Naxçıvan Muxtar Respublikasının Hərbi Prokurorluğu üçün yeni binanın inşasına ötən ilin oktyabr ayından başlanılıb. Zirzəmi ilə birlikdə altı mərtəbədən ibarət olacaq binada tikinti işlərinin əsas hissəsi başa çatdırılıb. Naxçıvan Şəhər Abadlıq və Təmir-Tikinti İdarəsinin inşaatçıları öhdələrinə düşən işi vaxtında və keyfiyyətlə yerinə yetirmək üçün səylə çalışırlar.
İş icraçısı Ataş Nəbiyevdən aldığımız məlumata görə, binanın zirzəmisi maddi sübutların saxlanması üçün otaq, arxiv, anbar və digər xidməti otaqlar üçün nəzərdə tutulub. Birinci mərtəbə Təhqiqat orqanları və əsgər dustaqxanalarında qanunların icrasına nəzarət şöbəsi üçün ayrılacaq. Dövlət ittihamının müdafiəsi üzrə şöbə və dəftərxana ikinci mərtəbədə yerləşəcək. Üçüncü mərtəbədə prokurorlar, köməkçilər üçün otaqlar yaradılacaq. Binanın dördüncü mərtəbəsində prokurorluğun İstintaq şöbəsi fəaliyyət göstərəcək. Sonuncu mansardtipli mərtəbədə stajorlar, kriminalistlər üçün otaqlar olacaq. Bu mərtəbədə müşavirə zalı da yerləşəcək.
Hazırda binanın altıncı mərtəbəsində hörgü işləri həyata keçirilir, arakəsmələr işlənilir, zirzəmidə isə suvaq işlərinə başlanılıb.

Xəbərlər şöbəsi