“2012-2020-ci illərdə Azərbaycan Respublikasında üzümçülüyün inkişafına dair Dövlət Proqramı” ölkəmizdə, eləcə də muxtar respublikamızda üzümçülük sahəsində dövlət siyasətinin və strategiyasının həyata keçirilməsində mühüm rol oynayır. Adıçəkilən dövlət proqramı muxtar respublikada da üzümçülüklə məşğul olan sahibkarların fəaliyyətini gücləndirir, yeni üzümçülük təsərrüfatlarının yaradılmasına əhəmiyyətli təsir göstərir.
Bunun nəticəsində son illər muxtar respublikada yüzlərlə hektar üzüm bağları salınıb, istehsal artırılıb. İqtisadi səmərəliliyi olduqca yüksək olan üzümçülük sahəsində zəngin təcrübə əldə edən babəkli sahibkarlar da üzüm bağlarını genişləndirirlər. Didivar kəndində salınan Hüseynqulu Bədəlova məxsus üzüm bağından da bol məhsul gözlənilir.
Torpaq mülkiyyətçisinin 4 il əvvəl saldığı üzüm bağı iki hektara yaxındır. Sahibkarlığa Kömək Fondundan 26 min manat vəsait götürərək təsərrüfatı genişləndirən kənd sakini burada müxtəlif üzüm sortları yetişdirir.
Müsahibimiz qeyd etdi ki, muxtar respublikanın digər rayon və kəndlərindən, eləcə də qonşu ölkələrdən gətirilmiş sortlar məhsuldarlığı ilə seçilir. Ağ, qırmızı, sarı, qara, qəhvəyi kişmişilər, əsgəri, xəlili, kürdəşi, həmçinin bənənyari, miskalı, ağ tayfı, ağ aldərə, hənəqırna, Naxçıvan şanısı kimi məşhur yerli üzüm sortları ən gözəl seleksiya növləridir.
Təcrübəli üzümçü dedi ki, babası Hüseynqulu kişi də sovet dönəmində üzümçülüklə məşğul olub: “Torpaqların kollektiv təsərrüfatlara cəlb edilməsi zamanı bağlarımız əlimizdən alınıb. Ancaq müstəqillik illərində əlverişli sahibkarlıq mühiti, yaradılan şərait imkan verdi ki, gözəl bir bağ salım. Bu gün dövlət qayğısı sayəsində bu bağa sahib olmaq imkanı əldə etmişəm. Çalışacağam ki, gələcəkdə məhsulun həcmini artırım, bu sahəyə işçi qüvvəsi də cəlb edim”.
Üzüm bağında bol məhsul yetişdirilməsi, məhsulun yüksək keyfiyyətə malik olması belə deməyə əsas verir ki, bu sahə ilə məşğul olan digər sahibkarlarla bərabər, Hüseynqulu Bədəlov da daxili bazarın yerli üzümçülük məhsulları ilə təminatına öz töhfəsini verəcək.
Muxtar RZAZADƏ
