Naxçıvan Muxtar Respublikası Gənclər və İdman Nazirliyi ilə Basketbol Federasiyası cari ilin əvvəlindən başlayaraq ilk dəfə basketbol üzrə kişilər arasında Naxçıvan Muxtar Respublika çempionatına start verib.
Mart ayının 14-də başlayan çempionat iki dövrədən ibarətdir. İlk dövrə iyun ayının 8-də yekunlaşacaq. Bundan sonra istirahətə yollanacaq basketbolçular ikinci dövrəyə sentyabrın 27-də start verəcəklər. 3 ay davam edəcək ikinci dövrənin oyunlarına dekabrın 27-də yekun vurulacaq.
Basketbol üzrə kişilər arasında Naxçıvan Muxtar Respublika çempionatında 8 komanda iştirak edir. “Naxçıvan”, “Lokomotiv”, “Babək”, “Sədərək”, “Şərur”, “Ordubad”, “Culfa” və “Naxçıvan” Universiteti” komandalarının birincilik uğrunda mübarizə apardığı çempionatın artıq 7 oyunu geridə qalıb. Açılış matçında çempionatın favoriti kimi göstərilən “Naxçıvan” komandası İlham Əliyev adına Olimpiya-İdman Kompleksində “Babək” komandasını sınağa çəkib. Oyun və dəqiqlik baxımından babəkli həmkarlarından üstün olan birincilər meydanı 53:25 hesablı qələbə ilə tərk ediblər. Bu görüşdən sonra “Naxçıvan” səfərdə “Sədərək” və “Lokomotiv” komandalarını da məğlub etməyi bacarıb. Sədərək komandası üzərində 66:38 hesabı ilə qələbə qazanan “Naxçıvan” komandasının ən baxımlı oyunu “Lokomotiv”lə görüşdə olub. Daha təcrübəli basketbolçularının səbəti dəqiq və düzgün nişan almasından maksimum istifadə edən favorit komanda rəqibin daşını daş üstə qoymayıb – 47:91. Onu da qeyd edək ki, “Naxçıvan” komandası bu qələbələrdən sonra turnir cədvəlinə başçılıq edir.
İlk görüşündə məğlub olan “Sədərək” komandası ikinci görüşdə də meydanı məğlub tərk edib. Onları bu dəfə məğlub edən “Babək” komandası olub – 61:38. Sədərəklilər kimi, “Şərur” komandası da hər iki görüşdə məğlub olub. Çempionatın ilk oyununda doğma arenada ordubadlı həmkarlarına məğlub olan (23:47) şərurlular ikinci görüşdə də meydanı xalsız tərk ediblər. Onlar bu dəfə səfərdə “Culfa” komandasından zəif olublar – 61:27.
Çempionata itkisiz davam edən digər komanda “Ordubad”dır. İlk görüşdə “Şərur”u məğlub edən ordubadlılar “ev” oyununda da bu üstünlüklərini davam etdiriblər. Onlar doğma arenada “Naxçıvan” Universitetinin komandasına əsl basketbol dərsi keçiblər – 72:35.
Qeyd edək ki, basketbol üzrə kişilər arasında Naxçıvan Muxtar Respublika çempionatının növbəti oyunları bu həftə keçiriləcək.
Ceyhun Məmmədov
