Naxçıvan şəhərinin siması ildən-ilə yeni tikililərin həyata vəsiqə alması ilə daha da gözəlləşir. Qədimliklə müasirliyin sintezini özündə yaşadan, Şərq memarlığının incəliklərini özündə əks etdirən müxtəliftəyinatlı binaların tikintisi və ya yenidən qurulması şəhərimizi gözəlləşdirməklə yanaşı, həm də ölkəmizin iqtisadi gücünü təcəssüm etdirir.
Naxçıvan şəhərinin Atatürk küçəsində İncəsənət Məktəbi üçün yeni bina inşa olunur. Dörd mərtəbədən ibarət olacaq binanın zirzəmi hissəsində hazırda beton-qəlib işləri aparılır. Naxçıvan Şəhər Abadlıq və Təmir-Tikinti İdarəsinin inşaatçıları tərəfindən aparılan inşaat işlərinə bu ilin may ayından başlanılıb. İş icraçısı Əmirxan Mazanovun verdiyi məlumata görə, binanın zirzəmi hissəsində qazanxana, zal, kitabxana və sinif otaqları yerləşəcək. Digər mərtəbələrdə də sinif otaqları olmaqla, ikinci mərtəbədə müəllimlər otağı, üçüncü mərtəbədə isə konsert zalı olacaq.
* * *
Naxçıvan Muxtar Respublikası Kənd Təsərrüfatı Nazirliyinin inzibati binasında işlər davam etdirilir. İstismar müddətini başa vurmuş və əsasən, daxili arakəsmələri ağac konstruksiyalardan ibarət olan binada cari ilin mart ayından əsaslı yenidənqurma işlərinə başlanılıb. Binanın daxili ağac konstruksiyaları, mərtəbələrarası tavanları tamamilə sökülərək dəmir-beton konstruksiyalarla yenidən qurulub, özül hissə isə bərkidilib. Zirzəmi ilə birlikdə 3 mərtəbədən ibarət olan binanın zirzəmi hissəsində və birinci mərtəbəsində qapı-pəncərələr salınıb, ikinci mərtəbədə isə arakəsmələrin hörgüsü davam etdirilir, çardaq hissənin qurulmasına başlanılıb. Bina hazır olduqdan sonra zirzəmi hissədə kənd təsərrüfatı muzeyi, arxiv, kitabxana və akt zalı yerləşəcək. Digər mərtəbələr isə inzibati otaqlar üçün nəzərdə tutulub.
Naxçıvan Muxtar Respublikası Dövlət Şəhərsalma və Arxitektura Komitəsinin Naxçıvan Şəhər İdarəsinin inşaatçıları tərəfindən yenidən qurulan binada yerli inşaat materiallarından istifadəyə önəm verilir, təhlükəsizlik qaydalarına ciddi əməl olunur.
Səbuhi HƏSƏNOV
