Muxtar respublikamızda sahibkarlara güzəştli kreditlərin verilməsi, müasir texnologiyaların tətbiqi, rəqabətqabiliyyətli, xüsusilə ixracyönümlü məhsulların istehsalı istiqamətində ardıcıl tədbirlər həyata keçirilir.
Naxçıvan şəhərində fəaliyyət göstərən Naxçıvan “Araz” Parket Fabriki də son illər həyata vəsiqə alan istehsal müəssisələrindəndir. Müəssisə inşaat obyektlərinin taxta və parket məmulatlarına olan tələbatının yerli istehsal hesabına ödənilməsi zərurətindən yaradılıb. Bu istehsal müəssisəsi də özəl bölməyə göstərilən dövlət qayğısından bəhrələnib. Parket fabrikinin inşa olunması, müasir texnoloji avadanlıqların alınması üçün 2010-cu ilin mart ayında Sahibkarlığa Kömək Fondundan 250 min manat dövlət maliyyə dəstəyi göstərilib. Naxçıvan şəhərində 3500 kvadratmetr torpaq sahəsi ayrılıb ki, burada da müasir layihə əsasında yeni bina inşa olunub. Fabrikdə ayrı-ayrı iş otaqları, 5 istehsal sexi, xammal və hazır məhsulların saxlanılması üçün anbar, yeməkxana və digər yardımçı otaqlar tikilib istifadəyə verilib. Müəssisədə Almaniya istehsalı olan avadanlıqlar quraşdırılıb, yüksəkkeyfiyyətli məhsul istehsal etmək üçün hər cür şərait yaradılıb.
Naxçıvan “Araz” Parket Fabrikində qurulmuş avadanlıqların gündəlik istehsal gücü 900 kvadratmetrdir. Naxçıvan Muxtar Respublikası Standartlaşdırma, Metrologiya və Patent üzrə Dövlət Komitəsi tərəfindən uyğunluq sertifikatı ilə təmin olunmuş müəssisədə hazırda tələbata uyğun müxtəlif çeşidlərdə məhsullar istehsal edilir.
2010-cu ilin iyul ayından fəaliyyətə başlayan müəssisədə parket istehsalı sahəsində 10 nəfər təcrübəli mütəxəssis çalışır. Fabrikdə işçilərin sağlamlığının mühafizəsi də diqqət mərkəzində saxlanılır. Burada xüsusi havatəmizləyici qurğu quraşdırılıb. Daxili bazarın keyfiyyətli yerli tikinti materialları ilə təmin olunması istiqamətində həyata keçirilən kompleks tədbirlər cari ildə də uğurla davam etdirilib, Naxçıvan “Araz” Parket Fabrikində plastik qapı-pəncərə istehsalı sahəsi yaradılıb. Müəssisədə Türkiyə istehsalı olan müasir texnoloji avadanlıqlar alınıb quraşdırılıb və həmin avadanlıqların idarə olunması üçün mütəxəssislər hazırlanıb. Ümumilikdə, yeni istehsal sahəsinin yaradılmasına və müasir texnoloji avadanlıqların alınmasına 120 min manat vəsait sərf olunub. Bu istehsal sahəsinin yaradılması daxili bazarı müxtəlif çeşiddə yerli inşaat materialları ilə təmin etməklə yanaşı, əhalinin məşğulluğunun artırılmasına da şərait yaradıb, ilkin olaraq 4 nəfər mütəxəssis daimi işlə təmin edilib.
Fabrikdə quraşdırılmış müasir avadanlıqlar xammalın qəbulundan tutmuş satışa çıxarılmasınadək bütün texnoloji proseslərə ciddi əməl olunmasına imkan verir. Parket istehsalı üçün lazım olan material xammal şəklində Türkiyə və Ukrayna respublikalarından alınıb gətirilir. İstehsal müəssisəsinə xammal şəklində daxil olan palıd, fıstıq və cökə ağacları ilkin olaraq emal sexində 5-8 santimetr qalınlığında kəsilib müəyyən ölçülərə salındıqdan sonra hər birinin tutumu 90 kubmetr olan 2 qurutma sexinə yığılır. Ağacın növünə uyğun olaraq, onun neçə dərəcə istilikdə və hansı müddətdə qurudulması, rütubəti və soyudulması kompüterdə proqramlaşdırılıb. Qurudulmuş parket, taxta lambirin və döşəmə taxtası yarımfabrikat halında son istehsal bölümünə daxil olur. Kompüterlə idarə olunan müasir texnoloji avadanlıqlarda taxtaların yan tərəfində şovlar açılıb hamarlanaraq növbəti mərhələdə paketlənib anbara təhvil verilir. Yaxın vaxtlarda ağac kəsimi avadanlığının alınması və yerli xammaldan səmərəli istifadə etməklə parket və taxta məmulatlarının istehsalı nəzərdə tutulur.
Müəssisədə istehsal olunan məhsullar Naxçıvan Muxtar Respublikasında, ölkəmizin paytaxtı Bakı şəhərində və ayrı-ayrı regionlarda satışa çıxarılır. Yüksək keyfiyyət göstəriciləri ilə seçilən məhsullar qiymət baxımından da istehlakçıların mənafeyinə uyğundur. Belə ki, Naxçıvan “Araz” Parket Fabrikinin istehsalı olan parketin 1 kvadratmetri, orta hesabla, 25 manata satılır.
Müəssisədə istehsal olunan məhsulların xarici bazarlara çıxarılması və tanıdılması istiqamətində işlər aparılır.
Kərəm Həsənov
