Hər bir sənətkar öz yaradıcılığı ilə özünə əbədi abidə qoyur. İslam Səfərli də öz sanballı yaradıcılığı ilə ətrafının, elinin, obasının, məmləkətinin, bütövlükdə, xalqının yaddaşında silinməz izlər buraxan bir şəxsiyyətdir. Xalq arasında seçilən bu cür insanlar isə həmişə nuraqənşər bir yolun əbədi yolçularıdır. Hər dan yeri ağaranda onların da ömrü təzələnir. Haqqında böyük ehtiramla söz açdığımız şair, dramaturq və publisist İslam Əhməd oğlu Səfərli ötən əsrin yetirdiyi böyük sənət adamlarından biri idi. Azərbaycan təbiətini, torpağını, xalqını ürəkdən sevən və bu yolda vətəndaşlıq, cəfakeş ədiblik xidməti göstərən unudulmaz İslam Səfərlinin istər ədəbi fəaliyyəti, istərsə də örnək ola biləcək insanlığı heç vaxt unudulmayacaq.
Çağdaş Azərbaycan ədəbiyyatının görkəmli nümayəndələrindən sayılan, poetik duyumu ilə seçilən şeir və poemaları, dramatik səhnə əsərləri ilə yaddaşlarda yaşayan İslam Səfərlinin ömür yolu qısa olsa da, yaradıcılıq taleyi uzun məsafəlidir. O, cəmi 52 il yaşadı. 1923-cü il fevralın 12-də Babək rayonunun Şəkərabad kəndində dünyaya göz açıb. Yaradıcılığa çox erkən başlayıb. İlk şeri “Ədəbiyyat qəzeti”ndə (1940) çap olunanda onun cəmi 17 yaşı var idi. Elə təzəcə ədəbi aləmdə yeni söz demişdi ki, müharibə başladı. Onun kövrək qələmini süngü əvəz etdi. Ancaq onun şerə, söz sənətinə marağı azalmadı. “Qızıl əsgər” və “Qırmızı bayraq” adlı cəbhə qəzetlərində oçerk və şeirləri çap olundu.
İslam Səfərli elə cəbhədən də yazıb-yaratmaq eşqilə qayıtdı. O gündən də qayğıları çoxaldı, poeziyada özünü axtarmağa başladı. “Mingəçevir işıqları” adlı ilk şeirlər kitabı ilə bir-birinin ardınca “Darülfünun şeirləri”, “Qığılcım”, “Qağayılar yorulanda”, “Qoşa söyüd”, “Pıçıldaşın, ləpələr”, “Həyatın nəfəsi”, “Çiçək təranəsi”, “Dan ulduzu, bir də mən”, “Ağ şanı, qara şanı”, “Əbədi beşik” kitablarında özünəməxsus poetik əsərlər yaratdı, mahnılarda və könüllərdə yaşadı.

XX əsr Azərbaycan uşaq ədəbiyyatının inkişafında xidmətləri olan söz sənətkarlarından biri də Azərbaycan romantik şerinin banisi Hüseyn Caviddir. Hüseyn Cavid öz yaradıcılığı ilə Azərbaycanda milli uşaq ədəbiyyatının xəzinəsinə töhfələr vermiş, onu janr və mövzu etibarilə zənginləşdirmişdir.
Uşaq ədəbiyyatının tematikası Hüseyn Cavid yaradıcı­lığında nə qədər müxtəlif olsa da, bu sahədə onun əsərləri zahirən nə qədər dağınıq və sistemsiz görünsə də, bu nümunələr öz məzmunu etibarilə vahiddir, tərbiyəvi mənasına görə bir-birini tamamlayır və uşaqlarda gələcək həyat üçün vacib olan daxili birlik, bütövlük və məqsəd aydınlığı yaradır.
Hüseyn Cavidin bu sahədəki bütün səy və cəhdi bir məqsədə – insanların, xüsusən gənc nəslin əxlaqi cəhətdən yüksəlməsinə yönəlmişdir; o, insanı həm özü üçün, həm də cəmiyyət üçün yararlı etməyə, onun zəkasını həyat təcrübəsi ilə, bəşəriyyətin əsrlər boyu yaratmış olduğu ən yaxşı sərvətlərlə zənginləşdirməyə çalışırdı. Uşaq şeirlərində böyük ədibin irəli sürdüyü məsələlər elə həyatidir ki, bir əsr bundan əvvəl yazılmasına baxmayaraq, bu əsərlər müasir günümüzdə uşaqların mənəvi tərbiyəsi işində öz aktuallığını itirməmişdir. Hüseyn Cavidin əsərləri insan şəxsiyyətinin və cəmiyyətin inkişafına mane olan qaragüruhçu qüvvələrə qarşı mübarizə aparmaq üçün oxucunu mədəniyyətə, maarifə, insanpərvərliyə, xeyirxahlığa, dostluğa, əməkdaşlığa çağırır. Bütün bunlar elə məharətlə təqdim edilir ki, hətta kiçikyaşlı uşaqlar belə, çətinlik çəkmədən bu yüksək keyfiyyətləri duya bilirlər.

Xəbər verdiyimiz kimi, böyük Azərbaycan şairi və dramaturqu Hüseyn Cavidin 130 illik yubileyi TÜRKSOY (Türk Kültür və Sanatları Ortaq Yönetimi) səviyyəsində Türkiyə Respublikasının paytaxtı Ankarada və ölkənin ən böyük şəhəri İstanbulda geniş qeyd olunmuşdur. Yubiley tədbirlərində Cəlil Məmmədquluzadə adına Naxçıvan Dövlət Musiqili Dram Teatrının Hüseyn Cavidin “İblis” pyesi əsasında hazırlanmış eyniadlı tamaşası teatrsevərlərə təqdim edilmişdir. Bu günlərdə TÜRKSOY-un baş katibi Düsen Kaseinovun adından Naxçıvan Muxtar Respublikası Mədəniyyət və Turizm Nazirliyinə məktub daxil olmuşdur. Məktubda deyilir:
“Beynəlxalq türk mədəniyyəti təşkilatı olan TÜRKSOY-un baş katibliyi aşağıdakıları bildirməkdən şərəf duyur.
Azərbaycanın görkəmli şairi və dramaturqu Hüseyn Cavidin 130 illik yubileyi münasibətilə 2012-ci ilin 24 dekabr tarixində Ankarada və 26 dekabr tarixində İstanbulda beynəlxalq TÜRKSOY təşkilatı tərəfindən təşkil olunan anma toplantıları və Naxçıvan Dövlət Musiqili Dram Teatrı tərəfindən “İblis” tamaşasının göstərilməsi böyük rəğbətlə qarşılanmışdır.
Bu önəmli təntənələrdə iştirakınızla bağlı Naxçıvan Muxtar Respublikası Mədəniyyət və Turizm Nazirliyinə, Naxçıvan Dövlət Musiqili Dram Teatrının kollektivinə dərin təşəkkürümü bildirirəm”.

Naxçıvan Muxtar Respublikası
Mədəniyyət və Turizm Nazirliyinin mətbuat xidməti

Naxçıvan Muxtar Respublikası Ali Məclisi Sədrinin tanınmış şair, dramaturq və publisist İslam Səfərlinin 90 illik yubileyinin Naxçıvanda geniş şəkildə qeyd olunması ilə əlaqədar 18 yanvar 2013-cü il tarixdə imzaladığı Sərəncamdan irəli gələn vəzifələrin müəyyənləşdirilməsi və müxtəlif səpgili yubiley tədbirlərinin keçirilməsi ilə əlaqədar Naxçıvan Dövlət Universitetində iclas keçirilib.
İclası giriş sözü ilə açan universitetin rektoru, akademik İsa Həbibbəyli İ.Səfərlinin həyat və yaradıcılığından danışıb. Qeyd olunub ki, İslam Səfərli 12 fevral 1923-cü ildə Babək rayonunun Şəkərabad kəndində dünyaya göz açıb. Naxçıvandakı 1 nömrəli məktəbi bitirdikdən sonra könüllü olaraq Böyük Vətən müharibəsində iştirak edib. Müharibə mövzusundakı şeir və poemalarında həmvətənlərimizin alman faşizminə qarşı mübarizədə göstərdiyi şücaəti təsirli poetik lövhələrlə vəsf edib.
İslam Səfərli dramaturq kimi də böyük uğurlar qazanıb. “Göz həkimi”, “Ana ürəyi”, “Yol ayrıcı”, “Xeyir və Şər”, “Dədəgünəş əfsanəsi” və sair əsərləri müxtəlif vaxtlarda tamaşaya qoyulub, tamaşaçı rəğbəti qazanıb. Oçerk, novella, libretto və kinossenari müəllifi kimi də tanınan İslam Səfərli məşhur sənətkarların əsərlərindən uğurlu tərcümələr edib. “Bakı, sabahın xeyir”, “Zərif gülüşlüm”, “Bir könül sındırmışam”, “Qonaq gəl bizə”, “Bakılı qız”, “Nə vaxta qaldı?”, “Ana”, “Ay qaşı, gözü qara qız”, “Ağ xalatlı həkimlər”, “Gəncliyimi gəzirəm”, “Aylı gecələr” və sair bu kimi onlarla şeirlərinə bəstələnmiş mahnıların dillər əzbəri olduğunu vurğulayan İsa Həbib­bəyli şairin Azərbaycanın dahi mütəfəkkiri Nəsirəddin Tusinin nəslindən olduğunu xatırladıb.
Sonra şairin yubileyi ilə bağlı universitetdə keçirilməsi nəzərdə tutulan elmi konfransın təşkili, bu istiqamətdə müxtəlif elmi nəşrlərin, mədəni-kütləvi tədbirlərin həyata keçirilməsi ilə bağlı müzakirələr aparılıb. İslam Səfərli irsinin tədqiqi və təbliği məqsədilə şairin həyat və yaradıcılığı ilə bağlı kütləvi informasiya vasitələrində çıxışların vacibliyi vurğulanıb.

Səadət ƏLİYEVA

Naxçıvan Muxtar Respublikası Dövlət Arxiv İdarəsində 2012-ci ildə görülən işlərin yekunlarına və 2013-cü ildə qarşıda du­ran vəzifələrə dair iclas keçirilmişdir.
İclası Naxçıvan Muxtar Respublikası Dövlət Arxiv İdarəsinin rəisi Fəxrəddin Cəfərov açaraq məruzə ilə çıxış etmişdir. Bildirilmişdir ki, ötən il Arxiv İdarəsi tərəfindən Culfa, Babək, Kəngərli və Şahbuz Rayon Dövlət arxivlərində kompleks yoxlamalar aparılmış, vətəndaşlar tərəfindən daxil olan ərizə və sorğulara verilmiş arxiv arayışları analiz edilmişdir. Bundan başqa, rayon dövlət arxivlərində mühafizə olunan dövlət sənədlərinin bərpa edilməsi, uçot və kargüzarlıq işlərinin, habelə sənədlərin idarə, müəssisə və təşkilatlardan qəbulu işlərinin düzgün aparılması üçün rayon dövlət arxivlərinə metodik köməklik edilmiş, mövcud nöqsan və çatışmazlıqların aradan qaldırılması üçün lazımi tədbirlər görülmüşdür.
İdarə rəisi qeyd etmişdir ki, Naxçıvan Muxtar Respublikası Dövlət Arxiv İdarəsi və Dövlət Arxivinin binasında əsaslı yenidənqurma işləri aparılmış, yeni mühafizə avadanlıqları qurularaq 2012-ci ilin sen­tyabr ayında arxiv işçilərinin ixtiyarına verilmişdir.
Sonra məruzə ətrafında Naxçıvan Muxtar Respublikası Dövlət Arxivinin direktoru Mirəli Seyidov, Şərur Rayon Dövlət Arxivinin müdiri Ədalət İmanov, Babək Rayon Dövlət Arxivinin müdiri Vilayət Qasımov, Kəngərli Rayon Dövlət Arxivinin müdiri İdris İbrahimov və Culfa Rayon Dövlət Arxivinin müdiri Fatma Abbasova çıxış etmişlər.
İclasa Naxçıvan Muxtar Respublikası Dövlət Arxiv İdarəsinin rəisi Fəxrəddin Cəfərov yekun vurmuşdur.

Xəbərlər şöbəsi

Dünən Naxçıvan Muxtar Respublikası Dövlət Televiziya və Radio Verilişləri Komitəsində 2012-ci ilin yekunlarına həsr olunmuş kollegiya iclası keçirilib.
İclası giriş sözü ilə Naxçıvan Muxtar Respublikası Dövlət Televiziya və Radio Verilişləri Komitəsinin sədri Ramiz Qurbanov açaraq bildirib ki, ötən il televiziyanın yaradıcı kollektivi tərəfindən 1906 proqram və veriliş hazırlanıb, 2 televiziya və 4 sənədli film çəkilərək efirə verilib. Radionun yaradıcı kollektivi isə 2580 proqram və veriliş təqdim edib.
“Milli dəyərlər ili” olan 2012-ci ildə kollektiv tərəfindən milli dəyərlərimizin öyrənilməsi və təbliği istiqamətində verilişlər, mütəmadi olaraq xəbər süjetləri hazırlanaraq efirə verilib.
Naxçıvan Muxtar Respublikası Televiziya və Radio Şurasının üzvü Fərasət Əsədullasoy kollegiya iclasında çıxış edərək muxtar respublikada televiziya və radio yayımı haqqında qanunvericiliyə düzgün əməl olunması istiqamətində həyata keçirilən tədbirlərdən danışıb.
Kollegiya iclasında Naxçıvan Muxtar Respublikası Ali Məclisi Aparatının Mətbuat və ictimaiyyətlə əlaqələr şöbəsinin müdiri Sahil Tahirli çıxış edib.

Xəbərlər şöbəsi

XIX yüzilliyin ikinci yarısından etibarən Naxçıvanın mədəni-maarif və ədəbi mühitində də böyük canlanma müşahidə olunurdu. Ötən dövrdə Naxçıvanda nəinki Şərq, hətta rus və Qərbi Avropa ədəbiyyatının təbliği və öyrənilməsi diqqətimizi çəkir. İlk dəfə yuxarıda adları keçən mövzuya müraciət edən görkəmli ədəbiyyatşünas Əziz Mirəhmədov “Yazıçılar, talelər, əsərlər” (Bakı, 1978) kitabında yazır: “... Bu qəzetdə (1884, №29) N.A.Nekrasovla əlaqədar olaraq bir materiala rast gəlirik. Həcmcə çox da böyük olmayan bu material iki hissədən ibarətdir. Şəxsiyyəti hələlik müəyyənləşdirilməmiş Gülməhəmməd bəy Kəngərli redaksiyaya müraciət edərək Nekrasovun “Əxlaqlı adam” əsərinin bir parçasını Azərbaycan dilinə tərcümə etdiyini bildirir və onu qəzetdə buraxmağı xahiş edir”.

Burada söhbət “Kəşkül” qəzetindən gedir. “Kəşkül” qəzeti 1883-cü ildən 1891-ci ilə qədər Tiflisdə nəşr olunmuşdur.
“Əxlaqlı adam” şeri rus şairi N.A.Nekrasova məxsusdur. Əsər üçhissəli olsa da, tərcüməçi redaksiyaya birinci hissəni çap olunmaq üçün göndərib. Yazılanlardan məlum olur ki, tərcüməçi G.Kəngərli əsərin hamısını tərcümə edibmiş.

Dünən Naxçıvan Muxtar Respublikası Gənclər və İdman, Təhsil nazirliklərinin və Naxçıvan Muxtar Respublikası Rəssamlar Birliyinin təşkilatçılığı ilə 20 Yanvar faciəsinin 23-cü ildönümünə həsr olunmuş muxtar respublika ali və orta ixtisas təhsili mü­əssisələrinin tələbələri, ümumtəhsil məktəbləri və məktəbdənkənar tərbiyə müəssisələrinin şagirdləri arasında rəsm müsabiqəsi keçirilib. Naxçıvan Muxtar Respublikası Rəssamlar Birliyinin Bəhruz Kəngərli adına Sərgi Salonunda keçirilən müsabiqəyə 30 rəsm işi təqdim olunub. Müsabiqə başlanmazdan əvvəl Rəssamlar Birliyinin sədri, Azərbaycan Respublikasının əməkdar rəssamı Ülviyyə Həmzəyeva, Təhsil Nazirliyinin Məktəbdənkənar tərbiyə müəssisələri ilə iş üzrə sektor müdiri Rasim Rüstəmov, Gənclər və İdman Nazirliyinin Gənclərlə iş şöbəsinin baş məsləhətçisi Nicat Babayev çıxış edərək tədbirin keçirilməsinin gənc nəslin vətənpərvərlik tərbiyəsinin yüksəldilməsi baxımından əhəmiyyətli olduğunu vurğulayıblar.
Müsabiqənin yekun nəticəsinə görə, Naxçıvan Qızlar Liseyinin 9-cu sinif şagirdi Sevgi Məmmədzadə, Naxçıvan Dövlət Universitetinin tələbəsi Zeynəb Məmmədova və Naxçıvan Özəl Universitetinin tələbəsi Gülarə Əzizəliyevanın rəsm işləri münsiflər heyəti tərəfindən birinci yerlə qiymətləndirilib. Naxçıvan Muxtar Respublikası Estetik Tərbiyə Mərkəzinin studiya üzvü Kənan Abbasov və Naxçıvan Müəllimlər İnstitutunun tələbəsi Ayşən Həsənova ikinci, Ordubad şəhər 1 nömrəli tam orta məktəbin 11-ci sinif şagirdi Aysel Əsgərli ilə Naxçıvan Müəllimlər İnstitutunun tələbəsi Nisə Qasımova isə üçüncü yerlərə layiq görülüblər.
Fəxri yerləri tutan və fərqlənən müsabiqə iştirakçılarına Naxçıvan Muxtar Respublikası Gənclər və İdman Nazirliyinin diplomları, fəxri fərmanları və qiymətli hədiyyələri, Təhsil Nazirliyi ilə Naxçıvan Muxtar Respublikası Rəssamlar Birliyinin diplomları verilib.

Naxçıvan Muxtar Respublikası Gənclər və İdman Nazirliyinin
mətbuat xidməti

Yola saldığımız 2012-ci il muxtar respublikamızda bütün sahələrdə əldə olunan uğurlu nailiyyətlərlə yadda qalmışdır. Ötən il tarixi-mədəni irsin qorunması və təbliği istiqamətində də məqsədyönlü tədbirlər görülmüş, mədəniyyət obyektlərinin inşası, yenidən qurulması və bərpasına xüsusi diqqət yetirilmişdir. Bu sahədə həyata keçirilən tədbirlərin tərkib hissəsi kimi kitabxanaların maddi-texniki bazası möhkəmləndirilmiş, kitabxana xidməti müasir tələblər səviyyəsində qurulmuşdur. Məmməd Səid Ordubadi adına Naxçıvan Muxtar Respublika Kitabxanasının 90 illik yubileyinin qeyd olunması, bu mədəniyyət ocağında elektron kitabxananın istifadəyə verilməsi, açılışı olan kənd mərkəzlərində, məktəblərdə zəngin kitabxanaların yaradılması da 2012-ci ilin mühüm mədəni tədbirləri sırasında yer almış, Naxçıvan Muxtar Respublikası Ali Məclisi Sədrinin himayəsi ilə yeni kitablar nəşr olunmuşdur.

Muxtar respublikada 2012-ci ilin “Milli dəyərlər ili” elan olunması ilə milli mədəniyyətin, milli dəyərlərin qorunması, inkişaf etdirilərək gələcək nəsillərə çatdırılması istiqamətində həyata keçirilən tədbirlərin əhatə dairəsi daha da genişlənmiş, milli dəyərlərimizlə bağlı festivallar, yaradıcılıq müsabiqələri keçirilmiş, “Naxçıvan” jurnalının bir nömrəsi “Milli dəyərlər ili”nə həsr olunmuş, “Naxçıvan mətbəxi”, “Naxçıvan tikmələri” kitabları və “Naxçıvan – Bəşəriyyətin beşiyi” albom-kataloqu işıq üzü görmüşdür.

Naxçıvan Muxtar Respublikası Rəssamlar Birliyinin Bəhruz Kəngərli adına Sərgi Salonunda 20 Yanvar faciəsinə həsr olunmuş sərgi təşkil edilmişdir. Sərgiyə baxışdan əvvəl birliyin sədri, Azərbaycan Respublikasının əməkdar rəssamı Ülviyyə Həmzəyeva çıxış edərək bildirmişdir ki, illər ötsə də, bu faciə heç zaman unudulmur, şəhidlərimizə diqqət və ehtiram əlaməti olaraq muxtar respublikada fəaliyyət göstərən rəssamlar öz yaradıcılıqlarında tez-tez bu mövzuya müraciət edirlər.

Dünən 20 Yanvar faciəsinin 23-cü ildönümü ilə əlaqədar muxtar respublikanın ümumtəhsil məktəblərinin şagirdləri arasında şeir müsabiqəsi keçirilib. Naxçıvan şəhərindəki 7 nömrəli tam orta məktəbdə keçirilən müsabiqəni Naxçıvan Muxtar Respublikası Gənclər və İdman, Təhsil nazirlikləri və muxtar respublika Yazıçılar Birliyi təşkil edib.
Müsabiqədə rayon, şəhər turlarının qalibi olan 10 şagird iştirak edib. Ordubad rayon Aşağı Əylis kənd tam orta məktəbinin 9-cu sinif şagirdi Röya Mirzəli müsabiqənin qalibi olub. Culfa rayon Dizə kənd tam orta məktəbinin 5-ci sinif şagirdi Nərminə Həsənova ilə Babək rayon Qoşadizə kənd tam orta məktəbinin 8-ci sinif şagirdi Güləmbər Nuriyeva ikinci və üçüncü yerlərə layiq görülüblər.
Qeyd edək ki, inşa yazı və şeir müsabiqələrində fəxri yerləri tutan və fərqlənən şagirdlərə Naxçıvan Muxtar Respublikası Gənclər və İdman Nazirliyinin diplomları, fəxri fərmanları və qiymətli hədiyyələri, muxtar respublika Təhsil Nazirliyinin diplomları təqdim olunub.

Naxçıvan Muxtar Respublikası Gənclər və İdman Nazirliyinin
mətbuat xidməti

Naxçıvan Muxtar Respublikası Mədəniyyət və Turizm Nazirliyi Mədəniyyət üzrə Elmi-Metodik Mərkəzin təşkilatçılığı ilə 20 Yanvar faciəsinin 23-cü ildönümü ilə əlaqədar olaraq Naxçıvan Dövlət Film Fondunda “Tariximizin şərəf və qəhrəmanlıq səhifəsi” mövzusunda tədbir keçirilmişdir. Şəhidlərin xatirəsi bir dəqiqəlik sükutla yad edilmişdir. Sonra çıxışlar olmuşdur.
Sonda 20 Yanvar faciəsinə həsr olunan sənədli filmə baxılmışdır.

Xəbərlər şöbəsi

Dünən Naxçıvan Muxtar Respublikası Mədəniyyət və Turizm Nazirliyində 2012-ci ildə görülmüş işlərə həsr olunmuş kollegiya iclası keçirilmişdir. Kollegiya iclasında mədəniyyət və turizm naziri Sarvan İbrahimov geniş məruzə ilə çıxış etmişdir.
Qeyd etmişdir ki, 2012-ci il də mədəniyyət sahəsi üçün uğurlu olmuşdur. Ötən il Culfa Şəhər Uşaq Musiqi Məktəbinin, Kəngərli rayonunun Çalxanqala Kənd Uşaq Musiqi Məktəbinin, Şərur rayonundakı Aşağı Daşarx Kənd Uşaq Musiqi Məktəbinin yeni binaları istifadəyə verilmişdir. 2012-ci ildə Şərur rayonunun Dərəkənd, Danyeri, Kərimbəyli, Qorçulu, Kəngərli rayonunun Çalxanqala, Ordubad rayonunun Behrud, Biləv, Parağa, Yuxarı Əylis, Culfa rayonunun Milax, Ləkətağ, Boyəhməd, Sədərək rayonunun Sədərək kəndlərində istifadəyə verilən kənd mərkəzlərində mədəniyyət müəssisələri üçün də yerlər ayrılmışdır.
Qeyd olunmuşdur ki, 2012-ci il “Milli dəyərlər ili” elan olunmuş, bununla bağlı Naxçıvan Muxtar Respublikası Mədəniyyət və Turizm Nazirliyi tərəfindən müxtəlif tədbirlər həyata keçirilmişdir. Belə ki, “Milli dəyərlərimiz – milli sərvətimiz” folklor və muğam festivalı, ədəbi tədbirlər, yaradıcılıq təşkilatları üzrə müsabiqələr təşkil olunmuşdur. 2012-ci ildə “Naxçıvan mətbəxi” və “Naxçıvan tikmələri” kitabları çap edilmiş, xalq yaradıcılığının ən qədim qaynağını özündə yaşadan “Şərur yallıları”ndan ibarət disk buraxılmışdır.

Naxçıvan Dövlət Tarix Muzeyində 20 Yanvar faciəsinin 23-cü ildönümü ilə bağlı tədbir keçirilmişdir. Tədbiri muzeyin direktoru, Naxçıvan Muxtar Respublikasının əməkdar mədəniyyət işçisi Nizami Rəhimov açmışdır.
Mərasimdə Azərbaycan Vətən Müharibəsi Veteranları və Şəhid Ailələri Naxçıvan Muxtar Respublikası Təşkilatının sədri Mirməcid Seyidov, Cəlil Məmmədquluzadə adına Ədəbiyyat Muzeyinin direktoru Aləmzər İbrahimova, şəhid qardaşı Emin Hacıyev və başqaları çıxış etmişlər. Qeyd olunmuşdur ki, 20 Yanvar hadisələri xalqımızın milli azadlıq arzusuna qarşı törədilmiş ən böyük təcavüz faktı, bir qəhrəmanlıq səhifəsidir. 1990-cı il yanvarın 19-dan 20-nə keçən gecə Azərbaycan xalqına qarşı törədilmiş cinayət, tökülmüş nahaq qanlar, insanların vəhşicəsinə qətlə yetirilməsi Azərbaycan xalqının müstəqillik uğrunda mübarizə əzmini qıra bilmədi. SSRİ rəhbərliyinin Azərbaycan xalqına qarşı törətdiyi bu qanlı cinayət xalq kütlələrini sıx birləşdirdi, onların mübarizliyini daha da artırdı. Həmin gecə Azərbaycan xalqı özünün yenilməzliyini, qəhrəmanlığını, Vətənə, torpağa sədaqətini, azadlıq uğrunda mübarizə əzmini bütün dünyaya bəyan etdi. Məhz bu əzmin, iradənin sayəsində xalqımız müqəddəs arzusuna çatdı, milli azadlığına qovuşdu. Azərbaycan müstəqil dövlət kimi dünya birliyinə daxil oldu.
Sonda şagirdlər 20 Yanvar faciəsi ilə bağlı şeirlər səsləndirmiş, muzeydə təşkil edilmiş sərgiyə baxış olmuşdur.

Xəbərlər şöbəsi

20 Yanvar faciəsinin 23-cü ildönümü ilə əlaqədar Şərur Rayon Mədəniyyət və Turizm Şöbəsində də tədbir keçirilmişdir. Tədbir iştirakçıları əvvəlcə şöbənin foyesində təşkil olunmuş sərgiyə baxmışlar.
Mərasimdə çıxış edənlər 1990-cı il yanvarın 20-də sovet ordusunun Bakıda törətdiyi faciənin təkcə Azərbaycan xalqına deyil, bütün bəşəriyyətə qarşı törədilmiş cinayət olduğunu, Vətənimizin azadlığı uğrunda canından keçmiş şəhidlərimizin heç bir zaman unudulmayacağını, onların əbədiyaşar xatirələrinin hər zaman uca tutulacağını vurğulamışlar.
Qeyd olunmuşdur ki, xalqımızın qəhrəmanlıq salnaməsi olan 20 Yanvar faciəsinə ilk etiraz ümummilli lider Heydər Əliyev tərəfindən bildirilmişdir. Ulu öndər yanvarın 21-də Azərbaycanın Moskvadakı Daimi Nümayəndəliyinə gələrək qəti şəkildə bu faciəni pisləmiş, ölkəmizin haqq səsini dünyaya çatdırmışdır. Məhz dahi rəhbərin qətiyyəti və müdrikliyi sayəsində 20 Yanvar faciəsinə siyasi-hüquqi qiymət verilmişdir.
Sonra Rza Təhmasib adına Şərur Xalq Teatrı aktyorlarının ifasında ədəbi-bədii kompozisiya nümayiş etdirilmişdir.

Həyatımız rənglərdən ibarətdir. Ömrümüzün heç bir saatı, dəqiqəsi rənglərsiz ötüşə bilməz. Rənglər bizim çox da önəm vermədiyimiz, əslində isə həyatımızın bütün gedişatına birbaşa təsir edən əvəzsiz gücə malikdir. Bir düşünün, gözlərimizi qapayırıq və heç bir rəngi görmədiyimizi düşünürük. Lakin bizə “qara”nlıqdır. Yaxud hər hansı bir mavi rəngli otağa daxil olarkən bizə elə gəlir ki, sanki soyuqdur və ya əksinə, otaq sarımtıl bir rənglə boyanıbsa, isti olduğunu düşünürük. Belə misalların sayını artırmaq olar. Bəli, gözümüzü qapadıqda və ya açdıqda mütləq bir rənglə qarşılaşırıq. Onlar bəzən mənfi, bəzən isə müsbət aura yaradırlar. Bəs rənglərin sirri nədədir? Hansı rənglər hansı qüvvəyə malikdir? Hisslərlə rənglər arasında hansı bağlılıqlar var? Bu yazımızda ağ və qara rənglərdən bəhs edəcəyik.

Naxçıvan Muxtar Respublikası Yazıçılar Birliyində 20 Yanvar hadisələrinin 23-cü ildönümü ilə əlaqədar “Şəhidlik zirvəsi” adlı ədəbi tədbir keçirilib. Tədbiri giriş sözü ilə açan Naxçıvan Muxtar Respublikası Yazıçılar Birliyinin sədri Asim Yadigar 20 Yanvar hadisələrinin xalqımızın müstəqillik uğrunda gərgin mübarizəsi tarixinin ən şərəfli səhifələrindən biri olduğunu qeyd edib. Vurğulanıb ki, 20 Yanvar hadisələrinə ilk dəfə hüquqi-siyasi qiymətin verilməsi Azərbaycan xalqının ümummilli lideri Heydər Əliyevin adı ilə bağlıdır. Məhz ulu öndər Heydər Əliyev xalqın müstəqillik arzusunun qəddar və qanlı üsullarla qarşısının alınmasına çalışılmasını ilk dəfə kəskin tənqid etmiş və dünya ictimaiyyətinin diqqətini bu məsələyə yönəltmişdir.
Sonra Yazıçılar Birliyinin üzvlərindən Səhlab Məmmədov, Elxan Yurdoğlu, Firudin Süleymanoğlu, Dilsuz Dünyamalıyev və başqaları 20 Yanvar şəhidlərinə həsr etdikləri şeirləri oxuyublar.

Elnur KƏLBİZADƏ

Azərbaycan xalqının tarixinə qanlı faciə kimi daxil olmuş 1990-cı il 20 Yanvar hadisələrində şəhid olanların xatirəsi ehtiramla yad edilir, 23 il öncə baş vermiş qanlı faciə bir daha xatırlanır.
Babək Rayon Uşaq Kitabxanasında tariximizin qan yaddaşına yazılmış o faciəli, lakin şərəfli tarixi günlə bağlı rayon mədəniyyət müəssisələri kollektivlərinin iştirakı ilə tədbir keçirilmişdir. Tədbiri giriş sözü ilə Uşaq Kitabxanasının müdiri Təranə Əliyeva açmışdır. “20 Yanvar hər bir azərbaycanlının yaddaşına həkk olunan qəhrəmanlıq tarixidir”, – deyən kitabxana müdiri bu tarixin heç vaxt unudulmayacağını, bundan sonrakı nəsillərin də yaddaşında yaşayacağını bildirmişdir.
Sonra Mərkəzləşdirilmiş Kitabxana Sisteminin direktor müavini İnayət Fətullayev, kitabxana işçisi Çinarə Feyzullayeva çıxış etmişlər.
Tədbirin sonunda 20 Yanvar faciəsinə həsr olunmuş “Şəhidlər unudulmur” adlı ədəbi-bədii kompozisiya nümayiş etdirilmişdir.

Xəbərlər şöbəsi

Dünən Naxçıvan Muxtar Respublikası Yazıçılar Birliyinin və Naxçıvan Dövlət Universitetinin təşkilatçılığı ilə “Naxçıvanda ədəbi proses – 2012: əsas yekunlar və vəzifələr” mövzusunda konfrans keçirilib. Konfransda Naxçıvanda yaşayıb-yaradan şair və yazıçılar, ədəbi tənqidçilər, ədəbiyyatşünas alimlər, mətbuat nümayəndələri iştirak ediblər.
Konfransı giriş sözü ilə açan Naxçıvan Muxtar Respublikası Yazıçılar Birliyinin sədri Asim Yadigar 2012-ci il ərzində Naxçıvan Muxtar Respublikası Yazıçılar Birliyinin fəaliyyəti, görülən işlər, qarşıda duran vəzifələr haqqında məruzə edib. Bildirilib ki, 2012-ci il oktyabr ayının 19-da Naxçıvan Muxtar Respublikası Yazıçılar Birliyinin konfransının yüksək səviyyədə keçirilməsi Naxçıvanda ədəbiyyatın inkişafına göstərilən qayğının bariz nümunəsidir. Bu diqqət və qayğı isə söz adamlarının qarşısında çox vacib vəzifələr qoyur. 2012-ci ilin yekunlarına toxunan birliyin sədri qeyd edib ki, ötən il Naxçıvanda yaşayıb-yaradan şair və yazıçıların 50-dən artıq kitabı işıq üzü görüb. Əvvəlki illərlə müqayisədə çap olunan nəsr əsərlərinin sayı artıb. Belə ki, ötən il Naxçıvan Muxtar Respublikası Yazıçılar Birliyi üzvlərinin 10-dan artıq nəsr əsəri çap edilib. Nəsr əsərlərinin müəlliflərinin sırasında gənc yazarların da olması gələcəyə ümidləri artırır. Nəsr əsərləri ilə yanaşı, ötən il uşaq ədəbiyyatının və dramaturgiyanın inkişafı istiqamətində də müəyyən addımlar atılıb. Lakin bu sahədə qələm sahibləri hələ də ciddi qələm təcrübələri ortaya qoya bilmirlər. Publisistika sahəsində nəzərəçarpacaq irəliləyişlərin olduğunun vurğulandığı konfransda bədii tərcümə sahəsində görülmüş və görüləcək işlərdən də danışılıb.

Tariximizin qəhrəmanlıq salnaməsi sayılan 20 Yanvar faciəsinin 23-cü ildönümü ilə əlaqədar M.S.Ordubadi adına Naxçıvan Muxtar Respublika Kitabxanasında sərgi təşkil olunmuşdur. Sərgidə 20 kitab, çoxlu qəzet və jurnallar, fotolar nümayiş etdirilir. Sərgidə Rafiq Səməndərin “Şəhidlər”, Əşrəf İbrahimovun “Şahid şəhidlər haqqında”, Qulu Kəngərlinin “Qara Yanvar şəhidləri”, İsmayıl Vəliyevin “Qara gündəlik”, Anarın “Şəhidlər dağı”, Famil Süleymanovun “Qana boyanmış Quran”, Vaqif Məmmədovun “Qeyrət qalası”, Abdulla Qurbaninin “Şəhidlər danışır” adlı kitabları və sair materiallar toplanmışdır.
Sərgini təşkil etməkdə məqsəd gəncləri, oxucuları xalqımızın başına gətirilən müsibətlərlə bir daha tanış etmək, xalqımızın müstəqillik uğrunda apardığı mübarizənin tarixini onlara çatdırmaqdan ibarətdir. Sərginin nümayişi yanvar ayının sonuna qədər davam edəcək.

Dilrubə NOVRUZOVA

Böyük Azərbaycan şairi və dramaturqu Hüseyn Cavidin 130 illik yubileyi TÜRKSOY (Türk Kültür və Sanatları Ortaq Yönetimi) səviyyəsində Türkiyə Respublikasının paytaxtı Ankara və ölkənin ən böyük şəhəri İstanbulda geniş qeyd olunmuşdur. 

Dekabrın 24-də mənzil qərargahı Ankara şəhərində yerləşən TÜRKSOY-un konfrans salonunda Hüseyn Cavidin 130 illik yubileyi ilə bağlı tədbir keçirilmişdir. Tədbirdə Azərbaycan Respublikasının Türkiyədəki səfiri Faiq Bağırov, TÜRKSOY-un baş katibinin müavini Fırat Furtaş, Naxçıvan Muxtar Respublikasının mədəniyyət və turizm nazirinin müavini Məhəmməd Həsənov, Türkiyə Respublikasının Mədəniyyət və Turizm Nazirliyinin Araşdırma və təhsil şöbəsinin müdiri Əhməd Arı, tədqiqatçı-alim Azər Turan, Qazi Universitetinin professoru Əhməd Bican Ercilasun, Qırğızıstan Yazıçılar Birliyinin sədri Omar Sultanov, Avroasiya Yazıçılar Birliyinin sədri Yaqub Öməroğlu və başqaları görkəmli Azərbaycan şairinin sənət dünyasından danışmışlar.
Sonra Hüseyn Cavidin həyat və yaradıcılığı ilə bağlı sənədli film nümayiş olunmuşdur.
Tədbirin bədii hissəsində Azərbaycan Respublikasının xalq artisti Həsən Ağasoy, Əməkdar artist Eyyub Yaqubov, Vaqif Əsədov və Ülviyyə Novruzovanın ifalarında romantik şairin şeirləri və sözlərinə bəstələnmiş nəğmələr səsləndirilmişdir.
Tədbirin sonunda TÜRKSOY rəhbərliyinə Naxçıvan Muxtar Respublikası və Hüseyn Cavidlə bağlı nəşr edilmiş kitablar təqdim olunmuşdur.
Həmin gün axşam saatlarında Ankaranın Keçiörən Bələdiyyəsinin teatr salonunda Cəlil Məmmədquluzadə adına Naxçıvan Dövlət Musiqili Dram Teatrının aktyorlarının ifasında ədibin eyniadlı pyesi əsasında hazırlanmış “İblis” tamaşası teatrsevərlərə təqdim edilmişdir.
Dekabrın 26-da isə İstanbul Universitetinin Konqres və Mədəniyyət Mərkəzində böyük ədibin 130 illiyi münasibətilə keçirilən tədbirdə universitetin rektoru, professor-doktor Yunus Söyletin, universitetin əməkdaşlarından professor-doktor Mustafa Özkanın, Nuri Ücenin, Naxçıvan Muxtar Respublikasının mədəniyyət və turizm nazirinin müavini Məhəmməd Həsənovun, Azərbaycan Respublikasının İstanbuldakı Baş konsulu Həsən Zeynalovun, TÜRKSOY-un baş katibi Düsen Kaseinovun və başqalarının çıxışları olmuşdur.
Sonra Naxçıvan teatrının ak­tyorları “İblis” tamaşasını teatrsevərlərə təqdim etmişlər.

Əli RZAYEV

Yanvarın 6-da Daxili Qoşunların Naxçıvan Alayında tanınmış müğənni, Azərbaycan Respublikasının əməkdar artisti Azərin Tağıyevanın konserti olub.
Tədbirdə Naxçıvan Alayının komandirinin müavini, mayor Şahin Bəylərov çıxış edərək ordumuzun artan qüdrətindən, xalq-ordu birliyindən və bu birliyin sarsılmazlığından danışıb.
Sonra söz alayın sözlü-nəğməli qonağına verilib. Azərinin ifasında səslənən vətənpərvərlik mövzusunda mahnılar əsgərlərdə xoş əhval-ruhiyyə yaradıb.
Konsertin sonunda Azərin Tağıyeva Daxili Qoşunların Naxçıvan Alayının fəxri fərmanı ilə təltif edilib. Qonaq göstərilən diqqətə görə minnətdarlığını bildirib.

Dilrubə NOVRUZOVA

Dekabrın 30-da Naxçıvan şəhərindəki “Təbriz” otelində Naxçıvan Muxtar Respublikası Gənclər və İdman Nazirliyi və Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənclər Birliyinin təşkilatçılığı ilə 31 Dekabr – Dünya Azərbaycanlılarının Həmrəylik Gününə həsr olunmuş tədbir keçirilmişdir.
Tədbirdə çıxış edən gənclər və idman naziri Azad Cabbarov əlamətdar gün münasibətilə gənc­ləri təbrik etmiş, Həmrəylik Gününün əhəmiyyətindən danışmışdır. Bildirilmişdir ki, dünya azərbaycanlılarının ən əziz bayramlarından biri olan Dünya Azərbaycanlılarının Həmrəylik Günü xalqımızın ümummilli lideri Heydər Əliyevin təşəbbüsü ilə 1991-ci ildə Naxçıvan parlamentinin sessiyasında təsis olunmuşdur. Dünya azərbaycanlılarının birliyinin əldə olunmasının, ölkədə və dünyada Azərbaycançılıq anlayışının milli təfəkkür idealına çevrilməsinin ulu öndər Heydər Əliyevin adı ilə bağlı olduğunu bildirən nazir bu tarixi missiyanın ölkə Prezidenti cənab İlham Əliyev tərəfindən uğurla həyata keçirildiyini vurğulamışdır.
Gənc zabit Azər Məmmədov, Naxçıvan Dövlət Universitetinin tələbəsi Aytən İsmayılova, partiya fəallarından Tural Rzayev çıxış edərək ölkəmizdə gənc nəslə göstərilən dövlət qayğısından danışmışlar.
Sonra Naxçıvan Musiqi Kolleci kollektivinin ifasında musiqi nömrələri səsləndirilmişdir.
Sonda ən yaxşı gənc idmançılar, məşqçilər, müəllimlər, həkimlər, alimlər, zabitlər, əsgərlər, kursantlar, aktyorlar, müğənnilər, şairlər, jurnalistlər, dövlət qulluqçuları, Yeni Azərbaycan Partiyasının gənc fəalları, gənc rəssamlar və sosial şəbəkə fəalları Naxçıvan Muxtar Respublikası Gənclər və İdman Nazirliyi və Yeni Azərbaycan Partiyası Naxçıvan Muxtar Respublika Təşkilatının Heydər Əliyev adına Gənc­lər Birliyinin qiymətli hədiyyələri ilə mükafatlandırılmışlar.

Naxçıvan Muxtar Respublikası Gənclər və İdman Nazirliyinin
mətbuat xidməti

“Duzdağ” otelində feysbuk sosial şəbəkəsində fəaliyyət göstərən “Naxçıvan gəncləri” qrupu üzvlərinin görüşü keçirilib.
Tədbirin aparıcısı keçirilən görüşün mahiyyəti barəsində qrup üzvlərinə ətraflı məlumat verib, internetin bugünkü həyatımızdakı rolu və imkanlarından bəhs edən videoçarx nümayiş etdirilib.
Tədbirdə çıxış edənlər doğma Naxçıvanımızın həqiqət carçısına çevrilmiş qrupun yaradılmasının əhəmiyyətindən, ötən dövr ərzindəki fəaliyyətindən və gələcək planlarından danışıblar.
Sonra sosial şəbəkələrdə xüsusi fəallıq göstərən gənclər mükafatlandırılıblar.
Naxçıvan Musiqi Kollecinin “Dilrüba” muğam ansamblının, Naxçıvan Özəl Universitetinin tələbələrindən ibarət “Dəniz” vokal ansamblının, Naxçıvan Dövlət Universitetinin “Şən və hazırcavablar klubu”nun çıxışları tədbir iştirakçılarında xoş ovqat yaradıb.

Xəbərlər şöbəsi

Bir neçə gündən sonra 2013-cü ili qarşılayacağıq. Bu müna­sibətlə şəhərimizdəki mədəniyyət müəssisələri bir sıra maraqlı və şən tədbirlər keçirməyi nəzərdə tutur.
M.T.Sidqi adına Naxçıvan Dövlət Kukla Teatrında, Naxçıvan Dövlət Uşaq Teatrında, Naxçıvan Dövlət Filarmoniyasında Yeni il şənlikləri hazırlanmışdır.
2013-cü ili şən qarşılamaq üçün Naxçıvan Dövlət Kukla Teatrı Yeni il şənliklərinə dekabrın 30-dan başlayacaq. Yanvarın 5-dək davam edəcək Yeni il şənliklərində teatrın kollektivi “Uf-uf xanım” və “Meşə macəraları” tamaşalarını təqdim edəcəkdir. Tamaşalardan əvvəl şən mahnı və rəqslər ifa olunacaq, Şaxta baba, Qar qız və kloun şənliklərə rəng qatacaq. Tamaşalar saat 1100, 1300 və 1500-da başlayacaq.
Naxçıvan Dövlət Uşaq Teatrı da hər il olduğu kimi, bu il də balacalar üçün maraqlı səhnəciklər hazırlamışdır. Uşaq teatrının tamaşaları 1-6 yanvar tarixlərində saat 1200 və 1400-da nümayiş olunacaq. Naxçıvan Muxtar Respublikasının əməkdar artisti Vüsal Rzayevin müəllifi və rejissoru olduğu “Sehrli saat” kompozisiyası uşaqları nağıllar aləminə aparacaq. Folklorumuzdan bəhrələnərək hazırlanmış kompozisiya uşaqlara şən əhval-ruhiyyə bəxş edəcəkdir. Teatrın tədbirləri bədii və şənlik hissələrindən ibarət olacaqdır. Yeni il şənliklərində uşaqlar üçün əyləncəli oyunlar, mahnı və rəqslər də hazırlanmışdır.
Naxçıvan Dövlət Filarmoniyası da uşaqlar üçün əyləncəli şənlik proqramı təqdim edəcəkdir.

Əli RZAYEV

Dekabrın 27-də Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondu tərəfindən 31 Dekabr – Dünya Azərbaycanlılarının Həmrəylik Günü və Yeni il münasibətilə tədbir təşkil olunmuşdur. “Xəmsə” şadlıq sarayında keçirilən mərasimdə fondun təşkil etdiyi fərdi jurnalist yazıları müsabiqəsinin qalibləri mükafatlandırılmışlar.
Qaliblər sırasında “Şərq qapısı” qəzetinin şöbə müdiri Sara Əzim­ovanın da adı vardır. Jurnalist “Gender, ailə və demoqrafiya məsələlərinin işıqlandırılması” istiqaməti üzrə “Ailə şəxsiyyəti və cəmiyyəti formalaşdıran mühüm sosial institutdur” adlı məqaləsi ilə qalib olmuş və mükafatlandırılmışdır.

Xəbərlər şöbəsi

Dünən Məmməd Səid Ordubadi adına Naxçıvan Muxtar Respublika Kitabxanasında Naxçıvan Dövlət Universitetinin Beynəlxalq münasibətlər kafedrasının dosenti Elbrus İsayevin “Böyük İpək Yolu və Naxçıvan” adlı kitabının təqdimat mərasimi keçirilmişdir.
Tədbiri giriş sözü ilə kitabxananın direktoru, tarix üzrə fəlsəfə doktoru Aytəkin Qəhrəmanova açaraq bildirmişdir ki, “Böyük İpək Yolu və Naxçıvan” kitabxananın yeni yaradılmış elektron kataloquna elektron versiyada təqdim edilən ilk monoqrafiyadır. Nəşrin elmi əhəmiyyətinə də toxunan kitabxananın direktoru tədqiqat əsərinin beynəlxalq iqtisadi əlaqələrdə Naxçıvanın mövqeyinin ortaya qoyulması və Naxçıvanşünaslıq elmi baxımından böyük qiymətə malik olduğunu vurğulamışdır.
Kitabın müəllifi çıxış edərək monoqrafiyanın hazırlanmasından, kitabda araşdırılmaq üçün qarşıya qoyulmuş mövzunun əhəmiyyət və aktuallığından bəhs etmişdir. Qeyd edilmişdir ki, Naxçıvan mədəniyyətinin formalaşmasında Böyük İpək Yolunun mühüm rolu olmuşdur. Müəllif kitab haqqında ətraflı məlumat verərək bildirmişdir ki, monoqrafiyanın giriş və nəticə hissələri ingilis dilinə elmi tərcümə olunaraq kitaba daxil edilmişdir. Həmçinin kitabla birlikdə beynəlxalq ticarət yolları və Naxçıvanın Böyük İpək Yolu üçün əhəmiyyətindən bəhs edən elmi-sənədli film də təqdim edilir.
Kitabxananın böyük kitabxanaçısı Vəsilə Cəfərova “Azərbaycan ərazisindən keçən beynəlxalq karvan yolları”, kitabxanaçı Heyran Əsgərova “Naxçıvanda Böyük İpək Yolu abidələri”, elmi katib Günay Kəngərli “Naxçıvan – Böyük İpək Yolu üzərində ticarət, sənətkarlıq və mədəniyyət mərkəzi” mövzularında məruzə etmişlər.
Sonra “Böyük İpək Yolu və Naxçıvan” adlı elmi-sənədli filmə baxış olmuşdur.
Sonda kitabın elektron variantı kitabxanaya təqdim olunmuş, müəllif monoqrafiyanı kitabxananın fonduna və əməkdaşlarına hədiyyə etmişdir.
Qeyd edək ki, kitabın elektron versiyası yaxın günlərdə kitabxananın elektron kitablar kataloquna daxil olunacaqdır.

Əzəmət HƏSƏNOV

XIX əsrin sonu, XX əsrin əvvəllərində Avropada yeni elm və təhsil ocaqları yaranmağa başladı. Azərbaycanda isə elmin və təhsilin ətalətdə olması bir sıra maarifçilər dəstəsinin (M.F.Axundzadə, H.Zərdabi, S.Ə.Şirvani, Ə.Hüseynzadə və başqalarının) böyük narahatlığına səbəb olmuşdu. “İlahi, bizim millətin mərifət baharı nə vaxt gələcək? Elm çiçəklərimiz nə zaman açılacaq? Həmişə belə gözübağlı, dililalmı qalacağız? Bu nə halətdir ki, düşmüşük? Bu nə yükdür ki, biz çəkiriz? Daha nə zamana qədər bu cəhalət boyunduruğundan qurtara bilməyəcəyiz? Axı biz də insanıq”, – deyə fəryad qoparanlardan biri də maarifçi-pedaqoq Məhəmmədağa Şahtaxtlı idi. 

Məhəmmədağa Şahtaxtlı təhsil və tərbiyə işinin cəmiyyətin həyatında, onun inkişafında mühüm əhəmiyyət daşıdığını deyirdi. Belə bir əhəmiyyətli işdə ömrünün sonuna qədər yorulmadan çalışan və mübarizə aparan Məhəmmədağa Şahtaxtlı rus, alman, ingilis, ərəb, türk və fars dillərində ədəbi, elmi, pedaqoji əsərlər yazmış, ömrünün 50 ildən çoxunu mətbuat, məktəb, maarif və əlifba məsələlərinə həsr etmişdir. O, istər təhsilin və elmin təşkilində, istərsə də elmi-pedaqoji fəaliyyətdə və zəngin elmi irsin yaradılmasında, xüsusilə təhsilin, pedaqoji prosesin, tərbiyənin elmi-metodik əsaslarla qurulmasında əhəmiyyətli işlər görmüşdür. M.Şahtaxtlının təhsillə bağlı ideyalarının əsasını təhsilin məzmununun elmlər kompleksini əks etdirməsi, verilən biliyin həyati faydalılığının olması, təhsilin dünya təcrübəsinə inteqrasiyası, öyrədənlərin milli və beynəlxalq səviyyədə hazırlığı tələbləri təşkil edir. İrəli sürülən bu tələblərə görə görkəmli pedaqoqun pedaqoji fikirlərini müasir günümüz üçün aktual hesab edə bilərik. Bu mənada Məhəmmədağa Şahtaxtlının fəaliyyəti pedaqoq, psixoloq, ədəbiyyatşünas və filosofların tədqiqat obyekti olmuşdur.

Hər il Türkiyə Cümhuriyyətinin Konya şəhərində XIII əsr türk ədəbiyyatının görkəmli nümayəndəsi, böyük mütəfəkkir-şair, filosof Mövlana Cəlaləddin Ruminin anım günü mərasimləri keçirilir. Bu il dekabr ayının 7-dən başlayaraq on gün davam edən növbəti, 739-cu Mövlana anım mərasimləri və mədəniyyət günləri tədbirlərində AMEA Naxçıvan Bölməsi İncəsənət, Dil və Ədəbiyyat İnstitutunun direktoru, AMEA-nın müxbir üzvü, professor Əbülfəz Quliyev də iştirak edib.
Mədəniyyət günləri çərçivəsində klassik musiqi, xalq rəqsləri gecəsi, teatr tamaşaları ilə yanaşı, bir neçə mövzuda elmi konfrans və simpoziumlar da təşkil edilib. Bu konfranslardan ”Vəfatının 700-cü ilində Sultan Vələd”, “Mövlananın dünyada yansımaları”, ”Mövlana Cəlaləddin Ruminin təlimində təbiət və çevrə”, “Mövlana və Osmanlının estetik dünyası” mövzularında keçirilən elmi məclislər yaddaqalan olub.
Həmyerlimiz “Mövlananın dünyada yansımaları” konfransı çərçivəsində “Mövlana irsinin Azərbaycanda öyrənilməsi və nəşri” mövzusunda məruzə edib. Məruzəçi çıxışında Azərbaycan Respublikasının Naxçıvan Muxtar Respublikasında ortaq mədəni-mənəvi dəyərlərimizin qorunması və inkişafına böyük qayğı göstərildiyindən, bu çərçivədə muxtar respublika rəhbərinin bilavasitə təşəbbü­sü və dəstəyi ilə Mövlananın “Məs­nəvi”sinin tərcümə edilərək Naxçıvanda işıq üzü görməsindən və “Məsnəvi”nin tərcümə məsələlərindən danışıb. Alimin məruzəsi maraqla qarşılanıb.

Xəbərlər şöbəsi

Dünən M.S.Ordubadi adına Naxçıvan Muxtar Respublika Kitabxanasında “İnformasiya cəmiyyətinin formalaşmasında elektron kitabxananın rolu” mövzusunda konfrans keçirilib. İctimaiyyətin nümayəndələrinin, tələbələrin və şagirdlərin iştirak etdiyi konfransı giriş sözü ilə kitabxananın direktoru, tarix üzrə fəlsəfə doktoru Aytəkin Qəhrəmanova açaraq mövzu ilə bağlı məruzə edib. 
Qeyd olunub ki, kitab və kitabxana cəmiyyətin vacib atributudur. Kitabxanaların ən başlıca vəzifəsi kitabxana fondlarını oxucuların tələb və maraqlarına uyğun formalaşdırmaqdan ibarətdir. Bir çox kitabxanalar ənənəvi kitablarla yanaşı, fondlarını elektron kitablarla da zənginləşdirir. Kitabxanalar informasiya cəmiyyətinin formalaşmasında xüsusi rol oynayır. Kitabxanaçı istifadəçi ilə informasiya arasında vasitəçidir. Müasir kitabxanaçı informasiya resurslarının axtarılması və seçilməsi məsələsinin həllinə kömək edir.

2012-ci il 14-18 dekabr tarixlərində Azərbaycan Bəstəkarlar İttifaqının IX qurultayı keçirilib. Ukrayna, Türkiyə, Rusiya, Özbəkistan, Gürcüstan və digər ölkə­lərdən gələn nümayəndələr də qurultayın iştirakçısı olublar. Qurultayda beş gün ərzində keçirilən konsertlərdə müxtəlif janrlarda bəstələnmiş yeni əsərlər səsləndirilib.
Dekabrın 15-də keçirilən Kamera Orkestrinin konsertində Naxçıvan Dövlət Universitetinin bəstəkarlıq ixtisası üzrə III kurs tələbəsi, Gənc Pianoçuların Respublika Müsabiqəsinin qalibi Ülvi Əhmədov fortepiano üçün “Mövzu ilə variasiyalar” əsəri ilə çıxış edib. Onun ifası musiqiçilər tərəfindən yüksək qiymətləndirilib.
Dekabrın 16-da Azərbaycan Dövlət Xalq Çalğı Alətləri Orkestrinin konsertində həmyerlilərimiz Kamal Əhmədovun və Yaşar Xəlilovun əsərləri ifa olunub.
Qurultayın sonuncu günü müzakirə keçirilib. Naxçıvanlı bəstəkarların əsərləri müxtəlif cəhətlərdən təhlil edilib, yüksək dəyərləndirilib.

Günay MƏMMƏDOVA
Azərbaycan Bəstəkarlar İttifaqının üzvü, musiqişünas

M.T. Sidqi adına Naxçıvan Dövlət Kukla Teatrının bədii rəhbər-direktoru, Azərbaycan Respublikasının xalq artisti Yasəmən Ramazanovadan aldığımız məlumata görə, kollektiv Dünya Azərbaycanlılarının Həmrəyliyi Günü və Yeni il bayramı ilə əlaqədar olaraq, Naxçıvan şəhərindəki uşaq bağçalarında tamaşalar göstərilməsinə başlayıb.
Xatırladaq ki, teatrın kollektivi Yeni il bayramı ilə əlaqədar olaraq, dekabrın 30-dan yanvar ayının ilk həftəsinin sonuna qədər balaca teatrsevərlər qarşısında gündə üç seans olmaqla tamaşalar göstərəcək.

Xəbərlər şöbəsi

Xalqımızın malik olduğu qədim sənət növləri içərisində xəttatlığın özünəməxsus yeri vardır. Sənət kimi formalaşması X-XII əsrlərə təsadüf edən xəttatlıq Şərq aləmində, o cümlədən ölkəmizdə orta əsrlərdə meydana gəlmiş, əsrlər boyu müxtəlif mərhələlər keçmişdir. İslam aləmi tərəfindən mənimsənilib istifadə edilən, ərəb hərflərinin müxtəlif formalarda yazılması ilə meydana gələn bu yazı sənəti incəsənətin bir növü sayılmasa da, ayrıca sənət qolu kimi daim inkişafda olmuşdur. İslam dünyasının mədəni dəyərlərini özündə əks etdirən xəttatlıq hazırda İslamın simvolu kimi qəbul edilir. Xəttatlığın tarixi hərflərin dekorativ şəkildə təsvir olunması ilə başlanmışdır. Allahın kəlamına duyulan hörmət və “Quran”ı ən gözəl şəkildə yazmaq cəhdləri xəttatlıq sənətini meydana çıxarmış, buna bağlı olaraq təzhib, əbru və cild sənətləri yaranmış, hətta kağızçılıq, mürəkkəbçilik belə, bir sənət qolu halına gəlmişdir.

Xəttatlıq zaman keçdikcə İslamı qəbul etmiş xalqların mədəniyyət və incəsənətində vacib sahələrdən birinə çevrilmişdir. Dekorativ-ornamental sənətlə qovuşan bu bədii yazı mədəniyyəti kitabları, saray binalarını, məscidləri, saxsıdan, metaldan, ağacdan və parçadan hazırlanan tətbiqi sənət nümunələrini bəzəyirdi.
Tədricən xəttatlıq müsəlman dünyasında müstəqil və əsas sənət növlərindən birinə çevrilməklə savadlılıq dərəcəsinin göstəricisi kimi məşhurlaşmışdır. Dövlət xadimlərinin, ədib, şair və alimlərin, rəssamların həm də yaxşı xəttat olduqlarına dair çoxlu misallar gətirmək mümkündür. Xəttatlıqdan əvvəllər daha çox kitab yazılmasında istifadə olunmuş, sonralar isə bu sənətdən memarlıqda istifadə edilməyə başlanmışdır. Görkəmli Azərbaycan xəttatlarından Mübarək şah Zərrinqələm Təbrizi, Şeyx Əhməd Sührəvərdi, Xacə Mir Əli ibn İlyas Təbrizi, Cəfər Təbrizi və bu kimi digər istedadlı xəttatlar bu sənətin inkişafında xüsusi rol oynamışlar.

Böyük Azərbaycan şairi və dramaturqu Hüseyn Cavidin anadan olmasının 130 illiyi qardaş Türkiyə Respublikasının paytaxtı Ankara və ölkənin ən böyük şəhəri İstanbulda da qeyd ediləcəkdir. TÜRKSOY (Türk Kültür və Sanatları Ortak Yönetimi) səviyyəsində təşkil olunacaq yubiley tədbirlərində Cəlil Məmmədquluzadə adına Naxçıvan Dövlət Musiqili Dram Teatrının da kollektivi iştirak edəcəkdir. Mənzil qərargahı Türkiyə Respublikasının paytaxtı Ankara şəhərində yerləşən TÜRKSOY-un dəvəti ilə dekabrın 22-də bu ölkəyə yola düşən teatr ayın 24-də Ankarada, 26-da isə İstanbulda böyük dramaturqumuzun “İblis” əsərini türkiyəli teatrsevərlərə təqdim edəcəkdir. Tamaşada Azərbaycan Respublikasının xalq artistləri Rza Xudiyev, Həsən Ağasoy, Azərbaycan Respublikasının əməkdar artistləri Xəlil Hüseynov, Elmira Kərimova, Vidadi Rəcəbli, Naxçıvan Muxtar Respublikasının əməkdar artistləri Günay Qurban­ova, Əbülfəz İmanov və başqaları rol almışlar. Tamaşanın rejissoru Azərbaycan Respublikasının xalq artisti Kamran Quliyev, bəstəkarı və musiqi tərtibatçısı Naxçıvan Muxtar Respublikasının əməkdar incəsənət xadimi Şəmsəddin Qasım­ov, quruluşçu rəssamı Naxçıvan Muxtar Respublikasının əməkdar rəssamı Əbülfəz Axundovdur.

Əli RZAYEV

Doğrusu, növbəti müsahibimizin o olduğunu biləndə, Baş redaktorumuzdan “Azərbaycanın Levitanı” adlandırılan Şəmistan Əlizamanlıdan müsahibə götürməyi mənə həvalə etməsini istədim. Onun ifa etdiyi mahnılar, xüsusilə “Əsgər Vətən əmanəti” mahnısı əsgərlik illərimizin ən sevimli mahnısı idi. Hər bazar günü istirahət vaxtlarında dinlədiyimiz bu mahnının ifaçısının bir gün müsahibim olacağını isə heç zaman düşünməmişdim. Naxçıvanlı gənclər qarşısında verdiyi konsertdə səmimi ifası, qəlbləri riqqətə gətirən və bizi qələbəyə səsləyən səsi, zaldan ona ünvanlanan alqışların sədası qulağımdan getməmiş artıq onunla redaksiyamızda üz-üzəyik. Özümü təqdim edirəm. Onun isə təqdimata ehtiyacı yoxdur. Kiminə görə “Azərbaycanın Levitanı”, kiminə görə Azərbaycanın ən məşhur hərbi diktoru, kiminə görə ən yaxşı hərbi mahnıların ifaçısı, kiminə görə, sadəcə, “Cənab leytenant”ı yaddaşlara əbədi həkk etdirən Şəmistan Əlizamanlı müsahibimizdir.

– Əvvəlcə sizi mükəmməl konsert proqramı münasibətilə təbrik edirəm. Konsertdə yaşanan coşqu, həqiqətən də, biz gənclərin yaddaşından silinməyəcək. Bu gün naxçıvanlı gənclərlə birbaşa ünsiyyətdə oldunuz. Bilmək istərdik ki, Şəmistan Əlizamanlının naxçıvanlı gənclərin vətənpərvərliyi ilə bağlı təəssüratları necədir?
– Naxçıvanlı gəncləri çox fəal, çox vətənpərvər gördüm. Bunun da səbəbi burada aparılan məqsədyönlü işlərdir. Bu, vətənpərvərlik tərbiyəsinin, işinin düzgün qurulmasının nəticəsidir. Mənə məlumdur ki, Naxçıvanda belə tədbirlər tez-tez keçirilir. Əlbəttə ki, bu, Naxçıvan üçün çox vacibdir, lazımlıdır. Naxçıvan blokada vəziyyətindədir. Blokadanın çətinliklərini burada – Naxçıvanda yaşayan insanlardan daha yaxşı heç kim bilməz. Naxçıvanı qorumaq üçün hər kəs əlindən gələni edir. Ümumiyyətlə, tarixən Naxçıvan vətənpərvər bir yer olub. Tarixi vərəqləsək görərik ki, Naxçıvan həmişə mərd, igid insanları, adlı-sanlı ziyalıları ilə tanınıb. Ona görə də burada belə vətənpərvər gənclərin yetişməsi təbiidir.
– Biz bilirik ki, bu, sizin muxtar respublikaya ilk gəlişiniz deyil. Hansı fərqləri müşahidə etdiniz? Naxçıvanla bağlı təəssüratlarınız...

Naxçıvan Müəllimlər İnstitutunda görkəmli dramaturq Mirzə Fətəli Axundzadənin anadan olmasının 200 illik yubileyinə həsr olunmuş elmi-praktik konfrans keçirilmişdir.
Konfransı giriş sözü ilə açan institutun rektoru, professor Oruc Həsənli bildirmişdir ki, Mirzə Fətəli Axundzadə həyatını xalqının ma­ariflənməsinə həsr edən Azərbaycan ədəbiyyatının görkəmli nümayəndələrindən olmuşdur. Onun fəlsəfi məzmunlu bədii əsərləri, tənqidi məqalələri dünyanın bir çox dillərinə tərcümə edilmiş və böyük oxucu kütləsi tərəfindən maraqla qarşılanmışdır. Kəşməkəşli Tiflis həyatı, canişinlikdəki fəaliyyəti, dövrünün ictimai-siyasi hadisələri onun ədəbi-bədii yaradıcılığı üçün mənbə rolu oynamışdır. Bunun nəticəsidir ki, onun yaradıcılığında həyat həqiqətlərinin bədii inikası real surətdə öz əksini tapmışdır.
İnstitutun Dillər və ədəbiyyat kafedrasının dosenti, filologiya üzrə fəlsəfə doktoru Əbülfəz Əzimli “Mirzə Fətəli Axundzadənin həyat və yaradıcılığı”, tədris işləri üzrə prorektor, filologiya elmləri doktoru Akif İmanlı “Mirzə Fətəli Axundzadənin ma­arifçilik ideyaları” mövzularında məruzələrlə çıxış etmişlər.
Məruzələrdə bildirilmişdir ki, ədib yaradıcılığa “Şəbuhi” təxəllüsü ilə yazdığı şeirlə başlamışdır. Lakin M.F.Axundzadə ədəbiyyatımıza dramaturgiyanın və povest janrının banisi kimi daxil olmuşdur. Onun dramatik növdə yazdığı əsərləri o dövrün cəhalət pərdəsini cəsarətlə dağıdan ədəbi nümunələrdəndir. Axundzadə yaradıcılığı təkcə Azərbaycanın deyil, ümumilikdə, müsəlman Şərqinin maariflənməsinə, dini mövhumatın və fanatikliyin aradan qaldırılmasına xidmət edir.
Elmi-praktik konfransa Oruc Həsənli yekun vurmuşdur.

Naxçıvan Müəllimlər
İnstitutunun mətbuat xidməti

2012-ci ilin Naxçıvan Muxtar Respublikasında “Milli dəyərlər ili” elan olunması ilə əlaqədar ötən dövr ərzində muxtar respublikamızın hər yerində olduğu kimi, Babək rayonunda da milli dəyərlərin bərpası, qorunması və gələcək nəsillərə çatdırılması istiqamətində mühüm işlər görülmüşdür. Dekabrın 18-də Babək Rayon Mədəniyyət və Turizm Şöbəsində “Milli dəyərlər ili”nə həsr olunmuş tədbir keçirilmişdir.
Tədbir iştirakçıları əvvəlcə xalq sənəti, milli musiqi və mətbəx nümunələrindən, “Milli dəyərlər ili”nə həsr olunmuş kitab, jurnal və qəzetlərdən ibarət sərgiyə baxmışlar. Sərgidə istedadlı qadınların əl işlərinə də geniş yer verilmişdir. Sərgilənən əsərlərdə istər xalqımızın şərəfli qədim keçmişinə və zəngin mifologiyasına, istərsə də çağdaş mövzulara həssaslıqla toxunulmuşdur. Əsərlərdə tarixi-memarlıq abidələrimizin, qədim qalalarımızın təsviri, toxuma və tikmə işlərində üslub və rəng əlvanlığının zənginliyi, xalqımızın toy və digər mərasimlərində icra olunan adət-ənənələrimizin sənət əsərlərində əks etdirilməsi ustalıqla işlənmiş, milli keyfiyyətlərə üstünlük verilmişdir.

Görkəmli dramaturq, ədəbiyyatımızın tanınmış siması Hüseyn Cavidin ev-muzeyində Naxçıvan Şəhər Qızlar Liseyinin IX sinif şagirdlərinin iştirakı ilə “Hüseyn Cavidin dramaturgiyası” mövzusunda açıq dərs keçilmişdir. Əvvəlcə şagirdlər tanınmış söz ustadının məqbərəsini ziyarət etmişlər.
Ədibin ev-muzeyində keçilən açıq dərsdə liseyin direktoru Aidə Allahverdiyeva və liseyin Azərbaycan dili və ədəbiyyat müəllimi Ruhiyyə Məmmədova şagirdlərə Hüseyn Cavidin həyat və yaradıcılığı haqqında məlumat vermiş, görkəmli dramaturqun zəngin irsinin ölməzliyindən söhbət açmış, gözəllik və sevgi şairinin dərin zəkasından, fəlsəfi-əxlaqi düşüncələrindən danışmışlar. Qeyd etmişlər ki, belə bir zəka sahibinin əziz xatirəsinin əbədiləşdirilməsində, onun zəngin irsinin qorunub saxlanıl­masında ümummilli lider Heydər Əliyevin əvəzsiz rolu, misilsiz xidmətləri olmuşdur. 1982-ci ilin noyabr ayında məhz ulu öndərin təşəbbüsü və böyük qayğısı nəticəsində ölməz şairin nəşi uzaq Sibirdən öz doğma yurduna – Naxçıvan torpağına gətirilmiş, burada dəfn olunaraq xatirəsi əbədiləşdirilmişdir. Şairin məzarı üzərində ucaldılan möhtəşəm məqbərə də görkəmli dövlət xadiminin Hüseyn Cavid irsinə olan dərin hörmət və ehtiramının ifadəsidir.
Sonra ev-muzeyinin baş fond mühafizi Məsmə Hacıyeva şagirdləri ədibin ev-muzeyi ilə ətraflı tanış etmiş, Hüseyn Cavidin həyat və yaradıcılığı barədə geniş məlumat vermişdir.
Açıq dərsin yekununda liseyin şagirdlərinin ifasında Hüseyn Cavidin məşhur “Ana” dramından səhnələşdirilmiş bir hissə göstərilmiş, şairin şeirləri bədii qiraət olunmuşdur.

 Günay XƏLİLBƏYLİ

Müsahibimiz Naxçıvan Muxtar Respublikası Yazıçılar Birliyinin sədri Asim Yadigardır 

– Asim müəllim, bu il oktyabr ayının 19-da Naxçıvan Muxtar Respublikası Yazıçılar Birliyinin konfransı keçirildi. Konfransın keçirilməsindən iki ay ötüb. Bilmək istərdik ki, konfransda gələcək üçün hansı istiqamətlər müəyyənləşdirilib?
– İlk növbədə, bir məsələni xüsusi olaraq vurğulamaq istəyirəm ki, Naxçıvan Muxtar Respublikası Yazı­çılar Birliyinin konfransında Naxçıvan Muxtar Respublikası Ali Məclisinin Sədri cənab Vasif Talıbov proqram xarakterli çıxışında çox mühüm və ciddi məsələlərin həyata keçirilməsinin vacibliyini bir daha bizim diqqətimizə çatdırdı. Biz belə fikirləşirik ki, bu gün ədəbiyyatın qarşısında çox mühüm vəzifələr durur. Yazıçı və şairlərimiz bədii əsərlərində həyat həqiqətlərini oxuculara necə çatdırırlar, onların əsərləri bu həqiqətləri öz dolğunluğu ilə əks etdirə bilirmi? Bütün bu məsələlər konfransda müzakirə edildi. Müəyyənləşdirildi ki, muxtar respublikanın yazarları diyarımızın sosial-iqtisadi inkişafını, muxtar respublikada xüsusilə mədəniyyət sahəsində həyata keçirilən tədbirləri və onların nəticələrini bədii formada əks etdirə biləcək sanballı əsərlərin ərsəyə gəlməsinə diqqəti artırmalıdırlar. Son illər Naxçıvanda xalq yaradıcılığının, milli dəyərlərimizin bərpası, araşdırılaraq təbliğ olunması, şübhəsiz ki, ədəbiyyatımızın nəsr sahəsini əhatə edən hekayə, povest və roman janrlarında yazılacaq əsərlərin əsas ideya-məzmununu təşkil etməlidir.
Ötən beş il ərzində yazarlarımızın 300-dən çox kitabı çap olunsa da, təəssüflər olsun ki, bu kitablar bədii ədəbiyyat nümunəsi kimi oxucuların geniş rəğbətini qazana bilməyib, Azərbaycan ədəbi mühitində hadisəyə çevrilən heç bir bədii əsərimiz olmayıb.
Ali Məclisin Sədri konfransdakı çıxışı zamanı demişdir: “Bu gün qarşıya qoyulan vəzifələrin yerinə yetirilməsində yaradıcı insanların əməyinə daha çox ehtiyac duyulur. Milli və bəşəri dəyərlərin daşıyıcısı olan ədəbiyyatın fəal yaradıcı gücündən, müsbət enerjisindən insanlar həmişə olduğu kimi, bu gün də faydalana bilərlər. Düşünürük ki, buna nail olmaq üçün ədəbi prosesi, bədii yaradıcılıq işini gücləndirmək lazımdır”. Bu fikirlər bizim üçün çox qiymətlidir. Biz bundan sonra işimizi bu istiqamətdə qurmalı, ədəbiyyatın yaradıcı gücündən daha səmərəli istifadə etməliyik.
– Ali Məclisin Sədri çıxışında Yazıçılar Birliyinin bəzi üzvlərinin yaradıcılığına münasibət bildirərək demişdir: “Muxtar respublika Yazı­çılar Birliyinin bəzi üzvləri əksər hallarda sönük lirikaya üstünlük verir, yubiley və ya təqvim şeirləri yazır, ədəbiyyatın, şerin ali missiyasını yaddan çıxarırlar. Bu, bir yandan kitab çapında sərbəstlik yaradılmasından irəli gəlirsə, digər tərəfdən Yazıçılar Birliyinin zəif işinin nəticəsidir”. Sizcə, qeyd edilən bu cür ciddi nöqsanları aradan qaldırmaq üçün nə etmək lazımdır?

Dünən Naxçıvan şəhərindəki “Gənclik” Mərkəzində 31 Dekabr – Dünya Azərbaycanlılarının Həmrəylik Gününə həsr olunmuş konsert proqramı keçirilib. Naxçıvan Muxtar Respublikası Gənclər və İdman Nazirliyinin və YAP Naxçıvan Muxtar Respublika Təşkilatının Heydər Əliyev adına Gənc­lər Birliyinin təşkilatçılığı ilə reallaşdırılan konsertdə hərbi-vətənpərvərlik mahnılarının mahir ifaçısı Şəmistan Əlizamanlı repertuarındakı mahnılarla çıxış edib. Tədbirdə Naxçıvan Muxtar Respublikası Gənclər və İdman Nazirliyi Aparatının Gənclərlə iş şöbəsinin baş məsləhətçisi Nicat Babayev gənclər üçün təşkil olunan konsert proqramının əhəmiyyətindən danışıb. Tanınmış jurnalist İlham Tumas isə çıxışında Naxçıvan Muxtar Respublikasında gənclərin vətənpərvərlik tərbiyəsinin yüksəldilməsinə böyük diqqət yetirildiyini bildirib.
Qeyd edək ki, Şəmistan Əlizamanlı maraqlı ifaları ilə 400-dən çox gəncin və müxtəlif təşkilatların nümayəndələrinin iştirak etdikləri konserti rövnəqləndirib. Onun oxuduğu “Çağırır Vətən”, “İgid əsgər, möhkəm dayan”, “Vətən əmanəti”, “Öncə Vətəndir”, “Can Azərbaycan”, “Cənab leytenant”, “Çırpınırdın, Qara dəniz” və sair mahnılar alqışlarla qarşılanıb. Konsert pro­qramının sonunda Heydər Əliyev adına Hərbi Liseyin kursantı Coşqun Şəmmədov çıxış edərək bildirib ki, bu cür konsertlərin keçirilməsi gənc­lərdə fədakarlıq, qəhrəmanlıq və məğlubedilməzlik hisslərini yüksəldir, vətənpərvərlik duyğularını gücləndirir.
 Konsertin sonunda Şəmistan Əlizamanlı ilk dəfə olaraq Naxçıvana həsr etdiyi mahnını səsləndirib.

Naxçıvan Muxtar Respublikası
Gənclər və İdman Nazirliyinin mətbuat xidməti

  “Şərq qapısı” qəzetinin redaksiyasında yeni saytın təqdimat mərasimi keçirilib.
 “Şərq qapısı” qəzetinin Baş redaktoru Tural Səfərov bildirib ki, muxtar respublikamızda gedən ictimai-siyasi prosesləri ictimaiyyətə operativ və qərəzsiz şəkildə çatdıran, Naxçıvan Muxtar Respublikasının iqtisadi inkişafı və tərəqqisinin əsas təbliğatçısına çevrilən, oxucularına məlumat çatdırmaqla yanaşı, həm də vətənpərvərlik və Azərbaycan dövlətçiliyinə sədaqət ruhu aşılayan “Şərq qapısı” qəzeti müasir tariximizin salnaməçisidir. Naxçıvan Muxtar Respublikası Ali Məclisi Sədrinin “Naxçıvan Muxtar Respublikasında dövlət mətbuat orqanlarının maddi-texniki vəziyyətini yaxşılaşdırmaq tədbirləri haqqında” 2000-ci il 29 mart tarixli Sərəncamından sonra özünün yeni inkişaf mərhələsinə qədəm qoyan qəzetin maddi-texniki bazası gücləndirilib, 2010-cu il iyulun 22-də – Milli Mətbuat Günündə isə böyük dövlət qayğısının bariz ifadəsi kimi qəzet redaksiyası üçün yeni bina istifadəyə verilib, qəzetin rəngli nəşrinə başlanılıb. Qeyd olunub ki, müasir texnologiya əsrinin ən əsas xüsusiyyətlərindən biri də insanlara məlumatları daha qısa zaman ərzində informasiya texnologiyaları vasitəsilə istənilən məkanda əldə etmək imkanını təmin etməsidir. Bu həm də informasiya vasitələrinin məlumatları daha geniş oxucu kütləsinə çatdırması deməkdir. Məhz bu amillər nəzərə alınaraq bu günlərdə “Şərq qapısı” qəzetinin yeni internet saytı hazırlanıb.
  Təqdimat mərasimində qəzetin əməkdaşı Elnur Kəlbizadə sayt haqqında ətraflı məlumat verib. Bildirib ki, artıq oxucular dünyanın istənilən nöqtəsindən, istənilən vaxt www.serqqapisi.az internet ünvanına daxil olmaqla “Şərq qapısı” qəzetini oxuya biləcəklər. Əsas menyusunda ana səhifə, rəsmi xronika, ictimai-siyasi, iqtisadiyyat, humanitar, idman, əlaqə və elanlar bölmələrinin yer aldığı yeni saytda qəzetin tarixi barədə məlumat, “Göy qurşağı” və “Tarix” əlavələri üçün xüsusi bölmələr də müəyyənləşdirilib. Humanitar bölmə daxilində elm və təhsil, mədəniyyət, turizm, səhiyyə, sosial yarımbölmələri var. Saytın əsas xüsusiyyətlərindən biri oxucuların, kənar müəlliflərin qəzetlə əməkdaşlığını təmin edəcək əlaqə bölməsinin yaradılmasıdır. Əlaqə bölməsində qəzetin ünvanı, elektron poçtu, əlaqə telefonları yerləşdirilib. Qəzetlə əməkdaşlıq edənlər öz məktub və məqalələrini asanlıqla elektron poçta göndərə biləcəklər. Eyni zamanda muxtar respublika ərazisinin internetlə tam əhatə olunması oxucuların qəzetin gündə­lik nömrələrini asanlıqla izləməsinə imkan yaradır. İnternet ünvanına daxil olan oxucular informasiyaları bölmələr üzrə seçməklə yanaşı, həm də təqvim cədvəlində istənilən tarixə olan məlumatlarla tanış ola bilərlər. Fotoqalereya hissəsində isə muxtar respublikadakı inkişaf proseslərinə, Naxçıvanın qədim tarixi abidələrinə, turizm-istirahət zonalarına aid rəngarəng fotoşəkillər yer alır. “Şərq qapısı” qəzetinin yeni saytındakı linklər bölməsindəki müvafiq bannerlər vasitəsi ilə oxucular digər faydalı internet resurslarına da keçid edə bilərlər. Bu informasiya resursu vasitəsilə qəzetin elektron versiyasını gündəlik olaraq əldə etmək də olar. Belə ki, saytda qəzetin gündəlik olaraq çapdan çıxan nömrələri “pdf” formatında yerləşdirilir. Beləliklə, istənilən oxucu nəinki qəzeti bu sayt vasitəsi ilə olduğu kimi oxuya bilər, eyni zamanda müvafiq nömrələri kompyuterinə yükləyə də bilər. İnternet saytı gündə­lik olaraq yenilənməklə daimi informasiya axınını təmin edəcək və muxtar respublikamız haqqında həqiqətlərin daha geniş miqyasda – qlobal informasiya məkanında təbliğinə şərait yaradacaq.
Tədbirdə çıxış edənlər “Şərq qapısı” qəzetinin yeni saytının yaradılmasının əhəmiyyətini vurğulamış, qəzetin kollektivinə gələcək fəaliyyətlərində uğurlar arzulamışlar.

“Şərq qapısı”

    Naxçıvan Mətbuat Şurası tərəfindən elan edilmiş “Milli dəyərlərimizi qoruyaq və yaşadaq” mövzusundakı müsabiqənin qalibləri mükafatlandırılıblar.
  “Şərq qapısı” qəzeti redaksiyasının akt zalında keçirilən tədbirdə çıxış edən Naxçıvan Mətbuat Şurasının sədri Rövşən Hüseynov bildirib ki, 2012-ci il Naxçıvan Muxtar     Respublikasında “Milli dəyərlər ili” elan olunub. Ötən dövr ərzində milli dəyərlərin bərpası, qorunması və gələcək nəsillərə çatdırılması istiqamətində mühüm işlər görülüb. Bu işlər sırasında Naxçıvan Mətbuat Şurası tərəfindən elan edilmiş “Milli dəyərlərimizi qoruyaq və yaşadaq” mövzusundakı müsabiqə də mühüm rol oynayır. İyul ayının 20-dən sentyabr ayının 20-dək davam edən müsabiqəyə muxtar respublikamızın kütləvi informasiya vasitələrinin əməkdaşları mövzu ilə bağlı bir sıra məqalələr və tele-radio verilişləri təqdim ediblər. Müsabiqənin şərtlərinə əsasən, araşdırma xarakterli materiallara üstünlük verilib.

   Sonra müsabiqənin qaliblərinə – “Unudulmuş “Sarı gəlin” yallısı” məqaləsi ilə birinci yeri tutmuş “Şərq qapısı” qəzetinin əməkdaşı Sara Əzimovaya, “Sənət inciləri” televiziya verilişi ilə ikinci yeri tutmuş Naxçıvan Muxtar Respublikası Dövlət Televiziya və Radio Verilişləri Komitəsinin əməkdaşı İradə Quliyevaya və “Milli varlığımızı möhürləyən dəyər – Azərbaycan dili” yazısı ilə üçüncü yeri tutmuş “Arazın səsi” qəzetinin əməkdaşı Gülzadə İsmayılovaya diplom və pul mükafatları təqdim edilib. Müsabiqədə fərqləndiklərinə görə “Yeni həyat” qəzetinin əməkdaşı Zülfiyyə İsmayıl və “Naxçıvanın səsi” radiosunun əməkdaşı Səadət Talıbova Mətbuat Şurasının fəxri fərmanlarına layiq görülüblər.

   Naxçıvan Muxtar Respublikası Ali Məclisi Aparatının Mətbuat və ictimaiyyətlə əlaqələr şöbəsinin müdiri Sahil Tahirli, Naxçıvan Mətbuat Şurası idarə heyətinin üzvü Tural Səfərov qalibləri təbrik edib, onlara gələcək fəaliyyətlərində uğurlar arzulayıblar.

   Tədbirdə gələcəkdə də belə müsabiqələrin keçirilməsinin vacibliyi vurğulanıb.

Xəbərlər şöbəsi

Dünən Naxçıvan şəhərindəki “Gənclik” Mərkəzində keçirilən tədbir qədim milli dəyərlərimizdən olan aşıq sənətinə həsr edilmişdi. Tədbiri giriş sözü ilə Naxçıvan Şəhər Mədəniyyət və Turizm Şöbəsinin müdiri İmamqulu Əhmədov açıb, milli dəyərlərimizə göstərilən dövlət qayğısından, aşıq sənətinin böyüməkdə olan gənc nəslə təbliğ edilməsinin əhəmiyyətindən danışıb. Sonra saz-söz ustadı Aşıq Ələsgər haqqında sənədli film nümayiş etdirilib.

    Naxçıvan Şəhər 2 nömrəli Uşaq Musiqi Məktəbinin direktoru, sənətşünaslıq üzrə fəlsəfə doktoru, dosent Natəvan Qədimova aşıq sənətinin, Naxçıvan aşıq sənəti mühitinin yaranma və inkişaf tarixindən, bu sənətin yaşadılması və təbliği istiqamətində görülən işlərdən danışıb.

            Qeyd olunub ki, Azərbaycan xalqının yaradıcılıq istiqamətlərindən biri də çoxəsrlik aşıq musiqisində təzahür olunur. Bu, xalqın fəlsəfi mədəniyyətinin formalaşdığı xüsusi bədii təfəkkür sahəsidir.  Aşıq sənətində poeziya, musiqi, rəqs, ifaçılıq sənəti sintez şəklində özünü göstərir. Aşıq musiqisi, aşıq insanın dəyərlərini, əməllərini tərənnüm edir və bundan ilham alır. Aşıq sənətinin əsas mövzuları məhəbbət və təbiət gözəlliyi, insan və onun əməlləridir. Özü də bu yaradıcılıq prosesi sintez, yəni teatrlaşdırılmış şəkildə improvizator aşıq tərəfindən sazda ifa ilə təqdim olunur.

Tarixən sənət adamları  Şərur torpağını  yallıların beşiyi adlandırıblar. Bir vaxtlar burada yallının 100-dən artıq növü olub. Onlar toy mərasimlərində, el şənliklərində yaşadılıb. Yallı təkcə musiqi və rəqs növü deyil. O, qədim oğuz-türk tarixinin başlıca möhürlərindən biri olmaqla yanaşı, xalqımızın həm də bugünkü varlığıdır.

            Muxtar respublikada yallılarımızın yaşadılması, tədqiqi və təbliği istiqamətində həyata keçirilən tədbirlər də təqdirəlayiqdir. 2012-ci ilin muxtar respublikamızda “Milli dəyərlər ili” elan olunması ilə əlaqədar olaraq, Naxçıvan Muxtar Respublikası Mədəniyyət və Turizm Nazirliyinin, Naxçıvan Muxtar Respublikası Dövlət Televiziya və Radio Verilişləri Komitəsinin birgə layihəsi ilə hazırlanan “Yallı” kompakt-diski  də yallılarımızın təbliği və yaşadılması, gələcək nəsillərə ötürülməsi baxımından mühüm və əlamətdar bir hadisədir.

            Kompakt-diskdə “Şərur” Xalq Yallı Ansamblının, “Nurani” Yallı Ansamblının, “Şərur qönçələri” Yallı Ansamblının ifasında 14 yallı rəqsi yerləşdirilib. Diskin üz qabığında nəfis tərtibatla işlənmiş buklet də bu işin araya-ərsəyə gətirilməsinə göstərilən xüsusi diqqətdən xəbər verir.

Ölkəmizin zəngin incəsənət nümunələri içərisində dekorativ-tətbiqi sənətin ən geniş yayılmış növlərindən biri olan tikmə sənətinin xüsusi rolu vardır. Xalqımız hələ qədimlərdən məişətdə önəmli yer tutan, texnika və kompozisiya quruluşuna görə bir-birindən fərqlənən zərif görünüşlü bədii tikmələrdən istifadə etmişdir. Əsasən, milli geyim nümunələrimizin, örtüklərin, pərdələrin və digər məişət əşyalarının bəzədilməsində istifadə olunan bu zəngin tikmələr ornamentlərinin zənginliyi və müxtəlifliyi ilə hər zaman seçilmiş, fərqlənmiş, bu günə qədər gəlib çatmışdır ki, bu da xalqımızın öz keçmişinə olan diqqət və ehtiramının ifadəsi kimi diqqəti çəkir. 

             Sevindirici haldır ki, bu qədim el sənətinin yaşadılması üçün bu gün də bir sıra əhəmiyyətli addımlar atılır. Belə təqdirəlayiq addımlardan biri də “Naxçıvan tikmələri” adlı kitabın işıq üzü görməsidir. “Əcəmi” Nəşriyyat-Poliqrafiya Birliyində çap olunmuş “Naxçıvan tikmələri” kitabında qədim tikmə sənətimiz barədə, tikmə sənətimizin müxtəlif növlərindən güləbətin, təkəlduz, doldurma, saya naxışlı bədii tikmə, muncuqlu tikmə, pilək, qurama, cülmə, oturtma, cinağı, basmanaxış, şəbəkə, düymələmə və başqa tikmə növləri haqqında geniş məlumat verilmişdir.

   “Azərbaycan qədim tarixə, mədəniyyətə, gözəl təbiətə, böyük iqtisadi potensiala və eyni zamanda rəngarəng ecazkar mətbəxə malik ölkədir”. “Əcəmi” Nəşriyyat-Poliqrafiya Birliyində nəfis şəkildə işıq üzü görmüş “Naxçıvan mətbəxi” adlı kitab  ümummilli liderimiz Heydər Əliyevin bu sözləri ilə açılır. 2012-ci il – “Milli dəyərlər ili”nə layiqli töhfə olan bu kitab Naxçıvan mətbəxinin öyrənilməsində böyük əhəmiyyətə malikdir.

Kitab boyu oxucu Naxçıvan ərazisində aşkar olunmuş gil ocaq qurğusu, kələ-kötür divarlı qazan, çölmək tipli qab qırıntılarından, keramika məmulatlarından, dulusçuluq nümunələrindən tutmuş bu gün mətbəximizdə işlədilən avadanlıqlarla, Naxçıvanın uzun inkişaf yolu keçmiş milli mətbəx mədəniyyəti ilə tanış olur.

            “Naxçıvan mətbəxi” “Giriş”lə birlikdə 34 bölmədən ibarətdir. “Naxçıvan duzu”, “Qida kimi istifadə edilən mədəni və yabanı bitkilər”, “Naxçıvan Muxtar Respublikasında bitən meyvələr”, “Süd mətbəxi”, “Duru xörəklər”, “Quru xörəklər”, “Salat, qəlyanaltı və məzələr”, “Şərbətlər”, “Şirniyyatlar”, “Mürəbbələr”, “Turşular”, “Ocaqlar” və başqa bölmələrdə verilən məlumatlar ensiklopedik xarakter daşıyır. Sadə və anlaşıqlı dildə yazılan kitabda Naxçıvan mətbəxinin unudulmaqda olan kulinariya nümunələri də verilib. Bu da həmin yeməklərin yenidən mətbəxlərimizə gətirilməsində mühüm əhəmiyyət daşıyır. Kulinariyamıza böyük diqqətin ifadəsi kimi “Naxçıvan mətbəxi”nin 1500 tirajla nəşr olunması geniş oxucu kütləsinin də marağının nəzərə alınması deməkdir.

İctimai-siyasi, ədəbi-bədii, elmi-publisistik jurnal olan “Naxçıvan” jurnalının işıq üzü görmüş 25-ci nömrəsi muxtar respublikada elan edilmiş “Milli dəyərlər ili”nə həsr olunmuşdur. Jurnal xalqımızın ümummilli lideri Heydər Əliyevin aşağıdakı müdrik kəlamı ilə açılır: “Milli dəyərlər qorunmalıdır, milli dəyərlər bizim varlığımızın əsasıdır. Milli dəyərlər insanın kamilləşməsi, şəxsiyyətin formalaşması üçün milli mentalitetdən qida alaraq zaman-zaman bütün əxlaqi keyfiyyətləri özündə toplayaraq cəmiyyətə vəsiqə alır. Hər xalqın öz adət-ənənəsi var, öz milli dəyərləri var. Biz öz milli dəyərlərimiz, adət-ənənələrimizlə fəxr edirik”.

            Topluda akademik İsmayıl Hacı­yevin, akademik İsa Həbibbəylinin, professor Hacıfəxrəddin Səfərlinin, AMEA-nın müxbir üzvü Əbülfəz Quliyevin, Heydər Əliyev Muzeyinin direktoru Ramil Oruc­əliyevin, professor Məhərrəm Cəfərlinin, AMEA-nın müxbir üzvü Hacı Qadir Qədirzadənin, filologiya elmləri doktoru Adil Bağırovun və başqalarının ictimai-siyasi, ədəbi-bədii və elmi-publisistik məqalələri nəşr edilmişdir.

            Jurnalda ulu öndər Heydər Əliyevin xalqımızın milli dəyərlərinin bərpa olunması və yaşadılması istiqamətində yorulmaz fəaliyyətindən danışılmış, milli dövlət quruculuğunda milli dəyərlərimizin qorunması, dövlətçiliyimizin əbədi olması üçünsə bu dəyərlərimizin gələcək nəsillərə aşılanmasının vacibliyi məsələləri və ümumxalq ideologiyasına çevrilmiş Azərbaycançılıq ideologiyasının milli dəyərlər kontekstində təhlili təqdim olunmuşdur.

Dördüncü çağırış Naxçıvan Muxtar Respublikası Ali       Məclisinin dördüncü sessiyasında Naxçıvan Muxtar Respublikası Ali Məclisinin Sədri cənab Vasif Talıbov 2012-ci ili muxtar respublikamızda “Milli dəyərlər ili” elan etmişdir. “Milli dəyərlər ili”ndə muxtar respublikamızda həyata keçirilən tədbirlərin miqyası və əhatə dairəsi daha da genişlənmiş, milli dəyərlərin bərpası, qorunması və gələcək nəsillərə çatdırılması ilə bağlı əvvəlki illərdən başlanmış tədbirlərə diqqət daha da artırılmışdır.

     Muxtar respublikada “Milli dəyərlər ili” ilə bağlı hazır­lanmış Tədbirlər Planının icrası istiqamətində aidiyyəti dövlət qurumları tərəfindən bir sıra işlər görülmüşdür. Ötən müddətdə milli adət-ənənələri, milli mətbəxi və tətbiqi sənət nümunələrini özündə əks etdirən kitablar hazırlanıb nəşr etdirilmiş, muxtar respublikanın şəhər və rayonları üzrə mədəni-maarif işçilərinin “Milli dəyərlər ili”nə həsr olunmuş zona müşavirələri keçirilmişdir.  Bundan başqa, “Ozan” yaradıcılıq studiyasının “Sazçı qızlar” ansamblının Şahbuz, Şərur, Culfa və Ordubad rayonlarında çıxışları təşkil olunmuş, ansambla 15 gənc qız cəlb olunmuşdur. Cari ilin mart ayında Naxçıvan Dövlət Xalça Muzeyində “Azərbaycan xalçaları: Naxçıvan qrupu” adlı kitabın təqdimat mərasimi keçirilmiş, sərgilər təşkil olunmuşdur.

Ulu öndər Heydər ƏLİYЕV:  Biz öz milli dəyərlərimizlə fəxr etməliyik. Bizim milli dəyərlərimiz əsrlər boyu xalqımızın həyatında, yaşayışında formalaşıbdır. Milli dəyərləri olmayan millət həqiqi millət, həqiqi xalq ola bilməz... Biz heç vaxt öz milli dəyərlərimizi unutmamalıyıq. Onu yaşatmaq, ondan bəhrələnmək, ruhlanmaq həyatımızın əsas istiqaməti, gələcək işlərimizin zəmanətidir.

 Qədim dövlətçilik tarixinə malik olan Azərbaycan xalqı hər zaman milli dəyərlərinə sadiq qalaraq bu dəyərləri əsrlərlə yaşatmış və inkişaf etdirmişdir. Milli dəyərlərimizin qorunması və gələcək nəsillərə çatdırılması bu gün də öz aktuallığını qoruyub saxlayır. Çünki milli dəyərlərimizin Azərbaycan xalqının formalaşmasına təsiri böyük olduğu kimi, milli dövlətçiliyimizin möhkəmləndirilməsində də xüsusi rolu vardır.

            Milli dəyərlərimizə, adət-ənənələrimizə biganə münasibət gələcəyimiz üçün yaxşı heç nə vəd etmir. Tarixdən məlumdur ki, öz soykökünə, tarixinə, milli dəyərlərinə, inanclarına dönük çıxan millətlər və dövlətlər müəyyən zaman kəsiyində “əriyib” yox olmuş və tarix səhnəsindən birdəfəlik silinmişlər. Hər hansı bir xalqı, dövləti məhv etmək üçün onu milli dəyərlərindən ayırmaq kifayətdir.

İctimai-siyasi, ədəbi-bədii, elmi-publisistik jurnal olan “Naxçıvan” jurnalının çapdan çıxmış budəfəki – 25-ci nömrəsi muxtar respublikada elan edilmiş “Milli dəyərlər ili”nə həsr olunmuşdur. İlk səhifəsində xalqımızın ümummilli lideri Heydər Əliyevin milli dəyərlərimiz haqqında müdrik kəlamları əks olunmuş topluda akademik İsmayıl Hacıyevin, akademik İsa Həbibbəylinin, professor Hacıfəxrəddin Səfərlinin, AMEA-nın müxbir üzvü Əbülfəz Quliyevin, Heydər Əliyev Muzeyinin direktoru Ramil Oruc­əliyevin, professor Məhərrəm Cəfərlinin, AMEA-nın müxbir üzvü Hacı Qadir Qədirzadənin, filologiya elmləri doktoru Adil Bağırovun və başqalarının ictimai-siyasi, ədəbi-bədii və elmi-publisistik məqalələri nəşr edilmişdir.

            Jurnalda ulu öndər Heydər     Əliyevin xalqımızın milli dəyərlərinin bərpa olunması və yaşadılması istiqamətində yorulmaz fəaliyyətindən danışılmış, milli dövlət quruculuğunda milli dəyərlərimizin qorunması, dövlətçiliyimizin əbədi olması üçünsə bu dəyərlərimizin gələcək nəsillərə aşılanmasının vacibliyi məsələləri və ümumxalq ideologiyasına çevrilmiş Azərbaycançılıq ideologiyasının milli dəyərlər kontekstində təhlili təqdim olunmuşdur.

            Məqalələrdə ən ali milli dəyərlərimiz olan ana dili və Dövlət bayrağından, xalçatoxuma və regionun özünəməxsusluğu ilə xalçalara verilən adlardan, Novruz bayramı ənənələrindən, Naxçıvan xanlığı atributlarının milli dəyər kimi təqdimindən, dialekt və şivələrimizdə, həmçinin ədəbiyyatımızda milli dəyərlərimizin təzahüründən,