Səudiyyə Ərəbistanı Krallığının Ticarət və Sənaye naziri Tofiq Bin Fauzan Ər-Rəbiənin rəhbərlik etdiyi nümayəndə heyətinin ölkəmizə səfəri çərçivəsində Azərbaycan Respublikası İqtisadiyyat və Sənaye Nazirliyinin dəstəyi və Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə mayın 15-də Bakı şəhərindəki Heydər Əliyev Mərkəzində II Azərbaycan-Səudiyyə Ərəbistanı Biznes Forumu keçirilmişdir.
Forumda hər iki ölkədən rəsmi şəxslərlə yanaşı, kənd təsərrüfatı, sənaye, tikinti, maliyyə, İKT, logistika, turizm, konsaltinq, neft-kimya, səhiyyə və digər sahələrdə fəaliyyət göstərən 300-dən çox iş adamı iştirak etmişdir.
Biznes foruma Naxçıvan Muxtar Respublikasının nümayəndə heyəti də qatılmışdır.
Forumda Naxçıvan Muxtar Respublikası İqtisadiyyat və Sənaye Nazirliyinin İnvestisiyaların təşviqi və ixraca dəstək şöbəsinin əməkdaşı və sahibkarlıq subyektlərindən “Dekor Qrup” Məhdud Məsuliyyətli Cəmiyyətinin direktoru iştirak etmişlər.
Tədbir çərçivəsində nazirliyin əməkdaşı qida məhsullarının distribusiyası ilə məşğul olan “Alrai Food İndustries” və “Wafra Food Products” şirkətlərinin nümayəndələri ilə görüşmüşdür. Görüş zamanı muxtar respublikada istehsal olunan ixracyönümlü məhsullar, o cümlədən mineral sular və qida məhsulları haqqında məlumat verilmiş, qarşılıqlı ticarət əlaqələrinin yaradılması barədə müzakirələr aparılmışdır. Xarici qonaqlara muxtar respublikanın investisiya imkanları və ixrac potensialını əks etdirən kitab, kataloq və broşürlər təqdim olunmuşdur.
“Dekor Qrup” Məhdud Məsuliyyətli Cəmiyyətinin direktoru mebel avadanlıqlarının istehsalı ilə məşğul olan “Riyadh furniture industries” şirkətinin nümayəndəsi ilə görüşmüş və əməkdaşlıq imkanları barədə müzakirə aparılmışdır.
Biznes forum çərçivəsində hər iki ölkənin biznes və investisiya imkanlarına dair təqdimatlar edilmiş, Səudiyyə Ərəbistanından olan iş adamları arasında bir sıra ikitərəfli görüşlər keçirilmişdir.
Naxçıvan Muxtar Respublikası
İqtisadiyyat və Sənaye Nazirliyinin mətbuat xidməti
