Naxçıvan Muxtar Respublikası Güləş Federasiyasının 2016-cı ilin yekunları və qarşıda duran vəzifələrlə bağlı iclası keçirilib.
Tədbiri giriş sözü ilə açan federasiyanın sədr müavini Faiq İsgəndərov bildirib ki, 2016-cı ildə Güləş Federasiyası tərəfindən muxtar respublika, şəhər (rayon) birincilikləri və çempionatları təşkil olunub, yeniyetmə və gənclərin bu növə cəlb edilməsi üçün müəyyən işlər görülüb. Bunun nəticəsidir ki, bu gün muxtar respublika üzrə 111 qrupda 1437 idmançı güləşin sirlərini öyrənir. Federasiyanın idmançıları bəhs olunan dövrdə 6 beynəlxalq, 2 respublika səviyyəli turnirdə, 6 Azərbaycan, 3 Naxçıvan Muxtar Respublika birinciliklərində, əlamətdar və tarixi günlərlə əlaqədar keçirilən 12 daxili birincilikdə iştirak ediblər.

Naxçıvan Muxtar Respublikası Güləş Federasiyasının məşqçi-müəllimi Hikmət Hüseyn­ov gələcəkdə keçiriləcək tədbirlər, Naxçıvan Muxtar Respublikası Gənclər və İdman Nazirliyi Aparatının rəhbəri Canməmməd Canməmmədov Naxçıvan Muxtar Respublikası Ali Məclisində “Naxçıvan Muxtar Respublikasında bədən tərbiyəsi və idmanın hazırkı vəziyyəti və qarşıda duran vəzifələr” mövzusunda keçirilmiş müşavirədə verilmiş tapşırıqlar haqqında tədbir iştirakçılarına məlumat veriblər.

*  *  *

Naxçıvan Muxtar Respublikası Karate-do Federasiyasında da ötən ilin yekunları və 2017-ci ildə qarşıda duran vəzifələrə həsr olunmuş yığıncaq keçirilib.
2016-cı ildə görülən işlər barədə danışan federasiyanın sədr müavini Nəriman Quliyev bildirib ki, karate-do idman növünün inkişafı üçün muxtar respublikanın şəhər və rayonlarında lazımi şərait yaradılıb, 5 yeni bölmə fəaliyyətə başlayıb. Bu gün muxtar respublikada federasiyanın 19 bölməsi var və burada 12 məşqçi-müəllim çalışır. Ötən il muxtar respublika daxilində 26 tədbir təşkil olunub və mindən çox idmançı mübarizə aparıb. Karate idman növü ilə bu gün 500-dən çox uşaq, yeniyetmə və gənc məşğul olur ki, onların da 60-ı qız idmançıdır. Yetirmələrimiz 2016-cı ildə ölkədaxili və beynəlxalq turnirlərdə 35 müxtəlif əyarlı medal qazanıblar.
Naxçıvan Muxtar Respublikası Gənclər və İdman Nazirliyi Aparatının rəhbəri Canməmməd Canməmmədov çıxışında bu il nazirliklə federasiyanın birgə təşkil edəcəyi yarışlar, tədbirlər barədə danışıb.

Ceyhun Məmmədov