Ümummilli lider Heydər Əliyevin anadan olmasının 92-ci ildönümünə həsr olunmuş “Naxçıvan-2015” Beynəlxalq Şahmat Festivalının 5-сi turu dünən keçirilən oyunlarla yekunlaşıb.
“A” turnirinin lideri gürcüstanlı qrossmeyster Levan Pantsulaya bu turda 4-cü pillədə qərarlaşan ukraynalı qrossmeyster Vladimir Onişukla qarşılaşıb. Turnirə iddialı başlayan Levan Pantsulaya bu görüşdən də qələbə ilə ayrılıb. Qazandığı qələbələrlə ikinci pillədə qərarlaşan azərbaycanlı beynəlxalq usta Zaur Məmmədov gürcüstanlı qrossmeyster Luka Paiçadzeni sınağa çəkib və qarşılaşmada rəqiblər xalları yarı bölüblər. Bu turda azarkeşlər azərbaycanlı qrossmeysterlər Rauf Məmmədov-Ülvi Bacarani, fransız qrossmeyster Bakrot Etyen-rusiyalı qrossmeyster Yevgeni Romanov və iranlı FİDE ustası Musavi Seyid Xəlil-rusiyalı qrossmeyster Aleksandr Xalifman duelinə şahidlik ediblər. Bu görüşlərdə Ülvi Bacarani və Aleksandr Xalifman qalib gəldiyi halda, Bakrot Etyen heç-heçə ilə razılaşmalı olub.
Naxçıvanın zəka sahiblərindən FİDE ustası Pərviz Qasımov bu turda azərbaycanlı qrossmeyster Nicat Abbasovla, digər həmyerlimiz, FİDE ustası Ürfan Sevdimalıyev isə gürcüstanlı FİDE ustası Georgi Sibaşvili ilə ağ-qara taxtada üz-üzə gəliblər. Hər iki həmyerlimiz bu turu məğlubiyyətlə başa vurub.

Son illər beynəlxalq idman yarışlarında qazanılan uğurlar Naxçıvan Muxtar Respublikasında idmana göstərilən diqqət və qayğının bariz nümunəsi kimi diqqəti cəlb edir. İdmançılarımızın dünya və Avropa çempionatlarında daim bayrağımızı yüksəltmələri, himnimizi səsləndirmələri bu sahə ilə məşğul olan insanlarda əlavə motivasiya yaradır. Qazanılan uğurlar uşaq və yeniyetmələrin bu sahəyə yüksək dərəcədə maraq göstərmələrinə səbəb olur.

Naxçıvan Muxtar Respublikası Karate-do Federasiyasının iki idmançısı Gürcüstanın paytaxtı Tbilisi şəhərində keçirilən WSKU (Dünya Şotokan Karate Birliyi) üzrə 6-cı dünya çempionatında iştirak edib. Onların hər ikisi iki üslub üzrə çıxış ediblər.
Oğlanlar arasında tatami üzərinə 8 yaşlı Rəşid Süleymanov çıxıb. O, karatenin şotokan üslubu üzrə (8 ballıq sistem üzrə) dünya çempionatının bürünc mükafatını qazanıb. Şobu nihon (2 xallıq sistem üzrə) üslubu üzrə isə Rəşid Süleymanov çempionatı ikinci pillədə başa vurub. Bu, karateçimizin beynəlxalq yarışlarda qazandığı ilk uğur deyil. O, Rusiya açıq çempionatının qalibi olmaqla yanaşı, Türkiyənin Antalya şəhərində keçirilən yarışda 4 kateqoriya üzrə tatami üzərinə çıxıb və hər kateqoriyada mükafatçılar sırasına düşməyi bacarıb.

 Naxçıvan şahmatçısı “C” turnirində liderdir

Ümummilli lider Heydər Əliyevin anadan olmasının 92-ci ildönümünə həsr olunmuş “Naxçıvan-2015” Beynəlxalq Şahmat Festivalının 4-сü turuna dünən yekun vurulub.
“A” qrupunun liderləri – azərbaycanlı qrossmeyster Ülvi Bacarani və gürcüstanlı qrossmeyster Levan Pantsulaya bu turda üz-üzə gəliblər. Gərgin idman mübarizəsi şəraitində keçən görüşdə gürcüstanlı zəka sahibi qalib olub.
İlk 3 turdan sonra aktivinə 2 xal yazdıran Naxçıvanın zəka sahiblərindən FİDE ustası Pərviz Qasımov bu turda rusiyalı qrossmeyster Yevgeni Romanovla qarşılaşıb və məğlubiyyətlə üzləşib.
Ağ-qara taxtada mübarizə aparan digər həmyerlimiz, FİDE ustası Ürfan Sevdimalıyev isə İran şahmatçısı, beynəlxalq usta Ümid Norozinin müqavimətini qıra bilməyib.
Liderlər cədvəlində özünə yer alan azərbaycanlı qrossmeysterlər Rauf Məmmədov Azər Mirzəyevlə, beynəlxalq usta Zaur Məmmədov isə digər qrossmeysterimiz Eltac Səfərli ilə bu turda qarşılaşıblar. Maraqlısı odur ki, hər iki qarşılaşmada rəqiblər “sülh”ə razılaşıblar.

Ümummilli lider Heydər Əliyevin anadan olmasının 92-ci ildönümü münasibətilə dünən Duzdağ yolunda Heydər Əliyev adına Hərbi Liseyin kursantları, ali və orta ixtisas təhsili müəssisələrinin tələbələri arasında kross qaçışı növü üzrə Naxçıvan Muxtar Respublika birinciliyi keçirilib. Naxçıvan Muxtar Respublikası Gənclər və İdman Nazirliyi ilə Yüngül Atletika Federasiyasının birgə təşkil etdiyi birincilikdə 500 atlet qüvvəsini sınayıb.

Yarışın bağlanış mərasimində çıxış edən Gənclər və İdman naziri Azad Cabbarov bildirib ki, muxtar respublikada idmanın bütün növlərində olduğu kimi, yüngül atletikaya da maraq yüksəkdir. Ümummilli lider Heydər Əliyevin anadan olmasının 92-ci ildönümü münasibətilə keçirilən yarışda gənclərin bu idman növünə olan marağı göz önündədir. Təşkil edilən hər bir tədbir muxtar respublikada idman sahəsinə göstərilən diqqət və qayğının nümunəsidir.
Təhsil naziri Piri Nağıyev tədbirdə çıxış edərək qeyd edib ki, bu gün muxtar respublikamızda təhsilə diqqət və qayğı ən yüksək səviyyədədir. Yeni məktəb binalarının tikilib istifadəyə verilməsi, onların maddi-texniki bazasının gücləndirilməsi və ən müasir informasiya-kommunikasiya texnologiyaları ilə təchizatı bu qayğının bariz nümunəsidir. Məhz bunun nəticəsində ali və orta ixtisas təhsili müəssisələrinin tələbələri idmana da böyük maraq göstərirlər.

 Dünən festivalın 3-cü turu başa çatıb

“Naxçıvan-2015” Beynəlxalq Şahmat Festivalının 3-сü turu geridə qalıb.
“A” qrupunda bu tur daha çox liderlərin qarşılaşması ilə yadda qalıb. Belə ki, ilk iki turda qələbə qazanan azərbaycanlı qrossmeyster Ülvi Bacarani rusiyalı Yevgeni Romanovla üz-üzə gəlib və beynəlxalq turnirdə ardıcıl üçüncü qələbəsini qazanıb. Turnir cədvəlinin digər liderlərindən olan gürcüstanlı qrossmeyster Levan Pantsulaya türkiyəli beynəlxalq usta Sanal Vahapı sınağa çəkib. Gürcüstanlı şahmatçı qalib gələrək maksimum xal toplayıb.
Turnirə qələbə ilə başlayan, lakin ikinci turda məğlubiyyətlə üzləşən Naxçıvanın zəka sahiblərindən FİDE ustası Pərviz Qasımov bu turda azərbaycanlı FİDE ustası Abdulla Qədimbəyli ilə qarşılaşıb. Ağ-qara taxtadan qələbə ilə ayrılan Pərviz xal ehtiyatını ikiyə yüksəldib. Digər həmyerlimiz FİDE ustası Ürfan Sevdimalıyev isə Hindistan şahmatçısı, qrossmeyster Gupta Abhijeetin müqavimətini qıra bilməyib.
Qadınlar arasında dünya çempionu, Çin təmsilçisi Hou Yifan bu turda azərbaycanlı beynəlxalq usta Zaur Məmmədovla qarşılaşıb. Maraqlı keçən qarşılaşmadan azərbaycanlı şahmatçı qalib kimi ayrılıb. Zaur kimi Rauf Məmmədov da bu turu qələbə ilə başa vurub. Qrossmeysterimiz gürcüstanlı beynəlxalq usta Nino Xurtsidzeni məğlub edib.
Hazırda “A” turnirində ikihakimiyyətlilik hökm sürür. Gürcüstanlı Levan Pantsulaya ilə azərbaycanlı Ülvi Bacarani beynəlxalq şahmat festivalının liderləridir.

Beynəlxalq festivalın iştirakçıları bu fikirdədir

Rüstəm Kasımcanov – özbəkistanlı qrossmeyster: – Beynəlxalq festivalın mənim üçün ən böyük əhəmiyyəti bu festivalın müstəqil Azərbaycanın qurucusu dahi şəxsiyyət Heydər Əliyevin anadan olmasının 92-ci ildönümünə həsr edilməsi, bu festival vasitəsilə dünyanın nüfuzlu şahmatçıları ilə yarışmaq imkanının yaradılmasıdır. Burada biz şahmatçılar üçün yaxşı şərait yaradılıb və asudə vaxtımız da səmərəli təşkil edilib. Hər yer sakit və təmizdir. İnsan özünü çox rahat hiss edir. Bizə yaradılan şəraitə görə şahmatçı yoldaşlarım adından minnətdarlığımı bildirirəm. Onu da deyim ki, bu qədim diyarda şahmata böyük maraq var. Festivalın keçirilməsi üçün görülmüş hərtərəfli hazırlıq da yüksək səviyyədədir. Bu səbəbdən də dünyanın müxtəlif ölkələrindən buraya öz gücünü sınamağa gəlmiş şahmatçılar razılıq edirlər. Festivala dəvət alanda çox sevindim. Ona görə sevindim ki, əvvəllər burada şahmat festivallarında iştirak etmiş şahmatçılardan Naxçıvan haqda eşitdiklərimi əyani şəkildə görə biləcəkdim.
Aleksandr Xalifman – rusiyalı beynəlxalq qrossmeyster: – Özüm haqda məlumat verərək deyim ki, Rusiya yığmasının tərkibində dünya şahmat olimpiadalarının 1992, 2000, 2002-ci illərdə qalibi olmuşam. 1982-ci ildə gənc­lər arasında SSRİ çempionluğunu qazanmışam. 1996-cı ildə Rusiya çempionluğu mənə nəsib olub. 1990-cı ildə Las-Veqasda keçirilən dünya FİDE çempionatının qalibi olmuşam. Bütün bunları sadalamaqda məqsədim beynəlxalq yarışlar haqda kifayət qədər təcrübəyə malik olduğumu bilməyinizdir. Qeyd etmək istəyirəm ki, Naxçıvanda keçirilən bu festival öz səviyyəsinə görə beynəlxalq səviyyəli digər yarışlardan heç də geri qalmır. Artıq üçüncü dəfədir ki, Naxçıvanda keçirilən beynəlxalq festivalda iştirak edirəm və hər dəfəsində bu şahmat bayramının daha yüksək səviyyədə təşkil olunduğunun şahidi oluram. Əminəm ki, bu festivalda iştirak edən hər bir şahmatçı mükafatçılar sırasına düşüb-düşməməyindən asılı olmayaraq, Naxçıvandan xoş təəssüratlarla ayrılacaq.

 Səbuhi Hüseynov

  “Bu gün qətiyyətlə deyə bilərik ki, özünün sürətli inkişafı ilə diqqətləri cəlb edən, beynəlxalq tədbirlərin keçirildiyi məkana çevrilən Naxçıvan Muxtar Respublikası həm də beynəlxalq idman yarışlarının keçirildiyi məkan kimi şöhrət qazanıb. Qədim diyar dünyanın şahmat arenasında da özünün layiqli yerini tutub, beynəlxalq şahmat festivallarının keçirildiyi məkan kimi tanınıb”. 

Bu sözləri Azərbaycan Şahmat Federasiyasının vitse-prezidenti Faiq Həsənov “Şərq qapısı” qəzetinə müsahibəsində dedi.
Azərbaycan Şahmat Federasiyasının vitse-prezidenti bildirib ki, artıq beşinci dəfədir, Naxçıvanda hər ilin may ayında ulu öndər Heydər Əliyevin anadan olmasının ildönümünə həsr edilmiş beynəlxalq şahmat festivalı keçirilir. Hər il dünyanın müxtəlif ölkələrindən onlarla tanınmış şahmatçı yarışlarda iştirak etmək üçün Naxçıvana gəlir, azərbaycanlı qonaqpərvərliyinin gözəl Naxçıvan nümunəsini görürlər və bundan şad olurlar. Ona görə də qədim diyara gələn idmançı ikinci dəfə də bura gəlmək arzusunda olur.

Naxçıvan Muxtar Respublikası Gənc­lər və İdman Nazirliyi və Paralimpiya Federasiyasının təşkilatçılığı ilə ümummilli lider Heydər Əliyevin anadan olmasının 92-ci ildönümünə həsr olunmuş sağlamlıq imkanları məhdud uşaqlar arasında Naxçıvan Muxtar Respublika birinciliyi keçirilib.
İdmanın stolüstü tennis, şahmat, dama və darts növləri üzrə keçirilən idman tədbirində sağlamlıq imkanları məhdud 89 uşaq iştirak edib. Yarışlar Naxçıvan şəhərindəki İlham Əliyev adına Olimpiya-İdman Kompleksi və Babək Rayon Şahmat məktəbində baş tutub.

“Naxçıvan -2015” Beynəlxalq Şahmat Festivalının ilk turu maraqlı qarşılaşmalarla yadda qalıb.
Bu turda “A” qrupunda keçmiş dünya çempionu, yarışın ən yüksək reytinqli şahmatçısı, özbəkistanlı Rustam Kasımcanov Azərbaycan şahmatçısı, beynəlxalq usta Ayaz Məmmədovla qarşılaşıb və “sülh”ə razılaşıb. Qadınlar arasında dünya çempionu, Çin təmsilçisi Hou Yifanın ilk qarşılaşmada azərbaycanlı beynəlxalq usta Nicat Ağayev olub. Daha üstün oyun sərgiləyən çinli zəka sahibi ilk turu qələbə ilə başa vurub. Azərbaycanlı qrossmeyster Rauf Məmmədov isə türkiyəli şahmatçı, FİDE ustası Ege Köksal ilə görüşüb və ilk qələbəsini qazanıb.
Naxçıvanın zəka sahiblərindən FİDE ustası Pərviz Qasımov ilk görüşündə beynəlxalq qrossmeyster Zeynəb Məmmədyarova ilə üz-üzə gəlib və ağ qara taxtadan qələbə ilə ayrılıb. Digər həmyerlimiz FİDE ustası Ürfan Sevdimalıyev FİDE ustası Nail Bəşirli ilə üz-üzə gəlib və onlar xalları yarı bölüblər.
Bu turda türkiyəli FİDE ustası Arat Ufuk Sezen ağ qara taxtada fransız Bakrot Etienlə mübarizə aparıb. Türkiyə təmsilçisi rəqibinin müqavimətini qıra bilməyib və xalları yarı bölüblər. Azərbaycanlı qrossmeyster Eltac Səfərlinin ilk rəqibi isə digər həmyerlimiz Orxan Abdulov olub. Bu qarşılaşma isə Eltacın xeyrinə başa çatıb. Ukrayna şahmatçısı Vladimir Baklan İran şahmatçısı, FİDE ustası Aryan Qulamini, ukraynalı qrossmeyster Vladimir Onişşuk Azərbaycan şahmatçısı, beynəlxalq usta Bəhruz Rzayevi məğlub edib.
Hindistan şahmatçısı Gupta Abhijeet bu turda azərbaycanlı şahmatçı Vüqar Əsədli ilə, rusiyalı şahmatçı, qrossmeyster Aleksandr Xalifman FİDE ustası, gürcüstanlı Georgi Sibaşvili ilə, Naxçıvanda keçirilən beynəlxalq şahmat festivallarının ənənəvi iştirakçılarından olan holland şahmatçısı Sergey Tivyakov azərbaycanlı, beynəlxalq usta Misratdin İsgəndərovla xalları yarı bölüblər.

Xəbərlər şöbəsi

 Ümummilli lider Heydər  Əliyevin anadan olmasının 92-ci ildönümünə həsr edilmiş boks üzrə Naxçıvan Muxtar Respublika turnirinə dünən yekun vurulub. 

Mayın 1-dən başlanan, Naxçıvan Muxtar Respublikası Gənclər və İdman Nazirliyi ilə Boks Federasiyası tərəfindən birgə təşkil edilən və Naxçıvan şəhərindəki İlham Əliyev adına Olimpiya-İdman Kompleksində keçirilən turnirdə muxtar respublikanın şəhər və rayonlarından, ümumilikdə, 150-dən çox dəri əlcək sahibi mübarizə aparıb.
Turnirin bağlanış mərasimində əvvəlcə səhnə Naxçıvan Dövlət Filarmoniyasının əməkdaşlarına verilib. Səsləndirilən musiqi nömrələri alqışlarla qarşılanıb.

Naxçıvan Şəhər Uşaq-gənclər idman məktəbinin mini-futbol meydançasında ümummilli lider Heydər Əliyevin anadan olmasının 92-ci ildönümünə həsr olunmuş 2002-2003-cü illər təvəllüdlü yeniyetmələr arasında mini-futbol üzrə Naxçıvan şəhər birinciliyi keçirilib. Naxçıvan Şəhər Gənclər və İdman İdarəsinin və Təhsil Şöbəsinin birgə təşkilatçılığı ilə keçirilən yarışda 7 komandada 70 futbolçu iştirak edib.
Olimpiya sistemi üzrə keçirilən yarışın yekununa əsasən, “Atabəylər” komandası birinci yerə layiq görülüb. Onlar finalda “Araz” komandasından üstün olublar. “Xəzər” və “Gənc Heydərçilər” komandaları isə üçüncülüklə kifayətləniblər.
Qalib komandalara və fərqlənən idmançılara Naxçıvan Şəhər Gənclər və İdman İdarəsinin diplomları, fəxri fərmanları və hədiyyələr təqdim edilib.

Xəbərlər şöbəsi

30 aprel-3 may tarixləri arasında Gürcüstan Respublikasının paytaxtı Tbilisi şəhərində Dünya Karate Federasiyasının 6-cı dünya çempionatı keçiriləcək. Sevindirici haldır ki, bu çempionatda Naxçıvan Muxtar Respublikası Karate-do Federasiyasının iki yetirməsi də iştirak edəcək. Belə ki, qonşu ölkədə bayrağımızı 9 yaşlı Rəşid Süleymanov və 8 yaşlı idmançımız Günay Süleymanova dalğalandırmağa çalışacaq. Bacı-qardaş olan karateçilərimiz artıq yarışın təşkil olunacağı ölkədədirlər.

Ceyhun Məmmədov

Naxçıvan Muxtar Respublikası Daxili İşlər Nazirliyinin İdman Cəmiyyətinin yetirmələrinin ölkə birinciliyində uğurlu çıxışları davam etməkdədir. Ötən günlərdə Bakı şəhərində Azərbaycan Respublikası Daxili İşlər Nazirliyinin İdman cəmiyyətləri arasında keçirilən boks üzrə açıq birinciliyə yekun vurulub. Naxçıvan Muxtar Respublikası Daxili İşlər Nazirliyinin İdman Cəmiyyətinin bir idmançısı qalib olmaqla bütün diqqətləri üzərinə cəlb edib. 69 kiloqram çəki dərəcəsində mübarizə aparan Əjdər Məmmədov bütün rəqiblərinə qalib gəlib və fəxri kürsünün ən yüksək zirvəsinə qalxıb.

Ceyhun Məmmədov

Babək rayon Nehrəm kənd 3 nömrəli tam orta məktəbdə Babək Rayon İcra Hakimiyyəti, rayon Gənclər və İdman İdarəsi, Uşaq-gənclər idman məktəbi və Naxçıvan Muxtar Respublikası Güləş Federasiyasının Babək rayon bölməsinin birgə təşkilatçılığı ilə ümummilli lider Heydər Əliyevin anadan olmasının 92-ci ildönümünə həsr olunmuş rayon məktəbliləri arasında sərbəst güləş üzrə turnir keçirilib. Turnirdə 6 komandada 100-dən çox güləşçi mübarizə aparıb.
Babək Rayon Uşaq-gənclər idman məktəbinin direktoru Füzuli Salmanlı, Güləş Federasiyasının Babək rayon bölməsinin sədri Kamil Kazımov və rayon Gənclər və İdman İdarəsinin rəisi Nazim Salmanlı çıxış edərək Naxçıvan Muxtar Respublikasında idmana göstərilən diqqət və qayğıdan bəhs edib, idmançılara uğurlar arzulayıblar.
Yekun nəticəyə əsasən, “Nehrəm” komandası turnirin qalibi olub. İkinci yerə “Zeynəddin”, üçüncü yerə isə “Cəhri” komandaları layiq görülüblər.
Sonda qaliblərə təşkilatçılar tərəfindən diplom və hədiyyələr təqdim edilib.

Ceyhun Məmmədov

Dünən Yeni Azərbaycan Partiyası Şahbuz Rayon Təşkilatı Heydər Əliyev adına Gənclər Birliyi, rayon Gənclər və İdman İdarəsi, Təhsil Şöbəsi və Yüngül Atletika Federasiyasının Şahbuz rayon bölməsinin birgə təşkilatçılığı ilə ümummilli lider Heydər Əliyevin anadan olmasının 92-ci ildönümünə həsr olunmuş ümumtəhsil məktəblərinin qız şagirdləri arasında yüngül atletika üzrə rayon birinciliyi keçirilib.
Yarışın açılış mərasimində rayon Gənclər və İdman İdarəsinin rəisi Vüqar Muradov və Təhsil Şöbəsinin əməkdaşı Fikrət Cəfərov çıxış edərək ümummilli lider Heydər Əliyevin ölkəmizdə idmanın inkişafına göstərdiyi qayğıdan bəhs ediblər. Bildirilib ki, ulu öndərin müəyyənləşdirdiyi idman siyasəti bu gün uğurla davam etdirilir. Bunun nəticəsidir ki, Azərbaycan idman ölkəsi kimi tanınır.
Yarışın reqlamentinə gəlincə, komanda və şəxsi hesablı birincilikdə 100, 200, 400, 800 metr məsafələrdə atletlər öz qüvvələrini sınayıblar. 19 məktəbdən 80 nəfərdən çox atletin iştirak etdiyi birinciliyin sonunda, müvafiq olaraq, Səməngül İsmayılova, Nərmin Rüstəmli, Sahilə Novruzova və Mədinə İbrahimova qət etdikləri məsafələrdə bütün rəqiblərinə qalib gəliblər. Komanda hesabında isə Aşağı Qışlaq kənd tam orta məktəbinin komandası birinci yerə layiq görülüb. Biçənək kənd tam orta məktəbinin komandası ikinci, Şahbuz şəhər 1 nömrəli tam orta məktəbin komandası isə üçüncü olub.
Qalib atletlər və komandalar təşkilatçıların diplom və hədiyyələri ilə mükafatlandırılıblar.

Ceyhun Məmmədov

Naxçıvan Muxtar Respublikası Şərq Döyüşü Sənəti Federasiyasının yetirmələri ötən həftə Ağdam Olimpiya-İdman Kompleksində keçirilən beynəlxalq turnirdə uğur qazanıblar. Ümummilli lider Heydər Əliyevin anadan olmasının 92-ci ildönümünə həsr olunmuş universal döyüş növləri üzrə beynəlxalq turnirə 2 idmançımız yollanıb. Məşqçi Cavid Məmmədovun rəhbərliyi ilə Ağdama yollanan idmançılarımızın hər ikisi mükafatçılar sırasına düşməyi bacarıb. Belə ki, 75 kiloqram çəki dərəcəsində mübarizə aparan Elxan Həsənəliyev yarımfinal mərhələsinə kimi qələbə ilə irəliləsə də, həlledici görüşdə iştirak edə bilməyib və turniri üçüncü pillədə başa vurub. Elə 85 kiloqram çəkidə rinqə çıxan Xəyal Abdullayev də bu uğuru təkrarlayıb.
Sonda qaliblərə təşkilatçılar tərəfindən diplom və medallar təqdim olunub.

Ceyhun Məmmədov

Mayın 1-dən 11-dək Naxçıvanda ümummilli lider­ Heydər Əliyevin anadan olmasının 92-ci ildönümünə həsr olunmuş ənənəvi “Naxçıvan Open-2015” Beynəlxalq Şahmat Festivalı keçiriləcək.
Şahmat festivalı çərçivəsində zəka sahibləri 3 turnirin iştirakçısı olacaqlar. Belə ki, reqlamentə əsasən, beynəlxalq festivalda güclülərin (“A” turniri), əmsalı 2250-dən az olanların (“B” turniri) və uşaqların (“C” turniri) yarışı keçiriləcək. Artıq “Naxçıvan Open-2015” festivalının “A” turnirində iştirak etmək üçün 61 şahmatçı, o cümlədən 32 qrossmeyster müraciət edib. İsveçrə sistemi üzrə 9 turdan ibarət olacaq yarışda hər iştirakçıya 40 gediş üçün 90 dəqiqə, partiya başa çatana qədər hər şahmatçıya 30 dəqiqə və hər gediş üçün əlavə 30 saniyə vaxt ayrılacaq.

Azərbaycan Respublikası gömrük orqanları arasında təşkil olunan futzal üzrə növbəti birincilikdə birinci və ikinci turun oyunları arxada qalıb.
Ümummilli lider Heydər Əliyevin anadan olmasının 92-ci, Azərbaycan Respublikası Dövlət Gömrük Komitəsinin yaradılmasının 23-cü ildönümünə həsr olunan yarışda Naxçıvan Muxtar Respublikası Dövlət Gömrük Komitəsinin komandası “B” qrupunda mübarizə aparıb. Qeyd edək ki, 16 komandanın mübarizə apardığı ənənəvi yarışda bu dəfə “A” qrupunun oyunları Sumqayıtda, “B” qrupunun oyunları isə bu günlərdə Bakıda baş tutub.
Qrup oyunlarında Bakı Baş Gömrük İdarəsinin komandası ilə (“BBGİ”) qolsuz bərabərə qalan və digər rəqiblərinə böyük üstünlüklə qalib gələn muxtar respublika gömrükçüləri yarışın dörddəbir final mərhələsində “Sumqayıt”ı (Sumqayıt Baş Gömrük İdarəsi) mübarizədən kənarlaşdırıb – 6:0.

Ümummilli lider Heydər Əliyevin anadan olmasının 92-ci ildönümü ilə əlaqədar Şahbuz rayon ümumtəhsil məktəblərinin komandaları arasında voleybol üzrə keçirilən rayon birinciliyinə yekun vurulub. Yeni Azərbaycan Partiyası Şahbuz Rayon Təşkilatı Heydər Əliyev adına Gənclər Birliyinin, Şahbuz Rayon Gənclər və İdman İdarəsinin və Təhsil Şöbəsinin birgə təşkil etdiyi birincilikdə 6 komanda mübarizə aparıb. Yarışdan əvvəl rayon Gənclər və İdman İdarəsinin rəisi Vüqar Muradov, Təhsil Şöbəsinin aparıcı məsləhətçisi Fikrət Cəfərov çıxış edərək ümummilli lider Heydər Əliyevin idmana və gənclərə göstərdiyi qayğıdan danışıblar, yarış haqqında iştirakçılara məlumat veriblər.
Olimpiya sistemi ilə keçirilən yarışın nəticəsinə əsasən, Şahbuz Rayon Uşaq-gənclər idman məktəbinin komandası birinci yerə layiq görülüb. Biçənək kənd tam orta məktəbinin komandası ikinci, Şahbuz şəhər 1 nömrəli tam orta məktəbin komandası isə üçüncü olub.
Sonda komandalara təşkilatçılar tərəfindən hədiyyələr və diplomlar təqdim edilib.

Ceyhun Məmmədov

Yeni Azərbaycan Partiyası Sədərək Rayon Təşkilatının Heydər Əliyev adına Gənclər Birliyinin, rayon Gənclər və İdman İdarəsi və Uşaq-gənclər idman məktəbinin birgə təşkilatçılığı ilə ümumtəhsil məktəblərinin komandaları arasında ümummilli lider Heydər Əliyevin anadan olmasının 92-ci ildönümünə həsr edilmiş mini-futbol üzrə rayon birinciliyi keçirilib.
Birinciliyi Sədərək Rayon Gənclər və İdman İdarəsinin rəisi Etibar Əliyev açaraq əsası ümummilli lider Heydər Əliyev tərəfindən qoyulan idman siyasətindən, idmana göstərilən diqqət və qayğıdan danışıb. Qeyd olunub ki, bu gün idmanın inkişafına göstərilən diqqət və qayğı Naxçıvan Muxtar Respublikasında da ən yüksək səviyyədədir.
Dairəvi sistemlə keçirilən birincilikdə bütün rəqiblərini üstələyən Uşaq-gənclər idman məktəbinin komandası qalib adını qazanıb. Onlar finalda Sədərək kənd 2 nömrəli tam orta məktəbin komandasını məğlub ediblər. Sədərək kənd 1 nömrəli tam orta məktəbin komandası isə üçüncülüklə kifayətlənib.
Sonda qaliblərə təşkilatçılar tərəfindən kubok, futbol topları, idman geyimləri və diplomlar təqdim edilib.

 Ceyhun Məmmədov

Naxçıvan Dövlət Universitetində müstəqil Azərbaycanın memarı və qurucusu, ümummilli lider Heydər Əliyevin anadan olmasının 92-ci ildönümünə həsr olunmuş “Universiada-2015” proqramına daxil olan idman yarışlarına aprel ayının ­10-da start verilib.
Universitetin 10 fakültəsinin qatıldığı “Universiada-2015” çərçivəsində idman yarışları davam edir. Bu günə qədər idmanın müxtəlif növləri üzrə keçirilən “Universiada-2015” yarışlarında oğlanlardan ibarət voleybol komandalarının yarışında Pedaqoji fakültənin, qızlar arasında keçirilən voleybol yarışlarında isə Tibb fakültəsinin komandaları qələbə qazanıblar. Universiadaya daxil edilən yarışlardan digəri stolüstü tennis oyunu olub. Pedaqoji fakültənin komandası I yerə çıxıb, Fizika-riyaziyyat və İqtisad fakültələri isə II və III yerləri bölüşüblər. Stolüstü tennis oyunu üzrə şəxsi birincilikdə “bədən tərbiyəsi və idman” ixtisasının IV kurs tələbəsi Həsən Qaraslan, həmin ixtisasın III kurs tələbəsi Səriyyə Quliyeva I yerin qalibləri olublar.
Qeyd edək ki, universiadaya may ayının 10-da yekun vurulacaq, həmin gün qaliblər kubok və diplomlarla təltif olunacaqlar.

Mina QASIMOVA

Bakı şəhərində keçirilən kikboksinq üzrə yeniyetmə və kişilər arasında Azərbaycan çempionatına yekun vurulub. Bu çempionatda Naxçıvan Muxtar Respublikası Şərq Döyüşü Sənəti Federasiyasının yetirmələri də iştirak ediblər. Paytaxta 4 idmançı ilə yollanan kikboksinqçilərimizdən üçü mükafatçılar sırasına düşüb. Ən uğurlu nəticəni 71 kiloqram çəki dərəcəsində mübarizə aparan Cavidan Rəcəbli əldə edib. Belə ki, o, final görüşünə kimi məğlubiyyətsiz irəliləyib və yalnız həlledici qarşılaşmada rinqi məğlub tərk edib. Digər idmançılarımızdan 48 kiloqram çəki dərəcəsində Fərman Rzayev və 57 kiloqram çəki dərəcəsində mübarizə aparan Ruslan Musayev isə üçüncülüklə kifayətləniblər.
Sonda idmançılarımıza təşkilatçılar tərəfindən diplom və medallar təqdim edilib.
Qeyd edək ki, idmançılarımız bu uğurlu çıxışlardan sonra Azərbaycan millisinin heyətinə cəlb ediliblər və hazırda yığma ilə birgə Bakıda təlim-məşq toplanışındadırlar.

 Ceyhun Məmmədov

Naxçıvan şəhərindəki 3 nömrəli tam orta məktəbdə ümummilli lider Heydər Əliyevin anadan olmasının 92-ci ildönümü münasibətilə şahmat yarışı keçirilib. Olimpiya sistemi üzrə keçirilən yarışda məktəbin 5-9-cu sinif şagirdləri iştirak ediblər. 4 gün davam edən yarışın yekun nəticələrinə əsasən, 5-ci sinif şagirdi Ümid Məmmədov bütün rəqiblərinə qalib gələrək birinci yerə layiq görülüb. Digər iki pillədə isə Renat Hacıyev və Nihad Süleymanov qərarlaşıblar. Sonda qaliblər mükafatlandırılıblar.

 Ceyhun Məmmədov

Naxçıvan Atıcılıq Mərkəzində “Vətənin müdafiəsinə hazıram” poliatlon çoxnövçülüyü üzrə Naxçıvan Muxtar Respublikası çempionatına yekun vurulub.
Naxçıvan Muxtar Respublikası Gənclər və İdman Nazirliyi, Təhsil Nazirliyi və Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin birgə təşkil etdiyi yarışda muxtar respublikanın şəhər və rayonlarını təmsil edən 8 komanda mübarizə aparıb.
Yarışın açılış mərasimində Gənc­lər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov, Təhsil Nazirliyinin nümayəndəsi Elxan Babayev və Səfərbərlik və Hərbi Xidmətə Çağırış üzrə Dövlət Xidmətinin əməkdaşı Məftun Xəlilov çıxış edərək muxtar respublikada idmana göstərilən qayğıdan bəhs edib, yarışın qaydaları haqda məlumat veriblər.
Qeyd edək ki, çempionatda şəhər və rayonlarda keçirilən yarışların qalib komandaları mübarizə aparıblar. 8 komanda 6 növdə – 100 metr məsafəyə qaçış, turnikdə dartınma, qumbaraatma, 2 kilometr məsafəyə qaçış, idman nərdivanı və paralel qollarda qalibi müəyyənləşdirməyə çalışıblar. Yekun nəticəyə əsasən, Naxçıvan şəhər 16 nömrəli tam orta məktəbin komandası bütün rəqiblərini xal hesabı ilə qabaqlayaraq qalib adını qazanıb. Şahbuz rayon Ayrınc kənd tam orta məktəbinin komandası ikinci, Şərur rayon Oğlanqala kənd tam orta məktəbinin komandası isə üçüncü yerlərə layiq görülüblər.
Məlumat üçün bildirək ki, Naxçıvan şəhər 16 nömrəli tam orta məktəbin komandası muxtar respublikanı Azərbaycan çempionatında təmsil edəcək.

Ceyhun Məmmədov

Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi kişilər arasında basketbol üzrə muxtar respublika çempionatı davam edir. Artıq birincilikdə üçüncü turun oyunlarına yekun vurulub. Mövsümə iddialı başlayan “Ordubad” komandası bu turda culfalı həmkarlarını məğlub etməklə şərikli lider olublar. “Naxçıvan” Universitetinin komandası isə çempionatda ilk qələbəsini qazanıb. Tələbələr səfərdə “Sədərək” komandasından üstün olublar. Elə Naxçıvan şəhərinin “Lokomotiv” komandası da bu turda ilk qələbə sevinci yaşayıb. Onlar səfərdə “Babək” komandasını məğlubiyyətə uğradıblar.

Culfa rayon Yaycı kənd 2 nömrəli tam orta məktəbin idman zalında rayon ümumtəhsil məktəbləri arasında “Zərərli vərdişlərə “yox” deyək, həmişə sağlam olaq” devizi altında qızlar arasında basketbol üzrə rayon birinciliyi keçirilib. Birincilikdə 5 komanda iştirak edib və oyunlar olimpiya sistemi üzrə təşkil edilib. Yekun nəticəyə əsasən, Yaycı kənd 2 nömrəli tam orta məktəbin komandası birinci yerə layiq görülüb. Onlar həlledici qarşılaşmada Yaycı kənd 1 nömrəli tam orta məktəbin komandasını məğlub ediblər.
Sonda qalib komanda və idmançılara Culfa Rayon Gənclər və İdman İdarəsinin, rayon Təhsil Şöbəsinin və Basketbol Federasiyasının Culfa rayon bölməsinin kubok və diplomları təqdim edilib.

Ceyhun Məmmədov

Bakı şəhərində keçirilən Böyük İpək Yolu beynəlxalq boks turniri başa çatıb. “Bakı-2015” Avropa Oyunlarına sınaq-hazırlıq xarakteri daşıyan yarışda Naxçıvan boksçusu, Avropa Oyunlarında iştirak edəcək Tayfur Əliyev də iştirak edib.
56 kiloqram çəki dərəcəsində mübarizə aparan dəri əlcək sahibimiz ilk görüşdə gürcüstanlı Levan Kadiaşvilini yarışdan kənarlaşdırıb – 3:0. Yarımfinala vəsiqə qazanan gənc boksçumuzun budəfəki rəqibi Kənan Hüseynəliyev olub. Daha inamlı mübarizə aparan və rəqibinə aman verməyən Tayfur Əliyev bu dəfə də rinqi 3:0 hesablı qələbə ilə tərk edib. Həlledici qarşılaşmada isə o, fransalı Samuel Kristori ilə üz-üzə gəlib. Milli komandamızın üzvü final qarşılaşmasında da qalib gələrək (2:1) turnirin baş mükafatını qazanıb.
Sonda idmançımız təşkilatçılar tərəfindən diplom və medalla təltif olunub.

Ceyhun Məmmədov

Naxçıvan şəhərindəki “N” hərbi hissədə Naxçıvan Muxtar Respublikası Gənclər və İdman Nazirliyi, Əlahiddə Ümumqoşun Ordusu, Təhsil Nazirliyi, Fövqəladə Hallar Nazirliyi və Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin birgə təşkilatçılığı ilə “Şahin” hərbi-idman oyunlarının Naxçıvan Muxtar Respublikası üzrə zona birinciliyi keçirilib. Yarışın keçirilməsində əsas məqsəd böyüməkdə olan nəslin hərbi-vətənpərvərlik tərbiyəsinə diqqət və qayğını daha da artırmaq, məktəb şagirdlərini hərbi-idman oyunlarına cəlb etməklə onların ordu sıralarında xidmətə hazır­lanmasına kömək göstərilməsindən ibarətdir. Tədbirin açılış mərasimində Gənclər və İdman Nazirliyinin, Təhsil Nazirliyinin və Əlahiddə Ümumqoşun Ordusunun nümayəndələri çıxış edərək tədbirin keçirilmə məqsədindən danışıb, iştirakçılara uğurlar arzulayıblar.
Yarışda hər bir komandanın heyətində 14 şagird (VIII-X sinif şagirdləri) olmaqla, 9 komanda iştirak edib və onlar 8 mərhələ üzrə yarışıblar.
Yekun nəticəyə əsasən, Culfa rayon Saltaq kənd tam orta məktəbinin komandası birinci yerə layiq görülüb. Şahbuz şəhər 1 nömrəli tam orta məktəbin komandası ikinci, Ordubad şəhərindəki internat məktəbinin komandası isə üçüncü olub.
Qaliblər təşkilatçılar tərəfindən diplom, fəxri fərman və kuboklarla təltif ediliblər.
Məlumat üçün bildirək ki, Culfa rayon Saltaq kənd tam orta məktəbinin və Şahbuz şəhər 1 nömrəli tam orta məktəbin komandaları Bakı şəhərində keçiriləcək “Şahin” hərbi-idman oyunlarının respublika finalında muxtar respublikanı təmsil edəcəklər.

 Ceyhun Məmmədov

Aprelin 14-də Naxçıvan Muxtar Respublika Stadionunda “Zərərli vərdişlərə “yox” deyək, həmişə sağlam olaq” devizi altında Naxçıvan şəhərindəki ümumtəhsil məktəblərinin oğlan və qız atletləri arasında yüngül atletika üzrə Naxçıvan şəhər birinciliyi keçirilib. Naxçıvan Muxtar Respublikası Yüngül Atletika Federasiyasının, Naxçıvan Şəhər Gənclər və İdman İdarəsinin və Təhsil Şöbəsinin birgə təşkilatçılığı ilə keçirilən yarışda 15 tam orta məktəbin komandası iştirak edib.
Naxçıvan Şəhər Gənclər və İdman İdarəsinin rəisi Xəyal Qurbanov tədbiri açıq elan edərək bildirib ki, birinciliyin keçirilməsində məqsəd Naxçıvan şəhərində yeniyetmə və gəncləri zərərli vərdişlərdən qorumaq və onları yüngül atletika idman növünə cəlb etməkdən ibarətdir.
Sonra Naxçıvan Muxtar Respublikası Yüngül Atletika Federasiyasının sədr müavini İntiqam Rəhimov və Təhsil Şöbəsinin nümayəndəsi Ruslan Quliyev çıxış edərək muxtar respublikada idmanın inkişafına göstərilən qayğıdan, idmanın kütləviləşməsi istiqamətində həyata keçirilən tədbirlərdən danışıb, idmançılara uğurlar arzulayıblar.
195 oğlan və qız atletin iştirak etdiyi yarışın yekun nəticələrinə əsasən, oğlanlar arasında İsmayıl Haqverdiyev, Tural Gözəlov, Vəli Tağıyev, Səfər Tağıyev, Rövşən Quliyev müvafiq olaraq 100, 200, 400, 800, 1500 metr, qızlar arasında isə Aytəkin Ələkbərova, Sevinc Haqverdiyeva, Səbinə Bədəlova, Zülfiyyə Mehdiyeva müvafiq olaraq 100, 200, 300, 500 metr məsafələrə qaçışda I yerlərə layiq görülüblər. Komanda hesabında isə 9 nömrəli tam orta məktəbin komandası birinci, 6 nömrəli tam orta məktəbin komandası ikinci, 16 nömrəli tam orta məktəbin komandası isə üçüncü yerlərə layiq görülüb.

 Ceyhun MƏMMƏDOV

İdmanla məşğul olmaq insan həyatında böyük dönüşlərə səbəb olub: bəzən xəstəlikdən qoruyub, bəzən uğur gətirib, insanı məşhur idmançı kimi tanıdıb. Azərbaycan idmanı son 20 ildə Avropada ən yüksək nailiyyət əldə etmiş sahə kimi qiymətləndirilir. Bunun səbəbi ölkə rəhbərinin bu sahəyə diqqəti, idmanı və idmançıları daim diqqətdə saxlaması, gənclərin bu sahəyə yönləndirilməsi istiqamətində verdiyi tapşırıqlardır. İndi qürurla demək olar ki, Azərbaycan idman ölkəsidir və qazanılan uğurlar bu sahənin inkişaf dinamikasının göstəricisidir.

Möcüzəvi növlər

İdman böyük və əyləncəli olduğu qədər, həm də çətin və çoxşaxəli sahədir. Dünya praktikasında idmanın inkişafı üçün müəyyən tədbirlər planı hazırlanır ki, ilk olaraq, bütün idman növlərinin kütləviliyinə nail olmaq üçün hansından başlanması planlaşdırılır. Bu, idman aləmində çox həssas məsələ kimi qeyd edilir. Çünki bir ölkədə idmanın inkişafı, kütləvi hal alması və tanıdılması üçün ilk addım vacib olmalıdır. Dünya alimləri idmanı təkcə sağlamlıq üçün bir vasitə yox, həm də möcüzəvi hərəkətlər sistemi kimi dəyərləndirirlər. Onlar üçün idmanın bəzi növləri var ki, həmin növlər qeyri-adiliyi ilə yanaşı, həm də insanları bir çox xəstəlikdən xilas edir. Avropalılar bunu belə dəyərləndirdiyi halda, bəzi islam ölkələri möcüzəvi idman növlərini dinlə əlaqələndirirlər. Onların fikrincə, bu idman növləri müntəzəm olaraq edildiyi təqdirdə insan bədənində möcüzəvi vəziyyət yaranır.

Babək Rayon İcra Hakimiyyəti, rayon Gənclər və İdman İdarəsi və Naxçıvan Muxtar Respublikası Futbol Federasiyasının rayon bölməsinin təşkilatçılığı ilə Çeşməbasar kəndindəki mini-futbol meydançasında ümummilli lider Heydər Əliyevin anadan olmasının 92-ci ildönümünə həsr olunmuş Babək rayonunun idarə, müəssisə və təşkilatları arasında futzal üzrə rayon birinciliyinə yekun vurulub. Birincilikdə 12 komandadan 144 idmançı mübarizə aparıb.
Yarış başlanmazdan öncə Babək Rayon Gənclər və İdman İdarəsinin rəisi Nazim Salmanlı, Babək Rayon İcra Hakimiyyəti başçısının birinci müavini Əbdülhüseyn Zamanov və Futbol Federasiyasının rayon bölməsinin rəhbəri Əsrafil Əsgərov çıxış edərək idmanın inkişafından bəhs edib, yarış iştirakçılarına uğurlar arzulayıblar.
Olimpiya sistemi üzrə keçirilən turnirin qalibi adını Babək Rayon Poliş Şöbəsinin komandası qazanıb. Onlar finalda Babək Rayon Mədəniyyət və Turizm Şöbəsinin komandasını məğlub ediblər. Üçüncü yerə isə Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Babək Rayon İdarəsinin komandası çıxıb.
Sonda qalib komandalara Naxçıvan Muxtar Respublikası Futbol Federasiyasının rayon bölməsinin hədiyyələri təqdim olunub.

 Ceyhun Məmmədov

Sədərək Rayon Gənclər və İdman İdarəsi, Təhsil Şöbəsi və Şahmat məktəbinin birgə təşkilatçılığı ilə rayon ümumtəhsil məktəblərinin şahmat müəllimləri arasında ümummilli lider Heydər Əliyevin anadan olmasının 92-ci ildönümünə həsr edilmiş birincilik keçirilib. Birincilikdə rayon ümumtəhsil məktəblərində şahmatın tədrisi ilə məşğul olan 14 müəllim iştirak edib. İsveçrə sistemi ilə keçirilən yarışda bütün rəqiblərini üstələyən Sədərək kənd 1 nömrəli tam orta məktəbin müəllimi Sultan Rzayev yarışın qalibi olub.
Qeyd edək ki, Sultan Rzayev aprel ayının sonunda Bakı şəhərində keçiriləcək respublika final mərhələsində Sədərək rayonunu təmsil edəcək.

Ceyhun Məmmədov

İdman ictimai həyatın mühüm sahəsidir. Artıq Azərbaycan beynəlxalq aləmdə idman ölkəsi kimi tanınır. Bu, həyata keçirilən uğurlu dövlət siyasətinin məntiqi nəticəsidir. Bir tərəfdən mövcud idman qurğuları yenidən qurulur, yaxud yeniləri inşa edilir, idmançılar hərtərəfli qayğı ilə əhatə olunur ki, bu da beynəlxalq turnirlərdə daha böyük uğurlar əldə etməyə imkan verir.

Digər tərəfdən isə Azərbaycan qitə və dünya miqyaslı idman yarışlarına ev sahibliyi etməklə gücünü bir daha sübut edir. Tikilən idman qurğuları, sosial infrastrukturun yeniləşməsi sosialyönümlü tədbirlərdəndir ki, bu da Naxçıvan Muxtar Respublikasında idman potensialının güclənməsi üçün mühüm əhəmiyyət kəsb edir. Hər ay keçirilən tədbirlərin sayının artması, idmançıların üzə çıxarılması onların idmanla məşğul olmaları ilə yanaşı, həm də sosial həyatlarına müsbət təsir göstərir.

Ümummilli lider Heydər Əliyevin anadan olmasının 92-ci ildönümünə həsr olunmuş Culfa rayon ümumtəhsil məktəblərinin I-V, VI-XI sinif şagirdləri (həm oğlan, həm də qızlar) arasında 3 mərhələdən ibarət olan şahmat üzrə birinci­liyə start verilib.
Culfa Rayon İcra Hakimiyyətinin tədbirlər planına uyğun olaraq, Təhsil Şöbəsinin, Uşaq-gənclər şahmat idman məktəbinin, Gənclər və İdman İdarəsinin, Naxçıvan Muxtar Respublikası Şahmat Federasiyasının rayon bölməsinin təşkilatçılığı ilə keçirilən şahmat birinciliyinin ilk mərhələsi məktəblərdaxili olub. Bu yarışda 4800 şagird öz intellekt səviyyəsini nümayiş etdirib.

Şərur Rayon Olimpiya-İdman Kompleksində keçirilən futbol üzrə uşaqlar arasında muxtar respublika birinciliyinə yekun vurulub.
Azərbaycan Futbol Federasiyaları Assosiasiyasının (AFFA) təşkil etdiyi və Naxçıvan Muxtar Respublikası Gənclər və İdman Nazirliyi ilə Futbol Federasiyasının dəstək verdiyi birincilikdə muxtar respublikanın şəhər və rayonlarının, ümumilikdə, 56 komandası iştirak edib. 10, 11, 12, 13 və 14 yaşlı uşaqların çempionatı ilə yanaşı, ümumtəhsil məktəblərinin 7 və 9-cu sinif şagirdləri “Məktəbli kuboku”nda mübarizə aparıblar. AFFA-nın təşkil etdiyi birincilik olimpiya sistemi üzrə keçirilib. Final görüşləri isə dünən başa çatıb.
Keçirilən 7 final qarşılaşmasının 6-da Şərur məktəblilərinin çıxışı diqqətdən yayınmayıb. 10 yaşlı uşaqların final qarşılaşmasında ordubadlı və şərurlu futbolçular meydana çıxıblar. Daha baxımlı oyun sərgiləyən ordubadlılar meydanı 6:5 hesablı qələbə ilə tərk ediblər. Bu, Şərur futbolçularının final matçında yeganə məğlubiyyətləri deyil. 13 yaşlı futbolçuların final matçında şahbuzlu həmkarları ilə qarşılaşan şərurlular yenə məğlub olublar – 4:5. 12 yaşlı gələcəyin futbolçuları arasında həlledici qarşılaşma yenə Şərur və Şahbuz komandalarını üz-üzə gətirib. Bu görüşdə üstünlüyü sonadək qoruyan Şərur futbolçuları qalib adını qazanıblar – 5:1. Onlar kimi, 14 yaşlılar da digər iki məğlubiyyəti unutdurmağa müvəffəq olublar. Şərur komandası bu dəfə finalda Naxçıvan şəhərinin komandası ilə qarşılaşıb və meydanda üstün olan tərəf məhz şərurlular olub – 3:1. Turnirin ən gərgin final qarşılaşması isə 11 yaşlı futbolçular arasında olub. Həlledici görüşdə üz-üzə gələn Şərur və Şahbuz futbolçularının səylərinə baxmayaraq, oyunun əsas və əlavə vaxtı heç-heçə (4:4) başa çatıb və qalib penalti zərbələrindən sonra müəyyənləşib. Zərbələri daha dəqiq yerinə yetirən Şahbuz komandası öz yaş qrupunda qalib adını qazanıb – 10:9.

Naxçıvan Muxtar Respublikasının Voleybol Federasiyasının Culfa rayon bölməsinin və Təhsil Şöbəsinin təşkilatçılığı ilə Əbrəqunus kənd tam orta məktəbinin idman zalında məktəblilər arasında voleybol yarışına yekun vurulub. Bu idman yarışının keçirilməsində əsas məqsəd voleybol oyununu şagirdlər arasında yaymaq və kütləviləşdirmək, onların voleybol ustalığını artırmaq və yarış təcrübəsini təkmilləşdirmək, həmçinin istedadlı voleybolçuları müəyyənləşdirməkdir.
Olimpiya sistemi ilə keçirilmiş yarışda 1998-2000-ci il təvəllüdlü oğlan şagirdlər iştirak ediblər. Rayonun ümumtəhsil məktəblərinin 10 komandasının iştirak etdiyi voleybol birinciliyində Əbrəqunus kənd tam orta məktəbinin komandası birinci, Xanəgah məktəbliləri ikinci, Qızılca kənd tam orta məktəbinin komandası isə üçüncü yerləri tutublar.
Qalib komandalar rayon Təhsil Şöbəsinin və Uşaq-gənclər idman məktəbinin diplom və hədiyyələri ilə mükafatlandırılıblar.

Ceyhun Məmmədov

Dünən Naxçıvan şəhərində yerləşən “N” hərbi hissədə yaz çağırışına həsr olunmuş “Vətənin müdafiəsinə hazıram” (VMH) poliatlon çoxnövçülüyü üzrə şəhər birinciliyi keçirilib. Naxçıvan Şəhər Gənclər və İdman İdarəsi, Təhsil Şöbəsi və Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Naxçıvan Şəhər İdarəsinin birgə təşkilatçılığı ilə keçirilən yarışda 12 tam orta məktəbin komandası iştirak edib. Naxçıvan Şəhər Gənclər və İdman İdarəsinin rəisi Xəyal Qurbanov tədbiri açıq elan edərək bildirib ki, bu cür yarışların keçirilməsi yeniyetmə və gənclərin hərbi-vətənpərvərlik ruhunda tərbiyə olunmalarına, vətənpərvərlik hislərinin aşılanmasına və gənc­lərin hərbi xidmətə hazırlıq səviyyələrinin yüksəldilməsinə kömək edir. Sonra Təhsil Şöbəsinin nümayəndəsi Ruslan Quliyev və Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətinin Naxçıvan Şəhər İdarəsinin nümayəndəsi, leytenant Əli Kazım­ov çıxış ediblər.
Poliatlon dördnövçülük pro­qramına uyğun olaraq, yarış 100 metr qaçış, 2000 metr kross qaçışı, qumbaraatma və turnikdədartınma növləri üzrə təşkil edilib. Yarışın yekununa əsasən, 16 nömrəli tam orta məktəbin komandası birinci yerə layiq görülüb. 1 nömrəli tam orta məktəbin komandası ikinci, 7 və 2 nömrəli tam orta məktəblərin komandaları isə üçüncü olublar.
Sonda I, II, III yerləri tutan komandalara təşkilatçıların kubok, diplom və fəxri fərmanları təqdim edilib.

* * *

Babək qəsəbəsində Babək Rayon Gənclər və İdman İdarəsi və Təhsil Şöbəsinin təşkilatçılığı ilə rayon ümumtəhsil məktəblərinin komandaları arasında “Vətənin müdafiəsinə hazıram” (VMH) poliatlon çoxnövçülüyü üzrə keçirilən birinciliyə yekun vurulub. Birinciliyin keçirilməsində məqsəd rayonun bədən tərbiyəsi və idman kollektivlərində, qəsəbə və kənd­lərində “VMH” çoxnövçülüyünü yeniyetmə və gənclər arasında təbliğ etmək, çağırışyaşlı və çağırışaqədərki gəncləri hərbi-vətənpərvərlik ruhunda tərbiyə etmək, onların Milli Orduda layiqincə xidmət etmələri üçün fiziki hazır­lıq səviyyələrini yüksəltməkdən ibarət olub.

Bakı şəhərindəki Hövsan Olimpiya-İdman Kompleksində uşaqlar, yeniyetmələr, gənclər və böyüklər arasında VKC növləri üzrə Milli Karate Federasiyasının Azərbaycan çempionatı keçirilib.
Bu yarışda Naxçıvan Muxtar Respublikası Karate-do Federasiyasının yetirmələri də çıxış ediblər. Federasiyanın sədr müavini Nəriman Quliyevin rəhbərliyi ilə paytaxta 9 karateçimiz yollanıb və idmançılarımızdan 6-sı fəxri kürsüyə qalxıb. Yaş qrupları üzrə keçirilən çempionatda ən uğurlu qələbəni Mahir Rzabəyli qazanıb. 18-22 yaş qrupunda karateçimiz bütün rəqiblərini məğlub edərək qızıl medal əldə edib. 18 yaşa kimi idmançılar arasında Mirpaşa Kərimzadə finala kimi məğlub olmayıb. Həlledici qarşılaşmada rəqibi xəsarət aldığına görə qaydalara əsasən, Mirpaşa Kərimzadə ikinci yerə layiq görülüb, rəqibi isə yarışdan uzaqlaşdırılıb. Gümüş medalı boynuna asan digər idmançımız isə Abbas Qasımov olub. O, 17 yaşlı karateçilər arasında yalnız final qarşılaşmasında məğlubiyyətlə üzləşib.
8-9 yaş qrupunda Rəşid Süleyman­ov, 14-15 yaş qrupunda Sərcan Məmmədov və 22-25 yaş qrupunda Yunis Hüseynəliyev isə çempionatı üçüncü pillədə başa vurublar.
Qalib idmançılara təşkilatçılar tərəfindən diplom və medallar təqdim olunub.
Məlumat üçün qeyd edək ki, idmançılarımızın uğurlu çıxışından sonra Naxçıvan Muxtar Respublikası Karate-do Federasiyası Azərbaycan Respublikası Gənclər və İdman Nazirliyi tərəfindən xüsusi hədiyyəyə layiq görülüb.

 Ceyhun Məmmədov

Azərbaycan Respublikası Daxili İşlər Nazirliyinin (DİN) Bakı şəhərində təşkil etdiyi sərbəst güləş üzrə DİN əməkdaşları arasında respublika çempionatına yekun vurulub. Bu yarışda Naxçıvan Muxtar Respublikası Daxili İşlər Nazirliyinin idmançıları da iştirak ediblər. Nazirliyin “İdman” Cəmiyyətinin rəisi, polis polkovniki Cavanşir Salayevin rəhbərliyi ilə Bakıya yollanan 7 güləşçimizdən dördü mükafatçılar sırasına düşməyi bacarıb. Belə ki, 65 kiloqram çəki dərəcəsində mübarizə aparan Ma­hir Babayev yalnız həlledici qarşılaşmada məğlub olub və ikinciliklə kifayətlənib. Onun kimi 74 kiloqram çəki dərəcəsində Ramin Məmmədov da gümüş medalla mükafatlandırılıb. Ağır çəki dərəcəsin­də mübarizə aparan Elməddin Abdullayev (97 kq) və Kamil Salayev (125 kq) isə üçüncü yerə layiq görülüblər.
Qalib idmançılarımıza diplom, medal və idman geyimləri təqdim edilib.
Məlumat üçün qeyd edək ki, idmançılarımız bu uğurdan sonra Azərbaycan Respublikası Daxili İşlər Nazirliyinin sərbəst güləş üzrə yığmasına dəvət olunublar.

Ceyhun Məmmədov

Naxçıvan Muxtar Respublikası Gənclər və İdman Nazirliyi ilə Basketbol Federasiyası cari ilin əvvəlindən başlayaraq ilk dəfə basketbol üzrə kişilər arasında Naxçıvan Muxtar Respublika çempionatına start verib.
Mart ayının 14-də başlayan çempionat iki dövrədən ibarətdir. İlk dövrə iyun ayının 8-də yekunlaşacaq. Bundan sonra istirahətə yollanacaq basketbolçular ikinci dövrəyə sen­tyabrın 27-də start verəcəklər. 3 ay davam edəcək ikinci dövrənin oyunlarına dekabrın 27-də yekun vurulacaq.
Basketbol üzrə kişilər arasında Naxçıvan Muxtar Respublika çempionatında 8 komanda iştirak edir. “Naxçıvan”, “Lokomotiv”, “Babək”, “Sədərək”, “Şərur”, “Ordubad”, “Culfa” və “Naxçıvan” Universiteti” komandalarının birincilik uğrunda mübarizə apardığı çempionatın artıq 7 oyunu geridə qalıb. Açılış matçında çempionatın favoriti kimi göstərilən “Naxçıvan” komandası İlham Əliyev adına Olimpiya-İdman Kompleksində “Babək” komandasını sınağa çəkib. Oyun və dəqiqlik baxımından babəkli həmkarlarından üstün olan birincilər meydanı 53:25 hesablı qələbə ilə tərk ediblər. Bu görüşdən sonra “Naxçıvan” səfərdə “Sədərək” və “Lokomotiv” komandalarını da məğlub etməyi bacarıb. Sədərək komandası üzərində 66:38 hesabı ilə qələbə qazanan “Naxçıvan” komandasının ən baxımlı oyunu “Lokomotiv”lə görüşdə olub. Daha təcrübəli basketbolçularının səbəti dəqiq və düzgün nişan almasından maksimum istifadə edən favorit komanda rəqibin daşını daş üstə qoymayıb – 47:91. Onu da qeyd edək ki, “Naxçıvan” komandası bu qələbələrdən sonra turnir cədvəlinə başçılıq edir.

Naxçıvan Muxtar Respublikası Gənclər və İdman Nazirliyi ilə Voleybol Federasiyasının birgə təşkil etdiyi açıq birinciliyə yekun vurulub.
Naxçıvan şəhərindəki İlham Əliyev adına Olimpiya-İdman Kompleksində 3 gün davam edən birinci­likdə 8 komanda iki yarımqrupda mübarizə aparıb. A qrupunda “DİN” (Daxili İşlər Nazirliyinin komandası), “Şahbuz”, “Sədərək”, “Ordubad”, B qrupunda isə “Şərur”, “Culfa”, “Babək” və “Kəngərli” komandalarının mübarizəsində finala A qrupunun iştirakçıları vəsiqə qazanıblar.
Birinciliyin son günündə əvvəlcə meydana üçüncülük uğrunda “Şərur” və “Culfa” komandaları çıxıblar. Daha üstün oyun nümayiş etdirən Culfa voleybolçuları meydanı 3:1 hesablı qələbə ilə tərk edərək birinciliyi üçüncü pillədə başa vurublar. Final görüşü isə gözlənildiyindən də maraqlı keçib. A qrupunda mübarizə aparan “DİN” və “Sədərək” komandaları qrup mərhələsində qarşılaşmış və sədərəklilər rəqibini 3:1 hesabı ilə məğlub etmişdilər. Həlledici qarşılaşmada “DİN” voleybolçuları işlərinin heç də asan olmadığını bilirdilər. Eldar Zülfüqarovla Rüstəm Cəfərovun idarə etdiyi qarşılaşma sədərəklilər üçün heç də yaxşı başlamadı və onlar ilk iki setdə istirahətə məğlub yollandılar.

“Araz-Naxçıvan” cari mövsümdə məğlub olmayan yeganə komandadır

Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi futbol üzrə Naxçıvan Muxtar Respublika çempionatı davam edir. Cari mövsümün başa çatmasına az bir müddət qalmış çempionluq uğrunda mübarizə həyəcanı da artmaqdadır. Artıq turnir cədvəlinin ilk 3 pilləsində qərarlaşan komandalar qarşıdakı oyunlarda xal itirməməyə çalışmalıdırlar. Əks təqdirdə, mövsüm ərzində çəkdikləri əziyyətlər hədər gedəcək.

Hazırda turnir cədvəlinə başçılıq edən “Dinamo” futbol komandasının aktivində 34 xal var. Keçirdiyi 13 oyunda yalnız meydanı bir dəfə məğlub tərk edən Daxili İşlər Nazirliyinin komandasını qarşıda daha çətin oyun gözləyir. “Araz-Naxçıvan”la görüş eyni zamanda çempionatın taleyini həll edəcək. Mövsümə iddialı başlayan “Araz-Naxçıvan” cari mövsümdə məğlub olmayan yeganə komandadır. Həmçinin “qırmızı-ağlar” rəqibi ilə müqayisədə bir oyun az keçirib. Yəni qarşıdakı turlarda qələbə qazanacağı təqdirdə, Naxçıvan Muxtar Respublika çempionatında növbəti mövsümün qalibi “Araz-Naxçıvan” ola bilər. Hazırda “qırmızı-ağlar”ın aktivində 12 oyundan 34 xal var.
Hər mövsüm çempionatın favoriti kimi göstərilən və ötən ili çempion kimi başa vuran “Universitet” komandası da uğurunu təkrarlaya bilər. Əslində, dövlət universitetinin yetirmələri “Araz-Naxçıvan”la oyuna kimi turnir cədvəlində ikili hakimiyyət yaratmışdılar və “Dinamo” ilə birgə liderlik “kreslo”sunda əyləşmişdilər. Lakin iki görüşdə “qırmızı-ağlar”a məğlub olan tələbələr (3:2, 4:2) çempionluq yarışında özlərini bir qədər çətinə saldılar. İndiyədək “Universitet” komandası 14 oyun keçirib və aktivində 31 xalı var.

Naxçıvan şəhərindəki İlham Əliyev adına Olimpiya-İdman Kompleksində voleybol üzrə Naxçıvan Muxtar Respublika açıq birinciliyi davam edir.
Naxçıvan Muxtar Respublikası Gənclər və İdman Nazirliyi ilə Voleybol Federasiyasının birgə təşkil etdiyi birincilikdə artıq qrup mərhələsinin oyunları başa çatıb.
Qrup oyunlarının son günü gərgin mübarizə ilə yadda qalıb. A qrupunda liderlik uğrunda mübarizə “DİN” və “Sədərək” komandaları arasında olub. Daha baxımlı oyun sərgiləyən sədərəklilər 3:1 hesabı ilə qalib gəldilər. Qrupun digər oyununda azarkeşlər 5 setə şahidlik ediblər. “Şahbuz” komandası “Ordubad” komandasını 3:2 hesabı ilə məğlub edərək qələbə qazanıb.
B qrupunda isə yarımfinala “Culfa” və “Şərur” voleybolçuları vəsiqə qazanıblar. Qrupun son oyunlarında “Şərur” “Babək”i, “Culfa” isə “Kəngərli”ni məğlub etməyi bacarıb. Hər iki görüş 3:0 hesabı ilə başa çatıb.
Artıq Naxçıvan Muxtar Respublika açıq birinciliyinin finalçıları da məlumdur. Dünən keçirilən yarımfinal görüşlərində aşağıdakı nəticələr qeydə alınıb:

“Sədərək”-3 – “Culfa”-1
“Şərur”-0 – “DİN”-3

Beləliklə, bu gün keçiriləcək final oyununda “Sədərək” və “DİN” komandaları qarşılaşacaqlar.
Dünən voleybolçular Naxçıvan şəhərindəki Heydər Əliyev Muzeyində, “Naxçıvanqala” Tarix-Memarlıq Muzey Kompleksində və Dövlət Bayrağı Muzeyində olublar.

Ceyhun Məmmədov

Dünən Naxçıvan şəhərindəki İlham Əliyev adına Olimpiya-İdman Kompleksində voleybol üzrə Naxçıvan Muxtar Respublika açıq birinciliyinə start verilib. Naxçıvan Muxtar Respublikası Gənclər və İdman Nazirliyi ilə Voleybol Federasiyasının birgə təşkil etdiyi birincilik 3 gün davam edəcək.
Yarışın açılış mərasimində öncə Azərbaycan Respublikasının Dövlət Himni səsləndirildi.
Mərasimdə çıxış edən Gənclər və İdman nazirinin müavini Məcid Seyidov qeyd etdi ki, son illər muxtar respublikada idman sahəsinə göstərilən diqqət və qayğı nəticəsində idmançılarımız hər bir yarışda uğurla çıxış edirlər. Bu gün keçirilən voleybol birinciliyi bir daha sübut edir ki, muxtar respublikada idmanın inkişafı yüksək səviyyədədir.
Voleybol Federasiyasının sədr müavini Aydın Mirzəyev isə çıxışında keçirilən birinciliyin qaydaları haqda iştirakçıları məlumatlandırdı və onlara uğurlar arzuladı.
Yarışda 8 komanda iki yarımqrupda mübarizə aparır. A qrupunda “DİN” (Daxili İşlər Nazirliyinin komandası), “Şahbuz”, “Sədərək” və “Ordubad”, B qrupunda isə “Şərur”, “Culfa”, “Babək” və “Kəngərli” komandaları ilk iki pillə üçün meydana çıxdılar. Qrupda ilk iki pillədə yer alan komandalar yarımfinala yüksələcək və həlledici qarşılaşma üçün mübarizə aparacaqlar.

  Amma hələ də bu işdə ləngiyirik

Artıq neçə illərdir ki, muxtar respublikamızda idman mövzusu aktual məsələlərdən birinə çevrilib. Bu da səbəbsiz deyil. Çünki idman hər bir cəmiyyətin sağlam inkişafında böyük rola malikdir. Bu baxımdan qürur duyuruq ki, Azərbaycan bayrağının iki dəfə rəsmi olaraq qaldırılmasının biri idmanla bağlıdır. Ona görə də idmanda qazandığımız uğurlar həm də böyük siyasi xarakter daşıyır, dövlətçiliyimizin nailiyyəti kimi qiymətləndirilir. Xüsusilə qeyd etməliyəm ki, idman təkcə hər hansı bir yarışda uğur qazanmaq deyil, həm də gələcək nəslin sağlamlığının qorunmasıdır. Bundan başqa, idman gəncləri təşəbbüskarlığa, əməksevərliyə, təəssübkeşliyə, səbrə, iradəli olmağa, dözümə öyrədir; insanda yalnız öz gücünə arxalanmaq, komanda yoldaşına yardım göstərmək, nəticə etibarilə, humanist olmaq və  Vətəni sevmək kimi vacib keyfiyyətlər formalaşdırır.  

Son 20 il muxtar respublikanın bədən tərbiyəsi və idman tarixində mühüm mərhələ təşkil edir. Artıq neçə illərdir ki, Naxçıvanda müxtəlif beynəlxalq idman yarışları keçirilir. Mütəxəssislərin fikrincə, hər hansı bir ölkədə beynəlxalq yarışlar keçirilərkən 3 əsas meyar nəzərə alınır. İlk növbədə, həmin ölkədə idmanın inkişafı, ikincisi, bu sahədə maddi-texniki bazanın vəziyyəti, üçüncüsü isə təşkilatçılıq. Sevindirici haldır ki, bütün bunlar muxtar respublikada yüksək səviyyədədir. Hazırda muxtar respublikada 1042 idman müəssisəsinin və sadə idman qurğularının fəaliyyət göstərməsi bu sahəyə qayğının ən böyük ifadəsidir. Ümumilikdə, muxtar respublikamızda son illərdə 40-dan çox idman obyekti tikilərək, yenidən qurularaq və ya əsaslı şəkildə təmir olunaraq istifadəyə verilib. Həmçinin muxtar respublikamızda istifadəyə verilən yeni məktəb binalarında ən müasir standartlara cavab verən idman zalları yaradılıb. Belə şərait hesabınadır ki, təkcə 2014-cü ildə muxtar respublika idmançıları dünya çempionatlarında 2, Avropa çempionatlarında 4, beynəlxalq turnirlərdə 10, Azərbaycan birinciliklərində 56 medal qazanıblar.

Dünən Babək rayonunda keçirilən yeniyetmə və gənclər arasında kikboksinq üzrə Naxçıvan Muxtar Respublika birinciliyinə yekun vurulub.
Naxçıvan Muxtar Respublikası Gənclər və İdman Nazirliyi ilə Şərq Döyüşü Sənəti Federasiyasının birgə təşkil etdiyi birincilikdə 60-dan çox idmançı 9 çəki dərəcəsində mübarizə aparıb. 31 Mart – Azərbaycanlıların Soyqırımı Gününə həsr olunan yarışın açılış mərasimində Naxçıvan Muxtar Respublikası Daxili İşlər Nazirliyinin “Dinamo” İdman Cəmiyyətinin rəisi, polis polkovniki Cavanşir Salayev, Babək Rayon Gənclər və İdman İdarəsinin rəisi Nazim Salmanlı və rayon Polis Şöbəsinin rəisi, polis mayoru İlham Məmmədov çıxış edərək soyqırımı haqda danışıblar. Çıxış edənlər həmçinin son illər muxtar respublikada idmanın kütləvi hal aldığını və gənclər arasında geniş yayılması üçün Naxçıvanda hər bir şəraitin olduğunu diqqətə çatdırıblar.
Birinciliyin reqlamentinə gəlincə, 9 çəki dərəcəsində mübarizə aparan idmançılar rinqdə kimin güclü olduğuna aydınlıq gətiriblər. Nəticəyə əsasən, Ümid Bayramov (27 kq), İsmayıl Yaqubov (31 kq), Anar Tarverdiyev (34 kq), Sənan Əliyev (39 kq), Rauf Həsənov (51 kq), Araz Hüseynzadə (57 kq), Kənan Məmmədov (60 kq), Ramul Səfərli (63 kq) və Abbas Qədimov (67 kq) bütün rəqiblərinə qalib gələrək fəxri kürsünün ən yüksək zirvəsinə qalxıblar.
Sonda qalib idmançılara diplom, medal və hədiyyələr təqdim olunub.

Ceyhun Məmmədov

Avropa alimlərinin apardığı tədqiqatlardan sonra məlum olub ki, mükəmməl fiziki hazırlığa yiyələnmək üçün insanda güclü daxili intizam və qətiyyətin olması vacibdir. İnsan idmanı, sadəcə, qarşısına qoyduğu məqsədə nail olmaq üçün etmir; sağlam həyat təkcə yarışlarda qazanılan uğurlardan ibarət deyil. Fiziki hazırlıq insan üçün böyük nemətdir – sağlamlıqdır. Bu nemətdən isə maksimum yararlanmaq insan xarakterindəki qətiyyətdən asılıdır.

Formalaşan xarakter

Bir müddət əvvəl ingilis alimlərin təsdiq etdiyi “insanın məşğul olduğu idman növünə görə xarakteri dəyişə bilər” fikri böyük səs-küyə səbəb olmuşdu. Bu fikir xarakterin 2 əlamətini – tipik və fərdi əlamətləri qarşılaşdırmışdı. Aparılan araşdırmalardan sonra təsdiq olunmuşdu ki, eyni cəmiyyətdə yaşayan insanların həyat şəraitində tipik xüsusiyyətlərlə yanaşı, özünəməxsus cəhətlər də rol oynayır. Bu cəhətlərin dəyişməsində isə başlıca rolu idman oynayır. Qısası, idman makromühitdə formalaşan etnik və milli xarakterləri birləşdirməyə müvəffəq olan yeganə vasitədir. Deməli, idman insanın xarakterini formalaşdırmaqla yanaşı, eyni zamanda onun sağlam ruhda inkişafına da təsir göstərir, onda idman etmək ənənə halını alır. Məsələn, fiziki təlim üçün ideal vaxt səhər yuxusundan sonradır. Hər gün səhər 30-60 dəqiqə fiziki təlimə vaxt ayıran adamlar əksər hallarda bu işi ömürlük adətə çevirirlər.
Fiziki təlimi gündəlik adətə çevirmək güclü daxili intizam tələb edir. Bunu yuxudan qalxan kimi ilk iş olaraq görmək isə insanın işini xeyli asanlaşdırır. Həftə ərzində bu, elə də çox vaxt aparmır: 200-300 dəqiqə. Maraqlısı odur ki, insan fiziki təlimlərini gündəlik altmış dəqiqəyə çatdırırsa, o, dünyanın ən sağlam 1-2 faiz insanları sırasına qoşulur.
Hər insan isə bu işin öhdəsindən lazımi səviyyədə gələ bilmir. Hansı səviyyədə olmasından asılı olmayaraq, daim məşq etmək zamanla adətə çevrilir. Alimlər idmana başlamağın heç vaxt gec olmadığını deyirlər: istənilən vaxt fiziki durumu düzəltmək mümkündür. Təbii ki, bunun üçün insan ilk olaraq özünü yaxşı mənada aldatmalıdır. Bəs necə? Ən azından axşamdan idman paltarını yatağın yanına qoymaqla özünü asan şəkildə aldada bilər. Yuxudan tam ayılmağa macal tapmamış artıq idman paltarında özünü görmək səni bu sahə ilə məşğul olmağa vadar edəcək. Eyni zamanda səhər idmanı insanda ovqatın da yaxşı olmasına zəmin yaradır.

Sağlam cəmiyyət üçün sağlam yol

Uzun, sağlam həyatı təmin etməyin əsas şərti fiziki təlimlərə başlamaq və bunu ömürboyu davam etdirməkdir. Daxili intizam və iradədən, xarakterdən istifadə edib fiziki təlimə başladıqda və bunu aramsız olaraq davam etdirdikdə insan cəmiyyət üçün də sağlam qərarlar qəbul edir. Tədqiqatçılar hər səhər fiziki təlimlə məşğul olan insanların daha ağıllı, iti düşüncəli və yaradıcı olduqlarını müəyyən ediblər. Onların intellekti daha yüksək olur və işlərini daha effektiv görmək üçün yeni ideyalara malik olurlar. Bunun səbəbi sadədir: hər səhər idman etməklə insan beynində oksigenlə zəngin qan axınını gücləndirir və bununla da, onun effektiv fəaliyyətini təmin edir. Bu da insanın gün ərzində ayıq, düşüncəli və yaradıcı olmasına şərait yaradır. Həkimlərin isə fikrincə, yuxudan oyanan kimi fiziki təlimlə məşğul olmaq insanın metabolik səviyyəsini qaldırır, nəticədə, bədən bütün gün ərzində aktiv kalori yandırır.
Daxili fiziki güclə yanaşı, möhkəm iradəyə malik olmağın digər yolu təşkilati və ya kollektiv idman növlərində çıxış etməkdir. Bu, fiziki hazırlığı yaxşı­laşdırmağın ən yaxşı yollarından biridir. Düzdür, bəzən insan buna vaxt məhdudiyyətinə görə məhəl qoymur, lakin vaxt və planlaşdırma məsələsində nə qədər çətinliklər törənsə də, nəticə hər zaman müsbət olur. Futbol, voleybol, tennis və bu kimi idman növləri ilə məşğul olduqda insan daha məsuliyyətli, intizamlı və diqqətli olur.
Güclü daxili intizama malik olan insan idman sayəsində istənilən uğura yiyələnə bilər. Çünki daxili intizam fərdin fiziki hazırlığını tam təmin etməklə yanaşı, eyni zamanda onda sağlam cəmiyyət üçün müsbət xarakter formalaşdırır.

 Ceyhun Məmmədov

“Gənclik” Tələbə İdman Cəmiyyəti Respublika Şurasının, Azərbaycan Respublikası Təhsil Nazirliyinin təşkilatçılığı ilə ali təhsil müəssisələrinin tələbələri arasında Bakı şəhərində keçirilən XII Respublika Universiadasında Naxçıvan Dövlət Universitetinin tələbələri yüksək nəticələr əldə ediblər.
İdmanın sərbəst güləş növü üzrə keçirilən yarışlarda Naxçıvan Dövlət Universitetinin tələbəsi Ramid Yaqubov 60 kq çəki dərəcəsində çempion olaraq, bu il iyul ayının 3-14-də Cənubi Koreyada keçiriləcək Tələbələrin 28-ci Dünya Universiadasında iştirak etmək hüququ qazanıb. Azər Əliyev isə 74 kq çəki dərəcəsində üçüncü yerə layiq görülüb. Qeyd edək ki, idmançı tələbələr yarışlara Naxçıvan Dövlət Universitetinin Tələbə idman klubunun sədri, dosent Məmmədəli Rəhimovun rəhbərliyi ilə qatılıblar.
Şahmat üzrə keçirilən yarışlarda isə universitetin tələbəsi Toğrul Hacızadə 51 şahmatçı arasından beşinci yerə layiq görülüb. Bu yarışlarda turnir cədvəlinə liderlik edən şahmatçı ilə Toğrul Hacızadə arasında cəmi yarım xal fərq olub.

Mina QASIMOVA

Şahbuz Rayon Gənclər və İdman İdarəsi ilə Təhsil Şöbəsinin birgə təşkil etdiyi rayon ümumtəhsil məktəblərinin şagirdləri arasında vətənin müdafiəsinə hazıram poliatlon çoxnövçülüyü üzrə Şahbuz rayon birinciliyinə yekun vurulub. Birinciliyin açılış mərasimində Şahbuz Rayon Gənclər və İdman İdarəsinin rəisi Vüqar Muradov, rayon Təhsil Şöbəsinin aparıcı məsləhətçisi Sahib Hüseynov çıxış edərək komandalara uğurlar arzulayıblar.
14 tam orta məktəbin komandasının mübarizə apardığı yarışın yekun nəticələrinə əsasən, Kükü kənd tam orta məktəbinin komandası birinci yerə layiq görülüb. Digər iki pillədə isə Kolanı və Gömür kənd tam orta məktəblərinin komandaları qərarlaşıblar. Qalib komandalara və hər növdə fərqlənən şagirdlərə təşkilatçılar tərəfindən diplomlar təqdim edilib.

 Ceyhun MƏMMƏDOV

İdmanın bütün növləri insana sərbəstlik, özünəinam, ən əsası isə atletik bədən bəxş edir. İnsan bədəni formalaşmağa başladığı bir gündən onun əzələləri müəyyən forma alır ki, bunu düzgün inkişaf etdirmək hər bir kəsin öz əlindədir. Atletik bədənə sahib olmaq idmana olan vurğunluqdan irəli gəlir. Məhz bu amil əsas götürülərək yüngül atletika bütün idman növlərinin yaradıcısı kimi qəbul edilir. 

Nələrə əməl etmək vacibdir?
Yüngül atletika ən qədim idman növlərindən biri hesab edilir. Bu növ özündə qaçış idman növlərini, idman yerişini, tullanmalar və atmaları, çoxnövçülük və kross yarışlarını birləşdirir. Yüngül atletikanın yaranma tarixi qədim olimpiya oyunlarının yaranma tarixi ilə eyni dövrə təsadüf edir. Maraqlısı odur ki, həmin dövrlərdə keçirilən olimpiya oyunları yalnız idman yarışları deyil, həm də idmanın sənət və mədəniyyətlə birləşdiyi böyük mərasim idi. Qədim tarixə malik olmasına baxmayaraq, müasir yüngül atletika oyunlarının geniş yayılması XIX əsrin son illərinə təsadüf edir.
Ümumiyyətlə, atletika özündə bir çox idman növünü ehtiva edir: 100, 200, 400, 800, 1500, 3000 metrlik məsafəyə qaçış, 110 və 400 metrlik məsafəyə sədlərlə qaçış, 2000 metrlik uzaqlığa maneələrlə qaçış, 10 min metrlik idman yerişi, hündürlüyə tullanma, şüvüllə tullanma, uzunluğa tullanma, üç təkanla tullanma, lövhəatma, çəkic­atma, nizəatma.
Naxçıvan Muxtar Respublikasında yüngül atletikanın geniş yayılmış növü qaçışdır ki, hazırda Yüngül Atletika Federasiyasının təşkil etdiyi yarışların əksəriyyəti məhz 200, 400, 800 və 1500 metrlik məsafəyə qaçış və ya kross yarışlarından ibarətdir. Yüngül atletika digər idman növlərindən fərqli olaraq, insanın özünü bu sahədə sübut etməsi üçün zaman tələb edir. Yəni hər qaçan, qaçmağı bacaran kəs atlet ola bilməz. Bu idman növünə başlamazdan öncə insan mütləq şəkildə həkim nəzarətindən keçməlidir. Yüngül atletikanı seçənlərin ən böyük səhvi isə bu növə sürətli başlanğıc etmələridir. Məşqlərə tədricən, yavaş başlayıb fiziki gücü müəyyən bir həddə çatdırmaq lazımdır. Sürətli fiziki gərginlik insanı sağlamlaşdırmır, əksinə, orqanizmi zəiflədir. Sağlam olmaq üçün asta qaçmaq məsləhətdir. Sürətli qaçmaq və ya beton, asfalt yerdə qaçmaq isə oynaqlar üçün təhlükəlidir.