Ordubad Rayon Gənclər və İdman İdarəsinin və Uşaq-gənclər idman məktəbinin təşkilatçılığı ilə “Zərərli vərdişlərə yox deyək, həmişə sağlam olaq” devizi altında karate-do üzrə Ordubad rayon birinciliyi keçirilib.

Birinciliyin açılışında Ordubad Rayon Gənclər və İdman İdarəsinin rəisi Əbülfəz Əliyev çıxış edərək iştirakçılara yarışın keçirilməsinin məqsədi haqqında məlumat verib və idmançılara müvəffəqiyyətlər arzulayıb. Birincilikdə 3 yaş qrupunda (7-8, 10-11, 12-13) 30-dan çox idmançı mübarizə aparıb. Gərgin keçən mübarizə nəticəsində 7-8 yaş qrupunda Bünyamin Zeynalov, 10-11 yaş qrupunda Fikrət Ağacanlı, 12-13 yaş qrupunda isə Hüseyn Əmirov qalib adını qazanıblar.
Sonda I, II və III yerləri tutan idmançılar təşkilatçılar tərəfindən diplomlarla mükafatlandırılıblar.

Ceyhun Məmmədov

İstənilən sahədə bir addım daha irəli getmək, digər insanlardan fərqli olmaq, edilən işin müsbət yöndə nəticəsini görmək – bunları uğur, müvəffəqiyyət, nailiyyət adlandırsaq, yəqin ki, yanılmarıq. İdmanda da uğur qazananlar daha güclü və iradəlilər, başqalarından mübarizə əzmi ilə seçilənlərdir.

Bəs uğur qazanmaq üçün nə etmək lazımdır? İnsan etdiyi hər hansı işə görə mükafat alır, uğur və şöhrət qazanır. Əgər insanın hər şeyi varsa, deməli, o, əlindən gələni edib ki, bunlara sahib olub. O zaman belə bir sual ortaya çıxır: bu uğuru niyə hamı əldə edə bilmir? Axı, hər kəs eyni hüquqa malikdir.
Həyatda uğur qazanmaq üçün, ilk növbədə, məqsəd aydın, irəliyə getmək üçün stimul olmalıdır. İdmanda uğur qazanmağı bir çox amillərlə əlaqələndirirlər. Psixoloji və fiziki hazırlıq, qarşıdakı turnirə və ya yarışa motivasiya, rəqiblərini dəyərləndirmək də bu amillər sırasındadır. Bunlar olmadıqda idmançının uğurlu çıxış etməsinə maneələr yaranır ki, bunu da bəzi idmançılar bəxt-tale ilə əlaqələndirirlər. Bu, məsələyə yanlış yanaşmadır.

Məktəblilərin yay tətilinin səmərəli təşkili məqsədilə 2004-2005-ci illər təvəllüdlü yeniyetmələr arasında futzal üzrə Naxçıvan Muxtar Respublika turniri keçirilib.
Naxçıvan Muxtar Respublikası Gənc­lər və İdman Nazirliyinin təşkil etdiyi turnirdə 8 komanda mübarizə aparıb. Naxçıvan şəhərindəki İlham Əliyev adına Olimpiya-İdman Kompleksində keçirilən yarışın açılış mərasimində çıxış edən Gənclər və İdman Nazirliyinin Kütləvi bədən tərbiyəsi və idman şöbəsinin müdiri Taleh İbrahimov bildirib ki, bu cür turnirlərin təşkili muxtar respublikada uşaq futbolunu inkişaf etdirmək, yeniyetmələrin oyun təcrübəsini və onlarda bu idman növünə marağı artırmaq məqsədi daşıyır. Hazırda Naxçıvanda bunun üçün hərtərəfli imkanlar yaradılıb, mini stadionlar tikilib uşaqların ixtiyarına verilib. Gələcəkdə də keçiriləcək belə turnirlər uşaqların futbol, həmçinin futzal bacarığına müsbət təsir göstərəcək.
“Naxçıvan-1”, “Naxçıvan-2”, “Darıdağ”, “Şərur”, “Şahbuz”, “Babək”, “Culfa” və “Ordubad” komandalarının mübarizə apardığı turnir olimpiya sistemi üzrə keçirilib. Turnirin həlledici qarşılaşmasında “Darıdağ” və “Şahbuz” komandaları üz-üzə gəliblər. Daha üstün oyun sərgiləyən Şahbuz komandası turnirin qalibi olub. Üçüncülük oyununda isə meydana “Şərur” və “Naxçıvan-1” komandaları çıxıb. Görüş “Naxçıvan-1” komandasının 2:1 hesablı qələbəsi ilə yekunlaşıb.
Sonda hər üç yeri tutan komandalar diplomla mükafatlandırılıblar.

Ceyhun Məmmədov

Şahbuz və Babək rayonlarının şahmat məktəblərinin dərnək üzvləri arasında yoldaşlıq görüşü keçirilib. Görüş 12 yaşa qədər və 12 yaşdan yuxarı yaş qrupunda olan şahmatçılar arasında təşkil edilib.
Yoldaşlıq görüşünün iştirakçıları əvvəlcə Şahbuz Rayon Tarix-Diyarşünaslıq Muzeyində olublar. Muzeydə şagirdlərə eksponatlar haqqında geniş məlumat verilib. Rayonun uşaq-gənclər şahmat məktəbində keçirilən görüş başlamazdan əvvəl çıxış edən Şahbuz Rayon Gənclər və İdman İdarəsinin məsləhətçisi İdris Qəhrəmanov, Babək Rayon Uşaq-Gənclər Şahmat Məktəbinin dərs hissə müdiri Zakir Quliyev və Şahbuz Rayon Uşaq-Gənclər Şahmat Məktəbinin direktoru Əli Gülmalıyev yarış iştirakçılarına tədbirin mahiyyəti barədə danışıblar.
Hər komandanın tərkibində 16 şahmatçı olmaqla, 32 şahmatçı gərgin mübarizə aparıb. Sonda 12 yaşa qədər yaş qrupunda Şahbuz Rayon Uşaq-Gənclər Şahmat Məktəbinin dərnək üzvləri, 12 yaşdan yuxarı yaş qrupunda isə Babək Rayon Uşaq-Gənclər Şahmat Məktəbinin dərnək üzvləri qalib gəliblər. Hər iki komandaya və fərqlənən şahmatçılara yarış təşkilatçılarının diplomları verilib.

Ceyhun Məmmədov

Şərur Rayon Gənclər və İdman İdarəsi ilə Naxçıvan Muxtar Respublikası Karate-do Federasiyasının birgə təşkil etdiyi yeniyetmələr arasında karate-do üzrə açıq birinciliyə yekun vurulub.
“Zərərli vərdişlərə yox deyək, həmişə sağlam olaq” devizi altında keçirilən birincilikdə Şərur rayonunun idmançıları ilə yanaşı, Kəngərli və Sədərək rayonlarının idmançıları da iştirak ediblər.
Tədbirdə 70-dən artıq idmançı qüvvəsini sınayıb və idmançılar beş yaş qrupu üzrə mübarizə aparıblar. Gərgin və maraqlı keçən mübarizədən sonra 6-7 yaş qrupunda Həbib Əhmədov, 8-9 yaş qrupunda Uğur Əsgərov, 10-11 yaş qrupunda Kənan Vəliyev, 12-13 yaş qrupunda Rövşən Nəcəfov, 14-15 yaş qrupunda isə Emin Nəcəfov birinci yerə layiq görülüblər.
Qaliblərə təşkilatçılar tərəfindən diplomlar təqdim olunub.

Ceyhun Məmmədov

Culfa Rayon Gənclər və İdman İdarəsinin təşkilatçılığı ilə rayonun Əbrəqunus kənd tam orta məktəbinin idman zalında Ərəzin və Əbrəqunus kənd voleybol komandalarının yoldaşlıq görüşü keçirilib.
Görüşdən öncə rayon Gənc­lər və İdman İdarəsinin baş məsləhətçisi Elçin Cəfərov çıxış edərək keçirilən tədbirin mahiyyətindən, idmanın inkişafına və gənclərə göstərilən dövlət qayğısından, son zamanlar idmanın müxtəlif növləri üzrə əldə olunan nailiyyətlərdən danışıb. Gərgin mübarizə şəraitində keçən yarışda Əbrəqunus kənd komandası 3:2 hesabı ilə qalib gəlib.
Sonda hər iki komandaya Culfa Rayon Gənclər və İdman İdarəsinin diplomları təqdim edilib.

 Ceyhun Məmmədov

İnam, mübarizə, qələbə – bu kəlmələr çalışdığı sahədən asılı olmayaraq, hər bir insan üçün böyük önəm kəsb edir.
İdman sahəsində bu sözlər daha qabarıq səslənir. Niyə? Çünki idman elə bir sahədir ki, burada insan gücünün və kamilliyinin sonsuzluğu sübut olunur. İdmançı mübarizə apardığı hər yarışda iki mütləq, daha dəqiq desək, yekun nəticə ilə qarşı-qarşıya qalır: qələbə və ya məğlubiyyət. Dəyişilməz bir hal var ki, burada qələbə və ya məğlubiyyət hər zaman idmançının ən yaxın dostudur. Bunun dərinliyini dərk etməyən idmançı isə heç vaxt uğur qazana bilməz.
Güc və kamilliyin vəhdəti idman sahəsində insanları hər zaman bir addım önə çıxarır. Bunu bəzən psixoloqlar qəbul edilməyən termin kimi qələmə verirlər. İdman sahəsində çalışan həkimlərin fikrincə, əldə olunan qələbələr idmançının aylarla gərgin məşqlərinin, gündəlik idman rejiminə əməl etməsinin və özünəinamının bəhrəsidir. Məğlubiyyət acısı isə onların özünü yenidən sınamaq və qələbə qazanmağa kökləyən amildir.

Müasir dövrümüzdə çoxlarını daha çox cəlb edən idman növü futboldur. Futbol oynamaq üçün, ilk növbədə, daxili istək lazımdır. Bu baxımdan uşaqlarda heç bir problem yoxdur. Ayağı top tutan istənilən uşağın muxtar respublikanın müxtəlif bölgələrində tikilmiş meydançalarda futbol oynadığını görmək mümkündür. Dünya səviyyəli futbolçuların bu tipli meydançalardan çıxdığı da məlumdur. Bu gün uşaqların futbol vərdişlərinə yiyələnməsi, biliyini zənginləşdirməsi və daha geniş məkanda nümayiş etdirməsi üçün şərait də yaradılıb.

Naxçıvanda gənc nəslin fiziki-mənəvi inkişafı idmana, futbola yönəlməsi istiqamətində xeyli iş görülüb. Təhsil müəssisələrində, əhalinin yaşayış yerlərində futbol infrastrukturunun yaradılması, ali, orta ixtisas və ümumtəhsil məktəblərində futbol bölmələrinin açılması, məhəllə, xüsusilə kənd komandaları arasında futbol üzrə yarışların təşkili müvafiq qurumlar tərəfindən həyata keçirilir. Ali, orta ixtisas və ümumtəhsil müəssisələrində yeniyetmə və gənclərin idmanla məşğul olması üçün əlverişli şərait yaradılıb, futbolun inkişaf etdirilməsi istiqamətində həyata keçirilən tədbirlər nəticəsində şagird və tələbələr arasında idmanın bu növünə maraq xeyli artıb. Uşaq, yeniyetmə və gənc­lər arasında futbol idman növünü təbliğ etmək, perspektivli futbolçuları üzə çıxarmaq məqsədilə il ərzində mütəmadi olaraq muxtar respublika səviyyəli çempionatlar təşkil olunur.

Naxçıvan şəhərindəki İlham Əliyev adına Olimpiya-İdman Kompleksinin Üzgüçülük Mərkəzində məktəblilərin yay tətilinin səmərəli təşkili məqsədilə 2001 və 2003-cü illər təvəllüdlü qızlar arasında keçirilən üzgüçülük üzrə Naxçıvan şəhər birinciliyinə yekun vurulub. Yarışın keçirilməsində məqsəd yay tətili günlərində məktəblilərin asudə vaxtlarını səmərəli təşkil etmək və onları sağlam həyat tərzinə uyğunlaşdırmaq olub. Naxçıvan Şəhər Gənclər və İdman İdarəsi ilə İlham Əliyev adına Olimpiya-İdman Kompleksinin birgə təşkil etdiyi birincilik üzgüçülüyün sərbəst üsulu üzrə keçirilib. 25 metr məsafədə keçirilən yarışda 2 yaş qrupunda 30-a yaxın idmançı mübarizə aparıb.
Yarışın yekununa əsasən, 2001-ci il təvəllüdlü idmançılar arasında Esmiralda Həsənzadə, Yasəmən Orucova, Səma Nəbiyeva, 2003-cü il təvəllüdlü idmançılar arasında isə Tahirə Həsənzadə, Nübar Qənbərova, Aysel Hüseynova müvafiq olaraq I, II və III yerlərə layiq görülüblər.
Sonda hər yaş qrupunda yer tutan və fərqlənən idmançılara Naxçıvan Şəhər Gənclər və İdman İdarəsinin diplom və fəxri fərmanları təqdim edilib.

 Ceyhun Məmmədov

Bu gün ölkəmizdə ən çox sevilən idman növlərindən biri futboldur. Naxçıvan Muxtar Respublikasında da ən kütləvi idman növü olan futbolun zəngin tarixi və ənənələri var. İstər ötən əsrdə, istərsə də indi Naxçıvan Azərbaycan futboluna peşəkar futbolçular və məşqçilər bəxş edib.
Təbii ki, istedadlı uşaq və gənclərin üzə çıxarılması, onların bu sahədə uğur qazanmaları üçün diqqət hər zaman vacibdir və uşaq futbolunun inkişafı birbaşa infrastrukturdan, şəraitdən, maddi-texniki bazadan asılıdır. Qürurvericidir ki, bütün bunlar muxtar respublikamızda təmin olunub. Müasir stadionlar, məşq meydançaları, yüksəkkeyfiyyətli inventarlar, avadanlıqlar uşaq və gənclərin yolunda konkret perspektiv körpü rolunu oynayır.
Naxçıvan Muxtar Respublikasında uşaq futbolunun inkişafına öz töhfəsini verən klublardan biri də “Darıdağ” Futbol Klubudur. Naxçıvan Muxtar Respublikası Daxili İşlər Nazirliyinin nəzdində fəaliyyət göstərən klub öz istedadlı yetirmələrinin oyunları ilə öyünə bilər. Komanda mütəmadi olaraq uşaq futboluna dəstək verir, muxtar respublikada bu növə uşaqların marağını artırmaq üçün yoldaşlıq görüşləri, turnirlər, yarışlar təşkil edir. Son olaraq Naxçıvan Muxtar Respublika Stadionunda keçirilən yarış bunun bariz nümunəsidir.

Güləş, Boks, Şərq Döyüşü Sənəti və Karate-do federasiyalarının uğurları daha çoxdur

Bu gün muxtar respublikada müasir idman infrastrukturu yaradılıb. Hər ay Naxçıvan Muxtar Respublikası Gənclər və İdman Nazirliyinin tədbirlər planına uyğun olaraq, turnirlər, yarışlar təşkil olunur. Təbii ki, belə yarışların təşkili yetişməkdə olan idmançıların yarış təcrübəsinin artmasına öz təsirini göstərir. Hazırda muxtar respublikada 12 idman federasiyası fəaliyyət göstərir və onlar cari ilin ilk 6 ayı ərzində bir çox uğura imza atıblar. Düzdür, “uğur” kəlməsi hamısına aid olmasa da, bəzi federasiyalar yetişdirdikləri idmançıların nailiyyətlərinə sevinə bilərlər. 

İslam Hümbətov adına Uşaq-Gənclər İdman Məktəbində “Zərərli vərdişlərə yox deyək, həmişə sağlam olaq” devizi altında yeniyetmələr (2006-2008-ci illər təvəllüdlü) arasında sərbəst güləş üzrə Naxçıvan şəhər birinciliyi keçirilib.
Naxçıvan Muxtar Respublikası Güləş Federasiyası ilə Naxçıvan Şəhər Gənclər və İdman İdarəsinin birgə təşkil etdiyi birincilikdə 10 çəki dərəcəsi üzrə 50-dən çox güləşçi mübarizə aparıb.
Tədbirin açılış mərasimində çıxış edən Gənclər və İdman İdarəsinin rəisi Xəyal Qurbanov və Güləş Federasiyasının sədr müavini Faiq İsgəndərov bildiriblər ki, birinciliyin keçirilməsində məqsəd yeniyetmələri zərərli vərdişlərdən uzaqlaşdırmaq, onları sərbəst güləş idman növünə cəlb etməklə bu idman növünün inkişafına və kütləviliyinə nail olmaqdır.
Yarışın keçirilmə qaydaları haqqında da idmançılara geniş məlumat verilib.
Beynəlxalq Güləş Federasiyasının mövcud qaydalarına əsasən keçirilən yarışda Sinan Rzayev, Hidayət İbrahimov, Namiq Əlizadə, Uğur Cəfərov, Ülvi İsmayılov, Ləzgi Xudadanlı, Altay Hacıyev, Nurlan Musayev, Mətin İmanov və Mirsadiq Seyidov müvafiq olaraq 20, 23, 26, 29, 32, 35, 38, 42, 46 və 53 kiloqram çəki dərəcələrində bütün rəqiblərinə qalib gələrək fəxri kürsünün ən yüksək zirvəsinə qalxıblar.
Sonda hər çəki dərəcəsində yer tutan idmançılar Naxçıvan Şəhər Gənclər və İdman İdarəsinin diplomları ilə mükafatlandırılıblar.

Xəbərlər şöbəsi

Naxçıvan Muxtar Respublika Stadionunda “Zərərli vərdişlərə yox deyək, həmişə sağlam olaq” devizi altında 2003-cü və 2005-ci illər təvəllüdlü uşaqlar arasında futbol üzrə keçirilən Naxçıvan şəhər açıq birinciliyinə yekun vurulub.

Naxçıvan Şəhər Gənc­lər və İdman İdarəsi ilə Naxçıvan Muxtar Respublikası Daxili İşlər Nazirliyi “Darıdağ” Futbol Klubunun birgə təşkil etdiyi birincilik 2 yaş qrupu üzrə keçirilib. Yarışdan öncə çıxış Naxçıvan Muxtar Respublikası Daxili İşlər Nazirliyi “Darıdağ” Futbol Klubunun sədr müavini Cavanşir Salayev və Gənclər və İdman İdarəsinin rəisi Xəyal Qurbanov bildiriblər ki, birinciliyi keçirməkdə məqsəd Naxçıvan şəhərində yeniyetmələri zərərli vərdişlərdən uzaqlaşdırmaq və onları futbol idman növünə cəlb etməkdir.
8 komandanın iştirak etdiyi açıq birincilikdə Naxçıvan şəhərinin komandaları ilə yanaşı, Şərur rayon Aralıq kəndinin və Culfa şəhərinin komandaları da mübarizə aparıblar. Olimpiya sistemi və futbolun mövcud qaydalarına əsasən keçirilən yarışın yekun nəticəsinə görə, 2003-cü il təvəllüdlü futbolçular arasında Naxçıvan Muxtar Respublikası Daxili İşlər Nazirliyi “Darıdağ” Futbol Klubunun “Darıdağ” komandası qalib adını qazanıb. 2005-ci il təvəllüdlü futbolçuların mübarizəsində isə “Aralıq” komandası bütün rəqiblərinə qalib gəlib.
Qalib komanda və komanda üzvləri Naxçıvan Şəhər Gənclər və İdman İdarəsi, Naxçıvan Muxtar Respublikası Daxili İşlər Nazirliyi “Darıdağ” Futbol Klubunun diplom, fəxri fərman və medalları ilə təltif olunublar.

Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksinin Üzgüçülük Mərkəzində “Zərərli vərdişlərə yox deyək, həmişə sağlam olaq” devizi altında yeniyetmələr (2003-2004 və 2005-2007-ci illər təvəllüdlü) arasında üzgüçülük üzrə keçirilən Naxçıvan şəhər birinciliyini İlham Əliyev adına Olimpiya-İdman Kompleksinin direktoru Ramin Talıbov açıq elan edib.
Sonra Azərbaycan Respublikasının Dövlət Himni səsləndirilib. Naxçıvan Şəhər Gənclər və İdman İdarəsinin rəisi Xəyal Qurbanov çıxış edərək bildirib ki, bu yarışı keçirməkdə məqsəd üzgüçülük idman növünü inkişaf etdirməkdən, məktəbliləri sağlam həyat tərzinə uyğunlaşdırmaqdan ibarətdir. Birincilik Naxçıvan Şəhər Gənclər və İdman İdarəsi ilə İlham Əliyev adına Olimpiya-İdman Kompleksinin birgə təşkilatçılığı ilə keçirilir.
Üzgüçülüyün sərbəst üsulu üzrə 25 metr məsafədə keçirilən yarışda 2 yaş qrupunda 40-a yaxın idmançı iştirak edib. Yarışın yekununa əsasən, 2003-2004-cü illər təvəllüdlü idmançılar arasında Amil Kətanov, 2005-2007-ci illər təvəllüdlü idmançılar arasında isə İsmayıl Yaqubov bütün rəqiblərini qabaqlayaraq qalib adını qazanıblar.
Sonda hər yaş qrupunda yer tutan və fərqlənən idmançılara təşkilatçıların diplom və fəxri fərmanları təqdim edilib.

 Ceyhun Məmmədov

Ordubad şəhərindəki şahmat məktəbində “Zərərli vərdişlərə yox deyək, həmişə sağlam olaq” devizi altında Ordubad və Culfa Rayon Gənclər və İdman idarələrinin və şahmat məktəbinin birgə təşkilatçılığı ilə “Ordubad” və “Culfa” komandaları arasında yoldaşlıq görüşü keçirilib.
Ordubad Rayon Gənclər və İdman İdarəsinin rəisi Əbülfəz Əliyev çıxış edərək yarış iştirakçılarına uğurlar arzulayıb. Ordubad Rayon Şahmat Məktəbinin direktoru İsrafil Məmmədov isə çıxışında şahmatçıları yarışın qaydaları barədə məlumatlandırıb. Gərgin keçən mübarizənin sonunda Ordubad rayon komandası 3,5 xal, Culfa rayon komandası isə 2,5 xal toplayıb.
Sonda komandalar təşkilatçılar tərəfindən diplomlarla mükafatlandırılıblar.

Ceyhun Məmmədov

İdman sağlam cəmiyyətin formalaşmasında mühüm rol oynayan sahədir. Naxçıvan Muxtar Respublikasında da bu sahənin uşaqlar, yeniyetmələr və gənclər arasında kütləvi hal alması üçün təqdirəlayiq işlər görülür. Elə il ərzində Naxçıvan Muxtar Respublikası Gənclər və İdman Nazirliyinin tədbirlər planına uyğun olaraq keçirilən yarışlarda, turnirlərdə 10 minlərlə idmançı iştirak edir. Təbii ki, iştirakçıların hamısı peşəkar karyeraya sahib olmasa da, nazirlik ən azından onların sağlam fərd kimi böyüməsinə köməkliyini göstərir.

Uşaq, yeniyetmə və gənclərin məşq proseslərinin daha düzgün, daha effektli alınması üçün hazır­da muxtar respublikanın şəhər və rayonlarında idman zalları, eləcə də məktəb zalları fəaliyyət göstərir. Bunlardan istifadə isə idman federasiyalarının üzərinə düşən əsas vəzifələrdən biridir: baza dövlət tərəfindən yaradılır və federasiyalara idmançı yetişdirmək üçün verilir.

Naxçıvan şəhərindəki İlham Əliyev adına Olimpiya-İdman Kompleksində “Zərərli vərdişlərə yox deyək, həmişə sağlam olaq” devizi altında “Naxçıvan” və “Şahbuz” komandaları arasında boks üzrə yoldaşlıq görüşü keçirilib. Naxçıvan Şəhər Gənclər və İdman İdarəsinin rəisi Xəyal Qurbanov tədbiri açıq elan edərək bildirib ki, bu yarışı keçirməkdə məqsəd yeniyetmə və gənc­ləri idmana cəlb etməkdən ibarətdir.
Sonra Naxçıvan Muxtar Respublikası Boks Federasiyasının sədr müavini Məmmədcəfər Əliyev yarışın qaydaları haqqında idmançılara məlumat verərək onlara uğurlar arzulayıb.
Naxçıvan Muxtar Respublikası Boks Federasiyası və Naxçıvan Şəhər Gənc­lər və İdman İdarəsinin birgə təşkilatçılığı ilə keçirilən yoldaşlıq görüşündə 13 çəki dərəcəsində 30-a yaxın dəri əlcək sahibi mübarizə aparıb. Beynəlxalq Boks Federasiyasının qaydalarına uyğun keçirilən görüşdə “Naxçıvan” komandası 8:5 hesabı ilə qalib gəlib.
Sonda hər iki komandada fərqlənən idmançılar Naxçıvan Şəhər Gənclər və İdman İdarəsinin diplomları ilə mükafatlandırılıblar.

Ceyhun Məmmədov

Bakı şəhərində yeniyetmələr arasında ağırlıqqaldırma üzrə “Zirvə” İdman Klubunun zona birinciliyi keçirilib. Birincilikdə 67 kiloqram çəki dərəcəsində Naxçıvan Muxtar Respublikası Gənclər və İdman Nazirliyinin nəzdində fəaliyyət göstərən ağır atletika bölməsinin yetirməsi Tərmenxan Babayev də çıxış edib. O, öz çəki dərəcəsində bütün rəqiblərini qabaqlayaraq birinciliyin qalibi olub.
Qeyd edək ki, Tərmenxan Babayev sentyabr ayında Polşada keçiriləcək Avropa birinciliyinə lisenziya əldə edib.

* * *

Almaniyanın Essen şəhərində kikboksinq üzrə dünya çempionatı keçirilib. Mundialda Naxçıvan Muxtar Respublikası Şərq Döyüşü Sənəti Federasiyasının yetirməsi Həsən Əliyev də mübarizə aparıb. 95+ kiloqram çəki dərəcəsində mübarizə aparan idmançımız bütün rəqiblərinə qalib gələrək dünya çempionu adına layiq görülüb.

 Ceyhun Məmmədov

Bədii gimnastika üzrə keçirilən yarışlarda muxtar respublikadan idmançıların olmasını, yəqin ki, mənim kimi oxucularımız da arzulayır. 2014-cü ildə gimnastikanın bütün növlərinin, o cümlədən bədii gimnastikanın kütləviləşməsi istiqamətində tədbirlərə start verilməsi önümüzdəki illərdə bu arzumuza çatacağımıza ümid yaratdı. Ən mühüm tədbirlərdən biri isə Naxçıvan Muxtar Respublikası Gənclər və İdman Nazirliyinin nəzdində “Xatun” bədii gimnastika bölməsinin yaradılması oldu. 

Qısa zamanda bölmə öz ətrafına onlarla uşaq və yeniyetməni toplaya bildi. Bu növün inkişafı üçün Naxçıvan Muxtar Respublikası Gənclər və İdman Nazirliyi tərəfindən bağçalara, məktəblərə afişalar vuruldu. Əvvəllər məşqlər İlham Əliyev adına Olimpiya-İdman Kompleksində aparılsa da, sonradan məşq yeri dəyişdirildi. Bunun səbəbi isə müraciət edənlərin sayının çoxluğu ilə əlaqədardır. İndi bədii gimnastika məşqlərinin keçirilməsi üçün Naxçıvan Muxtar Respublika Stadionunun inzibati binasında böyük və hərtərəfli şəraitlə təmin olunan zal ayrılıb. Məşqlər məşqçi-müəllim, Azərbaycanın idman ustası Humay Qafarova tərəfindən aparılır.

Naxçıvan Muxtar Respublikasında idmanın inkişafı, kütləvi hal alması və gənclər arasında təbliği üçün ardıcıl tədbirlər həyata keçirilir. Bu tədbirlərin davamı kimi Culfa rayonunun Bənəniyar kəndində yeniyetmə və gənc futbolçuların bu növlə məşğul olmaları üçün kənd stadionu yenidən qurularaq onların istifadəsinə verilib.

Bu münasibətlə keçirilən tədbirdə çıxış edən Culfa Rayon İcra Hakimiyyətinin başçısı Şükür Babayev bildirib ki, muxtar respublikanın digər bölgələri kimi, Culfa rayonu da günü-gündən inkişaf edərək yeniləşir. Hər il kənd­lərdə kompleks quruculuq işləri aparılır, yeni sosial obyektlər tikilir. Bənəniyar kəndində istifadəyə verilən stadion bu istiqamətdə həyata keçirilən tədbirlərin davamıdır. Şükür Babayev aparılan quruculuq tədbirlərinə görə rayon ictimaiyyəti adından Ali Məclisin Sədrinə minnətdarlıq edib.

Azərbaycan Respublikası Gənclər və İdman Nazirliyinin yaradılmasının 22-ci ildönümü münasibətilə Masallı rayonunda uşaqlar və yeniyetmələr arasında cüdo üzrə açıq turnir keçirilib. Turnirdə Naxçıvan Muxtar Respublikası Güləş Federasiyasının yetirməsi Abbas Məmmədov da iştirak edib. Tatami üzərinə 38 kiloqram çəki dərəcəsində çıxan idmançımız bütün rəqiblərinə qalib gələrək turnirin baş mükafatını qazanıb.
Qalib idmançımız diplom və medalla təltif olunub.

Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksində “Zərərli vərdişlərə yox deyək, həmişə sağlam olaq” devizi altında kişilər və gənclər arasında MMA döyüş növü üzrə Naxçıvan şəhər birinciliyi keçirilib.
Tədbirdə çıxış edən Naxçıvan Şəhər Gənclər və İdman İdarəsinin rəisi Xəyal Qurbanov və Naxçıvan Muxtar Respublikası Şərq Döyüşü Sənəti Federasiyasının sədr müavini Cavanşir Salayev bildiriblər ki, birinciliyin keçirilməsində əsas məqsəd MMA döyüş növünü kişilər və gənc­lər arasında təbliğ etməklə, onları zərərli vərdişlərdən uzaqlaşdırmaq və federasiya tərkibində fəaliyyət göstərən klubların işini təkmilləşdirməkdir.
Yarışda 7 çəki dərəcəsində 80 idmançı qüvvəsini sınayıb.

İdman etməmək üçün çox bəhanələr tapmaq olar: işin çoxluğu, vaxtın azlığı, idmana həvəssiz yanaşma, havanın soyuq və ya isti olması və sair. Bəs idman etmək üçün insan özünü nəyə məcbur etməlidir? Təbii ki, bu sualın kifayət qədər cavabı var. Bu cavablardan biri lap dəqiqdir: insan hər şeyi etməyə qadir varlıqdır. Bunun üçün, sadəcə, bir az iradə və cəsarət lazımdır.
İnsan idmanla məşğul olmursa, bu, onun tənbəlliyindən deyil, buna öyrəşməməyindən irəli gəlir. Ağır iş günündən sonra uzanmaq istəyinə güc gəlib idmanla məşğul olmaq lazımdır. Bunun ən rahat yolu işdən birbaşa idman zalına getməkdir. Bu ənənə 3-4 həftə davam edərsə, o zaman insan tənbəlliyə qalib gələcək. Bəzən burada bir sual yaranır: hansı idman növünü seçək? Gündəlik trenajor məşqlərindən sıxıldıqda və ya bu idmanı sevmədikdə, velosiped, qaçış, futbol, tennis, basketbol kimi növlərə müraciət etmək mümkündür. Ev şəraitində isə əzələ kütləsini artırmaq elə də vaxt almayacaq.

Naxçıvan Muxtar Respublikasında idmanın inkişafı, kütləvi hal alması və gənclər arasında təbliği üçün ardıcıl tədbirlər həyata keçirilir. Muxtar respublikanın şəhər və rayonlarında, həmçinin kəndlərində yeni idman obyektləri tikilir, mövcud idman qurğuları yenidən qurularaq istifadəyə verilir.
Bu tədbirlərin davamı kimi Culfa rayonunun Bənəniyar kəndində yeniyetmə və gənc futbolçuların daha mükəmməl stadionda məşq etmələri, futbol oynamaları üçün stadionda yenidənqurma işləri aparılır. Stadionun uzunluğu 86, eni 52 metrdir. Yararsız vəziyyətdə olan meydançaya xüsusi ot toxumu səpilib, yeni oyun qapıları qoyulub. Stadionun suvarılması üçün meydanın ərazisinə su xətti çəkilir. Hazırda stadionun ərazisinə bordür və daş döşənilir. Oyunların rahat izlənilməsi üçün stadionda oturacaqlar quraşdırılacaq.
Stadionun ərazisinə müxtəlif tinglər əkiləcək və ətrafında idman qurğuları quraşdırılacaq.

Ceyhun Məmmədov

Culfa rayonunun Bənəniyar kənd tam orta məktəbinin idman zalında Naxçıvan Muxtar Respublikası Şərq Döyüşü Sənəti Federasiyasının Culfa rayonundakı kikboksinq bölməsinin 30-a yaxın idmançısının iştirak etdiyi texniki-taktiki seminar keçirilib.
Seminar Azərbaycan Respublikasının Əməkdar bədən tərbiyəsi və idman xadimi, idman ustası, beynəlxalq dərəcəli hakim Hidayət Şabanov tərəfindən aparılıb.
Seminardan öncə Naxçıvan Muxtar Respublikası Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov və Naxçıvan Muxtar Respublikası Şərq Döyüşü Sənəti Federasiyasının sədr müavini Cavanşir Salayev çıxış edərək seminarın keçirilməsinin məqsədi haqqında məlumat veriblər.
Qeyd edək ki, seminar Naxçıvan Muxtar Respublikası Gənclər və İdman Nazirliyi və Şərq Döyüşü Sənəti Federasiyasının birgə tədbirlər planına əsasən keçirilib.

Ceyhun Məmmədov

İslam Hümbətov adına Uşaq-gənclər idman məktəbində məktəblilərin yay tətilinin səmərəli təşkil edilməsi məqsədilə kiçikyaşlı yeniyetmələr (2005-2007-ci illər təvəllüdlü) arasında cüdo üzrə Naxçıvan şəhər birinciliyi keçirilib.
Naxçıvan Şəhər Gənclər və İdman İdarəsinin baş məsləhətçisi Elşən Rəfiyev tədbiri açıq elan edib və yarışın keçirilmə məqsədi haqqında idmançılara məlumat verib. Naxçıvan Muxtar Respublikası Güləş Federasiyasının sədr müavini Faiq İsgəndərov isə yarışın keçirilmə qaydaları haqqında idmançıları məlumatlandırıb.
Naxçıvan Muxtar Respublikası Güləş Federasiyası ilə Naxçıvan Şəhər Gənclər və İdman İdarəsinin birgə təşkil etdiyi birincilikdə 7 çəki dərəcəsi üzrə 40-a yaxın idmançı qüvvəsini sınayıb. Beynəlxalq Cüdo Federasiyasının mövcud qaydalarına əsasən keçirilən yarışda Heydər Zamanov, Xaspolad Tutayuq, Orxan Niftəliyev, Əsgər Səfərov, Əziz Hacıyev, Rauf Cabbarov və Rüfət Zeynallı müvafiq olaraq 23, 26, 29, 32, 35, 42 və 46 kiloqram çəki dərəcələrində bütün rəqiblərini üstələyərək birinciliyin qalibi olublar.
Sonda hər çəki dərəcəsində yer tutan idmançılar diplomlarla təltif ediliblər.

Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksində “Zərərli vərdişlərə yox deyək, həmişə sağlam olaq” devizi altında yeniyetmə və gənclər arasında boks üzrə Naxçıvan şəhər açıq birinciliyi keçirilib.
Naxçıvan Muxtar Respublikası Boks Federasiyası, Naxçıvan Şəhər Gənclər və İdman İdarəsinin birgə təşkil etdiyi açıq birincilikdə Naxçıvan şəhərinin idmançıları ilə yanaşı, Kəngərli və Ordubad rayonlarının idmançıları da öz güclərini sınayıblar. Beynəlxalq Boks Federasiyasının qaydalarına uyğun keçirilən birincilikdə 24 çəki dərəcəsində 50 dəri əlcək sahibi qüvvəsini sınayıb. Gərgin mübarizə şəraitində keçən döyüşdə Sinan Əbilov (24 kiloqram, Kəngərli), Ayxan Heydərov (26 kiloqram, Naxçıvan), Heydərəli Əliyev (30 kiloqram, Naxçıvan), Cəsarət Qədimov (32 kiloqram, Kəngərli), Araz İmanlı (34 kiloqram, Naxçıvan), Nazim Abazərli (38 kiloqram, Naxçıvan), Əli Muxtarov (39 kiloqram, Ordubad), Nizami Novruzov (40 kiloqram, Naxçıvan), Ayxan Əlizadə (41 kiloqram, Naxçıvan), Ülvi Süleymanov (42 kiloqram, Naxçıvan), Əli Rüstəmov (44 kiloqram, Naxçıvan), Ayxan Süleymanov (46 kiloqram, Naxçıvan), İlkin Qurbanov (48 kiloqram, Naxçıvan), Kənan Zamanlı (49 kiloqram, Naxçıvan), Xəyal Quliyev (50 kiloqram, Naxçıvan), İsmayıl Abbaszadə (51 kiloqram, Naxçıvan), Kənan İbrahimli (52 kiloqram, Ordubad), Sənan İbrahimli (53 kiloqram, Ordubad), Hidayət Məmmədov (54 kiloqram, Naxçıvan), Kamran Allahverdiyev (56 kiloqram, Naxçıvan), Azər Abbaszadə (58 kiloqram, Naxçıvan), Pərvin Həsənzadə (62 kiloqram, Naxçıvan), Abbas Fərəcli (70 kiloqram, Kəngərli) və Məhəmməd Ələsgərov (75 kiloqram, Naxçıvan) bütün rəqiblərini üstələyərək birinciliyin qalibi olublar.
Sonda hər çəki dərəcəsində yer tutan idmançılar diplomla təltif ediliblər.

Ceyhun Məmmədov

İdmanla məşğul olmaq bədənimizi və ruhumuzu sağlam saxlayır. Müxtəlif idman növləri orqanizmimizə fərqli təsir göstərir. Çünki hər idman növü fərqli əzələlərə istiqamətlənir. Bu idman növləri içərisində üzgüçülük xüsusi əhəmiyyət kəsb edir: ideal bədən və əzələ quruluşuna sahib olmağımıza köməklik edir, beyin üçün faydalıdır. Son illər avstraliyalı mütəxəssislər uzunmüddətli təcrübə aparıblar. Onlar belə qənaətə gəliblər ki, üzgüçülük beyində qanın yaxşı işləməsinə səbəb olur, bədəndəki adrenalinin miqdarını yüksəldir ki, bu da damarları rahatlaşdırır. Mütəxəssislərin sözlərinə görə, üzgüçülüyün insan orqanizminə təsir göstərməsi üçün gündə ən azı 10 dəqiqə müddətində bu idmanla məşğul olmaq lazımdır. Üzgüçülüklə məşğul olarkən əməl edilməli olan əsas qaydalardan biri kifayət qədər maye qəbul etməkdir. Bu yolla itirilən enerjini tez zamanda bərpa etmək mümkündür.

Naxçıvan Muxtar Respublikası Ali Məclisi Sədrinin 11 yanvar 2016-cı il tarixli Sərəncamı ilə təsdiq edilən “2016-2020-ci illərdə Naxçıvan Muxtar Respublikasında sağlamlıq imkanları məhdud uşaqların təhsili və reabili­tasiyası üzrə Dövlət Pro­qramı”na uyğun olaraq tətil günlərində sağlamlıq imkanları məhdud uşaqların asudə vaxtlarının səmərəli təşkilinə xüsusi diqqət yetirilir.

Naxçıvan Muxtar Respublikası Gənclər və İdman Nazirliyi və Paralimpiya Federasiyasının təşkilatçılığı ilə Naxçıvan Uşaq Bərpa Mərkəzinin idman zalında sağlamlıq imkanları məhdud uşaqların iştirakı ilə boccia idman növü üzrə yarış keçirilib.
Sonda hаkimlər hеyəti yarışın qaliblərini müəyyən edib. Qaliblər mükafatlandırılıb, digər yarış iştirakçılarına isə hədiyyələr təqdim edilib.
Qeyd edək ki, Paralimpiya Federasiyasının nəzdində Uşaq Paralimpiya Klubunun yaradılması məqsədilə cari ilin may ayında boccia idman növü üzrə bölmə fəaliyyətə başlayıb. Bölməyə cəlb olunan uşaqlarla ilk məşqləri federasiya tərəfindən dəvət olunan Azərbaycan Milli Paralimpiya Komitəsinin nəzdində Uşaq Paralimpiya Komitəsinin boccia idman növü üzrə baş məşqçisi aparıb.

Xəbərlər şöbəsi

Naxçıvan şəhərindəki İlham Əliyev adına Olimpiya-İdman Kompleksinin Üzgüçülük Mərkəzində yeniyetmə və gənclər (2000-2002, 2003-2004 və 2005-ci illər təvəllüdlü) arasında üzgüçülük üzrə Naxçıvan şəhər birinciliyi keçirilib.
Kompleksin direktoru Ramin Talıbov tədbiri açıq elan etdikdən sonra Azərbaycan Respublikasının Dövlət Himni səsləndirilib. Sonra Naxçıvan Şəhər Gənclər və İdman İdarəsinin rəisi Xəyal Qurbanov çıxış edərək bildirib ki, bu yarışı keçirməkdə məqsəd məktəblilərin yay tətilinin daha da səmərəli təşkilinə nail olmaqdır.
Naxçıvan Şəhər Gənclər və İdman İdarəsi ilə İlham Əliyev adına Olimpiya-İdman Kompleksinin birgə təşkilatçılığı ilə keçirilən yarışda 3 yaş qrupunda 50-yə yaxın idmançı iştirak edib. Üzgüçülüyün sərbəst üsulu üzrə 25 metr məsafədə keçirilən yarışın yekununa əsasən, 2000-2002-ci illər təvəllüdlü idmançılar arasında Həsən Abbasov, 2003-2004-cü illər təvəllüdlü idmançılar arasında Amil Kətanov və 2005-ci il təvəllüdlü idmançılar arasında Ələsgər Hüseynov bütün rəqiblərini qabaqlayaraq birinci yerə layiq görülüblər.
Sonda hər yaş qrupunda yer tutan və fərqlənən idmançılara təşkilatçıların diplom və fəxri fərmanları təqdim edilib.

 Ceyhun Məmmədov

Gənclər siyasətində idmanın inkişaf etdirilməsi və onun kütləviliyinin artırılması mühüm yer tutur. Dövlətimizin başçısının ardıcıl səyləri nəticəsində bu gün Azərbaycan dünyanın qabaqcıl idman ölkələrindən birinə çevrilib. Respublikamızın müxtəlif bölgələrində olimpiya-idman komplekslərinin açılması, ölkəmizin nüfuzlu beynəlxalq idman yarışlarına ev sahibliyi etməsi, idmançılarımızın olimpiadalarda, dünya çempionatlarında uğurlu çıxışları buna əyani sübutdur.
Naxçıvan Muxtar Respublikasında da idmanın inkişafına davamlı qayğı dinamik xarakter alıb. Muxtar respublikamızın şəhər və rayon mərkəzləri ilə yanaşı, kəndlərində də idman obyektlərinin tikilməsi, mövcud obyektlərin yenidən qurulması bunun bariz nümunəsidir. Təbii ki, istifadəyə verilən yeni idman bazaları Naxçıvanda idmançıların daha böyük uğur qazanmalarına, onların müxtəlif yarışlarda uğurlu iştiraklarına zəmin yaradır.
Ötən gün Şərur rayon Yaycı kəndində daha bir idman obyekti – kənd stadionu gənclərin istifadəsinə verilib. Müasir tələblərə cavab verən stadionun uzunluğu 96 metr, eni 52 metrdir. Bir müddət öncə yararsız vəziyyətdə olan meydançaya xüsusi ot toxumu səpilib və yeni oyun qapıları qoyulub. Bununla yanaşı, stadionun suvarılması üçün əraziyə su xətti çəkilib. Azarkeşlərin keçirilən oyunları rahat izləmələri üçün 85 oturacaq quraşdırılıb. Stadionun məktəbin ərazisində yerləşməsi eyni zamanda şagirdlərin də buradan mütəmadi olaraq istifadə etmələri üçün əlverişlidir.
Stadionun ərazisinə müxtəlif tinglər əkilib, ətrafında idman qurğuları quraşdırılıb və digər idman növləri ilə məşğul olmaq üçün şərait yaradılıb.

 Ceyhun Məmmədov

İdmanın insan həyatında mühüm rol oynadığını yaxşı bilirik. Bu sahəyə istər peşəkar, istərsə də hobbi kimi yanaşanlar heç vaxt peşmançılıq hissi keçirməyiblər. Ancaq bir məsələni xüsusi vurğulamaq istəyirik ki, idman insan sağlamlığına müsbət təsir göstərdiyi kimi, onun psixoloji durumunu da tənzimləyir. Bu sahə ilə məşğul olanlar və olmaq istəyənlər hansı növə yönələcəklərini, adətən, öz bədən quruluşlarına, həmçinin maraqlarına görə seçirlər. Bəs insan doğulduğu aya görə hansı idman növünü seçə bilər? Aparılan araşdırmalardan sonra maraqlı nüanslar ortaya çıxıb...

Yanvar ayında doğulan insanların yaş fərqlərinə görə seçdikləri idman növləri də fərqlidir. Bu ayda dünyaya göz açanlar bitmək-tükənmək bilməyən enerjiyə sahibdirlər. Məhz buna görə alimlər yanvar ayını “döyüşçü” ayı adlandırırlar. Seçilən idman növləri isə fərqlidir. Məsələn, 14-19 yaş arası gənclər daha çox fərdi idman növlərinə – taekvandoya, güləşə üstünlük verirlər. Nisbətən yaşa dolmuş insanlar isə komanda idmanlarında müvəffəqiyyətə nail olurlar. Yəni yanvar ayında doğulan və idmanla məşğul olan insanların 62 faizi idarəçilik bacarığına malik olur və komanda idmanlarına üstünlük verirlər.

Bakı şəhərində VKC növləri üzrə Azərbaycan Respublikasının Milli Qəhrəmanı Murad Mirzəyevin xatirəsinə həsr olunmuş açıq turnir keçirilib. Azərbaycan Karate Federasiyasının təşkil etdiyi turnirdə Naxçıvan Muxtar Respublikası Karate-do Federasiyasının 5 idmançısı mübarizə aparıb. 

İdmançılarımız turnirdə uğurlu nəticə əldə edərək 3 medal qazanıblar. Belə ki, ən uğurlu nəticəni 14-15 yaş qrupunda, 50 kiloqram çəki dərəcəsində mübarizə aparan Sərcan Məmmədov göstərib. O, yalnız final görüşündə məğlub olaraq turnirin gümüş medalçısı olub. 10-11 yaş qrupunda, 30 kiloqram çəki dərəcəsində tatamiyə çıxan Vüsal Seyidov və bu yaş qrupunda 35 kiloqram çəki dərəcəsində iştirak edən Məhəmməd Şıxəlili üçüncü yerə çıxıblar.
Bu turnirlə yanaşı, Bakı şəhərində Azərbaycan Karate Federasiyasının “Arpaçay” Karate Klubunun birinci açıq birinciliyi də keçirilib. Bu birincilikdə də Naxçıvan Muxtar Respublikası Karate-do Federasiyasının 5 idmançısı iştirak edib. Bunlardan 12-13 yaş qrupunda, 33 kiloqram çəki dərəcəsində mübarizə aparan İmran Həsənov bütün rəqiblərinə qalib gələrək birinciliyin baş mükafatını qazanıb. 10-11 yaş qrupunda, 30 kiloqram çəki dərəcəsində isə Vüsal Seyidov üçüncü olub.
Sonda hər iki yarışda yer tutan idmançılarımıza diplom və medallar təqdim olunub.

Xəbərlər şöbəsi

Naxçıvan Muxtar Respublikası Gənclər və İdman Nazirliyi ilə Futbol Federasiyasının birgə təşkil etdiyi futbol üzrə Naxçıvan Muxtar Respublika çempionatına yekun vurulub.
Sentyabr ayının sonlarında start götürən və 10 komandanın ikidövrəli mübarizə apardığı çempionatın qalibi “Araz-Naxçıvan” futbol komandası olub. “Qırmızı-ağlar” mövsümün ilk görüşündə Naxçıvan Dövlət Universitetinin komandasına uduzsalar da, bu, onların il ərzində ilk və tək məğlubiyyətləri olub. Keçirdikləri 18 oyunun 16-da meydanı 3 xalla tərk edən “Araz-Naxçıvan” bir görüşdə “sülh”ə imza atıb. “Qırmızı-ağlar”ı mövsüm ərzində “DİN Darıdağ” futbol komandası izləsə də, sonda həmin komanda rəqiblərindən 6 xal geridə qalaraq, mövsümü ikinci pillədə başa vurub. Əslində, “DİN Darıdağ”ın cari ildə çıxışını müsbət qiymətləndirmək olar. Lakin komandanın hər iki görüşdə liderə məğlubiyyəti qəbuledilən olsa da, səfərdə gözlənilmədən “Əlincə” komandası ilə matçda meydanı xalsız tərk etməsi mövsümün sürprizlərindən biri olub.

Naxçıvan şəhərindəki İlham Əliyev adına Olimpiya-İdman Kompleksində 26 İyun – Silahlı Qüvvələr Gününə həsr olunmuş voleybol üzrə yoldaşlıq görüşü keçirilib. Naxçıvan Muxtar Respublikası Gənclər və İdman Nazirliyi ilə Voleybol Federasiyasının birgə təşkil etdiyi görüşdə “Naxçıvan” və “Culfa” komandaları üz-üzə gəlib.
Görüşdən öncə çıxış edən Naxçıvan Muxtar Respublikası Gənclər və İdman Nazirliyi Aparatının Kütləvi bədən tərbiyəsi və idman şöbəsinin müdiri Taleh İbrahimov bildirib ki, ölkəmizdə ordu quruculuğu da ümummilli lider Heydər Əliyevin adı ilə bağlıdır. Ulu öndər müstəqil Azərbaycanın əsas atributlarından hesab edilən ordumuzu daim diqqət mərkəzində saxlayır, mütəmadi olaraq cəbhə bölgələrində əsgərlər və zabitlərimizlə görüşürdü. Ümum­milli liderimizin yaratdığı ordu bu gün düşmənə hər an sarsıdıcı zərbə vurmağa hazırdır.
Voleybol Federasiyasının sədr müavini Aydın Mirzəyev isə iştirakçı idmançılara yarışın qaydaları haqqında məlumat verib, onlara uğurlar arzulayıb.
Gərgin idman mübarizəsi şəraitində keçən görüş Culfa voleybolçularının 3:2 hesablı qələbəsi ilə yekunlaşıb.
Sonda idmançılara federasiyanın hədiyyələri təqdim edilib.

Ceyhun Məmmədov

Yay fəslinin gəlişi insanın orqanizmində müəyyən dəyişikliklərin yaranmasına səbəb olur. Adətən, isti aylarda insanlar idmana daha çox meyil edirlər. Bunun bir sıra səbəbləri var: çəki salmaq, formada qalmaq, qışda hər hansı bir xəstəliklərdən qorunmaq və sair. Bu zaman ortaya bir sual çıxır: yay aylarında açıq havada edilə biləcək əsas məşqlər hansılar ola bilər və ya hansı idman hərəkətləri vacibdir? Vəziyyətimizə və zövqümüzə əsasən tətbiq edəcəyimiz, ən əsası ürək fəaliyyətimizin normada olması üçün açıq havada bəzi məşqlərlə qısa müddət ərzində idmana adaptasiya ola bilərik.
İlk olaraq yayda idman zalına getmədən və ya hər hansı idman alətinə ehtiyac duymadan açıq havada kalori yandıraraq bədən quruluşunu formada saxlamaq olar. Açıq havada oksigenin pozitiv enerjisi idman məşqlərinin bədənimizə təsir dərəcəsini də artırır. Nümunə olaraq 30 dəqiqə gəzinti, yüngül tempdə qaçış, velosipedsürmə, üzmə kimi hərəkətləri göstərmək mümkündür. Açıq havada bədənin formada qalması, artıq çəkilərdən uzaq olmaq və sağlamlığı qorumaq üçün, adətən, aşağıdakı məşqlər məsləhət görülür.
Pilləkənlərlə çıxıb-düşmə. Bu, ayaq əzələlərimizi çalışdırdığımız zaman həmçinin yağ yandırmağımızı da təmin edəcək bir idman hərəkətidir. Bunu 15-30 dəqiqə etmək kifayətdir.
Kürək hərəkəti. Bu hərəkət kürək əzələlərini inkişaf etdirir. Hərəkəti yerinə yetirmək üçün yerə üzüüstə uzanmaq və əlləri yerə dəyəcək şəkildə irəli uzatmaq lazımdır. Ayaqları düz vəziyyətdə pozmadan yuxarı qaldırıb saxlamaq kürək əzələlərini inkişaf etdirir. Bu, eyni zamanda onurğa sütununun düz qalmasına da müsbət təsir göstərir.

Rusiyanın Anapa şəhərində keçirilən gənclər arasında boks üzrə Avropa çempionatında Azərbaycan yığması da iştirak edib. Millimizin heyətində 60 kiloqram çəki dərəcəsində rinqə Naxçıvan boks məktəbinin yetirməsi Sərxan Əliyev çıxıb. Boksçumuz ilk mərhələdə alman həmkarı Yabs Germanı məğlub edib. İkinci görüş isə daha çox diqqət mərkəzində olub. Belə ki, bu mərhələdə Sərxan Əliyev Ukraynanı təmsil edən erməni boksçu Zoravor Petrosyanla üz-üzə gəlib. Görüşün hər üç raundunda qələbə qazanan boksçumuz 1/4 finala yüksəlib. Yarımfinal yolunda həmyerlimiz moldovalı Aleksandr Paraşviçlə qarşılaşıb və böyük üstünlüklə qələbəni bayram edib. Həlledici görüşdə iştirak etmək üçün Sərxan Əliyev İrlandiya təmsilçisi Oliver Keyran Makkarti ilə döyüşüb. Hakimlərin qərəzli qərarlarından sonra rinqi məğlub tərk edən boksçumuz qitə birinciliyini üçüncü pillədə başa vurub.
Sonda idmançımıza təşkilatçılar tərəfindən diplom və medal təqdim olunub.

Ceyhun Məmmədov

Naxçıvan Muxtar Respublikası Güləş Federasiyasının yetirmələrinin cari ildə beynəlxalq turnirlərdə qazandığı uğurlara daha biri əlavə olunub. 

Belə ki, Ukraynanın Odessa şəhərində sərbəst güləş üzrə keçirilən XII Avropa Beynəlxalq Turnirində Naxçıvan güləş məktəbinin yetirməsi Abbas Məmməd­ov da mübarizə aparıb. 34 kiloqram çəki dərəcəsində turnirdə iştirak edən güləşçimiz bütün rəqiblərinə tam üstünlüklə qalib gələrək finala yüksəlib. Həlledici qarşılaşmada Abbas Məmmədovun rəqibi rusiyalı güləşçi olub. İdmançımız final görüşündə də qalib gələrək turnirin baş mükafatını qazanıb.
Sonda idmançımıza təşkilatçılar tərəfindən diplom, medal və kubok təqdim olunub.

Ceyhun Məmmədov

Futbol üzrə Şərur rayon birinciliyinin final görüşləri yenidən qurulmuş Aralıq kənd stadionunda keçirilib.
Şərur Rayon Gənclər və İdman İdarəsinin təşkilatçılığı ilə keçirilən və 31 may 2016-cı il tarixdə start götürən yarışda rayonun 22 kəndinin futbol komandası mübarizə aparıb.
İyunun 10-da Muğancıq-Müslüm və Kürçülü kənd komandaları birinci və ikinci yerlər uğrunda final görüşündə qarşılaşıblar. Sonda 4:3 hesabı ilə Muğancıq-Müslüm kənd komandası yarışın qalibi adını qazanıb. Çomaxtur kənd komandası isə 3-cü yerlə kifayətlənməli olub.
Sonda yarışın qalib komandalarına təşkilatçılar tərəfindən diplom və kubok təqdim edilib.

Xəbərlər şöbəsi

Naxçıvan şəhərindəki Şahmat Mərkəzində 15 İyun – Milli Qurtuluş Günü münasibətilə adıçəkilən mərkəzin açıq birinciliyi keçirilir.
Birinciliyi giriş sözü ilə Naxçıvan Muxtar Respublikası Şahmat Federasiyasının sədr müavini, Naxçıvan Şahmat Mərkəzinin direktoru, beynəlxalq dərəcəli hakim Emin Hacıyev açaraq iştirakçıları təbrik edib, onlara müvəffəqiyyətlər arzulayıb.
Sonra birinciliyə start verilib. İlk turda növbəti mərhələyə keçmək üçün müxtəlif yaşlarda 118 şahmatçı qələbə uğrunda mübarizə aparıb.
Məlumat üçün bildirək ki, birincilik iyunun 15-də yekunlaşacaq.

Xəbərlər şöbəsi

28 May – Respublika Günü münasibətilə Naxçıvan Dövlət Universitetində təşkil edilən yarışların qaliblərinin mükafatlandırma mərasimi keçirilib.
Tədbirdə universitetin rektoru, AMEA-nın müxbir üzvü Saleh Məhərrəmov çıxış edərək ali təhsil ocağında keçirilən müxtəlif yarışların kütləvi hal almasını tələbə-gənclikdə elmi təfəkkür, sağlam düşüncə və fiziki hazırlığın inkişafı, onların asudə vaxtlarının səmərəli təşkili baxımından mühüm rol oynadığını vurğulayıb.
Universitetin tərbiyə işləri üzrə prorektoru, dosent Şamxal Məmmədov məlumat verib ki, “Universitet 2016” XIII çempionat çərçivəsində 28 May – Respublika Günü münasibətilə keçirilən fakültələrarası futbol yarışının qalibi Tibb fakültəsinin komandası olub. Tarix-filologiya fakültəsinin keçirdiyi intellektual yarışda isə 4 komanda iştirak edib. Tarix müəllimliyi ixtisasının tələbələrindən ibarət komanda I yerə çıxıb. Jurnalistika ixtisası tələbələrinin təmsil olunduğu komanda isə II yerə layiq görülüb.
Tibb fakültəsinin futbol komandasının qazandığı kubok komandanın kapitanı, Əczaçılıq ixtisasının II kurs tələbəsi Nicat Ağamalıya təqdim olunub. Tarix-filologiya fakültəsinin təşkil etdiyi intellektual yarışda xüsusi fərqlənən komanda üzvlərindən Tarix müəllimliyi ixtisasının tələbələri Türkanə Zeynal­ovaya, Zülfin Kərim­ovaya və Səkinə Hüseynovaya I dərəcəli diplomlar verilib. Jurnalistika ixtisasının tələbələrindən Kazım Kazımov, Badəm Məmmədova, Məmmədbağır Dünyamalıyev, Türkay Həsənov II dərəcəli diplomlarla təltif olunublar.

Mehriban SULTAN

Naxçıvan Muxtar Respublikası Güləş Federasiyasının yetirməsi Abbas Məmmədov ölkədaxili birinciliklərdə qazandığı uğurlara daha birini əlavə edib. Belə ki, Bakı şəhərində 2 nömrəli Respublika İxtisaslaşdırılmış Olimpiya Ehtiyatları Uşaq-Gənclər İdman Məktəbinin açıq birinciliyində Naxçıvan güləş məktəbinin yetirmələri də qələbə qazanmaq uğrunda mübarizə aparıblar. Ən yüksək nəticəni 34 kiloqram çəki dərəcəsində Abbas Məmmədov qazanıb. O, öz çəki dərəcəsində bütün rəqiblərinə qalib gələrək yarışın baş mükafatının sahibi olub.
Abbas Məmmədova təşkilatçılar tərəfindən diplom və medal təqdim edilib.

 Ceyhun Məmmədov

Naxçıvan şəhərindəki İlham Əliyev adına Olimpiya-İdman Kompleksində ümummilli lider Heydər Əliyevin anadan olmasının 93-cü ildönümünə həsr olunmuş kişilər arasında voleybol üzrə Naxçıvan Muxtar Respublika turniri keçirilib. Naxçıvan Muxtar Respublikası Gənc­lər və İdman Nazirliyi ilə Voleybol Federasiyasının birgə təşkil etdiyi turnir 2 gün davam edib.
Muxtar respublika turnirində “Naxçıvan”, “Şərur”, “Babək”, “Ordubad”, “Culfa”, “Şahbuz”, “Sədərək” və “Kəngərli” komandaları birincilik uğrunda mübarizə aparıblar. Olimpiya sistemi üzrə keçirilən turnirin yarımfinal mərhələsində “Şərur” komandası “Şahbuz”u (3:2), “Sədərək” komandası isə “Culfa”nı (3:0) məğlub edərək finala yüksəliblər.
Dünən turnirdə ilk olaraq meydana üçüncü yer uğrunda Şahbuz və Culfa voleybolçuları çıxıblar. Daha inamlı oyun sərgiləyən culfalılar meydanı quru hesablı qələbə ilə tərk ediblər – 3:0. Final görüşü isə daha gərgin idman mübarizəsi şəraitində keçib. “Sədərək” komandasının üzvləri şərurlu həmkarlarını məğlub etməkdə çətinlik çəkiblər. 3:1 hesablı qələbə nəticəsində “Şərur” komandası turnirin qalibi olub.
Sonda qalib komandalara diplom və hədiyyələr verilib.

Ceyhun Məmmədov

Mayın 25-də Naxçıvan Muxtar Respublika Stadionunda start götürən, ümummilli lider Heydər Əliyevin anadan olmasının 93-cü ildönümünə həsr olunmuş “Heydər Əliyev kuboku” uğrunda futbol üzrə turnir başa çatıb.

Mayın 25-də Naxçıvan Muxtar Respublika Stadionunda ümummilli lider Heydər Əliyevin anadan olmasının 93-cü ildönümünə həsr olunmuş “Heydər Əliyev kuboku” uğrunda futbol üzrə turnirin açılış mərasimi keçirilib.

Mayın 25-də Naxçıvan şəhərindəki İlham Əliyev adına Olimpiya-İdman Kompleksində veteran ağır atletlər arasında keçirilən Avropa çempionatının iştirakçıları Naxçıvan şəhərindəki Heydər Əliyev Muzeyində olublar. Burada muzeyin bələdçisi tərəfindən qonaqlara məlumat verilib ki, muzeyin fondunda ümummilli lider Heydər Əliyevin həyat və fəaliyyətini özündə əks etdirən minlərlə eksponat toplanıb. Ulu öndər tərəfindən qəbul edilmiş qərar və sərəncamlar, imzalanmış protokol və müqavilələr, ümummilli liderə göndərilmiş məktub və teleqramlar mənalı ömür yolunun müxtəlif anlarını özündə əks etdirməklə görkəmli dövlət xadiminin zəngin dövlətçilik və ictimai-siyasi fəaliyyəti barədə dolğun təsəvvür yaradır.

Naxçıvan şəhərindəki İlham Əliyev adına Olimpiya-İdman Kompleksində keçirilən veteran ağır atletlər arasında 26-cı kişilər və 24-cü qadınlar Avropa çempionatı davam edir. Qitə birinciliyində iştirak edən veteran idmançılarla söhbətləşdik.
Bill Barton (Avropa Veteran Ağır Atletlər Komitəsinin prezidenti): – Yenə Naxçıvanda olmaq, burada tanış simaları görmək, onların əlini sıxmaq bizi qürurlandırır. İlk olaraq mən Avropa çempionatının bu gözəl diyarda keçirilməsində bizə köməklik göstərən və təklifimizi müsbət dəyərləndirən muxtar respublika rəhbərinə minnətdarlığımı bildirirəm. Artıq üçüncü dəfədir ki, Naxçıvana gəlirəm. Qitə çempionatının Naxçıvanda keçirilməsinin əsas səbəblərindən biri yaradılan şəraitdir. İdmançıların rahatlığı, onların məşq etmələri, yarışlara hazırlaşması, otellərə kimi avtomobillə aparılması, qısa olaraq, onların əziyyət çəkməməyi üçün hər bir şərait yaradılıb. Naxçıvanda təşkil olunan yarışlarda çıxış edən idmançılar hər zaman bu şəhərdən razı qalıblar. İndi bizim, həmçinin keçirilən Avropa çempionatı iştirakçılarının elə bir yaş dövrüdür ki, onlar qayğı ilə əhatə olunmalıdırlar. Və bunu da gördük. Naxçıvan bizi böyük qonaqpərvərliklə qarşıladı və gələn idmançıları öz həmvətənlərindən ayırmadı.

Ümummilli lider Heydər Əliyevin anadan olmasının 93-cü il­dö­nümünə həsr olunmuş “Heydər Əliyev kuboku” uğrunda futbol üzrə turnir keçiriləcək.
Naxçıvan Muxtar Respublikası Gənclər və İdman Nazirliyi, Azərbaycan Peşəkar Futbol Liqası və Naxçıvan Muxtar Respublikası Futbol Federasiyasının birgə keçirəcəyi turnir Azərbaycanda ilk dəfə olaraq təşkil edilir. May ayının 25-dən 27-nə kimi davam edəcək turnirdə 4 komanda mübarizə aparacaq. Belə ki, geridə qoyulan mövsüm Azərbaycan Birinci Divizionunun qalibi “Neftçala”, həmçinin bu liqada çıxış edən MOİK, “Şərurspor” və Naxçıvanın “Araz-Naxçıvan” komandaları turnirdə birincilik uğrunda meydana çıxacaqlar. Turnirə Naxçıvan Muxtar Respublika Stadionu ev sahibliyi edəcək.
Dünən “Heydər Əliyev kuboku” uğrunda turnirin püşkatma mərasimi keçirilib. Naxçıvan Muxtar Respublika Stadionunun inzibati binasında təşkil edilən püşkatmanın nəticəsinə əsasən, görüşlər olimpiya sistemi üzrə keçiriləcək. Bu gün saat 1400-da turnirin açılış mərasimi olacaq və turnirin ilk oyunu saat 1500-da başlayacaq. İkinci görüş isə saat 1800-da oynanılacaq. Bu görüşlərdən qalib ayrılan komandalar finalda, məğlub olanlar isə üçüncü yer uğrunda görüş üçün meydana çıxacaqlar. Üçüncü yer uğrunda görüş mayın 27-də saat 1430-da, final görüşü isə saat 1730-da başlayacaq. Görüşlərdən sonra qaliblərin mükafatlandırma mərasimi keçiriləcək.
Qeyd edək ki, keçiriləcək görüşləri Peşəkar Futbol Liqası tərəfindən təyin edilmiş hakimlər briqadası idarə edəcək.

Ceyhun Məmmədov

Mayın 22-də Naxçıvan şəhərindəki İlham Əliyev adına Olimpiya-İdman Kompleksində veteran ağır atletlər arasında 26-cı kişilər və 24-cü qadınlar Avropa çempionatının açılış mərasimi olub. 21 ölkədən 200-yə yaxın atletin iştirak etdiyi yarışın açılış mərasimində çıxış edən Azərbaycan Respublikası gənclər və idman nazirinin müavini İsmayıl İsmayılov bildirib ki, artıq ikinci dəfədir, veteranlar arasında beynəlxalq turnir məhz burada keçirilir. Naxçıvan iki il əvvəl Dünya Kubokuna ev sahibliyi edib.

Naxçıvan Muxtar Respublikası Gənclər və İdman, Təhsil nazirlikləri və Hava və Ekstremal İdman Növləri Federasiyasının birgə təşkil etdikləri ali və orta ixtisas təhsili müəssisələrinin tələbələri arasında “Heydər Əliyev kuboku” uğrunda Əlincəqalaya yürüş üzrə Naxçıvan Muxtar Respublika açıq birinciliyi keçirilib.

150-dən çox idmançının mübarizə apardığı birinciliyin açılış mərasimində Naxçıvan Muxtar Respublikasının gənclər və idman naziri Azad Cabbarov, Naxçıvan Muxtar Respublikası Hava və Ekstremal İdman Növləri Federasiyasının sədri Hafiz Yaqubov, təhsil naziri Məmməd Qəribov çıxış ediblər. Çıxışlarda muxtar respublikada həyata keçirilən idman siyasətindən, bu sahədə əldə olunan nailiyyətlərdən söhbət açılıb. Bildirilib ki, müstəqil Azərbaycan Respublikasının uğurlu idman siyasətinin formalaşması ümummilli lider Heydər Əliyevin adı ilə bağlıdır. Bu gün dövlətin apardığı idman siyasəti keyfiyyətcə yeni mərhələdə davam etdirilir. Prezident İlham Əliyevin həyata keçirdiyi bu siyasət nəticəsində gənclərimiz cəmiyyətimizin inkişafında fəal sosial təbəqəyə çevriliblər.
Vurğulanıb ki, gənclərin bütün sahələrdə irəli çəkilməsi, onların intellektual səviyyələrinin artırılması, asudə vaxtlarının səmərəli təşkili, vətənpərvər ruhda tərbiyə olunması, beynəlxalq əhəmiyyətli tədbirlərdə yaxından iştirakı məsələləri daim diqqətdə saxlanılır.