Muxtar respublikamızda sahibkarlıq mühitinin formalaşması, iş adamları üçün əlverişli şəraitin yaradılması istiqamətində ardıcıl və məqsədyönlü tədbirlər həyata keçirilir. Bu tədbirlər nəticəsində əhalinin ərzaq təhlükəsizliyi təmin olunub.
İllər öncə ət məhsullarına olan tələbatımızı ödəmək, dadlı-tamlı bir məhsul əldə etmək üçün muxtar respublikadan kənara çıxırdıqsa, indi buna ehtiyac yoxdur. Bu gün daxili bazarda yüksəkkeyfiyyətli yerli ət məhsulları ilə hər addımda qarşılaşmaq olar. Ət istehsalı ilə məşğul olan müəssisələrdən biri “Gəmiqaya Bərəkət Qida Məhsulları” Məhdud Məsuliyyətli Cəmiyyətidir. Dövlət qаyğısındаn bəhrələnən bu müəssisə Babək rayonunun Qoşadizə kəndi ərazisində yerləşir. Burаdа müasir layihə əsasında yеni ət məhsulları kompleksi tikilərək 2013-cü ilin may ayında istifadəyə verilib.
Ötən günlərdə “Gəmiqaya Bərəkət Qida Məhsulları” Məhdud Məsuliyyətli Cəmiyyətinin istehsal sahələrindən biri olan “Gəmiqaya Bərəkət Ət Məhsulları Kompleksi”ndə olduq. İstehsal sahəsində 14 çeşid kolbasa və sosiska istehsal edilir. Keyfiyyətli məhsul istehsalı üçün Türkiyə, Avstriya və İtaliyadan idxal edilmiş avadanlıqlar alınıb. İstehsal sahəsi gündə bir ton ət məhsulu istehsaletmə gücünə malikdir. İstifadə olunan xammalın 80 faizi yerli məhsullardandır. Bütün iri və xırdabuynuzlu heyvanların kəsimində lazımi sanitar-gigiyenik tələblərə riayət olunur.
Müəssisənin yaradılmasında başlıca məqsəd daxili bazarın yüksəkkeyfiyyətli, rəqabətədavamlı ət və ət məhsulları ilə təchiz etməkdən ibarətdir. Onun tabeliyində ət kəsim və saxlama sexi, pərakəndə satış mağazası, kolbasa istehsalı sexində, ümumilikdə, 25 nəfər çalışır. Müəssisənin daim təzə ətlə təmin olunması üçün ayrı-ayrı rayonlarda fəaliyyət göstərən fermer və fərdi sahibkarlar ilə əlaqələr yaradılıb. Muxtar respublikanın müxtəlif bölgələrində yaşayan əhalidən bazar qiymətlərinə uyğun olaraq iribuynuzlu və xırdabuynuzlu heyvanlar alınmaqla xammal tədarük edilir. Məhsullar normalara uyğun qaydada soyuducu anbarlarda mənfi 18, hazır məhsul isə müsbət 8-10 dərəcə xüsusi kameralarda saxlanılır. İstehsal edilən bütün məhsullar ölkədaxili sertifikatlar ilə təmin olunub. “Gəmiqaya Bərəkət Ət Məhsulları Kompleksi”nin dana əti istehsalı üzrə illik gücü 1500 ton, çəkilmiş ət 70 ton, quzu əti 800 ton, sümüksüz ət 700 ton, ciyər 80 ton, əla növ kolbasa 180 ton, sardelka 100 ton, sosiska 180 ton, Naxçıvan kolbasası 160 min kiloqram, servelat 70 kiloqramdır. Müəssisə rəhbəri dönər üçün ət sifarişlərini də qəbul etdiklərini bildirir. Burada gün ərzində 100 baş iribuynuzlu, 250 baş xırdabuynuzlu heyvanın kəsimini həyata keçirmək mümkündür. Müxtəlif dondurucu temperatura malik 8 soyuducu kamera yaradılıb, məhsulların ticarət mərkəzlərinə çatdırılması məqsədilə 2 ədəd soyuducu yük yeri olan nəqliyyat vasitəsi alınıb. Həmin avtomobillər vasitəsilə istehsal edilən məhsulun ayrı-ayrı ticarət obyektlərinə keyfiyyətlə çatdırılması təmin olunur.
Müasir tехnоlоji аvаdаnlıqlаr quraşdırılmış müəssisədə istehsal prosesinə mərkəzləşdirilmiş qaydada nəzarət təmin edilib. Hazırda müəssisədə müxtəlif çеşidlərdə ət və ət məhsulları, hisə vеrilmiş və bişirilmiş kоlbаsа məmulаtlаrı, eləcə də sоsiskа istеhsаl оlunur. Burada ət və ya hazır məhsul lаbоrаtоr аnаlizdən keçirildikdən sonra satışa burахılır.
“Bərəkət” əmtəə nişanı ilə satışa çıxarılan ət və ət məhsulları аlıcılаr tərəfindən rəğbətlə qаrşılаnır. Ayrı-аyrı ticаrət şirkətlərindən аlınаn sifаrişlər də dаd-tаmı ilə sеçilən bu yеrli məhsulа tələbаtın çох оlduğunu göstərir. Kompleksdə müxtəlif çeşidlərdə ət və ət məhsullarının istehsal olunması istehlakçılara seçim imkanı yaradır. Həmin məhsullar əhalinin və dövlət tərəfindən təminatı həyata keçirilən qapalı müəssisələrin tələbatını tamamilə ödəyir. Gələcəkdə müəssisədə istehsal olunan məhsulların ölkəmizin digər regionlarında satışı və xarici bazarlara çıхаrılmаsı da plаnlаşdırılır.
Müəssisədə əməkdaşların peşəkarlıq səviyyəsinin artırılması üçün seminarlar da keçirilir. Avadanlıq və cihazların işlədilməsi prosesini fasiləsiz təmin etmək məqsədilə işçi heyəti metodik vəsaitlərlə təmin edilib.
Ət məhsulları kompleksində olarkən öyrəndik ki, heyvandarlıqla məşğul olan sahibkarlar istədikləri vaxt təsərrüfatında ətlik iribuynuzlu və xırdabuynuzlu heyvanları kompleksə nağd yolla sata bilirlər. Eyni zamanda sahibkar əgər, sadəcə, kəsim üçün müraciət edibsə, kəsilən heyvanın əti müəssisədəki xüsusi maşınlarla sifarişçilərin ünvanlarına çatdırılır.
Müəssisənin nəzdində fəaliyyət göstərən firma mağazasının xidmətlərindən istifadə edən alıcı Hüseyn Səfərov deyir ki, Bakıda yaşayıram. İllər öncə hər dəfə doğma diyara gələndə burada yaşayan qohum-tanışlar oradan ət məhsulları gətirməyimi istəyirdilər. Artıq buna ehtiyac qalmayıb. Bu gün Naxçıvanda istehsal və emal olunan ət məhsulları öz dad-tamı ilə seçilir. Diyarımızın coğrafi-təbii şəraiti, iqlimi burada bütün sanitar-gigiyenik qaydalara cavab verən məhsul istehsalında başlıca amillərdən biridir.
Ət məhsulları kompleksi də istehsal və xidmət baxımından yüksək şəraitə malik bir müəssisədir. Artıq hər dəfə doğma diyarıma qonaq gələndə bu müəssisədə istehsal olunan müxtəlif çeşiddə keyfiyyətli ət və ət məhsullarından Bakıda yaşayan dost-tanışa sovqat aparıram.
Bütün bunlardan belə qənaətə gəlmək olur ki, bəhs etdiyimiz istehsal müəssisəsinin məhsullarına təkcə yerli əhali tərəfindən deyil, buraya gələn qonaqlar tərəfindən də böyük maraq göstərilir.
Ramiyyə ƏKBƏROVA
