Hər bir insanın təkamülündə, onun zənginləşməsində, təhsil almasında, dünyagörüşünün genişlənməsində, ünsiyyət mədəniyyətinin formalaşmasında dil mühüm rol oynayır. Azərbaycan dili xalqımızın çoxəsrlik tarixinin, mədəniyyətinin, adət-ənənələrinin ifadə vasitəsidir. Ana dilimizin ifadə zənginliyi, axıcılığı və sadəliyi, səlis ahəngi onu dünyada ən şirin dillərdən biri kimi tanıtmışdır. Biz ana dilimizi qoruyub saxlamaqla qlobal dünyaya inteqrasiya edirik. 

Dünyaya inteqrasiyada, ölkəmizin dünya dövlətləri içərisində tanınmasında ali məktəblərdə xarici dillərin tədrisi də mühüm rol oynayır.
Dünya dillərinin tədrisində Naxçıvan Dövlət Universiteti də öz töhfəsini verir. Universitetin Beynəlxalq münasibətlər və xarici dillər fakültəsində alman, ingilis, fransız, rus, ərəb, fars dilləri tədris edilir. Bu təhsil ocağı çox sürətlə inkişaf edir, xarici əlaqələri günü-gündən genişlənir. Universitet dünyanın aparıcı ali məktəbləri ilə çox geniş işgüzar əlaqələr yaradıb. O nəinki regionda, hətta dünya miqyasında tanınmış ali məktəblərin birinə çevrilib. Naxçıvan Dövlət Universitetinin bir çox universitetlərlə, o cümlədən Cənubi Koreyanın Kimçonq və Busan Kyumqsunq universitetləri ilə əməkdaşlığı davam edir. Universitetdə digər dillərlə yanaşı, Koreya dili də tədris olunur.

Milli varlığımız olan ana dilimiz tarixən inkişaf edərək və zənginləşərək bu gün dünyanın hər yerində yaşayan bütün azərbaycanlının istifadə etdiyi ümummilli dil səviyyəsinə yüksəlmişdir.
Dilin müstəqil inkişafı, zənginləşməsi və nüfuzu bilavasitə dövlətçiliklə bağlı olduğu üçün dil dövlətçiliyin ən aparıcı atributlarından biri hesab olunur. Dövlətçilik zəminində dilin cəmiyyətdəki rolu artır, informasiya imkanları genişlənir. 1919-1920-ci illərdə Azərbaycan Xalq Cümhuriyyəti dilimizi dövlət dili kimi təsdiqləyib. 1936-cı ildən sonra isə Azərbaycan dili rəsmən dövlət dili sayılsa da, bu, formal xarakter daşımış və dövlət idarələrində məhdud çərçivədə işlənmiş, təqiblərə məruz qalmışdır.
“Hər bir xalqın milliliyini, mənəvi dəyərlərini yaşadan, inkişaf etdirən onun dilidir”, – deyən ümummilli liderimiz Heydər Əliyev ölkəmizə rəhbərliyinin birinci dövründən başlayaraq Azərbaycan dilinin inkişafı istiqamətində məqsədyönlü iş aparmış, mövcud tarixi təcrübəni və müasir dövrün tələblərini nəzərə alaraq mükəmməl dil siyasəti həyata keçirmişdir. Bunun nəticəsidir ki, 1970-ci ildən başlayaraq Azərbaycan dili elmi şəkildə öyrənilmiş, müasir Azərbaycan dilinin problemləri ilə bağlı çoxsaylı elmi-nəzəri əsərlər yaradılmışdır. Ali məktəblər üçün yazılmış dördcildlik “Müasir Azərbaycan dili” dərsliyi 1974-cü ildə məhz ulu ­öndərin təşəbbüsü ilə respublikanın dövlət mükafatına layiq görülmüşdü.

Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın Test mərkəzində Naxçıvan Muxtar Respublikasının Dövlət Miqrasiya xidmətində vakant vəzifələrin tutulması üçün 15 dekabr 2017-ci il tarixdə elan olunmuş müsabiqənin test imtahanları keçirilir.
Qeyd edək ki, müsabiqəyə 11 vakant vəzifənin tutulması üçün 125 namizəd sənəd təqdim edib. Test imtahanlarında keçid balını toplamış şəxslər müsahibə mərhələsində iştirak etmək hüququ qazanacaqlar. İmtahan başlanmazdan əvvəl namizədlərə slayd vasitəsilə imtahan və test proqramından istifadə qaydaları haqqında məlumat verilib. İmtahanda namizədlərə qanunvericilik üzrə 60, dünyagörüşü üzrə 10, informasiya texnologiyaları üzrə 10, məntiqi təfəkkürün yoxlanılması üzrə 20 sual olmaqla, ümumilikdə, 100 sual təqdim edilib. Sualları cavablandırmaq üçün namizədlərə 2 saat 30 dəqiqə vaxt verilib.
Test imtahanında obyektivliyin və şəffaflığın tam təmin edilməsi məqsədilə imtahanın videoçəkilişi aparılıb. İmtahan bitdikdən dərhal sonra namizədlərə cavab kartı və test imtahanının nəticəsinə dair arayış təqdim edilib. Test imtahanında Naxçıvan Muxtar Respublikası Dövlət Miqrasiya Xidmətinin əməkdaşları müşahidəçi qismində iştirak ediblər.
Test imtahanlarının nəticələri gündəlik olaraq operativ şəkildə Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın (www.dqmk.nmr.az) rəsmi internet səhifəsində yerləşdirilib.
Test imtahanları 22 fevral 2018-ci il tarixədək davam edəcəkdir.

Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın mətbuat xidməti

Babək rayonunun təşkil olunmasının 40 illiyi haqqında Naxçıvan Muxtar Respublikası Ali Məclisi Sədrinin 2018-ci il 16 fevral tarixli Sərəncamı hər bir rayon sakini tərəfindən sevinc və böyük minnətdarlıq hissi ilə qarşılanır. Sərəncamda deyilir: “Ötən əsrin 70-ci illərində xalqımızın ümummilli lideri Heydər Əliyevin müəyyənləşdirdiyi qu­ruculuq xətti Azərbaycanın re­gionlarını da əhatə etmiş, Naxçıvan Muxtar Respublikasında yeni rayonun yaradılması qərara alınmışdı. 1978-ci il oktyabrın 23-də təşkil olunmuş rayona xalq qəhrəmanı Babəkin adının verilməsi ulu öndərimizin qətiyyətinin, daim azərbaycançılıq mövqeyində dayanması istiqamətində həyata keçirdiyi tədbirlərin nəticəsi idi.
Yarandığı gündən ötən dövr ərzində Babək rayonu böyük inkişaf yolu keçmişdir. Hazırda rayonun əksər kəndlərində kompleks quruculuq işləri aparılmış, rayon ərazisi elektrik enerjisi və təbii qazla, poçt, geniş zolaqlı və simsiz internet xidmətləri ilə təmin edilmişdir”.
Deyirlər, abad Vətən orada yaşayan insanların birliyindən, vəhdətindən doğar. Vətən ona sahib çıxacaq, dəyər verəcək, uğruna hər zillətə qatlaşacaq övladları olmasa, Vətən deyil. Göstərilən dövlət qayğısı, yurd eşqi, torpağa, el-obaya bağlılığın işığında bu gün Babək rayonu da inkişaf edir, insanları rahat, firavan yaşayır. Bu yeniliyin, müasirliyin əsasında məhz elə Vətən sevgisi dayanır.

Güclü silahı, zirehli müdafiəsi və yüksək manevr qabiliyyəti olan BTR-82A zirehli transportyoru döyüş meydanında piyadaların hərəkət imkanlarını və mobilliyini artırmaq, döyüş fəaliyyətlərini atəşlə təmin etmək, düşmənin müxtəlif silah sistemlərinə qarşı effektiv mübarizə aparmaq, canlı qüvvəsini və hava hədəflərini məhv etmək, ekipajın atıcı silahlardan, mina və mərmi qəlpələrindən, kütləvi qırğın silahlarından qorunması məqsədilə təyin olunub.

Fevralın 15-də Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin ötən ilin yekunları və 2018-ci ildə qarşıda duran vəzifələrə həsr olunmuş yığıncağı keçirilib. 

Yığıncağı giriş sözü ilə Yeni Azərbaycan Partiyası Naxçıvan Muxtar Respublika Təşkilatının icra katibi, Naxçıvan Muxtar Respublikası Ali Məclisinin deputatı Anar İbrahimov açıb. O, əsası ümummilli lider Heydər Əliyev tərəfindən qoyulmuş dövlət gənclər siyasətinin əhəmiyyətindən, bu siyasətin Naxçıvanda da uğurla həyata keçirilməsindən danışıb.
Tədbirdə çıxış edən muxtar respublikanın gənclər və idman naziri, Yeni Azərbaycan Partiyası Naxçıvan Muxtar Respublika Təşkilatı Heydər Əliyev adına Gənclər Birliyinin sədri Azad Cabbarov qeyd edib ki, partiya yarandığı gündən öz sıralarına layiqli üzvləri cəlb edir. Bugünkü statistik göstəricilərə əsasən Yeni Azərbaycan Partiyası Naxçıvan Muxtar Respublika Təşkilatının 53 min 823 üzvü var. Təşkilatın Heydər Əliyev adına Gənclər Birliyinin sıralarında isə 21 min 855 gənc birləşib ki, onların da 11 min 391 nəfərini qadınlar təşkil edir. Partiyaya üzv olan gənclərin 5 min 85-i təhsil, 2 min 160-ı səhiyyə, 1542-si elm, mədəniyyət və incəsənət, 2 min 425-i idarəetmə, 5 min 313 nəfəri isə digər sahələrdə fəaliyyət göstərir.

Rayon Mədəniyyət Evində keçirilən yubiley tədbirində Yeni Azərbaycan Partiyası Culfa Rayon Təşkilatının sədri, Naxçıvan Muxtar Respublikası Ali Məclisinin deputatı Qadir İbrahimov məruzə ilə çıxış edib. Bildirib ki, 1992-ci il noyabrın 21-də Naxçıvanda yaradılan Yeni Azərbaycan Partiyası qısa zamanda böyük siyasi hərəkat xarakteri aldı. O dövrdə partiyanın yerlərdə rayon təşkilatı və özəklərinin yaradılması prosesi gedirdi. Siyasi fəalları ilə seçilən Culfa rayonu da bu prosesdən kənarda qalmadı. 1993-cü il fevralın 7-də ulu öndərimiz Heydər Əliyevin iştirakı ilə rayon Mədəniyyət Evində Yeni Azərbaycan Partiyası Culfa Rayon Təşkilatının təsis konfransı oldu. Konfransda 25 ərazi ilk təşkilatından 450 nəfər nümayəndə iştirak etdi.
Təşkilatın sədri qarşıda duran vəzifələrdən danışarkən bildirib ki, 2018-ci il üçün Naxçıvan şəhəri İslam Mədəniyyətinin Paytaxtıdır, eyni zamanda bu qədim şəhər ölkə­mizin Gənclər Paytaxtı seçilib. Bu il ümummilli liderimizin anadan olmasının 95, Azərbaycan Xalq Cümhuriyyətinin yaradılmasının 100, Milli Qurtuluş Gününün 25 illik yubileyləri qeyd olunacaqdır. Həmçinin aprelin 11-də ölkəmizdə Prezident seçkiləri keçiriləcəkdir. Bu ayın 8-də Yeni Azərbaycan Partiyasının VI qurultayı keçirilib və qurultay nümayəndələri yekdilliklə partiyamızın sədri, ölkə Prezidenti cənab İlham Əliyevin Azərbaycan Respublikası Prezidentliyinə namizədliyini irəli sürüblər. Yeni Azərbaycan Partiyası Culfa Rayon Təşkilatı da partiyamızın namizədini yüksək səviyyədə dəstəkləyəcək, bundan sonra da rayonun ictimai-siyasi həyatında fəallıqla iştirak edəcəkdir.

Bu il cümhuriyyətimizin 100 yaşı tamam olur. Bu böyük tarixi hadisəni qeyd etmək üçün Azərbaycan Respublikasının Prezidenti cənab İlham Əliyev “Azərbaycan Xalq Cümhuriyyətinin 100 illik yubileyi haqqında” 2017-ci il 16 may tarixli Sərəncam imzalayıb. Naxçıvan Muxtar Respublikası Ali Məclisinin Sədri cənab Vasif Talıbov müvafiq Tədbirlər Planı təsdiq edib. Azərbaycan Xalq Cümhuriyyətinin keçdiyi tarixi yola bu yüzilliyin işığında nəzər salmaq məqsədilə Naxçıvan Dövlət Universitetinin elmi katibi, tarix üzrə fəlsəfə doktoru, dosent Elçin Zamanovla görüşüb söhbət etdik.

– Elçin müəllim, bu il tariximizin şanlı səhifələrindən olan Azərbaycan Xalq Cümhuriyyətinin 100 illik yubileyi dövlət səviyyəsində qeyd olunacaq. Azərbaycan Xalq Cümhuriyyətinin yaradılması Azərbaycanın şərəf və ləyaqət səhifəsidir, milli kimliyimizin təsdiqidir. Azərbaycan Prezidenti cənab İlham Əliyev deyir: “Azərbaycan xalqı haqlı olaraq fəxr edir ki, bizim xalqımız bu respublikanı yaradıb”.

Daha bir uğurlu il tariximizə öz izlərini yazdı. Bu izləri muxtar respublikamızın bütün bölgələrində görmək olar. Ona görə də yurd, torpaq təəssübünü hər şeydən üstün tutan hər bir naxçıvanlının ötən ilin göstəricilərinə sevinməsinə mənəvi haqqı çatır. Və o da qürurvericidir ki, belə uğurların qazanılmasında bölgələrimiz sanki bir-birilə, yaxşı mənada, rəqabətə giriblər. Naxçıvanın Şərqə açılan qapısı hesab edilən Culfa da bu sıradadır. Bu gün bölgədə insanların maddi rifah halı xeyli yaxşılaşıb, onların məşğulluğunun təmin olunması istiqamətində məqsədyönlü tədbirlər həyata keçirilib. Zəhmətdən çəkinməyən, torpağı daimi iş yerinə çevirən culfalılar doğma yurd yerinin bugünkü büsatından fəxarət hissi keçirirlər. Bu həm də onunla bağlıdır ki, həmin bölgəyə qonşu İran İslam Respublikasından keçməklə çoxlu xarici turistlər gəlir. Onlar da qədim yurd yerimizin bugünkü büsatını, culfalıların yaşayış tərzini görür, bu rayon mərkəzinə göstərilən dövlət qayğısının şahidi olurlar. Qısası, Culfa bu gün müasir Azərbaycan rayonudur. Və daha xoş sabahlara doğru inamla addımlayır.

Naxçıvan Muxtar Respublikası Fövqəladə Hallar Nazirliyinin Mülki Müdafiə Alayında gənc əsgərlərin andiçmə mərasimi keçirilib.
Əvvəlcə Azərbaycan Respublikasının Dövlət Himninin sədaları altında üçrəngli bayrağımız meydana gətirilib. Sonra gənc əsgərlər Vətəni layiqincə qoruyacaqlarına, əsgəri borclarını şərəflə yerinə yetirəcəklərinə and içiblər.
Mərasimdə alay komandiri, polkovnik-leytenant Azadil Hüseynov hərbi andın əhəmiyyətindən danışıb. Bildirilib ki, hərbi and içən əsgər Azərbaycan Respublikasının mənafeyini, onun suverenliyini, ərazi bütövlüyünü və müstəqilliyini qoruyacağına, bundan ötrü qanını və canını əsirgəməyəcəyinə təntənəli surətdə vəd edir. Hərbi anda sadiq qalmaq hər bir əsgər üçün şərəf, namus və vicdan məsələsidir.
Tədbirdə çıxış edən kapitan Oktay Həsənov, əsgər Əhməd Əhmədov, gənc əsgər Sirus Cavadzadə, Naxçıvan Şəhər Gənclər və İdman İdarəsinin baş məsləhətçisi Elşən Rəfiyev, Azərbaycan Vətən Müharibəsi Veteranları və Şəhid Ailələri Naxçıvan Muxtar Respublika Təşkilatı Naxçıvan Şəhər Şöbəsinin sədri Zahid Cəfərov, valideyn Aydın Məmmədov gənc əsgərləri təbrik ediblər.
Naxçıvan Muxtar Respublikası fövqəladə hallar nazirinin müavini general-mayor Hikmət Kərimov çıxışında Azərbaycanın müstəqilliyinin, suverenliyinin və ərazi bütövlüyünün etibarlı şəkildə qorunmasında Silahlı Qüvvələrimizin rolundan danışıb, gənc əsgərlərə xidmətlərində uğurlar arzulayıb.
Sonda alayın şəxsi heyəti hərbi marşın müşayiəti ilə tribuna önündən keçib.

Xəbərlər şöbəsi

1979-cu il fevralın 11-də İran İslam Respublikası yaranmışdır. Həmin tarixdən başlayaraq hər il fevralın 11-i İran İslam Respublikasında Milli Bayram – İslam İnqilabı Günü kimi qeyd olunur.
Ötən əsrin 90-cı illərində ümummilli liderimiz Heydər Əliyevin Naxçıvan Muxtar Respublikası Ali Məclisinin Sədri kimi İran İslam Respublikasına səfərləri Azərbaycanla İran arasındakı münasibətlərin əsasını qoymuşdur. “Azərbaycanın və İranın tarixi keçmişi, ölkə­lərimizin coğrafi vəziyyəti, dövlətlərimizin bugünkü siyasəti bizi bundan sonra da daha sıx əməkdaşlığa dəvət edir”, – deyən ulu öndər ali hakimiyyətə qayıdışından sonra da Azərbaycan-İran əlaqələrinin inkişafını diqqətdə saxlamış, dövlətlərarası münasibətlərimiz yeni mərhələyə yüksəlmişdir. Azərbaycan Respublikası və İran İslam Respublikası arasında ­imzalanan sənədlər, münasibətlərimizin daha da genişləndirilməsi istiqamətində atılan addımlar siyasi, iqtisadi və mədəni sahədə əlaqələrin dərinləşməsi üçün yeni imkanlar açmışdır.

Bu gün Naxçıvan Muxtar Respublikasının yaradılmasının 94-cü ildönümü tamam olur.
Naxçıvanın muxtariyyət tarixi çətin yollardan keçmişdir. Ötən əsrin əvvəllərində Azərbaycanda və onun Naxçıvan diyarında gərgin vəziyyət yaranmışdı. Burada baş verən hadisələr, erməni quldurlarının törətdikləri qırğınlar, “Naxçıvan məsələsi”ni Cənubi Qafqazın hüdudlarından kənara çıxararaq beynəlxalq problemə çevirmişdi. Göstərilən təzyiqlərə baxmayaraq, Naxçıvan əhalisi erməni daşnaklarına qarşı inadla mübarizə aparır, bölgəni qoruyub-saxlamaq üçün bütün imkanlardan istifadə edirdi. Müsəlman Milli Şurası Naxçıvanın təhlükəsizliyini təmin etmək üçün 1918-ci ilin noyabrında paytaxtı Naxçıvan şəhəri olan Araz-Türk Cümhuriyyətini yaratdı və hökumətin tərkibini formalaşdırdı. Hökumətin tərkibi sədrdən və 6 üzvdən ibarət idi. Hökumətin başçısı vəzifəsinə Əmir bəy Nərimanbəyov seçilmişdi. Ərazisinə Naxçıvan və Şərur-Dərələyəz qəzaları, Ordubad mahalı, Eçmiədzin qəzasının bir hissəsi, İrəvan qəzasının Sərdarabad, Uluxanlı, Qəmərli, Vedibasar və Mehri bölgələri daxil olan Araz-Türk Respublikasının sahəsi 8,7 min kvadratkilometr, əhalisi bir milyon nəfərdən artıq idi.

Ulu öndər Heydər Əliyev tərəfindən müəyyənləşdirilən strateji inkişaf xəttinin muxtar respublikamızda uğurla davam etdirilməsi nəticəsində qədim diyarımızın sosial-iqtisadi mənzərəsi əsaslı şəkildə dəyişilib. Bütün sahələr üzrə innovativ yeniliklərin tətbiq olunması, reallaşdırılan məqsədyönlü islahatlar, bir sıra dövlət proqramları, mühüm infrastruktur layihələri davamlı yüksəlişi təmin edib. Muxtar respublikada inkişafın yeni konturlarını müəyyən edən perspektivli dövlət siyasətinin həyata keçirilməsi sahibkarlığın inkişafına, investisiya mühitinin daha da yaxşılaşdırılmasına səbəb olub. 2018-ci ilə əhəmiyyətli uğurlarla  qədəm qoyan naxçıvanlılar əldə edilən bu nailiyyətlərin sevincini, eyni zamanda bu il Naxçıvan şəhərinin həm İslam Mədəniyyətinin Paytaxtı, həm də ölkəmizin Gənclər Paytaxtı olmasının qürurunu yaşayırlar. 

Yanvarın 1-də Naxçıvan Muxtar Respublikasının şəhər və rayon mərkəzlərində yeni ilin gəlişi münasibətilə bayram şənlikləri ­keçirilib.
Naxçıvan Muxtar Respublikası Ali ­Məclisinin Sədri cənab Vasif Talıbov Naxçıvan şəhərinin Heydər Əliyev prospektində təşkil olunan bayram şənliyində iştirak edib, ictimai-iaşə xidmətinin təşkili ilə maraqlanıb, sakinlərin bayramını təbrik edib, uşaqlara hədiyyələr verib.

Naxçıvan Muxtar Respublikasındakı arxiv xidməti təşkilatları regionumuzun zəngin tarixini öyrənmək üçün qiymətli sənədlərin toplandığı və mühafizə olunduğu elmi-tədqiqat mərkəzləridir. Zaman keçdikcə xalqımızın əvəzsiz mənəvi sərvəti olan arxiv sənədlərinə daha çox müraciət olunur. Məhz bu xidmət vasitəsilə dövlət qurumlarının, eləcə də yerli və xarici tədqiqatçıların müxtəlif informasiyalara olan tələbatı ödənilir, vətəndaşların sosial-hüquqi xarakterli ərizə və sorğuları icra olunur. Bu baxımdan arxiv işinin günün tələbləri səviyyəsində qurulması qarşıda duran mühüm vəzifələrdəndir.

Qeyd edək ki, muxtar respublikamızdakı dövlət arxivlərinin fəaliyyəti Naxçıvan Muxtar Respublikası Ali Məclisinin Sədri tərəfindən daim diqqət mərkəzində saxlanılır, bu elmi-tədqiqat mərkəzləri üçün lazımi iş şəraitinin yaradılması, onların maddi-texniki bazasının gücləndirilməsi istiqamətində ardıcıl tədbirlər həyata keçirilir. Göstərilən dövlət qayğısı muxtar respublikada arxiv işinin təkmilləşdirilməsinə, xidmətlərin səviyyəsinin yüksəldilməsinə imkan verir. Bunun nəticəsidir ki, Naxçıvan Muxtar Respublikası Dövlət Arxiv İdarəsi 2017-ci ili nailiyyətlərlə başa vurub, fəaliyyətində uğurlu nəticələr qazanıb.

Yolların da “dərdi” var

...Yollara baxımsızlıq xroniki xəstəlik şəklini almışdır. Nə qədər acınacaqlı olsa da, deməliyik ki, əksər kəndlərimizin ayağından başına getmək, yaxud bir məhəllədən o birinə keçmək üçün mütləq palçığa batmalısan. Bu da onu göstərir ki, yolların da “dərdi” var. Babək rayonunun Qaraxanbəyli, Cavidabad, Tumbul, Vayxır, Xal-xal və digər kəndlərinin yolu baxımsızlıq üzündən yararsız hala düşmüşdür.

  Naxçıvan Muxtar Respublikasında miqrasiya proseslərinə dövlət nəzarətinin gücləndirilməsi, o cümlədən qanunsuz miqrasiyanın qarşısının alınması məqsədilə muxtar respublikanın Dövlət Miqrasiya Xidməti ­tərəfindən həyata keçirilən tədbirlər ötən ay ərzində də davam etdirilib.

Yanvar ayı ərzində xidmət tərəfindən muxtar respublikada olma və yaşama qaydalarına əməl etmədən mövcud qanunvericiliyin tələblərini pozmuş 28 əcnəbi aşkarlanıb. Onlardan 24-ü barəsində Azərbaycan Respublikası ərazisini 48 saat ərzində tərk etmə, ­ 4-ü barəsində inzibati qaydada ölkə hüdudlarından kənara çıxarılma qərarı qəbul edilib.
Ümumilikdə, ay ərzində Dövlət Miqrasiya Xidmətinə əcnəbilər və vətəndaşlığı olmayan şəxslər, habelə Azərbaycan Respublikası vətəndaşları tərəfindən 625 müraciət daxil olub. Bu müraciətlərdən 72-si əcnəbilərə və vətəndaşlığı olmayan şəxslərə müvəqqəti və daimi yaşamaq üçün icazənin, əmək fəaliyyətinin həyata keçirilməsi üçün iş icazəsinin verilməsi, eləcə də vətəndaşlıq mənsubiyyətinin müəyyənləşdirilməsi ilə bağlıdır. Müraciətlərin hər biri ayrı-ayrılıqda Azərbaycan Respublikası qanunvericiliyinin tələblərinə uyğun olaraq araşdırılıb və müvafiq qərarlar qəbul edilib. Yanvar ayı ərzində olduğu yer üzrə qeydiyyatla bağlı 553 müraciət qeydə alınaraq icrası təmin olunub. Həmin müraciətlərdən 234-ü elektron xidmətlər portalı və elektron poçt üzərindən qəbul edilib.
Hazırda Dövlət Miqrasiya Xidməti tərəfindən fəaliyyət istiqamətlərinə uyğun olaraq ardıcıl maarifləndirmə tədbirləri həyata keçirilir.

Xəbərlər şöbəsi

Naxçıvan Muxtar Respublikası Rabitə və Yeni Texnologiyalar Nazirliyi əhalinin diqqətinə çatdırır ki, 6 fevral 2018-ci il tarixdən etibarən bir çox ölkələrdə android əməliyyat sistemi olan qurğulara DressCode troyanı virusu zərbə vurmağa başlayıb.
Android əməliyyat sistemi olan qurğularda işləyən və əsas fəaliyyəti qorunan şəbəkələrdən istifadəçilərə məxsus məlumatların oğurlanması olan DressCode troyanı 2016-cı ildə tədqiqatçılar tərəfindən aşkar edilmişdir. “Google” şirkəti isə bu məsələyə dərhal reaksiya verərək tərkibində zərərverici kodu olan yoluxmuş tətbiqetmələri Play Marketdən kənarlaşdırmışdır. Lakin insidentin üzərindən 16 ay keçməsinə baxmayaraq, DressCode troyanının silinmədiyi və fəaliyyətini davam etdirdiyi məlum olub. Mütəxəssislər hesab edirlər ki, “Google”in həyata keçirdiyi tədbirlərə baxmayaraq, hazırda virus tam olaraq 4 milyon qurğunu yoluxdura bilib. O, xakerlərin serverlərinə qoşulması üçün telefonu SOCKS protokolundan istifadə etməyə məcbur edir və bununla da, nəinki yoluxmuş qurğuya, hətta onun qoşulduğu şəbəkəyə də giriş əldə edə bilir. DressCode troyanı yoluxmuş qurğunu konkret İP ünvanlara sorğu göndərməklə robot şəbəkə kimi istifadə edir. Virus, eyni zamanda onlayn pulqablarına və bank hesablarına kiberhücumlar həyata ­keçirir.
Naxçıvan Muxtar Respublikası Rabitə və Yeni Texnologiylar Nazirliyi yanında Elektron Təhlükəsizlik Mərkəzi android əməliyyat sistemi olan qurğularda təhlükədən qorunmaq üçün yerli istifadəçilərə bildirir ki, DressCode troyanı virusunu aşkar etmək mümkünsüzdür və virusun mövcudluğuna şübhə yaradacaq yeganə əlamətin akkumulyatorun vaxtından tez bitməsi hesab olunur.
Elektron Təhlükəsizlik Mərkəzi istifadəçilərə şübhəli görünən proqramları yükləməməyi, cihaza android əməliyyat sistemi üçün lisenziyalı anti­virus proqramı qurmağı, cihaz düzgün işləmədiyi təqdirdə, android əməliyyat sistemini silib yenidən yüklənməsini tövsiyə edir.

Naxçıvan Muxtar Respublikası Rabitə və Yeni Texnologiyalar
Nazirliyi yanında Elektron Təhlükəsizlik Mərkəzi

Tarixin yaşıdı, bəşəriyyətin beşiyi Naxçıvan Nuh Peyğəmbərin ayaq basdığı müqəddəs torpaqdır. Əzəli və əbədi Azərbaycan torpağı, Gəmiqaya daş kitabəli, Böyük İpək Yolunun yolçusu bu ulu diyar Naxçıvan şəhərinin timsalında şəhərsalma mədəniyyəti ilə də tarixə öz qədimlik möhürünü vurub. 

Vətən səngərdən başlayır. Bu gün bu deyim hər kəsin dilində səslənir, ürəklərdə bəslənən sonsuz Vətən sevgisindən xəbər verir. Bəli,Vətənin hər qarış torpağı bizlər üçün ən dəyərli nemətdir. Təsadüfi deyil ki, xalqımız Vətən kəlməsini hər zaman ana kəlməsi ilə birgə işlədir. Çünki qoynunda böyüyüb boya-başa çatdığımız bu diyar anamız qədər əziz və doğmadır.

Bu gün hər bir azərbaycanlı düşmən tapdağında olan torpaqlarımızı azad etməyə hazırdır. Babalarımızdan miras qalan bu yurdu göz bəbəyi kimi qorumaq qarşımızda duran əsas amaldır. Bu istiqamətdə dövlətimiz tərəfindən daim məqsədyönlü tədbirlər görülür. Həyata keçirilən işlər nəticəsində ordumuzun maddi-texniki bazası möhkəmləndirilir, səriştəli və vətənpərvər hərbçi kadrlar hazırlanır, hərbi qulluqçuların sosial şəraiti yaxşılaşdırılır. Naxçıvan Əlahiddə Ümumqoşun Ordunun son illər gücünə güc qatılıb, onun döyüş texnika və sursatlarının sayı xeyli artırılıb, müasir ordu modeli formalaşıb. Ötən il oktyabrın 18-də – Azərbaycan Respublikasının Dövlət Müstəqilliyi Günündə Naxçıvan Muxtar Respublikasında ilk milli hərbi hissənin yaradılmasının 25-ci ildönümü ilə bağlı möhtəşəm hərbi paradın keçirilməsi, eləcə də Əlahiddə Ümumqoşun Ordunun 2017-ci ildə görülən işlərin nəticələrinə, döyüş və ictimai-siyasi hazırlıqda əldə olunan nailiyyətlərə görə Azərbaycan Respublikası Silahlı Qüvvələri üzrə birinci yerə layiq görülməsi həyata keçirilən tədbirlərin nəticəsidir. Son illər peşəkar kadrların ordu sıralarına cəlbi əsgərlərin döyüş ruhuna da böyük təsir göstərir. Əsgərlərimiz qarşılarında duran mühüm tapşırıqları yerinə yetirmək üçün xidməti vəzifələrinə ciddi əməl edirlər. Mənfur düşmən də yaxşı dərk edir ki, qarşısında dayanan məhz qüdrətli Azərbaycan əsgəridir.

Muxtar respublikamızın inzibati xəritəsində “Dizə” toponimi ilə adlanan bir neçə yaşayış məntəqəsi var. Bu kəndlərin böyük əksəriyyətinə regionda həyata keçirilən genişmiqyaslı quruculuq tədbirlərindən pay düşüb, həmin yaşayış məntəqələri müasir Azərbaycan kəndinə çevrilib. Cari ildə Culfa rayonunun Dizə kəndi də bu sıraya qoşulub. Daha dəqiq desək, 2018-ci ildə yanvar ayının 15-də, qarlı bir qış günündə bu yaşayış məntəqəsində bir sıra sosial obyektlərin açılışı olub. Belə ki, burada yeni məktəb binası, kənd və xidmət mərkəzləri istifadəyə verilib. 

Naxçıvan-Ordubad magistralının Culfa rayonunun Yaycı kəndi ərazisindən sola ayrılaraq Dizəyə gedən 8,9 kilometr yol yenidən qurulub, yol yatağı genişləndirilib, asfalt örtük salınıb, ehtiyac duyulan yerlərdə su keçidləri qoyulub, beton kanal çəkilib, 5,8 kilometr yol hamarlanaraq qum-çınqıl qatı verilib. Bütün bunlar avtomobillərin, nəticə etibarılə, sərnişinlərin təhlükəsiz hərəkətini təmin edib. Bu yoldan həm də Gal və Şurud kəndləri sakinlərinin istifadə etdiklərini də xatırlasaq, görülən işin necə böyük əhəmiyyət daşıdığını təsəvvür etmək heç də çətin olmaz. Kənddə quruculuq işləri aparılarkən 380 metr fiber-optik kabelin, 1700 metr yüksəkgərginlikli və müxtəlif həcmlərdə yeraltı elektrik, yeni içməli su xəttinin çəkilməsi, 5503 metr elektrik xəttinin yenilənməsi bu sahələrdəki çətinlikləri aradan qaldırıb. 5000 metr rabitə, 4408 metrlik qaz, 1340 metr içməli su xəttinin təmir olunması, həyətyanı sahələri sel sularının zərərli təsirindən qorumaq üçün 600 metr istiqamətləndirici bəndin tikilməsi dizəlilər tərəfindən onlara göstərilən dövlət qayğısı kimi dəyərləndirilir.

Naxçıvan Muxtar Respublikasında iqtisadi və sosial sahədə qazanılmış nailiyyətlər ordu quruculuğunda da uğurların qazanılmasına imkan verir.
Belə ki, muxtar respublika ərazisində yerləşən hərbi hissələrin maddi-texniki təminatı davamlı olaraq möhkəmləndirilir, ordumuz ən müasir silahlarla təchiz olunur, şəxsi heyətin döyüş qabiliyyəti, mənəvi-psixoloji hazır­lığı artırılır. Ordu quruculuğu sahəsində həyata keçirilən tədbirlər 2017-ci ildə də uğurla davam etdirilib.
Ötən il Naxçıvan şəhərində Əlahiddə Ümumqoşun Ordunun Təlim-Tədris Mərkəzi istifadəyə verilib, mərkəzi hərbi xəstəxananın, tibb, texniki qulluq və texniki nəzarət məntəqələrinin, avtomobil dayanacağının, anqarın tikintisi davam etdirilib. Bundan əlavə, “Naxçıvan” Əlahiddə Sərhəd Diviziyasında infrastruktur obyektlərinin tikintisi başa çatdırılıb, sərhəd diviziyasında yaşayış binasının, Qaraçuq kəndi ərazisində sərhəd nəzarət məntəqəsinin inzibati binasının yenidən qurulması, Şərur rayonunda “N” hərbi hissədə infrastruktur obyektlərinin, Babək rayonunda qərargah binasının və texniki istismar hissəsinin tikintisi davam etdirilib. Eyni zamanda Şərur rayonunda qərargah binasının, əsgər yeməkxanasının və əsgər yataqxanasının, Babək rayonunda anqarın tikintisi başa çatdırılıb, Culfa rayonunda dörd, Şahbuz rayonunda üç anqarın tikintisi davam etdirilib.

Fevralın 2-də Azərbaycan Gəncləri Günü münasibətilə “Buta Palas”da təntənəli mərasim keçirilib. 

Naxcivantv.az xəbər verir ki, mərasimdə Naxçıvan şəhərinin 2018-ci il üçün Azərbaycanın “Gənclər paytaxtı” seçildiyi elan olunub. Bildirilib ki, Naxçıvan “www.genclerpaytaxti.az” saytında keçirilmiş onlayn səsvermənin qalibi olub.

Gənclər və idman naziri Azad Rəhimov gənclər paytaxtının rəmzi açarını Naxçıvan Muxtar Respublikasının gənclər və idman naziri Azad Cabbarova təqdim edib.

Tədbirdə çıxış edən Naxçıvan Muxtar Respublikasının gənclər və idman naziri Azad Cabbarov muxtar respublikada gənclər sahəsində görülən işlərdən danışıb, bu istiqamətdə həyata keçirilən  dövlət siyasətindən bəhs edib. Gənclər və idman naziri qeyd edib ki, bu il İslam mədəniyyətinin paytaxtı olan Naxçıvan Azərbaycanın gənclər paytaxtı kimi də, öz üzərinə düşən misiyyanı layiqincə yerinə yetirəcəkdir.

Naxçıvan Muxtar Respublikası Ali Məclisinin Sədri yanında Gənclər Fondunun, Naxçıvan Muxtar Respublikası Gənclər və İdman Nazirliyinin və Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin təşkilatçılığı ilə Gənc­lər Mərkəzində 2 fevral – Gənclər Gününə həsr olunmuş tədbir keçirilib.

Naxçıvan Muxtar Respublikasının Nazirlər Kabineti 2018-ci ilin yanvar ayında bir sıra qərarlar qəbul etmişdir.
Belə ki, Nazirlər Kabinetinin 2018-ci il 6 yanvar tarixli qərarları ilə “Naxçıvan Muxtar Respublikasında xarici iqtisadi fəaliyyətin mal nomenklaturası, idxal gömrük rüsumlarının dərəcələri və ixrac gömrük rüsumlarının dərəcələri”, “Naxçıvan Muxtar Respublikasının daxili işlər orqanları əməkdaşlarının attestasiyasının keçirilməsi Qaydası”, “Naxçıvan Muxtar Respublikası Dini Qurumlarla İş üzrə Dövlət Agent­liyinin strukturuna daxil olmayan tabeliyindəki qurumların Siyahısı”, 12 yanvar tarixli qərarları ilə “Naxçıvan Muxtar Respublikasında baza maliyyələşdirilməsinin subyektləri olan elmi müəssisə və təşkilatların Siyahısı”, “Аvtоmоbil Yоllаrı” Məqsədli Büdcə Fоndunun vəsаitinin muхtаr rеspublikа ərаzisində ümumi istifаdədə оlаn rеspublikа və yеrli əhəmiyyətli аvtоmоbil yоllаrının sахlаnmаsı və istismаrı üçün хərclənməsi Qаydаlаrı” və 16 yanvar tarixli qərarı ilə “Naxçıvan Muxtar Respublikasının ali təhsil müəssisələrində Distant Təhsil Mərkəzi haqqında Nümunəvi Əsasnamə” təsdiq edilmişdir.

1997-ci il fevralın 1-də ulu ­öndər Heydər Əliyevin Sərəncamı ilə Gənclərin birinci Forumunun keçirildiyi gün – fevralın 2-si Azərbaycanda Gənclər Günü elan edilmişdir.
“Biz yaratdığımız, qurduğumuz müstəqil Azərbaycan dövlətini gənc­lərə tapşırırıq. Bizim işimizi gənc­lər davam etdirməlidir”. Ümummilli liderimiz Heydər Əliyevin bu fikir­ləri Azərbaycan gəncliyinə göstərilən etimadın təzahürüdür. Ulu öndər ölkəmizə rəhbərlik etdiyi bütün dövrlərdə sağlamdüşüncəli gənc nəslin yetişdirilməsini, gənclərin ölkənin sosial-iqtisadi, ictimai-siyasi və mədəni həyatında iştirakının təmin edilməsini diqqət mərkəzində saxlamışdır. Dahi rəhbərin təşəbbüsü ilə hələ Sovetlər Birliyi dövründə Azərbaycan gəncliyinin inkişafı istiqamətində ardıcıl tədbirlər həyata keçirilmiş, milli dəyərlərə və tarixi­-mədəni irsə bağlı gənc nəslin formalaşdırılmasının əsası qoyulmuşdur. O dövrdə gənclərin təhsili sahəsində həyata keçirilən tədbirlər, onların ixtisaslı kadr kimi yetişdirilməsi, xüsusilə milli hərbçi kadrların hazırlanması ölkəmiz müstəqil­lik qazandıqdan sonra milli kadr təminatında əsas amil olmuşdur.

Bu gün İslam mədəniyyətinin paytaxtı statusunu fəxrlə daşıyan şəhərimiz artıq həm də Gənclər Paytaxtıdır. Muxtar respublikamızda cəmiyyətimizin aparıcı qüvvəsinə çevrilən, ictimai həyatımızda öz fəallıqları ilə tanınan gənclərimiz çoxdur. Onlardan bəziləri ilə görüşüb, gənclərimiz üçün ikiqat bayrama çevrilən bu əlamətdar gündə təəssüratlarını öyrəndik.
İsmayıl İsmayılov – Naxçıvan Dövlət Universitetinin müəllimi, 2017- ci ildə “İlin gənc rəssamı” nominasiyasının qalibi:
– Naxçıvanın Gənclər Paytaxtı seçilməyi məni çox sevindirdi. Bu, bütövlükdə Azərbaycan ictimaiyyətinin muxtar respublikada gənc­lərimiz üçün yaradılan şəraitə, burada gənclərin ictimai-siyasi fəallıqlarına, müxtəlif sahələrdə qazandıqları əhəmiyyətli uğurlara verdiyi yüksək qiymətdir. Biz gənclər bundan sonra da gördüyümüz işlərlə, qazanacağımız yeni-yeni nailiyyətlərlə muxtar respublikamızın daha da inkişaf etdirilməsinə öz töhfəmizi verməyə çalışacağıq.

Dünən növbəti dəfə əldə edilən uğurlu nəticə hər bir muxtar respublika sakininə sonsuz sevinc, qürur yaşatdı. “Azərbaycan gəncliyi 2016-2020-ci illərdə” Dövlət Pro­qramına müvafiq həyata keçirilən “Gənclər paytaxtı” seçimi üçün www.genclerpaytaxti.az saytı vasitəsilə həyata keçirilən onlayn səsvermədə ilk gündən ön sırada yer alan qədim Naxçıvan şəhəri liderliyini sonadək qorudu. Yanvarın 25-i saat 00:01-dən yanvarın 31-i saat 23:59-dək davam edən səsvermədə ölkəmizin 23 rayon və şəhəri birincilik uğrunda mübarizə apardı. Səsvermənin yekununa əsasən Naxçıvan şəhəri səslərin 30 faizini toplayaraq birinci oldu.
Naxçıvanlı gənclər səsvermənin başa çatdığı radələrdə Naxçıvan şəhərinin baş meydanına toplaşaraq sevinclərini ifadə etdilər. Gənclər bu il İslam mədəniyyətinin paytaxtı olan Naxçıvanın ölkəmizin “Gənclər paytaxtı” seçimi ilə bağlı səsvermədə qalib gəlməsini böyük uğur kimi qiymətləndirdi, bunu muxtar respublikada gənclərə göstərilən yüksək diqqət və qayğının nəticəsi kimi dəyərləndirdilər.

Dünən Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyanın və Naxçıvan Muxtar Respublikası Dövlət Təhlükəsizliyi Xidmətinin əməkdaşları tərəfindən “Ümummilli lider Heydər Əliyevin milliləşmə siyasəti, Azərbaycançılıq ideologiyası və dövlət qulluqçuları qarşısında duran vəzifələr” mövzusunda seminar keçirilib.
Komissiya tərəfindən keçirilən sonuncu müsabiqədə uğur qazanaraq mərkəzi və yerli icra hakimiyyəti orqanlarında, habelə məhkəmələrdə inzibati vəzifələrə təyin olunan dövlət qulluqçuları seminarda iştirak ediblər.
Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiya sədrinin müavini Ümid Qurbanov tədbiri giriş sözü ilə açaraq bildirib ki, ölkəmizdə müasir dövlət qulluğu sisteminin formalaşması və inkişafı ümummilli liderimiz Heydər Əliyevin adı ilə bağlıdır. Ulu öndər xalqın təkidli tələbi ilə ikinci dəfə ali hakimiyyətə gəldikdən sonra ölkəmizdə ictimai-siyasi sabitlik bərqərar edilib, dövlət idarəçiliyinin yeni əsasları formalaşdırılıb və Azərbaycan davamlı inkişaf yoluna qədəm qoyub. Dövlət idarəetmə sisteminin təkmilləşdirilməsi və demokratikləşdirilməsi prosesinə başlanılıb, dövlət qulluğu sahəsində daha geniş islahatlar həyata keçirilib. Bu siyasətin ölkəmizdə, eləcə də Naxçıvan Muxtar Respublikasında uğurla davam etdirilməsi nəticəsində bütün sahələr kimi, dövlət qulluğu sahəsinin də inkişafı üçün əlverişli imkanlar yaranıb.

Babək Rayon Mədəniyyət Evində keçirilən tədbiri giriş sözü ilə Yeni Azərbaycan Partiyası Babək Rayon Təşkilatının sədri, Naxçıvan Muxtar Respublikası Ali Məclisinin deputatı İsa Məmmədov açıb.
Təşkilat sədri bildirib ki, dünənin, bu günün və gələcəyin partiyası olan Yeni Azərbaycan Partiyası çox mürəkkəb tarixi şəraitdə yaradılıb. 1992-1993-cü illərdə partiyanın yerlərdə rayon təşkilatı və özəklərinin yaradılması prosesi gedib. Partiyanın Babək Rayon Təşkilatı isə 1993-cü il yanvar ayının 30-dan fəaliyyətə başlayıb.
Bildirilib ki, yaradılmasının 25 illik yubileyini qeyd edən Yeni Azərbaycan Partiyası Babək Rayon Təşkilatının təsis konfransı dahi rəhbərimiz Heydər Əliyevin iştirakı ilə keçirilib. Konfransda ulu öndər çıxış edərək mövcud tarixi şəraitdən, ictimai-siyasi vəziyyətdən, yeni yaradılan rayon təşkilatı qarşısında duran vəzifələrdən danışıb.
Diqqətə çatdırılıb ki, 2017-ci ildə rayon üzrə partiya sıralarına 111 nəfər qəbul olunub ki, onlardan 85-i gəncdir. Hazırda rayon üzrə 55 ərazi ilk partiya təşkilatı öz ətrafında 6748 nəfər partiya üzvünü birləşdirir. Onlardan 2822 nəfəri qadınlar, 2292 nəfəri isə gənc­lərdir. Babək qəsəbəsi və kəndlərdə yerləşən ərazi ilk partiya təşkilatları hər cür şə­raitlə təmin olunmuş müasir inzibati binalarda fəaliyyət göstərirlər.

Naxçıvan Dövlət Universitetində Heydər Əliyev lektoriyasının 2 fevral – Gənclər Gününə həsr olunmuş “Heydər Əliyev və gənc­lər siyasəti” mövzusunda növbəti məşğələsi keçirilib.
Universitetin rektoru, AMEA-nın müxbir üzvü Saleh ­Məhərrəmov tədbiri açaraq dahi şəxsiyyət Heydər Əliyevin adı ilə bağlı olan dövlət gənclər siyasətinin bu gün uğurla davam etdirildiyini və keyfiyyətcə yeni mərhələyə yüksəldiyini deyib. Çıxışda ümummilli liderin ölkəyə rəhbərlik etdiyi bütün dövrlərdə gənclərlə bağlı həyata keçirilən islahatlardan, gənclərin ölkə həyatının bütün sahələrində fəal iştirakının təmin edilməsi məqsədilə görülən işlərdən danışılıb.
Universitetin tədris işləri üzrə prorektoru, dosent Surə Seyid “Ulu öndər Heydər Əliyev və gənclər siyasəti” mövzusunda məruzə edib. Məruzədə 1994-cü ildə dövlət gənc­lər siyasətini həyata keçirmək məqsədilə Gənclər və İdman Nazirliyinin yaradılmasından, 1996-cı il fevralın 2-də ulu öndər Heydər Əliyevin iştirakı ilə Ümumrespublika Gənclərinin I Forumunun keçirilməsindən, gənclər siyasəti ilə bağlı ümummilli lider tərəfindən imzalanmış fərman və sərəncamların mahiyyətindən danışılıb.

Gərməçataq kəndinə işğalçı ermənilərin etdiyi ilk həmlə indiki kimi yadımdadı. Həmin gün hava yaman tutqun idi. Qara buludlar sanki bir-biri ilə vuruşacaq deyə, göy üzündən asılıb qalmış, ildırım şaqqıltısı ətrafı bürümüşdü. Axşamdan başlayan güclü yağış isə torpağı xal-xal bəzəmişdi. Həmin gün kəndimizdə top-tüfəng səsi səngimirdi. Erməni xisləti, nankorluğu yenə baş qaldırmışdı. Dağlar gözəli Gərməçataq düşmən işğalı ilə üz-üzə qalmışdı. Heç yana getməmək, əksinə yurdumuza su salmaq istəyəni qovmaq qərarına gəlmişdik. Yaşlı və orta nəslin nümayəndələri yaxşı bilirlər ki, həmin vaxt Naxçıvan necə də çətin günlər yaşayırdı. Enerji böhranı – zülmət qaranlığa qərq olan yaşayış məntəqələri, ərzaq qıtlığı – sonu görünməyən çörək növbələri və üstəgəl, erməni quldurlarının sərhədyanı kənd­lərə basqını. Beləcə, el-obamız, ümumilikdə, muxtar respublikamızın sərhəd kəndləri üçün ağrılı-acılı günlər başlamışdı. Səhəri səngərdə qarşılayıb, axşamı da orada yola salırdıq. Naxçıvanın hər yerindən döyüş zamanı bizim köməyimizə gəlirdilər. Hamımızın qəlbində tükənməz Vətən sevgisi, torpaq təəssübkeşliyi, hünər, qorxmazlıq var idi. Ulularımızdan bizə miras qalan yurda bağlılıq, onu dərin məhəbbətlə sevmək bizim üçün ən güclü ordu, silah-sursat demək idi. Belə çətin günlərdə bu torpağın dahi oğlu Heydər Əliyev dadımıza çatdı, Naxçıvanımızı qorudu, onu hifz etdi, yaşatdı. Yağı düşmənin arzusu, niyyəti puç oldu. Ulu öndərin ətrafında sıx birləşdik, vuruşduq, şəhidlər verdik, amma torpağımızı vermədik, onu qoruyub saxladıq.

Azərbaycan Vətən Müharibəsi Veteranları və Şəhid Ailələri Naxçıvan Muxtar Respublika Təşkilatı idarə heyətinin yığıncağı keçirilib.
Yığıncaqda təşkilatın sədri Mirməcid Seyidov məruzə ilə çıxış edərək ötən il görülən işlər barədə danışıb. Qeyd olunub ki, 2017-ci ildə Azərbaycan Vətən Müharibəsi Veteranları və Şəhid Ailələri Naxçıvan Muxtar Respublika Təşkilatının aidiyyəti təşkilatlarla əlaqələri daha da möhkəmlənib, müxtəlif mövzularda silsilə tədbirlər hazırlanıb. Belə ki, hesabat ilində təşkilat, onun şəhər və rayon şöbələri tərəfindən 30-dək tədbir keçirilib.
Vurğulanıb ki, təşkilatın həyata keçirdiyi tədbirlərin əsas məqsədlərindən biri gənc nəslə vətənpərvərlik hisslərinin aşılanması və onların doğma yurda məhəbbət ruhunda tərbiyə edilməsindən ibarətdir. Buna görə də bölgələrdə milli qəhrəmanlarımızın, şəhidlərimizin xatirəsinə həsr olunmuş tədbirlərin təşkilinə daha ciddi önəm verilib, onların qəhrəmanlıqla dolu həyat yolu televiziya və mətbuatda işıqlandırılıb.
Tədbirdə Azərbaycan Vətən Müharibəsi Veteranları və Şəhid Ailələri Naxçıvan Muxtar Respublika Təşkilatının şəhər və rayon şöbələrinin sədrləri çıxış edərək ötən il görülmüş işlərdən və qarşıda duran vəzifələrdən danışıblar.

Xəbərlər şöbəsi

Bu gün ölkəmizdə, o cümlədən muxtar respublikamızda həyata keçirilən praqmatik siyasət yüksək meyarlara cavab verən gələcəyin qarantı rolunda çıxış edir, iqtisadi yüksəlişimizi uğurlu şəkildə modelləşdirir. Həmin siyasət bu gün bütün sahələrdə müsbət nəticələrin əldə olunmasına şərait yaradıb, ötən illər ərzində makroiqtisadi sabitliyə, dinamik iqtisadi artıma nail olunub, yoxsulluğun azaldılmasında və əhalinin sosial rifahının yaxşılaşdırılmasında əhəmiyyətli uğurlar qazanılıb. Əldə olunan nəticələr seçilən düzgün siyasi xəttin bəhrəsi olmaqla yanaşı, həm də rəhbər amilinin real siyasi fəaliyyətdə təsdiqidir. Ötən il muxtar respublikamızda qazanılan nailiyyətlər də bu baxımdan diqqəti cəlb edir.

Bəhs olunan dövr muxtar respublikamızın həyatında bir sıra əlamətdar hadisələrlə yadda qalıb. Yanvarın 11-də Azərbaycan Respublikasının Prezidenti cənab İlham Əliyev Naxçıvan Muxtar Respublikasına 13 ildə sayca 13-cü səfərə gəlib. Ölkə başçısının ümummilli lider Heydər Əliyevin Naxçıvan şəhərinin mərkəzində ucaldılan abidəsini ziyarət etməklə başlayan səfəri muxtar respublikada bir sıra mühüm obyektlərin istifadəyə verilməsi ilə yadda qalıb.

Ölkəmizdə uğurla həyata keçirilən regionların sosial-iqtisadi inkişafı dövlət pro­qramları respublikamızın simasını tanınmaz dərəcədə dəyişib. Ölkə Prezidenti cənab İlham Əliyevin rəhbərliyi ilə aparılan iqtisadi siyasət, görülən işlər, irəli sürülən təşəbbüslər sayəsində əvvəlki illərdə olduğu kimi, 2017-ci ildə də böyük uğurlar əldə edilib.

Şərur şəhərindəki “Bahar” kino­teatrında təşkil olunan yubiley tədbirində Yeni Azərbaycan Partiyası Şərur Rayon Təşkilatının sədri, Naxçıvan Muxtar Respublikası Ali Məclisinin deputatı Əmir Babayev məruzə edib.
Qeyd olunub ki, Yeni Azərbaycan Partiyasının ilk rayon təşkilatı 1993-cü il yanvarın 23-də əbədiyaşar liderimiz Heydər Əliyevin iştirakı ilə Şərur rayonunda yaradılıb. Həmin il havaların qarlı və şaxtalı olmasına baxmayaraq, ən ucqar kəndlərdən də partiyanın yüzlərlə təəssübkeşi Şərur şəhərindəki Mədəniyyət Sarayına toplaşmışdı. Ümummilli liderimiz konfransdakı çıxışında ağır günlərdə, torpaqlarımızın işğalının genişləndiyi, iqtisadiyyatın get-gedə iflic vəziyyətinə düşdüyü, ölkə­nin parçalanmaq təhlükəsi ilə üz-üzə qaldığı bir şərait­də Yeni Azərbaycan Partiyasının yaranmasının zərurət olduğunu bəyan etdi və təşkilat üzvlərinin bu ağır problemlərin tezliklə aradan qaldırılması üçün partiyanın fəaliyyətində yaxından iştirak edəcəklərinə əmin olduğunu bildirdi.

Xəbər verdiyimiz kimi, Azərbaycan Respublikasının Prezidenti cənab İlham Əliyevin sədri olduğu “Caspian European Club” Azərbaycanın iqtisadi regionlarının 2017-ci il üçün illik investisiya reytinqini hazırlayıb. Azərbaycan regionlarının investisiya reytinqinin lideri ən yüksək ümumi bal toplamış Naxçıvan Muxtar Respublikası olub. “Caspian European Club”un sədrinin birinci müavini Telman Əliyevlə söhbətimiz də bu mövzuda oldu. Telman Əliyev əvvəlcə təşkilatın fəaliyyət istiqamətləri barədə danışaraq dedi:
– Məlum olduğu kimi, “Caspian European Club” dünyanın 70 ölkə­sinin 5 mindən artıq şirkət və təşkilatını birləşdirən, dinamik inkişaf edən regional təşkilatlardan biridir. Təşkilatımız 2002-ci ilin iyun ayında “Caspian Energy International Media Group”un iştirakı və Xəzər-Qara dəniz regionunda fəaliyyət göstərən neft-qaz şirkətlərinin dəstəyi ilə təsis edilib. Yarandığı ilk gündən “Caspian European Club”un sədri Azərbaycan Respublikasının Prezidenti cənab İlham Əliyevdir.
Klubun əsas hədəfi neft sahəsindən əldə olunan gəlirləri qeyri-neft sektorunun inkişafına cəlb etmək, iqtisadiyyat, energetika, gömrük, vergi, ətraf mühitin mühafizəsi və sair məsələlər üzrə ümumi pro­qramın hazırlanması üçün informasiya səviyyəsində lazımi şəraitin formalaşdırılmasında iştirak etmək, xarici və yerli biznes nümayəndələrinin problemlərinin sistematik öyrənilməsi və bu məlumatların Prezident Administrasiyası, hökumət, parlament və iqtisadi bloka nəzarət edən dövlət qurumlarına çatdırmaqdır. Eyni zamanda təşkilat əlverişli investisiya və biznes mühitinin yaradılmasını şərtləndirən proqram və təklifləri həyata keçirir, regional əhəmiyyətli müxtəlif informasiya layihələrini gerçəkləşdirir, biznes-forum, dəyirmi masa və işçi qruplar çərçivəsində dövlət qurumları ­ilə özəl sektor arasında dialoqu ­dəstəkləyir.

  Yanvarın 24-də Naxçıvan Muxtar Respublikası Mədəniyyət və Turizm Nazirliyinin təşkilatçılığı ilə Naxçıvan Dövlət Film Fondunda nazirliyin sistemində olan müəssisələrdə fəaliyyət göstərən gənclər üçün “Naxçıvanda islami dəyərlər və onların qorunması” mövzusunda tədbir keçirilib.

Naxçıvan Muxtar Respublikası Mədəniyyət və Turizm Nazirliyinin təhsil müəssisələri ilə iş üzrə baş məsləhətçisi Kənan Tağızadə çıxış edərək bildirib ki, 2009-cu il ok­tyabrın 14-də Bakıda keçirilən İslam ölkələrinin mədəniyyət nazirlərinin IV konfransında Naxçıvan şəhəri 2018-ci il üçün İslam mədəniyyətinin paytaxtı elan olunub. Bu gün keçirilən tədbirin məqsədi də gəncləri İslam mədəniyyəti və dəyərləri ilə tanış etmək, onları maarifləndirməkdir.
Qeyd edilib ki, Azərbaycanda İslam dini VII-VIII əsrlərdə yayılıb və xalqımızın milli-mənəvi dəyərlərinin əsasını təşkil edir. Bu gün iftixar hissi ilə deyirik ki, Azərbaycanın İslam mədəniyyəti ilə bağlı olan dahi insanları – Nizami Gəncəvi, Məhəmməd Füzuli, Nəsirəddin Tusi, Qətran Təbrizi və bir çox digər böyük şəxsiyyətləri dünya sivilizasiyasına böyük töhfələr verib və İslam mədəniyyətini zənginləşdiriblər.

  Yanvarın 24-də Naxçıvan Muxtar Respublikası Mədəniyyət və Turizm Nazirliyinin təşkilatçılığı ilə Naxçıvan Dövlət Film Fondunda nazirliyin sistemində olan müəssisələrdə fəaliyyət göstərən gənclər üçün “Naxçıvanda islami dəyərlər və onların qorunması” mövzusunda tədbir keçirilib.

Naxçıvan Muxtar Respublikası Mədəniyyət və Turizm Nazirliyinin təhsil müəssisələri ilə iş üzrə baş məsləhətçisi Kənan Tağızadə çıxış edərək bildirib ki, 2009-cu il ok­tyabrın 14-də Bakıda keçirilən İslam ölkələrinin mədəniyyət nazirlərinin IV konfransında Naxçıvan şəhəri 2018-ci il üçün İslam mədəniyyətinin paytaxtı elan olunub. Bu gün keçirilən tədbirin məqsədi də gəncləri İslam mədəniyyəti və dəyərləri ilə tanış etmək, onları maarifləndirməkdir.
Qeyd edilib ki, Azərbaycanda İslam dini VII-VIII əsrlərdə yayılıb və xalqımızın milli-mənəvi dəyərlərinin əsasını təşkil edir. Bu gün iftixar hissi ilə deyirik ki, Azərbaycanın İslam mədəniyyəti ilə bağlı olan dahi insanları – Nizami Gəncəvi, Məhəmməd Füzuli, Nəsirəddin Tusi, Qətran Təbrizi və bir çox digər böyük şəxsiyyətləri dünya sivilizasiyasına böyük töhfələr verib və İslam mədəniyyətini zənginləşdiriblər.

“Gənclər paytaxtı” seçimi “Azərbaycan gəncliyi 2017-2021-ci illərdə” Dövlət Proqramına uyğun olaraq müsabiqə yolu ilə həyata keçirilir. Həmin pro­qramın müvafiq bəndinə əsasən hər il ölkənin bir rayon və ya şəhərinin “Gənclər paytaxtı” elan edilməsi nəzərdə tutulub. Bu, yerlərdə gənclərlə işin daha da canlandırılması məqsədilə həyata keçirilir. “Gənclər paytaxtı – 2018”in seçimlərinə artıq start verilir.
Bu müsabiqədə Naxçıvan şəhəri də namizəd şəhərlər siyahısındadır. Artıq xeyli müddətdir ki, Naxçıvan Muxtar Respublikasının Gənclər və İdman Nazirliyi tərəfindən sözügedən müsabiqə ilə bağlı kompleks hazırlıq tədbirləri həyata keçirilir. Layihə ilə əlaqədar nazirliyin sifarişi və dəstəyi əsasında xüsusi tanıtım videoçarxları hazırlanaraq Naxçıvan televiziyasında, elektron informasiya resurslarında nümayiş olunub və gənclər arasında böyük maraqla qarşılanıb. Həmçinin Naxçıvan Muxtar Respublikasında fəaliyyət göstərən “Naxtel” mobil operatoru ilə bağlanmış müqavilə əsasında mobil istifadəçilərin müsabiqə ilə bağlı ətraflı məlumat əldə edə bilməsi üçün toplu mesaj xidməti istifadəyə verilib. Bundan əlavə, layihə ətrafında kütləviliyin təmin edilməsi məqsədilə nazirlik tərəfindən müsabiqə və Naxçıvan şəhəri haqqında zəruri məlumatları əks etdirən təqvim, buklet və əlfəcinlər hazırlanaraq Naxçıvan şəhərində yerləşən müxtəlif iaşə və ticarət mərkəzlərinə paylanılıb.
Cari il üzrə İslam mədəniyyətinin paytaxtı elan edilməsi Naxçıvan şəhərinin daha bir üstünlüyü sayıla bilər. Ərazisində kifayət qədər tarixi əhəmiyyətli memarlıq abidələri mövcud olan Naxçıvan şəhəri İslam mədəniyyət mərkəzi kimi də xüsusi əhəmiyyət daşıyır. Müsabiqənin mahiyyətinə nəzər salsaq, Azərbaycan gəncliyi üçün indiki məqamda qoca Şərqin və İslam mədəniyyətinin müasir şəhərsalma elementlərini və ən qədim tarixin nümunələrini özündə əks etdirən Naxçıvan şəhəri ən ideal seçim sayıla bilər. Naxçıvan şəhərində hazırda 3 ali, 3 orta ixtisas, 17 tam orta təhsil müəssisəsi, 13 muzey, 3 teatr, 1 kinoteatr, 7 konfrans-təlim zalı, 9 mehmanxana, idman kompleksi, gənclər evi, sərgi salonu fəaliyyət göstərir. Bundan əlavə, gənclərin istirahətlərinin səmərəli təşkil olunması üçün Heydər Əliyev parkı, “Əyləncə mərkəzi”, “Əyləncə adası” kimi istirahət məkanları və çoxsaylı kafe-restoranlar mövcuddur. Bütün bunlar Naxçıvan şəhərinin mədəniyyət tədbirlərinin mərkəzi kimi tanınmasında mühüm rol oynayır.

Naxçıvan Muxtar Respublikası Ali Məclisi Sədrinin tapşırığına əsasən Naxçıvan qarnizonu qoşunlarında 2017-ci tədris ilində döyüş hazırlığının, döyüş və döyüşə hazırolmanın, nizam-intizamın vəziyyətinə dair müşavirə keçirilib.
Əvvəlcə muxtar respublikamızda ordu quruculuğundan bəhs edən “Ordumuzun təməl ünvanı Naxçıvan” adlı film nümayiş etdirilib.
Naxçıvan qarnizonunun rəisi, general-leytenant Kərəm Mustafayev 2017-ci tədris ilində qoşunlarda döyüş hazırlığının, döyüş və döyüşə hazırolmanın, nizam-intizamın vəziyyətini təhlil edərək məruzə edib. Bildirilib ki, təməli ümummilli liderimiz Heydər Əliyev tərəfindən qoyulmuş ordu quruculuğu siyasətinin uğurla davam etdirilməsinin nəticəsidir ki, bu gün Silahlı Qüvvələrimiz Azərbaycan Respublikasının Prezidenti, Ali Baş Komandan cənab İlham Əliyevin rəhbərliyi altında dünyanın qabaqcıl, regionumuzun isə lider orduları səviyyəsinə yüksəlib.
Naxçıvan Muxtar Respublikası Ali Məclisinin Sədri cənab Vasif Talıbovun yüksək diqqət və qayğısı sayəsində uzun illər müxtəlif mərhələlərdən keçərək formalaşmış Əlahiddə Ümumqoşun Ordu bu gün yerləşdiyi coğrafi mövqeyə, kontingentinə və döyüş qabiliyyətinə görə keçmiş SSRİ və indiki MDB ölkələrinin silahlı qüvvələri səviyyəsində analoqu olmayan statusa malikdir.

Naxçıvan Muxtar Respublikası Ali Məclisinin Sədri yanında Dövlət Qulluğu Məsələləri üzrə Komissiyada 45 dövlət orqanı nümayəndəsinin iştirakı ilə “Naxçıvan Muxtar Respublikasının birinci-beşinci kateqoriya dövlət orqanlarında inzibati vəzifələrin ikinci-yeddinci təsnifatlarına uyğun olan vakant vəzifələrin tutulmasının Ümumi Şərtləri” və “Dövlət qulluqçularının vəzifə təlimatlarının hazırlanması” mövzularında seminar keçirilib.
Seminarda Dövlət Qulluğu Məsələləri üzrə Komissiyanın sədri İsmayıl Qəribli çıxış edərək bildirib ki, Naxçıvan Muxtar Respublikası Ali Məclisi Sədrinin 2017-ci il 7 iyul tarixli Fərmanı ilə təsdiq edilmiş “Naxçıvan Muxtar Respublikasında dövlət qulluğu vəzifəsinin tutulması məqsədi ilə müsahibə keçirilməsi Qaydası”nın 2.5-ci bəndinə əsasən Naxçıvan Muxtar Respublikasının Nazirlər Kabinetinin 2018-ci il 11 yanvar tarixli qərarı ilə “Naxçıvan Muxtar Respublikasının birinci-beşinci kateqoriya dövlət orqanlarında inzibati vəzifələrin ikinci-yeddinci təsnifatlarına uyğun olan vakant vəzifələrin tutulmasının Ümumi Şərtləri” təsdiq edilmişdir. Keçirilən seminarın məqsədi vakant dövlət qulluğu vəzifələrinin tutulması şərtləri və dövlət qulluqçularının vəzifə təlimatlarının hazırlanmasının yeni qaydaları ilə bağlı qanunvericiliyin tələblərinin diqqətə çatdırılması və bu işin qanunvericiliyin tələblərinə uyğun həyata keçirilməsinin təmin edilməsidir.
İsmayıl Qəribli qeyd edib ki, vəzifə təlimatları dövlət qulluqçusunun tutduğu vəzifənin funksiyalarının təsvir edilməsi üçün tərtib edilir. Dövlət qulluqçusu fəaliyyətini vəzifə təlimatlarının tələblərinə uyğun olaraq həyata keçirməlidir. Bundan başqa, Naxçıvan Muxtar Respublikası Nazirlər Kabinetinin müvafiq qərarına əsasən vəzifə təlimatlarında hər hansı əlavə və dəyişiklik olduqda dövlət orqanı bu barədə məlumatları bir ay müddətində komissiyaya təqdim etməlidir.
Seminarda komissiyanın sektor müdiri Türkan Gülməmmədli çıxış edib, mövzularla bağlı slaydlar nümayiş olunub.
Sonda seminar iştirakçılarını maraqlandıran suallar ətraflı cavablandırılıb.

Naxçıvan Muxtar Respublikası Ali Məclisinin Sədri yanında
Dövlət Qulluğu Məsələləri üzrə Komissiyanın mətbuat xidməti

Şərur rayonu

  Zaman tarixin bizdən uzaqlaşdırdığı bir çox hadisələri xatirələrdən silir. Lakin keçdiyimiz yollarda elə anlar olur ki, onlar bütöv bir xalqın taleyi üçün böyük əhəmiyyət kəsb etdiyindən tarix onları uzaqlaşdıra bilmir. Zaman etibarilə bu hadisələrdən nə qədər çox uzaqlaşırıqsa, onların təkcə bu günümüzə yox, sabahımıza da təsirini daha aydın başa düşür və dərk edirik. 1990-cı il yanvar ayının       19-dan 20-nə keçən gecə Bakıda, ondan bir neçə saat əvvəl muxtar respublikamızın sərhəd kəndləri olan Kərkidə və Sədərəkdə baş verən qanlı hadisələr də heç zaman yaddaşlardan silinməyəcək, gənc nəsillərə örnək kimi xatırlanacaqdır. 

Həmin hadisələrdən 28 il keçir. Lakin Azərbaycan xalqı insanlığa sığmayan bu ağır cinayətləri tarix boyu unutmayacaq, kədərli, eyni zamanda məğrurluqla, qəhrəmanlıqla dolu olan Qanlı Yanvar kövrək xatirələrdə yaşayacaqdır.
Vətən məhəbbəti həmişə müqəddəs sayılmış, hər şeydən əziz tutulmuşdur. Vətənə məhəbbətin kökü isə torpaqdan başlanır. Bu yüksək və ülvi duyğu, güclü, təmiz, pak hiss həmin gün müstəqilliyə, azadlığa gedən yolumuza hərbin gücü ilə sipər çəkmək istəyənlərə qarşı vətənpərvər oğullarımızın başladıqları mübarizənin ana xəttini təşkil etdi.

Şərəfli tariximizin qan yaddaşına yazılan 1990-cı ilin 20 Yanvar faciəsindən 28 il ötür. Bu faciə Azərbaycan xalqının iradəsini, milli azadlıq uğrunda mübarizə əzmini qıra bilmədi. Həmin müdhiş gecədə həlak olan Vətən oğulları xalqın milli azadlığı, müstəqilliyi üçün yol açdılar, bugünkü müstəqil Azərbaycan dövlətinin tarixinə həmin faciəni xalqımızın şərəf və qəhrəmanlıq səhifəsi kimi yazdılar.

Yanvarın 17-də Azərbaycan Respublikasının İran İslam Respublikasının Təbriz şəhərindəki Baş Konsulluğunda 20 Yanvar faciəsinin 28-ci ildönümü ilə əlaqədar anım mərasimi keçirilmişdir.
Tədbirdə şəhidlərin xatirəsi bir dəqiqəlik sükutla yad edilmişdir.
Sonra Azərbaycan Respublikasının Təbriz şəhərindəki Baş konsulu Əliyənnağı Hüseynov çıxış edərək demişdir ki, 20 Yanvar faciəsi Azərbaycan xalqının müstəqillik uğrunda mübarizə tarixinin şanlı səhifəsidir. Yanvarın 19-dan 20-nə keçən gecə qurbanlar verməsinə baxmayaraq, Azərbaycan xalqı milli azadlıq və istiqlal uğrunda mübarizliyini, əyilməzliyini, məğrurluğunu bir daha nümayiş etdirmişdir. Həmin gün 147 Azərbaycan vətəndaşı şəhid olmuş, 744 nəfər yaralanmış və xəsarət almışdır. 20 Yanvar faciəsinə ilk dəfə xalqımızın ümummilli lideri Heydər Əliyev öz etirazını bildirmişdir. Ulu öndər bütün təzyiqlərə baxmayaraq, Azərbaycanın Mos­kvadakı Daimi Nümayəndəliyində bəyanatla çıxış edərək hadisəni törədənləri ifşa etmiş, günahkarların cəzalandırılmasını tələb etmişdir.
Diqqətə çatdırılmışdır ki, ulu öndər Naxçıvanda fəaliyyət göstərdiyi dövrdə müstəqilliyimiz üçün mühüm qərarlar qəbul etmiş, ilk dəfə 20 Yanvar faciəsinə siyasi qiymət vermişdir. Dahi rəhbər ölkəmizdə yenidən siyasi hakimiyyətə qayıtdıqdan sonra isə 20 Yanvar faciəsinə dövlət səviyyəsində siyasi qiymət verilmiş, Bakı şəhərindəki Şəhidlər xiyabanı yenidən qurularaq xalqımızın müqəddəs and yerinə çevrilmişdir. Baş konsul ulu öndərin yolunu uğurla davam etdirən ölkə Prezidenti cənab İlham Əliyev tərəfindən 20 Yanvar şəhidlərinin xatirəsinin əbədiləşdirilməsi və onların ailələrinin sosial müdafiəsinin gücləndirilməsi istiqamətində görülən işlərdən də danışmışdır.
Mərasimdə 20 Yanvar hadisələrindən bəhs edən film nümayiş etdirilmiş, hazırlanmış fotostendlərə baxış olmuş, iştirakçılara əyani vəsaitlər paylanmış, ehsan süfrəsi açılmışdır.
İran İslam Respublikası Xarici İşlər Nazirliyinin Şimal-Qərb nümayəndəliyinin rəhbəri, Şərqi Azərbaycan Vilayətinin rəsmiləri, Türkiyə Respublikasının Təbrizdəki Baş konsulu və konsulluğun əməkdaşları, Təbrizdə yaşayan Azərbaycan vətəndaşları və ictimaiyyət nümayəndələri tədbirdə iştirak etmişlər.

“Şərq qapısı”

Azərbaycan xalqına qarşı törədilən 20 Yanvar faciəsindən 28 il ötür. Bu tarix Azərbaycan xalqının ərazi bütövlüyü, dövlət müstəqilliyi, azadlıq və demokratiya, Ermənistanın təcavüzkar hərəkətlərinə və keçmiş SSRİ rəhbərliyinin onlara havadarlıq etməsinə qarşı şərəfli mübarizə günü kimi tarixə düşüb.
1990-cı il yanvarın 19-dan 20-nə keçən gecə Sovet ordusunun xüsusi təlim keçmiş, əsasən, ermənilərdən ibarət olan qoşun hissələri 3 istiqamətdə Bakıya yeridilərək dinc əhaliyə qarşı misligörünməmiş vəhşiliklər törətmiş, insanları öldürmüş, yaşayış evləri atəşə tutulmuş, təcili yardım maşınları, avtomobillər tanklar tərəfindən əzilmiş, yaralılara yardım göstərən tibb işçiləri güllələnmişdi. Bu faciədə 147 Azərbaycan vətəndaşı şəhid olmuş, 744 nəfər yaralanmış və xəsarət almış, 4 nəfər itkin düşmüş, 841 nəfər qanunsuz həbs edilmişdir.
Bu əməliyyat SSRİ Müdafiə Nazirliyi, Daxili İşlər Nazirliyinin xüsusi təyinatlıları və SSRİ Dövlət Təhlükəsizlik Komitəsinin təxribat qrupları tərəfindən təşkil olunmuşdu. Azərbaycanı informasiya blokadasında saxlamaq, dünya ictimaiyyətinin bu kütləvi qırğın hadisəsindən xəbərdar olmasının qarşısını almaq məqsədilə dövlət televiziyasının enerji bloku partladılmış, dövri mətbuatın nəşrinə qadağa qoyulmuşdu.

“Naxçıvan” Universitetində 2017-ci ilin yekunları və qarşıda duran vəzifələrə dair yığıncaq keçirilib. Yığıncağı giriş sözü ilə universitetin rektoru, professor İsmayıl Əliyev açaraq məruzə ilə çıxış edib.
Bildirilib ki, hesabat ilində “Naxçıvan” Universitetində bütün ixtisaslar üzrə 984 nəfər tələbə təhsil alıb. 2017-2018-ci tədris ilində bu ali təhsil ocağına tələbə qəbulu 70 faiz olub. Belə ki, qəbul layihəsində verilmiş 249 yer üçün 218 tələbə qəbulu olub, 238 nəfəri qeydiyyatdan keçib. Hesabat ilində tədris intizamı daim diqqət mərkəzində saxlanılıb. Vurğulanıb ki, 2017-2018-ci tədris ili üçün 6 nəfər tələbə qəbul olmaqla, universitetin Magistratura şöbəsində, ümumilikdə, 11 nəfər tələbə təhsil alır. Ötən il ali təhsil ocağında Distant Tədris Mərkəzi fəaliyyətə başlayıb, doktoranturaya qəbul aparılıb. Hesabat ilində “Naxçıvan” Universiteti əməkdaşlarının 2 monoqrafiyası, 9 dərs vəsaiti, 16 proqram və metodik vəsaiti,184 məqalə və tezis nəşr edilib ki, bu məqalə və tezislərin 9-u xaricdə dərc olunub. Beynəlxalq əlaqələr sahəsində də qazanılan uğurlara toxunan rektor onu da bildirib ki, “Naxçıvan” Universitetinə xarici tələbələrin cəlbi üçün müəyyən işlər həyata keçirilir. Hazırda bu ali məktəbdə 14 xarici tələbə təhsil alır. Bundan başqa, universitetin Beynəlxalq münasibətlər ixtisasının III kurs tələbəsi Mehrac Abdullayev 2017-2018-ci tədris ili üzrə Türkiyənin Beykent Universiteti ilə bağlanmış müqavilə əsasında ­həmin universitetdə təhsil alır. 2017-ci il universitet ən yaxşı akkreditə olunmuş universitetlər sırasına daxil olmuşdur.
Sonra məruzə ətrafında çıxışlar dinlənilib.

Xalqımızın istiqlal mübarizəsinin önündə gedən böyük vətənpərvər şairimiz Xəlil Rza Ulutürk şeirlərinin birində yazırdı:

20 Yanvar faciəsindən 28 il ötür. Bu faciə ən yeni tariximizə xalqımızın müstəqillik uğrunda mübarizəsinin uca zirvəsi kimi yazılıb. Reallıq budur ki, əgər həmin illərdə biz müstəqil dövlətə və bu müstəqilliyin qarantı olan güclü milli orduya malik olsaydıq, onda nə 20 Yanvar, nə də Xocalı faciələri baş verərdi. Ancaq o tarixi dövrdən fərqli olaraq bu gün qürurla deyə bilirik ki, bizim müstəqil dövlətimiz və güclü ordumuz var. Xalqımızın ümummilli lideri Heydər Əliyev tərəfindən qurulan milli ordumuz bu gün təkcə regionun deyil, dünyanın ən güclü ordularından biridir.

Ötən dövrdə ordu quruculuğuna dövlətimiz tərəfindən göstərilən hərtərəfli qayğı Silahlı Qüvvələrimizin yeni mərhələyə qədəm qoymasına şərait yaratmaqla yanaşı, ölkəmizin regionda nüfuzunun artmasına da öz təsirini göstərib.
Qeyd edək ki, görkəmli dövlət xadimi Heydər Əliyev Azərbaycanda ilk milli ordu hissələrinin yaradılmasına Naxçıvandan başlayıb. Məhz həmin dövrdən etibarən muxtar respublikada ordu quruculuğu bir çox mərhələlərdən keçib və ötən hər il hərbi hissələr daha da təkmilləşdirilib. 2013-cü ilin dekabrında isə muxtar respublikada 5-ci Ordu Korpusunun bazasında Əlahiddə Ümumqoşun Ordusu yaradılıb. Azərbaycan Respublikasının Prezidenti, Silahlı Qüvvələrin Ali Baş Komandanı cənab İlham Əliyev tərəfindən atılan bu tarixi addım Naxçıvanın hərbi gücünün artırılmasında yeni bir mərhələyə çevrilib. Qısa müddət ərzində Əlahiddə Ümumqoşun Ordusu müxtəlif təyinatlı müasir döyüş texnikaları ilə təmin olunub, şəxsi heyətin sayı dəfələrlə artırılıb.

AMEA Naxçıvan Bölməsində 20 Yanvar faciəsinin 28-ci ildönümünə həsr olunan “20 Yanvar – azadlığımızın və milli iradəmizin simvolu” mövzusunda elmi konfrans keçirilib. Əvvəlcə şəhidlərin xatirəsi bir dəqiqəlik sükutla yad edilib.
Tədbirdə bölmənin sədri, akademik İsmayıl Hacıyev çıxış edərək SSRİ-nin ermənipərəst rəhbərliyinin Azərbaycan xalqına qarşı məkrli siyasəti nəticəsində 20 Yanvar faciəsinin törədildiyini bildirib. Qeyd edib ki, həmin gün Azərbaycan xalqının tarixinə tək faciə kimi yox, həm də qəhrəmanlıq zirvəsi kimi yazılıb.
İsmayıl Hacıyev ölkə­mizin həmin ərəfədə informasiya blokadasında olduğunu və ümummilli lider Heydər Əliyevin Azərbaycanın Moskvadakı Daimi Nümayəndəliyində cəsarətli bəyanatı ilə xalqın səsini dünyaya çatdırdığını söyləyib.
Sonra bölmənin Tarix, Etno­qrafiya və Arxeologiya İnstitutunun böyük elmi işçisi, tarix üzrə fəlsəfə doktoru Yaşar Rəhimov “20 Yanvar faciəsi ərəfəsində Azərbaycanda ictimai-siyasi vəziyyət”, həmin institutun şöbə müdiri, AMEA-nın müxbir üzvü Vəli Baxşəliyev “Ümummilli lider Heydər Əliyev və 20 Yanvar faciəsi”, şöbə müdiri, tarix üzrə fəlsəfə doktoru Toğrul Xəlilov “20 Yanvar faciəsi – insanlığa qarşı cinayət” və İncəsənət, Dil və Ədəbiyyat İnstitutunun Ədəbiyyatşünaslıq şöbəsinin böyük elmi işçisi, filologiya üzrə fəlsəfə doktoru Aygün Orucova “20 Yanvar hadisələri bədii ədəbiyyatda” mövzularında elmi məruzələrlə çıxış ediblər.
Tədbirdə, həmçinin Vətən uğrunda həlak olan şəhidlərimizin əziz xatirəsinə həsr olunmuş Bəxtiyar Vahabzadənin “Şəhidlər” poemasından parçalar, Qabilin “Mərsiyə”sindən, Məmməd Arazın “Ayağa dur, Azərbaycan”, Məmməd Aslanın “Ağla, qərənfil, ağla”, eləcə də Asim Yadigarın “Şəhidlik”, Xanəli Kərimlinin “Bütövlük” poemalarından parçalar, Vaqif Məmmədovun “Sədərək harayı” və digər şairlərin bu qəbildən olan şeirləri diqqətə çatdırılıb.
Tədbir iştirakçıları bölmənin Elektron kitabxanasında təşkil edilən “Qanlı 20 Yanvar” başlıqlı sərgi ilə də tanış olublar.

AMEA Naxçıvan Bölməsinin
İnformasiya şöbəsi

Tədbiri Film Fondunun direktoru Mirakif Seyidov açaraq bildirib ki, 20 Yanvar hadisələri Azərbaycan xalqını bütün dünyaya müstəqil yaşamağa qadir, eyni zamanda əyilməz bir xalq kimi tanıdıb. Həmin gün müstəqillik uğrunda mübarizəyə qalxmış Azərbaycan xalqının unudulmaz qəhrəmanlıq səhifəsidir.
Sonra Naxçıvan Şəhər Mədəniyyət və Turizm Şöbəsinin Gənclər Birliyi şöbəsinin sədri Aysəma Babayeva çıxış edərək qeyd edib ki, 20 Yanvar xalqımızın milli qürur günüdür. Azərbaycan xalqı öz qəhrəman övladlarının xatirəsini daim uca tutur və dərin ehtiramla yad edir. Xalqımızın işıqlı sabahı üçün canlarından keçən şəhidlərimizin xatirəsini gələcək nəsillər də böyük ehtiramla xatırlayacaqlar.
Çıxışda faciənin törədilmə səbəblərindən, bu faciəyə hüquqi-siyasi qiymət verilməsində ulu öndərimiz Heydər Əliyevin tarixi xidmətlərindən, Azərbaycan xalqının mübarizliyindən, bu gün qüdrətli ordumuz tərəfindən sərhədlərimizi etibarlı müdafiə edilməsindən bəhs olunub.
Tədbir iştirakçıları sonra uşaq musiqi, incəsənət və bədii sənətkarlıq məktəbləri şagirdlərinin rəsmlərindən ibarət sərgiyə baxıblar. Sərgidə xalqımızın müstəqillik mübarizəsi, 20 Yanvar hadisələri uşaqların gözü ilə təsvir edilib.
Sonda Yanvar hadisələrindən bəhs edən “Bakı – 1990” sənədli filmi nümayiş etdirilib.

Əli RZAYEV