Naxçıvan Muxtar Respublikası Vergilər Nazirliyində idarə, müəssisə və təşkilatların nümayəndələrinin iştirakı ilə “http://vergi.nakhchivan.az rəsmi internet səhifəsi və elektron xidmətlər” mövzusunda keçirilən təqdimat tədbirini giriş sözü ilə Naxçıvan Muxtar Respublikası vergilər nazirinin müavini, baş vergi xidməti müşaviri Fərrux Əkbərov açıb.

Bildirilib ki, muxtar respublikamızda ərzaq və qeyri-ərzaq məhsullarına olan tələbatın daxili imkanlar hesabına ödənilməsi üçün idxaldan asılılığın aradan qaldırılması istiqamətində görülən tədbirlər, iqtisadi inkişafın yeni keyfiyyət mərhələsinə daxil olması və sosial infrastruktur təminatının yaxşılaşdırılması nəticəsində makroiqtisadi göstəricilərin artımına nail olunub, sahibkarlığa dövlət himayəsinin həyata keçirilməsi nəticəsində əlverişli biznes və investisiya mühiti yaradılıb.
Qeyd olunub ki, muxtar respublikamızda sahibkarlığa qanunsuz müdaxilələrin qarşısının alınması, operativ vergi nəzarəti tədbirlərinin və səyyar vergi yoxlamalarının sayının kəskin surətdə azaldılması sahibkarlığa dövlət dəstəyinin bariz nümunəsidir.

Maliyyə idarəetməsinin təkmilləşdirilməsi istiqamətində Avstriya Respublikasının Federal Maliyyə Nazirliyinin dəvəti ilə Naxçıvan Muxtar Respublikasının Maliyyə Nazirliyinin nümayəndə heyəti 15-18 oktyabr tarixlərində Avstriyanın paytaxtı Vyanada və Ştiriya Əyalətinin Qrats şəhərində işgüzar səfərdə olub, bir sıra görüşlər keçirib.

Oktyabrın 21-də Fransanın paytaxtı Paris şəhərində SIAL Paris beynəlxalq ərzaq sərgisi açılıb. 1964-cü ildən dünyanın müxtəlif ölkələrində keçirilən SIAL sərgisində bu il 109 ölkədən 7 mindən çox şirkət iştirak edir. Bu şirkətlər ərzaq sahəsində 23 sektoru əhatə edir.
Kənd Təsərrüfatı və İqtisadiyyat nazirliklərinin, ölkəmizin Fransadakı səfirliyinin dəstəyi, Azərbaycanda İxracın və İnvestisiyaların Təşviqi Fondunun təşkilatçılığı ilə qida, meyvə-tərəvəz, şərab və digər spirtli içkilər, meyvə şirələri, mineral sular, konservləşdirilmiş məhsullar, fındıq və qurudulmuş meyvə, çay istehsalı ilə məşğul olan 23 Azərbaycan şirkəti sərgidə öz məhsullarını “Made in Azerbaijan” vahid ölkə stendi ilə təqdim edir.
Sərgidə Azərbaycan pavilyonunda Naxçıvan Muxtar Respublikasına ayrıca guşə ayrılıb.
Kənd təsərrüfatı və yeyinti məhsullarının nümayişi, satışı, müəssisələrin imicinin formalaşdırılması, brendlərinin reklamı və eyni zamanda iştirak edən müəssisələrin kooperasiya əlaqələrinin genişləndirilməsi, yeni tərəfdaşların tapılması məqsədilə təşkil olunmuş SIAL Paris beynəlxalq qida sərgisində muxtar respublikada fəaliyyət göstərən “Naxçıvan Məhsulları”, “F.H. Oğulları” və “Sumqala Tikinti Təchizat” Məhdud Məsuliyyətli cəmiyyətlərinin nümayəndələri iştirak edir.
Sərgi çərçivəsində Azərbaycan, o cümlədən Naxçıvan şirkətlərinin nümayəndələri Avropa İttifaqının alıcı şirkətləri ilə görüşlər keçirəcək və ixrac məsələlərinə dair müzakirələr aparacaq.
Qeyd edək ki, SIAL Paris beynəlxalq qida sərgisi oktyabrın 25-dək davam edəcək.

Naxçıvan Muxtar Respublikası
İqtisadiyyat Nazirliyinin mətbuat xidməti

Hərtərəfli inkişafın əsas göstəricilərindən biri güclü iqtisadiyyata sahib olmaqdır. Bu mənada, ölkəmizin ümumi inkişaf mənzərəsində mühüm yer tutan Naxçıvan Muxtar Respublikasında bütün sahələrdə əldə olunan uğurlar öz davamlılığı ilə seçilir. Muxtar respublika iqtisadiyyatı, onun insan rifahına xidmət edən stabil artım dinamikası davam etdirilməkdə və güclü iradə hesabına sürətlənməkdədir.
Əsası ümummilli liderimiz ­Heydər Əliyev tərəfindən müəyyən olunmuş iqtisadi inkişaf strategiyası müasir uğurlarımızın əsasını təşkil edir. Ölkəmizdə regionların inkişafının diqqət mərkəzində saxlanılması istiqamətində qəbul edilmiş mühüm dövlət qərarlarının icrası Naxçıvan Muxtar Respublikasının da hərtərəfli inkişaf etməsinə zəmin yaradıb. Qədim diyarın zəngin yeraltı, yerüstü təbii sərvətlərinin, əmək ehtiyatları və turizm potensialının fəal olaraq iqtisadi dövriyyəyə cəlb olunması bir zamanlar burada möcüzəvi görünən iqtisadi layihələri artıq reallığa çevirib. Naxçıvanda həyata keçirilən iqtisadi layihələr, irimiqyaslı infra­struktur quruculuğu tədbirləri bu diyarın investisiya cazibədarlığını da artırıb. Nəticədə, Naxçıvan bir çox göstəricilər üzrə investisiya cazibədar­lığı reytinqində ölkəmizin regionları arasında lider mövqeyinə çatıb.

Əhalinin ekoloji cəhətdən saf təbii qidaya həmişə böyük ehtiyacı var. Arıçılıq isə təbii qida istehsalı üçün ən perspektivli sahə hesab edilir. Bu baxımdan arıçılıq iqtisadiyyatın ən vacib sahələrindən biridir. Elə ona görə də muxtar respublikada bu sahənin inkişafı daim diqqət mərkəzində saxlanılır. Arı məhsulları insan bədəni tərəfindən 100 faiz mənimsənilir. Çünki bu məhsullar 99 faiz insan qanının plazmasına yaxındır. Arıçılıq məhsullarının istehsalı yalnız təbii yolla mümkündür. Arıçılıq, əslində, biznes sahəsi kimi də çox gəlirli sahədir. Arı ailəsinin bizə verdiyi əsas məhsullar bal, çiçək tozu, arı südü, vərəmum, mum və arı zəhəridir. Bütün bu məhsullar bir-birindən tərkibinə və müalicəvi xüsusiyyətlərinə görə fərqlənir. Ümumiyyətlə, arının bütün məhsulları bio­loji-aktiv maddələrlə zəngin və qiymətlidir. 

Bal

Arılar balı müxtəlif çiçəklərin nektarından – şirəsindən hazırlayır. Onlar əvvəlcə çiçək şirəsini mədəsinə toplayır, sonra pətəkdəki yuvalara boşaldırlar. Daha sonra isə mədə şirəsi ilə qarışmış nektarı qanadları ilə ventilyasiya yaradaraq qurudub qatılaşdırırlar. Qatılaşmış nektar bala çevrildikdə, yəni bal tam yetişdikdə pətəyin ağzını mumla suvayırlar.

Azərbaycan Respublikasının Prezidenti cənab İlham Əliyevin 2004-cü il 13 oktyabr tarixli Sərəncamına əsasən hər il oktyabrın 20-si ölkəmizdə “Energetiklər Günü” kimi qeyd edilir.
Azərbaycanda elektroenergetikanın inkişafına ümummilli lider Heydər Əliyevin rəhbərliyi ilə ötən əsrin 70-ci illərindən başlanılmış, enerji sisteminin sürətli inkişafını təmin etmək məqsədilə mühüm tədbirlər görülmüşdür. Müstəqillik illərində də ölkəmizdə ulu öndərin rəhbərliyi ilə enerji təhlükəsizliyinin təmin olunması istiqamətində ardıcıl tədbirlər görülmüşdür.
Ulu öndərin siyasi kursunu layiqincə davam etdirən Azərbaycan Respublikasının Prezidenti cənab İlham Əliyevin rəhbərliyi ilə Azərbaycanda enerji sektorunun inkişafı yeni mərhələyə qədəm qoymuşdur. Bu sahədə həyata keçirilən tədbirlər blokada şəraitində yaşayan Naxçıvan Muxtar Respublikasında da enerji təhlükəsizliyini təmin etmişdir. Xüsusilə son illər istifadəyə verilən yeni su elektrik stansiyaları tələbatın dayanıqlı şəkildə ödənilməsində və ixrac imkanlarının yaranmasında mühüm əhəmiyyətə malikdir. Belə ki, ölkə Prezidentinin iştirakı ilə Heydər Əliyev Su Anbarı üzərində gücü 4,5 meqavat olan yeni su elektrik stansiyası, ümumi gücü 87 meqavat olan Naxçıvan Modul Elektrik Stansiyası, Azərbaycanda ilk derivasiyatipli 22 meqavat güclü Biləv Su Elektrik Stansiyası, 20,5 meqavat güclü “Arpaçay-1” və 1,4 meqavat güclü “Arpaçay-2” Su Elektrik stansiyaları, 20 meqavat gücündə Günəş Elektrik Stansiyasının tikilib istifadəyə verilməsi və 2017-ci ildə stansiyanın gücünün daha 2 meqavat artırılması Naxçıvanın etibarlı enerji təminatına səbəb olmuşdur. Hazırda muxtar respublikadakı 8 elektrik stansiyasının ümumi gücü 239,4 meqavatdır.

Muxtar respublikada cari ilin ötən dövründə iqtisadiyyatın şaxələndirilməsi və sosial sahənin inkişafı üzrə mühüm tədbirlər həyata keçirilmiş, yüksək nəticələr qazanılmışdır.
Azərbaycan Respublikası Prezidentinin sədri olduğu “Caspian European Club”un 2017-ci il üçün hazırladığı investisiya reytinqində Naxçıvan Muxtar Respublikası ən yüksək ümumi bal toplayaraq birinci yerə çıxmış və bununla bağlı cari ilin yanvar ayının 23-də Heydər Əliyev Muzeyində tədbir keçirilmişdir.
Ötən dövrdə ən yaddaqalan hadisələrdən biri ölkə Prezidenti cənab İlham Əliyevin muxtar respublikaya növbəti səfəridir. Dövlət başçısı səfəri zamanı Naxçıvan Müəllimlər İnstitutunun və Qaraxanbəyli kəndində 6 nömrəli tam orta məktəb binasının, hərbi xəstəxananın, Naxçıvan Şəhər Təmizləyici Qurğular Kompleksinin, Şərur şəhər və ətraf kəndlərinin içməli su təchizatı və kanalizasiya sistemlərinin birinci mərhələsinin açılışlarında iştirak etmiş, Dövlət Sərhəd Xidmətinin sərhəd dəstəsində və Əlahiddə Ümumqoşun Ordunun “N” hərbi hissəsində yaradılan şəraitlə tanış olmuşdur.

Naxçıvan Muxtar Respublikasında bank sisteminin müasir tələblər səviyyəsində qurulması, yaradılan şərait əhaliyə nümunəvi xidmət göstərməyə imkan verir. Banklar və kredit təşkilatları tərəfindən muxtar respublika iqtisadiyyatına yönəldilən kredit qoyuluşunun həcmi 1 oktyabr 2018-ci il tarixə 106 milyon 297 min manat olmuşdur ki, bu da 2017-ci ilin müvafiq dövrü ilə müqayisədə 1 milyon 982 min manat artmışdır. Kredit qoyuluşu, əsasən, dövlət proqramlarının icrasına, real sektorun, kiçik və orta sahibkarlığın inkişafına yönəldilmişdir. Bu da kənd təsərrüfatı, yerli sənaye və istehlak malları istehsalının həcminin artması və yeni iş yerlərinin yaranması baxımından əhəmiyyətli olmuşdur.
Bank və kredit təşkilatları tərəfindən bu ilin 9 ayında 39 milyon 431 min manat kredit verilmişdir ki, bunun da 4 milyon 229 min manatı qısamüddətli, 35 milyon 202 min manatı isə uzunmüddətli kreditdir. Verilmiş kreditlərin 4 milyon 530 min manatı kənd təsərrüfatı, 5 milyon 172 min manatı sənaye, 670 min manatı tikinti, 1 milyon 830 min manatı kommersiya, 521 min manatı nəqliyyat, rabitə və informasiya, 15 min manatı balıqyetişdirmə sahəsinə, 2 milyon 970 min manatı daşınmaz əmlakla əlaqədar ipoteka kreditlərinin verilməsinə, 23 milyon 723 min manatı isə digər kommunal, sosial və istehlak kreditlərinin verilməsi kimi sahələrə yönəldilmişdir. Bundan başqa, kredit təşkilatları tərəfindən 128 fiziki və hüquqi şəxsə 3 milyon 115 min 600 manat dəyərində kənd təsərrüfatı texnikası üzrə lizinq xidməti göstərilmişdir.

Müasir dövrdə inkişaf etmiş ölkələrdə özəl sektorun əsasını ailə təsərrüfatları və kiçik sahibkarlıq subyektləri təşkil edir. Bu cür təsərrüfatlar özünüməşğulluğun nümunəvi modeli sayılmaqla yanaşı, həm də böyük sahibkarlıq subyektlərinin yaradılmasına gedən yolun başlanğıcı hesab edilir. Bu mənada, ailə təsərrüfatlarının yaradılması dövlətimizin marağındadır və bu cür fəaliyyətin nəticəsi ­ölkəmizin, eləcə də muxtar respublikamızın iqtisadi inkişafında mühüm rola malikdir. 

Ötən dövrdə muxtar respublikamızın bütün bölgələrində özünü­məşğulluğu belə fəaliyyət növü ilə təmin edən yüzlərlə ailə təsərrüfatı fəaliyyətə başlamışdır. Dövlət tərəfindən güzəştli şərtlərlə kreditlərin verilməsi, əldə olunan məhsulun satışı üçün yaradılmış şərait təsərrüfat sahiblərini daha da ruhlandırmışdır. Bu yazıda haqqında bəhs edəcəyimiz ailə təsərrüfatı sahibi də muxtar respublikada yaradılmış şəraitdən lazımınca yararlanaraq öz təsərrüfatını quran və ildən-ilə genişləndirən zəhmətkeş insanlardan biridir. Daxili bazarı sağlam, ekoloji təmiz kənd təsərrüfatı məhsulları ilə təmin etməyi qarşısına məqsəd qoymuş həmsöhbətimlə görüşmək üçün muxtar respublikamızın böyük yaşayış məntəqələrindən biri olan Babək rayonunun Nehrəm kəndinə üz tutduq.

Dünən Naxçıvan Dövlət Universitetində muxtar respublikanın ali təhsil ocaqlarında təhsil alan tələbələrin iştirakı ilə “İdeyadan Biznesə” layihəsi çərçivəsində startap turu keçirilib.
Tədbirdə universitetin İqtisadiyyat fakültəsinin dekanı Əşrəf Ələkbərov çıxış edərək bildirib ki, muxtar respublikada fəaliyyət göstərən ali təhsil ocaqlarının maddi-texniki bazasının möhkəmləndirilməsi, tədris prosesində innovativ texnologiyalardan geniş istifadə uğurlara yol açıb.
Azərbaycan Respublikası nəqliyyat, rabitə və yüksək texnologiyalar nazirinin müşaviri Tahir Məmmədov çıxışında innovasiyalar, informasiya-kommunikasiya texnologiyaları sahəsində ölkəmizdə aparılan dövlət siyasətindən, bu sahəyə cavabdeh qurum kimi nazirliyin həmin sektorun inkişafı istiqamətində həyata keçirdiyi layihələrdən danışıb.
Çıxışlardan sonra layihənin qaydaları və formatı barədə məlumat verilib. Təqdim olunan layihələrin münsiflər heyəti və komandalar arasında birgə müzakirəsi aparılıb, komanda üzvlərinə hədiyyələr verilib.
Tədbirin sonunda qalib gələn layihələrin adları açıqlanıb. “Nouhland” və “Compex” layihələri I, “Naxçıvan məhsullarının onlayn satışı” və “Nads” layihələri II və “Naxçıvan Book House” layihəsi III yerlərə layiq ­görülüblər.
Qeyd edək ki, layihə Heydər Əliyev Fondunun, Azərbaycan Respublikası Nəqliyyat, Rabitə və Yüksək Texnologiyalar Nazirliyinin, həmin nazirliyin tabeliyində İnformasiya Texnologiyalarının İnkişafı Dövlət Fondunun və Yüksək Texnologiyalar Parkının, Birləşmiş Millətlər Təşkilatının İnkişaf Proqramının, “Regional İnkişaf” İctimai Birliyinin, Azərbaycan Respublikasının Gənclər Fondunun, “Azercell” və “Microsoft” şirkətlərinin təşkilatçılığı ilə təşkil olunub.

 Nail ƏSGƏROV

Azərbaycan Respublikasının Prezidenti cənab İlham Əliyevin 2005-ci il 5 oktyabr tarixli Sərəncamı ilə hər il oktyabrın 13-ü ölkəmizdə dəmiryolçuların peşə bayramı günü kimi qeyd edilir. 

Dəmir yolu təsərrüfatının sürətli inkişafı dövrü ümummilli liderimiz Heydər Əliyevin Azərbaycana rəhbərlik etdiyi illərə təsadüf edir. O dövrdə ümummilli liderimizin şəxsi təşəbbüsü ilə dəmir yolu nəqliyyatında əsaslı dəyişikliklərə başlanıldı. Dahi rəhbərin dəmir yoluna verdiyi böyük əhəmiyyət, onun inkişafına göstərdiyi qayğı qısa zamanda öz bəhrəsini vermiş, yeni stansiyalar və vağzal binaları inşa olunmuşdu. Əgər 1969-cu ilə qədər dəmir yolunda 159 stansiya var idisə, qısa müddətdə onların sayı 176-ya çatmışdı. Bu dövrdə çəkilmiş yeni dəmir yolu xətlərinin uzunluğu 482,8 kilometrə, elektrikləşdirilmiş sahənin uzunluğu isə 1284 kilometrə çatdırılmışdır.
O illərdə Naxçıvan Muxtar Respublikasında da dəmir yolunun müasirləşdirilməsi diqqətdə saxlanılmış, artan yük və sərnişin daşınmasına olan tələbatı təmin etmək, nəqliyyat xidmətini təşkil etmək məqsədilə 1976-cı ildə dəmir yollarının Naxçıvan Hissəsinin mərkəzi aparatı İmişli stansiyasından Naxçıvan şəhərinə köçürülmüşdür. 1988-ci ildə isə Culfa-Şərur sahəsinin elektrikləşdirilməsi yük və sərnişin daşınmasında elektrovoz dartısından istifadəyə imkan yaratmışdır.

İqtisadiyyatın inkişafında standartlaşdırmanın rolu ildən-ilə artmaqdadır. Standartlaşdırmanın əsas məqsədi istehsalın səmərəliliyinin artırılmasından, istehlakçılara çatdırılan məhsul və xidmətlərin keyfiyyətinin yüksəldilməsindən, təhlükəsizlik normalarının daha da təkmilləşdirilməsindən, ətraf mühitin qorunmasından və ticarətdə texniki maneələrin aradan qaldırılmasından ibarətdir. 

Ölkəmizdə standartlaşdırma sahəsinin inkişafı ümummilli ­liderimiz Heydər Əliyevin adı ilə bağlıdır. Ulu öndərin siyasi hakimiyyətə ikinci dəfə qayıdışından sonra bu sahəyə diqqət və qayğı daha da artırılmış, hüquqi baza möhkəmləndirilmiş, yeni qanunlar qəbul edilmişdir.
Standartlaşdırma sahəsində həyata keçirilən islahatlar hazırda Azərbaycan Respublikasının Prezidenti cənab İlham Əliyev tərəfindən uğurla davam etdirilir. Azərbaycan Respublikasında standartlaşdırmanın inkişafı beynəlxalq standartlardan aktiv istifadə ilə yanaşı, müasir tələblərə cavab verən yeni milli standartların yaradılması istiqamətlərində uğurla aparılır. Ölkəmizdə keyfiyyət infrastrukturunun inkişafı və tənzimlənməsi standartlaşdırma, akkreditasiya, sertifikatlaşdırma, metrologiya, uyğunluğun qiymətləndirilməsi üzrə fəaliyyət istiqamətləri vasitəsilə həyata keçirilməkdədir. Hazırda ölkəmizdə beynəlxalq standartların tətbiqi ilə bağlı mühüm proqramların qəbulu və icrası, milli standartların beynəlxalq standartlara uyğunlaşdırılması, müasir tələblərə uyğun yeni milli standartların tətbiqi prosesi uğurla icra olunmaqdadır. Standartlaşdırmanın təkmilləşdirilməsi ölkə iqtisadiyyatının, sahibkarlığın inkişafında, istehlakçı hüquqlarının etibarlı qorunmasında, məhsul və xidmətlərin keyfiyyətinin yüksəldilməsində başlıca amildir.

Bu iki nemət – sayı-hesabı olmayan badam ağacları, bir də Ulu Yaradanın möcüzəsi olan “Badamlı” suyu Şahbuz rayonunun Badamlı kəndinin adını nəinki muxtar respublikada, bütün ölkəmizdə məşhurlaşdırıb. Barı-bərəkəti, bir də bənzərsiz mənzərələri ilə  fəsillər gözəli olan  payızın bu günlərində yolumuzu həmin kənddən salırıq. İndi o vaxtdır ki, kəndlinin aylarla gözlədiyi an gəlib yetişib. Həmişəki kimi, bu il də ağacların barına planını qurub, məhsulundan gələn gəliri ailəsinin bir dərdi-sərinə  xərcləyəcəyini müəyyənləşdirən kəndlilər badam, cəviz çırpır, qabıqdan çıxarır, bir yerə toplayır, sərir, qurudur, satışa hazırlayırlar. Məqsədimiz də elə təbiətin səxavətindən hər birinin taleyinə pay düşən, ruziləri qapılarındaca nəsibləri olan badamlılılarla görüşüb onlarla respublikamızın çox az sayda yaşayış məskənində bitən bu qiymətli bitki, onun növləri, faydaları barədə söhbətləşmək idi.

Qeyd edək ki, Naxçıvan Muxtar Respublikası Ali Məclisi Sədrinin 2016-cı il 8 fevral tarixli Sərəncamı ilə təsdiq edilmiş “2016-2020-ci illərdə Naxçıvan Muxtar Respublikasında meyvəçiliyin və tərəvəzçiliyin inkişafı üzrə Dövlət Proqramı”nın qəbul edilməsi muxtar respublikada bu sahələrin inkişaf etdirilməsində yeni mərhələnin başlanmasına şərait yaradıb. 2012-2015-ci illəri əhatə edən proqramda olduğu kimi, bu dövlət proqramının da icrası minlərlə hektar sahədə meyvə bağlarının salınması ilə nəticələnib. Belə bağlar arasında muxtar respublikamızın iqlim xüsusiyyətləri nəzərə alınaraq əkilən qərzəkli meyvələrdən olan badam üstünlük təşkil edir. Dövlət başçısı cənab İlham Əliyev də çıxışlarının birində ölkə ərazisindəki badam bağlarının əksəriyyətinin Naxçıvan Muxtar Respublikasında olduğunu vurğulamış, badamçılığın inkişaf etdirilməsinin əhəmiyyətini qeyd etmişdir.

Kəngərli rayonunda növbəti əmək yarmarkası keçirilib. Tədbiri giriş sözü ilə rayon Məşğulluq Mərkəzinin direktoru Səxavət Həsənov açaraq bildirib ki, muxtar respublikamızda həyata keçi­rilən məşğulluq tədbirləri əhalinin sosial müdafiəsinin gücləndirilməsində, insanların daimi işlə təmin olunmasında mühüm rol oynayır. Bu sahədə həyata keçirilən tədbirlər sakinlər tərəfindən onlara göstərilən böyük qayğı kimi ­dəyərləndirilir.
Naxçıvan Muxtar Respublikası Ali Məclisi Sədrinin 2016-cı il 11 yanvar tarixli Sərəncamı ilə təsdiq edilmiş “2016-2020-ci illərdə Naxçıvan Muxtar Respublikasında əhalinin məşğulluğunun artırılması üzrə Dövlət Proqramı”nın icrası istiqamətində görülən işlərin nəticəsidir ki, son illər yüzlərlə vətəndaşımız yeni iş yerləri ilə təmin olunub, onların maddi rifah halı və sosial vəziyyəti daha da yaxşılaşdırılıb.
Tədbirdə rayon İcra Hakimiyyəti başçısının müavini Hacırəddin Mehbalıyev çıxış edərək deyib ki, muxtar respublikamızda işaxtaran vətəndaşların, xüsusilə də gənclərin sosial müdafiəsinin gücləndirilməsi, onların münasib işlə təmin olunmaları məqsədilə bir sıra aktiv məşğulluq tədbirləri həyata keçirilir. Bu tədbirlər içərisində əmək yarmarkaları öz əhəmiyyəti ilə seçilir.

Muxtar respublikanın ən böyük bölgələrindən biri olan Şərur rayonunda cari ildə də tikinti-quruculuq tədbirləri sürətlə davam etdirilir. Kərimbəyli kəndindəki tam orta məktəb binası əsaslı şəkildə yenidən qurulur. 270 şagird yerlik məktəb binası zirzəmi qatı ilə birlikdə 4 mərtəbədən ibarət olacaqdır.
Artıq obyektin bütün mərtəbələrində beton-qəlib işləri, arakəsmələrin hörgüsü başa çatdırılmışdır. Hazırda suvaq işləri aparılır, elektrik, istilik, su və rabitə xətləri də çəkilir. Fasad hissə rütubətdən qorunmaq üçün xüsusi inşaat materialı ilə izolyasiya olunur.
Obyektdə “Gəmiqaya Şirkəti” Məhdud Məsuliyyətli Cəmiyyətinin kifayət qədər mühəndis-texniki işçisi, fəhlə və quraşdırıcısı çalışır. Onlar inşaat sektoru üçün nəzərdə tutulan geyim və avadanlıqlarla təmin olunublar.
Onu da qeyd edək ki, ötən aylarda Şərur şəhərinin Heydər Əliyev prospektindəki 7 nömrəli, 40 mənzilli beşmərtəbəli yaşayış binası əsaslı təmir olunaraq sakinlərin istifadəsinə verilib. Həmin ünvanda olan 9 nömrəli, 24 mənzilli üçmərtəbəli yaşayış binasının da əsaslı təmirinə başlanıb.

Naxçıvan Muxtar Respublikası İqtisadiyyat Nazirliyində keçirilən tədbirdə “Biznesdə uğur – 2017” nominasiyası üzrə qalib gələn sahibkarlara mükafatlar təqdim edilib.
Belə ki, “Biznesdə uğur – 2017” nominasiyası üzrə “Nəqşicahan Holdinq Şirkətlər Qrupu” Məhdud Məsuliyyətli Cəmiyyətinin Karbon Qazı Zavodu “İlin məhsulu”, “Cahan Holdinq” Kommersiya Şirkətləri İttifaqı “İlin şirkəti”, “Sumqala Tikinti Təchizat” Məhdud Məsuliyyətli Cəmiyyəti “İlin sahibkarı”, “Ləzzət Biskvit və Şokolad Fabriki” Məhdud Məsuliyyətli Cəmiyyəti “İlin ixracatçısı”, “Naxçıvan Məhsulları” Məhdud Məsuliyyətli Cəmiyyəti “İlin yerli məhsul alıcısı” nominasiyalarına layiq görülüblər.
Qeyd edək ki, “Biznesdə uğur” mükafatı Naxçıvan Muxtar Respublikası Ali Məclisi ­Sədrinin tapşırığı ilə sahibkarların fəaliyyətinin qiymətləndirilməsi üçün 2009-cu ildə təsis edilib.
Tədbirdə Naxçıvan Muxtar Respublikasının iqtisadiyyat naziri Famil Seyidov çıxış edərək bildirib ki, iqtisadiyyatın müxtəlif sahələrində fərqləndirici mükafat sayılan “Biznesdə uğur” hər il özəl sektorda fəaliyyət göstərən iş adamlarına, biznes və sahibkarlığın inkişafında yüksək nailiyyətlər əldə edən şirkətlərə verilir. İqtisadi cəhətdən 2017-ci ildə də onlar uğurlu fəaliyyətləri ilə öz sahələrində lider olduqlarını sübut ediblər.

Babək rayonunun Nehrəm kəndindəki “Xalaoğlu” kəndli-fermer təsərrüfatında yeni plastik tara istehsalı sahəsi fəaliyyətə başlayıb.
Ok­tyabrın 9-da müəssisədə bu münasibətlə keçirilən tədbirdə Naxçıvan Muxtar Respublikasının iqtisadiyyat naziri Famil Seyidov, Babək Rayon İcra Hakimiyyətinin başçısı Rasim Hüseynov çıxış edərək qeyd ediblər ki, muxtar respublikada həyata keçirilən iqtisadi siyasətin əsas istiqaməti əlverişli sahibkarlıq və biznes mühitinin formalaşdırılması, sakinlərin rifah halının yaxşılaşdırılması, yeni istehsal müəssisələri yaratmaqla məşğulluq probleminin həlli, əhalinin tələbatının maksimum səviyyədə daha keyfiyyətli yerli istehsal məhsulları hesabına ödənilməsindən ibarətdir.
Yeni yaradılan istehsal müəssisəsi ilə tanışlıq zamanı sahibkar Rafiq Əliyev məlumat verib ki, müəssisə muxtar respublikada plastik taralara olan tələbatı ödəməklə yanaşı, həm də ixrac imkanlarına malikdir.

Naxçıvan Muxtar Respublikası Daşınmaz Əmlak və Torpaq Məsələləri üzrə Dövlət Komitəsinin ­“Əmlak”­­ informasiya bülleteni­­n­in ilk nömrəsi çap­dan çıxıb. İnformasiya bülletenində komitənin maddi-texniki bazası, əməkdaşların fəaliyyəti üçün yaradılan şərait, fəaliyyət istiqamətləri üzrə görülmüş işlər və tətbiq olunan yeniliklər, eləcə də daşınmaz əmlak və torpaq qanunvericiliyinin izahı ilə bağlı yazılar yer alıb.
Jurnalda vətəndaşlar üçün daşınmaz əmlakın qeydiyyatının əhəmiyyəti, qeydiyyatdan keçmiş əmlak­lara dövlət tərəfindən verilən təminatlarla bağlı maarifləndirici məlumatlar öz əksini tapıb. İnformasiya bülletenində, həmçinin muxtar respublikada torpaqların elektron uçotunun aparılmasının əhəmiyyəti və bu sahədə görülmüş işlər, torpaq ehtiyatlarından səmərəli istifadə və daşınmaz əmlakın qeydiyyatı ilə bağlı təhlillər, komitə tərəfindən vətəndaşlara göstərilən səyyar və elektron xidmətlər barədə yazılar yer alıb. Vətəndaşlardan daxil olan sorğular əsasında sual-cavab rubrikası hazırlanıb.
“Əmlak” informasiya bülleteni Naxçıvan Muxtar Respublikasının Ədliyyə Nazirliyində qeydiyyatdan keçib və ildə iki dəfə nəşr olunması nəzərdə tutulur.

Naxçıvan Muxtar Respublikası
Daşınmaz Əmlak və Torpaq Məsələləri üzrə Dövlət Komitəsinin mətbuat xidməti

1969-cu ildə Yaponiyada keçirilmiş Ümumdünya Poçt İttifaqının Konqresində qəbul edilmiş qərarla hər il oktyabrın 9-u Ümumdünya Poçt Günü kimi qeyd olunur.
Ölkəmizdə rabitə və informasiya texnologiyalarının inkişafı ümummilli liderimiz Heydər Əliyevin ölkə­mizə birinci rəhbərliyi dövrünə təsadüf edir. Həmin illərdə ölkəmizin rabitə sistemində əsaslı dəyişikliklər baş vermiş, o dövrün tələblərinə uyğun poçt və rabitə sistemi qurulmuşdur. Azərbaycan müstəqillik qazandıqdan sonra isə ulu öndərin rəhbərliyi ilə poçt sistemi yeni inkişaf mərhələsinə qədəm qoymuşdur.
Muxtar respublikada son illər rabitə sahəsində gedən sürətli inkişaf, fiber-optik xətlərin çəkilməsi, yüksək­sürətli kompüter şəbəkələrinin yaradılması poçt sahəsində xidmətlərin müasir tələblərə uyğun qurulmasına şərait yaratmışdır. Ötən dövrdə həyata keçirilən ardıcıl tədbirlər nəticəsində poçt müəssisələri bütün növ xidmətlərin təşkili üçün müasir texnologiyalarla təmin edilmiş, xidmətin səviyyəsi yüksəldilmişdir. Naxçıvan Muxtar Respublikası Ali Məclisi Sədrinin “Naxçıvanpoçt Məhdud Məsuliyyətli Cəmiyyətinin yaradılması haqqında” 2013-cü il 30 iyul tarixli Sərəncamı isə bu sahədə görüləcək işlərin miqyasını daha da genişləndirmişdir. Hazırda muxtar respublika ərazisində 1 mərkəzi poçt şöbəsi, 7 rayon poçt filialı və 177 poçt bölməsi fəaliyyət göstərir. Poçt məntəqələrində nağdsız ödənişlərin təşkili üçün 172 ədəd POS-terminal qoyulub. Həmçinin Naxçıvan Muxtar Respublikası Rabitə və Yeni Texnologiyalar Nazirliyinin tərkibində yaradılan yeni “NAXTEL” 4G mobil operatoru ilə müqavilə bağlanılıb, nömrələrin və danışıq kartlarının satışının poçt şöbə və bölmələri tərəfindən həyata ­keçirilməsi təşkil olunub.

Bəzən gözəl bir mebel evlərimizin interyerini o qədər tamamlayır ki, onu istehsal edənləri alqışlayır, işlərini təqdir edirik. Əvvəlki illərdən fərqli olaraq indi muxtar respublikamızda fəaliyyət göstərən mebel mağazalarında müxtəlif çeşid, keyfiyyət və rənglərdə gördüyümüz, zövqlərimizi oxşayan, seçimimiz üçün bizə geniş imkanlar yaradan saysız-hesabsız mebel dəstlərinin necə hazırlanması haqqında məlumatımız varmı? Bəs bir-birindən yaraşıqlı həmin mebellərin materiallarını istehsal edənlər barəsində necə, nələrisə bilirikmi? Bu kimi suallara cavab tapmaq üçün gözəlliyi ilə zövqümüzü oxşayan həmin mebellərin materiallarını istehsal edən bir müəssisə – “Dekor Qrup” Məhdud Məsuliyyətli Cəmiyyəti haqqında söhbət açmaq istəyirik.

Sahibkarlıq fəaliyyətinə göstərilən dövlət qayğısı sayəsində adıçəkilən müəssisə 2013-cü ildə qurulub, 2014-cü ildən fəaliyyətə başlayıb. Ərazisi 15 min kvadratmetrdən artıq sahəni əhatə edən müəssisədə 4 istehsal sexi, sərgi-satış salonu olan inzibati bina, iş otaqları, yeməkxana, hazır məhsulları yığmaq üçün anbar var. Müəssisəni gəzib istehsal prosesi və hazır məhsullarla tanış olduq. Burada diqqətimizi ən çox çəkən mətbəx avadanlıqları istehsalı üçün hazırlanan materiallar oldu. Müəssisənin direktor müavini Ramazan Allahverdiyev də qeyd etdi ki, hər kəsin evində zövqünə, evinin interyerinə uyğun yığdırdığı mətbəx avadanlıqları burada istehsal edilən müxtəlif­ölçülü laminat lövhələrdən hazır­lanır. O bildirdi ki, laminatlı lövhənin yüksək istehlak xüsusiyyətləri vardır. Belə ki, termodayanıqlıdır, nəmə, ləkəyə, cızılmaya və digər zədələrə qarşı davamlıdır. Hazırda mətbəx avadanlıqları materialları istehsal olunan seximizdə mat, parlaq və daha parlaq olmaqla, 70 rəngdə laminat örtüklü mətbəx avadanlıqları hazırlanır.

Daxili bazarın kartofa olan tələbatının yerli istehsal hesabına ödənilməsi bolluq və ucuzluq yaratmaqla yanaşı, kənara valyuta axınının qarşısını da alır ki, bunun da iqtisadi baxımdan əhəmiyyətinin əlavə şərhə ehtiyacı yoxdur. Buna görə də dövlətimiz kənd təsərrüfatının aparıcı sahələrindən biri olan kartofçuluğun inkişafına xüsusi diqqət yetirir. Şərur rayonunda da kartofçuluqla məşğul olan torpaq mülkiyyətçiləri bu sahənin inkişafına böyük önəm verirlər. Onlar kartofçuluqda zəngin təcrübə qazanıblar. Hərtərəfli dövlət qayğısından və qazandıqları təcrübədən səmərəli istifadə edərək hər il uğurlu nəticələrə nail olurlar. Bu cəhətdən cari il də istisna deyil. Belə ki, bu ilin yazında rayonda 1076 hektar sahədə kartof əkilib. Əkinlər vaxtlı-vaxtında və yüksək aqrotexniki səviyyədə becərildiyindən yaxşı məhsul yetişdirilib. Kartof yığımı başa çatmaq üzrədir və sahələrdən artıq 14 min tona qədər məhsul hasil edilib.
Torpaq mülkiyyətçiləri tələbatlarından artıq olan məhsulun bir hissəsini bazara çıxarır, qalanını isə qış aylarında satmaq məqsədilə soyuducu anbarlara təhvil verirlər.

Xəbərlər şöbəsi

Ötən günlərdə Naxçıvan Muxtar Respublikası Dövlət Statistika Komitəsi tərəfindən 2018-ci ilin yanvar-avqust aylarında muxtar respublikanın sosial-­iqtisadi inkişafının nəticələrini özündə əks etdirən növbəti statistikası açıqlandı. Statistikaya görə, əvvəlki dövrlərdə olduğu kimi, cari ilin ilk səkkiz ayında da ümumi daxili məhsul istehsalında ilk yeri sənaye sahəsi tutur.
Belə ki, bu istehsalda sənayenin payı 726 milyon 450 min manat dəyərində olub. Kənd təsərrüfatı məhsullarının payı isə bu dövrdə 293 milyon 730 min 900 manat təşkil edib. Ötən ilin müvafiq dövrü ilə müqayisədə, əgər sənaye istehsalının həcmi 1,5 faiz çox olubsa, kənd təsərrüfatı məhsullarında bu artım daha çoxdur. Statistikaya görə, 2017-ci ilin müvafiq dövrü ilə müqayisədə aqrar məhsulların həcmi 3,8 faiz artıb.
Açıqlanan rəqəmlər Naxçıvan Muxtar Respublikasında kənd təsərrüfatının bir il ərzində ayrılıqda götürülmüş aylar üzrə dinamik inkişafını göstərir. Bu inkişafı şərtləndirən bir çox amillər var. Hər şeydən əvvəl, muxtar respublika tarixən aqrar sektora uyğunluğu ilə seçilir. Digər tərəfdən, sənaye məhsullarının istehsalında yeni infrastrukturun yaradılması və ya mövcud olanların genişləndirilməsi, eyni zamanda yeni texnoloji vasitələrdən istifadə başlanğıc üçün şərtdirsə, kənd təsərrüfatı sahəsində bunu nisbətən ardıcıl tətbiq etmək olar. Ancaq bu heç də o demək deyil ki, aqrar sektorda müasir texnoloji imkanlardan istifadə etmədən məhsul istehsalı həcmini artırmaq mümkündür. Burada əsas məsələ dövlətin kənd təsərrüfatı sahəsinə olan diqqəti, bu sahənin inkişafı üçün apardığı təşviqat tədbirləridir. İndiyədək muxtar respublikamızda kənd təsərrüfatının inkişaf etdirilməsi sahəsində görülən işlər onu sübut edir ki, aqrar sektor dövlətimizin prioritet qəbul etdiyi strateji istiqamətlərdəndir. Bu sahənin inkişafı üçün müxtəlif dövlət proqramlarının qəbul edilməsi, sahibkarlar, xüsusilə torpaq mülkiyyətçiləri ilə keçirilən görüşlər, dövlət tərəfindən bu sahə ilə məşğul olanlara hərtərəfli yardımların göstərilməsi aqrar bölmənin inkişaf perspektivlərini müəyyənləşdirməyə imkan vermişdir. Naxçıvan Muxtar Respublikası Ali Məclisinin Sədri də indiyədək keçirilən müşavirələrdə kənd təsərrüfatı sahəsində qarşıya qoyulan vəzifələrin icrasının vacibliyini dəfələrlə vurğulamış, bu sahənin gələcək inkişafı daha çox müzakirə predmetinə çevrilmişdir.

Müasir dövrdə iqtisadiyyatın şaxələndirilməsi ilə idxaldan asılılığın azaldılması istiqamətində görülən işlərdən biri də tütünçülüyün inkişaf etdirilməsidir. Artıq ötən ildən muxtar respublikamızda yenidən tütün əkilməsinə başlanılıb. İlk olaraq Kəngərli rayonunda 8 hektar sahədə sınaq məqsədilə məhsuldar “Virciniya” və “Oriental” tütün sortları əkilib, 12 tona yaxın quru tütün istehsal olunub. “Cahan Tabak Beynəlxalq” Məhdud Məsuliyyətli Cəmiyyəti tütünü münasib qiymətlərlə qəbul edir. Bu da torpaq mülkiyyətçilərinin tütünçülüyə marağını artırıb. Cari ildə Kəngərli ilə yanaşı, Şərur və Babək rayonları ərazisində də, ümumilikdə, 41 hektar sahədə tütün əkilib və 50 tondan artıq məhsul götürülməsi proqnozlaşdırılır.
Dünən isə “Cahan Tabak Beynəlxalq” MMC-nin nəzdində yaradılmış Tütünyetişdirmə Mərkəzində Kəngərli rayonunda tütünçülüklə məşğul olan 22 torpaq mülkiyyətçisinə onların tədarük etdikləri məhsulun dəyəri ödənilib. “Cahan Holdinq” Kommersiya Şirkətləri İttifaqının aparat rəhbəri Azər Cəfərov bildirib ki, tütünçülərin bu sahədən yaxşı gəlir əldə etməsi üçün onlara hər cür köməklik göstərilir, tütün şitillərinin yetişdirilməsi, əkinlərə aqrotexniki qulluq göstərilməsi, şumlama, kağlama və digər işlərdə müasir texnikalardan istifadə edirlər. O həmçinin qeyd edib ki, tütün əkini məqsədilə, ümumiyyətlə, 500 nəfərə yaxın yerli sakinin müqavilə ilə məşğulluğu təmin olunub. Tütünçülər isə gələcəkdə daha yaxşı çalışacaqlarını bildirib, yaradılan şəraitə görə dövlətimizə min­nətdarlıq ediblər.

Xəbərlər şöbəsi

Muxtar respublikada suvarmanın mütəşəkkil təşkili diqqət mərkəzindədir. 2018-ci ilin yanvar-sentyabr aylarında Naxçıvan Muxtar Respublikası ərazisində su istifadəçilərinə 225 milyon kubmetr suvarma suyu verilmiş, təkrar suvarma da daxil olmaqla, 188 min 273 hektar torpaq sahəsi suvarılmışdır. Bu dövrdə 189 kilometr beton və torpaq kanal, 252 kilometr ara arxlar lildən təmizlənmiş, 62 kilometr yeni suvarma boru xətti, 9 kilometr yeni içməli su xətti çəkilmiş, 17 kilometr suvarma boru xətti, 46 kilometr içməli su xətti təmir-bərpa olunmuşdur. Həyata keçirilən tədbirlərin nəticəsidir ki, melioratorlar payız suvarma mövsümünə tam hazırdırlar.
Bu ilin ötən dövründə Kəngərli rayonunun Böyükdüz kəndindəki 600 hektar sahədə qapalı suvarma şəbəkəsinin tikintisi də davam etdirilmiş, müxtəlif diametrli borularla 48 min 977 metr boru xətti çəkilmişdir. “Rayon mərkəzi və ətraf kəndlərin içməli su təchizatı və kanalizasiya sistemlərinin yenidən qurulması” layihəsi çərçivəsində isə Şahbuz şəhər çirkab sutəmizləyici qurğuda tikinti işləri davam etdirilmişdir.

Naxçıvan Muxtar Respublikası
Dövlət Meliorasiya və Su Təsərrüfatı Komitəsinin mətbuat xidməti

Muxtar respublikada daşınmaz əmlakın kadastrı və reyestrinin mütəmadi olaraq təkmilləşdirilməsi, eləcə də torpaq münasibətlərinin tənzimlənməsi sahəsində qarşıya qoyulmuş vəzifələrin icrası 2018-ci ilin ötən dövründə diqqətdə saxlanılmışdır.

Naxçıvan şəhəri və ətraf yaşayış məntəqələrində, Şərur rayonunun Düdəngə, Zeyvə, Danyeri, Tənənəm, Xələc, Ələkli, Arbatan, Cəlilkənd, Sərxanlı, Dəmirçi, Axura, Dizə, Həmzəli, Muğancıq-Müslüm, Oğlanqala və Aşağı Yaycı, Babək rayonunun Zeynəddin və Araz kəndlərində daşınmaz əmlak obyektlərinin plana alınması başa çatdırılmış, cari ilin 9 ayı ərzində 14 min 237 daşınmaz əmlak obyekti plana alınmışdır. Həmçinin Şərur rayonu üzrə 10, Babək rayonu üzrə 27, Culfa rayonu üzrə 2 bələdiyyənin sərhəd xəritələri və müvafiq yerquruluşu sənədləri, Şahbuz və Sədərək rayonları üzrə bütün bələdiyyələrin mövcud mülkiyyət növləri üzrə torpaq sahələrinin elektron kadastr xəritələri hazırlanmışdır.
Bu ilin yanvar-sentyabr aylarında muxtar respublika üzrə 4030 daşınmaz əmlak obyekti qeydiyyata alınmış, yeni yaranmış 494 daşınmaz əmlak obyektinə ünvan verilmişdir. Komitənin səyyar xidmət qrupu tərəfindən isə muxtar respublika üzrə 69 yaşayış məntəqəsində 579 vətəndaşın müraciətinə baxılmışdır.

Naxçıvan Muxtar Respublikası
Daşınmaz Əmlak və Torpaq Məsələləri üzrə Dövlət Komitəsinin mətbuat xidməti

Naxçıvan Muxtar Respublikası Dövlət Nəqliyyat Xidməti 2018-ci ilin 9 ayı ərzində muxtar respublika əhalisinə göstərilən avtonəqliyyat xidmətinin səviyyəsinin yüksəldilməsi üçün bir sıra tədbirlər həyata keçirmişdir. Belə ki, daşımalarla məşğul olan hüquqi və fiziki şəxslərlə maarifləndirici söhbətlər aparılmış, avtobuslar və mikroavtobuslar texniki müayinədən keçirilmişdir. Sürücülər üçün Naxçıvan Şəhər Təsərrüfathesablı Nəqliyyat İdarəsində “Tibbi müayinə otağı” yaradılmışdır. Avtovağzalların payız-qış mövsümünə hazırlığı da diqqətdə saxlanılmış, şəhərlərarası və rayonlararası marşrut avtobuslarının hərəkət qrafiki təkmilləşdirilmişdir.
2018-ci ilin 9 ayında İran İslam Respublikasından keçməklə Naxçıvan-Bakı-Naxçıvan avtobus marşrutu ilə Naxçıvandan Bakıya 11 min 944, Bakıdan Naxçıvana isə 12 min 678 sərnişin daşınmışdır. Avtonəqliyyat vasitələri ilə təhlükəsiz sərnişin daşınmasına, marşrut qrafikinə, xətdə olarkən avtobusların sürət həddinə nəzarət olunması üçün Naxtel-4G GPS monitorinq izləmə sistemindən istifadə edilmiş, sürücülərin həftədə bir dəfə qrup şəklində muzeylərə ekskursiyaları təşkil olunmuşdur.
Muxtar respublikanın bütün yaşayış məntəqələri marşrutla təmin edilmiş, 496 taksi əhaliyə xidmət ­göstərmişdir.

Naxçıvan Muxtar Respublikası
Dövlət Nəqliyyat Xidməti

Muxtar respublikada quruculuq tədbirlərinə start veriləndən qədim diyarımızın kənd yaşayış məntəqələri öz simasını əsaslı surətdə dəyişib. Belə tədbirlər ən böyük bölgələrimizdən biri olan Şərur rayonunu da əhatə edir. Qürur­verici haldır ki, bu gün bölgənin əksər kəndləri müasirlik donundadır və belə ünvanlarda kompleks quruculuq işləri həyata keçirilib.

Naxçıvanda elektromobil istehsal ediləcək. Bununla bağlı Naxçıvan Avtomobil Zavodunda hazırlıqlara başlanılıb. Layihənin qısa zamanda həyata keçirilməsi planlaşdırılır.
Naxçıvan Avtomobil Zavodunun direktoru Musa Abdullayev bildirib ki, bundan əlavə olaraq “LİFAN minivenləri”nin bazasında təcili tibbi yardım üçün istifadə oluna biləcək avtomobillərin 2019-cu ilin əvvəlində təcrübə-sınaq məqsədilə eksperimental nümunələrinin yığımı da həyata keçiriləcək.
Musa Abdullayev qeyd edib ki, 2010-cu ildən fəaliyyət göstərən zavodda bu günədək 5 mindən çox avtomobil istehsal olunub. Zavodda ilkin olaraq “Lifan” markalı 4 model avtomobil istehsal edilib və “NAZ Lifan” brendi altında satışa çıxarılır. Hazırda ticari avtomobillər də daxil olmaqla, 14 fərqli model istehsal edilir.
Naxçıvan Avtomobil Zavodunun direktoru qeyd edib ki, zavodda avtomobil sənayesində tətbiq olunan ən müasir dizayn, təhlükəsizlik və ekoloji normalara uyğun avtomobillər istehsal olunur. Bu illər ərzində satış və xidmət şəbəkəsi genişləndirilib, avtomobillərin keyfiyyətinə verilən zəmanət müddəti və yürüş məsafəsi artırılaraq 3 il və ya 150 min kilometrə çatdırılıb. Hazırda zavodda dizayn və parametrlərinə görə müasir biznes sedan olan “NAZ Lifan 820” və “NAZ Lifan 330” modelləri, satış sayına, keyfiyyətinə və dözümlülüyünə görə zavodun flaqmanı olan “NAZ Lifan 620” modelinin yeni dizayn və ekonomik mühərriklə təchiz edilmiş “NAZ Lifan 650” (“NAZ Lifan 620-II”) modeli və krossover sevənlər üçün xarici və daxili görünüşü yenilənmiş, yanacaq sərfiyyatı daha az olan mühərriklə təchiz edilən “NAZ Lifan X60” modeli istehsal olunur.
Direktor əlavə edib ki, zavodda istehsal olunan avtomobillərin maya dəyərinin aşağı salınması məqsədilə bəzi ehtiyat hissələrinin də istehsal olunması planlaşdırılır.

“Nuhçıxan” İnformasiya Agentliyi

Naxçıvan Muxtar Respublikası Dövlət Meliorasiya və Su Təsərrüfatı Komitəsinin mətbuat xidmətindən verilən məlumata görə, muxtar respublikada suvarmanı mütəşəkkil həyata keçirmək məqsədilə tərtib edilmiş qrafikə uyğun olaraq nasos stansiyalarında, hidrotexniki qurğularda təmir-bərpa işlərinin aparılması, kanallarda, arxlarda, kollektor və drenaj kanallarının lildən təmizlənməsi ötən dövrdə də diqqət mərkəzində saxlanılıb. Sututarlarda tələb olunan təmir işləri aparılıb və suvarma suyundan istifadəyə nəzarət artırılıb.
2018-ci ilin yanvar-sentyabr ayları ərzində Naxçıvan Muxtar Respublikası ərazisində olan Arpaçay Su Anbarına 130,8, Heydər Əliyev Su Anbarına 32,7, Bənəniyar Su Anbarına 15,4, Uzunoba Su Anbarına 7,2, Sirab Su Anbarına 4,6 milyon kubmetr olmaqla, ümumilikdə, sututarlara 195,3 milyon kubmetr su ehtiyatı yığılıb.
Su istifadəçilərinə 225,8 milyon kubmetr su verilib, bunun müqabilində 188 min 273 hektar torpaq sahəsi suvarılıb.
Cari aylarda 189 kilometr beton və torpaq kanal, 252 kilometr ara arxlar lildən təmizlənib, 62,7 kilometr yeni suvarma boru xətti, 9 kilometr yeni içməli su xətti çəkilib, 17 kilometr suvarma boru xətti, 46,6 kilometr içməli su xətti təmir-bərpa olunub.

Xəbərlər şöbəsi

Şahbuzlu zəhmət adamları bu fikirdədirlər

Muxtar respublikamızın iqlim şəraiti və hələ qədim dövrlərdən bəri əhalinin, əsasən, kənd təsərrüfatı ilə məşğul olması burada əkinçilik mədəniyyətinin formalaşmasını şərtləndirən amillərdən biridir. Əkin sahələrinin ildən-ilə genişləndirilməsi diyarımızı ölkəmizin ən çox kənd təsərrüfatı məhsulları istehsal edən regionlarından birinə çevirib.

Ümummilli liderimiz Heydər Əliyevin rəhbərliyi altında Azərbaycanda aqrar islahatların aparılmasına ilk dəfə Naxçıvanda başlanılması da təsadüfi deyil. Muxtar respublikamızda özəl mülkiyyətə əsaslanan aqrar münasibətlərin formalaşdırılmasında isə Naxçıvan Muxtar Respublikası Ali Məclisi Sədrinin sərəncamları ilə təsdiq edilmiş və icrası uğurla başa çatmış “Naxçıvan Muxtar Respublikasında kartofçuluğun inkişafı üzrə Dövlət Proqramı (2005-2010-cu illər)”, “2008-2015-ci illərdə Naxçıvan Muxtar Respublikasında əhalinin ərzaq məhsulları ilə etibarlı təminatına dair Dövlət Proqramı”, həmçinin icrası davam etdirilən “Naxçıvan Muxtar Respublikasının 2014-2018-ci illərdə sosial-iqtisadi inkişafı Dövlət Proqramı” və “2016-2020-ci illərdə Naxçıvan Muxtar Respublikasında meyvəçiliyin və tərəvəzçiliyin inkişafı üzrə Dövlət Pro­qramı”nın mühüm rolu vardır.

Naxçıvan şəhərinin Heydər Əliyev prospekti son illərin quruculuq, abadlıq tədbirlərindən pay alaraq yeni simasına qovuşub, binalarda aparılan təmir-bərpa işləri sayəsində sakinlərin mənzil-məişət şəraiti xeyli yaxşılaşıb. İnşa olunan yeni yaşayış binası da gələcəkdə sakinləri yüksəkkeyfiyyətli rahat mənzillərlə təmin edəcək.
Zirzəmi ilə birlikdə 4 blok və 7 mərtəbədən ibarət olan yaşayış binasının inşasına ötən ilin oktyabr ayından başlanılıb. “Gəmiqaya” Məhdud Məsuliyyətli Cəmiyyətinin inşaatçıları hazırda obyektin tikintisini sürətlə həyata keçirir. İnşaatçılar geyim formaları və lazım olan avadanlıqlarla təmin ediliblər.
Binanın birinci blokunun 4-cü, digər blokların isə 5-ci mərtəbələrində qəlib-beton işləri görülür. Zirzəmiyə hörgü-suvaq vurulur, digər mərtəbələrdə isə hörgü aparılır.
Layihəyə əsasən yaşayış binasında lift quraşdırılacaq. Zirzəmidə 29 yerlik avtomobil dayanacağı yaradılacaq, birinci mərtəbədə 12 mağaza istifadəyə veriləcək. Obyektdə kifayət qədər işçi qüvvəsi çalışır. Tikintidə, əsasən, yerli inşaat materiallarından istifadə edilir, keyfiyyət amilinə xüsusi önəm verilir.

* * *

Bu ilin may ayından Naxçıvan şəhərində polis məktəbi üçün kompleks tikilir. Məktəb kompleksinə tədris korpusu, qərargah, yeməkxana və yataqxana binaları daxildir.
İkimərtəbəli tədris korpusunda laboratoriyalar, kitabxana, sinif, həmçinin elektron sinif otaqları daxil olmaqla, digər otaqlar da fəaliyyət göstərəcəkdir. Burada orta ixtisas təhsilli polis əməkdaşlarının hazırlanması üçün ən müasir şərait yaradılacaq.
Kompleksin ərazisində yaşıllıqlar salınacaq və müasir işıqlandırma sistemləri qurulacaqdır.

Xəbərlər şöbəsi

Muxtar respublikamızda həyata keçirilən iqtisadi siyasətin əsas məqsədlərindən biri də ərzaq təhlükəsizliyinin təmin edilməsidir. Bunun üçün daxili bazarın tələbatına uyğun yerli məhsul istehsal edən müəssisələrin yaradılması istiqamətində məqsədyönlü tədbirlər həyata keçirilir. Məhz həmin tədbirlərin nəticəsidir ki, muxtar respublikada bazar iqtisadiyyatının tələblərinə uyğun rəqabətqabiliyyətli müəssisələrin sayı artır. Yaradılan müəssisələr bir tərəfdən, ərzaq və qeyri-ərzaq məhsullarının bolluğuna, digər tərəfdən isə əhalinin məşğulluğunu təmin edir. 

Belə müəssisələrdən biri də Naxçıvan şəhərində fəaliyyət göstərən “Gəmiqaya Bərəkət Qida Məhsulları” Məhdud Məsuliyyətli Cəmiyyətidir. Yaxın günlərdə müəssisədə olduq və öyrəndik ki, dövlət maliyyə dəstəyi ilə müəssisədə 2003-cü ildə çörək, 2004-cü ildə makaron və peçenye, 2005-ci ildə isə süd məhsulları istehsalı sahələri yaradılıb. Bu sahələrdə Almaniya, Türkiyə və İtaliya istehsalı olan müasir texnoloji avadanlıqlar quraşdırılıb. Müəssisənin fəaliyyətinin genişləndirilməsi, müasir texnoloji avadanlıqlar tətbiq olunmaqla istehsal gücünün artırılması, yeni istehsal sahələrinin yaradılması və əlavə işçi qüvvəsinin cəlb edilməsi məqsədilə Naxçıvan Muxtar Respublikasının Sahibkarlığın İnkişafı Fondundan 2008-ci ildə əlavə dövlət maliyyə dəstəyi göstərilib. Bu vəsaitlə çörək sexində avtomatik xətt istifadəyə verilib. Burada 5 növ undan çörək istehsal olunur. Çörəyin dəmir üzərində deyil, daş üzərində bişirilməsi onun daha keyfiyyətli olmasına imkan verir. Onu da qeyd edək ki, artıq bir neçə aydır müəssisədə “boradin” çörəyi də bişirilir. Bu çörək digərlərindən tərkibindəki vitaminlərə görə fərqlənir.

Naxçıvan Muxtar Respublikası Maliyyə Nazirliyi yanında Maliyyə Tədris Mərkəzi büdcə təşkilatlarının maliyyə və mühasibatlıq işində çalışanların mövcud biliklərinin artırılması və ixtisaslarının təkmilləşdirilməsi istiqamətində işlərini davam etdirir.
Tədris mərkəzi növbəti təlimə hərbi və hüquq-mühafizə orqanlarında çalışan maliyyə və mühasibatlıq üzrə mütəxəssisləri dəvət edib. Bu sahə üçün xüsusi hazırlanmış kursa 2018-ci il 2-5 oktyabr tarixlərdə Naxçıvan Muxtar Respublikası Ədliyyə Nazirliyində və onun Penitensiar Xidmətində, Vergilər Nazirliyində, Dövlət Gömrük Komitəsində, Daxili Qoşunların “Naxçıvan” Əlahiddə Əməliyyat Briqadasında çalışan 18 mütəxəssis cəlb olunub.
“Büdcə təşkilatlarında praktik mühasibatlıq” adlı kurs 5 moduldan ibarət olaraq Naxçıvan Muxtar Respublikası Maliyyə və Vergilər nazirliklərinin, eləcə də Naxçıvan Muxtar Respublika Prokurorluğunun ekspertlərinin təqdimatları üzrə mərkəzin tədris zalında keçirilir. Təkmilləşdirici kursda Milli Mühasibat Uçotu Standartlarına əsasən hüquq­-mühafizə orqanlarında maliyyə-­mühasibat işinin aparılması, xəzinə əməliyyatlarının təşkili və uçotu, vergi uçotunun təşkili, hərbi hissələrdə və hüquq-mühafizə orqanlarında maliyyə hesabatlarının hazır­lanması mövzuları ilə yanaşı, tədris prosesində ilk dəfə olaraq “Mühasibat uçotu işinin aparılması ilə əlaqədar hüquqi məsuliyyət” mövzusu üzrə məlumatların da əhatəli şəkildə iştirakçılara çatdırılması nəzərdə tutulub.

Bakıda Heydər Əliyev Mərkəzində IX Azərbaycan-Rusiya Regionlararası Forumu keçirilib.
Azərbaycanın İqtisadiyyat Nazirliyi və Rusiyanın İqtisadi İnkişaf Nazirliyinin təşkilatçılığı ilə keçirilən forumda Azərbaycan və Rusiya tərəfdən dövlət qurumlarının, parlamentlərin, icra hakimiyyəti orqanlarının nümayəndələri, iqtisadiyyatın müxtəlif sahələrində fəaliyyət göstərən sahibkarlar və mətbuat işçiləri iştirak ediblər.
Forum çərçivəsində Azərbaycan­-Rusiya və Rusiya-Azərbaycan İşgüzar Şuralarının geniş tərkibdə iclası keçirilib. Tədbirdə hər iki ­ölkədən rəsmi şəxslərlə yanaşı, sənaye, tikinti, bank, qida, maşınqayırma, metallurgiya, nəqliyyat, əczaçılıq və digər sahələrdə fəaliyyət göstərən şirkətlərin nümayəndələri iştirak ediblər.

Muxtar respublikamızda sahibkar­lıq fəaliyyətinin genişləndirilməsi müxtəlif növ və çeşiddə yerli məhsulların istehsalı üçün əlverişli şərait yaradıb. İstehsal məkanı Naxçıvan olan hər bir məhsulun keyfiyyətinə hər yerdə yüz faiz təminat verildiyi bir dövrdə belə məhsulların brendləşdirilərək satışa çıxarılması və ixrac olunması artıq günün ­tələbinə çevrilib.

Pərakəndəçiliklə bağlı mövzuya qəzetimizin ötən saylarında bir neçə dəfə toxunmuşuq. Mövzuya yenidən qayıtmağımızın səbəbi odur ki, bu sektor biznesin aynası sayılır və istənilən ölkədə iqtisadiyyatın lokomotivi hesab olunur. Eyni zamanda istehsalçı ilə istehlakçını görüşdürən, iqtisadi dildə desək, tələb və ehtiyacları tənzimləyən, keyfiyyətli məhsulu tanıdan, brendə çevirən, keyfiyyətsiz məhsulu isə bazardan çıxaran böyük bir sektordur. Maraqlı burasıdır ki, pərakəndəçilik sektoru həm də  istehsalçılara birbaşa məhsulu necə istehsal etməyi diktə edən bir şəbəkədir. Məhz bu şəbəkənin ortaya qoyduğu nəticələrlə sahibkarlar bazarın tələbini anlayır, hansı məhsulu nə zaman və necə satışa təqdim etməyi planlaşdırırlar. Təbii ki, zaman keçdikcə pərakəndəçilik sektoru da inkişaf edir, bir sıra yenilikləri özündə cəmləşdirir. Fikir versək, görərik ki, ölkəmizdə bu sektorun yaşı, elə müstəqilliyimizin yaşı qədərdir. Çünki pərakəndəçilik bazar iqtisadiyyatına məxsus iqtisadi meyarları özündə cəmləşdirir. 

Sentyabr ayının 27-də Naxçıvan Biznes Mərkəzində Beynəlxalq Ticarət Mərkəzinin (İTC) dəstəyi ilə Avropa İttifaqına məhsul ixracı imkanları, bazar tələbləri, müasir marketinq alətləri, beynəlxalq sərgilərdə iştirak qaydaları və daha yaxşı nəticələrin əldə edilməsi mövzularında təlim təşkil edilib.
Təlim müddətində marketinq və təbliğat işinin təşkili, logistika və nəqliyyat imkanlarından səmərəli istifadə, məhsulların qablaşdırılması, məhsul istehsalına dair beynəlxalq standartlar, Avropa istehlakçılarının tələbləri və bu kimi bir çox məsələyə dair müzakirələr aparılıb və beynəlxalq təcrübə haqqında sahibkarlar məlumatlandırılıblar.
Mərkəzin dəstəyi ilə 2018-ci il 21-25 oktyabr tarixlərdə Paris şəhərində keçiriləcək “Sial-Paris” beynəlxalq qida sərgisində muxtar respublikadan iştirak edəcək 4 şirkətin nümayəndələrinə alıcı şirkətlərlə biznes görüşlərin təşkili qaydaları və səmərəli təbliğat işinin qurulması sahəsində tövsiyələr verilib.
Təlimdə Amerika Birləşmiş Ştatlarının “Konsaltinq” şirkətinin vitse­-prezidenti, ixrac üzrə ekspert Şon Dulin və Beynəlxalq Ticarət Mərkəzinin Azərbaycan üzrə layihə rəhbəri Eldar Adilzadə iştirak ediblər.

Naxçıvan Muxtar Respublikası
İqtisadiyyat Nazirliyinin mətbuat xidməti

Muxtar respublikamızda əhalinin əsas məşğulluq sahəsi olan kənd təsərrüfatının inkişafına göstərilən dövlət qayğısı sayəsində bu sahəyə maraq getdikcə artır. Diyarımızın bütün bölgələrində aqrar sahədə qazanılan uğurlar da bununla bağlıdır. Ordubad rayonunda da son illər əldə edilən nailiyyətlər nəzərəçarpacaq dərəcədə diqqət çəkir. “Kənd təsərrüfatı məhsullarının istehsalçılarına dövlət dəstəyi haqqında” Azərbaycan Respublikası Prezidentinin 2007-ci il 23 yanvar tarixli Sərəncamının icrası ilə bağlı məhsul istehsalçılarına istifadə etdikləri yanacaq, motor yağlarına görə yardımların və gübrələrin verilməsi diqqətdə saxlanılır.
Rayonda torpaq mülkiyyətçilərinin daha çox məşğul olduğu sahələrdən biri taxılçılıqdır. Bu ilin məhsulu üçün ötən ilin payızında 1678 hektar sahədə aparılmış əkindən 4747 ton taxıl tədarük edilib. Hektarın orta məhsuldarlığı 28,2 sentnerə çatdırılıb. Rayonun Dəstə, Vənənd, Aza, Düylün və digər kəndlərində məhsuldarlıq daha yüksək olub.
Çəkdikləri zəhmətin bəhrə verdiyini görən torpaq mülkiyyətçiləri yenə də sahələrdədir. Onlar gələn ilin bol məhsulunun əsasını qoymaq üçün şum qaldırılması ilə məşğuldurlar. Artıq sahələrə şum traktorları çıxarılıb. Sentyabr ayının 1-nə olan məlumata görə, 245 hektar sahədə şum qaldırılıb. Mexanizatorlar şumun keyfiyyətlə aparılmasını diqqət mərkəzində saxlayıblar. Bu təsərrüfat tədbirinin vaxtında başa çatdırılması üçün rayonda hərtərəfli şərait yaradılıb.

Xəbərlər şöbəsi

Muxtar respublikada əlverişli biznes və sa­hibkarlıq mühitinin yaradılması iqtisadi inkişafda özəl bölmənin gücünü bir neçə dəfə artırıb.

Naxçıvan Muxtar Respublikasında infrastrukturun yenilənməsi, müasir müəssisələrin, yeni iş yerlərinin yaradılması istiqamətində sistemli tədbirlərin həyata keçirilməsi uzunmüddətli və hərtərəfli inkişaf konsepsiyasının reallaşdırılmasına əsaslı töhfələr verib.
Ötən dövrdə sahibkarlığın inkişaf etdirilməsinə göstərilən dövlət qayğısı nəticəsində istehsal müəssisələrinin sayı artıb, yerli məhsulların növ və çeşidinin həcmi yüksələn xətt üzrə inkişaf edib. Bu da, öz növbəsində, ümumi inkişafın əsas göstəricisi olan ümumi daxili məhsul istehsalının həcmini artırıb. Naxçıvan Muxtar Respublikası Dövlət Statistika Komitəsinin ilin ilk 8 ayının sosial-iqtisadi yekunlarına dair açıqladığı hesabatda qeyd olunur ki, muxtar respublikada 2018-ci ilin yanvar-avqust aylarında 1 milyard 757 milyon 595 min 400 manatlıq ümumi daxili məhsul istehsal olunub. Bu, 2017-ci ilin müvafiq dövrü ilə müqayisədə 1,4 faiz çoxdur.
Hər bir nəfərə düşən ümumi daxili məhsulun həcmi isə 2017-ci ilin müvafiq dövrü ilə müqayisədə 2,2 faiz artaraq 3872 manatı ötüb.

Son illər muxtar respublikamızda həyatın bütün sahələrində genişmiqyaslı quruculuq işləri görü­lür, insanların firavan yaşayışı, səmərəli iş fəaliyyəti təmin olunur. Tarixi keçmişimizə işıq salan binaların yenidən qurulması da mühüm əhəmiyyətli məsələ kimi diqqətdə saxlanılır. Cari ilin iyun ayının əvvəllərindən etibarən Naxçıvan şəhərinin Atatürk küçəsindəki 6 nömrəli binada da yenidənqurma işləri aparılır. Görülən işlərdə binanın tarixi görkəminin və memarlıq quruluşunun saxlanılmasına xüsusi diqqət yetirilir. Naxçıvan Şəhər Abadlıq və Təmir-Tikinti İdarəsinin inşaatçılarının çalışdığı obyektdə texniki təhlükəsizlik qaydalarına ciddi əməl olunur. İş icraçısı Qabil Yusifovdan aldığımız məlumata görə, hazırda binada söküntü işləri yekunlaşıb, daxildə arakəsmələr hörülür, fasad hissədə isə beton-bərkitmə işləri aparılır.
Qeyd edək ki, tikinti işləri başa çatdıqdan sonra binada Naxçıvan Muxtar Respublikasının Turizm Departamenti və Cəmşid Naxçıvanskinin ev-muzeyi yerləşəcək. Binanın ətrafında da abadlıq işləri aparılacaq, yeni park salınacaq. Parkda Naxçıvan Muxtar Respublikasının turizm marşrutlarının xəritəsini və tarixi abidələrinin görüntülərini əks etdirən stendlər qoyulacaq.
Doğma Naxçıvanımızda aparılan uğurlu siyasətin bəhrələri günü-gündən özünü daha qabarıq şəkildə büruzə verir. Görülən işlər isə birmənalı olaraq bu yurdun insanlarının rahatlığına, firavanlığına, parlaq gələcəyinə hesablanıb. Əminliklə demək olar ki, gələcək illərdə Oğuz yurdu nəinki Avropa məkanında, hətta dünya miqyasında özünəməxsusluğu ilə seçilən diyara çevriləcək.

Xəbərlər şöbəsi

Muxtar respublikamızda əhalinin əsas qida məhsullarına olan tələbatının fasiləsiz və dayanıqlı şəkildə yerli istehsal hesabına ödənilməsini təmin etmək üçün ardıcıl tədbirlər görülür. Həyata keçirilən işlər aqrar istehsalın inkişafında yeni mərhələ olmaqla yanaşı, torpaqdan düzgün və səmərəli istifadəni də günün tələbinə çevirib.
Naxçıvan Muxtar Respublikası Ali Məclisinin Sədri muxtar respublikada əkinəyararlı torpaqlardan səmərəli istifadə edilməsi, bu məsələyə dövlət nəzarətinin gücləndirilməsi barədə tapşırıqlar verib, aid mərkəzi və yerli icra hakimiyyəti orqanları qarşısında konkret vəzifələr müəyyənləşdirərək deyib: “Bu gün torpaqlardan səmərəli istifadə qarşıda duran əsas vəzifələrdəndir. Əkinəyararlı torpaq sahələrinin məhdudluğu nəzərə alınaraq əkinçiliyin inkişafında intensiv amillərə üstünlük verilməlidir. Kənd təsərrüfatına yararlı torpaqlardan digər məqsədlər üçün istifadənin qarşısı alınmalı, onların əkin dövriyyəsinə cəlb olunması istiqamətində tədbirlər görülməlidir”.
Verilmiş tapşırıqların və qarşıya qoyulmuş vəzifələrin icrası məqsədilə kənd təsərrüfatına yararlı torpaqların kateqoriyalar üzrə səmərəli istifadə istiqamətlərinin müəyyənləşdirilməsi, əkinəyararlı torpaq sahələrinin əkin dövriyyəsinə cəlb olunması üçün müvafiq tədbirlərin görülməsi, eroziya və şoranlaşmaya məruz qalmış torpaq sahələrinin dəqiqləşdirilməsi və xəritələşdirilməsi, əkinəyararlı torpaqlardan mövcud istifadə vəziyyətinə dair monitorinq­lərin aparılması Daşınmaz Əmlak və Torpaq Məsələləri üzrə Dövlət Komitəsi tərəfindən diqqət mərkəzində saxlanılır.

Bu gün informasiya-kommunikasiya texnologiyaları evimizin belə, ayrılmaz tərkib hissəsinə çevrilib. Dünyanın ən məşhur şirkətlərinin istehsalı olan həmin texnologiyalar müxtəlif informasiyaların, elmi yeniliklərin, statistik göstəricilərin və digər məlumatların əldə olunmasında hamımızın yaxın köməkçisidir. Onu da qeyd edək ki, informasiya-kommunikasiya texnologiyaları bu gün özünün ən müasir inkişaf mərhələsindədir. Onlardan səmərəli istifadə üçün muxtar respublikamızda da geniş imkanlar yaradılıb. 

Bir vaxtlar heç kimin ağlına belə gəlmədiyi texnologiyalar vasitəsilə bu gün dünyanın müxtəlif ölkələrinin televiziya kanallarını evlərimizdə rahatlıqla izləyir, müasir antennalar vasitəsilə mobil telefonlarımızla ən uzaq məsafələrlə əlaqə yarada bilirik. Hər il bu texnologiyaların tətbiqi ilə bağlı muxtar respublikamızda məqsədyönlü tədbirlər həyata keçirilir. Muxtar respublika ərazisinin tamamilə fiber-optik kabellə və internetlə təmin olunması da sübut edir ki, ölkə və dünya miqyasında tətbiq olunan yeniliklərin Naxçıvanda da tətbiq edilməsi diqqət mərkəzində saxlanılır. Bu həm də yeni mütəxəssislərin yetişdirilməsini tələb edir. Muxtar respublikanın ən böyük ali təhsil müəssisəsi olan Naxçıvan Dövlət Universitetində müvafiq ixtisaslar Rabitə və Yeni Texnologiyalar Nazirliyinə hamiliyə verilib. Bu sahə üzrə yetişdirilən mütəxəssislər təcrübə toplamaq məqsədilə başqa ölkə­lərə göndərilirlər. Yeni texnologiyalar sahəsində dünyanın ən böyük şirkətlərindən biri olan “Huawei” şirkəti ilə əməkdaşlıq yeni müstəvidə davam etdirilir.

Muxtar respublikada 2018-ci ilin yanvar-avqust aylarında 1 milyard 757 milyon 595 min 400 manatlıq ümumi daxili məhsul istehsal olunmuşdur ki, bu da 2017-ci ilin müvafiq dövrü ilə müqayisədə 1,4 faiz çoxdur.
Hər bir nəfərə düşən ümumi daxili məhsulun həcmi 2017-ci ilin müvafiq dövrü ilə müqayisədə 2,2 faiz artaraq 3872 manatı ­ötmüşdür.

* * *

Muxtar respublikada yaranan ümumi daxili məhsulun tərkibində ilk yeri sənaye sahəsi tutur. Sənaye üzrə 726 milyon 450 min manat dəyərində məhsul istehsal edilmişdir. Bu da 2017-ci ilin müvafiq dövrü ilə müqayisədə 1,5 faiz çoxdur.

* * *

Vəsait qoyuluşları çərçivəsində 2018-ci ilin yanvar-avqust aylarında muxtar respublikada bütün maliyyə mənbələrindən əsas kapitala 646 milyon 45 min manat vəsait yönəldilmişdir ki, bu da bir il öncəki göstəricidən 1,6 faiz çoxdur. Əsas kapitala yönəldilmiş vəsaitin 608 milyon 606 min manatı və ya 94,2 faizi tikinti-quraşdırma işlərinin payına düşmüşdür.

* * *

2018-ci ilin yanvar-avqust aylarında 293 milyon 730 min 900 manatlıq kənd təsərrüfatı məhsulları istehsal olunmuşdur. Bu da 2017-ci ilin müvafiq dövrü ilə müqayisədə 3,8 faiz çoxdur. Bu dövr ərzində diri çəkidə ət istehsalı 13969 tona, süd istehsalı isə 67148 tona çatmışdır. 2017-ci ilin müvafiq dövrü ilə müqayisədə ət istehsalı 5,9 faiz, süd istehsalı isə 1,7 faiz artmışdır.

Sentyabrın 17-də Rusiya Federasiyasının paytaxtı Moskva şəhərində “Worldfood Moscow 2018” sərgisi keçirilib. Sərgidə İqtisadiyyat Nazirliyinin dəstəyi və Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə “Made in Azerbaijan” vahid ölkə stendində qida, meyvə-tərəvəz, şərab və digər spirtli içkilər, fındıq və qurudulmuş meyvə, çay, konservləşdirilmiş məhsullar, qənnadı məmulatları və digər məhsulların istehsalı və ixracı ilə məşğul olan 35 Azərbaycan şirkəti təmsil olunub.
Sərgidə Naxçıvan Muxtar Respublikasında fəaliyyət göstərən sahibkarlıq subyektlərindən “Ləzzət Qida Sənaye” MMC-nin və Babək “Sirab” ASC-nin nümayəndələri iştirak ediblər.
Tədbirdə “Made in Azerbaijan” vahid ölkə stendi altında “Ləzzət Qida Sənaye” MMC tərəfindən istehsal olunan vafli peçenyelər, şokoladlı vaflilər və lokumlar, Babək “Sirab” ASC-nin isə bütün növ “Sirab” mineral suları nümayiş olunub.
Tədbir zamanı hər iki sahibkarlıq subyektinin nümayəndələri Rusiya Federasiyası və xarici şirkət rəsmiləri ilə əməkdaşlıq imkanları barədə müzakirələr aparılıb.

Naxçıvan Muxtar Respublikası
İqtisadiyyat Nazirliyinin mətbuat xidməti

Cəmiyyətin hərtərəfli inkişafı üçün biliyin əsas şərt olduğu dövrümüzdə bilikli gənclərin yetişdirilməsi üçün müasir təhsil sisteminin yaradılması günümüzün əsas məsələlərindəndir. Bacarığı ilə ölkəmizin sərvətlərinə sahib çıxa bilən, əməyi ilə daha çox dəyər yaradan savadlı gənclər məhz mütərəqqi təhsillə ərsəyə gələn potensial kimi artıq iqtisadi-mədəni həyatımızın hər sahəsində qabiliyyətlərini ortaya qoymaqdadır. Müasir təhsil qurucu­luğunda etibarlı kadr təminatı və müasir infrastruktur yaradılması isə bu gün prioritet məsələlərdən biri­dir. Ölkəmizdə müəyyənləşdirilmiş “Maddi dəyərlərin, iqtisadi potensialın insan kapitalına çevrilməsi” prinsipi üzrə muxtar respublikamızda həyata keçirilən təhsil quruculuğu tədbirləri də məhz bu istiqamətdə davam etdirilməkdədir.
Naxçıvan Muxtar Respublikası bütün sahələrdə olduğu kimi, təhsildəki uğurları ilə də ölkəmizdə liderliyini qoruyur. İldən-ilə artan dövlət qayğısı nəticəsində yeni təhsil obyektlərinin istifadəyə verilməsi, maddi-texniki bazanın yenilənməsi və pedaqoji kadrların yeni təhsil üsullarını və informasiya-kommunikasiya texnologiyalarını mənimsəməsi bu sahədəki nailiyyətləri artıran əsas amillərdəndir. Artıq Naxçıvanda təhsilin bütün pillələri üzrə əldə olunan nəticələr iyirmi il əvvəlki göstəricilərdən on dəfələrlə artıq səviyyədədir. Orta məktəbi əla qiymətlərlə bitirib, ali məktəblərə qəbul imtahanlarında daha yüksək nəticələrlə müəllimlərini və ailələrini qürurlandıran gənclərin sayı çoxaldıqca hər birimiz ürəkdən sevinirik. Çünki gələcək həyatımız məhz onlara bağlıdır. Bu il avqust ayının 20-də Naxçıvan Muxtar Respublikası Ali Məclisi Sədrinin muxtar respublikanın ümumtəhsil məktəblərini bitirərək ali məktəblərə qəbul imtahanlarında yüksək bal toplamış tələbələrlə görüşü zamanı dediyi kimi: “Yalnız hərtərəfli təhsil alan, peşə öyrənən, özünü ölkəsinin gələcəyinə hazırlayan gənclər dövlətçiliyimizin və müstəqilliyimizin dayağı ola bilərlər”.

Son illər muxtar respublikamızda sahibkarlığın inkişafı sahəsində ardıcıl tədbirlər görülür, onların normal fəaliyyətinə hərtərəfli şərait yaradılır. Bunun nəticəsidir ki, artıq diyarımızda güclü sahibkarlar dəstəsi formalaşıb. Onlar yaradılan şəraitdən səmərəli istifadə edir, müasir texnologiyalara əsaslanan yeni istehsal və xidmət sahələri yaradılır.

Naxçıvan Muxtar Respublikası Maliyyə Nazirliyi yanında Maliyyə Tədris Mərkəzində büdcə təşkilatlarında çalışan maliyyə və mühasibatlıq işçilərinin iştirakı ilə“Büdcə təşkilatlarında praktik mühasibatlıq” mövzusunda təşkil olunan təlimlər davam edir.
Təlimlərə Naxçıvan Muxtar Respublikası Daxili İşlər Nazirliyinin, Naxçıvan Muxtar Respublikası Prokurorluğunun, Dövlət Miqrasiya Xidmətinin, “Naxçıvan” Əlahiddə Sərhəd Diviziyasının, Naxçıvan Muxtar Respublikası Fövqəladə Hallar Nazirliyinin Dövlət Yanğın Təhlükəsizliyi və Dövlət Tikintidə Təhlükəsizliyə Nəzarət idarələrinin, Mülki Müdafiə Alayının, ümumilikdə, 17 nəfər maliyyə və mühasibatlıq əməkdaşı cəlb olunub.
Kurs gündəliyə uyğun olaraq muxtar respublikanın Maliyyə və Vergilər nazirliklərinin ekspertlərinin təqdimatları üzrə davam etdirilir. Təlimlərdə müəssisələrdə Milli Mühasibat Uçotu Standartlarına əsasən hüquq-mühafizə orqanlarında maliyyə-mühasibat işinin aparılması, xəzinə əməliyyatlarının təşkili və uçot, vergi uçotunun təşkili, hərbi hissələrdə və hüquq-mühafizə orqanlarında maliyyə hesabatlarının ­hazırlanması ilə bağlı mövzular üzrə məlumatlar əhatəli şəkildə iştirakçıların diqqətinə çatdırılır.
Təlimlərdə praktik məsələ və testlərin həllinə yer ayrılır, təlimçilər ekspertlər tərəfindən müşahidə edilir ki, bu da, öz növbəsində, təlimin keyfiyyətinin artırılmasına müsbət təsir göstərir. Bundan əlavə, iştirakçılara tədris prosesində və öz günlük işlərində faydalı ola biləcək təlim materialları təqdim olunur. Burada tədris edilən slayd materialları, müvafiq sahə üzrə normativ-hüquqi aktlar, sənəd formaları, təlimatlar, qaydalar və misallar öz əksini tapır. Təlimlər praktik iş, suallara cavab, testlərin işlənməsi və sorğu-anketlərin doldurulması ilə zənginləşdirilir.
Qeyd edək ki, təlimin yekununda tədris olunan mövzu ilə bağlı qiymətləndirmə mərhələsindən sonra iştirakçılara Maliyyə Tədris Mərkəzinin sertifikatları təqdim ediləcəkdir.

Naxçıvan Muxtar Respublikası
Maliyyə Nazirliyinin mətbuat xidməti

Yer üzündəki ən işgüzar canlılardan olan arılar Tanrının təbiətə bəxş etdiyi möcüzələrdən biridir. Bir arı ailəsində hər arının gündəlik özünəməxsus işi var. Gözətçi, kəşfiyyatçı, döyüşçü, ana, hətta hava haqqında məlumat verən arılar...

İqtisadi inkişafın əsas şərti kimi makroiqtisadi sabitliyin qorunması və bu məqsədlə bank sektoru tərəfindən davamlı olaraq həyata keçirilən tədbirlər həmişə diqqəti cəlb edir. Bu baxımdan Naxçıvan Muxtar Respublikasında real sektora kredit qoyuluşunun artması və sahibkarların maliyyə resurslarına çıxış imkanlarının yaxşılaşdırılması nəticəsində bank sektorunun maliyyə dayanıqlılığı ötən dövr ərzində də uğurla təmin olunub. Sərfəli faiz dərəcələri ilə verilən kreditlər ümumi iqtisadi aktivliyin artırılmasında, sahibkarlığın inkişafında, məşğulluğun təmin olunmasında mühüm rol oynayır. 

Mərkəzi Bankın Naxçıvan Muxtar Respublikası İdarəsindən aldığımız məlumata əsasən muxtar respublikada fəaliyyət göstərən banklar və kredit təşkilatları tərəfindən 1 sentyabr 2018-ci il tarixə muxtar respublikanın iqtisadiyyatına yönəldilən kredit qoyuluşunun həcmi 106 milyon 93 min manata çatıb, burada qısamüddətli kredit qoyuluşunun həcmi 2 milyon 772 min manata, uzunmüddətli kredit qoyuluşu isə 103 milyon 321 min manata yaxın olub.