Muxtar respublikada ildən-ilə miqyası artan quruculuq tədbirləri, nəticə etibarilə, regionun simasını əsaslı surətdə dəyişməkdə, şəhər, qəsəbə və kənd yaşayış məntəqələri müasirliyə qovuşmaqdadır. Abad yollar, müasir memarlıq üslubunda inşa olunmuş inzibati binalar böyük bir tarixi özündə yaşadan Naxçıvana xüsusi gözəllik bəxş edib. Sədərək rayonuna da quruculuq tədbirlərindən xeyli pay düşüb. Burada son illər aparılan genişmiqyaslı tikinti işləri müxtəlif sahələri əhatə edir.
Yaşayış məntəqələrində inşa olunan kənd və xidmət mərkəzləri, təhsil və səhiyyə ocaqları kənd əhalisinin yaşayışına, həyat tərzinə də müsbət təsir göstərir. Həmçinin rayon mərkəzi Heydərabad qəsəbəsində onlarla yeni inzibati bina, müxtəliftəyinatlı sosial obyektlər tikilərək istifadəyə verilib. Bu gün rayonda idarə, müəssisə və təşkilatların əksəriyyəti yeni binalarda fəaliyyət göstərir.
Dövlətin yüksək qayğısı sayəsində rayonun inkişaf tempi getdikcə daha da artır. 2014-cü ilin ötən dövrü ərzində həyata keçirilən tədbirlər, qazanılan uğurlar bunu bir daha sübut edir.
Rayonda tikinti-quruculuq işləri davam etdirilir. Bu tədbirlərdən rayon Təhsil Şöbəsinə, həmçinin Dövlət Torpaq və Xəritəçəkmə Komitəsinin Sədərək Rayon Şöbəsinə də pay düşüb. Heydərabad qəsəbəsində həmin qurumlar üçün ucaldılan binanın tikintisi Naxçıvan Muxtar Respublikası Dövlət Şəhərsalma və Arxitektura Komitəsinin Şərur Rayon İdarəsinin kollektivinə həvalə edilib. Bina zirzəmi ilə birlikdə dörd mərtəbədən ibarətdir.
Binanın hörgüsü qurtarıb, dam örtüyü vurulub, daxildə və fasad hissədə suvaq işləri başa çatıb, dəhlizlərə və pilləkənlərə travertin döşənib, su, elektrik, qaz və rabitə xətləri çəkilib. Hazırda pəncərələr salınır, binanın içərisində boyaq işləri aparılır, qapıların asılmasına və həyətdə abadlıq işləri aparılmasına, gülkarlıqlar, yaşıllıq zolaqları salınmasına hazırlıq görülür.
Qeyd edək ki, inşaatçılar üçün normal iş şəraiti yaradılıb. Müasirtipli layihə əsasında inşa olunan obyektdə yerli tikinti materiallarından istifadəyə üstünlük verilir, görülən işlər yüksək peşəkarlıqla və zövqoxşayan memarlıq elementlərindən istifadə edilməklə yerinə yetirilir.
Cəfər ƏLİYEV
