Bu gün Azərbaycan kuboku uğrunda “Araz-Naxçıvan” futbol komandası uzun aradan sonra ilk oyununu keçirəcək. I divizionun 8 komandasının qatıldığı ölkə kubokunun 1/16 mərhələsində artıq 3 görüş keçirilib. Sayca 22-ci kubok mövsümü olan cari ildə muxtar respublika təmsilçisinin rəqibi Ağsunun eyniadlı komandasıdır. Ötən mövsüm I divizionun qalibi olan Şirvan klubu cari ildə bir qədər inamsız təsir bağışlayır.
“Ağsu” komandası ilə keçirilən oyun “Araz-Naxçıvan”ın ölkə kuboku tarixində meydana çıxacağı 5-ci qarşılaşma olacaq.
“Araz-Naxçıvan” futbol komandası yarandığı gündən indiyə qədər “Ağsu” komandası ilə qarşılaşmayıb. Ölkə kubokunun reqlamentinə görə, 1/16 və 1/8 final mərhələsində rəqiblər arasında bir oyun keçirilir. Qalib gələn tərəfi isə 1/4 final mərhələsində iki görüş gözləyir: “ev”də və səfərdə. Muxtar respublika təmsilçisi “Ağsu” matçını qələbə ilə başa vurduğu təqdirdə 1/8 final mərhələsində Premyer Liqa klubu “Simurq”u qəbul edəcək. Zaqatala təmsilçisi ilə də görüş məhz Naxçıvan Muxtar Respublika Stadionunda oynanılacaq.
“Ağsu” I divizionun son turunda “Energetik”i 4:1 hesabı ilə məğlub edib və hazırda 13 xalla turnir cədvəlinin 5-ci pilləsində qərarlaşıb. Bu görüşə marağın yüksək olacağı gözlənilir. Bu gün saat 14⁰⁰-də Naxçıvan Muxtar Respublika Stadionunda keçiriləcək matçı izləmək üçün giriş pulsuz olacaq.

Ceyhun MƏMMƏDOV

Azərbaycan birinci divizionunun 7-ci turu çərçivəsində “Araz-Naxçıvan” futbol komandası oktyabrın 26-da Biləcərinin (Bakı) “Lokomotiv” komandasını qəbul etdi. Cari mövsümdə uğurlu çıxışı ilə hamının diqqətini cəlb edən muxtar respublika klubu bu dəfə də azarkeşlərini sevindirdi. Doğma arenada məğlub­edilməzlik seriyasını davam etdirən qırmızı-ağlar bu qələbədən sonra liderliyini davam etdirdi. Əsgər Abdullayevin yetirmələri “Bakı”nın “farm klubu” kimi ad qazanan “Lokomotiv”in qapısından üç cavabsız top keçirdilər.
Bu dəfə baş məşqçi Əsgər Abdullayev meydana 3-4-1-2 taktikası ilə çıxmışdı. Daha çox gücü yarımmüdafiə xəttinə verən baş məşqçi hücum yollarında iki hücumçuya bel bağlamışdı. Cari mövsümün ən çox qol sahibi David Canıyev, eləcə də Bəxtiyar Soltanov stadiona toplaşmış azarkeşlərə baxımlı və bolqollu oyun nümayiş etdirmək üçün əllərindən gələni etdilər.

Naxçıvan Muxtar Respublikası Gənclər və İdman Nazirliyi ilə Naxçıvan Muxtar Respublikası Basketbol Federasiyasının birgə təşkil etdiyi kişilər arasında basketbol üzrə muxtar respublika birinciliyinə yekun vurulub. 8 komandanın mübarizə apardığı turnirin final və üçüncü yer uğrunda oyunları dünən keçirilib. “Babək”, “Culfa”, “Ordubad”, “Şərur”, “Naxçıvan Dövlət Universiteti”, “Naxçıvan Özəl Universiteti”, “Naxçıvan-1” və “Naxçıvan-2” komandalarının qatıldığı turnirin final görüşü gözlənildiyi kimi gərgin mübarizə şəraitində keçib.
İlk olaraq qrup mərhələsini ikinci pillədə başa vuran iki komanda – “Ordubad” və “Naxçıvan Özəl Universiteti” meydana çıxıb. Bu görüşdə Ordubad təmsilçisinin basketbolçuları səbəti daha yaxşı “nişan” alıblar və turniri üçüncü pillədə başa vurmağa müvəffəq olublar – 52:39. Daha sonra qrup mərhələsini itkisiz tamamlayan “Naxçı­van-1” və “Naxçıvan Dövlət Universiteti”nin top sehrbazları öz bacarıqlarını nümayiş etdiriblər. İlk perioddan başlayaraq oyunun gedişatına nəzarət edən birincilər digər periodda da rəqibin hücumlarının qarşısını məharətlə almağa nail olublar. Nəticədə, universitet tələbələrini 21 sayı fərqi ilə (68-47) məğlubiyyətə düçar edən “Naxçıvan-1” komandası birinciliyin qalibi adını qazanıb.
Keçirilən görüşlərdən sonra Naxçıvan Muxtar Respublika birinciliyində yer tutan komandaların təltifetmə mərasimi olub. Qaliblərə diplom və hədiyyələr verilib.

Ceyhun MƏMMƏDOV

19-21 oktyabr 2013-cü il tarixlərdə Balakən Rayon Olimpiya İdman Kompleksində məktəblilərin VI Respublika Oyunlarının proqramına daxil olan sərbəst güləş üzrə turnir keçirilmişdir. Yarışda muxtar respublikamızın da idmançısı iştirak etmişdir. 45 kiloqram çəkidə mübarizə aparan Sərdar Əliyev finala qədər yüksələ bilmişdir. Həlledici mərhələdə də bu üstünlüyü əldən verməyən güləşçimiz yarışın qızıl medalına sahib olmuşdur. Fəxri yeri tutan idmançımıza diplom və medal verilmişdir. Eyni zamanda təmsilçimiz qazandığı nəticəyə görə bu ilin dekabr ayında keçiriləcək beynəlxalq turnirdə iştirak etmək hüququnu əldə etmişdir.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan Muxtar Respublikası Gənclər və İdman Nazirliyi və Naxçıvan Muxtar Respublikası Futbol Federasiyasının təşkilatçılığı ilə XII muxtar respublika futbol çempionatında dördüncü turun oyunlarına yekun vurulmuşdur.
“Batabat” öz meydanında “Dübəndi”ni  qəbul etmişdir. İlk oyun ev sahibinin 4:1 hesablı qələbəsilə başa çatmışdır. İlk görüşdən özünü ciddi rəqib kimi göstərən “Araz-2”  komandası 4-cü turda “Kəngərli”ni 4:1 hesabı ilə məğlub etmişdir. Növbəti qarşılaşmada  “DİN FK”  “Əlincə”nin qapısından 5 cavabsız top keçirmişdir. Bu turda “Babək” “Sədərəy”ə 3:1 hesabı ilə qalib gəlməyi bacarmışdır. “Universitet”-“Arpaçay” arasındakı sonuncu oyun tələbə futbolçuların 5:0 hesablı üstünlüyü ilə yekunlaşmışdır.

Bu gün Azərbaycan Superkuboku uğrunda “Xəzər Lənkəran” və “Neftçi” komandaları Naxçıvan Muxtar Respublika Stadionunda üz-üzə gələcəklər. Artıq matçın iştirakçıları oyunun baş tutacağı məkandadırlar və hər iki komanda dünən oyunun keçiriləcəyi arenada son məşqlərinə çıxıblar. Azərbaycan futbolunda əzəli rəqib kimi tanınan bu komandalar dünən Naxçıvan şəhərinin baş meydanında ümummilli lider Heydər Əliyevin əzəmətlə ucalan abidəsini  ziyarət ediblər. “Xəzər Lənkəran” və “Neftçi” futbol klublarının rəsmiləri, məşqçilər korpusu, futbolçuları, eyni zamanda Peşəkar Futbol Liqasının prezidenti Ramin Musayev Heydər Əliyev Muzeyinin qarşısındakı abidəyə gül dəstələri qoyublar. Sonra xatirə şəkli çəkdirilib.
Qeyd edək ki, Azərbaycan Superkuboku uğrunda keçiriləcək görüş bu gün saat 15⁰⁰-də Naxçıvan Muxtar Respublika Stadionunda keçiriləcək. Bu görüşün baş hakimi kimi meydana Rəhim Həsənov çıxacaq. Ona Yaşar Abbasov və Vaqif Musayev köməklik edəcəklər. Rauf Cabbarov isə oyuna dördüncü hakim kimi təyinat alıb. “Xəzər Lənkəran”-“Neftçi” matçını AFFA nümayəndəsi kimi Şaiq Həmidov, hakim-inspektor kimi isə Xaqani Məmmədov izləyəcəklər.

Xəbərlər şöbəsi

Cari mövsümə iddialı başlayan və məqsədinin Premyer Liqaya yüksəlmək olduğunu nümayiş etdirən “Araz-Naxçıvan” futbol komandası növbəti qələbəsini qazanıb. Muxtar respublika klubu bu dəfə “Kəpəz” futbol komandasını məğlub edib. Gəncədə yerli komandaya qarşı əzmkar oyun nümayiş etdirən qırmızı-ağlar minimal hesablı qələbə qazanaraq cari mövsümdə ilk dəfə turnir cədvəlində liderliyə yüksəliblər. “Araz-Naxçıvan”ın lider olmasında “Qaradağ Lökbatan”ın xal itirməsi də mühüm rol oynayıb. Belə ki, abşeronlular “Bakılı” ilə heç-heçə (1:1) edərək liderlik kürsüsünü naxçıvanlı həmkarlarına təhvil veriblər.

Gəncə səfərində ilk qələbə

Etiraf edək ki, “Araz-Naxçıvan”ın Gəncə səfərindən 3 xalla qayıdacağına ümid az idi. Çünki “Kəpəz” Premyer Liqanı yeni tərk edib və heyətində kifayət qədər təcrübəli futbolçular var. Bununla yanaşı, Gəncə təmsilçisi öz azarkeşi önündə həmişə mükəmməl oyun sərgiləyib. Naxçıvan klubu ilə görüşdə qələbə qazanmaq üçün “Kəpəz” bu matça ciddi hazırlaşmışdı.

10-13 oktyabrda Hövsan Olimpiya İdman Kompleksində Helsinki Olimpiya Oyunlarının gümüş mükafatçısı Rəşid Məmmədbəyovun xatirəsinə həsr olunmuş yeniyetmələr arasında sərbəst və yunan-Roma güləşi üzrə respublika seçim turnirinin final mərhələsi keçirilib. Yeniyetmə (1997-1998-ci illər təvəllüdlü) və gənclərin (1994-1996-cı illər təvəllüdlü) mübarizə apardığı turnirə muxtar respublikamızın da idmançıları qatılıblar. 63 kiloqram çəki dərəcəsində öz qüvvəsini sınayan sərbəst güləşçimiz Təbriz Məmmədov ən yüksək nəticəni göstərib. Digər idmançımız Rüfət Güləliyev isə 76 kiloqramda yunan-Roma güləşi üzrə bürünc medal qazanıb. Yer tutan idmançılarımız medal və diplomlarla, həmçinin pul mükafatı ilə təltif olunublar. Qalib və mükafatçılar yığma komandaların heyətinə cəlb edilərək beynəlxalq yarışlarda ölkəmizi təmsil etmək hüququ qazanıblar.

Naxçıvan Muxtar Respublikası
Gənclər və İdman Nazirliyinin mətbuat xidməti

Dünən İlham Əliyev adına Olimpiya İdman Kompleksində kişilər arasında basketbol üzrə Naxçıvan Muxtar Respublika birinciliyinə start verilib. Bu münasibətlə keçirilən tədbiri Naxçıvan Muxtar Respublikası Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov açaraq muxtar respublikada idmana göstərilən qayğıdan danışıb və yarış iştirakçılarına uğurlar arzulayıb.  
Üç gün davam edəcək muxtar respublika birinciliyində 8 komanda 2 yarımqrupda mübarizə aparır.  “Babək”, “Şərur”, “Culfa”, “Ordubad”, “Naxçıvan Özəl Universiteti”, “Naxçıvan Dövlət Universiteti”, “Naxçıvan-1” və “Naxçıvan-2” komandalarının birincilik uğrunda mübarizəyə başladığı yarışda qrup mərhələsini ilk pillədə başa vuran komandalar final görüşü keçirəcəklər. İlk mərhələni ikinci kimi tamamlayan komandalar isə üçüncü yer uğrunda mübarizə aparacaqlar.

Xəbər verdiyimiz kimi, “Araz-Naxçıvan” futbol komandası birinci divizionun V turunu da itkisiz başa vurdu. Muxtar respublika klubu doğma arenada Yevlaxın “Karvan” komandasını qəbul etdi və qazandığı qələbə ilə liderlik uğrunda mübarizəsini davam etdirdi. Son turda turnir cədvəlinin lideri “Qaradağ Lökbatan” futbol komandasının “Şahdağ”la oyunda xal itirməsi (0:0) qırmızı-ağların işinə yaradı. Böyük azarkeş kütləsi önündə “Karvan”la matçda komandamız əsl əzmkarlıq nümayiş etdirdi və aktivinə 3 xal yazdırmağı bacardı.

“Karvan”ın “karvanı” burdan keçməyib
Azərbaycan çempionatları tarixində bu komandalar bir dəfə də olsun qarşılaşmayıblar. Buna səbəb “Karvan”ın XXI əsrin ilk 10 illiyində yaranması və həmin zaman “Araz-Naxçıvan”ın çempionatda çıxış etməməsi olub. Məhz bu amil “Araz-Naxçıvan” komandasının baş məşqçisi Əsgər Abdullayevin meydana hansı taktika ilə çıxacağına olan marağı artırmışdı.

Bu gün “Araz-Naxçıvan” futbol komandası I divizionun 5-ci turu çərçivəsində növbəti oyununu keçirəcək. Qırmızı-ağlar Naxçıvan Muxtar Respublika Stadionunda Yevlaxın “Karvan” komandasını qəbul edəcəklər. Saat 1600-da başlayacaq matçı idarə edəcək hakimlər briqadası da artıq məlumdur. Oyunun baş hakimi kimi meydana Feyzulla Feyzullayev çıxacaq. Roman Vasilyev və Hüseyn İmanov bu görüşdə F.Feyzullayevə kömək edəcəklər. Oyunda dördüncü hakim funksiyasını Etibar Həsənov yerinə yetirəcək. Yavər Rəhimov isə Naxçıvanda keçiriləcək matçda hakimlərin işinə qiymət verəcək.
“Araz-Naxçıvan” “Karvan”la oynayacağı matça tam olaraq hazırdır. Komandanın heyətində zədəli və ya cəzalı futbolçuların olmaması baş məşqçi Əsgər Abdullayevi sevindirməyə bilməz. Cari mövsümdə məğlubiyyətsiz oyunlar seriyasını davam etdirmək üçün Naxçıvan təmsilçisinə mütləq qələbə lazımdır. “Karvan”a gəlincə isə Kənan Kərim­ovun rəhbərlik etdiyi komanda cari mövsümdə cəmi bir qələbə qazanıb. Səfər görüşlərində inamsız təsir bağışlayan Yevlax təmsilçisinin muxtar respublikadan 3 xalla qayıdacağı mümkünsüz görünür.

Ceyhun MƏMMƏDOV

Ölkə Prezidenti cənab İlham Əliyevin uğurla davam etdirdiyi inkişaf strategiyasının məntiqi nəticəsi olaraq, Azərbaycan regionun lider dövlətinə çevrilmişdir. Dövlətimizin iqtisadi qüdrətinin ildən-ilə artması, bütün sahələr kimi, idmanın tərəqqisinə də öz müsbət təsirini göstərməkdədir. Bu gün idmana dövlət səviyyəsində yüksək qayğı və diqqət göstərilir. Paytaxtda və regionlarda bir çox olimpiya idman komplekslərinin, müasir idman zallarının tikilib istifadəyə verilməsi, maddi-texniki bazanın möhkəmləndirilməsi bunu deməyə əsas verir.

Azərbaycanın bir sıra mötəbər yarışlara ev sahibliyi etməsi, idmançılarımızın dünya və Avropa miqyaslı turnirlərdə təmsil olunması Azərbaycanı dünyada idman ölkəsi kimi tanıtmışdır.
Xalqımıza məxsus qədim milli idman növü olan güləş bu gün daha da inkişaf etdirilir və ildən-ilə bu sahədə yüksək nailiyyətlər qazanılır. Bu idman növü zəngin tarixə və özünəməxsus köklərə malikdir. Milli güləşin qədim elementlərinə Qobustan qayalarında, şifahi xalq ədəbiyyatında, klassik ədəbiyyatda rast gəlirik.

Naxçıvan Muxtar Respublikası Gənclər və İdman Nazirliyi və Naxçıvan Muxtar Respublikası Futbol Federasiyasının təşkilatçılığı ilə XII muxtar respublika futbol çempionatında ikinci turun oyunlarına yekun vurulmuşdur.
Turun “Kəngərli” və “Dübəndi” komandaları arasında baş tutan ilk oyunu 5:5 hesablı bərabərliklə başa çatmışdır. “Sədərək”-“Əlincə” görüşündə sədərəklilər 3 top üstünlüyü ilə (5:2) qələbə əldə edə bilmişlər.

“Neftçi” və “Xəzər Lənkəran” futbol komandaları arasında keçirilməli olan Superkubok matçının yeri və tarixi artıq məlum olub. Son ölkə çempionu ilə Azərbaycan kubokunun finalçısı Naxçıvanda üz-üzə gələcək. Görüş oktyabrın 23-də Naxçıvan Muxtar Respublika Stadionunda keçiriləcək.
Artıq hər iki klubun rəsmiləri oyunun muxtar respublikada keçirilməsinə münasibətlərini bildiriblər. İlk olaraq, “Xəzər Lənkəran”ın vitse-prezidenti Tuyqun Nadirov Superkubokun oktya­brın 23-də Naxçıvanda keçirilməsi ilə bağlı verilən qərara mövqeyini açıqlayıb. 2012-2013-cü il mövsümündə Azərbaycan kubokunun finalında ölkə çempionu “Neftçi”yə uduzan Lənkəran təmsilçisi rəqibi udmaq iddialarını ortaya qoyub: “Xəzər Lənkəran” Azərbaycan Superkubok oyununa hazırdır. Biz ölkənin istənilən yerində oynamağa razıyıq. Bizim üçün fərq etməz. İstənilən yerdə oynayıb, qalib gələ bilərik”.

Dünən Azərbaycan Futbol Federasiyaları Assosiasiyasında 2013-2014-cü il mövsümü üçün Azərbaycan kuboku uğrunda yarışacaq futbol komandalarının püşkatma mərasimi keçirilib. Cari mövsümdə bu yarışa Premyer Liqanın və birinci divizionun hərəsindən 10 komanda qatılacaq. Divizion təmsilçilərindən 6-sı isə kuboka qatılmaqdan imtina edib.
Premyer Liqa klublarından “Neftçi”, “Qarabağ”, “İnter”, “Xəzər Lənkəran”, “Bakı”, “AZAL”, “Qəbələ”, “Rəvan”, “Sumqayıt”, “Simurq”, birinci diviziondan isə “Ağsu”, “MOİK”, “Qaradağ Lökbatan”, “Lokomotiv”, “Şahdağ”, “Şuşa”, “Araz-Naxçıvan”, “Mil-Muğan”, “Neftçala” və “Kəpəz” futbol komandaları Azərbaycan kuboku uğrunda mübarizə aparacaqlar. Bu komandalardan 8-i 1/16 finalda mübarizəyə başlayacaq. 12 komanda isə 4 cütün qalibini 1/8 finalda gözləyəcək.

Birinci divizionun 4-cü turu da “Araz-Naxçıvan” futbol komandası üçün uğurlu olub. Naxçıvan təmsilçisinin budəfəki rəqibi “Göyəzən” futbol komandası idi. Buna kimi “Turan-T” və “Şəmkir”i məğlubiyyətə uğradan qırmızı-ağlar Qazaxda yerli komandanın müqavimətini qırmaqda heç də çətinlik çəkməyiblər. Əsgər Abdullayevin yetirmələri hər iki hissədə vurduqları qollarla cari mövsümdə ilk böyük hesablı qələbələrini qazanıblar.

Qazax səfərindən öncə İmişlidə heç-heçə oyunla xal itirən “Araz-Naxçıvan” bu matçda mütləq qələbə qazanmalı idi. Liderlər cərgəsindən geri düşməmək üçün, əslində, reqlamenti qırmızı-ağlar üçün ideal hesab etmək olar.

Azərbaycan birinci divizionunun 4-cü turu çərçivəsində “Araz-Naxçıvan” futbol komandası növbəti görüşünü keçirəcək. Qazaxın “Göyəzən” futbol komandasının qonağı olacaq qırmızı-ağlar bu gün Gəncəyə yola düşüblər. Burdan isə Naxçıvan təmsilçisi Qazaxa yollanacaq. Komandamız Qazax Olimpiya İdman Kompleksində məskunlaşacaq və bu gün oyunun keçiriləcəyi stadionda məşqə çıxacaq. “Araz-Naxçıvan”ın heyətində zədəli və ya cəzalı olan futbolçu yoxdur.
Qeyd edək ki, oyunu idarə edəcək hakimlər briqadası artıq məlum olub. “Göyəzən”-“Araz-Naxçıvan” matçı FİFA dərəcəli təcrübəli hakim Anar Salmanova həvalə edilib. Ona bu görüşdə Yaşar Abbasov və Ra­hin Heybətov köməklik edəcəklər. Namiq Süleymanov isə dördüncü ha­kim funksiyasını yerinə yetirə­cək. Oyunun hakim-inspektoru Namiq Qasımovdur.
“Göyəzən”-“Araz-Naxçıvan” matçı sabah Qazax Şəhər Stadionunda oynanılacaq.

Ceyhun MƏMMƏDOV

Polşada gənclər arasında kikboksinq üzrə Avropa çempionatı keçirilib. Çempionata milli komandamızın tərkibində muxtar respublikamızın idmançısı Ruslan Musayev də qatılıb. Yarışda 51 kiloqram çəkidə mübarizə aparan həmyerlimiz bu dəfə daha yaxşı döyüş nümayiş etdirərək rəqibi üzərində tam üstünlüklə qələbə qazanıb. Avropa çempionu Ruslan Musayev yarışda qazandığı uğurlu nəticəyə görə diplom və medalla mükafatlandırılıb.

Naxçıvan Muxtar Respublikası
Gənclər və İdman Nazirliyinin mətbuat xidməti

Ötən həftə start verilmiş 2013-2014-cü ilin futbol mövsümündə keçiriləcək Naxçıvan Muxtar Respublikası çempionatında on komanda iştirak edir. Bu il çempionatın keçirilmə əsasnaməsində bir sıra dəyişikliklər edilmişdir. Belə ki, ölkə çempionatında iştirak edən “Araz” peşəkar futbol klubuna ehtiyat qüvvənin hazırlanması əsas məqsəd kimi nəzərə alınaraq, muxtar respublika çempionatının iştirakçılarına yaş həddinin tətbiq edilməsi qərara alınmışdır. Komandaların heyətində altı nəfər 18 yaşa qədər və beş nəfər 19-20 yaşlı futbolçuların iştirakına icazə verilmişdir. XII futbol çempionatının digər maraqlı cəhətlərindən biri də “Araz” peşəkar futbol klubunun eyniadlı hazırlıq qrupunun çempionatda iştirak etməsidir.
Çempionatda iştirak edən istedadlı və ümidverici futbolçularımızın il ərzində seçilməsi və bu komandanın ətrafında birləşdirilməsi də əsas məqsədlərdəndir.
Çempionatın birinci turunun oyunlarının nəticələri aşağıdakı kimidir:
    “Batabat” Şahbuz        2:1    “Kəngərli” Kəngərli
    “Dübəndi” Ordubad      0:4    “DİN FK” Naxçıvan
    “Arpaçay” Şərur           2:3    “Babək” Babək
    “Universitet” NDU        2:3    “Sədərək” Sədərək
    “Araz-2”Naxçıvan          –     “Əlincə” Culfa
“Araz-2” komandasının heyətinin tam formalaşdırılmaması səbəbindən “Araz-2”-“Əlincə” komandalarının oyununun nəticəsi Naxçıvan Muxtar Respublikası Futbol Federasiyasının nizam-intizam komissiyasının qərarından sonra müəyyənləşəcəkdir.

Naxçıvan Muxtar Respublikası 
Gənclər və İdman Nazirliyinin mətbuat xidməti

Birinci divizionun ilk iki turunda qələbəni bayram edən “Araz-Naxçıvan” futbol komandasının səfərdən 3 xalla qayıdacağı güman edilirdi. Çünki digər oyunlarda komandamızın inamlı çıxışı, meydanın hər yerində topa sahib ola bilməsi və rəqiblərindən üstün oyun sərgiləməsi bunu deməyə əsas verirdi. Di gəl ki, “Mil-Muğan” futbol komandası ilə görüşdə hakim səhvləri “Araz-Naxçıvan”ın “ev”ə üç xalla dönməsini, sözün əsl mənasında, əngəllədi.
Keçilməz müdafiə xətti
Əsgər Abdullayev səfər matçından qələbə ilə qayıtmaq və növbəti oyunun hazırlıqlarını böyük əhval-ruhiyyə ilə keçirmək fikrində idi. Məhz buna görə baş məşqçi ideal heyətlə meydana çıxmışdı. “Şəmkir”lə görüşdən fərqli olaraq, bu dəfə çərçivə Hüseyn Məhəmmədova həvalə olunmuşdu. Təcrübəli qapıçıya, adətən, səfər oyunlarında güvənən Ə.Abdullayev yanılmadığını bir daha göstərdi. Müdafiədə isə dəyişilməz Mikayıl Rəhimov-Ruslan Abıyev-Əlimirzə Daşzərini-Cavid Həsənov dördlüsü rəqib hücumçular üçün keçilməz sədd yaratmışdılar. Əsgər Abdullayev digər oyunlarla müqayisədə bu dəfə meydana 4-2-3-1 taktikası ilə çıxmışdı. Müdafiə xəttinin qarşısında Fərman Qəmbərov və Elgiz Kərimlini oynadan Ə.Abdullayev hücumda ötən oyunu zədəyə görə buraxan Emin İmaməliyevi sınaqdan keçirdi. E.İmaməliyevin fərqlənməsi üçün isə cinahlardan Elmin Çobanov və Bəxtiyar Soltanov müdafiə xəttini yarmağa çalışırdı.

Birinci divizionun III turu çərçivəsində “Araz-Naxçıvan” futbol komandası növbəti oyununu keçirib. İmişlidə “Mil-Muğan” komandasının qonağı olan qırmızı-ağlar “ev”ə bir xalla qayıtmağı bacarıblar. Oyun boyu üstünlüyü əldən verməyən muxtar respublika təmsilçisi cari mövsümdə keçiridiyi ikinci səfər matçını da məğlubiyyətsiz başa vurub. Bu görüşdə diqqət daha çox hakim Anar Niyazovun üzərində olub. Belə ki, A.Niyazov birinci və ikinci hissələrdə dəqiq penalti epizodlarında fit çalmayıb. İlk hissədə cərimə meydançasında əllə oynayan “Mil-Muğan” komandasının futbolçusunun bu “bacarığı” hakimin gözündən “yayınıb”. Elə ikinci hissədə də eyni epizodda iki dəfə topa əllə müdaxilə edən rəqib futbolçusu hakimin çalmayan fitinə sevinib. “Araz-Naxçıvan” futbolçularının etirazına baxmayaraq, Anar Niyazov oyunu davam etdirib. Bundan sonra Naxçıvan təmsilçisi hücumlarının kəsərini artırsa da, hesabı dəyişə bilməyib. Bu heç-heçədən sonra “Araz-Naxçıvan” 7 xalla turnir cədvəlində ikinci pillədə qərarlaşıb.
Qeyd edək ki, “Araz-Naxçıvan” komandası növbəti turun oyununu da səfərdə keçirəcək. Belə ki, oktyabrın 6-da komandamız Qazaxda yerli “Göyəzən”in qonağı olacaq.

Ceyhun MƏMMƏDOV

Naxçıvan Türk Liseyinin idman zalında muxtar respublikamızda 2013-cü ilin “Heydər Əliyev ili” elan olunması ilə bağlı voleybol üzrə şəhər birinciliyi keçirilib. Ümumtəhsil məktəblərinin, Heydər Əliyev adına Hərbi Liseyin və Naxçıvan Türk Liseyinin komandaları arasında keçirilən birinciliyi Naxçıvan Şəhər Gənclər və İdman İdarəsi, Təhsil Şöbəsi və Naxçıvan Muxtar Respublikası Voleybol Federasiyası birgə təşkil ediblər. Altı komandanın iştirak etdiyi yarışın yekun nəticəsinə görə, Heydər Əliyev adına Hərbi Liseyin komandası birinciliyin qalibi olub. Naxçıvan şəhər 6 və 13 nömrəli tam orta məktəblərin komandaları isə ikinci və üçüncü yerləri bölüşüblər.
Qalib komandalara yarışın təşkilatçıları tərəfindən diplomlar və hədiyyələr təqdim olunub.

Naxçıvan Muxtar Respublikası
Gənclər və İdman Nazirliyinin mətbuat xidməti

Sentyabr ayının 20-dən 24-dək paytaxt Bakı şəhərində üzgüçülük üzrə Azərbaycan Respublikası Yay Çempionatı keçirilmişdir. Çempionatda qələbə uğrunda səylə mübarizə aparan bir idmançımız muxtar respublikamıza medalla qayıtmışdır. Belə ki, dəfələrlə ölkə və muxtar respublika səviyyəli birinciliklərin mükafatçısı olmuş Şahin Qubadov bu yarışda növbəti uğurlu nəticəsini göstərə bilmişdir. O, üzgüçülüyün 50 metrə brass növü üzrə öz qüvvəsini sınayaraq üçüncü yerə çıxmışdır. Yarışda fəxri yeri tutmuş idmançımız diplom və medalla təltif edilmişdir.

Naxçıvan Muxtar Respublikası
Gənclər və İdman Nazirliyinin mətbuat xidməti

Birinci divizionda mübarizə aparan “Araz-Naxçıvan” futbol klubunun rəsmi fan-klubu fəaliyyətə başlayıb. Fan-klub “ultr­Araz” adı ilə azarkeşləri ətrafında cəmləyəcək. Yeni yaradılan azarkeş cəmiyyətinə isə Qadir Məmmədli rəhbərlik edəcək. Q.Məmmədli fan-klub rəhbəri kimi artıq ilk açıqlamasını da verib: “Artıq rəsmi fəaliyyətə başlamışıq. 8 nəfərdən ibarət idarə heyətimizi formalaşdırdıq. Yeni yaranmağımıza baxmayaraq, bir çox müraciət etmiş azarkeşlərimiz fan-kluba üzv qəbul olunublar. Çalışacağıq ki, bütün komandaların fan-klubları ilə əlaqə yaradaq. Biz yalnız 90 dəqiqəlik oyun zamanı rəqibik. Naxçıvana təşrif buyuracaq fan-klubları da burda hörmətlə qarşılayıb, xoş təəssüratla yola salacağıq. Hələ ki, Naxçıvan şəhərini əhatə edən fəaliyyətimizi qısa zaman ərzində genişləndirmək niyyətindəyik”.

Naxçıvan Muxtar Respublikası Yüngül Atletika Federasiyası, Naxçıvan Şəhər Gənc­lər və İdman İdarəsi və Naxçıvan Şəhər Təhsil Şöbəsinin birgə təşkilatçılığı ilə Naxçıvan Muxtar Respublika Stadionunda “Heydər Əliyev ili” ilə əlaqədar Naxçıvan şəhər ümumtəhsil məktəblərinin şagirdləri arasında yüngül atletika üzrə birincilik keçirilib. Birincilikdə 17 komandada 150-dən çox məktəbli mübarizə aparıb. Yarış oğlanlar arasında 100, 200, 400, 800, 1500, qızlar arasında isə 100, 200, 400, 800, 1000 metr məsafələrə qaçış üzrə keçirilib. Yarışda Naxçıvan şəhər 9 nömrəli tam orta məktəbin komandası birinciliyin qalibi olub. Naxçıvan şəhər 3 və 16 nömrəli tam orta məktəblərin komandaları isə ikinci və üçüncü yerlərə layiq görülüblər.
Qalib komandalara Naxçıvan Muxtar Respublikası Yüngül  Atletika Federasiyasının hədiyyələri, Naxçıvan Şəhər Gənclər və İdman İdarəsinin diplomları təqdim olunub.

Naxçıvan Muxtar Respublikası
Yüngül Atletika Federasiyası

Birinci divizionun ikinci turunda “Araz-Naxçıvan” futbol komandası ilk rəsmi “ev” oyununda Şəmkirin eyniadlı komandasını sentyabrın 22-də Naxçıvan Muxtar Respublika Stadionunda qəbul etdi. İlk turda başqa bir qərb təmsilçisi “Turan T”-ni məğlubiyyətə uğradan muxtar respublika klubu bu matçda da qələbəni bayram edib, liderlər qrupunda qərarlaşmaq istəyirdi. Odur ki, “ev” oyunu qırmızı-ağlar üçün böyük önəm kəsb edirdi. Xüsusilə 12 il bundan öncə bu arenada “Şəmkir”ə məğlub olan komandamız bu dəfə mütləq qələbə qazanmalı idi.

Asan hesab edilməyən rəqib – “Şəmkir”

“Araz-Naxçıvan” çıxış etdiyi 2000-2001 və 2001-2002-ci illər mövsümlərində “Şəmkir”lə 4 dəfə qarşılaşmış, onların 2-də məğlub olmuş, bu arenada keçirilən görüşdə isə hesab açılmamışdır. Həmin dövr şəmkirlilərin ən parlaq illəri hesab edilirdi. Belə ki, Azərbaycanın ən istedadlı futbolçularını heyətinə cəlb edən qərb klubu məhz bu iki mövsümdə çempionluq sevinci yaşamışdır. Bununla yanaşı, “Qızıl oyun”la çempion olduğu dövrdə şəmkirlilər Çempionlar Liqasında böyük əzmkar­lıq göstərmiş və tur adlamışdır. Elə 2001-2002-ci il mövsümünü də lider kimi başa vuran şəmkirlilər yenə UEFA kubokunda baxımlı oyunları ilə yadda qalmışdılar. Belə bir komandaya qarşı oynamaq, təbii ki, yeni formalaşan bir klub üçün asan deyildi.

Birinci divizionda mübarizə aparan “Araz-Naxçıvan” futbol komandası sentyabrın 22-də çempionatın ikinci turu çərçivəsində Naxçıvan Muxtar Respublika Stadionunda Şəmkirin eyniadlı komandasını qəbul edib. Ramil Diniyevin idarə etdiyi matçda komandamız qələbə qazanmağa müvəffəq olub. İlk dəqiqələrdən üstünlüyü ələ alan qırmızı-ağlar 18-ci dəqiqədə hesabı açıblar. Yarımmüdafiəçimiz Əlimirzə Daşzərini cərimə zərbəsindən mükəmməl qola imza atıb. İkinci hissə başlayan kimi hücumlarını davam etdirən Naxçıvan təmsilçiləri 59-cu dəqiqədə Bəxtiyar Soltan­ovun qolu sayəsində hesabı 2:0-a çatdırıblar. 71-ci dəqiqədə B. Soltanov dublunu rəsmiləşdirib – 3:0. Oyunun son dəqiqəsində isə qapıçı Nicat Əliyevin səhvi diqqətdən qaçmayıb. Fürsətdən istifadə edən Vüsal İbrahimov hesab arasındakı fərqi azaldıb. İki oyundan maksimum nəticə əldə edən “Araz-Naxçıvan” turnir cədvəlində xal ehtiyatını 6-ya çatdırıb və adını liderlər cərgəsinə yazdırıb.
Qeyd edək ki, “Araz-Naxçıvan” birinci divizionun üçüncü turunda növbəti oyununu İmişlidə “Mil-Muğan” komandasına qarşı keçirəcək.

Ceyhun MƏMMƏDOV

Azərbaycan birinci divizionunda yeni – 2013-2014-cü il mövsümünə start verildi. Cari ilin bizim üçün bu qədər maraq kəsb etməyinin əsas səbəbi isə Naxçıvanın “Araz” futbol klubunun çempionatda çıxış etməsidir.

“Turan-T” ilə yarımçıq qalmış hesab

“Araz-Naxçıvan”ın birinci divizionun startında belə çətin rəqiblə qarşılaşmağı bir qədər arzuolunmaz idi. Çünki premyer-liqanın bütün mövsümlərinin iştirakçısı olmuş “Turan”a qarşı səfərdə oynamaq heç də asan deyildi. Bir vaxtlar Tovuz klubunun “sükanı arxasında əyləşmiş” Əsgər Abdullayev bu dəfə keçmiş komandasına qarşı idi. Sonuncu dəfə “Araz” güclülər dəstəsində 2000-2001 və 2001-2002-ci illər mövsümündə çıxış edib.
İlk mövsümdə komandamız məhz bu stadionda tovuzlulara məğlub olmuşdu. Naxçıvanda keçirilən görüşdə meydanı “sülh”lə (1:1) tərk edən qırmızı-ağlar səfərdə 2:7 hesablı ağır məğlubiyyətə düçar olmuşdu. 12 klubun dairəvi sistemlə mübarizə apardığı 2000-2001-ci il mövsümündə “Araz” da yarışa qatılmışdı. Reqlamentə əsasən, həmin çempionatda 2 komanda aşağı dəstəyə yuvarlanmalı idi. Keçirdiyi 20 oyundan 4-nü qələbə, 2-ni isə heç-heçə ilə başa vuran Naxçıvan təmsilçisi 14 xalla mövsümü 9-cu pillədə başa vurmaqla yeni mövsümdə güclülər dəstəsində qalmağa müvəffəq olmuşdu.

Birinci divizionun ilk turunda Tovuzda “Turan-T”-nin qonağı olacaq “Araz-Naxçıvan” bu gün yola düşür. Komandamız əvvəlcə Gəncəyə, oradan isə məskunlaşmaq üçün Qazağa yollanacaq. Burada Qazax Olimpiya İdman Kompleksində qalacaq qırmızı-ağların bu gün matçın oynanılacağı Tovuz şəhər stadionunda məşqə də çıxacağı gözlənilir. Əsgər Abdullayevin yetirmələri yüngül məşqdən sonra yenidən Qazağa yollanacaq və oyunun başlama saatını gözləyəcək.
Qeyd edək ki, oyun sabah Tovuz şəhər stadionunda keçiriləcək və matçın başlama saatı 17⁰⁰-dir.
Artıq oyunu idarə edəcək hakimlər briqadası da məlumdur. “Araz-Naxçıvan”ın ilk turdakı oyununda Anar Salmanov fit çalacaq. Uzun illər premyer-liqada hakimlik edən A.Salmanova bu görüşdə Yaşar Abbasov və Aleksandr Musatkin köməklik edəcəklər. Nail Nağıyev isə matçın dördüncü hakimi vəzifəsini yerinə yetirəcək.

Ceyhun MƏMMƏDOV

Naxçıvan Muxtar Respublikasında idmanın müxtəlif sahələrinin inkişafı daim diqqət mərkəzindədir. Muxtar respublikada bu sahənin inkişafına hərtərəfli şərait yaradılıb. Gənclərin asudə vaxtlarının səmərəli təşkili, həmçinin onların idman sahəsində uğur qazanmalarını təmin etmək məqsədilə Naxçıvanda bir çox idman zalları, komplekslər fəaliyyət göstərir. Onlardan biri də Naxçıvan şəhərində yerləşən İlham Əliyev adına Olimpiya İdman Kompleksidir. 10 ildən çoxdur, qapıları idmançıların üzünə daim açıq olan kompleksdə məşq etmək üçün hər cür şərait mövcuddur. Yaradılan şəraitlə yaxından tanış olmaq üçün idman kompleksinə yollandıq.

10 illik fəaliyyətin nəticəsi

İlham Əliyev adına Olimpiya İdman Kompleksi barədə çox söz demək olar. Səbəbi, bu qurumun son illərdə göstərdiyi fəaliyyət, Naxçıvanda idmanın inkişafına verdiyi töhfələrdir. Kompleksdə bir idmançının yetişməsi, uğur qazanması və püxtələşməsi üçün hər bir şərait var.

Sentyabrın 9-da Gürcüstanın Tbilisi şəhərində “Nona Qaprindaşvili CUP-2013” Beynəlxalq Şahmat Turnirinə start verilib.
Bu ayın 17-dək davam edəcək turnirdə muxtar respublikamızın şahmatçılarından Urfan Sevdimalıyev, Tural Zeynalov və Sadiq Məmmədov da mübarizəyə qoşulublar. Birinci turdan oyunlara fəal başlayan Urfan Sevdimalıyev Ermənistan şahmatçısını mat edib. Yarışda Tural Zeynalov beynəlxalq usta ilə heç-heçə etsə də, digər təmsilçimiz Sadiq Məmmədov rəqibinə qalib gəlib.

Naxçıvan Muxtar Respublikası
 Gənclər və  İdman Nazirliyinin mətbuat xidməti

Naxçıvan şəhərindəki Şahmat Mərkəzində şahmat üzrə ənənəvi təsnifat turniri keçirilib. Şahmatın təbliğində və şahmatçıların təsnifat dərəcəsinin artırılmasında mühüm rol oynayan yarışda 6 qrupda 100-ə yaxın idmançı iştirak edib. Sonda yarış iştirakçılarına müvafiq şahmat dərəcələri verilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan Muxtar Respublikası Gənclər və İdman Nazirliyi ilə Şərq Döyüş Sənəti Federasiyasının tədbirlər planına uyğun olaraq, Culfa rayon və Naxçıvan şəhər kikboksinqçiləri arasında keçirilən yoldaşlıq görüşündə 45 idmançı gücünü sınayıb.
Yerlərdə kikboksinq idman növünü inkişaf etdirmək və idmançıların ustalıq səviyyəsini artırmaq məqsədilə təşkil edilən yoldaşlıq görüşü Naxçıvan şəhər təmsilçilərinin 25:20 hesablı üstünlüyü ilə başa çatıb.

Naxçıvan Muxtar Respublikası
Gənclər və İdman Nazirliyinin mətbuat xidməti

2002-2004-cü il təvəllüdlü yeniyetmələr arasında sərbəst güləş üzrə Naxçıvan şəhər birinciliyi keçirilib. Naxçıvan şəhərindəki İlham Əliyev adına Olimpiya İdman Kompleksində keçirilən yarışda 11 çəki dərəcəsində 50-dən artıq idmançı öz qüvvə və bacarığını nümayiş etdirib. Birincilik uğrunda gərgin mübarizədə müxtəlif çəkilərdə Tuncay Məmmədov, Məcid İbrahimov, Abbas Nəzərəliyev, Kəramət Xudiyev, Eldar Məhərrəmli, Həsənqulu Bağırov, Oruc Tağıyev, Davud Əliyev, Salman Həsənov, Gündüz Məmmədov və Qoca Əhmədov fəxri kürsünün ən yüksək pilləsinə qalxıblar.
Naxçıvan Şəhər Gənclər və İdman İdarəsi və Naxçıvan Muxtar Respublikası Güləş Federasiyasının təşkilatçı­lığı ilə keçirilən birincilikdə yer tutan güləşçilərə diplomlar verilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Beynəlxalq turnirlərin hegemonları

Naxçıvan Muxtar Respublikasında idmana və idmançılara göstərilən diqqət və qayğı göz qabağındadır. Bu sahənin bütün növlərində idmançılarımızın qazandıqları uğurlar ildən ilə artmaqdadır. Buna şahmatçılarımızın son zamanlar əldə etdikləri nailiyyətlər bariz nümunədir. Bu günlərdə Türkiyə Respublikasının Bitlis şəhərində Beynəlxalq Şahmat Turniri başa çatıb. İsveçrə sistemi üzrə 9 turdan ibarət olmuş yarışda muxtar respublikamızın 9 şahmatçısı öz qüvvəsini sınayıb. “A” və “B” qruplarında keçirilən beynəlxalq turnirdə təmsilçilərimiz uğurlu nəticələr əldə ediblər. Belə ki, “B” qrupunda mübarizə aparan şahmatçımız Sadiq Məmmədov öz qrupunun qalibi olub. Digər şahmatçımız Zahir Allahverdiyev isə 7 yaşlı şahmatçılar arasında turnir cədvəlini ilk pillədə başa vurub. Mükafata layiq görülmüş şahmatçılarımız kubok və medallarla təltif ediliblər.

Dünən birinci divizionun püşkatma mərasimi keçirilib. Mərasim AFFA-nın inzibati binasında təşkil olunub. 2013/2014-cü il mövsümündə birinci divizionda 15 klub çıxış edəcək. Onlardan 11-i ötən mövsümdə aşağı liqada mübarizə aparıb. İki klub son mövsümü premyer-liqada keçirib və son iki pilləni tutub. Eyni zamanda bir klub yaradılıb, biri fəaliyyətini bərpa edib. İştirakçıların sayı tək olduğundan hər tur bir komanda istirahət edəcək. İlk turda bu imkandan “Şəmkir” yararlanacaq.
Naxçıvanın “Araz” klubu isə ilk turu səfərdə keçirəcək. Qırmızı-ağlar Tovuzda “Turan”ın qonağı olacaqlar.

Ceyhun MƏMMƏDOV

Avqustun 31-də Naxçıvan Muxtar Respublikası Paralimpiya Federasiyasının təşkilatçılığı ilə qolbol komandası Ağbulaq İstirahət Mərkəzinə təlim-məşq toplanışına yollanıb. Komanda üzvləri iki gün ərzində Azərbaycan Milli Paralimpiya Komitəsinin baş məşqçisi Zahir Abdullayevin iştirakı ilə adıçəkilən idman növü üzrə məşqlərə qatılıblar. Bundan başqa, mərkəzdə komandanın ikigünlük istirahəti də təşkil edilib.

Xəbərlər şöbəsi

“Zərərli vərdişlərə “yox” deyək, həmişə sağlam olaq” devizi altında velosiped yarışı üzrə Şahbuz rayon birinciliyi keçirilib. Yarışda 15 velosipedçi starta çıxıb. İdmançılar finişə qədər 2000 metr məsafəni qət ediblər. Əsl idman mübarizəsi şəraitində keçən yarışda Arif Qasımov finişə birinci çatıb. Elmar Həsənov və Sinan Həşimov isə ikinci və üçüncü yerləri bölüşüblər.
Digər bir yarış isə Şahbuz rayon ümumtəhsil məktəblərində şahmat dərslərini tədris edən müəllimlər arasında olub. Dairəvi sistem üzrə keçirilən yarışın qalibləri birinciliyə qatılan 23 müəllim arasında müəyyən edilib. Yekun nəticəyə görə, Güney Qışlaq kənd tam orta məktəbinin müəllimi İlkin Baxşəliyev ən yüksək nəticəni göstərib. Kükü və Ayrınc kənd tam orta məktəblərinin müəllimləri Müşfiq Hüseynov ilə Araz Tarıyev isə ikinci və üçüncü yerlərə çıxıblar.
Şahbuz Rayon Gənclər və İdman İdarəsi, Təhsil və Polis şöbələrinin təşkil etdikləri yarışlarda fəxri yerləri tutan idmançılara diplom və mükafatlar verilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Türkiyədəki təlim-məşq toplanışı komandaya nə qazandırdı?

Cari mövsümdə birinci divizionda oynayacaq “Araz-Naxçıvan” futbol komandası Türkiyənin Ərzurum şəhərində təlim-məşq toplanışında növbəti yoldaşlıq görüşünü keçirib. Əsgər Abdullayevin yetirmələri bu dəfə “Rize Kalkandere­spor”u sınağa çəkiblər. Bundan öncəki matçını da qələbə ilə başa vuran qırmızı-ağlar stadionu yenə qələbə ilə tərk ediblər.

Dəyişən rəqiblər

Ümumiyyətlə, birinci divizionda çıxış edən komandaların yeni mövsüm öncəsi hazırlıqlarını ölkədən kənarda davam etdirmələri nadir hallardan biridir. Bu ənənəyə, adətən, “Neftçala”, “Qaradağ-Lökbatan” sadiq qalsa da, digər klublarımız maliyyə imkanlarını əsas götürərək ölkədən kənarda təlim-məşq toplanışı keçirməyi düşünməyiblər. Lakin yeni formalaşan “Araz-Naxçıvan”a göstərilən qayğı təlim-məşq toplanışında da özünü açıq şəkildə büruzə verməkdədir. Naxçıvan təmsilçisi yeni mövsümə iddialı hazırlaşmaq üçün avqust ayının 26-da Ərzuruma yollandı. Öncədən planlaşdırıldığı kimi, qırmızı-ağlar qonşu ölkədə iki yoldaşlıq görüşü keçirməli idi. Bununla Əsgər Abdullayev mövsümün başlamasına az bir müddət qalmış futbolçuların fiziki durumu, oyun təcrübəsi və onların mövsümə necə hazır olduqlarını yoxlamaq şansı əldə etdi.

Avqustun 26-da Ərzuruma təlim-məşq toplanışına yollanan “Araz-Naxçıvan” futbol komandası dünən ilk yoxlama matçına çıxıb. Əvvəlcə rəqib “Ərzurumspor” olsa da, müəyyən səbəblərdən rəqib dəyişdirilib. Əsgər Abdullayevin yetirmələrinin rəqibi “Yakutiyaspor” komandası olub.
İlk hissədə qapılara qol vurulmasa da, 55-ci dəqiqədə Rəhman Musayev fərqlənib. 64-cü dəqiqədə isə komandamızın baxışda olan legioneri Aleksandr Kurtskeviç rəqibin qapısından qol keçirməklə fərqlənməyi bacarıb. Sonrakı dəqiqələrdə hesab dəyişmədiyindən matç Naxçıvan təmsilçisinin 2:0 hesablı qələbəsi ilə yekunlaşıb.

Xəbərlər şöbəsi

Bu günlərdə Türkiyə Respublikasının Bitlis şəhərində keçirilən Beynəlxalq Şahmat Turniri başa çatıb.
Naxçıvan Muxtar Respublikası Gənclər və İdman Nazirliyinin mətbuat xidmətindən aldığımız məlumata görə, İsveçrə sistemi üzrə keçirilən 9 turdan ibarət yarışda muxtar respublikamızın 9 şahmatçısı iştirak edib. “A” və “B” qruplarında keçirilən beynəlxalq turnirdə təmsilçilərimiz uğurlu nəticələr əldə ediblər.
Belə ki, “B” qrupunda mübarizə aparan şahmatçımız Sadiq Məmmədov öz qrupunun qalibi olub. Digər şahmatçımız Zahir Allahverdiyev isə 7 yaşlı şahmatçılar arasında birinci yeri tutub. Mükafata layiq görülmüş şahmatçılarımız kubok və medallarla təltif olunublar. Məlumat üçün qeyd edək ki, İspaniyanın Barselona şəhərində avqustun 22-dən start götürmüş Beynəlxalq Şahmat Turnirində muxtar respublikamızın şahmatçısı Rauf Murtuzov da öz qüvvəsini sınayır. Bu ayın 31-dək davam edəcək turnirdə hazırda Rauf Murtuzovun 3 oyundan 2 xalı var.

Xəbərlər şöbəsi

Babək Rayon Uşaq-Gənclər Şahmat Məktəbində şahmat yarışı keçirilmişdir. Bu dəfə şahmat taxtası arxasında rayon ümumtəhsil məktəblərinin müəllimləri ilə Uşaq-Gənclər Şahmat Məktəbinin şagirdləri qarşılaşmışlar. İkisi müəllimlərdən və ikisi şagirdlərdən təşkil edilmiş 4 komandanın hər birinin tərkibi 6 nəfərdən ibarət olmuşdur.
Yarış iki turda keçirilmişdir. Yarış başlanmazdan əvvəl Uşaq-Gənclər Şahmat Məktəbinin direktoru İbrahim Sultanov və məktəbin məşqçi-müəllimi Fərid Zeynalov çıxış edərək asudə vaxtın səmərəli keçirilməsində idmanın, o cümlədən şahmatın əhəmiyyətindən danışmışlar.
Sonra şagirdlərlə müəllimlər mübarizə aparmışlar. Son nəticəyə görə, şagirdlər daha çox xal toplayaraq qalib olmuşlar.
Yarışın sonunda qaliblərə hədiyyələr təqdim edilmişdir.

Xəbərlər şöbəsi

Məşqlərini gündə 2 dəfə İbrahimxəlil Axundlu adına Naxçıvan Muxtar Respublika Stadionunda davam etdirən “Araz-Naxçıvan” futbol komandası avqustun 26-da Türkiyəyə təlim-məşq toplanışına yollanacaq. Təlim-məşq toplanışı Ərzurum şəhərindəki “Ərzurumspor” klubunun idman bazasında keçiriləcək.
32 nəfərlik heyətlə qardaş ölkəyə yollanacaq Naxçıvan təmsilçisi orada 2 yoldaşlıq matçı keçirməyi planlaşdırıb. Avqustun 27-də yerli “Ərzurumspor”la qarşılaşacaq “Araz-Naxçıvan” 2 gün sonra Rza Çalımbayın baş məşqçisi olduğu “Çaykur Rizespor”la görüşəcək. 10 günlük Ərzurum hazırlığının ardından komandamız Naxçıvana geri dönərək məşqləri yerli arenada davam etdirəcək.
Yerli azarkeşlər önündə komandanın daha bir yoldaşlıq matçı keçirməsi də planlaşdırılıb.
Həmçinin komanda bu günlərdə texniki heyəti də komplektləşdirib. Son iş yeri “AZAL” klubu olan həkim Sədi Məmmədov komandanın həkimi təyin olunub. “Turan”da çalışmış Rəşid Qayfulin isə “Araz-Naxçıvan”da masajçı kimi fəaliyyət göstərəcək.

Ceyhun MƏMMƏDOV

Naxçıvan Muxtar Respublikası Gənclər və İdman Nazirliyi və muxtar respublika Voleybol Federasiyasının təşkilatçılığı ilə İlham Əliyev adına Olimpiya İdman Kompleksində Babək və Culfa rayonlarının voleybol komandaları arasında yoldaşlıq görüşü keçirilib. Qarşılaşmada Culfa voleybolçuları babəkli rəqiblərini 3:1 hesabı ilə məğlub edərək görüşdən qalibiyyətlə ayrılıblar.
Hər iki komandaya Naxçıvan Muxtar Respublikası Voleybol Federasiyasının hədiyyələri təqdim edilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Şahbuz rayonundakı Ağbulaq İstirahət Mərkəzinin mini-futbol meydançasında paralimpiyaçılar arasında futzal üzrə birincilik keçirilib. Tədbiri Naxçıvan Muxtar Respublikası Gənclər və İdman Nazirliyi və muxtar respublika Paralimpiya Federasiyası təşkil edib.
8 komandanın mübarizə apardığı yarışda Şahbuz paralimpiyaçıları birinci yeri tutublar. İkinci yerə Babək, üçüncü yerə Culfa idmançıları layiq görülüblər.
Qaliblərə kuboklar və fəxri fərmanlar verilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Avqustun 13-də “Araz-Naxçıvan” futbol komandası böyük bir azarkeş kütləsini stadiona toplamağı bacardı. Naxçıvan Muxtar Respublika Stadionunda qırmızı-ağlar Neftçalanın eyniadlı komandasını qəbul etdi. Yoldaşlıq görüşü çərçivəsində keçirilən matçla “Araz-Naxçıvan” futbol klubu ictimaiyyətə təqdim olundu.

Naxçıvan Muxtar Respublikası Gənclər və İdman Nazirliyi və Basketbol Federasiyasının tədbirlər planına uyğun olaraq, “Zərərli vərdişlərə “yox” deyək, həmişə sağlam olaq” devizi altında Naxçıvan Türk Liseyinin idman zalında basketbol üzrə yoldaşlıq görüşü keçirilmişdir. “Naxçıvan-1” və “Naxçıvan-2” komandaları arasında keçirilən yarış başlanmazdan əvvəl Naxçıvan Muxtar Respublikası Basketbol Federasiyasının sədr müavini Ənvər Məmmədov çıxış edərək görüşün idmanın kütləviliyinə nail olmaq və idmançıların ustalıq səviyyəsini yüksəltmək məqsədi daşıdığını bildirmişdir. Maraqlı keçən yarış “Naxçıvan-1” komandasının 61:49 hesablı qələbəsi ilə başa çatmışdır. Fərqlənən idmançılara fəxri fərmanlar və xatirə hədiyyələri verilmişdir.

Naxçıvan Muxtar Respublikası
Gənclər və İdman Nazirliyinin mətbuat xidməti

Həmin deviz altında Naxçıvan şəhərindəki Şahmat Mərkəzində şahmat üzrə Naxçıvan şəhər birinciliyi keçirilmişdir. Naxçıvan Muxtar Respublikası Gənclər və İdman Nazirliyinin tədbirlər planına uyğun olaraq təşkil edilən yarışda 50-yə yaxın idmançı mübarizə aparmışdır. İsveçrə sistemi ilə 7 turda keçirilən birinci­likdə oğlanlar arasında Zahid Allahverdiyev, Əjdər Rzayev və Əhməd Baxşıyev, qızlar arasında isə Leyla Abdullayeva ən yüksək nəticəni göstərmişlər. Fəxri yerləri tutan idmançılara Naxçıvan Şəhər Gənclər və İdman İdarəsinin diplomları verilmişdir.

Naxçıvan Muxtar Respublikası
Gənclər və İdman Nazirliyinin mətbuat xidməti

Yenidən böyük futbola qayıdan “Araz” komandası ilk dəfə azarkeşlərinin önünə çıxıb. Muxtar respublika təmsilçisi yoldaşlıq görüşünü təlim-məşq üçün toplaşdığı Şərur Olimpiya İdman Kompleksinin stadionunda keçirib. “Qırmızı-ağlar”ın rəqibi isə Naxçıvan Dövlət Universitetinin eyniadlı komandası olub.
Birinci diviziona iddialı hazırlaşan Əsgər Abdullayevin yetirmələri bu matçda nəyə qadir olduqlarını nümayiş etdiriblər. Bütün futbolçuları sınaqdan keçirən Ə.Abdulla­yevin rəhbərlik etdiyi komanda onu məyus etməyib. 6:0 hesablı qələbə qazanan “Araz”da daha çox təcrübəli və ümid bəslənilən oyunçular etimadı doğruldublar. Belə ki, komandanın yeganə gürcü legioneri David Canalidze ilə hesabı açan Naxçıvan klubu daha sonra Rəhman Musayev və Emin İmaməliyevin qolları sayəsində hesab arasındakı fərqi yüksəldiblər. Hər iki təcrübəli futbolçu bu matçda dubl edib. Ötən mövsüm Premyer-Liqada “Rəvan”ın şərəfini qoruyan Mikayıl Rəhimov yeni komandasında da qol vurmağa müvəffəq olub.
Qeyd edək ki, “Araz” növbəti yoxlama oyununu avqustun 13-də “Neftçala” komandasına qarşı keçirəcək. Görüş İbrahimxəlil Axundlu adına Naxçıvan Muxtar Respublika stadionunda baş tutacaq.

Ceyhun MƏMMƏDOV

Yeni mövsümün başlamasına az bir müddət qalmış “Araz” futbol komandası təlim-məşq toplanışını sürətləndirib. Naxçıvan təmsilçisi ilk yoxlama oyununu bu yaxınlarda keçirəcək. Naxçıvan Muxtar Respublika Stadionunun ev sahibliyi edəcəyi görüşə Əsgər Abdulla­yevin yetirmələri ciddi hazırlaşırlar. Yeni təmir olunmuş arenada azarkeşlər qarşısına çıxacaq “ağ-qırmızılar” ilk matçda meydanı qələbə ilə tərk etmək istəyirlər. “Araz”ın yeni mövsümə necə hazırlaşdığını, komandanın hazırkı vəziyyətini yaxından öyrənmək üçün baş məşqçi Əsgər Abdulla­yevlə söhbətləşdik.

“Ürəkaçan odur ki, komandanın məşq etməsi üçün hər cür şərait yaradılıb”...

– Premyer liqada uzun illər çalışan bir məşqçi kimi yeni yaradılan bir komandada – birinci divizion təmsilçisində çalışmaq çətin deyil ki?
– Yeni yaradılan komandada çalışmaq çətin deyil. Niyəsinə gəlincə, “AZAL”da, “Turan”da və digər fəaliyyət göstərdiyim klublarda çalışdığım vaxtlar komandanı sıfırdan özüm yığmışam. İndi fərqli cəhət odur ki, reqlamentə görə, 8 nəfər 21 yaşlı olmalıdır. Birinci divizionda çıxış edən komandalar eyni problemlə üzləşdiyi üçün seçim etmək elə də asan deyil. Biz komandanı artıq yığmışıq və yoldaşlıq oyunlarında futbolçuların hansı səviyyədə olduğu daha aydın görünəcək.