Şərur Olimpiya-İdman Kompleksində qızlar üçün üzgüçülük və bədii gimnastika üzrə bölmələr fəaliyyətə başlayıb.
Bölmələrin ixtisaslı müəllimlərlə təmin edilməsi də diqqət mərkəzindədir. Buna görə Naxçıvan Muxtar Respublikası Gənc­lər və İdman Nazirliyi və Azərbaycan Respublikası Bədii Gimnastika Federasiyasının birgə təşkilatçılığı ilə Yengicə kənd tam orta məktəbinin ixtisaslı fənn müəllimi Sevinc Nəcəfova Bakı şəhərinə bədii gimnastika üzrə ixtisasartırma kursuna göndəriləcək. Bu addımlar 2017-ci il yanvarın 14-də Naxçıvan Muxtar Respublikası Ali Məclisində “Naxçıvan Muxtar Respublikasında bədən tərbiyəsi və idmanın hazırkı vəziyyəti və qarşıda duran vəzifələr” mövzusunda keçirilən müşavirədə verilmiş tapşırıqlara əsasən atılıb.

Ceyhun Məmmədov

Naxçıvan Muxtar Respublikasında uşaq, yeniyetmə və gənclərin idmana cəlbi, onların sağlam böyüməsi üçün mühüm tədbirlər həyata keçirilib. Bunun nəticəsidir ki, ötən il  muxtar respublika idmançıları ölkədaxili və beynəlxalq turnirlərdə 108 medal qazanıblar. 

Muxtar respublikada idmanın bütün növlərinə maraq göstərilməsi, 40 mindən çox uşaq, yeniyetmə və gəncin idmanla məşğul olması Naxçıvanda gələcək nəslin sağlam böyüdüyündən xəbər verir. Hazırda muxtar respublikada 12 idman federasiyası, Gənclər və İdman Nazirliyinin nəzdində olan idman bölmələri bu sahənin inkişafına töhfələrini verməkdədirlər. Hər bir idman növü çətinliyinə, dözümlülüyünə, çevikliyinə, hətta tamaşaçı auditoriyasına görə seçilir. Hazırda dünya idmanında “elit növ” adını qazanan bədii gimnastikanın Naxçıvan Muxtar Respublikasında təşəkkül tapması 2014-cü ilə təsadüf edir. Məlumat üçün bildirək ki, İsveçdə yaranan bədii gimnastikanı aktyorluq, balet, musiqi və pantomim ilə birlikdə edirlər. Həm incəsənət, həm də idman növü olan bədii gimnastika özündə iki yarış proqramını birləşdirir: fərdi çıxışlar və qrup hərəkətləri. Hər bir qrup komandası 5 əsas və 1 ehtiyatda olan gimnastdan ibarət olur. Ehtiyatda olan gimnast 2 hərəkətdən birində çıxış etməlidir. Bədii gimnastika sırf qadın idman növüdür və ölçüsü 13x13 metr olan xüsusi xalçada musiqi müşayiəti ilə yerinə yetirilir.

Ordubad rayonunun Aza kənd tam orta məktəbində 2 fevral – Gənclər Günü münasibətilə şahmat üzrə daxili birincilik keçirilib.

Bakı şəhərində Azərbaycan Respublikası Boks Federasiyasının İdman Kompleksində keçirilən kişi boksçular arasında Azərbaycan çempionatına yekun vurulub.
10 çəki dərəcəsi üzrə keçirilən çempionatda Naxçıvan Muxtar Respublikası Boks Federasiyasının 9 dəri əlcək sahibi mübarizə aparıb.
56 kiloqram çəki dərəcəsində rinqə çıxan Tayfur Əliyev final görüşündə Tural Əhmədovla üz-üzə gəlib. Zərbələrdə daha dəqiq olan Tayfur Əliyev ölkə çempionu adını qazanıb. Naxçıvanı təmsil edən digər boksçu Ağalar Sadiqzadə də bu uğuru təkrarlayıb. +91 kiloqram çəki dərəcəsində rinqə çıxan dəri əlcək sahibi həlledici qarşılaşmada Asəf Aslanlıdan üstün olub. Muxtar respublika boks məktəbinin digər yetirməsi Sərxan Əliyev də mükafat qazanıb. Belə ki, boksçumuz 60 kiloqram çəki dərəcəsində final görüşünə kimi məğlubiyyətsiz irəliləyib. Həlledici qarşılaşmada Cavid Çələbiyevlə qarşılaşan idmançımız ölkə çempionatının gümüş medalını qazanıb. Digər qızıl medalı isə komandamıza 81 kiloqram çəki dərəcəsində Eldar Quliyev qazandırıb.
Sonda idmançılarımıza təşkilatçılar tərəfindən diplom və medallar təqdim edilib.

- Ceyhun Məmmədov

Muxtar respublikada fəaliyyət göstərən daha 3 idman federasiyasında 2016-cı ilin yekunlarına və 2017-ci ildə qarşıda duran vəzifələrə həsr olunan yığıncaq keçirilib.
Naxçıvan Muxtar Respublikası Basketbol Federasiyasında keçirilən yığıncaqda çıxış edən federasiyanın sədri Mahir Əliyev bildirib ki, geridə qoyduğumuz ildə də qurumun əsas məqsədi basketbol idman növünü muxtar respublikada təbliğ etmək və gənclər arasında kütləvi hala gətirmək olub. Yaradılan şəraitdən federasiya maksimum istifadə edib və muxtar respublikanın şəhər və rayonlarında öz bölmələrini yaradıb. 2016-cı ildə federasiya Gənclər və İdman Nazirliyi ilə birgə 56 idman tədbiri keçirib.
Naxçıvan Muxtar Respublikası Voleybol Federasiyasının yekun iclasında çıxış edən federasiyanın sədr müavini Aydın Mirzəyev vurğulayıb ki, ötən il mütəmadi olaraq yarışlar, turnirlər təşkil edilib. Eyni zamanda voleybol üzrə Azərbaycan çempionatının yüksək liqasının ilk dövrəsinin oyunları məhz muxtar respublikada keçirilib. İndi bizim əsas məqsədimiz çıxış etdiyimiz Azərbaycan çempionatında yüksək nəticələr əldə etməkdir. Bunu nəzərə alaraq, artıq yığmaya rusiyalı məşqçi də dəvət etmişik. Məqsədimiz muxtar respublikanın şəhər və rayonlarında voleybola olan marağı artırmaqdır. Aydın Mirzəyev cari ildə görüləcək işlər barədə də geniş məlumat verib.

Naxçıvan Şəhər Gənclər və İdman İdarəsi, Naxçıvan şəhər 14 nömrəli tam orta məktəb və İlham Əliyev adına Olimpiya-İdman Kompleksinin birgə təşkil etdiyi futzal üzrə şəhər birinciliyinə yekun vurulub. 2 fevral – Gənclər Günü münasibətilə 2003-2004-cü illər təvəllüdlü idmançılar arasında keçirilən birincilikdə Naxçıvan şəhər 7, 14, 16 nömrəli və Heydər Əliyev adına tam orta məktəblərin komandaları mübarizə aparıblar.
Birinciliyin açılış mərasimində çıxış edən Gənclər və İdman İdarəsinin rəisi Xəyal Qurbanov və 14 nömrəli tam orta məktəbin direktoru Gülşən Ağayeva muxtar respublikada idman sahəsində görülən işlərdən, qazanılan uğurlardan danışıblar.
Olimpiya sistemi üzrə keçirilən yarışın yarımfinal mərhələsində Heydər Əliyev adına tam orta məktəbin komandası 7 nömrəli tam orta məktəbin komandasını (2:1), 14 nömrəli tam orta məktəbin futzalçıları isə 16 nömrəli tam orta məktəbin futzalçılarını (1:0) üstələyərək finala vəsiqə qazanıblar. Həlledici qarşılaşmada hesabda geri düşmələrinə bax­mayaraq, özlərini toparlayan 14 nömrəli tam orta məktəbin futzalçıları meydanı 3:1 hesablı qələbə ilə tərk ediblər.
Sonda qalib və iştirakçı komandalara təşkilatçılar tərəfindən diplomlar təqdim edilib.

Ceyhun Məmmədov

Naxçıvan şəhər 14 nömrəli tam orta məktəbdə 2 fevral – Gənclər Günü münasibətilə şahmat üzrə daxili birincilik keçirilib. Birincilikdə məktəbin 128 zəka sahibi qüvvəsini sınayıb. Açılış mərasimində çıxış edən məktəbin direktoru Gülşən Ağayeva Gənc­lər Günü haqqında tədbir iştirakçılarına məlumat verib və bildirib ki, 2 fevral – Gənclər Gününün elan olunması ümummilli lider Heydər Əliyevin adı ilə bağlıdır. Məhz ümummilli liderin hakimiyyətə qayıdışından sonra Azərbaycanda dövlət gənclər siyasətinin əsası qoyulub. Bunun nəticəsində Azərbaycan indi bir idman ölkəsi kimi dünyada tanınır, idmançılarımız çıxış etdikləri beynəlxalq yarışlarda bayrağımızı dalğalandırırlar. Muxtar respublikada da idmana və idmançılara böyük diqqət və qayğı göstərilir.
Sonra yarışa start verilib. Olimpiya sistemi üzrə keçirilən yarışda bütün rəqiblərini üstələyən VIII sinif şagirdi Rəvan Məmmədov birinciliyin qalibi olub. Digər iki pillədə isə məktəbin IV sinif şagirdləri Rəvan Həsənzadə və Əkbər Məmmədov qərarlaşıblar.
Sonda qaliblər diplomla təltif olunublar.

 Ceyhun Məmmədov

Voleybol komandamızın yeni baş məşqçisi bu fikirdədir

Voleybol üzrə Azərbaycan çempionatının yüksək liqasında mübarizə aparan “Naxçıvan” komandası üçüncü dövrənin hazırlıqlarını davam etdirir. Məlumat üçün bildirək ki, bundan sonra “Naxçıvan” komandasını çempionat oyunlarına və digər qarşılaşmalara rusiyalı baş məşqçi Aleksandr Çornı çıxaracaq. 55 yaşlı baş məşqçinin zəngin idman karyerası var. 1961-ci ildə anadan olan Çornı idmançı kimi uzun müddət Moskva şəhərində fəaliyyət göstərən Mərkəzi Ordu İdman Klubunun şərəfini qoruyub, bu klubda 10 qat SSRİ çempionu, 4 qat SSRİ Kubokunun, 6 qat Avropa Çempionları Kubokunun sahibi, böyüklər arasında Avropa çempionu adını qazanıb. 1979-cu ildə SSRİ yığmasının heyətində gənclər arasında Avropa, iki il sonra isə dünya çempionu olub.
Oyunçu karyerasını bitirəndən sonra o, məşqçilik işinə başlayıb. Çornı 1995-ci ilə qədər Mərkəzi Ordu İdman Klubunun ikinci klubunun, bir il İtaliya A seriyasında “Padova”nın, 1996-2008 və 2009-2011-ci illərdə Novokuybışevskinin “Oktan” klubunun baş məşqçisi olub.
Baş məşqçi bizimlə söhbətində hədəfləri barədə danışdı: “Hədəfimiz Azərbaycan çempionatında uğurlu çıxış etmək və yüksək yerə sahib olmaqdır. Bunun üçün ciddi hazırlaşmalı və məşqlərə ara verməməliyik. “Naxçıvan” komandası ilə ilk məşqlərdə uşaqların istedadlı olduğunu gördüm. Bu da daha bir məqsədimizə çatmağa – Naxçıvanda voleybolu inkişaf etdirməyə və istedadlı uşaqları yığmaya cəlb etməyə imkan verəcək. İnanıram ki, komanda ilə böyük uğurlara imza atacağıq”.
Qeyd edək ki, “Naxçıvan” komandasına baş məşqçi ilə yanaşı, daha iki voleybolçu da qoşulub.

Ceyhun Məmmədov

Naxçıvan Muxtar Respublikası Güləş Federasiyasının 2016-cı ilin yekunları və qarşıda duran vəzifələrlə bağlı iclası keçirilib.
Tədbiri giriş sözü ilə açan federasiyanın sədr müavini Faiq İsgəndərov bildirib ki, 2016-cı ildə Güləş Federasiyası tərəfindən muxtar respublika, şəhər (rayon) birincilikləri və çempionatları təşkil olunub, yeniyetmə və gənclərin bu növə cəlb edilməsi üçün müəyyən işlər görülüb. Bunun nəticəsidir ki, bu gün muxtar respublika üzrə 111 qrupda 1437 idmançı güləşin sirlərini öyrənir. Federasiyanın idmançıları bəhs olunan dövrdə 6 beynəlxalq, 2 respublika səviyyəli turnirdə, 6 Azərbaycan, 3 Naxçıvan Muxtar Respublika birinciliklərində, əlamətdar və tarixi günlərlə əlaqədar keçirilən 12 daxili birincilikdə iştirak ediblər.

Naxçıvan Muxtar Respublikası Karate-do Federasiyası 2017-ci ilə də uğurla başlayıb. Belə ki, federasiyanın yetirmələri Bakı şəhərində təşkil olunan beynəlxalq turnirdə uğurla nəticələnmiş mübarizə aparıblar.
Bakı İdman Sarayında Azərbaycan Respublikası Milli Karate Federasiyası və “Arpaçay” karate klubunun birgə təşkil etdiyi 20 Yanvar şəhidlərinin xatirəsinə həsr olunmuş uşaq, yeniyetmə və gənclər arasında klublararası beynəlxalq turnirdə 50 komandanın 700 idmançısı qüvvəsini sınayıb. İran İslam Respublikası, İsrail və Rusiya komandalarının da iştirak etdiyi turnirdə 5 idmançımız uğur qazanıb. 8-9 yaş qrupunda (33 kiloqram) mübarizə aparan Seyran Quluzadə yalnız final görüşündə məğlub olub. 10-11 yaş qrupunda (37 kiloqram) Məhəmməd Şıxəlili və 14-15 yaş qrupunda (70 kiloqram) Aslan İsmayılov da beynəlxalq turniri ikinci pillədə başa vurublar. Digər iki idmançımız – 12-13 yaş qrupunda (35 kiloqram) Vüsal Seyidov və 8-9 yaş qrupunda mübarizə aparan Aminə Novruzzadə (25 kiloqram) üçüncülüklə kifayətləniblər.
Sonda qalib olan idmançılarımız təşkilatçılar tərəfindən diplom və medalla təltif olunublar.

Ceyhun Məmmədov

Naxçıvan Muxtar Respublikası Şərq Döyüşü Sənəti Federasiyasında ötən ilin yekunları və 2017-ci ildə qarşıda duran vəzifələrə həsr olunmuş yığıncaq keçirilib.
Geridə qoyduğumuz ildə görülən işlər barədə danışan federasiyanın sədr müavini Cavanşir Salayev bildirib ki, muxtar respublikanın şəhər və rayonlarında bölmələri olan federasiyada 20-dən çox məşqçi-müəllim çalışır, ümumilikdə, 500-dən çox yeniyetmə və gənc bu idman növlərinin sirlərini öyrənir. Federasiyada 14 nəfərdən ibarət hakimlər kollegiyası fəaliyyət göstərir. Federasiyanın yetirmələri ötən il bir çox ölkədaxili və beynəlxalq turnirlərdə iştirak edərək gözəçarpan uğurlara nail olublar. Bununla yanaşı, bəhs olunan dövrdə muxtar respublikanın Gənclər və İdman Nazirliyi ilə birgə yarışlar, turnirlər təşkil edilib. 2017-ci ildə məqsəd federasiyanın nəzdində fəaliyyət göstərən bölmələrin iş qrafikini genişləndirmək və yeni idmançılar cəlb etməkdir. Cari ildə şəhər və rayon birincilikləri təşkil olunacaq. Uğur qazanan idmançılarımız isə ölkə birinciliklərində Naxçıvanı təmsil edəcəklər.
Naxçıvan Muxtar Respublikası Gənclər və İdman Nazirliyi Aparatının rəhbəri Canməmməd Canməmmədov çıxışında Naxçıvan Muxtar Respublikasının Ali Məclisində “Naxçıvan Muxtar Respublikasında bədən tərbiyəsi və idmanın hazırkı vəziyyəti və qarşıda duran vəzifələr” mövzusunda keçirilmiş müşavirədə verilmiş tapşırıqlarla bağlı yığıncaq iştirakçılarını məlumatlandırıb.

Ceyhun Məmmədov

Naxçıvan Muxtar Respublikası Yüngül Atletika Federasiyası 2016-cı ilin yekunları və cari ildə qarşıda duran vəzifələr mövzusunda yekun iclas keçirib. İclası giriş sözü ilə açan federasiyanın sədri Rövşən Məmmədov bildirib ki, bu gün Naxçıvan Muxtar Respublikasında bütün sahələrə olduğu kimi, bədən tərbiyəsi və idmanın inkişafına da xüsusi diqqət yetirilir. Hər il istifadəyə verilən yeni quruculuq obyektləri arasında idman müəssisələri üçün binalar da yer alır. 2002-ci ildə idman federasiyalarının yaradılması muxtar respublikada idmanın inkişafına öz töhfəsini verib. Bu federasiyalardan biri də Yüngül Atletika Federasiyasıdır. Naxçıvan Muxtar Respublikası Gənclər və İdman Nazirliyi ilə sıx əməkdaşlıq şəraitində hər ilin əvvəlində birlikdə hazırlanan və təsdiq edilən təqvim planına uyğun olaraq nəzərdə tutulan bütün idman yarışlarının hazırlanmasına və keçirilməsinə nail olunur. Hazır­da Yüngül Atletika Federasiyasının nəzdində 2 klub və 7 rayon bölməsində fəaliyyət göstərən 64 qrupda 682 idmançı məşqlərdə iştirak edir. Bunlardan 280-i qız, 402-si isə oğlanlardır. Klub və bölmələrdə idmançılarla federasiyadan aylıq əməkhaqqı alan 11 məşqçi müəllim məşğul olur.
Sonra çıxış edən federasiyanın sədr müavini İntiqam Rəhimov 2016-cı ildə təşkil edilən yarışlar barədə məlumat verib. Bildirilib ki, geridə qoyduğumuz il ərzində federasiya tərəfindən 29 muxtar respublika əhəmiyyətli yarış keçirilib. Yarışlarda 2647 nəfər gənc oğlan və qız iştirak edib.

Babək rayonunda “Zərərli vərdişlərə yox deyək, həmişə sağlam olaq” devizi altında “Babək” və “Naxçıvan” komandaları arasında MMA qarışıq döyüş növü üzrə yoldaşlıq görüşü keçirilib.
Naxçıvan Muxtar Respublikası Gənc­lər və İdman Nazirliyi ilə Şərq Döyüşü Sənəti Federasiyasının birgə təşkil etdiyi yoldaşlıq görüşündə idmançılar 8 çəki dərəcəsində mübarizə aparıblar. Yekun nəticəyə əsasən,“Naxçıvan” komandası babəkli həmkarları üzərində 5:3 hesabı ilə qalib gəlib.
Sonda qalib gələn komanda üzvlərinə Şərq Döyüşü Sənəti Federasiyasının diplom, medal və hədiyyələri təqdim edilib.

 Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksində “Zərərli vərdişlərə yox deyək, həmişə sağlam olaq” devizi altında yeniyetmələr arasında boks üzrə Naxçıvan şəhər açıq birinciliyi keçirilib.

Naxçıvan Şəhər Gənc­lər və İdman İdarəsinin rəisi Xəyal Qurbanov tədbiri açıq elan edərək bildirib ki, bu yarışın keçirilməsində məqsəd yeniyetmələri zərərli vərdişlərdən kənarlaşdırmaq və onları boks idman növünə cəlb etməkdən ibarətdir. Sonra Naxçıvan Muxtar Respublikası Boks Federasiyasının sədr müavini Məmmədcəfər Əliyev yarışın qaydaları haqqında idmançılara məlumat verib. Naxçıvan Şəhər Gənclər və İdman İdarəsi, Uşaq-gənclər idman məktəbi və Boks Federasiyasının təşkil etdiyi birincilikdə Naxçıvan şəhərinin idmançıları ilə yanaşı, Babək, Ordubad, Kəngərli və Şahbuz rayonlarının idmançıları da güclərini sınayıblar.
Beynəlxalq Boks Federasiyasının qaydalarına uyğun keçirilən birincilikdə 17 çəki dərəcəsində 80-ə yaxın dəri əlcək sahibi mübarizə aparıb. Gərgin mübarizə şəraitində keçən döyüşdə Heydərəli Əliyev (32 kiloqram, Naxçıvan), Hüseyn Məmmədzadə (34 kiloqram, Naxçıvan), İlkin Baxşıyev (38 kiloqram, Babək), Hüseyn Hüseynov (40 kiloqram, Naxçıvan), Həsən Hüseynov (41 kiloqram, Naxçıvan), Çingiz Qasımov (42 kiloqram, Kəngərli), Nizami Novruzov (44 kiloqram, Naxçıvan), Ülvi Süleymanov (45 kiloqram, Naxçıvan), Ümid Abbasov (46 kiloqram, Naxçıvan), Ayxan Süleymanov (48 kiloqram, Naxçıvan), Yusif Əliyev (50 kiloqram, Naxçıvan), Kənan İbrahimli (52 kiloqram, Ordubad), Sənan İbrahimli (54 kiloqram, Ordubad), Kamran Allahverdiyev (57 kiloqram, Naxçıvan), Ülvi İbrahimov (66 kiloqram, Ordubad), Abbas Fərəcli (70 kiloqram, Kəngərli) və Teymur Hacızadə (80 kiloqram, Naxçıvan) bütün rəqiblərini üstələyərək birinciliyin qalibi olublar.
Sonda müvafiq çəki dərəcələrində yer tutan idmançılar Naxçıvan Şəhər Gənclər və İdman İdarəsinin diplomları ilə təltif ediliblər.

 Ceyhun Məmmədov

Muxtar respublikamızda idmana göstərilən qayğı, yaradılan müasir
infrastruktur belə deməyə əsas verir

Bədən tərbiyəsi və idman  muxtar respublikada prioritet istiqamətlərdən sayılır. 20 ildən çoxdur ki, bu diyarda idmanın inkişafı istiqamətində təxirəsalınmaz tədbirlər həyata keçirilir,  uşaq, yeniyetmə və gənclərin idmana cəlbi üçün bir sıra işlər görülür, yeni-yeni idman obyektləri həyata vəsiqə alır. 

Təsadüfi deyil ki, hər il Naxçıvan Muxtar Respublikası Ali Məclisində bu sahə ilə bağlı müşavirələr keçirilir, həmin müşavirələrdə konkret istiqamətlər müəyyənləşdirilir. Bunun nəticəsidir ki, bu gün muxtar respublika idman diyarı kimi tanınır, idmançılarımız müxtəlif beynəlxalq tədbirlərdə parlaq qələbələr qazanır, ölkəmizin idman şərəfini qoruyur, üçrəngli bayrağımızı beynəlxalq arenalarda yüksəklərə qaldırırlar. Naxçıvanda bədən tərbiyəsi və idman sahəsində görülən işlərin əsas hədəflərindən biri də fiziki və mənəvi cəhətdən sağlam gəncliyin yetişdirilməsidir. Çünki sağlam gənclik sağlam və mübariz əsgər, döyüşçü, bir sözlə, xalqımızın gələcəyi deməkdir. Elə bu səbəbdəndir ki, ibtidai siniflərdən başlayaraq muxtar respublikada bu sahəyə xüsusi diqqət yetirilir, uşaqlar idmanın müxtəlif növlərinə cəlb olunurlar.
Ötən hər bir il muxtar respublikada keçirilən müxtəlif səviyyəli yarışlarla, yeni-yeni uğurlarla yadda qalır, idman sahəsində yeni istiqamətlər üzrə işlər görülür. Bu baxımdan 2016-cı il də bir sıra əlamətdar hadisələrlə xatırlanacaq.

Naxçıvan Şəhər Uşaq-gənclər idman məktəbində Dünya Azərbaycanlılarının Həmrəyliyi Günü münasibətilə yeniyetmələr (2000-2002-ci illər təvəllüdlülər) arasında sərbəst güləş üzrə Naxçıvan şəhər birinciliyi keçirilib. 

Naxçıvan Şəhər Gənclər və İdman İdarəsinin rəisi Xəyal Qurbanov tədbiri açıq elan edərək idmançıları qarşıdan gələn Yeni il bayramı və Dünya Azərbaycanlılarının Həmrəyliyi Günü münasibətilə təbrik edib. Naxçıvan Muxtar Respublikası Güləş Federasiyasının sədr müavini Faiq İsgəndərov idmançılara uğurlar arzulayıb.
Birincilikdə 10 çəki dərəcəsi üzrə 50-yə yaxın idmançı mübarizə aparıb. Yarışın yekununa əsasən, Hüseyn Əhmədli, Rasim Həsənov, Turqut Abdullayev, Sahil İsmayılov, Bəhlul Əsgərli, Orxan Ələkbərov, Altay Zeynalov, Qoca Əhmədov, Musa Mehdiyev və Nail Nuriyev müvafiq olaraq 42, 46, 50, 54, 58, 63, 69, 76, 84 və 100 kiloqram çəki dərəcələrində birinci yerlərə layiq görülüblər.
Hər çəki dərəcəsində yer tutan idmançılara Naxçıvan Şəhər Gənclər və İdman İdarəsinin diplomları təqdim edilib.

Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksində 31 Dekabr – Dünya Azərbaycanlılarının Həmrəyliyi Günü münasibətilə basketbol üzrə yoldaşlıq görüşü keçirilib.
Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi görüşdə “Naxçıvan” və “Lokomotiv” komandaları üz-üzə gəliblər.
Oyundan öncə çıxış edən federasiyanın sədr müavini Ənvər Məmmədov idmanda əldə olunan nailiyyətlər barədə geniş məlumat verib və iştirakçıları bayram münasibətilə təbrik edib.
Daha üstün oyun sərgiləyən “Naxçıvan” komandası meydanı 41:38 hesablı qələbə ilə tərk edib.
Sonda hər iki komandanın basket­bolçuları təşkilatçılar tərəfindən mükafatlandırılıblar.

Ceyhun Məmmədov

Naxçıvan Muxtar Respublikası Gənc­lər və İdman Nazirliyi və Par­alimpiya Federasiyasının təşkilatçılığı ilə dekabrın 23-də Naxçıvan şəhərindəki İlham Əliyev adına Olimpiya-İdman Kompleksində paralimpiyaçılar arasında armrestlinq (qol güləşi) üzrə muxtar respublika birinciliyi keçirilib.
Yarışın açılış mərasimində Gənclər və İdman Nazirliyinin və Paralimpiya Federasiyasının nümayəndələri çıxış edərək muxtar respublikada idmana göstərilən diqqət və qayğıdan, məhdud fiziki imkanlı şəxslərin idmana cəlb olunması istiqamətində həyata keçirilən tədbirlərdən bəhs ediblər. Vurğulanıb ki, yarışın keçirilməsində əsas məqsəd istedadlı idmançıların aşkara çıxarılmasına, məhdud fiziki imkanlı şəxslərin idmana olan maraqlarının artırılmasına, həmçinin onların cəmiyyətə inteqrasiyasına nail olmaqdır.
Yarışda 18 paralimpiyaçı iki yaş qrupunda mübarizə aparıb.
Sonda ilk üç yeri tutan idmançılara təşkilatçılar tərəfindən diplom və hədiyyələr, digər iştirakçılara isə fəxri fərmanlar təqdim olunub.

 Ceyhun Məmmədov

Naxçıvan Muxtar Respublikası Gənclər və İdman Nazirliyi, Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin birgə təşkil etdiyi futzal üzrə muxtar respublika birinciliyi başa çatıb. Yeni Azərbaycan Partiyasının üzvləri arasında keçirilən birincilikdə 8 komanda mübarizə aparıb.
Birincilik Naxçıvan şəhərindəki İlham Əliyev adına Olimpiya-İdman Kompleksində olimpiya sistemi üzrə keçirilib. Beynəlxalq Futzal Federasiyasının qaydalarına uyğun olaraq təşkil edilən birincilikdə futzalçılar hər hissəsi 20 dəqiqə olmaqla, 40 dəqiqəlik müddətdə qalibi müəyyənləşdirməyə çalışıblar.
Yarışın nəticəsinə gəlincə, həll­edici qarşılaşmada “Naxçıvan” və “Şərur” komandaları qələbə uğrunda mübarizə aparıblar. Daha baxımlı oyun sərgiləyən Şərur futzalçıları meydanı 5:4 hesablı qələbə ilə tərk ediblər. Üçüncülük matçında isə “Ordubad” komandası “Kəngərli” komandası ilə qarşılaşıb. Görüş Kəngərli təmsilçisinin 9:5 hesablı qələbəsi ilə yekunlaşıb.
Qalib komandaların futzalçıları diplom, kubok və hədiyyələrlə mükafatlandırılıblar.

Ceyhun Məmmədov

Naxçıvan Şəhər Uşaq-gənclər idman məktəbinin zalında Dünya Azərbaycanlılarının Həmrəylik Günü münasibətilə 2003-2005-ci illər təvəllüdlü güləşçilər arasında birincilik keçirilib.
50-dən çox pəhləvanın mübarizə apardığı yarışın açılış mərasimində çıxış edən Güləş Federasiyasının sədr müavini Faiq İsgəndərov yarışın qaydaları haqqında idmançılara məlumat verib və onları bayram münasibətilə təbrik edib.
Beynəlxalq Güləş Federasiyasının qaydalarına uyğun olaraq təşkil edilən birincilikdə idmançılar 10 çəki dərəcəsində mübarizə aparıblar. Yekun nəticəyə əsasən, Nicat Ocaqquliyev (26 kiloqram), Mirsamir Seyidov (32 kiloqram), Uğur Məmmədov (35 kiloqram), Fərid Rzayev (38 kiloqram), Kəramət Xudiyev (42 kiloqram), Yasin Cəfərov (47 kiloqram), Heydər Heydərov (53 kiloqram), Ayxan İsmayılov (59 kiloqram), Rəvan Bayramov (66 kiloqram) və Ramazan Əliyev (73 kiloqram) öz çəki dərəcələrində bütün rəqiblərini üstələyərək birinciliyin qalibi olublar.
Sonda qalib idmançılara diplomlar təqdim edilib.

Ceyhun Məmmədov

Naxçıvan şəhərindəki ­İlham Əliyev adına Olimpiya-İdman Kompleksində Dünya Azərbaycanlılarının Həmrəyliyi Günü münasibətilə yeniyetmələr arasında boks üzrə Naxçıvan şəhər birinciliyi keçirilib.
Naxçıvan Muxtar Respublikası Boks Federasiyası, Naxçıvan Şəhər Gənclər və İdman İdarəsi və Naxçıvan Şəhər Uşaq-gənclər idman məktəbinin birgə təşkilatçılığı ilə keçirilən birincilik Beynəlxalq Boks Federasiyasının qaydalarına əsasən təşkil edilib.
9 çəki dərəcəsində 30-a yaxın dəri əlcək sahibi öz qüvvəsini sınayıb. Gərgin mübarizə şəraitində keçən yarışda Nemət Yusifli, Ümid Abbasov, Murad Nağıyev, Ayxan Quliyev, Ayxan Süleymanov, Yusif Əliyev, Kamran Allahverdiyev, Əbülfəz Xəlilli və Teymur Hacızadə müvafiq olaraq 35, 44, 46, 48, 50, 52, 57, 63 və 70 kiloqram çəki dərəcələrində bütün rəqiblərini üstələyərək birinciliyin qalibi olublar.
Sonda hər çəki dərəcəsində yer tutan idmançılar təşkilatçıların diplomları ilə mükafatlandırılıblar.

 Ceyhun Məmmədov

Naxçıvan Muxtar Respublikası Gənc­lər və İdman Nazirliyi ilə Atıcılıq Federasiyasının birgə təşkil etdiyi peyntbol üzrə birincilik başa çatıb.
Birincilikdə Naxçıvan Muxtar Respublikası Dövlət Gömrük Komitəsinin strukturuna daxil olan 8 idarənin komandası mübarizə aparıb. Atıcılıq Mərkəzində reallaşan yarış olimpiya sistemi üzrə keçirilib.
Yarışın nəticəsinə əsasən, final görüşündə Naxçıvan Hava Nəqliyyatında Gömrük İdarəsinin komandası ilə Naxçıvan Terminal Kompleks Birliyinin komandası üz-üzə gəlib. Hədəfləri daha sərrast nişan alan birincilər yarışın qalibi olublar. Naxçıvan Muxtar Respublikası Dövlət Gömrük Komitəsinin Mühafizə Xidmətinin komandası isə üçüncülüklə kifayətlənib.
Sonda qalib komandalara təşkilatçıların diplom, medal və kubokları təqdim edilib.

Ceyhun Məmmədov

Naxçıvan şəhər 15 nömrəli tam orta məktəbin idman zalında şəhər tam orta məktəblərinin qız komandaları arasında voleybol birinciliyi keçirilib.
Şəhər Gənclər və İdman İdarəsinin rəisi Xəyal Qurbanov, Heydər Əliyev Uşaq-Gənclər Yaradıcılıq Mərkəzinin direktoru Namiq Novruzov və Təhsil Şöbəsinin nümayəndəsi Mahmud Kərimov çıxış edərək yarışın keçirilməsinin məqsədi haqqında komandalara məlumat veriblər, idmançılara uğurlar arzulayıblar.
Yarışda 14 komanda mübarizə aparıb. Beynəlxalq Voleybol Federasiyasının mövcud qaydalarına əsasən keçirilən yarışda VIII-XI sinif şagirdləri mübarizə aparıblar. Yarışın nəticəsinə gəlincə, 15 nömrəli tam orta məktəbin komandası birinciliyin qalibi olub. Digər iki pillədə 6 və 3 nömrəli tam orta məktəblərin voleybolçuları qərarlaşıblar.
Qalib komandalar təşkilatçıların diplomları ilə təltif olunublar.

Ceyhun Məmmədov

Xəbər verdiyimiz kimi, Naxçıvan Muxtar Respublikası Gənclər və İdman Nazirliyinin təşəbbüsü ilə muxtar respublikada futbolun inkişafı məqsədilə Azərbaycanın 15 və 16 yaşlılardan ibarət milli yığma komandasının baş məşqçisi Vüqar Məmmədov Naxçıvana dəvət edilmişdi. İki gün Naxçıvanda olan baş məşqçi burada seleksiya xarakterli məşqlər aparmışdır.
Artıq millinin baş məşqçisi Azərbaycan yığmasının heyətini açıqlayıb.
Dekabrın 15-dən 21-nə qədər Bakıda 16 yaşadək futbolçulardan ibarət Azərbaycan yığmasının seleksiya xarakterli təlim-məşq toplanışı keçiriləcək. Toplanış iki hissədən ibarət olacaq. 15-17 dekabr və 19-21 dekabr tarixlərini əhatə edəcək toplanışa dəvət olunmuş heyətdə “Araz-Naxçıvan” komandasının da iki futbolçusu var. Bunlar Hüseyn Abbasov və Əmircan Zamanlıdır.

Ceyhun Məmmədov

Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi basketbol üzrə muxtar respublika çempionatında yüksək və I dəstənin növbəti oyunları keçirilib və ilk dövrəyə yekun vurulub.
Yüksək dəstədə ilk dövrəni “Culfa” komandası qalib kimi başa vurub. Culfalılar son görüşdə Babək basketbolçularını səfərdə məğlub etməklə birinci yeri qazanıblar – 34:46. Turun ən maraqlı görüşü isə “Naxçıvan”-“Ordubad” komandaları arasında olub. Gərgin idman mübarizəsi şəraitində keçən görüşdə Naxçıvan basketbolçuları meydanı iki top fərqi ilə qalib tərk ediblər – 61:59.
I dəstədə isə “Şahbuz” komandası liderliyi əldə saxlayıb. Onları bu turda “Kəngərli” komandası da saxlaya bilməyib. Bu turda onlar səfərdə Kəngərli basketbolçularının qonağı olublar və meydanı 35:15 hesablı qələbə ilə tərk ediblər. “Lokomotiv” isə doğma meydanda 2 xalı “Naxçıvan” Universiteti komandası üzərində qazanıb – 33:30.

Ceyhun Məmmədov

Şahbuz Rayon Gənclər və İdman İdarəsi, Təhsil Şöbəsi və Yeni Azərbaycan Partiyası Şahbuz Rayon Təşkilatı Gənclər Birliyinin birgə təşkilatçılığı ilə Şahbuz Rayon Uşaq-gənclər idman məktəbinin güləş bölməsi qruplarının üzvləri arasında birincilik keçirilib. Uşaq-gənc­lər idman məktəbinin idman zalında təşkil edilən yarışdan əvvəl rayon Gənclər və İdman İdarəsinin əməkdaşı İdris Qəhrəmanov, məktəbin direktoru Ramin Qənbərov çıxış edərək yarışın keçirilməsi qaydaları haqqında məlumat veriblər. Birincilikdə 30-a yaxın güləşçi 32, 36, 48, 52, 58 və 69 kiloqram çəki dərəcələrində mübarizə aparıb. Yarışın nəticələrinə əsasən, Orxan Rüstəmli (32 kiloqram), Vüqar Məhərrəmov (36 kiloqram), Abbas Ağayev (48 kiloqram), Elşən Muradlı (52 kiloqram), Vətən Məhərrəmov (58 kiloqram) və Elxan Hüseynli (69 kiloqram) öz çəki dərəcələrində qalib olublar.

Ceyhun Məmmədov

Kəngərli Rayon Gənclər və İdman İdarəsi, Təhsil Şöbəsi, Uşaq-gənclər şahmat məktəbinin birgə təşkilatçılığı ilə Kəngərli Rayon Şahmat Məktəbində keçirilən məktəblilər arasında şahmat turniri başa çatıb.
Yarışdan əvvəl rayon Gənclər və İdman İdarəsinin rəisi Vüsal Hüseynov və Uşaq-gənclər şahmat məktəbinin direktoru Rauf Heydərov çıxış edərək muxtar respublikada bədən tərbiyəsi və idmanın inkişafından, idmançılara göstərilən qayğıdan danışıblar.
Olimpiya sistemi ilə keçirilən turnirdə 40-a yaxın oğlan və qız qüvvəsini sınayıb. İki qrup üzrə keçirilən turnirin nəticəsinə əsasən, “A” qrupunda qalib adını Pərviz Rzayev qazanıb. Mais Abbasov ikinci, Novruz İsmayılov isə üçüncü olub. “B” qrupunda isə Kainat Tağıyev hamıdan güclü olub. Əflatun Nağıyev və Uğur Məmmədov digər pillələrdə qərarlaşıblar.

Ceyhun Məmmədov

Culfa şəhər 3 nömrəli tam orta məktəbin idman zalında rayon Gənclər və İdman İdarəsi, Təhsil Şöbəsi və Naxçıvan Muxtar Respublikası Voleybol Federasiyasının Culfa rayon bölməsinin birgə təşkilatçılığı ilə ümumtəhsil məktəblərinin qız şagirdləri arasında voleybol üzrə birincilik keçirilib. Birincilikdə 12 komanda mübarizə aparıb. Yarış əsasnaməyə uyğun olaraq olimpiya sistemi ilə keçirilib.
Rayon Gənclər və İdman İdarəsinin rəisi Ümüd Həsənli, Təhsil Şöbəsinin müdiri Adəm Qasımov çıxış edərək keçirilən tədbirin mahiyyəti barədə tədbir iştirakçılarına məlumat veriblər.
Birincilikdə Culfa şəhər 3 nömrəli tam orta məktəbin komandası qalib adını qazanıb. Camaldın və Əbrəqunus kənd tam orta məktəblərinin komandaları isə ikinci və üçüncü olublar.
Qalib komandalara və fərqlənən idmançılara təşkilatçılar tərəfindən kubok, diplom və hədiyyələr təqdim edilib.

Ceyhun Məmmədov

Kəngərli Rayon Gənclər və İdman İdarəsi, Təhsil Şöbəsi, Uşaq-gənclər idman məktəbinin təşkilatçılığı ilə rayonun Yurdçu kənd tam orta məktəbində ümumtəhsil məktəblərinin qız voleybolçuları arasında birincilik təşkil edilib.
Rayon Gənclər və İdman İdarəsinin rəisi Vüsal Hüseynov və Uşaq-gənclər idman məktəbinin direktoru Sarvan Məmmədov çıxış edərək ölkəmizdə bədən tərbiyəsi və idmanın inkişafına göstərilən qayğıdan danışıblar. Qeyd olunub ki, bu gün ölkəmizdə, onun ayrılmaz tərkib hissəsi olan Naxçıvan Muxtar Respublikasında idmanın kütləviliyinin təmin olunması, müasir idman komplekslərinin istifadəyə verilməsi, respublika və beynəlxalq səviyyəli yarışlarda idmançılarımızın iştirakının təmin edilməsi görkəmli dövlət xadimi Heydər Əliyevin bu istiqamətdə müəyyənləşdirdiyi siyasətin uğurla davam etdirilməsinin nəticəsidir.

Naxçıvan Muxtar Respublikası Gənclər və İdman Nazirliyinin təşəbbüsü ilə muxtar respublikada futbolun inkişafı məqsədilə Azərbaycanın 15 və 16 yaşlılardan ibarət milli yığma komandasının baş məşqçisi Vüqar Məmmədov Naxçıvana dəvət olunub.
İki gün Naxçıvanda olan baş məşqçi Naxçıvan Muxtar Respublika Stadionunda seleksiya xarakterli məşqlər keçib. Məqsəd bu yaşda olan uşaqları seçmək və onları Azərbaycan yığma komandasına cəlb etməkdir.
Vüqar Məmmədovla görüşüb fikirlərini öyrəndik. O bildirdi ki, bu gün ölkənin bütün regionlarında idmanın inkişafına xüsusi diqqət göstərilir. Naxçıvana ilk dəfədir gəldiyini və gördüklərindən heyrətləndiyini dilə gətirən baş məşqçi burada futbolçular üçün yaradılan şəraitin mükəmməl səviyyədə olduğunu vurğuladı: “Uşaqların məşqini, ikitərəfli oyunlarını izlədim. Demək olar ki, istedadlı uşaq çoxdur. Çatışmayan yeganə cəhət oyun təcrübələrinin az olmasıdır. Bu da zamanla düzələn haldır. Seçimlərdə 30-dan çox uşaq iştirak edirdi. İki gün ərzində onların məşqlərdə və oyunlarda göstərdikləri bacarıqları diqqətlə izlədim. Artıq seçimimi də aparmışam və yaxın günlərdə onları yığma komandanın heyətinə cəlb edəcəm”.
Qeyd edək ki, qarşıdakı aylarda Azərbaycanın digər yaş qruplarının baş məşqçiləri də muxtar respublikaya dəvət olunacaqlar.

 Ceyhun Məmmədov

Bu gün Naxçıvan Muxtar Respublikasında idmanın kütləvi hal alması, gənclərin bu sahəyə cəlbi və onların asudə vaxtlarının səmərəli təşkili üçün hər bir şərait yaradılıb. Bu da qazanılan uğurların sayını daha da artırmağa imkan verib. Hazırda regionun şəhər və rayonları ilə yanaşı, kəndlərində də idmanın inkişafı üçün mühüm addımlar atılır. Təbii ki, belə addımlar istedadlı gənclərin üzə çıxmasına, onların bu sahədə yüksək nəticələr əldə etməsinə və üçrəngli bayrağımızı beynəlxalq arenalarda dalğalandırmasına səbəb olur. 

İdmanın inkişafı infrastrukturun geniş, çoxşaxəli olmasından asılıdır. Yəni idman obyektləri, zalları, kompleksləri nə qədər çox olarsa, qazanılan uğurların sayı da bir o qədər çox olacaq. Naxçıvan bu baxımdan ölkədə ad qazanmış regiondur. Muxtar respublikamızın, demək olar ki, hər bölgəsində tikilən, yenidən bərpa olunan idman obyektlərinin qapıları bu gün sakinlərin üzünə açıqdır.

Naxçıvan Muxtar Respublikası Gənclər və İdman Nazirliyi ilə muxtar respublikada fəaliyyət göstərən idman federasiyalarının birgə təşkil etdikləri məşqçi-müəllimlər, idmançılar üçün seminarlar davam etdirilir.
Növbəti seminar Hava və Ekstremal İdman Növləri Federasiyasının təşkilatçılığı ilə baş tutub. Dağ və ekstremal idman növləri üzrə seminarda Hava və Ekstremal İdman Növləri Federasiyasının sədr müavini Azər Məmmədov, Gənclər və İdman Nazirliyinin əməkdaşı Samir Oruclu bildiriblər ki, federasiya nazirliklə birgə belə tədbirləri mütəmadi olaraq təşkil edir. Seminarların təşkilində əsas məqsəd idmançıları bu növlə daha yaxından tanış etmək, onları maraqlandıran suallara aydınlıq gətirməkdir. Bu seminarlarda peşəkar məşqçilər iştirak edirlər.
Sonra çıxış edənlər bu növlərin muxtar respublikada geniş yayılması üçün görülən və görüləcək işlər barədə danışıblar.
Seminarda ekstremal idman növləri üzrə məşqçi-müəllim Babək İsgəndərov çıxış edib. O, nəzəri məlumatda idmançılara dağ yürüşünün yaranması tarixi və bu idman növünün texnikası barədə məlumat verib.
Dünən idmançılar təlim-məşqləri “Əshabi-Kəhf Ziyarətgahı” Dini-Mədəni Abidə Kompleksində praktik olaraq davam etdiriblər. Məşqçi-müəllim Babək İsgəndərovun rəhbərliyi altında idmançılara dağa dırmanma, dağdan enmə və qayaya dırmanma, həmçinin dağa dırmanarkən öncədən görüləcək tədbirlər haqqında məlumat verilib.
Qeyd edək ki, nəzəri və praktik təlim-məşqlərdə 60-a yaxın idmançı iştirak edib.

Ceyhun Məmmədov

Naxçıvan Muxtar Respublikası Güləş Federasiyası idmançılarının uğurları gündən-günə artmaqdadır. Federasiyanın idmançıları cari ildə ölkədaxili turnirlərlə yanaşı, beynəlxalq arenada da yarışlara qatılıblar. Qazanılan uğurların təməlində  idmana və idmançılara göstərilən diqqət dayanır.

İlin son ayında federasiya daha bir uğura imza atıb. Belə ki, 2-3 dekabr tarixlərində Sumqayıt şəhərində ümummilli lider Heydər Əliyevin anım gününə həsr olunmuş cüdo üzrə V açıq respublika turniri keçirilib. Bu turnirdə Naxçıvan Muxtar Respublikası Güləş Federasiyasının yetirməsi Abbas Məmmədov da mübarizə aparıb. İdmançımız 38 kiloqram çəki dərəcəsində tatami üzərinə çıxıb və turniri üçüncü pillədə başa vurub.
Abbas Məmmədova təşkilatçılar tərəfindən diplom və medal təqdim olunub.

Ceyhun Məmmədov

Kəngərli Rayon Gənclər və İdman İdarəsi, Yeni Azərbaycan Partiyası Kəngərli Rayon Təşkilatının Gənclər Birliyi və Uşaq-gənclər idman məktəbinin birgə hazırladığı tədbirlər planına uyğun olaraq, “Zərərli vərdişlərə yox deyək, həmişə sağlam olaq” devizi altında rayonda fəaliyyət göstərən ümumtəhsil məktəblərinin şagirdləri arasında boks üzrə şəxsi birincilik keçirilib. Yarışdan öncə rayon Gənclər və İdman İdarəsinin rəisi Vüsal Hüseynov, Uşaq-gənclər idman məktəbinin direktoru Sarvan Məmmədov çıxış edərək yarış iştirakçılarına zərərli vərdişlərin insan orqanizmi və sağlamlığı üçün nə qədər təhlükəli olduğu haqqında geniş məlumat veriblər.
Daha sonra yarışa start verilib. Gərgin keçən görüşlərdən sonra Sinan Əbilov, Ramiz Bayramov, Hüseyn Qənbərli, Elçin İmanov, Ucal Musayev və Tural Rzayev mükafata layiq görülüblər.
Sonda qalib idmançılara təşkilatçıların diplomları təqdim olunub.

Ceyhun Məmmədov

Şərur Rayon Gənclər və İdman İdarəsi ilə Təhsil Şöbəsinin birgə təşkil etdiyi məktəblilər arasında stolüstü tennis üzrə birinciliyə yekun vurulub. Yarışda 32 idmançı mübarizə aparıb.
Yekun nəticəyə əsasən, oğlanlar arasında Nihad Qurbanlı qalib adını qazanıb. Digər iki pillədə isə Əkrəm Rəhimli və Nail Xudiyev qərarlaşıblar.
Qızların mübarizəsində isə Xurşud Mahmudova hamıdan güclü olub. Nurcan Məmmədova ikinci, Gültəkin Süleymanova isə üçüncülüklə kifayətləniblər.
Qaliblər təşkilatçılar tərəfindən diplomlarla mükafatlandırılıblar.

Ceyhun Məmmədov

Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi futbol üzrə XV muxtar respublika çempionatında ilk dövrəyə yekun vurulub.

10 komandanın dairəvi sistem üzrə mübarizə apardığı çempionatın ilk dövrəsi 9 turdan ibarət olub. Komandaların qış fasiləsinə yollandığı dövrəni lider kimi “Araz-Naxçıvan” komandası başa vurub. Cari mövsümə də iddialı başlayan son iki mövsümün çempionu 9 oyunda maksimum xal toplayıb və ən yaxın izləyicisini 6 xal qabaqlayıb. “Qırmızı-ağlar” cari ildə ən çətin oyunlarını səfərdə keçirib. Belə ki, 4-cü və 5-ci turda müvafiq olaraq “Arpaçay”la Naxçıvan Dövlət Universitetinin (NDU) komandasının qonağı olan “Araz-Naxçıvan” rəqiblərini bir top fərqi ilə üstələyib (3:2, 2:1).
Hər mövsüm çempionatı qazanmağa iddialı olan “DİN-Darıdağ” futbol komandası isə ilk dövrəni ikinci pillədə başa vurub. Mövsümün açılış oyununda “Araz-Naxçıvan”a quru hesabla (0:3) məğlub olan “DİN-Darıdağ” daha bir məğlubiyyəti “Arpaçay”la görüşdə alıb (1:2). Maraqlısı odur ki, hər iki görüşdə onlar doğma arenada bu vəziyyətlə üzləşiblər. Cari mövsümdə sürpriz nəticələrə imza atan komanda isə “Batabat”dır. Şahbuz təmsilçisi ilk dövrədə 3 məğlubiyyətlə barışmalı olub və digər oyunlarda meydanı 3 xalla tərk edib. Şahbuzlular həmçinin ilk dövrədə gözlənilmədən “Sədərək” komandasına məğlub olmaqla hamını təəccübləndiriblər.

Babək rayonunun Zeynəddin kənd tam orta məktəbinin idman zalında sərbəst güləş üzrə rayon birinciliyi keçirilib.
Babək Rayon Uşaq-gənclər idman məktəbi ilə Təhsil Şöbəsinin birgə təşkil etdiyi birincilikdə 40-a yaxın güləşçi mübarizə aparıb. Yarış komanda xarakterli olub.
Yarışdan öncə çıxış edən rayon Təhsil Şöbəsinin əməkdaşı Müslüm Vəliyev, Uşaq-gənclər idman məktəbinin direktoru Emin Hüseynov və baş hakim İlyas ­Həsənov­ yarışın qaydaları barəsində idmançılara məlumat veriblər.
Sərbəst güləş növünün kütləviliyini artırmaq, şagirdlərin fiziki sağlamlığını təmin etmək məqsədilə keçirilən birincilikdə komandalar 10 çəki dərəcəsində (32, 35, 42, 46, 54, 58, 63, 69, 76, 85 kiloqram) mübarizə aparıblar. Birinciliyin yekun nəticəsinə əsasən, Zeynəddin kəndinin güləş komandası qalib adını qazanıb. Digər iki pillədə isə Cəhri və Şıxmahmud kəndlərinin komandaları qərarlaşıblar.
Sonda qalib komandalara diplom və hədiyyələr təqdim olunub.

Ceyhun Məmmədov

Naxçıvan Muxtar Respublikasında idmanın kütləviliyinin təmin edilməsi regionda yaradılan şərait hesabına mümkün olub. Bu gün diyarımızın bütün şəhər və rayonlarında gənclərin idmanın müxtəlif sahələrinə marağı artmaqdadır. Təbii ki, insanların idmana yönəlməsi həm də sağlam nəslin formalaşmasını təmin edir. 

Muxtar respublikada bu sahənin geniş vüsət alması üçün Gənclər və İdman Nazirliyi, həmçinin federasiyalar fəaliyyət dairələrini genişləndirməkdədirlər. Gənclər və İdman Nazirliyi, federasiyalar rayonlarda idmanın kütləviliyini təmin etmək üçün yarışlar, turnirlər təşkil edirlər. Rayon Gənclər və İdman idarələri nazirliyin təsdiq etdiyi plana uyğun olaraq gənclərin asudə vaxtlarının səmərəli təşkil olunmasına öz töhfəsini verir. Bəs rayonlarda federasiyaların bölmələri fəaliyyət göstərirmi? Göstərirsə, onların fəaliyyəti hansı səviyyədədir?
Bunu Ordubad rayonunun timsalında araşdırdıq. Əvvəlcə onu qeyd edək ki, bu bölgəmizdə də idmanın kütləviliyi diqqət mərkəzində saxlanılır. Hazırda Ordubad rayonunda 12 federasiyadan 8-nin bölməsi fəaliyyət göstərir.

Naxçıvan Muxtar Respublikası Gənclər və İdman Nazirliyi ilə Basketbol Federasiyasının birgə təşkil etdiyi basketbol üzrə muxtar respublika çempionatının yüksək və I dəstənin növbəti oyunları keçirilib. 

Naxçıvan Muxtar Respublika çempionatının yüksək dəstəsinin ilk iki turunu qələbə ilə başa vuran “Ordubad” komandası bu turda da uğura imza atıb. Səfərdə “Şərur” komandasının qonağı olan ordubadlı basketbolçular meydanı 54:26 hesablı qələbə ilə tərk ediblər.
Heç kimin gözləmədiyi halda bu tur “Naxçıvan” komandası məğlubiyyətlə üzləşib. Culfalı həmkarları qarşısında 20 top (63:43) fərqi ilə məğlubiyyət onların turnir cədvəlindəki mövqelərini də dəyişib.
I dəstədə isə “Şahbuz” komandası liderliyi qoruyub saxlaya bilib. Bu turda onlar doğma arenada Sədərək basketbolçularını sınağa çəkiblər və 45:34 hesablı qələbəyə seviniblər. “Lokomotiv” isə cari mövsümdə ikinci qələbəsini qazanıb. “Kəngərli” komandası ilə görüşdə 2 xalı bayram etmək onlar üçün heç də çətin olmayıb – 70:22.

Ceyhun Məmmədov

İslam Hümbətov adına Uşaq-gənclər idman məktəbində 2002-2004-cü illər təvəllüdlü yeniyetmələr arasında sambo üzrə Naxçıvan şəhər birinciliyi keçirilib.
Yarışdan öncə çıxış edən Naxçıvan Şəhər Gənclər və İdman İdarəsinin rəisi Xəyal Qurbanov yarışın keçirilmə məqsədi haqqında idmançılara geniş məlumat verib. Sonra Naxçıvan Muxtar Respublikası Güləş Federasiyasının sədr müavini Faiq İsgəndərov çıxış edərək idmançılara uğurlar arzulayıb.
Naxçıvan Muxtar Respublikası Güləş Federasiyası ilə Naxçıvan Şəhər Gənclər və İdman İdarəsinin birgə təşkil etdiyi birincilikdə 9 çəki dərəcəsi üzrə 50-yə yaxın idmançı mübarizə aparıb. Beynəlxalq Sambo Federasiyasının mövcud qaydalarına əsasən keçirilən yarışda Məhəmməd İsayev, Abbas İsfəndiyarov, Məhəmməd Şirinov, Zahid Əhmədov, Fuad Əşrəfli, Məhəmməd Həsənov, İsmayıl Abbaslı, Ayaz Əliyev və Aqşin Rüstəmov müvafiq olaraq 30, 34, 38, 42, 46, 50, 55, 60 və 66 kiloqram çəki dərəcələrində qalib adını qazanıblar.
Sonda hər çəki dərəcəsində yer tutan idmançılar Naxçıvan Şəhər Gənclər və İdman İdarəsinin diplomları ilə mükafatlandırılıblar.

Ceyhun Məmmədov

Azərbaycan Respublikasının dövlət müstəqilliyinin 25-ci ildönümünə həsr olunmuş “Futzal kuboku” uğrunda muxtar respublika birinciliyinə yekun vurulub.
Naxçıvan şəhərindəki İlham Əliyev adına Olimpiya-İdman Kompleksində keçirilən birincilikdə 9 komanda olimpiya sistemi üzrə mübarizə aparıb. Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi yarış 3 gün davam edib.
Birinciliyin bağlanış mərasimində çıxış edən Naxçıvan Muxtar Respublikası gənclər və idman naziri Azad Cabbarov bildirib ki, muxtar respublikada diqqətdə saxlanılan sahələrdən biri də gənc idmançılar nəslinin formalaşdırılmasıdır. Naxçıvan beynəlxalq idman yarışlarına ev sahibliyi edir. Bütün bunlar idmançıların peşəkarlıq səviyyəsinin yüksəldilməsi baxımından mühüm əhəmiyyət daşıyır. Yaradılan şərait gənclərin asudə vaxtının səmərəli təşkilinə və onların idman federasiyalarına cəlbinə səbəb olub.
Birinciliyin final görüşündə “DİN-Darıdağ” və “Şahbuz” komandaları üz-üzə gəliblər. Gərgin keçən görüşün ilk hissəsi heç-heçə (2:2) başa çatıb. İkinci hissədə daha yaxşı təsir bağışlayan “DİN-Darıdağ” komandası oyunu 8:3 hesablı qələbə ilə başa vuraraq birinciliyin baş mükafatını qazanıb.
Sonda finalçılara təşkilatçılar tərəfindən diplom və hədiyyələr, qalib komandaya isə kubok təqdim edilib.

Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksində paralimpiyaçılar arasında keçirilən futzal üzrə muxtar respublika birinciliyinə yekun vurulub.
Naxçıvan Muxtar Respublikası Gənclər və İdman Nazirliyi ilə Paralimpiya Federasiyasının birgə təşkil etdiyi birincilik iki gün davam edib və 8 komanda mübarizə aparıb.
Azərbaycan Respublikasının dövlət müstəqilliyinin bərpasının 25 illiyinə həsr olunmuş birincilikdə finala “Sədərək” və “Şahbuz” futzalçıları vəsiqə qazanıblar. Həlledici qarşılaşmada 4:0 hesabı ilə qalib gələn sədərəklilər birinciliyin qalibi olublar. Muxtar respublika birinciliyində “Naxçıvan” komandası üçüncü olub.
Sonda qalib komandalar təşkilatçılar tərəfindən diplom və hədiyyələrlə mükafatlandırılıblar.

Ceyhun Məmmədov

Naxçıvan Muxtar Respublikası Gənclər və İdman Nazirliyi və Par­alimpiya Federasiyasının birgə təşkilatçılığı ilə paralimpiyaçılar arasında futzal üzrə muxtar respublika birinciliyinə start verilib.
Azərbaycan Respublikasının dövlət müstəqilliyinin bərpasının 25 illiyinə həsr olunmuş birincilikdə “Naxçıvan”, “Şərur”, “Sədərək”, “Kəngərli”, “Şahbuz”, “Babək”, “Culfa” və “Ordubad” komandaları mübarizə aparırlar.
Naxçıvan şəhərindəki İlham Əliyev adına Olimpiya-İdman Kompleksində keçirilən yarışın açılış mərasimində çıxış edən Paralimpiya Federasiyasının sədri Cavid Səfərov idmançılara uğurlar arzulayıb. Muxtar respublikada idmanın kütləviliyindən danışan federasiya sədri bildirib ki, bu gün Naxçıvanda bütün sahələrə olduğu kimi, idmana da xüsusi diqqət və qayğı göstərilir. Bunun nəticəsidir ki, bu gün idmançılarımız keçirilən bütün yarışlarda iştirak edir və uğur qazanırlar. Muxtar respublikada məhdud fiziki imkanlı insanların idmana cəlbi hər zaman diqqətdə saxlanılır. Keçirilən futzal turniri də bunun ifadəsidir.
Sonra görüşlərə start verilib. Olimpiya sistemi üzrə keçirilən birincilik iki gün davam edəcək və bu gün keçiriləcək final görüşü ilə yarışa yekun vurulacaq.

 Ceyhun Məmmədov

Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi “Futzal kuboku” uğrunda muxtar respublika birinciliyinə start verilib. 

Olimpiya sistemi üzrə keçirilən və beynəlxalq futzal qaydalarına uyğun olaraq təşkil edilən birincilikdə 9 komanda mübarizə aparır. Azərbaycan Respublikasının dövlət müstəqilliyinin 25-ci ildönümünə həsr olunmuş yarış Naxçıvan şəhərindəki İlham Əliyev adına Olimpiya-İdman Kompleksində keçirilir.
Üç gün davam edəcək birincilikdə Naxçıvan Dövlət Universitetinin (NDU) komandası, “DİN-Darıdağ”, “Sədərək”, “Şərur”, “Kəngərli”, “Şahbuz”, “Babək”, “Culfa” və “Ordubad” komandaları meydana çıxacaqlar. Reqlamentə əsasən, qalib komanda bir oyunun nəticəsinə görə müəyyənləşdiriləcək. Oyunlarda təyin olunan vaxt zamanı qalib müəyyən edilməzsə, o zaman qaydalara əsasən yeddi metrlik 5 zərbədən istifadə olunacaq.

Ordubad Rayon Gənclər və İdman İdarəsi ilə Təhsil Şöbəsinin birgə təşkil etdiyi yüngül atletika üzrə rayon birinciliyi başa çatıb.
Birincilikdə 19 məktəbdən 157 şagird mübarizə aparıb. Birinciliyin açılış mərasimində rayon Gənclər və İdman İdarəsinin rəisi Əbülfəz Əliyev və Təhsil Şöbəsinin əməkdaşı Nicat Babayev çıxış edərək idmançılara uğurlar arzulayıblar.
Sonra yarışa start verilib. Gərgin keçən mübarizə nəticəsində Sabirkənd tam orta məktəbinin komandası birinci yerə layiq görülüb. Azadkənd tam orta məktəbinin komandası ikinci, Üstüpü kənd tam orta məktəbinin komandası isə üçüncü olublar.
Sonda şagirdlərə təşkilatçıların diplomları təqdim edilib.

Ceyhun Məmmədov

Naxçıvan Muxtar Respublikası Gənclər və İdman Nazirliyi ilə Boks Federasiyasının birgə təşkil etdiyi boks üzrə yeniyetmə, gənclər və kişilər arasında muxtar respublika birinciliyinə yekun vurulub. 

Olimpiya sistemi üzrə keçirilən və Beynəlxalq Boks Federasiyasının mövcud qaydalarına uyğun olaraq təşkil edilən birinciliyin məqsədi muxtar respublikada bu idman növünü təbliğ etmək və istedadlı dəri əlcək sahiblərini üzə çıxarmaqdan ibarət olub. Azərbaycan Respublikasının dövlət müstəqilliyinin 25-ci ildönümünə həsr olunmuş yarışda 100-ə yaxın dəri əlcək sahibi mübarizə aparıb. Naxçıvan şəhərindəki İlham Əliyev adına Olimpiya-İdman Kompleksində keçirilən birinciliyin son günündə tamaşaçılar bir-birindən maraqlı final görüşlərinə şahidlik ediblər.
Yarışın yekun nəticəsinə əsasən, Hüseyn Hüseynov (35 kiloqram), Ümid Abbasov (40 kiloqram), Ülvü Süleymanov (45 kiloqram), Ayxan Qubuşov (50 kiloqram), Nadir Cəfərov (53 kiloqram), Kamran Allahverdiyev (57 kiloqram), Yenisey İmanov (60 kiloqram), İbrahim Cəfərzadə (64 kiloqram), Yuris Allahverdiyev (69 kiloqram) və Məhəmmədəli Bağırov (75 kiloqram) öz çəki dərəcələrində bütün rəqiblərinə qalib gələrək birinciliyin baş mükafatını qazanıblar.
Yarışın qalibləri Naxçıvan Muxtar Respublikası Gənclər və İdman Nazirliyi və Boks Federasiyası tərəfindən diplom və hədiyyələrlə mükafatlandırılıblar.

Ceyhun Məmmədov

Naxçıvan şəhərindəki Heydər Əliyev Uşaq-Gənclər Yaradıcılıq Mərkəzində Azərbaycan Respublikasının dövlət müstəqilliyinin 25-ci ildönümünə həsr olunmuş basketbol üzrə yoldaşlıq görüşü keçirilib. 

Görüşdən öncə çıxış edən yaradıcılıq mərkəzinin direktoru Namiq Novruzov və Babək Rayon Uşaq-Gənclər İdman Məktəbinin direktoru Emin Hüseynov muxtar respublika idmanının inkişafı və uğurları, həmçinin keçirilən yarışın mahiyyəti barədə geniş məlumat veriblər.
Heydər Əliyev Uşaq-Gənclər Yaradıcılıq Mərkəzi ilə Babək Rayon Uşaq-Gənclər İdman Məktəbinin birgə təşkil etdiyi görüşdə hər iki qurumun komandaları üz-üzə gəlib. Gərgin mübarizə şəraitində keçən görüşdə Babək basketbolçuları rəqiblərinə 64:38 hesabı ilə qalib gəliblər.
Sonda qalib komandanın idmançılarına təşkilatçıların diplomları təqdim edilib.

Ceyhun Məmmədov

Naxçıvan Muxtar Respublikası Gənclər və İdman, Fövqəladə Hallar nazirlikləri, Hava və Ekstremal İdman Növləri Federasiyasının birgə təşkil etdiyi, Azərbaycan Respublikasının dövlət müstəqilliyinin 25-ci ildönümünə həsr olunmuş hüquq-mühafizə orqanlarının idmançıları arasında ekstremal idman oyunları üzrə muxtar respublika birinciliyinə yekun vurulub.
Yarışın açılış mərasimində çıxış edən təşkilatçı orqanların nümayəndələri birinciliyin mahiyyəti barədə idmançıları məlumatlandırıblar. Naxçıvan Muxtar Respublikası Fövqəladə Hallar Nazirliyinin Mülki Müdafiə Alayının təlim bazasında keçirilən birinciliyin reqlamentinə əsasən yarış 3 yaş (18-22, 23-27, 28-32) qrupu üzrə təşkil edilib. İdmançılar ekstremal idman yarışında maneələr zolağının dəf edilməsi, yüksəkliyə qalxma, quyudan zərərçəkmişin çıxarılması, əl və ayaqların köməyi ilə üfüqi kəndirdən keçmə, komandalar arasında kəndir dartma və fiqurlu nərdivanda çalışma növlərində qüvvələrini sınayıblar.
Birinciliyin yekun nəticəsinə əsasən, Daxili Qoşunların komandası bu prosesləri hamıdan öncə tamamlayaraq qalib adını qazanıb. Digər iki pillədə isə Əlahiddə Ümumqoşun Ordusunun və Fövqəladə Hallar Nazirliyinin komandaları qərarlaşıblar.
Sonda qalib komandalara təşkilatçılar tərəfindən diplom, kubok və hədiyyələr təqdim olunub.

Ceyhun Məmmədov

Azərbaycan Respublikasının dövlət müstəqilliyinin 25-ci ildönümünə həsr olunmuş boks üzrə yeniyetmə, gənclər və kişilər arasında Naxçıvan Muxtar Respublika birinciliyinə start verilib.
Noyabr ayının 19-da başlayan birincilikdə 100-ə yaxın dəri əlcək sahibi mübarizə aparır. Naxçıvan Muxtar Respublikası Gənclər və İdman Nazirliyi ilə Boks Federasiyasının birgə təşkil etdiyi yarış Naxçıvan şəhərindəki İlham Əliyev adına Olimpiya-İdman Kompleksində keçirilir.
Birincilikdə 2000 və 2003-cü illər təvəllüdlü yeniyetmələr və 1999-cu il təvəllüddən yuxarı gənclər və kişilər 12 çəki dərəcəsində rinqə çıxırlar. Onlar 35, 40, 45, 50, 53, 57, 60, 64, 69, 75, 81 və 91 kiloqram çəki dərəcələrində ən güclünü müəyyənləşdirməyə çalışacaqlar. Beynəlxalq Boks Federasiyasının mövcud qaydalarına uyğun olaraq təşkil edilən birincilik olimpiya sistemi üzrə keçirilir. Yarışı keçirməkdə məqsəd muxtar respublikada bu idman növünü təbliğ etmək, boksçuların dərəcələrini və döyüş təcrübələrini artırmaq, eyni zamanda istedadlı dəri əlcək sahiblərini üzə çıxarmaqdan ibarətdir.
Bu gün birinciliyin final görüşləri keçiriləcək. Yarışın qalibləri Naxçıvan Muxtar Respublikası Gənclər və İdman Nazirliyi və Boks Federasiyası tərəfindən diplom və hədiyyələrlə mükafatlandırılacaqlar.

Ceyhun Məmmədov

Kolumbiya ilə Azərbaycan arasında bədən tərbiyəsi və idman sahəsində mübadilə çərçivəsində voleybol üzrə yeniyetmələrdən ibarət Kolumbiya millisi Naxçıvan Muxtar Respublikasına gəlib.
Naxçıvan Muxtar Respublikası Gənclər və İdman Nazirliyi və Voleybol Federasiyasının təşkilatçılığı ilə qədim diyarda 4 gün qonaq olan kolumbiyalı yeniyetmə voleybolçular öncə Naxçıvan şəhərindəki Heydər Əliyev Muzeyini ziyarət ediblər. Daha sonra proqrama uyğun olaraq onlar Duzdağ Fizioterapiya Mərkəzində, “Əlincəqala” Tarix-Mədəniyyət Muzey Kompleksində, Nuh Peyğəmbərin məzarüstü abidəsində, “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksində olublar.
Naxçıvan Muxtar Respublikasına gələn Kolumbiya və Azərbaycanın qızlardan ibarət yeniyetmə voleybol komandaları arasında yoldaşlıq görüşü də keçirilib. Naxçıvan şəhərindəki İlham Əliyev adına Olimpiya-İdman Kompleksində keçirilən görüş Azərbaycan millisinin 2:0 hesablı qələbəsi ilə başa çatıb.

Ceyhun Məmmədov