Naxçıvan Muxtar Respublikasında idmanın inkişafı, kütləvi hal alması və gənclər arasında təbliği üçün ardıcıl tədbirlər həyata keçirilir. Bu tədbirlərin davamı kimi Culfa rayonunun Bənəniyar kəndində yeniyetmə və gənc futbolçuların bu növlə məşğul olmaları üçün kənd stadionu yenidən qurularaq onların istifadəsinə verilib.

Bu münasibətlə keçirilən tədbirdə çıxış edən Culfa Rayon İcra Hakimiyyətinin başçısı Şükür Babayev bildirib ki, muxtar respublikanın digər bölgələri kimi, Culfa rayonu da günü-gündən inkişaf edərək yeniləşir. Hər il kənd­lərdə kompleks quruculuq işləri aparılır, yeni sosial obyektlər tikilir. Bənəniyar kəndində istifadəyə verilən stadion bu istiqamətdə həyata keçirilən tədbirlərin davamıdır. Şükür Babayev aparılan quruculuq tədbirlərinə görə rayon ictimaiyyəti adından Ali Məclisin Sədrinə minnətdarlıq edib.

Naxçıvan Muxtar Respublikasının gənclər və idman naziri Azad Cabbarov isə çıxışında vurğulayıb ki, bu gün muxtar respublikanın tək şəhər və rayonlarında yox, həmçinin kəndlərində də yeni idman obyektləri tikilərək gənclərin ixtiyarına verilir. Kənddəki stadionun yenidən qurulması istedadlı uşaqların üzə çıxarılmasına və onların gələcəkdə böyük uğurlar qazanmasına zəmin yaradacaq.
Azad Cabbarov Bənəniyar kənd stadionunun istifadəyə verilməsi münasibətilə kənd camaatını təbrik edib, onlara idmanımızın inkişafı sahəsindəki fəaliyyətlərində uğurlar arzulayıb.
Ramiz Quliyev kənd sakinləri adından minnətdarlıq edərək deyib: – Bənəniyarda stadionun yenidən qurulması kəndin simasını dəyişib, gənc­lərin rahatlığına xidmət edən müasir infrastruktur yaradılıb. Bu stadion sakinlərin böyük sevincinə səbəb olub. Artıq dağların əhatəsində yerləşən bu yaşayış məntəqəsində idmanla məşğul olmaq xeyli asanlaşıb.
Qeyd edək ki, müasir tələblərə cavab verən stadionun uzunluğu 86, eni 52 metrdir. Yararsız vəziyyətdə olan meydançaya xüsusi ot toxumu səpilib, yeni oyun qapıları qoyulub. Stadionun suvarılması üçün meydanın ərazisinə su xətti çəkilib. Oyunların rahat izlənməsi üçün stadionda oturacaqlar quraşdırılıb. Bunlarla yanaşı, stadionun ərazisinə müxtəlif tinglər əkilib.

Xəbərlər şöbəsi