Son illər muxtar respublikamızda özəl bölmənin fəaliyyətinə hərtərəfli şərait yaradılıb. Bu, regionumuzun artan gücünü göstərməklə həm də insanların həyat səviyyəsinin yüksəlməsinə, yaşayış tərzinin yaxşılaşmasına imkan verib. Önəmli cəhətlərdən biri də odur ki, bu gün özəl müəssisələrin fəaliyyəti alıcı, müştəri marağına uyğun tənzimlənib və keyfiyyət amili ön planda qərarlaşır. Naxçıvan şəhərində fəaliyyət göstərən “Məişət Xidməti” Məhdud Məsuliyyətli Cəmiyyəti də çalışır ki, müştərilərini razı salsın.
Bu günlərdə cəmiyyətə gedib onların işi ilə maraqlanmaq istədim. Cəmiyyətin rəhbəri Ramin Abbasovla həmsöhbət olub öyrəndim ki, 2010-cu ildə istifadəyə verilən müəssisədə xalçaların yuyulması, parça və dəri əşyaların boyanması, pərdə və yataq dəstlərinin boyanıb ütülənməsi, yundan yorğan, döşək istehsalı, kimyəvi və quru təmizləmə, evlərin təmizlənməsi kimi sifarişlər yerinə yetirilir. Ramin Abbasov dedi ki, müəssisənin xidmətləri əvvəlcə tələbata tam cavab vermirdi. Amma cari ilin yanvar ayından yeni avadanlıqlar, keyfiyyətli yuyucu dərmanlar alınıb gətirildiyindən, həmçinin mütəxəssislər kursa göndərilib təcrübə topladıqlarından müştəriləri razı sala bilirik.

Qeyd etdiyimiz kimi, burada kimyəvi və quru təmizləmə də aparılır ki, bu prosesdə artıq bir avadanlıqdan deyil, üç yeni avadanlıqdan istifadə olunur. Bu sahənin mütəxəssisi Səkinə Eyvazovadır. O, təmizlənmiş kostyumu göstərərək: – Baxın, – deyir, yenicə alınmış kimidir. Çünki həm müasir avadanlıqda yuyulub təmizlənib, həm də yüksəkkeyfiyyətli dərmanlardan istifadə olunub. Deyir ki, təciliyuma sifarişləri 15-20 dəqiqəyə yerinə yetirilir.
Məlumat üçün bildirək ki, müəssisənin fəaliyyətindən avtomobil sahibləri də istifadə edə bilərlər. Belə ki, burada avtomobillərin içərisinin kimyəvi yuyulub təmizlənməsi də həyata keçirilir. Bundan başqa, köhnə divan-kresloların təmiri, üzlənməsi, yorğan-döşəklərin salınması, divan-kreslo və pərdələrin təmizlənməsi işləri də aparılır. Evlərin və yaxud yeni təmir olunan, tikilən obyektlərin təmizlənməsi sifarişləri də yerinə yetirilir.
Qiymətlərlə də maraqlandıq. Öyrəndik ki, xalçaların 1 kvadratmetri 2 manata, kostyum dəsti 12 manata, pencəklər 8 manata, pərdələrin 1 metri 1,5-2 manata yuyulur.

 Hafizə Əliyeva