Sağlam həyat tərzini özündə formalaşdıran ən böyük amillərdən biri də insanın yaş dövrlərinə uyğun olaraq məşq­etmə saatlarıdır. Bəzən uyğun olmayan bir vaxtda edilən məşq sağlamlığa zərər vurur. 

Yaşlı nəsil üçün məşq saatları

İlk olaraq yaşlı nəslin idmanetmə vaxtlarını nəzərdən keçirək. Həkimlər araşdırmalar zamanı müəyyən ediblər ki, 50 yaşdan sonra idmana başlayan insanlarda müəyyən həssaslıq yaranır. Yatmaq artıq yaşlı nəsildə vaxt itkisi kimi dəyərləndirildiyindən onların məşq vaxtlarının səhər saat 6-10 arasında olması daha məqsədəuyğundur. Çünki artıq formalaşan və öz funksiyasının kulminasiya nöqtəsində olan orqanizm daha çox təmiz hava tələb edir, böyrəklərin fəaliyyəti artır. Bu vaxtda ağır idmana girmək böyrəklərin iş tempini dəyişdirir, tarazlığı pozur. Bu zaman idman edən kəs bir stəkan isti suya iki qaşıq alma sirkəsi qatıb ilıq hala gəldikdən sonra içsə, bədəninin gümrahlığına nail ola bilər. Qlükoza və amin turşusu maddələri qanda müəyyən nisbətlərdə artır, fəaliyyət üçün enerji yaranır. Bu vaxtlarda yeyiləcək qida maksimum həzm olunur. Karbohidratlar maddələr mübadiləsi tərəfindən bundan sonrakı zaman mərhələlərində şiddətlə ehtiyac olan enerjiyə çevrilir.

Culfa rayonundakı “N” hərbi hissənin idman bazasında rayonun ümumtəhsil məktəblərinin komandaları arasında keçirilən “Şahin” hərbi-idman və turizm oyunlarının rayon birinciliyinə yekun vurulub.
Birincilikdə 13 komanda mübarizə aparıb. Yarış təsdiq olunmuş əsasnaməyə uyğun olaraq 8 növ üzrə keçirilib. Culfa Rayon Gənclər və İdman İdarəsinin rəisi Ümüd Həsənli, Təhsil Şöbəsinin metodisti Səbuhi İbrahimov və Səfərbərlik və Hərbi Xidmətə Çağırış üzrə Dövlət Xidmətinin Culfa Rayon Şöbəsinin əməkdaşı Turan Bağırlı çıxış edərək belə tədbirlərin əhəmiyyətindən danışıblar.
Saltaq kənd tam orta məktəbinin komandası birinci yerə layiq görülüb. Əbrəqunus kənd tam orta məktəbinin komandası ikinci, Bənəniyar kənd tam orta məktəbinin komandası isə üçüncü olub.
Qalib komandaya və müxtəlif növlərdə fərqlənən idmançılara təşkilatçılar tərəfindən diplom, kubok və hədiyyələr təqdim edilib.

Xəbərlər şöbəsi

Naxçıvan şəhərindəki İlham Əliyev adına Olimpiya-İdman Kompleksində hakimlər üçün seminar təşkil edilib. Naxçıvan Muxtar Respublikası Gənclər və İdman Nazirliyi və Karate-do Federasiyasının təşkil etdiyi seminarda muxtar respublikanın şəhər və rayonlarında karate-do idman növü üzrə məşqçilər və hakimlər iştirak ediblər.
Seminarda Azərbaycan Respublikasının Əməkdar məşqçisi Hidayət Şabanov hakimlərə qaydalar haqda məlumat verib, praktiki olaraq yeni tətbiq olunan qaydaları göstərib.
Seminardan sonra federasiyanın sədr müavini Nəriman Quliyev dedi ki, federasiyamız belə seminarları mütəmadi olaraq təşkil edir. Məqsəd bu idman növünü muxtar respublikada inkişaf etdirmək, məşqçilərin və hakimlərin beynəlxalq yarış təcrübəsini artırmaqdır. Çalışırıq ki, bu qəbildən seminarlar daha çox praktiki yöndə olsun. Belə tədbirlərin böyük fayda verəcəyinə əminik. Əsl nəticəni isə qarşıdakı yarışlar göstərəcək.
Qeyd edək ki, federasiya nazirliklə birgə Şərur Olimpiya-İdman Kompleksində də belə seminar təşkil edib.

Ceyhun Məmmədov

Kəngərli rayonunun Qıvraq qəsəbəsində yerləşən “N” hərbi hissədə rayon Gənclər və İdman İdarəsi, Təhsil Şöbəsi və Səfərbərlik və Hərbi Xidmətə Çağırış üzrə Dövlət Xidmətinin Kəngərli Rayon Şöbəsinin birgə təşkilatçılığı ilə “Şahin” hərbi-idman oyununun rayon birinciliyi keçirilib. Birincilikdə 8 komandada 122 şagird qüvvəsini sınayıb. Birinciliyin açılış mərasimində Gənclər və İdman İdarəsinin rəisi Vüsal Hüseynov və Təhsil Şöbəsinin əməkdaşı Səməd Səmədov çıxış edərək iştirakçılara yarışın qaydaları haqqında geniş məlumat veriblər.
Gərgin keçən mübarizə nəticəsində bütün rəqiblərini qabaqlayan Qıvraq qəsəbə tam orta məktəbinin komandası birinci yerə layiq görülüb. Qarabağlar kənd 1 nömrəli tam orta məktəbin komandası ikinci, həmin kəndin 2 nömrəli tam orta məktəbin komandası isə üçüncü yerə layiq görülüblər.
Sonda I, II, III yerləri tutan komandalar və yarışlarda fərdi surətdə fərqlənən şagirdlər təşkilatçılar tərəfindən diplom və hədiyyələrlə mükafatlandırılıblar.

Ceyhun Məmmədov

 Naxçıvan şəhərindəki 11 nömrəli tam orta məktəbin futbol meydançasında mini-futbol üzrə şəhər ümumtəhsil məktəblərinin koman­daları arasında keçirilən turnir başa çatıb. 

Novruz bayramı münasibətilə Naxçıvan Şəhər Uşaq-gənclər idman məktəbi ilə Təhsil Şöbəsinin birgə təşkil etdiyi turnir olimpiya sistemi üzrə keçirilib.
İki gün davam edən turnirin həll­edici qarşılaşmasında bütün rəqiblərini məğlub edən 16 və 10 nömrəli tam orta məktəblərin koman­daları qarşılaşıb. Final görüşündə də üstün oyun sərgiləyən 16 nömrəli tam orta məktəbin şagirdləri meydanı 4:2 hesablı qələbə ilə tərk ediblər. Bununla onlar turnirin qalibi adını qazanıblar. Üçüncü yer uğrunda meydana 11 və 14 nömrəli məktəblərin komandaları çıxıb. Gərgin keçən matçda qələbə qazanan 11 nömrəli tam orta məktəbin komandası turnirin üçüncüsü olub.
Qalib komandalara diplom və kubok təqdim edilib.

 Ceyhun Məmmədov

Şərur rayonunun Aralıq kənd tam orta məktəbinin futbol meydançasında tam orta məktəblərin arasında “Novruz kuboku” uğrunda mini-futbol üzrə birincilik keçirilib.
Şərur Rayon Gənclər və İdman İdarəsi ilə Təhsil Şöbəsinin birgə təşkil etdiyi birincilik 3 gün davam edib. 10 məktəbin komandasının mübarizə apardığı yarış olimpiya sistemi üzrə keçirilib. Beynəlxalq mini-futbol qaydalarına uyğun olaraq keçirilən birinciliyin final görüşündən öncə çıxış edən Naxçıvan Muxtar Respublikası Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov və Şərur Rayon Gənclər və İdman İdarəsinin rəisi Ramil Dadaşov muxtar respublikada idmana göstərilən diqqət və qayğıdan danışıblar.
İlk olaraq meydana üçüncü yer uğrunda mübarizə aparan Qarxun və Siyaqut kənd tam orta məktəblərinin komandaları çıxıb. Bu görüşdə daha üstün oyun sərgiləyən birincilər meydanı qələbə ilə tərk ediblər. Final görüşündə isə Aralıq və Sərxanlı kənd tam orta məktəblərinin komandaları qalibi müəyyənləşdirməyə çalışıblar. Gərgin keçən mübarizə nəticəsində aralıqlı məktəblilər rəqiblərini 5:0 hesabı ilə məğlub edərək birinciliyin qalibi olublar.
Sonda ilk üç pillədə qərarlaşan komandalara təşkilatçılar tərəfindən diplom, medal və kubok təqdim edilib.

Ceyhun Məmmədov

Novruz bayramı ərəfəsində İlham Əliyev adına Olimpiya-İdman Kompleksində sağlamlıq imkanları məhdud uşaqların iştirakı ilə xalq uşaq oyunlarından ibarət əyləncəli yarışın keçirilməsində məqsəd onların xalq uşaq oyunlarına marağını artırmaq olub.
Naxçıvan Muxtar Respublikası Əmək və Əhalinin Sosial Müdafiəsi Nazirliyinin təşkilatçılığı ilə keçirilən yarışda hər biri 4 nəfərdən ibarət olan 5 komanda iştirak edib. Yarış iştirakçıları 5 adda xalq oyunu üzrə qabiliyyətlərini sınayıblar. Oyun qaydalarını tez və dəqiq yerinə yetirərək daha çox xal toplayan komanda qalib hesab edilib.
Yarışda ilk üç yeri tutan komandalara hədiyyələr, digər yarış iştirakçılarına isə həvəsləndirici mükafatlar təqdim olunub.

Xəbərlər şöbəsi

Yeni Azərbaycan Partiyası Şərur Rayon Təşkilatı, rayon Təhsil Şöbəsi və Şərur Olimpiya-İdman Kompleksinin təşkilatçılığı ilə Novruz bayramına həsr olunmuş rayon ümumtəhsil məktəblərinin qız şagirdləri arasında basketbol idman növü üzrə yarış keçirilib. Yarışda 9 komanda iştirak edib. Tədbirin açılışında Yeni Azərbaycan Partiyası Şərur Rayon Təşkilatının sədri, Naxçıvan Muxtar Respublikası Ali Məclisinin deputatı Əmir Babayev, Şərur Rayon Təhsil Şöbəsinin müdiri Zaur Həsənov və Şərur Olimpiya-İdman Kompleksinin direktoru Rza Camalov çıxış edərək idmançılara uğurlar arzulayıblar.
Azərbaycan Respublikasının Dövlət Himni səsləndirildikdən sonra yarışa start verilib. Daha baxımlı oyun sərgiləyən Yengicə kənd tam orta məktəbinin komandası birinci yerə layiq görülüb. Şərur şəhər 2 nömrəli tam orta məktəbin komandası ikinci, Siyaqut kənd tam orta məktəbinin komandası üçüncü olublar.
Sonda qaliblər hədiyyə və diplomlarla mükafatlandırılıblar.

Ceyhun Məmmədov

Şahbuz Rayon Gənclər və İdman İdarəsi, Təhsil Şöbəsi, Səfərbərlik və Hərbi Xidmətə Çağırış üzrə Dövlət Xidmətinin Şahbuz Rayon Şöbəsinin təşkilatçılığı ilə rayonun ümumtəhsil məktəblərinin komandaları arasında Vətənin Müdafiəsinə Hazıram poliatlon çoxnövçülüyü üzrə rayon birinciliyi keçirilib.
Birincilikdə 13 ümumtəhsil məktəbinin komandası 100 metr məsafəyə qaçış, qumbara atmaq, turnikdə dartınmaq və 2000 metr məsafəyə kross qaçış növləri üzrə mübarizə aparıb.
Birincilikdə Şahbuz şəhər 1 nömrəli tam orta məktəbin komandası qalib adını qazanıb. Aşağı Qışlaq kənd tam orta məktəbinin komandası ikinci, Kükü kənd tam orta məktəbinin komandası isə üçüncü olub.
Sonda fərqlənən komandalara və idmançılara təşkilatçıların diplomları təqdim edilib.

Ceyhun Məmmədov

İdmanın kütləvi hal alması, gənclər arasında hər növün ayrılıqda təbliğ olunması üçün muxtar respublikamızda federasiyalar fəaliyyət göstərir. Belə qurumların iş prinsipi və vəzifələri nədən ibarətdir? İdman federasiyası öz statusuna görə qeyri-hökumət təşkilatıdır. İdman federasiyalarının yaradılması, fəaliyyəti, yenidən təşkili və ləğvi Azərbaycan Respublikasının müvafiq qanunvericiliyinə əsasən həyata keçirilir. 

Federasiyalar idman növlərini inkişaf etdirir, öz səlahiyyətləri çərçivəsində milli yığma komandaları formalaşdırır və idmançıların beynəlxalq yarışlarda iştirakını təmin edir. İdman federasiyaları idmanın inkişafına, idman məktəblərinin, olimpiya ehtiyatı məktəblərinin və olimpiya mərkəzlərinin fəaliyyətinə kömək göstərməli, beynəlxalq idman təşkilatlarının üzvü statusuna uyğun şəkildə qanunvericiliyə zidd olmayan hüquqlar əldə etməli və vəzifələr daşıya bilməlidirlər. Ümumilikdə, yalnız bir məqsəd olmalıdır: idman növlərini inkişaf etdirmək və ölkəmizi beynəlxalq səviyyədə layiqincə təmsil edəcək idmançılar yetişdirmək.

Bakı şəhərində keçirilən karate-do üzrə uşaqlar və yeniyetmələr arasında Azərbaycan açıq çempionatına yekun vurulub.
Azərbaycan Milli Karate Federasiyasının təşkil etdiyi çempionatda ölkənin bütün regionları ilə yanaşı, İran İslam Respublikasının da 3 komandası iştirak edib. Bu çempionatda Naxçıvan Muxtar Respublikası Karate-do Federasiyasının 5 yetirməsi mübarizə aparıb və onlar 4 müxtəlif əyyarlı medal qazanıblar.
Komandamızın heyətində ən uğurlu nəticəni 14-15 yaşlılar arasında mübarizə aparan Sərcan Məmmədov əldə edib. 52 kiloqram çəki dərəcəsində bütün rəqiblərini üstələyən idmançımız Azərbaycan çempionu adını qazanıb. Bu yaş qrupunda 57 kiloqram çəki dərəcəsində mübarizəyə qoşulan Murad Ələkbərov isə finala gedən yolda məğlubiyyətlə üzləşib, çempionatı üçüncü pillədə başa vurub. 11 yaş qrupunda 37 kiloqram çəki dərəcəsində tatami üzərinə çıxan Vüsal Seyidov yalnız həll­edici görüşdə məğlub olaraq çempionatı ikinci pillədə başa vurub. 9 yaş qrupunda 35 kiloqram çəki dərəcəsində mübarizə aparan Məhəmməd Şıxəlili isə üçüncü olub.
İdmançılarımıza diplom və medallar təqdim edilib.

Ceyhun Məmmədov

Naxçıvan şəhər tam orta məktəblərinin komandaları arasında keçirilən “Şahin” hərbi-idman oyununa yekun vurulub.
Tədbirin açılış mərasimində çıxış edən Naxçıvan Şəhər Gənclər və İdman İdarəsinin rəisi Xəyal Qurbanov, Əlahiddə Ümumqoşun Ordusunun zabiti, polkovnik-leytenant Zaur Həmidov, Naxçıvan Şəhər Təhsil Şöbəsinin nümayəndəsi Ruslan Quliyev, Səfərbərlik və Hərbi Xidmətə Çağırış üzrə Dövlət Xidmətinin Naxçıvan Şəhər İdarəsinin əməkdaşı Elxan Seyidov gənclərin hərbi-vətənpərvərlik tərbiyəsi haqqında danışıb, şahinlərə uğurlar arzulayıblar.
Yarışda 16 tam orta məktəbin komandası mübarizə aparıb. Hərbi-idman oyununda komandalar sıra hazırlığı, darağa patron doldurulması və boşaldılması, avtomatın sökülməsi və yığılması, tüfəngdən hədəfə atəş açmaq, fiziki hazırlıq, maneələrin dəf olunması, mülki müdafiə hazırlığı və qərargah çadırının qurulması mərhələləri üzrə öz qüvvələrini sınayıblar. Nəticəyə əsasən, 1 nömrəli tam orta məktəbin komandası bütün rəqiblərini üstələyərək qalib adını qazanıb. 15 nömrəli tam orta məktəbin komandası ikinci, 16 və 2 nömrəli tam orta məktəblərin komandaları isə üçüncü yerə layiq görülüblər. Qalib komandalar təşkilatçılar tərəfindən diplom, fəxri fərman və kuboklar ilə mükafatlandırılıblar.
Qeyd edək ki, birinci və ikinci yerlərin qalibləri olan 1 və 15 nömrəli tam orta məktəblərin komandaları aprel ayında keçiriləcək Naxçıvan Muxtar Respublika zona birinciliyində Naxçıvan şəhərini təmsil edəcəklər.

*  *  *

Ordubad rayonunda yerləşən “N” hərbi hissədə rayon Gənclər və İdman İdarəsi, Təhsil Şöbəsi və Səfərbərlik və Hərbi Xidmətə Çağırış üzrə Dövlət Xidmətinin Ordubad Rayon Şöbəsinin birgə təşkilatçılığı ilə “Şahin” hərbi-idman oyununun rayon birinciliyi keçirilib. Birincilikdə 9 komandada 126 şagird iştirak edib.
Birinciliyin açılış mərasimində Gənc­lər və İdman İdarəsinin rəisi Əbülfəz Əliyev çıxış edərək iştirakçılara yarışın qaydaları haqqında məlumat verib.
Yekun nəticəyə əsasən, bütün rəqiblərini qabaqlayan Ordubad şəhər M.Füzuli adına tam orta internat məktəbinin komandası birinci yerə layiq görülüb. Digər iki pillədə Ordubad şəhər 3 nömrəli və Dəstə kənd 1 nömrəli tam orta məktəblərin komandaları qərarlaşıblar.
İlk 3 pillədə qərarlaşan komandalara və yarışlarda fərdi surətdə fərqlənən şagirdlərə təşkilatçılar tərəfindən diplom və hədiyyələr təqdim olunub.

Ceyhun Məmmədov

Babək Rayon Gənclər və İdman İdarəsinin, Təhsil Şöbəsinin və Naxçıvan Muxtar Respublikasının Səfərbərlik və Hərbi Xidmətə Çağırış üzrə Dövlət Xidmətinin Babək Rayon İdarəsinin təşkilatçılığı ilə “N” hərbi hissədə rayonun tam orta məktəblərinin komandaları arasında “Şahin” hərbi-idman oyununun rayon birinciliyi keçirilib. Birincilik başlamazdan əvvəl Babək Rayon Gənclər və İdman İdarəsinin rəisi Nazim Salmanlı “Şahin” hərbi-idman oyununun keçirilməsinin əhəmiyyətindən və yeniyetmələrin vətənpərvərlik tərbiyəsinə təsirindən danışıb. Sonra yarışa start verilib. Birincilikdə 15 məktəbin (hər məktəbdən 14 şagird olmaqla, cəmi 210 şagird) komandası mübarizə aparıb.
Hərbi-idman oyununun qalibi Cəhri kənd 2 nömrəli tam orta məktəbin komandası olub. İkinci və üçüncü yerlərə Nehrəm kənd 2 nömrəli və Cəhri kənd 1 nömrəli tam orta məktəblərin komandaları layiq görülüblər.
Qalib komandalara təşkilatçılar tərəfindən qiymətli hədiyyələr və diplomlar təqdim edilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Martın 9-da "2009-2014-cü illərdə Azərbaycanda şahmatın inkişaf etdirilməsi Dövlət Proqramı"nın icrasına həsr olunmuş tədbir keçirilmişdir. Eyni zamanda Naxçıvan Muxtar Respublikası Gənclər və İdman, Təhsil nazirlikləri və Şahmat Federasiyasının birgə təşkil etdiyi şahmat üzrə Naxçıvan Muxtar Respublika turnirinə yekun vurulmuşdur. Turnir 4 gün davam etmişdir.

İkinci dövrəsinə start verilən futbol üzrə Naxçıvan Muxtar Respublika çempionatının artıq iki turunun oyunları keçirilib.
Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi çempionatda ilk dövrəni lider kimi başa vuran “Araz-Naxçıvan” komandası artıq ən yaxın rəqibini 3 xal qabaqlamağı bacarıb. Belə ki, dövrənin sonuncu oyununda olduğu kimi, ikinci dövrənin də ilk görüşündə “DİN-Darıdağ” komandasını məğlub edən “qırmızı-ağlar” liderliyi əldən verməyiblər. 11-ci turda isə onlar “Batabat” komandasına 3:0 hesabı ilə qalib gəliblər.
Liderin ən yaxın izləyicisi “DİNDarıdağ” komandası ardıcıl iki məğlubiyyətdən sonra 11-ci turda aktivinə 3 xal yazdıra bilib. Turnir cədvəlinin autsayderi “Sədərək” komandasını məğlub etmək onlar üçün heç də çətin olmayıb – 3:0.
Cari mövsümə iddialı başlayan Şərurun “Arpaçay” komandasını liderdən 5 xal ayırır. İkinci dövrəyə “Sədərək” komandası üzərində səfər qələbəsi ilə (2:3) başlayan şərurlular bu ənənələrini doğma arenada da davam etdiriblər. Culfa rayonunun komandası “Əlincə”ni sınağa çəkən “Arpaçay” çətin də olsa, sonda qalib gəlməyi bacarıb – 6:4. Liderlər cədvəlində yer alan Naxçıvan Dövlət Universitetinin futbol komandası ikinci dövrədə yalnız bir görüş keçirib. “Batabat”la oyunun təxirə düşməsinə baxmayaraq, tələbələr Babək səfərindən 3 xalla qayıtmağa müvəffəq olublar – 1:2.
Cari mövsümdə “Batabat” və “Əlincə” komandaları bir qədər uğurlu çıxış etsələr də, bunu “Kəngərli” və “Sədərək” komandaları haqqında demək olmaz. Düzdür, kəngərlililər aktivlərinə 11 oyunda 9 xal yazdıra biliblər, lakin sədərəklilər hələ də xala həsrətdilər.

Qeyd: S – sıra, O – oyun, Q – qələbə, H – heç-heçə, M – məğlubiyyət, T/F – top fərqi, X – xal.

 Ceyhun Məmmədov

Naxçıvan Muxtar Respublika Stadionunda 1999-2001-ci illər təvəllüdlü məktəblilər arasında yüngül atletika üzrə muxtar respublika birinciliyi keçirilib.
Naxçıvan Muxtar Respublikası Gənclər və İdman, Təhsil nazirlikləri və Yüngül Atletika Federasiyasının birgə təşkil etdiyi birinciliyin məqsədi muxtar respublikanın yeniyetmələrdən ibarət yüngül atletika üzrə yığma komandasının tərkibini formalaşdırmaq, həmçinin bu idman növünü inkişaf etdirmək və yeniyetmələri atletikaya cəlb etmək olub.
Birinciliyin açılış mərasimində çıxış edən gənclər və idman naziri Azad Cabbarov bildirib ki, ümummilli liderimiz Heydər Əliyevin müəyyənləşdirdiyi idman siyasəti Azərbaycan Respublikasının Prezidenti cənab İlham Əliyev tərəfindən uğurla davam etdirilir. Bunun nəticəsidir ki, ölkəmiz dünyanın ən nüfuzlu idman yarışlarına yüksək səviyyədə ev sahibliyi edir, idmançılarımızın olimpiya oyunlarında, dünya və Avropa çempionatlarında qazandıqları medalların sayı ilbəil artır. Naxçıvan Muxtar Respublikasında idmanın inkişafına xüsusi qayğı göstərilir.

Dünən Naxçıvan şəhərindəki İlham Əliyev adına Olimpiya-İdman Kompleksində cüdo üzrə yeniyetmələr arasında Naxçıvan Muxtar Respublika birinciliyinə start verilib.
5 mart – Bədən Tərbiyəsi və İdman Günü münasibətilə keçirilən birincilikdə 80-ə yaxın idmançı tatami üzərinə çıxıb. Naxçıvan Muxtar Respublikası Gənclər və İdman Nazirliyi ilə Güləş Federasiyasının birgə təşkil etdiyi yarış iki gün davam edəcək və 10 çəki dərəcəsində idmançılar qalib adı uğrunda mübarizə aparacaqlar.
Birinciliyin açılış mərasimində Azərbaycan Respublikasının Dövlət Himni səsləndirilib. Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov Azərbaycan Respublikasının Prezidenti cənab İlham Əliyevin xalqımızın sağlamlığının möhkəmlənməsində, gənc­lərin fiziki inkişafında bədən tərbiyəsinin əhəmiyyətini və rolunu nəzərə alaraq 5 martın Azərbaycan Respublikasında Bədən Tərbiyəsi və İdman Günü kimi qeyd olunması haqqında 2005-ci il 4 mart tarixli Sərəncam imzaladığını xatırladıb.

Muxtar respublikamızda məşqçi-müəllimlər, hakimlər və idmançılar üçün təşkil olunan seminarlar davam etdirilir.
Növbəti seminar dünən Naxçıvan Muxtar Respublikası Gənclər və İdman Nazir­liyi və Güləş Federasiyasının təşkilatçılığı ilə cüdo məşqçiləri və hakimləri üçün keçirilib. Seminarı giriş sözü ilə Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov açaraq muxtar respublikada bu idman növünün geniş yayıldığını, gənclərin bu sahəyə maraq göstərdiklərini bildirib.
5 mart – Bədən Tərbiyəsi və İdman Gününə həsr olunan cüdo üzrə seminarda Azərbaycan Cüdo Federasiyasının baş katibi Elmar Babanlı və Azərbaycan Cüdo Federasiyası Hakimlər Kollegiyasının sədri, beynəlxalq dərəcəli hakim Fariz Hüseynov çıxış ediblər.
Seminarın mahiyyəti barədə danışan federasiya nümayəndələri yeni qaydalar barədə məlumat veriblər və onları izahlı şəkildə kompüter vasitəsilə nümayiş etdiriblər. Fəndlərin tətbiqi, hakimlərin və məşqçilərin bu fəndlərə qiyməti seminar zamanı müzakirə olunub.

Naxçıvan şəhərindəki İlham Əliyev adına Olimpiya-İdman Kompleksində 5 mart – Bədən Tərbiyəsi və İdman Gününə həsr olunmuş yeniyetmə və gənclər arasında boks üzrə Naxçıvan şəhər açıq birinciliyinə start verilib.
60-dan çox dəri əlcək sahibinin mübarizə apardığı birincilikdə Ordubad və Kəngərli boksçuları iştirak edir. Naxçıvan Şəhər Gənclər və İdman İdarəsi ilə Naxçıvan Muxtar Respublikası Boks Federasiyasının birgə təşkil etdiyi birincilikdə əsas məqsəd federasiya tərkibində fəaliyyət göstərən klubların işinin təkmilləşdirilməsi və bu növü muxtar respublikada təbliğ etməkdir.
Yarışdan əvvəl çıxış edən Naxçıvan Muxtar Respublikası Gənclər və İdman Nazirliyinin aparat rəhbəri Canməmməd Canməmmədov, Naxçıvan Şəhər Gənclər və İdman İdarəsinin rəisi Xəyal Qurbanov və federasiyanın sədr müavini Məmmədcəfər Əliyev bütün idmançıları 5 mart – Bədən Tərbiyəsi və İdman Günü münasibətilə təbrik ediblər.
Birincilikdə boksçular 12 çəki dərəcəsində güclərini sınayıblar. Final görüşləri isə bu gün keçiriləcək.

Ceyhun Məmmədov

Muxtar respublikamızda intellektual səviyyəli, vətənpərvər, istedadlı gənclərin yetişdirilməsində, şagirdlərin asudə vaxtlarının səmərəli təşkilində məktəbdənkənar tərbiyə müəssisələrinin üzərinə mühüm vəzifələr düşür. Belə tərbiyə müəssisələri hərtərəfli dövlət qayğısı ilə əhatə olunublar. Muxtar respublikanın ayrı-ayrı rayonlarında şahmat məktəbləri, uşaq-gənclər yaradıcılıq mərkəzləri və başqa məktəbdənkənar müəssisələr üçün binalar tikilir və ya əsaslı təmir olunaraq şagirdlərin istifadəsinə verilir. Həmin müəssisələrdə fəaliyyət göstərən dərnəklərə xeyli şagird cəlb edilib. Bu dərnəklərin fəaliyyəti sayəsində uşaqların maraq və qabiliyyətlərinin inkişaf etdirilməsi və düzgün formalaşdırılması istiqamətində xeyli işlər görülüb və görülməkdədir.
Naxçıvan Muxtar Respublikası Ali Məclisi Sədrinin 2014-cü il 20 iyun tarixli “Naxçıvan Muxtar Respublikasının təhsil müəssisələrində elektron təhsilin təşkili ilə bağlı əlavə tədbirlər haqqında” Sərəncamından irəli gələn vəzifələrin həlli istiqamətində həyata keçirilən tədbirlərin davamı kimi, dünən ilk dəfə olaraq Naxçıvan Şahmat Mərkəzi ilə rayon şahmat məktəbləri arasında interaktiv əlaqə yaradılıb. Şahmat Mərkəzində keçilən dərsi muxtar respublikanın rayonlarının şahmat məktəblərində bu idman növü ilə məşğul olan 150-dən çox şahmatçı internet üzərindən izləyib.

5 mart – Bədən Tərbiyəsi və İdman Günü münasibətilə Şərur Olimpiya-İdman Kompleksində voleybol üzrə yoldaşlıq görüşü keçirilib.
Naxçıvan Muxtar Respublikası Voleybol Federasiyası, Şərur və Culfa Rayon Gənclər və İdman idarələrinin birgə təşkil etdikləri görüşdə “Şərur” və “Culfa” komandaları üz-üzə gəlib. Görüşdən əvvəl çıxış edən Naxçıvan Muxtar Respublikası Gənc­lər və İdman Nazirliyi aparatının Kütləvi bədən tərbiyəsi və idman şöbəsinin müdiri Taleh İbrahimov, Voleybol Federasiyasının sədr müavini Aydın Mirzəyev, Şərur və Culfa Rayon İcra hakimiyyətlərinin nümayəndələri Qafar Musayev və Orxan Ələkbərli Bədən Tərbiyəsi və İdman Günü münasibətilə bütün idmançıları təbrik edib, keçirilən oyunun mahiyyəti barədə danışıblar.
Oyunun nəticəsinə gəlincə, “Şərur” komandası ev sahibliyindən maksimum yararlanaraq culfalı həmkarlarını 3:1 hesabı ilə məğlub edib.
Sonda komandalara hədiyyə təqdim edilib.

Ceyhun Məmmədov

Babək rayonunda isə 5 mart – Bədən Tərbiyəsi və İdman Günü münasibətilə rayon ümumtəhsil məktəblərinin komandaları arasında yüngül atletika turniri keçirilib.
Babək Rayon Gənclər və İdman İdarəsi, Təhsil Şöbəsi və Naxçıvan Muxtar Respublikası Yüngül Atletika Federasiyasının Babək rayon bölməsinin təşkilatçılığı ilə keçirilən turnirdən əvvəl çıxış edən rayon Gənclər və İdman İdarəsinin rəisi Nazim Salmanlı, Təhsil Şöbəsinin əməkdaşı Müslüm Vəliyev muxtar respublikada idmançılara göstərilən diqqət və qayğıdan danışıblar.
Turnirdə oğlanlar 100, 200, 400, 800 və 1500 metr, qızlar isə 100, 200, 400 və 800 metr məsafəni birinci qət etməyə çalışıblar. Komanda hesabında Didivar kənd tam orta məktəbinin komandası qalib adını qazanıb. Digər iki pillədə isə Babək qəsəbə 2 və 1 nömrəli tam orta məktəblərin komandaları qərarlaşıblar.
Qaliblərə təşkilatçılar tərəfindən diplomlar təqdim edilib.

 Ceyhun Məmmədov

5 mart – Bədən Tərbiyəsi və İdman Günü münasibətilə Şərur Rayon Gənclər və İdman İdarəsi ilə Təhsil Şöbəsinin birgə təşkil etdiyi qızlar arasında basketbol üzrə birinciliyə yekun vurulub. Rayonun Şəhriyar kənd tam orta məktəbinin idman zalında keçirilən birincilikdə 7 məktəbdən 84 şagird iştirak edib. Birinciliyin final görüşündə Siyaqut və Yengicə kənd tam orta məktəblərinin komandaları üz-üzə gəlib. Daha üstün olan birincilər meydanı qalib kimi tərk ediblər. Üçüncü yerə isə Şəhriyar kənd tam orta məktəbinin komandası layiq görülüb.
Qaliblər təşkilatçılar tərəfindən diplomlarla mükafatlandırılıblar.

Ceyhun Məmmədov

Dünən Babək rayonunda 5 mart – Bədən Tərbiyəsi və İdman Günü münasibətilə basketbol üzrə yoldaşlıq görüşü keçirilib. Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi yoldaşlıq görüşündə “Babək” və “Şahbuz” komandaları üz-üzə gəlib. Görüşdən öncə çıxış edən federasiyanın sədr müavini Ənvər Məmmədov Bədən Tərbiyəsi və İdman Günü münasibətilə iştirakçıları, eləcə də idman ictimaiyyətini təbrik edib və bu gün haqqında geniş məlumat verib.
Daha baxımlı oyun sərgiləyən “Babək” komandası rəqibini 46:32 hesabı ilə məğlub edib.
Fərqlənən basketbolçulara federasiya tərəfindən diplomlar təqdim edilib.

Ceyhun Məmmədov

Naxçıvan şəhərindəki Uşaq-Gənclər İdman Məktəbinin idman zalında 2004-2006-cı il təvəllüdlü uşaqlar arasında güləş üzrə məktəbin daxili birinciliyi keçirilib.
Naxçıvan Muxtar Respublikası Güləş Federasiyasının təşkilatçılığı ilə keçirilən yarışda 11 çəki dərəcəsində 60-dan çox güləşçi mübarizə aparıb. Yarışdan öncə çıxış edən federasiyanın sədr müavini Faiq İsgəndərov bildirib ki, güləşin muxtar respublikada uşaqlar arasında təbliği üçün butipli yarışlar mütəmadi olaraq təşkil edilir. İdmançılar bu yarışlarda iştirak etməklə həm də yarış təcrübələrini artırmış olurlar.
Gərgin keçən yarışın yekun nəticələrinə əsasən, Sinan Rzayev (20 kiloqram), Turqay Qəhrəmanov (23 kiloqram), Nicat Ocaqquliyev (26 kiloqram), Tuncay Məmmədov (29 kiloqram), Samir Bağırzadə (32 kiloqram), Elmir Kərimli (35 kiloqram), Həsənxan Xudiyev (38 kiloqram), Heydər Nəcəfov (42 kiloqram), Xanlar Əzizov (47 kiloqram), Nuruağa Əhmədov (53 kiloqram) və Ramazan Əliyev (66 kiloqram) öz çəki dərəcələrində bütün rəqiblərini üstələyərək birinciliyin qalibi olublar.
Sonda qalib idmançılara diplomlar təqdim edilib.

Ceyhun Məmmədov

Ordubad şəhər 3 nömrəli tam orta məktəbin idman zalında 5 mart – Bədən Tərbiyəsi və İdman Günü münasibətilə “Naxçıvan”, “Şərur”, “Ordubad” və “Culfa” komandaları arasında karate-do üzrə yoldaşlıq görüşü keçirilib. 

Naxçıvan Muxtar Respublikası Karate-do Federasiyası ilə Naxçıvan Şəhər Gənclər və İdman İdarəsinin birgə təşkil etdiyi yoldaşlıq görüşü şotokan üslubunda, olimpiya sistemi üzrə keçirilib və 5 yaş qrupunda olan idmançılar mübarizə aparıblar. Naxçıvan Şəhər Gənclər və İdman İdarəsinin rəisi Xəyal Qurbanov tədbiri açıq elan edərək bildirib ki, ölkə Prezidenti cənab İlham Əliyevin 4 mart 2005-ci il tarixli Sərəncamına əsasən hər il martın 5-i ölkə­mizdə Bədən Tərbiyəsi və İdman Günü kimi qeyd edilir.
Sonra Karate-do Federasiyasının sədr müavini, yarışın baş hakimi Nəriman Quliyev çıxış edərək idmançılara yarışın qaydaları haqqında məlumat verib.
Yarışın yekun nəticəsinə əsasən, 6-7 yaş qrupunda Bünyamin Zeynalov (Ordubad), 8-9 yaş qrupunda Məhəmməd Şıxəlili (Naxçıvan), 10-11 yaş qrupunda Samir İbrahimli (Naxçıvan), 12-13 yaş qrupunda Vüsal Seyidov (Naxçıvan), 14-15 yaş qrupunda isə Murad Ələkbərov (Naxçıvan) müvafiq olaraq həmyaşıdları arasında birinci yerə layiq görülüblər.
Sonda hər yaş qrupunda yer tutan idmançılara Naxçıvan Şəhər Gənclər və İdman İdarəsinin diplomları təqdim edilib.

Ceyhun Məmmədov

Ötən həftə Bakı şəhərində Azərbaycan Respublikası Daxili İşlər Nazirliyinin idmançıları arasında keçirilən güc çoxnövçülüyü üzrə ölkə çempionatına yekun vurulub. Üç gün davam edən yarışda Naxçıvan Muxtar Respublikası Daxili İşlər Nazirliyinin yığma komandası da iştirak edib. İdmançılarımız bu yarışda uğurlu çıxış edərək 7 medal qazanıblar. İdmançılarımızdan ən uğurlu nəticəni 65 kiloqram çəki dərəcəsində Rəşad Həsənov, 80 kiloqram çəki dərəcəsində Cavanşir Yaqubov, 90 kiloqram çəki dərəcəsində Elməddin Abdullayev və 90+ kiloqram çəki dərəcəsində Kamil Salayev əldə ediblər. Belə ki, bu idmançılarımız bütün rəqiblərini üstələyərək çempionatın qalibi adını qazanıblar. 70 kiloqram çəki dərəcəsində Orxan Babayev, 75 kiloqram çəki dərəcəsində Rasif Məmmədov və 90+ kiloqram çəki dərəcəsində isə Rauf Vəliyev üçüncü olublar. Qeyd edək ki, Rasif Məmmədov eyni zamanda qol güləşi yarışında da bürünc medal qazanıb.
Sonda çempionatda yer tutan idmançılarımıza təşkilatçılar tərəfindən diplom və medallar təqdim olunub.

Ceyhun Məmmədov

Dünən Naxçıvan-Duzdağ magistral yolunda Xocalı soyqırımına həsr olunmuş Heydər Əliyev adına Hərbi Liseyin kursantları arasında kross qaçışı üzrə Naxçıvan şəhər turniri keçirilib. Naxçıvan Muxtar Respublikası Gənclər və İdman Nazirliyinin tədbirlər planına uyğun olaraq Naxçıvan Muxtar Respublikası Yüngül Atletika Federasiyası, Naxçıvan Şəhər Gənc­lər və İdman İdarəsi, Heydər Əliyev adına Hərbi Liseyin birgə təşkil etdiyi turnirdə 100-ə yaxın kursant mübarizə aparıb. Turnirin açılışından öncə Xocalı soyqırımında həyatını itirmiş həmvətənlərimiz bir dəqiqəlik sükutla yad edilib. Sonra çıxış edən federasiyanın sədr müavini İntiqam Əliyev, nazirliyin Kütləvi bədən tərbiyəsi və idman şöbəsinin müdiri Taleh İbrahimov 24 il öncə baş vermiş faciə haqqında iştirakçıları məlumatlandırıblar. Qeyd edilib ki, turniri keçirməkdə məqsəd həm də kursantlardan ibarət yığmanı formalaşdırmaq və yüngül atletikanı muxtar respublikada gənclər arasında təbliğ etməkdir.
3 kilometr məsafədə keçirilən kross yarışının nəticələrinə əsasən, Cəfər Quliyev bütün rəqiblərini arxada qoyaraq finiş xəttinə birinci çatıb. İlkin Əsgərov və Nurəddin Broyev isə ikinci və üçüncü olublar. Reqlamentə görə, ilk 10 pillədə qərarlaşan Ziyarət Vəliyev, Eldəniz Nağıyev, Qurban Abdullayev, Eşqin Abdullayev, Mustafa Musayev, İlkin Kərimov və Nurlan Məhərrəmov da qalib adını qazanıblar.
Sonda qaliblərə təşkilatçıların diplom və fəxri fərmanları, federasiyanın hədiyyələri təqdim edilib.

 Ceyhun Məmmədov

Dünən Naxçıvan şəhərindəki İlham Əliyev adına Olimpiya-İdman Kompleksində məşqçi-müəllimlər üçün karate-do üzrə seminar keçirilib.
Naxçıvan Muxtar Respublikası Gənclər və İdman Nazirliyi ilə Karate-do Federasiyasının birgə təşkil etdiyi seminarda muxtar respublikanın şəhər və rayonlarında bu növü təbliğ edən məşqçi-müəllimlər iştirak ediblər. Federasiyanın sədr müavini Nəriman Quliyev ilk olaraq qaydalar barədə məşqçi-müəllimləri məlumatlandırıb. Daha sonra yeni qaydalar və karate-do idman turnirlərində hakimlik zamanı məşqçilər və idmançıların nələrə əməl etməli olduqları praktik olaraq göstərilib. Xüsusilə idmançıların rəqibə zərər yetirməməsi üçün hansı fənd­ləri necə tətbiq etmələri nümayiş etdirilib.
Sonda qeyd edilib ki, qarşıdakı aylarda idmançılar üçün də belə seminar təşkil olunacaq.

Ceyhun Məmmədov

Naxçıvan Muxtar Respublikasında idmançılar üçün yaradılan şərait mütəmadi olaraq onların uğur qazanması ilə nəticələnir. Son dövrlər idmançılarımızın beynəlxalq arenalarda Azərbaycan bayrağını dalğalandırmaları artıq ənənə halını alıb. İran İslam Respublikasının Astara şəhərində keçirilən karate-do üzrə beynəlxalq turnirdə Naxçıvan Muxtar Respublikası Karate-do Federasiyasının 4 yetirməsi də iştirak edib. 16 komanda və 200-dən çox idmançının iştirak etdiyi beynəlxalq turnirdə karateçilərimiz 3 medal qazanıblar. Belə ki, 27 kiloqram çəki dərəcəsində Vüsal Seyidov bütün rəqiblərinə qalib gələrək qızıl medal qazanıb. 35 kiloqram çəki dərəcəsində İmran Həsənov və 50 kiloqram çəki dərəcəsində Sərxan Məmmədov isə yalnız final görüşlərində məğlub olaraq gümüş medalla kifayətləniblər.
Sonda idmançılarımıza təşkilatçılar tərəfindən diplom, medal və kubok təqdim edilib.

Ceyhun Məmmədov

Xocalı soyqırımının 24-cü ildönümü ilə əlaqədar Şərur Rayon Gənclər və İdman İdarəsi, Təhsil Şöbəsi və Naxçıvan Muxtar Respublikası Atıcılıq Federasiyasının Şərur rayon bölməsinin birgə təşkilatçılığı ilə atıcılıq üzrə məktəblilər arasında birincilik keçirilib. Yarışda 12 məktəbin 36 şagirdi iştirak edib. Yarışın nəticəsinə görə, Şərur şəhər 2 nömrəli tam orta məktəbin komandasının üzvləri daha sərrast olublar. Uşaq-Gənclər İdman Məktəbinin və Şərur şəhər 1 nömrəli tam orta məktəbin komandaları isə digər iki pillədə qərarlaşıblar.

Ceyhun Məmmədov

İran İslam Respublikasının Maku şəhərində keçirilən boks üzrə beynəlxalq turnir başa çatıb. Bu turnirdə Azərbaycanı Naxçıvan Muxtar Respublikası Boks Federasiyasının yetirmələri təmsil ediblər. Turnirdə İran və Türkiyə komandaları da mübarizə aparıblar.
Dəri əlcək sahiblərimiz turnirdə uğurlu nəticə əldə etməklə komandamızın aktivinə 7 müxtəlif əyarlı medal yazdırıblar. Boks həvəskarları finalda Naxçıvan idmançılarının görüşünü maraqla izləyiblər. Belə ki, 64 kiloqram çəki dərəcəsinin həll­edici qarşılaşmasında Samiq Seyidzadə və Yenisey İmanov üz-üzə gəlib. Görüş birincinin qələbəsi ilə yekunlaşıb. Samiq Seyidzadə kimi Arzuman Tağıyev də turniri qızıl medalla başa vurub. O, 60 kiloqram çəki dərəcəsində rəqib tanımayıb. 69 və 75 kiloqram çəki dərəcələrində mübarizə aparan Yuris Allahverdiyev və Şükür Hüseynov yalnız final görüşlərində məğlub olaraq turnirin ikincisi olublar. Arif Babayev (56 kiloqram) və Ayxan İsayev (81 kiloqram) isə bürünc mükafat qazanıblar.
Sonda idmançılarımıza diplom, medal, komandamıza isə kubok təqdim olunub.

Ceyhun Məmmədov

Bakı İdman Sarayında kikboksinq üzrə keçirilən kişilər arasında XXII Azərbaycan çempionatı və kadetlər arasında ölkə birinciliyinə yekun vurulub. Çempionatın keçirilməsində əsas məqsəd 2016-cı ildə Avropa çempionatı və beynəlxalq turnirlərdə iştirak edəcək milli komandanın tərkibini müəyyənləşdirmək, eyni zamanda cəmiyyətdə vətənpərvərlik ruhunu gücləndirmək, gənc­ləri pis vərdişlərdən uzaq tutmaqdan ibarət olub. Üç gün davam edən yarışda 30 rayonu və 45 klubu təmsil edən 600-ə yaxın idmançı iştirak edib.
Bu yarışda Naxçıvan Muxtar Respublikası Şərq Döyüşü Sənəti Federasiyasının 6 yetirməsi mübarizə aparıb. Kadetlər arasında ən uğurlu nəticəni 51 kiloqram çəki dərəcəsində Fərman Rzayev əldə edib. Belə ki, o, ölkə birincisi adına layiq görülüb. 67+ kiloqram çəki dərəcəsində isə Adil Süleymanov Azərbaycan birinciliyini bürünc medalla başa vurub.
XXII Azərbaycan çempionatında isə iki idmançımız fəxri kürsünün ən yüksək zirvəsinə qalxıb. 60 kiloqram çəki dərəcəsində Zöhrab Əzimov və 91+ kiloqram çəki dərəcəsində Ağalar Seyidov bütün rəqiblərinə qalib gələrək Azərbaycan çempionu adını qazanıblar. Digər iki idmançımız – 71 kiloqram çəki dərəcəsində Rəhim Əliyev ikinci, 75 kiloqram çəki dərəcəsində Cavidan Rəcəbli isə üçüncü olublar.
Qalib idmançılarımıza təşkilatçılar tərəfindən diplom və medal təqdim edilib.

Ceyhun Məmmədov

Babək rayonunda Xocalı faciəsinin 24-cü ildönümünə həsr olunmuş basketbol turniri keçirilib. Babək Rayon Təhsil Şöbəsi və Uşaq-Gənclər İdman Məktəbinin təşkilatçılığı ilə keçirilən tədbiri Uşaq-Gənclər İdman Məktəbinin direktoru Füzuli Salmanov açaraq Xocalı faciəsindən danışıb.
Sonra yarışın baş hakimi Fərəc Cəfərov oyunun qaydaları barədə komandalara məlumat verib. Xocalıda şəhid olanların əziz xatirəsinin bir dəqiqəlik sükutla yad edilməsi ilə yarışa start verilib. Gərgin keçən mübarizə şəraitində turnirin birinci pilləsinə Nehrəm kənd 1 nömrəli tam orta məktəbin komandası yüksəlib. İkinci yerə Babək qəsəbə 2 nömrəli tam orta məktəbin, üçüncü yerə isə Nehrəm kənd 3 nömrəli tam orta məktəbin komandaları layiq görülüblər.
Qalib komandalar diplomlarla təltif ediliblər.

Ceyhun Məmmədov

İdmanla yaxından maraqlananlar bu sahənin insan həyatını müsbət yöndə dəyişdiyini dəfələrlə müşahidə ediblər. Lakin bu sahə eyni zamanda insan orqanizmində bəzi fəsadlar da ortaya çıxarır. Bu isə insanların naşılığından yaranır: düzgün edilməyən idman o idmançıya xeyir yox, ziyan gətirə bilər. 

İdman edərkən daim işlək vəziyyətində olan oynaqlar zədə ilə tez-tez üzləşə bilər. Məhz bunun nəticəsidir ki, idman edənlərdə oynaq xəstəliklərinə təsadüf edilir. Bu xəstə­liklər oynaqlarda ağrılara, şişkinliyə, oynaqda hərəkətliliyin pozulmasına səbəb olur. Bəzən idmanla hobbi kimi maraqlananlar buna elə də əhəmiyyət vermirlər. Lakin bilmək vacibdir ki, müalicə edilməmiş oynaq xəstəlikləri iş qabiliyyətinin kəskin məhdudlaşmasına və hətta əlilliyə səbəb ola bilər.
Avropalı alimlərin apardığı araşdırmalara görə, qadınlarda bu xəstə­liklər kişilərlə müqayisədə daha tez-tez inkişaf edir. Əslində, oynaqların sağlamlığını cavanlıqda – məşqə yeni başlarkən qorumaq lazımdır. Bu, olduqca vacibdir. Hal-hazırda tibdə oynaq xəstəliklərini tam müalicə edən metodlar mövcud deyil. Əgər oynaqda dağılma prosesləri başlayıbsa, bu prosesləri yalnız bir qədər ləngitmək mümkündür. Ona görə oynaq xəstəliklərinin gecikmiş mərhələlərində yeganə müalicə üsulu cərrahi əməliyyatdır. Belə əməliyyatlar çox travmatik olur və uzunmüddətli bərpa dövrü tələb edir.

Boks üzrə gənclərin Azərbaycan çempionatına yekun vurulub. Bu çempionatda Naxçıvan Muxtar Respublikası boks məktəbinin yetirmələri də öz güclərini sınayıblar. Yarışda ən uğurlu nəticəni 60 kiloqram çəki dərəcəsində Sərxan Əliyev qazanıb. O, ilk iki mərhələdə müvafiq olaraq Qadir Məmmədov və Füzuli Tağıyevi mübarizədən kənarlaşdırıb. 1/4 final mərhələsində dəri əlcək sahibimiz Aqil Qəmbərlidən üstün olub. Finala gedən yolda isə Sərxan Əliyev Ədalət Əmirovu üstələyib. Həlledici qarşılaşmada boksçumuz Elton Məmmədovu məğlub edərək respublika çempionu adını qazanıb. Digər idmançımız, 81 kiloqram çəki dərəcəsində mübarizə aparan Toğrul İsmayıllı isə yarımfinala kimi itkisiz irəliləyib. Lakin final görüşündən öncə məğlub olan dəri əlcək sahibimiz çempionatı bürünc medalla başa vurub.
Bu nəticə ilə Naxçıvan boks komandası ölkə çempionatını 1 qızıl, 1 bürünc medalla 3-cü pillədə başa vurub.

 Ceyhun Məmmədov

Macarıstanın Debretsen şəhərində boks üzrə beynəlxalq turnirə yekun vurulub. 29 ölkənin 168 boksçusunun mübarizə apardığı turnirdə Azərbaycan millisi də çıxış edib. 5 gün davam edən beynəlxalq turnirdə “Bakı-2015” Avropa Oyunlarının, dünya, Avropa, Asiya və Cənubi Amerika çempionatlarının mükafatçıları mübarizə aparıblar. Azərbaycan komandası Macarıstana 7 dəri əlcək sahibi ilə yollanıb.
Millimizin heyətində 56 kiloqram çəki dərəcəsində rinqə Naxçıvan boks məktəbinin yetirməsi Tayfur Əliyev çıxıb. Turnirin ilk mərhələsində idmançımız Mərakeşi təmsil edən Muhammed Hamout ilə qarşılaşıb və qalib gəlib. Növbəti görüşdə onun rəqibi iordaniyalı Muhammed Alşadi olub. Hər üç raundda rəqibini məğlub edən dəri əlcək sahibimiz yarımfinala yüksəlib. Finala gedən yolda Tayfur Əliyev braziliyalı Karlos Roşanı da mübarizədən kənarlaşdırıb. Həll­edici qarşılaşmada dəri əlcək sahibimiz Böyük Britaniya təmsilçisi Aşfaq Qaisdadi ilə qarşılaşıb. Daha üstün görüş keçirən Tayfur Əliyev qələbə qazanaraq fəxri kürsünün ən yüksək pilləsinə qalxıb.
Sonda idmançımıza diplom, medal və kubok təqdim edilib.

Ceyhun Məmmədov

Culfa rayonunda boks üzrə yoldaşlıq görüşü keçirilib. Ordubad və Culfa Rayon Gənc­lər və İdman idarələri ilə Boks Federasiyasının birgə təşkil etdiyi görüşdə hər iki rayonun boksçuları qarşılaşıb. 10 çəki dərəcəsində dəri əlcək sahiblərinin mübarizə apardığı yoldaşlıq görüşündən öncə çıxış edən federasiyanın sədr müavini Məmmədcəfər Əliyev bildirib ki, bu idman növünün inkişafı üçün muxtar respublikada hərtərəfli şərait yaradılıb. Məqsəd şəhər və rayonlarda boksun kütləviliyinə nail olmaq, gənclər arasında boks idman növünü təbliğ etməkdir.
Ordubad boksçuları culfalı həmkar­larını 6:4 hesabı ilə məğlub etməyi bacarıblar.

Ceyhun Məmmədov

Naxçıvan Muxtar Respublikası Güləş Federasiyası idmançılar üçün  seminarların keçirilməsini davam etdirir. Ötən il olduğu kimi, builki seminarlarda da Azərbaycanın tanınmış məşqçiləri, idman ustaları iştirak edirlər. 

Dünən federasiyanın nəzdində fəaliyyət göstərən cüdo bölməsinin yetirmələri üçün təşkil olunan nəzəri və praktiki seminarda Azərbaycan Respublikasının Əməkdar məşqçisi, ikiqat Avropa çempionu Tərlan Poladov iştirak edib. Əvvəlcə idmançılara cüdonun yeni qaydaları haqda məlumat verən məşqçi sonra praktiki olaraq yeni tərtib olunan qaydaları idmançılara nümayiş etdirib.
Məşqdən sonra Tərlan Poladovun fikirlərini öyrəndik: “Seminarın təşkilində məqsəd idmançılara yeni qaydalar haqqında məlumat vermək və məşq prosesində olan bəzi fəndləri aşılamaqdır. Muxtar respublikada bu idman növünün inkişafı üçün hərtərəfli şərait yaradılıb, idmançılarda da yüksək əhval-ruhiyyə var. Keçirilən məşqdən sonra məşqçilərlə də söhbətlərimiz, fikir mübadiləmiz oldu. Federasiya ilə birgə belə tədbirlərin qarşıdakı aylarda da təşkili nəzərdə tutulub”.

Naxçıvan Muxtar Respublikası Gənclər və İdman Nazirliyi ilə Şərq Döyüşü Sənəti Federasiyasının birgə təşkil etdiyi taekvondo üzrə yeniyetmələr arasında daxili birinciliyə yekun vurulub. 2 fevral – Gənclər Günü münasibətilə keçirilən tədbirin açılış mərasimində çıxış edən Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov, federasiyanın sədr müavini Cavanşir Salayev idmançılara Gənclər Günü ilə bağlı geniş məlumat veriblər və bu gün münasibətilə onları təbrik ediblər.
40-dan çox idmançının mübarizə apardığı daxili birincilikdə taekvondoçular tatami üzərinə 7 çəki dərəcəsində çıxıblar. Birincilikdə Amal Heydərli (25 kiloqram), Rəşid Zülfüqarov (30 kiloqram), İntiqam Məmmədov (33 kiloqram), Ülvi Nəcəfov (37 kiloqram), Ramil Salayev (41 kiloqram), Ülvi Kazımlı (51 kiloqram) və Kərim İsmayılov (68 kiloqram) rəqiblərinə qalib gələrək fəxri kürsünün ən yüksək zirvəsinə qalxıblar.
Sonda qalib idmançılara diplomlar təqdim edilib.

Ceyhun Məmmədov

Naxçıvan Muxtar Respublikasında idman və idmançılara göstərilən diqqət öz bəhrəsini verməkdədir. Məhz bunun nəticəsidir ki, idmançılarımız mütəmadi olaraq beynəlxalq arenalarda çıxış edir, Azərbaycan yığmasının tərkibinə dəvət olunurlar. Muxtar respublikanı təmsil edən daha iki futbolçumuz Azərbaycan yığmasının heyətinə cəlb edilib. “Araz-Naxçıvan” Peşəkar Futbol Klubunun yetirmələri olan Əsgər Əsgərov və Elşad Əliyev Azərbaycanın 17 yaşlılardan ibarət millisinin təlim-məşq toplanışına yollanıblar. Hər iki futbolçumuzun milliyə dəvəti ilə bağlı fikirlərini öyrəndik.
Əsgər Əsgərov: “Milliyə dəvət hər bir futbolçunun arzusudur. Çalışacam ki, təlim-məşq toplanışında özümü yaxşı göstərim və Azərbaycan millisinin dəyişilməz üzvü olum. Bunu bacaracağıma əminəm”.
Elşad Əliyev: “Bu, ilk olaraq məşqçilərin bizə göstərdiyi etimaddır. Hər bir futbolçu çalışmalıdır ki, məşqçi tərəfindən ona olan güvəni heç vaxt itirməsin. İndi məqsədim Azərbaycan yığmasındakı məşqçilərin etimadını qazanmaqdır. Mənim bu səviyyəyə gəlib çatmağımda “Araz-Naxçıvan” futbol komandasının rolu böyükdür”.

Ceyhun Məmmədov

Dünən Naxçıvan Şəhər Uşaq-Gənc­lər İdman Məktəbinin idman zalında 2 fevral – Gənclər Günü münasibətilə güləş üzrə yoldaşlıq görüşü keçirilib.
Naxçıvan Muxtar Respublikası Gənclər və İdman Nazirliyi ilə Güləş Federasiyasının birgə təşkil etdiyi görüşdə “Naxçıvan” və “Babək” komandalarının güləşçiləri mübarizə aparıblar.
Yarışdan öncə çıxış edən Naxçıvan Muxtar Respublikası Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov bildirib ki, muxtar respublikada gənclər daim diqqət mərkəzindədir. Onların idmana cəlbi, zərərli vərdişlərdən uzaq olmaları üçün tez-tez belə tədbirlər təşkil edilir.
İdmançılar 10 çəki dərəcəsində mübarizə aparıblar. Daha üstün olan “Naxçıvan” komandasının yetirmələri babəkli həmkarlarını 7:3 hesabı ilə məğlub ediblər.
Sonda qalib komandaya diplom təqdim olunub.

Ceyhun Məmmədov

Şərur Rayon Olimpiya-İdman Kompleksində idmançılar üçün seminar təşkil olunub. Naxçıvan Muxtar Respublikası Gənclər və İdman Nazirliyi ilə Şərq Döyüşü Sənəti Federasiyasının birgə təşkil etdiyi seminarda federasiyanın rayon üzrə bölmələrinin 40-dan çox idmançısı iştirak edib.
Seminarı giriş sözü ilə açan federasiyanın sədr müavini Cavanşir Salayev bildirib ki, belə seminarların təşkili muxtar respublikada idmanın inkişafına dövlət qayğısının ifadəsi kimi dəyərləndirilir. Federasiya və nazirliyin belə tədbirləri təşkil etməkdə məqsədi rayonlarda yeniyetmə və gəncləri idmana cəlb etmək, onları zərərli vərdişlərdən uzaq tutmaqdır.
Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov isə vurğulayıb ki, nazirlik muxtar respublikada fəaliyyət göstərən federasiyalarla birgə ötən il də belə seminarlar keçirib. Seminarlarda Azərbaycanın tanınmış məşqçiləri iştirak etməklə, öz təcrübələrini gənc idmançılara aşılamağa çalışıblar.
Seminarda Azərbaycan Respublikasının Əməkdar məşqçisi Hidayət Şabanov iştirak edib və idmançılara öz məsləhətlərini verib.
Analoji seminar Naxçıvan şəhərində də təşkil edilib.

Ceyhun Məmmədov

Yanvarın 29-da Naxçıvan Muxtar Respublikası Şərq Döyüşü Sənəti Federasiyasının məşqçi-müəllim heyətinin və idmançılarının iştirakı ilə Cəlil Məmmədquluzadə adına Naxçıvan Dövlət Musiqili Dram Teatrında tədbir keçirilib.
Əvvəlcə Azərbaycan Respublikasının Dövlət Himni səsləndirilib.
Gənc idmançıların vətənpərvərlik ruhunun yüksəldilməsi, onların asudə vaxtının səmərəli keçirilməsi məqsədilə təşkil edilən tədbiri Naxçıvan Muxtar Respublikası daxili işlər nazirinin müavini, polis general-mayoru Səbuhi Novruzov açıb.

Sağlam gəncliyin formalaşması aparılan düzgün siyasətin nəticəsidir. Bu gün Azərbaycan gəncinin yüksək pillələrdə özünə yer tapması məhz bunun bariz nümunəsidir. Gənc­lərin idman sahəsinə marağının artırılması ölkəmizdə ön planda duran əsas məsələlərdəndir. İdman sağlam həyat tərzini insan üçün sığorta edən ən gözəl vasitədir. Məhz bu amili nəzərə alıb qəzetimizin bu sayından etibarən sağlam həyat tərzinin formalaşdırılması ilə bağlı yazıları oxucularımıza təqdim edəcəyik. 

İnsan ilk olaraq öz sağlamlığını qorumalı, özü özünün həkimi olmalıdır. Bunun üçün çox da ciddi işlər görmək tələb olunmur: sadəcə, gün ərzində 30-50 dəqiqəlik məşq həyatımızda böyük dəyişikliklərə səbəb ola bilər. İdman edən və etməyən insanları müqayisə etdikdə maraqlı faktlarla qarşılaşırıq. İdmanla məşğul olmağın ən böyük üstünlüklərindən biri ürəyi möhkəmləndirmək, yüksəlmiş qan təzyiqini nəzarətdə saxlamaqdır. İdman hərəkətləri qanda olan təhlükəli trombların sorulmasına kömək edir və orqanizmin qocalmasının qarşısını alır. Lakin bu hal idman etməyən insanlarda çox nadir hallarda baş verir. Passiv həyat tərzi keçirənlər aktiv hərəkətlər etmədikcə, oksigen hər bir hüceyrəyə daxil olmur, nəticədə, daxili üzvlərdə tənəffüs aktivləşmir, dəri təravətlənmir, qan dövranı pisləşir.
Yaş fərqindən asılı olmayaraq, insan idmanla məşğul olarkən əzələləri tonuslanır. Bu da fiziki hazırlıq almış oynaqların yüksək hərəkətlər etməsinə səbəb olur. Əks təqdirdə, insan ideal olmayan çəkiyə “sahiblənir” və artıq çəki onun həyat aktivliyini azaldır.

Naxçıvan Muxtar Respublikası Gənclər və İdman Nazirliyi ilə Səhiyyə Nazirliyinin birgə tədbirlər planına uyğun olaraq, Naxçıvan şəhərində fəaliyyət göstərən idman obyektlərində dezinfeksiya işləri aparılıb.
Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov bizimlə söhbətdə bildirdi ki, nazirlik idmançıların sağlamlığı üçün hər ay belə tədbirlər həyata keçirir, idman obyektləri, zalları dezinfeksiya olunur. Bu işlər tək Naxçıvan şəhərində yox, muxtar respublikanın bütün rayonlarında aparılır.
Dezinfeksiya işləri Naxçıvan şəhərindəki İlham Əliyev adına Olimpiya-İdman Kompleksində, Naxçıvan Muxtar Respublika Stadionunda və İslam Hümbətov adına Uşaq-Gənclər İdman Məktəbində, Şərur Olimpiya-İdman Kompleksində və digər idman məktəblərində aparılıb.

Xəbərlər şöbəsi

Naxçıvan Muxtar Respublikası Gənclər və İdman Nazirliyinin təşkilatçılığı ilə idmançılar üçün keçirilən seminarlar davam etdirilir. Bu səpkidə olan seminarlardan biri də dünən Naxçıvan Muxtar Respublika Stadionunda baş tutub. “Araz-Naxçıvan” Peşəkar Futbol Klubunun futbolçuları üçün təşkil edilən seminarda diyetoloq İsmayıl Vəliyev iştirak edib.
Seminarın açılışında çıxış edən Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahim­ov bildirib ki, butipli yığıncaqların təşkilində məqsəd idmançıların sağlamlığı və düzgün qidalanmasıdır. Sonra “Araz-Naxçıvan” futbol komandasının baş məşqçisi Sakit Rzayev çıxış edib və bu seminarın əhəmiyyətindən danışıb.
Diyetoloq İsmayıl Vəliyev çıxışında bildirib ki, əzələ kütləsinin artımı üçün məşq ilə yanaşı, həm də düzgün pəhriz rejiminə əməl olunmalıdır. Əsas qayda – əlavələr qidanı əvəz etməməlidir. Orqanizmə zülal, karbohidrat, yağ çox daxil olan zaman oksidləşmə vəziyyətində enerji hasil olur. Enerjini fiziki işlərə sərf etmədikdə isə bu, piylənmə ilə nəticələnir. İdmançıda əzələ kütləsinin artımının birinci qaydası güc məşqləri üçün, ikinci qaydası isə əzələnin artımı üçün enerjinin olmasıdır.
Diyetoloq onu da qeyd edib ki, fut bolçular ilk olaraq özlərini zərərli qidalardan qorumalı, mütəmadi olaraq onlara tövsiyə edilən yeməklərlə qidalanmalıdırlar.
Qeyd edək ki, növbəti seminar Karate-do, Boks və Güləş federasiyalarının yetirmələri üçün nəzərdə tutulub.

 Ceyhun Məmmədov

 İdmançılar bu aylarda qidalanmaya xüsusi fikir verməlidir

İdman edərkən bəzən kiçik səhvlərimiz insan orqanizmi üçün sonradan müəyyən fəsadlar törədir ki, bu da zaman keçdikcə bədəndə müəyyən anormallıq yaradır. İdman mütəxəssislərinin apardığı araşdırmalar zamanı məlum olub ki, ilin hər fəslində idman fərqli halda edilməlidir. Məsələn, yay və yaz aylarında daha çox açıq havada məşq etmək məsləhət görülür.

Təbii ki, qış fəslində də açıq havada idmanla məşğul olmaq orqanizmin daha sağlam inkişaf etməsinə zəmin yaradır. Lakin qış aylarında açıq havada məşq edərkən bəzi məqamları bilmək vacibdir. Bunlardan biri məşqə başlamazdan əvvəl isinmə hərəkətləridir. Soyuq qış aylarında isinmə, gərilmə hərəkətləri əzələləri dartınmaqdan, əzilmələrdən qoruyur. Peşəkar idmançılar isinmə hərəkətlərini 45-55, qeyri­-peşəkar idmançılar isə 20-25 dəqiqə etməlidir. Qış aylarında idman edərkən daha çox geyimə fikir vermək lazımdır: tərkibi yun və ya pambıq geyimlər bu fəsil üçün məqsədəuyğun deyil. Çünki bu geyimlər tərlə birgə isinir və bədəni nəmli saxlayır.
Qış aylarında açıq havada idmanla məşğul olduqda insan orqanizmindən tər ilə birlikdə kalium və natrium duzları xaric olunur. Bu baxımdan prosedurlardan əlavə, tərkibi protein olan pəhrizlərdən istifadə etmək məsləhətdir.

Naxçıvan Muxtar Respublikası Basketbol Federasiyasının təşkilatçılığı ilə “Naxçıvan” Universitetinin idman zalında yoldaşlıq görüşü təşkil edilib.
20 Yanvar şəhidlərinin xatirəsinə həsr olunmuş görüşdə “Naxçıvan” Universiteti və “Lokomotiv” komandaları üz-üzə gəliblər. Görüşdən öncə çıxış edən federasiyanın sədr müavini Ənvər Məmmədov 20 Yanvar faciəsi barədə məlumat verib, Sovet im­periyasının 1990-cı ilin yanvarın 19-dan 20-nə keçən gecə Bakıda törətdiyi vəhşilikləri, ondan 8 saat əvvəl havadarlarının köməyi ilə ermənilərin Naxçıvan Muxtar Respublikasına hücumlarını, günahsız insanların qətlə yetirildiyini bir daha diqqətə çatdırıb. Qeyd edib ki, SSRİ rəhbərliyinin göstərişi ilə törədilmiş dəhşətli cinayət Azərbaycan xalqının müstəqillik uğrunda mübarizə əzmini qıra bilməmiş, əksinə, xalqımızı daha da birləşdirmiş, mübarizliyini artırmışdır. Bu qanlı terror aktına ümummilli liderimizin 1993-cü ildə hakimiyyətə yenidən qayıdışından sonra dövlət səviyyəsində siyasi-hüquqi qiymət verilmişdir. Görkəmli dövlət xadiminin siyasi kursunu uğurla davam etdirən Azərbaycan Respublikasının Prezidenti cənab İlham Əliyev ölkəmizin azadlığı, suverenliyi uğrunda həlak olanların xatirəsinə böyük ehtiram bəsləyir, şəhidlərin ailə üzvlərinin sosial müdafiəsini gücləndirmək və onlara dövlət qayğısını daha da artırmaq məqsədilə mühüm qərarlar qəbul edilir, hər il dövlət səviyyəsində geniş tədbirlər planı hazırlanaraq həyata keçirilir.
Daha baxımlı oyun sərgiləyən “Lokomotiv” komandası meydanı 61:50 hesablı qələbə ilə tərk edib.
Sonda fərqlənən basketbolçulara federasiyanın diplomları təqdim olunub.

Xəbərlər şöbəsi

Naxçıvan şəhərindəki İlham Əliyev adına Olimpiya-İdman Kompleksində 20 Yanvar şəhidlərinin xatirəsinə həsr olunmuş gənclər və kişilər arasında kikboksinq üzrə Naxçıvan Muxtar Respublika birinci­liyi keçirilib. Naxçıvan Muxtar Respublikası Gənclər və İdman Nazirliyi ilə Şərq Döyüşü Sənəti Federasiyasının birgə təşkil etdiyi və 2 gün davam edən birincilikdə 70-ə yaxın idmançı mübarizə aparıb. Birinciliyin açılış mərasimində çıxış edən Gənc­lər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov, federasiyanın sədr müavini Cavanşir Salayev 20 Yanvar faciəsi haqqında danışıblar.
Birinciliyin reqlamentinə gəlincə, gənclər və kişilər 10 çəki dərəcəsində rinqə çıxıblar. Gənclərin mübarizəsində idmançılar 45, 51, 54, 57 və 67 kiloqram, kişilərin mübarizəsində isə 60, 65, 71, 75 və 81 kiloqram çəki dərəcələrində birincilik uğrunda mübarizə aparıblar.
Gərgin idman mübarizəsi şəraitində keçən yarışda daha çox 60 və 65 kiloqramda mübarizə aparan idmançıların döyüşləri maraq kəsb edib. Belə ki, 60 kiloqram çəki dərəcəsində dünya çempionu Nail Hüseynov Mərdan Muradovu məğlub edərək fəxri kürsünün ən yüksək zirvəsinə qalxıb. 65 kiloqram çəki dərəcəsində isə tamaşaçılar nokautun şahidi olublar. Belə ki, Avropa birinci­liyinin qalibi Ruslan Musayev bir neçə beynəlxalq turnirin qalibi olan Samiq Seyidzadə ilə üz-üzə gəlib. S.Seyidzadənin ikinci raunddakı qüvvətli zərbəsi rəqibin nokautu ilə yekunlaşıb. Kişilərin mübarizəsində digər çəki dərəcələrində Sarvan İsayev (71 kiloqram), İbrahim İbrahimli (75 kiloqram) və Mais Quliyev (85 kiloqram) birinciliyin qalibi olublar.
Gənclərin final görüşlərində isə Sənan Əliyev (45 kiloqram), Sahil Cəfərov (51 kiloqram), Rauf Həsənov (54 kiloqram), Murad Hüseynov (57 kiloqram) və Əbülfəz Əliyev (67 kiloqram) rinqi qalib tərk edərək birinciliyin baş mükafatını qazanıblar.
Sonda hər çəki dərəcəsində ilk 3 pilləni tutan idmançılara diplom və medal təqdim olunub.

 Ceyhun Məmmədov