Muxtar respublikamızda yerli xammaldan səmərəli istifadə etməklə daxili bazarın tələbatına uyğun keyfiyyətli məhsullar istehsal edən müxtəlif təyinatlı yeni istehsal müəssisələri yaradılır və ya mütərəqqi texnologiyalar tətbiq olunmaqla fəaliyyəti dayanmış müəssisələrin işi bərpa edilir.
Tikinti materiallarına olan tələbatın ödənilməsi istiqamətində də mühüm işlər görülür, həmin materialları istehsal edən müəssisələr fəaliyyətə başlayır. Təbii ki, bu da tikinti-quraşdırma işlərinin sürətlə aparılmasına rəvac verir. Digər tərəfdən, əhalinin gəlirlərinin artması səbəbindən fərdi evlərin tikintisi və təmiri işlərinin də həcmi ilbəil genişlənir. Bu proses bazarda tikinti materiallarına olan tələbatı artırır, istehlakçılar, təbii ki, daha keyfiyyətli tikinti materiallarına üstünlük verirlər. Onu da qeyd edək ki, əvvəllər hər hansı bir tikinti materialını almaq üçün günlərlə vaxt itirmək lazım gəlirdisə, indi ən keyfiyyətli məhsulu qısa zamanda əldə etmək mümkündür. Çünki bu gün Naxçıvan şəhərində tikinti materiallarının satışı üzrə ixtisaslaşmış bir neçə ticarət mərkəzi fəaliyyət göstərir. Onlardan biri də “Gəmiqaya” Tikinti Materialları Satış Mərkəzidir.
Ötən günlərdə yolumuzu sözügedən satış mərkəzindən saldıq. İş prosesi ilə tanışlıq zamanı öyrəndik ki, bu mərkəz 2011-ci ilin yanvar ayından fəaliyyətə başlayıb. Hazırda burada tikinti materiallarının, elektrotexnika avadanlıqlarının, xalçaçılıq məmulatlarının, məişət avadanlıqlarının, müxtəlif dizaynlı mebellərin satışı həyata keçirilir. Mərkəzdə muxtar respublikada istehsal olunan məhsullar, eləcə də dünyanın bir çox ölkələrinin, o cümlədən Türkiyənin, Yaponiyanın, İsveçrənin, Fransanın, Finlandiyanın, Belçikanın məhsulları satışa çıxarılıb. Bu da alıcılara daha geniş seçim imkanları yaradıb. Burada həmin mallar 10-15 faiz ucuz qiymətlərlə təklif olunur. Satılan malların ünvanda quraşdırılması da mərkəz tərəfindən təmin edilir.
Son illər muxtar respublikada istehsal olunan yüksəkkeyfiyyətli məhsullara tələbat artıb. Bunları nəzərə alan mərkəz həmin məhsulların satışını təşkil edib. Hazırda burada Naxçıvanda istehsal olunan bir neçə adda və çeşiddə tikinti materialları istehlakçılara təqdim edilir. 30 nəfərin işlə təmin olunduğu mərkəzdə məhsulların əksəriyyəti İSO 9001 standartlarına uyğundur. Türkiyənin tanınmış boya firmalarından olan “Kale kolor”, keramika məhsulları istehsalında öndə gedən “Ege seramik”, Almaniya məişət avadanlıqları istehsalı bazarında birinci yeri tutan “Siemens” firmalarının məhsulları burada müştərilərə sərfəli qiymətlərlə təklif edilir. Yüksək zövqlə ən müasir standartlara uyğun inşa edilmiş və alıcılar üçün hərtərəfli şərait yaradılmış satış mərkəzində muxtar respublikada fəaliyyət göstərən tikinti şirkətlərinə və əhaliyə nümunəvi xidmət göstərilir.
Burada yaradılan bölmələrdən birini hamam aksesuarları və təmizlik məhsulları təşkil edir. Həmin məhsullar 30-40 faiz aşağı qiymətə satılır. Türkiyə istehsalı olan müxtəlif çeşidli kafel, metlax və yer daşları istehlakçıların seçim imkanlarını artırır. Müxtəlif alətlər, təsərrüfat, boya məhsulları, təhlükəsizlik geyimləri, cehizlik mallar və xalçalar da istehlakçıların ən çox maraq göstərdiyi məhsullardandır. Türkiyənin “Özgür aydınlatma” firması ilə bağlanmış müqavilə əsasında muxtar respublikaya gətirilən bir-birindən gözəl, yaraşıqlı çilçıraqları 50 faiz aşağı qiymətə əldə etmək mümkündür. Alıcılar burada nəfis şəkildə işlənmiş Türkiyə, İtaliya və Cənubi Koreya istehsalı olan divar kağızlarını münasib qiymətə əldə edə bilərlər. Mərkəzdə həyət evlərində istifadə edilən oturacaqların, çardaqların, elektrik dirəklərinin və işıqlı ağacların satışı da həyata keçirilir. Bağ həvəskarlarının da istəyi diqqətdən kənarda qalmayıb. Belə ki, burada ayrıca bir hissədə müxtəlif gül və bitki toxumlarının, gübrələrin satışı təşkil edilib.
Mərkəzin elektronika bölməsində istehlakçılara televizorlar, musiqi mərkəzləri, soyuducular, kondisionerlər, paltaryuyan və qabyuyan maşınları 2 il zəmanətlə təklif olunur. Bunlar dünyanın ən məşhur firmalarına məxsus məhsullardır. Elektrikli ev alətləri bölməsi də istehlakçılar tərəfindən maraqla qarşılanan bölmələrdən biridir. Burada Türkiyə Respublikasının “Borsan elektrik”, “Günsan elektrik”, Almaniyanın “Şnayder” firmalarının məhsulları təqdim edilir.
Mətbəx mebel dəstlərinin satış bölməsində olan məhsullar alıcıların arzu və istəklərinə uyğun səmərəli seçim etməyə imkan verir. Yüksək keyfiyyəti ilə seçilən bu məhsullar beynəlxalq standartlara tam uyğundur. Yataq, uşaq, qonaq otağı və yumşaq mebel dəstlərinin satışı da yüksək səviyyədə təşkil olunub. Mərkəzdə qonaqların istirahəti və uşaqların əylənməsi üçün də hərtərəfli şərait var. Bu məqsədlə xüsusi bölmələr yaradılıb. Buradakı xidmət insanların daha rahat şəkildə yüksək zövqlə seçim etmələrinə imkan verir.
Nail ƏSGƏROV
