Avropa İttifaqının maliyyə dəstəyi ilə həyata keçirilən və Azərbaycan Respublikasının İqtisadiyyat Nazirliyinin benefisiarı olduğu “Azərbaycan Respublikasında kənd yerləri və regionların inkişafına dəstək proqramı”nın icrasına texniki yardım layihəsi çərçivəsində 12-21 oktyabr 2018-ci il tarixlərdə İtaliya Respublikasına təlim səfəri təşkil olunub. Səfərdə Naxçıvan Muxtar Respublikası İqtisadiyyat Nazirliyinin Sahibkarlığın inkişafı şöbəsinin müdiri Mircavid Tağızadə də iştirak edib.
Təlim səfərində kənd təsərrüfatı üzrə Elmi-Tədqiqat İnstitutu ilə tanışlıq olub, “Şərabçılıq Kooperativləri və Assosiasiyaların fəaliyyəti” ilə bağlı mühazirələr dinlənilib.
Təlim səfərinin növbəti günlərində İtaliyanın müxtəlif şəhərlərində yerləşən şərab emalı, aqroturizmlə məşğul olan və orqanik məhsul istehsal edən iri şirkətlərə səfərlər edilib. Təlimçilərə və iştirakçılara muxtar respublikanın sosial-iqtisadi və turizm potensialını əks etdirən katoloq, jurnal, broşürlər təqdim edilib.
İtaliyada keçirilmiş təlimdə iştirakda əsas məqsəd şərab istehsalı və emalı, kooperativlərin fəaliyyəti, yerli fəaliyyət qruplarının milli, regional və yerli hakimiyyət orqanları ilə koordinasiya mexanizmləri ilə tanış olmaqdır.

Naxçıvan Muxtar Respublikası
İqtisadiyyat Nazirliyinin mətbuat xidməti