Şərur Rayon Olimpiya-İdman Kompleksində keçirilən futbol üzrə uşaqlar arasında muxtar respublika birinciliyinə yekun vurulub.
Azərbaycan Futbol Federasiyaları Assosiasiyasının (AFFA) təşkil etdiyi və Naxçıvan Muxtar Respublikası Gənclər və İdman Nazirliyi ilə Futbol Federasiyasının dəstək verdiyi birincilikdə muxtar respublikanın şəhər və rayonlarının, ümumilikdə, 56 komandası iştirak edib. 10, 11, 12, 13 və 14 yaşlı uşaqların çempionatı ilə yanaşı, ümumtəhsil məktəblərinin 7 və 9-cu sinif şagirdləri “Məktəbli kuboku”nda mübarizə aparıblar. AFFA-nın təşkil etdiyi birincilik olimpiya sistemi üzrə keçirilib. Final görüşləri isə dünən başa çatıb.
Keçirilən 7 final qarşılaşmasının 6-da Şərur məktəblilərinin çıxışı diqqətdən yayınmayıb. 10 yaşlı uşaqların final qarşılaşmasında ordubadlı və şərurlu futbolçular meydana çıxıblar. Daha baxımlı oyun sərgiləyən ordubadlılar meydanı 6:5 hesablı qələbə ilə tərk ediblər. Bu, Şərur futbolçularının final matçında yeganə məğlubiyyətləri deyil. 13 yaşlı futbolçuların final matçında şahbuzlu həmkarları ilə qarşılaşan şərurlular yenə məğlub olublar – 4:5. 12 yaşlı gələcəyin futbolçuları arasında həlledici qarşılaşma yenə Şərur və Şahbuz komandalarını üz-üzə gətirib. Bu görüşdə üstünlüyü sonadək qoruyan Şərur futbolçuları qalib adını qazanıblar – 5:1. Onlar kimi, 14 yaşlılar da digər iki məğlubiyyəti unutdurmağa müvəffəq olublar. Şərur komandası bu dəfə finalda Naxçıvan şəhərinin komandası ilə qarşılaşıb və meydanda üstün olan tərəf məhz şərurlular olub – 3:1. Turnirin ən gərgin final qarşılaşması isə 11 yaşlı futbolçular arasında olub. Həlledici görüşdə üz-üzə gələn Şərur və Şahbuz futbolçularının səylərinə baxmayaraq, oyunun əsas və əlavə vaxtı heç-heçə (4:4) başa çatıb və qalib penalti zərbələrindən sonra müəyyənləşib. Zərbələri daha dəqiq yerinə yetirən Şahbuz komandası öz yaş qrupunda qalib adını qazanıb – 10:9.
“Məktəbli kuboku”nda isə muxtar respublikanı ölkə birinciliyində təmsil edəcək komandaların adlarına aydınlıq gətirilib. 7-ci sinif şagirdləri arasında keçirilən futbol yarışının finalında Naxçıvan şəhərinin və Şahbuz rayonunun məktəbliləri üz-üzə gəliblər. Rəqibinin daşını daş üstə qoymayan Naxçıvan şəhərinin məktəbliləri asan qələbə qazanıblar – 8:2. 9-cu sinif şagirdlərinin final qarşılaşmasında isə Culfa və Şərur məktəbliləri qalibi müəyyənləşdirməyə çalışıblar. Bu görüş şərurlu futbolçuların qələbəsi ilə nəticələnib – 0:2.
Qeyd edək ki, hər yaş qrupunda qalib olan komandalar, həmçinin “Məktəbli kuboku”nu başı üzərinə qaldıran komandalar Naxçıvan Muxtar Respublikasını göstərilən yaş qrupları üzrə Azərbaycan çempionatında təmsil edəcəklər.
Ceyhun Məmmədov
