Muxtar respublikada 2018-ci ilin ötən dövründə suvarmanı mütəşəkkil təşkil etmək məqsədilə tədbirlər görülmüş, 35 kilometr yeni suvarma boru xətti, 3 kilometr yeni içməli su xətti çəkilmiş, 12 kilometr suvarma boru xətti, 33 kilometr içməli su xətti təmir-bərpa olunmuşdur. Kəngərli rayonunun Böyükdüz kəndi ərazisində 410 hektar sahədə qapalı suvarma şəbəkəsinin tikintisi davam etdirilmiş, müxtəlif diametrli borularla 22 min 400 metr paylayıcı boru xətti çəkilmişdir.
Sədərək rayonunda “Dəhnə” adlanan ərazidə 8 hektar sahə, Kəngərli rayonunun Böyükdüz kəndi ərazisində 39 hektar sahə hamarlanaraq əkin üçün yararlı vəziyyətə gətirilmişdir. Şoranlaşmanın qarşısını almaq məqsədilə, ümumilikdə, 563 hektar sahədə qrunt sularının səviyyəsi aşağı salınmışdır. Torpaq sahələrini sel sularının zərərli təsirindən qorumaq məqsədilə Naxçıvançay və Cəhriçayda, Qahab və Sirab selovunda, eləcə də Arpaçay vadisində selə qarşı, ümumilikdə, 24 kilometr istiqamətləndirici bənd salınmışdır. Bu dövrdə 8 kəhrizin bərpası başa çatdırılmışdır.
“Şəhər Su Təchizatı və Kanalizasiya İnvestisiya Proqramı” layihəsi çərçivəsində Babək rayonunun Şəkərabad kəndində müxtəlif diametrli borularla 16,4 kilometr içməli su xətti çəkilmiş, 576 evə su verilərək sayğac quraşdırılmış, müxtəlif diametrli borularla 15,1 kilometr kanalizasiya xətti də çəkilmiş, bütün mənzillər şəbəkəyə qoşulmuşdur. “Rayon mərkəzi və ətraf kəndlərin içməli su təchizatı və kanalizasiya sistemlərinin yenidənqurulması” layihəsi çərçivəsində Şahbuz şəhər çirkab sutəmizləyici qurğusunda tikinti işləri davam etdirilmişdir. Şərur rayonunun Yengicə kəndində müxtəlif diametrli borularla 29 kilometr su xətti çəkilmiş, 860 ev şəbəkəyə qoşulmuşdur. Ordubad rayonunda ümumi tutumu 18 min kubmetr olan 6 su anbarının tikintisi başa çatdırılmış, 18 subartezian quyusu qazılmışdır. Həmçinin Ordubad şəhərində müxtəlif diametrli borularla 73 kilometr içməli su xətti, 72 kilometr kanalizasiya xətti və anbarlar arasında 7 kilometr təzyiqli boru xətti çəkilmişdir.
Naxçıvan Muxtar Respublikası
Dövlət Meliorasiya və Su Təsərrüfatı Komitəsinin mətbuat xidməti
