07 İyul 2022, Cümə axşamı

Naxçıvan Muxtar Respublikasında ümummilli lider Heydər Əliyevin anadan olmasının 98-ci ildönümünə həsr olunmuş "Naxçıvan-bəşəriyyətin beşiyi" V Beynəlxalq Rəsm Festivalı keçirilmişdir.

Mayın 25-də Naxçıvan şəhərindəki "Saat Meydanı" Turistik İstirahət Mərkəzində festivalda çəkilmiş əsərlərdən ibarət sərgi açılmışdır.

Naxçıvan Muxtar Respublikası Ali Məclisinin Sədri Vasif Talıbov sərginin açılışında iştirak etmişdir.

Naxçıvan Muxtar Respublikası Rəssamlar Birliyinin sədri, Azərbaycan Respublikasının Əməkdar rəssamı Ülviyyə Həmzəyeva çıxış edərək demişdir ki, muxtar respublikada rəssamlığın və təsviri sənətin inkişafı istiqamətində ardıcıl tədbirlər görülür. Ali Məclis Sədrinin Sərəncamı ilə bu il Rəssamlar Birliyinin 50 illik yubileyi qeyd olunur. Ötən dövrdə rəssamlıq sənətinin inkişafı diqqətdə saxlanılmış, ali təhsil ocaqlarında müvafiq ixtisaslar açılmış, rəssamlıq sənətinin tədrisi üçün hərtərəfli şərait yaradılmışdır. Rəssamlar Birliyi üçün yeni bina və emalatxana istifadəyə verilmiş, rəssamlardan 1-i Azərbaycan Respublikasının Xalq rəssamı, 1-i İncəsənət xadimi, 5-i Azərbaycan Respublikasının, 6-sı isə Naxçıvan Muxtar Respublikasının Əməkdar rəssamı fəxri adlarına layiq görülmüşdür. 2012-ci ildən başlayaraq "Naxçıvan-bəşəriyyətin beşiyi" Beynəlxalq Rəsm Festivalına start verilmiş, 4 beynəlxalq rəsm festivalı keçirilmişdir. Həmin festivallarda, ümumilikdə, 29 ölkədən 172 rəssamın 181 əsəri təqdim olunmuşdur. Ülviyyə Həmzəyeva göstərilən yüksək diqqət və qayğıya görə festival iştirakçıları adından Ali Məclisin Sədrinə minnətdarlıq etmişdir.

Naxçıvan Muxtar Respublikası Ali Məclisinin Sədri Vasif Talıbov festival iştirakçılarını salamlayaraq demişdir: “Naxçıvan-bəşəriyyətin beşiyi” V Beynəlxalq Rəsm Festivalı ümummilli liderimiz Heydər Əliyevin anadan olmasının 98-ci ildönümünə həsr olunmuşdur. İki ildən bir keçirilən beynəlxalq rəsm festivalı artıq ənənə halını almışdır. Dünyada pandemiyanın yayılması festivalın keçirilməsinə mane olmadı. Əvvəlki festivallarda olduğu kimi builki festivalda xarici ölkələrdən olan rəssamlar birbaşa deyil, öz əsərlərini göndərməklə iştirak ediblər.

"Festivalın keçirilməsi əlamətdar təqvimə təsadüf edir. May ayında böyük şəxsiyyət Heydər Əliyev anadan olmuşdur. Eyni zamanda bu ay təbiət oyanır, gözəlləşir", - deyən Ali Məclisin Sədri bildirmişdir ki, təbiətin bu gözəl mövsümü rəssamlar üçün geniş yaradıcılıq imkanları açır. Festivallarda çəkilən əsərlər Naxçıvanın tarixini, təbiətini, müasir inkişafını fərqli yanaşmalarla özündə əks etdirir. Hər festivaldan sonra həmin əsərlərdən ibarət kataloqlar hazırlanıb nəşr etdirilir. Bununla da festivallar tarixə çevrilir. Gələcəkdə həmin kataloqlara nəzər yetirənlər belə bir tədbirin ənənəvi şəkildə keçirildiyini görəcək və bunu davam etdirəcəklər.

Ali Məclisin Sədri festival iştirakçılarına təşəkkür etmiş, rəssamlara yaradıcılıq uğurları arzulamış və sərgiyə baxmışdır.

Bildirilmişdir ki, festivalda ölkəmizin digər bölgələrindən 18, Naxçıvan Muxtar Respublikasından isə 22 olmaqla, 40 rəssam iştirak etmişdir. Festivalda Türkiyə, İran, Rusiya, Özbəkistan, Türkmənistan və Kosovadan 23 rəssam onlayn şəkildə iştirak edərək Naxçıvana hərs olunmuş əsərlər çəkmişlər. Sərgidə rəssamların festivalda çəkdikləri 44 rəsm əsəri nümayiş olunur.

Rəssamlardan Cavid İsmayılovun "Qayıdış", Eldar Qurbanovun "Festival", Arzu Novruzovun "Zəngəzur dəhlizi", Həbibə Allahverdiyevanın "Həsrət bitdi, Naxçıvan", Səriyyə Əkbərovanın "Güllü-çiçəkli Naxçıvanım", Adil Yusifovun "Dağlar", Hökümə Məmmədlinin "Naxışlar diyarı", Həbib Allahverdiyevin "Şuşa", Ülviyyə Həmzəyevanın "Üçqardaş piri", Nəsrullah Musayevin "Naxçıvan təbiəti", Nailə Əhmədovanın "Naxçıvanın gözəlliyi", Təranə Seyidin "Qoç daşlar", İrina Eldarovanın "Laləli Naxçıvan", Qəhrəman Tağıyevin "Haçadağ", Fikrət Babayevin "Aza körpüsü" və digər əsərlər rəssamların zəngin təxəyyülünün və peşəkarlığının ifadəsinə çevrilmişdir.

Rəssamlardan Eldar Qurbanov və İrina Eldarova festivalın yüksək səviyyədə keçirilməsindən məmnunluqlarını bildirmiş, bundan sonrakı festivallarda da iştirak edəcəklərini qeyd etmişlər.

Festivalda 2012-ci ildən etibarən keçirilən “Naxçıvan-bəşəriyyətin beşiyi” Beynəlxalq Rəsm festivallarının, Naxçıvan Muxtar Respublikasının 95 illiyinə həsr olunmuş "Yurdumun rəngləri" albom-kataloqları, eləcə də müxtəlif dövrlərdə nəşr olunmuş "Bəhruz Kəngərli", "İbrahim Səfiyev" albom-kataloqları, rəssam İqbal Həsənəlizadənin Naxçıvan abidələrinin həkk olunduğu "Qoç heykəli" maketi də nümayiş olunmuşdur.

Ali Məclisin Sədri festivalda çəkilən əsərlərdən aidiyyəti üzrə muzeylərdə nümayiş etdirilməsi barədə tapşırıqlar vermişdir.

Sonda xatirə şəkli çəkdirilmişdir.


Naxçıvan Muxtar Respublikası
Ali Məclisinin mətbuat xidməti

ARXİV

İyul 2021
Be Ça Ç Ca C Ş B
28 29 30 1 2 3 4
5 6 7 8 9 10 11
12 13 14 15 16 17 18
19 20 21 22 23 24 25
26 27 28 29 30 31 1

MÜƏLLİFLƏR

KEÇİDLƏR