Son illərdə muxtar respublikamızda uşaq musiqi məktəbləri üçün yeni-yeni binaların istifadəyə verilməsi şagirdlərin muxtar respublikada və ölkəmizdə keçirilən müxtəlif festival və müsabiqələrdə fəal iştirak etməsinə, uğur qazanmasına şərait yaradıb. Regionumuzda musiqi sənətinin inkişafı, peşəkar musiqiçilərin yetişdirilməsi, onların böyük səhnələrə çıxması istiqamətində atılan addımlar cari ildə də davam etdirilir, musiqi məktəblərinin maddi-texniki bazası gücləndirilir, gələcəyin musiqiçilərinin ən yüksək səviyyədə təhsil almasına xüsusi diqqət yetirilir.
Ötən ilin noyabr ayından yenidən qurulmasına başlanılan Naxçıvan şəhərindəki 3 nömrəli Uşaq Musiqi Məktəbi üçün nəzərdə tutulan bina da muxtar respublikamızda musiqi təhsilinə göstərilən diqqət və qayğının bariz nümunəsidir. Binanın inşası Naxçıvan Şəhər Abadlıq və Təmir-Tikinti İdarəsinin kollektivi tərəfindən həyata keçirilib. Hazırda obyektdə son tamamlama işləri görülür, həyətdə aparılan abadlıq işləri yekunlaşdırılır.

Xəbərlər şöbəsi