Naxçıvan Muxtar Respublikası Gənclər və İdman Nazirliyi ilə Karate-do Federasiyası Ordubad rayonunda 15 İyun – Milli Qurtuluş Gününə həsr edilmiş seminar təşkil edib. 40-a yaxın idmançının iştirak etdiyi seminarda 7 nəfər müxtəlif kəmər imtahanları verib. İmtahanları uğurla tamamlayan karateçilərə federasiya tərəfindən müəyyən edilmiş kəmərlər təqdim olunub.

Ceyhun MƏMMƏDOV

Ötən gün 15 İyun – Milli Qurtuluş Gününə həsr edilmiş yüngül atletika üzrə turnirə yekun vurulub. Naxçıvan Şəhər Gənclər və İdman İdarəsi, Şahbuz Rayon Gənclər və İdman İdarəsi və “Rabitəçi” İdman Klubunun birgə təşkil etdiyi turnirdə 50-dən çox atlet qüvvəsini sınayıb. 2 kilometr kross yarışı üzrə keçirilən turnirdə oğlanlar və qızlar iştirak ediblər. Oğlanlardan Orucəli Orucov, qızlardan isə Zülfiyyə Mehdiyeva bütün rəqiblərini geridə qoyaraq finişə birinci çatıblar.
Sonda təşkilatçılar tərəfindən qalib olmuş idmançılara diplom və hədiyyələr təqdim edilib.

Ceyhun MƏMMƏDOV

15 İyun – Milli Qurtuluş Gününə həsr edilmiş daha bir turnir Naxçıvan Atıcılıq Mərkəzində keçirilib. Naxçıvan Muxtar Respublikası Gənclər və İdman Nazirliyi ilə Atıcılıq Federasiyasının birgə təşkil etdiyi atıcı­lıq üzrə muxtar respublika turnirində 30-a yaxın idmançı qüvvəsini sınayıb. Turniri təşkil etməkdə məqsəd atıcılıq üzrə muxtar respublikanın yığma komandasını təşkil etmək, həmçinin gənclərin atıcılıq idman növünə marağını artırmaq idi.
Turnirdə bütün rəqiblərini üstələyən Mahmud Vəliyev qalib adını qazanıb. Digər iki pillədə isə Fərhad Əliyev və Hikmət Xəlilov qərarlaşıblar.
Sonda Naxçıvan Muxtar Respublikasının gənclər və idman naziri Azad Cabbarov və Atıcılıq Federasiyasının sədri Asəf Məmmədov qalib idmançıları kubok, diplom və hədiyyələrlə mükafatlandırıblar.

Ceyhun MƏMMƏDOV

Naxçıvan şahmatçıları beynəlxalq turnirlərdə uğurlu çıxışları ilə yenə hamının diqqətini cəlb ediblər. Belə ki, 25-29 may tarixlərində Gürcüstan Respublikasının paytaxtı Tbilisi şəhərində keçirilən beynəlxalq yarışda Azərbaycan komandasının tərkibində iki naxçıvanlı şahmatçı – Nazlı Hümbətova və Zahid Allahverdiyev iştirak ediblər. 7 yaşlı uşaqlar arasında mübarizə aparan Z.Allahverdiyev yarışın qalibi olub.
Bununla yanaşı, 5-9 iyun tarixlərində Türkiyənin Manisa şəhərində keçirilən beynəlxalq turnirdə daha iki şahmatçımız iştirak edib və Elvin Namazlı reytinqsiz şahmatçılar arasında yarışı 3-cü pillədə başa vurub.
1-11 iyun tarixlərində isə Bakı şəhərində keçirilən Azərbaycan çempionatının final mərhələsində 3 zəka sahibimiz qüvvəsini sınayıb. Daha uğurlu təsir bağışlayan Sadiq Məmmədov çempionatı 4-cü yerdə başa vurub.
Qeyd edək ki, 16-27 iyun tarixləri arasında Yunanıstanın Kavala şəhərində məktəblilər arasında Avropa çempionatı keçiriləcək. Muxtar respublikamızı bu çempionatda Naxçıvan Şahmat Mərkəzinin 7 şahmatçısı təmsil edəcək.

Ceyhun MƏMMƏDOV

15 İyun – Milli Qurtuluş Günü münasibətilə dünən Naxçıvan Şəhər Gənclər və İdman İdarəsi və Naxçıvan Muxtar Respublikası Şərq Döyüşü Sənəti Federasiyasının birgə təşkilatçılığı ilə kikboks üzrə Naxçıvan şəhər açıq birinciliyi keçirilib.
Azərbaycan Respublikasının Dövlət himni səsləndirildikdən sonra Naxçıvan Şəhər Gənclər və İdman İdarəsinin rəisi Xəyal Qurbanov və federasiyanın sədr müavini Cavanşir Salahov çıxış edərək Milli Qurtuluş Gününə həsr edilmiş yarışda idmançılara uğurlar arzulayıblar.
Sonra meydan idmançılara verilib. Öz güclərini rinqdə nümayiş etdirən kikboksçuların bir-birindən mükəmməl döyüşləri tamaşaçıların alqışları ilə qarşılanıb. 12 çəki dərəcəsində (33, 36, 39, 45, 51, 54, 57, 60, 63,5, 65, 67 və 81+) keçirilən birincilikdə müvafiq olaraq Mustafa Əsgərli, Turan Quliyev, Qurban Qənbərli, Cavid Nəcəfov, Kərim Babayev, İlknur Nuriyev, Abbas Qədimov, Əhməd Əhmədzadə, Seymur Cabbarov, Araz Hacızadə, Sənan Quliyev və Ağəli Qurbanov bütün rəqiblərini məğlub edərək yarışın baş mükafatını qazanıblar.
Sonda qalib gələn idmançılara medal, diplom və qiymətli hədiyyələr təqdim olunub.

Ceyhun MƏMMƏDOV

Naxçıvan Muxtar Respublikası Şahmat Federasiyasının təşkil etdiyi daha bir turnirə yekun vurulub. Sürətli şahmat oyunu üzrə keçirilən açıq birincilik Naxçıvan Şahmat Mərkəzində keçirilib.
İki gün davam edən yarışda 109 zəka sahibi öz qüvvəsini sınayıb. 9 turdan ibarət birincilikdə bütün rəqiblərini üstələyən Pərviz Qasımov 8,5 xalla yarışın qalibi adını qazanıb. Açıq birincilikdə 3 şahmatçı – Hüseyn Həsənov, Sücəddin Seyidov və Toğrul Həsənzadə isə 7,5 xal toplayaraq digər pillələrdə qərarlaşıblar.
Qalib şahmatçılar federasiya tərəfindən mükafatlandırılıblar.

Ceyhun MƏMMƏDOV

Naxçıvan Muxtar Respublikası Basketbol Federasiyasının təşkilatçılığı ilə daha bir yoldaşlıq görüşü keçirilib. Milli Qurtuluş Gününə həsr edilmiş görüşdə Ordubad və Culfa basketbolçuları üz-üzə gəliblər.
Yoldaşlıq görüşündən əvvəl çıxış edən federasiyanın sədr müavini Ənvər Məmmədov muxtar respublikada idmana göstərilən diqqət və qayğıdan danışıb, basketbolçulara uğurlar arzulayıb.
Ordubad rayonunda təşkil edilən qarşılaşmada meydan sahibləri culfalı həmkarlarını üstələməyi bacarıblar – 53:43. Sonda fərqlənən idmançılar federasiya tərəfindən diplom və hədiyyələrlə mükafatlandırılıblar.

Ceyhun MƏMMƏDOV

Bunun üçün muxtar respublikamızda hər cür şərait yaradılıb

Naxçıvan Muxtar Respublikasında idmanın bütün sahələrinin inkişafı üçün geniş imkanlar yaradılıb. Yeniyetmə və gənclərin bu sahəyə istiqamətlənməsi üçün muxtar respublikada idman kompleksləri, futbol meydançaları və idman zalları istifadəyə verilib. Təbii ki, idman sahəsində müasir infrastrukturun yaradılması, idmanın inkişafı və idmançılarımızın beynəlxalq arenalarda uğur qazanması muxtar respublika rəhbərinin bu sahəyə diqqət və qayğısının nəticəsidir. 

“İdman bir ölkəni dünya arenasında tanıdan ən uğurlu siyasətdir”. Bu deyim müasir idmanda məşhur şüar kimi idmançıların ölkələrini layiqincə təmsil etmək üçün onlara verilən əlavə motivasiya xarakteri daşımaqdadır. Son illər Azərbaycan bayrağının dünyanın müxtəlif arenalarında dalğalanması ölkə başçısının idman sahəsində apardığı uğurlu siyasətin bariz göstəricisidir. Naxçıvan Muxtar Respublikası aparılan bu uğurlu siyasətdə daim müstəsna rol oynamışdır. İdmançılarımızın Azərbaycan yığmalarına dəvəti muxtar respublikada bu sahənin artıq tam püxtələşdiyindən xəbər verir.

Boks üzrə yeniyetmələr arasında keçirilən Azərbaycan çempionatına yekun vurulub. Çempionatda Naxçıvan Muxtar Respublikasının boksçuları uğurla çıxış ediblər. Belə ki, muxtar respublika təmsilçisi İman Vəliyev fəxri kürsünün ən yüksək pilləsinə qalxıb. 76 kiloqram çəki dərəcəsində mübarizə aparan boksçumuz bütün rəqiblərini məğlub edərək qızıl medala layiq görülüb.
40 kiloqramda Muxtar Fərzəliyev yarımfinala kimi yüksəlsə də, bu mərhələdə məğlub olub və çempionatın bürünc mükafatını qazanıb. Onunla yanaşı, 56 kiloqramda Elçin Məmmədov və 65 kiloqramda Tural Əhmədli Azərbaycan çempionatında bürünc mükafatın sahibi olublar.
Sonda mükafatçılara diplom, medal və qiymətli hədiyyələr verilib.

Ceyhun MƏMMƏDOV

Naxçıvan Şahmat Mərkəzində 15 İyun – Milli Qurtuluş Gününə həsr olunmuş mərkəzin daxili təsnifat turnirinə start verilib. Turnirdə 150-dən çox şahmatçı qüvvəsini sınayır. Naxçıvan Muxtar Respublikası Şahmat Federasiyasının təşkil etdiyi yarışda zəka sahibləri bütün dərəcələr üzrə mübarizə aparırlar. Sonda qalib olanlara idman dərəcələri veriləcək.
Qeyd edək ki, bu gün turnirin son günüdür. Növbəti həftə isə Şah­mat Federasiyası daha bir yarış təşkil edəcək. Belə ki, 7-8 iyun tarixlərində Şahmat Mərkəzində Naxçıvan Muxtar Respublikası açıq turnirinə start veriləcək. Sürətli şahmat üzrə keçiriləcək açıq turnirdə 200-ə yaxın şahmatçının iştirak edəcəyi gözlənilir.

Ceyhun MƏMMƏDOV

Mayın 21-də start verilən futbol üzrə 9-cu sinif şagirdlərinin respublika çempionatına yekun vurulub.
Ölkənin 2300 məktəbinin mübarizə apardığı turnirdə Naxçıvan Muxtar Respublikası Şərur şəhərindəki 2 nömrəli tam orta məktəblə təmsil olunub. Belə ki, zona yarışlarının qalibi olan 2 nömrəli tam orta məktəb Bakıda keçirilən final mərhələsinə vəsiqə qazanmışdı. Bu mərhələdə isə şərurlu məktəblilər daha inamla çıxış edərək çempionatda hamının diqqətini cəlb edə biliblər. 16 orta məktəbin mübarizə apardığı çempionatda Şərur komandası baş məşqçi Bilal Nağıyevin rəhbərliyi ilə finalda oynamaq hüququ qazanıb. Rəqib isə Sumqayıt məktəbliləri olub. “Bayıl Arena”da keçirilən final görüşündə şərurlu məktəblilər sumqayıtlı həmkarlarına 0:2 hesabı ilə məğlub olublar və çempionatı ikinci pillədə başa vurublar.

Ceyhun MƏMMƏDOV

Ümummilli lider Heydər Əliyevin anadan olmasının 91-ci ildönümünə həsr olunmuş ali və orta ixtisas məktəbləri tələbələri arasında və Hava və Ekstremal İdman Növləri Federasiyasının klubları arasında Əlincə qalasına yürüş üzrə Naxçıvan Muxtar Respublika turniri keçirilib.
Naxçıvan Muxtar Respublikası Gənclər və İdman Nazirliyi ilə Hava və Ekstremal İdman Növləri Federasiyasının birgə təşkil etdiyi turnirdə 200-dən artıq idmançı iştirak edib.
Yarışdan əvvəl Naxçıvan Muxtar Respublikasının gənclər və idman naziri Azad Cabbarov, Hava və Ekstremal İdman Növləri Federasiyasının sədri Hafiz Yaqubov idmançılara uğurlar arzulayıblar.
Yürüşdə daha yaxşı nəticəni Heydər Əliyev adına Hərbi Liseyin kursantları əldə ediblər. Onlar bütün rəqiblərini qabaqlayaraq turnirin baş mükafatını qazanıblar. Naxçıvan Dövlət Universitetinin tələbələri ikinci, Culfa rayonunun komandası isə yürüşü üçüncü pillədə başa vurublar.
Sonda nazirlik və federasiya tərəfindən qalib komandalara diplom və qiymətli hədiyyələr verilib.

Ceyhun MƏMMƏDOV

Ümummilli lider Heydər Əliyevin anadan olmasının 91-ci ildönümünə həsr edilmiş yeniyetmələr arasında basketbol üzrə Naxçıvan Muxtar Respublika turnirinə yekun vurulub.

Ümummilli lider Heydər Əliyevin anadan olmasının 91-ci ildönümünə həsr edilmiş basketbol üzrə yeniyetmələr arasında Naxçıvan Muxtar Respublika turnirinə dünən start verilib. Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi turnir 3 gün davam edəcək.
Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov və federasiyanın sədr müavini Ənvər Məmmədov turnirin açılış mərasimində çıxış edərək yarış iştirakçılarına uğurlar arzulayıblar. Azərbaycan Respublikasının Dövlət himni səsləndirildikdən sonra meydan basketbolçuların ixtiyarına verilib.
Mayın 22-də final qarşılaşması keçiriləcək turnirdə 8 komanda 2 yarımqrupda çıxış edir. “A” qrupunda Naxçıvan, Culfa, Şərur və Şahbuz basketbolçuları, “B” qrupunda isə Ordubad, Sədərək, Babək və Naxçıvan şəhərinin “Lokomotiv” komandaları birincilik uğrunda mübarizə aparırlar.
Qeyd edək ki, turnirin qalibi olacaq komandaya kubok, diplom və qiymətli hədiyyələr təqdim olunacaq. İkinci və üçüncü yerlərin sahibləri isə federasiya tərəfindən diplom və qiymətli hədiyyələrlə mükafatlandırılacaqlar.

Ceyhun MƏMMƏDOV

15-17 may tarixlərində Şərur rayonunda Azərbaycan Respublikası Gənclər və İdman Nazirliyinin Realmadrid Fondu ilə birgə həyata keçirdiyi layihənin təqdimatı olmuşdur. Bu müddətdə fiziki tərbiyə müəllimləri və uşaqlar üçün təlim keçilmişdir. Təlim zamanı Şərur rayonunun 8 nəfər fiziki tərbiyə müəlliminə Realmadrid Fondunun təqdim etdiyi təlim proqramı öyrədilmişdir. Təlim və təlim-məşq “Vətən” Sosial Futbol Məktəbinin məşqçisi Namiq Allahverdiyev tərəfindən həyata keçirilmişdir.

Mayın 18-də Azərbaycan Respublikası Gənclər və İdman Nazirliyinin Realmadrid Fondu ilə birgə həyata keçirdiyi “Futbol vasitəsilə uşaqların sağlamlıqlarının qorunması və sosial həyata inteqrasiyası” adlı layihə çərçivəsində yaradılan Realmadrid Futbol Məktəbinin bölməsi fəaliyyətə başlamışdır. Bu münasibətlə Şərur rayonundakı Olimpiya-İdman Kompleksində keçirilən tədbirdə çıxış edən Naxçıvan Muxtar Respublikasının gənclər və idman naziri Azad Cabbarov son illər muxtar respublikada idmana göstərilən diqqət və qayğıdan danışmışdır.

Dünən İlham Əliyev adına Olimpiya-İdman Kompleksində daha bir yarışa yekun vurulub. Naxçıvan Muxtar Respublikası Gənclər və İdman Nazirliyi ilə Şərq Döyüşü Sənəti Federasiyasının birgə təşkil etdiyi ümummilli lider Heydər Əliyevin anadan olmasının 91-ci ildönümünə həsr olunmuş MMA üzrə Naxçıvan Muxtar Respublika turnirində 40-a yaxın idmançı qüvvəsini sınayıb.

Futbol üzrə Azərbaycan I divizionunun 22-ci mövsümü Naxçıvan idman tarixinə qızıl hərflərlə yazıldı. Muxtar respublikanın yeni formalaşan “Araz-Naxçıvan” futbol klubu ilk dəfə olaraq çempion adını qazandı. 30 oyunda 25 qələbə, 4 heç-heçə və yalnız 1 məğlubiyyət  – bu, müstəqillik dövrü Azərbaycan futbol tarixində rekord göstəricidir. Təbii ki, bu uğura imza atanlar məşqçilər korpusu və futbolçulardır. Bu tarixi uğurun səbəbkarları ilə söhbətləşməyi qərara aldıq. Suallarımızı komandanın baş məşqçisi Əsgər Abdullayev, futbolçulardan Eşqin Quliyev, Bəxtiyar Soltanov və Tərlan Xəlilov cavablandırır.

– Əsgər müəllim, “Araz-Naxçıvan”dan təklif aldıqda tərəddüd etdinizmi?
– Etiraf edim ki, bəli. Çünki komanda yeni yaranmışdı və hansı yer uğrunda mübarizə aparacağını dəqiq bilmirdim. Naxçıvana gəldim və burada olan şəraiti gördükdən sonra klubun uğurlu çıxış edəcəyinə inandım. Muxtar respublika rəhbərinin idmana göstərdiyi qayğı komandanın uğurunda müstəsna rol oynadı. Əgər bu dəstək olmasaydı, uğur qazanmaq mümkün olmayacaqdı.

İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 91-ci ildönümünə həsr olunmuş voleybol üzrə kişilər arasında Naxçıvan Muxtar Respublika turnirinə yekun vurulub. Naxçıvan Muxtar Respublikası Gənclər və İdman Nazirliyi ilə Voleybol Federasiyasının birgə təşkil etdiyi turnirin qalibi Sədərək komandası olub.
8 komandanın dairəvi sistem üzrə 2 yarımqrupda mübarizə apardığı yarışda Babək, Sədərək, Culfa və Şahbuz voleybolçuları növbəti mərhələyə adlarını yazdırmışdılar. Bu mərhələdə daha yaxşı təsir bağışlayan Sədərək və Babək komandaları finalda qarşılaşdılar. İlk olaraq meydana 3-cü yer uğrunda mübarizə üçün Culfa və Şahbuz komandaları çıxdılar. 3:1 hesabı ilə qələbə qazanan culfalılar turniri üçüncü pillədə başa vurdular. Final qarşılaşmasında isə Sədərək təmsilçiləri 3:0 hesabı ilə rəqibini üstələməyi bacardılar.
Sonda qaliblərə diplom və hədiyyələr təqdim olundu.

Xəbərlər şöbəsi

Qədim oğuz-türk yurdu olan Naxçıvanda ümummilli lider Heydər Əliyevin anadan olmasının 91-ci ildönümünə həsr edilmiş “Naxçıvan Open-2014” Beynəlxalq Şahmat Festivalının uğurla başa çatması muxtar respublikada idmanın dünya standartları səviyyəsinə qaldırılmasının çox mühüm göstəricisidir.

Azərbaycan Respublikası gömrük orqanları arasında təşkil olunan futzal turnirinə yekun vurulub. Ümummilli lider Heydər Əliyevin anadan olmasının 91-ci, Azərbaycan Respublikası Dövlət Gömrük Komitəsinin yaradılmasının 22-ci ildönümünə həsr olunan yarışın qalibi Naxçıvan Muxtar Respublikası Dövlət Gömrük Komitəsinin komandası olub. Artıq ənənə halını almış turnirdə dəfələrlə çempionluq sevinci yaşayan “Naxçıvan” komandasının növbəti uğuru məhz muxtar respublikamızın 90 illik yubileyinə təsadüf edib. 

Həlledici qarşılaşma “Naxçıvan” və “HNBGİ” (Hava Nəqliyyatında Baş Gömrük İdarəsi) komandaları üz-üzə gəlib. Final matçı ümummilli liderimizin doğum günündə – may ayının 10-da Bakı şəhərindəki ABU ARENA-da baş tutub.
Rəqibin əks-hücum taktikası oyunun 12-ci dəqiqəsində öz bəhrəsini verib. Qapı önündə yaranmış qarışıqlıq zamanı Ramazan Ağa­yevin topu uzaqlaşdırmaq istəyi avtoqolla nəticələnib. Buna baxmayaraq, birinci hissənin tamamın­da futzalçılarımız “status-kvo”nu bərpa etməyi bacarıblar. Aynar İsmayılov rəqib qapıçı üçün çıxış yeri qoymayıb.
Oyunun ikinci hissəsi də gərgin və maraqlı alınıb. Komandamızı hesabda önə keçirən Aynar İsmayılov sona beş dəqiqə qalmış het-trikini rəsmiləşdirməklə yekun nəticəni müəyən edib: 3:1.
Final oyunundan əvvəl keçirilmiş üçüncülük uğrunda qarşılaşmada isə Bakı Baş Gömrük İdarəsinin komandası Biləsuvar Gömrük İdarəsinin futzalçılarını məğlubiyyətə uğradıb.
Sonra qaliblərin və şəxsi göstəricilərə görə turnirdə fərqlənənlərin mükafatlandırılması mərasimi olub. Komandamızın qapıçısı Rahil Tahirli turnirin ən yaxşı qapıçısı, Aynar İsmayılov isə ən məhsuldar oyunçu seçilib.

Naxçıvan Muxtar Respublikası
Dövlət Gömrük Komitəsinin mətbuat xidməti

Dünən Naxçıvan şəhərindəki Şahmat Mərkəzində ümummilli liderimiz Heydər Əliyevin anadan olmasının 91-ci ildönümünə həsr olunan “Naxçıvan Open-2014” Beynəlxalq Şahmat Festivalının doqquzuncu turunun oyunları keçirilib.

Dünən İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 91-ci ildönümünə həsr olunmuş voleybol üzrə Naxçıvan Muxtar Respublika turnirinə start verilib. Naxçıvan Muxtar Respublikası Gənclər və İdman Nazirliyi ilə Voleybol Federasiyasının birgə təşkil etdiyi turnir 3 gün davam edəcək.
Yarışı Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov açıq elan etdikdən sonra Azərbaycan Respublikasının Dövlət himni səsləndirildi. Daha sonra söz Voleybol Federasiyasının sədr müavini Aydın Mirzəyevə verildi. Federasiya rəsmisi gənc­lərin bu idmana olan marağından danışdı, muxtar respublikada idmana və idmançılara göstərilən diqqət və qayğıdan bəhs etdi.
Turnirin reqlamentinə əsasən, 8 komanda 2 yarımqrupda mübarizə aparır. Dairəvi sistem üzrə keçirilən yarışda Şərur, Babək, Sədərək, Ordubad, Culfa, Şahbuz, Kəngərli rayonlarını, həmçinin Naxçıvan şəhərini eyniadlı komandalar təmsil edir. Qrup mərhələsində ilk 2 pilləni tutan komandalar yarımfinala yüksələcəklər. Turnirin final qarşılaşması mayın 14-də keçiriləcək.

Ceyhun MƏMMƏDOV

Naxçıvan şəhərindəki Şahmat Mərkəzində ulu öndər Heydər Əliyevin anadan olmasının 91-ci ildönümünə həsr olunmuş “Naxçıvan Open-2014” Beynəlxalq Şahmat Festivalının yeddinci turunun görüşləri keçirilib.
Bu turda ən güclü şahmatçıların yarışdığı “A” qrupunda Bakı şahmatçısı, qrossmeyster Rauf Məmmədov özü ilə eyni titulu daşıyan Boris Savçenko ilə qarşılaşıb. Bu görüş hər iki şahmatçıya yarım xal qazandırıb. Yeddinci turun ən inamlı oynayan zəka sahibləri gürcü şahmatçılar olublar. Belə ki, Gürcüstan şahmatçılarından Merab Qaqunaşvili ukraynalı Anton Korobovu məğlub edib.

Ümummilli lider Heydər Əliyevin anadan olmasının 91-ci ildönümünə həsr olunmuş karate-do üzrə Naxçıvan Muxtar Respublika açıq birinciliyinə yekun vurulub. Naxçıvan Muxtar Respublikası Gənclər və İdman Nazirliyi ilə Karate-do Federasiyasının birgə təşkil etdiyi birincilikdə 200-ə yaxın idmançı qüvvəsini sınayıb.

Ümummilli liderimiz Heydər Əliyevin anadan olmasının 91-ci ildönümünə  həsr olunmuş “Naxçıvan Open-2014” Beynəlxalq Şahmat Festivalı davam edir. Dünən festivalın V turunun oyunları keçirilib.
“A” qrupunda ötən turun lideri, qrossmeyster Aleksandr Simonov özü ilə eyni titulu daşıyan Azərbaycan şahmatçısı Rauf Məmmədovla ağ-qara taxtada üz-üzə gəlib. Rauf Məmmədov bu görüşdən yarım xalla  ayrılıb. Ukraynalı Anton Korob­ov ilə gürcüstanlı Luka Paiçadzenin qarşılaşmasında da eyni nəticə əldə olunub. Azərbaycan şahmatçısı Eltac Səfərli gürcü şahmatçı Konstantin Şanavanı məğlub edib. Ötən turun qaliblərindən olan Natalya Jukova Oleq Korneyevə məğlub olub.

Ümummilli lider Heydər Əliyevin anadan olmasının 91-ci ildönümünə həsr olunmuş futbol turniri keçirilib. Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi turnirə aprelin 26-da start verilmişdi. “Universitet”, “DİN FK”, “Araz-2”,  “Babək”, “Batabat”, “Arpaçay”, “Əlincə”, “Sədərək”, “Dübəndi” və “Kəngərli” komandalarının mübarizə apardığı turnir olimpiya sistemi üzrə keçirilib. Final oyununda Naxçıvan Dövlət Universitetinin komandası ilə “Araz-2” komandası qarşılaşıb. Daha baxımlı oyun sərgiləyən tələbələr meydanı 2:1 hesablı qələbə ilə tərk ediblər.
Oyundan sonra Naxçıvan Muxtar Respublikası Futbol Federasiyasının sədri Səbuhi Şahverdiyev və Naxçıvan Dövlət Universitetinin rektoru Saleh Məhərrəmov qalib komandanı təbrik ediblər, komandalara gələcək oyunlarda uğurlar arzulayıblar. Daha sonra təltifetmə mərasimi başlayıb. Turnirin qalibi olan Naxçıvan Dövlət Universitetinin komandasına kubok, diplom və qiymətli hədiyyələr verilib. Həmçinin finalda oynamaq hüququ qazanan “Araz-2” komandası da mükafatlandırılıb.

Xəbərlər şöbəsi

Futbol üzrə Azərbaycan I divizionunun 29-cu turunda “Araz-Naxçıvan” futbol komandası doğma azarkeşləri önündə İmişlinin “Mil-Muğan” komandasını qəbul etdi. Artıq çempionluğu ötən turdan təmin edən qırmızı-ağlar bu görüşə, sadəcə, formal xarakterli oyun kimi yanaşırdı.
“Araz-Naxçıvan”ın baş məşqçisi Əsgər Abdullayev hər zaman olduğu kimi, yenə də meydana buraxdığı heyətlə hamının təəccübünə səbəb oldu. Cəzası başa çatan Bəxtiyar Soltanovu ehtiyatda əyləşdirən baş məşqçi əvəzində hücum xəttini son 4 oyunda olduğu kimi, David-Tərlan-Elmin triosuna tapşırmışdı. Azərbaycan milli komandasına da dəvət olunan qapıçımız Emil Balayev, həmişəki kimi, qapıdakı mövqeyini almışdı. Müdafiə xəttində Ruslan-Tural-Ruslan-Əlimirzə tandeminə üstünlük verən baş məşqçi yarımmüdafiə xəttində bu dəfə Elgiz-Akif-Eşqin üçlüsünü meydana buraxmışdı. Qələbə seriyasını davam etdirmək istəyən və mövsümü maksimum xalla başa vurmaq niyyətində olan Əsgər Abdullayevin komandası sonda istəyinə nail oldu.

Naxçıvan şəhərindəki Şahmat Mərkəzində ulu öndər Heydər Əliyevin anadan olmasının 91-ci ildönümünə həsr olunmuş “Naxçıvan Open-2014” Beynəlxalq Şahmat Festivalının dördüncü turu başa çatıb.
Dördüncü turda “A” qrupunda  ukraynalı şahmatçı  Anton Korobov rusiyalı şahmatçı  Aleksandr Simon­ovla qarşılaşıb. Rəqib şahmatçılar bu turun bəhrəsi olan 1 xalı bölüşməli olublar.  Azərbaycan şahmatçılarından Rauf Məmmədov gürcü Konstantin Şanava ilə, Eltac Səfərli isə rusiyalı şahmatçı Boris Savçenko ilə  görüşdən yarım xalla ayrılıblar. Bu turda Naxçıvan şahmatçısı Ürfan Sevdimalıyev Bakı Şahmat Məktəbinin yetirməsi Aytən Əmrəyeva ilə görüşdən qalib ayrılıb. Muxtar respublika şahmatçılarından Talıb Babayevin bu turdan sonra 1 xalı var. Turnir cədvəlinə hazırda 3,5 xalla Aleksandr Simonov liderlik edir.

Ümummilli lider Heydər Əliyevin anadan olmasının 91-ci ildönümü münasibətilə ali və orta ixtisas müəssisələrinin tələbələri arasında peyntbol üzrə Naxçıvan Muxtar Respublika turniri keçirilib. Naxçıvan Muxtar Rspublikası Gənclər və İdman Nazirliyi, Atıcılıq Federasiyası və “Gənc Vətənpərvərlər” İctimai Birliyinin birgə təşkil etdiyi yarışın  açılış mərasimində çıxış edən federasiyanın sədr müavini Fərhad Əliyev muxtar respublikada idmana və idmançılara göstərilən diqqət və qayğıdan danışıb.

Dünən Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 91-ci ildönümünə həsr olunmuş karate-do üzrə Naxçıvan Muxtar Respublika açıq çempionatına start verilib. Naxçıvan Muxtar Respublikası Gənclər və İdman Nazirliyi ilə Karate-do Federasiyasının birgə təşkil etdiyi birincilikdə 200-ə yaxın idmançı qüvvəsini sınayacaq. Yarışın reqlamentinə əsasən, idmançılar 7 yaş qrupunda mübarizə aparacaqlar.

Ceyhun MƏMMƏDOV

Mayın 6-da İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 91-ci ildönümünə həsr olunmuş qolbol par­alimpiya idman növü üzrə turnirin açılışı olmuşdur.

Ulu öndər Heydər Əliyevin anadan olmasının 91-ci ildönümü münasibətilə keçirilən “Naxçıvan Open-2014” Beynəlxalq Şahmat Festivalının III turunda “A” qrupunda ukraynalı Anton Korobov gürcü şahmatçısı Konstantin Şanava ilə görüşdən yarım xalla ayrılıb. Naxçıvan şahmatçılarından Talıb Babayev Aytən Əmrəyeva ilə görüşdə 3-cü məğlubiyyəti yaşamalı olub. Digər bir muxtar respublika şahmatçısı Ürfan Sevdimalıyev gürcü şahmatçısı Qaioz Niqalidze ilə görüşdən qalib çıxa bilməyib və üç turdan sonra aktivindəki bir xalla kifayətlənməli olub.
Bu qrupda Azərbaycan şahmatçılarından Eltac Səfərli türkiyəli şahmatçı Sanal Vahapla oyundan qalib ayrılıb. Azərbaycan şahmatçısı Türkan Məmmədyarova rəqibinə görüşdə qalib gələrək aktivinə bir xal yazdıra bilib. 3 turdan sonra rusiyalı şahmatçı Aleksandr Simanov 3 xalla turnir cədvəlinə liderlik edir.

Ümummilli lider Heydər Əliyevin anadan olmasının 91-ci ildönümünə həsr olunmuş ali və orta ixtisas müəssisələri tələbələri arasında 5 kilometr məsafəyə kross qaçışı yarışı keçirilib. Naxçıvan Muxtar Respublikası Gənclər və İdman Nazirliyi və Yüngül Atletika Federasiyasının birgə təşkilatçılığı ilə Duzdağ yolunda keçirilən yarışda 200-dən artıq idmançı iştirak edib.
Oğlanların yarışında Heydər Əliyev adına Hərbi Liseyin kursantı Əvəz Fərzəliyev bütün rəqiblərini geridə qoyaraq turnirin baş mükafatını qazanıb. Digər 4 pillədə isə Elçin Fərəcov (Hərbi Lisey), Xaliq Novruzov (NDU), Ceyhun Abbasov (Hərbi Lisey) və Kamal Əbilov (Hərbi Lisey) qərarlaşıblar.
Qızların yarışında isə əsas mübarizə Tibb Kolleci və Texniki Kollecin tələbələri arasında olub. Ancaq hamıdan sürətli qaçan Zeynəb Quliyeva (Tibb Kolleci) birinci yerə layiq görülüb. Texniki Kollecin tələbələri Rəngizə Rəhimova ilə Aytac İbrahimli ikinci və üçüncü yerləri paylaşıblar. Sona Məmmədova və Tünzalə Hüseynova (hər ikisi Tibb Kolleci) isə dördüncü və beşinci yerlərə sahib çıxıblar.
Qeyd edək ki, sonda fərqlənən idmançılar federasiya tərəfindən mükafatlandırılıblar.

Ceyhun MƏMMƏDOV

Dünən Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi futbol üzrə Naxçıvan kubokunun final oyunu keçirilib.
Cari mövsümü Naxçıvan Muxtar Respublika çempionatının qalibi kimi başa vuran Naxçıvan Dövlət Universitetinin komandası final matçında “Araz-2” komandası ilə qarşılaşıb. Gərgin keçən oyunda ilk qolu 15-ci dəqiqədə “Araz-2” komandasının futbolçusu vurub. Lakin “Araz-2” hesabı sonadək qoruya bilməyib. İlk hissənin başa çatmasına 1 dəqiqə qalmış tələbələrin heyətində Hasan Karaslan hesabı bərabərləşdirə bilib. Oyunun 55-ci dəqiqəsində isə Tağı Seyidov qələbə qolunun müəllifi olub.
Bununla, cari ildə həm Naxçıvan Muxtar Respublika çempionatının, həm də Naxçıvan kubokunun sahibi olan Naxçıvan Dövlət Universitetinin komandası ikinci uğura imza atıb.
Görüşdən sonra cari mövsümdə muxtar respublika çempionatında və Naxçıvan kuboku uğrunda yarışda fərqlənən komandalar Naxçıvan Muxtar Respublikası Gənclər və İdman Nazirliyi və Naxçıvan Muxtar Respublikası Futbol Federasiyası tərəfindən kubok, diplom və qiymətli hədiyyələrlə mükafatlandırılıblar.

Ceyhun MƏMMƏDOV

Mayın 5-də Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 91-ci ildönümünə həsr olunmuş gənclər arasında sərbəst güləş üzrə “Naxçıvan kuboku” uğrunda beynəlxalq yarışın qaliblərinin mükafatlandırma mərasimi keçirilmişdir.
Yarışın “A” yarımqrupunda Azərbaycan, Türkiyə, Özbəkistan və Qazaxıstan, “B” yarımqrupunda isə Naxçıvan, Rusiya, Gürcüstan və Ukrayna komandaları öz qüvvələrini sınamışlar. Qrup görüşlərinin nəticələrinə görə, Azərbaycan və Ukrayna komandaları öz yarımqruplarında birinciliyə nail olmuşlar. Final görüşündə birinci yer uğrunda Azərbaycan və Ukrayna komandaları mübarizə aparmışlar. Keçirilən görüşlərin nəticəsinə görə, Azərbaycan komandası birinci, Ukrayna komandası ikinci, Rusiya komandası isə üçüncü yerin sahibi olmuşdur.
Naxçıvan Muxtar Respublikası Güləş Federasiyasının sədri Azər Zeynalov və Azərbaycan Güləş Federasiyasının baş katibi Əjdər Cəfərov yarışda ikinci və üçüncü yerlərin sahiblərinə medal və diplomları təqdim etmişlər.
Sonra qalib olan Azərbaycan komandasına medal və  kubok təqdim edilmiş, xatirə şəkli çəkdirilmişdir.
Bununla da, ümummilli lider Heydər Əliyevin anadan olmasının 91-ci ildönümünə həsr olunmuş gənclər arasında sərbəst güləş üzrə “Naxçıvan kuboku” uğrunda beynəlxalq yarış başa çatmışdır.    

“Şərq qapısı”

Bu, gənclər arasında sərbəst güləş üzrə “Naxçıvan kuboku” uğrunda keçirilən yarışın iştirakçılarının yekdil fikri idi

Mayın 4-5-də İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 91-ci ildönümünə həsr olunmuş gənclər (1994-1996-cı illər təvəllüdlü) arasında sərbəst güləş üzrə “Naxçıvan kuboku” uğrunda beynəlxalq yarış keçirilib. Azərbaycan, Türkiyə, Rusiya, Qazaxıstan, Ukrayna, Gürcüstan, Özbəkistan və Naxçıvan komandalarının iştirak etdiyi beynəlxalq yarışın iştirakçılarının bir neçəsi yarışla bağlı təəssüratlarını bizimlə bölüşdü:

Əjdər Cəfərov – Azərbaycan Güləş Federasiyasının baş katibi: “Ulu öndər Heydər Əliyevin anadan olmasının ildönümünə həsr olunmuş bu yarışın Naxçıvanda keçirilməsi artıq ənənə halını alıb. İndi turnir yalnız gənclər arasında təşkil olunur. Qarşıdakı illərdə bu yarış yuxarı yaş qrupları arasında da keçirilə bilər. Digər tərəfdən, Naxçıvan turnirə çox yaxşı hazır­laşıb. Naxçıvan Muxtar Respublikası Gənc­lər və İdman Nazirliyi iştirakçıların boş vaxtlarının səmərəli keçməsi üçün müəyyən turlar təşkil edib və bu turlar sayəsində qonaq komandalar Naxçıvanı daha yaxından tanıyırlar. Bu cür təşkilatçılığa görə minnətdarlığımızı bildiririk. Naxçıvan o qədər qonaqpərvər bir yerdir ki, bizə turnirdə iştirak etmək üçün çoxlu müraciət edirlər. Buna görə ola bilsin, gələn il analoji yarışda iştirakçıların sayı çoxalsın”.

Artıq üç gündür ki, Naxçıvan mötəbər bir şahmat bayramına, Azərbaycan xalqının ümummilli lideri Heydər Əliyevin anadan olmasının 91-ci ildönümü münasibətilə keçirilən “Naxçıvan Open-2014” Beynəlxalq Şahmat Festivalına ev sahibliyi edir. Festivalın gedişində tanınmış hakim və şahmatçılarla həmsöhbət olduq:

Namiq İsmayılov – yarışın hakimi, beynəlxalq dərəcəli hakim:
– Bu gün Azərbaycan yığması dünya şahmat arenasında öz sözünü qətiyyətlə deməkdədir. İdmançılarımız beynəlxalq yarışlarda böyük uğurlar qazanır, Azərbaycanı idman ölkəsi kimi bütün dünyada tanıdırlar. Bu festivalda dünyanın tanınmış şahmat ustaları  ilə  yanaşı, yığma komandanın üzvlərindən bir neçə nəfər iştirak edir. Hər bir tur çox gərgin şəraitdə keçir, qələbə uğrunda mübarizə son turlara doğru daha da  çətinləşir. Azərbaycan şahmatçıları bu yarışda da öz sözünü deyəcək, yaxşı nəticələr əldə edəcəklər.  Onu da deyim ki, bu festival Naxçıvanın yeniyetmə şahmatçıları üçün təcrübə qazanmaq baxımından əhəmiyyətlidir. Yerli şahmatçılar son bir ildə böyük uğurlar əldə ediblər və festivalın gedişində də yaxşı, inamlı oyunlar müşahidə edirik.

Mayın 5-də ulu öndər Heydər Əliyevin anadan olmasının 91-ci ildönümünə həsr olunmuş “Naxçıvan Open-2014” Beynəlxalq Şahmat Festivalının ikinci turu keçirilib. Bu turda “A” qrupunda ukraynalı şahmatçı Anton Korobov Azərbaycan şahmatçısı Vüqar Rəsulovla görüşdən qalib ayrılaraq aktivinə ikinci xalını yazdırıb.  Rusiya şahmatçısı Natalya Jukova isə  Eltac Səfərli ilə görüşdən  yarım xal əldə edib. Türkiyəli şahmatçı Dastan Muhammed Batuhan qrossmeyster Pavel Smirnovla görüşü qələbə ilə başa vurub.
Bu turda muxtar respublika şahmatçılarından Talıb Babayev Azərbaycan şahmatçısı Aqil Pirverdiyevlə görüşdən qələbəsiz ayrılıb və hər iki tur onun üçün nəticəsiz olub.

Dünən İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 91-ci ildönümünə həsr olunmuş gənclər (1994-1996-cı illər təvəllüdlü) arasında sərbəst güləş üzrə “Naxçıvan kuboku” uğrunda beynəlxalq yarışa start verilib. Yarışın reqlamentinə əsasən, 2 yarımqrupda 8 komanda öz qüvvəsini sınayıb. Azərbaycan və Naxçıvan güləşçiləri ilə yanaşı, Türkiyə, Qazax­ıstan, Özbəkistan, Rusiya, Gürcüstan və Ukrayna güləşçilərinin mübarizə apardığı yarışda artıq finala yüksələn komandaların adlarına aydınlıq gəlib.

Ulu öndər Heydər Əliyevin anadan olmasının 91-ci ildönümünə həsr olunmuş “Naxçıvan Open-2014” Beynəlxalq Şahmat Festivalının ilk  qarşılaşmalarına dünən Naxçıvan şəhərindəki Şahmat Mərkəzində start verildi. Yarış başlanmazdan əvvəl mərhum şahmatçımız Vüqar Həşimovun xatirəsi bir dəqiqəlik sükutla yad edildi.
Şahmat festivalının baş hakimi Faiq Həsənov yarışın qaydaları haqqında iştirakçılara məlumat verərək onlara uğurlar arzuladı.
Ən yuxarı reytinq əmsalı 1771 olan Azərbaycan şahmatçısı Ayan Allahverdiyevanın yarışdığı “C” qrupunda birinci turdan Naxçıvan təmsilçilərindən Müslüm Əliyev, Sadiq Abbasov, Aqşin Abbaszadə, Əli Zeyniyev və başqaları 1 xalla ayrıla bildilər. “B” qrupunda  Naxçıvan şahmatçılarından Pərviz Qasımov, Sadiq Məmmədov, Adil Sevdimalıyev, Tural Zeynalov, Orxan Həsənov və başqaları ilk turdan xalla ayrılmaq üçün mübarizə apardılar. Qeyd edək ki, digər qruplardan fərqli olaraq, bu qrupda Naxçıvan təmsilçiləri uğurlu çıxış edərək turdan uğurla ayrıla bildilər.

Mayın 4-dən Naxçıvan mötəbər bir şahmat bayramına – Azərbaycan xalqının ümummilli lideri Heydər Əliyevin anadan olmasının 91-ci ildönümü münasibətilə keçirilən “Naxçıvan Open-2014” Beynəlxalq Şahmat Festivalına ev sahibliyi edir. Hakimlərin və iştirakçıların maraqlı fikirlərini oxucularımızla bölüşməyi peşə borcu bildik:

Yarışın baş hakimi, beynəlxalq dərəcəli hakim Faiq Həsənov:
– Gənclərin mənəvi tərbiyəsində, zehni inkişafında mühüm vasitə olan şahmat Azərbaycanda yüksək templə inkişaf edən və çox sevilən bir idman növüdür. Ulu öndərimiz Heydər Əliyev Azərbaycan şahmatçılarını daim diqqət və qayğı ilə əhatə etmiş, onların peşəkarlıq səviyyələrinin yüksəlməsi üçün xüsusi sərəncamlar imzalamışdır. Bu prosesi uğurla davam etdirən ölkə başçısı cənab İlham Əliyevin 2009-cu il 5 may tarixli Sərəncamı ilə təsdiq edilmiş “2009-2014-cü illərdə Azərbaycanda şahmatın inkişaf etdirilməsi Dövlət Proqramı” dünya ölkələri təcrübəsində şahmat idman növünün inkişafına yönəldilən ilk proqram kimi müasir idman tariximizə daxil olmuşdur. Bu qayğının nəticəsi olaraq, şahmatçılarımız dünya miqyaslı yarışlarda qazandıqları uğurlu nəticələrlə xalqımızı sevindirirlər. Azərbaycanın şahmat üzrə yığma komandası dünyanın ən güclü komandaları arasında ön sıralardadır. Bu yarış haqqında isə onu deyə bilərəm ki, blokadada olan muxtar respublikanın belə bir şahmat bayramına  ev sahibliyi etməsi regionun sürətli inkişafından, şahmat idman növünə göstərilən yüksək dövlət qayğısından xəbər verir. Qeyd edim ki, yüksək reytinqli şahmatçıların iştirakına görə builki festival xüsusilə fərqlənir. “A” qrupunda yüksək reytinqli şahmatçılar yarışırlar.

Ümummilli lider Heydər Əliyevin anadan olmasının 91-ci ildönümü münasibətilə Naxçıvan Muxtar Respublikası Gənclər və İdman Nazirliyi ilə muxtar respublika Boks Federasiyasının birgə təşkil etdiyi boks üzrə Naxçıvan Muxtar Respublika turniri başa çatıb.
Turnirin final mərhələsində 13 çəki dərəcəsində 26 idmançı qalib olmaq  üçün rinqə çıxıb. İlk olaraq mübarizəyə atılan isə 38 kiloqram çəkidə yarışan Muxtar Fərzəliyev və Ayxan Cavadlı olub. Yaşlarının az olmasına baxmayaraq, Naxçıvan şəhərini təmsil edən hər iki boksçu  rinqdə ustalıq nümayiş etdirib. Bu görüşdə Ayxan Cavadlı rəqibini üstələyərək öz çəkisində yarışın qalibi olub. 56 kiloqram çəki dərəcəsində Culfa rayonunu təmsil edən Kamil Qazıbəyov Sədərək təmsilçisi  Nicat Ağayevlə mübarizədə üstünlük əldə edib. Sədərək təmsilçisi mübarizəsini sona qədər davam etdirsə də, qələbə üçün lazımi xalı toplaya bilməyib.

Ümummilli lider Heydər Əliyevin anadan olmasının 91-ci ildönümü münasibətilə Naxçıvan Muxtar Respublikası Gənclər və İdman Nazirliyi ilə Boks Federasiyasının birgə təşkil etdiyi boks üzrə Naxçıvan Muxtar Respublika turnirinə start verilib.

Futbol üzrə Azərbaycan I divizionunun lideri “Araz-Naxçıvan” futbol komandası bu gün növbəti görüşünə çıxacaq. 28-ci turda komandamız “Şəmkir”in qonağı olacaq. Ən yaxın izləyicisini bir oyun fərqi ilə 12 xal qabaqlayan muxtar respublika təmsilçisi çempionluğunu qərb bölgəsində elan etməyə yaxındır. Bunun üçün Naxçıvan təmsilçisinə bir xal da kifayət edir.
Yevlaxda “Karvan”ı məğlub etdikdən sonra Şəmkirə yollanan komandamız burdakı Olimpiya-İdman Kompleksində məskunlaşıb. Oyun bu gün bu kompleksin stadionunda keçiriləcək. Komandamız bu görüşə ciddi hazırlaşıb. Əsgər Abdullayevin yetirmələri oyunun böyük əhəmiyyət kəsb etdiyini yaxşı anlayırlar və qələbə üçün əllərindən gələni etməyə hazırdılar. “Araz-Naxçıvan”ın heyətində Bəxtiyar Soltanov istisna olmaqla, cəzalı və zədəli futbolçu yoxdur. Meydan sahibləri isə bu oyuna itki ilə çıxacaqlar. Belə ki, ötən tur qırmızı vərəqə ilə cəzalanan Ramil Sadiqov üzləşdiyi cəzaya görə mövsümü vaxtından əvvəl başa vurmalı olub.
“Şəmkir”-“Araz-Naxçıvan” matçının hakimləri də artıq bəllidir. Oyunda əsas referi kimi Ziya Nəsirov fit çalacaq. Ona meydanda Azad Hüseynov və Müslüm Əliyev yardımçı olacaqlar. 4-cü hakim funksiyasını isə Emin Nağıbəyov yerinə yetirəcək.
Qeyd edək ki, görüş bu gün saat 16⁰⁰-da Şəmkir Şəhər Olimpiya-İdman Kompleksinin stadionunda keçiriləcək.   

Xəbərlər şöbəsi

Ümummilli liderimiz Heydər Əliyevin anadan olmasının 91-ci ildönümü münasibətilə Şərur rayonunda voleybol birinciliyi keçirilib.
Yeni Azərbaycan Partiyası Şərur Rayon Təşkilatının, rayon Gənclər və İdman İdarəsinin təşkilatçılığı ilə keçirilən birincilik üç gün davam edib. Yarışın final mərhələsində Çərçiboğan və Çəmənli kəndlərinin komandaları qarşılaşıblar. Finalda Çərçiboğan komandası inamlı qələbə qazanaraq birinci yerə layiq görülüb.
Qalib yerləri tutan hər iki komanda mükafatlandırılıb.

Xəbərlər şöbəsi

Ötən həftə Naxçıvan idmançıları üçün yaddaqalan olub. Belə ki, “Cəsurlar” hərbi-idman və turizm oyunlarının Naxçıvan Muxtar Respublika üzrə qalibi olmuş Ordubad rayon 3 nömrəli tam orta məktəb respublika turunun final mərhələsində uğurla çıxış edib.
Azərbaycan Respublikası Təhsil, Gənclər və İdman, Müdafiə, Fövqəladə Hallar, Mədəniyyət və Turizm nazirliklərinin, Səfərbərlik və Hərbi Xidmətə Çağırış üzrə Dövlət Xidməti və Respublika Veteranlar Şurasının birgə keçirdiyi yarışda respublika ümumtəhsil məktəblərinin VII-VIII sinif şagirdləri iştirak ediblər. Final yarışında Zərdab və Bakı şəhər Xətai rayonlarının məktəbliləri ilk iki pillədə qərarlaşıblar. Ordubad rayonunun komandası isə turniri üçüncü pillədə başa vurub. Qalib komandalar Təhsil Nazirliyinin fəxri fərmanı ilə təltif olunublar.

Xəbərlər şöbəsi

Ümummilli liderimiz Heydər Əliyevin anadan olmasının 91-ci ildönümü münasibətilə Babək Rayon Uşaq-Gənclər Şahmat Məktəbində rayon ümumtəhsil məktəbləri arasında keçirilən şahmat yarışının üçüncü zona yarışı keçirilib.
Yarışda Didivar, Şıxmahmud, Xəlilli kənd, Cəhri kənd 1 və 2 nömrəli tam orta məktəblərin şagirdləri iştirak ediblər. Yarışda birinci yerə Cəhri kənd 1 nömrəli, ikinci yerə Cəhri kənd 2 nömrəli tam orta məktəblərin şahmatçıları çıxıblar. Üçüncü yeri isə Didivar kənd tam orta məktəbinin şagirdləri tutublar.
Məlumat üçün deyək ki, qaliblər may ayının 5-də Babək Rayon Uşaq-Gənclər Şahmat Məktəbində keçiriləcək final mərhələsinə vəsiqə qazanıblar.

Sona MİRZƏYEVA

Naxçıvan Muxtar Respublikası Gənclər və İdman Nazirliyi, Təhsil Nazirliyi və Səfərbərlik və Hərbi Xidmətə Çağırış üzrə Dövlət Xidmətinin birgə təşkil etdiyi “Vətənin müdafiəsinə hazıram” poliatlon çoxnövçülük üzrə Naxçıvan Muxtar Respublika birinciliyinin qalibi olmuş Şərur komandası respublika birinciliyində də mükafatçılar arasında yer almağı bacarıb. Belə ki, ötən həftə Mingəçevir şəhərində keçirilən Azərbaycan çempionatında uğurla çıxış edən məktəblilərimiz turniri üçüncü pillədə başa vurublar. Şərur şəhər 2 nömrəli tam orta məktəbin şagirdləri Mingəçevirdə təşkil olunan birinci­likdə hamını təəccübləndirməyə müvəffəq olublar.
Bununla, “Vətənin müdafiəsinə hazıram” poliatlon çoxnövçülük üzrə Azərbaycan çempionatının üçüncüsü olan komandamız Azərbaycan Respublikası Gənclər və İdman Nazirliyi tərəfindən diplom və kubokla təltif edilib.

Ceyhun MƏMMƏDOV

“Sağlam həyat sağlam idmanın nəticəsidir”. Bu deyim idman sahəsində çalışan həkimlərin apardıqları araşdırmalardan sonra özləri üçün seçdikləri devizdir. Hər gün yüksək əhval-ruhiyyədə olmaq, enerjili və sağlam həyat yaşamaq istəyənlərə həkimlərin ilk və əsas məsləhəti idmanla məşğul olmaqdır.

İdmanın xeyri

İdman insanın həyat tərzini müsbət və ya mənfi yöndə dəyişdirə bilən kompleks fəaliyyət sistemidir; onu tanınmış simaya çevirir, yaxud əlil buraxır. Ancaq həkimlər bu sahədən düzgün yararlananların heç vaxt mənfi halla üzləşmədiyini qeyd edirlər. Bəs idmanla məşğul olmağın bizə nə kimi xeyir və ya xeyirləri var? Aparılan araşdırmalardan sonra məlum olub ki, bu sahənin insan orqanizmi üçün aşağıdakı xeyirləri var:

Ümummilli lider Heydər Əliyevin anadan olmasının 91-ci ildönümü münasibətilə bu gün boks üzrə Naxçıvan Muxtar Respublika turnirinə start veriləcək.
Naxçıvan Muxtar Respublikası Gənclər və İdman Nazirliyi ilə Boks Federasiyasının birgə təşkil etdiyi birincilik 3 gün davam edəcək. Artıq dünən idmançıların hansı çəki dərəcəsində rinqə çıxacaqları müəyyənləşib. 200-ə yaxın idmançının mübarizə aparacağı turnirdə boksçular 13 çəki dərəcəsində – 38, 42, 46, 48, 52, 54, 56, 60, 64, 69, 75, 81 və 91 kiloqramda yumruqlarını “işə” salacaqlar. Bu gündən etibarən start verilən turnirə mayın 2-də yekun vurulacaq.
Qeyd edək ki, turnirdə fərqlənən idmançılara nazirlik və federasiya tərəfindən diplom və qiymətli hədiyyələr veriləcək.

Ceyhun MƏMMƏDOV