Ümummilli lider Heydər Əliyevin anadan olmasının 92-ci ildönümünə həsr olunmuş Culfa rayon ümumtəhsil məktəblərinin I-V, VI-XI sinif şagirdləri (həm oğlan, həm də qızlar) arasında 3 mərhələdən ibarət olan şahmat üzrə birinciliyə start verilib.
Culfa Rayon İcra Hakimiyyətinin tədbirlər planına uyğun olaraq, Təhsil Şöbəsinin, Uşaq-gənclər şahmat idman məktəbinin, Gənclər və İdman İdarəsinin, Naxçıvan Muxtar Respublikası Şahmat Federasiyasının rayon bölməsinin təşkilatçılığı ilə keçirilən şahmat birinciliyinin ilk mərhələsi məktəblərdaxili olub. Bu yarışda 4800 şagird öz intellekt səviyyəsini nümayiş etdirib.
İkinci mərhələ isə zonalar üzrə keçirilib. Rayonun bütün məktəblərinin qatıldığı zona birinciliyi, ilk olaraq, Bənəniyar kənd tam orta məktəbində təşkil olunub. Zona birinciliyində Camaldın, Ərəzin, Qızılca, Əbrəqunus, Bənəniyar, Kırna, Saltaq və Göydərə kənd tam orta məktəblərinin şagirdləri iştirak ediblər.
Yarışdan öncə Culfa Rayon Təhsil Şöbəsinin müdiri Adəm Qasımov, Uşaq-gənclər şahmat idman məktəbinin direktoru Hüseyn Tağıyev, Gənclər və İdman İdarəsinin rəisi Ümid Həsənli çıxış edərək muxtar respublikamızda şahmatın kütləviləşməsi üçün həyata keçirilən tədbirlərdən, şagirdlərin şahmat ustalığının artırılmasında və təcrübələrinin təkmilləşdirilməsində bu yarışların əhəmiyyətindən, bu cür yarışlar nəticəsində şagirdlər arasında dostluq və şahmat-idman əlaqələrinin möhkəmləndirilməsindən danışıblar.
İsveçrə sistemi üzrə keçirilən birincilikdə müxtəlif yaş qrupları üzrə oğlan və qızların hər biri ayrılıqda mübarizə aparıblar. Nəticədə, I-V siniflərin oğlanları arasında Məhəmməd Nəzərli (Qızılca) birinci, Aslan Həmidli (Bənəniyar) ikinci, Uğur İbrahimov (Ərəzin) üçüncü; qızlar arasında isə Duyğu Qafarova (Ərəzin) birinci, Sevinc Novruzlu (Qızılca) ikinci, Nurgül Əhmədova (Camaldın) üçüncü yerlərə sahib olublar.
VI-XI siniflərin oğlan şagirdlərindən Təbriz Həsənli (Əbrəqunus) birinci, Turqut Hacıyev (Bənəniyar) ikinci, Nəriman Muradov üçüncü; qızlardan Gülgəz Məhərrəmli (Camaldın) birinci, Həcər Seyidova (Bənəniyar) ikinci, İnci Nəzərli (Qızılca) üçüncü yerləri qazanıblar.
Qaliblərə təşkilatçılar tərəfindən diplom və hədiyyələr təqdim edilib.
Qeyd edək ki, mükafatçılar rayon birinciliyində iştirak edəcəklər.
Ceyhun Məmmədov
