2014-cü ilin muxtar respublikamızda “Muxtariyyət ili” elan edilməsi ilə əlaqədar Şərur rayonunda stolüstü tennis üzrə rayon birinciliyi keçirilmişdir. Rayonda stolüstü idman növünü inkişaf etdirmək, idmanın kütləviliyinə nail olmaq məqsədilə keçirilən birinciliyi Şərur Rayon Gənclər və İdman İdarəsi və Təhsil Şöbəsi təşkil etmişdir. Birincilikdə 8 komandada 48 idmançı mübarizə aparmışdır. Olimpiya sistemi üzrə keçirilən yarışda Şərur şəhər 2 nömrəli tam orta məktəbin komandası birinci, Muğanlı kənd tam orta məktəbinin idmançıları ikinci və Şərur şəhər 1 nömrəli tam orta məktəbin tennisçiləri isə üçüncü yerlərə sahib olmuşlar.
Qalib komandalara diplomlar verilmişdir.

Naxçıvan Muxtar Respublikası
Gənclər və İdman Nazirliyinin mətbuat xidmət

Futbol üzrə I divizionun ilk dövrəsini lider kimi başa vuran “Araz-Naxçıvan” futbol komandası təlim-məşq toplanışını Bakıda keçirir. Yanvarın 5-də “Neftçi”nin keçmiş bazasında toplanan qırmızı-ağlar ilk olaraq baş məşqçi Əsgər Abdullayevin rəhbərliyi ilə geridə qalan 15 turu müzakirə edib. Baş məşqçi ilk dövrədə buraxılan səhvlərin təkrarlanmaması üçün yetirmələrinə öz tapşırıqlarını verib və liderliyi qorumağın lider olmaqdan çətin olduğunu vurğulayıb.

Naxçıvan Muxtar Respublikasında idmana göstərilən dövlət qayğısı öz bəhrəsini verməkdədir. Artıq idmanın bir çox sahələrində qazanılan uğurlar bunun bariz nümunəsidir. Son illər Naxçıvan Muxtar Respublikasında Şərq döyüşü sənətinə də maraq artmaqdadır. Buna səbəb muxtar respublikada fəaliyyət göstərən Şərq Döyüşü Sənəti Federasiyasının fəaliyyətinin məqsədyönlü təşkilidir.

Ötən il federasiya tərəfindən Naxçıvana dəvət olunan və burdakı gənc idmançıların püxtələşməsində müstəsna rol oynayan Gündüz Qarayev ona göstərilən etimadı doğruldub. Hazırda federasiyanın nəzdində fəaliyyət göstərən MMA-1 idman növü üzrə istedadlı gənc­lərə dərs keçən G.Qarayev hələ peşəkar idmandan ayrı düşmədiyini sübut edib.

Futbol üzrə Azərbaycan I divizionunun ilk dövrəsini lider kimi başa vuran “Araz-Naxçıvan” futbol komandası təlim-məşq toplanışını Bakıda davam etdirməkdədir. Hazırlığın necə getdiyini öyrənmək üçün komandanın baş məşqçisi Əsgər Abdullayevlə söhbətləşdik:

– “Araz-Naxçıvan” futbol komandası I divizionun lideridir. Sizin artıq komandanı tam olaraq formalaşdırdığınızı söyləmək olarmı?
– Bir müddət əvvəl “Araz-Naxçıvan”ın I divizionda oynayıb-oynamayacağı sual altında idi. Çətinliklə də olsa, komandanı formalaşdırdıq. Fikirləşdim, komandaya təcrübəli futbolçular lazımdır ki, cavan futbolçular onların  təcrübələrindən yararlansınlar. Hal-hazırda liderik, amma bu, qalibik demək deyil. İndi əsas məqsədimiz ilk dövrədəki uğurları ikinci dövrədə təkrarlamaqdır. İlk dövrədə komandanın normal çıxış etdiyini deyə bilərəm.
– İlk dövrədə komandada çatışmayan cəhətlər hansılar oldu?

Cari ilin əvvəlində Naxçıvan idmançıları daha bir mötəbər turnirdə qüvvələrini sınayacaqlar. Uzun fasilədən sonra böyük futbola qayıdan muxtar respublika klubunun yeniyetmələrdən ibarət komandası bu dəfə Azərbaycan kubokunun final mərhələsində çıxış edəcək. Belə ki, tarixdə ilk dəfə olaraq Naxçıvanın 2000-ci il təvəllüdlü futbolçularından ibarət futbol komandası kubok yarışında iştirakçı qismində meydana çıxacaq.
Azərbaycan Futbol Federasiyaları Assosiasiyası tərəfindən Bakıda təşkil edilən kubokun final mərhələsində 8 komandanın iştirak edəcəyi gözlənilir. Bu turniri təşkil etməkdə əsas məqsəd isə respublikada futbolun kütləvi hal almasına nail olmaqdır. Yanvarın 27-də start veriləcək turnirdə ancaq regionlarda elit məşqçilərin rəhbərlik etdiyi komandalar mübarizə aparacaqlar. Naxçıvan komandasını bu turnirdə meydana elit məşqçilər Bilal Nağıyev və İntiqam Rəhimov çıxaracaqlar. Reqlamentə əsasən, 2000-ci il təvəllüdlü futbolçularla yanaşı, hər komandadan 2001-ci il təvəllüdlü üç oyunçu da meydana çıxa bilər.

Ceyhun MƏMMƏDOV

Naxçıvan Muxtar Respublikası Basketbol Federasiyasının təşkilatçılığı ilə 20 Yanvar faciəsinin 24-cü ildönümünə həsr olunmuş yoldaşlıq görüşü keçirilib. Əvvəlcə şəhidlərimizin əziz xatirəsi bir dəqiqəlik sükutla yad edilib. Federasiyanın sədr müavini Ənvər Məmmədov çıxış edərək 1990-cı il yanvarın 19-dan 20-nə keçən gecə sovet qoşunlarının Bakı şəhərində törətdikləri faciədən danışıb.
Sonra meydana “Naxçıvan-1” və “Naxçıvan-2” komandaları çıxıblar. Gərgin mübarizə şəraitində keçən oyun “Naxçıvan-1” komandasının 69:66 üstünlüyü ilə başa çatıb.
Daha çox top sehrbazlarının mükəmməl oyunu ilə yaddaqalan yoldaşlıq görüşündən sonra federasiya oyun zamanı fərqlənən basketbolçuları xatirə hədiyyələri ilə mükafatlandırıb.  

Ceyhun MƏMMƏDOV

Futbol üzrə Azərbaycan I divizionunun ilk dövrəsini lider kimi başa vuran “Araz-Naxçıvan” futbol komandası ikinci dövrənin hazırlıqlarını Bakıda davam etdirir. Artıq muxtar respublika təmsilçisi paytaxtda yoxlama görüşü də keçirib. Dünən keçirilən yoldaşlıq görüşündə rəqib “Sumqayıt” futbol komandası olub. Premyer-Liqa təmsilçisi ilə matç Sumqayıtda keçirilib və komandamız güclü rəqibi qarşısında minimal hesabla qalib gələrək  daha yaxşı hazırlaşdığını bir daha sübut edib.

“Araz-Naxçıvan” komandası Premyer- Liqa təmsilçisi qarşısına fərqli heyətlə çıxmışdı. Belə ki, baş məşqçi Əsgər Abdullayev qapını Rəşad Heydərov, müdafiə xəttini isə Ruslan Abıyev, Ruslan Zümrüd­ov, Əlimirzə Daşzərini və Cavid Həsənova həvalə etmişdi. Eşqin Quliyevin kapitan kimi çıxdığı matçda yarımmüdafiə xətti onunla yanaşı, Azər Məmmədov və Elmin Çobanova tapşırılmışdı. Bəxtiyar Soltanov və Əziz Hüseynovla cinahlardan hücum quran qırmızı-ağlar sivri ucda İrfan Yuseynova bel bağlamışdılar. “Sumqayıt” isə Premyer-Liqa oyunlarında olduğu kimi, yenə də meydana daha çox gənc və perspektivli oyunçuları buraxmışdı ki, bu futbolçuların da əksəriyyəti hazırda Azərbaycan millisinin şərəfini qoruyurlar.

İkinci dövrənin hazırlıqlarını davam etdirən “Araz-Naxçıvan” futbol komandasının sparinq rəqibləri artıq bəllidir. Bakıda gündə bir dəfə məşq etməklə çempionatın ikinci dövrəsinə hazırlaşan muxtar respublika təmsilçisi burda üç yoxlama görü­şü keçirəcək. Rəqiblərin Premyer-Liqada mübarizə aparan komandalardan olmasını baş məşqçi Əsgər Abdullayev xüsusilə istəyib. Belə ki, komandamızın ilk rəqibi Bakının “Rəvan” klubu olacaq. Baş məşqçisini istefaya göndərən “sığortaçılar” “sükan arxasına” yeni gətirilən türk mütəxəssis Güvənc Kurtarla ilk matçını məhz “Araz-Naxçıvan”a qarşı keçirəcəklər. Oyun yanvarın 12-si, saat 13⁰⁰-də “Bayıl Arena”da oynanılacaq.
Qırmızı-ağların ikinci rəqibi yenə Premyer-Liqa təmsilçisi “Sumqayıt” futbol komandası olacaq. Gənclik şəhərini təmsil edən komanda ilə oyunumuz isə yanvarın 15-nə təsadüf edəcək. Sumqayıt şəhərində yeni istifadəyə verilmiş arenada baş tutacaq oyunun başlama saatı 14⁰⁰-dür.
İki rəqibdən fərqli olaraq, sonuncu matç bir qədər çətin rəqibə qarşı olacaq. Belə ki, Premyer-Liqanın güclü rəqiblərindən olan “AZAL”la oyun yanvarın 22-də keçiriləcək. Oyunun başlama saatı dəqiqləşməsə də, bu matçın Şüvəlanda yerləşən “AZAL Arena”da oynanılacağı dəqiqdir. Onu da qeyd edək ki, komandamızın baş məşqçisi Əsgər Abdullayev bir vaxtlar məhz “AZAL”-ın baş məşqçisi olub.
Bu oyunlarda əsas məqsəd futbolçuların fiziki durumunu yoxlamaq və yeni gələnlərin oyun qabiliyyətinə yaxından bələd olmaqdır. Odur ki, bu görüşlərdə baş məşqçi əsas olaraq yeni taktikaların meydanda aşılamasına çalışacaq.

Ceyhun MƏMMƏDOV

Futbol üzrə Azərbaycan I divizionunun ilk dövrəsini lider kimi başa vuran “Araz-Naxçıvan” futbol komandası ikinci dövrənin hazırlıqlarına start verib. Yanvarın 5-də Bakıda bir araya gələn Əsgər Abdullayevin yetirmələri ilk bir həftəni daha çox bərpa prosesi kimi keçəcək. Bununla yanaşı, komandaya cəlb olunacaq yeni futbolçular sınaqdan keçiriləcək.
Məlum olduğu kimi, “Araz-Naxçıvan” ilk dövrə başa çatdıqdan sonra 5 futbolçu ilə yollarını ayırıb. Elvin Cəbrayıllı, Rəşad Hacızadə, Elnur Soltanlı, Nicat Əliyev və Ozal Əbiyevlə müqaviləyə qarşılıqlı surətdə son qoyan muxtar respublika təmsilçisi indi daha çox gənc futbolçuları sınaqdan keçirir. Baş məşqçi Əsgər Abdullayevin ixtiyarında olan və sınaq müddətində topqovma bacarıqlarını nümayiş etdirməyə çalışan 8 gənc futbolçudan kimlərin komandada qalıb-qalmayacağı bu həftənin sonunadək aydınlaşacaq.

Dünən İlham Əliyev adına Olimpiya-İdman Kompleksində ümummilli lider Heydər Əliyevin 90 illik yubileyi münasibətilə Azərbaycan Futbol Federasiyaları Assosiasiyası ilə Futbol Veteranları İttifaqının birgə təşkil etdiyi veteran futbolçular arasında turnirin yekun mərhələsinin oyunları keçirilib. Açılış mərasimindən sonra tədbirin bədii hissəsi Naxçıvan Dövlət Filarmoniyası kollektivinin çıxışı ilə yadda qalıb.

Bundan sonra turnirin yekun mərhələsinə start verilib. Tədbirdə veteran futbolçulardan ibarət “Neftçi”, “Qarabağ”, “Kəpəz”, “Sumqayıt” və “Araz-Naxçıvan” komandaları iştirak ediblər. Meydan sahibləri kimi Naxçıvan təmsilçisi yalnız son oyunda meydana çıxacaqdı və komandanın rəqibi digər 4 komandanın birləşmiş kollektivi olacaqdı.

Babək Rayon Təhsil Şöbəsinin təşkilatçılığı ilə Babək qəsəbəsindəki Uşaq-Gənclər Şahmat Məktəbində 31 Dekabr – Dünya Azərbaycanlılarının Həmrəylik Gününə həsr olunmuş rayon ümumtəhsil məktəbləri arasında şahmat turniri keçirilmişdir.
Turnir başlamazdan əvvəl Babək Rayon Təhsil Şöbəsinin əməkdaşı Müslüm Vəliyev, Uşaq-Gənc­lər Şahmat Məktəbinin direktoru İbrahim Sultanov ölkəmizdə idmana göstərilən qayğıdan bəhs etmiş, muxtar respublikamızda olimpiya-idman komplekslərinin, idman məktəblərinin inşa olunmasının bunun bariz nümunəsi olduğunu diqqətə çatdırmışlar. Bildirilmişdir ki, idmana göstərilən qayğı nəticəsində muxtar respublikamızda beynəlxalq səviyyəli yarışların keçirilməsi artıq ənənə halını almışdır.
Baş hakim Zakir Quliyev turnirin qaydaları barədə məlumat vermişdir. Sonra ümumtəhsil məktəblərindən 20 komandanın mübarizəsinə start verilmişdir. Hər komandada 2 oğlan, 1 qız olmaqla, 60 idmançı yarışmışdır.  
Yarışda Babək qəsəbə tam orta məktəbinin komandası 7 xalla birinci yeri tutmuşdur. İkinci yeri 6 xalla Qoşadizə kənd tam orta məktəbinin komandası qazanmış, üçüncü yerdə isə 5 xalla Nehrəm kənd 3 nömrəli və Sirab kənd tam orta məktəblərinin komandaları qərarlaşmışlar.
Turnirin sonunda qalib komandalar Təhsil Şöbəsinin diplomları ilə təltif olunmuşlar.

Xəbərlər şöbəsi

Futbol üzrə Azərbaycan I divizionunun ilk dövrəsinin son turunda “Araz-Naxçıvan” futbol komandası Bakının “Qaradağ-Lökbatan” futbol komandasını qəbul etdi. Yeni ilə lider kimi qədəm qoymaq üçün Naxçıvan təmsilçisi turnir cədvəlində ən yaxın izləyicisini geridə qoymaq niyyətində idi. Muxtar respublika klubu bu arzusunu reallaşdırdı və ilin son matçında azarkeşləri önündə rəqibini minimal hesabla məğlub edərək liderliyini möhkəmlətdi.

Emin və Eşqinin yoxluğu

Ən yaxın izləyicisi üzərində qələbə qazanmaq heç də asan deyildi. “Araz-Naxçıvan” futbol komandasının baş məşqçisi Əsgər Abdullayev bunu bilirdi və buna görə tədbirini görmüşdü. “Qaradağ-Lökbatan”ı məğlub edib ötən turdakı məğlubiyyətin təsadüf olduğunu sübut etmək üçün Naxçıvan təmsilçisi lökbatanlıları mütləq halda meydandan xalsız göndərmək istəyirdi. Qarın yağmasına baxmayaraq, bu oyunun hazır­lıqlarına ciddi şəkildə adaptasiya olan “Araz-Naxçıvan”da Emin İmam­əliyevin zədəli, Eşqin Quliyevin isə cəzalı olması baş məşqçini düşündürürdü. Doğma azarkeşlər önündə qələbə qazanmaq istəyən qırmızı-ağlar meydana, həmişə olduğu kimi, 4-3-3 taktikası ilə çıxmışdılar. Heyətdə yeganə də­yişiklik Fərman Qəmbərovun ilk 11-likdə meydana çıxması idi. Müdafiə xəttində Ruslan və Mikayılla yanaşı, Əlimirzə ilə Fərmana bel bağlayan Əsgər Abdullayev yarımmüdafiədə Akif-Elgiz-Cavid triosuna tapşırıqlar vermişdi. David Canıyev, Bəxtiyar Soltanov və Elmin Çobanov isə meydana qol ümidi kimi çıxmışdılar.

Dünən İlham Əliyev adına Olimpiya-İdman Kompleksində daha bir turnirə start verilib. Naxçıvan Muxtar Respublikası Gənclər və İdman Nazirliyi ilə Naxçıvan Muxtar Respublikası Voleybol Federasiyasının birgə təşkil etdiyi və ümummilli lider Heydər Əliyevin əziz xatirəsinə həsr olunmuş voleybol üzrə kişilər arasında Naxçıvan Muxtar Respublika çempionatının açılış mərasimi olub.
Açılışda nazirlik və federasiya rəsmiləri çıxış edərək son zamanlar muxtar respublikada voleybolun inkişafından, bu idman növünə göstərilən dövlət qayğısından bəhs ediblər.
Sonra Dövlət himni səsləndirilib.

Futbol üzrə Azərbaycan I divizionunun hazırkı lideri “Araz-Naxçıvan” futbol komandası çempionatın ilk dövrəsinin son turunda “Qaradağ-Lökbatan”ı qəbul edəcək. İlk dövrəni lider kimi başa vurmaq istəyən Naxçıvan təmsilçisi üçün bu matç böyük əhəmiyyət kəsb edir. Hazırda muxtar respublika komandasını bir xalla izləyən Bakı təmsilçisi son iki mövsümdə daha iddialı təsir bağışlayır. Belə ki, 2011-2012-ci illər mövsümünü çempion kimi başa vuran lökbatanlılar ötən mövsüm I divizionda gümüş medalla mükafatlandırılmışlar. Baş məşqçisi Adil Mahmudov olan “Qaradağ-Lökbatan” komandası cari mövsümdə yeganə məğlub olmayan komandadır. Buna baxmayaraq, rəqib turnir cədvəlində ən çox heç-heçə edən komandalardan biridir – 3 heç-heçə.

Cəmiyyətin inkişafının mühüm şərtlərindən biri insan inkişafı indeksinin yüksəlməsinə xidmət edən fiziki və mənəvi cəhətdən sağlam insanların olmasıdır. Qiymətli  insan resurslarının yaradılması və onlardan istifadənin düzgün təşkili üçün cəmiyyətin hər bir fərdinin hərtərəfli inkişafına, onun fiziki sağlamlığına, zehni imkanlarının genişləndirilməsinə xidmət edən hər bir şəraitdən istifadə edilməlidir. Dünyada milyard dollarlarla ölçülən bir həcmə çatan idman iqtisadiyyatı bu gün özünün geniş imkanları ilə bir çox xidmət və istehsal sahələrinə də təsiretmə gücünə malikdir.

Futbol üzrə Azərbaycan I divizionunun 14-cü turu çərçivəsində keçirilən “Neftçala” – “Araz-Naxçıvan” qarşılaşması, gözlənildiyi kimi, gərgin mübarizə şəraitində keçib. Neftçalaya səfərə saatlar qalmış matçın keçiriləcəyi yeri Bakı şəhərinə dəyişən rəqib komanda eyni zamanda istəyini də reallaşdırmış oldu. “Araz-Naxçıvan” futbol komandasının stadionu təbii ot örtüyünə malikdir və komanda bütün məşqlərini burada keçirir. Təbii ki, gözlənilmədən süni meydançada keçirilən matç futbolçuların da oyununa mənfi təsir göstərdi. İşin inzibati tərəfində üstünlüyü ələ alan “Neftçala” futbol komandası oyun zamanı hakimin də ədalətsiz qərarları əsasında meydanı qalib kimi tərk etdi.

Buna baxmayaraq, “Araz-Naxçıvan” yenə irəlidədir

Futbol üzrə Azərbaycan I divizionunun 14-cü turunun mərkəzi qarşılaşmasında dekabrın 15-də “Araz-Naxçıvan” futbol komandası “Neftçala” futbol komandasının qonağı oldu. Son iki mövsümdə çempionatda çıxış edən və mükafatçılar sırasında olan Neftçala təmsilçisi ilə muxtar respublika klubu arasındakı qarşılaşma, gözlənildiyi kimi, gərgin mübarizə şəraitində keçdi. Meydan sahiblərinin ikinci hissədə nadir hücumlarından biri qolla nəticələnincə komandamız meydandan 1:0 hesabı ilə məğlub ayrıldı.

Stadion niyə dəyişdirildi?

Bu matça marağın hədsiz dərəcədə çox olacağı öncədən bəlli idi. Ancaq “Neftçala” futbol klubunun oyunu Bakıya keçirməsi gözlənilməz oldu. Görüşlərin təqvimi açıqlanarkən Azərbaycan Peşəkar Futbol Liqası “Neftçala”-“Araz-Naxçıvan” matçının keçiriləcəyi yer kimi Nəriman Nərimanov adına Neftçala Şəhər Stadionunu göstərmişdi. Ancaq oyuna saatlar qala qurum meydan sahiblərinin ərizəsi əsasında oyunun keçirilmə yerində dəyişiklik etdi.

Futbol üzrə Azərbaycan I divizionunun 14-cü turu çərçivəsində “Araz-Naxçıvan” futbol komandası səfərdə “Neftçala” futbol komandasının qonağı olacaq. Nəriman Nərimanov adına Neftçala Şəhər Stadionunda keçiriləcək matç turun mərkəzi oyunu hesab edilir. Hazırda turnir cədvəlinə liderlik edən Naxçıvan təmsilçisi rəqibindən 11 xal irəlidədir. Neftçala klubu isə son iki mövsümdən fərqli olaraq, uğursuz çıxışı ilə diqqəti cəlb edir.
“Neftçala” futbol komandası son 3 turdur ki, qələbə üzünə həsrətdir. Sonuncu dəfə doğma arenada “Mil-Muğan”ı məğlub edən (1:0) qara-ağlar o vaxtdan bəri çempionatda qələbə qazana bilmirlər. Keçirdiyi 3 oyunda “Qaradağ-Lökbatan” və “Şəmkir”lə heç-heçə edən neftçalalılar öz meydanlarında “Turan-T”yə uduzublar. Ümumiyyətlə, komandanın cari mövsümdəki “ev” oyunlarına baxdıqda maraqlı statistika ilə üzləşirsən. Belə ki, baş məşqçi Bəhram Şahquliyevin komandası doğma arenada keçirdiyi 7 oyunun 3-də məğlub olub ki, bu da onların turnir cədvəlində irəliləməsinə maneçilik törədib.

Futbol üzrə Azərbaycan I divizionunun 13-cü turu “Araz-Naxçıvan” futbol komandasının daha bir qələbəsi ilə yadda qaldı. Həftəiçi ölkə kubokunun 1/8 final mərhələsində “Simurq” üzərində qələbədən sonra Naxçıvan təmsilçisi bu dəfə “Ağsu” futbol komandasını büdrətdi. Cari mövsümdə ikinci dəfə qarşılaşdığı Şirvan klubu qarşısında mükəmməl oyun sərgiləyən qırmızı-ağlar qazandığı qələbədən sonra liderliyini davam etdirdi.

Tanış rəqib

“Ağsu” futbol komandası cari mövsümdə ikinci dəfə Naxçıvana səfər edirdi. Ok­tyabrın son günündə ölkə kubokunun 1/16 final mərhələsində “Araz-Naxçıvan”la qarşılaşmaq üçün muxtar respublikaya gələn şirvanlılar yenə məğlubiyyətlə üzləşdilər. O zaman Elmin Çobanovun əlavə edilmiş dəqiqələrdə vurduğu qol komandamızı növbəti mərhələyə daşımışdı. I divizionda ilk dövrənin başa çatmasına iki tur qalmış qırmızı-ağların qonağı olan “Ağsu” son 3 turda qələbə üzünə həsrət idi. Belə ki, “Qaradağ-Lökbatan” və “Turan-T”-yə məğlub olan ağsulular ötən turda doğma arenada “Şəmkir”in müqavimətini qıra bilməmişdilər. Naxçıvana qələbə əzmi ilə gələn “Ağsu”nun heyətində iki futbolçunun olmaması diqqəti çəkirdi. Baş məşqçi Naxçıvandan cari mövsümdə heç bir komandanın xal apara bilmədiyini də yaxşı bilirdi.

Futbol üzrə Azərbaycan kubokunda “Simurq” futbol komandasını mübarizədən kənarlaşdıran “Araz-Naxçıvan” futbol komandası çempionat oyununun hazırlıqlarına start verib. Belə ki, futbol üzrə I divizionun 13-cü turu çərçivəsində muxtar respublika klubu “Ağsu” futbol komandasını qəbul edəcək. 34 xalla turnir cədvəlinə başçılıq edən qırmızı-ağlar Şirvan klubu ilə cari mövsümdə bir dəfə qarşılaşıb. Azərbaycan kubokunda komandamıza rəqib olan ağsulular Naxçıvandan əliboş qayıtmışdılar (1:0).
Rüfət Quliyevin baş məşqçisi olduğu “Ağsu” futbol komandası ötən mövsüm çempion olduqdan sonra klub rəhbərliyi komanda heyətindən bir çox futbolçunun gedişinə mane ola bilmədi. Odur ki, göy-ağlar cari mövsümdə bir qədər zəif çıxış təsiri bağışlayırlar. Xüsusilə “Ağsu”nun qərb klublarına qarşı uğursuzluğu diqqətdən yayınmır. 2013-2014-cü illər mövsümünün açılış matçında “Kəpəz”ə doğma arenada 0:5 hesablı məğlubiyyət R.Quliyevin yetirmələrinə mənfi təsir göstərdi. Son 3 turda isə Ağsu təmsilçisi “Qaradağ Lökbatan” məğlubiyyətindən sonra “Turan-T”yə də boyun əyib (0:3), “Şəmkir”in isə müqavimətini qıra bilməyib (1:1). Hazırda turnir cədvəlinin 7-ci pilləsində qərarlaşan göy-ağların Naxçıvana oyundan bir gün əvvəl gələcəyi gözlənilir.
Bu matça “Simurq” üzərində qazandığı qələbənin böyük əhval-ruhiyyəsi ilə çıxacaq “Araz-Naxçıvan”ın heyətində zədəli və cəzalı futbolçu yoxdur.
Qeyd edək ki, Naxçıvan Muxtar Respublika Stadionunda keçiriləcək “Araz-Naxçıvan”-“Ağsu” oyunu dekabrın 8-də olacaq. Oyunun başlama vaxtı isə saat 14⁰⁰-dür.

Ceyhun MƏMMƏDOV

Futbol üzrə Azərbaycan kubokunun 1/8 final mərhələsində dünən “Araz-Naxçıvan” futbol komandası Zaqatalanın “Simurq” futbol komandasını qəbul etdi. Kubokun öncəki mərhələsində “Ağsu” futbol komandasını təyin edilmiş əlavə vaxtda məğlub edən muxtar respublika təmsilçisi uğurlu oyunlar seriyasını davam etdirdi. Premyer-Liqa təmsilçisi önündə çarəsiz qalmayan qırmızı-ağlar rəqibini məğlub etməklə yanaşı, həm də son zamanlar mətbuatda işıq üzü görən bəzi söz-söhbətlərə də son qoydu. Əsas və əlavə vaxtı 2:2 başa çatan matçın taleyini penalti zərbələri həll etdi. Çərçivəni daha dəqiq nişan alan “Araz-Naxçıvan”ın futbolçuları 1/4 finala yüksəlməyə müvəffəq oldular.

27-30 noyabr 2013-cü il tarixlərdə Balakən rayonundakı Olimpiya-İdman Kompleksində məktəblilərin VI respublika oyunlarının proqramına daxil olan sərbəst güləş üzrə final yarışı keçirilmişdir. Yarışda muxtar respublikamızın da komandası iştirak etmişdir.
Güləşçilərimizdən 52 kiloqram çəkidə mübarizə aparan Kəramət Əsgərov finala qədər yüksələ bilmişdir. Həlledici mərhələdə bu üstünlüyü əldən verən güləşçimiz yarışın gümüş medalına sahib çıxmışdır. 48 kiloqram çəkidə öz qüvvəsini sınayan Sərdar Əliyev isə yarışda üçüncü yerə çıxaraq mükafatçılar sırasına düşmüşdür. Digər idmançılarımızdan 32 kiloqramda güləşən Bağır Zeynalov da üçüncü yerlə kifayətlənərək bürünc medalla mükafatlandırılmışdır. Komandamız ən yaxşı komanda kimi kuboka layiq görülmüşdür.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan şəhərindəki İlham Əliyev adına Olimpiya-İdman Kompleksində paralimpiyaçılar arasında armrestlinq (qol güləşi) üzrə muxtar respublika birinciliyi keçirilib.
Naxçıvan Muxtar Respublikası Gənclər və İdman Nazirliyi ilə Paralimpiya Federasiyasının təşkil etdikləri yarışın açılış mərasimində Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov və  Paralimpiya Federasiyasının sədr müavini Elçin Nəzərəliyev çıxış edərək yarışın əhəmiyyətindən danışıblar.
Birincilikdə iki çəkidə 20 idmançı iştirak edib. Yarışda 70+ çəki dərəcəsində Babək rayon paralimpiyaçısı Telman Şirinov birinciliyin qalibi olub. Culfa və Kəngərli  rayonlarının  idmançıları Firudin Həsənov ilə Əzabi Rüstəmov isə ikinci və üçüncü yerləri tutublar. 70– çəkidə isə Babək rayon idmançıları Ramin Fərhadov birinci, Tural Qasımov ikinci və Culfa rayon komandasının üzvü Sərvər Əliyev üçüncü yerlərə layiq görülüblər.
Sonda qalib idmançılara Naxçıvan Muxtar Respublikası Paralimpiya Federasiyasının hədiyyələri, digər idmançılara həvəsləndirici mükafatlar verilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Sabah Azərbaycan kubokunun 1/8 final mərhələsində “Araz-Naxçıvan” futbol komandası Zaqatalanın “Simurq” futbol komandasını qəbul edəcək. Naxçıvan Muxtar Respublika Stadionunda keçiriləcək matçın başlama saatı 14⁰⁰-dür. Artıq qonaq komanda Naxçıvana gəlib. Sarı-qaraların bu gün oyunun baş tutacağı stadionda məşq edəcəyi gözlənilir.
Son 4 turdur, “Araz-Naxçıvan”ın oyunlarını meydandan izləyən Zaqatala klubunun məşqçiləri son olaraq Mingəçevirdə də oyuna canlı tamaşa ediblər. Məhz bu oyundan sonra komandanın məşqçisi İqor Getman maraqlı açıqlama verib: “Mingəçevirdə “Araz-Naxçıvan” qalib gəlsə də, bütün kartlarını açmadı. Biz “Araz-Naxçıvan”ı güclü rəqib kimi qəbul edirik və bilirik ki, bizi Naxçıvanda asan “gəzinti” gözləmir. Bu  komandanın gücünü bilmək üçün onun baş məşqçisini və heyətini nəzərdən keçirmək kifayətdir.

Futbol üzrə Azərbaycan I divizionunun 12-ci turu çərçivəsində “Araz-Naxçıvan” futbol komandası dünən Mingəçevirdə “Energetik”in qonağı idi. Ötən həftə çətin “Şuşa” qələbəsindən sonra Aran zonasındakı oyun komandamız üçün bir qədər asan oldu. Mingəçevir şəhərində yerli komanda ilə oyunun taleyini muxtar respublika klubu elə ilk hissədəcə həll etdi. Bu qələbə ilə cari mövsümdə məğlubiyyətsizlik seriyasını 12-yə yüksəldən qırmızı-ağlar liderliyini də davam etdirdi.

İndiyə qədər “Energetik” futbol komandası ilə qarşılaşmayan “Araz-Naxçıvan” Mingəçevirə itkilərlə yollanmışdı. Belə ki, komandanın əsas müdafiəçiləri Mikayıl Rəhimov, Əlimirzə Daşzərini və yarımmüdafiəçi Fərman Qəmbərov bu oyunu buraxmalı olmuşdular. “Şuşa” ilə matçda sarı vərəqə limitini dolduran bu futbolçular baş məşqçi Əsgər Abdullayev tərəfindən heyətə daxil edilməmişdilər.

Naxçıvan şəhərindəki Heydər Əliyev Uşaq-Gənclər Yaradıcılıq Mərkəzində şəhər ümumtəhsil məktəblərinin şagirdləri arasında “Şən startlar” yarışı keçirilib.
“Heydər Əliyev ili” ilə əlaqədar olaraq keçirilən yarışda birinci yerə 5 nömrəli tam orta məktəbin şagirdləri layiq görülüblər. 7 nömrəli tam orta məktəbin şagirdləri ikinci, 2 və 15 nömrəli tam orta məktəbin şagirdləri isə üçüncü yerə çıxıblar.  Fərqləndirici yerə isə 17 nömrəli tam orta məktəbin şagirdləri sahibləniblər.
Sözügedən mərkəzin, Naxçıvan Şəhər Təhsil Şöbəsinin, Gənclər və İdman İdarəsinin təşkil etdiyi yarışın qaliblərinə diplomlar təqdim edilib.

Xəbərlər şöbəsi

Futbol üzrə Azərbaycan I divizionunun 12-ci turunda “Araz-Naxçıvan” futbol komandası Mingəçevirdə yerli “Energetik”in qonağı olacaq. Bu gün səhər saatlarında Gəncəyə yola düşən muxtar respublika klubu Nizami yurdundan Mingəçevirə yollanacaq. Qırmızı-ağlar günün ikinci yarısında oyunun keçiriləcəyi Yaşar Məmmədzadə adına Şəhər Stadionunda son məşqinə çıxacaq. Komandamız bu görüşə itkilərlə yollanıb. Belə ki, “Şuşa” ilə matçda 4-cü sarı vərəqələrini alan müdafiəçilərimiz Mikayıl Rəhimov, Əlimirzə Daşzərini və Fərman Qəmbərov bu oyunu buraxmaq məcburiyyətində qalıblar. “Araz-Naxçıvan”ın baş məşqçisi Əsgər Abdullayevin adıçəkilən futbolçuların əvəzinə meydana daha fərqli heyət çıxaracağını təxmin etmək olar.
“Energetik”ə gəlincə, Mingəçevir təmsilçisi I divizionda daim autsayder qismində iştirak edib. Bunun bariz nümunəsidir ki, cari mövsümdə Sahib Qocayevin yetirmələri cəmi 4 xal qazanıblar və turnir cədvəlində 15-ci pillədə qərarlaşıblar. Digər tərəfdən, bu klub son 4 matçda rəqib qapılarına yol tapa bilməyib, öz qapısından isə 18 qol buraxıb.

Ceyhun MƏMMƏDOV

Dünən Naxçıvan Muxtar Respublikası Basketbol Federasiyasının təşkilatçılığı ilə “Naxçıvan” və “Culfa” basketbol komandalarının yoldaşlıq görüşü keçirilib. Oyun başlamazdan öncə çıxış edən Naxçıvan Muxtar Respublikası Basketbol Federasiyasının sədr müavini Ənvər Məmmədov son zamanlar muxtar respublikada bu idman növünə artan maraqdan danışıb, belə yarışların bundan sonra da keçiriləcəyini bildirib.
Sonra qarşılaşmaya start verilib. Gərgin oyun şəraitində keçən qarşılaşma “Naxçıvan” komandasının 51:32 hesablı qələbəsi ilə başa çatıb.
Sonda oyunda fərqlənən idmançılara Basketbol Federasiyasının fəxri fərmanı və hədiyyələr təqdim edilib.

Xəbərlər şöbəsi

Cari mövsüm futbol üzrə Azərbaycan I divizionunda məğlubiyyətsiz olaraq addımlayan “Araz-Naxçıvan” futbol komandası növbəti qələbəsini qazanıb. 11-ci turda doğma azarkeşləri önündə “Şuşa”nı qəbul edən Naxçıvan təmsilçisi 3 xalı bir qolla əldə edib. Turnir cədvəlinin üst pillələrində qərarlaşan rəqibi məğlub etməklə qırmızı-ağlar liderliklərini bir qədər də möhkəmləndiriblər.

I divizionun 11-ci turu liderlərin qarşılaşması ilə yadda qaldı. Belə ki, turnir cədvəlinə başçılıq edən “Araz-Naxçıvan” 4-cü pillədə qərarlaşan “Şuşa”nı qəbul etdi, Lökbatanda “Qaradağ” isə yarandığı gündən əzəli rəqibi olan “Neftçala”nın müqavimətini qırmağa çalışdı. Bu 4 komanda arasında keçirilən matçlar həm də üst pillələrdəki yerlərə tam aydın­lıq gətirəcəkdi. “Qaradağ Lökbatan” – “Neftçala” görüşündən bir gün öncə meydana çıxan “Araz-Naxçıvan” rəqibini məğlub etməklə liderliyini davam etdirdi. Düzdür, “Şuşa”nı məğlub etmək o qədər də asan olmadı. Lakin Əsgər Abdullayevin yetirmələri qarşısında aciz qalan qonaq komanda Naxçıvanı xalsız tərk etdi.

Naxçıvan Muxtar Respublikası Gənclər və İdman Nazirliyi və Naxçıvan Muxtar Respublikası Futbol Federasiyasının təşkilatçılığı ilə XII muxtar respublika futbol çempionatında yeddinci turun oyunlarına yekun vurulmuşdur.

Futbol üzrə Azərbaycan I divizionunun 11-ci turu çərçivəsində “Araz-Naxçıvan” futbol komandası noyabrın 23-də doğma arenada “Şuşa” futbol komandası ilə qarşılaşacaq. Bakıda məskunlaşan rəqib komanda cari mövsümdə baxımlı oyunu ilə diqqəti cəlb edir. Nadir Qasımovun yetirmələri güclü rəqiblərə qarşı hücum futbolu sərgiləməklə onun müdafiə xəttində gərginlik yaratmağa çalışırlar. Cari ildə “Şuşa” futbol klubu keçirdiyi 10 oyunun 6-da qələbəni bayram edib. Yalnız bir dəfə heç-heçə ilə barışmalı olan şuşalılar 3 dəfə meydanı məğlub tərk ediblər. Ötən tur doğma arenada “Şəmkir”i darmadağın edən “Şuşa” Naxçıvana itkilərlə gəlir. Belə ki, 9-cu turda qırmızı vərəqə alan Frensis Boadi və ötən tur cəzalandırılan İsrafil Qarayev “Araz-Naxçıvan”la oyunu buraxmalı olacaqlar. Bununla yanaşı, komandanın baş məşqçisi Nadir Qasımov Nizam-İntizam Komitəsinin qərarına əsasən, “Araz-Naxçıvan”da daxil olmaqla, 5 oyunda oyunu tamaşaçı kimi seyr edəcək.
“Araz-Naxçıvan”a gəlincə, “MOİK” üzərində qələbədən sonra Əsgər Abdullayevin yetirmələri bu matça da ciddi hazır­laşırlar. Gündə iki dəfə məşq prosesi keçməklə 11-ci turun hazırlıqlarını davam etdirən muxtar respublika klubunun heyətində zədəli futbolçu yoxdur. Ötən tur sarı vərəqə ilə cəzalandırılan Elgün Abbaslı cari mövsümdə 4-cü dəfə hakimlərin qəzəbinə tuş gəlib və “Şuşa” ilə matçdan öncə cəzalı vəziyyətə düşüb.
Qeyd edək ki, Naxçıvan Muxtar Respublika Stadionunda keçiriləcək oyunun başlama vaxtı saat 15⁰⁰-dir.

Ceyhun MƏMMƏDOV

Rusiyanın Anapa şəhərində boks üzrə yeniyetmələr arasında Avropa birinciliyinə yekun vurulub, bu yarışda həmyerlimiz mükafata layiq yer tutub.
Bu barədə qəzetimizə Naxçıvan Muxtar Respublikası Gənclər və İdman Nazirliyinin mətbuat xidmətindən məlumat verilib. Məlumatda bildirilib ki, yeniyetmə idmançılar arasında keçirilən yarışda iştirak edən muxtar respublika idmançısı Tayfur Əliyevin döyüşləri yaddaqalan olub. 52 kq çəki dərəcəsində mübarizə aparan yeniyetmə idmançımız yarımfinala  Rumıniya və Macarıstandan olan rəqibləri üzərində qazandığı inamlı qələbə ilə vəsiqə alıb. Boksçumuz yarımfinalda İtaliya təmsilçisi Marko Amorozona qalib gələrək həlledici mərhələyə vəsiqə əldə edib. Finalda isə  həmyerlimiz Rusiya idmançısı ilə qarşılaşıb. Həlledici döyüşdə qələbəni əldən verən idmançımız ikinci yerə layiq görülüb. Mükafata layiq yeri tutmuş boksçumuza diplom, medal və qiymətli hədiyyələr təqdim edilib.

Xəbərlər şöbəsi

“Sədərək” komandası yarışın qalibi olub

Muxtar respublika gömrük orqanları arasında keçirilən futzal turnirinə yekun vurulub. Naxçıvan şəhərindəki İlham Əliyev adına Olimpiya İdman Kompleksində keçirilən yarışda  6 komanda mübarizə aparıb.
Turnir üç turdan ibarət olub. Oyunlar dairəvi sistem üzrə keçirilib. Əsasən, dörd komandanın çempionluq şansı yüksək qiymətləndirilsə də, bu şansı reallığa çevirən tərəf “Sədərək” olub. Birinci tur çərçivəsində oynanılan “Komitə”-“Sədərək” oyunu ümumi nəticə üçün həlledici olub.
Son oyun günündə üz-üzə gələn “Komitə” və “Şahtaxtı” komandalarının qarşılaşmasında ikinciliyin taleyinə aydınlıq gətirilib. Bu oyunda minimum bir xala ehtiyacı olan komitə təmsilçiləri 7:3 hesablı qələbə ilə xal ehtiyatını 12-ə çatdıraraq turnirin ikincisi olublar.

Noyabrın 16-dan 17-dək Ağsu rayonunda paralimpiya idman festivalı keçirilmişdir. Muxtar respublikamızın da paralimpiyaçılarının qatıldıqları festivaldan idmançılarımız medallarla qayıtmışlar. Belə ki, ağırlıqqaldırma üzrə mübarizə aparan təmsilçilərimizdən 65 kiloqram çəkidə Telman Şirinov, 88 kiloqram çəkidə isə Eldar Əliyev üçüncü yerlərə layiq görülmüşlər.

Naxçıvan Muxtar Respublikası
Gənclər və İdman Nazirliyinin mətbuat xidməti

Azərbaycan I divizionunun 10-cu turu da “Araz-Naxçıvan” futbol komandası üçün uğurlu oldu. Bundan əvvəlki oyunda doğma arenada “Bakılı”nı məğlubiyyətə uğradan muxtar respublika klubu bu dəfə paytaxtın digər bir təmsilçisi “MOİK”i də (Mərkəzi Ordu İdman Klubu) məğlub etməyi bacardı.

İki görüş

“Araz-Naxçıvan” hələ 2001/2002-ci illər mövsümündə “MOİK”lə 2 dəfə qarşılaşmış və birində qələbə qazanmış, digərində isə meydanı məğlub tərk etməli olmuşdu. Xüsusilə Bakıda keçirilən oyun qolların sayına görə yadda qalmışdı: 3:4.
“Araz-Naxçıvan”ın baş məşqçisi Əsgər Abdullayev yetirmələrini bu matç üçün xüsusi hazır­lamışdı. Düzdür, komandamız 11 il bundan öncə səfərdə məğlubiyyətlə üzləşmişdisə, “ev”də minimal hesabla qalib gəlməyi bacarmışdı. I divizionda öz dəst-xətti ilə seçilən “Araz-Naxçıvan” bu görüşdə də meydana 4-3-3 taktikası ilə çıxmışdı. Matçın taleyini elə ilk hissədə həll etmək istəyən Əsgər Abdullayev yetirmələrinə hücum xəttində aktiv olmalarını tapşırmışdı.

Noyabrın 16-da Naxçıvan şəhərindəki Şahmat Mərkəzində muxtar respublika üzrə şahmat birinciliyi keçirilmişdir. İki qrupda təşkil edilmiş yarışda 100-ə yaxın şahmatçı öz qüvvə və bacarığını sınamışdır. Doqquz turdan ibarət yarışda idmançılar İsveçrə sistemi ilə mübarizə aparmışlar. Birincilikdə oğlanlar arasında Aydın İsmayılov, Pərviz Qasımov, Siyavuş Bağırov, Sadiq Qarayev, Seyid Hüseyn, qızlar arasında isə Qəndab Cəfərli, Aynur Kətanova, Fatimə İsmayılova, Yeganə Əhmədova və Zərrin Məmmədova fəxri kürsünün ən yüksək pilləsinə qalxmışlar. Naxçıvan Muxtar Respublikası Gənclər və İdman Nazirliyi və Şahmat Federasiyasının təşkilatçılığı ilə keçirilən yarışda fəxri yerləri tutmuş şahmatçılara diplomlar verilmişdir. Eyni zamanda birinci yerləri tutmuş idmançılar ölkə üzrə seçmə yarışlarında iştirak etmək hüququnu əldə etmişlər.

Naxçıvan Muxtar Respublikası
Gənclər və İdman Nazirliyinin mətbuat xidməti

Cari mövsümdən Azərbaycan I divizionunda çıxışını təmin edən “Araz-Naxçıvan” futbol komandası uğurlu oyunlar seriyasını davam etdirməkdədir.
Qısa vaxtda Naxçıvan təmsilçisinin belə nəticəyə imza atması futbol ictimaiyyətinin diqqətini cəlb edib. Ölkə mətbuatında artıq muxtar respublika klubunun uğurlu çıxışı, çempionat oyunları və gələcək planları haqda silsilə yazılar dərc olunur. Təbii ki, komandamızın təqdirəlayiq çıxışında tərəfdar amilinin də rolu vardır. I divizion komandaları arasında fanat ordusu baxımından özünəməxsus yer tutan qırmızı-ağların “ev” oyunlarını ən az halda 3000 azarkeş izləyir. Bu göstərici isə hətta Azərbaycan Premyer Liqasında mübarizə aparan bəzi komandaların oyunlarına gələn fanat sayını geridə qoyur.

Dünən Azərbaycan I divizionunun 10-cu turuna start verilib. Bu turda “Araz-Naxçıvan” futbol komandası sabah “MOİK”-in qonağı olacaq. Qırmızı-ağlar artıq  bu gün Bakıya yola düşüblər və Əsgər Abdullayevin komandası oyunun keçiriləcəyi arenada son məşqinə çıxacaq. Muxtar respublika klubunun heyətində zədəli və cəzalı futbolçuların olmaması baş məşqçinin səfərə rahat yollanmasını təmin edib. 21 yaşlılardan ibarət Azərbaycan yığmasına çağırılan qapıçı Emil Balayev qırmızı-ağların düşərgəsinə Bakıda qatılacaq. “Bakılı” ilə görüşdə zədələnərək meydanı tərk edən Mikayıl Rəhimovun isə zədəsi tam sağalıb.
Qeyd edək ki, 10-cu tur çərçivəsində keçiriləcək “MOİK”-“Araz-Naxçıvan” matçı noyabrın 17-də “Bakı” futbol klubunun təlim-məşq bazasının stadionunda keçiriləcək. Saat 14⁰⁰-də başlayacaq görüşün baş hakimi, FİFA dərəcəli referi Anar Salmanovdur. Ona bu görüşdə Elşən Acalov və Azad Hüseynov köməklik edəcəklər. Oyunda dördüncü hakim funksiyasını isə Fuad Rəsulzadə yerinə yetirəcək. Hakimlərin oyunu necə idarə etmələrinə hakim-inspektor kimi Aydın Gözəlov qiymət verəcək.

Ceyhun MƏMMƏDOV

Noyabrın 12-dən etibarən Naxçıvan Muxtar Respublikası Ali   Məclisinin Sədri yanında Gənclər Fondu və Naxçıvan Muxtar Respublikası Gənclər və İdman Nazirliyinin təşkilatçılığı ilə gənclər arasında 10-17 noyabr – Beynəlxalq Tələbə-Gənc­lər Həftəsinə həsr olunmuş tədbirlərin keçirilməsinə başlanılıb.
Noyabrın 12-də İlham Əliyev adına Olimpiya İdman Kompleksində muxtar respublika ali və orta ixtisas təhsili müəssisələrinin tələbələri arasında badminton üzrə yarışa start verilib. 12 qız idmançının iştirak etdiyi turnirin açılış mərasimində Naxçıvan Muxtar Respublikası gənc­lər və idman nazirinin müavini Məcid Seyidov və Naxçıvan Dövlət Universitetinin tərbiyə işləri üzrə prorektoru, fəlsəfə elmləri doktoru, professor Məmməd Rzayev çıxış edərək ölkəmizdə, o cümlədən muxtar respublikamızda gənclərə göstərilən diqqət və qayğıdan danışıblar. Sonra badmintonçular öz qüvvələrini sınayıblar. Olimpiya sistemi ilə keçirilən yarış gərgin və maraqlı idman mübarizəsi şəraitində keçib.

Şərq Döyüşü Sənəti Federasiyasının zəhməti hədər getmir

Naxçıvan Muxtar Respublikası Şərq Döyüşü Sənəti Federasiyasının yetirmələri bu yaxınlarda respublika birinciliyindən qayıdıblar. Bu federasiyanın MMA növü üzrə 4 idmançı ilə paytaxta üz tutan həmyerlilərimizin hamısı mükafatçılar sırasına düşməyi bacarıb. Bu, 2002-ci ildən fəaliyyət göstərən federasiyanın ilk belə uğuru deyil.
Ümumilikdə, bu idman növünə gəlincə, hazırda MMA idman növü dünyada sürətlə inkişaf edir. Artıq Ümumdünya MMA Federasiyası təsis olunub və üzvlər qəbul edilib. Azərbaycan MMA liqası da federasiyaya üzv qəbul olunub. Ölkəmizdə idmana dövlət səviyyəsində dəstək göstərilir, digər idman növləriylə yanaşı, qarışıq döyüş növlərinin inkişaf etdirilməsi də diqqət mərkəzindədir. Dörd ildir ki, Azərbaycan nümayəndə heyəti Əlbəyaxa Döyüş Növləri üzrə Ümumdünya Assosiasiyası ilə əməkdaşlıq edir, azərbaycanlı idmançılar, bir qayda olaraq, təşkil edilən yarışlarda uğurla çıxış edirlər.

Azərbaycan I divizionunun IX turu çərçivəsində “Araz-Naxçıvan” futbol komandası noyabrın 9-da Bakının “Bakılı” futbol komandasını qəbul etdi. Turnir cədvəlinə başçılıq edən muxtar respublika komandası qələbə seriyasını bu oyunda da davam etdirdi. Qırmızı-ağlar paytaxt təmsilçisi önündə mükəmməl oyun sərgiləməklə 4:0 hesablı qələbəni bayram etməyi bacardılar. Bu, Əsgər Abdullayevin yetirmələrinin cari mövsümdə ikinci belə böyükhesablı qələbəsidir.

Tanış rəqib

“Bakılı” Naxçıvan təmsilçisi üçün heç də yad komanda deyil. Belə ki, paytaxt klubu hələ komandamız əsas liqada oynayarkən bizə rəqib olmuş və bu arenadan “ev”ə əliboş qayıtmışdı. Bu görüşə kimi 4 dəfə “Araz-Naxçıvan”la qarşılaşan “Bakılı” bir dəfə belə olsun, 3 xal sevinci yaşamayıb. Qırmızı-ağlar paytaxt təmsilçiləri ilə 2001-2002-ci illər mövsümündə keçirdiyi hər iki matçdan qələbə ilə ayrılıblar – 2:0, 4:2.

Naxçıvan Muxtar Respublikası Gənclər və İdman Nazirliyi və muxtar respublika Güləş Federasiyasının tədbirlər planına uyğun olaraq, Naxçıvan Şəhər  Gənclər və İdman İdarəsi və İslam Hümbətov adına Uşaq-Gənclər İdman Məktəbinin təşkilatçılığı ilə cüdo üzrə şəhər birinciliyi keçirilib. Naxçıvan şəhərindəki İlham Əliyev adına Olimpiya İdman Kompleksində keçirilən yarışda iki yaş qrupunda 80-ə yaxın idmançı mübarizə aparıb. Qalib idmançılar diplomlarla təltif ediliblər.

Naxçıvan Muxtar Respublikası Karate-do Federasiyası və Naxçıvan Şəhər Gənclər və İdman İdarəsinin təşkilatçılığı ilə 12 Noyabr – Konstitusiya Gününə həsr olunmuş karate-do üzrə Naxçıvan şəhər açıq birinciliyi keçirilib. Naxçıvan şəhərindəki İlham Əliyev adına Olimpiya İdman Kompleksində baş tutan yarışın açılış mərasimində Naxçıvan Muxtar Respublikası Karate-do Federasiyasının sədr müavini Nəriman Quliyev, Naxçıvan Muxtar Respublikası Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov, Naxçıvan Şəhər Gənclər və İdman İdarəsinin rəisi Xəyal Qurbanov çıxış edərək idmançılara uğurlar arzulayıblar. Karate-donun şotokan və kontak karate növləri üzrə keçirilən birincilikdə 150 idmançı mübarizə aparıb. 6 yaş qrupunda şotokan növü üzrə keçirilən yarışlarda Salman Hüseynov, Həsən Həsənzadə, Əkrəm Nəcəfov, Mirpaşa Kərimov, Xəzər Əliyev və Cavid Seyidov fəxri kürsünün ən yüksək pilləsinə qalxıblar. Kontak növü üzrə 5 yaş qrupunda mübarizə aparan idmançılar arasında isə Tayfun İsmayılov, Eltun Əsgərov, Mikayıl Cəfərov, Rəşad Hüseynli və Fərid Cəfərov qalib adına layiq görülüblər. Fəxri yerləri tutan idmançılara yarışın təşkilatçıları tərəfindən diplomlar verilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Şənbə günü Azərbaycan I divizionunun IX turu çərçivəsində “Araz-Naxçıvan” futbol komandası “Bakılı” futbol komandasını qəbul edəcək. Hazırda turnir cədvəlinə başçılıq edən muxtar respublika klubu bu görüşə ciddi hazırlaşır. Ötən tur səfərdə “Şahdağ”ı məğlubiyyətə uğradan qırmızı-ağlar “ev”də qələbə seriyasını davam etdirmək niyyətindədirlər.
“Ev” oyunlarında daim hücum futbolu  oynadan Əsgər Abdullayevin yenə eyni taktikanı seçəcəyi güman edilir. 4-3-3 sxeminin uğurlu alınması qırmızı-ağların qol arayışında daha aktiv olmalarına zəmin yaradır. Oyunun hazırlıqlarını davam etdirən “Araz-Naxçıvan”ın heyətində zədəli və ya cəzalı futbolçu yoxdur. Sadəcə, yarımmüdafiəçi Akif Tağıyevin sağ ayağında elə də ciddi olmayan zədə Əsgər Abdullayevi düşündürür. Həkim nəzarətində məşqlərə davam edən A.Tağıyevin “Bakılı”  ilə matçda meydana çıxacağı gözlənilir.
Qeyd edək ki, noyabrın 9-da Naxçıvan Muxtar Respublika Stadionunda keçiriləcək “Araz-Naxçıvan”-“Bakılı” qarşılaşması saat 15⁰⁰-də başlayacaq.

Ceyhun MƏMMƏDOV

Muxtar respublika gömrük orqanları arasında növbəti futzal turnirinə start verilib. İlham Əliyev adına Olimpiya İdman Kompleksində keçirilən yarışda qalib adı uğrunda 6 gömrük orqanının komandası mübarizəyə qatılıb. Dairəvi sistem üzrə keçirilən oyunlarda nizam-intizamı qorumaq Naxçıvan Muxtar Respublikası Futbol Federasiyasının hakimlərinə həvalə olunub.
Turnirin açılış mərasimində çıxış edən Naxçıvan Muxtar Respublikası Dövlət Gömrük Komitəsi sədrinin müavini, gömrük xidməti general-mayoru Səhət Həbibbəyli gömrükçülər arasında idmanı təbliğ etmək, onların fiziki sağlamlığının qayğısına qalmaq məqsədilə keçirilən yarışların gömrük əməkdaşları arasında qarşılıqlı münasibətlərin inkişafına  müsbət təsir göstərdiyini, onlarda qələbəyə inam, mübarizlik hisslərini artırdığını önə çəkib.

Azərbaycan I divizionunun 8-ci turu çərçivəsində “Araz-Naxçıvan” futbol komandası Qusar səfərinə yollanmışdı. Yerli “Şahdağ”ın qonağı olan muxtar respublika təmsilçisi bu görüşdən sonra aktivinə daha 3 xal yazdırmağı bacardı. Turun mərkəzi görüşü kimi hesab edilən oyunda qırmızı-ağlar iki dəfə rəqibi mərkəzə dəvət etməklə liderliklərini qorumuş oldular. Məlumat üçün bildirək ki, “Şahdağ”la oyun müstəqil çempionatlarımız tarixində muxtar respublika klubunun 50-ci çempionat oyunu kimi də yaddaşlara həkk olundu.

Qusar səfərindən öncə I divizionun liderlər cərgəsində yer alan komandalar “Araz-Naxçıvan”ın bu turda xal itirəcəyini güman edirdilər. Çünki qusarlılar doğma arenada istənilən rəqibi büdrətməyə layiq futbol oynayırlar. Təbii ki, onların bu cür təsir bağışlamasında stadion amili də mühüm rol oynayır. Ot örtüyünün bərbad vəziyyətdə olduğu arenada komandaların baxımlı oyun sərgiləməsi müşkül məsələyə çevrilib. “Araz-Naxçıvan” futbol komandasının baş məşqçisi Əsgər Abdullayev də “Şahdağ”la oyuna məhz bu aspektdən yanaşmışdı.

Dünən Naxçıvan Muxtar Respublikası Gənclər və İdman Nazirliyi, Naxçıvan Muxtar Respublikası Yüngül Atletika Federasiyasının birgə təşkilatçılığı ilə “Zərərli vərdişlərə “yox” deyək, həmişə sağlam olaq” devizi altında müvafiq məsafələrə qaçış üzrə Naxçıvan Muxtar Respublika birinciliyi keçirilib. Azərbaycan Atletika Federasiyasının nümayəndələrinin də iştirak etdiyi birincilikdə Şərur, Babək, Culfa, Ordubad, Kəngərli, Şahbuz, Sədərək və Naxçıvan şəhər komandaları iştirak ediblər. Yarışın əsasnaməsinə görə, hər komandanın heyətində 10 idmançı olub. 40 nəfər oğlan və 40 nəfər qız olmaqla, ümumilikdə, 80 atletin qatıldığı yarış məsafələrə görə müxtəlif olub. Belə ki, oğlanlar 100, 200, 400, 1000 və 1500 metr, qızlar isə 100, 200, 400 və 1000 metr məsafələrə qaçmaqla öz güclərini nümayiş etdiriblər. Bu yarışın keçirilməsində əsas məqsəd məktəblilərin bu sahəyə cəlbinə nail olmaq və qarşıdakı illərdə uğur qazanan idmançıları milli komandanın tərkibinə daxil etməkdən  ibarətdir.

Dünən Yüngül Atletika Federasiyasında seminar keçirilib. Regionlarda atletikanın inkişaf proqramı əsasında təşkil edilən seminarı giriş sözü ilə federasiyanın sədr müavini İntiqam Rəhimov açıb. O, çıxışında son zamanlar Naxçıvan Muxtar Respublikasında bu idman növünün geniş yayıldığını, gənclərin bu sahəyə daha çox maraq göstərdiyini bildirib.
Sonra Azərbaycan Atletika Federasiyasından Naxçıvana gəlmiş məşqçi-müəllimlər, beynəlxalq dərəcəli lektorlar və respublika dərəcəli hakimlər Aqil Paşayev və Ceyhun Hüseynov çıxış ediblər. Hər iki lektor çıxışı zamanı əvvəlcə seminarın mövzuları barədə danışıblar.
Çıxışlardan sonra atletika idman növündən bəhs edən maraqlı hadisələr barədə videorolik təqdim olunub.
Atletika, yarış və məşqçilərin etik qaydaları mövzularına həsr olunan seminarın əsas məqsədi Naxçıvanda bu idman növünü daha da inkişaf etdirmək, yeniyetmələrin bu sahəyə cəlb olunması istiqamətində görüləcək işlərin müzakirəsindən ibarət olub. Qonaqların Naxçıvanda olduqları müddətdə əsas hədəfləri muxtar respublikada uğur qazanan idmançıları, istedadlı gəncləri milli komandaya dəvət etmək olacaq.
Məlumat üçün qeyd edək ki, Azərbaycan Atletika Federasiyası istedadlı gənclərin üzə çıxarılması məqsədilə 2012-2016-cı illər arasında ölkənin bütün regionlarında seminarlar və yarışlar təşkil edəcəkdir.

Ceyhun MƏMMƏDOV

Azərbaycan kubokuna 1/16 final mərhələsindən başlayan “Araz-Naxçıvan” futbol komandası doğma azarkeşləri önündə daha bir qələbəyə imza atdı. Bu mərhələdə Ağsunun eyniadlı komandasını qəbul edən qırmızı-ağlar çətin keçən matçda azarkeşlərini sevindirməyə müvəffəq oldular. Minimal hesablı qələbə muxtar respublika təmsilçisini 1/8 finala yüksəltdi. Dekabrda keçiriləcək bu mərhələnin oyununda “Araz-Naxçıvan” Zaqatalanın “Simurq” komandasını qəbul edəcək.

Hücum futbolu və nəticəsi

Ötən mövsüm I divizionun qalibi olmuş “Ağsu”nun bu mərhələdə komandamızın qarşısına çıxması oyunun gərgin və çətin keçəcəyindən xəbər verirdi. Odur ki, “Araz-Naxçıvan”ın baş məşqçisi Əsgər Abdullayevin bu görüşdə daha çox hücum oyununa üstünlük verəcəyi gözlənilən idi. Heç vaxt qarşılaşmadığımız bir rəqibə qarşı belə taktika seçmək, sözsüz ki, təhlükəlidir. Di gəl ki, işinin öhdəsindən layiqincə gələn baş məşqçi meydana 4-3-3 taktikası ilə çıxdı.

Azərbaycan I divizionunda uğurlu çıxışını davam etdirən “Araz-Naxçıvan” futbol komandası 8-ci tur çərçivəsində noyabrın 3-ü Qusarda “Şahdağ”ın qonağı olacaq. Uzun illərdir, Azərbaycan futbolunda öz dəst-xətti ilə seçilən şimal klubu hazırda çempionatın ən çətin səfər komandası kimi qələmə verilir. Doğma azarkeşi önündə daha inamlı təsir bağışlayan qusarlılar cari mövsümdə uğursuz çıxışları ilə yadda qalıblar. Aktivindəki xalların çoxunu “ev”də qazanan “Şahdağ” hazırda 8 xalla turnir cədvəlində 12-ci pillədə qərarlaşıb.
“Şahdağ” qırmızı-ağlar üçün yad komanda deyil. Belə ki, “Araz-Naxçıvan” çempionatda çıxış etdiyi dönəmlərdə Qusar təmsilçisi ilə 4 dəfə üz-üzə gəlib. 2000/2001-ci il mövsümündə muxtar respublika klubu qusarlı həmkarları ilə iki dəfə qarşılaşıb. Səfərdə rəqibini 1:0 hesabı ilə məğlub edən “Araz-Naxçıvan” doğma arenada da qələbəni bayram edib – 3:0. 2001/2002-ci il mövsümü də qırmızı-ağlar üçün uğurlu olub. Belə ki, 8-ci pillədə başa vurduğumuz çempionatda “Şahdağ”la keçirilən oyunlarda “sülh” qeydə alınıb – 2:2, 1:1.
Hazırda turnir cədvəlinə başçılıq edən “Araz-Naxçıvan” əgər bu görüşdən 3 xalla ayrılarsa, o zaman çempionatın ilk dövrəsini lider kimi başa vurmaq ehtimalı artacaq.
Şövkət Orduxanov adına Qusar Şəhər Stadionunda keçiriləcək matç 8-ci turun mərkəzi görüşü hesab olunur.

Xəbərlər şöbəsi