Çempionluq yolunda əmin addımlarla irəliləyən “Araz-Naxçıvan” futbol komandası növbəti qələbəsini bayram edib. Səfərdə “Karvan” futbol komandasının qonağı olan muxtar respublika klubu 1:3 hesablı qələbə qazanmaqla cari mövsümdə qalibiyyət sayını 22-yə yüksəltdi və liderliyini davam etdirdi. Bununla, qırmızı-ağlar Yevlaxda qazandıqları qələbə sayəsində həm turnir cədvəlindəki mövqelərini qorudular, həm də çempion olmaq üçün əla şans əldə etdilər.

Qələbəyə heç nə mane ola bilmədi

Yevlaxda keçirilən oyun böyük əhəmiyyət kəsb edirdi. Ən yaxın izləyicisini 9 xal qabaqlayan “Araz-Naxçıvan”a bu görüşün qalibi olacağı təqdirdə çempionluq üçün yalnız 1 xal kifayət edirdi. Buna görə məhz “Karvan” üzərində mütləq qələbəni qarşısına məqsəd qoyan komandanın baş məşqçisi Əsgər Abdullayev əsas heyəti meydana buraxmışdı. Qapıda Emil Balayevə güvənən Ə.Abdullayev müdafiəni yenə Ruslan-Mikayıl-Cavid-Əlimirzə kvartetinə tapşırmışdı. Yarımmüdafiə xəttində Eşqin-Akif-Elgiz triosu həmişəki mövqeyində qalmışdı. Bu dəfə Tərlan Xəlilov həmişəki mövqeyindən fərqli yerdə çıxış edirdi. Hücumun sol cinahında özünə yer alan  T.Xəlilovla yanaşı, Elmin Çobanov və David Canıyev də rəqibin müdafiə xəttini yarmağa çalışırdı.

Naxçıvan Muxtar Respublikası Gənc­lər və İdman Nazirliyi ilə Futbol Federasiyasının birgə təşkil etdiyi Naxçıvan Muxtar Respublika çempionatına yekun vurulub. Çempionatda 10 komanda iştirak edib ki, bunların 3-ü Naxçıvan şəhərinin təmsilçiləri olub. Digər 7 komanda isə muxtar respublikanın rayonlarından qatılıb. Ötən ilin sentyabr ayında başlayan uzun marafon bu həftə başa çatıb. Budəfəki çempionluq marafonu bir çox xüsusiyyəti ilə digər mövsümlərdən fərqlənib. İlk olaraq, yenidən Azərbaycan çempionatında iştirak edən “Araz-Naxçıvan”ın əvəzedici heyəti “Araz-2” adı ilə muxtar respublika birinciliyində öz qüvvəsini sınayıb. Digər tərəfdən isə uzun müddətdən sonra çempionun adı dəyişib. Belə ki, 7 illik “DİN FK” hegemonluğuna son qoyulub. Bu uğura Naxçıvan Dövlət Universitetinin “Universitet” komandası imza atıb.
Naxçıvan Muxtar Respublika çempionatının 2013-2014-cü illər mövsümündə feyr-pleyə ən çox riayət edən komanda “Kəngərli” olub. Komandanın futbolçuları cəmi 9 sarı vərəqə ilə cəzalandırılıblar.   
 

Xəbərlər şöbəsi

Yüngül atletika üzrə Naxçıvan şəhər ümumtəhsil məktəblərinin şəhər birinciliyinə yekun vurulub. Naxçıvan Şəhər Gənclər və İdman İdarəsi, Təhsil Şöbəsi və “Rabitəçi” idman klubunun birgə təşkil etdiyi birincilikdə 17 məktəbin şagirdləri qüvvələrini sınayıblar. Qızlar və oğlanlardan ibarət olan komandalar 6 nəfərdən təşkil olunub və onlar birincilik uğrunda müəyyən edilmiş məsafələri hamıdan tez qaçmağa çalışıblar. Ümumilikdə, 100-ə yaxın gənc atletin mübarizə apardığı birincilik reqlamentə əsasən, 100, 200 və 400 metr məsafələrə qaçış üzrə təşkil olunub. Naxçıvan şəhərindəki 9 nömrəli tam orta məktəbin şagirdləri hamıdan tez finiş xəttinə çataraq turnirin qalibi adını qazanıblar. Yarışı 3 nömrəli tam orta məktəbin komandası ikinci, 16 nömrəli tam orta məktəbin komandası isə üçüncü başa vurub.

Xəbərlər şöbəsi

Aprel ayının 24-də Babək Rayon Uşaq-Gənclər Şahmat Məktəbində Azərbaycan xalqının ümummilli lideri Heydər Əliyevin anadan olmasının 91-ci ildönümü  münasibətilə Babək rayonunun ümumtəhsil məktəbləri arasında şahmat yarışının II mərhələsi  keçirilmişdir. Babək Rayon İcra Hakimiyyəti və rayon Təhsil Şöbəsinin tədbirlər planına əsasən  təşkil olunan yarışda 6 məktəbin komandası iştirak etmişdir.      
Yarış başlanmazdan əvvəl rayon Təhsil Şöbəsinin məsləhətçisi Rasim Eyvazov  çıxış edərək bildirmişdir ki, ümummilli lider Heydər Əliyevin anadan olmasının 91-ci ildönümü Babək rayonunda silsilə tədbirlərlə geniş qeyd olunur. Zonalarda start götürən şahmat  yarışı da bu tədbirlərin davamıdır.  
Babək Rayon Uşaq-Gənclər Şahmat Məktəbinin baş təlimatçısı  Zakir Quliyev yarışın qaydaları barədə məlumat vermişdir.  
Yarışın nəticələrinə görə, Hacıvar kənd tam orta məktəbinin komandası birinci, Güznüt kənd  tam orta məktəbinin komandası ikinci, Yarımca  kənd tam orta məktəbinin komandası üçüncü olmuşdur.
Qalib komanda mayın 5-də keçiriləcək final mərhələsində iştirak edəcəkdir.  
Həmin gün adıçəkilən tədbirlər planına əsasən, rayonun ümumtəhsil məktəbləri arasında mini-futbol yarışı keçirilmişdir. Kərimbəyli kənd tam orta məktəbinin komandası rəqiblərini məğlub edərək mayın 8-də keçiriləcək final mərhələsində  iştirak etmək hüququ qazanmışdır.

Xəbərlər şöbəsi

Naxçıvan Muxtar Respublikası Gənclər və İdman Nazirliyi, Təhsil Nazirliyi və Səfərbərlik və Hərbi Xidmətə Çağırış üzrə Dövlət Xidmətinin birgə təşkil etdiyi “Vətənin müdafiəsinə hazıram” poliatlon çoxnövçülük üzrə Naxçıvan Muxtar Respublika birinciliyinin final mərhələsinə yekun vurulub.
Şərur, Sədərək, Babək, Ordubad, Culfa, Şahbuz, Kəngərli rayonları və Naxçıvan şəhər məktəblilərinin mübarizə apardığı yarışda hər komanda 5 nəfərdən ibarət heyət formalaşdırıb. Birincilik uğrunda mübarizədə məktəblilər yarışın reqlamentinə əsasən, 6 növdə qüvvələrini sınayıblar. İlk olaraq, onlar 100 metr məsafəyə qaçmaqda sürətlərini nümayiş etdiriblərsə, 2000 metrdə daha çox onların dözümlülüyü yoxlanılıb. Digər növlərdə isə məktəbli gənclər daha çox fiziki güclərinə bel bağlayıblar. Əvvəlcə turnikdə dartınan yarış iştirakçıları ardınca idman nərdivanını keçmə və paralel qollarda qolların bükülüb-açılması mərhələsində komandalarına xal qazandırmağa çalışıblar. Son olaraq, qumbaraatma mərhələsini də uğurla başa vuran iştirakçılar birinciliyin qalibinə şahidlik ediblər. Belə ki, cari ildə “Vətənin müdafiəsinə hazı­r­am” poliatlon çoxnövçülük üzrə birinciliyin final mərhələsinin qalibi Şərur komandası olub. Komanda bu gün Mingəçevir şəhərində keçiriləcək Azərbaycan çempionatında Naxçıvan Muxtar Respublikasını təmsil edəcəkdir.

Ceyhun MƏMMƏDOV

Azərbaycan Respublikası gömrük orqanları arasında təşkil olunan futzal üzrə növbəti birincilikdə birinci və ikinci turun oyunları arxada qalıb. Ümummilli lider Heydər Əliyevin anadan olmasının 91-ci, Azərbaycan Respublikası Dövlət Gömrük Komitəsinin yaradılmasının   22-ci ildönümünə həsr olunan yarışda Naxçıvan Muxtar Respublikası Dövlət Gömrük Komitəsinin komandası “B” qrupunda mübarizə aparıb. Qeyd edək ki, 16 komandanın mübarizə apardığı ənənəvi yarışda bu dəfə “A” qrupunun oyunları Qazaxda, “B” qrupunun oyunları isə bu günlərdə İsmayıllıda baş tutub.
Qrup oyunlarında Bakı Baş Gömrük İdarəsinin komandası ilə (“BBGİ”) bərabərə qalan (3:3) və digər rəqiblərinə böyük üstünlüklə qalib gələn komandamız yarışın dörddəbir final mərhələsində “Astara”nı (Astara Gömrük İdarəsi) mübarizədən kənarlaşdırıb: 8:0.
Qrup oyununda “sülh”ə razılaşan “Naxçıvan” və “BBGİ” komandaları finalın bir addımlığında yenidən üz-üzə gəliblər. Erkən final kimi də dəyərləndirilən qarşılaşmada Naxçıvan gömrükçüləri matçın 10-cu dəqiqəsində Aynar İsmayıl­ovla önə keçib. Birinci hissənin tamamında Kamil Hacıyev və Vilayət Mehralıyev hərəyə bir dəfə fərqlənməklə fərqi üç topa çatdırıblar. Rəqib futzalçıların bütün cəhdləri ikinci hissədə də nəticəsiz qalıb. Əvəzində Asif Eyvazov yekun nəticəni müəyyən edib: 4:0.
Final qarşılaşması ümummilli liderimizin doğum günündə – may ayının 10-da Bakı şəhərindəki ABU ARENAda keçiriləcək. Həlledici oyunda “Naxçıvan” və “HNBGİ” (Hava Nəqliyyatında Baş Gömrük İdarəsi) komandaları üz-üzə gələcəklər.

Naxçıvan Muxtar Respublikası
Dövlət Gömrük Komitəsinin mətbuat xidməti

Naxçıvan Dövlət Universitetində Naxçıvan Muxtar Respublikası Gənclər və İdman Nazirliyinin və Naxçıvan Muxtar Respublikası Voleybol Federasiyasının təşkilatçılığı ilə “Zərərli vərdişlərə “yox” deyək, həmişə sağlam olaq” devizi altında voleybol yarışı keçirilib. Yarış başlanmazdan əvvəl universitetin tərbiyə işləri üzrə prorektoru, professor Məmməd Rzayev və Naxçıvan Muxtar Respublikası Voleybol Federasiyasının sədr  müavini Aydın Mirzəyev çıxışlarında bildiriblər ki, ölkəmizdə idman sahəsində həyata keçirilən tədbirlər Azərbaycanın ayrılmaz tərkib hissəsi olan muxtar respublikada da öz bəhrəsini verməkdədir. Çıxış edənlər bölgədə gənclərə və idmana göstərilən dövlət qayğısından, idman sahəsində qazanılan uğurlardan, idmanın kütləviliyinin təmin olunması, tələbələrin asudə vaxtlarının səmərəli təşkili kimi zəruri məsələlərdən də danışıblar.
Sonra voleybol yarışına start verilib. Culfa rayonunun və Naxçıvan Dövlət Universitetinin oğlanlardan ibarət voleybol komandaları arasında keçən gərgin yarış 3:1 hesabı ilə Naxçıvan Dövlət Universiteti komandasının qələbəsi ilə başa çatıb. Oyunun sonunda iştirakçılara hədiyyələr təqdim edilib.

Mina QASIMOVA

Ötən həftə Naxçıvan Muxtar Respublikasının futbol həvəskarları daha bir turnirə şahidlik etdilər. Bu dəfə yaşıl meydanlara peşəkar futbolçular yox, bu yolda əmin addımlarla irəliləmək istəyən yeniyetmə məktəblilər çıxdılar. İlk olaraq qeyd edək ki, ölkə Prezidenti cənab İlham Əliyevin Sərəncamı ilə təsdiq edilmiş “2005-2015-ci illərdə Azərbaycanda futbolun inkişafına dair Dövlət Proqramı”na əsasən, son illərdə muxtar respublikada bu idman növünün inkişafı üçün bir sıra tədbirlər görülüb. Bu günlərdə Azərbaycan Futbol Federasiyaları Assosiasiyası və Naxçıvan Muxtar Respublikası Gənclər və İdman Nazirliyinin birgə təşkil etdiyi Azərbaycan çempionatının Naxçıvan üzrə zona birinciliyinə yekun vurulub.

Futbol üzrə Azərbaycan I divizionunun lideri “Araz-Naxçıvan” futbol komandası çempionatın 26-cı turunu da qələbə ilə başa vurdu. Doğma azarkeşlər önündə Qazaxın “Göyəzən” futbol komandasını qəbul edən qırmızı-ağlar böyükhesablı qələbə qazanmaqla çempionluğa bir addım daha yaxınlaşdı. İndi komandamızın mövsümü qızıl medallarla başa vurması üçün yalnız 4 xala ehtiyacı var. Mövsümün başa çatmasına 4 tur qaldığını nəzərə alsaq, o zaman indidən “Araz-Naxçıvan”ı təbrik etmək olar.

Turnir cədvəlinin autsayderi “Göyəzən” qarşısına “Araz-Naxçıvan” futbol komandasının baş məşqçisi Əsgər Abdullayevin fərqli heyətlə çıxacağı gözlənilirdi. Birincisi, komandamızda cəzalı sayının çox olması bunu deməyə əsas verirdi. Qırmızı vərəqə ilə cəzalanan Bəxtiyar Soltanov və Ruslan Abıyevə ötən tur sarı vərəqə limitini dolduran Akif Tağıyev və Əlimirzə Daşzərini də qoşulmuşdu. İkincisi isə bir qədər zəif təsir bağışlayan Qazax təmsilçisi önündə əsas heyət futbolçularının istirahət edəcəyi gözlənilirdi.

Ümummilli lider Heydər Əliyevin anadan olmasının 91-ci ildönümü münasibətilə Babək rayonundakı ümumtəhsil məktəblərinin şagirdləri arasında şahmat üzrə rayon birinciliyi keçirilir. Dünən Babək Rayon Uşaq-Gənclər Şahmat Məktəbində keçirilən yarışın birinci zona turnirinə start verilib. Yarış başlanmazdan əvvəl rayon İcra Hakimiyyətinin nümayəndəsi Yusif Mahmudov, Təhsil Şöbəsinin əməkdaşı Nicat Fətullayev, Babək qəsəbə tam orta məktəbinin direktoru Əli Hacıyev çıxış edərək muxtar respublikamızda gənclərin asudə vaxtlarının səmərəli təşkili üçün həyata keçirilən tədbirlərdən, idmana, o cümlədən şahmatın inkişafına göstərilən qayğıdan bəhs ediblər.
Sonra oyunun baş hakimi Zakir Quliyev yarışın qaydaları barədə məlumat verib. Hər bir yarış iştirakçısı şahmat taxtası arxasına keçərək bacarığını nümayiş etdirib.
Qeyd edək ki, yarışda rayonun 6 ümumtəhsil məktəbinin şagirdləri iştirak ediblər. Qaliblər may ayında keçiriləcək final mərhələsinə vəsiqə qazanıblar.

Xəbərlər şöbəsi

Çempionluğunu qeyd etməyə hazırlaşan “Araz-Naxçıvan” futbol komandası sabah futbol üzrə Azərbaycan I divizionunun 26-cı turu çərçivəsində Qazaxın “Göyəzən” klubunu qəbul edəcək. Çempionatın son ərəfəsində qırmızı-ağlar doğma arenada keçiriləcək matçı da qalib başa vurub uğurlar seriyasını davam etdirmək niyyətindədir. Lakin “Göyəzən”ə qarşı oynanılacaq matça komandamız itki­lərlə çıxacaq. Belə ki, 4 oyunluq cəza alan Bəxtiyar Soltan­ovla yanaşı, müdafiəçimiz Ruslan Abıyev də oyunu buraxmalı olacaq. “Lokomotiv”lə görüşdə birbaşa qırmızı vərəqə alan müdafiəçimiz 1 oyunluq cəzalanıb. Müdafiədə boşluqlar bununla kifayətlənmir. Sol cinahda müdafiəçimiz Əlimirzə Daşzərini də sarı vərəqə limitinə görə oyunu azarkeş qismində izləyəcək. Yarımmüdafiə xəttində Akif Tağıyevin də yoxluğu baş məşqçi Əsgər Abdullayevi qayğılandırmaya bilməz.

Moldovanın paytaxtı Kişinyovda keçirilən budo üzrə Avropa çempionatı başa çatıb. Qitə birinciliyinə yollanan millimizin tərkibində muxtar respublikamızın idmançısı Həsən Əliyev də çıxış edib. Çempionatın sonuncu günü həmyerlimiz 95 kiloqram çəkidə birincilik uğrunda mübarizə aparıb. Finalda Həsən Əliyevin rəqibi yarışa ev sahibliyi edən Moldova idmançısı olub. Həlledici görüşdə daha yaxşı döyüş nümayiş etdirən təmsilçimiz rəqibi üzərində tam üstünlüklə qələbə qazanıb. Avropa çempionu adını qazanan Həsən Əliyev fəxri kürsünün ən yüksək zirvəsinə qalxıb, himnimizin sədaları altında bayrağımızı ucaldıb.

Ceyhun MƏMMƏDOV

Ötən həftə Balakən Rayon Olimpiya-İdman Kompleksində məktəblilərin IX respublika oyunlarının pro­qramına daxil olan sərbəst güləş üzrə yarış keçirilib. Turnirdə Naxçıvan Muxtar Respublikasının da komandası iştirak edib. Güləşçilərimizdən 35 kiloqram çəkidə mübarizə aparan Sənan Zeynalov finala qədər yüksəlsə də, həlledici görüşdə gümüş medalla kifayətlənib. 53 kiloqram çəki dərəcəsində öz qüvvəsini sınayan Alı Məmmədov isə yarışda üçüncü yerə çıxaraq adını mükafatçılar sırasına yazdırıb. Digər idmançılarımızdan 70 kiloqram çəki dərəcəsində döşək üzərinə çıxan Seyran Hüseynli və 73 kiloqram çəki dərəcəsində yarışan Sərxan Əliyev də üçüncü yerlərlə kifayətlənərək bürünc medala sahib çıxıblar.

Ceyhun MƏMMƏDOV

Naxçıvan Muxtar Respublikası Paralimpiya Federasiyası Gənclər və İdman Nazirliyi ilə birgə Naxçıvan Atıcılıq Mərkəzində Vətənimizin suverenliyi və ərazi bütövlüyümüzün müdafiəsi zamanı əlil olmuş vətəndaşların iştirakı ilə idmanın peyntbol növü üzrə yarış keçirib.
Tədbirdə Paralimpiya Federasiyasının, Gənclər və İdman Nazirliyinin nümayəndələri çıxış edərək qeyd ediblər ki, məhdud fiziki imkanlı şəxslər üçün sağlam həyat tərzinin təmin edilməsi, onların muxtar respublikanın idman həyatına daha fəal inteqrasiyası, habelə məhdud fiziki imkanlı şəxslərin yeni idman növlərinə cəlbi daim diqqət mərkəzindədir.
Peyntbol üzrə yarışda hər biri 4 nəfərdən ibarət 5 komanda iştirak edib.
Yarışın qalibi hakimlər heyəti tərəfindən müəyyən edilib. Qalib gələn komandaya Naxçıvan Muxtar Respublikası Gənclər və İdman Nazirliyinin diplomları və Paralimpiya Federasiyasının hədiyyələri verilib, digər yarış iştirakçılarına isə həvəsləndirici hədiyyələr təqdim olunub.

Ceyhun MƏMMƏDOV

Futbol üzrə Azərbaycan I divizionunun 25-ci turu çərçivəsində “Araz-Naxçıvan” futbol komandası azarkeşlərini yenə sevindirdi. Səfərdə “Lokomotiv”in qonağı olan qırmızı-ağlar 3 xalı 3 qolla əldə etdilər. Biləcəridə keçirilən oyundakı qələbədən sonra əldə edilən xallar komandamızı çempionluğa bir addım da yaxınlaşdırdı.

Bakıya yollanarkən “Araz-Naxçıvan” komandasının baş məşqçisi Əsgər Abdullayev 3 xalın vacibliyindən xəbərdar idi və mövsümün son turlarında itiriləcək hər hansı bir xalın nə qədər böyük əhəmiyyəti olduğunu yaxşı bilirdi. Odur ki, yetirmələrinə mütləq şəkildə qələbə qazanmağı tapşıran baş məşqçi heyətə də, necə deyərlər, əl gəzdirməli olmuşdu. Paytaxtda keçiriləcək oyunun ilk 18-liyinə Bəxtiyar Soltanov, Əziz Hüseynov, Elvin Ağamalov və Eşqin Quliyev daxil edilməzkən, Ruslan Zamanov oyunu kənardan izləməli oldu. B.Soltanovun cəzalı olması onun oyunda iştirakına imkan verməmişdi.

Böyük idmançılar bütün dünyaya məxsusdurlar. Dünyada tanınmış məşhur idmançılar isə onlara aid edilən bu deyimi daim bəşəri düşüncə olaraq yaddaşlara həkk etməyə çalışmışlar. Azarkeş kimi izlədiyimiz idmançıların bizə bəxş etdikləri sevinc hisslərini bəzən heç bir şeyə dəyişmək istəmirik. Və bu sevinc, qazanılan uğur tarixə yazılır. Xüsusilə paralimpiyaçıların əzmkarlıqla əldə etdikləri uğur, bu uğura görə yaşanan sevinc tarixin yaddaşına əbədi həkk olunur.

Ötən gün Naxçıvan Atıcılıq Mərkəzində Naxçıvan Muxtar Respublikası Gənclər və İdman Nazirliyi, Təhsil Nazirliyi, Fövqəladə Hallar Nazirliyi, Səfərbərlik və Hərbi Xidmətə Çağırış üzrə Dövlət Xidməti və Əlahiddə Ümumqoşun Ordusunun təşkilatçılığı ilə gənclərin hərbi-vətənpərvərlik tərbiyəsində müstəsna əhəmiyyəti olan “Şahin” hərbi idman oyununun Naxçıvan Muxtar Respublika birinciliyi keçirilib.
Əvvəlcə Azərbaycan Respublikasının Dövlət himni səsləndirilib. Sonra Gənc­lər və İdman Nazirliyinin əməkdaşı Canməmməd Canməmmədov yarışı açıq elan edib və birincilikdə iştirak edən gənclərə uğurlar arzulayıb.
Muxtar respublika birinciliyində 9 komanda mübarizə aparırdı. “Naxçıvan-1”, “Naxçıvan-2” komandaları ilə yanaşı, Şərur, Babək, Sədərək, Ordubad, Culfa, Şahbuz və Kəngərli komandaları da bu yarışda öz qüvvələrini sınayıblar. Digər mərhələlərdən fərqli olaraq, bu dəfə məktəblilər daha çətin sınaqlardan keçməli olublar. Belə ki, komandalar 8 mərhələdə öz güclərini nümayiş etdiriblər. Əvvəlcə onlar sıra hazırlığında özlərini göstərdilərsə, digər mərhələlərdə darağa patrondoldurma və boşaltma, avtomatı sökmək və yığmaq, tüfəngdən hədəfə atəş açmaq, fiziki hazırlıq və maneələrin dəf olunması mərhələlərinin öhdəsindən gəlməyə çalışıblar. Son iki mərhələdə isə məktəbli gənclər münsiflər qarşısında öz bacarıqlarını müdafiə hazırlığı və sanitarların yarışında nümayiş etdiriblər.
Qeyd edək ki, zona birinciliyinin qalibləri olan Ordubad rayonunun və Naxçıvan şəhərinin “Naxçıvan-1” komandaları may ayında Bakıda keçiriləcək ümumrespublika birinciliyinə vəsiqə qazanıblar.

Ceyhun MƏMMƏDOV

Futbol üzrə Azərbaycan I divizionunun 25-ci turu çərçivəsində “Araz-Naxçıvan” futbol komandası səfərdə Biləcərinin “Lokomotiv” komandasının qonağı olacaq.
Ötən turdakı heç-heçədən sonra bu oyuna ciddi şəkildə hazırlaşan Əsgər Abdullayevin yetirmələri gündə iki dəfə olmaqla məşqlərini davam etdirirlər. Komandamız Naxçıvanda son məşqinə bu gün çıxacaq. Muxtar respublika stadionunda keçiriləcək məşqdən sonra futbolçular səfər hazırlıqlarına başlayacaqlar. Sabah isə komandamız Bakıya yola düşəcək və günün ikinci yarısında “Bakı” futbol klubunun (FK) təlim-məşq bazasının stadionunda məşq prosesini davam etdirəcək.
Komandadakı ab-havaya gəlincə, çempionluq yarışında liderliyi qorumaq üçün bütün qüvvələrini səfərbər edən qırmızı-ağlarda əsas məqsəd səfər matçından üç xalla qayıtmaqdır. “Araz-Naxçıvan”ın heyətində yeganə itki isə Bəxtiyar Soltanovdur. Belə ki, “Neftçala” ilə görüşdə qırmızı vərəqə alan futbolçumuza İntizam Komitəsi 4 oyunluq cəza verib.
Qeyd edək ki, “Lokomotiv”-“Araz-Naxçıvan” matçı aprelin 13-ü saat 15⁰⁰-də “Bakı” FK-nın təlim-məşq bazasının stadionunda oynanılacaq.

Ceyhun MƏMMƏDOV

Naxçıvan Muxtar Respublikası Basketbol Federasiyası daha bir yoldaşlıq oyununun keçirilməsinə təşkilatçılıq edib.
Dünən Sədərək və Şahbuz basketbolçuları qarşılaşıblar. “Zərərli vərdişlərə “yox” deyək, həmişə sağlam olaq” devizi altında keçirilən matçdan öncə çıxış edən federasiyanın sədr müavini Ənvər Məmmədov basketbolun muxtar respublika idmanında mühüm yerə sahib olduğunu və bu idman növünün gündən-günə genişləndiyini bildirib.
Sonra meydana çıxan top sehrbazları öz bacarıqlarını nümayiş etdiriblər. Bu görüşdə daha fəal olan sədərəklilər rəqibini 43:37 hesabı ilə məğlubiyyətə uğradıblar.
Görüşdən sonra federasiya tərəfindən fərqlənən idmançılara hədiyyələr verilib.

Ceyhun MƏMMƏDOV

Aprel ayının 14-dən 24-dək Bolqarıstanın paytaxtı Sofiya şəhərində keçiriləcək boks üzrə dünya çempionatında Naxçıvan boks məktəbinin yetirməsi Tayfur Əliyev də iştirak edəcək.
Naxçıvan Muxtar Respublikası Boks Federasiyasından aldığımız məlumata görə, həmyerlimiz dünya çempionatına hazırlıq mərhələsində ölkəmizin paytaxtı Bakı və Qəbələ şəhərlərində keçirilən təlim-məşq toplantılarına qatılıb. Aprelin 3-də isə idmançımız Bolqarıstanın paytaxtı Sofiya şəhərinə yollanıb. Gənc boksçumuz aprelin 14-dək Sofiya şəhərində keçiriləcək təlim-məşq toplantılarında iştirak edəcək.
Məlumat üçün bildirək ki, Tayfur Əliyev 3 dəfə Azərbaycan birinciliyinin, 2 dəfə Avropa birinciliyinin qızıl və gümüş mükafatçısı olub.

Xəbərlər şöbəsi

Dünən Naxçıvan Muxtar Respublikası Gənclər və İdman Nazirliyi, Təhsil Nazirliyi, Fövqəladə Hallar Nazirliyi, Səfərbərlik və Hərbi Xidmətə Çağırış üzrə Dövlət Xidməti və Əlahiddə Ümumqoşun Ordusunun təşkilatçılığı ilə “Cəsurlar” hərbi idman və turizm oyununun muxtar respublika zona birinciliyi keçirilib. Əvvəlcə Azərbaycan Respublikasının Dövlət himni səsləndirilib.
Gənclər və İdman Nazirliyinin əməkdaşı Canməmməd Canməmmədov yarışı açıq elan etdikdən sonra turnirin reqlamenti barədə məlumat verib.
Sonra Təhsil Nazirliyinin əməkdaşı Elxan Babayev, Əlahiddə Ümumqoşun Ordusunun zabiti, polkovnik-leytenant Mirqiyas Rüstəmov çıxış ediblər.
Muxtar respublika birinciliyində 9 komanda öz gücünü sınayıb. “Naxçıvan-1” və “Naxçıvan-2” komandaları Naxçıvan şəhərini təmsil etdiyi halda, digər 7 komanda muxtar respublikamızın rayonlarını bu yarışda layiqincə təmsil etməyə çalışıb. Komandalar reqlamentə uyğun olaraq, 10 növ üzrə yarışıblar. Belə ki, gənc məktəblilər ilk olaraq sıra hazırlığında öz bacarıqlarını göstəriblərsə, digər mərhələdə onlar daha çətin sınaq qarşısına çıxıblar. Taxta hasarın üstündən keçməklə maneənin dəf olunması, körpünün üstündən keçməklə xəndəyin dəf olunması, kəndir vasitəsilə təhlükəli zolağın qət olunması, kəndir vasitəsilə yüksəkliyə dırmanma, yüksəklikdən enmə və yerdə sürünməklə maneənin dəf olunması mərhələləri məktəbli gənclərə əzmkarlıq nümayiş etdirməyə fürsət verib. Bununla yanaşı, yarış iştirakçıları istehkamdan hədəfə qumbaraatma, zəhərli zonanın dəf olunması, yaralının döyüş zonasından çıxarılması və turist çadırının qurulması mərhələlərində də öz bacarıqlarını nümayiş etdiriblər. Yekun nəticəyə görə, Ordubad şəhərindəki 3 nömrəli tam orta məktəbin komandası birinciliyin qalibi olub. Culfa rayon Saltaq kənd tam orta məktəbinin komandası ilə Naxçıvan şəhərindəki 15 nömrəli tam orta məktəbin komandası ikinci və üçüncü yerləri bölüşüblər.
Qeyd edək ki, zona birinciliyinin qalibləri olan iki komanda may ayında Bakıda keçiriləcək respublika birinciliyinə vəsiqə qazanıblar.

Ceyhun MƏMMƏDOV

Futbol üzrə Azərbaycan I divizionunun 24-cü turu çərçivəsində “Araz-Naxçıvan” futbol komandası doğma azarkeşləri önündə “Neftçala” futbol komandasını qəbul edəcək. Hazır­da çempionata liderlik edən qırmızı-ağlar üçün bu matç böyük əhəmiyyət kəsb edir. Belə ki, muxtar respublika təmsilçisinin turnir cədvəlindəki ən yaxın izləyicisi məhz Neftçala klubudur. Rəqibini 9 xal qabaqlayan “Araz-Naxçıvan” bu görüşdə qalib gəldiyi təqdirdə çempionluğunu, demək olar ki, böyük ölçüdə sığortalamış olacaq.
“Araz-Naxçıvan” futbol komandasının baş məşqçisi Əsgər Abdullayevi matç öncəsi düşündürən məqam müdafiəçi Ruslan Zamanovun ötən tur “Qaradağ Lökbatan”la oyunda cari mövsümdə dördüncü sarı vərəqə alaraq cəzalı duruma düşməsidir. Bununla yanaşı, qırmızı-ağların heyətində zədəli futbolçunun olma­ması oyuna daha ciddi hazır­laşmağa zəmin yaradıb. “Neftçala” ilə oyunun hazırlıqlarına gəlincə, komandamız gündə bir dəfə olmaqla məşqlərini davam etdirir.
Rəqib komandanın muxtar respublikaya bu gün gələcəyi gözlənilir. “Neftçala”nın heyətində ən böyük itki isə hücumçu Aqşin Həşimovun cəzalı olmasıdır.
Qeyd edək ki, “Araz-Naxçıvan” – “Neftçala” görüşü aprelin 5-i, saat 15⁰⁰-də Naxçıvan Muxtar Respublika Stadionunda olacaq.

Xəbərlər şöbəsi

Onunla görüşəndə “Naxçıvan Muxtar Respublikasının əməkdar bədən tərbiyəsi və idman xadimi” fəxri adı ilə təltif olunduğunu hələ bilmirdi. Təbrik etdim. Sevincindən gözləri doldu. “Mən futbolla vaxtsız vidalaşdım. Amma ondan ayrılmadım. Naxçıvanda futbolun inkişafı üçün əlimdən gələni əsirgəmədim. Mənim bu kiçik xidmətimə dövlətimiz böyük qiymət verib. Məni ən çox sevindirən hadisə böyük futbola yenidən qayıtmaq olar deyə, düşünmüşəm: elə bil, futbola qayıtmışam”, – dedi.

Futbol bəzən ədalətsiz oyun kimi də qiymətləndirilir: oyunçuların zədələnmələri, baş verə biləcək bədbəxt hadisələr, məğlubiyyətlər, uğursuzluqdan sonra oyunçuların komandadan uzaqlaşdırılması və sair. Sadalanan bu “ədalətsizlik”lər bəzən tanınmış simaların karyeralarını vaxtından əvvəl bitirmələrinə səbəb olur. Keçmiş SSRİ dönəmində Naxçıvan futbolu bir yetirməsi ilə öyünməyə başlayırdı ki, “zədə epidemiyası” ondan da yan keçmədi.
İbrahim Rzayev Naxçıvan futbolunun ötən əsrin 80-90-cı illərində yetişdirdiyi ən istedadlı oyunçuların siyahısına başçılıq edirdi. Gənc yaşlarında onun mükəmməl oyunu keçmiş sovet məşqçilərinin diqqətindən yayınmamışdı.

Futbol üzrə Azərbaycan I divizionunun lideri olan “Araz-Naxçıvan” futbol komandası əldə etdiyi nəticələrlə Premyer-Liqaya doğru əmin addımlarla irəliləməkdədir. Ən yaxın izləyicisindən 11 xal irəlidə olan komandamızın elə həmin rəqibə qarşı keçirəcəyi matç maraqla gözlənilirdi. Çünki əldə ediləcək hər hansı uğurlu nəticə çempionluq yolunda mühüm rol oynayacaqdı. Digər tərəfdən, “Qaradağ Lökbatan”ın da birincilik uğrunda mübarizə aparması görüşə marağı daha da artırmışdı.

Stadion niyə dəyişdirildi?

“Araz-Naxçıvan” futbol komandası Bakıda keçirilən görüşdə bir çox təcrübəli futbolçusuna yer verməmişdi. Belə ki, nisbətən yüngül zədəsi olan Akif Tağıyev Naxçıvanda qalmış, Əlimirzə Daşzərini və İrfan Hüseynov isə 18-liyə salınmamışdı. Əvəzində isə komandanın baş məşqçisi Əsgər Abdullayev müdafiə xəttində Mikayıl-Ruslan-Tural-Ruslan kvartetinə şans vermişdi. Elgiz Kərimlinin önündə oynayan Eşqin Quliyev və Cavid Həsənov isə hücumların qurulmasında bilavasitə rol oynayırdı.

Futbol üzrə Azərbaycan I divizionunun 22-ci turu çərçivəsində “Araz-Naxçıvan” futbol komandası doğma arenada “MOİK”-i qəbul etdi. Bakı təmsilçisi ilə görüş xüsusi əhəmiyyət kəsb edirdi. Çünki çempionatın ilk dövrəsində paytaxtda keçirilən matçda muxtar respublika klubu hakimin son dəqiqələrdə rəqib qapısına təyin etdiyi penalti cəriməsi ilə minimal hesabla qələbə qazanmışdı. Bu, böyük səs-küyə səbəb olsa da, sonradan Hakimlər Komitəsinin verdiyi qərara əsasən, referinin son dəqiqədə lehimizə verdiyi penalti zərbəsi düzgün qiymətləndirilmişdi. Bu baxımdan muxtar respublika təmsilçisi birinci dövrədəki qələbənin təsadüfi olmadığını sübut etmək niyyətində idi.

Futbolçulara istirahət

Naxçıvan Muxtar Respublika Stadionunda keçirilən görüş böyük marağa səbəb oldu. İlk olaraq baş məşqçi Əsgər Abdullayev “Xəzər Lənkəran”la keçirilən görüşdən sonra bir çox futbolçuya bu oyunda istirahət vermişdi. Başda Tərlan Xəlilov və Ruslan Zamanov olmaqla bir çox oyunçu ilk 18-liyə alınmamışdı. Əvəzində isə baş məşqçi müdafiə xəttində Mikayıl Rəhimov və Ruslan Abıyevə bel bağlamışdı. Hücum xətti isə Elmin Çobanov, David Canıyev və Bəxtiyar Soltanova həvalə edilmişdi.

Futbol üzrə Azərbaycan kubokunun 1/4 final mərhələsinə yüksəlməklə tarix yazan “Araz-Naxçıvan” futbol komandası bu mərhələdə “Xəzər Lənkəran” futbol komandasına rəqib olmuşdu. “Ağsu” və “Simurq” futbol komandalarını mübarizədən kənarlaşdıran muxtar respublika klubunun Lənkəran təmsilçisi önündə mərhələ adlaması ehtimalı az dəyərləndirilirdi. Buna səbəb kimi cənub bölgəsi klubunun yarandığı 10 il müddətində Azərbaycan futbolunda bir çox ilkə imza atması, tanınmış məşqçiləri heyətinə cəlb etməsi, ən bahalı futbolçuların transferini gerçəkləşdirməsi göstərilirdi.

Futbol üzrə Azərbaycan I divizionunun 21-ci turu “Araz-Naxçıvan” futbol komandası üçün böyük əhəmiyyət kəsb edirdi. Çünki bu görüşdən üç gün öncə doğma arenada Azərbaycan kubokunun 1/4 final mərhələsində “Xəzər Lənkəran”la çətin oyuna çıxan komandamız Bakıya bir qədər yorğun yollanmışdı. Həmçinin kubok uğrunda yarışda əlverişli imkan əldə edən muxtar respublika təmsilçisi, sadəcə, bu görüşü düşünürdü.

“Araz-Naxçıvan” Peşəkar Futbol Komandası I divizionda öz parlaq oyunu ilə futbol həvəskarlarının rəğbətini qazanmışdır. Həmçinin komanda Azərbaycan kuboku uğrunda keçirilən görüşlərdə də əzmkar mübarizə aparır.
Martın 12-də Naxçıvan Muxtar Respublikası Mərkəzi Stadionunda “Araz-Naxçıvan” və “Xəzər Lənkəran” komandaları arasında Azərbaycan kubokunun 1/4 final mərhələsinin ilk oyunu keçirilmişdir. Ölkənin ən güclü komandalarından biri olan “Xəzər Lənkəran” və I divizionda turnir cədvəlinə başçılıq edən “Araz-Naxçıvan”, sözün əsl mənasında, azarkeşlərə futbol bayramı yaşatmışlar. Gərgin idman mübarizəsi şəraitində keçən görüş 1:1 hesabı ilə başa çatmışdır.

Qalib Lənkəranda məlum olacaq

Azərbaycan Kubokunun 1/4 final mərhələsinə çıxmaqla tarix yazan “Araz-Naxçıvan” futbol komandası bu siyahıya daha birini də əlavə etdi. Belə ki, Lənkəranın “Xəzər Lənkəran” klubunu qəbul edən muxtar respublika təmsilçisi mükəmməl oyunu ilə azarkeşlərini sevindirdi.
Hələ kubokun 1/8 final mərhələsində “Simurq”u məğlub edərkən çoxları bunun təsadüfi olduğunu deyirdi. Lakin muxtar respublika təmsilçisi bugünkü oyunu ilə bütün deyilənlərin üstündən xətt çəkdi. Baş məşqçi Əsgər Abdullayevin yetirmələri Premyer-Liqada öz dəst-xətti ilə seçilən güclü “Xəzər Lənkəran” futbol komandası ilə sülhə imza atmaqla hamının təəccübünə səbəb oldu.
Oyuna marağın hədsiz dərəcədə çox olacağı öncədən məlum idi. Matç zamanı isə 8500 azarkeş komandamıza dəstək olmaqla bu heç-heçədə müstəsna rol oynadı. Oyuna gəlincə, ilk dəqiqələrdən hücuma atılan komandamız İrfan Hüseynov­un zərbəsi ilə hesabı aça bilərdi. Lakin rəqib qapıçının inamlı oyunu buna imkan vermədi. Az sonra isə referi Elvin Əsgərov qapımıza penalti zərbəsi təyin etdi.

Çempionluq yolunda əmin addımlarla irəliləyən “Araz-Naxçıvan” futbol komandası uğurlu çıxışına daha birini əlavə edib. 20-ci turun qarşılaşmasında muxtar respublika təmsilçisinin qonağı Gəncənin “Kəpəz” klubu olub. Adına və qazandığı titullara görə Azərbaycanın sayılıb-seçilən 3 klubundan biri olan qərb təmsilçisi Naxçıvan klubu qarşısında tab gətirə bilməyib.

Əslində, Gəncə təmsilçisinin cari mövsümdən I divizionda çıxış etməsi və nisbətən zəif təsir bağışlaması çoxlarını təəssüfləndirib. Hələ ilk dövrədə “Araz-Naxçıvan”ın ən çətin səfər matçı kimi “Kəpəz”lə qarşılaşma göstərilirdi. Çünki bu komanda xüsusilə doğma azarkeşləri önündə istənilən rəqibə qalib gəlmək gücünə malikdir. Lakin həmin görüşdə qırmızı-ağlar mükəmməl oyun sərgiləyərək 3 xal qazanmağa müvəffəq olmuşdular.

Bu gün futbol üzrə Azərbaycan Kubokunun 1/4 final mərhələsinin ilk görüşləri keçiriləcək. Tarixində ilk dəfə kubok uğrunda yarışın bu mərhələsinə adlayan “Araz-Naxçıvan” futbol komandası doğma arenada Premyer-Liqa təmsilçisi “Xəzər Lənkəran”ı qəbul edəcək.
İlk olaraq rəqib barədə. Lənkəran təmsilçisi 10 ildir, Azərbaycan futbolunda öz dəst-xətti ilə seçilən komanda kimi formalaşıb. Futbolumuz tarixində ən bahalı, həmçinin ən tanınmış futbolçuları da elə ağ-yaşıllar transfer edib. Hazırda Premyer-Liqada mübarizə aparan “Xəzər Lənkəran” 31 xalla turnir cədvəlinin 7-ci pilləsində qərarlaşıb. Cari mövsümdə Lənkəran baş məşqçi dəyişikliyi edib. Belə ki, mövsümə Con Benjamin Toşakla başlayan lənkəranlılar sonradan uğursuz çıxışa görə uelsli mütəxəssisi istefaya göndərdilər. Əvəzində isə bir vaxtlar  Türkiyənin “Fənərbaxça”, “Qalatasaray”, “Beşiktaş” kimi tanınmış futbol komandalarının “sükanı arxasında” əyləşən, həmçinin Türkiyə millisini çalışdıran Mustafa Dənizli Lənkəran futbol komandasına baş məşqçi təyin edildi.

“Araz-Naxçıvan” futbol komandası növbəti oyununu doğma arenada Gəncənin “Kəpəz” klubuna qarşı keçirəcək. Ötən mövsüm Premyer-Liqada mübarizə aparan gəncəlilər uğursuz çıxışdan sonra I diviziona yuvarlanıblar. Çempionatın ilk dövrəsində Nizami yurdunda keçirilən matçda muxtar respublika təmsilçisi minimal hesabla (0:1) rəqibini üstələmişdi.
Hazırlıqlara gəlincə, Əsgər Abdullayevin komandası bu görüşün hazırlıqlarını “Turan-T” ilə matçdan sonra ara vermədən davam etdirir. Ötən günə kimi gündə iki dəfə məşq prosesi keçən qırmızı-ağlar dünəndən etibarən məşqlərinin sayını birə endiriblər. 21 yaşlılardan ibarət millinin heyətinə dəvət olunan qapıçımız Emil Balayev isə bu gün düşərgəyə qoşulub və onun bu matçda da qapını qoruyacağı gözlənilir. Gəncə təmsilçisi Naxçıvana oyun günü gələcək.
Qeyd edək ki, “Araz-Naxçıvan”-“Kəpəz” oyunu martın 8-də keçiriləcək. Naxçıvan Muxtar Respublika Stadionunda keçiriləcək oyun saat 15⁰⁰-də başlayacaq.

Ceyhun MƏMMƏDOV

5 mart – Bədən Tərbiyəsi və İdman Gününə həsr olunmuş karate-do üzrə Şərur rayon birinciliyi keçirilib. Şərur Olimpiya-İdman Kompleksində keçirilən birincilik başlanmazdan əvvəl Azərbaycan Respublikasının Dövlət himni səsləndirilib. Muxtar respublika Karate-do Federasiyasının sədr müavini Nəriman Quliyev, Şərur Rayon Gənc­lər və İdman İdarəsinin rəisi Ramil Dadaşov çıxış edərək iştirakçılara uğurlar arzulayıblar. Naxçıvan Muxtar Respublikası Gənc­lər və İdman Nazirliyinin Naxçıvan Muxtar Respublikası Karate-do Federasiyası ilə birgə təşkil etdiyi yarışda müxtəlif yaş qrupu və çəki dərəcələrində 80 idmançı mübarizə aparıb. Birinciliyin yekun nəticələrinə görə, öz yaş qruplarında Vüsal Sadiqov, Abdulla Əliyev, Oruc Kərim­ov, Əfsər Abbasov, Tayfun İsmayılov, Anar Nəbiyev, Azər Vəliyev, Sərxan Həsənli, Fərid Cəfərov və Rəşad Hüseynli yarışın qalibləri olublar. Komanda hesabında isə Düdəngə, Cəlilkənd və Çomaxtur kəndlərinin komandaları müvafiq olaraq birinci, ikinci və üçüncü yerləri tutublar.
Sonda qalib idmançılara diplomlar təqdim olunub.

Naxçıvan Muxtar Respublikası
Gənclər və İdman Nazirliyinin mətbuat xidməti

Dünən 5 mart – Bədən Tərbiyəsi və İdman Günü münasibətilə Naxçıvan Muxtar Respublikasında bir sıra tədbirlər keçirilib.
Tədbirlər planına uyğun olaraq, ilk tədbir Naxçıvan şəhərindəki İlham Əliyev adına Olimpiya-İdman Kompleksində olub. Naxçıvan Muxtar Respublikası Gənclər və İdman Nazirliyi ilə Naxçıvan Muxtar Respublikası Güləş Federasiyasının birgə təşkil etdiyi yeniyetmələr arasında cüdo üzrə Naxçıvan Muxtar Respublikası birinciliyinin açılış mərasimində muxtar respublikanın gənclər və idman naziri Azad Cabbarov çıxış edərək Bədən Tərbiyəsi və İdman Gününün təsis edilməsindən danışmışdır. Qeyd olunmuşdur ki, bu tarix Azərbaycan Respublikasının Prezidenti cənab İlham Əliyevin “Bədən Tərbiyəsi və İdman Gününün təsis edilməsi haqqında” 4 mart 2005-ci il tarixli Sərəncamına əsasən qeyd edilir. 1997-ci ildə cənab İlham Əliyevin Milli Olimpiya Komitəsinin prezidenti seçilməsindən sonra ölkəmizdə idmana, bədən tərbiyəsinə diqqət daha da artmışdır. Ölkəmizdə idmanın inkişafı ildən-ilə geniş vüsət alır.

Ulu öndər Heydər ƏLİYEV: İdman, bədən tərbiyəsi gənclərimizin daha da sağlam olması üçün lazımdır. Bu, müstəqil Azərbaycanın gələcəyi üçün əsasdır. Eyni zamanda gənclərimiz fiziki cəhətdən nə qədər güclü, nə qədər hazırlıqlı və sağlam olsalar, bir o qədər yaxşı işləyəcək, öz vəzifələrinin öhdəsindən bacarıqla gələcəklər və müstəqil Azərbaycanın müstəqilliyinin təmin olunmasında ləyaqətlə iştirak edəcəklər.

Azərbaycan Respublikasının Prezidenti cənab İlham Əliyevin “Bədən Tərbiyəsi və İdman Günü”nün təsis edilməsi haqqında 2005-ci il 4 mart tarixli Sərəncamına əsasən, hər il martın 5-i ölkəmizdə “Bədən Tərbiyəsi və İdman Günü” kimi qeyd olunur.

Sədərək rayonunun Sədərək kəndindəki 1 nömrəli tam orta məktəbin idman zalında Naxçıvan Muxtar Respublikası Gənclər və İdman Nazirliyi Naxçıvan Muxtar Respublikası Voleybol Federasiyası ilə birgə 5 mart – Bədən Tərbiyəsi və İdman Günü münasibətilə voleybol üzrə yoldaşlıq görüşü keçirib.
Sədərək rayon voleybolçuları ilə Şərur rayon təmsilçiləri arasında keçirilən yoldaşlıq görüşü 2:0 hesabı ilə meydan sahiblərinin xeyrinə başa çatıb. Komandalara Naxçıvan Muxtar Respublikası Voleybol Federasiyasının hədiyyələri verilib.
Əlamətdar gün münasibətilə daha bir yarış Culfa rayon Bənəniyar kənd tam orta məktəbinin idman zalında olub. Burada 1996-2001-ci illər təvəllüdlü idmançılar arasında karate-do üzrə rayon birinciliyi keçirilib. Culfa Rayon Gənclər və İdman İdarəsi və Naxçıvan Muxtar Respublikası Şərq Döyüşü Sənəti Federasiyasının təşkilatçılığı ilə keçirilən birincilikdə 50-yə yaxın idmançı iştirak edib.
Qaliblərə diplomlar verilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Futbol üzrə Azərbaycan I divizionunun lideri “Araz-Naxçıvan” futbol komandası 19-cu turda növbəti qələbəsini bayram edib. Doğma azarkeşlər önündə komandamızın budəfəki qonağı “Turan-T” futbol komandası olub. Tovuz təmsilçisinin son turlar uğurlu çıxışı və turnir cədvəlində üst pillələrdə qərarlaşması matçın gərgin keçəcəyindən xəbər verirdi. Lakin qonaqlardan daha üstün oyun sərgiləyən qırmızı-ağlar 3 xalı bir qolla əldə etdilər.

Canıyevi Quliyev əvəzlədi

Çətin Ağsu səfərindən sonra “ev”də bu görüşün nə qədər böyük əhəmiyyət kəsb etdiyini bütün futbolçular yaxşı dərk edirdilər. Buna görə baş məşqçi Əsgər Abdullayev işini tədbirli görmüşdü və yetirmələrinə oyunun taleyini ilk hissədəcə həll etməyi tapşırmışdı. Komandanın qol ümidi David Canıyevin cəzalı olması Ə.Abdullayevi heyətdə dəyişiklik etməyə məcbur etmişdi. Onu yeni transfer Fərid Quliyevlə əvəzləyən mütəxəssisin yanılmadığı oyun gedişində göründü. Müdafiə xəttində Mikayıl Rəhimov yenə ehtiyatda saxlanmış və meydan Tural-Ruslan-Ruslan-Əlimirzə kvartetinə həvalə edilmişdi. Yarımmüdafiə xəttində “dirijorluq” Tərlan Xəlilova tapşırılmışdısa, ona Akif Tağıyev və Cavid Həsənov da köməklik edirdi. Bəxtiyar Soltanov və Elmin Çobanov isə Fərid Quliyevə sivri ucda yardımçı olurdular.

Naxçıvan Muxtar Respublikası Gənclər və İdman Nazirliyinin tədbirlər planına daxil olan daha bir turnirə yekun vurulub. 5 mart – Bədən Tərbiyəsi və İdman Günü ilə əlaqədar yeniyetmə və gənclər arasında boks üzrə Naxçıvan şəhər açıq birinciliyi keçirilib. Naxçıvan Muxtar Respublikası Boks Federasiyası və Naxçıvan Şəhər Gənclər və İdman İdarəsinin birgə təşkil etdiyi turnirdə 40-dan çox idmançı 12 çəki dərəcəsində qüvvələrini sınayıb.
Yarışın açılış mərasimində çıxış edən Gənclər və İdman İdarəsinin rəisi Xəyal Qurbanov son zamanlar muxtar respublikada boksa olan maraqdan, idmançılara göstərilən qayğıdan danışıb. Daha sonra idmançılara uğurlar arzulayan idarə rəisi turniri açıq elan edib. Gərgin mübarizə şəraitində keçən döyüşlərdə yeniyetmələrin rinqdəki şücaətləri tamaşaçılar tərəfindən alqışlarla qarşılanıb.
Sonda turnirin qaliblərinə federasiyanın qiymətli hədiyyələri təqdim olunub, Naxçıvan Şəhər Gənclər və İdman İdarəsinin diplomları verilib.

Ceyhun MƏMMƏDOV

Futbol üzrə Azərbaycan I divizionunun 19-cu turu çərçivəsində “Araz-Naxçıvan” futbol komandası Tovuzun “Turan-T” futbol komandasını qəbul edəcək. Artıq oyunu idarə edəcək hakimlər briqadasının da adı açıqlanıb. Belə ki, Naxçıvan Muxtar Respublika Stadionunda oyunun başlama fitini çalacaq referi Fariz Yusifov olacaq. Ona bu görüşdə Cavanşir Yusifov və Akif Əmirli köməklik edəcəklər. Dördüncü hakim kimi isə meydana Cəmaləddin Hacıyev çıxacaq.
Oyuna ciddi hazırlaşan və xal itirməyi ağlından belə keçirməyən “Araz-Naxçıvan” komandası gündə iki dəfə olmaqla bu matçın hazırlıqlarına yekun vurub. Sonuncu dəfə dünən məşqə çıxan qırmızı-ağlar artıq oyunun başlama saatını gözləyirlər. Komandamızın heyətində iki itkinin olması baş məşqçi Əsgər Abdullayevi qayğılandırır. David Canıyev və Fərman Qəmbərovun cəzalı vəziyyətə düşməsini komandamız üçün müsbət qiymətləndirmək olmaz.
“Turan-T” komandası isə Naxçıvana bu gün – oyun günü gələcək. Ötən tur turnir cədvəlinin liderlərindən olan “Qaradağ-Lökbatan”dan xal almağı bacaran tovuzlular muxtar respublika təmsilçisi üçün də təhlükəli rəqib hesab edilirlər. Mövsümün ilk dövrəsində keçirilən matçda komandamız səfərdə rəqibini 2:1 hesabı ilə məğlub etməyi bacarmışdı.
Qeyd edək ki, “Araz-Naxçıvan”-“Turan-T” matçı bu gün Naxçıvan Muxtar Respublika Stadionunda keçiriləcək. Oyunun başlama saatı 15⁰⁰-dir.

Ceyhun MƏMMƏDOV

Naxçıvan Türk Liseyinin idman zalında “Zərərli vərdişlərə “yox” deyək, həmişə sağlam olaq” devizi altında Naxçıvan şəhər ümumtəhsil məktəblərinin və Naxçıvan Türk Liseyinin komandaları arasında voleybol üzrə birincilik keçirilmişdir. Naxçıvan Muxtar Respublikası Voleybol Federasiyası, Naxçıvan Şəhər Gənclər və İdman İdarəsi və Naxçıvan Şəhər Təhsil Şöbəsinin təşkil etdikləri yarışda Naxçıvan Türk Liseyinin komandası daxil olmaqla, 15 komanda mübarizə aparmışdır.
Yarışdan əvvəl Naxçıvan Şəhər Gənclər və İdman İdarəsinin rəisi Xəyal Qurbanov, Naxçıvan Muxtar Respublikası Voleybol Federasiyasının sədr müavini Aydın Mirzəyev və Naxçıvan Şəhər Təhsil Şöbəsinin nümayəndəsi Ruslan Quliyev çıxış edərək idmançılara uğurlar arzulamışlar. Olimpiya sistemi ilə keçirilmiş birincilikdə Naxçıvan şəhərindəki 6 nömrəli tam orta məktəbin komandası qalib olmuşdur. 15 və 9 nömrəli tam orta məktəblərin komandaları isə ikinci və üçüncü yerləri tutmuşlar.
Sonda fəxri yerləri tutan komandalar və fərqlənən idmançılar təşkilatçıların hədiyyələri və diplomları ilə mükafatlandırılmışlar.

Naxçıvan Muxtar Respublikası
Gənclər və İdman Nazirliyinin mətbuat xidməti

Yaşa və seçilən idman növünə diqqət yetirmək lazımdır

“İdman sağlamlığın rəhnidir”. Bu deyim artıq bütün dünyada şüar halını alıb. İdmanın istənilən növü ilə məşğul olmaq insan sağlamlığına kifayət qədər xeyir verir, onu gümrah saxlayır və bəzi problemlərdən qoruyur. İstər həkim, istərsə də mütəxəssis rəyinə nəzər yetirsək, idmanın insan həyatında nə qədər önəmli rol oynadığını görərik. Bütün idman növlərinin sağlamlığa xeyirli olduğunu nəzərə alsaq, ortaya maraqlı nüans çıxır: məşğul olmaq üçün idman növü seçərkən nəyə diqqət yetirməliyik və ya hansı yaşda hansı idman növü ilə məşğul olmaq daha faydalıdır?

Ötən həftə Naxçıvan Muxtar Respublikası Gənclər və İdman Nazirliyi ilə Naxçıvan Muxtar Respublikası Şərq Döyüşü Sənəti Federasiyasının birgə təşkil etdiyi daha bir turnir başa çatıb. MMA üzrə keçirilən yarışda muxtar respublika idmançıları İlham Əliyev adına Olimpiya-İdman Kompleksinin rinqində öz güclərini sınayıblar. İki gün davam edən muxtar respublika birinciliyi maraqlı anları ilə yadda qalıb. Belə bir turnirə ilk dəfə ev sahibliyi edən Naxçıvanda yarışa maraq olduqca çox olub.
Turnirin reqlamentinə gəlincə, 18 yaşadək gənclər 50, 55, 60 və 65 kiloqram çəki dərəcələrində rinqə çıxıblar. Bu çəkilərdə bütün rəqiblərini məğlub edən Polad Cəlil­ov, Mətin Ələsov, Elvin Salayev və Abbas Əsgərov ən yüksək pilləyə qalxıblar. Böyüklər arasında keçirilən döyüşlər isə daha kəskin mübarizə ilə yadda qalıb. Səkkiz çəki dərəcəsində Rəhman Quliyev (66 kiloqram), Fuad Nəsirov (68 kiloqram), Əli Muradov (70 kiloqram), Elmar Qasımov (75 kiloqram), Yadigar Budaqov (80 kiloqram), Xəyal Abdullayev (85 kiloqram),  Sənan Cabbarov (90 kiloqram) və Elnur Abdullayev (96 kiloqram) hamıdan güclü olduqlarını rinqdə sübut ediblər.
Sonda turnirin qalibləri diplom, medal, kubok və qiymətli hədiyyələrlə mükafatlandırılıblar.

Ceyhun MƏMMƏDOV

Futbol üzrə Azərbaycan I divizionunun 18-ci turu çərçivəsində “Araz-Naxçıvan” futbol komandası fevralın 23-də səfərdə “Ağsu”nun qonağı olub. “Araz-Naxçıvan” turnir cədvəlində liderliyini qorumaq və çempionluq yolunda çətin bir səddi aşmaq istəyirdi. Bunun üçün muxtar respublika təmsilçisi mütləq şəkildə qələbə qazanmalı idi. Ağsuya səfər öncəsi baş məşqçi Əsgər Abdullayev açıqlamasında da bu görüşün çətin keçəcəyini vurğulamışdı. Çünki buna kimi Ağsu təmsilçisi iki dəfə Naxçıvanda qonaq olmuş və hər iki matçı eyni hesablı məğlubiyyətlə (1:0) başa vurmuşdu. Odur ki, “Ağsu”nun baş məşqçisi Rüfət Quliyev nəyin bahasına olursa-olsun, “qırmızı-ağlar”ı məğlub etməyi qarşısına məqsəd qoymuşdu.

“Araz-Naxçıvan” bu görüşün əhəmiyyətinin böyük olduğunu öncədən bildiyindən daha ciddi hazırlaşmışdı. Baş məşqçi Əsgər Abdullayev heç kimin gözləmədiyi halda əsas heyətdə bəzi dəyişikliklər etmişdi ki, bu da matçın gedişatına müsbət dərəcədə öz təsirini göstərdi. Müdafiə xətti həmişəkindən fərqli olaraq, iki Ruslana həvalə edilmişdi.

Muxtar respublika gömrük orqanlarının əməkdaşları arasında ilk dəfə olaraq atıcılığın sporting idman növü üzrə turnir keçirilib. Naxçıvan Muxtar Respublikasının 90 illik yubileyinə həsr olunan yarışda 18 gömrükçü öz sərrastlığını nümayiş etdirib.
Gömrükçülərin fiziki sağlamlığını qorumaq, onlar arasında idmanın bu növünü təbliğ etmək, asudə vaxtın səmərəli təşkilinə nail olmaq, silahdan atış vərdişlərini təkmilləşdirmək və bu növdə ən güclü idmançıları müəyyənləşdirmək məqsədilə keçirilən turnir Naxçıvan Muxtar Respublikası Atıcı­lıq Mərkəzində təşkil olunub. Yarışda hər idmançı sıra ilə beş ayrı hədəfə iki atəş açıb.
Sonda ən yüksək nəticə iki idmançıda qeydə alındığından, onlar eyni qaydada hədəfləri təkrar nişan alıblar. Tətiklə hədəf arasında daha dəqiq olan Rəfael Əliyev (Naxçıvan Şəhər Gömrük İdarəsi) turnirin qalibi olub. Nurəddin Aslanov və Əsgər Qurbanov (Naxçıvan Hava Nəqliyyatında Gömrük İdarəsi) ikinci, üçüncü yerləri bölüşüblər.
Qaliblər diplom və və qiymətli hədiyyələrlə mükafatlandırılıblar.

Xəbərlər şöbəsi

Fevralın 10-dan 18-dək Hövsan Olimpiya-İdman Kompleksində boks üzrə yeniyetmələr arasında keçirilən Azərbaycan birinciliyində naxçıvanlı dəri əlcək ustası Sərxan Əliyev qızıl medal qazanıb.  
38 komandadan 250-yə yaxın boksçunun qalibiyyət uğrunda mübarizə apardığı yarışda həmyerlimiz Sərxan Əliyev 50 kiloqram çəki dərəcəsində bütün görüşlərdə inamlı qələbə qazanıb. Daha bir idmançımız, 80 kiloqram çəki dərəcəsində  birincilik uğrunda mübarizə aparan Nihad Orucov isə yalnız final görüşündə məğlub olaraq gümüş medalla kifayətlənib. Naxçıvan boks məktəbinin yetirməsi olan, 75 kiloqram çəki dərəcəsində mübarizəyə qatılan  Toğrul İsmayıllı isə bürünc medal qazanıb.

Xəbərlər şöbəsi

Futbol üzrə Azərbaycan I divizionunun lideri “Araz-Naxçıvan” futbol klubu növbəti qələbəsini qazanıb. Çempionatın ikinci dövrəsinin ilk “ev” matçında qırmızı-ağlar Qusarın “Şahdağ” komandasını qəbul ediblər. Gərgin mübarizə şəraitində keçən qarşılaşma muxtar respublika təmsilçisinin 3:1 hesablı qələbəsi ilə yekunlaşıb. Bununla, cari mövsümdə 15-ci qələbəsini bayram edən Naxçıvan təmsilçisi ən yaxın rəqibini 7 xal qabaqlamağı bacarıb.

İkinci dövrəyə qələbə ilə başladıq

Əvvəlcə onu qeyd edək ki, I divizionun 16-cı turunda “Araz-Naxçıvan” səfərdə “Bakılı”nın qonağı olmuşdu. Zirə qəsəbəsindəki Olimpiya-İdman Kompleksinin stadionunda keçirilən matç komandamız üçün uğurlu alındı. Belə ki, baş məşqçi Əsgər Abdullayevin meydana buraxdığı futbolçular elə oyunun taleyini ilk hissədəcə vurduqları bir qolla həll etdilər. Bəxtiyar Soltanovun 12-ci dəqiqədə vurduğu mükəmməl qol cari mövsümdə ən baxımlı qollar siyahısına düşməklə yanaşı, həm də komandamıza vacib olan 3 xalı qazandırdı.

Futbol üzrə Azərbaycan I divizionunun 17-ci turu çərçivəsində “Araz-Naxçıvan” futbol komandası doğma arenada Qusarın “Şahdağ” klubunu qəbul edəcək. Muxtar respublika təmsilçisinin heyətində bir itkinin olması baş məşqçi Əsgər Abdullayevi qayğılandırır. Belə ki, qırmızı vərəqə cəzalısı olan Eşqin Quliyev bu oyunu da buraxmalı olacaq. Ötən oyunu sarı vərəqə cəzasına görə buraxan David Canıyev və Ruslan Abıyev isə “Şahdağ”la qarşılaşmada meydanda olacaqlar.
Cari çempionatın ilk dövrəsində Qusarda keçirilən oyun bir çox maraqlı məqamları ilə yadda qalmışdı. Bu görüşü qələbə ilə (2:0) başa vuran “Araz-Naxçıvan” çətin səfərdən 3 xalla qayıtmışdı. Eyni zamanda rəqibin futbolçusu Yusif Yusifzadə aqressiv hərəkətinə görə meydandan qovuldu və ikiillik futboldan kənarlaşdırıldı.
Qeyd edək ki, “Araz-Naxçıvan”-“Şahdağ” matçı bu gün Naxçıvan Muxtar Respublika Stadionunda keçiriləcək. Oyunun başlama saatı isə 14⁰⁰-dür.

Ceyhun MƏMMƏDOV

Naxçıvan Muxtar Respublikası Gənc­lər və İdman Nazirliyi ilə Naxçıvan Muxtar Respublikası Futbol Federasiyasının birgə təşkil etdiyi mini-futbol turnirinə dünən yekun vurulub. Muxtar respublikanın bütün rayonlarının hər birindən bir, Naxçıvan şəhərindən isə 3 komandanın qatıldığı turnir olimpiya sistemi üzrə keçirilib. 10 komandanın mübarizə apardığı mini-turnirdə ilk olaraq 4 komanda 1/4 finala yüksəlmək üçün qarşılaşıb. Qalib gələn tərəf isə digər 6 komandaya qoşulub və birincilik uğrunda mübarizəyə start verilib. 1/4 finaldan uğurla adlayan “Araz-Naxçıvan-2” və Şərurun “Arpaçay” komandaları finalda iştirak etmək hüququ qazanıblar.

Bu günlərdə Naxçıvan şəhərindəki Şahmat Mərkəzində muxtar respublikamızın yaranmasının 90 illiyi ilə əlaqədar 16 yaşadək məktəblilər arasında şahmat üzrə muxtar respublika birinciliyi keçirilib. Naxçıvan Muxtar Respublikası Gənclər və İdman, Təhsil nazirlikləri və Naxçıvan Muxtar Respublikası Şahmat Federasiyasının təşkilatçılığı ilə keçirilən yarışa 100-dən artıq idmançı qatılıb. İki qrupda 7 turdan ibarət olan birincilikdə idmançılar İsveçrə sistemi ilə yarışıblar. Birincilikdə oğlanlar və qızlar arasında Naxçıvan şəhər şahmatçıları Bəxtiyar İsmayılov, Sadiq Məmmədov, Pərviz Qasımov, Toğrul Əliyev, Fatimə İsmayılova, Ordubad rayon idmançısı Seyid Hüseyn və Babək rayon təmsilçisi Aynur Kətənova qalib olublar. Fəxri yerləri tutan şahmatçılar diplomlarla təltif ediliblər.

Naxçıvan Muxtar Respublikası
Gənclər və İdman Nazirliyinin mətbuat xidməti

“Muxtariyyət ili” ilə əlaqədar Şahbuz rayonunun ümumtəhsil məktəblərinin şagirdləri arasında şahmat üzrə rayon birinciliyi təşkil edilib. İsveçrə sistemi üzrə keçirilən yarışın qalibləri birinciliyə qatılan 22 şahmatçı arasında müəyyən olunublar. Yekun nəticəyə görə, Şahbuz Rayon Uşaq-Gənclər Şahmat Məktəbinin yetirməsi Qəndab Cəfərli ən yüksək nəticəni göstərib. Məktəbin üzvlərindən Nuray Quluzadə ilə Mətləb Məhərrəmli isə ikinci və üçüncü yerləri bölüşüblər.
Şahbuz Rayon Gənclər və İdman İdarəsi və Təhsil Şöbəsinin təşkil etdikləri yarışda fəxri yerləri tutan idmançılar təltif ediliblər.

Naxçıvan Muxtar Respublikası
Gənclər və İdman Nazirliyinin mətbuat xidməti