Ümummilli lider Heydər Əliyevin anadan olmasının 92-ci ildönümünə həsr olunmuş “Naxçıvan-2015” Beynəlxalq Şahmat Festivalının 7-сi turu başa çatıb.
“A” turnirində mübarizə aparan və aktivində 2 xal olan Naxçıvan şahmatçısı, FİDE ustası Pərviz Qasımov bu turda beynəlxalq usta Ülviyyə Fətəliyeva ilə, digər həmyerlimiz, FİDE ustası Ürfan Sevdimalıyev isə beynəlxalq usta Xəyalə Abdulla ilə qarşılaşıb. Hər iki görüş həmyerlilərimizin qələbəsi ilə başa çatıb.
Qrupun liderlərindən biri – gürcüstanlı qrossmeyster Levan Pantsulaya bu turda hollandiyalı qrossmeyster Sergey Tivyakovla üz-üzə gəlib və görüş “sülh”lə başa çatıb. Aktivində 5 xal olan azərbaycanlı qrossmeyster Eltac Səfərli də bu turu heç-heçə ilə başa vurub. O, digər azərbaycanlı qrossmeyster Qədir Hüseynovla xalları yarı bölüb. Liderlər qrupunda qərarlaşan iranlı qrossmeyster İdani Pouya azərbaycanlı qrossmeyster Azər Mirzəyevdən üstün olub.
“Naxçıvan-2015” Beynəlxalq Şahmat Festivalının 7-ci turunda “B” turnirinin lideri azərbaycanlı şahmatçı Rəşad Zeynallı Toğrul Həsənzadə ilə üz-üzə gəlib.
Bu görüşdə naxçıvanlı şahmatçı Toğrul Həsənzadə rəqibi ilə heç-heçə edib. Turun digər maraqlı görüşlərində Məhəmməd Muradlı Ramil Cavadovu, Elnur Əliyev isə iranlı şahmatçı Behranq Kabudini sınağa çəkib. Daha üstün olan Məhəmməd və Behranq görüşləri qələbə ilə başa vurublar. Alınan bu nəticələrdən sonra Məhəmməd Muradlı liderliyə yüksəlib. Onun kimi Rəşad Zeynallı, Behranq Kabudi və Vəli Zeynalzadənin də aktivində 6 xal var.
Festivalın “C” turnirinin 7-ci turu lider Mətin Mürsəllinin xal itkisi ilə yadda qalıb. O, azərbaycanlı zəka sahibi Vahid Həsənzadə ilə xalları yarı bölməli olub. Naxçıvan şahmat məktəbinin yetirməsi Siyavuş Bağırov bu turda cəbrayıllı həmkarı ilə “sülh” bağlayıb. Digər həmyerlimiz Kənan Şərifzadə isə Altay Eynullayevə məğlub olub. Bu turda naxçıvanlı şahmatçı Vaqif Cabbarlı oyunu ilə diqqət çəkib. 7 yaşlı zəka sahibi reytinq əmsalı 1418 olan Vahid Həsənlini məğlub edib.
Bu nəticələrdən sonra Mətin Mürsəlli yenə liderliyini davam etdirir – 6,5 xal.
Ceyhun Məmmədov
