Naxçıvan şəhərində fəaliyyət göstərən ümumtəhsil məktəblərinin texniki işçilərinin iştirakı ilə maarifləndirici tədbir keçirilib.
Tədbiri giriş sözü ilə Naxçıvan Şəhər Təhsil Şöbəsinin müdiri Elşən Qəbulov açaraq bildirib ki, bu gün ölkəmizdə, eləcə də muxtar respublikamızda təhsilin inkişafına xüsusi diqqət və qayğı göstərilir. Təhsil müəssisələri üçün müasir üslubda yeni inzibati binalar tikilir, təhsil ocaqları üçün zəruri şərait yaradılır, tədris prosesində ən yeni texnologiyalar tətbiq olunur.

Tədbirdə Naxçıvan Şəhər Polis İdarəsinin rəis əvəzi, polkovnik-leytenant Kamil Məmmədəliyev və Fövqəladə Hallar Nazirliyinin əməkdaşı, kapitan Rəcəb Səfərov çıxış ediblər. Çıxışlarda bildirilib ki, hər bir müəssisədə olduğu kimi, təhsil müəssisələrində də qaz və texniki təhlükəsizlik, eləcə də yanğın təhlükəsizliyi qaydalarına əməl olunması qarşıda duran vəzifələrdən biridir. Buna görə də iş günü və dərslər qurtardıqdan sonra növbətçi işıqlandırma və qurğuları istisna olmaqla, bütün elektrik qurğu və cihazlarının dövriyyədən ayrılması, həmçinin mövcud yanğınsöndürmə qurğuları və vasitələrinin daim istifadə üçün yararlı vəziyyətdə saxlanması mövzusunda mütəmadi olaraq maarifləndirici tədbirlər həyata keçirilir.
Qeyd edilib ki, qarşıdan gələn qış mövsümü ərzində təhsil müəssisələrində yanğın təhlükəsizliyi tədbirlərinin həyata keçirilməsi diqqət mərkəzində saxlanılmalıdır. Bütün inzibati binalarda olduğu kimi, təhsil müəssisələrində də mövsümə hazırlıqla bağlı bir sıra zəruri tədbirlər həyata keçirilməlidir. Belə ki, qış mövsümü başlanmazdan əvvəl bütün isitmə qurğuları, cihazları diqqətlə yoxlanılmalı nasazlıqlar aradan qaldırılmalıdır. Nasaz soba və isitmə cihazlarının istismar olunmasına yol verilməməlidir. Qazanxanalarda qurğulara texniki xidmət göstərilməli, nasaz cihaz və avadanlıqlar təmir olunmalı və ya yenisi ilə əvəz edilməli, qazanxanaların yanğın təhlükəsizliyi üçün zəruri tədbirlər görülməlidir.
Sonda iştirakçıları maraqlandıran suallar cavablandırılıb.

 Nail ƏSGƏROV