Naxçıvan Muxtar Respublikası Dövlət Şəhərsalma və Arxitektura Komitəsində keçirilən, 2016-cı ilin yekunlarına və qarşıda duran vəzifələrə həsr olunan kollegiya iclasını komitənin sədri Hicran Rüstəmov açaraq məruzə ilə çıxış edib.
Komitə sədri bildirib ki, 2016-cı il ərzində muxtar respublikada 98 milyon 535 min 200 manat həcmində tikinti işləri yerinə yetirilib. Belə ki, hesabat ilində Naxçıvan şəhərində 3 nömrəli, Naxçıvan şəhər Tumbul, Şərur rayonunun Arbatan, Oğlanqala, Babək rayonunun Xəlilli, Yarımca, Məzrə, Culfa rayonunun Gülüstan, Xanəgah, Saltaq, Kəngərli rayonunun Şahtaxtı, Yurdçu, Ordubad rayonunun Baş Dizə kənd­lərində tam orta məktəb, Şərur şəhərində Fizika-Riyaziyyat Təmayüllü Lisey, Naxçıvan Dövlət Texniki Kolleci binalarının tikintisi və yenidən qurulması başa çatdırılaraq istifadəyə verilib.
Bu dövrdə “Naxçıvan” Əlahiddə Sərhəd Diviziyasının ərazisində uşaq bağçasının yenidən qurulması başa çatdırılıb, Kəngərli rayonunda 222 yerlik uşaq bağçasının tikintisi davam etdirilir.
Vurğulanıb ki, Naxçıvan Muxtar Respublikası qədim abidələr və maddi-mədəniyyət nümunələri ilə zəngindir. Bəhs olunan dövrdə muxtar respublikada iki mühüm tarixi abidə bərpa edilib. Kəngərli rayonundakı Qarabağlar Türbə Kompleksində isə bərpa işlərinə başlanılıb.

Su insan üçün ən vacib nemətlərdəndir. Canlı həyatın yaranması və yaşaması üçün suyun nə dərəcədə əvəzedilməz olduğunu hər kəs bilir. İnsana lazım olan şirin su ehtiyatları təbiətdə çox məhdud və qeyri-bərabər şəkildə paylanıldığından ondan düzgün istifadə olunması ən vacib məsələlərdəndir. 

Su həyat mənbəyidir. Su olmasa, Yer üzündə heç bir canlı yaşaya bilməz. Planetdəki canlıların çoxalması ilə suya olan tələbat da artır. Bununla yanaşı, insanın mədəni tələbatları təmiz suya olan ehtiyacı daha da artırır.
Naxçıvan özünün iqlimi və relyef quruluşuna görə müxtəlif səviyyədə su ehtiyatlarına malikdir. Muxtar respublikada bəzi yerlərdə bütün ilboyu içməli su mənbəyi olan çox sayda bulaqlar çağladığı halda, bir çox yerlərdə belə su mənbələri olmadığından əhalinin suya olan tələbatı da təbii şəkildə ödənilmir. Bulaq suyu ən təmiz, ən gözəl sudur. Ancaq təbiət bunu hər yerə bəxş etmədiyindən təmiz suyu bütün insanların istifadəsinə çatdıra bilmək dövlətimizin sosial qayğısının mühüm bir hissəsini təşkil edir. Çünki təmiz suyun olmaması müəyyən müddətdən sonra normal həyatda ciddi çətinliklər yaradır.

Yeni Azərbaycan Partiyası Culfa Rayon Təşkilatının növbəti şura iclasında ötən il görülmüş işlər və qarşıda duran vəzifələr müzakirə olunub. Şura iclasında təşkilatın sədri, Naxçıvan Muxtar Respublikası Ali Məclisinin deputatı Qadir İbrahimov məruzə edib.
Bildirilib ki, 2016-cı ilin oktyabr ayında Yeni Azərbaycan Partiyasının rayondakı ilk təşkilatlarında hesabat-seçki yığıncaqları keçirilib. Aparılan struktur dəyişikliyinə görə ərazi ilk təşkilatlarının sayı 55-ə endirilib və bu ilk təşkilatlarda hesabat-seçki yığıncaqları keçirilib.
Qeyd olunub ki, 2016-cı ildə keçirilən referendumda rayon təşkilatı fəal iştirak edib, Konstitusiyamızda edilən əlavə və dəyişikliklər dəstəklənib.
Hesabat ili ərzində milli-mənəvi dəyərlərimizin qorunub saxlanmasına, onun inkişaf etdirilməsinə diqqətlə yanaşılıb. Belə ki, tarixi günlər, bayramlar və digər tədbirlər müntəzəm olaraq qeyd edilib.
Vurğulanıb ki, 1 yanvar 2017-ci il tarixə rayon təşkilatının və onun 55 ərazi ilk təşkilatının tərkibində 5435 nəfər Yeni Azərbaycan Partiyası üzvü uçotda durur. 2016-cı ildə 81 nəfər Yeni Azərbaycan Partiyası sıralarına qəbul olunub ki, onların da 39 nəfəri qadın, 67 nəfəri gəncdir.

Naxçıvan Muxtar Respublikası Dövlət Miqrasiya Xidmətində əcnəbilərin və vətəndaşlığı olmayan şəxslərin iştirakı ilə “Milli qəhrəmanlarımız və şəhidlərimiz” mövzusunda maarifləndirici tədbir keçirilib.

Tədbiri xidmətin əməkdaşı Samir Abbasov açaraq iştirakçılara xalqımızın azadlığı və torpaqlarımızın bütövlüyü uğrunda mübarizəsi, bu yolda canlarından keçən şəhidlərimiz və milli qəhrəmanlarımız haqda məlumat verib.
Slaydların nümayiş etdirildiyi tədbirdə Naxçıvan Muxtar Respublikası Mədəniyyət və Turizm Nazirliyinin əməkdaşı Əli Rzayev mövzu ilə bağlı məruzə edib.
Qeyd olunub ki, insan üçün həyatda ən gözəl və ən doğma şəxs onu dünyaya gətirən anadır. Ana müqəddəsdir və məhz müqəddəsliyinə görə Vətəni də anamız kimi sevir, ona “Ana Vətən!” deyirik. Vətən bizim varlığımız, fəxrimiz, qürurumuzdur. Vətən uğrunda, onun azadlıq və istiqlaliyyəti yolunda canını qurban verən, xalqın rifahı və xoşbəxtliyi naminə şəhid olan qəhrəmanlar heç vaxt unudulmur, öz ölümləri ilə ölümsüzlüyə qovuşurlar. Azərbaycan qəhrəmanlar yurdu, igidlər məskənidir. Neçə-neçə ərənlər yetişdirib bu müqəddəs torpaq, ulu diyar. Bu torpaq Babəklərin, Cavanşirlərin, Koroğluların vətənidir. Belə qəhrəmanlar həmişə yaşamışdır və daim yaşayacaqdır.

Azərbaycan və onun Naxçıvan Muxtar Respublikası ilə İran İslam Respublikası arasında əlaqələr uğurla inkişaf etdirilir. Bu əlaqələr son illərdə hər iki ölkə tərəfindən imzalanan sənədlər və əldə olunan razılıqlar nəticəsində daha da möhkəmlənib. Qarşılıqlı səfərlər əməkdaşlıq münasibətlərinin yeni mərhələyə qədəm qoymasına imkan verib. Yanvarın 24-də İran İslam Respublikasının Qərbi Azərbaycan Vilayətinin valisi Qurbanəli Səadətin rəhbərlik etdiyi nümayəndə heyəti Naxçıvan Muxtar Respublikasına gəlib.

Qərbi Azərbaycan Vilayətinin sənaye, mədən, kənd təsərrüfatı, tikinti sahələrində fəaliyyət göstərən iş adamları dünən Naxçıvan Biznes Mərkəzində muxtar respublikada istehsal olunan məhsullarla tanış olublar, naxçıvanlı sahibkar­larla görüşüblər.
Naxçıvan Muxtar Respublikasının iqtisadiyyat naziri Famil Seyidov qonaqlara məlumat verib ki, Naxçıvan Biznes Mərkəzinin əsas fəaliyyəti sahibkarların maarifləndirilməsi, onlara metodoloji dəstəyin göstərilməsi və biznesin inkişafı üzrə məsləhətlərin verilməsidir. Bildirilib ki, muxtar respublikada sahibkar­lığın inkişaf etdirilməsinə göstərilən dövlət dəstəyi sayəsində ümumi daxili məhsulda özəl sektorun payı 87 faizi ötüb. Hazırda muxtar respublikada 366 növdə məhsul istehsal olunur. 107-si ərzaq, 237-si qeyri-ərzaq olmaqla, 344 növdə məhsula olan tələbat tamamilə yerli istehsal hesabına ödənilir. Qonaqların diqqətinə çatdırılıb ki, hazırda mərkəzdə 100-ə yaxın istehsal və xidmət müəssisəsi tərəfindən istehsal edilən məhsullar nümayiş etdirilir.

Naxçıvan Muxtar Respublikası Həmkarlar İttifaqları Şurasında 2016-cı ilin yekunlarına və qarşıda duran vəzifələrə həsr olunmuş iclas keçirilib. İclasda Naxçıvan Muxtar Respublikası Həmkarlar İttifaqları Şurasının sədri Sucaxan Novruzov məruzə ilə çıxış edib.
Bildirilib ki, 2016-cı ildə sahibkarlıq fəaliyyəti ilə məşğul olmaq üçün 33 hüquqi və 2173 fiziki şəxsin dövlət qeydiyyatına alınması və 47 yerli istehsal və xidmət sahəsinin yaradılması nəticəsində Naxçıvan Muxtar Respublikası Həmkarlar İttifaqları Şurasının tabeliyində olan təşkilatların sıraları yeni yaranmış ilk həmkarlar təşkilatının hesabına genişlənərək 1564-ə çatıb, ittifaq üzvlərinin sayı isə 70 mini ötüb. Şura tərəfindən yeni yaranmış həmin təşkilatlarda maarifləndirmə məqsədilə tədbirlər keçirilib, işçilərin sosial-iqtisadi tələbatının ödənilməsi və əməyinin mühafizəsi mövzusunda söhbətlər aparılıb.

Azərbaycan Respublikasının Türkiyənin Qars şəhərindəki Baş Konsulluğu bu şəhərdə fəaliyyət göstərən Heydər Əliyev adına Anadolu Texniki-Peşə Liseyində 20 Yanvar faciəsinin 27-ci ildönümü ilə əlaqədar anım mərasimi keçirib.

Əvvəlcə şəhidlərimizin ruhuna “Qurani-Kərim”dən dualar oxunub.
Tədbirdə baş konsul Nuru Quliyev çıxış edərək 20 Yanvar faciəsinin başvermə səbəbləri və nəticələri barədə məlumat verib. Böyük insan itkisinə səbəb olan bu faciənin Azərbaycan xalqının dövlətçilik tarixinə qəhrəmanlıq salnaməsi kimi yazıldığını diqqətə çatdıran baş konsul qeyd edib ki, keçmiş SSRİ rəhbərliyi həmin hadisələrin əsl mahiyyətini o vaxt cidd-cəhdlə dünya ictimaiyyətindən gizlətməyə çalışırdı. Lakin həmin ağır günlərdə xalqımızla həmrəylik nümayiş etdirən ümummilli lider Heydər Əliyev həyatını təhlükə qarşısında qoyaraq Azərbaycanın Moskva şəhərindəki Daimi Nümayəndəliyinə gedərək 20 Yanvar faciəsini törədənlərin əsl simasını ifşa edib, bu cinayətin tam mahiyyətini açıqlayıb.
Sonra professor Xurşid İsayev və dosent Nəzakət Hüseynqızı çıxış edərək deyiblər ki, 1990-cı il yanvarın 19-dan 20-nə keçən gecə sovet qoşunlarının Azərbaycan xalqına qarşı törətdiyi hərbi cinayət uzun illər xalqların bərabərliyi, insan haqları, humanizm prinsipləri barədə saxta təbliğat aparan Kommunist Partiyasının əsl simasını ortaya qoyub. 20 Yanvar faciəsi təcavüzkar Ermənistanın Azərbaycana qarşı əsassız ərazi iddialarına qarşı etiraz edən xalqın azadlıq mübarizəsini boğmaq məqsədi daşıyırdı.
Mərasimdə Qars Böyükşəhər Bələdiyyəsinin sədri Murtaza Karaçanta, onun müavinləri, Ədalət və İnkişaf Partiyasının Qars vilayət təşkilatının sədri Adem Çalkın, Qafqaz Universitetinin prorektoru Selçuk Ural, digər rəsmi şəxslər, eləcə də Azərbaycanı və Türkiyəni təmsil edən ziyalılar, kütləvi informasiya vasitələrinin əməkdaşları iştirak ediblər.

“Şərq qapısı”

Qan yaddaşımızda yaşayan 1990-cı ilin yanvar qırğını nə qədər faciəli olsa da, Azərbaycan xalqının iradəsini, milli azadlıq uğrunda mübarizə əzmini qıra bilmədi. Həmin müdhiş gecədə həlak olan Vətən oğulları xalqın milli azadlığı, müstəqilliyi üçün yol açdılar, bugünkü müstəqil Azərbaycan dövlətinin tarixinə həmin faciəni xalqımızın şərəf və qəhrəmanlıq səhifəsi kimi yazdılar.

Şərur rayonu

20 Yanvar faciəsi qədim və zəngin tarixə malik Azərbaycan xalqının müstəqil dövlətçilik ənənələrini bərpa etmək uğrunda mübarizəsində mühüm mərhələ təşkil edir. Ölkəmizə qarşı ərazi iddiaları irəli sürən Ermənistanın təcavüzkar hərəkətlərindən və SSRİ rəhbərliyinin onlara havadarlığından hiddətlənən, Bakının küçələrinə və meydanlarına çıxaraq buna qəti etirazını bildirən geniş xalq kütlələrinə qarşı 1990-cı il yanvarın 20-də sovet ordusunun döyüş hissələrinin yeridilməsi ölkəmizdə misli­gö­rünməmiş faciəyə gətirib çıxardı. Ölkəmizin müstəqilliyi və ərazi bütövlüyü uğrunda şəhid olmuş qəhrəman övladlarımızı xalqımız dünən bir daha yad etdi. Şəhidlərimiz Şərur rayonunda da böyük hörmətlə anıldı.
Şərur rayonu muxtar respublikamızın ən böyük rayonlarından biridir. Ötən əsrin sonlarından başlayaraq muxtar respublikamızın digər sərhədyanı yaşayış məntəqələri kimi, Şərur rayonunun da sərhəd kəndləri mənfur ermənilərin hücumlarına məruz qalıb. Lakin igid şərurlular torpaqlarımızın bütövlüyü uğrunda Şərurda, Sədərəkdə, muxtar respublikamızın, eləcə də ölkəmizin müxtəlif bölgələrində qəhrəmanlıqla mübarizə aparıblar.
Dünən muxtar respublikamızın bütün bölgələrində olduğu kimi, Şərur rayonunda da şəhidlərimiz bir daha yad edildi. Rayon ictimaiyyətinin nümayəndələri Şərur şəhərindəki Şəhidlər xiyabanına gedərək şəhidlərin ölməz xatirəsinə ehtiramlarını bildirdilər, Vətən övladlarının məzarlarına tər qərənfillər düzdülər.

Yanvarın 18-də Azərbaycan Respublikasının İran İslam Respublikasının Təbriz şəhərindəki Baş Konsulluğunda 20 Yanvar faciəsinin 27-ci il­dönümü ilə əlaqədar anım mərasimi keçirilmişdir.
Tədbirdə şəhidlərin xatirəsi bir dəqiqəlik sükutla yad edilmişdir.
Sonra Azərbaycan Respublikasının Təbriz şəhərindəki Baş konsulu Əliyənnağı Hüseynov çıxış edərək demişdir ki, 20 Yanvar faciəsi Azərbaycan xalqının müstəqillik arzularını boğmaq, ermənilərin ərazilərimizin işğalına göz yummağa məcbur etmək məqsədinə xidmət etmişdir. Yanvarın 19-dan 20-nə keçən gecə qurbanlar verməsinə baxmayaraq, Azərbaycan xalqı milli azadlıq və istiqlal uğrunda mübarizliyini, əyilməzliyini, məğrurluğunu bir daha nümayiş etdirmişdir. Həmin dövrdə ilk dəfə xalqımızın ümummilli lideri Heydər Əliyev bütün təzyiqlərə baxmayaraq, yerli və xarici kütləvi informasiya vasitələrində bəyanatla çıxış edərək etiraz səsini ucaltmış, hadisəni törədənləri ifşa etmiş, günahkarların cəzalandırılmasını tələb etmişdir. Ulu öndər Naxçıvanda fəaliyyət göstərdiyi dövrdə, eləcə də ölkəmizdə yenidən hakimiyyətə qayıtdıqdan sonra isə 20 Yanvar faciəsinə siyasi qiymət vermişdir.

Naxçıvan Muxtar Respublikası Ali Məclisi Sədrinin 2017-ci il 18 yanvar tarixli Sərəncamı ilə daxili işlər orqanlarında səmərəli fəaliyyətinə görə bir qrup əməkdaş “Rəşadətli əməyə görə” nişanı ilə təltif edilib. Bu münasibətlə Naxçıvan Muxtar Respublikası Daxili İşlər Nazirliyində təqdimetmə mərasimi keçirilib.
Təqdimetmə mərasimində çıxış edən daxili işlər naziri, general-leytenant Əhməd Əhmədov bildirib ki, muxtar respublikanın daxili işlər orqanları Naxçıvan Muxtar Respublikası Ali Məclisi Sədrinin davamlı qayğısı ilə əhatə olunub. Əməkdaşların əməyinin yüksək qiymətləndirilməsi, mənzil-məişət şəraitlərinin yaxşılaşdırılması, digər problemlərinin həll edilməsi onların öz vəzifə borclarını yüksək səviyyədə yerinə yetirmələrinə stimul olub. Nazir diqqətə çatdırıb ki, Naxçıvan Muxtar Respublikası Daxili İşlər Komissarlığının yaradılmasının 93-cü ildönümü münasibətilə keçirilən tədbirdə bir qrup əməkdaşa nazirliyin “Əla xidmətlərə görə” döş nişanının, fəxri fərmanların, pul mükafatlarının verilməsi, bir neçə nəfərə təşəkkür elan edilməsi muxtar respublikada polis əməyinə verilən qiymətin ifadəsidir. Ən böyük qayğı isə Ali Məclis Sədrinin adıçəkilən sərəncamı ilə bir qrup əməkdaşın “Rəşadətli əməyə görə” nişanı ilə təltif edilməsidir.
Daxili işlər naziri deyib ki, ötən il də muxtar respublikada sabitliyin təmin edilməsi istiqamətində həyata keçirilən tədbirlər davam etdirilib, əməliyyat şəraiti tam nəzarətdə saxlanılıb, qarşıya qoyulan vəzifələr layiqincə yerinə yetirilib. Daxili işlər orqanlarında şəxsi heyətin peşəkarlıq səviyyəsi xeyli yüksəldilib. İstər şəxsi heyətin sosial-məişət şəraitinin yaxşılaşdırılması, istərsə də daxili işlər orqanlarının maddi-texniki bazasının, xidməti iş şəraitinin yüksəldilməsi istiqamətində həyata keçirilən tədbirlər davamlı xarakter alıb.

Dünən muxtar respublikamızın orta ixtisas və ümumtəhsil məktəblərində bir dərs saatı 20 Yanvar faciəsinə həsr olunub. Dərslərdə bildirilib ki, 1990-cı il yanvarın 20-si Azərbaycanın müasir tarixinə həm faciə, həm də xalqımızın qəhrəmanlıq salnaməsi, qürur günü kimi daxil olub. Həmin gün şəhidlik zirvəsinə ucalan Vətən övladları bir daha sübut etdilər ki, Azərbaycan xalqı yenilməzdir, azadlıq, müstəqillik yolundan onu heç bir qüvvə döndərə bilməz. O faciədən 27 il ötür. Ancaq qədirbilən xalqımız həmin günün dəhşətlərini yaddan çıxarmır, azadlıq mücadiləsində canından keçən şəhidlərimizi böyük ehtiramla yad edir.
Dərslərdə ulu öndər Heydər Əliyevin 20 Yanvar faciəsinə siyasi-hüquqi qiymət verməsi və onun dünya ictimaiyyətinə çatdırılması istiqamətində həyata keçirdiyi tədbirlərdən də danışılıb.

Xəbərlər şöbəsi

Hər dəfə Şəhidlər xiyabanına enən son pilləyə ayaq basanda könlümdəki qürur və kədər hissləri bir-birinə qarışır, bu insanları bizim aramızdan qoparan düşmənə olan nifrətim qat-qat artır, məzarlara baxdıqca yaxın keçmişimizdə baş verən hadisələr bir-bir yenidən gözlər önünə gəlir, yaddaşım yenidən vərəqlənir, qəhrəmanlarımızın baxışları sanki üzərimə tuşlanır. Burada torpağa tapşırılan neçə-neçə şəhidin rəsmi dil açıb danışır, əvvəllər yalnız şəhərin bir hissəsi olan, ancaq bir neçə müddət sonra Şəhidlər xiyabanına çevrilən bu məkanda tək olmadığımı bir daha anlayıram.

Xalqın bir millət kimi yaşaması onun özünümüdafiəsindən başlanır. Bu, elə bir imtahan anıdır ki, insanlar ayaq basdığı torpağın indiyə qədər ona verdiyi çörəyin haqqını ödəməyi, onu qorumağı, lazım gələndə şəhidlik zirvəsinə qədər ucalmağı hər şeydən üstün tuturlar.
Xalqımız şanlı keçmişinə həmişə sadiq qalıb, heç zaman digər millətlərin mərhəmətinə sığınmadan qəhrəman övladlarının canı bahasına öz varlığını qoruyub saxlayıb. XX əsrin sonlarına doğru erməni daşnaklarına Sədərəkdə verilən layiqli dərs də Azərbaycan xalqının tarixinə qızıl hərflərlə yazılıb, Vətənini sevən hər bir insanın yaddaşında dərin izlər buraxıb. 20 Yanvar faciəsinin 27-ci ildönümü günündə o dövrdə Sədərək rayonunun qəhrəmanlıqla müdafiəsini, bu döyüşlərdə fədakarlıq göstərənləri dərin hörmətlə anır, şəhidlərimizin ruhu qarşısında baş əyirik.

Azərbaycan Respublikasının Prezidenti cənab İlham Əliyevin Naxçıvan Muxtar Respublikasına hər səfəri mühüm layihələrin həyata keçirilməsi, yeni infrastruktur obyektlərinin istifadəyə verilməsi ilə yadda qalır. Bu səfərlərdə diqqətçəkən məqamlardan biri də ölkə başçısının Naxçıvana hər gəlişində ordumuzun komplektləşdirilməsi ilə bağlı görülən işlərlə, o cümlədən döyüş arsenalı ilə tanış olması və yeni hərbi obyektlərin istifadəyə verilməsidir. Bu sahədə həyata keçirilən tədbirlər göstərir ki, dövlətimizin başçısı Naxçıvanın təhlükəsizliyinə xüsusi diqqət yetirir. Fikir versək görərik ki, son 13 ildə muxtar respublikaya 13 dəfə səfər edən Prezident İlham Əliyev hər gəlişində hərbi hissələrdə olub, yeni infrastruktur obyektlərinin açılışını edib, şəxsi heyətin sosial və xidmət şəraiti ilə maraqlanıb. Və hər dəfə də muxtar respublikada bu sahədə həyata keçirilən tədbirlərin davamlı olacağının anonsunu verib.

AMEA Naxçıvan Bölməsində 20 Yanvar faciəsinin 27-ci ildönümü ilə əlaqədar keçirilən elmi konfransdan əvvəl şəhidlərimizin əziz xatirəsi bir dəqiqəlik sükutla yad edilib.

“20 Yanvar – tariximizin qanlı və şanlı səhifəsi” mövzusuna həsr olunan tədbiri bölmənin sədri, akademik İsmayıl Hacıyev açaraq Azərbaycan xalqının vətənə, torpağa sədaqətini, azadlıq, müstəqillik uğrunda mübarizədə sarsılmazlığını bütün dünyaya göstərən 20 Yanvar faciəsinin səbəblərindən, Sovet imperiyasına rəhbərlik edən ermənipərəst vəzifə sahiblərinin Azərbaycan xalqına qarşı məkrli siyasətlərindən və 1990-cı ildə törədilən qanlı cinayətlərdən ətraflı danışıb. Akademik çıxışında 20 Yanvar tarixini Azərbaycan xalqının qəhrəmanlıq zirvəsi kimi dəyərləndirib.
Bölmənin Tarix, Etnoqrafiya və Arxeologiya İnstitutunun şöbə müdiri, AMEA-nın müxbir üzvü Vəli Baxşəliyevin, həmin institutun şöbə müdiri, tarix üzrə fəlsəfə doktoru, dosent Toğrul Xəlilovun, böyük elmi işçi, tarix üzrə fəlsəfə doktoru Yaşar Rəhim­ovun, aparıcı elmi işçi, tarix üzrə fəlsəfə doktoru Musa Quliyevin məruzələri dinlənilib.

Xalqımızın qan yaddaşına yazılan 20 Yanvar faciəsi tariximizin qəhrəmanlıq səhifəsi, iftixar günüdür. Çünki yanvarın 19-dan 20-nə keçən gecə tökülmüş qanlar Azərbaycan xalqının müstəqillik uğrundakı mübarizə əzmini qıra bilməmiş, igid oğullarımız şəhidlik zirvəsinə yüksələrək xalqımızın yenilməzliyini, qəhrəmanlığını, Vətənə, torpağa sədaqətini bütün dünyaya, ən əsası isə faciənin təşkilatçılarına nümayiş etdirmişlər.

Azərbaycan övladları ən ağır sınaqlara sinə gərmək əzmini bütün dünyaya nümayiş etdirərək 1990-cı il yanvarın 20-də xalqımızın qəhrəmanlıq salnaməsinə parlaq səhifə yazdılar. Bu, elə bir səhifədir ki, bizə milli ideallar uğrunda mübarizənin, bu yolda hər cür məhrumiyyətlərə sinə gərmək əzminin nə demək olduğunu xatırladır. Bu tarix Azərbaycan xalqının əyilməz bir xalq olduğunu, müstəqilliyi pay olaraq deyil, haqq olaraq aldığını sübut edir. 1990-cı il yanvarın 19-dan 20-nə keçən gecə törədilən bu faciə istiqlaliyyət, suverenlik, müstəqillik uğrunda mübarizəyə qalxmış Azərbaycan xalqının apardığı mücadilənin unudulmaz səhifəsidir.

“Naxçıvan” Universitetində 2016-cı ildə 4 fakültə, 10 kafedra, 6 şöbə, 4 mərkəz fəaliyyət göstərib. Universitetdə 14 ixtisas üzrə 854 nəfər əyani, 103 nəfər isə qiyabi şöbədə olmaqla, 957 nəfər tələbə təhsil alıb. 2016-2017-ci tədris ilində universitetdə tələbə qəbulu əvvəlki illə müqayisədə 18 faiz artıb. Universitetin magistratura şöbəsində 7 nəfər tələbə təhsil alır.
Bu fikirləri “Naxçıvan” Universitetində ötən ilin yekunları və cari ildə qarşıda duran vəzifələrlə bağlı keçirilən yığıncaqda universitetin rektoru, professor İsmayıl Əliyev səsləndirib. Rektor bildirib ki, “Naxçıvan” Universitetində kadr hazırlığı ilə 75 nəfər professor-müəllim heyəti məşğul olur. Onlardan 3 nəfəri elmlər doktoru, professor, 24 nəfəri fəlsəfə doktoru, dosentdir.
Qeyd edilib ki, ötən il ali təhsil ocağının “Elmi əsərlər” jurnalının ilk sayı nəşr olunub. “Naxçıvan” Universitetinin əməkdaşları 5 monoqrafiya, 5 dərs vəsaiti, 60 proqram və metodik vəsait, 178 məqalə və tezis nəşr etdiriblər ki, bu məqalə və tezislərin 23-ü xaricdə işıq üzü görüb.
Vurğulanıb ki, ötən il Beynəlxalq əlaqələr şöbəsi beynəlxalq təlim və proqramlarda, müxtəlif sərgilərdə iştirak edib. İstər universitetin tanıtımı, istərsə də ikitərəfli əlaqələrin qurulması və inkişafı baxımından bu istiqamətdə mühüm işlər görülüb. Belə ki, universitetin əməkdaşları fevral ayında “EURİE – 2016” Avrasiya Beynəlxalq Ali Təhsil Sammitində, aprel ayında Qafqaz Universitetlər Birliyinin təşkil etdiyi “KUNİB Təhsil Sərgisində” iştirak ediblər.

20 Yanvar faciəsinin 27-ci ildönümü münasibətilə yanvarın 19-da Naxçıvan şəhərindəki Xatirə Muzeyi ilə muxtar respublikanın ümumtəhsil məktəbləri arasında interaktiv əlaqə yaradılıb.

İnteraktiv dərs 20 Yanvar faciəsinin növbəti ildönümünə həsr olunub. Xatirə Muzeyinin bələdçisi Rəqsanə Kərimova bildirib ki, muzeydə 2 mindən çox eksponat var və onlardan 400-ə yaxını ekspozisiyada nümayiş etdirilir. Ötən əsrin əvvəllərindən başlayaraq təcavüzkar erməni daşnaklarının azərbaycanlılara qarşı müxtəlif illərdə törətdikləri dəhşətli cinayətlərin izləri bu eksponatlarda öz əksini tapıb. Azərbaycanın suverenliyi və ərazi bütövlüyü uğrunda döyüşlərdə həlak olanların xatirəsinin əbədiləşdirildiyi muzeydə şəhidlərin fotoşəkilləri, şəxsi sənədləri, döyüş fəaliyyətlərini əhatə edən materiallar saxlanılır. Eyni zamanda muzeydə qəhrəmanlıq tariximizin müxtəlif dövrlərinə aid kitablar mühafizə və nümayiş etdirilir.

Naxçıvan Dövlət Universitetinin Beynəlxalq münasibətlər fakültəsinin akt zalında “Görkəmli ictimai və elm ­xadimi Əziz Əliyev: həyatı və fəaliyyəti” mövzusunda elmi konfrans­ keçirilib.
Naxçıvan Muxtar Respublikası Səhiyyə Nazirliyinin əməkdaşlarının, Naxçıvan şəhərindəki tibb müəssisələrinin baş həkimlərinin, Naxçıvan Dövlət Universitetinin Tibb fakültəsinin, “Naxçıvan” Universitetinin, Naxçıvan Müəllimlər İnstitutunun, Naxçıvan Tibb Kollecinin müəllim və tələbələrinin iştirak etdiyi konfransı giriş sözü ilə Naxçıvan Dövlət Universitetinin rektoru, AMEA-nın müxbir üzvü Saleh Məhərrəmov açıb. Bildirib ki, görkəmli dövlət və elm xadimi Əziz Əliyev müxtəlif məsul vəzifələrdə çalışaraq dövlət idarəçiliyinin təkmilləşdirilməsində səmərəli fəaliyyət göstərib, Azərbaycanda səhiyyə sisteminin və tibb təhsilinin formalaşdırılmasına layiqli töhfələr verib. Azərbaycan və Dağıstan xalqları arasında dostluq və qardaşlıq əlaqələrinin daha da möhkəmləndirilməsi Əziz Əliyevin adı ilə sıx bağlıdır. Azərbaycan Respublikasının Prezidenti cənab İlham Əliyev “Azərbaycanın görkəmli dövlət və elm xadimi Əziz Əliyevin 120 illik yubileyinin keçirilməsi haqqında” 2016-cı il 18 noyabr tarixli Sərəncam imzalayıb. Yubileyin Naxçıvan Muxtar Respublikasında keçirilməsi ilə əlaqədar Naxçıvan Muxtar Respublikası Ali Məclisi Sədrinin 2016-cı il 21 noyabr tarixli Sərəncamı ilə Tədbirlər Planı təsdiq olunub. Tədbirlər Planına əsasən muxtar respublikada müxtəlif tədbirlər keçirilir. Naxçıvan Dövlət Universitetində keçirilən elmi konfrans da növbəti tədbirlərdən biridir.

“Muxtar respublika iqtisadiyyatının bütün sahələri 2016-cı ildə yüksək nailiyyətlərlə əlamətdar olub, makroiqtisadi sabitlik qorunub saxlanılıb, özəl bölmənin inkişafına əlverişli mühit yaradılıb. Muxtar respublikada iqtisadiyyatın bütün sahələrində dövlət maliyyə dəstəyi və özəl investisiya hesabına 49 istehsal və xidmət sahəsi istifadəyə verilib. Yerli istehsal sahələrinin inkişafının nəticəsidir ki, bu gün muxtar respublikada 366 növdə məhsul istehsal olunur. 107-si ərzaq, 237-si qeyri-ərzaq olmaqla, 344 növdə məhsula olan tələbatın yerli imkanlar hesabına ödənilməsi təmin edilib”. Bu fikirlər Naxçıvan Muxtar Respublikası İqtisadiyyat Nazirliyində keçirilən kollegiya iclasında səsləndirilib.
2016-cı ilin yekunlarına və qarşıda duran vəzifələrə həsr olunan kollegiya iclasında iqtisadiyyat naziri Famil Seyidov çıxış edərək bildirib ki, kənd təsərrüfatı məhsulları istehsalının mühüm əhəmiyyətini nəzərə alaraq aqrar sektorun inkişafı ötən il də diqqət mərkəzində saxlanılıb. Kənd təsərrüfatı məhsulları istehsalı yönümlü 16 layihənin maliyyələşdirilməsinə 989 min 700 manat dövlət maliyyə dəstəyi göstərilib. Həyata keçirilən ardıcıl və məqsədyönlü tədbirlər bu sektorda iqtisadi aktivliyi artırıb, muxtar respublika üzrə 2016-cı ildə 429 milyon 448 min manatlıq kənd təsərrüfatı məhsulu istehsal edilib ki, bu da 2015-ci illə müqayisədə 6 faiz çoxdur.

Yeni Azərbaycan Partiyası Şərur Rayon Təşkilatında 2016-cı ilin yekunları, cari ildə təşkilat üzvlərinin qarşısında duran vəzifələrlə bağlı şura iclası keçirilib. Gündə­likdə duran məsələ ilə əlaqədar rayon təşkilatının sədri, Naxçıvan Muxtar Respublikası Ali Məclisinin deputatı Əmir Baba­yevin məruzəsi dinlənilib.
Bildirilib ki, 2016-cı ildə muxtar respublika həyatının bütün sahələrində inkişaf təmin edilib, əvvəlki illərdə olduğu kimi, tikinti-quruculuq, abadlaşdırma, yaşıllaşdırma işləri davam etdirilib, əhalinin sosial vəziyyətinin yaxşılaşdırılması istiqamətində əhəmiyyətli addımlar atılıb. Bütün uğurlar Azərbaycanda, onun ayrılmaz tərkib hissəsi olan muxtar respublikamızda ulu öndərimiz Heydər Əliyevin quruculuq xəttinin ardıcıllıqla davam etdirilməsi hesabına əldə olunub.
Yeni Azərbaycan Partiyası Şərur Rayon Təşkilatının ötən ildəki fəaliyyətindən danışan Əmir Babayev təşkilatın xətti ilə il ərzində bir sıra tədbirlər keçirildiyini diqqətə çatdırıb. Bildirilib ki, rayonda hərtərəfli sosial-iqtisadi inkişafın təmin olunmasında, genişmiqyaslı quruculuq tədbirlərinin yerinə yetirilməsində hər bir Yeni Azərbaycan Partiyasının üzvü fəallıq nümayiş etdirib.

Naxçıvan Muxtar Respublikası Dövlət Sosial Müdafiə Fondunda keçirilən kollegiya iclasında fondun sədri Əli Quliyev məruzə ilə çıxış edib.
Qeyd edilib ki, 2016-cı ildə fondun hesabına 52 milyon 966 min 500 manat plana qarşı 65 milyon 985 min 520 manat vəsait daxil olub. Daxil olan vəsait nəzərdə tutulan məbləğdən 13 milyon 19 min 20 manat, yaxud 24,6 faiz, 2015-ci ilin müvafiq dövründə yığılan vəsaitdən isə 4 milyon 215 min 760 manat, yaxud 6,8 faiz çox olub.
2016-cı il ərzində fondun yerli orqanları tərəfindən 1449 nəfərə yaşa görə, 634 nəfərə əlilliyə görə, 653 nəfərə isə ailə başçısını itirməyə görə, ümumilikdə, 2736 nəfərə əmək pensiyası təyin edilib.
Muxtar respublikada sahibkarlıq fəaliyyətinin genişlənməsinin, davamlı sosial-iqtisadi yüksəlişin, yeni istehsal, emal, ticarət, xidmət obyektlərinin yaradılmasının, aparılan tikinti-quruculuq işlərinin və yeni açılan iş yerlərinin nəticəsidir ki, əmək pensiyaları və müavinətlərin ödənişi üçün tələb olunan vəsaitin 53 faizi sığortaedənlərdən məcburi dövlət sosial sığortahaqqı şəklində yığılıb.

Naxçıvan Şəhər İcra Hakimiyyətində 2016-cı ilin yekunlarına və 2017-ci ildə qarşıda duran vəzifələrə həsr olunan müşavirə keçirilib. Müşavirəni Naxçıvan Şəhər İcra Hakimiyyətinin başçısı Vüqar Səfərov açaraq məruzə ilə çıxış edib.
Bildirilib ki, 2016-cı ildə Naxçıvan şəhərində genişmiqyaslı tikinti-quruculuq işləri görülüb. Belə ki, Tələbə Qəbulu üzrə Dövlət Komissiyasının Naxçıvan Muxtar Respublikası Regional Bölməsinin, Naxçıvan Muxtar Respublikası Daşınmaz Əmlak və Torpaq Məsələləri üzrə Dövlət Komitəsinin, Naxçıvan Dövlət Texniki Kollecinin binalarının, 7 mərtəbəli yaşayış binasının, Avtomobil və Ehtiyat Hissələrinin Satış Mərkəzi və yeraltı qarajın, Bəhruz Kəngərli adına Rəssamlar Parkının, Naxçıvan şəhərinin Bulqan kəndində kənd və xidmət mərkəzlərinin, feldşer-mama məntəqəsinin, Tumbul kəndində məktəb binası və digər infrastruktur obyektlərinin, Naxçıvan Muxtar Respublikası Dövlət Miqrasiya Xidmətinin Miqrantların Müvəqqəti Saxlanma Mərkəzinin, Naxçıvan Muxtar Respublikası Fövqəladə Hallar Nazirliyinin zabitləri üçün yataqxananın, Naxçıvan şəhər 3 nömrəli tam orta məktəbin, “Gənc­lər şəhərciyi” yaşayış kompleksinin, 4 yaşayış binasının tikintisi və yenidən qurulması, 2 yaşayış binasının əsaslı təmiri başa çatdırılıb. Naxçıvan Muxtar Respublikası Standartlaşdırma, Metrologiya və Patent üzrə Dövlət Komitəsinin inzibati binasının, Naxçıvan Müəllimlər İnstitutu üçün korpusların, 400 yerlik avtomobil dayanacağının tikintisi, yenidən qurulması, əsaslı təmiri və digər qurucu­luq tədbirləri davam etdirilib.

“Naxçıvan Muxtar Respublikası Dini Qurumlarla İş üzrə İdarəsi 2016-cı ildə  dövlət-din münasibətlərinin tənzimlənməsi və bundan irəli gələn vəzifələrin təkmilləşdirilməsinə, radikal və dini nifrət yayan cərəyanlara qarşı müvafiq tədbirlərin həyata keçirilməsinə, cəmiyyətdə milli-mənəvi dəyərlərimizin təbliğinə diqqəti artırıb”. 

Bu fikirlər Naxçıvan Muxtar Respublikası Dini Qurumlarla İş üzrə İdarənin ötən ilin yekunları və qarşıda duran vəzifələrə həsr olunmuş iclasında səsləndirilib. İdarənin rəisi Vüqar Babayev bildirib ki, Naxçıvan Muxtar Respublikasında milli-dini ənənələri yaşatmaq, dini maarifləndirmə işini gücləndirmək, dini abidə və ziyarətgahları qorumaq və onlardan düzgün istifadə etmək məqsədilə 2016-cı il mayın 3-də Naxçıvan Muxtar Respublikası qazisi yanında Şura yaradılıb. Şuraya Naxçıvan Muxtar Respublikası qazisi sədr təyin edilib. 2016-cı ildə idarənin əməkdaşları Naxçıvan Muxtar Respublikası qazisi yanında Şuranın sədri ilə birlikdə muxtar respublika ərazisində yerləşən pir və ziyarətgahlara baxış keçirib.

Vətənpərvərlik insanın daxili zənginliyidir. Bu zənginliyin toxumları kiçik yaşlarımızdan daxilimizdə cücərib boy atmağa başlayır. Zaman keçdikcə daha da böyüyür, ailəmizə, torpağımıza, vətənimizə bağlılıq hissi yaradır. Bu bağlılıq milli əxlaqımızı və dünyagörüşümüzü formalaşdıran, milli və mənəvi dəyərlərimizə sahiblik etmək və onu qorumaq haqqını verən, eyni zamanda sözlə ifadə edilməyəcək qədər müqəddəs hissdir. Vətənpərvərlik dövlət quruluşundan asılı deyil, ancaq insanı öz dövləti və bu dövlətin milli ideologiyasını özündə əks etdirən dövlətçilik ənənələri ilə sıx bağlayır. Bəlkə də, buna görədir ki, vətənpərvərlik ideyası bir xalqın müstəqilliyinin əsas sütunlarından sayılır. Azərbaycan xalqı da gələcəyimiz olan gənc nəslin Vətənə məhəbbət, xalqa, elinə və obasına hörmət, soykökünə, öz ata-babalarının ənənələrinə sədaqət ruhunda tərbiyə olunmasına həmişə böyük məsuliyyətlə yanaşıb və ona həyati əhəmiyyətli məsələ kimi baxıb. Bəs ümumilikdə götürsək, vətənpərvərlik özündə hansı meyarları birləşdirir? Bu meyarları necə təbliğ etməliyik? Bu və bu kimi suallarla redaksiyamızın qonaqlarına müraciət etdik.

Naxçıvan Muxtar Respublikasının Təhsil, Gənclər və İdman nazirliklərinin birgə təşkilatçılığı ilə məktəblilərdə vətənpərvərlik hisslərinin yüksəldilməsi məqsədilə muxtar respublikada fəaliyyət göstərən tam orta məktəblərin şagirdləri arasında keçirilən “Torpaq, uğrunda ölən varsa, Vətəndir” mövzusunda inşa yazı müsabiqəsinə yekun vurulub. Müsabiqə iki mərhələdən – şəhər (rayon) və muxtar respublika mərhələsindən ibarət olub. Müsabiqədə VIII-XI sinif şagirdləri iştirak ediblər.
Münsiflər heyətinin yekun qərarına əsasən, Naxçıvan şəhər 8 nömrəli tam orta məktəbin X sinif şagirdi Zöhrə Kəngərli qalib adını qazanıb. Şərur rayon Zeyvə kənd tam orta məktəbinin X sinif şagirdi Həsən Hüseynov ikinci, Naxçıvan şəhər Heydər Əliyev adına tam orta məktəbin IX sinif şagirdi Nərmin Abazərli isə üçüncü olub. Naxçıvan şəhər 3 nömrəli tam orta məktəbin VIII sinif şagirdi Samirə Məhərrəmova, Kəngərli rayonundakı Təzəkənd tam orta məktəbinin XI sinif şagirdi Akif Budaqlı, Ordubad şəhər 3 nömrəli tam orta məktəbin IX sinif şagirdi Alsu Cəfərli isə həvəsləndirici yerlərə layiq görülüblər.

Xəbərlər şöbəsi

Naxçıvan Muxtar Respublikasında keyfiyyətə nəzarət infrastrukturunun inkişafı, standartlaşdırma, akkreditasiya, patentləşdirmə, metrologiya, uyğunluğun qiymətləndirilməsi istiqamətləri üzrə fəaliyyətin səmərəli təşkili daim diqqət mərkəzində saxlanılır. Naxçıvan Muxtar Respublikası Standartlaşdırma, Metrologiya və Patent üzrə Dövlət Komitəsi 2016-cı ildə fəaliyyətini gücləndirmiş, dövlət pro­qramlarının qarşıya qoyduğu vəzifələr, sessiya və müşavirələrdə verilmiş tapşırıqlar uğurla icra olunmuşdur.

Komitənin müvafiq işçi qrupları tərəfindən elektrik, qaz və su sayğaclarının istismar müddətinə, məktəbli, tələbə və müəllim geyim formalarının, eləcə də məktəbli ləvazimatlarının keyfiyyət göstəricilərinə, təhsil müəssisələrinin yeməkxanalarına alınan ərzağın keyfiyyətinə, tikinti məhsullarının istehsalı sahəsində, ticarət, ictimai iaşə, məişət və digər xidmət sahələrində texniki normativ hüquqi aktların tələblərinə əməl olunmasına, istehlak bazarında məhsulların keyfiyyətinə nəzarət məqsədilə monitorinqlər aparılmışdır. Monitorinqlər zamanı normativ göstəriciləri standarta uyğun olmayan 253 elektrik və 67 qaz sayğacı aşkarlanaraq idxalçı müəssisəyə geri göndərilmişdir. Komitənin laboratoriyasında ölçmə vasitələrinin yoxlanılmasında istifadə olunan sınaq stendləri və nümunəvi ölçmə vasitələri ixtisaslı mütəxəssislərin iştirakı ilə kompleks kalibrlənmişdir.

Naxçıvan Muxtar Respublikası Prokurorluğunda ötən ilin yekunlarına və qarşıda duran vəzifələrə həsr olunan kollegiya iclası keçirilib.
Kollegiya iclasını Naxçıvan Muxtar Respublikasının prokuroru, II dərəcəli dövlət ədliyyə müşaviri Səbuhi Şahverdiyev açaraq məruzə edib. Məruzəçi qeyd edib ki, 2016-cı il muxtar respublikamız üçün uğurlu olub. Bu dövrdə prokurorluq orqanlarının bütün səyləri muxtar respublika rəhbərinin tapşırıq və tövsiyələrindən irəli gələn vəzifələrin yerinə yetirilməsinə, işin keyfiyyətinin yüksəldilməsinə, müasir iş metodlarını tətbiq etməyə qadir olan kadr korpusunun formalaşdırılmasına, möhkəm nizam-intizam yaradılmaqla mənfi təzahürlərin vaxtında aradan qaldırılmasını təmin edən işlək nəzarət mexanizminin yaradılmasına istiqamətləndirilib.
Bildirilib ki, hesabat dövründə muxtar respublika prokurorluğunun əməkdaşları cinayətkarlığa və hüquq pozuntularına qarşı mübarizə sahəsində digər hüquq-mühafizə orqanları ilə əlaqəli şəkildə fəaliyyət göstərərək ölkəmizdə, eləcə də muxtar respublikamızda həyata keçirilən quruculuq işlərinin əsas təminatlarından biri olan ictimai-siyasi sabitliyin və əmin-amanlığın qorunması, cinayətkarlığa və hüquq pozuntularına qarşı mübarizə, qanunçuluq və hüquq qaydasının möhkəmləndirilməsi, vətəndaşların hüquq və azadlıqlarının müdafiəsi istiqamətində zəruri tədbirlərin görülməsini təmin etməyə çalışıblar.

Naxçıvan Muxtar Respublikası Gənclər və İdman Nazirliyi 2016-cı ildə öz işini təsdiq edilmiş tədbirlər planına uyğun qurub, gənclər arasında bədən tərbiyəsi və idmanın kütləviliyinə nail olunması üçün məqsədyönlü tədbirlər həyata keçirib.
Ümumilikdə, il ərzində nazirlik tərəfindən dövlət gənclər siyasəti və idman sahəsində 361 tədbir icra edilib ki, bunlardan 139-u gənclərlə iş, 222-si isə kütləvi bədən tərbiyəsi və idman sahələrini əhatə edib.
Bu fikirləri Naxçıvan Muxtar Respublikası Gənclər və İdman Nazirliyinin kollegiya iclasında nazir Azad Cabbarov səsləndirib. Nazir bildirib ki, 2016-cı ildə mütəmadi olaraq muxtar respublikanın şəhər və rayonlarında gənclərin vətənə məhəbbət, dövlətçiliyə sədaqət ruhunda tərbiyə olunması məqsədilə vətənpərvərlik mövzusunda filmlər nümayiş etdirilib, onların tarixi yerlərə və muzeylərə gəzintiləri təşkil olunub. Çağırışyaşlı gənc­lərin hərbi xidmətə hazırlanması məqsədilə gənclərin hərbi hissələrdə əsgər və zabitlərlə görüşü keçirilib. Yeniyetmə və gənclərin intellektual səviyyələrinin yüksəldilməsi məqsədilə “Nuh yurdu” intellektual oyununun keçirilməsinə diqqət artırılıb, rayon və muxtar respublika birincilikləri təşkil olunub.

Naxçıvan Muxtar Respublikası Standartlaşdırma, Metrologiya və Patent üzrə Dövlət Komitəsində kollegiya iclası keçirilib.
Kollegiya iclasında komitənin sədri Bəxtiyar İsmayılov bildirib ki, muxtar respublikamızda keyfiyyət infrastrukturunun inkişaf etdirilməsi, əhalinin sağlamlığının qorunması, məhsul, iş və xidmətlərin təhlükəsizliyinin təmin edilməsi və keyfiyyətinin yaxşılaşdırılması, ətraf mühitin mühafizəsi dövlət siyasətinin prioritet istiqamətlərindəndir. Bu baxımdan Naxçıvan Muxtar Respublikası Standartlaşdırma, Metrologiya və Patent üzrə Dövlət Komitəsinin qarşısında mühüm vəzifələr durur. Qeyd olunub ki, Azərbaycan Respublikası Prezidentinin müvafiq Sərəncamı ilə təsdiq edilmiş “Azərbaycan dilinin qloballaşma şəraitində zamanın tələblərinə uyğun istifadəsinə və ölkədə dilçiliyin inkişafına dair Dövlət Proqramı” üzrə idxal olunan malların etiketlərində və adlarında istehlakçılar üçün Azərbaycan dilində zəruri məlumatların olmasına nəzarət edilməsi tədbirinin icrası istiqamətində 2016-cı ildə idxal olunmuş 143 halda məhsulun üzərinə Azərbaycan dilində zəruri məlumatların vurulması təmin olunub.

2016-cı ildə muxtar respublikada sosial-iqtisadi sahədə inkişaf təmin edilib. Həyata keçirilən infrastruktur layihələri, maddi-texniki bazanın gücləndirilməsi istiqamətində görülən işlər sayəsində bu inkişaf gömrük orqanlarını da əhatə edib. Ötən il Sədərək sərhəd-gömrük buraxılış məntəqəsi üçün dünya standartlarına uyğun kompleksin tikintisi davam etdirilib. Naxçıvan-Məşhəd dəmir yolu xəttinin fəaliyyətə başlaması ilə muxtar respublika gömrüyünün xidmət dairəsi daha da genişlənib. Naxçıvan və Culfa şəhərlərinin dəmir yolu vağzallarında rentgen nəzarəti qurğuları və elektron məlumat lövhələri quraşdırılıb, gömrük nəzarətinin aparılması üçün lazımi şərait yaradılıb. 2016-cı ilin sentyabr ayında istifadəyə verilən Naxçıvan Beynəlxalq Hava Limanının “Qərb terminalı”nda da gömrük xidmətinin təşkili üçün infoköşk, elektron məlumat lövhələri və termal kamera qurulub. Bundan əlavə, avtonəqliyyat vasitələrinin keçidini sürətləndirmək məqsədilə Sədərək və Culfa sərhəd-keçid məntəqələrində yeni avadanlıqlar və xüsusi proqram təminatı quraşdırılaraq “Sərhədkeçmə vaxtının ölçülməsi” sisteminin tətbiqinə başlanılıb.

Kərkililər doğma yurd yerlərinə qayıdacaqlarına əmindirlər

İllərdir ki, düşmən tapdağı altında olan yurd yerlərimizə səsimiz çatmır, ünümüz yetmir. O yurd yerlərimiz də gözlərini yollara dikib bizi gözləyir. O yurd yerlərindən biri də sərhəd bölgəsi, doğma diyarımızın alınmaz qalası olan Sədərək rayonunda, Tejkar dağının ətəyində yerləşən Kərki kəndidir. 

Kənd yaşıllığa bürünmüşdü. Elə bir yaşıllığa ki, uzaqdan baxanda meşəyə bənzədirdin. Möhrədən işlənmiş kipçərək evləri yaşıllıq gözəgörünməz etmişdi.
Ərənləri qurşaq tutar, at minər, cıdıra çıxardılar. Xanım-xatın gözəlləri oğlanlardan geri qalmazdılar. Bişirdiklərinin ətri beş-altı ev uzağa yayılardı.
Kəndin dişgöynədən bulaqları vardı. Minbir zümzümə ilə axırdılar. Meyvə və üzüm bağlarının məhsullarını şirinlikdən yemək olmurdu. Hələ qarpızını, qovununu demirəm.
Bu kiçik yurd yerinin özünəməxsus xüsusiyyətləri vardı. Kənddə ki bir xeyir iş oldu, ta toy qurtarana qədər hamı bir nəfər kimi o evə yığışırdı, təkcə mal-heyvan örüşdən qayıdanda tez gəlib yerbəyer etdikdən sonra toy evinə qayıdırdılar. Səhərəcən çal-çağır kəsilməzdi. Qara zurnanın səsi dağları tərpədərdi, qonşu kəndlərə gedib çıxardı.

Naxçıvan Dövlət Universitetində “20 Yanvar müstəqilliyimizin şəhidlik zirvəsidir” mövzusunda dəyirmi masa keçirilib.
Universitetin rektoru, AMEA-nın müxbir üzvü Saleh Məhərrəmov Azərbaycan xalqının milli azadlıq hərəkatı və müstəqillik tarixindən, 20 Yanvar faciəsinin səbəblərindən bəhs edib. Qeyd olunub ki, 27 il bundan əvvəl keçmiş Sovet İttifaqının qoşun hissələrinin fövqəladə vəziyyət elan edilmədən Bakı şəhərinə yeridilməsi nəticəsində Bakıda və Azərbaycanın digər rayonlarında 146 nəfər öldürülüb, 744 nəfər yaralanıb, 841 nəfər qanunsuz həbs olunub. Lakin bu faciə xalqın milli əzm və iradəsini qıra, onu müstəqillik uğrunda mübarizəsindən döndərə bilməyib. Saleh Məhərrəm­ov Azərbaycan xalqının ümummilli lideri Heydər Əliyevin bu faciəyə siyasi-hüquqi qiymət verilməsindəki tarixi xidmətlərindən danışaraq vurğulayıb ki, Azərbaycanın ərazi bütövlüyünün və dövlət müstəqilliyinin qorunması, şəhidlərin xatirəsinin əbədiləşdirilməsi, şəhid ailələrinin sosial şəraitlərinin yaxşılaşdırılması ilə bağlı bu gün də əhəmiyyətli işlər görülür.

Muxtar respublikada səfərdə olan Türkiyə Respublikası İqtisadiyyat Nazirliyinin nümayəndə heyəti bu fikirdədir

Türkiyə Respublikası İqtisadiyyat Nazirliyinin İxracat İdarəsinin rəisi Tayfun Kılıçın rəhbərlik etdiyi nümayəndə heyəti Naxçıvan Muxtar Respublikasında ikigünlük səfərdə olub.
Səfər çərçivəsində qonaqlar ümummilli liderimizin Naxçıvan şəhərindəki abidəsini və Heydər Əliyev Muzeyini ziyarət ediblər. “Xan Sarayı” Dövlət Tarix-Memarlıq, Möminə Xatın və Açıq Səma Altında Muzey Kompleksi ilə tanış olan nümayəndə heyəti muxtar respublikanın yerli istehsal müəssisələrində olub, regionun ixrac potensialı ilə maraqlanıb.
“Gəmiqaya Qida Məhsulları Sənaye Kompleksi”, “Gəmiqаyа Dаş Məhsullаrı Sənаyе Kоmplеksi”, “Gəmiqaya Mebel Fabriki”, “Gəmiqaya Mineral Sular”, “Ləzzət Biskvit və Şokolad Fabriki”, “Gəmiqaya Bərəkət Ət Məhsulları Kompleksi”, “Araz-3” Məhdud Məsuliyyətli cəmiyyətləri və Naxçıvan Sənaye Kompleksi ilə tanışlıq zamanı qonaqlara burada istehsal olunan məhsullar haqqında məlumat verilib, onların ixrac imkanlarından bəhs edilib.
Yanvarın 17-də Naxçıvan Biznes Mərkəzinə gələn nümayəndə heyətinə məlumat verilib ki, mərkəzin əsas missiyası sahibkarlara xidmət, biznesin inkişafı üzrə onlara məsləhətlərin verilməsi, biznesə yeni başlayanlar üçün treninqlərin təşkili, biznes-planların hazırlanmasında metodoloji dəstək göstərilməsidir. Qeyd olunub ki, hazırda burada Naxçıvanın yerli məhsulları olan kərpicdən mebel dəstinə, kiçik plastik hissələrdən dam örtüyünə, mineral sulardan ərzaq məhsullarına və yuyucu vasitələrə, Naxçıvan duzundan konservləşdirilmiş qovurmaya qədər xeyli çeşiddə müxtəlif məhsullar nümayiş etdirilir. Muxtar respublikada iri özəl sektor təmsilçiləri olan “Gəmiqaya Holdinq”, “Dizayn Holdinq”, “Cahan Holdinq” Şirkətlər ittifaqları, “Zümrüd” Kiçik Müəssisəsi, “Ləzzət Qida Sənaye” Məhdud Məsuliyyətli Cəmiyyəti, Babək “Sirab” Açıq Səhmdar Cəmiyyəti ilə yanaşı, çox sayda digər orta və kiçik biznes qurumlarının məhsulları da burada öz yerini tutub.

“2016-cı il muxtar respublikada müasir texnologiyaların tətbiq edilməsi ilə telekommunikasiya və poçt xidmətlərinin çeşidinin və keyfiyyətinin artırılması ba­xımından xeyli zəngin olub. Belə ki, 2015-ci ilin iyun ayından etibarən qurulmasına başlanan 4-cü nəsil mobil rabitə sistemi üzrə layihənin icrası davam etdirilib, bu müddətdə muxtar respublikanın bütün yaşayış məntəqələrini əhatə edən 98 baza stansiyası, fiber-optik əsaslı arabağlantı şəbəkəsi və mərkəzi idarəetmə sistemi qurulub, “Naxtel”in qeydiyyat və hesabat sistemi üçün əsas və ehtiyat server avadanlıqları, proqram təminatı hazırlanıb, zəruri olan müştəri xidmətləri mərkəzləri, məlumat sorğu və digər xidmətlər yaradılıb, bu rabitə növünün mobil data imkanlarından istifadə olunaraq avtomobillər üçün GPS izləmə sistemi qurulub. İstifadəçilərin bütün məlumatları və xidmətləri əldə edə biləcəyi 3 dildə naxtel.az domen adlı internet saytı hazırlanıb, ötən il oktyabr ayının 25-də Naxçıvan Muxtar Respublikası Ali Məclisi Sədrinin və bir çox xarici qonaqların iştirakı ilə Naxtel 4G mobil rabitə şəbəkəsi istifadəyə verilib”. Bu fikirlər Naxçıvan Muxtar Respublikasının Rabitə və Yeni Texnologiyalar Nazirliyində keçirilən kollegiya iclasında səsləndirilib.

Naxçıvan Muxtar Respublikası Fövqəladə Hallar Nazirliyində 2016-cı ildə görülmüş işlərin yekunları və 2017-ci ildə qarşıda duran vəzifələrlə bağlı kollegiya iclası keçirilib.
İclasda məruzə edən fövqəladə hallar naziri, general-leytenant Şamı Abdullayev qeyd edib ki, ötən il Fövqəladə Hallar Nazirliyi üçün ən yaddaqalan illərdən biri olub. Hərtərəfli dövlət qayğısı ilə əhatə olunmuş nazirliyə hesabat dövrü ərzində Azərbaycan Respublikası Fövqəladə Hallar Nazirliyindən 69 adda müxtəlif növ əşya əmlakları, fərdi mühafizə vasitələri, kimyəvi reaktivlər, laboratoriya avadanlıqları, yeməkxana ləvazimatları verilib.
Şamı Abdullayev nazirliyin mərkəzi aparatının və struktur qurumlarının ixtisaslı kadrlarla komplektləşdirilməsinə, əməkdaşların peşəkarlığının artırılmasına diqqət çəkərək vurğulayıb ki, ötən dövr ərzində 2 zabit Rusiya Federasiyasının Fövqəladə Hallar Nazirliyinin Mülki Mühafizə Akademiyasına təhsil almağa, 6 nəfər hərbi və xüsusi rütbəli əməkdaş isə müvafiq ixtisas­artırma kurslarına göndərilib.

Naxçıvan Muxtar Respublikası Ədliyyə Nazirliyində 2016-cı ilin yekunları və qarşıda duran vəzifələrə həsr olunmuş kollegiya iclası keçirilib.
Kollegiya iclasını Naxçıvan Muxtar Respublikasının ədliyyə naziri, II dərəcəli dövlət ədliyyə müşaviri Suliddin Əliyev açaraq məruzə ilə çıxış edib. Bildirilib ki, nazirliyin əsas fəaliyyət istiqamətlərindən biri olan hüquqi maarifləndirmə və hüquqi təbliğat sahəsində həyata keçirilən tədbirlər davam etdirilib, muxtar respublikanın şəhər və rayonlarında bələdiyyə fəaliyyəti ilə bağlı 14, notariat və qeydiyyat fəaliyyəti ilə bağlı 11, icra xidməti ilə əlaqədar 4 tədbir keçirilib.
Qeyd olunub ki, “Hüquqi aktların Naxçıvan Muxtar Respublikasının Hüquqi Aktlarının Dövlət Reyestrinə daxil edilməsi qaydaları haqqında Əsasnamə”yə uyğun olaraq reyestrə hesabat dövrü ərzində 143 hüquqi akt daxil edilib. Daxil edilən hüquqi aktların 77-si normativ hüquqi akt, 66-sı qeyri normativ hüquqi aktdır.
Nazirlik üzrə müəyyən edilmiş 18 adda informativ və interaktiv elektron xidmət növünün aktiv olduğunu bildirən Suliddin Əliyev deyib ki, istifadəçilər elektron xidmət bölməsinə daxil olmaqla göstərilən xidmətin adı, bu xidmət üçün tələb olunan sənədlərin dəqiq siyahısı, sənədlərin elektron forması ilə tanış ola, zəruri informasiya əldə edə bilərlər.

2016-cı il oktyabrın 17-də – Azərbaycanın dövlət müstəqilliyinin bərpasının 25-ci ildönümü ərəfəsində Naxçıvan Dövlət Televiziyası internet üzərindən HD formatda canlı yayıma başlamış, bununla əlaqədar yaradılan www.naxcivantv.az internet saytının təqdimatı olmuşdur.  Televiziyanın yeni saytının fəaliyyətə başlaması Naxçıvanın informasiya blokadasının yarılması və qədim diyarın tanıdılması istiqamətində atılan növbəti addım kimi mühüm əhəmiyyətə malikdir. 

Naxçıvan Dövlət Televiziyasının internet saytının “Rəsmi xəbərlər”, “Anonslar”, “Televernisaj və videoçarxlar”, “Aktual”, “İctimai”, “Mətbuat səhifələrində”, “Gənclər və idman”, “Ədəbiyyat”, “Turizm”, “Reklamlar və elanlar” bölmələrində müntəzəm olaraq izləyicilərə yeni telemateriallar çatdırılır. Rəsmi xəbərlər isə Azərbaycan, ingilis və rus dillərində təqdim olunur. Saytın gün ərzində müntəzəm yenilənən “Xəbərlər” bölməsində isə muxtar respublikada baş verən yeniliklər, şəhər və kəndlərin inkişafı, təhsil, səhiyyə, mədəniyyət, elm, informasiya texnologiyaları və digər sahələrdən hazırlanan operativ xəbərlər yerləşdirilir. Hazırda saytda “Naxçıvanşünaslıq” və “İslam mədəniyyətinin paytaxtı Naxçıvan – 2018” bölmələrinin yaradılması istiqamətində işlər aparılır.

Muxtar respublikada gənclərin yaradıcılıq axtarışlarının stimullaşdırılmasına, vətənpərvərlik tərbiyəsinin gücləndirilməsinə, onların intellektual inkişafına və asudə vaxtlarının səmərəli təşkilinə xüsusi diqqət yetirilir, istedadlı gənclərin üzə çıxarılması məqsədilə müxtəlif yaradıcılıq müsabiqələri keçirilir. 2016-cı ildə də muxtar respublikada bu məsələ diqqətdə saxlanılmış, keçirilən yaradıcılıq müsabiqələrində gənclər fəal iştirak etmişdir. 

Naxçıvan Muxtar Respublikası Ali Məclisinin Sədri yanında Bilik Fondu və Naxçıvan Muxtar Respublikası Ali Məclisinin Sədri yanında Gənclər Fondunun təşkilatçı­lığı ilə ötən il iyun ayının 16-dan noyabr ayının 30-dək “Naxçıvan: dünən və bu gün” mövzusunda yaradıcılıq müsabiqəsi keçirilmişdir. Publisistika və teleradio materialları, rəsm əsərləri, ədəbi nümunələr, musiqi və elmi-tədqiqat əsərləri kateqoriyaları üzrə keçirilən müsabiqəyə 81 iştirakçı tərəfindən 97 yaradıcılıq nümunəsi təqdim olunmuşdur.
Musiqi istedadı olan gənclərin aşkar edilməsi və onların yaradıcılıq potensialının üzə çıxarılması zəngin musiqi mədəniyyətimizin yaşadılması baxımından mühüm əhəmiyyət kəsb edir. Naxçıvan Muxtar Respublikası Mədəniyyət və Turizm Nazirliyi və Naxçıvan Muxtar Respublikası Dövlət Televiziya və Radio Verilişləri Komitəsinin birgə təşkilatçılığı ilə ötən il xalq mahnı və təsniflərinin ifaçılıq müsabiqəsinin keçirilməsi də bu məqsədə xidmət etmişdir. Bununla yanaşı, Mədəniyyət və Turizm Nazirliyinin təşkilatçılığı ilə ulu öndər Heydər Əliyevin anadan olmasının 93-cü ildönümü ilə bağlı “Gənclik” Mərkəzində uşaq musiqi, incəsənət və bədii sənətkarlıq məktəblərinin şagirdləri arasında “İfaçılıq” müsabiqəsi də keçirilmişdir.

Naxçıvan Muxtar Respublikası Səfərbərlik və Hərbi Xidmətə Çağırış üzrə Dövlət Xidmətində 2016-cı ilin yekunlarına və qarşıya qoyulmuş vəzifələrin icrasına həsr olunmuş müşavirə keçirilib.
Müşavirəni xidmətin rəisi, general-mayor Səxavət Salmanov açaraq bildirib ki, Səfərbərlik və Hərbi Xidmətə Çağırış üzrə Dövlət Xidməti əvvəlki illərdə olduğu kimi, 2016-cı ildə də muxtar respublika ərazisində qeydiyyatda duran və 16 yaşı tamam olan Azərbaycan Respublikası vətəndaşlarının yaşayış yeri üzrə ilkin hərbi qeydiyyata alınmasını, qeydiyyata götürülmüş vətəndaşların çağırışqabağı hazırlıq işlərinin təşkil edilməsini, onlarla sağlamlıq profilaktik tədbirlərin keçirilməsini, çağırış kampaniyalarının mütəşəkkil aparılmasını təmin edib. Qeyd olunub ki, Azərbaycan Respublikası Silahlı Qüvvələrinin və qanunvericiliyə uyğun olaraq yaradılmış başqa birləşmələrin və xüsusi birləşmələrin sürücü ixtisası ilə komplektləşdirilməsi məqsədilə Naxçıvan Texniki Peşə və Sürücülük Məktəbinə 2016-cı il ərzində 293 nəfər çağırışçı cəlb olunub.

 Ötən ilin uğurları göstərdi ki, böyük yaradıcı gücə malik olan Heydər Əliyev ideyalarının, Heydər Əliyev quruculuq xəttinin davam etdirilməsi və yurda bağlılıq prinsipi əsas götürülərək Naxçıvan bütün sahələrdə inkişafı ilə nümunə göstəriləcək bir muxtar respublika səviyyəsinə yüksəlib. Burada ölkə başçısı cənab İlham Əliyevin muxtar respublikaya səfərlərinin birində söylədiyi bu fikirləri xatırlamaq yerinə düşər: “...Bu gün Naxçıvanın gələcək inkişafı ilə bağlı əlavə sözlərə ehtiyac yoxdur. Çünki bütün işlər burada ən yüksək səviyyədə görülübdür. Bir daha qeyd etmək istəyirəm ki, siz bütün məsələləri – quruculuq, abadlıq işlərini, enerji təhlükəsizliyi, hərbi potensial, infrastruktur layihələrinin icrası, ərzaq təhlükəsizliyi məsələlərini həll etmisiniz. Bundan sonra ancaq bu uğurlara yeni uğurlar əlavə etmək lazımdır”.

Bəli, 2016-cı ildə uğurlar üzərinə uğurlar əlavə olundu. Ötən illərdəki kimi, 2016-cı ildə də üç prinsip əsas götürüldü: muxtar respublika sakinlərinin rahat yaşaması, regionda təhlükəsizliyin təmin edilməsi, iqtisadi və sosial həyatın bütün sahələrində tərəqqi və inkişaf tempinin qorunub saxlanılması. Bəhs olunan qısa zaman kəsiyinin muxtar respublikamızda “Nizam-intizamın daha da möhkəmləndirilməsi ili” elan olunması bu məqsədə çatmaqda əhəmiyyətli rol oynadı, görülən işə görə məsuliyyət hissi daha da artdı.

Bizim əksəriyyətimiz ötən əsrin 90-cı illərinin əvvəllərindən Naxçıvanda başlanan misilsiz quruculuq işlərinin şahidləriyik. Bəli, əksəriyyətimiz qısa zamanda bu diyarın necə inkişaf etdiyini görmüşük. Bu inkişafı daş üstə daş qoyan, qurub-yaradan, xalqın dar günündə onun yanında olan, qurub-yaratdıqlarının sabahını düşünən şəxsiyyətlər təmin edə bilərlər.
Dünyada heç bir hadisə təsadüfən baş vermir. Hər hadisənin kökündə zamanın və dövrün tələbi var. Ötən əsrin 90-cı illərinin əvvəllərində Naxçıvanda baş verən məlum hadisələr də özü ilə bərabər yeni tələblər, ehtiyaclar gətirdi. Bu tələb və ehtiyaclardan ən mühümü isə müdrik rəhbər, xalqa yanan insan tələbi idi. Bu, zamanın elə bir ehtiyacı idi ki, muxtar respublika əhalisinin gələcək taleyi bütövlükdə bundan asılı idi.
Ulu öndərimizin Naxçıvanda yaşayıb fəaliyyət göstərdiyi dövrdə muxtar respublikamızı gözləyən işğal təhlükəsi aradan qaldırıldı, blokada vəziyyətində yaşayan və böyük çətinliklərlə üzləşən muxtar respublika əhalisində sabahkı günə böyük inam yarandı. Azərbaycan xalqının təkidli tələbi ilə ulu öndərimiz yenidən siyasi hakimiyyətə qayıdandan sonra strateji əhəmiyyətli Naxçıvan Muxtar Respublikası etibarlı əllərə əmanət edilməli idi. 1960-cı il yanvarın 14-də sadə bir zəhmətkeş ailəsində dünyaya göz açan, Heydər Əliyev məktəbində püxtələşərək böyük dövlətçilik yolu keçən Vasif Talıbovun Naxçıvan Muxtar Respublikasının rəhbəri seçilməsi ilə muxtar respublikanın tarixində yeni mərhələnin təməli qoyuldu. Heydər Əliyev yoluna sədaqət, vətən sevgisi, Naxçıvanın taleyinə və gələcəyinə cavabdehlik hissi yeni mərhələdə muxtar respublikanın bütün istiqamətlər üzrə sürətli inkişafını təmin etdi.

Yanvarın 13-də Naxçıvan şəhərindəki Dövlət Bayrağı Muzeyində dövlət qulluğuna qəbul olunan dövlət qulluqçularının andiçmə mərasimi keçirilib.
Andiçmə mərasimində Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya tərəfindən muxtar respublika İqtisadiyyat Nazirliyi, Dövlət Statistika Komitəsi və Sahibkarlığa Kömək Fondunda vakant vəzifələrin tutulması üçün elan olunmuş müsabiqələrdə müvəffəqiyyət qazanan 49 nəfər iştirak edib.
Mərasimdə Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın sədri İsmayıl Qəribli çıxış edərək ölkəmizdə, eləcə də muxtar respublikada bütün sahələr kimi, dövlət qulluğu sahəsinin də qayğı ilə əhatə olunduğunu, müasir tələblərə cavab verən dövlət idarəetmə sisteminin yaradıldığını deyib.
İsmayıl Qəribli qeyd edib ki, dövlət orqanları üçün müasir inzibati binaların tikilib istifadəyə verilməsi, bacarıq və peşəkarlığı yüksək olan dövlət qulluqçularının təltif edilməsi, dövlət idarəçiliyi sistemində yeni texnologiyaların tətbiqi, “Elektron hökumət”in, Vətəndaşların Müraciətləri üzrə Elektron Qeydiyyat və İdarələrarası Elektron Sənəd Dövriyyəsi sistemlərinin qurulması bunun bariz nümunəsidir.

Naxçıvan Muxtar Respublikası Daxili İşlər Nazirliyində ötən ilin yekunlarına və qarşıda duran vəzifələrə həsr olunan kollegiya iclasını Naxçıvan Muxtar Respublikasının daxili işlər naziri, general-leytenant Əhməd Əhmədov açaraq məruzə edib.

Bildirilib ki, ötən il muxtar respublikada vətəndaşların və dövlətin qanuni mənafelərinin qorunması sahəsində həyata keçirilən tədbirlər davam etdirilib, kriminogen duruma tam nəzarət olunub, ictimai qaydanın qorunması və asayişin təmin edilməsi istiqamətində əsaslı işlər görülüb.
Hesabat dövründə daxili işlər və prokurorluq orqanları üzrə 29 cinayət faktı qeydə alınıb. 29 cinayət faktına görə 25 cinayət işi başlanıb.
Vurğulanıb ki, cinayətlərin ümumi sayının artmasına baxmayaraq, oğurluq cinayətləri 50 faiz, korrupsiya ilə bağlı cinayətlər 100 faiz, vəzifə səlahiyyətlərini aşma ilə bağlı cinayətlər 100 faiz, ümumiyyətlə, dövlət hakimiyyəti əleyhinə olan cinayətlər 100 faiz azalıb. Təqsirləndirilən şəxslərin axtarışı istiqamətində aparılmış əməliyyat-axtarış tədbirləri nəticəsində istintaqdan və məhkəmədən yayınan 5 nəfərdən 4-nün yeri müəyyənləşdirilərək tutulub, axtarış işinin göstəriciləri 80 faiz təşkil edib. Bu dövrdə əməkdaşların icraatında 21 cinayət işi olub. Onlardan 14-ü ittiham aktı ilə məhkəməyə göndərilib, 2 cinayət işinin icraatına xitam verilib, 5 cinayət işinin istintaqı isə haliyədə davam etdirilir. Məhkəmə və prokurorluq orqanları tərəfindən əlavə istintaqa qaytarılan cinayət işləri olmayıb, dəymiş maddi ziyanın ödənilməsi 100 faiz təşkil edib. Avtomobillərin texniki vəziyyətinə xüsusi fikir verilərək xeyli sayda nasaz avtomaşının istismarına qadağa qoyulub, aşkar olunan 23 min 820 yol hərəkəti əleyhinə olan inzibati xəta üzrə qanunauyğun tədbirlər görülüb. Əhalidən qanunsuz saxlanılan silahların yığılması istiqamətində həyata keçirilən tədbirlər ardıcıl davam etdirilərək vətəndaşlar tərəfindən 115 ədəd odlu silah, xeyli sayda döyüş sursatı və hərbi ləvazimat könüllü olaraq polis orqanlarına təhvil verilib.

Azərbaycan Respublikasının Prezidenti cənab İlham Əliyev “Azərbaycanın görkəmli dövlət və elm xadimi Əziz Əliyevin 120 illik yubileyinin keçirilməsi haqqında” 2016-cı il 18 noyabr tarixli Sərəncam imzalayıb. Yubileyin Naxçıvan Muxtar Respublikasında keçirilməsi ilə əlaqədar Naxçıvan Muxtar Respublikası Ali Məclisi Sədrinin 2016-cı il 21 noyabr tarixli Sərəncamı ilə Tədbirlər Planı təsdiq olunub. Tədbirlər Planına əsasən muxtar respublikada müxtəlif tədbirlərin keçirilməsi nəzərdə tutulub.
AMEA Naxçıvan Bölməsində plana əsasən, “Əziz Əliyev: həyat yolu” mövzusunda interaktiv dərs keçilib. Muxtar respublikanın 205 məktəbinin izlədiyi dərsi bölmənin sədri, akademik İsmayıl Hacıyev aparıb. Qeyd olunub ki, XX əsrdə Azərbaycan xalqının yetişdirdiyi görkəmli şəxsiyyətlərdən biri olan Əməkdar həkim, tibb elmləri doktoru, professor Əziz Əliyev dərin ağıl və düşüncəyə, rəhbərlik etmək qabiliyyətinə və zəngin həyat təcrübəsinə malik idi. Əziz Əliyev 1897-ci ilin yanvar ayında qədim Azərbaycan torpağı olan İrəvan quberniyasının Hamamlı kəndində anadan olub. İlk təhsilini doğulduğu kənddə alıb. 1908-ci ildən sonra isə Rusiyanın Çita şəhərindəki gimnaziyada oxuyub. 1914-1917-ci illərdə İrəvan kişi gimnaziyasında təhsil alan Əziz Əliyev buranı qızıl medalla bitirdikdən sonra Rusiyanın Sankt-Peterburq şəhərindəki Hərbi Tibb Akademiyasına qəbul edilib. 1918-ci ildə İrəvana gələn Əziz Əliyev sonra ailəsini çətinliklə Naxçıvanın Şərur rayonuna gətirib, bir müddət sonra Şahtaxtı kəndinə köçüb.

Çünki bütün istiqamətlər üzrə işlər uğurla gedir və gözəl nəticələr var

Naxçıvan Muxtar Respublikası yeni ilə uğurla başladı. Muxtar respublika sakinləri ötən ilin nailiyyətlərinin sevincini yaşadığı bir dövrdə Azərbaycan Prezidenti cənab İlham Əliyev Naxçıvana səfər etdi. Dövlət başçısı kimi cənab İlham Əliyevin Naxçıvana sayca 13-cü səfəri də muxtar respublikamız üçün çox mühüm əhəmiyyət daşıyan obyektlərin istifadəyə verilməsi ilə yadda qaldı. Ölkə rəhbəri budəfəki səfərində də muxtar respublikada aparılan quruculuq işlərini yüksək qiymətləndirdi: “Çox şadam ki, Naxçıvan uğurla, sürətlə inkişaf edir, böyük quruculuq, abadlıq işləri aparılır. Son illər ərzində Naxçıvan böyük inkişaf yolu keçmişdir. Naxçıvan şəhərinin abadlaşdırılması, gözəlləşdirilməsi, infrastruktur layihələrinin icrası, bütün şəhər və kəndlərin abadlaşması prosesi onu göstərir ki, respublika möhkəm ayaqda dayanıb. Hesab edirəm ki, bu gün Naxçıvan Muxtar Respublikasının çiçəklənmə dövrüdür. Çünki bütün istiqamətlər üzrə işlər uğurla gedir və gözəl nəticələr var”.
Bu, Azərbaycan Prezidentinin muxtar respublika rəhbərinin, eləcə də bütün naxçıvanlıların fəaliyyətinə verdiyi yüksək dəyərdir. Blokadanın çətinliklərinə baxmayaraq, muxtar respublikada böyük quruculuq proqramı gerçəkləşdirilib, Naxçıvan yeni inkişaf mərhələsinə qədəm qoyub. Bu yüksəliş hər gün gözümüz qarşısında baş verdiyindən bizə adi görünür. Ancaq dövlət başçısına adi görünmür. Prezident blokada şəraitində inkişaf və tərəqqiyə nail olmağın çətinliklərini çox yaxşı bilir. Ölkə rəhbəri onu da bilir ki, blokada şəraitində daşı daş üstə qoymaq hər oğulun işi deyil.

Naxçıvan Muxtar Respublikası Ali Məhkəməsinin Rəyasət Heyətinin iclası keçirilib. İclasda 2016-cı ildə muxtar respublika məhkəmələrinin fəaliyyətinin yekunları müzakirə olunub.
İclası giriş sözü ilə açan Naxçıvan Muxtar Respublikası Ali Məhkəməsinin sədri Ramiz Süleymanov məhkəmə fəaliyyətinin təkmilləşdirilməsi üzrə görülən işlər, 2016-cı ildə muxtar respublikada ədalət mühakiməsinin həyata keçirilməsi vəziyyəti ilə bağlı məruzə edib.
Muxtar respublika məhkəmələri tərəfindən vətəndaşların hüquq və azadlıqlarının təmin olunması sahəsində, habelə əhalinin hüquqi maarifləndirilməsi istiqamətində görülən işlər barədə danışan Ali Məhkəmənin sədri bildirib ki, əvvəlki illərdə olduğu kimi, ötən ildə də Naxçıvan Muxtar Respublikasında hüquq institutlarının inkişaf etdirilməsi, məhkəmə orqanlarının fəaliyyətinin müasirləşdirilməsi istiqamətində mühüm addımlar atılıb, məhkəmələrin fəaliyyətində yeni informasiya texnologiyalarının tətbiq olunması ilə bağlı bir sıra işlər görülüb. Hakimlərin peşə bacarıqlarının artırılması, onlar tərəfindən ədalət mühakiməsinin həyata keçirilməsi ilə bağlı olaraq Avropa Məhkəməsinin presedent hüququnun öyrənilməsi, onların hüquqi biliklərinin daha da möhkəmləndirilməsi istiqamətində, eləcə də milli qanunvericiliyə edilən əlavələr və dəyişikliklər barədə müntəzəm olaraq muxtar respublikada yaşayan əhali arasında hüquqi təbliğat və izahat işlərinin aparılması sahəsində bir sıra tədbirlər həyata keçirilib.

Azərbaycan Respublikasının Prezidentinin 2016-cı il 18 noyabr tarixli Sərəncamına və sərəncamın icrası ilə bağlı  Naxçıvan Muxtar Respublikası Ali Məclisi Sədrinin  təsdiq etdiyi Tədbirlər Planına əsasən, Naxçıvan Tibb Kollecində  görkəmli dövlət və elm xadimi, pedaqoq-alim, professor Əziz Əliyevin yubileyinə həsr edilmiş tədbir keçirilib. 

Tədbiri giriş sözü ilə Naxçıvan Tibb Kollecinin direktoru Sona Məmmədova açıb.
Naxçıvan Muxtar Respublikası Səhiyyə Nazirliyinin Kadr, elm və təhsil sektorunun müdiri Səmayə İbrahimovanın “Əziz Əliyevin səhiyyədəki xidmətləri” və kollecin şöbə müdiri Sahibə Quliyevanın “Əziz Əliyevin həyatı və siyasi fəaliyyəti” mövzularında çıxışları dinlənilib.
Çıxışlarda vurğulanıb ki, XX əsrdə Azərbaycan xalqının yetişdirdiyi görkəmli şəxsiyyətlərdən biri olan Əməkdar həkim, tibb elmləri doktoru, professor Əziz Əliyev dərin ağıl və düşüncəyə, rəhbərlik etmək qabiliyyətinə və zəngin həyat təcrübəsinə malik idi. Əziz Əliyev 1897-ci ilin yanvar ayında qədim Azərbaycan torpağı olan İrəvan quberniyasının Hamamlı kəndində anadan olub. İlk təhsilini doğulduğu kənddə alıb, 1908-ci ildən sonra isə Rusiyanın Çita şəhərindəki gimnaziyada oxuyub. 1914-1917-ci illərdə İrəvan kişi gimnaziyasında təhsil alan Əziz Əliyev buranı əla qiymətlərlə bitirdikdən sonra Rusiyanın Sankt-Peterburq şəhərindəki Hərbi Tibb Akademiyasına qəbul edilib. 1918-ci ildə İrəvana gələn Əziz Əliyev ailəsini çətinliklə Naxçıvanın Şərur rayonuna gətirib, bir müddət sonra Şahtaxtı kəndinə köçüb.

Güclü iqtisadiyyat müasir cəmiyyət quruculuğunun əsas şərtlərindəndir. Bu mənada, vətəndaşlarının rifah və təhlükəsizliyinin təmin olunması üçün müstəqil siyasət yeridərək öz daxili imkanları hesabına iqtisadiyyatını möhkəmləndirən Azərbaycanın uğurları çoxaldıqca onun beynəlxalq aləmdəki nüfuzu da artır, ölkəmiz sürətlə güclü dünya dövlətləri arasına daxil olur.
Müasir Azərbaycanın ümumi inkişaf mənzərəsində özünəməxsus inkişaf yolu ilə gedən Naxçıvan Muxtar Respublikası iqtisadi və sosial həyatın bütün sahələrində qazandığı uğurlarla diqqətəlayiq bir səviyyəyə çatıb. Təməli sağlam olan müasir Naxçıvan iqtisadiyyatı əsası ümummilli liderimiz Heydər Əliyev tərəfindən qoyulmuş inkişaf strategiyasına dönmədən əməl olunması ilə indiki mərhələyə yüksəlib. Çoxlarına təəccüblü gəlsə də, indi Naxçıvan minik avtomobillərinin istehsal edildiyi, ərazisinin, demək olar ki, tamamında dördüncü nəsil mobil rabitə şəbəkəsinin xidmətlərindən istifadə olunduğu, yaxın regionda ən güclü Günəş Elektrik Stansiyasının işə salındığı, ildə 400 mindən artıq turistin səfər etdiyi, 420 milyon ABŞ dollarından artıq ixracat həcminə çatıldığı bir məkana çevrilib. Bu mənada, ölkə Prezidenti cənab İlham Əliyevin muxtar respublikada həyata keçirilən yeni quruculuq ünvanlarına yüksək qiymət verərək “Mən çox şadam ki, qədim Naxçıvan bu gün yeniləşir, yenidən qurulur, gözəl binalar tikilir, xiyabanlar salınır”, – deməsi dövlət başçısının muxtar respublikanın inkişafına xüsusi diqqətindən xəbər verir.