Məqsədlərinə çatmaq üçün dayanmadan məşq edən, bunun bəhrəsini dəfələrlə görən, Naxçıvan Muxtar Respublikasının fəxri, həmçinin ölkənin sağlam gələcəyinə nümunə ola biləcək boksçu – Tayfur Əliyev. Onun haqqında kifayət qədər danışmaq, yazmaq mümkündür. Lakin bu dəfə Tayfur Əliyevə suallar ünvanladıq, danışan isə o oldu.

– Azərbaycanın idman ictimaiyyəti Tayfur Əliyevi “Bakı-2015” birinci Avropa Oyunlarından sonra daha çox tanımağa başladı. Buna kimi qazandığın uğurlar barədə oxuculara məlumat verməyi xahiş edirik.
– İlk dəfə 2009-cu ildə yeniyetmələr arasında Azərbaycan çempionatına qatıldım və gümüş medal qazandım. Bir il sonra eyni yarışda istəyimə çataraq qızıl medal əldə etdim. Uğurumun davam edəcəyini bilirdim və Avropa çempionatına vəsiqəni təmin etdim. 2011-ci ildə Qroznıda keçirilən boks üzrə yarışda yeniyetmələr arasında Avropa çempionu, 2013-cü ildə isə gənclər arasında Anapada keçirilən Avropa birinciliyində ikinci oldum. Hər il keçirilən “Prezident Kuboku”nu qazandım, bir il sonra bu turnirin ən yaxşı boksçusu adına sahib oldum. Bu il ilk dəfə kişilər arasında Azərbaycan çempionatına qatıldım və qalib oldum. Boksla məşğul olduğum dövr ərzində yeniyetmə və gənclər arasında 6, kişilər arasında isə bir dəfə Azərbaycan çempionu olmuşam. Son çempionluğum isə mənə Avropa Oyunlarında iştirak etmək hüququ qazandırdı.

Naxçıvan Dövlət Universitetində birinci Avropa Oyunlarının bürünc mükafatçısı, həmin ali məktəbin Bədən tərbiyəsi və idman ixtisası üzrə I kurs tələbəsi, gənc boksçu Tayfur Əliyevlə görüş keçirilib.
Görüşdə universitetin rektoru, AMEA-nın müxbir üzvü Saleh Məhərrəmov bildirib ki, Azərbaycan Respublikasının Prezidenti cənab İlham Əliyevin 2015-ci il 29 iyun tarixli Sərəncamı ilə gənc boksçu Tayfur Əliyevin “Tərəqqi” medalı ilə təltif olunması, eyni zamanda Naxçıvan Muxtar Respublikası Ali Məclisinin Sədri cənab Vasif Talıbovun birinci Avropa Oyunlarındakı nailiyyətlərinə görə Tayfur Əliyevə “Naxçıvan Muxtar Respublikasının 85 illiyi” yubiley qızıl medalını təqdim etməsi ölkədə idmanın inkişafına və gənclərə göstərilən böyük diqqət və qayğının bariz ifadəsidir. Rektor gənc yaşında qazandığı bütün bu yüksək nailiyyətlərə görə rəhbərlik etdiyi ali təhsil ocağının çoxsaylı kollektivi adından Tayfur Əliyevi təbrik edib.
Universitetin müəllimi, boks üzrə idman ustası, birinci Avropa Oyunlarının bürünc mükafatçısı Tayfur Əliyevin ali təhsil ocağındakı ixtisas müəllimi Valeh Əlixanov 4 yaşından boksla məşğul olan gənc boksçunun bu günə qədər qazandığı idman uğurlarına nəzər salıb, keçirdiyi yarışlar haqqında məlumat verib. Bildirilib ki, Tayfur Əliyev “Bakı-2015” ilk Avropa Oyunlarında boks yığmamızın heyətində kişilər arasında 56 kiloqram çəki dərəcəsində mübarizə aparıb. Birinci Avropa Oyunlarının bürünc mükafatçısı, tələbə Tayfur Əliyev 2015-ci ilin oktyabr ayında Qətər Əmirliyində keçiriləcək dünya çempionatında iştirak edəcək.

23 iyun-3 iyul tarixlərində Türkiyənin Konya şəhərində şahmat üzrə məktəblilər arasında Avropa çempionatı keçirilib.
Qitə birinciliyində muxtar respublikanı Aynur Kətanova, Sadiq Məmmədov və Pərviz Qasımov təmsil ediblər. Ən uğurlu nəticəni isə 15 yaş qrupunda çıxış edən Pərviz Qasımov qazanıb. O, bu yaş qrupunda olan 52 şahmatçı arasında ikinci yerə çıxıb. 9 turdan ibarət olan Avropa çempionatında FİDE ustamız 6,5 xal toplayıb və liderdən yarım xal geri qalıb. Qazandığı bu uğurdan sonra Pərviz Qasımov Xorvatiyanın Porets şəhərində keçiriləcək Avropa çempionatına, həmçinin gələn il Tunisdə təşkil olunacaq şahmat üzrə məktəblilər arasında dünya çempionatına vəsiqəni təmin edib.
Konyada keçirilən Avropa çempionatının ikincisi olan idmançımıza təşkilatçılar tərəfindən diplom və medal təqdim olunub. Onu da qeyd edək ki, şahmat üzrə məktəblilər arasında keçirilən qitə birinciliyində beynəlxalq hakim Emin Hacıyev də ədalət təmsilçisi kimi iştirak edib.
Qəzetimizə açıqlamasında Avropa çempionatının gümüş mükafatçısı dedi: “Məqsədim qarşıdakı turnirlərə daha ciddi hazırlaşmaq və Naxçıvana uğurlarla qayıtmaqdır. Təbii ki, Konyada qazandığım uğurun arxasında daimi məşqlərlə yanaşı, göstərilən diqqət və qayğının da böyük rolu var”.

 Ceyhun Məmmədov

Ordubad rayonunda 15 İyun – Milli Qurtuluş Gününə həsr olunmuş 15 iyun-6 iyul 2015-ci il tarixləri arası keçirilən mini-futbol yarışı başa çatmışdır.
Final görüşünə kimi 10 komanda dairəvi üsulla oyunlar keçirmiş və 4 komanda yarımfinal mərhələsinə vəsiqə qazanmışdır. Ordubad rayon birinciliyinin həlledici qarşılaşmasında Ordubad Rayon Gənclər və İdman İdarəsinin “Gənclər birliyi” komandası ilə Ordubad şəhərinin “Qapıcıq” komandası üz-üzə gəlmişlər. “Qapıcıq” komandası 4:2 hesabı ilə qalib gəlmiş və birinci yerə layiq görülmüşdür.
Qalib komanda kubok, diplom və qiymətli hədiyyələrlə mükafatlandırılmışdır.

Naxçıvan Muxtar Respublikası
Gənclər və İdman Nazirliyinin mətbuat xidməti

Dünən Naxçıvan Muxtar Respublikası Gənclər və İdman Nazirliyinin tədbirlər planına əsasən, Yeni Azərbaycan Partiyası Babək Rayon Təşkilatının Heydər Əliyev adına Gənclər Birliyi və Babək Rayon Gənclər və İdman İdarəsinin təşkilatçılığı ilə bir qrup gəncin Naxçıvan şəhərindəki Cəmşid Naxçıvanskinin ev-muzeyinə və Xatirə Muzeyinə ekskursiyası təşkil edilib. Gənclərə hər iki muzeydə olan eksponatlar və hərb tariximiz barədə ətraflı məlumat verilib. Bu kimi tədbirlərin gənc nəslin vətənpərvərlik tərbiyəsinin düzgün formalaşdırılmasında, hərb tariximizin öyrənilməsində müstəsna əhəmiyyət kəsb etdiyi nəzərə alınaraq gələcəkdə də keçirilməsi davam etdiriləcək.

Naxçıvan Muxtar Respublikası
Gənclər və İdman Nazirliyinin mətbuat xidməti

İlk dəfə olaraq Azərbaycanda təşkil olunan birinci Avropa Oyunlarına yekun vurulub. “Bakı-2015” ilk Avropa Oyunları istər təşkilatçılıq, istərsə də idmançılarımızın uğurlu çıxışı baxımından bir daha sübut etdi ki, Azərbaycan artıq dünyada bir idman ölkəsi kimi sözünü deməkdədir.
İlk Avropa Oyunları eyni zamanda Naxçıvan Muxtar Respublikası üçün də yaddaqalan oldu. Belə ki, bu mötəbər idman tədbirində çıxış edən boksçumuz Tayfur Əliyev bürünc medal qazanmaqla adını tarixə yazdırdı. Ötən gün Tayfur Naxçıvana qayıdıb. Avropa Oyunlarının bürünc mükafatçısı Naxçıvan Beynəlxalq Hava Limanında idman ictimaiyyəti, kütləvi informasiya vasitələri nümayəndələri və azarkeşlər tərəfindən böyük coşqu ilə qarşılanıb.
Sonra Tayfur Əliyev Naxçıvan Üzgüçülük Mərkəzində kütləvi informasiya vasitələri nümayəndələrinin suallarını cavablandırıb. Mətbuat konfransından öncə çıxış edən Naxçıvan Muxtar Respublikası Gənclər və İdman naziri Azad Cabbarov boksçumuzu qazandığı böyük nailiyyətə görə təbrik edib və bu uğuru son illər muxtar respublikada idmana göstərilən qayğının nəticəsi kimi dəyərləndirib. Gənclər və İdman naziri “Bakı-2015” ilk Avropa Oyunlarında bürünc medal qazanmış boksçumuza hədiyyə təqdim edib.

Naxçıvan Muxtar Respublikası Gənclər və İdman Nazirliyi və Səhiyyə Nazirliyinin tədbirlər planına əsasən, Naxçıvan şəhərindəki idman zallarında dezinfeksiya işləri aparılıb. Bu tədbir ilk olaraq İlham Əliyev adına Olimpiya-İdman Kompleksi, Naxçıvan Muxtar Respublika Stadionu, Naxçıvan Şəhər Üzgüçülük Mərkəzi və Naxçıvan Şəhər Uşaq-gənclər idman məktəbinin idman zallarında həyata keçirilib.
Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov bizimlə söhbətində bildirdi ki, bu cür tədbirlər mütəmadi olaraq həyata keçirilir. Naxçıvan şəhərində və muxtar respublikanın rayonlarında müxtəlif idman zalları fəaliyyət göstərir. Biz Səhiyyə Nazirliyi və rayonların Gigiyena və Epidemiologiya mərkəzləri ilə birgə tez-tez dərmanlama işləri aparırıq. Məqsəd isə idmançılarımızı yoluxucu xəstə­liklərdən qorumaq və onların daha təmiz idman zallarında məşqlər etməsini təmin etməkdir.
Dezinfeksiya işləri ötən gün Şərur rayonunda da aparılıb. Belə ki, rayon Gənclər və İdman İdarəsi ilə Gigiyena və Epidemiologiya Mərkəzinin birgə həyata keçirdiyi dezinfeksiya işləri ilk olaraq Şərur Rayon Olimpiya-İdman Kompleksində aparılıb. Daha sonra Gənclər və İdman Nazirliyinin balansında olan idman zallarında dezinfeksiya işləri həyata keçirilib.

 Ceyhun Məmmədov

İlham Əliyev adına Olimpiya-İdman Kompleksinin Üzgüçülük Mərkəzində məktəblilərin yay tətilinin səmərəli təşkili məqsədilə yeniyetmə və gənclər arasında üzgüçülük üzrə Naxçıvan şəhər birinciliyi keçirilmişdir. İlham Əliyev adına Olimpiya-İdman Kompleksinin direktoru Ramin Talıbov tədbiri açıq elan etmiş və Azərbaycan Respublikasının Dövlət Himni səsləndirilmişdir.
İlham Əliyev adına Olimpiya-İdman Kompleksinin və Naxçıvan Şəhər Gənclər və İdman İdarəsinin birgə təşkilatçılığı ilə keçirilən yarışda 5 yaş qrupunda 50 idmançı iştirak etmişdir. Yarışda 1998-1999-cu illər təvəllüdlü idmançılar arasında Şahin Qubadov, 2000-ci il təvəllüdlü idmançılar arasında İsmayıl Haqverdiyev, 2001-ci il təvəllüdlü idmançılar arasında Alı Əmrahov, 2002-ci il təvəllüdlü idmançılar arasında Həsən Abbasov, 2003-2005-ci illər təvəllüdlü idmançılar arasında isə Əsgər Məmmədov həmyaşıdları arasında birinci yerə layiq görülmüşlər.
Sonda hər yaş qrupunda I, II və III yerləri tutan idmançılara təşkilatçıların diplom və fəxri fərmanları təqdim olunmuşdur.

Naxçıvan Muxtar Respublikası
Gənclər və İdman Nazirliyinin mətbuat xidməti

İdman meydanlarını səhnələrə bənzədənlər az deyil. İdmançıları, adətən, səhnədə yaradıcı iş görən insanlar kimi də qiymətləndirirlər. Sənətkarlar və idmançılar: fərqli deyimlər olsa belə, bunları birləşdirən bir dəyər var – uğurlu sonluq. Lakin sənət adamlarından fərqli olaraq idmançılar yaradıcılıqlarında əks maneələrlə üzləşirlər. Yəni hər hansı idman növü ilə məşğul olan kəslər qarşı tərəfin böyük gücü qarşısında tab gətirmək və uğur qazanmaq üçün fiziki güclə yanaşı, psixoloji vəziyyətə də hazır olmalıdırlar.

Dəyişilməz üçlü vəhdət

Psixoloji hazırlıq, psixoloji tərəfdən məsələyə yanaşmaq və yaxud psixoloji durumun tənzimlənməsi – bu amillər idmanda əsas şərtlərdəndir. Düzdür, digər nüanslar da idmanda rol oynayır, lakin idmançının yüksək səviyyədə psixoloji hazırlığı onu qələbəyə aparır. İnsan psixologiyası hər şeyə qadirdir. Psixoloji durumu hər zaman sabit saxlamaq üçünsə insan ağlı mühüm rol oynayır. Yəni insan normal düşünmək, normal addım atmaq və hadisəni normal tərzdə analiz etmək üçün ağlından istifadə etməlidir. Hələ qədim dövrlərdən başlayaraq alimlər insanın ağlının, cisminin və ruhunun vəhdətinin vacibliyini qeyd etmişlər və bu üçlü vəhdətin qeyri-adi imkanlara malik olmasını sübut etmişlər.

Ötən ayın son günlərində Rusiyanın Novorossiysk şəhərində Budo K-1 növü üzrə dünya kuboku uğrunda qitələrarası döyüş turnirinin Avropa-Asiya mərhələsinin döyüşləri keçirilib. “Qara dəniz kuboku-2015” adlanan turnirdə ölkəmizin şərəfini 7 idmançı qoruyub. Bu idmançıların üçü Naxçıvan Muxtar Respublikasının kikboksinqçiləri olub. 20-dən çox ölkə idmançısının mübarizə apardığı turnirdə hər üç idmançımız fəxri kürsüyə yüksəlməyi bacarıb. Belə ki, Naxçıvan Muxtar Respublikası Şərq Döyüşü Sənəti Federasiyasının idmançılarından Ruslan Musayev qızıl, Samiq Seyidzadə gümüş, Nail Hüseynov isə bürünc medal qazanıblar.
Sonda idmançılarımıza təşkilatçılar tərəfindən diplom, kubok, medal və hədiyyələr təqdim olunub.

Ceyhun Məmmədov

Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi basketbol üzrə muxtar respublika çempionatında 7-ci turun oyunları keçirilib.
“Naxçıvan” komandası bu tura kimi xal itkisi yaşamayan “Ordubad” komandasını qəbul edib.

Dünən Naxçıvan şəhərindəki İlham Əliyev adına Olimpiya- İdman Kompleksində 26 İyun – Silahlı Qüvvələr Günü münasibətilə yeniyetmələr arasında karate-do üzrə Naxçıvan şəhər birinciliyi keçirilib.
Naxçıvan Şəhər Gənclər və İdman İdarəsinin rəisi Xəyal Qurbanov yarışın açılış mərasimində çıxış edərək Azərbaycan Silahlı Qüvvələrinin yaranma tarixindən, inkişafından, ordu quruculuğunda, Silahlı Qüvvələrin təkmilləşdirilməsi və maddi-texniki bazasının gücləndirilməsində ulu öndər Heydər Əliyevin misilsiz xidmətlərindən söhbət açıb.
Vurğulayıb ki, ümummilli lider Heydər Əliyevin 1998-ci il mayın 22-də imzaladığı Fərmanla 26 iyun Azərbaycan Respublikasının Silahlı Qüvvələri Günü elan edilib. Bu tarixin Silahlı Qüvvələr Günü elan edilməsi milli ordu quruculuğunda varislik ənənələrinin bərpası və tarixilik baxımından böyük əhəmiyyətə malikdir.

Avropa məkanına inteqrasiya etməklə ümumavropa xəzinəsinə özünün əvəzsiz töhfələrini verən Azərbaycan “Bakı-2015” birinci Avropa Oyunlarını keçirməklə qitə miqyasında Azərbaycan standartlarını yaradır.
Birinci Avropa Oyunları təkcə adıçəkilən qitənin deyil, bütün dünyanın idman tarixində mühüm bir hadisədir. Müstəqilliyinin 24-cü ilini yaşayan Azərbaycan Respublikası bu oyunları yüksək səviyyədə təşkil etməklə Avropa ölkə­lərinə də nümunə göstərmiş oldu. Bundan sonra yüz il keçsə də, bütün Avropa, dünya bu həqiqəti etiraf edəcək, gələcəkdə Avropa Oyunlarının hər açılış mərasimində bu oyunların ilk keçirildiyi məkan kimi Odlar yurdu Azərbaycanın adı çəkiləcəkdir.
Bu gün ölkəmizdə bütün istiqamətlərdə olduğu kimi, idman sahəsində də tarixi uğurlar qazanılır. Təsadüfi deyil ki, respublikamız birinci Avropa Oyunlarında həm də qızıl medal qazanan idmançıların sayına görə seçilir. Azərbaycan idmançıları bu günədək keçirilən yarışlarda 14 qızıl, 7 gümüş və 14 bürünc medal qazanmaqla ön sıralarda yer alırlar. Bu, ölkəmizdə idmana göstərilən dövlət qayğısının nəticəsidir. Hər an dövlətimizin qayğısını hiss edən idmançılarımız müxtəlif olimpiadalarda, dünya, qitə və regional əhəmiyyətli mühüm idman yarışlarında qazandıqları medalların sayını ilbəil artırırlar.

“Bakı-2015” ilk Avropa Oyunlarında boks yarışları davam edir. Dünən 6 çəkidə 1/8 mərhələsinin görüşləri keçirilib. Yığmamızın üzvü, Naxçıvan boksçusu Tayfur Əliyev 54 kiloqram çəkidə 1/8 finaldan mübarizəyə qoşulub. Onun rəqibi bundan öncəki mərhələdə ispaniyalı Dieqo Pereyra Ferrerini məğlub edən (3:0) Nikolae Andreiana olub. Tayfur Əliyev bu döyüşündə inamlı qələbə qazanıb. O, rəqibini məğlub etməkdə ciddi çətinlik çəkməyib – 3:0 (30:27; 29:28; 30:27). Tayfur Əliyev 1/4 finalda Fredrik Yensenlə (Danimarka) gücünü yoxlayacaq. Görüş iyunun 22-də olacaq.

 Ceyhun Məmmədov

Düzgün tərbiyə almış vətənpərvər gəncliyin yetişdirilməsi və sağlam milli şüurun formalaşması xalqın xoşbəxt gələcəyinin təminatı deməkdir. İnsanın istər maddi, istərsə də mənəvi baxımdan ideal formalaşması üçün, ilk növbədə, ona fiziki sağlamlıq lazımdır. Deməli, sağlam gələcəyin əsası idmandan başlayır. Məşqçi amili idmanda mühüm rol oynayır. Naxçıvan Muxtar Respublikasında idmana, idmançılara, həmçinin məşqçilərə göstərilən qayğı yüksək səviyyədədir. 

Milli idman növlərindən olan güləşin muxtar respublikada qədim ənənəsi var. Belə ki, dünənimizdən bizə miras qalan bu idman növü xüsusi qayğı ilə və bu günümüzə kimi yaşadılıb, öz potensialını itirməyib. Təbii ki, güləşin zəmanəmizə kimi gəlməsində əsas rolu onu təbliğ edən məşqçilər oynayıb. Bu məşqçilərdən biri də ömrünü güləşə həsr edən Kamaləddin İsmayılovdur.
Kamaləddin müəllimlə söhbətimizə güləşin onun həyatında hansı dəyişik­liklərə səbəb olduğu barədə başladıq: “Güləş mənim üçün bir idman növü olmaqla yanaşı, həm də böyük mirasdır, milli dəyərdir. Azərbaycanda bu növün qədim tarixi var. Biz gənc olarkən güləşin sirlərini öyrənməklə kifayətlənmirdik, eyni zamanda bu növün tarixi barədə məlumatlar əldə edirdik. 12 yaşımdan etibarən bu sahəni seçmişəm və heç vaxt da peşman olmamışam. Peşəkar karyeram ərzində dəfələrlə yeniyetmə, gənc və kişilər arasında Naxçıvan çempionu olmuşam. Həmçinin yeniyetmələr arasında “Azərbaycan çempionu” adını qazanmışam. Hərbi xidmətdə olduğum müddətdə yenə də bu idmanla məşğul olmuşam və Ukraynada hərbçilər arasında keçirilən birinciliyin qalibi olmuşam”.

Sərhəd Qoşunlarının yaradılmasının 96-cı ildönümünə həsr olunan və üç mərhələdə keçirilən hərbi-idman oyunlarında bu il ölkəmizin 28 sərhədyanı rayonunun 136 ümumtəhsil məktəbinin 680 şagirdi iştirak edib. İlk iki mərhələdə yarışların qalibi olmuş Ordubad şəhərindəki internat məktəbin, Füzulinin Horadiz şəhər 1 nömrəli, Cəlil­abadın Ləkin, Lənkəranın Haftoni, Qusarın Yuxarı Zeyxur, Qaxın Zəyəm, Qazağın Birinci Şıxlı kənd tam orta məktəblərinin ko­mandaları final mərhələsinə vəsiqə qazanıblar.

Culfa Rayon Uşaq-gənclər idman məktəbi 15 İyun – Milli Qurtuluş Gününə həsr edilmiş cüdo üzrə rayon birinciliyi keçirib. Birincilikdə 60-a yaxın idmançı olimpiya sistemində və 7 çəki dərəcəsində qüvvəsini sınayıb. Yekun nəticəyə görə, müxtəlif çəki dərəcələrində Məhəmməd Yaqublu, Cəlal Məmmədov, Asif Məmmədov, Emil Nəzərov, Əli Səfərəliyev, Səfər Məmmədov və Elsevər Məmmədov I yerə layiq görülüblər.
Qalib və fərqlənən idmançılara Culfa Rayon Gənclər və İdman İdarəsinin və rayon Uşaq-gənclər idman məktəbinin diplomları təqdim edilib.

Naxçıvan Muxtar Respublikası Gənclər
və İdman Nazirliyinin mətbuat xidməti

Şahbuz rayonunda 15 İyun – Milli Qurtuluş Günü ilə əlaqədar ümumtəhsil məktəblərinin şagirdləri arasında şahmat üzrə rayon birinciliyi keçirilib. 20 şahmatçı yarışda İsveçrə sistemi ilə 8 turda qüvvəsini sınayıb. Yarış başlamazdan əvvəl rayon Təhsil Şöbəsinin əməkdaşı Sahib Hüseynov, Gənclər və İdman İdarəsinin məsləhətçisi İdris Qəhrəman­ov çıxış edərək ümummilli liderin Azərbaycanda ikinci dəfə hakimiyyətə qayıdışından, ölkəmizin sürətli inkişafından söhbət açıb və iştirakçılara uğurlar arzulayıblar.
Yarışın nəticələrinə görə, birinci yerə Nuray Quluzadə, ikinci yerə Vüsal Cabbarov, üçüncü yerə isə Hüseyn Hüseynli layiq görülüblər. Qaliblərə təşkilatçılar tərəfindən diplomlar və hədiyyələr təqdim olunub.
Qeyd edək ki, yarış Şahbuz Rayon Gənclər və İdman İdarəsinin və Təhsil Şöbəsinin təşkilatçılığı ilə keçirilib.

Naxçıvan Muxtar Respublikası Gənclər və İdman Nazirliyinin
mətbuat xidməti

Babək rayon Nehrəm kənd 3 nömrəli tam orta məktəbdə Babək Rayon İcra Hakimiyyətinin, Gənclər və İdman İdarəsinin, Uşaq-gənclər idman məktəbinin və Naxçıvan Muxtar Respublikası Güləş Federasiyası Babək rayon bölməsinin təşkilatçılığı ilə Milli Qurtuluş Gününə həsr olunmuş sərbəst güləş üzrə rayon turniri keçirilib. Turnirdə 6 komandada 90-dan çox güləşçi mübarizə aparıb.
Babək Rayon Uşaq-gənclər idman məktəbinin direktoru Füzuli Salmanov, Gənclər və İdman İdarəsinin rəisi Nazim Salmanlı və Təhsil Şöbəsinin aparıcı məsləhətçisi Müslüm Vəliyev çıxış edərək ümummilli liderin həyat və fəaliyyətindən, muxtar respublikamızda idmana göstərilən diqqət və qayğıdan bəhs ediblər. Sonra yarışa start verilib.
Turnirin qalibi Nehrəm kəndinin komandası olub. İkinci yerə Zeynəddin, üçüncü yerə isə Şıxmahmud kəndlərinin komandaları layiq görülüblər.
Sonda qaliblərə təşkilatçılar tərəfindən diplomlar təqdim edilib.

Naxçıvan Muxtar Respublikası Gənclər və İdman Nazirliyinin
mətbuat xidməti

Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi basketbol üzrə muxtar respublika çempionatında 6-cı turun oyunları keçirilib.
“Naxçıvan” komandası bu dəfə doğma arenada şərurlu həmkarları ilə qarşılaşıb və meydanı böyükhesablı qələbə ilə tərk edib – 93:22. Turnir cədvəlinin digər lideri “Ordubad” komandası isə səfərdə Sədərək basketbolçularının qonağı olub. Daha üstün olan qonaqlar aktivlərinə 2 xal yazdırmağı bacarıblar – 39:100.

Naxçıvan Muxtar Respublikası Şərq Döyüşü Sənəti Federasiyasının yetirməsi İlkin Səfərov ötən həftə İtaliyada keçirilən uşu-sando üzrə dünya çempionatında çıxış edib. Həmyerlimiz bu yarışda bütün rəqiblərinə qalib gələrək dünya çempionu adına layiq görülüb.
Naxçıvan şəhərindəki Üzgüçülük Mərkəzində dünya çempionu ilə görüş keçirilib. Görüşü giriş sözü ilə açan Şərq Döyüşü Sənəti Federasiyasının sədr müavini Cavanşir Salayev muxtar respublikada idmanın inkişafına göstərilən diqqət və qayğıdan danışıb.
Azərbaycan MMA (Qarışıq Döyüş Növləri) Liqasının prezidenti Kənan Məmmədov, məşqçi Xamis Məmmədov çıxışlarında qeyd ediblər ki, muxtar respublika idmanı son illər özünün inkişaf mərhələsindədir və İlkin Səfərovun dünya çempionu olması məhz bunun nəticəsidir.

İdmançılarımız üçün yaradılan şərait nəticəsində son illər əldə edilən uğurlar, qazanılan nailiyyətlər bir-birini əvəzləməkdədir. Hər ay Gənclər və İdman Nazirliyi ilə muxtar respublikada fəaliyyət göstərən idman federasiyalarının təşkil etdikləri yarışlar və turnirlər yeniyetmə, gənc idmançıların püxtələşməsi ilə nəticələnir. Geridə qoyduğumuz may ayını idman ayı hesab etmək olar.

İlk dəfə Azərbaycanda keçiriləcək “Bakı-2015” Birinci Avropa Oyunlarının başlamasına az bir zaman qalıb. Artıq bu mötəbər idman tədbirində iştirak edəcək ölkələr mübarizə aparacaqları yığmalarının heyətlərini açıqlayıblar. Azərbaycanı Avropa Oyunlarında 291 idmançı təmsil edəcək ki, onlar arasında Naxçıvan idmançıları da var. İlk Avropa Oyunlarında ölkəmizin boks üzrə yığmasının heyətində 56 kiloqram çəki dərəcəsində rinqə Tayfur Əliyev çıxacaq. Onunla yanaşı, güləş yığmamızın heyətinə naxçıvanlı güləşçi Hacı Əliyev də dəvət olunub.
Boks üzrə yığmamızın heyətini müəyyənləşdirmək üçün son sparrinq görüşləri keçirilib. 56 kiloqram çəki dərəcəsində kişilər arasında son ölkə çempionu, Naxçıvan boksçusu Tayfur Əliyev rinqdə dünya çempionu Cavid Çələbiyevlə üz-üzə gəlib. Görüşü tam üstünlüklə başa vuran naxçıvanlı boksçu “Bakı-2015” Birinci Avropa Oyunlarında iştirakını təmin edib.
Bu görüşə kimi idmançımız boks üzrə kişilərdən ibarət Azərbaycan yığmasının heyətində İtaliya və Meksikada təlim-məşq toplanışında olub. Bu toplanış zamanı Tayfur Əliyev öz çəki dərəcəsində sparrinq görüşlərində italyan və meksikalı həmkarlarını məğlub etməklə diqqətləri öz üzərinə cəlb edib.
Qeyd edək ki, “Bakı-2015” Birinci Avropa Oyunlarında iştirak edəcək azərbaycanlı idmançılar iyun ayının 8-dən etibarən yeni tikilən atletlər kəndində toplaşacaqlar.

Xəbərlər şöbəsi

Yaxud biz niyə idman edirik?

 “İdman cəmiyyətin ayrılmaz hissəsidir”, “İdman sağlamlığın rəhnidir”, “İdman gənclərin gələcəyidir” kimi deyimlər artıq bütün dünyada şüara, devizə çevrilib. İdmanın siyasi aləmdə də rolunun böyük olduğunu nəzərə alsaq, o zaman bu sahəni müasir dövrümüzün öndə gedən sahəsi adlandıra bilərik. İdeal cəmiyyətin formalaşmasında müstəsna rol oynayan idmana başlamazdan öncə insan qarşısında iki yol olur: bu sahəyə hobbi kimi yanaşmaq, yaxud bu sahədə peşəkar olmaq. Təbii ki, hər iki amil özündə bir çox məqamları birləşdirir. Hobbi kimi idmanla məşğul olmaq, sadəcə, insanı müəyyən xəstəliklərdən qoruyur, onu gümrah, sağlam ruhda saxlayır. Peşəkar kimi bu sahəni seçmək isə təkcə insanın özünü yox, eyni zamanda cəmiyyəti maraqlandırır: onun uğuru ölkənin tanınmasında bilavasitə rol oynayır.

Hər kəs idman etməyi bacarır, lakin edilən idmanın mahiyyətini anlayan müasir cəmiyyətimizdə çoxluq təşkil etmir. Düzdür, Braziliyanın tanınmış klinikasının mütəxəssislərinin apardığı araşdırmadan sonra məlum olub ki, bu sahə ilə məşğul olanların cəmi 30 faizə qədəri 35 yaşdan yuxarıdır. Deməli, idman daha çox uşaq, yeniyetmə və gənclər arasında populyardır. Bəs bu təbəqənin insanları etdikləri idmanın mahiyyəti barədə nə bilirlər? Yenə aparılan tədqiqatlardan nəticə: 100 min uşaq, yeniyetmə və gəncin qatıldığı sorğudan sonra belə qənaətə gəlinib ki, hələ də dünyada idman sahəsində maarifləndirmə siyasəti düzgün aparılmır. Biz idmanı niyə sevirik? Bax müasir dövrün idman həyatında ən çox qarşılaşdığımız bu sual çoxları üçün qaranlıq qalmaqdadır. Əslində, bunun çox sadə cavabı var: maariflənmək.

Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi basketbol üzrə muxtar respublika çempionatında 5-ci turun oyunları keçirilib.
“Naxçıvan” komandası səfərdə culfalı həmkarları ilə qarşılaşıb və meydanı 76:42 hesablı qələbə ilə tərk edib. Onlar kimi “Ordubad” komandası da qələbə sevinci yaşayıb. Bu dəfə ordubadlı basketbolçular “Babək” komandası qarşısında çətin anlar yaşasalar da, sonda 2 xalı aktivlərinə yaza biliblər – 45:40. “Lokomotiv”-“Naxçıvan” Universiteti komandalarının oyununda da azarkeşlər 5 xallıq fərqin şahidi olublar. Belə ki, daha üstün oyun sərgiləyən meydan sahibləri qələbə qazanmaqla, xallarını 7-yə çatdırıblar. Ümumiyyətlə, bu turu meydan sahibləri üçün uğurlu hesab etmək olar. “Lokomotiv” və “Ordubad” komandaları kimi, “Şərur” komandası da doğma meydan amilindən yararlanmağa müvəffəq olub. Onlar mövsüm ərzində ikinci qələbələrini “Sədərək” komandası üzərində əldə ediblər – 44:25.

Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi futbol üzrə Naxçıvan Muxtar Respublika çempionatı başa çatıb. 10 komandanın mübarizə apardığı çempionatın qalibi adını “Araz-Naxçıvan” futbol komandası qazanıb.
Ötən ilin sentyabr ayında start verilən və 18 turdan ibarət olan muxtar respublika çempionatı bir sıra əlamətdar hadisələrlə yadda qaldı. Cari mövsümün qalibi “Araz-Naxçıvan” futbol komandası çempionatı məğlubiyyətsiz başa vurub. Komanda mövsüm ərzində yalnız bir dəfə xal itkisi ilə üzləşməli olub. Belə ki, Şərurda “Arpaçay” komandasının qonağı olan “qırmızı-ağlar” meydanı “sülh”lə tərk ediblər. Son 3 tura kimi “Dinamo” futbol klubu “Araz-Naxçıvan”ı izləsə də, rəqiblər arasında keçirilən matç hər şeyi həll edib. Daxili İşlər Nazirliyinin komandası başa çatan mövsümdə meydanı 3 dəfə məğlub tərk edib ki, bunun da məhz ikisi “qırmızı-ağlar”la oyunlara təsadüf edir. Onlar digər məğlubiyyətlə Şərurda “Arpa­çay”la oyunda üzləşiblər. 3 məğlubiyyət və əldə edilən 43 xal nəticəsində “Dinamo” mövsümü ikinci pillədə başa vurub.

Ötən həftə Bakı şəhərindəki “Sərhədçi” İdman Olimpiya Mərkəzində sərbəst və yunan-Roma güləşi üzrə yeniyetmələrin Azərbaycan çempionatı keçirilib.
Ölkə birinciliyində Naxçıvan güləşçiləri də qüvvələrini sınayıblar. Çempionatda iştirak edən 10 pəhləvanımız uğurlu çıxışları ilə diqqəti cəlb edib.
76 kiloqram çəki dərəcəsində yunan-Roma güləşi üzrə mübarizə aparan Rüfət Güləliyev həlledici qarşılaşmaya kimi bütün rəqiblərini məğlub edib. Final qarşılaşmasında pəhləvanımız Mingəçevir şəhərinin təmsilçisi Cavanşir Qasımovla qarşılaşıb. Üstünlüyü əldən verməyən güləşçimiz bu qarşılaşmada da qalib gələrək Azərbaycan çempionu adını qazanıb.
50 kiloqram çəki dərəcəsində mübarizə aparan digər yunan-Roma güləşçimiz Elvin Kərimov finala kimi irəliləyib. Lakin həlledici qarşılaşmada “ROİL” idman klubunun güləşçisi Həsən Məmmədliyə məğlub olan pəhləvanımız Azərbaycan çempionatında gümüş medala sahib çıxıb.
58 kiloqram çəki dərəcəsində mübarizə aparan Afin Mustafayev isə ölkə birinciliyini beşinci yerdə başa vurub.
Sonda qalib idmançılarımıza diplom və medallar təqdim olunub. Güləşçilərimiz Azərbaycan yığma komandasının heyətinə daxil ediliblər.

 Ceyhun Məmmədov

Mayın 25-də Naxçıvan şəhərindəki İlham Əliyev adına Olimpiya-İdman Kompleksində “Bakı-2015” Birinci Avropa Oyunlarına dəstək spartakiadası keçirilib. Muxtar respublikanın ümumtəhsil məktəblərinin şagirdləri arasında keçirilən spartakiada yüngül atletika, şahmat, basketbol və stolüstü tennis idman növlərini əhatə edib.
Spartakiadanın açılış mərasimində çıxış edən Naxçıvan Muxtar Respublikasının Gənclər və İdman naziri Azad Cabbarov “Bakı-2015” Birinci Avropa Oyunlarına dəstək məqsədilə keçirilən idman yarışının iştirakçılarını salamlayaraq, onlara uğurlar arzuladı.

Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi basketbol üzrə muxtar respublika çempionatında 4-cü turun oyunları keçirilib.
Çempionatın favoritləri bu turu da itkisiz başa vurublar. Turnir cədvəlinin lideri “Naxçıvan” komandası “Naxçıvan” Universiteti basketbolçularını sınağa çəkib. Oyun ərzində üstünlüyü əldən verməyən lider meydanı böyükhesablı qələbə ilə tərk edib – 110:31. Rəqibini daban-dabana izləyən “Ordubad” komandası da qələbəni bayram edib. Onlar budəfəki səfərdə “Lokomotiv” komandasını məğlub ediblər – 28:48. Ordubadlı basketbolçular kimi, culfalı idmançılar da bu turu səfərdə qələbə ilə başa vurublar. Sədərəkdə eyniadlı komandanın qonağı olan “Culfa” komandası 73:40 hesabı ilə qələbə qazanaraq turnir cədvəlinin üçüncü pilləsinə yüksəlib. Dördüncü turun son oyununda isə meydana Babək və Şərur basketbolçuları çıxıblar. Baxımlı oyun babəklilərin 56:30 hesablı qələbəsi ilə yekunlaşıb.

Şahbuz Rayon Gənclər və İdman İdarəsi, Təhsil Şöbəsi və Naxçıvan Muxtar Respublikası Yüngül Atletika Federasiyasının Şahbuz rayon bölməsinin birgə təşkilatçılığı ilə ümumtəhsil məktəblərinin qızları arasında yüngül atletika üzrə rayon birinciliyi keçirilib.
Tədbirin açılış mərasimində çıxış edən rayon Gənclər və İdman İdarəsinin rəisi Vüqar Muradov, Təhsil Şöbəsinin aparıcı məsləhətçisi Kamran Quliyev və Yüngül Atletika Federasiyasının rayon bölməsinin nümayəndəsi İdris Qəhrəmanov iştirakçılara uğurlar arzulayıblar.
Reqlamentə əsasən, şagirdlər 100, 200, 400 və 800 metr məsafələrə qaçış, eyni zamanda uzununa tullanma üzrə qüvvələrini sınayıblar.
45 nəfərin şəxsi birincilik üzrə mübarizəsində Səməngül İsmayılova (100 m), Nərmin Rüstəmli (200 m), Zəminə Hüseynova (400 m) və Mədinə İbrahimova (800 m) bütün rəqiblərini qabaqlayıblar. Uzununa tullanmada isə Fidan Hüseynli birinci yerə layiq görülüb.
Sonda qaliblərə təşkilatçıların diplom və hədiyyələri təqdim edilib.

Ceyhun Məmmədov

Ümummilli lider Heydər Əliyevin anadan olmasının 92-ci ildönümünə həsr olunmuş kikboksinq üzrə Naxçıvan Muxtar Respublika turnirinə yekun vurulub.
Naxçıvan Muxtar Respublikası Gənclər və İdman Nazirliyi ilə Şərq Döyüşü Sənəti Federasiyasının birgə təşkil etdiyi turnirdə 10 çəki dərəcəsində 200-ə yaxın idmançı iştirak edib.
Turnirin açılış mərasimində Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahim­ov, Şərq Döyüşü Sənəti Federasiyasının sədr müavini Cavanşir Salayev çıxış edərək yarış iştirakçılarına uğurlar arzulayıblar.
Sonra Naxçıvan Dövlət Filarmoniyasının və Şərur Xalq Yallı Ansamblının bir-birindən maraqlı çıxışları olub.
İki gün davam edən yarışın final qarşılaşmaları gərginliyi ilə yadda qalıb. Kişilərin mübarizəsində Kənan Məmmədov (60 kq), Ruslan Musayev (63 kq), Samiq Seyidzadə (67 kq), İbrahim İbrahimli (75 kq), Hüseyn Xəlilov (81 kq) və Mirəli Seyidov (91 kq) öz çəki dərəcələrində bütün rəqiblərinə qalib gələrək turnirin baş mükafatını qazanıblar. Yeniyetmələrin mübarizəsində isə Əhməd Cəfərov (51 kq), Bəxtiyar Qəribov (54 kq), Mərdan Muradov (60 kq) və Mətin Zal (67 kq) qalib adını qazanıblar.
Sonda qalib idmançılar diplom, medal, kubok və hədiyyələrlə mükafatlandırılıblar.

Ceyhun Məmmədov

Ümummilli lider Heydər Əliyevin anadan olmasının 92-ci ildönümünə həsr olunmuş velosiped yürüşü üzrə Naxçıvan Muxtar Respublika birinciliyi keçirilib.
Naxçıvan Muxtar Respublikası Gənclər və İdman Nazirliyi ilə Hava və Ekstremal İdman Növləri Federasiyasının birgə təşkil etdiyi birincilikdə 40-dan çox idmançı mübarizə aparıb.
Yarışın açılış mərasimində çıxış edən Gənclər və İdman naziri Azad Cabbarov bildirib ki, muxtar respublikada idmanın inkişafına göstərilən diqqət və qayğı nəticəsində son illər idmançılarımız ölkədaxili və beynəlxalq turnirlərdə uğurla çıxış edirlər. Ölkəmizdə bu il ilk dəfə təşkil olunacaq Avropa Oyunları idmanımızın inkişafına öz töhfəsini verəcək.
Hava və Ekstremal İdman Növləri Federasiyasının sədri Hafiz Yaqubov çıxışında qeyd edib ki, federasiyanın yeni fəaliyyətə başlamasına baxmayaraq, artıq bir çox gənc bu növlərə maraq göstərməkdədir. Məqsədimiz bu idman növlərini muxtar respublikada kütləvi hala gətirmək və gəncləri idmana cəlb etməkdir. Hazırda muxtar respublikada hər bir yeniyetmə və gəncin idman sahəsində uğur qazanması üçün bütün şərait yaradılıb.
Komanda və fərdi hesabda mübarizə aparan idmançılar Uzunoba gölünün ətrafında yürüşü yekunlaşdırıblar. Komanda hesabında hamını qabaqlayan Naxçıvan Dövlət Universitetinin komandası qalib adını qazanıb. “Qapıcıq” idman klubunun velosipedçiləri ikinci, Kəngərli rayonunun komandası üçüncü olublar. Fərdi yarışlarda isə ilk üç pillədə Naxçıvan Dövlət Universitetinin tələbələri – Rəşad Əhmədov, Malik Hənifəyev və Xaliq Novruzov qərarlaşıblar.
Sonda qaliblərə diplom, kubok və hədiyyələr təqdim olunub.

Ceyhun Məmmədov

Naxçıvan şəhərindəki Şahmat Mərkəzində ümumtəhsil məktəblərinin şagirdləri arasında şahmat üzrə birincilik keçirilib. Təhsil Nazirliyinin və Şahmat Federasiyasının birgə təşkil etdiyi birincilikdə 86 zəka sahibi qüvvəsini sınayıb. Yarışın yekunlarına əsasən, Naxçıvan şəhər 1 nömrəli tam orta məktəbin şagirdi Süleyman Məmmədov qalib adını qazanıb. 5 nömrəli tam orta məktəbin şagirdləri Rəvan Rəhimov və Kərim Rəhimov isə digər iki pillədə qərarlaşıblar.
Sonda qaliblərə diplomlar təqdim olunub.

Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 92-ci ildönümünə həsr olunmuş basketbol üzrə muxtar respublika birinciliyinə dünən yekun vurulub.
Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi birincilikdə muxtar respublikanın şəhər və rayonlarından 8 komanda mübarizə aparıb.
“A” qrupunda “Naxçıvan”, “Şahbuz”, “Şərur” və “Babək”, “B” qrupunda isə “Ordubad”, “Lokomotiv”, “Culfa” və “Sədərək” komandaları yer alıblar. Nəticəyə əsasən, “A” qrupundan “Naxçıvan” və “Babək”, “B” qrupundan isə “Ordubad” və “Culfa” komandaları yarımfinala vəsiqə qazanıblar. Bu mərhələdə daha baxımlı oyun sərgiləyən “Naxçıvan” və “Ordubad” komandaları həlledici qarşılaşmada üz-üzə gəliblər. Gərgin idman mübarizəsi şəraitində keçən qarşılaşma “Naxçıvan” komandasının qələbəsi ilə yekunlaşıb – 49:29. Turnirin üçüncülük matçında isə Culfa və Babək basketbolçuları üz-üzə gəliblər. Bu görüşdə şans bir qədər culfalıların tərəfində olub – 23:22.
Bununla da, ümummilli lider Heydər Əliyevin anadan olmasının 92-ci ildönümünə həsr olunmuş basketbol üzrə muxtar respublika birinciliyinin qalibi “Naxçıvan” komandası olub.
Üç gün davam edən turnirin qalibləri diplom, basketbol topu, kubok və hədiyyələrlə mükafatlandırılıblar.

Ceyhun Məmmədov

İlk dəfə olaraq Azərbaycanda təşkil olunacaq Birinci Avropa Oyunlarının başlamasına az bir zaman qalıb. “Bakı-2015” Birinci Avropa Oyunlarında çıxış edəcək idmançılar artıq son təlim-məşq toplanışlarını keçirirlər. Azərbaycanı bu mötəbər yarışda təmsil edəcək boks üzrə milli komandamız da Avropa Oyunlarına hazırlıqlarını davam etdirir. Sevindirici haldır ki, ilk Avropa Oyunlarında Naxçıvan boksçusu Tayfur Əliyev də iştirak edəcək. Dəri əlcək sahibimiz hazırda Azərbaycan millisi ilə birgə Meksikanın paytaxtı Mexiko şəhərində təlim-məşq toplanışındadır. “Avropa Oyunlarına hazırlıqlarımız davam edir. Artıq yarışın başlamasına az bir müddət qalıb və bütün diqqətimizi təlimlərə yönəltmişik. İlk Avropa Oyunlarında tarixə düşmək, uğur qazanmaq üçün əlimdən gələni edəcəyəm. Məqsədim Azərbaycan bayrağını bu mötəbər idman yarışında dalğalandırmaqdır”, – deyən Naxçıvan boksçusu Tayfur Əliyev may ayının 25-dək Meksikada təlim-məşq toplanışında olacaq.
Artıq okeanın o tayında boksçumuz bir neçə sparrinq döyüşü keçirib və rinqi qələbələrlə tərk edib.

 Ceyhun Məmmədov

Azərbaycanın ayrılmaz tərkib hissəsi olan Naxçıvan Muxtar Respublikasında beynəlxalq şahmat festivallarının keçirilməsi artıq ənənə halını alıb. Bu günlərdə ümummilli lider Heydər Əliyevin anadan olmasının 92-ci ildönümünə həsr edilmiş “Naxçıvan-2015” Beynəlxalq Şahmat Festivalının uğurla başa çatması muxtar respublikada idmanın dünya standartları səviyyəsində inkişafının çox mühüm göstəricisidir.

Hələ 2003-cü ildə Naxçıvan şəhərində gənclər arasında şahmat üzrə dünya çempionatının keçirilməsi bütün dünyada böyük əks-səda doğurmuşdu. O zaman muxtar respublikada sabitlik, yarışların keçirilməsi üçün ideal şərait yaradılmasaydı, dünyanın 36 ölkəsindən gələn şahmatçılar qəbul edilə, yarışın yüksək səviyyədə keçirilməsi təmin oluna bilməzdi. Məhz həyata keçirilən bu tədbirlər muxtar respublikada uşaq, yeniyetmə və gənclərdə “bəşər tarixinin ən qocaman kəşfi” adlandırılan şahmat idman növünə marağı daha da artırdı. Həmin yarışın uğurlu təşkili sonrakı möhtəşəm idman tədbirlərinin Naxçıvanda keçirilməsinə səbəb oldu, bu istiqamətdə davamlı xarakter alan tədbirlər şahmatın daha da inkişafına böyük təkan verdi.
Ümummilli lider Heydər Əliyevin Azərbaycana rəhbərliyinin birinci dövründə – ötən əsrin yetmişinci illərində ölkənin hər yerində olduğu kimi, muxtar respublikada da şahmat məktəbləri yaradılmış, buraya ixtisaslı kadrlar cəlb olunmuşdu. Ancaq 1987-ci ildən sonra bu sahə tamamilə unudulmuş, şahmat məktəbləri baxımsız vəziyyətə düşmüşdü. Ulu öndərimizin Azərbaycanda yenidən siyasi hakimiyyətə qayıdışından sonra şahmat məktəbləri üçün yeni binaların tikintisi, mövcud binaların yenidən qurulması və idman federasiyalarının yaradılması işinə başlanılmışdır.

Azərbaycan Respublikası gömrük orqanları arasında təşkil olunan futzal turnirinə yekun vurulub.
Ümummilli lider Heydər Əliyevin anadan olmasının 92-ci ildönümünə həsr olunmuş yarışın qalibi Naxçıvan Muxtar Respublikası Dövlət Gömrük Komitəsinin komandası olub. Artıq ənənə halını almış turnirdə dəfələrlə çempionluq sevinci yaşayan “Naxçıvan” komandası növbəti uğurunu Azərbaycan Respublikası Dövlət Gömrük Komitəsinin komandası üzərində əldə edib.
Bakı şəhərindəki ABU ARENA-da keçirilən final oyunu gözlənildiyindən də gərgin olub. Matçın 3-cü dəqiqəsində əks-hücumda yaxalanan komandamız hesabda geri düşüb. Sonrakı dəqiqələrdə tərəflər əlverişli qol imkanları əldə etsələr də, ilk hissə elə bu hesabla da başa çatıb.

Mayın 10-da “Naxçıvan-2015” Beynəlxalq Şahmat Festivalının qalibləri mükafatlandırılmışdır.
Şahmat festivalının baş hakimi Faiq Həsənov qalibləri səhnəyə dəvət edərək onlara mükafatları təqdim etmişdir.
Əvvəlcə “C” turnirində 8 yaşa qədər olan idmançılar mükafatlandırılmışdır. Bu yaş qrupu üzrə oğlanlar arasında Sumqayıt şahmatçısı Şamil Məmmədov, Bakı şahmatçısı Əli Züqanov, Naxçıvan şahmatçısı Zahid Allahverdiyev, qızlar arasında isə Bakı şahmatçıları Nurtac Heydərli, Aydan Şükürova və Füzuli rayon şahmatçısı Səmra Qasımova müvafiq olaraq 1-ci, 2-ci və 3-cü yerləri tutmuşlar.

“Naxçıvan-2015” Beynəlxalq Şahmat Festivalı qədim Naxçıvan şəhərindəki Şahmat Mərkəzində çox yüksək səviyyədə keçirildi. Yarışın nəticələri media və internet vasitəsi ilə bütün dünyaya çatdırıldı. Dünyanın istənilən ölkəsindən beynəlxalq festivalın gedişini izləmək mümkün oldu. Mənim fikrimcə, artıq ənənə halını alan beynəlxalq şahmat festivallarının yüksək səviyyədə təşkil olunması ilə diqqəti cəlb edən Naxçıvan təcrübəsi bir çox ölkələrə nümunədir.
Bu fikirləri “Şərq qapısı” qəzetinə müsahibəsində Beynəlxalq Şahmat Federasiyasının prezidenti Kirsan İlyumjinov dedi.
Beynəlxalq Şahmat Federasiyasının prezidenti qeyd etdi ki, Naxçıvanda beynəlxalq şahmat festivalları keçirildiyi zaman bütün tanınmış şahmatçılar bura sevinclə gəlirlər. Çünki Naxçıvandakı qonaqpərvərlik, beynəlxalq tədbirlərin keçirilməsi mədəniyyəti, təşkilatçılıq çox yüksək səviyyədədir. Bura qonaq gələn bütün şahmatçılar üçün hər cür şərait yaradılır.

“Naxçıvan-2015” Beynəlxalq Şahmat Festivalı ulu öndər Heydər Əliyevin anadan olmasının 92-ci ildönümünə həsr olunmuşdu. Ona görə də ümummilli liderimizə və onun doğulub boya-başa çatdığı qədim, doğma Naxçıvana sonsuz sevgimi ifadə etmək üçün festivalın qalibi kimi qazandığım kuboku Naxçıvan şəhərində yerləşən Heydər Əliyev Muzeyinə hədiyyə etdim.
Bu sözləri “Naxçıvan-2015” Beynəlxalq Şahmat Festivalının qalibi, Bakı şahmat məktəbinin yetirməsi Eltac Səfərli dedi.
“Naxçıvanda keçirilən beynəlxalq festivalda artıq ikinci dəfədir, iştirak edirəm. Keçən il ikinci yerə çıxa bildim, bu il isə daha böyük əzmkarlıq göstərərək birinci yeri qazandım. Əminəm ki, bu festivalda iştirak edən hər bir şahmatçı qaliblər sırasına düşməsə belə, Naxçıvandan xoş təəssüratlarla ayrılıb. Çünki mən hər dəfə şahmat bayramının daha yüksək səviyyədə təşkil olunduğunun şahidi oluram”, – deyən Eltac Səfərli beynəlxalq şahmat yarışının yüksək səviyyədə təşkili üçün dərin min­nətdarlığını bildirdi.
“Naxçıvan-2015” Beynəlxalq Şahmat Festivalının qalibi vurğuladı ki, 5 ildir, keçirilən beynəlxalq şahmat festivalı bir daha muxtar respublikanın beynəlxalq yarışların keçirilməsində böyük təcrübəyə malik olduğunu nümayiş etdirdi. Naxçıvan festivalların yüksək səviyyədə təşkili ilə dünyanın məşhur, tanınmış şahmatçılarını cəlb edə bilib.

Rauf Əliyev

Dünən Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 92-ci ildönümünə həsr olunmuş kişilər arasında basketbol üzrə muxtar respublika birinciliyinə start verilib. Naxçıvan Muxtar Respublikası Gənc­lər və İdman Nazirliyi ilə Basketbol Federasiyasının birgə təşkil etdiyi birincilikdə muxtar respublikanın şəhər və rayonlarından 8 komanda mübarizə aparır.

Ümummilli lider Heydər Əliyevin anadan olmasının 92-ci ildönümünə həsr olunmuş karate-do üzrə Naxçıvan Muxtar Respublika açıq birinciliyi keçirilib.
Birinciliyin açılış mərasimində ilk olaraq Azərbaycan Respublikasının Dövlət Himni səsləndirilib. Sonra Naxçıvan Muxtar Respublikası Karate-do Federasiyasının sədri Vəli Ələsgərov çıxış edərək iştirakçılara uğurlar arzulayıb. Tədbirin bədii hissəsində uşaq rəqqasların və karateçilərin nümunəvi çıxışları tamaşaçılar tərəfindən alqışlarla qarşılanıb.
Naxçıvan Muxtar Respublikası Gənclər və İdman Nazirliyi ilə Karate-do Federasiyasının birgə təşkil etdiyi birincilikdə 7 yaş qrupu üzrə 250-dən çox idmançı mübarizə aparıb. Muxtar respublikanın şəhər və rayonlarının idmançıları ilə yanaşı, yarışda Bakı şəhərinin müxtəlif idman klublarını təmsil edən 50-dən çox karateçi iştirak edib.

Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 92-ci ildönümünə həsr edilmiş voleybol üzrə kişilər arasında Naxçıvan Muxtar Respublika birinciliyinə yekun vurulub. Naxçıvan Muxtar Respublikası Gənclər və İdman Nazirliyi ilə Voleybol Federasiyasının birgə təşkil etdiyi birincilikdə şəhər və rayonların 8 komandası mübarizə aparıb.
İki gün davam edən muxtar respublika birinciliyi olimpiya sistemi üzrə keçirilib. Yarışın ilk günündə “Sədərək” “Babək”i, “Şərur” “Ordubad”ı, “Culfa” “Kəngərli”ni, “Naxçıvan” isə “Şahbuz”u məğlub edərək adlarını yarımfinala yazdırıblar. Bu mərhələnin oyunları isə daha gərgin idman mübarizəsi şəraitində keçib. Birinciliyin favoriti kimi göstərilən “Sədərək” final yolunda Şərur voleybolçularını mübarizədən kənarlaşdırıb. Onların həlledici qarşılaşmada rəqibi “Culfa” komandası olub. Culfalılar isə bu mərhələdə şahbuzlu həmkarlarından üstün olublar.
Birinciliyin son günündə əvvəlcə meydana üçüncülük uğrunda “Şərur” və “Şahbuz” komandaları çıxıblar. Daha baxımlı oyun sərgiləyən Şərur voleybolçuları hər üç setdə qalib gələrək birinciliyi üçüncü pillədə başa vurublar – 3:0.
Final qarşılaşmasında isə “Sədərək” “Culfa” komandası ilə üz-üzə gəlib. Azarkeşlərin böyük maraqla izlədiyi görüşdə sədərəklilər qalib gəliblər – 3:0.
Bununla, “Sədərək” komandası ümummilli lider Heydər Əliyevin anadan olmasının 92-ci ildönümünə həsr edilmiş voleybol üzrə kişilər arasında Naxçıvan Muxtar Respublika birinciliyinin qalibi olub.
Sonda təşkilatçılar tərəfindən yer tutmuş komandalara diplom, kubok və hədiyyələr təqdim edilib.

 Ceyhun Məmmədov

Mayın 7-də Şərur Rayon Olimpiya-İdman Kompleksində ümummilli lider Heydər Əliyevin anadan olmasının 92-ci ildönümünə həsr olunmuş kikboksinq üzrə “Azərbaycan kəməri” uğrunda peşəkarlar arasında ilk ölkə çempionatı keçirilib.

Azərbaycan Respublikasının və Naxçıvan Muxtar Respublikasının Gənclər və İdman nazirliklərinin, Azərbaycan Kikboksinq və Naxçıvan Muxtar Respublikası Şərq Döyüşü Sənəti federasiyalarının birgə təşkilatçılığı ilə keçirilən çempionatın iştirakçıları əvvəlcə ümummilli lider Heydər Əliyevin Naxçıvan şəhərinin baş meydanında əzəmətlə ucalan abidəsini ziyarət edərək önünə gül dəstələri qoyublar.
Şərur Rayon Olimpiya-İdman Kompleksində kikboksinq üzrə “Azərbaycan kəməri” uğrunda peşəkarlar arasında ilk ölkə çempionatının açılış mərasimində çıxış edən Naxçıvan Muxtar Respublikasının Gənclər və İdman naziri Azad Cabbarov bildirdi ki, qədim və zəngin tarixə malik olan ölkəmizdə idman milli-mədəni irsimizin ayrılmaz tərkib hissəsini təşkil edir. Müstəqil Azərbaycan Respublikasında idmanın inkişafı ulu öndər Heydər Əliyevin adı ilə bağlıdır. Ümummilli liderin həyata keçirdiyi idman siyasəti bu gün Azərbaycan Prezidenti cənab İlham Əliyev tərəfindən uğurla davam etdirilir.

Ümummilli lider Heydər Əliyevin anadan olmasının 92-ci ildönümünə həsr olunmuş “Naxçıvan-2015” Beynəlxalq Şahmat Festivalının 7-сi turu başa çatıb.
“A” turnirində mübarizə aparan və aktivində 2 xal olan Naxçıvan şahmatçısı, FİDE ustası Pərviz Qasımov bu turda beynəlxalq usta Ülviyyə Fətəliyeva ilə, digər həmyerlimiz, FİDE ustası Ürfan Sevdimalıyev isə beynəlxalq usta Xəyalə Abdulla ilə qarşılaşıb. Hər iki görüş həmyerlilərimizin qələbəsi ilə başa çatıb.
Qrupun liderlərindən biri – gürcüstanlı qrossmeyster Levan Pantsulaya bu turda hollandiyalı qrossmeyster Sergey Tivyakovla üz-üzə gəlib və görüş “sülh”lə başa çatıb. Aktivində 5 xal olan azərbaycanlı qrossmeyster Eltac Səfərli də bu turu heç-heçə ilə başa vurub. O, digər azərbaycanlı qrossmeyster Qədir Hüseynovla xalları yarı bölüb. Liderlər qrupunda qərarlaşan iranlı qrossmeyster İdani Pouya azərbaycanlı qrossmeyster Azər Mirzəyevdən üstün olub.
“Naxçıvan-2015” Beynəlxalq Şahmat Festivalının 7-ci turunda “B” turnirinin lideri azərbaycanlı şahmatçı Rəşad Zeynallı Toğrul Həsənzadə ilə üz-üzə gəlib.

Ümummilli lider Heydər Əliyevin anadan olmasının 92-ci ildönümünə həsr olunmuş “Naxçıvan-2015” Beynəlxalq Şahmat Festivalının 6-сı turu dünən keçirilən oyunlarla yekunlaşıb.
“A” turnirində mübarizə aparan Naxçıvanın zəka sahiblərindən FİDE ustası Pərviz Qasımov bu turda gürcüstanlı qrossmeyster Nino Xomeriki ilə qarşılaşıb. Aktivində 2 xal olan şahmatçımız bu turda da məğlubiyyətlə barışmalı olub. Digər həmyerlimiz, FİDE ustası Ürfan Sevdimalıyev isə iranlı şahmatçı Morteza Əsgəri ilə ağ-qara taxtada üz-üzə gəlib, Pərvizdən fərqli olaraq, Ürfan bu turu qələbə ilə başa vurub.
“A” turnirinin lideri gürcüstanlı qrossmeyster Levan Pantsulaya bu turda azərbaycanlı qrossmeyster Eltac Səfərli ilə qarşılaşıb. 5 oyundan maksimum xal toplayan Levan Pantsulaya bu görüşdə ilk dəfə məğlub olub. Turun ən maraqlı görüşü isə azərbaycanlı qrossmeyster Ülvi Bacarani ilə rusiyalı qrossmeyster Aleksandr Xalifman dueli olub. 5 oyundan 4 xal toplayan bu şahmatçıların görüşündən qalib ayrılan olmayıb.

Ümummilli lider Heydər Əliyevin anadan olmasının 92-ci ildönümünə həsr olunmuş futbol üzrə Naxçıvan Muxtar Respublika turnirinə dünən yekun vuruldu.
Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi turnirin final qarşılaşmasında “Araz-Naxçıvan” və “Dinamo” futbol komandaları üz-üzə gəldilər.
Naxçıvan Muxtar Respublika Stadionunda gərgin idman mübarizəsinə şahidlik edən azarkeşlər oyun ərzində 5 qol izlədilər. İlk hissəyə hücumlarla başlayan “Araz-Naxçıvan” Tağı Seyidovun dublu sayəsində rəqibi iki dəfə mərkəzə dəvət etdi. Maraqlısı odur ki, “qırmızı-ağlar” oyunun 70 dəqiqəyə yaxın müddətini azlıqda keçirdilər. Sərt oyun nəticəsində hakim Elşad Əliyevi meydandan kənarlaşdırdı. Bu, görüşdə son qırmızı vərəqə olmadı. Belə ki, referi ikinci hissədə də hər iki komandadan bir futbolçunu meydandan çıxardı. Lakin ruhdan düşməyən komandalar ikinci hissədə daha baxımlı oyun sərgilədilər. Əvvəlcə “Araz-Naxçıvan”ın heyətində Əsgər Əsgərov hesab arasındakı fərqi 3 topa çatdırdı. “Dinamo” bu qollardan birinin əvəzini çıxsa da, sona 10 dəqiqə qalmış qapısında daha bir qol gördü və meydanı 1:4 hesablı məğlubiyyətlə tərk etdi.

Artıq yeddi gündür ki, Naxçıvan mötəbər bir şahmat bayramına, Azərbaycan xalqının ümummilli lideri Heydər Əliyevin anadan olmasının 92-ci ildönümü münasibətilə keçirilən “Naxçıvan–2015” Beynəlxalq Şahmat Festivalına ev sahibliyi edir. Festival iştirakçıları onlara yaradılan şəraitdən razılıqla danışırlar. Naxçıvana heyran olduqlarını bildirən festival iştirakçıları buradan xoş təəssüratlarla ayrılacaqlar. Festivalın gedişində tanınmış hakim və şahmatçılarla həmsöhbət olduq:

Mayın 7-də ümummilli lider Heydər Əliyevin anadan olmasının 92-ci ildönümünə həsr olunan sərbəst güləş üzrə Naxçıvan Muxtar Respublika çempionatına yekun vurulmuşdur.
Naxçıvan şəhərindəki İlham Əliyev adına Olimpiya-İdman Kompleksində keçirilən çempionatın dünən final görüşləri keçirilmişdir. 126 pəhləvanın çıxış etdiyi yarışda güləşçilər 15 çəki dərəcəsində mübarizə aparmışlar.
Turnirin son günü maraqlı final qarşılaşmaları ilə yadda qalmışdır. Sərbəst güləşçilərin mübarizəsində 42 kiloqramda Abbas Həsənov, 46 kiloqramda Murad Bağırlı, 50 kiloqramda Altay Zeynalov, 54 kiloqramda Murad Quliyev, 58 ki­loqramda Sərdar Əliyev, 63 kiloqramda Zamin Quliyev, 69 ki­loqramda Rauf Qurbanov, 76 kiloqramda Novruz Ağazadə, 85 kiloqramda İman Abdullayev və 100 kiloqramda Oruc İbrahimov bütün rəqiblərini üstələyərək birinci yerlərə layiq görülmüşlər.
Çempionatda yunan-Roma güləşçiləri də güclərini sınamışlar. 32 kiloqram çəki dərəcəsində keçirilən yarışın həlledici qarşılaşmasında Həsən Xudiyev Qurban Xudiyevi, 35 kiloqram çəki dərəcəsində Elis Əliyev Elman Əsgərovu, 42 kiloqram çəki dərəcəsində Elnur İsmayılov Adil Ələkbərovu, 50 kiloqram çəki dərəcəsində İsfəndiyar Məhərrəmli İsi Əliyevi və 58 kiloqram çəki dərəcəsində Afin Mustafayev İsmayıl Haqverdiyevi məğlub edərək birinci­liyin baş mükafatını qazanmışlar.
Sonda mükafatlandırma mərasimi olmuşdur.
Qaliblərə Naxçıvan Muxtar Respublikası Güləş Federasiyasının mükafatları təqdim edilmişdir.

“Şərq qapısı”

Mayın 6-da Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 92-ci ildönümünə həsr olunmuş sərbəst güləş üzrə muxtar respublika çempionatının açılış mərasimi keçirilmişdir.
Tədbirdə Naxçıvan Muxtar Respublikası Güləş Federasiyasının sədri Azər Zeynalov çıxış edərək demişdir ki, ümummilli liderimiz Heydər Əliyev ölkəmizə rəhbərliyi dövründə idmanın inkişafını diqqətdə saxlamış, bu sahədə ardıcıl tədbirlər görülmüşdür. Azərbaycanın bütün bölgələrində idman kompleksləri, meydançalar tikilib istifadəyə verilmiş, idman-sağlamlıq mərkəzləri yaradılmışdır. Hazırda ulu öndərin müəyyənləşdirdiyi idman siyasəti ölkə Prezidenti cənab İlham Əliyev tərəfindən uğurla davam və inkişaf etdirilir.