Muxtar respublikada əhaliyə göstərilən rabitə xidmətinin səviyyəsini yüksəltmək məqsədilə həyata keçirilən tədbirlər bu sahədə yüksək nəticələrə nail olunmasına imkan verib. Həmin tədbirlərdən Ordubad rayonuna da xeyli pay düşüb. Rayon Rabitə İdarəsindən aldığımız məlumata görə, cari ilin ilk 10 ayı ərzində rayonda rabitə xidmətinin səviyyəsini yüksəltmək üçün həyata keçirilən məqsədyönlü tədbirlər davam etdirilib. Qeyd edək ki, 2013-cü ilin ilk 10 ayı ərzində əhaliyə göstərilən informasiya və rabitə xidmətlərinin həcmi 3006,5 min manat olub ki, bu da əvvəlki ilin müvafiq dövrü ilə müqayisədə 4,4 faiz çoxdur. Cari ilin ötən dövrü ərzində 160-a yaxın abunəçiyə telefon xətti çəkilib. İnternet istifadəçilərinin də sayı gündən-günə artmaqdadır.
Ordubad rayonunun Gəmiqaya qolu üstündə yerləşən Bist, Ələhi, Xurs, Nürgüt, Nəsirvaz kənd­lərində kompleks quruculuq tədbirlərinin həyata keçirilməsi ilə əlaqədar bu ünvanlarda yeni xətlər çəkilib, avtomat telefon stansiyası quraşdırılaraq rayonda olan ATS-lərin sayı 25-ə çatdırılıb. Bölgənin digər yaşayış məntəqələrində də ilin ötən dövründə cari və əsaslı təmir işləri aparılıb. Rabitəçilər abunəçilərin qış mövsümündə hansısa problemlərlə üzləşməmələri üçün qışa hazırlıq tədbirlərini başa çatdırıblar.
Müntəzəm olaraq rabitəçilər ATS-lərdə reydlər aparır, texniki göstəricilərin normativlərə uyğun olub-olmadığı yoxlanılır, sıradan çıxmış akkumulyatorlar yeniləri ilə əvəz olunur.

Xəbərlər şöbəsi

Muxtar respublikanın bütün ehtiyatlarından səmərəli istifadə olunmaqla daxili bazarın tənzimlənməsində, tələbatın yerli istehsal hesabına ödənilməsində və idxaldan asılılığın azaldılmasında, xaricə valyuta axınının qarşısının alınmasında, əhali tələbatının daha dolğun ödənilməsində yerli istehsalın əvəzsiz rolunu nəzərə alaraq muxtar respublikada kompleks tədbirlər həyata keçirilmiş, yeni istehsal və xidmət sahələri yaradılmışdır. Belə istehsal sahələrindən biri də 2008-ci ilin dekabr ayından fəaliyyət göstərən “Karbon Qazı Zavodu” Açıq Səhmdar Cəmiyyətidir.
Özəl bölməyə göstərilən dövlət qayğısından bu müəssisə də bəhrələnmiş, 2007-ci ilin mart ayında Sahibkarlığa Kömək Fondundan 680 min manat dövlət maliyyə dəstəyi göstərilmişdir. İkimərtəbəli inzibati və istehsal binalarından ibarət olan müəssisədə əsaslı təmir və yenidənqurma işləri aparılmışdır. Qaz mənbəyindən zavodadək 2650 metr boru xəttində təmir işləri görülmüşdür. Müəssisədə Rusiya və Ukraynadan alınmış müasir texnoloji avadanlıqlar quraşdırılmışdır ki, bu, görülən işin daha keyfiyyətli, sürətli və yüksək  səviyyədə aparılmasına imkan yaratmışdır. İstehsal və köməkçi sahələrin tikintisinə, həyətyanı sahənin abadlaşdırılmasına 775 min 500 manat, avadanlıqların  alınmasına isə 320 min manat, ümumilikdə, 1 milyon 95 min 500 manat vəsait sərf olunmuşdur.

Həyata keçirilən siyasət o zaman uğur gətirir ki, o həm dövlətin milli maraqlarına xidmət edir, həm ölkənin bütün regionlarında sağlam iqtisadi və siyasi mühit yarada bilir, həm də özünün sosial yönümü ilə xalqın bütün nümayəndələrinin mənafeyini ifadə edir. Təbii ki, bu zaman həmin ölkə iqtisadi qüdrəti, siyasi yüksəlişi və sosial ədaləti ilə hər zaman öndə olacaqdır. Çox sevindirici haldır ki, ölkəmiz Heydər Əliyev ideyalarından yetərincə bəhrələnməklə sadalanan hər bir nüansı özünün inkişaf mərhələlərində yaşamış və indi də yaşamaqdadır. Təkcə son 10 il müddətində ölkə iqtisadiyyatı 3,4 dəfə artmışdır. Ölkəmiz üzrə 1,2 milyon yeni iş yeri açılmışdır ki, bunun 900 mini daimidir.

Bütün bu uğurları eynilə Naxçıvan Muxtar Respublikasının da iqtisadi inkişafında görmək mümkündür. Burada yaradılan möhkəm və sağlam iqtisadi mühit hər bir bölgədə özünü əks etdirməklə müdrik siyasətin ən yüksək təntənəsinə çevrilmişdir. 2013-cü ilin yanvar-oktyabr aylarının sosial-iqtisadi inkişafı göstəricilərinə diqqət edəndə görürük ki, muxtar respublikada 1 milyard 768 milyon 736 min 600 manat (2012-ci ilin müvafiq göstəricisindən 8,6 faiz çox) həcmində Ümumi Daxili Məhsul istehsal edilmişdir.

Azərbaycan Respublikasının Prezidenti cənab İlham Əliyevin Azərbaycan Respublikasında telefon rabitəsinin yaradılmasının 125 illiyi ilə əlaqədar imzaladığı 2006-cı il 2 dekabr tarixli Sərəncamına əsasən, hər il dekabrın 6-sı ölkəmizdə “Rabitə və informasiya texnologiyaları sahəsi işçilərinin peşə bayramı günü” kimi qeyd edilir.
Azərbaycanda rabitə sisteminin əsas inkişaf dövrü ötən əsrin 70-80-ci illərinə təsadüf edir. Bu dövrdə respublikaya rəhbərlik edən ümummilli lider Heydər Əliyevin uzaqgörən siyasəti nəticəsində rabitə sistemində də böyük nailiyyətlər əldə olunmuşdur. Ulu öndərin diqqət və qayğısı nəticəsində rabitənin inkişafı üzrə bir sıra qərarlar qəbul edilmiş, Azərbaycan Elmlər Akademiyasında, ali təhsil müəssisələrində elektronika, avtomatika və hesablama texnikası üzrə istedadlı alimlər və təcrübəli mütəxəssislər yetişdirilmiş, elektron avadanlıqlar istehsal edən zavodlar tikilərək istifadəyə verilmiş, elmi-tədqiqat müəssisələri yaradılmışdır.

Əhalinin mənzil-məişət şəraitinin yaxşılaşdırılması istiqamətində həyata keçirilən tədbirlər geniş vüsət alan tikinti-quruculuq işlərinin tərkib hissəsidir. Naxçıvan şəhərinin Atatürk küçəsində inşası davam etdirilən 9 nömrəli yaşayış binasının tikintisi bu tədbirlərin davamıdır. Zirzəmi ilə birlikdə 9 mərtəbədən ibarət olacaq binada tikinti işlərinə bu ilin fevral ayından başlanılıb. İş icraçısı Kamal Cəfərovdan aldığımız məlumata görə, 54 mənzildən ibarət olacaq binada, əsasən, üç və dörd­otaqlı mənzillər yerləşəcək. Hazırda binanın ilk 4 mərtəbəsində arakəsmələr hörülüb, sonuncu mərtəbədə isə qəlib-beton işləri aparılır. “Gəmiqaya” Məhdud Məsuliyyətli Cəmiyyətinin inşaatçıları tərəfindən aparılan tikinti işlərində, əsasən, yerli tikinti materiallarından istifadə olunur. Tikintidə təhlükəsizlik qaydalarına ciddi əməl edilir. İnşaatçılar işin keyfiyyətlə və vaxtında başa çatdırılması üçün əllərindən gələni əsirgəmirlər.

Xəbərlər şöbəsi

Naxçıvan Muxtar Respublikasının sosial-iqtisadi inkişafı özünü bütün sahələrdə göstərməkdədir. Son illər yüzlərlə sosial obyektin tikilib istifadəyə verilməsi, yeni infra­struktur layihələrinin reallaşdırılması bunun əyani sübutudur. Digər sahələrlə yanaşı, muxtar respub­likada hava nəqliyyatı infrastrukturu da daim müasirləşir, dövrün tələblərinə uyğunlaşdırılır.
Bu tədbirlərin davamı olaraq, Naxçıvan Beynəlxalq Hava Limanı üçün yeni inzibati bina inşa edilir. Zirzəmi ilə birlikdə dörd mərtəbədən ibarət olan binada tikinti işlərini “Dizayn” Məhdud Məsuliyyətli Cəmiyyətinin inşaatçıları həyata keçirirlər. Obyektin iş icraçısı Fəxrəddin Əliyarovun bildirdiyinə görə, binada əsas tikinti işləri başa çatdırılıb, dam örtüyü vurulub. Hazırda kommunikasiya xətlərinin çəkilişi, havalandırma sistemlərinin qurulması, fasadın üzlənməsi aparılır, şəbəkəbəndlər quraşdırılır, həyətdə abadlıq işləri görülür.

Qış fəsli yaxınlaşdıqca onun qayğıları da artır. Qışın öz gözəlliyi olsa da, bu fəslin adamı çətin vəziyyətə sala biləcək sürprizləri də az olmur. Ona görə də qışda tam rahat həyatı təmin edə bilmək üçün hazırlıqlara lap erkəndən, hələ yay bitməmişdən başlanılır. Naxçıvan kimi iqlimi kəskin kontinental, yəni yayı isti, qışı da ki sərt soyuq olan bir yerdə qışa hərtərəfli hazırlaşmaq bütün təsərrüfat və rəhbər işçilərin əsas qayğılarından biri olur.

Muxtar respublikada qışa etibarlı hazırlaşmaq, payız-qış mövsümündə əhalinin tələbatlarını tam ödəyə bilmək üçün görülən bütün tədbirlərin məqsədi də bu mühüm mərhələni heç bir çətinlik olmadan başa vura bilməkdir. Qış boyu alıcıları təzə meyvə-tərəvəzlə də təmin edə bilmək üçün mövcud soyuducu anbarların və istixana komplekslərinin gücündən tam istifadə edə bilmək, bazarda bolluq yaratmaq da hazırda diqqət mərkəzində olan məsələlərdəndir.

2013-cü təsərrüfat ilini yüksək göstəricilərlə başa vuran muxtar respublikanın torpaq mülkiyyətçiləri yenə də sahələrdədir. Onlar 2014-cü ilin bol məhsulunun əsasını qoymaq üçün vaxtdan səmərəli istifadə etməyə çalışırlar. Qeyd edək ki, vaxtında keyfiyyətli toxum sortları əldə edilib, ehtiyat hissələri və yanacaq tədarükü qayğısına qalınıb. Naxçıvan Muxtar Respublikası Kənd Təsərrüfatı Nazirliyindən aldığımız məlumata görə, taxıl əkini kampaniyasının vaxtında başa çatdırılması üçün əvvəlcədən həyata keçirilən belə hazırlıq tədbirləri əkin kampaniyasında mütəşəkkilliyin təmin edilməsində mühüm rol oynayır.  
Bunun nəticəsidir ki, 27 noyabr 2013-cü il tarixə 16 min 200 hektar sahədə şum qaldırılması başa çatdırılıb. Həmin sahələrin 14 min hektarına toxum səpilib. Əkilmiş sahələrin 10 min hektarının suvarılması təmin olunub.
Şum qaldırılması, taxıl əkini və əkilmiş sahələrin suvarılması davam etdirilir.

Əli CABBAROV

Sədərək rayonunda həyata keçirilən tikinti-quruculuq tədbirləri dinamik xarakter alıb. Bunun nəticəsidir ki, cari ilin ötən dövrü ərzində rayon mərkəzi Heydərabad qəsəbəsində zirzəmi ilə birlikdə üçmərtəbəli 144 yerlik uşaq bağçasının açılışı olub. İlin quruculuq ərməğanlarından biri də Naxçıvan-Sədərək yüksəktəzyiqli magistral qaz kəmərinin istifadəyə verilməsidir. Həmin xətdən Şərur rayonunda 17 min 772, Kəngərli rayonunda 5355, Sədərək rayonunda isə 2182 abonent olmaqla, 25 mindən artıq abonent istifadə etmək imkanı qazanıb.
Hazırda Sədərək kəndində həyata keçirilən quruculuq tədbirləri sırasında yenidən qurulan 1 nömrəli tam orta məktəbin binası da var. Binanın görkəmi tamamilə yenilənib. Zirzəmi ilə birlikdə 3 mərtəbədən ibarət olan təhsil ocağının binasında tədrisin səviyyəsini yüksəltmək üçün hərtərəfli şərait yaradılır. Bu quruculuq tədbirini “Gəmiqaya” Məhdud Məsuliyyətli Cəmiyyətinin inşaatçıları həyata keçirirlər.

“Yol mədəniyyət, iqtisadiyyat, bir sözlə, həyat deməkdir”, – deyən ümummilli liderimiz Heydər Əliyevin ikinci dəfə siyasi hakimiyyətə qayıdışından sonra yaradılan sabitlik və iqtisadi inkişaf ölkə iqtisadiyyatının tərəqqisində mühüm rol oynayan avtomobil yollarının bərpası və yenidən qurulmasına əlverişli şərait yaratmışdır. Bu istiqamətdə işlər ölkə başçısı cənab İlham Əliyev tərəfindən uğurla davam etdirilməkdədir. “Azərbaycan Respublikasında avtomobil yolları şəbəkəsinin yeniləşməsinə və inkişafına dair (2006-2015-ci illər) Dövlət Proqramı”na uyğun olaraq, ölkəmizdə, o cümlədən muxtar respublikamızda yol-nəqliyyat kompleksinin yeniləşməsi və beynəlxalq standartlara uyğunlaşdırılması istiqamətində kompleks tədbirlər həyata keçirilir.

Muxtar respublikada həyata keçirilən iqtisadi siyasətin əsas məqsədlərindən biri də ərzaq təhlükəsizliyinin təmin edilməsidir. Bunun üçün daxili bazarın tələbatına uyğun yerli məhsul istehsal edən müəssisələrin yaradılması istiqamətində məqsədyönlü tədbirlər həyata keçirilir. Məhz həmin tədbirlərin nəticəsidir ki, bazar iqtisadiyyatının tələblərinə uyğun rəqabətqabiliyyətli müəssisələr yaradılır. Belə müəssisələrdən biri də Naxçıvan şəhərində fəaliyyət göstərən “Gəmiqaya Bərəkət Qida Məhsulları” Məhdud Məsuliyyətli Cəmiyyətidir.

Azərbaycan Respublikasında sənayenin sahə və ərazi strukturunun təkmilləşdirilməsi məsələləri 1941-1945-ci illər müharibəsindən sonrakı illərdə dövlət qarşısında dayanan ən mühüm iqtisadi problem olaraq öz həllini gözləyirdi. Lakin etiraf edilməlidir ki, dahi rəhbər Heydər Əliyevin hakimiyyətə gəldiyi 1969-cu ilə qədər bu sahədə nəinki əsaslı, hətta nəzərəçarpacaq dəyişiklik belə baş verməmişdir.

Müharibəyə qədər və müharibədən sonrakı illərdə də Bakı-Sumqayıt iqtisadi rayonunda neft sənayesinin inkişafına ittifaq dövlətinin mənafeyinə uyğun olaraq xüsusi diqqət yetirilməsi, ayrılan kapital qoyuluşlarının neft sənayesinin və onunla əlaqədar digər sahələrin inkişafına yönəldilməsi respublikanın qalan bütün iqtisadi rayonlarında məhsuldar qüvvələrin inkişafını son dərəcə zəiflətmişdi. Ötən əsrin 70-ci illərində respublika əhalisinin 24 faizini, ərazisinin 8 faizini təşkil edən Bakı-Sumqayıt iqtisadi rayonu 1970-ci ildə ölkədə istehsal edilən ümumi sənaye məhsulunun 70 faizini verirdi. Yerdəqalan 9 iqtisadi rayonun payına sənaye istehsalının 30 faizi düşürdü. Naxçıvan Muxtar Respublikası Azərbaycanda istehsal olunan ümumi sənaye məhsulunun həmin ildə yalnız 1,2 faizini verirdi.

Naxçıvan Muxtar Respublikası Dövlət Statistika Komitəsinin verdiyi məlumata görə, 2013-cü ilin yanvar-oktyabr aylarında Naxçıvan Muxtar Respublikasında 1 milyard 768 milyon 736 min 600 manatlıq Ümumi Daxili Məhsul istehsal olunmuşdur ki, bu da 2012-ci ilin yanvar-oktyabr ayları ilə müqayisədə 8,6 faiz çoxdur. Ümumi Daxili Məhsulun sahə strukturunda ilk yeri sənaye sahəsi tutmaqdadır. Hər bir nəfərə düşən Ümumi Daxili Məhsulun həcmi 2012-ci ilin yanvar-oktyabr ayları ilə müqayisədə 7,4 faiz artaraq 4104,7 manata (5231,6 ABŞ dollarına) çatmışdır.

*   *   *

2013-cü ilin yanvar-oktyabr aylarında Naxçıvan Muxtar Respublikasında 725 milyon 161 min 800 manatlıq sənaye məhsulu istehsal edilmişdir ki, bu da 2012-ci ilin müvafiq dövründəki göstəricini 6,8 faiz üstələmişdir.

Muxtar respublikanın sosial-iqtisadi inkişafının sürətləndirilməsi avtomobil yolları şəbəkəsinin və yol infrastrukturunun bərpasına və yenidən qurulmasına təkan verib.
Ötən illərdə olduğu kimi, cari ildə də magistral, şəhərdaxili və kənd yollarının müasir səviyyədə qurulması, yeni yol infrastrukturunun yaradılması istiqamətində ardıcıl tədbirlər görülüb.

Dünən Naxçıvan Biznes Mərkəzində Naxçıvan Muxtar Respublikası Sahibkarlar Konfederasiyası tərəfindən muxtar respublikada Quşçuluq Birliyinin yaradılması ilə əlaqədar tədbir keçirilib. Tədbirdə muxtar respublikada fəaliyyət göstərən quşçuluq təsərrüfatlarının rəhbərləri iştirak ediblər.
Tədbiri konfederasiyanın sədri Abbas Babayev açaraq yeni yaradılan Naxçıvan Muxtar Respublikası Quşçuluq Birliyi haqqında məlumat verib. Qeyd olunub ki, birlik muxtar respublikada quşçuluq təsərrüfatının ictimai birliyi olub, mülkiyyət və təşkilati-hüquqi formasından asılı olmayaraq, quşçuluq təsərrüfatı ilə məşğul olan hüquqi və fiziki şəxslərin könüllülük əsasında fəaliyyətini əlaqələndirən, onların hüquqi və iqtisadi mənafelərini müdafiə edən, ictimai-faydalı məqsədlər daşıyan, öz fəaliyyətinin əsas məqsədi kimi gəlir əldə etməyi nəzərdə tutmayan qeyri-kommersiya, qeyri-hökumət təşkilatıdır. Birlik öz fəaliyyətində Azərbaycan Respublikasının və Naxçıvan Muxtar Respublikasının konstitusiyalarını, “Qeyri-hökumət təşkilatları (ictimai birliklər və fondlar) haqqında” Azərbaycan Respublikasının Qanununu, Azərbaycan Respublikasının və Naxçıvan Muxtar Respublikasının qüvvədə olan digər normativ-hüquqi aktlarını və özünün Nizamnaməsini rəhbər tutur.

Ölkəmizdə sosial-iqtisadi inkişafın sürətləndirilməsi və əhalinin maddi rifahının daha da yaxşılaşdırılması məqsədilə sənaye məhsulları istehsalı sektoruna xüsusi önəm verilir. Muхtаr rеspublikаmızdа da bаzаr iqtisаdiyyаtının tələblərinə uyğun sаhibkаrlıq mühiti fоrmаlаşdırılır, sаhibkаrlıq fəаliyyətinin stimullаşdırılmаsı və gеnişləndirilməsi məqsədilə dövlət mаliyyə dəstəyi göstərilir. Bunun nəticəsidir ki, özəl sеktоrun Ümumi Dахili Məhsuldаkı pаyı ilbəil artır.
Özəl bölməyə, sahibkarlıq fəaliyyətinə yaradılan şəraitdən bəhrələnərək əhalinin yerli məhsullardan istifadə imkanlarını artıran müəssisələrdən biri də Nахçıvаn şəhərində fəаliyyət göstərən “Gəmiqaya Qida Məhsulları Sənaye Kompleksi” Məhdud Məsuliyyətli Cəmiyyətidir. Cəmiyyətin direktoru Həsən Məmmədov bildirdi ki, sənaye şəhərciyində inzibati bina, istehsal sexləri, yeməkxana, satış şöbəsi üçün bina, xammal və hazır məhsulun saxlanılması məqsədilə anbar tikilib istifadəyə verilmişdir.

“Son illər həyata keçirilmiş qanunverici-institusional islahatların tərkib hissəsi kimi vergi orqanlarının işinin çevik və işlək mexanizmlər əsasında qurulması ölkəmizdə liberal biznes mühitinin təkmilləşməsinə, habelə vergi daxilolmalarının artım dinamikasına müsbət təsirini göstərməkdədir”. Bu fikirlər Culfa rayonunda fəaliyyət göstərən sahibkarlarla keçirilən görüşdə səsləndirilib.

Culfa Rayon Vergilər Şöbəsinin rəisi Nəcəf Allahverdiyev çıxışında vergilərin düzgün hesablanması, tam və vaxtında ödənilməsinə nəzarətin təmin edilməsi sahəsində kameral vergi yoxlamalarının əhəmiyyətini qeyd edib. Son illər ərzində kameral vergi yoxlamalarının keyfiyyətinin artdığını qeyd edən şöbə rəisi bildirib ki, aparılan təkmilləşdirmə işləri sistem tərəfindən aşkarlanmayan kənarlaşmaların müəyyənləşdirilməsinə və vergitutma bazasının genişləndirilməsinə şərait yaradır. 

Şahbuz rayonu muxtar respublikamızın qədim yurd yerlərindən biridir. 836,6 kvadratkilometr ərazini əhatə edən bölgənin əhalisi 24 mindən çoxdur. Rayonda 1 şəhər, 1 qəsəbə, 22 kənd  vardır.
Kiçik Qafqazın Dərələyəz silsiləsinin cənubuna, Zəngəzur silsiləsinin qərb yamaclarına sığınan Şahbuz rayonu təbii gözəlliklər diyarı, yurdumuzun dilbər guşələrindən biridir. Rayon ərazisindəki təbiət abidələri bu qədim yurd yerinə bir məğrurluq və əzəmət bəxş edib. Şəninə nəğmələr qoşulan Salvartı dağı, Şapur qalası, Üçqardaş, Qonaqgörməz, Ağdaban dağları min illərdir, bu diyarı dövrəsinə alıb. Batabat yaylağındakı “Üzən ada” təbiətin ən böyük möcüzələrindən biridir. Sovet dönəmində “Üzən ada”nı ləğv etmək üçün buraya texnikalar gətirilsə də, rayonun yurd təəssüblü insanları bu təbiət möcüzəsini qoruyub saxlaya biliblər.

Muxtar respublikamızın davamlı sosial-iqtisadi inkişafı paytaxt Naxçıvan şəhəri də daxil olmaqla bütün bölgələrin simasını dəyişib. Regionun quruculuq salnaməsinin səhifələrində on yaşına doğru addımlayan Kəngərli rayonunun da öz yeri var. Bir zamanlar çöllük ərazilərdən ibarət olan indiki rayon mərkəzi çox qısa zamanda müasir mərkəzə çevrilib.

Naxçıvan-Sədərək magistral yolunun üzərində yerləşən rayon mərkəzində bir-birindən gözəl inzibati binalar, rahat yollar, mədəniyyət və istirahət parkı, mədəniyyət evi və digər ünvanlar bu əraziyə möhtəşəm bir gözəllik bəxş edir. Son illərdə rayon mərkəzi olan Qıvraq qəsəbəsində müxtəlif infrastruktur layihələrin həyata keçirilməsi, rayondaxili və kəndarası avtomobil yollarının yenidən qurulması, yaşıllıq zolaqlarının yaradılması Kəngərli rayonunda həyata keçirilən mühüm tədbirlərdəndir. Qeyd edək ki, muxtar respublikanın digər bölgələrində olduğu kimi, Kəngərli rayonunda da görülən işlər kompleks xarakter daşıyır. Rayonun əksər kəndlərində kompleks quruculuq işləri aparılıb.

Şahbuz Rayon İcra Hakimiyyətindən aldığımız məlumata görə, rayon ərazisinin 2765 hektar sahəsi əkin altındadır. Dağlıq zona olmasına baxmayaraq, burada taxılçılığa maraq ildən-ilə artır. Başa vurduğumuz təsərrüfat ilində Şahbuzun torpaq mülkiyyətçiləri 1009 hektarı buğda, 319 hektarı arpa olmaqla, 1328 hektar sahədən 3703 ton taxıl tədarük ediblər. Hektarın orta məhsuldarlığı 27,9 sentnerə çatdırılıb ki, bu da dağlıq zona üçün yüksək nəticə hesab oluna bilər. Rayonun Türkeş, Badamlı, Nursu, Mahmudoba, Sələsüz kəndlərində məhsuldarlıq daha yüksək olub.

Kənd yaşayış məntəqələrinin böyük əksəriyyəti dağlıq zonada yerləşən Ordubad rayonuna da son illər muxtar respublikada həyata keçirilən quruculuq tədbirlərindən xeyli pay düşmüş, belə tədbirlər hesabına bölgənin siması əsaslı surətdə dəyişilmişdir. Sevindirici haldır ki, inşaat işləri ucqar dağ kəndlərini də əhatə edir. Cari ildə də belə tədbirlər davam etdirilir. Bir neçə gün əvvəl rayonun Ələhi, Xurs və Nürgüt kəndlərində yeni sosial obyektlərin açılışı olmuşdur. Hazırda Bist kəndində yeni obyektlər təhvilə hazırlanır.
Naxçıvan Muxtar Respublikası Dövlət Şəhərsalma və Arxitektura Komitəsinin Ordubad Rayon İdarəsinin inşaatçıları bir neçə aydır ki,  Bist kəndində quruculuq tədbirləri həyata keçirirlər. Yeni obyektlərdən biri xidmət mərkəzidir. Burada gözəllik salonu, bərbərxana, ət satışı yeri və mağaza fəaliyyət göstərəcək. İnşaatçılar həyata keçirdikləri quruculuq tədbirində keyfiyyət amilinə ciddi diqqət yetirirlər. Onlara yaradılan şərait isə imkan verib ki, yeni obyekt vaxtında kənd camaatının istifadəsinə verilsin. Digər bir yeni tikilidə həkim ambulatoriyası fəaliyyət göstərəcək. Ambulatoriya binasında kənd sakinlərinə tibbi xidmət göstərmək üçün hərtərəfli şərait yaradılacaq.  
Hər iki obyektdə son tamamlama işləri həyata keçirilir.

Xəbərlər şöbəsi

Naxçıvan Muxtar Respublikası iqtisadiyyatın inkişafına görə yeni keyfiyyət mərhələsindədir. Yeni mərhələnin əsas hədəfi iqtisadiyyatın rəqabət qabiliyyətinin yüksəldilməsinə nail olmaqla muxtar respublikanın dinamik sosial-iqtisadi inkişafının davamlılığını təmin etməkdən ibarətdir. Bu hədəfin reallaşması istiqamətində icrası vacib vəzifələr müəyyənləşdirilmişdir. Artıq regionda hədəflənən məqsədlərə nail olunmaqdadır.

Hazırda muxtar respublikamızın maliyyə bazarında nağdsız ödəniş sisteminin yüksək səviyyədə inkişaf etdiyini söyləmək çətindir. Buna səbəb hələ də sahibkarlıqla məşğul olan ortasəviyyəli bir çox hüquqi və fiziki şəxslərin pul vəsaitlərinin daha tez əldə edilməsi məqsədilə nağd şəkildə əməliyyatlara üstünlük vermələri və alıcıların çox cüzi bir hissəsinin nağdsız ödənişlərə maraq göstərmələridir. Lakin nəzərə almaq lazımdır ki, nağdsız ödənişlər xüsusilə böyükhəcmli məbləğlərə üçüncü şəxslərin müdaxiləsi imkanlarını, saxta pul əskinaslarından istifadə hallarını aradan qaldırır.
Vətəndaşların isə nağdsız ödənişlərə az maraq göstərmələrinin səbəbi bu sistemin imkanları haqqında az məlumata malik olmaları, həmçinin sistemin hələ ki maliyyə bazarını tam əhatə etməməsidir. Digər tərəfdən, hər hansı ticarət obyektindən alış-veriş edən şəxsin ödənişi kart vasitəsilə nağdsız şəkildə həyata keçirməsinə əsas yaradan amillər kifayət qədər mövcud deyil. Yəni alıcını indiyə qədər adət etdiyi nağd ödəniş sistemindən imtina edərək ödəniş kartı əldə etməyə, ondan istifadə qaydalarını öyrənməyə, istifadə etməyə maraqlandıran stimullaşdırıcı səbəblər olmalıdır.

Strateji məhsul sayılan taxıla olan tələbatın daxili imkanlar hesabına ödənilməsi üçün muxtar respublikamızda həyata keçirilən tədbirlər cari ildə də davam etdirilir. Naxçıvan Muxtar Respublikası Kənd Təsərrüfatı Nazirliyindən aldığımız operativ məlumata görə, taxıl əkini kampaniyasının mütəşəkkil şəkildə başa çatdırılması üçün əvvəlcədən həyata keçirilən hazırlıq tədbirləri özünü göstərir. Taxılçılıqla məşğul olan torpaq mülkiyyətçiləri, fermerlər 2014-cü ilin bol məhsulunun əsasını qoymaq üçün vaxtdan səmərəli istifadə etməyə çalışırlar. Qeyd edək ki, vaxtında keyfiyyətli toxum sortları əldə edilmiş, ehtiyat hissələri və yanacaq tədarükü qayğısına qalınmışdır.
Həyata keçirilən tədbirlərin nəti­cəsidir ki, 13 noyabr 2013-cü il tarixə 15 min 200 hektar sahədə şum qaldırılması başa çatdırılmışdır. Həmin sahələrin 11 min hektarına toxum səpilmişdir. Əkilmiş sahələrin 7500 hektarında suvarma başa çatdırılmışdır.
Şum qaldırılması, taxıl əkini və əkilmiş sahələrin suvarılması davam etdirilir.

Xəbərlər şöbəsi

Qədim Naxçıvan diyarının hansı səmtinə üz tutsan, orada Heydər Əliyev ideyalarına sadiqliyin və bu sadiqliyin nəticəsi olan müasirliyin şahidi olursan. Dahi şəxsiyyətin xeyir-duası ilə 1978-ci ildə yaradılan Babək rayonu da bu müasirliyin bütün çalarlarını özündə əks etdirən yurd yerlərindən biridir. Rayon mərkəzi Babək qəsəbəsinin yerləşdiyi ərazi sovet dövründə Nehrəm kəndinin torpaq sahələri olub. Araz çayı üzərində su elektrik stansiyası tikilərkən su altında qalan Təzəkənd yaşayış məntəqəsinin sakinləri bu əraziyə köçürülüb. Rayon yaradılarkən həmin kəndə qəsəbə statusu verilərək xalq qəhrəmanı Babəkin adı əbədiləşdirilib. Rayona və rayon mərkəzinə “Babək” adının verilməsi o zaman mərkəzi hakimiyyətin iradəsinin əksinə olsa da, bu, ulu öndərin qətiyyəti sayəsində reallaşdırılıb.

Muxtar respublikada həyata keçirilən iqtisadi inkişaf modelinin strateji istiqamətlərindən biri mövcud təbii-iqtisadi, texniki-istehsal və elmi-texniki potensialın fəal surətdə təsərrüfat dövriyyəsinə cəlb olunmasıdır. Bu da, öz növbəsində, regionların sosial-iqtisadi inkişafı, əhalinin ərzaq məhsulları ilə etibarlı təminatı, meyvəçiliyin və tərəvəzçiliyin inkişafı və bir sıra konkret sahələr üzrə mühüm dövlət proqramlarının qəbul edilməsini şərtləndirir. Ötən illər ərzində Naxçıvan Muxtar Respublikası Ali Məclisi Sədrinin sərəncamları ilə muxtar respublikanın gələcək inkişafında təməl rolunu oynayan dövlət proqramları təsdiq edilib. Bu proqramların icrasının uğurla və yüksək keyfiyyətlə həyata keçirildiyi bölgələrimizdən biri də Babək rayonudur. Bunu 2013-cü ilin ötən dövrünün sosial-iqtisadi göstəriciləri də təsdiqləyir.  

Naxçıvanın malik olduğu potensialdan tam və səmərəli istifadə olunması, infrastrukturun yenilənməsi, çoxlu sayda yeni iş yerlərinin açılmasına şərait yaradılması, sahibkarlığın inkişaf etdirilməsi, sosial xidmətlərin həcminin, keyfiyyətinin və ünvanlılığının əhəmiyyətli dərəcədə artırılması, yoxsulluğun azaldılması muxtar respublikada prioritet sahələrdir.

Azərbaycan Respublikasının Prezidenti cənab İlham Əliyevin “Keçmiş SSRİ Əmanət Bankının Azərbaycan Respublikası Bankının Azərbaycan Respublikasının vətəndaşları olan əmanətçilərinə fərdi birdəfəlik ödə­mələrin verilməsi haqqında” 2012-ci il 14 mart tarixli Fərmanı ilə ötən ilin ikinci yarısından başlayaraq keçmiş SSRİ dövründə məlum proseslər nəticəsində batmış əmanətlər geri qaytarılır. Özünə aid olmayan əmanətləri mənafeləri pozulmuş əmanətçilərə və ya onların varislərinə qaytarmaqla dövlətimiz bir daha vətəndaşlarına qayğısını nümayiş etdirmişdir. Azərbaycanda həmin əmanətlərin qaytarılmasında əmanətçilərin xeyrinə tətbiq olunan qiymətləndirmə indiyə qədər MDB məkanında tətbiq olunmuş ən yüksək qiymətləndirmədir. Əhalinin bütün təbəqələrinin maraqları nəzərə alınmaqla əmanətlərin geri qaytarılması zamanı yarana biləcək hüquqi və texniki məsələlərin həll olunması üçün verilən imkanlar və kifayət qədər vaxt da dövlətin bu məsələnin həllində nə qədər maraqlı olduğunu göstərir.
Mərkəzi Bankın Naxçıvan Muxtar Respublikası İdarəsindən aldığımız məlumata görə, muxtar respublikada fəaliyyət göstərən Kapital Bankın Baş İdarəsi və onun rayon filialları tərəfin­dən əmanətlərin qaytarılması üçün lazımi şərait yaradılmışdır. 2012-ci il iyun ayının 1-dən başlayaraq 2013-cü il noyabr ayının 7-dək olan məlumata görə, 37 min 531 əmanətçiyə 13 milyon 993 min 254 manat nağd pul vəsaiti ödənilmişdir.
Qeyd edək ki, əmanətlərin qaytarılması 2013-cü il dekabr ayının 31-dək davam etdiriləcəkdir.  

Xəbərlər şöbəsi

Noyabrın 4-də Gəncə şəhərində Azərbaycan Respublikası İqtisadiyyat və Sənaye Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Azərbaycan-Türkiyə Biznes Forumu keçirilmişdir.
Azərbaycan və Türkiyə tərəfdən müvafiq dövlət qurumlarının nümayəndələri ilə yanaşı, yerli icra hakimiyyəti orqanları əməkdaşlarının və iqtisadiyyatın müxtəlif sahələrində fəaliyyət göstərən sahibkar­ların iştirak etdiyi forumda Azərbaycanda bir çox sahələrdə Türkiyə şirkətlərinin, eləcə də Türkiyədə Azərbaycan şirkətlərinin uğurlu fəaliyyətindən bəhs edilmişdir. Qeyd olunmuşdur ki, Azərbaycanın xarici ölkələrə yatırdığı investisiyaların həcminə görə Türkiyə birinci yerdə durur. Türkiyədən Azərbaycana da son on ildə böyük həcmdə investisiya yönəldilmişdir.

Naxçıvan Muxtar Respublikasında əhaliyə yüksəkkeyfiyyətli məhsullar təklif olunmaqla nümunəvi xidmət etmək imkanlarına malik müasir ticarət mərkəzləri tikilib istifadəyə verilir. Belə müəssisələrdən biri də “Cahan” Məhdud Məsuliyyətli Cəmiyyətinin Naxçıvan şəhərindəki Ə.Əliyev küçəsində fəaliyyət göstərən “Cahan” Ticarət Mərkəzidir.
“Cahan” Ticarət Mərkəzi fəaliyyətə başladığı dövrdən ötən müddət ərzində ticarət mərkəzinə istər alıcı, istərsə də satıcı qismində müraciət edənlərin sayı qat-qat artmış, kompleksin yenidən qurulması və yeni korpusun inşa olunması zərurəti yaranmışdır. Digər sahibkarlıq subyektləri kimi, “Cahan” Məhdud Məsuliyyətli Cəmiyyəti də göstərilən dövlət qayğısından bəhrələnmiş, təqdim olunmuş layihəyə uyğun Sahibkarlığa Kömək Fondundan dövlət maliyyə dəstəyi göstərilmişdir. Cari ilin aprel ayından kompleksin ərazisində  8750 kvadratmetr torpaq sahəsi ayrılmış, 350 mağazanın və digər xidmət sahələrinin fəaliyyət göstərəcəyi ikimərtəbəli yeni korpusun inşasına, cari ilin iyun ayından isə “Cahan” Ticarət Mərkəzinin əsas binasında yenidənqurma işlərinə başlanılmışdır.

2001-ci ildə Naxçıvan şəhərinin inzibati ərazi bölgüsündə dəyişik­lik edildi. O zaman bir hissəsi Babək rayonuna, bir hissəsi Naxçıvan şəhərinə tabe olan indiki Əliabad qəsəbəsi yaradıldı və Naxçıvan şəhərinin inzibati ərazi bölgüsünə daxil olundu.
2009-cu ildə qəsəbədə uşaq musiqi məktəbi, uşaq bağçası, qəsəbə mərkəzi inşa olunaraq istifadəyə verildi. Açılış mərasimində çıxış edən Naxçıvan Muxtar Respublikası Ali Məclisinin Sədri cənab Vasif Talıbov bir məqama diqqət çəkərək qeyd etmişdi ki, “Əliabad qəsəbəsinin yaradılması vacib məsələ idi. 2001-ci ilə kimi qəsəbənin bir hissəsi şəhərə, kənd hissəsi isə Babək rayonuna tabe olduğundan idarəetmə çətin idi. Ərazidə kommunal xidmətlərin həyata keçirilməsi də problemlər yaradırdı. Ərazinin qazla, elektriklə, telefonla, digər xidmətlərlə təminatında da çətinliklər var idi. 2001-ci ildə Naxçıvan Muxtar Respublikası Ali Məclisinin qanunvericilik təşəbbüsü qaydasında Azərbaycan Respublikası Milli Məclisi qarşısında qaldırdığı məsələyə əsasən, Əliabad kəndi ilə Naxçıvan şəhərinə tabe olan mənzil istismar sahəsi birləşdirilərək Əliabad qəsəbəsi yaradıldı”.  

Yeraltı və yerüstü sərvətlərlə zəngin muxtar respublikamızın təbii resurslarından səmərəli istifadə məqsədilə daha bir nəhəng layihə reallaşdırılmış, 2012-ci ildə “Gəmiqaya Holdinq” Şirkətlər İttifaqının Naxçıvan Sement Zavodunun tikintisi uğurla başa çatdırılmışdır.
Əvvəlcə muxtar respublika ərazisində “Gəmiqaya Holdinq” Şirkətlər İttifaqının mütəxəssisləri tərəfindən sement istehsalı üçün xammal mənbələrinin müəyyən olunması məqsədilə geoloji axtarışlar aparılmışdır. Yataqlarda lazımi xammal aşkar olunduqdan sonra onun tərkibi Türkiyənin Sement İstehsalçıları Birliyi tərəfindən və Çin Xalq Respublikasının bu sahə üzrə ixtisaslaşmış laboratoriyalarında yoxlamadan keçirilmişdir. Laboratoriyalardan müsbət rəylər alındıqdan sonra Kəngərli rayonunda 150,6 hektarlıq ərazidə yeni Sement Zavodunun tikintisinə başlanılmışdır. Öz əhəmiyyətinə və çəkilən xərclərin miqyasına görə son 20 ilin ən böyük layihələrindən olan zavodun inşası “Gəmiqaya Holdinq” Şirkətlər İttifaqının təcrübəli mütəxəssisləri və inşaatçıları tərəfindən həyata keçirilmişdir. Burada istehsal sahələri, xammal və hazır məhsulların saxlanılması üçün anbar, inzibati və iaşə xidməti binaları tikilmiş, Naxçıvan-Sədərək magistralından zavodadək 2 kilometr məsafədə yeni avtomobil yolu çəkilib asfalt-beton örtük salınmış, yüksəkkeyfiyyətli məhsul istehsalı ilə yanaşı, hazır məhsulun daşınmasına da hərtərəfli şərait yaradılmışdır.

Gözəlliyin onundan doqquzunun dondan ibarət olduğunu bu gün kiməsə sübut etməyə ehtiyac yoxdur. Əsas olan odur ki, gözəl geyim insanı daha yaxşı, daha yaraşıqlı göstərir və onu digərlərindən fərqləndirir. Hətta bir az dərinə varsaq, onun nüfuzuna da müsbət təsir göstərir.

Şəhərlər, rayonlar, kəndlər də insanlar kimidir. Bir bölgənin gözəlliyi onun rahat yolları, abad və işıqlı küçələri, gözoxşayan tikililəri, bir sözlə, insanoğlunun yaratdıqları ilə ölçülür. Görülən və görüləcək işlərin kompleks şəkildə aparılması, kəndlə şəhər arasındakı fərqin azaldılması isə bu gözəlliyin “paylanılması” baxımından ədaləti ortaya qoyur. Çünki gözəllik bütöv olanda göz oxşayır... Bu yaxınlarda xalqımız bu gözəlliklərin, inkişafın yaradılması, qorunması və davam etdirilməsi üçün böyük öndərimizin ümummilli ideyalarına sadiqliyini bir daha sübut etdi. Heydər Əliyev siyasətini dəstəklədi, növbəti prezident seçkilərində də bu siyasətə səs verdi.

Şahbuz rayonunun quruculuq xəritəsi hərtərəfli dövlət qayğısı hesabına ildən-ilə genişlənir. Öncə onu qeyd edək ki, cari ilin ötən dövrü ərzində rayonun Kükü və Ağbulaq kəndlərində yeni sosial obyektlər istifadəyə verilib.
Quruculuq tədbirləri hazırda sürətlə davam etdirilir. Rayon mərkəzinin ən gözəl ünvanlarından biri olan Heydər Əliyev prospektində Yeni Azərbaycan Partiyası Şahbuz Rayon Təşkilatı üçün zirzəmi ilə birlikdə 3 mərtəbədən ibarət bina inşa olunur. Tikinti işləri Naxçıvan Muxtar Respublikası Dövlət Şəhərsalma və Arxitektura Komitəsinin Naxçıvan Şəhər İdarəsinə həvalə edilib. İnşaatçılara hərtərəfli iş şəraiti yaradılıb. Bu şəraitdən səmərəli istifadə olunmasının nəticəsidir ki, obyektdə tikinti işləri əsasən başa çatdırılıb.

Regionların sosial-iqtisadi inkişafına dair ikinci dövlət proqramının icrasının dördüncü ilinin yekunlarına həsr olunmuş konfransdakı çıxışında “bu, çox böyük sosialyönümlü, böyük vəsait tələb edən layihədir” deyən Prezident İlham Əliyev bildirmişdir ki, ölkəmiz üçün bunun əhəmiyyəti çox böyükdür. Çünki bütün dövrlərdə Azərbaycanda, Bakıda və digər bölgələrdə içməli su problemi çox kəskin dayanmışdır. Bölgələrdə, ümumiyyətlə, kanalizasiya xətləri yox idi. Bakının da kanalizasiya sistemi köhnəlmişdir. Bu sahədə böyük quruculuq işləri aparılır və biz yenə də maksimum səviyyədə hədəf seçmişik ki, bu sahədə infrastruktur tamamilə yeniləşsin. İndi həm Bakıda, həm də bütün bölgələrdə içməli su və kanalizasiya layihələri icra edilir... Bütün müvafiq qurumlar öz vəzifə borclarını yerinə yetirirlər. Bu layihələr keyfiyyətlə və vaxtında yerinə yetirilməlidir.
Sədərək rayonunda həyata keçirilən yenidənqurma, abadlıq-quruculuq işləri sırasında içməli su və kanalizasiya sistemlərinin yeniləşdirilməsi layihəsinin icrası da uğurla davam etdirilir.
Bu günlərdə tikinti işlərinin gedişi ilə maraqlandıq. Tikintinin baş mühəndisi Mehmet Firat görülən işlər barədə məlumat verdi. Öyrəndik ki, rayon ərazisində hər birinin tutumu 12 min 500 kubmetr olan 2 su anbarı tikiləcək. Anbarlara 10 min kubmetr su yığılacaq. “Aşağı mənbə” və “yuxarıda supaylayıcı” adlanan həmin anbarların birində artıq təməl işləri, sütunların, beton divarların qaldırılması başa çatdırılmış, digərində isə dəmir-beton işləri və sütunların qaldırılmasına başlanılmışdır.

Bazarda bolluq yaradıb yaxşı qazanc da əldə etməyin ən yaxşı yolu yeni istehsal sahəsi qurmaqla istehlakçılara yeni məhsul təklif etməkdir. İstehsal o zaman daha çox sərfəli hesab edilir ki, ticarətdən fərqli olaraq, burada torpaqdan, əmək və kapital ehtiyatlarından daha səmərəli istifadə olunsun, nəticədə, daha yaxşı gəlir əldə edilsin. Hər yeni yaradılan istehsal sahələrində yeni iş yerlərinin açılması, burada yeni texnologiyaların tətbiqi və innovasiyalara geniş imkanlar yaranması sahələrarası əlaqələrin dərinləşməsi ilə nəticələnir ki, bu da son illərdə regionumuzda həyata keçirilən iqtisadi inkişaf siyasətinin əsas istiqamətlərindəndir.
Son illərdə Naxçıvan Muxtar Respublikasında yaradılmış istehsal müəssisələri arasında “Araz-3” Məhdud Məsuliyyətli Cəmiyyəti də vardır. Çoxprofilli müəssisə kimi fəaliyyət göstərən bu cəmiyyətin yaradılmasında məqsəd, ilk olaraq, ərzaq məhsullarının istehsalının təşkil olunmasıdır. Belə ki, 2011-ci ildə Naxçıvan şəhərində istifadəyə verilmiş bu müəssisədə alma sirkəsi, kartof cipsi, unlu-qənnadı məmulatları istehsalı sahələri yaradılmışdır.

Naxçıvan Avtomobil Zavodunun tikintisinə 2008-ci ilin avqust ayında başlanılıb. İstehsal sahəsi, satış salonu, anbar və inzibati binadan ibarət olan zavodun 2472 kvadratmetrlik ərazisində Almani­ya, İtaliya və Belçikadan gətirilmiş müasir texnoloji avadanlıqlar quraşdırılıb.
2010-cu il yanvarın 11-də istifadəyə verilən Naxçıvan Avtomobil Zavodunun açılış mərasimində iştirak edən Naxçıvan Muxtar Respublikası Ali Məclisinin Sədri belə tədbirləri ölkəmizdə ulu öndərimizlə başlanan işlərin davamı kimi dəyərləndirərək demişdir: “Əgər Sovet hakimiyyəti illərində ulu öndərimiz Gəncə Avtomobil Zavodunun qurulması işinə başlamasaydı, müstəqillik illərində isə cənab Prezident həmin zavodun fəaliyyətinin təmin olunmasına şərait yaratmasaydı, indi Naxçıvan Avtomobil Zavodunun qurulması da sual altında ola bilərdi”.
Naxçıvan Avtomobil Zavodunda tikilib istifadəyə verilən ikimərtəbəli binanın birinci mərtəbəsində Satış şöbəsi və sərgi-satış salonu, ikinci mərtəbədə isə Marketinq şöbəsi və inzibati heyət üçün ayrı-ayrı otaqlar yerləşir. Marketinq şöbəsi daxili bazarın tələbatını öyrənməklə yanaşı, xarici əlaqələrin yaradılması və ehtiyat hissələrinin alınıb gətirilməsi vəzifələrini icra edir. Müəssisədə yığım sexi, anbar, yük boşaldılması üçün platforma, sınaq yolu və sınaq avadanlıqları quraşdırılıb.

“Son illər həyata keçirilmiş islahatların tərkib hissəsi kimi vergi orqanlarının işinin çevik və işlək mexanizmlər əsasında qurulması ölkəmizdə liberal biznes mühitinin təkmilləşməsinə, habelə vergi daxilolmalarının artım dinamikasına müsbət təsirini göstərir”. Bu fikirlər Babək Rayon Vergilər Şöbəsində keçirilən sahibkarlarla görüşdə səsləndirilib.
Tədbirdə vergi ödəyiciləri ilə bağlanması nəzərdə tutulan vergi partnyorluğu sazişləri barədə danışan şöbənin rəisi Səftər Əliyarov qeyd edib ki, “Vergi part­nyorluğu sazişi” vergi orqanı ilə vergi ödəyicisi arasında vergi risklərinin minimallaşdırılması məqsədilə könüllü şəkildə bağlanmış niyyət razılaşmasıdır. Bu sənəd vergilərin ödənilməsi ilə bağlı könüllü əməletmə səviyyəsinin artırılması istiqamətində partnyorluq etmək, çevik və səmərəli vergi nəzarəti yaratmaq, sahibkarlığa lüzumsuz müdaxilələrin qarşısını almaqla onun inkişafını stimullaşdırmaq, əməkdaşlığa və şəffaf münasibətlərə əsaslanan birgə fəaliyyəti təmin etmək kimi mühüm məqsədləri müəyyən edir.
Qaydalara əsasən, sazişin bağlanılması məqsədilə vergi ödəyicilərinin seçimi zamanı ilkin olaraq sertifikatlaşdırılmış pro­qram təminatı ilə mühasibat uçotu aparan vergi ödəyicilərinə, ƏDV ödəyicilərinə, maliyyə xidmətlərini həyata keçirən kredit və sığorta təşkilatlarına, vergi ili ərzində yaranmış vergi öhdəliklərini tam və vaxtında icra edən, habelə alğı-satqı əməliyyatlarını nağdsız qaydada həyata keçirən vergi ödəyicilərinə üstünlük veriləcək.
Sonra şöbənin əməkdaşlarından  Ataxan Nuriyevin, Habil Fərhadovun, Gülşən Eyvazovanın və başqalarının çıxışları olub.

Xəbərlər şöbəsi

Sərhəd bölgəsi Sədərək rayonunda payızlıq taxıl əkini davam edir. Rayon İcra Hakimiyyəti başçısının aqrar məsələlər üzrə müavini Bəxtiyar Mahmud­ovun sözlərinə görə, bu il rayonda 2128 hektarın taxılı biçilmiş, 6142 ton məhsul istehsal edilmiş, məhsuldarlıq 28,9 sentnerə çatdırılmışdır. Növbəti uğurdan ruhlanan taxılçılar gələn ilin bol məhsulunun əsasını qoymaqdadırlar. Məlumat üçün bildirək ki, əkinəyararlı 3250 hektar torpaq sahəsi olan rayonda hələlik 450 hektar sahə şumlanmış, 330 hektardan çox sahədə isə buğda əkilmişdir. Əkilən sahələrin 280 hektarı suvarılmışdır.

Aqrar sahə muxtar respublika  iqtisadiyyatının əsasını təşkil edir

Azərbaycan Respublikasının Prezidenti cənab İlham Əliyevin 2008-ci il 9 oktyabr tarixli Fərmanı ilə hər il noyabrın 1-i ölkəmizdə “Kənd Təsərrüfatı İşçiləri Günü” kimi qeyd olunur.
Kənd təsərrüfatının dinamik inkişafı əhalinin keyfiyyətli ərzaq məhsulları ilə təminatında vacib məsələdir. Xalqımızın ümummilli lideri Heydər Əliyev ölkəmizə rəhbərlik etdiyi bütün dövrlərdə iqtisadiyyatın aparıcı sahələrindən biri olan kənd təsərrüfatının inkişafına xüsusi diqqət və qayğı ilə yanaşmışdır. Ötən əsrin 70-ci illərindən başlayaraq ulu öndərin rəhbərliyi ilə həyata keçirilən tədbirlər nəticəsində bu sahədə uğurlu nəticələr qazanılmış, Azərbaycan ittifaq respublikaları sırasında kənd təsərrüfatının inkişaf göstəricilərinə görə qabaqcıl yerlərdən birini tutmuşdur. Lakin 90-cı illərin məlum hadisələri, bütövlükdə, ölkə iqtisadiyyatını, o cümlədən kənd təsərrüfatını da iflic vəziyyətinə salmış, infrastruktur tamamilə dağıdılmışdır. Belə bir dövrdə ulu öndərin Azərbaycanda yenidən siyasi hakimiyyətə qayıtması ilə ölkə iqtisadiyyatında yeni inkişaf mərhələsinin əsası qoyulmuş, uğurlu aqrar islahatlar həyata keçirilmiş, kənd təsərrüfatının inkişaf etdirilməsi məqsədilə hüquqi baza yaradılmış, yeni torpaq-mülkiyyət münasibətləri formalaşdırılmışdır. Dahi şəxsiyyətin təşəbbüsü ilə bir çox qərarlar qəbul olunmuş, zərərlə işləyən kolxoz və sovxozların ictimai mal-qarasının özəlləşdirilməsinə başlanmışdır.

Naxçıvan Muxtar Respublikasında aparılan quruculuq tədbirlərindən təhsil müəssisələrinə də böyük pay düşüb. İstər ali, istərsə də orta ümumtəhsil müəssisələri üçün binaların tikilməsi və ya əsaslı şəkildə yenidən qurulması təhsilə göstərilən yüksək diqqət və qayğının nəticəsi kimi dəyərləndirilir. Bu sahədə görülən işlərdən Naxçıvan Dövlət Universiteti də xeyli bəhrələnib.
Son illərdə bu təhsil ocağında müxtəlif tədris korpuslarının tikilərək, yaxud əsaslı şəkildə yenidən qurularaq istifadəyə verilməsi tədrisin keyfiyyətinin artan xətt üzrə yüksəldilməsinə geniş imkanlar açır.
Cari ilin may ayından isə universitetin baytarlıq ixtisası üçün yeni tədris binasının əsaslı şəkildə yenidən qurulmasına başlanılıb. İnşaat işləri “Gəmiqaya” Məhdud Məsuliyyətli Cəmiyyətinin inşaatçıları tərəfindən aparılır. İkimərtəbəli binaya 1 mərtəbə də əlavə olunub. Binanın birinci və ikinci mərtəbələrində arakəsmələr hörülüb, suvaq və elektrik işləri davam etdirilir. Üçüncü mərtəbədə isə beton-qəlib işləri görülür. Tikintidə təhlükəsizlik qaydalarına ciddi əməl olunur.

Xəbərlər şöbəsi

Dünən Naxçıvan Muxtar Respublikası Nəqliyyat Nazirliyi Naxçıvan Şəhər Təsərrüfathesablı Nəqliyyat İdarəsində 2013-2014-cü ilin payız-qış mövsümünə hazırlıq və sərnişindaşımanın səviyyəsinin daha da yüksəldilməsi ilə bağlı seminar-müşavirə keçirib.
Tədbiri Naxçıvan Muxtar Respublikası Nəqliyyat Nazirliyinin Nəqliyyatda əlaqələndirmə və li­­senziyalaşdırma şöbəsinin müdiri Ramin Qəhrəmanov açaraq avtomobil nəqliyyatı sahəsində görülmüş işlərdən danışıb. Qeyd edilib ki, muxtar respublikada bütün sahələrdə olduğu kimi, avtomobil nəqliyyatı sahəsində də böyük irəliləyişlər əldə olunub. Ucqar dağ kəndlərinə belə, asfalt yollar salınır, rayon mərkəzlərində yeni avtovağzal kompleksləri tikilib istifadəyə verilir.

Cari ilin ilk 9 ayı ərzində  Naxçıvan Muxtar Respublikası Vergilər Nazirliyi və onun yerli orqanları tərəfindən muxtar respublika ərazisində fəaliyyət göstərən  ticarət, iaşə, xidmət və digər sahələrdə əhali ilə nağd pul hesablaşmalarının aparılması qaydalarına riayət olunması, nəzarət-kassa aparatlarından istifadə, vergi orqanlarında uçotda durmadan fəaliyyət göstərən vətəndaşların aşkar edilməsi, xarici valyuta sərvətlərinin ödəniş vasitəsi olaraq qəbul edilməsi, işəgötürənlə işçilər arasında əmək müqavilələrinin bağlanmasına nəzarət  və  bu kimi operativ nəzarətin əhatə funksiyalarına daxil olan məsələlər üzrə 87 vergi ödəyicisində qanunvericiliyin pozulması faktları aşkar edilib. Bu barədə məlumatı qəzetimizə Naxçıvan Muxtar Respublikası Vergilər Nazirliyinin Qanunsuz sahibkarlığın aşkar edilməsi şöbəsinin rəisi, vergi xidməti müşaviri Rəşad Əliyev verib.

Muxtar respublikada iqtisadiyyatın dinamik inkişafı təmin olunmuş, sahibkarlıq subyektlərinin fəaliyyətinin stimullaşdırılması və genişləndirilməsinə dövlət maliyyə dəstəyi göstərilmiş, iş adamlarının normal fəaliyyəti üçün əlverişli biznes mühiti formalaşdırılmış, yeni istehsal və xidmət sahələri yaradılmışdır. Aparılan uğurlu islahatlar nəticəsində sənaye məhsulunun həcmi ilbəil artmış, muxtar respublikada istehsal olunan sənaye məhsulunun 93,2 faizi özəl sektorun payına düşmüşdür.

Əlverişli sahibkarlıq mühitindən bəhrələnərək dövlət maliyyə dəstəyi ilə istehsal sahəsini genişləndirən müəssisələrdən biri də Naxçıvan şəhərində fəaliyyət göstərən “Zümrüd” Kiçik Müəssisəsidir.
“1997-ci ildə 6 nəfərlə  fərdi sifarişlərə uyğun kişi və qadın geyimləri tikməklə fəaliyyətə başladıq”, –  deyən müəssisənin direktoru Etibar Hacıyev bildirdi ki, ötən müddət ərzində dövlət dəstəyi ilə müasir istehsal sahəsi yaradılmışdır. Müəssisədə istehsal olunan məktəbli formaları alıcılar tərəfindən rəğbətlə qarşılanır. Verilən sifarişləri vaxtında və keyfiyyətlə yerinə yetirmək üçün burada yeni avadanlıqlar quraşdırılmış, müəssisəyə əlavə işçi qüvvəsi cəlb olunmuşdur.

Mərkəzi Bankın Naxçıvan Muxtar Respublika İdarəsində muxtar respublikada fəaliyyət göstərən banklar və digər kredit təşkilatlarının, aidiyyəti qurumların nümayəndələrinin iştirakı ilə keçirilən “Elektron ödəniş məkanının formalaşması və ödəniş alətləri ilə iş” mövzusunda ikigünlük kurs oktyabrın 26-da başa çatıb. Məlumat üçün bildirək ki, kursun məqsədi muxtar respublikada yüksək ödəniş mədəniyyətinə malik olan cəmiyyətin formalaşdırılmasına, hesablaşmalarda nağdsız ödənişlər üzrə dövriyyənin inkişaf etdirilməsinə, elektron ödəniş xidmətlərinin çeşidinin effektivliyinin tətbiqi dairəsinin genişləndirilməsinə və istifadəsinin kütləviliyinə nail olmaqdan ibarət idi.
Tədbirdə Azərbaycan Bank Tədris Mərkəzinin ekspertləri Ramil Mahmudov, Cəlal Orucov və Nicat Məmmədli nağdsız ödəniş xidmətlərinin əhəmiyyəti, təsərrüfat subyektlərində POS-terminalların qoyulması, habelə innovativ və yüksəkkeyfiyyətli xidmətlərin tətbiqi ilə bağlı çıxışlar ediblər.
Kursun sonunda 45 nəfər tədbir iştirakçısına müvafiq sertifikatlar verilib.

Xəbərlər şöbəsi

Naxçıvan Muxtar Respublikası Ali Məclisi Sədrinin 2008-ci il 17 sentyabr tarixli Sərəncamı ilə təsdiq edilmiş “2008-2015-ci illərdə Naxçıvan Muxtar Respublikasında əhalinin ərzaq məhsulları ilə eti­barlı təminatına dair Dövlət Pro­qra­mı”nın qəbulundan ötən müddət ərzində muxtar respublikada bu istiqamətdə həyata keçirilən tədbirlər öz bəhrələrini vermiş, xeyli nailiyyətlər, uğurlu nəticələr qazanılmışdır. Bu nailiyyətləri taxıl istehsalı sahəsində də görmək olar. Göstərilən dövlət qayğısı hesabına ötən ilin payızında əkilmiş 35 min 324 hektar taxıl əkini sahəsindən 102 min 960 ton taxıl istehsal olunmuş, məhsuldarlıq 29,1 sentnerə çatdırılmışdır. Qazanılan uğurdan ruhlanan torpaq mülkiyyətçiləri 2014-cü ilin bol və keyfiyyətli taxılının əsasını qoymaq üçün əkin kampaniyasını uğurla davam etdirirlər. Naxçıvan Muxtar Respublikası Kənd Təsərrüfatı Nazirliyindən aldığımız məlumata görə, taxıl əkini kampaniyasının mütəşəkkil şəkildə başa çatdırılması üçün əvvəlcədən həyata keçirilən hazırlıq tədbirləri özünü göstərir. Qeyd edək ki, sahələrə kifayət qədər texnika çıxarılmış­dır. Onların yanacaq və ehtiyat hissələri ilə təchizatı da diqqət mərkəzindədir.
Şumun keyfiyyətli aparılmasının bol məhsul üçün vacib şərtlərdən biri olduğunu unutmayan mexanizatorlar şum qaldırılmasında bu amilə ciddi diqqət yetirirlər. Əkin zamanı taxılçılar məhsuldar toxum sortlarından istifadəyə və şırım üsulu ilə əkinə üstünlük verirlər. Bu da belə qənaət yaradır ki, gələn təsərrüfat ili də taxılçılarımız üçün uğurlu illərdən biri olacaq.
Nazirlikdən verilən operativ məlumata görə, oktyabr ayının 28-dək muxtar respublikada 13 min hektar sahədə şum qaldırılmış, 6 min  hektar sahədə əkin aparılmış, əkilmiş sahələrin 2698 hektarı suvarılmışdır. Payızlıq taxıl əkini kampaniyası sürətlə davam etdirilir.

Xəbərlər şöbəsi

Bu mövzuda seminar keçirilib

Naxçıvan şəhərindəki “Təbriz” mehmanxanasında “Naxçıvan Muxtar Respublikasında sahibkarlıq potensialının gücləndirilməsinə dəstək” mövzusunda seminar keçirilib.
Seminarı Naxçıvan Muxtar Respublikası İqtisadi İnkişaf Nazirliyi, Sahibkarlar Konfederasiyası, Azərbaycan Respublikası Xarici İşlər Nazirliyinin Naxçıvan Muxtar Respublikasındakı İdarəsi ATƏT-in Bakı Ofisi ilə birgə təşkil edib.
Tədbiri ATƏT-in Bakı Ofisinin əməkdaşı Matilde Nquyen Raniqel açıb. Qeyd olunub ki, son 3 il ərzində ATƏT-in Bakı Ofisi iqtisadi idarəetmənin keyfiyyətini artırmaq, Bakıda və Azərbaycanın regionlarında əlverişli biznes mühitini təşviq etmək üçün normativ hüquqi məsələlərin yaxşılaşdırılması istiqamətində dəstək tədbirləri həyata keçirib. Belə tədbirlər Naxçıvan Muxtar Respublikasını da əhatə edib. 2009-cu ilin mayında ofis tərəfindən Naxçıvan Dövlət Universiteti ilə əməkdaşlıq əsasında Naxçıvanda müsbət biznes və investisiya mühiti üzrə qabaqcıl təcrübələrə dair təlim seminarları təşkil olunub. 2012-ci ilin oktyabrında da bu mövzuda 3 günlük seminar keçirilib.

Oktyabrın 25-də Mərkəzi Bankın Naxçıvan Muxtar Respublika İdarəsində muxtar respublikada fəaliyyət göstərən banklar və digər kredit təşkilatlarının, aidiyyəti qurumların nümayəndələrinin iştirakı ilə “Elektron ödəniş məkanının formalaşması və ödəniş alətləri ilə iş” mövzusunda ikigünlük kursa başlanılmışdır.
Bu münasibətlə keçirilən tədbiri idarənin sədri Səbuhi Məmməd­ov açaraq bildirmişdir ki, Naxçıvan Muxtar Respublikasında son illər elektron ödəniş sistemlərindən istifadənin genişləndirilməsi, nağdsız hesablaşmaların həcminin artırılması istiqamətində bir sıra işlər görülmüş, bu sahənin inkişafı diqqət mərkəzində saxlanılmışdır. Bank infrastrukturu genişləndirilərək ödəniş kartlarının sayı 1 oktyabr 2013-cü il tarixə 178 min 992, bankomatların sayı 85, POS-terminalların sayı isə 212 ədəd olmuşdur. Əməkhaqqı və pensiyaların, sosial müavinətlərin ödənilməsinin 97,5 faizinin, qeyri-dövlət sektorunda isə əməkhaqlarının 27 faizinin ödəniş kartları vasitəsi ilə aparıldığını bildirən idarə sədri əlavə edib ki, dövlət büdcəsindən maliyyələşən təşkilatlar və pensiya təminatı üzrə ödəniş kartlarının  sayı 120 min ədəddən çoxdur.

Dövlətin iqtisadi inkişafın davamlı hal alması yolunda həyata keçirdiyi ən mühüm tədbirlərdən biri bazarda formalaşmış tələbin ödənilməsi üçün zəruri olan yeni istehsal və xidmət sahələrinin yaradılmasına təkan verən kreditləşmə siyasətidir. Bu həm də mühüm tənzimləmə vasitəsi kimi istifadə olunaraq ölkədə və regionda əhali tələbatlarına cavab verən, nəzərdə tutulduğu müddətdə öz xərcini çıxara bilən yeni biznes subyektlərinin yaradılmasına, fəaliyyətdə olanların işinin canlandırılmasına xidmət edir. Bütün bunlar ardıcıl həyata keçirilib müsbət nəticə verdikdə dövlət-sahibkar-istehlakçı münasibətlərində hər kəsin mənafeləri təmin olunur. Verilmiş kreditlərin vaxtında qaytarılması həm də yeni kreditlərə mənbə və zəmanət yaradır.

Naxçıvan şəhərinin Əziz Əliyev küçəsində 4 yeni binanın ucaldılması bu ünvana yeni görkəm bəxş edib. Belə ki, burada 220 yerlik uşaq bağçası, zirzəmi ilə birlikdə 6 mərtəbədən ibarət 3 yaşayış binası ucaldılıb. Hazırda uşaq bağçası binasının dam örtüyü vurulur, mərmər mozaik daşlarla və şəbəkəbəndlərlə eksteryerin dizayn işləri aparılır, interyer avanqard üslubda işlənilir. Zirzəmi ilə birlikdə dörd mərtəbədən ibarət olan binada tikinti işlərinin qısa müddətdə başa çatdırılması üçün inşaatçılar bütün qüvvələri səfərbər ediblər.
Obyektlərin inşasını həyata keçirən Naxçıvan Şəhər Abadlıq və Təmir-Tikinti İdarəsinin iş ustası Əmirxan Mazanovun bildirdiyinə görə, inşaat işlərinin davam etdirildiyi 3 yaşayış binasından ikisi 30, biri isə 20 mənzilli nəzərdə tutulub. Ümumilikdə, 80 mənzildən 75-i ikiotaqlı, 5-i üçotaqlı olacaq. Üçotaqlı mənzillər 65 kvadratmetr, ikiotaqlı mənzillər isə 54 kvadratmetr sahəni əhatə edəcək.

Xəbərlər şöbəsi

Sənaye məhsulu istehsalı regionda iqtisadi inkişafın mühüm göstəricilərindən biri olub, əməktutumlu yeni iş yerlərinin yaradılmasının, innovasiyaların tətbiqi və ixracyönümlü əmtəələrin çeşidinin artırılmasının əsas yollarından biridir. Sənayeləşmə vasitəsilə müxtəlif sahələrdən əldə olunan xammal ehtiyatları insanların tələbatlarına cavab verə bilən son məhsul halına gətirilir, ixtisaslaşmış əməyin tətbiqinə geniş meydan açılır. Sənayenin inkişaf etdirilməsi düzgün idarə olunduqda o, ekoloji tarazlığa zərər vurmadan xammal, kapital və əmək ehtiyatlarının iqtisadi dövriyyəyə cəlb olunmasının ən səmərəli yolu hesab olunur. Regional inkişaf üçün zəruri olan sənaye məhsulu istehsalında sənaye parklarının yaradılması sahibkar, bazar və tənzimləmə strukturları arasındakı münasibətləri tənzimləyən, eləcə də bazarın tələblərinə uyğun proqnoz nəticələrinə əsaslanan məhsul istehsalına nail olunmasına xidmət edir.