Naxçıvan Muxtar Respublikası Gənclər və İdman, Təhsil nazirlikləri, Səfərbərlik və Hərbi Xidmətə Çağırış üzrə Dövlət Xidməti, Şahmat, Basketbol, Yüngül Atletika və Atıcılıq federasiyalarının təşkilatçılığı ilə muxtar respublikada fəaliyyət göstərən orta ümumtəhsil məktəblərinin şagirdləri arasında spartakiadaya start verilib. 

İki gün davam edəcək spartakiada “Vətənin müdafiəsinə hazıram” poliatlon çoxnövçülüyü, şahmat, yüngül atletika, basketbol, həndbol və stolüstü tennis növlərini əhatə edir.
Naxçıvan Şahmat Mərkəzində isə zəka sahibləri birincilik uğrunda qüvvələrini sınayırlar. 8 komandalı yarışda 2005-2007-ci illər təvəllüdlü məktəbli şahmatçılar mübarizə aparırlar. Hər komandanın heyətində 5 oğlan və 4 qız zəka sahibi qüvvəsini sınayır. Yarış İsveçrə sistemi üzrə keçirilir.
“Vətənin müdafiəsinə hazıram” poliatlon çoxnövçülüyü üzrə yarışın proqramına əsasən 9 komandanın idmançıları 100 metr məsafəyə qaçış, qumbaraatma, turnikdədartınma, 2000 metr məsafəyə kross qaçışı və pnevmatik silahdan 10 metr məsafəyə atış üzrə yarışlarda mübarizə aparırlar.

Naxçıvan Muxtar Respublikası Gənclər və İdman Nazirliyi və Atıcılıq Federasiyasının birgə təşkilatçılığı ilə Naxçıvan şəhərinin ölkəmizin Gənclər Paytaxtı seçilməsi ilə əlaqədar ali və orta ixtisas təhsili müəssisələrinin tələbələri, eyni zamanda Heydər Əliyev adına Hərbi Liseyin kursantları arasında peyntbol üzrə muxtar respublika birinciliyi keçirilib.
Atıcılıq Mərkəzində keçirilən yarışda tərkibi 6 nəfərdən ibarət olmaqla, 7 komanda mübarizə aparıb.
Birinciliyin nəticələrinə əsasən hədəfləri daha sərrast vuran Naxçıvan Dövlət Universitetinin komandası qalib adını qazanıb. Naxçıvan Dövlət Texniki Kollecinin komandası ikinci, Musiqi Kollecinin komandası isə üçüncü olub.
Sonda qaliblər Gənclər və İdman Nazirliyinin diplom və kubokları ilə mükafatlandırılıblar.

Naxçıvan Muxtar Respublikası Gənclər və İdman Nazirliyinin
mətbuat xidməti

Naxçıvan Qarnizonu üzrə hərbi qulluqçular arasında yüngül atletika birinciliyi keçirilib. “Vətənə, xalqa və dövlətə xidmət ömrümüzün mənasıdır” devizi altında təşkil olunan birincilikdə 16 komanda mübarizə aparıb.
Hərbi qulluqçuların sürət, çeviklik və dözümlülüyünü yoxlamaq, güclü idmançı və komandaları müəyyən etmək məqsədilə keçirilən birincilikdə 220 idmançı yarışıb. Atletlər Naxçıvan Ordu İdman Klubunun idman şəhərciyində 100, 1000 və 3000 metr məsafəyə qaçış, 400 metr məsafəyə estafet qaçışı, hündürlüyə və uzunluğa tullanma yarışlarında güclərini sınayıblar.
Yekun nəticəyə əsasən yarışların qalibi Heydər Əliyev adına Hərbi Liseyin kursantları olub. Komanda hesabında ikinci yerdə xüsusi təyinatlılar, üçüncü yerdə isə Daxili Qoşunların “Naxçıvan” Əlahiddə Əməliyyat Briqadasının atletləri qərarlaşıblar.
İlk üçlükdə qərarlaşan hərbi qulluqçu və komandalar Əlahiddə Ümumqoşun Ordu Komandanlığı tərəfindən diplom və fəxri fərmanla təltif ediliblər.

Nəriman NƏCƏFOV

Bu yolda qazanılanlar Naxçıvan idmanının uğurlarıdır

Ağır atletika risk tələb edən mürəkkəb bir idman növüdür. Bu növdə qüvvət və sərtliyin birləşməsi idmançıya böyük bir çəkini qaldırmaq imkanı verdiyi kimi, psixoloji gərginlik də yaradır. Ağır atletika ən qədim idman növü kimi olimpiya oyunlarının proqramına daxil edilib. Dünyanın ən mötəbər idman bayramında bu növ öz “ağırlığı” ilə böyük nüfuz qazanıb. Belə bir “ağırlığın” altına girmək böyük məsuliyyət, cəsarət tələb edir. Bu öhdəliyi öz üzərinə götürən isə hazırda dünyanın ən güclü idmançılarından biri hesab edilən, yeni­yetmələr arasında ikiqat Avropa çempionu Tərmenxan Babayevdir. 100 ilə yaxın ağır atletika tariximizdə təkanla qaldırma hərəkətində  onun ram etdiyi çəkiləri bu yaşda öz çəkisində heç kim başı üzərinə qaldıra bilməyib.

İlk yarışdan ümidləri doğruldan idmançı

Şərur rayonunun Çomaxtur kəndində 2002-ci ildə dünya­ya göz açan Tərmenxan Babayev idmana erkən yaşlarından maraq göstərib. 2012-ci ildə Naxçıvan Muxtar Respublikası Gənclər və İdman Nazirliyinin nəzdində Şərur rayonunda fəaliyyət göstərən ağır atletika bölməsinə yazılıb. Burada onun ilk məşqçisi Şəfi Hüseynov olub. İkiillik məşqlərdən sonra o, ölkə birinciliyində uğurlu nəticə qazanıb. Təməli bu yarışdan qoyulan uğurlar onun milli komandaya dəvət olunması ilə nəticələnib. Bununla da onun üçün idman karyerasında yeni dönəm başlayır. Tərmenxan qarşısına bir məqsəd qoyur: idman rejiminə riayət etmək və böyük rəqabətdən qalib ayrılmaq. Qısa vaxt kəsiyində bunun öhdəsindən gələn Tərmenxanın özünəinamı artır, 2016-cı ilin əvvəlində çıxış etdiyi ölkə birinciliyində çempion olur, Azərbaycan kubokunu başı üzərinə qaldırır. Həmin il yığmanın heyətində Malayziyada keçirilən dünya birinciliyində mükafat qazanmasa da, ilk beynəlxalq yarışda hamının diqqətini cəlb edir.

Qusar rayonunda kross qaçışı üzrə Azərbaycan çempionatı keçirilib.
Çempionatda Naxçıvan Muxtar Respublikası Yüngül Atletika Federasiyasının iki idmançısı da mübarizə aparıb. Hər iki idmançımız uğurlu nəticələr qazanıb. Belə ki, 6 kilometr məsafədə Əmrah Nağıyev bütün rəqiblərini qabaqlayaraq Azərbaycan çempionu adına layiq görülüb. Digər idmançımız Səfər Tağıyev isə 3 kilometr məsafədə finiş xəttini ikinci yerdə başa vurub.
İdmançılarımız təşkilatçılar tərəfindən mükafatlandırılıblar.

Naxçıvan Muxtar Respublikası Gənclər və İdman Nazirliyinin mətbuat xidməti

Argentinanın paytaxtı Buenos-Ayresdə oktyabr ayının 6-da start verilən Yeniyetmələrin 3-cü Olimpiya oyunlarında ağır atletimiz – 85 kiloqram çəki dərəcəsində Tərmenxan Babayev körpücük üzərinə çıxıb.
Naxçıvan Muxtar Respublikası Gənclər və İdman Nazirliyinin nəzdində Şərur rayonunda fəaliyyət göstərən ağır atletika bölməsinin yetirməsi olan Tərmenxan Babayev 2002-ci ildə Naxçıvanda anadan olub. Şəxsi məşqçisi Şəfi Hüseynovdur. Yeniyetmələr arasında Avropa birinciliyinin ikiqat qalibi (2017, 2018), 6 qat rekordçusudur.
Olimpiya oyunlarında atletimiz birdənqaldırma hərəkətində 142 kiloqramı ram edib və bu hərəkətdə 2-ci olub. Tərmenxan təkanla qaldırma hərəkətində də 174 kiloqramın öhdəsindən gəlib və bu hərəkətdə 2-ci yeri tutub.
Toplam 316 kiloqram nəticə ilə Tərmenxan Babayev Yeniyetmələrin Olimpiya oyunlarında 85 kiloqram çəki dərəcəsində “Gümüş” medala layiq görülüb.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan Muxtar Respublikası Gənclər və İdman Nazirliyi bu ilin ötən 9 ayında gənclərlə iş, kütləvi bədən tərbiyəsi və idman sahələri üzrə 405 tədbir keçirmişdir. Naxçıvan şəhərinin 2018-ci il üçün ölkəmizin Gənclər Paytaxtı seçilməsi ilə əlaqədar “Hünər” XII Vətənpərvərlik Mahnıları Festivalı keçirilmiş, Naxçıvan şəhərindəki mərkəzi meydanda konsert proqramı təşkil olunmuşdur. Bununla yanaşı, Ağbulaq İstirahət Mərkəzində muxtar respublikada fəaliyyət göstərən ali və orta ixtisas təhsili müəssisələri tələbələrinin və idman federasiyalarının idmançılarının iştirakı ilə gənc­lərin qış və yay məktəbləri təşkil edilmişdir. Naxçıvan şəhərində və muxtar respublikanın rayonlarında “Gənclər bağı” salınmışdır.
Ümummilli lider Heydər Əliyevin anadan olmasının 95 illiyi ilə əlaqədar gənclərin “Qurtuluşdan Əlincəqalaya” devizi altında yürüşü təşkil edilmiş, lektoriya və açıq dərs keçilmiş, ulu öndərin siyasi fəaliyyətinin hər iki dövründən bəhs edən “Hakimiyyətin yükü” adlı sənədli film nümayiş olunmuşdur. Naxçıvan şəhərinin 2018-ci il üçün İslam Mədəniyyətinin Paytaxtı seçilməsi ilə əlaqədar gənc­lərin muzeylərə ekskursiyası təşkil olunmuş, “Oxunması zəruri olan kitablar”ın müzakirəsi keçirilmişdir.

Naxçıvan Şahmat Mərkəzində Naxçıvan Muxtar Respublikası ­Şahmat Federasiyasının kuboku uğrunda keçirilən muxtar respublika birinciliyi başa çatmışdır.
Naxçıvan Muxtar Respublikası Gənclər və İdman Nazirliyi ilə Şahmat Federasiyasının birgə təşkil etdiyi birincilikdə şəhər və rayonların, ümumilikdə, 8 komandası mübarizə aparmışdır. Reqlamentə əsasən birincilikdə çıxış edən hər komandanın heyətində 4 oğlan və 2 qız şahmatçı iştirak etmişdir. Belə ki, oğlanlar 8, 10, 12 və 14 yaş, qızlar isə 10 və 14 yaş qruplarında güclərini nümayiş etdirmişlər. Xal hesablamalarda hər qələbəyə 2, heç-heçəyə isə 1 xal verilmişdir.
“Naxçıvan” komandası keçirdiyi 7 tur ərzində bütün görüşlərini qələbə ilə başa vuraraq Şahmat Federasiyasının kuboku uğrunda keçirilən birinciliyin qalibi olmuşdur. 10 xal toplayan “Babək” komandası birinciliyi ikinci pillədə başa vurmuşdur. Onlardan bir xal geri qalan “Ordubad” komandası isə üçüncü olmuşdur.

18 oktyabr – Müstəqillik Günü münasibətilə tələbələr arasında ekstremal yürüş üzrə Naxçıvan Muxtar Respublika birinciliyi keçirilib.
Uzunoba Su Anbarı ətrafında təşkil olunan birincilikdə 100-ə yaxın idmançı mübarizə aparıb. Naxçıvan Muxtar Respublikası Gənclər və İdman Nazirliyi ilə Hava və Ekstremal İdman Növləri Federasiyasının birgə təşkil etdiyi yarışda oğlanlar 3, qızlar isə 2 kilometr məsafəni qət etməyə çalışıblar.
Yarışın yekun nəticəsinə əsasən oğlanlar arasında “Naxçıvan” Universitetinin tələbəsi Abbas Babayev finiş xəttinə hamıdan tez çatıb. Naxçıvan Dövlət Texniki Kollecinin tələbələri – Əkbər Mehdiyev və Fərid Qasımov ikinci və üçüncü olublar.
Qızların mübarizəsində isə Naxçıvan Dövlət Universitetinin tələbəsi Gülayə Cəfərova qalib adını qazanıb. İlkanə Babayeva (Naxçıvan Dövlət Texniki Kolleci) və Dünya Əmrahlı (Naxçıvan Tibb Kolleci) digər pillə­lərdə qərarlaşıblar.
Sonda qaliblər təşkilatçılar tərəfindən diplom və hədiyyələrlə mükafatlandırılıblar.

Naxçıvan Muxtar Respublikası
Gənclər və İdman Nazirliyinin
mətbuat xidməti

Naxçıvan Şahmat Mərkəzində Naxçıvan Muxtar Respublikası Şahmat Federasiyasının kuboku uğrunda muxtar respublika birinciliyinə start verilib.
Muxtar respublikanın Gənclər və İdman Nazirliyi ilə Şahmat Federasiyasının birgə təşkil etdiyi birincilikdə şəhər və rayonların, ümumilikdə, 8 komandası mübarizə aparır. Birinciliyin reqlamentinə əsasən hər komandanın heyətində 4 oğlan və 2 qız iştirak edir. Oğlanlar 8, 10, 12 və 14 yaş, qızlar isə 10 və 14 yaş qruplarında ağ-qara taxtada kimin güclü olduğunu nümayiş etdirməyə çalışırlar. Xal hesablamalarına gəlincə, hər qələbəyə 2, heç-heçəyə isə 1 xal veriləcək. Sonda hər hansı komandanın xal hesabları bərabər olarsa, o zaman fərdi yarışlarda qazanılan xallar ­hesablanacaq.
Qeyd edək ki, birinciliyə ayın 12-də yekun vurulacaq və qalib komandalar federasiya tərəfindən diplom və kubokla mükafatlandırılacaqlar.

Naxçıvan Muxtar Respublikası
Gənclər və İdman Nazirliyinin
mətbuat xidməti

Naxçıvan şəhərindəki İlham Əliyev adına Olimpiya­-İdman Kompleksində 18 oktyabr – Dövlət Müstəqilliyi Günü münasibətilə yeniyetmə və gənclər arasında boks üzrə Naxçıvan şəhər açıq birinciliyi keçirilib.
Naxçıvan Muxtar Respublikası Boks Federasiyası ilə şəhər Gənclər və İdman İdarəsinin təşkil etdiyi açıq birincilikdə Naxçıvan şəhərinin idmançıları ilə yanaşı, Babək, Ordubad, Culfa və Şərur rayonlarının idmançıları da mübarizə aparıblar. Beynəlxalq Boks Federasiyasının qaydalarına uyğun keçirilən birincilikdə 31 çəki dərəcəsində 80-ə yaxın dəri əlcək sahibi qüvvəsini sınayıb.
Gərgin mübarizə şəraitində keçən döyüşdə hər çəki dərəcəsində yer tutan idmançılar diplomlarla mükafatlandırılıblar.

Ceyhun MƏMMƏDOV

Naxçıvan Muxtar Respublikası Karate­-do Federasiyasının yetirməsi Rəşid Süleymanov daha bir uğura imza atıb.
Belə ki, Rusiyanın paytaxtı Moskva şəhərində karate üzrə açıq birincilik keçirilib. İdmançımız bu yarışda 12-13 yaş qrupunda (kumite yarışlarında) mübarizə aparıb. 45 kiloqram çəki dərəcəsində tatami üzərinə çıxan Rəşid Süleymanov birinciliyi ikinci pillədə başa vurub.
Sonda idmançımız təşkilatçılar tərəfindən diplom və medalla təltif olunub.

Ceyhun MƏMMƏDOV

Naxçıvan şəhərindəki “N”hərbi hissənin təlim-məşq meydanında payız çağırışına həsr olunmuş “Vətənin müdafiəsinə hazıram” poliatlon çoxnövçülüyü üzrə şəhər birinciliyi ­keçirilib.
Yarışda 14 tam orta məktəbin komandası iştirak edib. Reqlamentə əsasən komandalar 100 və 2000 metr məsafəyə qaçış, qumbaraatma və turnikdədartınma növlərində güclərini sınayıblar.
Yarışın yekununa əsasən 662 xalla 9 nömrəli tam orta məktəbin komandası qalib adını qazanıb. 519 xalla 16 nömrəli tam orta məktəbin komandası ikinci, 515 xalla 15 nömrəli tam orta məktəbin komandası isə üçüncü olub.
Sonda qalib komandalar təşkilatçıların diplom, fəxri fərman və kubokları ilə təltif ediliblər.
Qeyd edək ki, 9 nömrəli tam orta məktəbin komandası oktyabr ayında keçiriləcək Naxçıvan Muxtar Respublika zona birinciliyində Naxçıvan şəhərini təmsil edəcək.

Ceyhun MƏMMƏDOV

Muxtar respublikamızın şəhər və rayonlarında 50-dən çox idman obyekti fəaliyyət göstərir. Yaradılan müasir idman infrastrukturu burada beynəlxalq yarışları yüksək səviyyədə keçirməyə imkan verir, idmançılarımız üçün yaradılan şərait onların beynəlxalq arenalarda uğur qazanmasına yol açır. Bu, muxtar respublikamızda idmana göstərilən qayğının nəticəsidir.
Naxçıvanda yenilə­­şən id­man obyektlərindən bi­­ri də Culfa Rayon Mər­­kə­­­­zi Stadionudur. Naxçı­van Mux­­­tar Respublikası ­­Ali Məc­lisi Sədrinin tapşırığına əsa­­­­­­sən muxtar respublikanın Gənc­­­lər və İdman Nazirliyi tə­rəf­indən rayon mərkəzi stadionunun yenidən qurularaq gənc­lərin istifadəsinə verilməsi muxtar res­publikamızda idmanın inkişafına növ­bəti töhfə olacaq.
Stadion müasir standartlara cavab verə biləcək şəkildə təmir olunur, ətrafındakı çəpərlər boyanır. Həmçinin stadionun ətrafındakı bordürlər yenilənir, tamaşaçılar üçün nəzərdə tutulan səkilərə kilid daşlar döşənilir. Uzunluğu 100, eni isə 60 metr olan təbii ot örtüklü stadion ərazisində 80 nəfərlik oturacaqlar quraşdırılacaq. Bununla yanaşı, stadionun ərazisində voleybol və basketbol, mini-futbol meydançaları, ehtiyat oyunçular üçün kabinlər də inşa ediləcək. Eyni zamanda burada sadə idman qurğuları quraşdırılacaq, qaçış və uzunluğa tullanma yarışlarının keçirilməsi üçün zolaq salınacaq.
Qeyd edək ki, stadionun sulama sistemi də yenidən bərpa olunur və su nasosları yeniləri ilə əvəzlənir.
Stadionda muxtar respublika çempionatı üzrə oyunların, həm də rayon birinciliklərinin keçirilməsi nəzərdə tutulur.

 Ceyhun MƏMMƏDOV

6-18 oktyabr tarixlərdə Argentinanın paytaxtı Buenos-Ayres şəhərində Yeniyetmələrin III Yay Olimpiya Oyunları keçiriləcək.
Naxçıvan Muxtar Respublikası Gənclər və İdman Nazirliyinin Şərur rayon ağır atletika bölməsinin yetirməsi Tərmenxan Babayev olimpiadada Azərbaycanı ağırlıqqaldırmada təmsil edəcək. Yığma­mızın heyətində ilk dəfə olaraq olimpiya oyunlarında iştirak edəcək Tərmenxana böyük ümidlər var. Səbəbi isə hazırda onun öz yaş qrupu və çəki dərəcəsində dünyanın güclü idmançılarından biri olmasıdır. Məşqçi Səfi Hüseynovun yetirməsi idman mütəxəssisləri tərəfindən olimpiadada qələbə qazanmağa real namizəd kimi göstərilir. Onun olimpiya oyunlarına vəsiqə qazanması, eyni zamanda Naxçıvan idmanı tarixində ilkdir.
Qeyd edək ki, bu gün Azərbaycan olimpiya komandası Cənubi Amerika ölkəsinə 17 idmançı (8 qız və 9 oğlan), 12 məşqçi və həkim, nümayəndə heyətinin rəhbəri və gənc səfirdən ibarət heyətlə yollanıb. Bundan başqa, nümayəndə heyətinə Milli Olimpiya Komitəsi, Gənclər və İdman Nazirliyi və bəzi federasiyaların rəhbərləri də daxildir.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan Muxtar Respublikası Futbol Federasiyasının muxtar respublikanın Gənclər və İdman, Təhsil nazirlikləri ilə razılaşdırılmış təqvim planına uyğun olaraq futbol üzrə XVII muxtar respublika çempionatına start verilib.
Doqquz komandanın mübarizə apardığı çempionat iki dövrədən ibarətdir. İlk dövrəyə bu ilin noyabr ayının sonlarında yekun vurulacaq. İkinci dövrənin oyunları isə fevral ayında başlayacaq. Reqlamentə əsasən hər turda bir komanda istirahət edəcək.
Çempionatda artıq ilk iki turun oyunları keçirilib. Dörd mövsümdür ki,çempionluq titulunu əldən verməyən “Araz-Naxçıvan” futbol komandası cari mövsümdə də iddialı olduğunu qazandığı qələbələrlə sübut edib. Belə ki, “qırmızı-ağlar” birinci turda Kəngərlinin eyniadlı komandasını minimal hesabla (0:1) məğlub edib. İkinci turda isə Culfa təmsilçisi “Əlincə”ni qəbul edən Naxçıvan şəhər komandası rəqibi 5 dəfə mərkəzə dəvət etməli olub – 5:0.
Ötən mövsüm olduğu kimi, “Babək” komandası yeni mövsümə də qələbələrlə başlayıb. Onlar ilk turda “Batabat” komandasını 6:1, ikinci turda isə “Dübəndi” komandasını 3:0 hesabı ilə məğlub ediblər. Səfərdə “Əlincə”yə (0:3), doğma arenada isə “Batabat”a (9:4) qalib gələn “Arpaçay” komandası da iki görüşdən maksimum xal toplayıb.

Torpaqlarımızın müdafiəsində ayıq-sayıq dayanan, təlimlərdə fəal iştirak edərək daha da püxtələşən hərbi qulluqçularımız bu dəfə futbol meydançasında qələbə uğrunda yarışıblar. “Vətənə, xalqa və dövlətə xidmət ömrümüzün mənasıdır” devizi altında təşkil olunan futbol birinciliyində 17 komanda mübarizə aparıb. Əlahiddə Ümumqoşun Ordu komandanlığının təşkil etdiyi və olimpiya sistemi ilə keçirilən yarışda oyunları Naxçıvan Muxtar Respublikası Futbol Federasiyasının hakimləri idarə ediblər.
Geniş tamaşaçı kütləsinin izlədiyi oyunlar gərgin mübarizə şəraitində keçib. 17 komanda arasından finala qədər yüksələn ən güclü 2 komandanın mübarizə apardığı final görüşündə 5-0 hesabı ilə qələbə qazanan tərəf Daxili Qoşunların “Naxçıvan” Əlahiddə Əməliyyat Briqadasının futbol komandası olub. Hərbi qulluqçuların futbol birinciliyində ikinci yerdə motoatıcılar, üçüncü yerdə isə xüsusi təyinatlılar qərarlaşıb. İlk ­üçlükdə yer alan komandalar ­Əlahiddə Ümumqoşun Ordu ­ko­­­­­­­mandanlığı ­ tərəfindən diplom və kuboklarla ­mükafatlandırılıblar.

Nəriman NƏCƏFOV

Azərbaycan Milli Karate Federasiyasının təşkilatçılığı ilə karate-do üzrə “Bakı Open” beynəlxalq çempionatı keçirilib.
Bakı şəhərində təşkil olunan çempionatda Naxçıvan Muxtar Respublikası Karate-do Federasiyasının 2 idmançısı da mübarizə aparıb. 16-17 yaş qrupunda tatami üzərinə çıxan Aslan İsmayılov uğurla çıxış edib. O, 76 kiloqram çəki dərəcəsində bürünc medal qazanıb. Digər idmançımız Vüsal Seyidov isə hakimlərin qərəzli qərarları ilə üzləşib. Belə ki, 12-13 yaş qrupunda -40 kiloqram çəki dərəcəsində mübarizə aparan idmançımız 6 görüşdə qalib gəlsə də, mükafatçılar sırasına düşə bilməyib.

 Ceyhun MƏMMƏDOV

Şamaxı Olimpiya-İdman Kompleksində Əməkdar bədən tərbiyəsi və idman xadimi Oleq Krapivinin şərəfinə 2004-2005-ci illər təvəllüdlü yeniyetmələr arasında sərbəst güləş üzrə VI açıq respublika turniri keçirilib. Turnirdə Azərbaycandan, Rusiyadan, Ukraynadan, Gürcüstandan, İrandan, Qazaxıstandan və Qırğızıstandan, ümumilikdə, 300-ə yaxın güləşçi iştirak edib.
Beynəlxalq turnirdə Naxçıvan Muxtar Respublikası Güləş Federasiyasının idmançısı Dadaş Dadaşzadə də mübarizə aparıb. O, 75 kiloqram çəki dərəcəsində bütün rəqiblərinə qalib gələrək turnirin baş mükafatını qazanıb.
Sonda idmançımız təşkilatçılar tərəfindən mükafatlandırılıb.

Ceyhun MƏMMƏDOV

Naxçıvan Muxtar Respublikası Şahmat Federasiyasının kuboku uğrunda şahmat üzrə Ordubad rayon birinciliyinə yekun vurulub.
Rayon Gənclər və İdman İdarəsi ilə Şahmat Federasiyasının təşkil etdiyi birincilikdə 60 şahmatçı mübarizə aparıb.
Birinciliyin yekununa əsasən oğlanlar arasında 8 yaş qrupunda Yusif Əliyev, 10 yaş qrupunda Rəcəb Abdullabəyli, 12 yaş qrupunda Uğur Həsənli, 14 yaş qrupunda Seyid Hüseyn qalib adını qazanıb. Qızların mübarizəsində isə 10 yaş qrupunda Zərifə Bədəlbəyli və 14 yaş qrupunda Zərrin Məmmədli birinci olublar.
Qaliblər muxtar respublika mərhələsində iştirak etmək hüququ qazanıblar.

Ceyhun MƏMMƏDOV

Naxçıvan Muxtar Respublikası Şahmat Federasiyasının rayon bölmələri və Gənclər və İdman idarələrinin təşkilatçılığı ilə muxtar respublikada şahmat birincilikləri təşkil olunur. Birincilikləri keçirməkdə məqsəd məktəblilər arasında bacarıqlı və istedadlı şahmatçıları üzə çıxarmaq, onlar arasında idman və dostluq əlaqələrini inkişaf etdirməkdir.
Sədərək Rayon Uşaq-Gənclər Şahmat Məktəbində keçirilən federasiyanın kuboku uğrunda rayon birinciliyində 52 oğlan və qız şahmatçı mübarizə aparıb. Yarış 3 gün davam edəcək.
Babək rayonunda da şahmat birinciliyinə start verilib. Birincilikdə 60 zəka sahibi (40 oğlan və 20 qız) mübarizə aparır.
Kəngərli Rayon Gənclər və İdman İdarəsi və Şahmat Federasiyasının rayon bölməsinin birgə təşkilatçılığı ilə keçirilən federasiyanın kuboku uğrunda birincilikdə isə 12 məktəbdən 50 şagird iştirak edir.
Şahbuz rayonunda da şahmat birinciliyinə start verilib. Yarışda 23 məktəbin 80-nə yaxın zəka sahibi mübarizə aparır.
Analoji birincilik Culfa rayonunda da təşkil edilib. Naxçıvan Muxtar Respublikası Şahmat Federasiyasının kuboku uğrunda rayon birinciliyində 54 zəka sahibi ağ-qara taxtada mübarizə aparır.
Qeyd edək ki, sonda qalib gələn şahmatçılara muxtar respublika mərhələsində iştirak etmək üçün sertifikatlar və diplomlar təqdim ediləcəkdir.

Naxçıvan Muxtar Respublikası Şahmat Federasiyasının kuboku uğrunda şahmat üzrə Naxçıvan şəhər birinciliyinə start verilib.
Naxçıvan Şahmat Mərkəzində keçirilən birincilikdə 60 oğlan və qız mübarizə aparır. Naxçıvan Şəhər Gənclər və İdman İdarəsi və Uşaq-Gənclər Şahmat Məktəbinin birgə təşkil etdiyi yarış üç gün davam edəcək.
Qalib gələn şahmatçılara muxtar respublika mərhələsində iştirak etmək üçün sertifikatlar təqdim ediləcək.
Analoji tədbir Şərur rayonunda da keçirilib. Belə ki, rayon Gənclər və İdman İdarəsi, Təhsil Şöbəsi və Şahmat Federasiyasının Şərur bölməsinin birgə təşkilatçılığı ilə məktəblilər arasında rayon birinciliyinə yekun vurulub. Yarışda 16 məktəbdən 50-dən artıq şagird iştirak edib.
Komanda xarakteri daşıyan birinciliyin qalibi Ələkli kənd tam orta məktəbinin komandası olub. Aralıq kənd tam orta məktəbinin komandası ikinci, Çərçiboğan kənd tam orta məktəbinin komanda­sı isə üçüncü olub.
Qaliblərə təşkilatçılar tərəfindən diplomlar təqdim edilib.

 Ceyhun MƏMMƏDOV

Naxçıvan Qarnizonu üzrə hərbi qulluqçular arasında futbol birinciliyinə start verilib.
“Vətənə, xalqa və dövlətə xidmət ömrümüzün mənasıdır” devizi altında təşkil olunan birincilikdə 17 komanda mübarizə aparır.
Əlahiddə Ümumqoşun Ordu komandanlığının təşkil etdiyi və olimpiya sistemi ilə keçirilən birinciliyi Naxçıvan Muxtar Respublikası Futbol Federasiyasının hakimləri idarə edirlər.

Nəriman NƏCƏFOV

Naxçıvan Muxtar Respublika Stadionunda “Zərərli vərdişlərə yox deyək, həmişə sağlam olaq” devizi altında “Naxçıvan”-“Şahbuz” komandaları arasında kross qaçışı üzrə yoldaşlıq görüşü keçirilib.
Naxçıvan Muxtar Respublikası Yüngül Atletika Federasiyası ilə Naxçıvan Şəhər Gənclər və İdman İdarəsinin birgə təşkil etdiyi görüşdə hər iki komandanın tərkibində, ümumilikdə, 50 atlet mübarizə aparıb.
Şəhər Gənclər və İdman İdarəsinin rəisi Xəyal Qurbanov bildirib ki, bu yarışı keçirməkdə məqsəd gəncləri zərərli vərdişlərdən kənarlaşdırmaq və onları idmana cəlb etməkdir.
3 kilometr məsafədə keçirilən kross yarışının nəticələrinə əsasən oğlanlar arasında Əmrah Nağıyev, Səfər Tağıyev, İbrahim Cəfərzadə, Sərraf Kərimov, Coşqun Əliyev müvafiq olaraq ilk beş pillədə qərarlaşıblar. Qızların mübarizəsində isə Xatun Orucova qalib adını qazanıb. Gülayə Cəfərova, İlkanə Babayeva, Rəmidə Abdullayeva və Tamella Qurbanova digər yerlərə layiq görülüblər.
Qalib idmançılara diplom və hədiyyələr təqdim olunub.

Naxçıvan Muxtar Respublikası Gənclər və İdman Nazirliyinin mətbuat xidməti

Sədərək rayonunda keçirilən “Zərərli vərdişlərə yox deyək, həmişə sağlam olaq” devizi altında stolüstü tennis üzrə rayon birinciliyinə yekun vurulub.
Rayon Gənclər və İdman İdarəsi, Təhsil Şöbəsi, Uşaq-gənclər idman məktəbi və Yeni Azərbaycan Partiyası Sədərək Rayon Təşkilatı Gənclər Birliyinin birgə təşkilatçılığı ilə ümumtəhsil məktəblərinin şagirdləri arasında keçirilən birincilikdə 22 idmançı (12 qız və 10 oğlan) mübarizə aparıb.
Birincilikdə qaliblər və fərqlənən idmançılar təşkilatçıların diplomları ilə təltif olunublar.

Naxçıvan Muxtar Respublikası
Gənclər və İdman Nazirliyinin mətbuat xidməti

İdman insanların həyatında mühüm yer tutur. Gün ərzində yüksək əhval-ruhiyyədə və enerjili olmaq üçün mütləq şəkildə idmanla məşğul olmaq lazımdır. Mütəxəssislər maraqlı bir məqama  da toxunaraq qeyd edirlər ki, istənilən yaş həddində idman insan orqanizminə yalnız müsbət təsir göstərir. Düzdür, bəzi idman növləri var ki, onlar müəyyən fəsadlar törədə, həmin idman növünə olan marağı azalda bilər. Lakin yüngül atletika ilə məşğul olanlar bu barədə heç vaxt şikayətçi olmayıblar. Əlbəttə, bunun da səbəbləri var ki, yazıda bunları bir qədər açmağa çalışacağıq.

Zaman keçdikcə insan orqanizmi tələb olunan müəyyən təbii və süni təsirlərə uyğunlaşır. İnsan orqanizminə mənfi mənada təsir edən amillərdən biri də xəstəliklərdir. Bədənin möhkəmləndirilməsi isə bu xəstəlikləri müalicə etmir, sadəcə, onların qarşısını alır. Yəni bir növ profilaktik rol oynayır. Bədəni möhkəmləndirərkən immunitet sistemi də məşq etmiş olur. Atletika idman növlərində bu proses daha çox sezilir. Ümumiyyətlə, “atletika” qüvvə, çeviklik, cəldlik tələb edən hərəkətlərin məcmusudur. Bu, bir idman növü olmaqla yanaşı, həm də digər fiziki hazırlıq tələb edən növlərin əsasını təşkil edir. Məhz buna görə Yunanıstanda böyük fiziki qüvvəyə malik insanları – idman yarışlarının iştirakçılarını “atlet” adlandırırdılar.

Naxçıvan Muxtar Respublikası Gənclər və İdman Nazirliyi və Naxçıvan Muxtar Respublikası Paralimpiya Federasiyasının birgə təşkilatçılığı ilə 18 yaşadək sağlamlıq imkanları məhdud oğlanlar və qızlar arasında üzgüçülük yarışı keçirilib.
Naxçıvan şəhərindəki ­İlham Əliyev adına Olimpiya-İdman Kompleksinin Üzgüçülük Mərkəzində keçirilən yarışda sağlamlıq imkanları məhdud 14 uşaq iştirak edib.
Yarışın yekun nəticələrinə əsasən oğlanlar arasında Allahverən Səfərov, Fərid Qafarlı və Hüseyn Abdullayev ilk üç pillədə qərarlaşıblar.
Qızlar arasında isə qalib adını Səkinə Rəhimli qazanıb. Mələk Əhmədzadə ikinci, Nurgül Müslümova isə üçüncü yerlərə layiq görülüblər. Sonda qaliblərə fəxri fərmanlar, digər yarış iştirakçılarına isə həvəsləndirici mükafatlar təqdim edilib.

. Naxçıvan Muxtar Respublikası Gənclər və İdman Nazirliyinin
mətbuat xidməti

Şüvəlan qəsəbəsində yerləşən Ağır Atletika Akademiyasının yarış zalında keçirilən gənclər arasında ağır atletika üzrə Azərbaycan birinciliyinə yekun vurulub. Çempionatın təşkilində məqsəd idmançıların ustalıq səviyyəsinin artırılması və təkmilləşdirilməsi, texniki cəhətdən hazırlıqlı və dərəcə normalarını yerinə yetirən idmançıların seçilməsi, kişilərdən və qadınlardan ibarət milli yığma komandaların tərkibinin müəyyənləşdirilməsi, onların qarşıdakı beynəlxalq yarışlara hazırlanmasıdır.

Bu gün Naxçıvan Muxtar Respublikasında gənclərin idmana cəlbi, onlara sağlam həyat tərzinin aşılanması diqqət mərkəzində saxlanılır. Bu işlərin davamlı olması, idmanın maddi-texniki bazasının gücləndirilməsi, idman qurğuları və obyektlərinin tikilib istifadəyə verilməsi isə gənclərin bədən tərbiyəsi və idmana marağını gündən-günə artırır. Naxçıvanda idman siyasətinin düzgün qurulduğunu bu sahədə qazanılmış nəticələr də təsdiqləyir – diyarımızda beynəlxalq səviyyəli yarışlar təşkil olunur, idmançılarımız hər il müxtəlif idman növləri üzrə keçirilən Avropa və dünya çempionatlarında uğurlu nəticələr göstərirlər. 

Belarusun Brest şəhərində keçirilən gömrük xidmətləri arasında futzal üzrə 12-ci açıq birincilikdə Azərbaycan gömrükçüləri növbəti görüşünü dünən Ermənistan komandasına qarşı keçirib.
Ölkəmizi yarışda təmsil edən Naxçıvan Muxtar Respublikası Dövlət Gömrük Komitəsinin komandası oyunu rəqibindən aşkar üstün şəraitdə keçirərək 4:0 hesabı ilə qalib gəlib. Ramazan Ağayev, Kamil Hacı­yev, Orxan Məmmədov, Cavid Xəlilov, İlqar İsmayılov və Rahil Tahirlidən ibarət start heyətlə meyda­na çıxan komandamız turnirdə ilk qələbəsini qazanıb.
Qeyd edək ki, gömrükçülərimiz növbəti görüşünü sentyabrın 13-də Ukrayna komandasına qarşı keçirə­cək. Turnirə 5 ölkə – Azərbaycan, Rusiya, Belarus, Ukrayna və Ermənistan komandaları qatılıblar. Brest şəhəri isə yerli komanda ilə təmsil olunur.

Xəbərlər şöbəsi

Avqust ayında Naxçıvan Muxtar Respublikası Gənclər və İdman Nazirliyi tərəfindən muxtar respublikada idmanın kütləviliyinin təmin edilməsi diqqət mərkəzində saxlanılmış, Naxçıvan Muxtar Respublikası idman federasiyaları idmançılarının Ağbulaq İstirahət Mərkəzində “Yay məktəbi” təşkil edilmişdir. Naxçıvan Muxtar Respublikası Karate-do Federasiyasının idmançılarına texniki-taktiki seminar, Naxçıvan Şəhər Üzgüçülük Mərkəzində gənc oğlan və qızlar arasında üzgüçülük üzrə Naxçıvan şəhər birincilikləri keçirilmişdir.
Türkiyənin Malatya şəhərində şahmat üzrə keçirilən VI beynəlxalq “Qızıl ərik” şahmat festivalında Naxçıvan Muxtar Respublikası Şahmat Federasiyasının, Türkiyənin Samsun şəhərində keçirilən cüdo üzrə beynəlxalq turnirdə Naxçıvan Muxtar Respublikasının cüdo üzrə yığma komandasının, İran İslam Respublikasının Urmiya şəhərində karate üzrə keçirilən ənənəvi “Urmiya Open” Beynəlxalq çempionatında Naxçıvan Muxtar Respublikasının Karate-do Federasiyasının idmançılarının iştirakı təmin edilmiş, 12 avqust – Beynəlxalq Gənclər Günü münasibətilə Naxçıvan Şahmat Mərkəzində gənc­lər arasında şahmat üzrə Naxçıvan Muxtar Respublika birinciliyi keçirilmişdir. Bundan başqa, gənc idmançıların Naxçıvan şəhərində yerləşən muzeylərə gəzintiləri təşkil edilmiş, idmanın müxtəlif növləri üzrə şəhər və rayon birincilikləri, yoldaşlıq görüşləri təşkil olunmuşdur.
Avqust ayında idmançılarımız muxtar respublika birinciliklərində 3, beynəlxalq turnirlərdə 7 olmaqla, 10 medal qazanmışlar.

Naxçıvan Muxtar Respublikası Gənclər və İdman Nazirliyinin mətbuat xidməti

Naxçıvan Muxtar Respublikası Ali Məclisi Sədrinin tövsiyə və tapşırıqlarına əsasən Naxçıvan Muxtar Respublikası Gənclər və İdman Nazirliyi və Naxçıvan Muxtar Respublikası Güləş Federasiyasının birgə təşkilatçılığı ilə məşqçi və idmançılar üçün cüdo üzrə seminar və təlim-məşq toplanışı keçirilib. 

Naxçıvan şəhərindəki İslam Hümbətov adına Uşaq-gənclər idman məktəbində keçirilən seminara muxtar respublikanın perspektivli cüdoçuları və məşqçi­-müəllimlər qatılıblar. Bakı şəhərindən dəvət olunmuş Azərbaycan Cüdo Federasiyasının regionlarda cüdonun inkişafı sektorunun müdiri, ikiqat Avropa çempionu Tərlan Poladov və Veteranlar Komitəsinin üzvü Vüsal Cəfərov cüdoçuların tәlim-mәşq prosesində iştirak ediblər. Mәşqçilәr yeniyetmә cüdoçulara yeni qaydalarla bağlı nəzəri və praktik məlumat veriblər.
Seminar barədə fikirlərini bildirən Tərlan Poladov qeyd edib ki, əsas məqsəd Azərbaycanda cüdonun inkişafına nail olmaqdır. Bunun üçün ölkə bu idman növünün təbliği istiqamətində işlər görülür. Bu gün Naxçıvanda cüdonun inkişafı, gənc­lər arasında sevilməsi və insanlarda bu növə marağın artırılması üçün hər bir şərait yaradılıb. Biz məşqçilər də mütəmadi olaraq nazirlik və federasiyanın dəvəti ilə muxtar respublikaya gəlir, məşqçi-müəllimlər və idmançılar üçün seminarlar, ­təlim-məşq toplanışları təşkil edirik. Eyni zamanda yeni qaydalar barəsində də onları məlumatlandırırıq. Bu gün keçirilən seminarda 80-dən çox idmançı iştirak edirdi. Biz Naxçıvana hər dəfə gəlib idmançı sayını çox gördükcə qürurlanırıq. Çünki muxtar respublikada bu növə maraq çoxdur. Naxçıvan cüdoçuları ölkədaxili və beynəlxalq arenalarda qazandıqları uğurlarla cüdonun muxtar respublikada inkişafının daim diqqətdə saxlanıldığını əyani olaraq göstərirlər.

Muxtar respublikamızda olimpiya hərəkatının genişlənməsinə böyük önəm verilir. Əlbəttə, bunun müəyyən səbəbləri var ki, ən əsası da, dünya ölkələrinin böyük əksəriyyətinin bu tədbirlərdə iştirakıdır. Diyarımızda idmanın inkişaf tempini müxtəlif kriteriyalarla ölçmək olar. Ancaq olimpiya oyunlarında çıxış bu tempin ən yüksəyidir. Bu sevinci bizə cari ildə keçiriləcək Yeniyetmələrin III Yay Olimpiya Oyunlarında idmançımız Tərmenxan Babayev yaşadacaq.
Naxçıvan Muxtar Respublikası Gənclər və İdman Nazirliyinin Şərur rayon ağır atletika bölməsinin yetirməsi Argentinanın Buenos-Ayres şəhərində keçiriləcək olimpiadada Azərbaycanı ağırlıqqaldırmada təmsil edəcək. Ölkəmizin qazandığı 17 lisenziyadan biri məhz Tərmenxanın payına düşür. Cənubi Amerika ölkəsinə yollanacaq (hələlik 9 idman növü üzrə) yığma­mızın heyətində ən böyük ümidlər Naxçıvan idmançısınadır. Belə ki, hazırda öz yaş qrupu və çəki dərəcəsində dünyanın ən güclü idmançılarından hesab edilən Tərmenxan Babayev olimpiadada qələbə qazanmağa ən real namizəd göstərilir. Onun olimpiya oyunlarına vəsiqə qazanması, eyni zamanda Naxçıvan idmanı tarixində ilkdir. Məhz bu amili nəzərə alıb idmançımızın da fikirlərini öyrəndik: “İlk dəfə olaraq olimpiadada iştirak etmək və dünyanın ən güclü idmançıları ilə eyni yarışda mübarizə aparmaq qürur­vericidir. Olimpiadaya vəsiqə qazanmaq, əslində, heç də asan olmadı. İştirak etdiyim turnirlərdə, Avropa və dünya çempionatlarında uğur qazanmağa çalışdım və buna nail oldum. Bu, təkcə mənim yox, həmçinin mənə dəstək olan, mənimlə həmişə maraqlanan və üzərimdə əziyyəti olanların qələbəsidir. Sevindirici haldır ki, Naxçıvan idmanı tarixində ilkə imza atacağam. Bununla qürur duyuram. Bu yolda muxtar respublika rəhbərinin göstərdiyi qayğı məni yeni-yeni qələbələrə ruhlandırır. Təlim-məşq toplanışlarında və yarışlarda, turnirlərdə iştirakım təmin edilib. İndi məqsədim olimpiadada qələbə qazanıb Naxçıvanın idman ənənəsini davam etdirmək və Azərbaycan bayrağını dalğalandırmaqdır”.

Naxçıvan Şəhər Gənclər və İdman İdarəsi ilə İlham Əliyev adına Olimpiya-İdman Kompleksinin birgə təşkil etdiyi qızlar arasında üzgüçülük üzrə şəhər birinciliyinə yekun vurulub.
Kompleksin Üzgüçülük Mərkəzində məktəblilərin yay tətilinin səmərəli təşkili və onları sağlam həyat tərzinə uyğunlaşdırmaq məqsədilə keçirilən birincilikdə idmançılar üzgüçülüyün sərbəst üsulu üzrə 25 metr məsafəni qət ediblər. 4 yaş qrupu üzrə 30 idmançı mübarizə aparıb.
Sonda hər yaş qrupunda yer tutan idmançılar diplomlarla təltif olunublar.

Naxçıvan Muxtar Respublikası Gənclər və
İdman Nazirliyinin mətbuat xidməti

Dünən İlham Əliyev adına Olimpiya-İdman Kompleksində “Zərərli vərdişlərə yox deyək, həmişə sağlam olaq” devizi altında yeniyetmə və gənclər arasında boks üzrə Naxçıvan şəhər açıq birinciliyi keçirilib. Naxçıvan Muxtar Respublikası Boks Federasiyası və Naxçıvan Şəhər Gənclər və İdman İdarəsinin birgə təşkilatçılığı ilə keçirilən açıq birincilikdə Naxçıvan şəhərinin idmançıları ilə yanaşı, Kəngərli, Babək və Şərur rayonlarının idmançıları da öz güclərini sınayıblar. Beynəlxalq Boks Federasiyasının qaydalarına uyğun keçirilən birincilikdə 25 çəki dərəcəsində 70-ə yaxın dəri əlcək sahibi yarışıb.
Sonda hər çəki dərəcəsində yer tutan idmançılar Naxçıvan Şəhər Gənclər və İdman İdarəsinin diplomları ilə mükafatlandırılıblar.

Naxçıvan Muxtar Respublikası Gənclər və İdman Nazirliyinin
mətbuat xidməti

Müstəqil ölkəmizdə dövlətçiliyin təbliği, iqtisadiyyatın və sosial sahələrin inkişafı və möhkəmləndirilməsi, gənclərin əməyə və Vətənin müdafiəsinə hazırlanması kimi məsələlərin həllinin təmin olunmasında bədən tərbiyəsi və idmanın gündəlik həyatımıza daxil edilməsi aktual məsələlərdən birinə çevrilib. 

Dövlət başçısının həyata keçirdiyi uğurlu gənclər siyasəti, bədən tərbiyəsinin və idmanın inkişafı ölkəmizin ümumi inkişaf siyasətinin tərkib hissəsini təşkil edir. Digər tərəfdən, idmanın inkişafı ölkənin nüfuzu, beynəlxalq aləmdə tanınması deməkdir. Bu istiqamətdə dövlətimiz lazım olan bütün tədbirləri həyata keçirməklə yanaşı, ölkədə sağlam həyat tərzinin təbliğini də diqqətdə saxlayır. Fəal yaş qruplarından olan insanların əhalinin ümumi sayının 60 faizini təşkil etməsi, onların təhsil səviyyələrinin yüksək olması, xüsusən yeniyetmə və gənclərin bədən tərbiyəsi və idmana kütləvi maraq göstərmələri kimi amillər buna müsbət şərait yaradır.
Bölgələrdə olimpiya-idman komplekslərinin və digər idman obyektlərinin yaradılması, idman növlərinin inkişafına diqqətin artırılması, hər təqvim ilində əhalinin bütün yaş qruplarını əhatə edən kütləvi bədən tərbiyəsi – sağlamlıq və idman tədbirlərinin təşkili gənc nəslin fiziki və mənəvi inkişafında böyük rol oynayır. Bu baxımdan gənclərin idman sahəsinə cəlbi də xüsusilə diqqət mərkəzində saxlanılır.

İran İslam Respublikasının Urmiya şəhərində karate-do­ üzrə “Urmiya-Open” XIV Həmrəylik və Dostluq beynəlxalq çempionatı keçirilib.
15 ölkədən 320 idmançının iştirak etdiyi çempionatda Azərbaycan Milli Karate Federasiyasının yetirmələri də mübarizə aparıblar.
Sevindirici haldır ki, millimizin heyətində qonşu ölkədə çıxış edən idmançılar arasında Naxçıvan Muxtar Respublikası Karate-do Federasiyasının yetirməsi Aslan İsmayılov da mübarizə aparıb. 4 gün davam edən çempionatda idmançımız 16-17 yaş qruplarında tatami üzərinə çıxıb. O, beynəlxalq çempionatı 76 kiloqram çəki dərəcəsində üçüncü pillədə başa ­vurub.
Sonda idmançımız təşkilatçılar tərəfindən diplom, medal və pul mükafatı ilə təltif olunub.

Naxçıvan Muxtar Respublikası Gənclər və İdman Nazirliyinin mətbuat xidməti

Naxçıvan Muxtar Respublikası Gənclər və İdman Nazirliyi, şəhər və rayon Gənclər və İdman idarələrinin təşkilatçılığı ilə gənclərin asudə vaxtlarının səmərəli təşkili məqsədilə gənclərdən ibarət kənd komandaları arasında təşkil edilən futbol üzrə şəhər və rayon birinciliyində növbəti turun oyunlarına yekun vurulub.
Naxçıvan şəhəri üzrə keçirilən birincilikdə növbəti mərhələyə Qaraçuq kənd komandası yüksəlib. Onlar Bulqan kənd komandasını məğlub etməyi bacarıblar – 9:2. Şərur rayonu üzrə iki görüş keçirilib. Belə ki, Xələc kənd komandası Aşağı Yaycını (4:0), Kürçülü kənd komandası isə Çərçiboğan komandasını (6:5) məğlub edərək növbəti mərhələyə yüksəliblər. Babək rayonu üzrə Kültəpə komandası Cəhri (3:0), Şahbuz rayonu üzrə Kolanı komandası Biçənək (3:0), Culfa rayonu üzrə isə Xanəgah komandası Saltaq komandaları (3:0) üzərində eynihesablı qələbəyə seviniblər. Ordubad rayonu üzrə Əndəmic komandası “Ordubad gənclər birliyi” (2:1), Kəngərli rayonu üzrə Qıvraq qəsəbə komandası Yurdçu (6:1), Sədərək rayonu üzrə isə Sədərək komandası Sədərək-1 komandaları (6:4) üzərində qələbə qazanıblar.
Qeyd edək ki, şəhər və rayonlar üzrə I, II, III yerləri tutmuş komandalar kubokla, həmin komandaların üzvləri və oyunu idarə edən hakimlər Gənclər və İdman Nazirliyi tərəfindən mükafatlandırılacaqlar.

Naxçıvan Muxtar Respublikası
Gənclər və İdman Nazirliyinin mətbuat xidməti

Türkiyənin Malatya şəhərində şahmat üzrə 6-cı beynəlxalq “Qızıl ərik” şahmat festivalı keçirilib. Festivalda Naxçıvan Muxtar Respublikası Şahmat Federasiyasının yetirmələri də iştirak ediblər.
Turnirin reqlamentinə əsasən 10 ölkə­dən 495 şahmatçı 5 qrupda mübarizə aparıb. “A” qrupunda mübarizə aparan FİDE ustamız Pərviz Qasımov keçirdiyi 9 görüşdən 7 xal toplayıb və nəticədə, üçüncü olub. Eyni zamanda zəka sahibimiz beynəlxalq əmsalını 27,1 (2314) artıraraq beynəlxalq usta normasının ilk balını toplayıb.
“B” qrupunda çıxış edən Tural Zeynalov 198 zəka sahibi arasında 7-ci olub. Belə ki, şahmatçımız 9 turdan 7 xal toplayıb və beynəlxalq əmsalını 20,6 (1682) artırıb.
14 yaşlı şahmatçıların mübarizəsində uğurlu nəticəni Nazlı Hümbətova əldə edib. İdmançımız, ümumilikdə, dördüncü, qızlar arasında isə ikinci olub.
10 yaşlı zəka sahiblərinin mübarizəsində Hüseyn Qənbərli 9 turdan ibarət festivalda 6,5 xal toplayaraq 5-ci yerlə kifayətlənib.
Sonda şahmatçılarımıza təşkilatçılar tərəfindən diplom, medal, kubok və pul mükafatı təqdim olunub.

Ceyhun MƏMMƏDOV

Naxçıvan Muxtar Respublikası Güləş Federasiyasının yetirmələri daha bir uğura imza atıblar. Türkiyənin Samsun şəhərində cüdo üzrə keçi­rilən beynəlxalq turnirdə iştirak edən idmançılarımız mükafatçılar sırasına düşməyi bacarıblar.
2004-2005-ci illər təvəllüdlü cüdoçular arasında tatami üzərinə Qalib Qaybalıyev çıxıb. 42 kiloqram çəki dərəcəsində mübarizə aparan idmançımız bütün rəqiblərinə qalib gələrək turnirin baş mükafatını qazanıb. 22 kiloqram çəki dərəcəsində Rəhim Qaybalıyev gümüş medalın sahibi olub.
2001-2003-cü illər təvəllüdlü idmançıların mübarizəsində isə fəxri kürsüyə iki cüdoçumuz çıxıb. 50 kiloqram çəki dərəcəsində Abbas Məmmədov ikinci, Cavid İsayev isə üçüncü olublar.
Sonda qalib idmançılarımız diplom və medallarla mükafatlandı­rılıblar.

Ceyhun MƏMMƏDOV

Naxçıvan şəhərindəki İlham Əliyev adına Olimpiya-İdman Kompleksinin Üzgüçülük Mərkəzində 12 avqust – Beynəlxalq Gənclər Günü münasibətilə qızlar arasında üzgüçülük üzrə şəhər birinciliyi keçirilib.
Naxçıvan Şəhər Gənclər və ­İdman İdarəsi və Olimpiya-İdman Kompleksinin birgə təşkil etdiyi birincilikdə 30 idmançı 3 yaş qrupunda mübarizə aparıb. Üzgüçülüyün sərbəst üsulu üzrə 25 metr məsafədə keçirilən yarışın yekun nəticəsinə əsasən 2001-2003-cü illər təvəllüdlü idmançılar arasında Nərmin Hə­sənova, 2004-2006-cı illər təvəllüdlü idmançılar arasında Gülan Əh­mədova və 2007-2008-ci illər təvəllüdlü idmançılar arasında Röya Məmmədova qalib adını qazanıblar.
Sonda idmançılar diplomlarla təltif olunublar.

Naxçıvan şəhərindəki İlham Əliyev adına Olimpiya-İdman Kompleksinin Üzgüçülük Mərkəzində məktəblilərin yay tətilinin səmərəli təşkili məqsədilə üzgüçülük üzrə şəhər ­birinciliyi keçirilib.
Naxçıvan Şəhər Gənclər və İdman İdarəsi ilə İdman Kompleksinin birgə təşkil etdiyi birincilikdə 20-dən çox idmançı 2 yaş qrupunda mübarizə aparıb. Üzgüçülüyün sərbəst üsulu üzrə 25 metr məsafədə keçirilən yarışın yekun nəticəsinə əsasən 2002-2003-cü illər təvəllüdlü idmançılar arasında Həsən Abbasov, 2004-2005-ci illər təvəllüdlü idmançılar arasında isə Toğrul İsmayılov finiş xəttinə hamıdan tez çatıblar.
Sonda hər yaş qrupunda yer tutan idmançılar diplomlarla təltif olunublar.

Ceyhun Məmmədov

Naxçıvan Muxtar Respublikası Gənclər və İdman Nazirliyi, şəhər və rayon Gənclər və İdman idarələrinin təşkilatçılığı ilə gənclərin asudə vaxtlarının səmərəli təşkili məqsədilə gənclərdən ibarət kənd komandaları arasında keçirilən futbol üzrə şəhər və rayon birinciliklərində növbəti oyunlar başa çatıb.
Naxçıvan şəhəri üzrə keçirilən birincilikdə Əliabad qəsəbə və Qara­xanbəyli kənd komandaları üz-üzə gəlib. Görüş birincilərin 6:5 hesablı qələbəsi ilə yekunlaşıb. Şərur rayonunda keçirilən görüşdə isə Aralıq kənd komandası Kosacan kənd komandasını məğlub etməyi bacarıb – 3:2. Babək rayonu üzrə Nəhəcir komandası Vayxır (4:1), Şahbuz rayonu üzrə Şahbuzkənd komandası Keçili (5:3), Culfa rayonu üzrə Kırna komandası Göydərə (3:1), Ordubad rayonu üzrə Kələntər komandası Aza (3:0), Sədərək rayonu üzrə Heydərabad komandası Qaraağac (5:1), Kəngərli rayonu üzrə isə Xok komandası Qarabağlar komandası (4:2) üzərində qələbə qazanaraq növbəti mərhələyə yüksəliblər.

Naxçıvan Muxtar Respublikası Gənclər və İdman Nazirliyi və Karate-do Federasiyasının birgə təşkilatçılığı ilə idmançılar üçün taktiki-texniki seminar keçirilib.
Naxçıvan Muxtar Respublika Stadionunun idman zalında keçirilən seminar Bakı şəhərindən dəvət olunmuş “Araz” İdman Klubunun rəhbəri Siyavuş Bayramov tərəfindən aparılıb. 50-dən çox idmançının iştirak etdiyi seminarda yeni qaydalar haqqında məlumat verilib. Eyni zamanda Karate-do Federasiyasının idmançıları üçün kəmər imtahanı da keçirilib.

Ceyhun Məmmədov

Naxçıvan Muxtar Respublikası Gənclər və İdman Nazirliyi tərəfindən Naxçıvan şəhərinin 2018-ci il üçün ölkəmizin Gənclər Paytaxtı seçilməsi ilə əlaqədar “Gənclik” Mərkəzində “Hünər” XII Vətənpərvərlik Mahnıları Festivalının seçim, final mərhələləri və qaliblərin mükafatlandırılması mərasimi, Naxçıvan şəhərindəki mərkəzi meydanda Bakı şəhərindən dəvət olunmuş müğənnilərin ifasında konsert proqramı keçirilmişdir. Naxçıvan Muxtar Respublikasında fəaliyyət göstərən ali təhsil müəssisələrində təhsil alan gənclərin Ağbulaq İstirahət Mərkəzində “Yay məktəbi” təşkil olunmuş, Naxçıvan şəhərindəki “Zirvə” Kitab Evində “Kitablar tozlanmasın” devizi altında yeni layihəyə start verilmişdir.
İyul ayında Kəngərli rayon mərkəzi stadionu yenidən qurularaq istifadəyə verilmiş, muxtar respublikanın gənc­lərdən ibarət kənd komandaları arasında futbol üzrə şəhər və rayon birinciliklərinin açılışı olmuşdur. Bu dövrdə idmançılarımız muxtar respublika birinciliklərində 4, Avropa birinciliklərində 3, ölkə birinciliklərində 3, beynəlxalq turnirlərdə 3 olmaqla, 13 medal qazanmışlar.

Naxçıvan Muxtar Respublikası
Gənclər və İdman Nazirliyinin mətbuat xidməti

Türkiyə Respublikasının Ankara şəhərində “Ankara Çubuk IV” Beynəlxalq Şahmat Festivalı keçirilib.
806 şahmatçının iştirak etdiyi festivalda Naxçıvan Muxtar Respublikası Şahmat Federasiyasının zəka sahibləri də yarışıblar. Belə ki, ağ-qara taxta üzərində mübarizə aparmaq üçün qonşu ölkəyə 8 şahmatçımız yollanıb.
Festivalın reqlamentinə əsasən 13 ölkənin idmançısı “A” və “B” qruplarında, 8, 10 və 14 yaş qruplarında qalibi müəyyənləşdirməyə çalışıblar.
Ən uğurlu nəticəni “B” qrupunda mübarizə aparan Tural Zeynalov (1656) əldə edib. Belə ki, 7,5 xal toplayan zəka sahibimiz bu qrupda iştirak edən 294 şahmatçı arasında ikinci olub.
14 yaşlı şahmatçıların mübarizəsində isə Nəsrin Babayeva (1392) qızlar arasında üçüncü yeri əldə edib. Qeyd edək ki, bu qrupda 82 şahmatçı ağ-qara taxtada qalibi müəyyənləşdirməyə çalışıb.
“A” qrupunda iştirak edən FİDE ustamız Pərviz Qasımov (2313) 6,5 xalla festivalı 10-cu pillədə başa vurub və mükafatçılar sırasına düşüb. Bu qrupda 127 zəka sahibi mübarizə aparıb.
Sonda qalib idmançılarımız diplom, medal və kubokla mükafatlandırılıblar.

 Ceyhun MƏMMƏDOV

Bu il 22-29 iyul tarixlərində İtaliyanın Milan şəhərində 40-a yaxın ölkədən 388 atletin iştirakı ilə 15 və 17 yaşa qədər yeniyetmə oğlan və qızlar arasında ağır atletika üzrə Avropa birinciliyi keçirilib.
Birincilikdə Azərbaycan yığmasının üzvləri də öz güclərini sınayıblar. Naxçıvan Muxtar Respublikası Gənclər və İdman Nazirliyinin nəzdində olan Şərur rayon Ağır atletika bölməsinin yetirməsi Tarmenxan Babayev də turnirdə iştirak edib. O, yaşı 17-yə qədər olan oğlanlar arasında 94 kiloqram çəki dərəcəsində mübarizə aparıb. Ötən il Kosovonun paytaxtı Priştinada ­ 6 Avropa rekordunu yeniləyərək çempion olan atletimiz bu dəfə də qələbə əldə edib. Birdən qaldırma hərəkətində 145 kiloqram nəticə göstərərək gümüş medala layiq görü­lən idmançımız təkanla qaldırmada 180 kiloqram nəticə göstərməklə bütün rəqiblərini üstələyərək qızıl medal qazanıb. Ümumilikdə, 325 kiloqram (145+180) nəticə ilə 94 kiloqram çəki dərəcəsində yekun sıralamada fəxri kürsünün ən yüksək pilləsinə qalxmış Tamerxan Babayev Avropa birinciliyinin ikiqat qalibi adını qazanıb.

Naxçıvan Muxtar Respublikası
Gənclər və İdman Nazirliyinin mətbuat xidməti

Naxçıvan Muxtar Respublikasında idmanın kütləvi hal alması üçün mütəmadi olaraq yeni idman obyektləri, zallar, futbol meydançaları tikilib istifadəyə verilir. Şəhər və rayonlarla yanaşı, xüsusilə kəndlərdə də əhalinin sağlamlığı üçün idman bazalarının formalaşdırılması daim diqqət mərkəzində saxlanılır. Futbolun inkişafı üçün əlverişli şəraitin olması və yeni stadionların yaradılması gəncləri bu sahəyə daha çox cəlb edir.
Yaradılan bu şəraitdən məqsədyönlü şəkildə istifadə edən Naxçıvan Muxtar Respublikasının Gənclər və İdman Nazirliyi, şəhər və rayon Gənclər və İdman idarələrinin təşkilatçılığı ilə gənclərin asudə vaxtlarının səmərəli təşkili məqsədilə onlardan ibarət kənd komandaları arasında futbol üzrə şəhər və rayon birinciliyinə start verilib. Sentyabr ayının 8-dək hər həftənin şənbə günü oynanılacaq oyunlar olimpiya sistemi üzrə keçiriləcək. Görüşlər Naxçıvan şəhəri üzrə İslam Hümbətov adına Uşaq-Gənclər İdman Məktəbinin stadionunda, Şərur rayonu üzrə Aralıq kənd, Babək rayonu üzrə Babək qəsəbə, Nehrəm və Vayxır kənd, Ordubad rayonu üzrə Kələntər kənd, Culfa rayonu üzrə Ərəzin kənd, Şahbuz rayonu üzrə Kolanı kənd və Şahbuz şəhər stadionlarında, Kəngərli, Sədərək rayonlarında isə rayon mərkəzi stadionlarında olmaqla, muxtar respublika üzrə 11 stadionda təşkil ediləcəkdir. Şəhər və rayon üzrə birincilik uğrunda Naxçıvan şəhəri üzrə 5, Şərur rayonu üzrə 13, Babək rayonu üzrə 8, Ordubad rayonu üzrə 8, Culfa rayonu üzrə 8, Kəngərli rayonu üzrə 6, Şahbuz rayonu üzrə 9, Sədərək rayonu üzrə isə 4 olmaqla, ümumilikdə, 61 kəndin futbol komandası yarışacaqlar.

İlham Əliyev adına Olimpiya-­İdman Kompleksində Naxçıvan Muxtar Respublikası Gənclər və İdman Nazirliyinin və Voleybol Federasiyasının birgə təşkilatçılığı ilə “Zərərli vərdişlərə yox deyək, həmişə sağlam olaq” devizi altında Şahbuz və Ordubad rayon komandaları arasında voleybol üzrə yoldaşlıq görüşü keçirilib.
Əvvəlcə Naxçıvan Muxtar Respublikası Gənclər və İdman Nazirliyinin şöbə müdiri Taleh İbrahimov və Voleybol Federasiyasının sədr müavini Aydın Mirzəyev çıxış edərək muxtar respublikada idmana və idmançılara göstərilən diqqət və qayğıdan, onlar üçün yaradılan şəraitdən danışıb, iştirakçılara uğurlar arzulayıblar. Daha sonra oyuna start verilib. Oyun 3:2 hesabı ilə Şahbuz rayon komandasının qələbəsi ilə başa çatıb.
Sonra hər iki komandaya voleybol topları hədiyyə edilib.

Naxçıvan Muxtar Respublikası
Gənclər və İdman Nazirliyinin mətbuat xidməti

Muxtar respublikamızda yeni stadionların istifadəyə verilməsi gənc nəslin sağlamlığının qorunmasında böyük rol oynayır. Belə stadionlar kənd yaşayış məntəqələrində də lazımi idman qurğuları ilə təmin edilərək gənclərin ixtiyarına verilir. Naxçıvan Muxtar Respublikası Ali Məclisi Sədrinin tapşırıqlarına əsasən muxtar respublikanın Gənclər və İdman Nazirliyi tərəfindən Kəngərli rayonunda daha bir idman obyekti – rayon mərkəzi stadionunun yenidən qurularaq gənclərin istifadəsinə verilməsi də  Naxçıvanda idmanın inkişafına növbəti töhfədir.   

Qeyd edək ki, stadionun suvarma sistemi yenidən bərpa olunub, 200 ədəd oturacaq quraşdırılıb, tamaşaçılar üçün nəzərdə tutulan sahədə kilid daşları yenidən döşənilib, stadionun ətrafında olan ad göstəriciləri yenilənib. Stadionda mövcud olan sadətipli idman qurğuları, basketbol və voleybol üçün nəzərdə tutulmuş meydançalar təmir olunub.
Stadionun açılış mərasimində çıxış edən Kəngərli Rayon İcra Hakimiyyətinin başçısı Kamal Ələkbərov bildirib ki, bu gün muxtar respublikamızda bütün sahələrdə olduğu kimi, idmana da diqqət və qayğı göstərilir. Doğma diyarımızın şəhər və rayonlarında, kəndlərində yeni idman obyektləri, stadionlar tikilərək gənclərimizin ixtiyarına verilir. Bu, idmana, idmançılara göstərilən dövlət qayğısının bariz nümunəsidir. Kəngərli rayon mərkəzi stadionunun da yenidən bərpası rayonda uşaq və yeniyetmələrin, gənclərin asudə vaxtlarının səmərəli təşkil olunmasında müstəsna rol oynayacaq. Eyni zamanda yenidən təmir olunan stadionda keçiriləcək yarışlar, turnirlər istedadlı gənclərin üzə çıxarılmasına şərait yaradacaq.