Bu gün muxtar respublikada yaradılan müasir idman infrastrukturu istənilən yarışı yüksək səviyyədə keçirməyə imkan verir. Naxçıvanda idmançılar üçün yaradılan şərait onların dünya arenalarında uğur qazanması ilə nəticələnir. Uğurlu idman siyasəti nəticəsində muxtar respublikada mütəmadi olaraq tədbirlər, yarışlar, turnirlər təşkil edilir, hər il idman infrastrukturu müasirləşdirilir. Naxçıvanın beynəlxalq yarışlara ev sahibliyi etməsi bunun bariz nümunəsidir. Bu cür infrastruktur eyni zamanda gənclərin sağlam, idmançıların peşəkar idmançı kimi formalaşması baxımından böyük rol oynayır.
Muxtar respublikanın şəhər və rayonlarında yeniləşən idman obyektləri gənc nəslin bu sahəyə olan marağını gündən-günə artırmaqdadır. Müasir avadanlıqlarla təmin olunan belə idman obyektlərindən biri də Şərur rayon Aralıq kənd stadionudur. Ötən gün istifadəyə verilən kənd stadionu qısa vaxt kəsiyində müasir standartlara cavab verən şəkildə yenidən qurulub. Uzunluğu 90 metr, eni isə 45 metr olan təbii öt örtüklü stadionun ərazisində 160 nəfərlik oturacaqlar quraşdırılıb. Stadionda idmançıların rahatlığı üçün 2 soyunub-geyinmə otağı və hakim otağı tikilib. Stadionun ot örtüyünün suvarılması üçün su sistemi quraşdırılıb. Meydança dünya standartlarına cavab verən (7,32 metr x 2,44 metr) qapılar və qapı torları ilə təmin olunub.
Bu stadiondan Aralıq kənd tam orta məktəbinin şagirdləri, həmçinin qonşu kəndlərin yeniyetmə və gəncləri də istifadə edəcəklər.
Yenidən qurulan stadion kənd sakinlərinin də ürəyincə olub. Aralıq kənd sakini Zaman Nəcəfov bizimlə söhbətində yeni stadionun yeniyetmə və gənclərin ixtiyarına verilməsini kənd sakinləri tərəfindən böyük sevinclə qarşılandığını vurğuladı: “Bu gün muxtar respublikada idmanın kütləviliyi üçün tədbirlər həyata keçirilir, idman obyektləri tikilib gənclərin ixtiyarına verilir. Belə idman obyektlərindən biri də kəndimizin stadionudur. Təbii ki, gənclərin sağlam ruhda böyüməsi və idmana maraq göstərməsi üçün bu cür idman infrastrukturlarının olması vacibdir. İdman hər zaman muxtar respublika rəhbərinin diqqət mərkəzində olub. Daim gənclərə, idmançılara böyük qayğı ilə yanaşan muxtar respublika rəhbərinə kənd sakinləri adından minnətdarlığımızı bildiririk”.
Ceyhun Məmmədov
