Babək qəsəbəsində yeni quruculuq ünvanlarından biri olan uşaq bağçası binasında isə tikinti işləri davam etdirilir. Uşaq bağçası binasının tikintisinə ötən ilin fevral ayından başlanılıb. İnşaat işləri “Dizayn” Məhdud Məsuliyyətli Cəmiyyətinin inşaatçıları tərəfindən aparılır. 220 yerlik nəzərdə tutulmuş uşaq bağçası zirzəmi ilə birlikdə 4 mərtəbədən ibarətdir. İş icraçısı İbrahim Hüseynovun dediyinə görə, ümumi ərazisi 1000 kvadratmetr olan binanın zirzəmi hissəsində  yeməkxana, qarderob, tibb xidməti otağı, yataqxana və oyun zalı yerləşəcək. Birinci mərtəbədə valideynlər otağı, müdiriyyət, 2-ci və 3-cü mərtəbələrin hər birində metodik kabinet olmaqla, bütün mərtəbələrdə yataqxana və oyun zalları fəaliyyət göstərəcək.
Binanın dam örtüyü vurulub, bütün dəhlizlərdə döşəmə işləri yekunlaşıb, hazırda pəncərələr salınır. Yaxın günlərdə otaqların döşəməsi vurulacaq, boyaq işlərinə başlanılacaq.
Adıçəkilən obyektin vaxtında istifadəyə verilməsi üçün inşaatçılar səylə çalışırlar.

Xəbərlər şöbəsi