Muxtar respublikamızda həyata keçirilən quruculuq tədbirlərinin bir qolunu da uşaq və yeniyetmələrin musiqi istedadını üzə çıxarmaq və inkişaf etdirmək üçün inşa olunan musiqi məktəblərinin binaları təşkil edir.
Son illər Naxçıvan şəhərində, rayon mərkəzlərində və kənd yaşayış məntəqələrimizdə belə yeni ünvanların sayı artmaqdadır. Bu qayğıdan Sədərək rayonuna da pay düşüb. Hazırda rayonun Sədərək kəndində uşaq musiqi məktəbi üçün yeni bina inşa olunur. Tikinti işləri Sədərək Rayon Təsərrüfathesablı Tikinti-Quraşdırma İdarəsinin kollektivinə həvalə edilib. İdarədən aldığımız məlumata görə, inşaat işlərinə aprel ayından başlanılıb. İnşaatçılara yaradılan şərait hesabına ötən müddət ərzində tikinti işlərinin böyük qismi başa çatdırılıb. Binanın çardağı qurulub.

Hazırda binanın daxilində suvaq işləri həyata keçirilir. Keyfiyyət amilinə ciddi diqqət yetirilən bina zirzəmi ilə birlikdə 3 mərtəbədən ibarətdir. Burada sinif otaqları, musiqi nəzəriyyəsi və ədəbiyyatı kabinələri, iclas zalı və digər otaqlar müəllim və şagirdlərin ixtiyarına veriləcək. Məktəbdə müxtəlif şöbələrin fəaliyyəti üçün hərtərəfli şərait yaradılacaq.
İnşaatçılar binanın nəzərdə tutulduğu vaxtda təhvil verilməsi üçün səy və bacarıqlarını əsirgəmirlər.

Xəbərlər şöbəsi