Hazırda muxtar respublikamızda taxıl biçininin ən məsul dövrüdür. Məhsul yığımında qarşıya çıxa biləcək çətinliklərin aradan qaldırılmasını təmin etmək üçün rayonlarda qərargahlar təşkil edilib. Biçin kampaniyasına kifayət qədər maşın və mexanizmlər cəlb olunub.
Taxılçılığın inkişafına böyük önəm verilən rayonlarımızdan biri Ordubaddır. Bölgənin məhsuldar və münbit torpaq sahələri burada yüksəkkeyfiyyətli taxıl istehsalına imkan verir.
Rayon İcra Hakimiyyətindən aldığımız məlumata görə, hər il taxıl əkini sahələrinin genişləndirilməsi, məhsuldarlığın artırılması istiqamətində ardıcıl tədbirlər görülür. Bu da bol məhsul istehsalına, biçin kampaniyasının vaxtında və itkisiz başa çatdırılmasına imkan verir. Kombaynçılar və mexanizatorlar yaradılan bu şəraitdən səmərəli istifadə edirlər.
Məlumatda o da bildirilir ki, rayonda 1605 payız, 73 hektar yazlıq olmaqla, ümumilikdə, 1678 hektar sahədə taxıl əkilib. Bunun 780 hektarını buğda, 898 hektarını arpa təşkil edir. 16 iyul 2018-ci il tarixə rayonda 1674 hektar sahənin taxılı tədarük olunub. 4602 ton məhsul toplanılıb. Orta məhsuldarlıq 27,5 sentner təşkil edib. Rayonun Dəstə, Vənənd, Düylün, Aşağı Əylis kəndlərində məhsuldarlıq daha yüksək olub.
Culfa Rayon İcra Hakimiyyətindən isə qəzetimizə bildirdilər ki, torpaq mülkiyyətçiləri 5 min 963 hektar sahədə payızlıq, 153 hektar sahədə isə yazlıq taxıl olmaqla, ümumilikdə, 6 min 116 hektar sahədə taxıl əkini aparıblar. Bunun 4 min 837 hektarı buğda, 1279 hektarı arpadır. İyul ayının 16-na olan məlumata görə, 6 min 47 hektar sahədə taxıl biçilib. Bunun da nəticəsində 17 min 352 ton məhsul istehsal edilən sahələrdə orta məhsuldarlıq 28,7 sentner olub. Sahələrə 20-yə yaxın kombayn çıxarılıb. Rayonun Bənəniyar, Yaycı, Ərəzin, Göydərə, Camaldın kəndlərində məhsuldarlıq yüksəkdir.
Ümumilikdə, bu il muxtar respublika üzrə 32 min 483 hektar sahədə taxıl biçini aparılacaq. İyul ayının 16-na olan məlumata görə artıq 24 min 245 hektar sahədə biçin başa çatıb. 72 min 623 ton məhsul istehsal olunub. Hektarın orta məhsuldarlığı 30 sentnerdir.
Taxıl biçini kampaniyası davam edir.
Güntac ŞAHMƏMMƏDLİ
