Muxtar respublikamızda idmanın inkişafına olan qayğı təkcə olimpiya-idman növlərini deyil, qeyri-olimpiya idman növlərini də əhatə edir. Son illər idmançılarımız ağırlıqqaldırmanın pauerliftinq növündə ən yüksək nailiyyətlərə imza atıblar və bu da pauerliftinq idman növünə olan marağı artırıb. İndi muxtar respublikanın şəhər və rayonlarında gənclərin bu növlə məşğul olmaları üçün idman zalları fəaliyyət göstərir. Naxçıvan Muxtar Respublikası Gənclər və İdman Nazirliyinin dəstəyi ilə fəaliyyət göstərən bu bölmələrdə hazırda 100-dən çox idmançı var.
Oktyabrın 23-də “Zərərli vərdişlərə yox deyək, həmişə sağlam olaq” devizi altında Naxçıvanda ilk dəfə pauerliftinq idman növü üzrə muxtar respublika birinciliyi keçirilib. Naxçıvan şəhərindəki İlham Əliyev adına Olimpiya-İdman Kompleksində keçirilən birincilikdə 30-a yaxın idmançı qüvvəsini sınayıb.

 Tələbkarlıq gərəkdir

Yaxşı xatirimdədir, mərhum Hidayət Əliyev güləş üzrə Azərbaycan çempionu olanda və ümumittifaq birinciliyində mükafata layiq yer tutanda əməkdar məşqçi, respublika dərəcəli hakim, mərhum Yusif Əhmədovun yetirməsinin müvəffəqiyyəti barədə Naxçıvanda iftixar dolusu söhbət gedirdi.
Bəli, Naxçıvan güləş məktəbi 50-ci və 60-cı illərdə Azərbaycan idmanına bir çox mötəbər yarışların qalibləri və mükafatçıları olan bacarıqlı pəhləvanlar vermişdir.
Bakıda Qanlı Yanvar hadisələrinin günahsız qurbanlarından olub paytaxtın şəhidlər xiyabanında uyuyan keçmiş SSRİ-nin idman ustası Tofiq Novruzovun, eləcə də idman ustalarından İslam Hümbətovun, Rəmzi Mehdiyevin, Bağır Həsənovun, Eldar Xəlilovun və başqalarının adı bu gün də hörmət və məhəbbət hissi ilə çəkilir. Bu pəhləvanlar paytaxt güləşçiləri ilə, demək olar ki, bərabər səviyyədə çıxış etmiş və dəfələrlə Azərbaycan çempionu olmuşlar. Güləşçilərin hazırlığı üçün əla, yaxud nümunəvi şəraitin olmadığı həmin illərdə pəhləvanlar öz üzərlərində ciddi səy və həvəslə çalışır, yarışlarda yüksək nəticələr qazanmağa can atırdılar.

Naxçıvan Muxtar Respublikası Gənclər və İdman Nazirliyi ilə Hava və Ekstremal İdman Növləri Federasiyasının birgə təşkil etdiyi 18 oktyabr Dövlət Müstəqilliyi Gününə həsr edilmiş velosiped yarışı üzrə Naxçıvan Muxtar Respublika birinciliyinə yekun vurulub. Kəngərli rayonu ərazisində keçirilən birincilikdə şagirdlər və tələbələrdən ibarət 80-ə yaxın idmançı mübarizə aparıb. Nəticəyə əsasən, şagirdlər arasında Ramil Sadiqov, Hafiz Nəcəfov və Hüseyn Cəfərov yarışı ilk üç pillədə başa vurublar. Tələbələrdən isə Xalid Novruzov, Tağıyar İsmayılov və Malik Hənifəyev müvafiq olaraq I, II və III yerləri tutublar.
Sonda qalib idmançılar diplomla təltif olunublar.

 Ceyhun Məmmədov

Naxçıvan Muxtar Respublikası Gənclər və İdman Nazirliyi, Təhsil Nazirliyi, Səfərbərlik və Hərbi Xidmətə Çağırış üzrə Dövlət Xidmətinin təşkilatçılığı ilə “Vətənin müdafiəsinə hazıram” poliatlon çoxnövçülüyü üzrə Naxçıvan Muxtar Respublika çempionatının final mərhələsi keçirilib.
Açılış mərasimində Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov, Təhsil Nazirliyinin əməkdaşı Elxan Babayev, Səfərbərlik və Hərbi Xidmətə Çağırış üzrə Dövlət Xidmətinin əməkdaşı Məftun Xəlilov çıxış ediblər. Bildirilib ki, yeniyetmələrin şəxsiyyət kimi formalaşmasında, onların əsl vətəndaş kimi yetişməsində fiziki tərbiyə və idmanın böyük rolu var. İdman yeniyetmə və gənclərin milli mənlik şüuru­nun, vətənpərvərlik və mübarizlik hislərinin formalaşmasında xüsusi rol oynayır.
Muxtar respublikanın 8 komandasının mübarizə apardığı final mərhələsində şagirdlər qumbaraatma, turnikdə dartınma və 100, 2000 metr məsafəyə qaçışda qüvvələrini sınayıblar.
Yekun nəticəyə əsasən, Şərur rayon Oğlanqala kənd tam orta məktəbinin komandası bütün rəqiblərini üstələyərək muxtar respublika çempionatının final mərhələsinin qalibi olub. Digər iki pillədə isə Naxçıvan şəhər 16 nömrəli tam orta məktəb və Kəngərli rayon Qarabağlar kənd 2 nömrəli tam orta məktəbin komandaları qərarlaşıb.
Sonda qaliblərə diplom və kubok təqdim edilib.

 Ceyhun Məmmədov

Naxçıvan Muxtar Respublikası Gənclər və İdman Nazirliyi, Yüngül Atletika Federasiyası və Heydər Əliyev adına Hərbi Liseyin birgə təşkil etdiyi 18 oktyabr Dövlət Müstəqilliyi Gününə həsr olunmuş Heydər Əliyev adına Hərbi Lisey kursantları arasında 5 kilometr məsafəyə kross qaçışı üzrə turnir başa çatıb.
200-dən çox kursantın iştirak etdiyi turniri keçirməkdə məqsəd muxtar respublikada kursantları bu növə cəlb etmək və Naxçıvanda yüngül atletika üzrə gənclərdən ibarət yığma komandanın heyətini müəyyənləşdirmək idi.
Naxçıvan şəhəri – Duzdağ Fizioterapiya Mərkəzinin magistral yolunda baş tutan turnirin yekun nəticəsinə əsasən, Qurban Abdullayev təyin edilən məsafəni hamıdan tez qət edərək qalib adını qazanıb. Cəfər Quliyev 2-ci, Nurəddin Buzoyev isə 3-cü pillədə qərarlaşıblar.
Turnirin mükafatlandırma mərasimində çıxış edən Yüngül Atletika Federasiyasının sədri Rövşən Məmmədov bildirib ki, Azərbaycanın öz dövlət müstəqilliyini bərpa etməsi ölkəmizin ictimai-siyasi həyatında böyük dəyişikliklərin baş verməsinə səbəb olub. Şəhidlərin qanı bahasına qazandığımız müstəqilliyin möhkəmləndirilməsi, qorunub saxlanması üçün ulu öndərimiz Heydər Əliyev gecəli-gündüzlü yorulmadan çalışıb. İndi Azərbaycanın haqq səsi dünyanın hər yerindən eşidilməkdədir. Bu gün ümummilli liderin siyasi kursunu Azərbaycan Respublikasının Prezidenti cənab İlham Əliyev uğurla davam etdirir. Bütün sahələr kimi, idmanın inkişafı da diqqət mərkəzindədir. Muxtar respublikada idman sahəsinə böyük qayğı göstərilir.

Naxçıvan Muxtar Respublikası Güləş Federasiyasının son illər beynəlxalq arenalarda qazandığı uğurlara daha biri əlavə olunub. Ötən həftə Ukraynanın Odessa şəhərində yeniyetmələr arasında keçirilən cüdo üzrə “XII Avropa” beynəlxalq turniri başa çatıb. Bir çox ölkənin iştirak etdiyi turnirdə Naxçıvan Muxtar Respublikası Güləş Federasiyasının yetirməsi Abbas Məmmədov da çıxış edib. Abbas Məmmədov turnirin ilk mərhələsində Ukrayna və Gürcüstan idmançılarını məğlubiyyətə uğradıb. Cüdoçumuz beynəlxalq turniri üçüncü pillədə başa vurmaqla bürünc medal qazanıb.
Abbas Məmmədova təşkilatçılar tərəfindən diplom və medal təqdim olunub.

Ceyhun Məmmədov

Fevralın 21-də Naxçıvan Muxtar Respublikası Ali Məclisində “Naxçıvan Muxtar Respublikasında bədən tərbiyəsi və idmanın hazırkı vəziyyəti və qarşıda duran vəzifələr” mövzusunda keçirilən müşavirədə verilən tapşırıqların icrası ilə bağlı Naxçıvan Muxtar Respublikası Par­alimpiya Federasiyası və Gənclər və İdman Nazirliyinin birgə təşkilatçılığı ilə Naxçıvan Muxtar Respublika Stadionunda paralimpiyaçılar arasında yüngül atletika (100-200 metr məsafəyə qaçış) üzrə yarış keçirilib.
Tədbirdə Paralimpiya Federasiyasının, Gənclər və İdman Nazirliyinin nümayəndələri çıxış edərək bildiriblər ki, muxtar respublikada məhdud fiziki imkanlı gənclərin idman həyatına inteqrasiyası daim diqqət mərkəzindədir. Bu qəbildən olan tədbirlərin keçirilməsində də əsas məqsəd məhdud fiziki imkanlı şəxslərin idmana olan maraqlarını artırmaqla onlarda sağlam həyat tərzini formalaşdırmaq, həmçinin istedadlı idmançıları aşkara çıxarmaq, habelə onların asudə vaxtlarının səmərəli keçirilməsinə nail olmaqdır.
Yarışda 20 paralimpiyaçı bacarığını nümayiş etdirib. 100 metr məsafədə bütün rəqiblərini qabaqlayan Təvəkkül Tağıyev qalib adını qazanıb. Digər iki pillədə isə Fazil Ağayev və Coşqun Hüseynov qərarlaşıb. 200 metr məsafəni isə hamıdan tez Zamin Zahidli qət edib. Firəddin Əliyev ikinci, Vüsal Nağıyev isə üçüncü olublar.
Sonda ilk üç yeri tutan idmançılara Naxçıvan Muxtar Respublikası Paralimpiya Federasiyasının mükafatları, digər iştirakçılara isə həvəsləndirici hədiyyələr təqdim edilib.

Ceyhun Məmmədov

18 oktyabr Dövlət Müstəqilliyi Günü münasibətilə Naxçıvanda ilk dəfə qızlar arasında basketbol üzrə yoldaşlıq görüşü keçirilib.
Yoldaşlıq görüşündən əvvəl çıxış edən federasiyanın sədr müavini Ənvər Məmmədov Azərbaycanın müstəqillik yolunda qazandığı uğurlar barədə idmançılara məlumat verib.
Naxçıvan Muxtar Respublikası Gənclər və İdman Nazirliyi ilə Basket­bol Federasiyasının birgə təşkil etdiyi görüşdə Culfa və Ordubad basketbolçuları üz-üzə gəliblər.
“Culfa” komandası ordubadlı həmkarlarını 27:17 hesabı ilə məğlub edib.

Ceyhun Məmmədov

Oktyabrın 6-da Qətərin paytaxtı Dohada boks üzrə dünya çempionatına start verilib.
Bu il keçirilən dünya çempionatında əvvəlki yarışlardan fərqli olaraq dünyanın ən güclüləri mübarizə aparırlar. Birinci Avropa Oyunlarında 1-3-cü, Bolqarıstanda keçirilən qitə çempionatında isə 1-6-cı yeri tutanlar Qətərdə təşkil olunan yarışa vəsiqə qazanıblar. Bu dünya çempionatı Rio-de Janeyro Olimpiadasına lisenziya xarakterlidir. Qətərdəki dünya çempionatından 23 boksçu olimpiadaya lisenziya qazanacaq. 49, 52 və 81 kiloqram çəki dərəcələrində 1-2-ci, 56, 60, 64, 69, 75 kiloqram çəki dərəcələrində 1-3-cü, 91 və 91+ kiloqram çəki dərəcələrində isə yalnız qaliblər olimpiadaya vəsiqə əldə edəcəklər.
73 ölkənin 260 boksçusunun qüvvəsini sınadığı çempionatda Azərbaycan millisi də çıxış edir. Sevindirici haldır ki, Dohaya millimizin heyətində Naxçıvan boks məktəbinin yetirməsi Tayfur Əliyev də yollanıb. 56 kiloqram çəki dərəcəsində rinqə çıxan dünya çempionatının debütantı Tayfur Əliyev mübarizəyə ikinci mərhələdən (1/8 finaldan) başlayıb. Boksçumuz monqolustanlı İderhuu Enkhjarqnillə üz-üzə gəlib. Hər üç raundda qalib gələn boksçumuz növbəti mərhələyə vəsiqə qazanıb. Tayfur Əliyev 1/4 finalda irlandiyalı Maykl Konlanla qarşılaşacaq.
Azərbaycan dünya çempionatında 9 boksçu ilə təmsil olunur ki, onların da arasında ən gənci məhz Tayfur Əliyevdir.

 Ceyhun Məmmədov

Ötən həftə Ağdam rayonunun Quzanlı qəsəbəsindəki Olimpiya-İdman Kompleksində ümummilli lider Heydər Əliyevin xatirəsinə həsr olunan kişilər arasında peşəkar kikboksinq turnirinin qalibləri arasında turnir keçirilib. Bu yarışda Naxçıvan Muxtar Respublikası Şərq Döyüşü Sənəti Federasiyasının yetirməsi Ruslan Musayev də iştirak edib. 57 kiloqram çəki dərəcəsində mübarizə aparan idmançımız bütün rəqiblərinə qalib gələrək turnirin baş mükafatını qazanıb.
Naxçıvan Muxtar Respublikası Şərq Döyüşü Sənəti Federasiyasının digər yetirməsi Nail Hüseynov da uğur əldə edib. Kikboksinqçimiz Ukraynada keçirilən ölkə çempionatında çıxış edib və qalib adını qazanıb.
Sonda idmançılarımıza təşkilatçılar tərəfindən diplom, medal və kubok təqdim olunub.

 Ceyhun Məmmədov

Naxçıvan Muxtar Respublikası Daxili İşlər Nazirliyinin əməkdaşları arasında keçirilən estafet yarışına yekun vurulub. Naxçıvan Muxtar Respublika Stadionunda təşkil edilən yarışda nazirliyin 14 komandası çıxış edib. Hər komandanın heyətində 4 atletin mübarizə apardığı yarışda idmançılar, ümumilikdə, 4000 metr məsafəni qət etməli olublar. Finiş xəttinə hamıdan tez çatan Daxili Qoşunların Naxçıvan Əlahiddə Əməliyyat Briqadasının komandası birinci yerə layiq görülüb. Daxili İşlər Nazirliyinin xüsusi təyinatlı əməliyyat taqımının komandası ikinci, Babək Rayon Polis Şöbəsinin komandası isə üçüncü olublar.
Sonda qaliblərə diplomlar təqdim olunub.

 Ceyhun Məmmədov

Naxçıvan Muxtar Respublikası Gənclər və İdman Nazirliyi, Atıcı­lıq Federasiyasının birgə təşkilatçılığı ilə 18 oktyabr Dövlət Müstəqilliyi Gününə həsr olunmuş Naxçıvan şəhərində fəaliyyət göstərən ümumtəhsil müəssisələrinin şagirdləri arasında peyntbol üzrə birincilik keçirilib.
Naxçıvan Atıcılıq Mərkəzində keçirilən birincilikdə 19 komandanın tərkibində 120-yə yaxın şagird iştirak edib.
Yarışın açılış mərasimində çıxış edən Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov müstəqillik günü münasibətilə keçirilən birincilikdə iştirak edən idmançıları təbrik edib və ölkəmizin müstəqillik tarixi barədə danışıb. Muxtar respublikada idmana və idmançılara göstərilən diqqət və qayğıdan bəhs edən nazirliyin əməkdaşı sonra yarışın qaydaları haqda şagirdləri məlumatlandırıb.
İki gün davam edən yarış olimpiya sistemi üzrə keçirilib. Yarımfinal mərhələsində 15 və 16 nöm­rəli tam orta məktəblərin komandalarını məğlub edən Heydər Əliyev adına Hərbi Lisey və 9 nömrəli tam orta məktəbin komandaları adlarını finala yazdırıblar. İlk olaraq peyntbol sahəsinə üçüncü yer uğrunda 15 və 16 nömrəli tam orta məktəbin komandaları daxil olub. Bu görüşdə 15 nömrəli tam orta məktəbin şagirdləri qələbə qazanaraq birinciliyi üçüncü pillədə başa vurublar.
Final görüşündə isə hərbi liseyin kursantları 9 nömrəli tam orta məktəbin şagirdlərini üstələyiblər.
Mükafatlandırma mərasimində çıxış edən gənclər və idman naziri Azad Cabbarov, Atıcılıq Federasiyasının sədri Asəf Məmmədov və Heydər Əliyev adına Hərbi Liseyin rəisi Elman Orucov muxtar respublikada idmanın inkişafı istiqamətində həyata keçirilən tədbirlərdən danışıblar, qalibləri təbrik ediblər.
Qaliblərə diplom, medal, kubok və hədiyyələr verilib.

Ceyhun Məmmədov

Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi kişilər arasında basketbol üzrə muxtar respublika çempionatında 8-ci turun oyunları keçirilib.
Turun ilk görüşü “Babək” komandasının səfərdə inamlı qələbəsi ilə yadda qalıb. Belə ki, onlar “Lokomotiv”i 33:16 hesabı ilə məğlub edərək turnir cədvəlində dördüncü pilləyə yüksəliblər. Liderlər cərgəsində yer alan “Ordubad” komandası da bu turu qələbə ilə başa vurub. Səfərdə “Culfa” komandasının qonağı olan ordubadlı basketbolçular meydanı 47:16 hesablı qələbə ilə tərk ediblər. Cari çempionatda itkisiz irəliləyən “Naxçıvan” komandası bu turda da aktivinə 2 xal yazdırmağa müvəffəq olub.

Naxçıvan Muxtar Respublika Stadionunda “Zərərli vərdişlərə yox deyək, həmişə sağlam olaq” devizi altında şəhər tam orta məktəblərinin oğlan və qız atletləri arasında yüngül atletika üzrə şəhər birinciliyi keçirilib.
Naxçıvan Muxtar Respublikası Yüngül Atletika Federasiyası, Naxçıvan Şəhər Gənclər və İdman İdarəsi və Təhsil Şöbəsinin birgə təşkilatçılığı ilə keçirilən yarışda 16 tam orta məktəbin komandası iştirak edib, hər komandanın tərkibi isə 4 oğlan və 4 qızdan ibarət olub.
Yarışın açılış mərasimində Gənclər və İdman İdarəsinin rəisi Xəyal Qurbanov, Yüngül Atletika Federasiyasının sədr müavini İntiqam Rəhimov və Təhsil Şöbəsinin nümayəndəsi Ruslan Quliyev çıxış ediblər. Bildirilib ki, birinciliyin keçirilməsində məqsəd yeniyetmə və gəncləri zərərli vərdişlərdən uzaqlaşdırmaq, onları yüngül atletika idman növünə cəlb etməklə bu idman növünün inkişafına və kütləviliyinə nail olmaqdır.
Beynəlxalq Atletika Federasiyasının qaydalarına uyğun keçirilən yarışda oğlanlar arasında Nail Oruc­ov, Kamil Mirzəyev, Ayxan Seyidov və Səfər Tağıyev müvafiq olaraq 100, 200, 400, 800 metr məsafəni hamıdan öndə qət ediblər. Qızların mübarizəsində isə Zəhra Şeval Yıldız, Səbinə Bədəlova, Gülay Hüseynova və Zülfiyyə Mehdiyeva müvafiq olaraq 100, 200, 300, 500 metr məsafədə birinci yerlərə layiq görülüblər.
Komanda hesabına gəlincə, 16 nömrəli tam orta məktəbin komandası şəhər birinciliyinin qalibi olub. Digər iki pillədə isə 3 və 6 nömrəli tam orta məktəblərin komandaları qərarlaşıblar.
Sonda yer tutan komanda və idmançılar Naxçıvan Şəhər Gənclər və İdman İdarəsinin diplomları və Yüngül Atletika Federasiyasının hədiyyələri ilə mükafatlandırılıblar.

Xəbərlər şöbəsi

Naxçıvan Muxtar Respublikası Gənclər və İdman Nazirliyi, Təhsil Nazirliyi, Hava və Ekstremal İdman Növləri Federasiyasının birgə təşkilatçılığı ilə Naxçıvan şəhər ümumtəhsil məktəblərinin şagirdləri arasında velosiped yarışı üzrə şəhər birinciliyi keçirilib. Naxçıvan Muxtar Respublika Stadionunda keçirilən yarışda 15 məktəbin 90-dan çox şagirdi mübarizə aparıb.
Yarışın açılış mərasimində çıxış edən Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov və federasiyanın sədr müavini Azər Məmmədov muxtar respublikada idmana və idmançılara göstərilən diqqət və qayğıdan danışıblar. Yarışın qaydaları haqda velosipedçilər məlumatlandırıldıqdan sonra birinciliyə start verilib.
Yarışın reqlamentinə əsasən, qızlar 1200 metr, oğlanlar isə 1600 metr məsafəni qət etməyə çalışıblar. Qızların mübarizəsində 9 nömrəli tam orta məktəbin şagirdi Lütfiyyə Mehdiyeva bütün rəqiblərini geridə qoyaraq qalib adını qazanıb. Bu məktəbin digər şagirdi Nərmin Əsmərova ikinci, 4 nömrəli tam orta məktəbin şagirdi Sevinc Əliyeva isə üçüncü olub.
Oğlanların mübarizəsində ilk pillədə 9 nömrəli tam orta məktəbin şagirdi Azər Abbasov qərarlaşıb. Digər iki pilləni isə 2 nömrəli tam otra məktəbin şagirdi Elşad Əliyev və 16 nömrəli tam orta məktəbin şagirdi Musa Sadiqov tutublar.
Sonda qaliblər təşkilatçılar tərəfindən mükafatlandırılıblar.

Ceyhun Məmmədov

Bu gün muxtar respublikada yaradılan müasir idman infrastrukturu istənilən yarışı yüksək səviyyədə keçirməyə imkan verir. Naxçıvanda idmançılar üçün yaradılan şərait onların dünya arenalarında uğur qazanması ilə nəticələnir. Uğurlu idman siyasəti nəticəsində muxtar respublikada mütəmadi olaraq tədbirlər, yarışlar, turnirlər təşkil edilir, hər il idman infrastrukturu müasirləşdirilir. Naxçıvanın beynəlxalq yarışlara ev sahibliyi etməsi bunun bariz nümunəsidir. Bu cür infrastruktur eyni zamanda gənc­lərin sağlam, idmançıların peşəkar idmançı kimi formalaşması baxımından böyük rol oynayır.
Muxtar respublikanın şəhər və rayonlarında yeniləşən idman obyektləri gənc nəslin bu sahəyə olan marağını gündən-günə artırmaqdadır. Müasir avadanlıqlarla təmin olunan belə idman obyektlərindən biri də Şərur rayon Aralıq kənd stadionudur. Ötən gün istifadəyə verilən kənd stadionu qısa vaxt kəsiyində müasir standartlara cavab verən şəkildə yenidən qurulub. Uzunluğu 90 metr, eni isə 45 metr olan təbii öt örtüklü stadionun ərazisində 160 nəfərlik oturacaqlar quraşdırılıb. Stadionda idmançıların rahatlığı üçün 2 soyunub-geyinmə otağı və hakim otağı tikilib. Stadionun ot örtüyünün suvarılması üçün su sistemi quraşdırılıb. Meydança dünya standartlarına cavab verən (7,32 metr x 2,44 metr) qapılar və qapı torları ilə təmin olunub.

Gəncləri zərərli vərdişlərdən çəkindirmək, idman vasitəsilə onları sağlam ruhda tərbiyə etmək, idmanın kütləviləşdirilməsinə nail olmaq, peşəkar idmançıların uğurlu nəticə qazanmalarına kömək etmək – bütün bunlar müasir Azərbaycan idmanının yüksəlişinə səbəb olan addımlardır. Ümummilli lider Heydər Əliyevin dediyi kimi: “Əgər biz hamımız idmanın inkişafına şərait yaratsaq, idmanı kütləvi etsək və bütün insanlar üçün bədən tərbiyəsini mütləq onların həyatının bir hissəsinə çevirsək, xalqımızın fiziki sağlamlığını, mənəvi sağlamlığını təmin edəcəyik”. 

Bu gün Azərbaycanın hər yerində idmanın inkişafı üçün böyük işlər görülür. İdman infrastrukturunun yaradılmasını müasir dövrün tələbləri baxımından təxirəsalınmaz vəzifələrdən biri kimi müəyyənləşdirən muxtar respublika rəhbəri tez bir zamanda istedadlı idmançıların yetişməsi üçün geniş imkanlar yaradıb. Muxtar respublikada fəaliyyət göstərən idman federasiyalarının qarşısına idmanın inkişafı, kütləviliyi üçün mühüm vəzifələr qoyulub. Bu gün Naxçıvanda fəaliyyət göstərən federasiyaların nəzdində yüzlərlə yeniyetmə və gənc müxtəlif idman növləri ilə məşğul olur. Belə federasiyalardan biri də Şərq Döyüşü Sənəti Federasiyasıdır. 2015-ci ilin ilk 8 ayında federasiya Gənclər və İdman Nazirliyi ilə birgə 20-yə yaxın yarış, turnir və seminarlar təşkil edib. Keçirilən tədbirlər barədə məlumat verən federasiyanın sədr müavini Cavanşir Salayev bildirdi ki, Naxçıvanda təşkil edilən bütün idman yarışları yüksək səviyyəsi, kütləviliyi ilə seçilir. Federasiya olaraq cari ilin ilk 8 ayında nazirliklə birgə bir çox tədbirlər keçirmişik.

Naxçıvan boks tarixində ilkə imza atan və ilk dəfə Azərbaycanda keçirilən “Bakı-2015” Avropa Oyunlarının bürünc mükafatçısı Tayfur Əliyev yığma komandanın heyətində məşqlərini davam etdirir. Oktyabrda Qətərdə təşkil olunacaq dünya çempionatında iştirak edəcək boksçumuz hazırlıqlarına sentyabrın 1-dən start verib. Qarşıdakı dünya çempionatında 56 kiloqram çəki dərəcəsində rinqə çıxacaq Tayfur Əliyev sentyabrın 26-da millinin heyətində İtaliyaya gedəcək. İkihəftəlik təlim-məşq toplanışından sonra boksçumuz Qətərə yollanacaq. Qətərdə keçiriləcək dünya çempionatı böyük əhəmiyyət kəsb edir. Belə ki, bu çempionatda ilk 3 pilləni tutan idmançılar gələn il Braziliyanın Rio-de Janeyro şəhərində təşkil olunacaq Yay Olimpiya Oyunlarına birbaşa vəsiqə qazanacaqlar.

Xəbərlər şöbəsi

Naxçıvan şəhərindəki İslam Hümbətov adına Uşaq-gənclər idman məktəbində məktəblilərin asudə vaxtlarının səmərəli təşkil edilməsi məqsədilə yeniyetmələr (1999-2001-cil illər) arasında sərbəst güləş üzrə Naxçıvan şəhər birinciliyi keçirilib.
Naxçıvan Muxtar Respublikası Güləş Federasiyasının və Naxçıvan Şəhər Gənclər və İdman İdarəsinin birgə təşkilatçılığı ilə keçirilən yarışda 9 çəki dərəcəsində 50-yə yaxın idmançı qüvvəsini sınayıb. Yarışın açılış mərasimində çıxış edən idarənin rəisi Xəyal Qurbanov, Güləş Federasiyasının sədr müavini Faiq İsgəndərov bildiriblər ki, tədbirin keçirilməsində məqsəd məktəblilərin asudə vaxtlarını səmərəli təşkil etmək, yeniyetmələr arasında sərbəst güləş idmanını inkişaf etdirməklə Naxçıvan şəhərində güləş ənənələrinin inkişafına nail olmaqdır. Daha sonra çıxış edənlər yarışın qaydaları haqqında idmançılara geniş məlumat veriblər.
Beynəlxalq Güləş Federasiyasının mövcud qaydalarına əsasən keçirilən birincilikdə Elsun Kazımlı, Abbas Həsənov, Bağır Zeynalov, Kənan Kərimov, Murad Quliyev, Həsən Həsənov, Gündüz Məmmədov, Rauf Qurbanov və Nail Nuriyev müvafiq olaraq 42, 46, 50, 54, 58, 63, 69, 76 və 100 kiloqram çəki dərəcələrində mübarizə apararaq həmyaşıdları arasında birinci yerlərə layiq görülüblər.
Sonda hər çəki dərəcəsində yer tutan idmançılar Naxçıvan Şəhər Gənclər və İdman İdarəsinin diplomları ilə təltif olunublar.

 Ceyhun Məmmədov

İdman sahəsində qazanılan nailiyyətlər dövlətin ümumi inkişaf səviyyəsini, iqtisadi potensialını müəyyənləşdirən vacib meyarlardan biri kimi səciyyələndirilir. Azərbaycanda idman siyasətinin düzgün qurulduğunu bu sahədə qazanılmış uğurlu nəticələr təsdiqləyir. Uğurlu idman siyasətinin nəticəsidir ki, Azərbaycan dünyanın idman ictimaiyyəti tərəfindən ciddi tərəfdaş, idmançılarımız isə əsas rəqib kimi qəbul olunurlar. Ölkənin bütün regionlarında olduğu kimi, Naxçıvan Muxtar Respublikasında da idman sahəsində qazanılan uğurlar saysız-hesabsızdır. Bunun səbəbi isə idmana göstərilən diqqət və qayğıdır.

Bir il öncə Naxçıvan Muxtar Respublikası Gənclər və İdman Nazirliyinin nəzdində bədii gimnastika bölməsi yaradıldı. Qısa zaman kəsiyində bu bölmənin fəaliyyət dairəsi genişləndi və hazırda 100-dən çox 3-11 yaşlı qızlar bu idman növü ilə məşğul olur. Ak­tyorluq, balet, musiqi və pantomim ilə birlikdə edilən bədii gimnastikanın özünəxas qaydaları və qiymətləndirmə sistemi var. Qız uşaqlarının fiziki tərbiyəsində mühüm rol oynayan bədii gimnastika onlarda elastik və çevik hərəkətlərin meydana gəlməsinə imkan yaradır. Bu idman növündə insanın hər bir hiss və həyəcanı bədənin müəyyən hərəkəti ilə müşayiət olunur.

İlham Əliyev adına Olimpiya-İdman Kompleksində “Zərərli vərdişlərə yox deyək, həmişə sağlam olaq” devizi altında yeniyetmə və gənclər arasında boks üzrə Naxçıvan şəhər açıq birinciliyi keçirilib. Naxçıvan Muxtar Respublikası Boks Federasiyası ilə Naxçıvan Şəhər Gənclər və İdman İdarəsinin təşkil etdiyi birincilikdə 16 çəki dərəcəsində 40-a yaxın idmançı mübarizə aparıb.
Açıq birincilikdə Naxçıvan şəhərinin komandası ilə yanaşı, Ordubad və Kəngərli rayonlarının dəri əlcək ustalarından ibarət komandaları da qüvvələrini sınayıblar. Yarışın yekun nəticəsinə əsasən, Elvin Seyidov (Ordubad), Nazim Abazərli (Naxçıvan), Süleyman Abdullayev (Kəngərli), Ayxan Quliyev (Naxçıvan), Ülvi Süleymanov (Naxçıvan), Hidayət Məmmədov (Naxçıvan), Kənan İbrahimov (Ordubad), Muxtar Fərzəliyev (Naxçıvan), Ayxan Süleymanov (Naxçıvan), Əbülfəz Xəlilov (Naxçıvan), Zakir Abbas­ov (Naxçıvan), Yenisey İman­ov (Naxçıvan), Arif Bayramov (Naxçıvan), Yuris Allahverdiyev (Naxçıvan), Qənbər Abdullayev (Naxçıvan) və Toğrul İsmayıllı (Naxçıvan) müvafiq olaraq 28, 32, 34, 38, 40, 42, 46, 48, 50, 54, 57, 60, 64, 69, 75, 81 kiloqram çəki dərəcələrində I yerə layiq görülüblər.
Sonda qaliblər Naxçıvan Şəhər Gənclər və İdman İdarəsinin diplomları ilə təltif olunublar.

 Ceyhun Məmmədov

Amerika Birləşmiş Ştatlarının Las-Veqas şəhərində 2016-cı ildə Braziliyanın Rio-de Janeyro şəhərində keçiriləcək XXXI Yay Olimpiya Oyunlarına ilk lisenziyaların qazanıldığı güləş üzrə dünya çempionatı başa çatıb. Sərbəst güləş yarışlarında ötənilki dünya və Avropa çempionu, Naxçıvan güləş məktəbinin yetirməsi Hacı Əliyev bu dəfə Las-Veqası fəth edib. 61 kiloqram çəki dərəcəsində mübarizə aparan həmyerlimiz finala qədər maneəsiz irəliləyib. Moldovadan Andrey Perpelita, Yaponiyadan Masakazu Kamoi, yarımfinalda isə bolqar Vladimir Dubov güləşçimiz qarşısında tab gətirməyib. Finalda Hacı Əliyevin rəqibi Monqolustandan Nomin Batbold olub. Rəqibinə vaxtından əvvəl qalib gələn güləşçimiz ikinci dəfə dünya çempionatının qızıl medalına yiyələnib və Azərbaycan sərbəst güləş tarixində ilk ikiqat dünya çempionu adını qazanıb.

 Ceyhun Məmmədov

Naxçıvan şəhərindəki Uşaq-gənclər idman məktəbində “Zərərli vərdişlərə yox deyək, həmişə sağlam olaq” devizi altında “Naxçıvan” və “Culfa” komandaları arasında cüdo üzrə yoldaşlıq görüşü keçirilib.

Naxçıvan Şəhər və Culfa Rayon Gənclər və İdman idarələri ilə Uşaq-gənclər idman məktəbinin birgə təşkil etdiyi yarışda 10 çəki dərəcəsindən 50 idmançı iştirak edib.
Yarışın açılışında çıxış edən Naxçıvan Şəhər və Culfa Rayon Gənclər və İdman idarələrinin rəisləri Xəyal Qurbanov və Ümid Həsənli, Uşaq-gənclər idman məktəbinin dərs hissə müdiri Hikmət Hüseynov yarışın keçirilmə məqsədi və qaydaları haqqında idmançılara geniş məlumat veriblər.
Yekun nəticəyə əsasən, culfalı cüdoçular yoldaşlıq görüşündə naxçıvanlı həmkarlarını 6:4 hesabı ilə məğlub etməyi bacarıblar.
Sonda fərqlənən idmançılara diplom və fəxri fərmanlar təqdim edilib.

 Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksində “Zərərli vərdişlərə yox deyək, həmişə sağlam olaq” devizi altında Naxçıvan Muxtar Respublikası Karate-do Federasiyasının “Naxçıvan” və “Budokan” komandaları arasında karate-do üzrə yoldaşlıq görüşü keçirilib.
Naxçıvan Muxtar Respublikası Karate-do Federasiyasının və Naxçıvan Şəhər Gənclər və İdman İdarəsinin təşkil etdiyi görüşün açılış mərasimində çıxış edən Gənclər və İdman İdarəsinin rəisi Xəyal Qurbanov bildirib ki, bu yarışı keçirməkdə məqsəd məktəbliləri zərərli vərdişlərdən kənarlaşdırmaq, Naxçıvan şəhərində yeniyetmə və gəncləri idmana cəlb etməkdən ibarətdir.
Səkkiz yaş qrupunda 40-a yaxın idmançının iştirak etdiyi görüş “Naxçıvan” komandasının 5:3 hesablı qələbəsi ilə başa çatıb.
Sonda fərqlənən idmançılara Naxçıvan Şəhər Gənclər və İdman İdarəsinin diplom və fəxri fərmanları təqdim edilib.

 Ceyhun Məmmədov

Cari ildə muxtar respublika idmançılarının beynəlxalq arenalarda qazandıqları uğurlara daha biri əlavə olunub.
Naxçıvan Muxtar Respublikası Şərq Döyüşü Sənəti Federasiyasının yetirməsi İlkin Səfərov bu dəfə bayrağımızı İngiltərənin Norviç şəhərində dalğalandırmağa müvəffəq olub. Bu şəhərdə MMA qarışıq döyüş növü üzrə keçirilən dünya çempionatında idmançımız finala kimi rinqdə rəqiblərinə qalib gəlib. Həlledici qarşılaşmada onun rəqibi yerli döyüşçü olub. İlkin Səfərov rəqibini məğlub edərək cari ildə ikinci dəfə dünya çempionu adını qazanıb.
Qeyd edək ki, idmançımız iyul ayında İtaliyada keçirilən dünya çempionatında da fəxri kürsünün ən yüksək pilləsinə qalxmışdı.

Ceyhun Məmmədov

Yeni Azərbaycan Partiyası Şahbuz Rayon Təşkilatı Heydər Əliyev adına Gənclər Birliyi rayon Gənc­lər və İdman İdarəsi ilə birgə ümumtəhsil məktəblərinin şagirdləri arasında şahmat üzrə rayon birinciliyi keçirib.
İsveçrə sistemi ilə keçirilən yarışın məqsədi məktəblilərin asudə vaxtının səmərəli təşkili və onların bu idman sahəsinə cəlbindən ibarət idi. 20 zəka sahibinin qüvvəsini sınadığı birincilik gərginliyi ilə yadda qalıb və Umud Məhərrəmli bütün rəqiblərinə qalib gələrək birinci yerə layiq görülüb. Digər iki pillədə isə Tuncay Cabbarov və Sunay Hüseynli qərarlaşıblar.
Şahmat birinciliyi ilə yanaşı, təşkilatçılar ümumtəhsil məktəblərinin şagirdləri arasında velosiped üzrə rayon birinciliyi də təşkil ediblər. Sahbuz şəhərində 28 May və Səməd Vurğun küçələri arasında 2000 metr məsafəni 20-dən çox velosipedçi birinci qət etməyə çalışıb. Yarışın yekun nəticəsinə əsasən, Murad Bağırov rəqiblərini qabaqlayaraq finiş xəttinə hamıdan tez çatıb. Elçin Hüseynli və Aydın Muradlı isə rayon birinciliyini müvafiq olaraq ikinci və üçüncü pillədə başa vurublar.
Şahbuz rayonunda “Zərərli vərdişlərə yox deyək, həmişə sağlam olaq” devizi altında futbol üzrə yoldaşlıq görüşü keçirilib. Uşaq-Gənclər İdman Məktəbinin komandası ilə Şahbuzkənd komandasının üz-üzə gəldiyi görüş “sülh”lə yekunlaşıb – 2:2.
Keçirilən tədbirlərdən sonra uğur qazanan idmançılara təşkilatçılar tərəfindən diplomlar təqdim edilib.

Ceyhun Məmmədov

Azərbaycan idmanı bu gün dünya arenasında özünəməxsus yerə sahibdir. Dövlət başçısı cənab İlham Əliyevin diqqət və qayğısı sayəsində idman böyük bir inkişaf yolundadır. Ölkə Prezidenti çıxışlarının birində idmanın ölkəmizdə sürətlə inkişaf etdiyini bildirərək deyib: “Mən qətiyyətlə deyərdim ki, dünyanın heç bir ölkəsində bizim dövlətimiz qədər idmana qayğı göstərilmir. Bunun da bariz nümunəsidir ki, son illər istər olimpiadalarda, istərsə də müxtəlif turnirlərdə yüksək nəticələr əldə olunur. Son illər idmançılarımız respublikamızı beynəlxalq arenalarda layiqincə təmsil edirlər”.
Bu gün Azərbaycanda həyata keçirilən idman siyasəti Naxçıvan Muxtar Respublikasında da uğurla davam etdirilir. Burada müxtəlif idman federasiyaları, eləcə də Voleybol Federasiyası yaradılıb və bu idmanın kütləviləşməsi üçün məqsədyönlü işlər görülüb. Hazırda voleybol muxtar respublikada kütləvi hal alıb, gənclər və yeniyetmələrin bu sahəyə marağı artıb.
Xatırladaq ki, voleybol hərəsi 6 oyunçudan ibarət olan iki komanda arasında topla oynanılan idman növüdür. 1964-cü ildən Yay Olimpiya Oyunlarının proqramına salınıb. Oyunun məqsədi topu tor üzərindən aşırıb rəqib komandanın meydançasında yerə dəyməsinə nail olmaq və xal qazanmaqdır. Populyarlıq dərəcəsinə görə kollektiv idman növlərindən futbol və basketboldan sonra voleybol həndbol, buz xokkeyi, reqbi kimi məşhur idman növlərindən daha çox auditoriyaya malikdir.

Naxçıvan Muxtar Respublikası Voleybol Federasiyasının Şahbuz rayon bölməsinin və Şahbuz Rayon Gənclər və İdman İdarəsinin təşkilatçılığı ilə “Zərərli vərdişlərə yox deyək, həmişə sağlam olaq” devizi altında Şahbuz rayonunun idarə, müəssisə, təşkilat və kənd inzibati ərazi dairələrinin voleybol komandaları arasında rayon birinciliyi keçirilib.
Yarışın keçirilməsində məqsəd gənclərə zərərli vərdişlərin insan həyatı üçün nə dərəcədə mənfi hal olduğunu aşılamaq, rayonda voleybol idman növünün kütləviliyinə nail olmaq və Şahbuz rayon voleybol yığma komandasının tərkibinə yeni istedadlı gəncləri daxil etmək idi. Olimpiya sistemi üzrə 4 gün davam edən birincilikdə 10 komanda mübarizə aparıb.
Finala gedən yolda bütün rəqiblərini məğlub edən İcra Hakimiyyətinin komandası ilə Kükü kənd inzibati ərazi dairəsinin komandası həlledici qarşılaşmada üz-üzə gəliblər. Daha üstün oyun sərgiləyən birincilər meydanı 3:1 hesablı qələbə ilə tərk ediblər.
Sonda qalib komandaya kubok, medal və diplom təqdim olunub.

 Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksində voleybol üzrə yoldaşlıq görüşü keçirilib. Naxçıvan Muxtar Respublikası Gənclər və İdman Nazirliyi ilə Voleybol Federasiyasının birgə təşkil etdiyi görüşdə Şahbuz və Ordubad komandaları üz-üzə gəlib. Yoldaşlıq görüşündən öncə çıxış edən federasiyanın sədr müavini Aydın Mirzəyev bildirib ki, son illər muxtar respublikada idman sahəsinə göstərilən diqqət və qayğı nəticəsində idmançılarımız hər bir yarışda uğurla çıxış edirlər.
Daha sonra federasiyanın sədr müavini görüşün qaydaları haqda iştirakçıları məlumatlandırıb və onlara uğurlar arzulayıb.
Gərgin idman mübarizəsi şəraitində keçən qarşılaşma Şahbuz voleybolçularının 3:0 hesablı qələbəsi ilə yekunlaşıb.
Hər iki komandaya hədiyyələr təqdim olunub.

Ceyhun Məmmədov

Cəmiyyətin sağlam şəkildə formalaşması vacib olduğu kimi, idmanın kütləvi hal alması, istedadlı idmançıların üzə çıxması və onların uğur qazanması üçün müəyyən edilmiş standartlara cavab verən idman obyektlərinin olması da vacibdir. Naxçıvan Muxtar Respublikasında bu sahənin inkişafı və geniş yayılması, cəmiyyətin sağlam ruhda formalaşması üçün idman kompleksləri, zalları, obyektləri istifadəyə verilib. Bu da idmançılarımızın əldə etdikləri qələbələrdə mühüm amillərdən biridir.
Ölkə başçısının idman sahəsində apardığı uğurlu siyasət nəticəsində bu gün Azərbaycan dünyada idman ölkəsi kimi tanınır. Naxçıvanda idman infrastrukturunun gündən-günə yenilənməsi, yeni idman obyektlərinin istifadəyə verilməsi idmançılarımızın beynəlxalq arenalarda uğurlu çıxışına zəmin yaradıb. Belə idman obyektlərindən biri də Naxçıvan şəhərində yaradılmış Üzgüçülük Mərkəzidir. Müasir dövrümüzdə üzgüçülük dünya arenalarında ən geniş yayılmış idman növüdür. Səbəbi isə çox sadədir: bu növ ideal bədən və əzələ quruluşuna sahib olmağımız üçün xüsusi əhəmiyyətə malikdir.

Türkiyənin Sakarya şəhərində cüdo üzrə beynəlxalq turnir keçirilib. Bir çox ölkənin iştirak etdiyi turnirdə Azərbaycan yığması da mübarizə aparıb. Sevindirici haldır ki, millimizin heyətində Türkiyəyə Naxçıvan Muxtar Respublikası Güləş Federasiyasının yetirməsi Abdulla İsmayılov da yollanıb. 90+ kiloqram çəki dərəcəsində tatamiyə çıxan həmyerlimiz finala kimi bütün rəqiblərini məğlub edib. Həlledici qarşılaşmada məğlub olan Abdulla İsmayılov beynəlxalq turniri ikinci pillədə başa vurub.
Sonda idmançımıza medal və Türkiyə Gənclər və İdman Nazirliyinin diplomu təqdim olunub.

Ceyhun MƏMMƏDOV

İlham Əliyev adına Olimpiya-İdman Kompleksinin Üzgüçülük Mərkəzində “Zərərli vərdişlərə yox deyək, həmişə sağlam olaq” devizi altında yeniyetmə və gənclər arasında üzgüçülük üzrə Naxçıvan şəhər birinciliyi keçirilib.
Açılış mərasimində çıxış edən mərkəzin direktoru Ramin Talıbov və Naxçıvan Şəhər Gənclər və İdman İdarəsinin rəisi Xəyal Qurbanov bu yarışı keçirməkdə məqsədin məktəbliləri zərərli vərdişlərdən kənarlaşdırmaq, onlarda üzgüçülük idman növünü inkişaf etdirmək, məktəbliləri sağlam həyat tərzinə uyğunlaşdırmaq olduğunu qeyd ediblər. İlham Əliyev adına Olimpiya-İdman Kompleksinin və Naxçıvan Şəhər Gənclər və İdman İdarəsinin birgə təşkilatçılığı ilə keçirilən yarışda 2 yaş qrupunda 30-a yaxın idmançı iştirak edib və üzgüçülüyün sərbəst üsulu üzrə 25 və 50 metr məsafəni qət etməyə çalışıb. Nəticəyə əsasən, 50 metr məsafədə 1999-cu il təvəllüdlü idmançılar arasında Turan Məmməd­ov, 25 metr məsafədə 2000-ci il təvəllüdlü idmançılar arasında Vüqar Nəsirli bütün rəqiblərini qabaqlayaraq birinci yerə layiq görülüblər.
Sonda hər yaş qrupunda I, II və III yerləri tutan idmançılara təşkilatçıların diplom və fəxri fərmanları təqdim edilib.

 Ceyhun MƏMMƏDOV

      İdman sahəsində ən böyük uğur insanın bilik və düşüncəsinin vəhdəti ilə  əldə edilir. Biliyə isə tədris vasitəsilə çatmaq olar. Bu iki birləşməni bacaran idmançı istədiyi göstəriciyə nail olmaq imkanına malikdir. Bilik və düşüncədən öncə insan psixologiyasında problemlər olmamalı, ağıl və əqli bacarıqlar bu sahə ilə məşğul olmağa imkan yaratmalıdır.  

İdmançıda əqli yüksəliş

İnsanın psixoloji halı olaraq fikrin bir obyektə toplanmış və ya fokuslanmış vəziyyəti beyində diqqəti yaradır. Bəs beyin idmanda hansı rolu oynayır? Bəzən peşəkar idmançı olmaq üçün peşəkar mütəxəssisə ehtiyacın olduğu kimi, peşəkar həkimə də müraciət vacibdir. Avropalı alimlər təsdiq ediblər ki, hər məşqdə əqli bacarıqlar üzərində işləməklə onların imkanlarını artırmaq mümkündür. Qısası, insan öz əqli bacarığının 5 faizindən istifadə etmək gücünə malikdir. Bu isə idmançıların daha uğurlu çıxış etməsinə zəmin yaradır.
Son illər Azərbaycanda da məşqçilər “idmanda düşüncə” adlı yeni tədris planı hazırlayıblar ki, bu da heç Avropadan geri qalmır. İdmanda düşüncə nədir? Hər tədrisdən öncə idmançılarla 10-15 dəqiqə ərzində nəzəri və praktik formada dərs keçilir. Bu zaman məşqçilər yetirmələrinə suallar ünvanlayır, fərdi cavablar alındıqdan sonra bütün komanda üçün konkretləşmiş cavab müəyyən edilir və məşqə start verilir.

Nəzəri və praktik tədris

İdmanda düşüncə özlüyündə iki yerə bölünür:
- mənəvi düşüncə;
- peşə düşüncəsi.
Məşqçilərin fikrincə, bu düşüncələr idmançının özünü dərk etməsinə, onun şəxsiyyət kimi formalaşaraq fəaliyyət göstərməsinə zəmin yaradır ki, bunun nəticəsində cəmiyyət fədakar insan və idmançı qazanmış olur.
Mənəvi düşüncə: Bunu anladıqca idmançı özünü dərk etməyə başlayır, insanın dərk halı isə psixikanın yüksək halı hesab edilir. İdmançı mənəvi olaraq yüksələrkən o dərk etməyə başlayır ki, dünya və həyatın gözəlliyi onun üçün yaradılmışdır və o, bunu qorumalıdır. Onun hər bir çıxışı, arenada yüksəlişi yeni bir sənət əsəri yaratmaqdır. Nəhayət, idmançı dərk edir ki, onun gördüyü hər bir iş, qazandığı hər bir uğur özü üçün yox, vətən, xalq naminədir. Bu anda o, insanlıq missiyasını praktik olaraq yerinə yetirdiyini dərk edərək fəaliyyət göstərir. Nəticə: idman həm dünyanı, həm də insanlığı məhvdən qoruyan insan yaratmış olur.
Peşə düşüncəsi: Adından da göründüyü kimi öz peşəsini əhatə edir. İdmançının peşəsi ətrafında düşünməsi ona hər vəziyyətdən çıxış yolu tapmaq bacarığı aşılayır və eyni zamanda ona operativ fikirləşmək, düzgün qərar çıxarmaq bacarığı verir.­
Hər bir idmançı peşə yüksəlişinə axtarışlar, yeniliklər etməklə çata bilər. İdmançı hər an sevdiyi peşəsini həyatının əsas məqsədi olduğunu düşünməlidir. Yalnız bu halda o, peşə kamilliyinə malik ola bilər. Bunun üçün məşqçilər gündəlik məşqlərdə idmançıya əlçatmaz zirvədə yerləşən arzusuna bir pillə yaxınlaşdığını vizual olaraq göstərməlidir.
İdmanda tədris əvvəlcə nəzəri, sonra isə praktik olaraq icra olunur. Bu tədris üsulu idmançının peşə biliyini daha tez, daha kamil qavramasına böyük təsir göstərir. Düşüncə tədrisinin bugünkü idmana nə qədər vacib olduğunu biz yuxarıda da gördük. Bu gün idman güc mübarizəsindən ağıl mübarizəsinə yönəlib ki, bu da idmançıların, ilk olaraq, şüurlu fərd kimi formalaşmasında müstəsna rol oynayır.

 Ceyhun MƏMMƏDOV

Naxçıvan Muxtar Respublikası Gənclər və İdman Nazirliyi, Boks Federasiyası və Şahbuz Rayon Gənclər və İdman İdarəsinin təşkilatçılığı ilə Naxçıvan və Şahbuz komandaları arasında boks üzrə yoldaşlıq görüşü keçirilib.
Şahbuz rayonunda baş tutan görüşdən öncə çıxış edən federasiyanın sədr müavini Məmmədcəfər Əliyev və rayon Gənclər və İdman İdarəsinin rəisi Vüqar Muradov muxtar respublikamızda gənclərin bu növə olan marağından danışıb, son illər qazanılan uğurlar barədə iştirakçıları məlumatlandırıblar. “Bakı-2015” birinci Avropa Oyunlarında Tayfur Əliyevin bürünc mükafat qazanmasını muxtar respublikada idman və idmançılara göstərilən diqqətin bariz nümunəsi kimi qeyd ediblər.
10 çəki dərəcəsində keçirilən yoldaşlıq görüşündə Naxçıvan boksçularının rinqdə daha əzmkar olmaları hesaba da öz təsirini göstərib. Belə ki, onlar şahbuzlu həmkarlarını 6:4 hesabı ilə məğlub etməyi bacarıblar.
Sonda fərqlənən idmançılara təşkilatçılar tərəfindən diplomlar təqdim edilib.

 Ceyhun MƏMMƏDOV

Naxçıvan Muxtar Respublikası ali, orta ixtisas təhsili müəssisələrinin tələbələri və ümumtəhsil müəssisələrinin şagirdlərinin iştirakı ilə “Zərərli vərdişlərə yox deyək, həmişə sağlam olaq” devizi altında velosiped yürüşü üzrə muxtar respublika birinciliyi keçirilib. Naxçıvan Muxtar Respublikası Gənclər və İdman Nazirliyi ilə Hava və Ekstremal İdman Növləri Federasiyasının birgə təşkil etdiyi birinciliyin açılış mərasimində çıxış edən federasiyanın sədr müavini Azər Məmmədov keçirilən yarışın mahiyyəti haqda məlumat verib. Sonra nazirliyin Kütləvi bədən tərbiyəsi və idman şöbəsinin müdiri Taleh İbrahimov çıxış edərək son illər muxtar respublikada idmanın yüksəlişindən və göstərilən qayğıdan danışıb. Nazirlik nümayəndəsi həmçinin yarışın qaydaları haqda iştirakçıları məlumatlandırıb.
Naxçıvan Muxtar Respublikasında hava və ekstremal idman növlərini tanıtmaq, inkişaf etdirmək və kütləviliyinə nail olmaq məqsədilə keçirilən yarışda 40-dan çox velosipedçi iştirak edib. Yarışın reqlamentinə əsasən, iştirakçılar fərdi və komanda hesabında mübarizə aparıblar.
Fərdi hesabda Naxçıvan Dövlət Universitetinin tələbəsi Rəşad Əhmədov bütün rəqiblərini qabaqlayaraq birinci yerə layiq görülüb. Universitetin digər tələbəsi Xalid Novruzov ikinci, Şahbuz rayon komandasının üzvü Əsəd Fərzəlizadə isə üçüncü olublar.
Komanda hesabına gəlincə, Naxçıvan Dövlət Universitetinin komandası muxtar respublika birinciliyini ilk pillədə başa vurub. Digər iki pillədə isə Şahbuz rayonunun və Naxçıvan Dövlət Texniki Kollecinin komandaları qərarlaşıblar.
Sonda qaliblərə təşkilatçılar tərəfindən diplom və hədiyyələr təqdim olunub.

 Ceyhun Məmmədov

İdman sağlamlıqdır, sağlam həyat tərzidir. İdman sağlamlığı və cəmiyyətin inkişafını təmin edən ən vacib sahələrdən biridir. Bu sahə ilə məşğul olan insanlar fiziki cəhətdən sağlam olduqları kimi, ruhən də sağlam, zərərli vərdişlərdən uzaq olurlar. Fiziki cəhətdən qüvvətli insan özünü daha da qətiyyətli, inamlı hiss edir. Hərtərəfli inkişaf etmiş insan həyatda tam iki cür sağlamlığa malik olmalıdır: mənəvi və fiziki sağlamlıq. Bu iki sağlamlığın vəhdətini  insana ancaq idmanın verməyə qüdrəti var. Müstəqillik və dövlətçiliyin möhkəmləndirilməsi, etibarlı gələcəyin təminatı əhalinin aktivliyinin artırılmasından asılıdır ki, bunun da əsasını sağlam həyat tərzi təşkil edir.

Azərbaycanda idman siyasətinin düzgün qurulduğunu bu sahədə qazanılmış uğurlu nəticələr təsdiqləyir: ölkəmizdə beynəlxalq səviyyəli yarışlar təşkil olunur, idmançılarımız hər il müxtəlif idman növləri üzrə keçirilən Avropa və dünya çempionatlarında yüksək nəticələr göstərirlər. Azərbaycan Prezidenti cənab İlham Əliyevin bu yarışları izləməsi, idmançılarımıza mənəvi dəstək olması, onları ruhlandırması da vacib amillər kimi vurğulanmalıdır.

Son illər muxtar respublikamızda da aparılan idman siyasəti özünü qabarıq şəkildə büruzə verməkdədir. Bu baxımdan cari ilin ilk 7 ayı ərzində Şərur Rayon Gənclər və İdman İdarəsinin gördüyü işləri qənaətbəxş hesab etmək olar. İdarənin rəisi Ramil Dadaşov bizimlə söhbətində dedi ki, Gənclər və İdman İdarəsinin məqsədi Şərur rayonunda bütün idman növlərinə marağı artırmaq, həmçinin istedadlı idmançıları üzə çıxarmaqdır. Artıq bir çox yarışlarda perspektivli uşaqlar seçilib və onlarla mütəmadi olaraq məşqlər aparılır.

İdman böyük təbliğat vasitəsidir. İdmançılar dünyanın əksər ölkələrində bir sıra peşə sahiblərindən daha çox tanınır, böyük sevgi ilə qarşılanır. Bu rəğbətin əvəzində isə onlar arenalarda azarkeşlərə əsl mübarizənin nə olduğunu nümayiş etdirməyə çalışırlar. Bütün sahələr maraqlı, çətin olduğu qədər, eyni zamanda məsuliyyətlidir: insanın bu məsuliyyəti dərk etməsi və onu sevməsi işini ikiqat çətinləşdirir. İdman sahəsində məsuliyyətli sənətlərdən biri məhz məşqçilikdir. Bu sahə onunla məşğul olan insandan yüksək bacarıq, dözüm, səbir, ustalıq, peşəkarlıq tələb edir. Son dövrlər dünya idmanında yaxşı məşqçi termini geniş yayılıb. Bəs yaxşı məşqçi kimdir? Cavabı qısa və sadədir: idmançılar üçün həm yaxın dost, yaxşı psixoloq, həm də arxa, kömək. Bu cür məşqçilər Naxçıvan Muxtar Respublikasında kifayət qədərdir. Belə mütəxəssislərdən biri də boks üzrə muxtar respublika yığmasının baş məşqçisi, “Tərəqqi” medallı Məmmədəli Eyvazovdur.

Naxçıvan şəhərindəki İlham Əliyev adına Olimpiya-İdman Kompleksinin Üzgüçülük Mərkəzində “Zərərli vərdişlərə yox deyək, həmişə sağlam olaq” devizi altında məktəblilərin yay tətilinin səmərəli təşkili məqsədilə yeniyetmələr arasında üzgüçülük üzrə Naxçıvan şəhər birinciliyi keçirilib.
Dörd yaş qrupunda 40-a yaxın idmançının iştirak etdiyi birincilikdə gənc üzgüçülərin gərgin mübarizəsi diqqətdən yayınmayıb. Nəticəyə əsasən, 2001-ci il təvəllüdlü idmançılar arasında Vüqar Nəsirli, 2002-ci il təvəllüdlü idmançılar arasında Məhəmməd Abasquliyev, 2003-cü il təvəllüdlü idmançılar arasında Amil Kətanov, 2004-2006-cı illər təvəllüdlü idmançılar arasında isə Abdulla Əlisoy bütün rəqiblərini qabaqlayaraq finiş xəttinə hamıdan tez çatıblar.
Sonda hər yaş qrupunda I, II və III yerləri tutan idmançılara təşkilatçıların diplom və fəxri fərmanları təqdim edilib.

 Ceyhun MƏMMƏDOV

Ukraynanın Odessa şəhərində universal döyüş növü üzrə Avropa çempionatı keçirilib. Qitə birinciliyində Azərbaycan Universal Döyüş Federasiyasının idmançıları da iştirak ediblər. Sevindirici haldır ki, Naxçıvan idmançısı Xəyal Abdullayev də millimizin heyətində bu birincilikdə çıxış edib.
Naxçıvan Muxtar Respublikası Şərq Döyüşü Sənəti Federasiyasının yetirməsi 80 kiloqram çəki dərəcəsində mübarizə aparıb. İdmançımız Moldova, Rumıniya və Türkiyə idmançılarını məğlub edərək finala yüksəlib. Həlledici qarşılaşmada Xəyal Abdullayev ukraynalı həmkarı Viktor Qanko ilə üz-üzə gəlib. Bu qarşılaşmanın nəticəsinə görə o, qitə birinciliyini ikinci pillədə başa vurub.
İdmançımız təşkilatçılar tərəfindən diplom və medala layiq görülüb.
Qeyd edək ki, Xəyal Abdullayev oktyabr ayında Azərbaycan Universal Döyüş yığmasının heyətində dünya çempionatında iştirak edəcəkdir.

 Ceyhun MƏMMƏDOV

Naxçıvan Şəhər Şahmat Mərkəzində “Zərərli vərdişlərə yox deyək, həmişə sağlam olaq” devizi altında məktəblilərin yay tətilinin səmərəli təşkili məqsədilə yeniyetmələr arasında şahmat üzrə şəhər birinciliyi keçirilib. Naxçıvan Şəhər Gənclər və İdman İdarəsi ilə Naxçıvan Şəhər Uşaq-gənclər şahmat məktəbinin birgə təşkil etdiyi birincilikdə 8-12 yaş qruplarında 60-a yaxın oğlan və qız şahmatçı iştirak edib. İsveçrə sistemi üzrə 7 turdan ibarət olan yarışın açılış mərasimində çıxış edən şəhər Gənclər və İdman İdarəsinin rəisi Xəyal Qurbanov bildirib ki, bu yarışı keçirməkdə məqsəd məktəblilərin yay tətilində asudə vaxtlarının daha səmərəli təşkil edilməsindən ibarətdir. Sonra Naxçıvan Şəhər Uşaq-gənclər şahmat məktəbinin direktoru Emin Hacıyev çıxış edərək yarışın qaydaları haqqında şahmatçılara məlumat verib.
Yarışın yekun nəticələrinə əsasən, oğlanlar arasında Əbülfəz Məmmədli, Əli Həsənov, Əli və Əjdər Rzalı, qızların mübarizəsində isə Azərin Cəfərli, Azərin Məmmədli və Səma Sadiqova müvafiq yaş qruplarında bütün rəqiblərinə qalib gələrək birinci olublar.
Sonda hər yaş qrupunda qalib gələn idmançılara diplomlar təqdim edilib.

 Ceyhun MƏMMƏDOV

İsveçin Landskrona şəhərində keçirilən yaşı 15 və 17-yə qədər olan yeniyetmələrin ağır atletika üzrə Avropa birinciliyi davam edir. Turnirdə Azərbaycan milli komandası da iştirak edir. Yaşı 15-ə qədər olan idmançıların mübarizəsində 27 ölkədən 141 (63 qız, 78 oğlan), yaşı 17-yə qədər olan idmançıların mübarizəsində isə 29 ölkədən 192 (80 qız, 112 oğlan) atlet birincilik uğrunda mübarizə aparır.
Yığmamızın heyətində İsveçə yollanan idmançılar arasında Naxçıvan təmsilçisi Tarmenxan Babayev də var. O, yaşı 15-ə qədər oğlanların yarışında 62 kiloqram çəki dərəcəsində mübarizə aparıb. İdmançımız 197 kiloqram yekun nəticə göstərərək sıralamada 6-cı yeri tutub.
Qeyd edək ki, Avropa birinciliyi avqust ayının 9-na kimi davam edəcək.

Ceyhun Məmmədov

Muxtar respublikanın kompleks inkişafı idman sahəsini də əhatə edib.
Bir neçə ildir ki, möhtəşəm idman yarışlarına ev sahibliyi edən Naxçıvan şəhərində, həmçinin rayon mərkəzlərində həyata vəsiqə alan yeni idman obyektləri, həmin obyektlərin maddi-texniki bazalarının gücləndirilməsi həm idmana marağı artırmaqda, həm də yeni qələbələr qazanılmasında başlıca amildir.
Öz işini günün tələbləri səviyyəsində quran qurumlardan biri də Naxçıvan şəhərində fəaliyyət göstərən Uşaq-gənclər idman məktəbidir. Məktəb gənclərin yay tətilini səmərəli keçirməsi üçün tədbirlər planı hazırlayıb və onları həyata keçirməkdədir.
Keçirilən yarışların mahiyyətini, onların verdiyi nəticələri və gəncləri idmana cəlb etmək üçün hansı tədbirlərin görüləcəyini öyrənmək üçün məktəbin direktoru, Naxçıvan Muxtar Respublikası Güləş Federasiyasının sədr müavini Faiq İsgəndərovla söhbətləşdik. Faiq müəllim bildirdi ki, Uşaq-gənclər idman məktəbində idmanın sərbəst və yunan-Roma güləşi, cüdo və sambo növləri üzrə məşqlər keçirilir. Hazırda bu məşqlər 16 müəllim tərəfindən aparılır və məktəbimizə müraciət edənlərin sayı da gündən-günə artmaqdadır. Həftənin 6 günü daxil olmaqla məşqlərdə ayrı-ayrı növlər üzrə, ümumilikdə, 500-ə yaxın uşaq, yeniyetmə və gənc iştirak edir. Məqsəd isə muxtar respublikada bu idman növlərinə olan marağı artırmaq, onları məktəblilər, həmçinin gənclər arasında kütləvi hala gətirmək, yarışlarda uğur əldə edən idmançıları milli komandaya dəvət etməkdir. 2015-ci ilin birinci yarımili ərzində uşaq, yeniyetmə və gənclərin yay tətilinin səmərəli təşkili, asudə vaxtlarından düzgün istifadə etmələri üçün nəzərdə tutulan bir sıra tədbirlər reallaşdırılıb.

Məktəblilərin yay tətilində asudə vaxtlarının səmərəli keçirilməsi məqsədilə Culfa şəhər mərkəzi futbol meydançasının qaçış zolağında “Zərərli vərdişlərə “yox” deyək, həmişə sağlam olaq” devizi altında yüngül atletikanın kross növü üzrə rayon birinciliyi keçirilib. 800 və 1500 metr məsafələr üzrə keçirilən yarışda 60-a yaxın idmançı iştirak edib. Culfa Rayon Gənclər və İdman İdarəsi, Təhsil Şöbəsi və Uşaq-gənclər idman məktəbinin birgə təşkil etdiyi birinciliyin yekun nəticəsinə əsasən, 800 metr məsafədə Cəlal Məmmədov bütün rəqiblərini qabaqlayaraq qalib adını qazanıb. Bu məsafədə Ayxan Abbasov və Həsən Həsənli digər iki pillədə qərarlaşıblar. 1500 metr məsafədə isə Elgün İmanov finiş xəttinə birinci çatıb. Elsevər Məmmədov və Məhəmməd Quliyev isə müvafiq olaraq ikinci, üçüncü pillələri bölüşüblər.
Qalib və fərqlənən iştirakçılara təşkilatçılar tərəfindən diplomlar təqdim edilib.

…voleybol üzrə yoldaşlıq görüşü keçirilib

Rayonda həmin deviz altında təşkil edilən tədbirlərdən biri də Əbrəqunus kənd tam orta məktəbinin idman zalında baş tutub. Burada Əbrəqunus və Bənəniyar kənd tam orta məktəblərinin komandaları arasında voleybol üzrə yoldaşlıq görüşü keçirilib. Görüşdə Əbrəqunus kənd tam orta məktəbinin komandası rəqibini 3:1 hesabı ilə məğlub edib.

Ceyhun MƏMMƏDOV

Naxçıvan Muxtar Respublikası Gənc­lər və İdman Nazirliyinin nəzdində stolüstü tennis idman növü üzrə bölmə fəaliyyətə başlayıb. Naxçıvan şəhərindəki Üzgüçülük Mərkəzində həftənin 1, 3 və 5-ci günləri oğlan qruplarına, 2 və 4-cü günləri isə qız qruplarına stolüstü tennisin qaydaları öyrədilir.
Məşqçi Vüqar Tağıyev söhbətində yeni yaradılan bölmə haqda dedi: “Bölmə­miz lazımi idman avadanlıqları ilə təmin edilib. Üzgüçülük Mərkəzində yeni tennis stolları quraşdırılıb və bu növlə məşğul olmaq istəyənlər üçün hərtərəfli şərait yaradılıb. İki gündür məşqlərə başlamağımıza baxmayaraq, artıq 20-dən çox yeniyetmə və gənc bölməyə yazılıb. Gənclər və İdman Nazirliyinin əsas məqsədi bu idman növünə olan marağı idman ictimaiyyəti arasında kütləvi hala gətirməkdir”.
Qeyd edək ki, stolüstü tennis idman növü ilə məşğul olmaq istəyənlər Naxçıvan şəhərindəki Üzgüçülük Mərkəzinə müraciət edə bilərlər.

Ceyhun MƏMMƏDOV

Muxtar respublikamızda həyata keçirilən idman siyasəti öz bəhrələrini verir. İdman federasiyaları tək Naxçıvanda deyil, eyni zamanda ölkəmizdə və ölkə­dən kənarda qazandıqları uğurlarla bu işin hədər getmədiyini nümayiş etdirməkdədir.
Təbii ki, burda əsas amil idmanın müxtəlif növlərinin inkişafına yaradılan şəraitdir. Onu da qeyd edək ki, idmanın individual sahələri ilə yanaşı, komanda oyunlarına yeniyetmə və gənclərin axını kollektiv idman növlərinin daha geniş yayılmasına imkan yaradıb. Belə idman növlərindən biri də basketboldur. Muxtar respublikada bu idmanın inkişafı, kütləviləşməsi və gənc­lər arasında yayılması üçün məqsədyönlü tədbirlər həyata keçirilir.
Məlumat üçün bildirək ki, basketbol idman növü 1891-ci ildə Amerika Birləşmiş Ştatlarında yaranmışdır.
Azərbaycanda bu idman növünün inkişafı ötən əsrin 30-cu illərinə təsadüf etsə də, geniş vüsət alması ölkə Prezidenti cənab İlham Əliyevin adı ilə bağlıdır. Dövlət başçısı ölkəmizdə digər idman növləri ilə yanaşı, basketbolun inkişafını da daim diqqətdə saxlayır.

İyulun 23-də Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin xatirəsinə həsr olunmuş gənclər arasında sərbəst güləş üzrə “Naxçıvan Kuboku” uğrunda beynəlxalq yarışın qaliblərinin mükafatlandırma mərasimi keçirilmişdir.
Turnirin “A” yarımqrupunda Azərbaycan, İran, Gürcüstan və Özbəkistan, “B” yarımqrupunda isə Naxçıvan, Türkiyə, Qazaxıstan və Rusiya komandaları öz qüvvələrini sınamışlar. Qrup görüşlərinin nəticələrinə görə, Azərbaycan və Rusiya komandaları öz yarımqruplarında birinciliyə nail olmuşlar. Final görüşündə birinci yer uğrunda Azərbaycan və Rusiya komandaları mübarizə aparmışlar. Keçirilən görüşlərin nəticəsinə görə, Azərbaycan komandası birinci, Rusiya komandası ikinci yerin sahibi olmuşdur. Gürcüstan komandası isə həlledici mərhələdə Türkiyə komandasını məğlub edərək üçüncü yerə çıxmışdır.

Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin xatirəsinə həsr olunmuş gənclər arasında sərbəst güləş üzrə “Naxçıvan Kuboku” uğrunda beynəlxalq yarış keçirilib. “A” qrupunda Azərbaycan, Gürcüstan, Özbəkistan və İran, “B” qrupunda isə Naxçıvan, Türkiyə, Rusiya və Qazaxıstan komandaları mübarizə aparıblar. Yarışın gedişində olimpiya dərəcəli hakim Bəhmən Talebi ilə görüşüb həmsöhbət olduq: 

– Bu çempionat haqda fikirlərinizi bilmək maraqlı olardı.
– İlk olaraq onu deyim ki, mən artıq dördüncü dəfədir, Naxçıvanda keçirilən yarışlarda iştirak edirəm. Hər dəfə də muxtar respublikada güləş idman növünə göstərilən diqqət və qayğının yeni-yeni nailiyyətlərə yol açdığının şahidi oluram. Bu mötəbər yarışda iştirakçı xarici ölkələrin, Azərbaycanın, eləcə də Naxçıvan Muxtar Respublikasının güclü gənc idmançıları iştirak edirlər. Bəlkə də buna görədir ki, yarışlara böyük tamaşaçı marağı var. Olimpiya-İdman Kompleksinin tamaşaçılar üçün ayrılan bölümü heç zaman boş qalmır. Demək olar ki, hər bir görüş gərgin mübarizə şəraitində keçir, gənc idmançılar “Naxçıvan Kuboku”nu komandalarına qazandırmaq üçün əllərindən gələni edirlər. Digər bir məsələyə diqqət çəkmək istərdim ki, yarışlar yüksək səviyyədə təşkil olunub, idmançıların istirahəti, asudə vaxtlarının səmərəli təşkili üçün hər şey düşünülüb, heç bir təfərrüat diqqətdən yayınmayıb. Bütün bunlar Naxçıvanın mötəbər yarışlara ev sahibliyi etməkdə böyük təcrübə qazandığından xəbər verir. Burada olduğum müddət ərzində imkan daxilində idman infrastrukturunun mövcud vəziyyəti ilə də tanış olmuşam. Açığını deyim ki, burada idman quruculuğu istiqamətində görülən işlər məni valeh edib. Bütün bu görülən işlər sübut edir ki, Naxçıvan Muxtar Respublikasında idman hər zaman diqqət mərkəzində saxlanılan və təşviq edilən sahədir. Bunun nəticəsidir ki, Naxçıvan idmançıları mötəbər yarışlarda müntəzəm olaraq iştirak edir və Azərbaycanın idman şərəfini layiqincə qoruyurlar.

İyulun 22-də Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin xatirəsinə həsr olunmuş gənclər arasında sərbəst güləş üzrə “Naxçıvan Kuboku” uğrunda beynəlxalq turnirə start verilmişdir.
Turnirin açılış mərasimindən öncə ümummilli lider Heydər Əliyevin Naxçıvan şəhərindəki abidəsi ziyarət edilmiş, abidə önünə gül dəstələri qoyulmuşdur.

Naxçıvan Muxtar Respublikası Daxili İşlər Nazirliyinin İdman Cəmiyyətində “Zərərli vərdişlərə “yox” deyək, həmişə sağlam olaq” devizi altında yeniyetmə və gənclər arasında kikboksinq üzrə şəhər birinciliyi keçirilib.
Naxçıvan Muxtar Respublikası Şərq Döyüşü Sənəti Federasiyası ilə Naxçıvan Şəhər Gənc­lər və İdman İdarəsinin birgə təşkil etdiyi yarışda 12 çəki dərəcəsində 100-dən çox idmançı qüvvəsini sınayıb.
Əvvəlcə Azərbaycan Respublikasının Dövlət Himni səsləndirilib. Sonra çıxış edən federasiyanın sədr müavini Cavanşir Salayev muxtar respublikada bu növün təbliği və gənclər arasında kütləvi hal alması üçün belə tədbirlərin keçirilməsinin vacibliyini vurğulayıb. O qeyd edib ki, Naxçıvanda idmanın bütün sahələrinin inkişafı üçün hər bir şərait yaradılıb.
Tamaşaçılar final qarşılaşmalarında maraqlı görüşlərə şahidlik ediblər. Nəticəyə əsasən, Akif İsmayılov (24 kq), Əkbər Babayev (27 kq), İsmayıl Yaqubov (33 kq), Xəyal Fərəcli (36 kq), Həsən Kərimli (39 kq), Qadir Bağırov (42 kq), Nurxan Mirzəyev (45 kq), Fərman Rzayev (48 kq), Əbülfəz Rəcəbli (51 kq), Məhərrəm Süleymanov (54 kq), Araz Hüseynzadə (60 kq) və Əli Qəmbərov (67 kq) həlledici qarşılaşmalarda qalib gələrək birinci yerə layiq görülüblər.
Sonda hər çəki dərəcəsində ilk üç pillədə qərarlaşan idmançılara təşkilatçılar tərəfindən diplom və hədiyyələr təqdim olunub.

 Ceyhun Məmmədov