22 aprel hər il dünyada Beynəlxalq Yer Kürəsi Günü kimi qeyd olunur. Yaranma tarixi XIX əsrin 40-cı illərinə təsadüf edən həmin günün qeyd olunmasında məqsəd ekoloji problemlərin aradan qaldırılması, ətraf mühitin çirklənməsinin qarşısının alınmasıdır. Hər il aprelin 22-də ölkəmizdə, eləcə də muxtar respublikamızda həmin günün mahiyyətini özündə əks etdirən tədbirlər təşkil edilir. Ötən şənbə iməciliyi isə muxtar respublikamızda Beynəlxalq Yer Kürəsi Gününə həsr olunub.
Bu məqsədlə aprelin 21-də Naxçıvan Muxtar Respublikası Gənclər və İdman Nazirliyinin, Gənclər Fondunun və Yeni Azərbaycan Partiyası Naxçıvan Muxtar Respublika Təşkilatı Heydər Əliyev adına Gənclər Birliyinin birgə təşkilatçılığı ilə keçirilən iməcilikdə nazirlik və təşkilatların əməkdaşları, eləcə də gənclər iştirak edib. Naxçıvan şəhəri ətrafında salınmış “Gənclər bağı”nda keçirilən iməcilikdə muxtar respublikada təhsil alan əcnəbi tələbələr də iştirak ediblər. Bağda əkilmiş ağaclar suvarılıb və onlara aqrotexniki qulluq göstərilib. Yüksək fəallıq müşahidə olunan iməcilikdə əcnəbi tələbələr həvəslə çalışıblar.
Həmin gün Əshabi-Kəhf ziyarətgahına gedən yolun kənarına 100 gül kolu və 150 meyvə tingi əkilib, Dövlət Yol Polisi İdarəsinin yaxınlığında yaşıllıqlara qulluq olunub.
Babək rayonunda keçirilən iməciliklərdə də rayon sakinlərinin fəal iştirakı müşahidə olunub. Onlar Naxçıvan-Şahbuz magistral yolunun kənarlarında, həmçinin Şıxmahmud, Vayxır, Xalxal, Məmmədrza Dizə və Məzrə kəndlərindəki yol kənarlarında ağaclara aqrotexniki qulluq göstəriblər.
Ordubad rayonunda keçirilən iməciliklərdə “Əylis düzü” adlanan ərazidəki qızılgül bağına qulluq göstərilib, yol kənarlarında və rayonun kəndlərindəki iməcilik ərazilərində suvarma və budama işləri aparılıb.
Culfa rayonunda keçirilən iməciliklərdə isə yaşıllıqlara aqrotexniki qulluq göstərilib, suvarma və budama işləri görülüb.
Şahbuzlular Naxçıvan-Şahbuz-Batabat magistral yolunun, həmçinin Ayrınc-Kolanı kəndləri arasındakı yolun kənarlarında yaşıllıqlara aqrotexniki qulluq göstəriblər.
İməcilik zamanı ahıl vətəndaşların həyətlərində təmizlik və səliqə-sahman işləri də aparılıb. Ümumilikdə, iməciliklərdə 15 min 119 nəfər iştirak edib.
Xəbərlər şöbəsi
