hər kəsə minnətdarlığını bildirib.

Nuray ƏSGƏROVA

Muxtar respublikamızda həyata keçirilən uğurlu sosial-iqtisadi siyasət nəticəsində əhalinin rifah halı yaxşılaşır və bu, əmək potensialının formalaşmasına öz müsbət təsirini göstərir. Bu baxımdan əmək potensialından səmərəli istifadəsinin prioritet istiqamətlərinin müəyyənləşdirilməsi aktual məsələlərdən biridir.
AMEA Naxçıvan Bölməsinin Təbii Ehtiyatlar İnstitutunun İqtisadiyyat şöbəsinin müdiri Sevinc Cabbarovanın rus dilində geniş oxucu kütləsinə təqdim etdiyi “Naxçıvan Muxtar Respublikasında əmək potensialının formalaşması və istifadəsi” adlı monoqrafiyası bu mənada, iqtisadi inkişafın müasir mərhələsində aktual tədqiqat əsəri kimi diqqəti cəlb edir.
Monoqrafiyanın “Naxçıvan Muxtar Respublikasında əmək potensialının formalaşması və istifadəsinin nəzəri-metodoloji əsasları” adlanan birinci fəslində əmək potensialının formalaşması amilləri və ondan səmərəli istifadəyə demoqrafik dəyişikliklərin təsiri öz əksini tapıb.
Yeni nəşrin ikinci fəsli “Naxçıvan iqtisadi rayonunda əmək potensialından istifadə vəziyyətinin təhlili və iqtisadi qiymətləndirilməsi” adlanır. Burada Naxçıvan iqtisadi rayonunda əhalinin əmək fəallığına sosial-iqtisadi inkişafın təsiri, məşğulluğun inkişaf vəziyyəti tədqiq edilib.

Dövlət İmtahan Mərkəzi aprelin 30-da 2017-2018-ci tədris ili üçün Azərbaycan Respublikasının ali təhsil müəssisələrinə qəbul olmaq istəyən abituriyentlərin II və III ixtisas qrupları üzrə qəbul imtahanı keçirib. 

İmtahan respublikanın 11 şəhərində – Bakı, Naxçıvan, Gəncə, Sumqayıt, Mingəçevir, Şəki, Bərdə, Göyçay, Şirvan, Lənkəran və Xaçmaz şəhərlərində, ümumilikdə, 66 binada aparılıb. İmtahanların idarə olunmasına 237 imtahan rəhbəri və orta təhsil müəssisələrindən 2637 nəzarətçi-müəllim cəlb olunub.
İmtahan zallarında abituriyent­lərin rahat şəkildə imtahan verməsi üçün zəruri şərait yaradılıb, binaların girişində təhlükəsizliyin və buraxılış rejiminin operativliyinin təmin edilməsi üçün stasionar metalaxtaran aparatlar quraşdırılıb.

Naxçıvan şəhərindəki 3 nömrəli tam orta məktəbdə VII-VIII sinif şagirdləri arasında rus dili və ədəbiyyatı fənni üzrə ümumrespublika olimpiadasının Naxçıvan Muxtar Respublikası üzrə zona turu təşkil olunub.
Tədbirdə Naxçıvan Muxtar Respublikası Təhsil Nazirliyinin əməkdaşı Mahir Əliyev çıxış edərək muxtar respublikada təhsilə göstərilən dövlət qayğısından danışıb.
“Rossotrudniçestvo” Agentliyinin Azərbaycandakı nümayəndəliyinin rəhbəri Valentin Denisov çıxışında Azərbaycan məktəblərində rus dilinin tədris olunmasını iki ölkə arasında dostluq münasibətlərinin göstəricisi kimi dəyərləndirib, belə tədbirlərin Rusiya və Azərbaycanın qarşılıqlı əlaqələrinin inkişafında böyük əhəmiyyət kəsb etdiyini diqqətə çatdırıb, olimpiada iştirakçılarına uğurlar arzulayıb.
Valentin Denisov olimpiadanın keçirilməsində göstərilən diqqətə görə minnətdarlı­ğını bildirib.
Tədbirin ədəbi-bədii hissəsində məktəbin şagirdlərinin ifasında Azərbaycan və rus dillərində şeirlər və mahnılar səsləndirilib.
Şagirdlərə olimpiadanın qaydaları haqqında məlumat verildikdən sonra olimpiadanın zona turu başlayıb.
Qeyd edək ki, rus dili və ədəbiyyatı fənni üzrə IX ümumrespublika olimpiadası Rusiya Federasiyasının Azərbaycandakı səfirliyi, “Rossotrudniçestvo” Agentliyinin Azərbaycandakı nümayəndəliyi, Azərbaycan Respublikasının Təhsil Nazirliyi və Azərbaycanın Rusdilli Təhsil Müəssisələri Müəllimləri Assosiasiyasının birgə təşkilatçılığı ilə keçirilir.

Tural AĞAYEV

Muxtar respublikada təhsil siyasətinin diqqətdə saxlanılması, bu sahəyə prioritet istiqamət kimi baxılması öz bəhrələrini verməkdədir. Hər il regionda bir neçə yeni məktəb binasının istifadəyə verilməsi, təhsil ocaqlarının maddi-texniki bazalarının gücləndirilməsi şagirdlərin muxtar respublika və ölkə səviyyəsində keçirilən olimpiadalarda, digər bilik yarışmalarında, idman birinciliklərində, məzunların qəbul imtahanlarında yüksək nəticələr qazanılmasını təmin edir. 

Sərhəd bölgəsi Sədərək rayonunun timsalında da bunu görmək olar. Müstəqilliyəqədərki və müstəqillik qazandığımız illərdə bölgənin təhsil mühitini müqayisə etsək, həm şərait, həm də keyfiyyət baxımından böyük fərqi görərik. Sədərəkdə sovet dönəmində belə dövrün tələblərinə cavab verən məktəb binaları tikilməyib. Uyğunlaşdırılmış binalardan istifadə edilib. Bu da, sözsüz ki, təhsilin keyfiyyətinə öz təsirini göstərib. Təhsil ocaqlarının ixtisaslı kadrlarla təminatı da ürəkaçan olmayıb. Keçid dövrü adlandırdığımız zaman kəsiyində adıçəkilən sahələrdə vəziyyət bir qədər də çətinləşib. Bölgənin sərhəddə yerləşməsi, məlum hadisələrin başlaması ilə vəziyyətin daha da ağırlaşması burada o dövrün təhsili barədə müsbət mənada nə isə deməyə imkan verməyən amillərdir. O dövrdə Sədərəkdə əsas məsələ yurd yerinin qorunması idi, sədərəklilər sərhədçi ömrü yaşayırdılar, digər sahələr kölgədə qalmışdı. Ümummilli liderimiz Heydər Əliyevin Moskvadan Naxçıvana qayıdışı, bir neçə dəfə Sədərəkdə olması, sərhəd bölgəsinin sakinləri ilə görüşməsi, onların problemləri ilə maraqlanması tədricən burada həyatın bütün sahələrinin canlanmasına gətirib çıxardı. Həyat öz axarına düşməyə, insanların sabaha olan inamı güclənməyə başladı. Təhsil sahəsi də özünün inkişafına qədəm qoydu. Bu gün qazanılan uğurların təməli də məhz o dövrdə möhkəmləndirilib.

Konfransı rektor, AMEA-nın müxbir üzvü Saleh Məhərrəmov açaraq ali təhsil ocağının 50 illik yubileyinin dövlət səviyyəsində qeyd olunmasını elmin, təhsilin inkişafına göstərilən dövlət qayğısı kimi dəyərləndirib.
“Naxçıvan Muxtar Respublikasında elmin inkişafında Naxçıvan Dövlət Universitetinin rolu” adlı məruzə ilə çıxış edən AMEA Naxçıvan Bölməsinin sədri, AMEA-nın həqiqi üzvü İsmayıl Hacıyev bildirib ki, Naxçıvan Dövlət Universiteti muxtar respublikada digər elm və təhsil müəssisələrinin yaranması, inkişafı və formalaşmasında, onların kadr potensialı ilə təmin olunmasında əhəmiyyətli rol oynayıb. Hazırda Naxçıvan Dövlət Universitetində 385 nəfərdən ibarət professor-müəllim heyəti çalışır ki, onlardan 2 nəfəri AMEA-nın müxbir üzvü, 18 nəfəri elmlər doktoru, 175 nəfəri isə fəlsəfə doktorudur. Universitetdə bakalavr, magistr, fəlsəfə və elmlər doktoru hazırlığı işi yüksək səviyyədə aparılır.
Konfransda çıxış edən İqdır Universitetinin rektoru, professor Mehmet Hakkı Alma rəhbərlik etdiyi universitetin strukturu və fəaliyyəti haqqında məlumat verib. Rektor universitet rəhbərliyini və müəllim-tələbə kollektivini yubiley münasibətilə təbrik edib.
Naxçıvan Müəllimlər İnstitutunun rektoru, professor Oruc Həsənli “Naxçıvan Muxtar Respublikasında müəllim kadrlarının hazırlığında Naxçıvan Dövlət Universitetinin rolu” adlı məruzə ilə çıxış edərək bildirib ki, universitetin məzunları bu gün Azərbaycanda milli dövlət quruculuğunun müxtəlif sahələrində yaxından iştirak edirlər.
“Naxçıvan” Universitetinin rektoru, professor İsmayıl Əliyev “Naxçıvan Dövlət Universitetinin ali təhsil müəssisələri sırasında yeri” adlı məruzə ilə çıxış edib. Məruzədə qeyd olunub ki, ali təhsil ocağı böyük inkişaf yolu keçərək qədim diyarın əsas elm, təhsil və mədəniyyət mərkəzinə çevrilib. Universitet Azərbaycanın 42 ali təhsil ocağı arasında özünün həm ənənələri, həm nailiyyətləri ilə seçilir.
Konfrans üç bölmə iclası ilə işini davam etdirib.

Nərmin Cabbarova

AMEA Naxçıvan Bölməsində böyük Azərbaycan şairi, ictimai xadim Molla Pənah Vaqifin anadan olmasının 300 illik yubileyinə həsr olunan elmi konfrans keçirilib.
Tədbir AMEA Naxçıvan Bölməsi, Naxçıvan Dövlət Universiteti və Naxçıvan Muxtar Respublikasının Yazıçılar Birliyi tərəfindən birgə təşkil olunub.
Konfransda bölmənin sədri, akademik İsmayıl Hacıyev Prezident İlham Əliyevin “Böyük Azərbaycan şairi Molla Pənah Vaqifin 300 illik yubileyinin keçirilməsi haqqında” 12 yanvar 2017-ci il tarixli Sərəncamının şairin yaradıcılığının təbliği baxımından böyük əhəmiyyət daşıdığını vurğulayıb. Bildirib ki, sərəncama əsasən ölkədə silsilə tədbirlər təşkil olunur. Böyük Azərbaycan şairi Molla Pənah Vaqifin anadan olmasının 300 illik yubileyinin YUNESKO və TÜRKSOY miqyasında beynəlxalq səviyyədə qeyd olunması təkcə Molla Pənah Vaqifə deyil, bütünlükdə, Azərbaycan ədəbiyyatına verilən dəyərdir.

Naxçıvan Muxtar Respublikası Təhsil Nazirliyi və AMEA Naxçıvan Bölməsinin birgə təşkilatçılığı ilə muxtar respublikanın ümumtəhsil məktəblərinin şagirdləri üçün növbəti interaktiv dərs keçilib.
` “Kitabi-Dədə Qorqud” dastanları və Naxçıvan” mövzusunda keçilən dərsdə bölmənin İncəsənət, Dil və Ədəbiyyat İnstitutunun direktоru, AMEA-nın müxbir üzvü Əbülfəz Quliyev Azərbaycan xalq ədəbiyyatının ən qədim yazılı abidəsi olan “Kitabi-Dədə Qorqud” dastanları barədə şagirdlərə ətraflı məlumat verib. Bildirib ki, daha çox oğuzların tarixini əks etdirən və 12 boydan ibarət olan bu folklor abidəmizdə oğuz türklərinin həyat tərzi, adət-ənənələri, dünyagörüşü, düşmənə qarşı qəhrəmanlıq mübarizəsi, mərdliyi əks olunub. “Kitabi-Dədə Qorqud” dastanı, təxminən, X-XI əsrlərdə yazıya alınıb.
Əbülfəz Quliyev qeyd edib ki, dastanların dünya miqyasında təbliği və Azərbaycanda adının əbədiləşdirilməsi məqsədilə ulu öndər Heydər Əliyev 1997-ci il aprelin 20-də “Kitabi-Dədə Qorqud” dastanlarının 1300 illiyi haqqında” Fərman imzalayıb. Həmin tarixi fərmandan sonra “Kitabi-Dədə Qorqud”un tədqiqi, nəşri və təbliği sahəsində mühüm tədbirlər həyata keçirilib. Naxçıvan şəhərində 1999-cu ildə Dədə Qorqudun abidəsi ucaldılıb, Naxçıvanda və Türkiyənin Van şəhərində beynəlxalq simpoziumlar təşkil olunub.

Naxçıvan Muxtar Respublikası Təhsil Nazirliyində ümumtəhsil məktəblərində pedaqoji təcrübə keçən tələbələrlə görüş keçirilib.
Görüşdə Naxçıvan Muxtar Respublikasının təhsil naziri Məmməd Qəribov çıxış edərək təhsil quruculuğu sahəsində görülən işlərdən, orta təhsilin inkişaf səviyyəsindən, bu sahəyə göstərilən dövlət qayğısından bəhs edib, ali və orta ixtisas təhsili müəssisələrinin birgə fəaliyyətinin tədrisin və təhsilin yüksək səviyyədə qurulmasında mühüm rolundan danışıb.
Bu görüşün Naxçıvan Muxtar Respublikası Ali Məclisi Sədrinin 2015-ci il 27 iyul tarixli “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamına uyğun olaraq keçirildiyini bildirən təhsil naziri vurğulayıb ki, təkcə cari ilin birinci rübündə müxtəlif bölgələrimizdə 5 yeni məktəb binasının istifadəyə verilməsi, təhsil müəssisələrinin ən müasir avadanlıqlarla təchiz edilməsi, müəllim əməyinə yüksək qiymət verilməsi göstərilən dövlət qayğısının bariz nümunəsidir.

Naxçıvan Muxtar Respublikası Ali Məclisi Sədrinin 2015-ci il 27 iyul tarixli “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamına uyğun olaraq, muxtar respublikanın Rabitə və Yeni Texnologiyalar Nazirliyində Naxçıvan Dövlət Texniki Kollecinin tələbələrinin iştirakı ilə tədbir keçirilib.
Tədbiri giriş sözü ilə açan rabitə və yeni texnologiyalar naziri Rövşən Məmmədov bildirib ki, ixtisasların müvafiq təşkilatlara hamiliyə verilməsi yüksəkixtisaslı kadr hazırlığına böyük töhfə verir. Bu baxımdan müvafiq ixtisaslar üzrə təhsil alan tələbələrin nazirliyin struktur qurumlarında təcrübə keçməsi təqdirəlayiq haldır. Əminliklə demək olar ki, Naxçıvan Dövlət Texniki Kollecinin tələbələrinin əksəriyyəti gələcəkdə muxtar respublikanın bank qurumlarında fəaliyyət göstərməklə bərabər, poçt əməliyyatçısı kimi effektiv iş nümayiş etdirə biləcəklər.
Görüşdə “Naxçıvanpoçt” Məhdud Məsuliyyətli Cəmiyyətinin direktoru İlqar Sadiqov, Naxçıvan Muxtar Respublikası Rabitə və Yeni Texnologiyalar Nazirliyi Poçt rabitəsi şöbəsinin mütəxəssisi Hüsniyyə Rəcəbovanın çıxışları olub. Çıxışlarda qeyd edilib ki, təcrübə müddətində nazirliyin mütəxəssisləri tərəfindən Naxçıvan Dövlət Texniki Kollecinin Bank işi ixtisası üzrə təhsil alan tələbələrinə dərslər keçilib. Dərslərdə mərkəzi terminallar haqda məlumat verilib, həmin terminal vasitəsilə qaz, elektrik, su istifadə haqlarının, telefon abunə borclarının ödənişi, abunəçilərin borclarının hesablanması, adların, ünvanların korreksiyası, yeni abonent yaradılması və terminaldan müxtəlif hesabatların çıxarılması öyrədilib. Bundan başqa, Colvir sistemi ilə işləmək qaydası, pul köçürmələrinin qəbulu, ödənişi, axtarış aparılması, tele­qramların qəbulu və göndərilməsi, bağlamaların qeydiyyatı, müxtəlif hesabatların çıxarılması qaydaları üçün dərslər keçilib. Smartkartların yüklənməsi və hesabatların çıxarılması da öyrədilib. Bütün bunlar tədris otağındakı kompüterlərin “Naxçıvanpoçt” Məhdud Məsuliyyətli Cəmiyyətinin şəbəkəsinə qoşulması vasitəsilə əyani olaraq həyata keçirilib.

AMEA Naxçıvan Bölməsində “Naxçıvanın tarixi abidələri” və “Kültəpədə arxeoloji qazıntılar” kitablarının təqdimatı olub.
Tədbiri giriş sözü ilə açan bölmənin sədri, akademik İsmayıl Hacıyev 2006-cı ildən etibarən AMEA Naxçıvan Bölməsinin arxeoloji ekspedisiyasının muxtar respublika ərazisində beynəlxalq ekspedisiyalarla birgə apardığı arxeoloji qazıntılar və bu tədqiqatların Naxçıvanın qədim tarixinin öyrənilməsindəki rolu barədə danışıb.
Bildirilib ki, Naxçıvan tarixi abidələrlə zəngin olan bir diyardır. Naxçıvan Muxtar Respublikası Ali Məclisi Sədrinin 2005-ci il 6 dekabr tarixli “Naxçıvan Muxtar Respublikası ərazisindəki tarix və mədəniyyət abidələrinin qorunması və pasportlaşdırılması işinin təşkili haqqında” Sərəncamı əsasında Naxçıvanın tarixi və mədəniyyət abidələrinin öyrənilməsinə başlanılıb.

Naxçıvan Muxtar Respublikası Ali Məclisinin Sədri cənab Vasif Talıbovun 2017-ci il 14 yanvar tarixli Sərəncamına əsasən Naxçıvan Dövlət Universitetinin 50 illik yubileyi qeyd edilməkdədir. Bununla əlaqədar Tədbirlər Planı təsdiq edilib. Sərəncamda bu ali təhsil ocağının yarım əsr ərzində keçdiyi inkişaf yolu yüksək qiymətləndirilərək deyilir: “Naxçıvan Dövlət Universiteti yüksək ixtisaslı kadrların yetişdirilməsinə, elmi və ali təhsil mühitinin formalaşmasına öz təsirini göstərmiş, fəaliyyət göstərdiyi dövrdə universitetin 30 minə yaxın məzunu olmuşdur. Naxçıvan Dövlət Universitetinin məzunları ölkəmizdə milli dövlət quruculuğunun və təsərrüfat həyatının müxtəlif sahələrində çalışaraq iqtisadi, elmi və mədəni potensialın gücləndirilməsinə layiqli töhfələr verirlər”. 

Sivilizasiyanın beşiyi olan Nuhun vətəni Naxçıvan dünyada nəinki zəngin tarixi irsi və mədəniyyəti, eyni zamanda böyük ziyalı ordusu və dahi şəxsiyyətləri ilə də şöhrət qazanıb. Tarixən maarifçi ideyaların geniş intişar tapdığı, əvəzsiz ədəbi nümunələrin, memarlıq incilərinin, musiqi əsərlərinin, elmin müxtəlif sahələrinin təşəkkül etdiyi bu diyar dünyanın ən zəngin mədəniyyət mərkəzlərindən biridir. Bunu şərtləndirən başlıca amillər isə Naxçıvanın Şərq və Qərb mədəniyyətlərinin qovuşduğu məkanda yerləşməsi, geosiyasi mövqeyi və tarixin müxtəlif dövrlərində Azərbaycanın paytaxtı olması kimi xarakterizə edilir.

İstedadlı şagirdlərin aşkar edilməsi, onların potensiallarının artırılması, həmçinin şagirdlər arasında sağlam rəqabət şəraitinin yaradılması məqsədilə təşkil olunan respublika fənn olimpiadalarının final mərhələsi IX, X və XI sinif şagirdləri arasında 8 fənn üzrə keçirilib.
Bu il olimpiadanın final mərhələsində muxtar respublika üzrə Azərbaycan dili fənnindən 12, tarixdən 7, coğrafiyadan 20, riyaziyyatdan 8, fizikadan 3, kimyadan 5, biologiyadan 10, informatikadan 1 məktəbli olmaqla, ümumilikdə, 66 şagird iştirak edib. Fənn olimpiadalarının final mərhələsində şagirdlərə açıqtipli, isbat, izahat, həll tələb edən sual və tapşırıqlar təqdim olunub.
Məlumat üçün bildirək ki, bu il keçirilən respublika fənn olimpiadalarında muxtar respublikanın ümumtəhsil məktəblərindən 208 şagird yarımfinal turunda iştirak edib və onlardan 66-sı final mərhələsinə qatılmaq hüququ qazanıb. Ötən illə müqayisədə bu göstərici 21 nəfər çoxdur. Belə ki, ötən il keçirilən fənn olimpiadalarının final mərhələsində 45 şagird iştirak etmişdi.
Qeyd edək ki, son mərhələdə iştirak edən bütün şagirdlərə olimpiadanın “İştirak” sertifikatı veriləcək. Yekunda hər fəndən ölkə üzrə 30 nəfər qalib seçiləcək. Final mərhələsində qalib gələn şagirdlər müvafiq olaraq qızıl, gümüş, bürünc medal, diplom və müxtəlif hədiyyələrlə təltif olunacaqlar. Hər bir fəndən ölkə üzrə ən güclü şagird “Birincilərin birincisi” nominasiyası üzrə təltif ediləcək.

 Nail Əsgərov

Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 2015-ci il 27 iyul tarixli Sərəncamına uyğun olaraq aprelin 20-də Naxçıvan Dövlət Universitetinin Təbiətşünaslıq və kənd təsərrüfatı fakültəsinin Torpaqşünaslıq və aqrokimya ixtisası üzrə təhsil alan tələbələri Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Komitəsində olublar.

Tələbələrlə görüşdə komitənin sədri Müslüm Cabbarzadə bildirib ki, mülkiyyət hüquqlarının tənzimlənməsində vahid idarəçiliyi təmin etmək məqsədilə Naxçıvan Muxtar Respublikası Ali Məclisi Sədrinin 2015-ci il 19 may tarixli Sərəncamı ilə Daşınmaz Əmlakın Dövlət Reyestri Xidmətinin bazasında Naxçıvan Muxtar Respublikasının Daşınmaz Əmlak və Torpaq Məsələləri üzrə Dövlət Komitəsi yaradılıb. Komitənin inzibati binasında müasir avadanlıqlarla təchiz olunmuş iş otaqları, iclas zalı, xəritəçəkmə, server və çap otaqları, 3 arxiv otağı, digər yardımçı otaqlar mövcuddur. Komitənin arxivində 200 minə yaxın torpaq və digər daşınmaz əmlak obyektlərinə dair arxiv sənədləri, torpaq balansı, geobotaniki tədqiqatlar, torpaqdan istifadə hüququna dair Dövlət Aktları, müxtəlif miqyaslı bərk və kağız xəritələr, torpaq islahatı materialları, yerquruluşu sənədləri, kosmik fotoplanlar və elektron variantda materiallar qorunub saxlanılır. Binada Daşınmaz Əmlak və Torpaq Məsələləri üzrə Dövlət Komitəsi, onun Naxçıvan Şəhər İdarəsi və komitənin tabeliyində olan Dövlət Yerquruluşu, Geodeziya və Xəritəçəkmə Layihə İnstitutu fəaliyyət göstərir.

Ali təhsil ocağında Xalq artisti, “Şöhrət” ordenli bəstəkar, professor Tofiq Bakıxanovun rəhbərliyi ilə növbəti ustad dərsi təşkil olunub. Ustad dərsini aparan Bakı Musiqi Akademiyasının müəllimi, professor Hökümə Əliyeva universitetin Musiqi müəllimliyi və Simli alətlər ixtisaslarının tələbələrinə skripka alətinin sirri, ifa texnikası və düzgün istifadə qaydaları haqqında əyani şəkildə məlumat verib.
Professor Tofiq Bakıxanov dərsin gedişini izləyib. Gənc ifaçılara məsləhət və tövsiyələrini verib, onları musiqinin sirlərinə dərindən yiyələnməyə səsləyib.
Ustad dərsləri bir neçə gün davam edəcək.
Tofiq Bakıxanov Naxçıvan Dövlət Universitetində İncəsənət fakültəsinin birinci kurs tələbələrinin hesabat konsertinə də baxıb. Konsert Bəstəkarlıq ixtisasının I kurs tələbəsi Hakim Məmmədovun Xalq şairi Məmməd Arazın sözlərinə bəstələdiyi “Naxçıvan” mahnısının Solo oxuma ixtisasının I kurs tələbəsi Rüstəm İbrahimov tərəfindən ifası ilə başlayıb. Tələbələrdən Sevindik Rzayev və Fuad Kazımlı tarda, Namizət Oruclu qarmonda, Çilər Məmmədova, Səxavət Rəhim­ov, Aysel Rzayeva və digərləri fortepianoda rəngarəng musiqi nömrələri təqdim ediblər. İncəsənət fakültəsinin müxtəlif ixtisaslarına bu il qəbul olan tələbələrin nağara, fleyta, skripka, saksafon, kontrabas musiqi alətlərindəki solo ifaları alqışlarla qarşılanıb.
Proqramda Fikrət Əmirov, Tofiq Quliyev, Arif Məlikov, Rauf Hacıyev və digər görkəmli Azərbaycan bəstəkarlarının, habelə dünya klassiklərinin repertuarından seçmələr səsləndirilib. Konsert proqramı “Sarı gəlin” Azərbaycan xalq mahnısının ifası ilə başa çatıb.
Universitetin rektoru, AMEA-nın müxbir üzvü Saleh Məhərrəmov yekunda çıxış edərək hesabat konsertinin istedadların seçimi, tələbələrdə ilkin səhnə mədəniyyəti, sənət vərdişləri aşılanması baxımından əhəmiyyətini diqqətə çatdırıb. Rektor uğurlu konsert proqramını fakültə rəhbərinin, sənət müəllimlərinin birgə zəhmətinin bəhrəsi kimi yüksək qiymətləndirib, gənc sənətkara uğurlar arzulayıb.

Taleh HAXVERDİYEV

Naxçıvan şəhərindəki Gənclər Mərkəzində yeniyetmələr arasında “Nuh yurdu” intellektual oyununun Naxçıvan şəhər birinciliyi keçirilib.
Oyun yeniyetmələrin intellektual səviyyəsini, dünyagörüşünü, zehni inkişafını stimullaşdırmaq, onların biliklərə olan maraqlarını artırmaq, eləcə də asudə vaxtlarının səmərəli təşkili istiqamətində yeni üsullar tətbiq etmək məqsədilə təşkil olunub.
Tədbirdə Naxçıvan Şəhər Gənclər və İdman İdarəsinin rəisi Xəyal Qurbanov, Naxçıvan Muxtar Respublikası Gənclər və İdman Nazirliyi Aparatının Gənclərlə iş şöbəsinin müdiri Nicat Babayev və Naxçıvan Şəhər Təhsil Şöbəsinin əməkdaşı Baba Əliyev çıxış edərək bildiriblər ki, bilik yarışması Azərbaycanın, o cümlədən Naxçıvanın zəngin milli mədəniyyəti və tarixinin təbliğində, gənclərdə təfəkkürün formalaşmasında, onlarda zehni qabiliyyət və bacarıqların inkişafında mühüm rol oynayacaq.
8 komandanın iştirak etdiyi intellektual oyun 2 mərhələ və final, hər mərhələ isə beş raunddan ibarət olub. Gərgin keçən mübarizə nəticəsində 8 nömrəli tam orta məktəbin “Lider” komandası qalib adını qazanıb. 5 nömrəli tam orta məktəbin “Göytürk” komandası ikinci, 12 nömrəli tam orta məktəbin “Zəfər” komandası yarışın üçüncüsü olub.
Qaliblərə diplom, fəxri fərman, kubok və bilik kitabları hədiyyə olunub.

Ceyhun Məmmədov

Culfa şəhərində keçirilən tədbiri rayon Təhsil Şöbəsinin müdiri Adəm Qasımov açıb.
Universitetin elmi işlər üzrə prorektoru, dosent Mübariz Nuriyev qeyd edib ki, 1967-ci ildə 3 ixtisasla Azərbaycan Pedaqoji İnstitutunun filialı kimi fəaliyyətə başlayan universitet hazırda 57 ixtisas üzrə bakalavr, 46 ixtisas üzrə magistr, 31 ixtisas üzrə doktorant hazırlığı aparılan və dünyaya inteqrasiya edən ali təhsil ocaqlarından biridir. Burada güclü maddi-texniki baza, elektron sənəd dövriyyəsi, elektron təhsil şəbəkəsi yaradılıb, imtahanlar elektron qaydada keçirilir.
Prorektor vurğulayıb ki, universitet əməkdaşlarının 400-dən artıq kitabı, 5000-ə yaxın məqaləsi işıq üzü görüb. Məqalələrin 400-ü xaricdə nüfuzlu jurnallarda dərc edilib. Yüzlərlə elmi-tədqiqat işlərinin 70 faizi doğma Naxçıvanın öyrənilməsinə həsr olunub. Naxçıvan Dövlət Universiteti 80-dən çox xarici universitetlə müəllim-tələbə mobilliyi həyata keçirir. 10-dan çox xarici ölkə­dən 360-dan artıq tələbə universitetdə təhsil alır.
Tədbirdə Azərbaycan Respublikasının Əməkdar elm xadimi, professor Hüseyn Həşimli, Ümumi və nəzəri fizika kafedrasının müdiri, dosent Fərman Qocayev, Riyazi analiz kafedrasının müdiri, dosent Elşad Ağayev və kafedranın müəllimi, dosent Sahib Əliyev çıxış edərək universitetin keçdiyi inkişaf yolundan bəhs ediblər.

Taleh HAXVERDİYEV

Naxçıvan Müəllimlər İnstitutunda “Təhsil kurikulumları: praktik tətbiqlər” mövzusunda elmi konfrans keçirilib.
Konfransı giriş sözü ilə Naxçıvan Müəllimlər İnstitutunun rektoru, professor Oruc Həsənli açaraq təhsil kurikulumlarının əhəmiyyətindən danışıb. Qeyd edib ki, aparılan araşdırmalar nəticəsində yeni təlim strategiyalarının, o cümlədən fəal təlim, interaktiv metodların tətbiqinin müəllimin peşəkarlıq səviyyəsinə yeni və kifayət qədər yüksək tələblər qoyması bir daha müəyyənləşdirilib.
Konfransın plenar iclasında institutun Kurikulum mərkəzinin metodisti Tamara Baxşəliyeva “Müasir təlimdə oxu strategiyaları”, Pedaqogika və psixologiya kafedrasının baş müəllimi, pedaqogika üzrə fəlsəfə doktoru Lalə Allahverdiyeva “Fəal dərsin səmərəli təşkilində fasilitasiya bacarığının rolu”, Kurikulum mərkəzinin metodisti Züleyxa Abbasova “Kimya fənnindən inteqrasiya”, AMEA Naxçıvan Bölməsinin dissertantı Təranə Qəbulova “Fənn kurikulumlarının tətbiqində İKT-dən istifadənin əhəmiyyəti”, Şərur rayon Zeyvə kənd tam orta məktəbinin müəllimi Fərmayil Əsgərov “Kurikulum ilə xarici dillərin tədrisi” mövzularında məruzə ediblər.
Sonra elmi konfrans öz işini bölmə iclasları ilə davam etdirib. Müxtəlif mövzuları əhatə edən bölmə iclaslarında təcrübəli pedaqoqların, ali təhsil müəssisələri əməkdaşlarının çıxışları olub.
Sonda bölmə iclaslarının nəticələri müzakirə edilib, fikir mübadiləsi aparılıb, yeni təhsil islahatının həyata keçirilməsi ilə bağlı bir çox suallar cavablandırılıb.

 Nail Əsgərov

Naxçıvan Muxtar Respubli­kası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” 27 iyul 2015-ci il tarixli Sərəncamına uyğun olaraq aprelin 18-də Naxçıvan Dövlət Universitetinin Sosial idarəetmə və hüquq fakültəsinin hüquqşünaslıq ixtisası üzrə təhsil alan tələbələri Naxçıvan Muxtar Respublikası Ali Məhkəməsində olublar.
Tələbələr əvvəlcə buradakı kitabxana ilə tanış olub, sonra onlara Ümumi şöbəyə daxil olan sənədlərin və cinayət, mülki, inzibati və sair işlərin və materialların qeydiyyatı, rəsmiləşdirilməsi, işlərin formalaşdırılması və göndərilməsi, vətəndaşların müraciətlərinin baxılması qaydaları haqqında ətraflı məlumat verilib.
Tələbələrlə görüş zamanı Naxçıvan Muxtar Respublikasının Ali Məhkəmə­sinin sədri Ramiz Süleymanov qeyd edib ki, Naxçıvan Muxtar Respublikası Ali Məclisi Sədrinin “Ali və orta ixtisas təhsili müəssisələrində ixtisasların müvafiq təşkilatlara hamiliyə verilməsi haqqında” Sərəncamı hüquq təhsili alan tələbələrin aidiyyəti dövlət orqanlarında təcrübə qazanmaları, onların bacarıqlı mütəxəssis kimi yetişmələri baxımından atılan mühüm addımdır. Sərəncamda nəzərdə tutulan vəzifələrin uğurlu icrasını təmin etmək məqsədilə Naxçıvan Muxtar Respublikası Ali Məhkəməsində görüləcək işlərə dair tədbirlər planının təsdiq olunduğunu bildirən Ramiz Süleyman­ov diqqətə çatdırıb ki, planda hüquqşünaslıq ixtisası üzrə təhsil alan tələbələr üçün seminar-məşğələlərin keçirilməsi, onların məhkəmə proseslərində iştirakının təmin olunması nəzərdə tutulub.

Azərbaycan Respublikası Dövlət İmtahan Mərkəzi aprelin 16-da ümumi (9 illik) orta təhsil bazasından orta ixtisas təhsili müəssisələrinə qəbul olmaq istəyən əvvəlki illərin məzunları, o cümlədən eksternat qaydasına yekun qiymətləndirmədə (attestasiya) iştirak edən və ya üzrlü səbəbdən 9-cu sinif buraxılış imtahanının 1-ci mərhələsində iştirak edə bilməyən şagirdlər üçün imtahanlar keçirib.
İmtahanlar Bakı, Sumqayıt, Naxçıvan, Gəncə, Şəki, Şirvan, Göyçay, Xaçmaz, Bərdə və Lənkəran şəhərlərində təşkil olunub.
Naxçıvan Muxtar Respublikasında ümumi orta təhsil bazasından orta ixtisas təhsili müəssisələrinə qəbul imtahanının birinci mərhələsinə imtahan Naxçıvan şəhər 14 nömrəli tam orta məktəbin binasında keçirilib. İmtahan üçün 44 nəzarətçi, 4 rəhbər, 1 ümumi rəhbər və 4 mühafizəçi təyin olunub. Saat 1300-da başlayan imtahan 1500-da başa çatıb. İmtahanda 511 namizəd iştirak edib.
Qeyd edək ki, ümumi təhsil bazasından orta ixtisas təhsili müəssisələrinə qəbul imtahanı 2 mərhələdə həyata keçiriləcək. Birinci mərhələdə abituriyentlərə Azərbaycan dili fənnindən oxuyub-anlama və yazı ­bacarıqlarını yoxlamaq məqsədilə 2 mətn əsasında 10 açıq, 10 qapalı, riyaziyyat fənnindən riyazi bacarıqları yoxlamaq üçün 10 açıq, ümumilikdə, iki fənn üzrə 30 test tapşırığı təqdim edilib. Birinci mərhələdə imtahan müddəti 2 saat olub. İkinci mərhələdə imtahan iştirakçılarına sualları cavablandırmaları üçün 1 saat 30 dəqiqə vaxt veriləcək. 

 Fatma BABAYEVA

“Cari ilin may ayında gözlənilməz şad bir xəbər naxçıvanlıları sevindirdi. Şəhər başçısının Qafqaz tədris mahalı hamisindən aldığı və ictimaiyyətə elan etdiyi teleqramda deyilirdi ki, Naxçıvanımda altı sinifli kişi gimnaziyası açmaq məsələləri prinsip etibarı ilə tamamilə həll edilmişdir. Lakin bu şərtlə ki, şəhər əhalisi birdəfəlik yardım alaraq 5000 manat və hər il 2000 manat vəsait verməli və gimnaziya binasını tikmək üçün yer ayırmalıdır”. 

Bu sətirlər XX əsr Azərbaycan ədəbiyyatı, mətbuatı, teatrı və ictimai fikir tarixində özünəməxsus yer tutan ziyalılardan biri olan Eynəli bəy Sultanovun sonsuz bir sevinclə Naxçıvan şəhərində məktəb açılacağı haqda yazan qələminin məhsuludur. O Eynəli bəyin ki, hələ 1882-ci ildə öz evində “Ziyalılar cəmiyyəti” təşkil edərək şəhərin bütün tərəqqipərvər insanlarını bu cəmiyyətin işığına toplamışdı, doğma şəhəri haqda danışanda “Naxçıvanımda” demişdi. Bəli, bu böyük insanın, əsl maarif fədaisinin ən böyük arzularından biri xalqının bütün nümayəndələrini təhsilli görmək idi.

Naxçıvan Muxtar Respublikası Ali Məclisi Sədrinin tapşırığına əsasən “Əcəmi” Nəşriyyat-Poliqrafiya Birliyində “Behbud ağa Şahtaxtinski: sənədlər və materiallar” kitabı nəşr olunmuşdur.
Aprelin 14-də AMEA Naxçıvan Bölməsində Naxçıvan Muxtar Respublikası Ali Məclisinin Sədri yanında Bilik Fondunun Himayəçilik Şurasının təşkilatçılığı ilə “Behbud ağa Şahtaxtinski: sənədlər və materiallar” kitabının təqdimatı olmuşdur.
AMEA Naxçıvan Bölməsinin sədri, Bilik Fondunun Himayəçilik Şurasının üzvü, akademik İsmayıl Hacıyev tədbiri giriş sözü ilə açmış, “Behbud ağa Şahtaxtinski: sənədlər və materiallar” kitabının görkəmli diplomatın həyat və fəaliyyətinin öyrənilməsi sahəsindəki əhəmiyyətini diqqətə çatdırmış, belə qiymətli bir kitabın nəşrinə görə Ali Məclisin Sədrinə muxtar respublikanın ziyalıları adından dərin minnətdarlığını bildirmişdir.
Tədbirdə çıxış edən Naxçıvan Muxtar Respublikası Ali Məclisi Sədrinin yanında Bilik Fondunun Himayəçilik Şurası Sədrinin müavini Əli Həsənov demişdir ki, Behbud ağa Şahtaxtinski Azərbaycanın dövlətçilik, diplomatiya və ictimai həyatında mühüm yer tutan böyük tarixi şəxsiyyətdir. Bu gün Behbud ağa Şahtaxtinski deyərkən gözlərimiz önündə əqidəli ziyalı və alovlu vətənpərvər dayanır. Qısa, lakin mənalı həyatını Azərbaycan naminə mübarizəyə həsr edən, bu mübarizənin ilk qaliblərindən və qurbanlarından olan Behbud ağa Şahtaxtinski üzərinə düşən tarixi missiyanı şərəflə yerinə yetirmişdir. Onun həyatı və mübarizəsi siyasi tariximizdə vətəndaşlıq və dövlətçilik etalonudur.

Tədbirdə Şahbuz rayon ağsaqqalları və ziyalıları, rayon Təhsil Şöbəsinin nümayəndələri, müəllim və şagirdlər, universitet əməkdaşları iştirak ediblər. Şahbuz Rayon Təhsil Şöbəsinin müdiri Araz Məmmədov tədbirdə çıxış edərək Naxçıvan Muxtar Respublikası Ali Məclisi Sədrinin Naxçıvan Dövlət Universitetinin 50 illik yubileyinin keçirilməsi haqqında 14 yanvar 2017-ci il tarixdə imzaladığı Sərəncamın əhəmiyyətindən danışıb, universitetin 50 illik yubileyinin qeyd olunmasını muxtar respublikada elmə və təhsilə göstərilən yüksək diqqətin bariz nümunəsi olduğunu vurğulayıb.
Naxçıvan Dövlət Universitetinin tərbiyə işləri üzrə prorektoru, dosent Şamxal Məmmədov universitetin keçdiyi inkişaf yoluna nəzər salaraq bildirib ki, 1967-1968-ci tədris ilində cəmi 3 ixtisas üzrə kadr hazırlığına başlanan bu ali təhsil ocağında hazır­da 57 ixtisas üzrə bakalavr, 46 ixtisas üzrə magistr, 31 ixtisas üzrə doktorant hazırlığı aparılır. Prorektor universitetin maddi-texniki və tədris bazası, 108 hektar sahədə yerləşən 16 tədris korpusu, Elektron kitabxana, Konservatoriya, Sosial Xidmət Mərkəzi, Xəstəxana, Olimpiya-İdman Mərkəzi, Baytarlıq Təbabəti Klinikası və Tələbə evi, Media mərkəzi və digər struktur qurumları, beynəlxalq əlaqələri, elektron universitet quruculuğu istiqamətində qazandığı uğurlar haqqında ətraflı məlumat verib. Qeyd edib ki, Naxçıvan Dövlət Universiteti 2009-cu ildə Avropa Rektorlar Klubu tərəfindən “Minilliyin universiteti” adına layiq görülüb, 2015-ci ildə Azərbaycan Respublikasının 30 ali məktəbinin çoxkriteriyalı, beynəlxalq standartlara uyğun reytinq cədvəlində birinci yeri tutub.

Azərbaycan Respublikasının Prezidenti cənab İlham Əliyev 2017-ci il 7 fevral tarixdə “Akademik Həsən Əliyevin 110 illik yubileyinin keçirilməsi haqqında” Sərəncam imzalayıb. Sərəncamda deyilir: “Azərbaycanda coğrafiya və torpaqşünaslıq elmlərinin müxtəlif sahələrinin təşəkkül tapmasında, bir sıra yeni elmi istiqamətlərin bugünkü simasının müəyyənləşməsində Həsən Əliyevin müstəsna xidmətləri vardır. Alim bütün zəngin fəaliyyəti boyunca ətraf mühitin mühafizəsi, ekoloji tarazlıq və ölkənin təbii sərvətlərindən səmərəli istifadə üzrə kompleks proqram və silsilə layihələri daim uğurla həyata keçirmişdir”. 

Həmin sərəncamın muxtar respublikamızda icrasını təmin etmək məqsədilə Naxçıvan Muxtar Respublikası Ali Məslisinin Sədri  cənab Vasif Talıbovun 2017-ci il 10 fevral tarixli Sərəncamı ilə “Akademik Həsən Əliyevin 110 illik yubileyinin Naxçıvan Muxtar Respublikasında keçirilməsi ilə əlaqədar Tədbirlər Planı” təsdiq edilib. Tədbirlər planına əsasən il ərzində muxtar respublikada müxtəlif tədbirlərin keçirilməsi nəzərdə tutulub.

Bu günlərdə Sankt-Peterburq Dövlət Universitetində keçirilən “Mendeleyev – 2017” Beynəlxalq Konfransda Azərbaycanı AMEA Naxçıvan Bölməsinin əməkdaşları təmsil ediblər.
Rusiya Federasiyasının bir çox şəhərlərindən, o cümlədən Almaniyadan, İsveçrədən, Qazaxıstandan, Belarusdan nüfuzlu elm adamlarının qatıldığı konfransda bölmənin Təbii Ehtiyatlar İnstitutunun İqtisadiyyat şöbəsinin müdiri, iqtisadiyyat üzrə fəlsəfə doktoru Sevinc Cabbarova, həmin institutun Mineral xammalın kimyası və texnologiyası laboratoriyasının böyük elmi işçisi, dosent Aliyə Rzayeva və Sorbsiya prosesləri laboratoriyasının elmi işçisi Mahnur Cəfərli iştirak ediblər.
Beynəlxalq tədbirdə həmyerlilərimizin “Naxçıvan Muxtar Respublikasında sənaye məhsullarının istehsalında yerli xammaldan istifadə”, “Sürmə indium selenidin sintez şəraitinin öyrənilməsi”, “Gallium (III), Bismut (III) və Sürmə (V)-nin azosafraninlərlə ekstraksiyalı atom-absorbsiyalı təyini” mövzularında çıxışları konfrans iştirakçıları tərəfindən rəğbətlə qarşılanıb, məruzələr ətrafında ciddi müzakirələr aparılıb.
Hər üç gənc tədqiqatçımızın çıxış etdikləri mövzuların elmi dəyəri nəzərə alınaraq “Mendeleyev – 2017” Beynəlxalq Konfransının sertifikatına layiq görülüb.

AMEA Naxçıvan Bölməsinin
İnformasiya şöbəsi

AMEA Naxçıvan Bölməsində görkəmli folklorşünas alim, professor Məmmədhüseyn Təhmasibin 110 illik yubileyinə həsr edilən elmi konfrans keçirilib.
AMEA Naxçıvan Bölməsi, Naxçıvan Muxtar Respublikası Mədəniyyət və Turizm Nazirliyi, Naxçıvan Muxtar Respublikası Yazıçılar Birliyi tərəfindən təşkil olunan tədbirdə bölmənin sədri, akademik İsmayıl Hacıyev görkəm­li alimin həyat və yaradıcılığından, folklorşünaslıq sahəsindəki əvəzolunmaz xidmətlərindən söz açıb. O bil­dirib ki, folklorumuzu sistemləşdirən, toplayan və Azərbaycanda folklorşünaslıq məktəbi yaradan professor Məmmədhüseyn Təhmasib Azərbaycan tarixinin, etno­qrafiyasının, toponiminin, coğrafiyasının mükəmməl bilicisi olub. Alimin apardığı elmi-tədqiqat işləri bu gün də Azərbaycan ədəbiyyatşünaslığı üçün dəyərli mənbədir. Şifahi xalq ədəbiyyatının tədqiqində böyük xidmətləri olan alim gərgin zəhməti sayəsində müxtəlif janrlı tədqiqat əsərləri yazaraq nəşr etdirib. Eyni zamanda o, dastanlarımızın toplanılması sahəsində də ciddi işlər görüb.
Qeyd olunub ki, Məmmədhüseyn Təhmasibin rəhbərliyi ilə şifahi xalq ədəbiyyatımızın qədim və zəngin janrı olan dastanlarımızın müxtəlif variantları yazıya alınıb, 5 cildlik “Azərbaycan dastanları” çap edilib. Kitablarda dastanlarımızdakı adlar araşdırılıb və o adlara aydınlıq gətirilib. Eyni zamanda onun “Bir qalanın sirri”, “Onu bağışlamaq olarmı?” ssenariləri əsasında eyni­adlı filmlər çəkilib, “Bahar”, “Aslan yatağı”, “Çiçəklənən arzular” və digər pyes-nağılları teatr səhnələrində uğurla tamaşaya qoyulub.