Digər bölgələrimiz kimi, “Muxtariyyət ili”ndə Şahbuz rayonunda da quruculuq tədbirlərinin həcmi artıb, coğrafiyası xeyli genişlənib.
Ötən həftə rayon mərkəzində 2 yeni obyektin – Şahbuz şəhər 2 nömrəli tam orta məktəbi və şəhər mərkəzi binalarının açılış mərasimləri olub. Hazırda quruculuq tədbirləri daha bir neçə ünvanda davam etdirilir. Belə ünvanlardan biri Nursu kəndidir. Bu yaşayış məntəqəsində kənd məktəbinin binası yenidən qurulan obyektlər sırasındadır. İki mərtəbədən ibarət olan məktəb binası 234 şagird yerlikdir. Məktəbə 1 əlavə korpus artırılıb. Buraya kifayət qədər texnika və işçi qüvvəsi cəlb edilib. Bu isə inşaat işlərinin sürətlə və keyfiyyətlə aparılmasına imkan verib. Naxçıvan Muxtar Respublikası Dövlət Şəhərsalma və Arxitektura Komitəsinin Şahbuz Rayon İdarəsinin bir qrup inşaatçısı öhdəsinə götürdüyü quruculuq tədbirini vaxtında başa çatdırmaq üçün səyini əsirgəmir.
Digər bir obyekt kənddə fəaliyyət göstərən qurumların birgə işini təşkil etmək üçün inşa olunan kənd mərkəzidir. Adıçəkilən idarənin inşaatçıları qısa müddət ərzində 2 mərtəbədən ibarət olan, müasirtipli layihə əsasında inşa edilən binada bir çox işləri başa çatdırıblar. Mərkəzdə icra nümayəndəliyi, bələdiyyə, Yeni Azərbaycan Partiyası ərazi ilk təşkilatı, klub, kitabxana, polis sahə və baytarlıq məntəqələri fəaliyyət göstərəcək. Həmçinin mərkəzdə rabitə evi də yerləşəcəkdir.
Daha bir quruculuq tədbiri kənddə inşa olunan həkim ambulatoriyasıdır. Bu bina da 2 mərtəbədən ibarətdir. Tibb ocağında yaradılacaq şərait kənd adamlarına səhiyyə xidmətinin lazımi səviyyədə qurulmasına imkan verəcək.
Kənd sakinləri kənddə inşa olunan xidmət mərkəzini onlara göstərilən növbəti dövlət qayğısı kimi dəyərləndirirlər. Xidmət mərkəzində mağazalar, ət satışı dükanı, bərbər və gözəllik salonu fəaliyyət göstərəcək. Hazırda obyektdə son tamamlama işləri aparılır.
Naxçıvan Muxtar Respublikası Dövlət Şəhərsalma və Arxitektura Komitəsinin Babək Rayon İdarəsinin inşaatçıları isə Xalq şairi Məmməd Arazın ev-muzeyinin inşası ilə məşğuldurlar.
Ucqar bir dağ kəndində kompleks quruculuq tədbirlərinin aparılması insanların qurub-yaratmaq əzminə müsbət təsirini göstərib.
Xəbərlər şöbəsi
