Muxtar respublikada kənd təsərrüfatının, eləcə də onun aparıcı sahələrindən olan heyvandarlığın inkişafı daim diqqət mərkəzində saxlanılır. Əhalinin sağlam və keyfiyyətli ət və süd məhsulları ilə təmin olunması sahəsində ardıcıl tədbirlər görülür, baytarlıq xidmətinin səviyyəsi yüksəldilir, epizootik vəziyyətə tam nəzarət edilir.
Dövlət Baytarlıq Xidməti tərəfindən mart ayında da ardıcıl tədbirlər həyata keçirilmişdir. Belə ki, ötən ay mərkəzi və rayon baytarlıq laboratoriyalarında bruselyoz xəstəliyinə görə 9736 qan nümunəsi, 218 patoloji nümunə, 5 adda 16 min 771 parazitar nümunə müayinələrdən keçirilmişdir. Profilaktika məqsədilə 6417 baş iribuynuzluda qarayara, 13 min 202 baş iribuynuzluda emkar, 60 min 613 baş iribuynuzluda nodulyar dermatit, 1698 baş iribuynuzluda dabaq, 13 min 362 baş xırdabuynuzluda isə bradzot xəstəliyinə qarşı peyvəndləmə tədbirləri aparılmışdır. Qeyd olunan dövrdə 319 obyektdə dezinfeksiya və dezinseksiya işləri görülmüş, baytarlıq nəzarəti altında olan obyektlərdə 23 dəfə reyd aparılmış, Sanitar-ekspertiza laboratoriyalarında 1259 nümunə orqanoleptik, bakterioskopik, toksikoloji müayinələrdən keçirilmişdir.
Ötən ay muxtar respublikada 953 baş inək və düyədə süni mayalanma aparılmış, keçən ildən mayalanmış inəklərdən 1044 baş cins buzov alınmışdır. Həmçinin yerlərdə sahibkarlarla 2 dəfə görüş təşkil edilmiş, onlara mal-qaraya qulluq, yemləmə, xəstəliklərdən qorunma və digər məsələlər barədə maarifləndirici tövsiyələr verilmişdir. Bundan başqa, 2018-ci ilin birinci rübündə muxtar respublika üzrə 1676 vətəndaşın 36 min 42 arı ailəsi qeydiyyata alınmış və baytarlıq-sanitariya pasportu (şəhadətnamə) verilmişdir.
Naxçıvan Muxtar Respublikası
Dövlət Baytarlıq Xidməti
